رد: متقلبين الود

٤٥


اليوم الكبير


ملاك
حوسه حوسه ماتخيل فيه حوسه مثل اللي قاعد يصير حجزنا المشغل السوم بس عشان عددنا والله يا جيش مو طبيعي اهل دينا خالاتها وبنات خالاتها ورنود وامها وانا وخواتي ومن عصر جالسين ننتظر دورنا لان الحريم الكبار بدوا هم اول قبلنا وجبنا حنا القهوه وجالسين نتقهوى لين يجي دورنا ودينا جالسه تسوي في اظافرها جنبنا
دينا: مع اني قايله مانبي نعزم العالم كلها بس القريبين مره مره بس ماقصروا
رنود وهي تاكل دجاجه شوايه مع ندى: يعني انتي اللحين عزمتي من
دينا: محد بس افنان وجود وريماس صاحباتي اللي كانوا بالثانوي وانتم وعماتي والريم صاحبتنا المشتركه انا ونوف
رنود: قليل
دينا: هو قليل بس اسأليني خالاتك من عزموا ماما عزمت بنات خالتها وصاحباتها وسعاد خالتي عزمت نسايبها وسمر مثلها
ندى بحماس: يعني اول مره بنشوف خوات متعب بعد الملكه
ملاك: غريبه يوم ملكتوا ما جو
ندى بلا اهتمام: راحت مها وقعت ورجعنا كملنا الفلم اللي كنا نتابعه اسوأ ملكه في التاريخ
ملاك تاخذ بخاطر مها: مو لازم فرح وطق ان شاء الله يتفقون ويعيشون احسن حياه
دينا: هاللحين سمر وين ليش تاخرت
ملاك تذكرت: انا نسيت خلك من سمر اخوي الضعيف ليش مبلكته وماتردين علاه
دينا: يحول حتى انتي علمك انا قايله له ياقيس ياحبيبي قبل الزواج باسبوعين لانكلم بعض وش الفايده نسولف ليله العرس يصير الجو بارد
مها بغمزه: وانتي تبين الجو حار
دينا: تلايطي
ملاك: اليوم يوم نزلت يقول قولي لها ترد علي
دينا: خلاص كلها ثلاث ساعات وبشوفه
نوف جايه بعد ماغسلت شعرها: دينا هاك جوالك يدق مالك من اليوم
دينا: هاتيه...الو ..هلا ... خلاص خلوكم عند الباب برسل وحده من البنات عليكم..يخوي قفل انا مشغوله
ملاك: شالقصه
دينا: مالك جاي وجايب شنطتي وفستاني وحده تقوم تجيبها
نوف: ندى قومي مقدر اطلع برد
ندى: وحده تجي معي اعرف الشنذه انا اكبر مني
قامت رنود معها وراحوا يجيبون اغراض دينا وانا ابتلشت بقيس خليها ترد وخليها ترد يخي البنت فالت خلاص وكلنا نعرف دينا بالعناد افهم تكفى


رندا

قمت انا وندى نجيب اغراض دينا فستان ومسكه وهالاشياء واخو دينا مالك ياذا الادمي رفع الضغط فل مستعجلنا تعالو تعالوا واخرتها لسا مانزلها من السياره
فتحنا الباب وجلسنا وراه ننتظر يدخلها وكالعاده ندى ماتعرف تسكت
ندى: عاد انا قلت يامها لاترخصين نفسك ارفضي وازعلي بس مافهمت تستاهل
رندا: معليك انتي خلك اذ جاء دورك لا تسكتين
ندى: انا اللحين بس كلام ما صار شي رسمي يعني عمة دينا كلمت امي ولمحت لها لان دينا حبت تربطني مع عمها وتقول انها عجزت لين خلتهم يقتنعون
رندا: وانتي وش رايك
ندى: الولد ماعليه كلام بس مشكلته حلو حلو بزياده يعني انا جنبه ولا شي كيف الولد يصير احلى من البنت مايصير
رندا: اما حلو
ندى: يجنن يشبهه ممثل هندي على قوله دينا حتى انا يوم شفته قلت ذا جنس ثالث جماله اوفر
قطع علينا كلامنا صوت رجال من ورا الباب
: الاغراض عند الباب نادوا احد يشيلها وقولي للي وراك دواك عندي الجنس الثالث بيوريها شغلها اذ ماخليتها تندم الف مره على كلمتها ماكنت ولد فهد عطران الشوارب مايتجرون علي تجرأ هي علي
قال كلامه وانسحب وندى نطت من الخوف وجات جنبي احسها كاتمه بكوتها بس ماطولت وجلست تبكي
ندى: تكفين رندا بيذبحني اعرفه دينا تقول احياناً هو عصبي وش اسوي
رندا: خلاص انتي ادخلي جوه ولاتجيبين لاحد سيره انا بشيل الاغراض ولاحقتك
حرصت ان البنات مايشوفون ندى وتتنكد الجلسه واخذت الاغراض انا ووديتها عندهم ورحت لقيتها مقفله غرفه الصلاه عليها يارب مو وقته مره مو وقته


