تويت
عقل الطبيب أم قلب الحبيب....
الجزء الثالث....
يحيى.........
طلعت من عندهم وانا مو مصدق الكلام إلي انقال !!.....معقول غادة مدمنة!!
ليه!!....إيش وصلها لهذه المواصيل!!....ليه سوت في نفسها كذا؟؟
وليه لجأت لي أنا !!.....
انا غبي!!....ما يحتجلها جواب....مالقت غيري قدامها ....يعني بتروح لهارون مثلا!!....بتقول لحبيبها انا مدمنة بالله عالجني!!....اخر شي تفكر فيه انها تهز صورتها قدام هارون !!.....مع اننا كلنا عارفين ان صورتها مهزوزة قدامه ..ومو قدامه وبس!!....صورتها مهزوزة عند الكل.....لكن غادة ايش يهمها !!...
وحركت السيارة من قدام بيتهم ....لكن ما قدرت اسوق...الدنيا سودا قدام عيني
وقفت السيارة على جنب....الي حصل اليوم ضيعني.... توهني!!....ليه دايما ما تجي المصايب غير من تحت راس غادة!!....ليه ما حد يحرق قلبي ويدمر أعصابي غير غادة!!....ليه ماحبيت وحدة تستاهل حبي!!....ليه!!....
كم هذا القلب راح يعاني منك يا غادة!!....وكم راح أستحمل!!....اه ساعدني يا أرحم الراحمين....
وبعدين يا يحيى!!...راح تساعدها!!....راح تقدر تتزوجها وانت عارف إنها ما تفكر فيك...راح تقدر تتزوجها وانت عارف أنها مجنونة وهيمانة بهارون!!...كيف تتزوج وحدة قلبها معلق بأخوك!!
لكن أنا ما راح اتزوجها غير عشان اساعدها!!....البنت استنجدت فيا!!...
ما يهم إيش الأسباب الي خلتها تلجأ لي.... المهم أنها لجأت لي!!....
ومر قدامي منظرها ...مع انها كانت لابسة النقاب إلا ان الإنكسار والتعب باينين في عينها...حتى صوتها كان مكسور....أنا عارف غادة!!...وعارف قد إيش كابرت وتنازلت عن جزء من كبريائها وشموخها عشان تطلب مساعدتي...وهذا لوحدة الي خلاني ما أتردد ولا دقيقة وأساعدها....وراح اساندها بكل قوتي ....
عند هذا الحد من التفكير حركت السيارة على البيت وانا احضر نفسي للعاصفة الي راح تحصل في بيتنا ....
في الصالة ما كان في احد من اهل البيت....
دقيت على ابوي ...
جاني صوته : هلا يحيى !!...
جاوبته: السلام عليكم ورحمة الله ...كيفك يبا !!
ابوي: الحمد لله ....انت فينك بعد العصر !!...ما حصلتك!!
جاوبته: أي والله يالغالي انشغلت ....السموحة يبا!!
ابوي: ما عليك وانا ابوك....الحين فينك انت!!
جاوبته : انا بالبيت يبا وابغاك ضروري...
ابوي: تعال انا في المكتب ...
قفلت منه ورحت له على المكتب وانا ادعي ربي انه يثبت اقدامي ويقوي حجتي قدام ابوي ويقتنع ....لانه لو كسبت موافقته راح تهون عليا المسألة كثير...
وقفت عند الباب وانا احاول اضبط نفسي...اللهم اشرح صدري ويسر أمري وأحلل عقدة من لساني ليفقهو قولي ....ودخلت عليه.....
...........................
غادة.....
ليه انا غبية؟!....ليه اتهورت !!...كيف قدرت الغي كرامتي واطلب منه طلب زي كذا....مو كفاية اني طايحة من عينه واني من وجهة نظره وحدة ساقطة!!
