الجزء الخامس...
بدايات..



صباح الحب..
صباح الشوق..
صباح الهمس والذوق..
لاشعة شمس اخترقت روحي..
والنظره الحلوه..والبسمه الشفافه..
ياصباحي..


************************************************** ****************

اريام: هلا منار...صباح الخير..
منار:هلا والله صباح الخيرات..وينك يا بنت؟..لي كم يوم ما شفتك؟
اريام: والحين بغثك وبقولك مريني..ها لحد الان ودك تشوفيني؟؟هههههههه
منار:فديتك والله..تجهزي بس انا قريبه عندك..
اريام: هههه انا اللي فداك ..يله انتظرك..باي..
منار: باي..

******************************************
منار: دحوم ارجع لبيت اريام..
ابتسم عبد الرحمن ابتسامه واضحه: من عيوني..
منار ضحكت من داخلها على اخوها بس حبت تستعبط:وش عندك على هالروقان؟
عبد الرحمن يحاول يكون طبيعي: يعني وش عندي..واحد مروق ايش فيها؟
منار :طيب صدقتك..
وقفوا سيارتهم برا القصر لانه محد يدخله بدون علم مسبق عند الحرس..
اريام: السلام عليكم..صباح الخير..
عبدالرحمن"هالمره بتجرأ شوي"..:وعليكم السلام صباح النور اري...احم..اريام.
منار ودها تفقع ضحك: وعليكم السلام..اريام ابشرك انفكت العقده اللي عنده..
عبد الرحمن بتهديد وهو منحرج: منار..اعقلي..
اريام تحاول تخفي ضحكتها: منار خلي اخوك بحاله..
عبد الرحمن طار من الوناسه..اريام تتكلم عنه..بس استحى بنفس الوقت بطعبه الحيوي موووووت..
اريام غيرت السالفه: منار..اقولك شفتي المريض غرفته رقم(...)
وبدت تتكلم عن الشغل..وعبد الرحمن متابع بدقه كل كلمه تقولها ..ويستمع بصمت..يكفي انه يسمع همسها على صباح يوم ربيعي..

&&&&&&&&&&&&&&&&&&&&&&&&&&&&&&&&&&&&&&

في الباص..
على غير العاده..ابتهال جالسه بمكان غير مكانها..تحس مالها وجه تقابل به مشاعل..وخصوصا مرام..دائما ابوها يسبب لها الذل بسمعته..والحين بينظرون لها نظرة الشفقه والرحمه زياده عليها..
ركبت مشاعل الباص..دورت ابتهال بمكانها ما حصلتها..وجلست باي مكان..
مرام نفس الشي.ما حصلت ولا وحده منهم..
>>>>>>>>>>>>>>>>>>>>>>>>>>>>>>
في المدرسه..
ابتهال صفطت عبايتها بسرعه واخذت شنطتها بتروح الفصل..
مشاعل شافتها: ابتهال ...ابتهال...
ابتهال سمعت صوت مشاعل وتدافعت ذكرى ليلة امس قدام عيونها.."وامتلت دموع"..وكملت مشي..
مشاعل ركضت ومسكت ابتهال: ابتهال..ممكن توقفين...
ابتهال وقفت وعيونها بالارض ولا طالعت مشاعل ولا تكلمت بحرف..
مشاعل وقفت قدامها...ورفعت راسها..
:ابتهال قلبي..ارفعي راسك...
ابتهال ولا كانها تسمع..
مدت مشاعل يدها ورفعت راسها باصبعها: ابتهال فديتك..اللي حصل امس ما يستاهل تنزلين راسك عشانه..بالعكس..
ابتهال طالعت عيونها: مشاعل...بس هذا ما يفتخر فيه؟؟؟
مشاعل: بس ما ينزل الراس...في كل بيت مشاكل..في كل بيت بلاوي عندي وعندك وعند كل بنت..بس احنا نرفع راسنا لاننا نقدر نتغلب عليها..ولا؟؟
ابتهال ضمت مشاعل..تحس انها تحتاج حضن يواسيها..تحتاج حضن تفرغ فيه كل الامها..
حست بيد على كتفها..
:ابتهال قلبي وينك؟؟
مشاعل تركت ابتهال واستغربت جيتها..!!
ابتهال لفت عليها:مرام؟؟
مرام ضمتها وهي حاسه فيها: ايوه مرام..كيفك بعد امس..؟؟
ابتهال بدا يرجع لها الامل..في ناس تحبها وتهتم فيها وتسأل عنها..
ابتسمت لهم وعيونها باقي فيها دموع: يله عاد...ما تنعطون وجه..لهدرجه تبون حضني الدافي..؟؟
ضحكوا كلهم وراحوا لفصولهم..

%%%%%%%%%%%%%%%%%%%%%%%%%%%%%


:ياربي شكلي تاخرت...
وصارت تركض بسرعه تبي تلحق على اللفت قبل لا يتسكر..
:لحظه لحظه..."وحطت يدها.."
وانفتح ودخلت فيه..:اوه الحمدلله..
وتسكر الباب مره ثانيه..
حست ان مافي اللفت الا هي وواحد...لحظه لحظه..ريحة العطر بالمره مألوفه لها..."وبلعت ريقها"
وهي تحس بفرق الطول بينها وبينه..بما انه طوووويل..
ضاري يطالعها وفي باله كلمه وحده"هذي بنت عمي"
صمت غريب...والوقت صار طووويل..وكان الدور الرابع بعيييد.
ضاري يخفي ابتسامه: صباح الخير...اخت مدى..
مدى ارتجفت من صوته الثقيل:صباح النور استاذ...
ضاري وكأن الامر ما يعنيه: وان شا الله مرتاحه بشغلك وزميلاتك....
مدى مازالت مرتبكه كون انها تكلم ابن صاحب الشركه: ايوه الحمدلله..
وانفتح باب اللفت..ومر ضاري من جنب مدى بالمررره..
ووقف عند الباب:كويس...
وراح وخلاها..
وقفت مدى في مكانها ما زالت متوتره..وترمش بعيونها..بلعت ريقها وهي تحس كانها راكضه مية ميل...
تسكر باب اللفت وهي فيه: لا...ياربيه..