مشعل

اطرافي وتفكيري وعروقي تتأكل وتفكير جديد رعب يتشكل في اعماقي من قسوه الاهانه وحدتها حركت السياره بدون ما اجاوب على اي سؤال لمالك ورحت عند قصر الرجال لقيت ماجد اخوي واقف مع اهل المعرس يشوفون الذبايح
ناديته على جنب وجاني وبدون ما افكر في رايه ووش بيفكر كلمته
مشعل: ياخوي طلبتك
ماجد بحميّا: عطيتك
مشعل: ابيك تكلم عديلك وتقوله بملك على بنتك اليوم
ماجد: اليوم عرس والعالم مشتطه ما تأجلها
مشعل: ماجد ماودي اتقدم علاك كلمه انت هالحين ولا كلمته انا
ماجد: خلاص بكلمه
لحقت ماجد اخوي لين ابعد عن العرب وكلم الرجال اللي معرف حتى اسمه عشر دقايق وقفل وجاء يمي
ماجد: كلمته وماصدق على الله يقول لو بياخذها الليله ماعندي مانع
مشعل : خلها عنده انا بس املك
ماجد باستغراب: والله ماصدق على الله انا يوم دريت ان دينا قدمت زوجها كنت معارض لو ما احرجوني الرياجيل وهذه ما خلاني اهرج اعطاني على طول
مشعل: زين طحنا فيه المهم انا رايح البيت بغير ثيابي واجيب المملك واجي تبا شي
ماجد: انت الله اعلم ضارب راسك بمكان منت بطبيعي انتبه لطريقك
مشعل يتذكر شيء: اسمع ابو مالك لاتجيب لاحد علم لين يتم
وطلعت السياره قبل اسمع رده وابلش باسألته حركت وانا اتذكر كلامها هين هين شوفي الجنس الثالث وش بيسوي فيك هالحين



