.
،



ســـلآم .. يازين الامطار .. وريحه المطر وجو المطر يازين الشتا
وصبحكم الله بالخير يالربع يالطيبين !!

كيف الحــال !

بجد مشتاق بقوه لذا المكان اللي مهما نغيب عنه الى مانرجع له
يارباااه وربي مشتاق للمكان بقوه مشتاق لكل شي فيه

وينك !

فيه بس احيان تاخذنا الظروف والعناد وشوفه النفس ونغيب ماندري الى
الايام مرت بسرعه لي شهرين الى شوي مادخلت فيذا

احيان نقول بنريح لنا شوي ونبطل شخبطه وسوالف وكذا بعد فتره مدري ليه
نعاند ونكابر وتعجبنا الغيبه ونطولها وهي قصيره مدري

بس خلونا نتفق للمكان وحشه وربي وله شكل ثاني وكل ماغبنا اكثر اشتقنا للرجعه
لي فتره كـ العاده قبل ارجع اخذ فتره اتابعكم بقوه هنا

امركم في صفحات الصراحه كثير اتفلسف وكذا احب وربي !!

عاد مع ذا الاجواء اللي تنعش وتفتح النفس لكل شي زين قلت يالد خلاص ارفع الستاره
وتنح نح وادخل اكتب جعل مايكتب الى انت

وهذاني معكم الله لايعوق بشر !!

تصــدقون

والله من امس من كتبت هنا ماني راضي انام زين وتفكيري كله وش اكتب وكيف اكتب
واصلا وش عندي اكتبه ووش ابي بالضبط ليتني قعدت فوق السطح ومانزلت

بجد ثلاث ميه فكره براسي ومليون خطه اشغلتني الرجعه

عشان كذا اقول لكم من زمان مشكله يوم تغيب فتره صعب بقوه يوم بترجع
تحسب حسابات مالها داعي وتكبر السالفه وهي بسيطه حدك تجي تكتب تلقى الامور سهله بشكل

ياحبنا للمبالغات ياحبنا للدراما !!

خلونا نقول نقطه ونهايه سطر لو بطاوعني بقعد اكتب لين بكره
لازم اوقف شوي واكمل برد جديد عشان الملل من القراءه للكتابات الطويله

يالله نقطه ونهايه سطور

لحد يغير القناه راجع بس بعدل الجلسه وبجمعني شوي احسني مشتت وكذا

وبس والله .. سلام

وربي وضعي نفس الصوره في راسي طاقه ايجابيه لو وزعوها على النفسيات
والمنفسين خلتهم كلهم يفلونها اليوم

احيان نفسك تكون مفتوحه لكل شي زين وودك بس تضحك لو احد مر وسلم
قعدت تضحك وانت ترد السلام بجد احيان من قوه الروقان

ودك تدور المنفسين وتكلمهم لين يفكونها شوي ويخلون عنهم النفسنه اللي مال امها داعي
مدري عشان الخميس اليوم ولا عشان الامطار والاجواء وللا عشان الرجعه بعد الغيبه

والله مدري بالضبط بس النفسيه فـ التوب ياربي لك الحمد !!

نقطه ونهايه سطر

كنت مقفل صفحه الصراحه لفتره من غبت لاني ماحب احد يرسل شي ومقدر ارد عليه
وبعضهم الله يصلحهم من تغيب انواع العتب والشرهات وكذا

فقل الصفحات عشان ماضطر ارد على احد او اخليه ياخذ راحته بالحش
اريحكم من الحش واريح مخي من استقبال بعض الكلام اللي ماله داعي

المهم بعد فتره يمكن الاسبوعين اللي فاتن فتحت الصفحه وارسلت للاصحاب اني فتحت الصفحه
تخبرون بعطيهم فرصه يحشون او يباركون ويقولون اللي يبغون

ثلاث عينات مرت عليا من اللي ارسلت لهم !!

اللي فرح وجا يتحمد لنا بالسلامه وكذا وذول العينه اللي ماندمت ولا راح اندم اني عرفتهم
وناس قعدو يعاتبون بطريقه حلوه وفيها كميه لطافه تجنن وربي وذول بعد ماندمت اني قلت لهم
العينه الاخيره اللي سوو نفسهم ماشافو شي ولا كاني ارسلت لهم وذول اللي ودي الارض انشقت وبلعتني

بس والله تبقون اصحاب واخوان مهما يصير

نقطه ونهايه سطر

فـ الاخير

خلونا دايم نحاول اننا نكون في افضل الحالات عشان نقدر نقول اللي نبيه بالشكل الافضل
مستحيل راح نقدر نوصل شي وحنا منفسين وكذا

عشان هكا خلوكم دايم في وضع زين قبل ماتتكلمون بـ الاشياء المهمه لانها ماراح توصل
بـ الشكل المطلوب اذ اخذنا فكره غلط قبل نتكلم

تكفون لا ياثر فيكم بعض الاقوال او الافعال اللي ماتعرفون اسبابها وتحكمون عليها
من جهه وحده بدون ماتكون عندكم كل التفاصيل او اغلبها

السمع احيان ماهو كل شي او السمع من جهه وحده !!