حطيت يدي على راسي وحركتها على شعري بتوتر ...اوووه وبعدين ...ايش المفروض اسوي!!....ادق عليه اخليه يلغي كل شي!!...
وبعدين؟؟...أنا ايش راح أسوي!!...كيف أقدر أتخطى هذه المحنة لوحدي!!
اقدر... اقدر اروح المستشفى واتعالج هناك!!....طيب وامي ايش الي راح يقنعها اني علاجي من الادمان راح يكون سري ...كيف راح تقتنع اني راح اتعالج زي زي أي مريض ثاني!!...
وتذكرت الي حصل بيني وبينها امس لما انهرت وتعبت من كثر الفشل ...
دخلت عليها الغرفة وكانت جالسة على المصلى تدعي وتسبح...
قربت منها وقتلها بهدوء اقرب للإنهيار: يما انا لازم اتعالج!!....لازم اتخلص من هذي الزبالة ( اكرمكم الله) الي انا فيها !!
حطت يدها على راسي ومسحت عليه بحنيه وقالت ودموعها تسبق كلامها: والله عارفة يا غادة إلي تحسي فيه ....والله العالم إني اتقطع على حالتك...أدري أني المفروض أكون اقوى من كذا!!....وخلاص من اليوم ورايح راح اكون معاك...وماراح أضعف زي كل مرة!!
هزيت راسي يعني لا....وقتلها: انا بروح الأمل!!...هناك راح ...
قاطعتني بصوت حاد بعد ما شالت يدها عني بقوة: إييييييييش!!...إنتي تبغي تفضحيني!!....تبغي الناس بعد هذا العمر كله يقولو نورة ما عرفت تربي بنتها!!..
قتلها بترجي: طز في الناس...أصلا من متى الناس رضيو عن أحد أو سابو احد في حاله!!...يما انا أبغى اطهر!!...والله تعبت يما!!...تعبت وما عاد أقدر استحمل!! ....وبعدين يما علاجي هناك راح يكون سري!!....يعني ماحد بيعرف شي!!
قامت من على السجادة بسرعة وقالت بعصبية: تكذبين على نفسك!!...الناس الي ما يخافون الله كثير...وراح تلقي نفسك بعد اقل من شهر على كل لسان!!...ما ترضيلي الذل على اخر عمري!!
وقفت وقتلها بترجي: يما ارحميني!!...انا كل يوم أموت بشكل بطيء... دفاعاتي كلها بدت تنهار!!...
امي بحدة وبصوت عالي: قتلك انا راح اعالجك!!...والي راح يسووه هناك راح نسويه هنا!!...إنتي بس قوي نفسك واستحملي!!
قلت بعناد: اذا ما تبغي تروحي معي حروح انا...حروح قبل ما اتجنن!!
امي فزع: والله يا غادة لو سويتيها لأغضب عليكي!!!!
بعدت عنها وقتلها وانا منهارة: ليه يما!!...انتي كذا تضريني!!...حرام عليكي!!...عاجبك الي انا فيه!!....الناس ولا بنتك!!
أمي: غادة قتلك راح أساعدك!!...
قتلها: لا نكذب على أنفسنا...أنا يوم بعد يوم حالتي جالسة تدهور !!.... وانتي يما ما تقدري !!..
امي بحنية: نحاول يا غادة!!...خلينا نحاول!!
قتلها وانا ابعد أكثر: خلاص!!....ما ابغى اسمع اكثر!!...خلاص!!
وطلعت من عندها وانا اجري ....
ودخلت غرفتي وارتميت على سريري أبكي...وانا ادعي ربنا أنه يلاقيلي حل من الي أنا فيه....!!....
وجلست أفكر وأفكر...لغاية ما ساقتني أفكاري ليحيى....مدري ليه هو اول واحد نط ببالي !!.... أمكن لانه كان في بالي اصلا بعد الموقف الأخير الي حصل بينا!!.... طيب مو هارون ييالي طول الوقت !!.... ليه ما لجأت له!!
