/
\
/
\



بصالة انتظار النساء الصغيرة واللي تبعد عن غرفة الدكتورة خطوات قليلة فقط ..
قعدت هي وموضي بانتظار دورها وهم يسولفون .. : هذي متى تخلص زهقنا وهم
ماقضو من هالتحاليل ..
لفت عليها نورة اللي مزاجها اصلا ما كان رايق : وش اللي حادتس تجين معي الا اللقافة
رفعت موضي برقعها وهي مبتسمة : والله من اعرستي و ثاقلن دمتس دام هذي علومتس
لا ابعدتي عنه .. فكينا منتس ولا تجينا خلتس مع رجلتس ابرتس ..
ضحكت على كلامها وهي تحسب في يدها : بقى له ٣ ايام و يجي ياخذني .. ياموضي
والله مدري وش فيني لا صرت عنده يذبحني الشوق لكم .. واذا جيت الديرة احس اني
مابي افارقه .. الله يخليه لي " سكتت يوم شافت الممرضة جايتها مبتسمة و بيدها ورقة "
يارب اجعله خير ..
مدت لها الممرضة الفلبينية الورقة واتسعت ابتسامتها : مبروك مدام هامل " حامل "
لفو على بعضهم ثنتينهم وكل وحدة فيهم مستانسة بهالخبر .. ضمتها موضي وهي
تبارك لها : مبروك يالنوري الله يتمم لتس يارب .. ويرزقتس بالذرية الصالحة ..
مسحت دموعها اللي نزلت من فرحتها وهي تنزل برقعها على وجهها : الله يبارك
بعمرتس .. عقبال ما اشوف عيالتس وعيال عيالتس ..
رفعت يدينها للسماء وهي تضحك : امين .. الحمدلله ماهنا احد من الديرة ولا خبرتس
وصل لهم قبل لا نوصل بيتنا ..
مشو ثنتينهم ورا الممرضة اللي صرفت لها ادويتها وطلعو راجعين للبيت .. كانت
نورة تحس باحاسيس غريبة .. تختبر مشاعر لاول مرة بحياتها تجربها .. حلمها اللي
راودها من الصغر تحقق اخيرا وبتصير ام مثل ما كانت تتمنى .. اول شي طرى في
بالها كان زوجها تبيه يجي وتزف له هالخبر اللي اكيد راح يسعده .. ودها بس تشوف
علامات الفرحة على وجهه وهي تقول له هالخبر الحلو احساس عظيم يغمرها الحين
ربي جمعهم على خير و حب .. وتعلقت فيه لدرجة صارت تحس انه يقاسمها روحها
ويمكن اكثر بعد .. وهو بعد اللي كانت تحس بحبه قبل مايقول لها اللي بقلبه .. خالتها
اللي كانت دايم تقول لها انها تبي تشوف عيال طلال وتفاصيل كثيرة جميلة بانتظارها
تحس بحماس كبير لهاليوم اللي بينتشر فيه خبر حملها والكل يعرف فيه راح تفكيرها
لسما ورسيل وابو طلال بعد .. ودها تستعجل الايام وتزف لهم هالخبر الحلو وتعيش
اجمل ايام عمرها بانتظار اول مولود لها .. هالمولود اللي تعتبره ثمرة حبها له .. كل
شوي كانت تشوف موضي اللي بتسبقها لاهلها وتزف لهم الخبر وصلو للبيت وركضت
موضي قبل نورة ودخلت تبشرهم ومن اول مادخلت نورة استقبلوها بالتهاني توردت
خدودها خجل من هالاحساس اللي تعيشه الحين سلمت على امها وابوها ودخلت للغرفة
سحبت مخدة وانسدحت لها شوي تبي تريح .. ومع التفكير بهالحلم الجميل اللي تحقق
لها .. خذت لها غفوة ماتدري كم مدتها .. ماقامت الا على اصوات خواتها اللي جايين
لها للغرفة .. ومنيرة اللي واقفة عند راسها : النوري قومي رجلتس جا ..
فزت على طول من سمعت طاريه .. : تقولين الصدز يامنيرة ؟
قعدت قبالها وهي تحلف لها : والله انه جاي تو ابوي يوم يقعد في فرشتنا الا ويشوف
موتره وقال لي ادخلي البيت هذا رجل اختس جاي ..
رتبت خصلات شعرها المتناثرة .. وفكت ضفيرها اللي تعودت دايم بالديرة تسويها
وقفت عند المراية تناظر نفسها وابتسمت .. حطت يدها على قلبها : موضي علميني
الصدز طلال جا ؟ " وقبل ماترد موضي سمعت صوته وهو يسلم على ابوها .. " اي
والله هذا هو جا .. اروح له ولا انتظر لين يصوت لي ؟
سحبتها موضي من يدها تبي تجلسها : اقعدي انتي الحين شوي .. وعقب روحي اقعدي
معهم ..
جلسو هم بالداخل بالوقت اللي كان طلال جالس فيه مع ابو راكان وزوجته بعد السلام
والسؤال عن الاحوال .. تردد الف مرة قبل يقول لهم الموضوع كان يحس بتوتر كبير
لكن هو حمل امانة ولازم يبلغهم هالأمانة : والله مدري من وين ابدا كلامي .. لكن انا
جايك اليوم بخبر مو زين وان شاء الله ..
