ونقلب الصفحه ونحط ذا التصميم الاليم ببدايتها
يمكن يعبر عن بعض اللي يمرون من هنا مدري ويمكن بترزز بتصاميمي القديمه
ونقول سلام يالربع ...

تو اصحى لسى ما افطرت دخلت شيكت على شغلي
وقلت بمركم هنا وبكتب لكم شوي اعرف بعضكم يبون يقرون شي جديد

المهم

قبل يشتغل جهازي اللي زي وجهي جاني اتصال من رقم غريب عاد اموت
بالارقام الغريبه احس فيه شي مهم
كذا مخي متركب مدري ليه

المهم

الاتصال واحد من البكستانيه اللي مايطفشون وهم يكذبون
بجد دلوخ سلام عليكم استاز *^*&^ جاب اسمي عاد يحسبني بصدقه
يوم يكون يعرف اسمي وهو اي واحد يخل رقمي باي برنامج
بيطلع له اسمي على طول

المهم

يبغاني بكل ثقه اعطيه رقم حسابي حق البنك ويقول بتجيك رساله عطنيها
قلت انت بالاتصالات او بالراجحي
يقول مافيه مشكله لازم رقم الحساب

الحمار لو معاه جوال واتصلو عليه عرفهم من غبائهم وجملهم
اللي ماتتغير بكل مره نفسي اعرف كيف قدرو ينصبون على العالم
وهو باين انه يكذب مدري شلوووون !!!

بعد شوي حول ع الواتس يقول برسل لك رقم عطنيه عشان اساعدك اكثر
المشكله توي صاحي وقاعد ادور بجوالي المسجل بسجل المكالمه ماحصلته
التسلب بيدخل على جوالي من الواتس وبيفعله عنده
ويبغى رقم الكود حق تسجيل الواتس برقم غير الرقم اللي بالجوال

يحسب انه يكلم اطرش من الطروش اللي يصدقونه
الكود من ثمانيه ارقام وجاتني رساله ع الجوال به بعضنا يعطونه الرقم اللي جاهم
وهنا تكمل المصيبه لانه بالرقم راح يفعل الواتس حقك بجواله
واي احد يرسل له راح يحسبه انت

طبعا بعد مايخترق جوالك وياخذ كل الارقام اللي فيه شايفين كيف الكود
يسوي لهم وبعضنا يعطيه الرقم بكل برائه يحسبه ماراح يصير شي

المهم

قعدت انقله ارقام غير اللي جاتني بس بنفس عدد الارقام كل مادخلها
ماضبطت معاه لانها ارقام من راسي
طفشت الصديق كل شوي يرسل واعطيه ارقام غلط

يوم شفته عصب قلت صديق ابغى شي عشان انا مو مركز
متحمس وهو يقول ايش يبغى

قلت سيجارة حشيش اليوم مادخنت وانا اذ مادخنتها ما اركز زين
قال درقز قلت لا حشيش مو مخدرات بس حشيش

قال انت مجنون وتووووت تووووت قفل بوجهي

كنت بكملها معاه بس ماش عرف اني استهبل
بس يعجبني فيهم اصرارهم واتصالاتهم هذه يكمن المره العاشره يتصلون
واكلم الشباب ذاك اليوم طلع الاغلبيه متصلين عليهم باوقات مختلفه

والله حاسدهم على اصرارهم والشعب الان الظاهر اغلبنا نعرف انهم نصابين
بس هم ماعندهم مشكله شغلتهم هذه ماتفرق معاهم

ياكثر كلامي اليوم مدري ليه !!!