مصيبة لو لسى أفكر فيه؟! ولسى صورتي قدام هارون تهمني!!....
لساتك تحبيه يا غادة!!....بعد كل الي جاكي من تحت راسه!!....وإيش الي جاني من تحت راسه!!... الي حصلي انا رحت له برجليني!!....
أنتبهت على يد أمي وهيا تهزني بشويش: غادة!!....غادة!!
انتبهت لها واعتدلت في جلستي...وانا اقلها: هلا يما...
جلست وصارت مقابلة لي وسألتني بحنية: في إيش كنتي تفكري!!
ضميت نفسي ولفيت ذراعي حول سيقاني وسألتها: يما تعتقدي إن الي حصل صح!!....
امي بسرعة: أكيد صح!!....هذا ولد عمك ما راح تلقي أحد يحفظ سرك زيه!!
قتلها: طيب ليه حاسة إني تهورت لما طلبت مساعدته!!
قامت ومسحت على راسي بحنية وقالت : اطردي هذه الأفكار من راسك....احنا ما تصرفنا غير التصرف الصح...
وتركتني وطلعت
جلست اطل على الفراغ الي تركته وراها ....الله يسامحك يما!!....لو تفهمتيني...ما كان انذليت لأحد في الدنيا...ماكنت احتجت ليحيى او لغيره...الله يسامحك....
................................
يحيى..................
:إيش قلت يبا!!....
جاوبني: إيش تبغاني اقول يا يحيى!!
قتله: قول مبروك يبا!!
أبوي:الله يهديك!!... طيب ليه مستعجل!!....
جاوبته:وليه التأخير!!.....قول مبروك يبا !!
أبوي: وأمك وأخوانك بيرضو!!.....إيش بتقلهم!!
جاوبته: أنا إذا كسبت رضاك راح أقدر على الباقين!!....ها إيش قلت!
سكت وفضل لحظات يطالع فيا وبعدين قال : يحيى صارحني!!...لايكون غلطت مع....!!
قاطعته بسرعة وبعتب:أستغفر الله العظيم!!...كيف تقول كذا يبا!!.....إنت مربينا إنا ما نقرب الحرام يبا!!...كيف الحين تقول كذا!!...وبعدين غادة هذه عرضي....كيف بقدر ألعب في شرفي.... وبعدين انت شايف غادة وحدة من الشارع عشان تقول كذا!!....الله يسامحك يبا
أبوي: يا يحيى انا عارف والله...لكن ...استغفر الله العظيم... إيش اقول ...مع إني ماني فاهم ليه هذه العجلة لكن الله يتمم لك بخير يا يحيى...مبروك يا ولدي!!
أبتسمت براحة وقمت من مكاني ورحت حبيته على راسه: مبروك لك يالغالي...الله يطول لنا في عمرك!!
أبوي بحنان: الله يجعل قدومها قدوم خير عليك...والله يعينك على امك!!....
جاوبته: عاد إنت حاول تقنعها معي يالغالي بطريقتك!!....
أبوي: خير إن شاء الله....
وجا الوقت الحاسم...المواجهة الصعبة ....
كانت جالسة في الصالة مع سراب
قربت منهم: السلام عليكم ...
أمي وسراب: وعليكم السلام ورحمة الله...
ورحت حبيت على راسها....وجلست مقابل لها : يما !!
أمي: هلا حبيبي!!
سألتها: إيش اكثر شي يسعدك في ذي الدنيا!!
أمي: هذا سؤال يا يحيى!!....أكيد يما إني أشوفكم مبسوطين ومرتاحين!!
سألتها بحذر: وودك تفرحي فينا وفي عيالنا يما!!
أمي: الله يهديك !!...إيش فيك اليوم..إلا هذه الساعة إلي اتمناها طول عمري!!
قتلها: يعني بتفرحين إذا قتلك إني نويت اتزوج!!