وقبل يكمل كلمته شهقت ام راكان وحطت يدها على قلبها : راكان ولدي صاير له شي
تكفى ياطلال علمني ؟
اشر لها بيده يهديها : لا يا خالتي مافيه الا العافية .. " رجع ناظر في ابو راكان اللي
بان الخوف على ملامح وجهه .. " يا خالي هو ارسلني اقول لك انك ابتليت في نفسك
وجسدك واهلك ومالك وصبرت .. واليوم ربي ابتلاك في ولدك ومايبي منك الا الصبر
حط يده على عيونه وكأنه مايبي يشوف او يسمع خبر شين عن ولده : وش اللي صاير
وقفت قلبي ..
رحم حالتهم المترقبة وتكلم على طول .. : صوب خويه بالغلط والولد توفى من وقته
والحين موقفينه ..
تعالت صوت شهقة ام راكان وصياحها مع صوت ابو راكان وهو يردد : لا حول ولا
قوة الا بالله .. لا حول ولا قوة الا بالله .. يارب لطفك وسترك " بدا يمسح على لحيته
اللي كساها الشيب وهو يشوف زوجته اللي قلبتها مناحة " قولي الحمدلله على كل حال
هذا قدر رب العالمين .. الحمدلله اللي سلمه لنا .. والله اللي خلقه ماهوب مضيعه يالله
يارب تلطف بولدي ..
بالداخل البنات يسمعون الاصوات ولا هم دارين وش الموضوع سحبت نورة جلالها
و قبل تطلع دخلت لهم امهم وهي تصيح .. مسكتها من يدها وهي مرتاعة : يمه وش
اللي صاير ؟ تكفين لا تقولين راكان صار له شي ؟
رفعت برقعها وقعدت على الارض وهي تصيح وتمسح دموعها بشيلتها .. : ياحسرتي
عليك ياولدي .. راكان بالحبس يانورة مصوبن خويه ..
وقفو الكل مذهولين من كلامها اللي قعدت تعيده عليهم و تصيح .. تسلل الخوف لقلوبهم
طلعت لابوها وطلال برا ودموعها بعيونها ومن انتبهت لشكل ابوها عرفت ان السالفة
جد .. قعدت ومسكت يد طلال : طلال احلفك بالله راكان وش اللي صاير عليه ؟
كانت تتكلم وهي ترتجف وعيونها غرقانة دموع ماكان ابد يحب يشوف الحزن بعيونها
لكن غصب عنه هو اللي جا يقول لهم هالخبر الشين : اذكري الله يانورة راكان مافيه
الا العافية وان شاء الله قضيته سهلة .. بس انتو ادعو له وان شاء الله محد بيخليه ..
ناظرت ابوها وهي تصيح : يبه علمني راكان وش بيصير عليه ؟
كان منزل راسه ومبين عليه التأثر حتى انه مو قادر يقول اي كلمة ولا هو قادر يرفع
راسه ويناظرهم .. رجعت التفتت على طلال تترجاه : طلال ؟
كانت عيونه معلقة بعيونها .. وده انه يضمها لصدره ويسكن رجفتها .. الموقف كله
موتره واللي زاد توتره اكثر صوت صياح خالته بالداخل وبناتها معاها .. : قولي ان
شاء الله خير .. انا كلمت المحامي يشوف قضيته .. وامرها بإذن الله سهل بياخذون
شهادة اخوياه وادلة الطب الجنائي واذا ثبت القتل الخطا .. نروح نتفاهم مع اهل الولد
وان شاء الله الدية امرها سهل ..
التفت لها ابوها وهو يشوف واحد من بعيد جاي لهم .. : قومي وانا ابوتس ادخلي مع
امتس وخواتتس .. وقصرن حسكن لا يطلع الرياجيل هالحين اكيد بيجوني ..
قامت على طول ودخلت للبيت وقعدت مع امها وخواتها .. ماكانت تدري وش تقول
لهم بالضبط لكن كانت تبي تهديهم كعادتها دايم بهالازمات .. : يمه طلال يقول ان شاء
الله امره سهل .. تكفين يمه ادعي له ربي يفرج كربته ويسهل له امره ولدك وتعرفينه
مايخطي على احد ابد وهذي حكمة رب العالمين .. الله اللي كاتب له هاليوم من يوم
خلقه .. ادعي له يمه دعا الوالدين مستجاب ان شاء الله انها توافق ساعة اجابة وربي
يكتب له الفرج ..
رفعت يدينها للسما وهي تردد : يالله يارب ولدي لا تخليه .. يارب انك تفرج كربته
وتفكه من السجن يارب العالمين ..
كان وضعهم جدا حزين الا انهم اشغلو وقتهم بالدعاء له .. حتى في بيت خالتهم اللي
من سمعت الاصوات بالخارج وهي حاسة انه بيت اختها فيه شي وقفت على الشباك
ماتبي تسمع وش اللي صاير .. وبنفس الوقت ودها تعرف وترتاح .. : والله انه فيهم
شي .. هالرياجيل اللي متجمعين عند عمتس وراهم علم ..
قربت هيا تناظر مع امها بخوف : يمه هذا ماهوب رجل نورة ؟
