ومساكم الله بـ الخير ونقلب ابو ام الصفحه وفكه
من الصفحه اللي قبل ونقول هيا تعااال

مشغول ذا الاسبوع وماعندي وقت ادخل بالنهار ابد للاسف
وجوكم هنا بصراحه بجد يفتح النفس للكتابه

حمد لله على السلامه للناس اللي رجعو وخلو المكان اجمل
الوزير وطيف وشهرزاد ومع تواجد دوافيرنا اللي دايم

نور كويس احلى اسم جا لكم بصراحه اختصر علينا اشياء واجد
تنهيده والملكه وورود المحبه بعد مع خفاي

وابو العز ولدنا والطاقيه بعد حياكم الله بجد استمراركم يعطي
المكان بعد شي من الوناسه

لي تعليقات واجد وربي بس تخبرون الكتابه من الجوال
تذعف الكبد < كلمه صعبه عليكم ههههههه

المهم

زي ماقلت لكم عندي كميه ردود ع الكلام هنا وع الصراحات
والتقييمات اللي وصلت هي كلها حلوه وانتقاد بدون غلط

بس تقييم بيذبحوني فيه هذا عاد غير !!!

فـ الاخير

وربي تواجدكم في مدوناتكم رهيييب الله يسعدكم
واصلو ولاتقطعونا بجد شكل المكان افضل

والنفسيات يصفون على جنب خلو العالم تبدع بدون فلسفه
وتعقيدات لامور وخلوكم اكثر انفتاح للاخر

وبس والله سلامتكم اشوفكم بوقت قريب
او بكره اذ فضيت باذن الله ودعواتكم لا هنتم ....

سلام

تصميم قديم وكـ العاده مع التقليبات القاه احسن شي كنت اسويه اني احط التاريخ
حق السنه معقوله مرت اربع سنوات الى شوي وربي الايام تجري جري

ياأأربأإأآه

الله يكفينا الشر ويعطينا الخير ويبعد عنا وعنكم كل اذى قولو امين
بس لحظه بوريكم شي



هذه حقت اسبوع مادخلت هنا وشوفو كيف التنبيهات ياربااه كم انتم كرماء معي
الله يسعدكم بجد الواحد ينصدم صدمات حلوه مع بعض الصباحات

بجد مدري ش اقول هذا وفيه عالم ماش ماعاد لتواجدهم بصمات
مع انهم فيه على طول هنا بس يالله ماعليكم

اكثر رساله صراحه تفاجات منها واحد يقول ياخي المنتدى لسى فيه ماكنت متوقع القاه
ويسلم ويدعي للناس المشرفه على المنتدى احسه فرحان ومصدوم بنفس الوقت

عاد من الطيبين القدام هنا اللي يمكن من نفس فترات تسجيلي الاولى
ايام الطيش وكذا !!

ماعليكم ربي يسعده ويارب يمر من هنا لاني رديت على رسالته قبل شوي
بس ماظنيت انه بيرجع شكله لسى مصدوم

نفس جماهير الهلال البارح للان مصدومين من النصر مع المباراه انتهت تعادل
بس للان ماهم مستوعبين الصدمه اللي سواها لهم " كبير الرياض "

ابو العز تعال قرب وانا اخوك ذا السبت وانتم عاد صارت لكم مع الاسبات عاده
من ايام طيب الذكر " سدني "

المهم بروح اكمل بعض الردود لان فيه ا ساله جايه تسال عن اشياء مدري كيف
يبغالي صراحه وقت لان السوال اختصاصي بحت ماينفع اجاوب كذا من راسي

ماعليكم .. اهم شي الاخلاق .. >> وش دخل

والله مدري بس ذبحونا بالمكيفات وكـ العاده فـ كل شتاء معاناه مع التكييف بالدوام
اصابعي شوي ويصيرن زرقاوات

يـ الله بقفل ذا الرد وجايكم باللي بعده بسالكم كم من سوال صغيرون
خليكم قريب

ســـلآم

كذا وجهي وانا اقلب المدونات من اول الصبح للان مدري وين اودي وجهي
عاد في راسي كذا سوال !!

بس خلونا نبدا بالشي اللي متعبن من امس او قبل امس وحبيت اشاركم فيه
الحين تعالو هنا !!

اخت امك .. تصير خالتك .. صح .. اكيد خالتك اش فيك انت
طيب لا تدف ادري بتصير خالتي

لسى مو هنا السوال !! طيب

سوالي اخت جدتك .. وش تصير لك .. طبعا جدتك زوجة جدك مو ام امك او ام ابوك
جدتك زوجة جدك اختها وش تصير لي !!