سمر

قفلت من حنين بعد ما وصفت لها مكان القاعه اخذت جوله على نفسي تاكدت كل شي تمام حبيت البس اصفر اليوم ليش لحد يسألني من راسي لساسي اصفر باصفر مشعشعه كني شمس
ارسلت لابو هيثم ينتبه له وطلعت من الغرفه لقيت البنات كلهم بصاله الجناح لبسوا وخلصوا بس مدري ندى مو عاجبتني من اليوم سرحانه بس نخلص الليله على خير واعرف وش فيها حتى مو موجوده اللحين مدري وين راحت
ملاك: سمر طالعي نظره اخيره فيه غلطه شي تراني اخت المعرس وبطلع للصاله قبلكم
سمر بضحكه: حلوه مليون مره قلت لك
ملاك: مع اني لبست كحلي عشان يطلعني فاتحه بس مدري وش السالفه
سمر: بالعكس احس سمارك يجنن لاتفكرين تسوين اي شي لبشرتك خلها مثل ماهي
رندا هي تلف على نفسها : وش رايكم
ملاك: هيليقيه اللحين لابسه وردي مايل للابيض ومنفوش ليه العروسه وهي عروسه مالبست كذا
رندا بمياعه: مالك دخل
ملاك: الله يشفيك
سمر: والله حلو لبسك رنود بعدين كثير يلبسون ابيض
نوف: انا العكس لابسه اسود كني بعزاء
ملاك : لا فستانك فخم بس لو مقصرته شوي
سمر: لا خير هو لين ركبتها تبينه تقصره لوين
ملاك: ما شاء الله هي بيضاء مثل دينا ويصلح اللون علاها
سمر: مها وندى وين
رندا: نادتهم امهم وراحوا معها
سمر: ثريا وسعاد طلعوا للناس بدري
ملاك: وين بدري العرب وصلوا من بعد العشاء واضح متحمسين
سمر: عمات دينا جو
رندا: ايه وجو يسلمون عليها قلنا تلبس وراحوا
قطع علينا سوالفنا صوت دينا من ورا الباب
دينا: جاهزين تشوفون الطله الاخيره
ملاك ورندا بتصفيق وحماس: جاهزين يالله
طلعت دينا من الغرفه ويا تبارك الله طالعه باربي وبيبي وتجنن وناعمه وكل شي
فستانها ناعم وهادي عليها قماش شفاف ورجلها من تحت ركبتها واضحه مسكتها باللون الوردي ورد طبيعي يجيب العافيه مكياجها ناعم ما كثرت وطالعه بيبي فيس وشعرها احسن شي فرقته مع النص وسوته بالفير وحطت تاج ناعم حتى الطرحه قالت ما بلبسها وطلعت مميزه جد على كثر العروس اللي حضرتها ماشفت مثل طلتها
ملاك: واو واو دينا وش ذا حصني نفسك قبيلتنا بيحضرون والله ليطسونك عين
رندا: بس انتي فال خير دينا حبيبي والله طالعه قمر وحصني نفسك مثل ما قالت ملاك
نوف وهي تدمع: تكفين دينا ماصدقت اني بشوفك في هاللحظه
دينا تضم نوف: بس خلاص مكياجك انعدم عادي عقبال ماتشوفيني متخرجه
ملاك: قله ادب حمستيني اتزوج وانا اطمح اصير عانس
دينا: خليك انتي كلمي اخوك قولي له تراني حاجزه المصوره من الساعه ثمانيه خليه يجي
سمر: يالله عشان بس يجي نطلع حنا
دينا: فاقدتلي الخوات ماما وخاله سعاد وندى ومها
سمر: كلهم نزلوا تحت الضيوف جو ولازم يستقبلونهم
نوف: دينا جده اخذت شجرتها حقت الورد وحطته بسله تقول بترميه عليك بالزفه ومجهزته من امس
دينا بتدمع: ياحبيبي ياجده دامها فرطت بشجرتها يعني متحمسه
ملاك: خلاص نوف تراها على طريف لاتخلينها تبكي الارتست مشت
دينا: بعدين تعالوا حركات طالعين احلى من بعض بتغطون علي
ملاك: اذ فيه احد يبي يغطي عليك فهي هاذي اللي لابسه منفوش
رندا: ياذا المنفوش خلاص طقت كبدي
ساره اخت ملاك تدخل مدرعمه: دينا يا تبارك الله ولا غلطه المهم بسرعه بسرعه قيس وصل تعالي تعالي
واخذت دينا معها عند الجدار والجلسه اللي مجهزينها للتصوير وراحت تنادي امها وخواتها وثريا عشان يزفون قيس لدينا قبل التصوير
انا والبنات كلنا دخلنا غرفه قريبه من موقع الحدث ومجهزين جوالاتنا للتصوير واشوف سعاد جات بعبايتها وبناتها جو ودخلوا معنا والله يا شكلنا مصخره لو ينفتح الباب بالغلط وبس تجمعوا الحريم في زاويه خوات قيس وامه وخالته وثريا وسعاد ووفاء وعماتها بعباياتهم وعلى دخلته للغرفه اشتغلت موسيقى هاديه من اختيار ملاك


