باااك

بدت حركات الحش في الدوام والموظفات وسوالفهم،،
المقربه مني هي وحده فقط وصديقتها برضو،
لأني صديقة خالاتها أيام الكليه وممتازين هالعائله على كيف كيفي :)
المهم جابو فطور وعزموني وتكيت وبدو في الحش،
هم متعجبين من أمور من جد تستوجب التعجب.. بس استرسلو
وأنا يجيني ربو من الحش والغيبه رغم ان فيه ناس تخليني أحشهم ههههههه
المهم قلت ( الحيين سرت بين موظفاات وسار فيه محشاات وغيبه ..اخذتوها حلا )
ضحكو وهم بصراحه مو من البنات اللي ماعندهم سوالف الا الحش لكن متأذين،
وحده منهم مقدمه استقالتها خلاص طفح الكيل عندها.
البنت كويسه لكن لاحظت انها تحتاج تتعامل مع مشاكل فيها هي اذا ما وعيت لها وسيطرت عليها،
ماراح تستقر في وظيفه، وقلتها لها وامبسطت انها استمعت بحرص واتفقت مع كلامي وعجبها.

لأن واللي لازم تنتبهو له زين ( إذا كنتو بتتركو وظيفه أو مكان بسبب شخص فإنت غلطان )
في كل مكان وكل وظيفه لابد تلاقي نفس عينة هذا الشخص، للأسف مافيه مفر من هذي المشكله،
لذا نتعلم الدبلوماسيه وكيف نضبط أمورنا ونتعايش مع كل الظروف والأشخاص مادامت الوظيفه والراتب والخبره زينين ومافيهم مشاكل.



المهم البنتين ذولا نحاف من اللي يبغون يمتنون شوي فيكثرون أكل ويشترولي كوكيز وبلاوي وسندوتشات وفول وتميس ...
قلت ترا أنا بخير مو لازم أمتن معكم والله اللي عندي كافي ولازمله تنقيص ههههههههه أبتليت فيكم ياثنتين.
لما علمت أمي صاحت علي ههههههه لأني ما متنت الا بعد عيد الفطر وزعلت مني، والله ماعندي سبب مقنع ، وقتها طفشت وقلت ليه ما أستمتع بالنعم الموجوده بالسويرماركت ،، وقشيت اللي بالسوق
ضميري شكله مقدم على إجازه سنويه،، الله يرده بالسلامه في القريب العاجل .



سلااام

‏"الحب هو هديتي إلى العالم. أنا أملئ نفسي بالحب، وأرسله الى العالم.
كيف يعاملوني الأخرين هذا شأنهم. كيف أتفاعل معهم فهذا شأني."

-هالة كاظم
‏⁧‫



فعلا.. وهذا اللي متبعته في تعاملي، خصوصا السطر الثاني كامل.
لا تنسو تراجعو نعم الله فيكم وتحمدوه كل يوم عليها، والحمد ليس فقط بالكلام والدعاء،
بل بتوظيف هذه النعم فيما يرضي الله واستغلالها وعدم اهمالها .

حساب هاله كاظم سناب
halakazim
ممتازه هذي الجده

مساءكم سعيد



أيام حافله في دوامي وتعب لذيذ لحد الآن ماعدا موقف واحد، الحمد لله على كل حال،
وأحلا شي إن بنت خالو اللي أقلكم حزنت لما تزوجت وراحت توأم روحي،، هي تدرس في نفس مكان عملي، طلبت الطلاق ورجعت للعزوبيه معي ... وهي ياقلبي فرحانه مثلي بوجودنا سوا في مكان واحد،، كل شوي تجي مكتبي تبشرني بالدرجات الكامله أو أي خبر حلو والا اذا بغت مصروف أو فزعه، فرحانين بهاللمه الله يديمها.
هي تربت على يد جدتي لأن امها وابوها تفارقو من طفولتها،، وقبل كم سنه توفى خالي الله يرحمه ، وما تركت جدتي حتى لما تطلقت، رغم ان امها موجوده لكن تزورها وتقوم بواجبها وتستقر مع جدتي، هي الصقيق الصقوقي ورفيقة حياتي قبل تكبر أختي وتصف معنا طبعا ههههههه
ف فرحت لما يقولون لها الطالبات عني اني مريحه وساعدتهم يسترخون قبل امتحانهم لاني كنت مراقبه عليهم اليوم، ردت هي وقالت اي طبعا هي راحه وسعاده وكل يوم انط لها في مكتبها عشان كذا ... قلت لها أثرك تحبيني من قلب يالخفوق
قالت إي أحسك أمي معي.
للحين أنا تحت تأثير هالكلمات الحلوه .. جعل عيني ماتبكيها

