الجزء الثالث...
ما خلف الاسوار....



نزلت بسرعه من سيارة الاجره..وتحمل بين طياتها كل ذرات الفرح..منذ زمن لم تراها..منذ مده لم تلمع في عينيها كل هذا الابتسامات..
فتحت باب بيتهم تصرخ..
:يمه ...يمه.. ابتهال..سلطان...يمه..
طلعوا لهم الثلاثه مع اخوانها..الصغار الأثنين..(بدر وداد)
والكل ينتظرها تتكلم مع ان كل شي واضح..ومكتوب على جبينها..ومرسوم على عيونها..
قاومت مدى دموعها وركضت لحضن امها تبكي من قلبها ..بكت بعمق..بكت ايام الحرمان..ايام الجوع..البرد..ايام الحزن والتعاسه..بكت دقايق الفرح المحسوبه بدقه وتنتهي بلمح البصر..
تأثرت امها كثير وقاومت دمعتها..الدمعه اللي قاومتها سنين وما تنزلها الا لمن تخشع له الابصار وتذل له الرقاب..رب الارباب..عالم الغيب..سبحانه الواهب العزيز الجبار..
ابتهال نزلت منها دمعة فرح وحضنت سلطان اللي راسم ابتسامه جميله على وجهه اللي كبره الدهر سنين قدام..
مدى استوعبت انها بكت الكل بعدت عن امها وهي تمسح دموعها والابتسامه مرسومه على وجهها..
:خلاص ايش فيكم..انا بكيت لانها ا نشا الله راح تكون اخر دمعه..لان ربي افرجها علينا وان شا الله من فرج لفرج..يله ابتهال بنسوي حفله و نعزم صديقتك شعوله..ونحتفل كلنا..
ام سلطان بفرح غامر: اللهم لك الحمد حتى ترضى ولك الحمد اذا رضيت ولك الحمد بعد الرضى..
ودخلوا كلهم غرفة مدى وابتهال واخوانهم بما انها الغرفه الوحيده غير غرفة امها..وسلطان ينام بالصاله..
صارت مدى تحكي لهم بشغف من اول ما دخلت الشركه..وعن مشاعرها ..حكت بكل التفاصيل وبكل حماس..وهم مستمتعين بسالفتها وفرحانين لفرحتها وطريقة وصفها...قلوبهم كانت تنبض بسعاده لاول مره من بعد زمن عاشوا حياة كلها الم وحزن ودموع..
سلطان :المهم كم راتبك؟؟؟؟!!
الكل لف على سلطان لان سؤاله وجيه..ولفوا بعدها على مدى بسرعه ينتظرون الجواب..
سكتت مدى شوي وحكت شعرها وطلعت لسانها بطفوله: ما ادري..ما سألت هههههههههههه

ابتهال رمتها بكتاب جنبها: يا الحولاء..اول شي تسألين عنه الراتب..ياربي على الدلاخه..
ام سلطان بحكمه: اكيد رواتبهم حلوه..اذكروا الله بس..
مدى بتفكير: اتوقع انه من 6 الالاف فما فوق..
ابتهال طلعت عيونها وتردد ببطئ: ست ..ست..الالاف؟؟؟
سلطان يعد على اصابعه.:يعني واحد .اثنين..ثلاثه..اربعه ..خمسه ..سته...ستة الالاف!!
وضحكوا مع بعض: هههههههههههههه
ابتهال: سلطان اتوقع بيصير عندنا فائض فلوس..يمكن نسوي مشروع خيري..
سلطان: انا بشتري لي نظارات شمسيه ماركه..
ابتهال بغباء: ليه؟؟
سلطان: يا ذكيه..ما تشوفين عيال العز لازم نظارات شمسيه..خلاص انا بعد ما عاد احتمل الشمس على عيوني هههههه
وضحكوا كلهم..
تم ذاك اليوم كله ضحك ..وتخيلات..وتخطيط واسع للمستقبل اللي بدا يشرق لهم..


************************************************** ***************

في مكان واسع..اراضي خضراء مزينه بكل انواع الورد الجميله..مع نفحات الهوا المنعشه..بالاجواء الربيعيه..على كراسي مغطيه بمظلات كبيره داخل اسوار القصر..
جالسين العائله كلهم يشربون الشاي ويحلون من بعد الغدا بالحديقه..
ضاري كان ماسك كوب الشاي حقه ورايح عالم بعيد عنهم وعن مناقشتهم لمحاضرة امهم اللي حضرتها اليوم الصباح..
دانا: ضاري...ضاري"ونغزته على كتفه" ضاري..
ضاري بدون ما يلف عليها: همممممم
دانا طالعة امها ولانا باستغراب ورجعت لفت عليه:ضاري انت معانا..؟
ضاري حط كوبه على الطاوله:عن اذنكم..
وتوجه لداخل القصر..متوجه لمكتب ابوه..
ام ضاري: ايش فيه؟؟
التوأم هزوا اكتافهم دلاله لعدم معرفة السبب...
ام ضاري بنظره عميقه"ايش عنده ولد السوريه..وش يخطط عليه؟؟"
لانا: يله مامي كملي..
دانا صرخت: لالي...no.... لالي.."وراحت لها"...لالي لا تخربي الورد يا شقيه...
وحضنتها وجلست مع امها اللي كملت السالفه وبالها مشغول..