قيس


الجو يوتر داخل بين حريم وكلهم يتفحصوني ما قدرت اخذ نظره على دينا وتفاجأت بهجوم الدبابات خالاتي من كل صوب جو يسلمون علي وما اسمع الا
مبروك ومبروك واللي تمدح واللي تذم تعديتهم ورحت جنب دينا مثل ما قالت لي ملاك اسوي لاحظت ارتعاش فكها ونظراتها بالارض هذي هي دينا بيني وبينها مو مثل قدام الناس تصير تستحي بس ما الومها العيون كلها صوبنا بست راسها كما العادات والحمدلله الزحمه بدت تخف لين ما بقي الا امها
ثريا: يالله خذوا راحتكم وتصوروا بطلع البنات الجناح مافيه الا انتم
قيس بابتسامه: ابشري
ثريا: لاحظوا قلت خذوا راحتكم بالتصوير بس
دينا بحنق: ماما خلاص
طلعت امها من عندنا والمصوره لسع ما جات جلست وجلست هي بعدي وقلت خل افتح سالفه لان البنت صايره حياويه
قيس: تكلمي قولي حرف وحشني صوتك اسبوعين يالظالمه
دينا: حسيت لازم كذا عشان نشتاق لبعض
قيس بعذوبه: انتي وانتي جنبي مشتاق وميت شوق بس عذبتيني عالفاضي
دينا وعينها بالارض: خلاص شوفني جنبك هاللحين
قيس: يالله وينها المصوره خلنا نمشي
دينا: تكفى لاتقول بنمشي وكذا اتوتر عالفاضي
قيس: انا عندي كلام بقوله ما يصلح هنا
دينا: قوله عادي مافي احد
قيس: لا كلام حساس مقدر اقوله بصوت مسموع
دينا: قيس لا تتكلم مثل كذه وقسم ببكي
قيس باستغراب وضحكه: لاتبكين خلاص لا اتكلم ولا شي لاحقين على الكلام وعلى كل شي
دينا: مازلت تتكلم
قيس: خلاص سكت سكت
بس خلصت كلامي وتدخل المصوره زين زين كل ما كان الشغل اسرع واسرع كان احسن



دينا

غمزت للمصوره عشان تفهمني وابتسمت تأكد لي انها للحين ذاكره كلامي يوم قلت لها مابي وضعيات تصوير اوفر واذكر نوف وقتها ضحكت تقول انتو مابقيتوا شي تو تفكرين تستحين
المصوره: تبغي تتصوري اول لوحدك ولا مع عريسك
قيس : لا مع عريسها
دينا بغيض: هي تسألني
قيس: وانا جاوبتها يالله بسرعه خلينا نخلص
المصوره: وقف جنبها شوي..انتي ياعروسه تقدمي شويه ..ايوه كذا تمام
اخذت المصوره كذا صوره لنا مره جالسين ومره واقفين مره لقيس لوحده ومره لي لوحدي ساعه بالضبط كلها تصوير
قيس: خلاص والله لو بنصور فيلم بعدين انا كنت متحمس احسب فيه حركات دام مافيه يالله مشينا
دينا: حركات ايش قيس تكفى اسكت
قيس: فاهمتني انتي حركات ايش وش ذي الصور ما كنك تتصورين مع زوجك
دينا بهمس: عيب البنت موجوده
قيس: مدام خلاص خلصنا تصوير
المصوره: بدك شي يا عروسه
دينا بسرعه عشان لايتكلم قيس: لاحبيبي خلاص انتي روحي اللحين وبيننا تلفون
قيس: ايه حبيبي اتحدى اذ مو اول مره تشوفينها
دينا: اشش
يوم جمعت اغراضها المصوره وطلعت حسيت بنفس المغص اللي احس فيه اليوم والله مابا اجلس مع قيس لوحدنا اخر مره جلست معه في ثاني ايام العيد يوم كان متضايق واذكر وقتها بالضبط كيف كانت مظراته وحركاته وانا تحت تأثير اللحظه كنت مستمتعه بس يوم جلست مع نفسي وفكرت حسيت مالي داعي وصارت عكسيه صرت اتوتر اذ جلست معه لوحدي الله يستر ذا كيف بعيش معه