ركزت نظرها فيه وشهقت اول ما تأكدت منه : يارب تستر على بنتي لا يكون فيها
شي ؟ ولا محمد ؟ لا لا ان شاء الله مافيهم الا العافية ..
حطت يدها على فمها وهي تبي تعرف اللي فيهم وترتاح : يمه تكفين روحي شوفي
وش اللي صاير ..
قعدت مكانها محتارة ماتدري وش تسوي .. : وانا وشلون اروح لهن وهالرياجيل
برا .. جماعتي ماعلي فيهم .. بس رجل نورة شلون اطلع وهو يشوفني .. " وبعد
تفكير " ها اسمعي وانا امتس .. البسي عباتتس واطلعي من البيت روحي يسار ..
الباب مانقدر ندخل منه والرياجيل قاعدين بس روحي لم دريشة البنات وانشديهن
وش اللي صاير .. روحي وانا امتس والله ان رجليني ما يشيلني ..
كان احساسها يقول ان الامر متعلق براكان لكن كانت تكذب احساسها .. طلعت من
البيت وهي مستعجلة ماتبي احد ينتبه لها .. وجات لبيت عمها من الخلف .. وقفت
عند الشباك وطقته عليهم .. : موضي ..
موضي اللي كانت قاعدة بالصالة فزت لها على طول .. ماعرفت تخبي دموعها
وشكلها اصلا مبين عليها اثار الصياح .. وقبل تتكلم بادرتها هيا : ياويل قلبي وش
اللي صاير ياموضي ؟
جات خالتها من وراها وهي متغطية ببرقعها ماتبي هيا تنتبه لصوتها .. : ماهوب
صاير الا كل خير .. مير مانبي نورة تروح عنا ..
هزت راسها بالنفي من لمحت نظرات موضي لامها : لا .. خالتي واللي يسلمتس
علميني وش فيه .. من اللي ميت ؟
قاطعتها موضي : اعوذ بالله من هالطاري .. محد ميت بس " والتفتت على امها "
راكان صارت له مشكلة وان شاء الله بيحلونها ..
وقفو كلهم بالغرفة يناظرون هيا اللي تسمعهم وكل وحدة فيهم تهون عليها وعلى
نفسها وهم مايدرون للحين وش هي خطورة الموضوع بجد طلال من اول يهونه
لهم بس جيته هي اللي مخوفتهم .. رجعت للبيت ودموعها على خدودها .. تنفست
بصعوبة تحاول تاخذ اكبر قدر من الهوا قبل تتكلم .. واول ماوصلت شافت امها
تصيح ومشعل عندها .. عرفت انه واصلها كل شي من مشعل ودخلت هي الغرفة
تبي تقعد لحالها وماتفكر بشي غيره .. كانت صدمتها كبيرة من اللي سمعته شي
واحد كانت تتمناه بهاللحظة ودها بس تشوفه وتقول له انها راح تنتظره العمر كله
بس يرجع لها .. ماتبي الا هو ولا عمرها حلمت الا فيه .. وراح تتحمل كل ظرف
ممكن يمر عليهم .. وتكمل معاه باقي حياتها .. لاول مرة بحياتها تظهر مشاعرها
المدفونة له قدام اهلها دايم مخبية كل شعور حب بداخلها لانها تستحي تقول اللي
بقلبها بس اليوم غصب عنها فاض فيها الحزن .. اول ماشافت امها جاية جنبها ..
حطت راسها على حجرها ودفنت نفسها بحضنها واستسلمت لدموعها : يمه راكان
بيرجع لي .. ماهوب مخليني ولاني بمخليته ..
مسحت على شعرها وهي تهديها وكل اللي تتمناه انه ربي يسهل كل اموره وتعدي
هالمشكلة على خير ..
طلال قبل مايروح كلم سلمان يقول لاهله يدخلون يبي يكلم نورة ..وبعد شوي جا
له سلمان يقول له يدخل دخل وشافها واقفة في الصالة كان خشمها احمر وعيونها
متورمة من كثر الصياح .. : انا ماشي الحين .. تبين تروحين معاي ولا بتقعدين
عند اهلك ..
هزت راسها بالنفي : لا ابي اقعد معهم .. " مسكت يده تترجاه .. " تكفى يا طلال
اخوي لا تخليه طلبتك ..
ضغط على يدها يواسيها : ابشري .. ان شاء الله مانيب مخليه .. بخليك اسبوع
بعد وبجي اخذك يوم الاربعاء الجاي ان شاء الله انتبهي لنفسك ولابوك بعد تراه
يكتم بنفسه وما يتكلم .. ولا تشيلون هم راكان الله بييسر اموره ..
بعدت يدها عنه وهي تسمع صوت امها تدعي له .. ومن شافها جاية حب راسها
قبل لا يطلع : والله لو ما ارسلني لكم راكان ماجيتكم بهالاخبار الشينة .. بس ان
شاء الله ما اجيكم الاسبوع الجاي الا بالاخبار اللي تسركم .. "التفت لنورة وكأنه
يسرق صورتها للمرة الأخيرة قبل يروح .. " يالله فمان الله ..
ودعته بدموع خليط من حزن على اخوها واهلها وعلى فراق زوجها : الله يحفظك
ومشى راجع للرياض ..