$$$$$$$$$$$$$$$$$$$$$$$$$$$$$$$$$$$$$$$$$$$$$$

دانا: لمو حرام عليك مي عز الدين بفيلمها عمر وسلمى كانت تجنن لدرجه شفته قبل كم سنه بالسينما كم مره..
لمياء: هي حلوه بس كان تامر حسني احلى..مررره رومانسي..
دانا: ههههههه يا حبي لك..تدورين الرومنسيه..
وما حست الا بصراخ من وراها وفجأه وحده صقعت فيها وتمسكت فيها لحد ما لصقوا في الجدار..
دانا في اللحظات السريعه كانت مسكره عيونها واخر شي شافته تعابير الصدمه على وجه لمياء..
حست بانفاس عند رقبتها وقرفت..فتحت عيونها وانصدمت من اللي قدامها..
بصوت عربجي مع ابتسامه:صباح الخير..
دانا تطالعها..تبي تتاكد انها في حضن هذي المخلوق الغريب الي دايم سيرته تسبب لها الاشمئزاز..
قربت منها البنت اكثر..وطبعت بوسه على خدها..
:اسفه..يا قلبي ما كان قصدي أأذيك..
دانا بقرف: اوك...بس بعدي عني..
بعدت عنها شوي وقرصت خدها: يا حلوك من قريب..اوك يا قلبي..صدفه سعيده..باي..
وراحت وهي تمشي مشيه عربجيه غريبه...
تجمعوا صاحبات دانا حولها وهي ما زالت مستنده على الجدار..وقلبها يدق بقوووه عجيبه..
لمياء:oh my god..هذي البنت غبيه ولا ايش؟؟
:دنوو بسم الله عليك..خلاص اخذي نفس..راحت عنك..
:دنو..اجيب لك مويه....
وصاروا صاحباتها يهدونها..لانها يا لله تلحق انفاسها..ومازالت حالة الصدمه مأثره فيها..
لمياء مسكتها من يدها وجلستها..
:دنو خلاص حبو..حصل خير..
دانا: تتوقعين قاصدتها...؟؟
لمياء طالعت البنت البوي: تبين الصراحه..
لفت عليها دانا بحماس..
لمياء تكمل: انا ملاحظتها كم مره تطالعك وتأشر عليك..
دانا خافت: لالا قولي غير كذا..
لمياء: ما عليك منها...ايش بتسوي يعني؟؟؟

$$$$$$$$$$$$$$$$$$$$$$$$$$$$$$$$$$$$$$$$$$$$$$

لانا: شهد...!!
شهد وهي حاطه راسها على الطاوله: هلا..
لانا: ودي اسوي اكشن بحياتي..طفشت مرره روتين في روتين.
رفعت راسها شهد: وايش ناويه عليه؟؟؟؟
لانا بتفكير عميق: ما ادري..بس الا ما الاقي شي يملا علي حياتي ويغير علي جوي..
شهد رجعت وحطت راسها وهي تدري انها بتدخل بدوامات اكثر من اول..


##############################################

في مكتبه..وتفكيره ما توقف ولا لحظه..
"انا راح اكتشف..وما راح اسكت..لو صارت مدى بنت عمي ايش بسوي..لالا..هي ايش بتسوي..؟؟..ومرت ابوي لو عرفت اني عارف اكيد راح تنهار..اكيد"

ولمعت ابتسامه خفيفه على فمه..بعد النتائج اللي وصل لها...


************************************************** ****************

سلطان طلع من شركه وهو يجر اذيال الخيبه..ما صدمته الجمله المعتاده"ما عندنا وظائف"..
مشى شوي..ما يدري وين يروح..كيف بيلاقي وظيفه..كيف راح يكون رجال ومسؤول عن اهله ويصرف عليهم..
فكر لو كان معاه دورة انجليزي ولا حاسب يمكن كانت الفرص اكثر..بس حتى هذي بعيده عنه..من وين يجيب فلوس المعهد..
قطع عليه تفكيره..نغمة جواله..
:هلا ثامر...
ثامر: هلا سلطون...وينك؟؟
سلطان: والله ادور في الشوراع..
ثامر: اقول تعال عندنا بالحاره..مجتمعين العيال..
سلطان: اوك انا في الطريق..




وصل سلطان..حصل ثامر وكم واحد من الحاره...وثلاثه او اربعه ما يعرفهم..
ثامر: هلا سلطون.."وسلم عليهم".كيف حالك؟؟ اعرفك على الشباب..مهند...رائد..عبد المحسن..
طالعهم سلطان اشكالهم ما تأهل بس سلم عليهم..
:هلا والله..
مهند اكبرهم واعرضهم جسم: هلا سلطان..واخيرا شفناك..
سلطان ابتسم: هههه شفتوا عاد..الشغل ما خلا لي مجال احك اصبع رجلي الايمين ههههه
ضحكوا كلهم..
مهند: انت تشتغل..؟؟
سلطان: ايه بالمره...انا وين والشغل وين...شهادتي تطيح الوجه..
مهند: اها..طيب اشتغل اعمال حره مثلنا..
سلطان: اعمال حره..!!....يعني مثل ايش؟؟
مهند ابتسم: يعني ودك تجي معانا...
سلطان: ايوه عادي..بس كيف شغلكم..؟
مهند: اصبر ادور لك شغله محترمه تليق بك..وبعدين اعلمك..