ندى

جالسه اشوف ابو دينا يكلمها كل ساعه بالجوال ويتطمن عليها واحس العبره خانقتني ليش يا يبه منت بمثله ابو دينا اللي كانوا يقولون عنه مهمل ومدري ايش اذكره يوم قالت دينا بقدم زواجي رفض وقال ماتتزوجين الا بعد ما تتخرجين لو ما شاف دينا وقيس صاملين ما اعطاها فرصه بس في المقابل ابوي انا وش سوا ؟ دق علي في يوم زواج اختي الثالثه خرب فرحتي وقال تجين توقعين في واحد بياخذك ماني راده ولما كنت تحت تاثير الموقف اللي صار لي عصر مع عم دينا رحت ووافقت على طول بس الشيء اللي ما عرفته ان هو عم دينا اللي صار زوجي ببساطه لقى ابوي ارض خصبه واستغله والضحايا انا ومها اشوى بس امي ماكثرت بنات ولا كان حالتنا تحزن حسيت ما لازم اني اسكت لازم اسوي ردة فعل رحت بعيد عن الاجواء المزعجه واتصلت على الرقم اللي اخذته من جوال دينا




مشعل

انا والعيال عند بوابه الجناح ننتظرهم يسمحون لنا ندخل نسلم على بنتاخي بس دق رقم علي وابعدت عن العيال ورحت رديت
صوت بنت: الو
مشعل باستغراب: هلا
: اباقولك كلمتين
مشعل: ومن متى تعرفيني عشان يكون بيننا كلام
: والله يقولون انك صرت زوجي ف ابمنع المأساه قبل تصير
مشعل:ماعلموك اهلك انه عيب عليك تكلمين رجال غريب عنك
ندى: اي غريب انت اليوم جايب المملك وش يسوي هاه انا مابيك ولا اتوقع ان رجولتك تسمح تاخذ وحده مغصوبه عليك
مشعل: خلينا من شماعه الرجوله اللي ياحبكم انتم يالبنات للتمساح فيها تتوقعين انك اذ قلتي رجولتكم وخرابيط باحترق واقول روحي رجولتي ما تسمح لي لا ياعين ابوك انا مثل مابديت في اللي سويته بنهيه كلمتك والله لتدفعين ثمنها غالي
ندى: عساك الجلطه يالحقير
قفلت الجوال وانا مستغرب البنت اللي اليوم بس سمعت صوتي بغت تجيها سكته بس هالحين استقوت ماعلينا انا اعرف لها دواها عندي انا من عمري اربع سنين اللي يقول لي حلو قصيت لسانه قطع علي تفكيري ووعيدي راشد ينادي يقول تعال سلم حطيت الجوال بجيبي يارب بس دينا ماعندها خبر لان ماني بناقص حنتها