&&&&&&&&&&&&&&&&&&&&&&&&&&&&&&&&&&&&&&


دق الباب على ابوه..
ابو ضاري..:تفضل..
ضاري بهدوء: السلام عليكم..
ابو ضاري: هلا ضاري وعليكم السلام..تعال..
ضاري سكر الباب وجلس قبال مكتب ابوه..وسكت..
ابوه اللي كان يقرا الجريده وينتظره يتكلم..بس طال سكوته...رفع عينه طالع ولده..حس ان السالفه مهمه..ترك اللي بيده..وفسخ نظارته الطبيه المخصصه للقرائه..
:ضاري...تكلم ايش عندك؟؟
ضاري بسرعه بس ما زال بنفس هالة الجمود: يبه انا لي عم؟؟؟
وقف الهواء عن الحركه عند ابو ضاري...السؤال ابدا مو متوقع..وايش جابه على باله..هذا شي اندثر من سنين..هذا شي قتله الماضي..بس شكل ما دفنه الحاضر..ويبي المستقبل يفضحه..
ضاري لاحظ ان وجه ابوه انخطف..وعرف ان السالفه فيها إن...
كر السؤال على ابوه وهو مركز على ردة فعله: يبه......انا لي عم؟؟؟
طالعه ابو ضاري..كل الحروف ضاعت...كل الاعذار اختفت من قدامه..
"مستحيل اهدم اللي بنيته سنين..مستحيل اضيع جهد وتعب سنين..مستحيل اجدد الماضي وألمه وجعه..ضاري ايش جاب هالفكره في بالك ما انتهينا من هالسالفه.."

كان هذا الكلام اللي دار في نفس ابو ضاري..وذكريات الماضي تتضارب قدامه..
قام ضاري من كرسيه وقف وحط وجهه بوجه ابوه والفاصل بينهم المكتب وضاغط على اصابعها اللي ساندها على مكتب ابوه وهو ينتظر اجابته..
:يبه....هو حي ولا ميت؟؟.....عنده عيال ولا لأ؟؟؟
ابو ضاري بدأ يختنق ما عاد يحس ان فيه اوكسجين..فتح ازرار ثوبه الاول والثاني..
:ضاري....احم....هو لك عم...بس ....بس انه مات من سنين وماله عيال لان زوجته ماتت معاه..
ضاري سكت انصدم من اللي قاله ابوه" لي عم ومات؟؟؟ طيب ليه ما قالوا لنا...ليه ما جابوا طاريه...اصدقك يبه ولا لأ؟؟"

قطع عليه حبل افكاره صوت ابوه الحازم اللي فيه نبرة تهديد: ضاري انسى السالفه ولا تفتحها ابد..وخصوصا قدام امك فاهم..وشوفني حذرتك وقلت لك يا ضاري انسى انسى السالفه سمعتني؟؟؟!!!
ضاري بشده: سالفة ان عمي مات ..هذي ما راح اصدقها...لو انك قايلها واحنا صغار يمكن اصدقك وتمشي علي..لكن انا بسكت وارجع اسأل عنها ابرجع..لاني ابيك تقولها بدون ما انبش من وراك..
وطلع وسكر الباب...وترك ابوه في حيره..
:ايش دراه عن عمه...انا من زمان وانا قايل اني وحيد امي وابوي...يكون سمع شي عن القصه؟؟ يكون شافه...؟ ولا سؤال عابر...ضاري الله يهديك..الله يهديك لا تنبش الماضي اتركه يروح في حال سبيله ما صدقنا على الله ان السالفه تنسى وتنقضي...ولا راح تودي ابوك في داهيه............................

%%%%%%%%%%%%%%%%%%%%%%%%%%%%%

خرج ضاري بسيارته الرنج روفر "سبور" وفي عقله مليون فكره وفكره..سالفه وسالفه..
:ليه يبي يخبي السالفه...ايش صاير ....البنت اللي اليوم تكون بنت عمي...
رجع شعره على ورا وشد عليه..وزفر من قلبه..
"هذا اللي مختبيته يا مرت ابوي..هذا اللي تخافين منه..راح اعرفه...صدقيني راح اعرفه"
وصارت الاشاره خضراء وضرب هرن بقوه وصار يسب ويلعن ويشتم أي واحد..
ما حصل نفسه الا تعدا مدينة الرياض وما حوله الا اراضي يابسه عطشانه تنتظر المطر يرويها..
"راح اعرفها...راح اعرفها..يا ...يا امي راح اعرفها"
قالها بكل استهتار....

$$$$$$$$$$$$$$$$$$$$$$$$$$$$$$$$$$$$$$$$$$$$$$



صباح الخير..
من قلبي الى روحي..
صباح الخير..
عدد الامي وجروحي..
صباح الخير..
يا يوم جديد ابتسم وبدد همومي..
صباح الخير..


>>>>>>>>>>>>>>>>>>>>>>>

جالسين على نفس الطاوله بنفس الترتيب..كل الاوضاع هاديه الا بين اثنين مو راضيه تستقر..
ابو ضاري اللي اتعبه وهده كيف يمكن يكمل ما بناه سنين وما يجي ضاري ويخرب عليه كل شي...
قال بصوت واهن وهو يحاول يغير جوه: هاه اريامي..وينك امس؟؟..ما شفتك على العشاء!!
اريام رجعت نظاراتها الطبيه بشكل لا ارادي: والله يبه كنت مشغوله ونمت على طول..
ابو ضاري بابتسامه: الله يقويك يا بنيتي..
طالعوه التوأم وقالوا بصوت واحد: واحنا؟؟؟
ضحك ابو ضاري : هههه انتوا الله يقويكم ويوفقكم كلكم..
ام ضاري: يله عاد خلصوا..لا تتأخرون..
التوأم مع بعض: فديتك..دادي...
دانا: لا نا لا تقلديني..
لانا: انتي اللي لا تقلديني...
دانا: لا انتي..
لانا: لالالا انتي.....
ام ضاري بعصبيه: بس...ما احنا ناقصين على هالصباح..
ضاري طالع اللي تعتبر في مقام امه...بس ماقد صارت له ام..ولا حس بحنانها ابدا...وما شاف منها الا التفرقه بينه وبين عيالها وما يكن لها أي مشاعر وديه..وما قد حس ان في بينهم صله...
وقف:دايمه....انا طالع..
التوأم بعد ما راح ضاري: ايش فيه؟؟؟
ام ضاري واللي قلبها ما تطمن من حالته امس وخصوصا انه كل شوي يطالعها بنظرات غريبه كل ما تكلمت... حبت تتاكد..
:ابو ضاري فيه شي حاصل بالشغل...
ابو ضاري اللي ارتبك: ايوه في صفقه وخايف يخسرها..
ام ضاري هزت راسها بتفهم وتحاول تقنع نفسها ان مافي شي يخوف...