&&&&&&&&&&&&&&&&&&&&&&&&&&&&&&&&&&&&&&

اريام: ههههه وش عندك يا السنعه..
منار:والله قررت اتعلم الطبخ..تخيلي يطلب مني زوجي اكله واقول له ما اعرف..بيقول لي انتي فاشله وايش تعرفين..
اريام: والله درر..يابنت ايش الفلسفه هذي..والله كبرتي وصرتي عروس هههه..
منار: تطنزي يا ستي ايش عليك..عندك اللي يحبك وما راح يشوف عيوبك..
وقفت اريام عن المشي في ممرات المستشفى:ايش تقصدين؟؟ومن تقصدين؟؟
دقتها منار بكوعها: يعني يعني ما انتي عارفه....!!
اريام عقدت حواجبها: افهم ايش..؟؟..تكلمي يا بنت ..وش تفكرين فيه..؟
منار: يعني بالله ما لاحظتي ان "وقالت بهمس"..الدكتور خالد ونظراته لك..
اريام تصرف: وانا على بالي عندك سالفه..لا ما لاحظت شي..وبعدين شنو هالكلام..عيب عليك يا منار تطلعي اشاعات على الرجال..
منار مسكت اريام: يا حبيبتي هذي مو اشاعات هذي حقيقه واضحه..اصلا لو سألتي المستشفى كله ..خالد هيمان بمين..؟ بيقولون وبالفم المليان اريام..
اريام حطت يدها على فم منار: قصري صوتك جعل لسانك القص..وبعدين ..وبعدين..اقول انسي السالفه..هذي كلها خرابيط..
منار وخرت يدها : طيب راح نشوف..
اريام: طيب..انا راح اروح لشغلي..باي..
منار:باي.........معقوله ما صدقت ولا تستعبط معاي..والله الاعمى بيشوف اريام بعيون خالد..
اريام صارت تمشي بالممرات على غير وجهه..اهم شي تبي تبعد الافكار هذي عن راسها..ولا تبي تفكر فيها..
" اصلا الدكتور خالد مشرفي بالعمل وبس.."
حصلت نفسها واقفه عند غرفته..
:انا ايش جابني هنا..
تقدمت كم خطوه"لالا بتطمن عليه واروح مكتبي.."
دقت الباب وفتحته..
:السلام عليكم ...ادخل؟؟؟
ابتسم: وعليكم السلام.."وعدل جلسته"..اكيد تفضلي..
اريام: كيف حالك يا سامي؟؟؟
سامي: تمام والله..اليوم الدكتور سوا لي فحوصات من اول وجديد..
جلست اريام على الكرسي اللي عند السرير..
:حلوو...وهذا شي اكيد انهم يفحصونك من جديد..
طالعت الطاوله ..شافت الورد ذابل..
:لكل شي نهايه.."قالها سامي بدون ما يطالعه"
اريام: لانك ما رعيتها..
سامي: صاحبتها ما تستاهل الرعايه..
اريام شالت ورده وتفتت بايدها بسرعه: بس ما اتوقع انه الورد له ذنب في الموضوع..
سامي: نسيت اقول للعامله تشيله وترميه..
اريام نفضت يدها: ايوه مو مهم الورد بداله ورد.."كانها تبي تشيل ذكراها تماما"
سامي ما علق على الموضوع..
اريام: ممكن سؤال فضولي شوي..؟
سامي: اكيد تفضلي..
اريام: وين اهلك...؟
سامي: انا وحيد امي وابوي...وما عندي الا اخت ومتزوجه وهي خارج الرياض ولاهيه بزوجها وعيالها..ما عندي احد..
اريام: وامك وابوك ليه ما يزوروك..ولا كبار بالسن ما يقدروا..
سامي: لا...."وسكت"
اريام فضولها ما سمح لها تسكت: لا ايش؟؟؟
سامي: اقصد لا مو كبار..بس ما يعروفوا اني هنا..
اريام بدهشه: ليه؟؟؟؟؟؟؟؟؟
سامي امتلت عيونه دموع يحاول يخفيها: ما ابيهم يتعذبوا معاي..امي ما راح تتحمل تشوفني وانا اموت وما بيدها شي..وابوي نفس الشي..الموت حق..على الاقل اموت وانا مرتاح اني ما عذبتهم معاي..ولا يشوفون اللي انا شفته .."وتنهد"..واللي بشوفه..
اريام حاولت تداري عبرتها..مع هذا الشخص صايره حساسه بزياده..هي واجهة مشاكل اكبر من هذي واكثر ايلام..بس سامي حست انها متعاطفه معاه..
اريام: وايش قلت لهم؟؟
سامي مسح دمعه خانته: قلت لهم اني مسافر..وما قلت الا لحبيب..احم...اقصد طليقتي..اللي توقعت انها الوحيده اللي راح توقف جنبي لأخر لحظه..
اريام ما حبت سيرتها: خلاص هي مرحله من حياتك وعدت...والحمدلله انك ما ارتبطت فيها عشان ما تنصدم اكثر..
سامي بحالميه بس صوته مليان الم: كنا مخططين على الزواج..ومستعدين له بكل لحظه..قررنا ايش بنسوي ووين راح نسافر..وكيف راح نعيش ايامنا..تصورنا انا وهي السعاده وحلمنا فيها وقررنا نعيشها..بس فجأه وبدون مقدمات..تتحطم الامال..ونتهدم الاحلام..وتبدد الفرحه والسعاده في لحظه..والله لحظه..عمري ما تخيلت اني راح اكون هنا في هذا المكان..ولا قد تصورت اني ممكن اصارع هذا المرض...لكن قدر الله وما شاء فعل..ما اقدر اقول اكثر من كذا..
كبر بعين اريام اكثر...ما شا الله الايمان مالي قلبه..جاها شعور ..نفسها تمسح على شعره الاسود..وتطبطب عليه..لكنها تراجعت وبعدت هالافكار بسرعه..
:سامي...ابدا خطوه جديده..انسى كل شي بالماضي وابدا عيش الحاضر وبس..
سامي: بس محسوب علي هالحاضر,..
اريام: مهما كان عمرك...عيشه بكل لحظه..مهما طال فيك الزمن او قصر..عيشه بكل حالاته..وبنظره جديده..خليها كلها تفاؤل وحياة..وامل وعطاء..شيل البؤس والحزن والالم ..وعيش الفرحه والسعاده..
سامي طالعها وهي تتكلم..وعيونها فيها لمعه غريبه..حس بشي...لكنه استبعده..


$$$$$$$$$$$$$$$$$$$$$$$$$$$$$$$$$$$$$$$$$$$


:مدى...!!؟
مدى: هلا....
:انتي تعرفين صاحب الشركه...؟؟؟؟؟




@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@

نهاية الجزء..

