،




ونقــول يــآأآأأإرب

ونقلب الصفحه ونبعد عن اللي قبلها فيها ردين اظن او ثلاثه مسويه
زحمـه لبعضهم فـ زي العاده اذ ماعجب بعضهم الكلام

لقط اقلامه وعفشه وراح للصراحه وكب العشا هناك
مثل البارح اظن ثنين جو هناك وكبو العشا ومشو ولا كانهم سوو شي !!

تصدقون لا حظت شي مدري عندي او عند الكل بعضهم مايستحمل
تجيب طاري اي احد في مدونتك كان الموضوع ايجابي او سلبي بس ليه تجيب طاريهم

بعضنا للاسف الى الان منصب نفسه وصي علينا وعلى اللي نكتبه
الى الان يعتبر نفسه له الصلاحيه على هذه الامور ومايتحمل يشوفك تكتب كذا

مدري صراحه بس بعضهم احسه كذا مدري عشان زعلان من احد ويشوفك
تتكلم عنه ويزعل او مصاحب احد ويشوفك تتكلم عنه ويخاف

ما ادري صراحه وش السالفه بـ الضبط !!

عاد البارح النفسيه فـ اسواء حالتها اهلي كلهم مسافرين اليوم وبكره وبجلس لحالي كـ العاده
بفتره الاجازات اكون لحالي اكثر شي لاني مدوام وكذا

فـ النفسيه تكون مخيسه لدرجه ودك تطلع فوق السطح !!

قلت لا نمت بصحى اكثر مروق واليوم خميس ورواتب وكذا للاسف نفس الحاله
لا وتكمل يوم ادخل صفحه الصراحه والقى الكلام كذا

بس خلاص اوريكم اذ نفست ماني مار الصفحه لو فيها اللي فيها احسها احيان تكمل الناقص
بس قبل اطلع اشوف حالات الناس بالواتس دايم اسويها

لقيت واحد حاط هذا البيت للشافعي والله كانه يقصدني بجد
قعدت اضحك على حالتنا من كم كلمه يتغير مودنا وبكل سهوله بعد

يخاطبني السفيه بكل قبح
فأكره أن أكون له مجيبا



يزيد سفاهة فأزيد حلما
كعود زاده الإحراق طيبا

فـ بجد حالة خوينا جات ع الجرح على قولتهم من دخلت اليوم اول شي
سويته دورت على البيتين كاملات وهذاني جبتهم واهديها للنفسيات
اللي مدمنين تنمر بالصراحات

تم الحذف بصراحه

يالله خلوني اطلع لا تروحون بعيد راجع بعد شوي مازال فـ الفم ماء

كونو دائما بخير .. واجعلونا نراكم اكثر سعاده ..
وبس والله .. سلام

كذا تقريبا وضعي اليوم مدري محد علمني وخلوني لامقيد ولا مفكوك
الحمد لله طيب ومافيني الى العافيه لحد يدرعم ويحسب فيني شي !!

بس اقصد النفسيه تمثلها هذه الايقونه بصراحه
واحساس انه اليوم خميس بعد كذا !!

ماعليكم من حلطمتي اليوم احسني ماسك مود حياه الفهد بصراحه
بس بتعدي باذن الله اول ما ادخل بجو الخميس والرواتب وكذا ماعليكم

نقطه ونهايه سطر

تعالو هنا الحين احيان كثيره نحس اننا كثرنا شكوى او تحلطم للناس وودك بس تسكت
لكن ماش مايفيد السكوت فـ الغالب نحتاج نتكلم البلا فـ انك تطفش الناس

اللي يعزون عليك بالتحلطم !!

بس يستاهلون ليه يعرفونا اصلا وليه يعطونا وجهه وكذا فـ يتحملونا اذ نفسنا
عاد احيان ودك تتكلم بس تحس وانت تكلم بعضهم انه فـ قمه سعاده ووناسته

والله تتحسف انك تكلمه فـ موضوعك او تقول له انك منفس وكذا
وتسولف معاه ولا كأنك فيك شي بجد لانك شفته وحسيت فيه انه مستانس ليه تقلب موده
وتدخله معاك بجوك اللي زي وجهك !!

ليت بعضنا يتعلمون يسوون كذا ياخي !!