##############################################

بالسياره مع السواق.....
لانا بتردد: دنو...لو ما احضر المدرسه اليوم ايش يصير؟؟
دانا لفت عليها بسرعه ورعب: يعني وين بتروحين؟؟
لانا بلعت ريقها: اممم بروح اتمشى...
دانا بتحذير واللي عارفه وين بتروح وعشان ايش: لانا انتبهي تسوينها...ترا راح اقول لامي سامعه...!!
لانا بطفش: اوف منك....ليه انتي معقده..
دانا بهدوء: لانا لا تحاولي....لا يعني لا .....


************************************************** ****************

في الباص.....

وفي نفس مكانها امس...
يطالعون البيت اللي كل يوم يطالعون...
ابتهال: يارب يطلع يارب يارب..
ومشاعل تدعي معاها: يارب..
ابتهال صرخت: طلع طلع..
وكلهم لزقوا بالشباك..
ابتهال: يالبيه....وبعدين معاه..."وتنهدت"
مشاعل: أي والله وبعدين ...
ثواني الا كل وحده جالسه بمكانها بادب بما ان اخته جات...
ابتهال بعد ماجلست مرام لفت عليها: مرام....اليوم مسويه حفله صغيره ايش رايك تجين؟؟؟
مرام: بمناسبة ايش؟؟
ابتهال: اختى مدى توظفت...
مرام بفرحه: والله!!...مبروك..وبحاول اجي..
ابتهال: لالا مافيه تحاولين لازم تجين...
مرام : خلاص اوكي ولا يهمك..
مشاعل مسويه زعلانه: ابتهال لا تكلميني اليوم ابد..
ابتهال وفيها الضحكه: لا ميته عليك عاد..تكفين حني علي..
مشاعل: ليش ما لزمتي علي مثل هذي المغروره...!
ابتهال ضحكت:ههههههههه شعوله فديتك اصلا انتي الاساس وبدونك مافي حفله هههههههه لان اصلا مافي الا خشتك قلت ازيدها ثانيه عشان نحس بتغير شوي...
مشاعل ضحكت: ههههههههه يليق علي التغلي صح...
ابتهال كشرت: ياشين وجهك بس..قالت ايش قالت يليق...استريحي بس هههههههههههههه


&&&&&&&&&&&&&&&&&&&&&&&&&&&&&&&&&&&&&&

مدى دخلت مكتبها...وبكل حماس حطت اغراضها وبدت تشتغل ومعاها هوازن وعلياء يساعدونها..
مدى اللي دخلت بجو الشغل ومره متحمسه معاه لانه نفس دراستها وصاير تطبيق لها...
وبعد مرور خمس ساعات من الشغل صار وقت البريك....


البنات يسولفون وهم نازلين للكافتيريا اللي تحت...
علياء: مدى تكفين تخيلي انك مكان هوازن ههههه..
مدى استحت: هههههه ما راح تخيل..
هوازن بعصبيه مصطنعه: وانتي مخليه حياتي الزوجيه ملطشه عندك..وايام شهر العسل مضحكه عندك....يا جعل ربي يبلاك برجال يعذبك..
علياء برومنسيه: هو خليه يجي بعدين نتفاهم هههههه
وضحكوا البنات عليها...
مدى: مستعجله على ايش؟؟؟على الشقا!!
علياء: خلاص مابقى في العمر كثر ما راح ..عمري 27 سنه وما تزوجت حرام عليك..
مدى انصدمت:وربي ما بان عليك..
هوازن بعياره: الله يخلي الميك اب...وكريمات للتجاعيد حول العنين..
علياء ضربتها: يادوبه انا اصغر منك..هذي الكريمات لك انتي وكرشك..
هوازن ضحكت عليها وهي تجلس على طاوله فاضيه:حبيبتي لسه طالعه من النفاس
اصبري علي شويه وراح تروح..
مدى: هوازن كم عندك؟؟؟
هوازن: قلت لك عندي بنوته قمر مثلي...هههههه
مدى: ههه الله يخليها لك...
علياء: الا هوازن...........وسكتت..
هوازن ومدى لفوا يشوفون ايش تطالع علياء وهي فاتحه فمها..
كان واقف بهيبته يسلم احد مدراء الشركه ويبتسم له..
علياء بحالميه: بنات...لو يجيني واحد مثل هذا والله ما اقول لا..
هوازن ضحكت: لا عاد تكفين وافقي...
مدى سكتت شوي طالعته صحيح جمال اخاذ وساحر وابتسامته لها مفعولها على أي بنت... بس تحس ان غروره يغطي على جماله ويقبحه بنظرها..لانها تهتم بالجوهر الداخلي مو المظهر..
طاحت عينها بعينه..ارتبكت مدى وعلى طول لفت للجهه الثانيه..
علياء بدهشه: بنات يطالع طاولتنا؟؟؟
هوازن بنفس الغرابه:كأنه....!!
علياء بيغمى عليها: بنات مو كأنه جاي لطاولاتنا...بنات الحقوا علي الحقوا علي عطره وصل قبله خلاص انا ذبت...
مر من عندهم...وبطرف عينه طالع طاولتهم وركز على اللي تتوسطهم وراح...
مدى تأكدت ان النظره الاولى كانت لها...قلبها بدا يخفق..لالا مستحيل يطالعني...اكيد علياء...علياء كاشفه ويطالعها...اكيد..وبلعت ريقها..