/
\
/
\

/
\
/
\


في اطهر بقعة على وجه الارض وفي بيت الله الحرام وقفت لاول مرة بهالمكان
الطاهر اللي تزوره لاول مرة بحياتها .. كانت تناظر بكل شي حولها بانبهار من
الماذن الطويلة الى ساحات الحرم الواسعة .. واول مادخلو لساحة الطواف وشافت
الكعبة من بعيد دمعت عيونها .. وماقدرت تسيطر على مشاعرها قرب منها ومسك
يدها اول مادخلو في الزحمة .. وابتدو بسم الله الشوط الاول من طوافهم .. رفع يده
يأشر على جهة الحجر السود وهو يردد : بسم الله .. الله اكبر ..
رهبة حستها بقلبها وهي تشوف الناس اللي حولها والاهم من هذا انها في بيت الله
الحرام .. المكان اللي تمنت لو تشوفه مرة بس قبل موتها .. ماتذكر انه بقى احد
من اهلها واللي تعرفهم مادعت لهم كل من جا في بالها توجهت لله بخالص الدعاء
ودعت من قلب لهم .. واهم دعاء كررته برجاء انه ربي يبعد عنها شبح الماضي
بكل الامه واحزانه ويسخر لها قلب زوجها ويسخرها له ..
اول ماوصلو للركن اليماني دنق وقرب من اذنها يبيها تسمعه : رددي هالدعاء بين
الركن اليماني والحجر الاسود .. { ربنا اتنا في الدنيا حسنة وفي الاخرة حسنة وقنا
عذاب النار} ..
رددت الدعاء في كل شوط بين هذين الركنين .. واستشعرت بقوة روحانية المكان
ابتسمت وهي تشوفه يضغط على يدها يبعدون شوي عن الزحمة بما انهم في الشوط
الاخير يبون يكونون على الاطراف عشان يسهل لهم الخروج من الزحمة ..
قرب من اذنها : صلي ركعتين الطواف مع هالحريم ولا تتحركين من مكانك ابد انا
بصلي واجي اوقف لك هنا زين ؟
شيخة بتجاوب : ان شاء الله ..
وراحت في اول مكان فاضي حصلته .. كبرت وصلت ركعتين الطواف .. وقعدت
تسبح مكانها لحد ما لاح لها زول الوليد وهو يدورها بين الحريم .. قامت على طول
وراحت له .. واول ماشافها ابتسم : يالله هاتي يدك نروح نسعى ..
مسكت يده وهي مو قادرة تقاوم هالفرحة اللي فيها : بسم الله ..
واول ما بدو السعي من الصفا قرأ بصوت مسموع لها (إن الصفا والمروة من شعائر
الله فمن حج البيت أو اعتمر فلا جناح عليه أن يطوف بهما ومن تطوع خيرا فإن الله
شاكر عليم ) .. واستقبلو القبلة قبل ما يبدأون اول اشواط السعي " لا إله إلا الله والله
اكبر .. لا إله إلا الله وحده لا شريك له ، له الملك وله الحمد وهو على كل شيء قدير
لا إله إلا الله وحده ، أنجز وعده ، ونصر عبده ، وهزم الأحزاب وحده "
اتمو جميع اشواط السعي .. وقصرو شعورهم وحلو احرامهم .. قرب منها وهو يأشر
لها على مكان تصلي فيه : صلي مع هالحريم .. ومثل ماوصيتك قبل لا تتحركين الا
اذا شفتيني ..
كان ودها تصفقه على هالاوامر اللي كل شوي يقولها لها .. هي مو صغيرة او جاهلة
ماتفهم ومن قالها لها اول مرة استوعبتها .. واكيد هي بقناعتها ماراح تتحرك ابد وهي
ماتعرف وين تروح اصلا .. قعدت مع الحريم وهي تنتظر صلاة المغرب .. صوت
الاذان اللي صدح اسرى قشعريرة بجسدها تمنت كل اهلها يعيشون معاها نفس هالشعور
اللي هي تعيشه الحين .. كل احساس عظيم تختبره تمنت لهم نصيب فيه ..
بعد صلاة العشا شافته جاي يدورها وقامت له على طول .. واول مامشو طالعين من
الحرم للفندق اللي مستأجرين غرفتهم فيه .. قعدت تناظر بكل المحلات حولها بفرحة
وهي كل شوي تأشر له على شي : ابي اخذ منهن لخواتي وخواتك ولأمي وخالتي بعد
راحو لمحل اكسسورات .. وفي زاوية المحل الصغير كان جالس شايب يكتب اسماء
على بعض هالاكسسوارات .. اختارت على عددهم وقربت منه تبيه يكتب لها : ابيه
يكتب اسم نورة وموضي وحصة ومنيرة وهيا وسارة .. وخواتك امل " وبخجل "
من هي الثانية ؟
ابتسم وهو ياخذها ويحطها عند الشايب : فرح ..
ابتسمت بخاطرها وشلون نست هالاسم وهو يعني الفرح رجعت تختار اشياء تناسب
امها وخالتها .. وخالتها ام الوليد بعد .. وخذت لها مجموعة مسابيح لابوها وراكان
وسلمان وابو الوليد بعد ..
قرب منها يسألها : تعالي شوفي من ناقص ..
ناظرت بالاسماء تعدهم .. وتكلمت بصوت بالكاد ينسمع : موضي وهيا مابعد كتبهم
ناظرها الشايب مستفسر : ارفعي صوتك يابنتي ماني سامعك ايش قلتي ؟
رجعت تكرر له نفس الاسماء : موضي وهيا ..
كتب لها اسمائهم ومدها لها .. : كدا تمام ؟
اشرت له براسها مستانسة وهي تناظر بالوليد فرحانة .. : خلاص ناخذهن ؟
جمع الولد الصغير اللي مع الشايب هداياهم المتواضعة وحطها لهم بكيسين وحاسبهم
الوليد ومشو راجعين للفندق .. دخلت على طول تتسبح وقعد هو ينتظرها بالغرفة ..
لبست وجففت شعرها وطلعت له .. باسها على خدها دخل هو الثاني يتسبح بعدها ..
جلست على السرير تتذكر كل اللي صار لها اليوم .. وهي تحس بفرحة بعمرها ما
جربتها بحياتها وشكرت ربها اللي عوضها خير بهالانسان اللي دعت من قلب ربي
يسخره لها .. وهذا اهم شي هي تفكر فيه الحين ..