هذا اللي محيرني والله من قبل امس يوم دريت انها توفت الله يرحمها
ويغفر لها ويجعلها من اهل جنات النعيم ويتقبلها مع الصديقين والشهداء

الله يرحمها ويغفر لها ..

الحين ابغى اللي يعرف يقول لي وش تقرب لي اخت جدتي
اقول جدتي وخلاص وللا خالتي وخلاص وللا ايش بالضبط

وترا له هديه هذا كبرها اللي يعلمن وش تقرب لي اخت جدتي
او ماتقرب لي اصلا !!

يالله ادري ماعندي ماعند جدتي الله يرحمها بس ودي اعرف وربي
وبس والله سلامتكم !!

فـ الاخير

مدوناتكم نايمه فـ اليومين اللي راحن وذا الشي ماعجنبي ياليت تسيرونا عليها
وتكتبون ونعشونا بذا البرد شوي

.. سلآم سلآم قبل الطرده ..

اذكر مره كتبت بذا الموضوع اللي فـ الصوره وان " السعاده قرار "
نتخذها ببعض الاحيان لنكون اسعد وان الامور طبيه اذ شفناها باكثر سعاده وكذا

جاني كلام واجد عن ذا الموضوع وبعضهم استغربو مني ذا الشي وليه اقوله
وبعض اخواننا العرب اللي قدر الله على بلدانهم ببعض المشاكل اكلوني صراحه

لين شوي واحذف الموضوع لانهم دخلو في اشياء مالها داعي !!

ماعليكم من خرابيطي بس احيان تكون جعان تسولف ومن مبطي ماجيت
فـ تحس ان ودك بس تقرقر لين تقول امين

امس اقول لواحد اني مشتاق للدوام للمكان وكذا وقعد يطقطق عليا
يقول انت ذكرتني ببزران المدارس فـ اول الايام مبسوطين بيداومون حطمني

وذكرني باول ايام لي الدراسه يارباااه للان اذكره والله عاد كانت
بعد العيد مباشره تبدا الدراسه وتخبرون عزايم الاعياد وغدا مدري عند مين
وعشا كمان وكذا

اذكر لليوم فرحتنا ان بعد بكره مدارس يارباااااه قسم ايام حلوه
والنتيجه مخيبه بس الحمد لله ماصرت مدرس كل يوم اقول الحمد
ماصرت مدرس !!

وش دخل مدري وربي بس اشوفها اشين وظيفه بالتاريخ انك تكون مدرس
شي مو حلو صراحه مع ان فيه فلوس حلوه ورواتب زينه بس ماحبيت

يالله ماعليكم

فـ الاخير

السعاده ترا بجد قرار نتخذه بلحظه يقلب اوم المود قلب
جربو تفرحون ببكره اكثر وتنتظرون الشي الزين فيه

وبس والله سلامتكم

سلام بقوم ابصم تاخرت وهلا بالعيآآأأل

ســـلآم

كوذيه من الصبح ادوركم وادور نفسي وادور مدونتي يمين يـ انحست
حوس اليوم الله وكيلكم شوي واتضارب مع الناس

مايصلح الشغل الزايد بوقت واحد وباقي الاوقات ماعندك شي
ماحب كذا شغلي متراكم من الاسبوع اللي راح لان الشغل صلاحيات ماهي
عند الكل !

طيب احد يسوي شي لا مانقدر لازم تجي !!

اليوم النفسيه زينه ياربي لك الحمد مع ان الشغل لين راسي
بس الحمد لله النفسيه طيبه

صح يوم خلصت صرت ماعاد اقبل من احد شي لو جاب خمسين
خلاص بح خلص رصيدي مابقى الى قسوتي

ماعليكم

بوه شي شاغلن بالي شوي مو بالعاده يصير معاي كذا بس انشغل بالي والله
ماحب كذا ينشغل بالي بزياده اقعد اضرب اخماس فـ اسداس

لين اصير ادور الهوشه بشمعه

تعالو هنا الحين الجوع والانتظار والكرف الزايد هذه كلها عوامل تودي للانفجار
قسم اني بطل للان مابعدت افنجرت بس الله يستر من باقي اليوم

ماخذي لي عطر من العربيه للعود انصحكم فيهم اسمه " كلمات " والله ياهو رايق
كانك طايح في مبخره وطالع منها الريحه بطله صراحه

وينفع للكل شباب وبنات >> خف علينا يـ جولي شيك

ماعليكم من الاعلان بس وربي بلاش مو بفلوس العطر بطل لايفوتكم اللي بتهدي
لاخوها زوجها امها ابوها والله ينفع وعنندهم الان تخفيضات 50%

يعني السعر حريقه لحقو عليهم !!

