إسـتمع ، ثم إبتـسم ، ثم تجـاهل
ليس من الضروري أن تأخذ كل شيء بعين الإعتبار !

رحم الله من تغافل لأجل بقاء ود وستر زله
(فأسرها يوسف في نفسه ولم يبدها لهم)

نقاء القلب ليس عيبا
و التغافل ليس غباء !!

و التسامح ليس ضعفا
و الصمت ليس إنطواء !!

هي تربيه و عباده .. تظهر دائما دون الحاجة للتصنع .. او الابهار
بقدر ماهي .. تربية وعباده !

وبس والله سـلامتكم

ســلآم

﴿ ثم السبيل يسره ﴾ ..
الأصل في كل دروب الحياة اليسر ؛

و العسر ، طارئ و يرحل ..
اللهم يسر لنا كل عسير ،

و لا تحملنا مالا طاقة لنا به .. !

..

نحن نخبئ عتابنا في نصف حديث !!

في جرف بحه
و نكمل كل شيء طبيعيا

..

ليس عليك أن تسعد الجميع !
ولكن عليك أن لا تؤذي أحد

خذ من مرح الأطفال
وخذ من هدوء المسنين

خذ من تواضع العظماء
وخذ من أحلام الفقراء !!
وستعرف معنى الحياة ..

..

نقظه ونهايه كلام ..

سلآم

عندما تتصرف بعيدا عن التقيد
بردة فعل اي احد .. !

عندما تكون حرا
بفكرك واحساسك ..

الشعور هنا يكون جدا جميل
لاتخاف من غيرة حبيب !
ولا شرهة صديق !
ولا عتاب محب !

انت حر تهدي من تشاء
وتضحك مع من تشاء
تكتب مايجول في خاطرك

ولا يضيرك ردة فعل الآخرين
الجميع منك قريبين !!

وفي نفس الوقت بعيدين
الا من يرى فيك الطيبه والوضوح !!

فتبادله الجمال بالجمال
والاحترام بالاحترام !

لتبقى قيمة الانسان التجارة الرابحة
التي تحرص عليها لتبقى قريبا
من قلوب الطيبين الذين يحسنون الظن بك
ويبتهجون لوجودك .. !

وبس والله ســلامتكم

سلآم

الحقيقه و الكذب !

المفروض تكون الحقيقه هي الغالبه نفس الصوره لكن عند الغالب
الكذب هو الغالب هو المسيطر والمستحوذ للاسف !

في دراسه شفتها قبل فتره ان الواحد فينا يكذب فـ اليوم 1.5 كذبه
وتصدقون بعد ان الواحد مايقدر يتكلم لمدة عشر دقايق
بدون مايكذب كذبه على الأقل !!

قعدت اراجع حساباتي واشوف ودققت اكثر على نفسي فـ اليومين اللي راحن
طلعت بجد اذ كثرت كلام لازم اطش كم كذبه
لو من باب المزح او التصريف او الكذبات البيضاء !!

اكثر كذبه استخدمتها بعد التدقيق طبعا يوم احد يسالني وينك ع الجوال
او احد يسالني كيف حالك ؟

هنا يطلع الكذب لا اردايا هذه عينه طبعا مو اكثر !!
او يطلع بدون مانحس اننا نكذب او نقول عشان تمشي الامور بشكل افضل !
وقيسو عليها ...

وفـ وقتنا هذا جات وسائل التواصل وتعالو شوفو انواع الكذب فـ كل مكان
بكل الاشكال اللي يمكن تشوفونها في كل شي حتى اتفه الاشياء الكذب
يكون هو المسيطر او بنسب كبيره نكذب !!

المشكله تستمر الامور ويصعب على من صنع كذبه ان يتوقف لانه بدا بكذبه
فـ مضطر يكمل فيها للاخير وهذه مشكله النت بشكل عام

السوال ليه نكذب ؟

اي احد يقدر يساعدنا ويجاوبنا عليه يقول لنا ليه نكذب !!
تتقعون استخفاف بعقول من نحدثهم او صفه فينا ماقدرنا نبطلها او كذب للحصول
على اشياء من وراء هذا الكذب ؟

بجد تتعب يوم تفكر فـ هذا الموضوع وتقفل الباب وتريح راسك افضل
وتسوي نفسك مصدق الشخص اللي يكلمك وتقول عادي
او توقف وتقول لا مـ انت صادق !

الاخيره هذه صعب نقولها

فـ الاخير
الكاذب يبان لو بعد حين مهما اتقن الكذب سياتي يوم وتتضح الامور
واحيان معاد يفيد فيها الترقيع

وبس والله سـلامتكم

صح قبل اطلع جاني سوال عن الكتابات الاخيره هنا فـ المدونه اذ كانت
لي او منقوله

ودام نتكلم عن الصدق والكذب فـ بقول لكم
بعضها لي وبعضها لا والله اعجبتني وجبتها بس كـ العاده اذا جتب
شي ما انقله نفس ماهو لازم ازيد عليه من عندي بتصرف

وبس والله الان نقطه ونهايه سطور

وســـلآمتـــكم

ســلآم

بجد ماعدت اعرف كيف !!
مرت عليا ثلاث ايام يمكن من اسواء الايام او اكثرها سواد من سنوات
ايام كانت مخيسه بشكل الله لايوريكم !!