نقطه ونهايه سطر

المهم تعالو بسالكم الحين وش فيهم العالم هابين علينا فـ بعض الاحيان تلقونهم يسوون
انهم عارفين كل شي بكل شي ومسوين بتاع كله

احيان بعضنا يعرف عنك شي بسيط باي طريقه كانت الى يجي ويبين
للعالم انه يعرف عنك كل شي ويقعد يتكلم ويلمح مايدري ابو الشباب او ام شباصه
ان ذا الكلام ببعض الاحيان يضر ناس وثقت فيه وكذا

تخليو تجي تسالني بسالفه واقول لك الموضوع والقاك تتكلم عنه بشكل عام
او تدري من احد عن موضوع خاص فيني والقاك تتكلم عنه كانك خويي او صديقي

لا اهدا من كذا بالله !!

لا تسوي خووي وانت بعيد وتقط الميانه على قولتهم وانت ماعندك ماعند جدتي
بعضهم يرفع الضغط بذا الحركه ودك من يسصطره تسصطير

نقطه ونهايه سطر

وس بعد دام السالفه حلطمه فـ حلطمه !!

ايوه صح احيان نشوف احدهم او نشوف موضوع ونقول ماهو كويس او ماله داعي
وسبحان الله لين يجي وقت وتلقى من يكلمك بالسالفه او بالشخص ويخليك

تشوفه من زاويه ثانيه غير اللي كنت تشوفه منها فتتغير فكرتك عن الشخص
او عن الموضوع بكبره وتصير تشوف الشخص غير وافضل بكثير لنظرتك الاولى

وتبدا تغير فكرتك احيان 180 درجه عن بعض الامور اللي كنت حاطها براسك
مدري هذه الحاله عند الكل او بس عندي !!

مدري والله .. بس اللي اعرفه اننا المرفوض نكون اكثر تفتح للامور وناخذها من اكثر من زاويه
او نحاول يوم نتكلم مع احد نركز ع الايجابيات في الاشخاص مو بس نقعد

نحش معهم فيه

بالله جربوها اذ احد جا يحش باحد قدامكم حاولو قد ماتقدرون تطلعون الاشياء الزينه فيه
بدون ماتقللون من الشخص اللي يكلمكم طبعا وتسوين فاهمين عليه

مع الوقت بتتغير نظرته للشخص وبيبطل حش فيه وكذا
ترا من واقع تجارب اقول ذا الكلام

نفس سالفه بعض الحريم تجي تمدح عند زوجها بحدى صديقاتها او قريباتها
لين يتعلق فيها الرجال وثمن تزوجها عليها

فـ البنات المتزوجات وخرو عن السالفه مالكم علاقه بالموضوع من اساسه

>> ياولد انت وش تقول ووين رايح

والله مدري وش اقول بجد ومدري وين وصلت بس شكل السوالف فككت شوي
من النفسيه المخيسه

فـ لحد يركز على كلامي كثير ترى ماعندي سالفه ولا ادري وش ابغى
وبس والله سلامتكم

ســـلآم .. ســـلآم



وعلموني بالله لا تخلوني كذا

وصبحكم الله بـ الخير .. ياخي جوي مدمور بشكل مدري كيف جاي
ذا الصوره بجد تمثلني بقوه فـ اليومين اللي راحن مع نفسي اقوى شي

مو عشان شي لا والله بس لان البيت خالي والناس محد حولي
فـ ماخذ وضعيه هوم الووون بقوه

الاسترحه فاضيه الى شوي بعد
بس احسن شي ان المدينه زحممممه تقول كل السعوديه عندنا من جد زحمه
لو تسوي لك خيمه على الرصيف وتقول للايجار بتلقى ميه يستاجرونها منك

والبحرين زحمه الجسر ماعاد يشيل اللي طالعين من السعوديه
ودبي زحمه بعد ومالعبنا والمباريات زحمه والطنطوره زحمه ورالي حايل زحمه

ياخي السعوديين ذول احد يعطينا عددهم ماشاء الله بكل مكان زحمه
لا وورده تقول بيجونا بالاجازه حقتهم وحنا ناقصين زحام اصلا

امزح وربي الدار دار الكل وحياكم الله باي وقت

بس تدرون ليه اقول كذا شكلي من قو النفسنه اجل اداوم والعالم كلهم اجازات
سلامات !!!