للكاتبه بقايا شتات...

اسف كان ودي اكتب رد نزلت موضوعي في محل الرد على القصه اسف خطاءمطبعي

الله يعطيك العافيه ,,.
ننتظر التكمله ,,.

..

الله يعطيك العافيه ,,.
ننتظر التكمله ,,.

الله يعطيك العافيه
ننتظرك

الجزء السابع...

خفايا الماضي..

ابتهال: بجد مدى كلميني..قولي ايش يبي منك؟؟
مدى بدا الخوف والتوتر يتسلل لقلبها: وانا ايش دراني عنه..
ابتهال: يعني ما سألك عن عنوان بيتكم..رقم تليفونكم..او لمح لك بشي..
مدى طنشت: ابتهال ايش فيك صايره كانك مشاعل..لاما قال شي..ما اتوقع جاء عشاني..اتوقع عنده سالفه..
ابتهال بنص عين: اجل عشان مين؟؟..لا يكون لمحني في الباص واعجب فيني..
مدى طالعتها باستحقار: ما ودك تبلين العافيه..وتقومين تحطين اذنك على الباب عسى تسمعين شي..
ابتهال قامت وحطت اذنها: ساكتين..او يتكلمون بصوت واطي.."وقربت اذنها اكثر"..لالا شكلهم ساكتين..

************************************************** ****************

سلطان يطالع ضاري اللي بان عليه الارتباك من لما شاف ابوه..
:يا هلا والله ومسهلا..هذا ابوي..
ضاري ابتسم وعرف قصد سلطان: هلا هلا..احم..والله ماني عارف كيف بأبدا بس بأبدا..
طالعهم شوي لاحظ انهم ينتظرونه..وكمل:
والله يا ابو سلطان انا جاي لك انت مخصوص..انا من قريب بس..مرني اسم عائلتكم الكريمه..اللي هي تحمل نفس عائلتي..
ابو سلطان رفع عينه على ضاري..وكأن الشكوك بدت تتأكد له..والذكريات صارت مثل الصور تمر عليه..
ضاري لاحظ ردة فعل ابو سلطان وقرر انه يكمل ويتشجع :والاهم من هذا كله نحمل نفس الجد..
سلطان وعلى راسه اكبر علامة استفهام:يعني؟؟
ضاري وجه كلامه لسلطان: يعني احنا لنا نفس الجد والعائله..
سلطان لف على ابوه اللي حس انه ضاغط على اصابعه وشوي وتدخل اظافر ايده بكفه..
وتكلم بهدوء: انت ولد حمد؟؟!!
ضاري وسلطان كل واحد صدمته ما كانت اقل من الثاني سمعوا طيحة كاسات الشاي في المطبخ..لفوا على بعض..
وسلطان يبي اجابه من ضاري عشان يأكد الكلام اللي قاعد ينقال..
ضاري: ايوه انا ولد حمد..
وقف ابو سلطان وشياطين الدنيا على راسه: لا بارك الله فيك ولا في ابوك..اطلع برا بيتي..اطلع..
وقف ضاري وهو مستحيل يترك السالفه كذا معلقه ولا اخذ لا حق ولا باطل: يعني انت عمي..؟
ابو سلطان وهو يحاول يضبط اعصابه لا يهد البيت عليه: سلطان قوله اطلع..انا ما افتكيت من ابوك اكثر من عشرين سنه تجي انت تكملها علي..واذا ابوك ما قالك السالفه روح قوله انك عرفتها وقوله ان الحق حق وان الباطل باطل..مو هذي كلمته..وانت لا عاد اشوفك لافي بيتي ولا قريب عندي ولا تحاول تجي تزورني ولا تسألني..وسلم لي على مرت ابوك كثيررررر وسلام خاص بعد..
"وجهه كلامه لسلطان"
سلطان ودني غرفتي وطلع هذا من بيتي سامع......
سلطان ما زال جالس..ما استوعب اللي يصير أي عم واي خرابيط..واي حق؟؟يبي احد يفهمه السالفه..
:يبه من حمد هذا...؟؟
ابو سلطان لف على سلطان وعيونه بيطلع منها نار: لا تجيب طاريه انت انظف من ان تقول اسمه..تعال ودني غرفتي بسرعه..
ضاري ما تحمل الاهانه اكثر من كذا..طلع برا البيت وصك الباب بقوووووووه..
:الحين هذا شايف نفسه على ايش ..بس شنو اللي بينه وبين ابوي..اتوقع شي كبير..وكبير بالمررره..
ام سلطان انتفضت في مكانها ..سيرة حمد ومرته رعب لهم قبل عشرين سنه والحين رجع لهم..
هذا ولد حمد..ايش يبي فينا..وش ذكرهم فينا بعد موتهم..ما كفاهم اللي صار لنا بأسباهم...ما كفاهم..
طلعوا مدى وابتهال من الغرفه لما سمعوا صوت الباب..
وراحوا لامهم..
:يمه وش السالفه..؟؟
:من هذا يمه ومن حمد..؟
تسندت ام سلطان على اقرب طاوله تبي توازن نفسها ..
ركضت لها مدى: يمه ايش فيك..؟؟تعبانه...تعالي استريحي بالصاله..
وراحوا جلسوا امهم بالصاله..
وهي تنوح: من وين طلعوا لنا..؟؟..ومن وين طلعوا لنا..؟؟!!