وبس والله حمد لله على سلامه ابطال الننجا قصدي المدونات
طيف وشمس ونفر حياكم الله لكم كم يوم غايبين

نستنى تنهيدهـ وشهرزاد والملكه وتكمل الامور مع خفائي بعد
يارباااه وابو العز اللي يشوفه يقرسطه ويجيبه صاير يتغلي المحلي

وبس والله سلامتكم .. ونقول .. سلام دوامي بينتهي اخير

فـ امان الله

خودافس

رد ماله داعي

الســـلآم عليـــكم .. دار قوما مومنين .. وصبحكم الله بـ الخير
اليوم برد ولسى ماوصلنا لنهايه الاسبوع الاول فـ المربعانيه
اوم وعمه البرد كله !!

ماعليكم

والله يجزاك كل خير يابو الانفار ماقصرت وانا اخوك
يعني نعتمد كلام نفر اخت جدتي ماتصير لي الله يرحمها

اما نور كويس بغى يدخلنا بجدار تخللت عظامك اجل
يالله ماعليكم

المهم

بويكم شي شفته والله بـ الصدفه لاني قليل اصلا اروح هناك




هذه الصفحه الاولى من الايميل حقي وهو قديم صراحه سجلت فيه اول مادخلت هنا
من سنة اسكت يعني

وغيرته فـ المنتدى من زمان وحطيت بريدي الجديد بس مستغرب ليه الرسايل
اللي مثل هذه توصل لي على بريدي القديم سوال للفنيين هنا !!

هذا اول شي ثاني شي
شايفين صاحب الرسايل كيف مصر يوصل رسالته وبنفس الوقت
ما كان جاه من البدايه ان المستخدم امتلاء صندوق بريده ولا يمكن استقبال الرسائل الجديده

وخوينا مصر الى يرسل يابن الحلال البريد مليان شوف لك مكان ثاني
وهذا الطيب الى يرسل هنا

يابو ترا فيه صفحه صراحه مكلفتني ذيك الحسبه وفاتحها عشان الرسايل
اللي زي كذا لو رايح لها اريح لك وراح توصل لي اسرع

وكمان لاني اشوفها بـ اليوم مليون مره !!




وهنا بملفي حاطها للكل عشان اللي مافيه يسجل دخول يقدر من الملف
يروح للصفحه حقت الصراحه بسهوله

ويقول اللي يريده ويبشر بالرد ديوصل له لين عنده
وش تبون بالله اكثر من كذا

ع العموم

عشان ماطول عليكم نفضت البريد عندي هنا واللي بيرسل يقدر
>> وليه تطولها طيب

مدري بس حبيت اسوي من الحبه قبه

فـ الاخير

اللي ملى بريدي هنا وفي الايميل برا تعال ارسل من ثاني او روح
لصفحه الصراحه وتكلم وبس والله سلاتكم

ســلآم

تعالــو هنـــا
ولا تاريخ اليوم رهيب 4-4-1440 هجري كل شي يذكرني بشي




بالله ليه محد ذكرني بعيد ميلادي معكم هنا في عبير
والله تو انتبه ان قبل امس كان !!

ياربااااه

صار لي معكم هنا (11) سنه قسم انه عمر ياويل حالي
بجد الايام تعدي بسرعه وشيبت وسنوني انحتت

اجل لي فيذا احد عشر عاما كاملا متخيلين معاي الرقم
هذا لو ولد توه انولد يمديه بكره يتخرج من الابتدائيه

اللهم ارحمنا برحمتك يارب العالمين !!