ضاري بنفسه"يكون هذي بنت عمي....يكون؟؟"

%%%%%%%%%%%%%%%%%%%%%%%%%%%%%

بالعياده النفسيه..
شالت ملف المريض المقصود..خططت امس بليلتها كيف راح تقابله..وايش راح تسأله...
ودقت الباب ودخلت...
:صباح الخير سامي..."وهي تطالع ملفه وتقرا اسمه"
طالعها سامي وصد عنها..
بلعت ريقها اريام...ودخلت وسكرت الباب..وقالت بنبرة تشجيع
:لا ما شا الله اليوم صحتك ميه بالميه..
مافي تجاوب منه...
جلست على الكرسي القريب من سريره واخذت الورد اللي جنبه وشمته:واو...مره روعه شكل اللي جابه لك ذوق..
طالعها سامي وبنظرات غير مركزه وكانه ما يدري ايش يقول وتخربط..
اريام ما زالت بنفس النبره الفرحه والتشجيعيه:ايوه يا استاذ سامي...كيف صحتك؟؟
سامي ببرود: ماقلتي من شوي انها كويسه..
اريام: واخيرا..ابي اسمع صوتك..
سامي بعدم اهتمام:و ليه؟؟
اريام: لاني ابي اسمعه..
سكت سامي..
اريام:طيب من زارك اليوم؟؟
سامي وهو يتغلف بالبرود: طليقتي....
اريام انصدمت: طليقتك؟؟؟...."حاولت تضبط انفعالها"...سوري اقصد معليش على التطفل..
سامي ابتسم بسخريه: لا عادي خذي راحتك..من لما عرفت اني مريض..بال....بال.. احم احم"حس بغصه بحلقه"..بالسرطان وهي قرت الطلاق..
اريام ما انصدمت كثر ما حنت ورحمة هذا الشخص اللي في وقت حاجته تركته اقرب الناس له..
سامي لف عليها لما لاحظ صمتها: عادي ايش فيك...لا تنصدمي من الحياة..طلاقها مو شي الكبير عندي..عندي اللي اكبر منه..وعندي اللي اوفى منها ..مرضى اكثر شي وفاء لي في حياتي بيلازمني حتى مماتي..
اريام حاولت تجمع نفسها..هي جايه تزرع الامل والتفاؤل فيه..وتخليه يرضخ للعلاج..
:سامي انت لازم تعالج...لان حتى هذا المرض ممكن يخونك..هو قاعد يفترسك..
سامي :قلتيها يمكن...ويمكن لا...يمكن هو يريحني..اتوقع ان لازم شي يوفي لي..
اريام: سامي ابدا هذا ابدا مو منطق انت ما شفت نسبة اللي تشافوا منه..كثير..لا تضعف لازم تحاول..لازم تحاربه وتقضي عليه..
سامي: هذا مكتوب لي وما راح يتغير...ريحي نفسك ما راح اعالج..
اريام بشده شوي: وانت ما تعلم الغيوب...ربي في لحظه يغير من حال الى حال..لاتيأس ولا تقنط من رحمة رب العالمين..الموت حق على كل منا..بس لازم الانسان يسعى للشفاء ويحاول...لان نفسك وصحتك عليك حق ولا؟؟
سامي سكت..
اريام اعجبها سكوته وكملت عليه..
:لو وقف كل واحد عن المحاوله ويأس مثلك..ما اتوقع يبقى احد من البشر...سامي انت اهون من غيرك..على الاقل ..انت تمشي..تاكل...وتشوف وتقدر تعالج وتقضي عليه..فيه ناس خلاص قضى عليهم وتمكن منهم لانهم اعطوه المجال..
سامي: بس........
اريام: لابس ولا شي ...انت حاول وحاول ...وحاول...لحد ما تنجح..وكل شي مكتوب ومقدر..
سامي سكت وبداخله"نفس النتيجه....نفس النتيجه.."
اريام: توعدني ترضخ للعلاج..
سامي: ابي افكر...
اريام ابتسمت على انها وصلت للي تبي: اوكي فكر وخذ راحتك ...وقولي اذا وافقت..
سامي ابتسم:واثقه اني بوافق..
اريام: ايوه واثقه...عن اذنك الحين....وبمرك اخر الدوام...
سامي طالعها بدون ما يتكلم لحد ما طلعت وبعدها شرد في افكاره..

$$$$$$$$$$$$$$$$$$$$$$$$$$$$$$$$$$$$$$$$$$$$$$


وقت المغرب.............