الاداره عندنا يمكن 7 ماخذين اجازه واغلب الادارات فاضيه الشعب كله ماجز
وخويكم النفسيه مداوم


احد يطلعني ياهوو يمين على قول واحد كل ماكملته قال الكلمه الاشهر
والاجمل فـ وصف هذه الايام ويارب سامحنا

يقول الجو " بيض "

بجد جوي له كذا يوم بييييض ودورينا صاير بيض والمباريات بيض
والناس بعد

لا ويجيك قسيمه من ساهر ياربااااه وتكمل عاد شكلي بطلعها من خشم واحد اعرفه
جاي ومستعجل ادوره وابغى سوالفه يوم وصلت لقيت راقد

ويقول النوم سلطان سلامات واللي جاي مصفي الطبلون
وماخذ ساهر وش بتسوي له !!

تصدقون ودي ساهر يطعينا صلاحيه تحويل القسايم بحولها لخوينا راعي النوم
واللا انه يشوف لي حل

يالله مأ عليكم كلن يصلح سيارته ويسدد قسايمه كفايه الزحمه اللي حنا فيها
بجد جو الاجازه مايزين الى بالزحمه

امس لقيت واحد مكاوي كبير والله بالعمر يدور شقق مفروشه ومعاه عائلته
لفيت معاه بكذا شقه قريبه من الحرم وحوله والله مالقينا اخر شي

قال بالله ياوليدي بس طلعني ودلني على طريق مكه برجع ياعم عين من الله
خير بتلقون باذن لله والى يرجع طيب والمشوار ومدري ايش

بغيت اخذهم عندنا بالبيت عشانه فاضي والله بس خفت يفهمونن خطا
اخر شي وانا قدامهم بالسياره بوريه الطريق لاني دخلتهم شوي احياء وكذا

لقيو شقه وتركتهم عندها مع كم دعوه من اللي يحبها قلبك
شكل من فرحتهم لو قايل لهم زوجوني كان زوجوني يازين بعض الدعوات
بس اقول لكم الفضاوه زينه

انا وش قاعد اقول والله بجد مدري وش ابي بالضبط المهم
الاجواء كلها بيض على قول خوينا

فخليكم من البيض واسمعو الكلام اللي ايدامه فيه

اي احد يقدر يوسع على نفسه ويتسانس لا يقصر مع نفسه لا تتردد اعقلها وتوكل
قول لاي احد يعرض عليك موضوع وانت فاضي ماعندك شي

قول له تم وهيا ولا تترددون وربي بتندمون !!

وبس والله سلامتكم .. خلوني انزل بالمسبح حقي



ســـلآم

ياولي ويلاه ياولد وش صاير بالدنيا كل مانقول زانت
جا علم جديد

لا ونور زعلان على طريقه وضع الفواصل بين المراجعين والموظفين فـ الاداراة
او المنشآت فـ البنوك وكذا !!

نور اسال مجرب وانا اخوك عندنا كذا واحيان كثيره امسك بالاستقبال
وتعال شوف كيف والله انواع القلق فـ الحاجز بعد ماسووه عندنا والله ارتحنا بجد صار التعامل
اكثر راحه مع المراجعين بدون اي فلسفه ولقافه وكذا

بس نقول لهم خليكم واقفين الصوت واضح ماله داعي تميل ع الشباك اللي بالقزاز
بس الشعب تعود على هذه الحركه



لا وتعال شوف الروايح العطريه يوم يوقف يكون بوضعيه
والتكيف وراه يدخل لك الهوا مع الشباك قسم احيان تحسك بتموت من الكتمه

فـ مجبوين نخدمهم لا وبأبتسامه بعد وبعضهم بس يحش
احسهم من طقه خوينا نور

يالله ماعليكم بس بجد اسوا مكان ممكن تشتغل فيه انك تكون موظف استقبال
بمكان زي كذا انواع التطفيش والعقليات اللي تمر عليك

من تركب عندنا بالاداره صار له الان يمكن سنتين
كذا مره اكون هناك بس احاول بسرعه اغير المكان لانه بجد مكان يتعب والله

لو تجلس فيه كذا ساعه يانور تعرف قد ايش مفيد وجود هذه الحواجز
وبس والله سلامتكم

ســلآم

ونقول صبحكم الله بـ الخير .. وهلا بالعيأأأآأل يالله بلا كسل
الدوامات رجعت ياهوو !!