تعيش قصه من بدايتها لين نهايتها بكل مافيها
تنتهي القصه او ينتهي الجزء الاكثر خوفا وترقب على ارض الواقع
تنتقل الى النقل الآن والتحول الفضائي والنتي للقصه !!

فرق كبير وكبير وكبير بين الواقع اللي عشناه مع القصه واحداثها
وبين النقل الفضائي او بمواقع التواصل فرق كبير جدا

ماتدري كيف تسوي او ايش تقول لانك ماتقدر تتكلم بهذا الوقت
تضطر تلتزم الصمت بشكل كامل تتابع وانت مغبون او مقهور
ماتدري من وين تلقاها من اللي حولك ورده فعلهم للموضوع والقضيه ؟

او من كلام الناس عنها وكذبهم الصريح فيها ومبالغتهم بشكل
يجلط اي والله النقل للقصه كان خرافي بشكل لا يصدق

اول مره في حياتي اعيش زي كذا مواقف زي ماقلت لكم من بدايتها لين نهايتها
وبعدين نقل الناس للاحداث بشكل درامي اكثر من الواقع بتزييف صريح
لكل شي بدايه من صاحب القصه الى اخر شي فيها !

ياليت اقدر اقول لكم ش السالفه بالضبط بس والله مقدر اقول شي هنا
اللي مستغرب منه كميه التاليف والكذب اللي صارت بعد النهايه

تعدي على الاشخاص قذف بشع جدا جدا اتهامات تودي ورا الشمس
تجني دعاء بالظلم على شخص يحتاج الدعاء له بالشفاء !

اقول لكم احترت والله مع كذا موقف وللان والله العظيم محتار شي ماهو سهل
خاصه للناس اللي تعرف كل صغيره وكبيره بالموضوع وعاشتها
بكل مافيها من رعب واثاره وتعدي على الغير بشكل سربع جدا

ما اقول غير كان الله في عون الاهل والاقارب وكفاهم الله شر بعض البشر
ممن يتفنون في اثارة الفتن والاخذ من غير المصادر الحقيقيه

وبس والله سلامتكم !!

ادري اغلبكم يبون يعرفون السالفه الان مقدر اقول بس قريب اروق ازين
واعطيكم السالفه بشكل افضل او احطكم شوي بالصوره

الان لا استطيع ابدا !!

ســـلآم

ايوه وقفو شوي بعلمكم بسالفه زينه !
ابشركم

رجعو الدعم المعنوي للمدونات صرنا نقدر نعطي اعجابات من جديد للمدونات
ايوه كذا احلى اجمل خلونا نشوف لو شي بسيط
من تفاعل الناس اللي تمر على مدوناتنا !!

يعطيكم العافيه يـ شباب على هذا الشي
خلونا نحسس الناس اللي قاعده تكتب هنا بشي من اعجابنا بكتاباتهم البطله

ايوه زر الاعجاب رجع بالسلامه
لا اوصيكم عاد اسعدوا من يكتبون في مدوناتهم بضغطة زر صغيره

وبس والله سلامتكم

سلآم

والله طفشت من الساعه 8 احاول ادخل هنا بسوي شغله
تعبت طفشت كرهت اوم اوم الموقع كل مره يعطيني 59 ثواني

تنتهي ولا جاني كلمه المرور الموقته يمكن ميه مره ضغطت اعادة ارسال
والان الساعه شوي وتصير 9 وماقدرت ادخل

اسوء مواقع فـ العالم كله المواقع الحكوميه عندنا السيرفرات مضروبه
مع اي زحمه تعلق مع اي مشكله توقف
مسوين يعنني نحرص على خدمة المراجع بسهوله ويسر

واخرتها مايفتح موقعهم وخفو علينا قال سرية العميل ومن ذا الخراط
اقلعها من سريه عشان ادخل لازم رساله برقم سري موقت
خفو علينا بالله ترا محدن درى عنكم !!

والله عصبو بي بجد وانا ماني ناقص اصلا !!

لا وتروح تراجعهم يقول ماعاد يفيد خلص امورك عن طريق الموقع وسجل كل شي
طيب انتم عطونا مواقع زين الناس نتعامل معاها



<< ادري ادري معصب

اي وربي عصبو بي بجد وماني عارف ادخل على الحساب عشان اسوي الامور
قبل بكره لان بكره بتنزل الرواتب واقعد بها اذ اليوم ماسويتها

احد يعرف لي هكر بهكر لهم موقعهم وربي
اخليهم يعرفون ان الله حق !!