مدري وش قاعد اخربط بس المهم كلن يصلح سيارته

ام نقطه ونهايه سطور ونقفل ع الرد ولسى ترا فيه هربته بعد
لحد يغير القناه خليكم قريب

لاني بغيب بكره وبعده وماراح اكتب الى الاحد باذن الله
فلخوني اخلص سوالف كم يوم اليوم

وبس والله ... سلامتكم ..

وجا الفطور بالوقت اللي ودي اكتب ولسى ماخلصت بس ماعليكم
افطر وعلينا بالخير وباذن الله

اذ لقيت وقت رجعت وكتبت

يالله استودعكم الله ربي كونو بخير دائما
فـ امان الله وحفظه


ســلآم

آأإأآم بآأإأآك اقين آأإأآند اآإأآقين

كذا قاعد اشيل حروفي من الصبح اليوم من كثر الحماس مدري وين اوديها
حتى تو افطرنا صح فوول ومدري ايش ويدي كلها ريحه سمن

بس ماعليكم للان مدرك حروفي زين قابلت ناس فتحو نفسي وربي
السعاده احيان نلقاها في كلمه في حرف فـ اي شي

بس حنا احيان نسوي من الحبه قبه ليت الناس كلها تاخذ الامور باكثر سهاله
باقل توتر باخف عناد بشوي تسامح وتجازو اشياء مجرد الحديث فيها يجيك الحارق !!

والله ان الامور زينه وطيبه لو نعطيها اللي تستحقه ومانحاول نكون اكبر منها
مدري ليه احيان نصر اننا نكون في المكان الغلط والى ننصب انفسنا محامين وحاكمين وجلاد وحراس

خلونا ندع الخلق للخالق نتعامل معاهم بشوي حب وباكثر اخويه
اتركو عنكم مايسوكم واللي ماتعرفونه لا تحاولون توصولون له ماراح يفيد بشي

العيش بسهوله اكثر بفرح اكثر بمحاوله النسيان بمحاوله التصديق مهما كانت الروايه اللي انقالت لنا
ياليت مانحاول جاهدين اظهار ما لايحمد عقباه

قسم بالله افضل شي نسويه اننا نصدق اللي ينقال لنا ونتقبله بصدر رحب وبحب
وين المشكله مدري ليه احيان نتعب عشان نتعب بس كذا اتعب نفسي واتعب الناس معاي وفـ الاخير

انا اللي اتعب !!

من جد شعب ماله حل ندور التعب والعتب بشموع مانحاول نكون اكثر سعاده
وربكم الفرح احيان قريب مننا بس حنا نشغل انفسنا باشياء ثانيه تبعدنا عنه

مدري كيف اشرحها هذه والله

المهم انبسطو عيشو يومكم اسرع واسهل بدون تعقيدات وبدون تفكير كثير ببكره
خلو بكره لبكره وخلونا نستانس اليوم اكثر

وبس والله سلامتكم .. طولتها ادري .. بس وربكم مشتاق للمكان للي فيه لكل شي

فـ الاخير

شكرا للناس اللي قاعده ترحب من الصبح للناس اللي خلت للمكان شكل احلى
شكر للناس اللي قعدو وراي خلف الكواليس لين جابوني على وجهي هنا

شكرا لكم جميعا .. اذ فيه وقت كتبت بعد الظهر اذا مالقيت وقت
الوعد باذن الله الاحد وانتم وانا طيبين باذن الله

ســـلآم

آإأم بآأإأآك اقين وادور محارش ذا المره خلاص انتهى وقت السوالف
اللي مع نفسي الحين بسولف معكم شوي من هنا وهنا

في ثلاث اشياء بعلق عليها ع الطاير !!

اول شي اهني تنهيدهـ على جرأتها وقدرتها واقدامها وابداعها في التدوين الصوتي
ذا البنت من سنين تقول تبغى تدون صوتي واخرتها سوتها

ارفع لها العقال على قولتهم والله يعينها على بعض العقول صراحه
بس كمان خذي العلم وانا اخوك دايم الاول او من يبتكر شي شي راح يلقى معارضين له
او مشككين او متعصبين لبعض ارائهم وكذا

فـ قود هيد وماعليك !!