المشكله اشوف بعضهم زعلانين انتهت مدري كم اسبوع بسرعه
احمدو ربكم غيركم لا كم اسبوع ولا كم يوم كلها جمعه وسبت
حتى مايمديك تغسل وتكوي ثيابك الى الاحد جاي يركض

ماعليكم

في تواجد هنا وفيه حركه حلوه ومتابعه طيبه من الشعب
بس للان مستغرب ليه نبخل او نطنش والله مدري

الاجواء هذه الايام بجد بجد رهيبه ومنعشه وهذا زينها والله وتقول لحد يداوم
بس ماش محد يقدر !!

ايو صح قبل انسى الحين لي كم يوم استنى صراحه وبقوه بعد
يعني زي مايقولون انتظر الصراحه بشمعه

وهذه مشكله اللي مايترك له مكان احد يقدر يوصل له الى من الصراحات
او المنتدى هنا وخويكم صاحب ذا المكان ماله طريق الى من خلالهم

فـ الشكوى لله !!

اللي قاهرني زي ماقلت لكم استنى صراحه لاني ارسل كثير صراحات واحيان استنى
بعض الردود ومدري اذ اللي ارسلت لهم عرفو انه انا المرسل او لا !!

لاني اعتمد على فطنه المستقبل وانه بيعرفن او لا واغلب متابعينن هنا
مشاء الله عليهم فطنتهم كبيره ويدرون انها مني الى احيان تخونهم فطانتهم للاسف

المهم

ان جتني صراحه فاضيه مافيها الى ( . ) اي والله هذا كل اللي فيها نقظه
مدري رصيد اللي ارسلها انتهى او انه كتب كلام طويل وارسل وجاته الرساله الغبيه حقت الصراحه
انك لا تستطيع ارسال هذه الصراحه الان حاول في وقت لاحق

ايوه هذه رسالتهم بس بالانجلش !!

وخوينا شكله عصب وحط النقطه وقال بجرب تروح او لا وراحت ووصلت لي
واللي قبلها للاسف لم يصل

فـ نصيحه من مجرب وخبير بذا الامور قبل ترسل اي صراحه لاي احد
سوي نسخ للكلام وبعدين اضغط ارسال

اذ ماجاك تاكيد الارسال حدث الصفحه ولصق الكلام من ثاني واعد الارسال
سهله شايفين كيف !!

المهم لخوينا او اختنا اللي ارسل النقطه ياليت تعيدها من ثاني وتقول ش السالفه
بـ الضبط لاني من جد استنى صراحه مهمه والنقطه حاست اوم اوم اللقافه عندي

وبس والله سلامتكم

نقطه ونهايه سطور اذ فضيت رجعت وكتبت وادعو معاي صاحبنا يرجع يرسل
وبس والله

ســــلآم !!

روقآآأإأن واستكنآأإأآن

اليوم الجو والدوام والامور ياربي لك الحمد تجيب العافيه الصحوه بدري
النومه كـ العاده متاخر بس الصحوه اكثر نشاط من دايم

يمكن لاني قفلت يومي قبل انام ببعض الامور الطيبه عاد تصدقون وجربوها
ختمو يومكم بشي طيب اي شي را ح تصحون اكثر روقان

من فتره ضيعت يوم الاثنين بين الايام كان ذا اليوم مسوي لي زحمه بالاسبوع
لين بدون ما انتبه خليت له روتين معين ويتكرر بكل اسبوع

ومدري ليه لازم اسوي ذا الموضوع كل اسبوع
لين صارت ميزه او لزمه بالاثنين خلتني اشوف يوم الاثنين اثقل يوم بالتاريخ

من فتره قلت لا لابد من تغيير ذا الشي واعاده يوم الاثنين للوضع الطبيعي
كـ الايام الثانيه لييييه مخليه يختلف عنهم

المهم !!

من شهرين ذا الكلام بطلت الاشياء اللي كنت متعود اسويها الاثنين
مره مسحت اوم اومها من قاموس يوم الاثنين لو فنجال شاهي اهم شي اعدل فيه

بجد بالبدايه كنت اقول سلامات وش بيصير يعني

لكن والله ان مع الوقت صار الاثنين مثل الثلوث مثل الاحد ماعاد فيه فرق
رجع يوم عادي جدا جدا !!