في بيت ابو سلطان...كان الاستعداد للحفله بسيط..طبخت ام سلطان كم اكله..اشترى سلطان العصير..وابتهال ومدى عملوا الكيكه...
واجتمعوا البنات بالصاله مع امهم..وسلطان طلع برا البيت بعد ما حذرهم انهم يبقوا له من الكيكه والعصير..
وصلت مشاعل: يا اهل البيت...
ابتهال: هلا حياك...مسويه سنعه..
مشاعل: ههههههه نفسي يوم تمدحيني..
ابتهال: هذا مدح يا ذكيه..
مشاعل: طيب وخري خليني اسلم على خالتي ام سلطان...ام الغالي..
ابتهال: ههههههه الله يعينك يا سلطان لو فكرت فيها...
ام سلطان: هلا والله...يا حيا الله من جانا..وشلونك يا مشاعل؟؟؟
مشاعل: الحمدلله تمام يا خاله...
ام سلطان: ايش اخبار جدتك؟؟
مشاعل: تسلم عليك يا خاله...هلا والله بالموظفه المستجده ههههههه
مدى حضنتها: اهلين..
مشاعل بحب: مبروك يا قلبي تستاهلين والله..
مدى: الله يبارك بعمرك..تسلمين يا قلبي..
ابتهال غارت...وبعدتهم عن بعض: خلاص عاد طولتوها..
مشاعل: ههههه يا قلبو على اللي يغارون..
ابتهال: ما غرت عليك...انا اغار على اختي..
مدى: ايوه واضح..
مشاعل كتفت ايدينها: ابتهال ما ادري متى بتعترفين بانك تحبيني؟؟؟
ابتهال: اذا حجت البقره على قرونها...لاني ما احبك ..
وسمعوا دق على الباب..
ابتهال نقزت: مرام جات......"وراحت تفتح لها"......اهلين مرومه..
مرام: اهلين..
ابتهال سلمت عليها: حياك....حياك يا قلبي..
دخلت مرام وسلمت على ام سلطان وباركت لمدى..
وجلسوا يسولفون ويضحكون..
جابوا الكيكه بيقصونها مع بعض...وبدر وداد متحمسين للكيكه..
سمعوا الباب الخارجي انفتح...
ام سلطان استغربت: سلطان رجع؟؟؟؟
مدى اكثر استغراب: لا ما اتوقع ....يدري ان عندنا بنات..
ابتهال طالعت مدى بخوف: لا يكون؟؟؟؟
قامت مدى وام سلطان اللي فهموا قصد ابتهال وتفاجئوا ان اللي في بالهم صحيح..
وحطوا ايديهم على قلوبهم...بما ان سلطان مو موجود والبيت فيه بنات...





@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@

نهاية البارت...
للكاتبه بقايا شتات

الجزء الرابع..
ورود ذابله...

في غرفتها الورديه..الناعمه..جالسه وفاتحه اللاب حقها وتكلم صاحبتها على المسن..
دانا:هاي لمو..
لمياء:هلا..هايات حبو..
دانا:كيفك؟...وينك من زمان عنك؟؟
لمياء:والله مثل ما انتي عارفه علمي ومافي مجال اني اشوف احد ههههههه..
دانا: هههه الله يوفقك ان شا الله..
لمياء:الا دنو شوفتي البنت الboy..؟؟
دانا تذكرتها وكشرت:ايش فيها...؟
لمياء:صايره سالفة البنات..واغلب البنات منهبلين عليها..
دانا بقرف: ووووع...بصراحه ما عجبتني بالمره..
لمياء: عاد البنات عاجبتهم شخصيتها..ومسميه نفسها فيصل..
دانا: ههههه الحمد لله والشكر بس..اكيد انها مجنونه رسمي..
لمياء: ههه معاكي حق..ايوه سولفي بس وخليها عنك..


************************************************** ****************

لانا نزلت بعبايتها..
ام ضاري: على وين؟؟؟
لانا:ماما انا وصاحباتي مجتمعين بالمول..
ام ضاري: واختك وينها؟؟
لانا: وانا ايش علي منها..
ام ضاري: لا تتأخرين الساعه 8 بالضبط تكوني بالبيت..مفهوم؟؟
لانا بطفش: مفهوم مامي...يله باي..
ام ضاري مسكت الريموت تقلب المحطات بطفش لان اليوم ما عندها شي..


&&&&&&&&&&&&&&&&&&&&&&&&&&&&&&&&&&&&&&

قامت مدى وام سلطان اللي فهموا قصد ابتهال وتفاجؤا ان اللي في بالهم صحيح..وحطوا ايديهم على قلوبهم.بما ان سلطان مو موجود بالبيت...والبيت فيه بنات...