/
\
/
\

/
\
/
\


صار له يومين يترجاها يجيها البيت وهي رافضة كثرة هالمقابلات اللي تحس
انها بتخليه مايستعجل على زواجهم لكن مع اصراره والحاحه هالمرة رضت
انه يجي عندها ..
وكعادتها كل مرة كشخت له وتعطرت وانتظرته يجي من حظها اليوم اربعاء
والعائلة هاليوم محد يقعد في البيت وابوها من طاح عليهم مريض للحين وهو
كل يوم نايم بعد صلاة العشا .. استقبلته في الصالة استقبال حميمي كعادتهم
من سنوات مضت .. ولبسها هالمرة مايقل خلاعة عن كل مرة تشوفه فيها ..
ومن جلس معاها وهو طول الوقت مقربها منه ويبوس فيها وهي تتدلع عليه ..
مدت له الحلى وهي تبي توكله بيدينها : حبيبي ذوق هاللقمة من يدي ..
كان يناظرها مبتسم ابتسامة كلها رغبة اكل اللقمة من يدها وهو يتأملها : يا
عمري انتي .. الله لا يحرمني من هاليدين الحلوة .. ولا من صاحبتها الاحلى
ضحكت وبعدت عنه وهي تشوف نظراته لها ..
مسك يدها يقربها منه : حبيبتي ..
ناظرها بهيام وجاوبته بدلع : عيونها ..
عض شفته وتكلم وهو مازال مبتسم : الحين محد في البيت صح ؟ " هزت
رساها بالنفي وكمل كلامه " زين تعالي وريني غرفتك .. " وقبل ماتعترض
على كلامه قام " ولا كلمة انتي من زمان واعدتني .. لا تقولين شي الحين ..
يالله عاد حبيبتي ابي اشوف ذوقك عشان اختار لك شي يعجبك ابي اثاث بيتنا
نفس اللي انتي تعيشين فيه ..
قامت معاه وهي حاطة يدها على خصرها : ايه ايه .. اضحك علي بهالكلام
الحلو .. تعال بس تشوفها وتطلع وبعدها نروح نقعد بالمجلس زي دايم ..
لف يده حول خصرها ومشى معاها : ابشري من عيوني .. انتي تامرين امر
ياقلبي ..
حست بفرحة كبيرة وهي تحس بحجم الحب الكبير اللي مغرقها فيه .. ورقت
معاه لغرفتها .. وقف عند الباب يتأمل اثاثها الفاخر جدا وهو مدرك بداخله
انه مايقدر .. لو حاول يجيب ولو نص قيمته .. شوي دخل يشوف ادراجها
واغراضها اللي على التسريحة .. حتى ملابسها .. : والله انك بنت نعمة من
جد ..
طقته على كتفه بدلع : حبيييييبي .. وش هالكلام ..
التفت لها وضمها له : ياعيون حبيبك انتي .. " حاولت تبعد عنه لكنه تمسك
فيها اكثر وهو يلثم وجهها " حبيبتي لا تزودينها وتصيرين معقدة انتي الحين
زوجتي والكل يعرف ..
حطت يدها على صدره تحاول انها تبعده وهو متمسك فيها اكثر من قبل ..
وماحست بنفسها الا وهو راميها على السرير مر وقت طويل قبل تستوعب
اللي صار لها هالوقت كله .. ناظرته بخوف : صلاح .. وش سويت انت ؟
اشر لها تهدا وتسترخي : ماسويت شي ياقلبي انتي .. منال .. اليوم ولا بعد
5 اشهر انتي زوجتي .. ليش خايفة ؟ " قرب منها وباس خدها
.." يسعد لي ربي زوجتي الغالية تصدقين من اليوم راح احبك اكثر ..
بعدته عنها وهي مصدومة من وضعها معاه : ليش سويت اللي سويته ؟ انا
من الاول قلت لك بعد الزواج راح اكون لك .. " وبدت تصيح " ليش حرام
عليك ..
قعد وهو يناظرها : منال ؟ وش فيك انتي .. تراك حلالي واسوي اللي ابي
بعدين الحين ولا بعد 5 اشهر وش يفرق .. انا انسان احبك وابي اعيش معاك
عمري كله .. امسحي دموعك الحين ولا تقفلين بجوي رجاء ..
عصبت عليه وهي تشوف بروده معاها : انا اقفل بجوك .. صلاح انا ماعندي
استعداد اعيش هالايام بقلق وتوتر نفسي .. من بكرة تجي تقول لابوي الزواج
بعد شهر ..
قام وهو يلبس ملابسه ويناظرها بقهر : الظاهر انك مريضة انتي .. وشو شهر
ومن وين لي مصاريف زواج وشقة ومقدم عقد وتأثيث انتي تحسبيني مثلك ..
العب في الفلوس ومادري وين اوديها ؟ خلاص انا وعدتك بعد 5 اشهر على
ما يجيني قرض تيسير الزواج .. ووقتها تنحل كل مشاكلنا ..
وطلع من عندها تاركها وراه وهي تصيح منهارة .. هي كانت طول عمرها
معاه تتمنع وماعمرها مكنته من نفسه .. ماتدري ليش هالمرة ضعفت له ..
ليش هالمرة استسلمت له ولمعسول كلامه ووعوده اللي ما تنتهي .. حاولت
تهدي نفسها بالاخير وتقنعها .. هي واثقة من حبه وواثقة انه اختارها هي انها
تكون زوجته .. واكيد راح ينتظر الفترة هذي تمر بسرعة ويعيشون مع بعض
مثل اي اثنين متزوجين قامت تتسبح وهي تعيد نفس الكلام على نفسها تحاول
انها تخفف من احساس الخوف اللي تملكها ..