سلطان سدح ابوه على السرير..ونفسه يسأله بس خايف منه..
:اسمع لا تسأل ولا تحاول تعرف السالفه..هالشي مالك خص فيه..وانسى اللي قاله ولد الجبان..سامع..؟
سلطان: ا نشا الله..
وطلع وصك الباب...
حصل امه وخواته في الصاله وجلس عندهم..
مدى: سلطان وش يبي..؟
سلطان رفع كتوفه: علمي علمكم..قال كلمتين فهمها ابوي وطلع..
ابتهال: على فكره ترا هذا مدير مدى..
مدى بغت تقوم تكفخ ابتهال على غبائها ولقافتها..
ام سلطان: مديرك؟؟يعني انتي تشتغلين عند حمد؟؟
سلطان: الحين هذا مديرك؟؟هو ولد عمي يمه؟؟
ام سلطان بسرعه: لا مو ولد عمك ولا يقرب لكم..وانتي يا مدى دوري لك وظيفه ثانيه غير هالوظيفه..
مدى انصدمت:ليه...؟؟
ام سلطان: بس..ما تشتغلين عندهم ابد سامعه..
مدى بعناد: يمه ما راح اترك الوظيفه الا لما تقولي لي السبب..مستحيل اترك وظيفتي كذا..عشان هذا جاء ورمى كم كلمه وراح..
ام سلطان بنفسها"يا ريته كم كلمه وراح..هذا فتح علينا ابواب مسكره من سنين.."
:مدى وانا امك اسمعي الكلام وبس..
ابتهال باعتراض: يمه لا مو حل..قولوا لنا السالفه وخلصونا..
سلطان: هو يقول ان لنا نفس العائله والجد..يعني ابوي وابوه اخوان..
مدى والاستعياب عندها بطئ :يعني...يعني ضاري ولد عمي..؟؟
ابتهال: احنا لنا عيال عم تجار..اصلا ما قد سمعنا ان لنا عم..
سلطان: بس ابوي يعرف ابوه لانه قال....
قاطعته ام سلطان: سلطان..بس خلاص ولا كلمه..السالفه هذي تتسكر وان سمعت احد يتكلم فيها ما يلوم الا نفسه..
وراحت لغرفة زوجها تبي تعرف ايش راح تخبي لهم الايام الجايه..
نظروا الثلاثه لبعضهم..
ابتهال: فهمتوا شي..؟؟
مدى: انا متأكده ان ضاري ولد عمي..ولنا عم ما يبون يتكلمون عنه..
سلطان يكمل: لانه هو حتى بنفسه جاي يتأكد...
ابتهال: وايش قال ابوي؟؟
سلطان حكى لهم السالفه من الاول للاخير..
مدى: كل شي واضح..ان الشي بين كبار بس..ومحد يعرفه الا هم.بس ليه..وشنو اللي صاير قبل 20 سنه..!!


:ابو سلطان ..وش راح يصير فينا قولي..؟؟
محمد ابو سلطان: وانا وش يدريني يا نوره..احنا ما لنا علاقه..جاء ولده وهو اللي تكلم ..احنا ما تكلمنا..
نوره بخوف: وموضي ورجلها حمد بيسكتون ما اظن يا محمد ما اظن..
محمد ضاقت فيه الدنيا: الحين انتي ورا ما تسكتين وتنقلعين عن وجهي...ولا اقولك.انا اللي بنقلع..
لبس ثوبه واخذ شماغه وطلع بخطوات مو ثابته لبرا البيت..بيبدا سهرته اليوم من بدري مثل كل يوم...
ابتهال اللي شافت ابوها مار من عندهم وطلع: كله منه ولد الكاشات جاء وخرب ابوي..من شوي كان وش زينه..
سلطان تنهد على حال ابوه..وتذكر سالفة مهند والشغل..وقرر يطلع يشوف ثامر اذا يعرف عنهم هالشي ولا...
مدى كانت الافكار تلعب براسها لعب..ما تدري تفكر بايش ولا ايش..والاهم انها مستحيل تترك وظيفتها..
نوره بدا هم كبير يتسلل لقلبها غير همها..الحين وش بيفكها من شر موضي اللي طالهم قبل 20 سنه.....


&&&&&&&&&&&&&&&&&&&&&&&&&&&&&&&&&&&&&&
"في الذكريات..."

حمد: اقولك ثلاث ارباع الحلال بأسمه..
موضي: ماعلي منك ..ونصفي على الحديده..
حمد: يعني وش تبين نسوي يا مره...اروح اطلع ابوي من قبره اللي ما نشف واقوله ليش الحلال باسم محمد..
موضي: الا الغلطه غلطة ابوك ليش يفرق بينك وبين اخوك ..ولا عشانك خذت السوريه...
حمد عصب: انا كم مره قلت لك لا تجيبي طاريها على لسانك..
موضي كشرت: اسمع واخر الهرج..ان محمد ونوير زوجته ياخذون الحلال هذي انساها..بالطيب بالغصب بناخذ مثلهم..
حمد: هذي اوراق رسميه ما نقدر نغيرها..
موضي والشيطان بدا يلعب براسها..لان فكرة انها تنسى العز والنعيم اللي هي فيه شي مستحيل عندها..
:والاوراق ما تتزور...
طالعها حمد.....:انتي من جدك تتكلمين..؟
موضي: اجل العب..والقانون لا يحمل مغفلين..دور لك من هنا ولا هنا..وترا محد يدقق وبعدين ابوك ظلمك عشانك جبت وحده مو من العائله..هذا قمة الظلم..على الاقل يومه حرمك منها عوض شي بدالها..ونعيش احنا وعيالنا بعز..
حمد سكت وكأنه حب يعوض فقدان زوجته بالفلوس..ابوه حرمه منها ونغص عليه قبل لا تموت..
موضي: اسمع خلص الموضوع بسرعه..قبل لا يتكلم محمد عن الورث وما الورث..
وبدا حمد يلعب لعبته الوسخه مع موضي..سجل كل الحلال باسمه باوراق مزوره..