دخل يترنح بمشيته ويدندن..
مدى بلعت ريقها: يمه لهيه شوي لحد ما ندخل البنات الغرفه..
ام سلطان ارتجفت كلها..وحاولت تضبط اعصابها:اتركيه علي ..
دخلت مدى الصاله ووجهها مخطوف..
وبصوت مرتجف: ابتهال دخلي البنات الغرفه..
ابتهال اختفى الدم من وجهها: ايش جابه؟؟؟"وفزت من مكانها"..بنات بسرعه..بسرعه ادخلوا الغرفه...
مشاعل قد تكرر عليها الموقف..وبدا قلبها بالخفقان..
اما مرام اللي ما تدري ولا فهمت ايش السالفه قامت والخوف مالي قلبها..
ابتهال دخلت البنات بسرعه الغرفه..وسكرت الباب وقفلته مرتين وتسندت عليه وهي مغمضه عيونها ..وتبلع عبرتها لانها عارفه ايش راح يصير..
في الممر كانت واقفه ام سلطان ..
حاولت تتكلم بثبات:ابو سلطان ايش جابك؟؟
ابو سلطان اللي صار جنبها: ايش عليك مني هذا بيتي.."ودفها"..وخري عن وجهي..
مدى راحت بسرعه لامها تسندها لانها صقعت الجدار..
دخل ابو سلطان الصاله..شاف الاكل والعصير والصحون,,,وبدر ووداد جالسين يطالعون الكيكه بشغف اطفال بريء..
لف وعيونه كلها شر: كان عندكم احد؟؟
ام سلطان بارتباك: كان عندنا..عندنا....
ما امداها تكمل جملتها الا بدا الاسد بالزئير..
:انا كم مره قلت لكم ما ابي احد في بيتي ..كم مررررررررررررررره؟؟..يعني ايش تعانديني...اكيد تعانديني...
نزل واخذ الكيكه ورماها الى ان صكت في الجداروعيون الطفوله والبرائه تتابعها..بعيون مليانه حرمان..الم..ودمعة قهر..
ودودا بطفوله: ليه بابا؟؟؟؟
مسك وداد من بيجامتها ورفعها بيد وحده:حتى انتي تراديني...؟
بدر بدا في نوبة بكاء حاده..بكاء خوف من الكائن الهايج اللي قدامه ..
رمى بنته بكل قسوه على الطرحات الموجوده بالصاله..ودز كاسات العصير برجله لحد ما انكسبت على الارض..
وتوجه لام سلطان ومسكها من شعرها : انا كم مره بعلم فيك.هاه..؟؟؟
ام سلطان الموقف مو غريب عليها..بس لها فتره ماشفته بالهيجان هذا..
مدى وهي تحاول تمسك يد ابوها: خلاص يبه..خلاص شي صار وانتهى..وما راح يتكرر..
طالعها بعين قويه: انتي اسكتي ولا حرف..وانتي"وشد شعر ام سلطان"..مره ثانيه بتكسرين كلمتي اذبحك..تعرفين ايش معني اذبحك..؟؟
ابتهال في الغرفه حطت ايدينها على اذنيها ..ماتبي تسمع شي..ماتبي..خلاص ملت..تعبت..ماتبي تفتح عيونها وتشوف وجه مشاعل ومرام..ماتبي تشوف نظرة الشفقه..ولا الخوف..ولا حتى الرحمه..ماتبي تكون ضعيفه عندهم..تمنت ذيك اللحظه لو ابوها ميت..لو ما كان موجود على الحياة احسن..
مشاعل بدت تبكي..اول مره تشوف ابتهال كذا..دايما قويه..ما تخاف..ما تهاب ليه صارت كذا ليه!!
مرام..ما تعودت على هالمواقف عيشتها افضل بكثير منهم..على قد ما رحمتهم على قد ما كانت تبي تطلع من هالبيت بسرعه...
ابو سلطان ما زال في قمة هياجانه..ويصرخ ترك ام سلطان وراح للصاله ..للمطبخ ..صار يتحرك بجنون..بيكسر كل شي حوله..يبي يحول كل شي قدامه لدمار..
مدى تطالعه بقوه وهي سانده امها عليها..بس ما تقدر تسوي شي..
ثواني وانفتح الباب..دخل منه وهو يلهث من الركض..
:هو داخل؟؟؟
ابتسمت له مدى لانه المنقذ الوحيد: ايوه..الحمد لله انك جيت صاير بركان..
سلطان ابتسم يطمنها: قال لي واحد من العيال شفت ابوك رجع...وين البنات؟؟
مدى: بالغرفه مسكرين عليهم..
سلطان: انا بتصرف..
اخذ نفس عميق لان بيجيه من الضرب ما يكفيه بس لازم يتصرف...دخل على ابوه وهو واقف ويتنفس بسرعه..وحوله اغراض مكسره ومبعرثه..
شده بقوه:يبه تعال معاي..
ابو سلطان: اتركني يا الولد العاق..اتركني..
سلطان شد ابوه اكثر: تعال معاي بيه تعال..
ابو سلطان وهو يحاول يفلت منه ويدفه عنه: قلت لك اتركني يا حيوان ياxxxxxx..يا ابنxxxxxx..
سلطان سحبه بقوه بالقوه: خلينا نتفاهم برا..
ابو سلطان وهو يحاول يتحرر من سلطان..ضربه من جنبه..
سلطان تألم وخف شده على ابوه...
وعلى طول استغل ابوه المه وصار يضربه من كل مكان..
سلطان عرف لو ترك له المجال بيروح فيها فا مسك يد ابوه وثبتها بقوووه..وشده اقوى وحركه قدامه وهو يحاول يتجنب الضرب قدر الامكان..
سلطان: بعدوا....بعدوا...وسكروا الباب وراي...
مدى وام سلطان..بعدوا على طول لحد ما طلع سلطان بابوهم...وسكروا الباب...
تنفست مدى بعمق..وحطت يدها على راسها بتعب وهي تحاول تقوي نفسها عشان اللي حولها...
ام سلطان جلست على الارض بالصاله بتعب..
مدى: احم احم..بروح اقول لابتهال تطلع..
وهي تمشي تفكر بالاهانه اللي سواها ابوهم لهم..قالوا ان الابو سند وعز..بس هم ما شافوا منه الا الذل والهوان..
دقت الباب: ابتهال....ابتهال خلاص راح..
ابتهال بسرعه وقفت وفتحت الباب..وضمت اختها وهي تبكي..
مشاعل اشرت لمرام انهم يطلعون ويروحون بيوتهم..وفعلا طلعوا بسرعه..
بعد دقايق..
كان الهدوء مالي المكان..
مدى جالسه ترتب اوراق شغلها وتهلي نفسها..
ابتهال ضامه رجولها لصدرها وتحاول تمسك دمعتها..
ام سلطان اخذ عقلها التفكير" انا حرمه كبيره ويصير لي كذا...ما فكر بسني..ما فكر اني زوجته..ياريتك ترجع ابو سلطان الاول..حسبي على من كان السبب حسبي الله ونعم الوكيل"
بدر نايم على الارض ..
وداد تطالع الجرح بإيدها خلفته اصابع ابوها وامتلت عيونها دموع..
:ماما....شوفي بابا ايش سوى..."وقربت عند امها"
الثلاثه طالعوا الجرح العميق شوي..
ام سلطان..مسكت ايد بنتها وباستها وضمتها بحضنها الدافي..
ابتهال لفت على مدى والالم ياكل قلبها...
مدى طالعت ابتهال وكأن الشي عادي...ورجعت لاوراقها وهي ما تدري ايش مكتوب فيها...