وتخلصت تقريبا من النفسنه حقت الاثنين عقبال مانختم الان نفسنه ليله الاحد
ياخي احيان نسوي لانفسنا طقوس عبيطه مع الوقت تصير ملسمات تتكرر باستمرار

مدري متى نقدر نطلع منها وكذا !!

احيان والله مانحتاج اشياء كثيره بس كل الشغله نحاول نعدل فـ بعض الامور الروتينيه في يومنا
نرجع لليوم من بدايه لين نهايه ونشوف هـ الامور تتكرر معنا على طول بذا اليوم

اقلبها او طنش بعضها سهله ترا

ادري قاعد اتفلسف عليكم وكذا بس وش اسوي فاضي وربي وتوي انهيت شغلي
ودخلت هنا بدون هدف وكذا

ايوه صح نسيت اقول لكم صاحب (.) اللي امس تذكرونه ابشركم جا وقال لي السالفه
طلع نفس توقعي لا ومرسل لي رساله ومكررها خمس مرات

حزني والله تعقد من صفحتي بالصراحه

شكلي بغير الصفحه واجدد الرابط عشان مايتعب مره ثانيه ويقعد يطنقر علينا ويرسل لنا
( . ) كل شوي اذ عصب

ويالله نختم ذا الرد ونقول كل عام وانتم بخير
وسنه جديده باذن الله افضل وربي تو اذكر اننا صرنا بالسنه الجديده

ماعليكم اهم شي الاخلاق

فـ الاخير وع الطاير

تصدقون من الاثنين اللي راح لين اليوم وصل عدد المشاهدات للمدونه (1200) مشاهده فـ اسبوع
ماعليكم العدد حلو وكبير ويفتح النفس للسوالف ... اذا في اسبوع كل ذول مرو من هنا
ياربااااااه ..

لتكونو دائما بخير ..
وعودا حميدا للدوامات والمدراس وكل شي .. وبس والله

ســلآم

يــقــآل !

من أتقن الصبر لن تكسره الحياة
ومن عرف قيمة الحب في الله
تهون عليه التضحيات..

ومن تقاسم السعادة
مع الآخرين
أحس بقيمة الإنسانية..

كل شيء في هذه الدنيا
إما أن يتركك،أو أن تتركه ..

جعل الله يومنا و يومكم مبارك
ومنحنا الله جميعا الصحة والعافية

..

بـ سرعه !!

لا توهم نفسك في أمور لن تحدث لك
لا في القريب ولا في المستقبل

يعني كن أكثر واقعية في حياتك ..

بإختصار

تصالح مع نفسك اكثر فـ الحياره قصيره ..

اسخف شيء ممكن تراه في حياتك
شخص كل غايته في الحياة إزعاجك وسخرية منك ..

بعض التفاصيل الصغيرة
والتي لا ننظر لها

قد تكون مؤثرة في حياتنا
بطريقة غير مباشرة ..

ربما عن طريقة الصدفة
ستعرف ماقيمة تلك

التفاصيل الصغيرة
ومدى تأثيرها على حياتك ..

لاتدعها تمر دائما بسلام

فـ الاخير

لا احد يتغير
هم يظهرون على حقيقتهم ليس أكثر ..

نقطه ونهايه اسرع من البدايه

سـلآم ​​​

هذه يبغى لها كاسه شاهي وروقان اكثر !!

أكبر مخاطرة قد تقوم بها في حياتك
هي أن لا تخاطر !!

فعدم المخاطرة
يعني أنك ستبقى في مكانك كما انت

فإن كنت مظلوم
ستبقى مظلوما

وان كنت حزين
ستبقى حزينا

ولن يتغير شيء إلى أن تخاطر لتغير واقعك !!

لنتجرأ قليلا على مخاوفنا لنحاول تجازوها باقل الاضرار لن نعرف عنها
وعن سهولة تجازوها اذا لم نرفع درجات المخاطره عندنا

اعقلها دائما وتوكل ولا تتردد دع الخوف من النتيجه
في اخر صفحات حساباتك لنفسك

ابدا قبل ان تتردد وتخاف النتيجه قبل ان تعرف بها !!

البعض بحاجة إلى من يقال لهم
بأن كل أمورنا ستكون على مايرام

مع أننا نعلم بأن لا شيء سيتغير معنا
مالم نبحث نحن عن ذلك التغيير ..