دينا


قبل الزفه وانا عند الممر وقيس جنبي دخلوا علي العيال مالك،مشعل،ابو خلي،راشد، وحتى تركي مدري ليش حسيت بغصه اشكالهم بالثوب ولا تباريكهم لي ولا وش القصه
راشد بحب: مبروك دينا شوف ياقيس دينا مو بنت اختي دينا بنتي الله الله فيها
قيس: ماتوصي حريص
مشعل: ياتبارك الله يخي مابقيتي زين للحريم اليوم انا لي سنه اقول لاتقطعين نصيب بنات عمك
دينا: مشعل خلاص اسلوبك وكلامك يذكرني ب ايام كنت عندكم
مشعل بضحكه وهو يحضني: بتسوقينها علي وتقولين اشتقت للايام ذيك بقول كذابه وكذابه
بعد ما ابعدت من عند مشعل على طول مالك حضني يا حبيبي اللي يشوفه مايقول اصغر مني بسنتين في فرق حجم بيني وبينه
مالك: شوف يا ولد السالم اخذت شمعه بيتنا الله الله فيها وانتي بس يزعلك بحرف تعرفين وش تسوين
دينا: ملوك حركات تحبني
مالك بنذاله: لا ذي شكليات قدام العريس بس
تركي وهو يصافحني برسميه: مبروك يا بنتاخي حظ من كنتي نصيبه
دينا: عقبالكم يارب
ابو خلي دخال عرض: دوني انا قلت بحضر عرسك وحضرته
جلست عشان اكون في مستوى طوله: ياحظي ابو خلي والله اني صرت احبك يالوصخ
ابو خلي انحرج: لا عيب تحبيني منتي باختي
دينا بصدمه: حركات ابو خلي والله وكبرنا
قيس كنه متنرفز: يالله يرسلون علي يقولون وقت الزفه
راشد: يالله يا عيال دندون حنا نستأذن
دينا: استودعتكم الله
حاولت اجاهد دموعي وانا اشوفهم طالعين مدري ليش الوضع يبكي ياما نتهاوش ونتضارب بس الحمدلله احس قلوبنا عند بعض
قيس كنه متضايق: هذه ماهو تركي ولد عمك
دينا بكذب بعد مافهمت وش فيه: ايه ولد عمي وش فيها تراني اكشف على عيال عمي
قيس يطالع بصدمه
دينا بضحكه بدون نفس: بشويش لا لا ذا تركي راضع مع مشعل يصير عمي عادي محرم
قيس وهو يحرك رقبته حركته اذ توتر: حتى ولو انا عمك واخوك يوم حضنوك ارتفع الصغط عندي خلاص سلموا من بعيد ورحوا ماله داعي
دينا: قيس حياتي مو لذاك الدرجه هونها
قيس: والقزم ذا نظراته ماهي بطيبه
دينا : اجل انت اللي ماهو بطيب تقصد ابو خلي
ملاك جايه مستعجله: دينا خلاص بيشغلون اغنيه الزفه خليك عند الباب تعالي وانت اخ قيس روح انتظرها عند سيارتك مافي تدخل عند الحريم
قيس: من اول داري وانا اللي اقيل مابدخل جوه المهم انا برا دينا حبي مايحتاج تسلمين على الكل خلصي زفتك وتعالي
ملاك: يخوي توكل بس يالله دينا تجهزي
جلست واقفه عند اول الممر والانوار مقفله بس شفت اشاره ملاك من بعيد وبدت الاضواء كلها جهتي توترت بس قلت انا قدها مشيت بهدوء ونعومه متعوب عليها اشوف عند الكوشه ماما وخالاتي وشاىف عماتي وصاحباتي كلهم مبتسمين لي حسيت بشجاعه وثقه رفعت راسي وكملت الزفه على انغام هاديه عيني على اللي على الكوشه مهما تخاصمت معهم وتطاولت عليهم كلهم يحبوني حتى عماتي احسهم فرحانين من قلبهم لي شفت البنات يصفرون وينادوني اشرت لهم بمسكتي وكملت طريقي شفت نوف والريم جالسين جنب بعض ويصفقون بهدوء ياحبيبي يا نوف واضح ارتاحت لها مديت يدي لسمر اللي جات وساعدتني اعدي الدرج وشهد اخت ملاك تمشي مع المصوره من اول جات وساعدتني مع سمر بس مشيت لين وصلت الكوشه اشتغلت ميوزك للرقص وبدو البنات حواليني يرقصون ويغطرفون متحمسات وانا نسيت نفسي من الحماس رقصت معهم حسيت ماما وعماتي ناقدين بص ماعلي انا كم مره بعيش مستخسرين فيني رقصه مسكت ندى وملاك والباقين جلسوا يصفقون لنا ورقصت مع ملاك مره ومره مع نوف ومره مع ندى لين خلصت الاغنيه واجات ماما سحبتني بهدوء عشان لا تلفت الانتباه وجلست على الكرسي اللي كان من اختيار سمر الكوشه كلها تصميم سمر اشتغلت اغنيه وقامت ماما وخاله وفاء وعماتي يرقصون عليها وانا احاول احافظ على مظهر البنت الانيقه بعد ما خلصوا جات ماما تكلمني
ثريا:عماتك يقولون بيتصورون معك عادي
دينا: ايه عادي
شفتهم حولي يحاولون ينتظمون كلهم نوف وندى ومها وسمر وملاك ورندا وساره وشهد وتذكار وعليا ودلال عماتي حتى منى حرمه عمي والريم وريماس صاحبتي ايام الثانوي صفوا حول الكوشه واخذت المصوره لنا كذا صوره اخرها صورتي مع جداتي وحده يميني ووحده شمالي الله يطول باعمارهم