امي بفرحة: والله يا يحيى!!...أخيرا بتفرح قلبي!!
سراب: وليه هذه اللفة كلها كنت قلت إنك تبغى تتزوج وإن عينك على وحدة!!
قتلها : إيه عيني على وحدة!!....
أمي بحماس: من ذي!!...تصير لنا!!...من بيت مين!!
جاوبتها: إيه تصرلنا .....وهيا وحدة من عيال عمي!!
أمي: مين !!
قتلها ببطء: غادة
سراب بشبه صراخ: إييييييييييييييش!!....مين !!
تجاهلت صريخ سراب وركزت نظري على أمي...
إلي كانت جامدة وما أعطتني أي تعبير....!!
سالتها: إيش قلتي يما!!....
سراب بزعل: إيش تبغاها تقول!!...يعني خلت الدنيا من البنات وما عاد في غير غادة!!
قتلها بحدة: سراب!!...نقطينا بسكوتك!!....ورأيك إحتفضي فيه لنفسك!!
سكتت وهي تتأفف وتزفر....ما ناقصني غير شعننة سراب!!
رجعت ألتفت لأمي وسالتها: إيش قلتي يما!!
أمي : إشمعنى غادة بالذات وإنت عارف .....
قاطعتها بسرعة: كانت يما!!.....لكن الحين هيا تبغاني أنا!!
قالت بعصبية: إيش!!...إيش عرفك إنها تبغاك إنت!!
قتلها بإرتباك : أنا يما ....كنت!!
قالت بحدة: إنت إيش!!...رحت خطبتها!!....رحت خطبتها ولا مشيت معاها!!
بهت من كلمة امي....كلمتها اذتني في الصميم...
قلت بحزن وعتب : الله يسامحك يما !! ....هذا تفكيري فيني!!
ما ردت علي ... بعدت وجهها عني للجهة الثانية
رحت وجلست بجنبها وقتلها بلوم: تمونين على الروح يالغالية لكن أسمعيني يما الله يخليكي!!
أمي بصرامة: جاوبني!!....خطبتها!!....
مارديت عليها ....
رجعت قالت بنفس النبرة: ليه ساكت جاوبني!!...ولا مالك وجه!!
قتلها بترجي: يما ما راح يتم شي من دون شورك ورضاك!!
أمي بغضب: رحت خطبتها وجاي تلف راسي بكلمتين!!.....هذه اخرتها يا يحيى!!...تكسر فرحة قلبي !!.... الله يسامحك يا ولدي!!....
وبدأت تبكي!!...يا الله الحين كيف راح أفاتحها بالخبر الأصعب!!....
وقفت مرتبك ماني عارف إيش أقولها ولا إيش أسوي!!
في اللحظة هذه جانا صوت أبوي: أم هارون!!.....يحيى جا كلمني!!....واليوم بيروح يملك على بنت عمه!!
أميوقفت وقالت بصراخ : إيييييييش!!...اليوم بيملك عليها!!.....وإنت عارف وما قتلي!!...طابخينا سوا من ورى ظهري!!....هذه اخرتها !!...ولدي يتزوج وأنا اخر من يعلم!!.....
أبوي بصرامة: شايفاه تزوجها!!...جالس اقلك بيروح يملك عليها !!...
أمي: وإنت اكيد عارف من قبل وساكت!!...وعاجبك الموضوع!!....أكيد عاجبك!!....مهي بنت أخوك!!
أبوي : وإيش فيها غادة ماهي عاجبك!!....
سراب : إيه يبا مو عاجبانا كلنا!!....
أبوي يصوت زي الرعد: سراب قصري لسانك ويلا على غرفتك!!...
طلعت وهيا تبرطم بكلام مو مفهوم....
رجع أبوي وجه كلامه لأمي: إيش فيها غادة!!...ليه مو عاجباكي!!