فـ الاخير

اجعل من نفسك سببا في إقناع أحدهم
ان الخير مازال موجودا في الناس مهما حصل من بعضهم

وبس والله نقطه ونهايه سطوور

ســلآم​

ونقول صبحكم الله بـ الخير بذا الخميس المتخمسن ونهايه اسبوع اول بالترم الثاني
والدوامات ياعيال وهلا بالخميس !!

الحين تعالو هنا فيه ناس رجو راس رج عشان الصوره اللي حاطها بصفحة الصراحه
عشان حاط صوره بنت مو ولد !! يمين ازعاج لين غيرتها خلاص ارتاحو

ماعليكم ذا بيكون اخر رد لي بـ ذا الصفحه وشكلي بكثر السوالفه فيه لان مافيني اسوي صفحه
جديده بنهايه الاسبوع مايصير فراح تكون الصفحه الجديد الاسبوع الجاي

قبل ابدا بس بقول .. تنهيدهـ وطيف وملكه بشموخي وخفائ وشمس وابو العز وينكم ياهوو
فقدنا تواجدكم بمدوناتكم صراحه شرفونا بحضوركم وكتاباتكم

بجد ترا لكم فقده بصراحه !!

ما عليكم اللي مامر مدونة شهرزاد ونور فاته كثير والله قاعدين يتكملون بموضوع حلو والله
وفيه نقاط بجد اعجبتني بدعو فيه بصراحه بطرحهم وتفكيرهم اهنيكم صراحه

ناقصنا ببعض الاحيان ناس تتكلم مثل كذا يخلونك تعدل لو شوي من حالتك
احيان نمشي على اولنا مدرعمين ولا نفكر نغير شي او نطور من اشياء فينا

على قولتنا مكبرين روسنا بزياده ومدرعمين على عماها

بحط لكم شوي اقتباسات من مدوناتهم

بجد احيان يبغالنا نجلس مع انفسنا اكثر عشان ننشطر بعض الامور
اللي كنا نحسب انها كبيره او ماراح تتعدل لو مهما سوينا

بكم جلسه مع انفسنا نعرف انها سهله الحل وامكانيه التغيير للافضل وارده
كل اللي علينا استيعاب الامور والنظر لها بشكل كامل ثم نحول للتطوير فيها
بس ما استوعبناها وكذا !!

هذه مع انها ببدايه الكلام بس اشوفها اهم شي فـ الطرح كله مشكلتنا فـ الغالب
تتمحور حول القناعات الشخصيه اللي ناخذها عن اي شي
احيان ماتكون بالشكل الصحيح فـ رجوعنا لها من ثاني وتصحيحها شي حلو وبيريحنا كثير

النظر لاي موضوع من كذا زاويه بعد مانكون في وضعيه تساعد
بيعطينا افكار اكثر وبيخلينا نشوفها بشكل مختلف يودي بكل تاكيد للتصحيح وكذا

يارباااه والله كلام كبير احيان التعليق عليه يخربه

ونكمل مع شهرزارد

القناعه كنز لا يفني قالوها من زمان بس كنا نقراها ونحفظها ونكتبها بدون مانطبقها صح
راس مال القناعه واعلى درجاتها وتطبيقها حب الذات وتعزيز هذا الشي في الشخص

لانك اذ حبيت ذاتك واقتنعت فيها وعززت ثقتك بنفسك بتكون قناعتك بكل شي
في اعلى درجاتها

نروح الان لنور

بجد ابدعتو اهنيك على مستوى طرحكم وابداعكم فيه بجد كان حوار شيق بينكم
شكرا لكم يبغالنا جلسات زي كذا واجد

فـ الاخير

الثقه لازم تكون اكبر من كل شي ثاني فهم واخذ الامور دايم انها للتعلم بدون اي شوفه
نفس او تعالي فـ القبول بوجهات النظر واختلافها

البعد عن الطرح النرجسي اللي يكون فيه التوجيه مستفز من البعض
اطرح اللي عندك بدون تعقيد وبدون محاوله فرض الراي على الاخر

خذ من كل احد مهما كان مكانه او وضعه واستفيد منه بقد ماتقدر احيان كلمه تفرق معنا كثير
احيان الوصول للحلول يحتاج منا بعض التنازلات وكذا

وبس والله طولتها وهي صغيره

شكرا للكل ونقول باذن الله اجازه سعيده ونهايه اسبوع اجمل
ونشوفكم باذن الله بـ الاسبوع الجاي

وسلامتكم .. سلآم