قيس

وصلت جناح الفندق اللي حاجزه لي نص ساعه عالباب انتظر اخت ساره تخلص توصياتها بس شكلها مطوله
ساره: وانتم قفلوا جوالاتكم عشان لحد يزعجكم ويخرب جلستكم
قيس بملل: حنا بنلحق نجلس اصلا من حنتك
ساره: ووش بعد ايه خلاص تصبح على خير
قيس: وانتي من اهله
قفلت باب الجناح ورجعت لدينا اللي كانت جالسه على الكنبه حتى واضح مستغرقه بالتفكير واللي صدمني ريحه العطر اللي اعرفه زين ريحه محتفظ بها في خلايا عقلي لي معها ذكريات اعرف عطرهاالمميز والمثير والمختلف والدافي
قيس بهمس وانا اطلع البشت: في ايش الحلو سرحان
دينا بتوتر: والله انا مدري ليش سرحانه
لاحظتها والله مرتبكه يمكن اجواء العرس لها دور بتوترها
قيس بهدوء اجلس جنبها: اذ تبغيت تبدلين تقول ساره ان اغراضك هناك في ذيك الشنطه اخذي راحتك حبي
دينا فزت قايمه: ايه والله ياكرهي للفساتين انا
جلست فوق نص ساعه تبدل وانا اخذت جوالي طالما تعشينا بالقاعه خلينا نطلب عصير حلا اي شي نقضي به الوقت بس خلصت طلب ورفعت راسي الا دينا داخله علي ولابسه بجامه حرير لونها بني طالعه مع لون بشرتها ولا غلطه صح مسحت المكياج بس شعرها تركته مثل ماهو حاولت احافظ على نظراتي البنت اصلاً بتجيها سكته من التوتر
قيس: ايه تقولين كيف كانت الليله
دينا: كيف كانت مره حلوه
قيس: وانا بعد كانت حلوه بوجودك
دينا: قيس اسألك شي ماتضحك علي
قيس باستغراب: شنهو
دينا: جد اللحين لون عينك كذا من ربي
قيس بضحكه: اي والله من ربي ليه عاجبتك
دينا بغرور: مو مره بس استغربتها
رن الجرس وكان خدمه الطلب ماعرفت صدق الا تجي بوقت ما بدت بيننا السوالف رحت اخذت الكيك والعصير اللي طالبه وجيت حطيته على الطاوله وجلست في امل ان السوالف بيننا ترجع تنفتح
دينا بعد ما مديت كاسه العصير لها وجلست جنبها: تدري كنت محتاجه حاجه بارده
قيس : عافيه على قلبك عيني

والله يالبنت ملاحظها متوتره مو هاذي دينا دينا اللي اعرفها غير والله غير بس مثل ماقلت شكلها حست بجديّه القصه حسيتها مركزه نظراتها صوب الارض قلت هذي فرصتك ياقيس ناظر فيها وتمعن مثل ماتبي
دينا تقطع تأملي: قيس في ايش تفكر
قيس بهدوء : اللاشيء ما احس اني افكر بشيء
دينا تبرر: قيس انا مادري ليش احسني اوفر دراما بس يعني ماعندي سوالف بس صدقني اذ جاء على بالك اني متوتره ولا مابي جلستك غلط في غلط والله مستانسه بس مدري ليش كذا
قيس بابتسامه: مستانسه
دينا: يعني هو لا تدقق في الكلمه
كانت تفرك اصابعها ونظراتها وريحتها وانفاساها المتوتره اسكرتني وجات ببالي قصه حبيت ابداها
قيس ببحه وهمس: دينا قربي بقولك شي
دينا بنظرات شك: قوله هنا ماحد يسمع
قيس بخبث: لاهو كلام حساس مقدر اقوله بصوت مسموع
وبس قربت مني كملت اللي بديته يوم العيد ...