أمي : مافيها ولا شي!!...بس كل العيلة عارفة إنها تحب أخوه ....وكم قد جريت وراه!!.....إيش بيقولون الناس!!....وبعدين زواجهم بهذه السرعة بفتح علينا الألسن!!
حسيت أمي ماسكة سكينة وجالسة تطعني فيها من غير رحمة وهيا تقول جملتها ذي!!
جاوبها أبوي: ماعلينا من أحد!!....الناس تتكلم في كل الأحوال!!....وإذا تبغي سعادة ولدك وافقي!!...لانه مقتنع فيها ويبغاها!!...
أمي بغضب: لا ماني موافقة!!!....وإذا يبغى رضاي لا يتزوجها!!....
وتركتنا وطلعت!!....وقفت في مكاني متصنم!!.....يديني متربطة ولساني متربط!!....لاني عارف أسوي أو أقول أي شي!!.....
جاني صوت ابوي:ماعليك يبا!!.... قتلك إن موافقة أمك بتكون صعبة!!...لكني متأكد إنها في الاخر بتوافق!!
قتله بحيرة: طيب والحل!!....الناس مستنين نجيهم بعد المغرب!!...وماباقي على المغرب شي!!
أبوي بهدوء: ولا يهمك بنعقد اليوم إن شاء الله
قلت بحزن:قلبي ما يطاوعني اعقد وأمي غضبانة علي!!....
أبوي بطولة بال: أنا بطلع أتفاهم معاها ....وإن شاء الله ربنا ييسر إلي فيه الخير!!
قتله بسرعة : إيه كلمها يبا !!...الله يسلمك!!
طلع عشان يكلمها وأنا جلست في الصالة .....
كل شوية وأطل في الساعة....خلاص ما باقي شي!!....وبعدين اكيد الناس راح يقلقو الحين....
مسكت الجوال ودقيت على رقم أمها!!....غادة حاليا ما ابغى اسمع صوتها !!
وبعد كام رنة جاني صوت عمتي نور: هلا يحيى!!
قتلها : هلا عمتي ...بس بغيت أقلك إني إمكن اتأخر شوي!!....لكن إن شاء....
جاني صوتها بحزن: أهلك ما وافقو!!
قتلها بسرعة: إلا موافقين وأبوي بيجي معي!!...لكن....!!....
عمتي نورة: خلاص يما إحنا مستنينك....في أمان الله
وقفلت منها إلا على دخلت هارون!!.....
اخر إنسان أتمنى أشوفه في هذه اللحظة!!....
هارون: السلام عليكم....
جاوبته بهدوء من دون ما اطل في وجهه: وعليكم السلام ورحمة الله....
هارون: أوووه...أشوفك جالس في البيت على غير العادة!!...وفي الصالة كمان!!
قال كذا وجلس ...
قتله : إيه مستني ابوي ....
هارون: بترجعو المؤسسة!!
حبيت أكون معاه مباشر عشان أسد أي طريق للجدال ...فقتله: لا بنروح...اليوم راح أعقد على غادة!!
التفت لي بسرعة وقال:إيش!!
قتله بجفاء: ما يحتاج أعيد الكلام مرتين!!....سمعت!!
هارون بإستغراب: طيب وليه كذا معصب !!...
جاوبته: لانك بتقول نفس الكلام إلي كلهم قالوه!!....إنها تجري وراك وتبغاك إنت!!....وانا عارف ومع هذا أبغاها !!....عندك مانع!!
وقف وقال ببرود: لا ما عندي مانع!!.....لكنك كذاب ما تبغاها ...ولا ما كنت معصب بهذا الشكل!!
وقفت وقتله بحده: ما راح أتجادل معاك!!
سالني بهدوء: يحيى ممكن تهدأ !!...ياخي أنا ما قلت ولا شي!!....ماني فاهم ليه ثاير كذا!!
جاوبته: قتلك مو ثاير ولا عصبي!!.....
وتركته واقف.....