يالله م عليكم من عصبيتي اللي مالها داعي
خلوني افطر يمكن اذ افطرت اروق شوي

ســـلآم

يارباااااه وش هذا كسرنا حاجز الميه مليوون نقطه !!
والله ماني مصدق



شايفين كيف كسرتو الرقم معاي وتعدينا حاجز المية مليون نقطه في نقاط التقييم
قبل كم اسبوع كتبت لكم هنا عدد النقاط بالله شوفو كم كانت
والان كم وصلت يارباااه

وربي انكم بجد ناس كرماء مع صاحب هذه المدونه
اجل بكم اسبوع تضاعف العدد ووصلنا لهذا الرقم

بكشخ فيه لين احد يلحقني !!

مدري ش اقول بس والله بجد اسعدني تفاعلكم مع ذا المدونه بكرم تقييمكم
بروحكم الطيبه مع صاحبها بتواجدكم بكل شي وربي

الله يسعدكم واحد واحد فردا فردا

وبس والله سلامتكم حبيت اوثق هذه اللحظات الجميله ولا ماعندي سالفه
وخلونا نشوف كيف بتكون الايام الجايه

لتكونو دائما بخير .. !!

ســـلآم

ونقول بـسم الله ..

كلنا تمر علينا فترة من فترات العمر وتكون ملامحها " حالة من السلبية "
وتختلف من شخص لشخص وظرف عن ظرف وأسباب عن أسباب

لكن كلها حالة من الضعف اوالإنكسار اوالتعب !
يتشتت التفكير تتشعب الامور ويصعب جمعها من جديد او ترتيبها

" محظوظ من يقدر يتعامل معاها بالقرآن وحسن الظن بالله والأمل بالتغيير للافضل "

منا اللي يتعثر ومنا اللي يجتهد ومنا اللي ينازع
لكن بأذن الله يجي وقت ونتخطى هـ المرحلة ونبتعد عنها بأذن الله !

عشان كذا ابغى اقول ...

أن هـ المرحه من أصعب المراحل اللي ممكن تضيع الشخص
" تشتت , إكتئاب , عزلة , كره للنفس ، كره للحياه "

والمرحلة هذي وجذورها اللي تمتد فينا على حسب أختلاف حجم جذعها
تكون مرحلة تأخذ من أعصابنا وراحتنا وقوتنا وثقتنا وحياتنا وعلاقاتنا مع الي حولنا !!

والرسالة اللي أبي أقولها لكل من بيقرا هـ الكلام هذا أو جربه

هــ الروح اللي كرمنا الله بنفخها في أجسادنا
واللي كرمنا وفضلنا بأننا كنا من عباده وخلقه في هيئة بشر
" كان ممكن نكون حجر أو شجر أو طير "

طيب !!

هل الروح هذي تستحق مننا الوقوف جنبها ؟
هل تستحق أننا نجبر كسرها ؟
هل من حقها علينا أننا نحفظ حقها ؟

حرام أنه نعيش أختبار صعب ومرحلة صعبة مثل الاكتئاب أوالسلبية
تمر علينا بدون مانتعلم منها وتقوينا وتخلينا نحرس ارواحنا وعقولنا واجسادنا وقلوبنا بعد !

والأهم من هذا كله أننا نتأكد أن العون والقوة والفرج بيد الله عز وجل
ويكفي لو نطلع منها بوقفة صادقة مع النفس
تبين لنا قوتنا اللي كنا نجهلها وما كنا ندري أننا نمتلكها !!

ربي يكتب السعادة وراحة البال لنا ولكم ولا يجعلنا من المحتارين

لازم نتعلم نكون اقوى في الشده قبل الرخاء ومع الألم قبل الشفاء
لان هذه الاشياء اللي تخلينا نعرف قدراتنا صح ونعرف ان الامور سهله
تتحول من وضع للاخر وان بعد كل عسر يأتي بأذن الله اليسر !!
لا تستمر الحياه بدون ان نجرب الأمرين " العسر و اليسر "

تذكرو هذا جيدا
﴿ ثم السبيل يسره ﴾ ..
الأصل في كل دروب الحياة اليسر ؛ ركزو الأصل دائما اليسر

وبس والله سلامتكم مبغى اطول واتفلسف واليوم خميس ورواتب وكذا
خلو ثقتنا بـ الله اكبر وبأن القادم سيكون أفضل

نقظه ونهايه سطور كثيره
ارجعو اقروها من ثاني يمكن يكون فاتكم شي منا ولا منا

اتمنى لكم اجازه سعيده ونهايه اسبوع اجمل
وبس والله سلامتكم

ســـلآم

﴿ لا تقلبون الصفحه حتى تقرأون السطر الأخير ﴾

وبس والله ســلآمتكم .. اجازه سعيده للكل باذن الله .. وبس
ســـلآم