هنيالنا في أقلامكم ماشاء الله لا قوة إلا بالله،،
أقلام غنيه بالإبداع اللي يغذي الروح ويبسطها !
واصلي ياتنهيده في إثارة الأقلام ومنها تزيد أبياتك اللي تزيدني شوق لقلمك أكثر وأكثر

يقولكم يابنات لا تتزوجي المعضل واللي مهتم بجسمه،
خذي الدب، لأن ابو جسم نفسه في راس خشمه من الدايت،
أما الدب إذا شافك متضايقه قال اش رايك نطلب بيتزا




أصلا الدبيين خفاف دم واذا قلتي بتسوين دايت تقدرين تقنعينه يمشي معك ع الدايت،مو مثل الباقين .. ابو جسم بينتقدك كل ما خربتي الدايت، والا الصعلوك اللي ياكل الاخضر واليابس وما يمتن، بيقول ليه ماتاكلين معي ما أحب أكل لوحدي،، انتي تتمددين وهو ماشاء الله ثابت هههههههههه

أختي الصغيرة طلعت عيني لما كانت ولازالت على نظام صحي ورياضه نوعين في اليوم، نزلت من فوق الميه والان وصلت ٧٣ ومواصله ربي يحفظها.. سارت اخصائيه غذائيه من تجربتها، وانا في حياتي ما طلعت عن الثمانين وكل شوي تجلدني تبغاني ماشيه معها
لما مشيت معها على نظامها والتمارين والكرف،، كل شوي تهزئني لاني كل ساعه اوقف ع الميزان ههههههههه
تقول ممنوع تشوفينه الا في الأسبوع مره ويفضل ماتشوفينه مره،، لان كل ماشاف الشخص الميزان وما لقى انه نزل بيحبط وبرضو الجسم يكون تغير وبان عليه الجهد والمسزان مايبان عليه الا متأخر وهي تبغاني ما اعتمد عليه،،،، ثاني شي تهزئني عليه انو كل ما طقت في راسي اخرب اخرب بس ما اكثر.. لاني انحف بسرعه الحمد لله ف أخالف،، وهي يمه كل ما قفطتني تضيع لحظة المتعه من قوة التأنيب اللي تعطيني اياه. واذا التزمت ماتعطيني الوجه الراضي طبعا.. عشان ما اتمادى
والله تصلح مدربه صارمه .

الان هي بعيد وتراسلني وتقول يالله نتحد ونستمر ومدري ايش،، قلت خليك عندك وفكيني شرك أنا في نعييم هههههههههه ناقصني اتزوجلي الدب اللي يشتريلي بيتزا ك رضوه p:



تذكرت موقف معها لما كانت دبا مررره في أمريكا. أيام ادمانها الفاست فوود والبلاوي،، أيام كانت اذا طلبت اخواني باسكن روبنز يقولون لا مافيه،، تقول لهم ( ابغى أعيش حياتي ) هههههه سارو كل ما مرو من عنده قالو تبغين تعيشين حياتك والا نكمل الطريق
المهم كنا في مقهى وقالت شوفيني أنا وزوجي.. والتفت على المكان اللي تقصده.. لقيت واحد ووحده من الاوزان الثقيله ومعاهم وجبات من مكدونالدز وخدودهم كلها سعاده ههههههههه قتلتني بالتشبيه.. سبحان من غير حالها

السلام عليكم
صباح الخيرات والمسرات


عاد الانترنت وعدت معاهو :)
كان موجود بس ثقيييييييييييييييل
تنهيده سلامة روحك وبدنك والله معقول وصلتي للبكا من المرض :(..
بس صراحه المرض طلع أبيات جنان
صح لسانكي وبدنكي وفكركي البراقي .

أما أنا لي اسبوعين لوحدي مع البابا في البيت،، ميمتي مسافره وباقي العائله متوزعين خلقه.
وقال لي عازم المحافظ وشخصيات هامه قلت مو مشكله بس مايكون غدا لاني بكون بدوامي،
صحيح ان ابويه معين وعزايم الرجال معاه ما تتعب لكن شلت هم،، وبعدين اعتذرو
كان ابويه كذا حزنان انه ما جمعهم وقال شفتي، سافرو وكنسلو كل شي،
قلت الله يفرج عليهم ويكتب أجرهم ههههههههه ضحك علي ^^"
ماتجي هالعزايم الكبيره الا وامي مسافره ، ولكن هالمره مع الدوام استثقلتها.


الا في الدوام ماسكه نادي الفنون والبارح مارسنا التظليل بالفحم واللعب بالظل والنور،
أغلبهم بدون نفس وقالو بيغيرون النادي قلت اوك روحو استكشفو باقي النوادي وتعالو بقرار اكيد،
رجعو وقالو بنبقى في الفنون هههههههه ورسمو افضل من قبل ^_


إلى اللقاء قريبا