جاني صوته: يحيى!!....إيش فيك!!....خلينا نتكلم يا اخي!!....يحيى.....يحيى!!!
طنشته وما رديت عليه ....
رحت استنى ابوي في السيارة
بعد طول إنتظار جا.....وكان وجهه ما يبشر بالخير أبدا...
أستنيت حتى ركب السيارة وسألته بخيبة امل: لسى زعلانة!!
أبوي: ماهي راضية تقتنع.....أنا أقول لا نتأخر على الجماعة الحين...!!
سألته بأسف: وأمي!!...اعقد وهيا مو راضية عليا!!.....ليه تسوي كذا!!
أبوي : ما بتفضل زعلانة عليك طول عمرها!!...بعد شوية راح تروق وتهدأ.... لكن خلينا نتركها الحين .....
قتله بحزن: كان ودي تجي معي وتفرح لي !!
أبوي: الله يهديها .....
وطلعنا على بيت عمي....
في السيارة تفاجأت بسؤال أبوي: يحيى في شي أنا ماني عارفه!!
قتله بإرتباك على قد ما اقدر حاولت أخفيه: شي زي إيش يعني!!...
أبوي: زواجك من غادة بهذه الطريقة!!....قلبي يقلي إنك منت فرحان!!...
قتله بسرعة: ليه تقول كذا يبا!!..إذا ما ابغاها ما راح أتزوجها!!
أبوي:حاس إن الموضوع فيه سر بينكم إنتو الثلاثة!!
قتله عشان انهي الحوار: سر لاني ابغى بنت عمي!!....وبعدين هدي بالك يبا لا سر ولا شي!!....كل ما في الموضوع إني لو أجلت ما راح أتزوج غير بعد شهرين أو ثلاثة !!....وانا مستعجل!!....وعمتي نورة مستعجلة وتبغى تطمن على غادة اليوم قبل بكرة!!
وشكله لسى ما أقتنع: الله يوفقكم .....ويكتب لكم الخير !!....
.................................................. ....................
أمل..................
:إيييييييييييييييييييييش!!....مستحيل!!
سراب: هذا إلي حصل!!....
قلت بإنكار: أخوكي انهبل!!...يبغى يتزوج غادة!!.....ما لقي غير غادة!!...
سراب: مدري إيش سوت له!!...حتى أمي تركها زعلانة وراح يعقد عليها مع ابوي!!
قتلها : لا مستحيل الزواج ذا يتم!!...غادة ذي إيش تبغى!!....لما ما حصلت أمل مع هارون قالت اميل على اخوه!!....إيش تبغى !!...تبغى تولعها بين هارون و يحيى؟!
سراب بقهر: أنا قلت إن تحت راسها شي!!....سوت نفسها عقلت وهديت عشان تلعب على عقل المسكين يحيى!!....
قتلها بقهر: وهم الحين بيت الزفت غادة!!
سراب: إيه طلعو عشان يعقدو!!
قتلها بسرعة: أجل قفلي ...بدق على المبخت أخوكي أشوف إيش الي في راسه!!
سراب: أخوكي ما يبغى حتى يتناقش في هذا الموضوع...سكتني وقلي مالي دخل!!...أقص ذراعي إذا ما كانت غادة ساحرة له!!
قتلها بخوف: معقول!!...ما تسويها؟!
سراب: أجل إيش تفسري إن أخوكي في يوم وليلة يقرر إنه يبغى يتزوجها!! عمرة ما لمح إنه يبغاها!!...حتى سيرتها كان ما يطيق يسمعها ويقوم أول ما نتكلم عنها!!
قتلها بقهر: أنا ما راح أسكت!!...كلنا المفروض ما نسكت!!....أنا الحين راح أكلمه وأعرف حكايته!!
وقفلت منها وأنا حدي واصلة من القهر...
وعلى طول دقيت عليه....