/
\
/
\

/
\
/
\


نزلو من السيارة رايحين لبيت خالهم .. ناظرت حولها واستغربت كل شي تشوفه
البيت تغير وصار مكانه فيلا متوسطة لكن اكبر من بيته المتواضع اللي قبل وبيت
جيرانهم مازال هو نفسه نفس الفيلا القديمة اللي كانت تشوفها حلوة بوقتها وفخمة
الحين تشوفها اقل من عادية .. اما الحديقة اللي كانت تجمعهم ايام طفولتهم تغيرت
كثير وصارت احلى من قبل .. ماعادت هي الحديقة اللي حملت على ارضها احلى
الذكريات .. انتبهت لامها تناديها ومشت معاها ماكانت ابد حاسة بالوقت اللي راح
وهي منشغلة باستعادة ذكرياتها .. دخلت بيت خالها واستقبلتهم زوجة خالها اللي
كانت تكره تحكمها فيهم وفرض اوامرها عليها وعلى امها .. تذكرت هالوجه الحين
رغم انه بنظرها صار ابشع واقبح من قبل .. واصوات عيال خالها اللي مسببين
ازعاج كبير .. تذكرت انها بوقتها كان عندها 5 عيال .. 3 بنات وولدين .. والحين
اكيد العدد صار اكبر بما انها تسمع صوت اطفال ..
استنكرتها في البداية وماعرفتها .. وام خالد طول الوقت كانت تبتسم ابتسامة غريبة
وكأنها بهاللحظة جاية تنتقم من كل اللي سببو عذابها هالسنين كلها .. دخلت ودخلت
معاها ديما .. وجلسو بالصالة شافت بنات خالها الكبيرة ومتزوجة وعندها عيال يوم
كانت هي في بيت خالها كانت هالبنت بالثانوي .. والثانية بعد كانت بالمتوسط يعني
اكيد هالاطفال عيالهم .. كانت ساكتة وهي تتأمل كل شي وكل خطوة تمشيها كأنها
خالد او ريان ماتدري وين تروح او وش تقول بالضبط ..
جلست ام خالد وهي مازالت محافظة على نفس ابتسامتها .. تدري ان زوجة اخوها
ماتحبها هي اللي كرهتها بحياتها واجبرتها تتزوج وتطلع من البيت بعد ماكثر تشكيها
اكثر من مرة .. اما البنات فكانو يحبون عمتهم ويكنون لها كل تقدير لانهم ماعمرهم
شافو الزلة منها ..
تكلمت ام عبدالعزيز وهي ترحب فيهم : يا هلا والله بأم خالد وينك ماعاد تجينا ولا
نشوفك " والتفتت لديما وهي مبتسمة " ماقلتي لنا انك بتجيبين ضيوف معك ولا كان
ضيفناها اللي تستاهله ..
ناظرت ام خالد في بنتها ورجعت تناظر ام عبدالعزيز بابتسامة : من قال انها ضيفة
هذا بيت خالها وهي جاية تسلم على بنات خالها ..
ذهول الجم الكل عن الكلام ولا وحدة فيهم قدرت تعبر او تقول شي قعدو يناظرونها
مستغربين كلامها .. كملت وهي تمسك يد ديما : هذي بنتي ديما .. ماتذكرونها ؟
صدمة خلت الكل يناظرها مستغرب .. لا زوجة اخوها قادرة تتكلم ولا حتى البنات
مصدقين اللي يشوفونه قدامهم هي فعلا تشبه لام خالد والحين بس اللي انتبهو لهالشي
تكلمت رغد بنت خالها الكبيرة : ديما ؟؟؟ عمتي .. ديما اللي توفت ؟
ابتسمت وهي تداري جروحها اللي سببوها لها : ايه هذي هي تشوفين يا رغد ؟ هذا
بنتي ما ماتت ليش ما قال لكم ابوك وانا معلمته اني دريت انها للحين عايشة ؟ اكيد
انه هو لاعبها معاهم .. ولا كان فرح لي اقول له بنتي للحين عايشة يضيع السالفة
ويسكر الخط ..
وقفت ام عبدالعزيز معصبة : حدك عاد الا رجلي ما اسمح لك تغلطين عليه وش
اللي لاعبها من وراك ؟ وش يستفيد اصلا من هاللعبة اللي تقولينها ..
ناظرت بالصالة الواسعة حولها وتكملت ببرود .. : يستفيد هالفيلا الحلوة بدل بيته
الخرابة اللي كان ساكنه قبل .. يستفيد سيارته اللي شراها وهو اللي ماكان عنده الا
كابريس ومكسر بعد " حطت يدها على جبينها وكأنها تتذكر " وش بعد انتي قولي
لي هالمرة وش بعد استفاد من بيعة بنتي ؟
كانت تسمع كلامها مذهولة .. وماعرفت وش ترد عليها .. حتى بنات اخوها اللي
يناظرون عمتهم باستغراب .. ابد ماتوقعو بيوم انهم راح يسمعون هالكلام اللي ما
يخطر على بال احد ..
انتفض كل جسدها وهي تصارخ عليها : جاية في بيتي وتغلط على زوجي وتقولين
على اخوك انه حرامي ..
وقفت بكل برود تكلمها : لا حاشاه اخوي منو قال انه حرامي ؟ قولي خاين .. قولي
نذل .. قولي انسان ماعنده ضمير .. اي شي يخطر في بالك الا حرامي ..
سمعت صوته بالخارج وهو جاي لهم يصارخ .. دخل عليهم معصب .. : قصرو
اصواتكم الله لا يبارك فيكم .. وش هالصراخ كله .. " واول ما انتبه لديما تراجع
للخلف " من اللي عندكم ؟
صوتت له ام خالد وهي واقفة : تعالي ياخوي " قالت هالكلمة وهي تشدد على كل
حرف فيها " مافي احد غريب .. هذي بنت اختك ديما .. اللي قلت لي انها ماتت ..
اللي الله ردها لي وكشف لي كذبكم ..
دخل يناظر ديما باستغراب .. وهو للحين مو مصدق شلون رجعت لامها .. ومن
شافت نظراته مسكت في يد امها بيدينها الثنتين .. وعيونها على امها ماتبي تناظر
بأي شي ثاني بالذات خالها اللي حست بنظراته الحين شي يذكرها بنظرات ابوها
اذا عصب عليها ..
رجع التفت على اخته وهو يصارخ : ومن اللي قال لك اني لاعب عليك ولا ادري
وينها فيه .. هم مكلميني وقايلين لي انها ماتت بحادث .. يوم راحت مع ابوها في
طريق الدمام ..
ضحكت بأعلى صوتها وهي تسمع تردده في الكلام : بتكذب علي بعد ؟ والله وانا
حلفت بالله اني لادفعكم ثمن هالعذاب اللي عشته انا وبنتي .. واسأل الله اللي ردها
لي سالمة بعد هالسنين كلها انه يكشف لي كل الاعيبكم وينصرني عليكم ..
مسكها مع يدها بقوة .. وهو يسحبها .. : تتبلين علي الحين .. بعد ماضفيتك طول
هالسنين وعزيتك وكرمتك جاية تقولين هالكلام ..؟
حاولت تبعد عنه وهي ترد عليه : عزيتني وكرمتني ؟ انت تكذب على منو .. وين
العز اللي شفته عندك وانا من جيت هالبيت وانت ذالني ومسود عيشتي وعلى كل
طالعة ونازلة قلت لي مصاريفك ومصاريف بنتك ..
وقف مكانه وهو مازال يسحبها .. : برا .. برا بيتي ولا عاد اشوفك تعتبينه بعد
اليوم ابد .. خذي عيالك وانقلعي لا اشوفك جايتني ..
شالت ديم ومدتها لديما اللي كانت يدينها ترتجف .. ودنقت تشيل ريان اللي كان
يصيح من الخوف .. ومشت طالعة هي وعيالها .. : ماكنت ابي اجي لك ولا ابي
قربك .. جيت بس ابي اعلمك اني بارفع دعاوى على كل اللي حرموني من بنتي
وان شاء الله اشوف يوم فيكم وابرد حرتي اللي للحين مابردت ..
طلعت بعدها على طول رايحة لبيت ام متعب اللي عازمتهم اليوم للعشا .. التفتت
على ديما اللي من وصلت عند الباب قعدت على طول على الدرج .. : يمه ماقدر
اتحرك .. خذي ديم لا تطيح مني ..
نزلت ريان وقعدت جنب ديما تاخذ بنتها الصغيرة منها .. : لا يضيق خلقك .. ولا
تفكرين بشي صار ابد .. يا ما بنشوف ايام سودا بس مابي اسكت عن حقي اكثر
من اللي سكتته .. وان شاء الله ربي يظهر الحق ويريح قلوبنا ..
خذت نفس عميق تحاول ترتاح وزفرته بهدوء .. وبعد ماحست انها ارتاحت قامت
تمشي مع امها رايحين لبيت ام متعب اللي مجاور لبيت خالها ..