بس تعالو هنا اشوف الكتابه افضل لنا كملتقين من الصوت وكذا صح الصوت اريح للمدون
بس للمتلقي نسبه التركيز تكون اقل نسبه التعليق على الكلام كمان

مانحب نسمع واجد واذ سمعنا بثواني ننسى بدايه الكلام ونسى وش السالفه اصلا
مدري هو بس انا كذا او الغالبيه فـ اشوف الكتابه افضل للمدون

نجي للشي الثاني !!

نفر تعال قرب هنا وانا اخوك ترى صوت المرأه ليس بعروه ابدا ابدا صوتها ليس عوره
الرسول قابل النساء وكلمهن والصحابه من بعده كلهم كلمو النساء وعايشه رضي الله عنها

كانت تسال من الرجال وتجيب على اسالتهم
ومشايخنا الافاضل من ابن باز لابن عثيمن لال الشيخ كلهم افتو بان صوت المرأه ليس بعوره

صح انت جايبها بطريقه تتريق او تطقطق فيها بس لا مو كذا وانا اخوك
ليس في صوت المراه عوره دامها ملتزمه بادبها !!

فـ الاخير

نروح لابو الانوار نور الفجر صاحب القلم الفذ وملك الردود على المدونين
وين الاستمتاع في سماع صوت سيده تتكلم في موضوع عادي جدا

لا وانا اخوك والله مافيه استمتاع الى اذ كان استمتاع بطرحها ورايها وفكرها هذه انا معاك فيها
اما استمتاع للصوت فقط هذه معدومه وانا اخوك صح لو كانت تغني يمكن

تدرون عاد اننا احيان نحط اشياء في اماكن مو اماكنها ونكبر امور ونحلل بطرق غريبه شوي
اهدا من كذا ياشباب وانتم بعد يابنات اهدا من كذا بالله

دام كل الطرق تودي في الاخير الى روما دعونا نسلك الطريق الذي نختاره
لا تحاولون تفرضون الطريق على الناس خلوهم يسلكون طريقهم بكيفهم

وبس والله سلامتكم .. نفسي اجرب صراحه التدوين الصوتي لو مره
تنهيدهـ عطينا البرنامج لو اسمه حنا ندور عليه

شكلي بجرب مره بخرعكم شويتين

وبس الله .. سلامتكم

.. سلآم ..

وصبحكم الله بكل خير .. وسعاده وامل يتجدد بـ اسبوع افضل باذن الله
وبدايه اسعد من كل وقت ..

توى اصحى وتو اجي الدوام تاخير ابو ساعتين كـ العاده
مستحيل ما اتاخر اموت بالتسحب اول يوم بالاسبوع وناسه التاخير لو انها مو بيدي

بس كمان له طعم التاخير صحيت 9 وافطرت وعليا بالخير دام
خربت قلت خلني اخربها مره وحده واسحبها لين عشر ماعاد تفرق

اشين شي بذا الاجواء انك تصحى وانت نظام السمك التنفس مع فمك بس
مره ماهو وقت زكام مره مو وقتها بذا الاجواء لو زكمه ابو ريالين تخليك تعض الارض

وتعرف ان العافيه زينه وطيبه والجنه الجنه !!

ماعليكم الدرج كل انواع الحبوب والمضادات فيه صديليه مخليه بس امر وبلع
ثم البس وع الدوام

وربي ياخشمي تقول احد مولع فيه بكبريت شعور اهبل وربي !!

تدرون احيان التحلطم يجيب العافيه عشان كذا جاين اتحلطم عليكم من صباح الله خير
المشكله خوينا معاي هنا ومتاكد بيقرا كلامي

لاتوصل شي للمدير يابو


يالله خلوني اختم ذا الرد الحلطمي واكمل معكم بمضوع ثاني
بالرد الجاي !!


كونـ و بخيـ ر دائـمـا وبس والله .. سلامتكم

ســـلام

آإإأآم بآأإأآك

هذا الرد بخليه للهياط شوي فـ اللي مو عاجبه لايناظر
قبل اقول اي شي او ابدا الهياط الصباحي خلوني ابدا معكم بـ شكر الناس اللي تستحق

شكرا مليون .. طيف .. تنهيدهـ .. شهرزاد .. انه الحرف .. ورود المحبه .. خفائ
شكرا لكم مليون على الكلام الراقي والترحيب والتعزيز ونفخه الراس

جعل ربي يسعدكم ولا يوريكم بيوم مكروه شكرا مليون ع الكلام الراقي والمنتاز
فـ الصراحه فـ مدوناتكم في التقييم ربي يسعدكم ويحفظكم يارب

بجد احيان ماتدري وين تودي جمايل بعضهم معاك !!