المهم

استقبل التهاني والتبريكات على صفحتي هناك بالصراحه
لحظه بجيبها

هنا رابط الصراحه

طبعا اللي بيحش يصف على جنب تخبرون احتفال ميلاد وكذا
فـ النفسيات خليكم على جنب بس اليومين هذه

وايوه الكرماء دائما معنا ترا كلامكم يفرق والله
وعادي لو بدون اسماء اهم شي نشوف كلام

اسعد جدا بذلك

ياربااااه

وربي 11 سنه كثيره يالله حسن الخاتمه اقول

وبس والله سلامتكم ربي يسعدكم جميع
وعقبال مانكمل معكم العشرين

قسم كثيره بجد كثيره ياني عرفت فيها ناس طيبين واجد
باذن الله بخلي رد قريب بس عن الناس اللي عرفتهم فيذا

بتكلم عنهم وبتذكرهم يمكن احد منهم يمر ويلقى كلامنا عنهم
خلاص خلوني اطلع بدت تخنقن العبره

لا اوصيكم كلمه طيبه بهذه المناسبه الصغيره وبعد ذا العمر
على قولتهم " كلمه ولو جبر خاطر "

سـلام

ولتكوني دائما بخير وكل عام ومدونتي وانا بخير
وربي لا يغير علينا

فـ امان الله

هذه الايقونه او الايموجي منتشره كثير بالواتس بعد التحديثات الاخيره
وانا بعد استخدمها واجد اذ جا كلام ماعجبني

مدري ليه لاشفت الصوره تذكرت خوينا نور كويس الفجر
قبل فتره يقول انه لحق ع الخمسينات الميلاديه طلع شايب الله يعطيك الصحه والعافيه

نور تعال هنا

يمين انك محشش بجد ذا السلام للكل دام فيه دعوه حلوه وفيها بسمه
بس مشكلتك مركبه ع المقابر وانت الصادق مو الاموات يمين انك رهيب ياشيخ

اجل فيه سلام للموتى !!

ماعليكم من تحشيشنا انا ونور نتصالح باذن الله دام الشغله مافيها زعل
المشكله لو بيزعل لاني قلت شايب

نقطه ونهايه سطر

نجي للكلام اللي ايدامه فيه بجد ترا بعضنا كلامه كله ايدامات وبهارات
وابداع ويحسسك ان ماعندك سالفه يوم تتكلم لان كلام بليغ ويوصف بشكل رهيب

بجد كلنا نقدر نكتب وسهل نكتب هي كلها سطور ونعبيها
المشكله في اللي يكتب عشان بس يعبي فراغات !!

واللي يكتب لهدف
ويكون عارف وش يبغى بالضبط !!

لان فيه ناس ياااامشاء الله عليهم كتاباتهم تسكت على قولتهم
تخليك توقف قدامها متنح ماتدري وش ترد او تقول احيان نكتفي بالاعجاب بس
لان الكلام كان بليغ لدرجه ان تعليقنا عليه راح يخربه

فنكتفي بالاعجاب او التقييم اذ قبل او برساله اعجاب بـ الصراحه

الكتابه فن واهلها ماهم واجد فيذا اقلام هنا والله يوم يكتبون انهم يبدعون
بطريقه حلوه ماتمل من القراءه لهم يختصرون اشياء واجد يعبرون عن اللي تبغى نقوله
بطريقتهم الخاصه يخلونك تقول الله عليك يسلم فمك ياشيخ

رد مقنع شافي وافي يحمل الكثير من كل شي ويمر على اشياء كثيره
فـ سطور قليله بس اللي يقهر اصحاب هذه الاقلام غزواتهم لمدوناتهم قليله شوي

بس اذ غزو كانت غنايمهم واجد وغنايمنا بعد لاننا فـ نفس السفينه

شكرأ لكم مليون وربي يسعدكم بجد تواجد البعض نعمه كتاباتهم متعه
يجعلون النقاط على الحروف بوضوح يسهلون كل كلمه لتصل بشكل اسرع

وبس والله .. حبيت اقول لهم شكرا ..

اخر كلمه وبقفل السطر بجد

الفن هو ان تعرف متى تتوقف عن مايزعجك لتبدا بشكل افضل من مكان مختلف
او بدايه افضل لا ننظر للعوده الى نقطه التوقف لنمر عليها بسلام

كلنا لنا نقط توقف احيان كثيره نشوفها لكن نكابر ونكمل والمفروض نوقف عندها
لنبدا من جديد لان الاستمرار سيزيد الطين بله

وبس والله .. سلامتكم .. جميع

خلونا اكثر عطاء لمن كانو اكثر ترحيب وامتاع وكرما

ســـلآم

كــ العاده امر المدونات الصبح بدري قبل اكتب هنا اي شي اشوف الشعب واخبارهم
وكل شي فـ خلوني ارحب بوردة الامل وشمس حياكم الله وحمد لله ع السلامه

وان شاء الله يكون تواجدكم اكثر وهربتاتكم ازود !!

المهم مبغى اطول عليكم لقيت لي سوال خونفشاري مقطوط في مدونه قريبه
من هنا وجبته على طول ياربااااه وناسه الاساله اللي كذا

لحظه بروح اجيبه !!