:كيف ابوي يكتب الحلال باسمك؟؟
حمد: عشاني انا اكبر منك..
محمد: ما اصدق ابوي يسويها..
حمد: ابوي ما سواها الا لمصلحتنا..انا بعطيك حقك بس انا اللي بديره لك..
محمد: بس متى ابوي سجله باسمك..؟؟
حمد: هذي سالفه قديمه...وبعدين وش فيك انت اسألتك كثيره..
محمد بطيب نيه..ما توقع ان بيجي يوم وينطعن في ظهره ومن اللي يطعنه اخوه..شي ما يخطر على البال ..لكنه موجود..ناس نفوسهم ضعيفه غرتهم الحياة الدنيا وما فكروا في بكره ايش ممكن تكون العواقب..اكل حلال يتيم ومو أي يتيم...حلال اخوه من امه وابوه ولحمه ودمه..


مشت الحيله على محمد صادق النيات..وزوجته الطيبه..
موضي ما سكتت على كذا..تحمل الكره الكثير على محمد..لانه الجد خطبها له ورفضها ومحمد كان مقرر ياخذ بنت عمتها نوره..
وتحمل الكره الاكبر لنوره اللي كانت دائما وابدا احسن منها بكل شي ..زرعت في قلبها الحسد والغل..بدل ما تحمل الخير لنفسها ولغيرها..
اخذت حمد حبته..بس فاقد الشي لا يعطيه..قلبها ما حمل الحب لاحد من قبل ومستحيل يستمر بالعطاء..حتى حمد زوجها ما صار يملي عينها لكنه صار تحصيل حاصل وفوق هذا كله يحب زوجته الاولى..
موضي كانت ضحية هوى نفسها..مشت ورا افكارها السوداء بدون رادع..وبدون خوف وبدون حتى تفكير بعقلانيه..
صارت انانيه درجه اولى..حتى على عيالها..وصارت لعبتها المفضله انها تركض وراء الفلوس والجاه والسلطه وغيره ما تبي..
اجبرت حمد انه يخلي اخوه يوقع على اوراق وشيكات بمبالغ كبيره..بدون رصيد..لانه لو فكر بيوم من الايام بانه يطالب بحقه بيدخل السجن على طول لانه مديوون بديون وهميه لاخوه..
وبكذا قدرت موضي تكسب كل الاطراف حتى حمد نفسه لانه زور الاوراق..وقدرت تفرض السيطره على الجميع.. وبكذا كونت شخصيتها وهيبتها حتى على زوجها ابو عيالها...