خلوني اختم الرد واروح افطر جعان وربي
وبس والله سلامتكم

ســـلام قال درقز قال

يامشاء الله اليوم اشوف زوار القسم كثار هلا بالعياااال
بجد تحمسون الواحد يجي يسولف عليكم والخط فاضي

م عليكم

احيان تقابل احد من زمان عنه تقول يارجال ادعم وروح سلم وكذا
فـ رحت وسلمت وسالت عن الحال والاحول عادي يعني
اسويها كثير هذه الحركه من باب السلام وكذا

بعضهم يحسب وراها اشياء ثانيه
كل شوي يسال وش تبي جاي بعد كل هذه السنين
اكيد عندك شي واللا وش جايبك انت ووجهك وترسل هنا انت
توقف ماتردي وش تقول

م عليكم

وايوه قد صارت معاي وكثير بعد وزي ماقول لكم بعد ماحسيت وجهي
صار كبر فنجال القهوه قلت والله ولا شي بس جاي اسلم من باب
الصداقه والاخوه والمعرفه لا اكثر

م عليكم

فمن باب الاحتراز دام الدنيا كلها احترازات هاالايام قدمو النيه الطيبه
ودوم حاولو تخلون الامور اسهل لكم وللناس اللي تسال عنكم
لا تحسسونهم انهم ثقال عليكم لو كانو ثقال
احيان نحتاج شوي مجامله وكذا

فـ الاخير

ماراح ابطل هذه العاده مهما يصير غيبو وتعالو وتشوفون من
راح يكون اول المستقبلين لكم اذ الله عطاني وعطاكم عمر
وبس والله سلامتكم

م عندي سالفه ب شفت الناس واجد بالقسم قلت اسولف معكم شوي
طبعا بانتظار الناس الل معطلين ومتكين في بيوتهم شاركونا
بعض يومياتكم هنا المكان يساعد والاجواء تقول تعالو

يالله فـ امان الله

وصح قبل انسى حاول قد ماتقدر لا تشغل نفسك باكثر من شي
في نفس الوقت اتركو وقتكم اكثر لشي واحد بلاش تشتت وكذا

ونقول نقطه ونهايه سطور

ســـــلآم

مسهم بالخير .. كيفكم يالربع اخباركم .. كل الاماكن تقول لا تطلع من هنا
مدري ليه ماشوف العالم متربعين معنا هنا !!

م عليكم

امس واحد يقول لي ترا والله مفهم شي من مدونتك ابد
طيب وينك ماشوف لك مشاركات هنا
يقول اسكت ادخل عشان اقرا مدونتك واطلع
قلت توك تقول ماتفهم شي منها
غير الموضوع بحرفنه عاليه وماحبيت اطول السالفه

مدري ازعل او اقول عادي لولا اختلاف الاذواق لبارت السلع
بس على فكره مو اول واحد يقول لي كذا ولا راح يكون الاخير

فـ عادي تصير باحسن العوايل

م عليكم

نفسي اسوي استفتاء للاعضاء هنا او طلب اعطاء راي بكل صدق
ماودي بالمجالمه بذا الوقت عادي اتقبل كل شي بصدر رحب والله

ادري قد ايش يممرون المدونه هنا وهم كثير
بس المرور يكون بفايده او مرور عادي

نفسي اسوي هذا الاستفتاء واشوف راي الاعضاء بذا المكان
وبجد هو الفهم هنا للكلام صعب او عادي طريقتي بالكتابه عاديه او مقعده
وصعبه الفهم !!

لان فيه بعض الاحيان من اللايكات تحت اعرف ان كلامي ما اعجب بعضكم
رغم ان اغلبكم يدخلون هنا بس بصماتهم تكون بعنايه اكثر
مو اي شي تلقون لهم بصمه فيه

المهم
عطوني رايكم .. في هذه الاشياء !!

اتكلم كثير والفايده شوي !!
لو اخفف قرقره افضل او اكمل كذا !!
ارجع للنسخ واللصق واجيب هنا الاشياء اللي تعجبني !!
او اكمل اسولف كاني في مجلس !!