/
\
/
\

/
\
/
\



وقفت مكانها مو مصدقة اللي تشوفه .. ومن لاحظت جوري تفاجأها سألتها
على طول .. : وش فيك ؟ تراه اخوي مو وحش ..
سحبتها بعيد عن الملحق .. وهي للحين مو مصدقة : شفته والله العظيم شفته
ناظرتها مستغربة وش قاعدة تقول : ديوم سلامات ؟ ادري انك شايفته بس
ليش ارتعتي ؟
شافت امها طالعة وابتسمت تودعها : بعدين اعلمك بروح البيت الحين .. زين ؟
مسكتها قبل تروح : لا والله ماتروحين الا اذا علمتيني .. حاسة انه وراك سالفة
وين شايفة اخوي فيه ..
التفتت لامها اللي تناديها ورجعت تكلمها : والله العظيم سالفة طويلة الحين ماقدر
اقول لك كل شي .. بس هو يشتغل بمستشفى صح ؟
جوري : ايه .. ليش ؟
ديما وهي رايحة ركض لامها : خلاص شفته بالمستشفى ..
ومن شافتها رايحة تركض نادتها اكثر من مرة بس طنشتها وماردت عليها ..
تغطت وطلعت من بيتهم راجعين لبيت امها .. وطول الوقت وهي تفكر فيه ما
تدري ليش حست انه هو بعد خانها .. لانه عرف بمكانها وعرف من هي وما
انقذها ولا حتي فكر يقول لها وين امها فيه .. " اكيد عارف اسمي .. مستحيل
مايعرفه بس لييييييش ؟ " كرهته لانه هو الوحيد اللي مازالت تذكر كل تفاصيله
نستهم كلهم حتى خالها وبناته .. حتى خواته نستهم وماذكرت الا هو اذا رجعت
للماضي ما كانت تحن الا لامها وله .. وهو اللي للحين محتفظة بتذكار منه ومع
هذا كله تجاهلها وتجاهل وجودها وما اثرت فيه رجعتها .. انقهرت منه كثير ..
واللي قهرها اكثر سنين عمرها اللي كانت تنتظر اي وقت ترجع لامها وتشوفه
هو .. هو بعد كانت تتمنى تشوفه .. كانت حاطة ريان بحجرها وماسكة يده
تلعبه .. وفكرها كله يروح له .. كانت بس تتمنى تلاقي فرصة وتسأله اذا هو
عرف انها ماماتت ليش مافكر يوصلها لامها وهو كل يوم يجي يحقق معاها عن
اسباب التعذيب .. وطول الطريق من الخبر للدمام هذا كان تفكيرها اول ماوصلو
البيت طلعت للغرفة اللي تنام فيها .. قبل ماتنتقل لغرفتها الجديدة .. اللي للحين ما
جهزت ..
غسلت وبدلت ولبست بيجامتها وقبل ما تنام انتبهت لامها اللي جاية تجلس معاها
شوي .. ابتسمت لها وهي تمسك يدها تبوسها .. : مابتنامين الحين ؟
ابتسمت لها بحنان : لا ياقلبي ابي اسولف معاك عن اللي صار اليوم اول ابيك
تقولين لي كل شي حسيتيه .. شلون يوم شفتي البنات ؟ مو بنات خالك لانك ما
لحقتي تتهنين بالقعدة معاهم بس ان شاء الله نروح لكل وحدة في بيتها ولا اعزمهم
يجوني .. الله يسعدهم هم اللي دايم يواصلوني .. عسى الله يسعدهم مدري شلون
طلعو من هالام والابو الله يهديهم ويصلحهم .. المهم اني ابيك تسولفين عن بنات
خالتك ام متعب والحفلة .. وكل شي ..
ضحكت على كلام امها .. مثلها بالضبط مهما زعلت من احد ماتحب تدعي عليه
او تقول شي غلط عليه في ظهره : استانست واجد والله .. ماتوقعت اني بستانس
هالكثر قلت يمكن بستحي منهم بس هم الله يسعدهم ماخلوني احس بالاحراج ابد
بالذات جوري .. يمه هالبنت نفسها ماتغيرت .. نفس سوالفها اللي كانت تمسكها
علي اول ..
جلست على الارض وجلست ديما جنبها .. : اجل كانت بينكم سالفة كايدة وانتو
بالحوش صح ؟
بعد تردد فكرت انها تصارح امها باللي في خاطرها وترتاح .. : يمه بعلمك اللي
صار وانتي قولي لي وش اللي فعلا صاير " واول ماشافت انصاتها معاها على
طول تكلمت " طلعت مع جوري بشوف " وبخجل " متعب والله مو انا اللي كنت
ابي اشوفه بس هي قالت تعالي شوفي شلون صار شكله بعد هالسنين ومن شفته
انصدمت وربي .. يمه متعب كان كل يوم يجيني في المسشتفى ..
فتحت عيونها متفاجأة : شلون يعني يجيك ؟
فركت يدينها في بعض بتوتر وهذا طبعها اذا صارت تسولف : يوم طارق اخوي
طقني واغمى علي .. يوم ادخل المستشفى بالاول كنت تعبانة ومابي اتكلم مع احد
وبعدها كنت زعلانة على عمي وزوجته .. لاني كل مرة اطلبهم يساعدوني وهم
يرجعوني لابوي .. وجاني متعب مادري وش شغلته بس هو اللي كان يجي يسأل
عن وضعي في البيت ومن يطقني وكل هالسوالف .. يعني يمه عرفني وما قال
لي شي عنك .. " وبحزن " يعني نفسهم ..
حطت يدها على كتفها : اولا ياقلبي مستحيل يكون عرفك وما قال لامه .. وانتي
تعرفينهم زين وشفتي شلون استقبلوك ثاني شي ديوم متعب ماعاد هو اللي كنتي
دايم معاه اول .. الحين صار رجال وانتي مو محرم له .. شلون تروحين عشان
تشوفينه ..
ضحكت وهي تحس بخجل من كلام امها : والله مو قصدي اشوفه ولا حتى اكلمه
وربي استحي .. بس هي قالت لي تعالي شوفيه بدون محد يدري ..
ابتسمت لها وهي تستغرب اوقات تصرفاتها تتصرف وكأن مالها شخصية مستقلة
واي شخص يطلب منها تسوي شي تسويه بدون ماتفكر في النتائج كملو جلستهم
وسوالفهم .. وبعد ما استئذنتها امها رايحة تنام رجعت تفكر بكل شي صار معاها
اليوم .. وبكل مشاعر تحركت بقلبها ..