%%%%%%%%%%%%%%%%%%%%%%%%%%%%%%%%%%%%%%%%%%%%%%%%%% %%%%%%%%

في القصر...
دخلت دانا مع لالي غرفة لانا..
:لنو..مين راح يجي اليوم؟؟
لانا وهي تحط الماسكرا على رموشها الكثيفه وتزيدها كثافه:بنات خالتي لطوف..وخالي صالح..
دانا: اها...comeلالي..خليني اكشخك قبل لا يجون الضيوف.."وشالتها بحنان وراحت غرفتها"
لانا طالعت لالي بقرف وهي تفكر شلون دانا متحملتها...
ونزلت وهي لابسه تنوره سوداء حرير قصيره لحد الركبه وعلى خصرها شريطه فوشيه..وبلوزه توب بدون اكمام ما فيها الا شريطه فوشيه نفس اللي بالتنوره..
وبشعرها المقصوص بقصه غريبه"يعني خصل طويله وقصيره..مقصوص بعشوائيه"..وحاطه جلوس فوووشي بمعنى الكلمه..وطالعه جذابه جدا وخليها انثى بحق..
حست بشي متعلق برجلها وصرخت..واع لالي بعدي عني..انا لانا مو دانا...دانا..
جات دانا تركض:ايش فيه؟؟
لانا حطت يدها على خصرها: خذي بستك وع تلزق فيني..
ابتسمت دانا لبستها:تعالي قلبوو..هذي متوحشه لا تلعبي معاها..بعدين تاكلك هههه..
لانا عصبت: هههاي..بايخه.."وسمعت صوت امها"
:لانا..
لانا نزلت بسرعه: يس مام..
موضي باعجاب: لبسك مره نايس..
لانا بدلع ماسخ: يسلمو مامي..عارفه..
موضي تعجبها لانا تحس انها فيها منها بعكس دانا الحبوبه..واريام المسالمه..
:كنت ابيك تشوفي الخدم ايش جهزوا وتشرفي عليهم..
لانا: اوك..
واتصل موبايلها..
لانا: اووف ها الاياد ما يمل..كل شوي يتصل.."وعطته بيزي"
ودخلت المطبخ..
رن الجرس..
وقفت موضي تستقبل اختها ومرت اخوها..
:هلا لطيفه كيفك..؟؟"وتبوسها"
لطيفه: هلا موضي شلونك..ان شا الله تمام..
موضي: تمام والله..حياك..
:هلا خالتوا..
موضي: هلا ريماس..كيفك يا حلوه..؟
ريماس: تمام خالتوا..اجل وين البنات؟؟
موضي: بيجون الحين..
:بعدي خليني اسلم على خالتو..
موضي: هلا هلا رهام..
رهام: هلا خالتي..كيفك وشلونك ا نشا الله بخير."ودخلت بدون ما تنتظر الاجابه"
موضي: ادخلي الله يستر عليك....هلا احلام اخوي معاك؟؟
احلام اللي ما تحب تزور موضي كثير بس تضطر: هلا واله لا ما جاء معاي..
موضي: الله يهديه من زمان ما شفته..
احلام:اذا جاء ياخذني راح اقوله يسلم عليك..
ودخلت بعدها بنتها الكبيره والوحيده: هلا عمتي..
:هلا مأثر...واو اليوم محلوه..
مأثر اللي تدري ان عمتها حاطتها ضمن القائمه اللي تبيها لواحد من عيالها: هههه عيونك الحلوه عمتي..
ودخل الكل وجلسوا..والشي الاكيد ان البنات قعدوا على جنب بعيد عن جلسة الحريم..
طلعت عليهم لانا: هاي..girls..واو كل وحده تقول انا احلى..بس لا تحاولون لاني انا احلى هههههه..
ريماس اللي ضمتها: ههههههه واحشتني يادوووبه..
لانا باستها من خدها: حتى انتي حبو..
رهام اللي ما تبلع حركات لانا: هههه يا شين الثقه..
لانا بغرور: يحق لي.."وسلمت عليها"...مأثر ماني مصدقه
وراحت لها وضمتها:كيفك يا قمر؟؟
مأثر:تمام والله..وانتي يا عسل..؟
لانا: انا fine..وتمام التمام كمان..
نزلت دانا وقبلها لالي..اللي ركضت لحضن رهام وتربعت فيه: ههه تحب تحاشرني..
لانا بقرف: وع..
وصلت لهم دانا وضمت رهام: يا قلبووو واحشتني موت..
رهام اللي تصغر دانا بسنه ضمتها اكثر:حتى انتي..
ريماس سلمت بغرور: اهلين دنو..
دانا عادي عندها: هلا ريمو.........مأثر عندنا يا لا الهول..هههههه
مأثر: هلا وغلا شوفتي كيف..؟
"ريماس ومأثر بجامعه وحده..وسنه اولى"
وجلسوا البنات..ريماس ما تجلس الا مع لانا لانها نفس الستايل والافكار..اما البقيه عادي...
مستوى جمالهم واحد..بس مأثر كانت اكثرهم جاذبيه..ابوها اغناء واحد بالعائله عشان كذا موضي حاطتها بالقائمه...ولها تعامل خاص بينهم..والكره بين ريماس ومأثر موجود..لان ريماس تبي ضاري لها..اما "ولد الغربه" راح تخليه لها..
ريماس: اقول لنو..ايش جابها هذي..
لانا: ريمو..ايش فيك على مرت اخوي..
ريماس: وع حرام عليكم تاخذ ضاري..
لانا بعدم اهتمام مع انها تعرف ان ريماس تحبه: لا يمكن تاخذ ولد الغربه..
سكتت ريماس وكأنها تطمنت شوي..
رهام: اقول بنات انا الطفش ذابحني وفيني هزه اليوم..
دانا: ايش رايكم نطلع بالملحق بالغرفه..مجهزه السماعات والدي جي على كيف كيفك.
رهام: يالبى قلبك يا بنت خالتو..تعرفيني..
طلعوا البنات برا..ودخلوا الغرفه الواسعه واللي مجهزه خصيصا للبنات لان فيها عازل صوت..بس كلها زجاج عاكس البرا ما يشوف اللي داخل ..بس العكس..
ريماس تصرخ عشان الصوت عالي: اقول ايش صار على اياد..؟؟
لانا بطفش وقرف: اوف اوف يا ريمو ما تصدقي قد ايش نشبه..تصدقين انه طلع طماع وما عنده ولا ربع اللي عندي دادي..
ريماس: لانا...بقولك حاجه..
لانا: امري..
ريماس: لنو..ضاري لا ياخذ هذي انتي تعرفين قد ايش انا متعلقه فيه..
لانا: بحاول لك يا قلبو..بس تعرفين الوالده وضاري ما يتفقون بس بأضبطك معاه..
ريماس بحماس: تكفين....
لانا: مع انه شي صعب بس بحاول لعيونك..انا ما ادري ايش عاجبك فيه..ثقيل وما يضحك وما يعطي وجه ايش لك فيه..
ريماس بحالميه مصطنعه: هههه مو هذا اللي جنني فديته بس..
جلست مأثر جنبها وقالت بقصد: من اللي تفدينه حبو..؟؟
ريماس كشرت: وانتي ايش عليك؟؟
دانا شافت الجو تكهرب شوي: ريمو تعالي ارقصي على اغنية رشود..
ريمو بحماس: لا تكون ادي على بالموت...؟؟
رهام: ههههه ترا راح تنجن علينا...
وصاروا البنات يستهبلون...

$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$ $$$$$$$$$$$$$$$$$$$$$$$$$$$$$$$$$$$$$$$$$$