مدري والله

فـ الاخير

يسعدني وربي كلامكم ونقدكم ورايكم بالمكان
لاني بدونه ماراح اكتب او اخربط فيذا

من الاشياء اللي ضحتني بخوينا اللي يقول مايفهم من مدونتي شي
قلت له ياخي احب الناس يوم يتكلمون عن المدونه وبعضهم كلامهم يجيب السعاده

قال شكلك تحب المدرح واجد

قلت اكيد واحد مايحب المدح والثناء اصلا بدونهم ماتلقوني هنا من زمان
بعد شهر بالضبط بكمل هنا معكم عشىر سنوات

اي والله مدونتي هنا بعد شهر بتكمل السنه العاشره من يوم افتتحتها لين اليوم
صامده لم تتغير ولم يتغير عنوانها بس صاحبها اللي كل شوي يتغير وكذا

م عليكم

يالله فـ امان الله وحفظه .. لا تنسون هذا الدعاء
" بسم الله الذي لايضر .. مع اسمه شيئا .. في الأرض ولا في السماء .. وهو السميع البصير "

كونو دائما بخير .. سلام

سلام عليكم .. م عندي شي اليوم
بس بترزز معكم شوي وبشوف لي شغله منا منا اي شي !!

وصح بعلكم بشي ياويلكم لو يكمل اللي براسي
قررت اصير قارئ كفوف اي والله بس انتظروني قريبا

واحدن طيب شرواكم دخل السالفه بمخي وارسل لي فيديوهات تعلمييه
واعجبتني الشغله !!

وببدا فيها مع ذا الحجر وباذن الله ماينتهي الحجر الى وانا صاير
قارئ كف من الدرجه الاولى

وبتخصص بالحب والعلاقات وكذا يعني تخصص مطلوب فـ السوق
من الان اللي وده اقرا كفه يقول وياخذ رقم لاني متوقع بعد فتره

م عاد بادي احد وجه اذ بديت اشتغل من جد

الحين كبدايه عرفت اسماء الخطوط بالكف
خط الحب والقلب وخط الحكمة والعقل وخط الحياه وكذا

بطنش خط الحياه بركز على خط القلب والعقل بس
عشان ما اتشتت معكم يوم اقرا لكم

عاد انتظروني وكل واحد يقلل يعقم يدينه شوي
لا تروح الخطوط وابلش معاكم

ف الاخير

شايف اقلام طالعه جديده معنا بالمدونات لا اوصيكم مرو مدوناتهم
فيه اختيارات لهم رهيبه خلونا ندعمهم عشان يكملون معنا

وبس والله سلامتكم

لا تنسون " بسم الله الذي لايضر مع اسمه شيئا في الأرض ولا في السماء وهو السميع البصير "

فـ امان الله
ســلآم

جاني خبر سد نفسي وربي عن كل شي
خلوني مع نفسي اليوم

مدري ليه الناس تحب تنقل هذه الاخبار بسرعه
كانهم فرحانين فيها !!

يـ الله فـ امان الله
كونو بخير

ســـلآم

سطور ليست للقراءه تجاهلها افضل !!

" أظلمك .. إذا حطيت لك بالعرب ند
لأنـكـ عرب وشعور مغليك ديره "

كن شيئا فريدا ،
ليست منه نسخ أخرى . .

أعبر حياتهم ك صدفة خفيفة من أحلى الصدف ،
كن شيئا وحييدا / لا يتكرر مرتين !

عندما تشعر بنقصك الشديد وخيباتك المتكررة
يهبك الله أصدقاء يملؤون الجزء الفارغ منك

تشعر حينها بأهمية وجود
أصدقاء مثلهم !!

فـ الاخير

ولمن يسال عن كلامي الاخير كان وقت عرفت بالحظر الكلي
على مدينتي وبس والله !!