/
\
/
\

/
\
/
\



خلف القضبان الحديدية .. وفي غرفة شبه مظلمة كان يقضي ليله الكئيب يحس
بمشاعر متعبة الى ابعد الحدود .. كل الهموم تجمعت عليه من كل مكان ولا يدري
اي هم فيهم يبديه على الثاني .. الى هالوقت مايدري وش هو مصيره ولا يدري
وش راح يصير عليه .. يتمنى بس يسمحون له يروح لاهل منصور ويشرح لهم
الوضع كله .. يبي بس يقول لهم احساسه بفقده اعظم من اي احساس ثاني والندم
اللي يراوده بكل لحظة يتذكر استعجاله في مسك المسدس وهو يجهله ولا بحياته
شافه او استخدمه .. كان يفكر بأهله وابوه وخواته .. ويفكر بهيا وش اللي ممكن
يكون في بالها الحين .. مايدري وش اللي راح تفكر فيه عنه .. وهل لو قدر يطلع
من السجن بيكون في عيونها مثل اول رغم ان الواقع يقول انه لو طلع راح تتغير
حياته وراح تواجهه مصاعب اكثر ..
واهله اللي ماكان لهم مصدر رزق بعد الله الا هو الحين لا جامعة ولا حتي الدوام
المتعب اللي كان يشتغله رغم الارهاق عشانهم .. كان يدري انه هذا مصيره اللي
قدره له رب العالمين .. انه يولد في اسرة فقيرة وينشأ طول حياته بشقى .. من
صغره وهو متحمل مسئولية واللي بعمره مايعرفون الا الالعاب والكورة .. ولا
حتى عمره اعترض على قضاء الله وقدره .. لكن هيا هي الوحيدة الي مايبي شي
في الدنيا يوقف بينه وبينها .. هم توهم صغار ومابعد عاشو الحب مثل مايتمنون
مابعد عاشو حياتهم مثل كل اثنين مخطوبين .. من كبر وقرر انه يكمل دراسته
عشان يتوظف ويتزوجها على طول .. وكل يوم يروح لجامعته او حتى دوامه
كان يشوفها قدام عيونه .. حلم وردي رسم عليه كل خطط المستقبل يتمنى السنين
تمضي فيه ويحقق هالحلم .. ويوم صار كل اللي باقي على تخرجه سنة وكم شهر
بس يصير هذا كله .. ويدخل السجن بقضية مايدري وش اخرتها ..
يخاف انه يتسلح بالأمل ويكون مستقبله مظلم .. وبنفس الوقت مايبي ييأس وهو
مدرك ان رحمة رب العالمين كبيرة ..
قعد يستمع لشكوى اللي جنبه .. مشاكله وهمومه قاتل ومحكوم عليه بالقصاص
بعد ايام ..مايدري بوقتها هل يواسيه او يواسي نفسه ..ولا يدري حتى وش هو
الكلام المناسب اللي يقوله .. هو محتاج من يطبطب عليه ويعلمه شلون يواجه
مصاعب هالحياة وظروفها ..
" يارب الصبر .. يارب الصبر .. " كان يبي يصبر على كل اللي يصير معاه
اوقات يحس انه وده يموت ولا يعيش بهالعذاب .. يتمنى انه يترك الدنيا بكل هم
وتعب فيها .. وكل ماتسلل اليأس لقلبه دعى ربي يرزقه صبر اكثر .. ويمكن
اوقات كان يهون على نفسه اذا سمع قصص غيره ..
التفت على رجال ممكن يكون في الثلاثينات ملتحي وباين عليه الوقار .. اقترب
منه وسلم عليه .. رد السلام راكان وانتظره يتكلم .. مايدري ليش الحين يتمنى
اي احد يتكلم معاه عشان ينسى الوساوس اللي تراوده كل شوي ..
ربت على كتفه وهو يتكلم بايمان : لا تيأس ولا يضيق خلقك .. محد في هالدنيا
خالي هموم .. كلن له نصيبه .. والله عز وجل قال " لقد خلقنا الانسان في كبد "
وهذي حياتنا من مشقة الى مشقة ومالنا الا الصبر واحتساب الأجر ..
التفت له راكان متسائل : ومن وين اجيب قوة ايمانك ..
قرب منه وهمس له وهو مبتسم .. : انا والله دخلت السجن ما اعرف من الاسلام
الا اسمه .. شراب , مخدرات وبنات .. وكل معصية بهالدنيا سويتها .. وقدر الله لي
اني انمسك من 3 سنوات والى هاليوم وانا اقضي عقوبة القتل .. لاني قتلت واحد
في مضاربة .. وصدر بحقي حكم القصاص .. والحمدلله على كل حال .. الحين
لو اموت .. اموت وانا راضي عن نفسي .. هالسجن رجعني لصوابي وعقلي ..
ورجعني لربي ..
ناظره راكان بتعجب من حاله .. وكيف ان ايامه في الدنيا معدودة ومع هذا يتكلم
وكأنه اكثر الناس سعادة .. كمل كلامه له بنفس الاسلوب المحبب : اذا ضاقت
فيك الدنيا .. وحسيت انك وحيد بهالعالم قول " لا اله الا انت سبحانك اني كنت
من الظالمين " وبإذن الله تفرج كربتك .. قال هذي الدعوة يونس عليه السلام في
بطن الحوت .. وكتب الله له النجاة .. وان شاء الله يكتب لك النجاة من هذا السجن
انت قضيتك قتل خطا .. والله راح يظهر حقك ولو طال الزمان ..
راحة كبيرة سرت بجسده من بعد كلامه معاه .. كان يحس نفسه بمكان مظلم وكل
المنافذ مسكرة عليه .. وبعد كلامه فتحت له نوافذ الأمل اللي بدونها مستحيل نعيش
ابتسم له برضى وشكره على كلامه اللي ريحه .. وقام معاه يصلون الفجر جماعة
وكل اللي بداخله أمل ان الغد يحمل له تباشير فرح حتى لو طال انتظارها ..



/
\
/
\