فكــرت .. وبقول ذا السوال له اكثر من وجهه واكثر من جهه فلخونا ناخذها
من هذه الجهات بشكل فلسفي اكثر

بس قبل بجاوب بدون فلسفه وبعدين اتفلسف معكم شوي

اجابتي ايوه والله لايعوق بشر وبقلب قوي بعد لاني لو ماعندي سالفه
مابديت من البدايه ذا الموضوع

نقطه ونهايه سطر

نجي للفلسفه الحين !!

فيه عالم كثير يعتقدون انهم يحبون او يحبون صح بس مايكون المجال بينهم يسمح
للتكمله او مواصله المشوار صح لانهم الى مايكون في احد منهم ماخذ الموضوع

بطريقه ماهي جديه بالشكل المطلوب او يكون عازم بس بعد مايوصول لمرحله
الجديه فـ الموضوع ينصدم بالواقع ويفرمل للاسف !!

اما لرفض اهله او خوفه وتتردده من رده فعلهم وبعضهم يفرمل اصلا قبل يكمل
لانه باختصار كان اكثر جبن من انه يكمل صح فـ يوقف !!

اشوف البنت ماعندها مشكله كبيره مثل الرجل لانها فـ الوضع الطبيعي بيجي لها احد ويتقدم
وقليل اللي بيسال انت ليه جاي تخطب بنتنا تجازونا ذا الموضوع من زمان

فـ الامور سهله بنسبه اكبر واهلها بيسالون عن الولد وباذن الله تكمل على خير
المشكله من عند الولد هذه من وجهه نظري بعضنا يتردد اكثر مدري ليه

يكون ماهو بقد الحب اللي بداه مع احداهن من البدايه لو كان قصده طيب وحلو
بس فـ اقرب تردد او شي تلقونه يوقف وينسحب وهنا ودك تفرمه !!

طيب نقول نقطه ونهايه سطر ونروح للوجهه الثاني

الحب اللي يكون عن طريق اماكن غير التقليديه مثل النت او اي مكان يحبون بعضهم فيه
هنا عاد امسك وخل وشيل وحط وتعال شوف انواع الشردات من الجهتين

شباب كانو او بنات يخافون يكملون لو انهم ميتين ببعضهم مدري ليه صراحه
بس هنا يكون الهرروب اسهل للبعض ويقول لك فتره وانسى كل شي حتى لو كان
سبب في القضاء على شي كبير فـ واحد منهم !!

نقطه ونهايه سطر

ونروح للوجهه الثالثه لو كان الحب موجود والبدايه جميله وحلوه وكلن فاهم الثاني
والامور طيبه ووصلت لين الخطبه واكمال الخطوه الاهم !!

هنا يجي تدخل الاهل فـ العائله المقابله اوذا من مواخيذنا او لا عاد للولد او للبنت
نفس الحكايه وهيا عاد هذه كيف تنحل !!

اعرف حالات كثيره صارت مثل كذا وتعنت الاهل وانرفض اكمال الموضوع وصارت اشياء مالها داعي
وتضرر الطرفين فيها بصراحه رغم جديتهم ثنينهم بس الاهل كانو اقوى وتعنتهم اجبرهم
على الافتراق

خلونا نضرب مثال :: شاب مثل اللوزه وبنت كفو وبنت حموله كلهم شغالين في القطاع الصحي
ممرضين حبو بعضهم من العمل واخذو سنين لين قرورو يتزوجون

وبوووووم كانت الطامه من الاهل والرفض القاطع لذا الموضوع
من اهل الزوج طبعا لان البنت اهلها ماعنده مانع اصلا

هيا عاد تعالو حلوها !!

وبس والله سلامتكم واعتذر ع الاطاله ولي رجعه ع الموضوع
لانه شيق بجد

ويالله كونو بخير .. واجازه باذن الله سعيده وونيسه وكل شي

ســــلآم

ممتن لكم جدا لطيبتكم لكرمكم لاحسانكم ولمروركم العطر كنت اليوم
جاي بقفل الصفحه بسرعه وبفتح الجديده كـ العاده !!

بس لقيت هذا الكرم معكم قلت لا بخلي الصفحه اطول وقت مبغى
اقلبها بسرعه من فتره طويله ماشفت لكم تواجد مثل كذا فـ الصفحه

تفاعلكم بجد رهيب واعجبني وخلاني ابقى بالصفحه اطول وقت
شكرا لكم دائما !!