أسال الله رب كل شي علام الغيوب الرحمن الرحيم العليم الحكيم بأن يبلغنا رمضان على خير
لا فاقدين ولا مفقودين وان يعيدنا سالمين الى بيوته اجمعين
مصلين قائمين صائمين

اللهم آمين

ســلآم

مسهم بـ الخير .. ش اخباركم يالطيبين
من فتره ماوصلني نفس هذه التقيمات وربي خرشتوني يوم دخلت
كذا عيوني صارن يوم اشوف

بس اكثر ثنين شدوني وخلوني اروح اقرا شوي واشوف
مع اني كنت اعرف ان الامر في حرمه وتحريم
بس والله ماتوقعت ان حتى التعلم اوالقراءه فيه محرمه

لحظه بجيب كلام بعضكم هنا

وسبحان الله بعدها على طول

اقول لكم كانهم متفقين وربي التقييمات ورى بعض على طول بس الاخير
بشوي عصبيه

الله يجزاكم كل خير يارب ماقصرتو والله
تم الغاء فكره المشروع من اساسه وجاري البحث عن شغله ثانيه
مشكله لاصرت فاضي وبجحر

طلع الموضوع ماهو بسيط وانا والله اول ماخذه بشوي طقطقه وكذا
طلع التحريم يشمل اشياء كثيره في قراءة الكف والكلام فيها

نصيحه مني بعد اللي شفته خلونا نبعد عنه افضل
هاه ياللي علمتني المضوع وحمستني له يارب تشوف الكلام
ابعد وانا اخوك ابعد

فـ الاخير
لايصح الى الصحيح دائما والبعد عن كل شبهه افضل لنا جميع
الشكر طبعا موصول للناس اللي نبهوني لذا الشي

بجد احيان طقطتنا ومزحنا المفروض مايخلنا نتجاوز المشروع والمباح
وبس والله سلامتكم !!

صح قبل انسى شكلي برجع اداوم عادي فـ اليومين الجايه
توهم اتصلو عليا يبغون ارقامي عشان بيطلعون لنا مشاهد تخلينا نتحرك وقت الحظر
بدون مانتعرض للعقوبات وكذا

مدري افرح بذا الشي او اخاف لاني راح اطلع من الحجر بس برجع للدوام
مدري من وين القاها من القرعه وللا من اختها العميا

خلوني اطلع بس ولحد يجيب طاري الكفوف توبه خلاص

فـ امان الله .. كونو دائما بخير ..
ســـلآم

ونقول مساكم الله بكل خير .. ياربااااه بالله شوفو التصميم ذا
ياني تعبت فيه زمان تعب جعت الصور ودمجتها
وكتب يارباااه تو اشوف التوقيع تحت مسويه فـ 2013

صار له 7 سنوات !!
والله كاني امس مسويه يارباااه بجد الايام تجري والله
عاد ذكروني اقول لكم سالفته لان سالفته طويله يارباااه
يمين ايام حلوه ونحسه بنفس الوقت !!

م عليكم

يقولون المصائب لا تاتي فرادا ابد !!
طلع المشهد حقي للدوام يعني من بكره بداوم باذن الله فيه شي حلو بالمشهد
اقدر اتمشى وقت حظر التجول براحتي بس وين اروح والناس نايمين

م عليكم

نجي للطامه الثانيه اليوم من صحيت شاشة التلفزون حقي ماتشتغل
ماعندي الى هي يمين قهر !!
المحلات حقت التصليح مقفله محلات لو بشتري جديد مافيه مقفله بعد
بالله وش السواه الحين !!

دوام وقلق ... شاشه بح .. وحضر تجول .. ووفوق ذا كله كورونا بكل مكان
كملت والله !!!!!

بقي اللاب توب والجوال !!!!
لا واللاب ماخذه من واحد عشان شغلي عليه الان كثير يعني باي وقت
يقول هاته !!

اقول لكم ان المصائب ماتاتي فرادا ؟

لا وكملت واحد من زمان ماكلمته والبارح ارسلت له
مدري وش خلاني اقول له اللي قلت وشكلي جبت العيد والله
مع اني مو قصدي بس تفلسفت وكذا

وهو ترك كل كلامي في الرساله ومسك السطر اللي جبت به العيد
وعلق عليه طيب ترا فيه كلام واجد فوق

بجد لا تاتي فرادا ابد

م عليكم

خلوني اشوف مواقع الطلبات بطلب شاشه من اول احوس بسوق دت كوم
يقول اقرب وقت للتسليم 30 ابريل يعني بعد 23 يوم يكون رمضان
الله العفو والعافيه انتصف

اقول لكم ماهي راضيه تضبط معاي

يالله .. فـ امان الله .. وحفظه ..
ســـلآم

ونقول .. مساكم الله بـ الخير .. وابشركم خلاص
فرجت وكنت اظنها لن تفرج !!