جاني صوته: أمل إذا تبغي تتكلمي في نفس الموضوع فلا تتعبي نفسك!!...
قتله : كيف يعني لا أتعب نفسي!!....طيب تناقش معنا يا اخي!!...علمنا بإلي في راسك!!...
يحيى: إيش في راسي!!....واحد ويبغى يتزوج بنت عمه ليه مكبرينها!!
قتله : لانها كبيرة ....إنت عارف كويس إنها جري!!
قاطعني بعصبية: ومع هذا أبغاها وأبغى اتزوجها!!.....
قتله: وأمي مو مهتم لزعلها!!....مين أهم غادة ولا أمك!!
قلي بحدة: سؤالك ماله معنى من أساسه!!...وأمي راح ترضى ...ما في أم ما تتمنى السعادة لولدها!!
قتله بعصبية: وغادة الحين هيا سعادتك!!...ياخي قول كلام يتصدق!!
قلي بطفش: أقول بقفل الحين لانا وصلنا ....سلام...
وقفل في وجهي....
رميت الجوال بعصبية : حسبي الله عليكي يا غادة!!...الله يشيلك ونفتك منك!!...
كنت معصبية ومقهورة حيل...وباين عليا...
دخل عليا صالح وأنا في هذه الحالة...
سألني بإستغراب: أمل!!....ليش معصبه!!
قتله : من هذه الأخبار إلي تسم البدن!!
جلس بجنبي وسأل: أي أخبار!!
قتله: يحيى اليوم راح يعقد على غادة!!...تخيل!!
سألني بإستغراب: يحيى بيعقد اليوم!!.....دوبني ادري!!
قتله: كلنا اليوم عرفنا!!...أصلا هوا اليوم فاتح أبوي وراحو عشان يعقدو عليها اليوم!!...تخيل!!
صالح: طيب ..... وليه معصبة كذا!!...المفروض بدل ما تعصبي تقومي تلبسي وتتشيكي وتروحيلهم ...وتفرحيله!!
قتله بإنكار: أفرحله لانه بيتزوج غادة!!....
صالح: مين غادة!!
قتله بقهر: بنت عمي!!
صالح: هههههههههه يا شيخة!!...أنا قلت مع هذه العصبية كلها غادة ذي تطلع شغالتكم!!...
قتله بقهر: صالح!!...إيش شغالتنا إنت الثاني!!...وبعدين أخوي بيتزوج شغالة!!...و في شغالة أصلا إسمها غادة!!
صالح: ههههههههههههههه عادي شغالتنا إسمها زهراء!!
قتله بزعل: أنا في إيش وإنت في أيش!!
مسك خدي بإصبعينه الإثنين وضمهم لبعض وقال: أمووووت في شكلك وإنتي معصبه!!
قمت من عنده بعصبية وقلت: يووووه يا صالح وربي إنك مروق!!
وقف معايا وقال: والحين إنتي ليه معصبة بالشكل ذا!!....ليش غادة ذي فيها شي!!...يعني!!
قتله بسرعة وبتوتر خفيف: لا يعني ولا ما يعني!!...بس كل إلي في الموضوع إنها ماخلصت تعليمها!!....يادوب عندها الثانوي
مع إني عارفة إن هذا ماهو عذر أصلا إلا إنه هذا العذر الوحيد إلي جا ببالي...أجل إيش أقله!!....غادة تحب زوج أختك وياما جريت وراه!!
صالح: لا والله مصيبة كبيرة!!...لالا لازم تمنعوه إنه يتزوجها!!....
التفت له وطليت عليه بقهر: تتريق!!.....طيب !!...أنا اصلا غلطانة لاني جالسة احكيلك!!
وتحركت من مكاني ...لكن هو لف عليا ذراعاته :ههههههههههه يا قلبي على الزعلان انا!!...أقول إيش رايك نترك أخوكي في حاله...ونشوف إحنا حالنا!!
………………………..
تعليق