بس بجد الكرم ميزه زينه وانتم وربي اهلها وناسها بجد لولا دعمكم وكلامكم الطيب
كان وربي ماشفتو خشتي فيذا ابد

ان شاء الله العدوى الطيبه تنتقل للشباب عندنا !!

نقطه ونهايه سطر

نجي للهياط الحين لحظه بجيب الصوره



الظاهر الاول في الوطن العربي اللي مدونته تتخطي الصفحه رقم 330 والاول اللي اللايكات
فيها تتعدى العشرين الف لايك !!

يارباااااه

وربي ان فخر ليا تكون هذه الارقام في مدونه وربكم ان اشوفها كلام فـ الهوا وسوالف
احيان كثيره مالها داعي !!

بس زي ماقلنا الكرم ماهو مستغرب من اهل الكرم وهنا ويشهد عليا ربي ماشفت منكم
غير الكرم والطيب والوجيه البيضا

بس رقم صعب احم احم !!

مع كل غياباتي وهجاتي وسحباتي ارقامي وصلت كذا
كيف لو اني مواصل معكم وماغيب كان وصلت المليون وانا اضحك << برا برا اقول

وبس والله سلامتكم

لي كم تعليق ع الطاير فيه كم موضوع ودي اسوي فاهم واقعد اتفلسف عليكم فيها
بس خلوني اخلص شغلي واشوف حل للزكمه اللي مدري من وين طلعت لي

وباذن الله نكمل .. فـ خليكم قراب ولحدا يغير القناه

ســـلام

يخاطبني السفيه بكل قبح........... فأكره أن أكون له مجيبا
يزيد سفاهة فأزيد حلما...........كعود زاده الإحراق طيبا




وصبحكم الله بكل خير يـا وجيه الخير ياربعي ياهلي بديت اليوم ببيت للشافعي
قاله من سنين واحسه جأي بـ الصميم

وعلاج فعال ومجرب للتنمر والمتنمرين !!

نقطه ونهايه سطر

تصدقون احيان عند البعض استغلال خطا لمفهوم ( الراي والراي الاخر ) اوالاختلاف
لايسفد للود قضيه فنلقاهم يخطئون اكثر من انهم جايين يصلحون

ينفرون اكثر منهم ويجلعون لتواجدهم شكل من الاستهجان
يكون مرورهم او عدمه زي بعض وياليت اصلا مايمر

بجد فيه اوقات ينرفع ضغطك وانت مالك دخل بالسالفه اصلا وكلامك فيها ماله داعي
ويمكن يخرب على اصحاب السالفه الاصليين تدخلك اللي مال امه داعي

احيان ينصب بعضنا نفسه مدافعا عن اشخاص ضد اخرين
او محاميا عن افعال بعضهم وهو ماله دخل اصلا !!

ياليت نكون اكثر ايجابيه من ذا الناحيه لانركز على الاخطاء واظهارها والتركيز عليها
لا والاستمرار في التذكير فيها بكل مكان كأن مافي هـ البلد الى ذا الولد

على قولتهم اجيك بكل مكان محاولا بشتى الطرق ايصال امر لك يمكن ماسمعت زين بالاول
فجيك بكل مكان !!

قمه اللا اخلاق ان نتابع فرض آرائنا في كل مكان ومحاوله مستميته لاظهار
مقدار خطأ احدنا اهدا من كذا ياشباب خلونا نهدي اللعب شوي

لك حريه ابداء رأيك بس مالك ابد حريه فرضه !!

لان بعضنا يعتقد انه بس ابدا راي والسلام وهو ماخلى مكان ماراح قال رايه في السالفه
لين الطوب اللي بالجدار عصب عليه وشوي ويطيح

اهداء من كذا ياهووو

فيه امور سهله وبسيطه لو نخليها تمر بسلام ومانقعد لبعض على التكه زي مايقولون
خلوها تعدي باكثر اريحيه بشوي فكر ايجابي

من الاخير

لا تفرض وصايتك على احدهم لا وفي اماكن المفروض اننا ناخذ فيها راحتنا على الاخر
يعني لاتجي بمكان عام وتدور خصوصيه او تبحث عن عرض عضلات

كلنا معرضين للخطأ احيان او اننا نقابل ناس تشوفنا نسوي شي خطا وهو مو خطا
بس نظرتهم له انه خطأ وهنا المشكله وربي !!