من زمان امدح فيكم ياحقين عبير اقول مافيه مثلكم ابد
وان جمايلكم معاي كثيره بس ماتوقعت توصل لين كذا والله
يعني كرم لا يكمن تخيله اووصفه بجد تحرجوني بكرمكم
اي والله !!


هذه وحده عضوه معنا هنا حزنها وضعي انا وتلفزيوني وقالت والله مايصير

ولقيت لها راسايل واجد الو الو ياوسمي الو رد
المهم رديت بعد ما انخرشت وربي شوي قلت عسى خير
عاد تقول جايبه لك هديه او بجيب لك شي تعال

وانا اعدل الجلسه واقعد زين ولو عندي عطر بخيت منه
مدري وش دخل العطر بس تحمست شوي المهم
وارد عليها هلا انا هنا بس انشغلت شوي

الى وتقول والله برسل لك تلفزوين قلت ايش شولن
عاد من سنين جدي وانا محد ارسل لي شي تقل مقطوع من شجره
يابنت ماله داعي الكلافه انا باخذ بس المحلات مقفله الان
قالت لا برسل لك واحد واصلا اخذته لانك تاخرت مارديت

عاد انا رديت بعد الرساله بنص يوم وشوي
المهم قلت الشكوى لله ماتقصرين والله يجيك منك اكثر

قالت وش رايك اصوره لك عشان تصدقني
ياربااااه يمين شوي وياصل راسي للسقف معقوله فيه احد بيسوي
معاي كذا وانا ولد

ايوه لان الهدايا بالعاده من الاولاد للبنات مو العكس
بس قلت حنا في 2020 كل شي صار معاد فيه فروقات
ومن قو اللخمه ضيعت وش اقول
كاني واحد جاي يخطب وبيدخل يشوف الشوفه الشرعيه

المهم قلت ايوه ارسلي الصوره بشوف وحالتي حاله
مدري ليه عرقت وكذا لحد يسالني بس عرقت

شوي وترسل البنت الصوره حقت الشاشه وانتظرها تتحمل
وانا بين مصدوم وماني مصدق واقول وش ذا الكرم وافكر
كيف برد الهديه وربي ماهي بسيطه الشغله لا وبهذه السرعه

الى شوي وتتحمل الصوره وافتحها وهنا جات الفرحه الاكبر
بس ماهي لي لا والله لصاحبتنا اللي جايبه لي التلفزوين

انزلو اوريكم تلفزوينها اللي جايبته لي








اي والله هذه الصوره او التلفزوين اللي جابته لي
طلعت تطقطق عليا وانا ووجهي صدقتها ياخي مدري ليه صدقت
وقسم انها مشت عليا بالبدايه

شفت الحماس والرسايل وكذا
واخرتها تطقطق عليا ياويلي ويلاه

الشرهه مو عليها على اللي يجي يشتكي لكم من ثاني لوضعه
بس بجد تراها صعبه حجر وبدون تلفزوين ولحالك
وش السواه

والله لو اعرف بيتها وين غير اروح واسرق تلفزوينهم

يـ الله م عليكم

طولت السالفه وهي قصيره وخليتها حكايه اقول لكم فاضي
وماعندي تلفزوين ولا شي
وقلت والله غير اجحفلكم معاي نفس اللي صار معاي امس
ولا اكلها لحالي

اللي صدقت بداية قصتي يصف معاي على جنب

وبس والله سلامتكم .. سلآم

بنقلب الصفحه بس

تعالو بالصفحه الجايه