%%%%%%%%%%%%%%%%%%%%%%%%%%%%%

في المول..
لانا ومعاها شهد..طبعا التميز واضح عليهم..عباياتهم مثل بعض وكلها تلمع بالكرستال..وكل وحده مكتوب على عبايتها من ورا الدلع حقها"لاني..شوشو"..ومفتوحه من قدام..كاشفين والشعر نصه طالع..اكمام العبايه مرفوعه واليد مليانه اساور حلوه وملونه..
جمالهم تشهد به جميع العيون..صح لانا اجمل بكثيييير من شهد اللي جمالها ناعم مو جذاب مثل لانا..
وابتسامتهم البيضا تفتن كل القلوب..
لانا: شوفي هذولي من الصبح ورانا..
لفت شهد: ههههه مصدقين بنعطيهم وجه..
لانا بغرور: ولا واحد حلو..
شهد: وين اياد؟؟
لانا: اوه انتي قديمه..غيرته طلباته كثيره..
شهد:اها وانتي بدون شي الحين..؟
لانا بضحكه ماسخه:ههههه لا مستحيل...مو بس واحد الا كم واحد....وانتي؟؟
شهد: انا ما عندي احد كلهم تركتهم باخذ بريك..
لانا: ههههه حلوه بريك..
وجلسوا بكوفي على الكراسي اللي قدام المحل وهم عارفين انها مو للعائلات..
وكل العيون تطالعهم منهم المعجبه ومنها الناقده..ومنها العابره اللي ما همها تصرفاتهم المراهقه..
:اروح انا مع الدلع..
لانا لفت عليه:oh my god...انت شوفت روحك بالمرايه قبل لاتجي هههههه.
الولد: افا...ما عجبناك...والحلو الثاني بعد ما عجبناه؟؟
شهد طالعت لانا يمعنى ايش اقول..لانا اشرت لها تطنشه..
ونفذت شهد الاوامر..
لانا بطفش: اليوم المول أي شي..
شهد:جايين بدري مره..
لانا: كله من دنو ما رضت تجي..
شهد: ليه؟؟
لانا بقهر: ما عندها هالحركات ولا تحبها..
شهد تنمت انها صادقت دانا بدال لانا..لكن تدري ان حياتها وسمعتها معلقه بيد لانا..ولا تقدر تعاندها.. ولا تفكر ترد لها طلب..

$$$$$$$$$$$$$$$$$$$$$$$$$$$$$$$$$$$$$$$$$$$$$$

سلطان اخذ ابوه على مكان بعيد شوي عند البيت وجلسه..
جلس ابوه بتعب بعد ما خلصت كل طاقته..وانسدح بالشارع..
طالعه سلطان بأسى..حس انه هو ابوه مو ولده..مسؤول عنه وعن تصرفاته..تعب من حال ابوه..ومن المشاكل اللي يسببها له..الناس كلها تتكلم عليهم..وسيرة ابوه على كل لسان.."اه"..تنهد بتعب..تمنى لو يقدر يغير شي..تمنى لو ان القدر كتب له حياة احسن..تمنى لو انه عايش مثل كل اللي بسنه عايشين الحياة بالطول والعرض..
زادت همومه هموم..وغير هذا فكرة ان اخته تصرف عليه وعلى اهله فكره ما يتقبلها أي رجال..ومسيطره عليه من لما توظفت بس ما لقى لها حل..

##############################################


في الشوفت المسائي..
دخلت مكتبه بفرح..
:استاذ خالد...
خالد ابتسم لها اول مره تدخل عنده ولا وبعد مبتسمه <<عز الطلب..
اريام: استاذ خالد ابشرك..المريض سامي وافق على جلسات العلاج..
خالد اتسعت ابتسامته: هههههه كنت عارف انك قدها...مبروووك..وتستاهلي كل خير..
اريام بعفويه: قد ايش فرحت"وضمت ايدها لبعض" هههه ما توقعت اني انجح..
خالد قام من كرسيه وقرب منها: وربي تستاهلين كل خير..وانا كنت واثق فيك..
اريام:مشكور على الثقه تسلم..
خالد قرب اكثر: العفو...
اريام اختفت ابتسامتها وهي تحس بقربه..طالعت خالد بعيونها...حست ان في شي غلط..شي مو طبيعي..نظره مو عاديه..
:احم احم.....خلاص عن اذنك..قلت ابشرك وامشي..
خالد استوقفها: اريام......!
اريام لفت عليه: هلا..
خالد بتردد: ا...امممممم...خلاص خلاص روحي..
اريام ارتاحت انه ما تكلم وطلعت بسرعه..ودخلت مكتبها...
وهي تحس قلبها بيوقف...ايش كان يبي منها..ما ارتاحت له ابد..بس لو مو مسؤولها بالشغل..كان شافت له حل..

************************************************** ****************

ضاري بمكتب ابوه بالشركه..ويفتح درج وينبش اللي فيه..والثاني والثالث وراه..
والرابع والخامس بدون جدوا..
ضاري: لو كان عنده اوراق ولا شي وين ممكن تكون؟؟؟وين؟؟؟
حط يده على الطاوله وسند عليها راسه ..يريح شوي..من عرف السالفه وعقله مو راضي يهدا ولا دقيقه وحده..
رفع راسه فجأه: اكيد بمكتب البيت....اكيد..
وتحرك وطلع من الشركه..