ضاري اللي ما رجع للبيت من اول ما طلع من بيت عمه للي لحد الان ما يدري هو عمه صدق ولا مزحه ولا في حقيقه ثانيه..
تقريبا طاف الرياض كلها...لحد ما صدع راسه وقرر يرجع ويرتاح..
دخل البيت اللي حس انه موجود احد..شاف الغرفه الزجاجيه يلمح ظلال ناس تتحرك عرف ان البنات موجودين..قرر يسلم عليهم ويعرف من فيه..
فتح الباب وكأن الصوت اندفع فجأه لانه كان عالي جدا..
اول من لاحظ وجوده ريماس اللي وقفت رقص وقعدت تطالعه..اول مره تشوفه منزل شماغه على كتفه..شعره منكوش شوي..لكنه معطيه حركه وجاذبيه حلوووه ومناسبته..
دانا طفت الاغنيه بسرعه..
ضاري بصوت ثقيل شوي: السلام عليكم..
نطت عنده رهام: هلا والله ولد خالتوا..كيفك..؟؟
ضاري ماوده يبتسم مع انه يحب حركات رهام..بس ما يحب يعطيهم وجه:هلا رهومه..كيفك؟؟
رهام: تمام والله..
ريماس بدلع ماسخ: هلا ضاري..كيف حالك..؟؟"وترجع خصله عن وجهها"
ضاري طالعها صح حلوه بس دلعها زايد وتذكره بلانا اخته: هلا ريمو كيفك؟؟
ريماس ابتسمت اليوم دلعها: تمام والله..نسأل عنك..
ضاري عداها ولف على مأثر اللي كانت جالسه: وانتي يا مأثر كيف حالك؟؟
مأثر بحيا: الحمد لله بخير وانت؟؟؟
ولعت ريماس ودها تقوم وتطلع مأثر من حياتها للابد..
ضاري: ماشي الحال...وانتوا يا خواتي...
قربت دانا من ضاري: انا واحشني..
لانا من بعيد ارسلت له بوسه: امواه فديتك واحشني يا خيووو..
ضاري بصيغة امر: اوك ما اقاطعكم..بس قصروا عليه شوي مو لهدرجه ما تسمعون..وبعدين انا تعبان وابي انام..."وطلع"
لانا: اووووف لازم يتأمر نفسي مره ما يقول امر في اخر المقابله هذي
..
طلع ضاري واتجه لباب القصر الداخلي..
:ضاري...ضاري..
عرف صوتها المميز: هلا ريمو...
ريماس وقفت عنده: اوه تعبت...حبيت اقولك سلامات ايش فيك..؟
ضاري تحسف انه قالها: لا عادي من الشغل والله يسلمك"وجاء بيدخل"
:لحظه ضروي..اقصد ضاري..
ضاري وقف وبداخله"اللهم طولك يا روح"
وفكت تعليقة من موبايلها :تفضل..
ضاري طالع التعليقه: شنو هذا؟؟
ريماس: مني لك..قلت ذكرى هديه أي شي..
ضاري اخذها: يسلموو حلوه..بس بناتيه بعطيها لانا ولا دانا وشكرا..
ودخل وتركها...
ريماس ضربت رجلها بالارض وتتهزاء فيه: بعطيها دانا ولا لانا..لو ابي اعطيهم عطيتهم انا...اووووف ياربيه..
:قلتي شي؟؟؟؟
بلعت ريقها ريماس ما توقعته سمعها: ها....لا سلامتك"وابتسمت وراحت"
ضاري: الحمدلله والشكر بس..
دخل سلم على اللي في مقام خالته ومرت خاله..وطالع موضي وابتسم..
موضي استغربت اول مره يبتسم في وجهها...
لطيفه:متى بنفرح فيك يا ضاري..
ضاري طفش من هالسيره: ا نشا الله..
لطيفه بحماس: ادور لك..؟؟
ضاري بسرعه: لالا شنو تدورين لي...ان شا الله اذا ربي كتب لي..
احلام زوجة خاله: ما بقى في العمر كثر ما مضى..
ضاري ابتسم لهم ابتسامة مجامله: ههه والله ما بعد شيبت..عن اذنكم"وراح"

لطيفه: ما قد شفت راس يابس كثر راسه..
موضي مكشره: الله يعينه على نفسه..
احلام: وولد الغربه كيفه.؟؟
موضي:قلتيها ولد الغربه..ما يتصل ولا يسأل او يفكر حتى..الغربه ماكله قلبه وعقله..
لطيفه: انا اقول اجبريه يتزوج..
موضي: من؟؟؟
لطيفه: هالشايب..
موضي: وانا ايش علي منه ...متى ما قال بتزوج زوجناه..ما راح اغصب احد..


$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$ $$$$$$$$$$$$$$$$$$$$$$$$$$$$$$$$$$$$$$$$$$

صعد ضاري لغرفته...وبدل ملابسه ولبس بيجامة النوم..دخل دورة المياه وفتح المويه البارده..طالع وجهه بالمرايه باين عليه الارهاق والتعب من الهالات اللي تحت عيونه...
فجأه طلعت صورة مدى وهي تطالعه اليوم ببجامتها البسطيه اللي لونها رمادي وبالوسط دبوب وردي...ابتسم لصورتها كانت في قمة برائتها وعفويتها...شاف المويه البارد كيف تنساب على المغسله قرر يرحم حرارة وجهه ..وغسله كم مره لعل وعسى انه يطفي لهيب التعب..
ورمى نفسه على السرير بكل حيله ..وراح في نومه عميقه ما يعرف ايش بيسوي بعدها..

################################################## ##########################################

رجعت ريماس للبنات...
لانا: وين رحتي....؟
ريماس: رحت لاخوك..
لانا: لاخوي..؟؟؟ ليه؟
ريماس: قلت بسوي اني اعرف الواجب واقوله سلامات ليه تعبان..
لانا: هههههههه واكيد قالك من الشغل..اصلا ما اخذ حياته الا الشغل..
ريماس بتفكير: يكون يحب وحده معاه الشركه...
لانا:ريماس ريحي قلبك..هذا ضاري جليد ..ثلج..جماد ما يحس ولا يحب..ولا في شخص في الحياة بيصك عمره الثلاثين وزياده ولا فكر يتزوج ولا يحب ولا يخطب حتى..انا اقول حولي على الثاني احسن لك..والله راح تعجبينه..
ريماس لفت عليها وطالعتها باستحقار: خبله انا اخذ ذاك..واي كات تتحول حياتي لجحيم انا متأكده..
لانا: والله صادقه..احنا مانبيه يرجع اجل وشلون زوجته..


رهام: انا نفسي اصادق بويه..
مأثر..لا وع..
دانا: رهومه لا مستحيل شنو اللي اصادقها..
رهام: ابي اشوف حياتهم كيف تفكيرهم..طموحهم شنو.؟؟
مأثر: اكيد تسوق سياره ههههه.
دانا: هههههههه اكيد...بس يمه تخرع...نظاراتها يا رهام ما تطمن..
رهام: يعني ايش بتسوي لك..بتاكلك..يا حبو..اذا حاولت تتقرب منك تقربي منها خلينا نعرف شنو غايتها...
مأثر:لاتسمعي كلامها اخاف توديك بداهيه..
دانا: احد قالك اني فار تجارب...لا ما راح احاول ولا ابي احاول..اصلا ما ارتحت لها ابدا..
رهام: كيفك..بس اذا هي تبي تصادق وحده حلوه مثلي قولي لي..بأمشي معاها..
دانا: ايوه بخلي التجربه فيك هههه..ونشوف اخرتها..



<<<<بالنسبه لولد الغربه راح تتوضح صورته مع البارتات القادمه>>>>
@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@

نهاية البارت...

للكاتبه بقايا شتات..

الله يعطيك العافيه
متابعينك

الله يعطيك العافيه ,,
ننتظر التكمله ,,.

مشكورة نتظر التكملة