على مر العصور يامكثر ماطلعت امور وخطأ اصحابها من البدايه ومع الوقت ثبت
انها مو اخطاء بس الناس استعجلو فـ اصدار الاحكام !!

وخذوها مني دايم اصدار الحكم على الفعل اسهل بكثير من الفعل نفسه
يعني سهل اجي انتقدك بس صعب اني افكر وابدا في تنفيذ شي !!

عشان كذا النقاد اكثر وامتن لان شغلتهم سهله ومغير يتسدحون وينظرون
بعكس الناس اللي تشتغل وتسوي امور وتبتكر اشياء لو انها بسيطه

بس اسمهم سوو شي !!

يالله طولتها وهي قصيره خلوني اروح افطر لاني بديت اعصب وربي
لتكونو دائما بخير .. وبس والله

ســـلآم

تحديث !!

يبغالنا نسويه كل مامر وقت وحنا باتم الصحه والعافيه لازم نسوي تحديث لانفسنا
لافكارنا لتوجهنا لرسم بعض خططنا !!

نحتاج تحديث !!

نوسع شوي لمداركنا للامور اللي تمر فينا ليه نبقى على النسخ القديمه فترات طويله
ليه احيان كثيره نصر اننا نكون نفسنا العام وقبل العام والسنه الجايه

ليه مانسوي تحديثات !!

يبغالنا اول نتصالح مع انفسنا نعرف ان الغد دايم يحمل الجديد ليه مانروح معاه
ونحدث الامور للافضل طبعا

ليه بعضنا لسى متمسك بـ عادات اكل عليها الزمن وشرب وثبت للمره المليون
انها اشياء خااااااطئه وغبيه بعد

نحتاج تحديث !!

تصدقون اول ماكنت مومن بمقوله ان التعليم يفرق كثير بيننا في مستوى تفكيرنا
او طرحنا وكذا لاني اشوف التجارب كمان لها دور وتعلم احيان اكثر من التعليم بحد ذاته

بس اكتشفت انه لا التعليم يفرق بكثير بيينا !!

في الطرح في نوعيه الطرح في اختيار المفردات المناسبه عند الاختلاف مع احدهم
هذه الاشياء رغم بساطتها الى انها توضح الفرق الكبير بين المتعلم والغير متعلم

عشان كذا نحتاج تحديث على طول

المتعلمين قابليتهم للتحديث سهله جدا يستوعبون بسهوله ان الزمن يتغير بسرعه
فكيفون أنفسهم على التغير هم بعد يتاقلمون اسرع يجربون اكثر يبتكرون

عشان كذا حالوا كثير انكم تسوون تحديثات لانفسكم بكل وقت
ياخي بينك وبين نفسك انوي التحديث

وعلى مستوى فكرك وتفكيرك وكن راقي واكثر تعقل
بالمختصر : اوبن مايند :

فتح مخك يعني لا متى مقفله انت ووجهك

وبس والله سلامتكم .. يالله خلوني اشوفكم متحدثين على اخر اصدار
اللي يبغى شاهي وهو يتحدث يقرب جاي

كونوا بخير دائما .. وكونوا اقوى التحديثات يبغى لها قووه

ســلآم

سلام .. ماعندي شي بس بقول لكم ان ذا اخر رد بالصفحه
وبقلبها ان شاء الله اذ داومت بكره ..

يوووه يالذكريات احيان تجي بـ الوقت الغلط
قربو حبوب الفلوتاب مني لعلي انام

تدرون احب صفحات الصراحه اقيم الناس فيها واعلق على بعض كلامهم
بس ماش فيه ناس خربو شغلنا بالاستحدام السيء للصفحات

لين قفلوها اهلها او اهملوها بشكل كامل !!

والله اقولها وانا صادق يمكن ميه مره ادخل صفحه الصراحه عندي
وادري احيان كثيره اجيها فاضيه او مافيها جديد يفيد

بس اروح لها من اشغل الجوال صرت اروح لها اول شي
ياهي سعاده يوم القى احد مرسل له شي والله لو يعاتب يازينها

بجد احس بصفحات الصراحه راااحه

من رجعت لليوم كملت يمكن اسبوع كميه كلام وتشجيع وربي ترفع الراس
ياليت اقدر اكرم اصحابها بشي يستاهل قسم بالله ماراح اقصر

الطيب في الطيبين ماهو خساره .... وبس والله سلامتكم

صح قبل ما انسى ترا مو كل الشباب نفس بعض مو كلهم
اغلب همهم الانتقاص ممن يختلفون معهم

ويالله تصبحون على خير لقيت الفلوتاب وباخذها وبخمد
عسى بس اصحى للدوام وما اسحب

سلآم