&&&&&&&&&&&&&&&&&&&&&&&&&&&&&&&&&&&&&&

دخل ابو ضاري الصاله..حصل ام ضاري جالسه وجلس عندها..
ام ضاري بدون ما تطالعه: رجعت...؟؟
ابو ضاري:ايوه..
ام ضاري سكتت..وراحت بها الذكريات لكم سنه ورا..
}اخذت ابو ضاري عن حب ..بس عمره ما حبها..وعمره ما كن لها غير الاحترام والموده..كان حبه وحياته وقلبه كله لامرته الاولى السوريه..وكل تفكيرها انحصر بانه فضل الاجنبيه علي..تحولت وتبدلت مشاعرها من ناحيته...من بعد ما كانت تركض وراه..تركته بحاله..وتوقف قلبها عن النبض باسمه..قسى قلبها عليه..وصلت لدرجة الكره..صارت تشوف عيوبه..ما صار يملي عينها..تجبرت عليه بما انه حنين وطيب قلبه..بس عمره ما كان لها ولا كانت له..
كل واحد رضا بالقدر والنصيب..ومجبورين على بعض تحت اسم العشره والقرابه..
تزوجها غصب عنه..بعد غضب الجد عليه لانه ترك بنات العايله واخذ الاجنبيه..وبعد ما جابت زوجته ضاري..الموت اخذ عشقه وقلبه وروحه..رجع وحصل نفسه مخطوب لبنت عمه ومحدد زواجه ومجبور عليه وبدون أي اعتراض..ما حس بطعم السعاده ولا يوم من بعد موت زوجته..ولا شاف للفرح لمحه..بالعكس كل مالها تتحول حياته لجحيم مع ام ضاري...
ام ضاري فرض عليها الجد انها تمثل قدام العالم ان ضاري ولدها ويكون لقبها ام ضاري..صبت انتقامها على ضاري وابوه..وبدت تفكر في نفسها وبأنانيه..وتحول قلبها لصخر جلمود مستحيل يتصدع..مستحيل..{

قطع عليهم الصمت الرهيب بسة دانا...وهي تتلزق في ابو ضاري..
:هههههه وينها راعيتك..
لانا: لالي ..لالي ...وين راحت الدوبه؟؟
ام ضاري ابتسمت تحاول تنسى الماضي اللي يضعفها في بعض الاحيان..
:تعالي شوفيها..
جات لانا:لالي come..حاست لي الغرفه وهربت..
ضحكوا...نادر ما كان الابتسامه لها صدا في هالقصر الكبير...كل واحد عايش لحاله ومنعزل ولا يدري عن الثاني باي شي..
لانا حست ولاول مره بالسعاده...اول مره تشوف امها ابوها يضحكون مع بعض ..ابتسمت..كان ودها تبكي ما كانت تحس بالحنان الاسري..ما كانت تحس انهم عائله مترابطه..
ابوها لاهي بالشغل..وامها ما ذاقت منها حضن دافي دايم رسميه معاهم ودلالها بالفلوس بس...
جلست وهي تطالعهم وتتمنى لو اللحظه هذي تتحول لصوره وتثبت وتدوووووم..
دخلت لانا..
:هاي...الكل مجتمع"ولاحظت الابتسامات"
ابتسمت بداخلها بس عارفه انها مجرد لحظه وتختفي..
الكل: هايات...
دانا طالعت لانا وفهمت نظرتها اليائسه..
ابو ضاري: تعالي اجلسي وسولفي علينا..وين كنتي؟؟
لانا ابتسمت: كنت بالمول..
ام ضاري:ومن كان معاك..؟
لانا: شهد صاحبتي..
شوي دخلوا ضاري واريام..
اريام :السلام عليكم..
الكل : وعليكم السلام..
لفت اريام على ضاري تشوف ردة فعله على الجمعه هذي في غير وقت الاكل..
ضاري ما عطى نظرة اريام أي اهميه..ورمى نفسه على اقرب كنبه..
:السلام..ايش عندكم مجتمعين..؟؟
ام ضاري رفعت حاجب: ليه حرام...؟؟
ضاري بابتسامه سخريه: لالا عادي حلال خذوا راحتكم..
حس بنظرات التوأم المعاتبه له..
ضاري:اوك..انا قايم ما راح اخرب عليكم الجو الاسري هه.."وراح"
اريام على انها عصبت من حركته...بس تدري ايش بداخله يحس انه غير مرغوب فيه ومنبوذ بينهم..
بعد ما راح ضاري سكت الكل..وتوتر الجو...
ابو ضاري: انا رايح انام تصبحون على خير..
عرفوا ان اللحظه خلاص اختفت..وتفرقوا كلهم.....

&&&&&&&&&&&&&&&&&&&&&&&&&&&&&&&&&&&&&&

في غرفة لانا..
:يعني لازم يخرب علينا..
دانا: الله يهديه..
لانا: تصدقين بعض الاحيان احسه يكرهنا..
دانا: لانا...هذا اخوك عيب تقولي هالكلام..
لانا بتبرير: احساس مجرد احساس..
دانا:لا اكيد مو في محله..
"ما كان عندهم علم بانه مو من ام واب واحد ومحد يعرف الا ضاري و بس"

%%%%%%%%%%%%%%%%%%%%%%%%%%%%%


على فراش مدى كانت ابتهال منسدحه جنب مدى وحاضنتها..
ابتهال بهدوء: مدى..
مدى: هلا..
ابتهال: متى ابوي راح يتغير....؟
مدى سكتت..
ابتهال: تتوقعين في امل؟؟؟
مدى تنهدت: يمكن...ان شا الله....الله يهديه..
ابتهال عيونها دموع: مدى..احس ان ابوي ما يحبنا..
مدى بلعت غصه بحلقها..حاولت تتكلم..تبرر..تلاقي عذر..بس ما قدرت..
ابتهال: يعني انتي تحسين مثلي..؟
مدى: احم..لا اكيد انه يحبنا بس مو في وعيه..يعني ما قد صحا..
ابتهال: طيب تصبحين على خير..
مدى: وانتي من اهله..
ولفت على بدر ووداد اللي على نفس الفرشه اللي هم عليها ..غطتهم زين وباست كل واحد على عينه بحنان..وهي تتمنى ان النوم يتسلل لجفونها..





@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@

نهاية البارت

للكاتبه بقايا شتات