نقطه ونهايه سطر

ونقول حياكم الله بـ ذا الاسبوع الاول بـ الاختبارات وبالتوفيق ان شاء الله
للناس اللي لسى تدرس واللي عندهم ناس يدرسون

ربي يكتب لكم الخير دوم

نمبر بوك !! (number book) ...

بعضهم ناسينه او متعلمين عليه قريب ومسوين زحمه
ماينفع كذا ياشباب تروح للبرنامج وتحط اسم احد وتقعد تاذي العالم
واذا طلع مو اللي تدوره قمت تحش او تصر الى انه هو فلان !!

لا مو كذا ياشباب اهدا من كذا بالله !!

ماعليكم نقفل السالفه

الحين المفروض نفرق بين الجد والمزح على طول ونحاول نبعد عن المزح
اللي كله ردح ومحاوله تمرير اشياء مالها داعي بنص المزح

ماينفع كمان كذا ياشباب روقنا بالله اهدا من كذا يعني

احيان بنص اوم السالفه ترى يقلب المزح جد ويتعكر الجو وعاد نقعد بها
فلخونا اهدا وكذا

وبس والله

المهم

قريت مره عن سالفه العمر ومتى كان الوقت اللي نقول فيه اننا بافضل حالاتنا
واجمل اوقات عمرنا وقت كنا اقوى متى يكون !!

خلوني اعلمكم بشي بسيط اي تفكير لشي ماضي مهما كان بيودينا معاه
لمكان واحد نحس فيه انه افضل ايامنا او خلونا نقول اجملها واسعدها

مع اننا ماندري عن الجاي من الايام واذ بتكون اجمل منها
فنقعد ع الاطلال اكثر ونحسب ان اللي مضى كان افضل من اليوم بكثير

بالنسبه لي اشوف اليوم افضل من اي وقت ثاني بكثير بدون تعطيل للذكريات
وحالاتها ومهما كان فيها من طلعات ونزلات وكذا

فرحنا بـ الذكريات الحلوه لازم مايعني اننا نعطل ايامنا او نتئاشم اكثر ببكره
احيان التنمر الذاتي اكثر انواع التنمر اللي ممكن نمر فيه !!

من تنمر بعضهم فـينا وكذا

فـ خلونا نكون ايجابيين افضل لايامنا الحاضره ومستقبلنا بس عاد هاه بدون تمادي
او غرور احيان حبنا لانفسنا يودينا بداهيه ترا انتبهوا

يمكن تطيح بذاتك وانت قاعد تنفخ فيها بزياده

فـ خلونا نهدي اللعب شوي مهما سوينا لازم يكون لنا داعم او سند نرجع له
على طول نكون مكملين لبعض بدون مانكابر ونقول مايحتاج

احيان ودك تطلع لك شخص من تحت الارض عشان تتكلم معاه وتفض فض له شوي
لا ننا بنرتاح كذا حتى لو اللي يسمع لنا ماسوى لنا شي مفيد
بس انه استقطع من وقته وسمع لنا وخلانا نقول اللي نبغاه !!

ردي هذا طويل وادري قلت لكم من اول ماكتبت اليوم ماودي اختم الصفحه واقلبها
فـ راح اطول بالرد شوي تحملوني !!

جمال الشخص احيان تعكسه روحه الطيبه تقبله لكل حالاتنا في كل حالاته بعضهم للاسف
ما يحاول يكون متقبل لك فـ كل حالاتك يعني اذ منفس ابعد عني اذ ماتضحك فارقن
وقيسوا عليها زي كذا !!

بعضنا يتعود على الشي الحلو بـ الشخص وينسى مع الوقت الاشياء السيئه فيه
لاننا بـ اختصار تمر علينا اوقات مخيسه ومطينه بستين طين

خلوها تعدي على خير وساعدونا نعديها على خير لا تصيرون من يزيد الطين بــله !!

نقطه ونهايه سطور

فـ الاخير

طولتها شوي اعذروني ع الاطاله بس محد قال لكم عطوني وجهه بزياده
لين تحسفت والله اقلب الصفحه

اجل احد يعطي راعين السوالف وجه من جدكم انتم

امزح امزح لتكونو بخير دائما مدري لي قاعد اتبسم اننا وجهي << لا تدف طيب
بس تذكرت سالفه مروري على بعض صفحات الصراحه عندكم

ياخي شي المرور على صفحات الصراحه حقت الناس
وشوي دعم وكذا ممتع بـ صراحه

وبس والله

ســــلآم