رد: متقلبين الود

٤٦

دينا

ياه قمت على نور الشمس انا بالعاده ما انام في الاماكن الغريبه بس من التعب نمت حسيت كأن براسي هواء كله بسبب سمر نست تحط في شنطتي مجفف الشعر ونمت وانا شعري مبلل
بس صحصحت وفتحت عيني جيت بقوم وانتبهت على اسواره ذهب ناعمه في يدي لو ما سمر علمتني ان فيه عادات كذا كان فكرتها حاجه ثانيه قمت بكسل ودخلت دوره المياه غسلت وجهي وجمعت شعري فوق وربطته والله مالي حيل احط ميكب مع الصبح عاد خلوا قيس يتعود يشوف وجهي كل صبح كيف
الا على سيره قيس هو وينه ؟؟ اكيد نزل تحت او شي
دقايق سبحت في افكاري وضحكت من تفكيري وربي يا انا مو صاحيه بس غصب عني انا لو ماعرفته الا ليله امس يمديني رحت فيها والله كذا احس قيس فيه حنّيه بزياده
نفضت راسي لعل الافكار تطير لا يجي قيس ويشوفني على هالحاله الحمدلله الافكار ماتنشاف قمت بدور جوالي اذكره مقفل من امس بشوف وش صار ومنها اقول لقيس يجي يطلب قهوه للحين احسني نايمه
طلعت على الصاله شفت قيس جالس على الكنبه وحاط يده بين راسه وواضح مو فالدنيا غريبه
رحت جلست جنبه يوم انتبه لي رفع راسه ويوم شفت ملامحه ايقنت ان فيه مصيبه
دينا بتوجس: صباح الخير
قيس: صباح النور
دينا: قيس فيك شي
قيس يغطي وجهه وبالم حسيته من نبره صوته: قولي وش مافيك
دينا بخوف: قيس وش فيه
قيس على نفس حالته : ابوي يا دينا ابوي
دينا: وش فيه
قيس : جابر قبل ساعه دق علي يقول تعبان جاته جلطه انا جبتها لابوي انا جبت له جلطه
دينا بعدم فهم: وش جبت لابوك
قيس بصراخ : جلطه انا جلطت ابوي ابوي يمكن مايقوم وكله سببي انا
دينا : خلاص اهدا قيس وش دراك عن الغيب انت اهدا وادع لابوك لاتجلس تلوم نفسك
قيس : وش بيصير فيه اذ ابوي صار له قسم بالله نفسي ما اسامحها والله ما اسامحها

والله خفت قيس مو طبيعي حاولت اجلسه وضميته لصدري قلت يمكن يهدى الولد مو بعقله ومن ملامحه واضح انه خايف توقعته بيقاوم ويسحب نفسه مني بس لا سند نفسه لصدري وحضن خصري بيده وهو يتمتم بأدعيه يارب اشفي ابوي ويارب سامحني
بس انا للأن ماني فاهمه وش القصه وكيف قيس جاب له جلطه وعمي وش فيه وكل ذا ماقدرت اخذ نص اجابه من قيس بسبب حالته


نوف

امس كلنا رحنا لبيت خاله ثريا على اساس نسوي فقره التحليل اللي بعد كل مناسبه بس ياليتنا ما رحنا والله يالليله كلها دموع عمه ثريا اللي يشوفها يقول بنتها ماعمرها ابعدت عنها ما كملت السهره معهم على طول رحت نمت وانا اتذكر حواري مع ريم وكيف انها حريصه توصل لي كل كلمه يقولها وائل عني وتقول بعد اعطيني موعد عشان يجي هو واهله يكلمون ابوي حتى بس اسم اني انعرف اني له وهو لي وقلت لها لين تهدى الاوضاع واقولك
طلعت من الغرفه اللي كنا نايمين فيها انا والبنات وشفت المطبخ انواره شغاله ولاني مطمنه ان البيت مافيه احد والليله ليله ابو دينا عند زوجته الثانيه دخلت المطبخ على طول ولقيت ندى تبكي
نوف: ياه دموعكم ماخلصت تراها مستانسه انها طلعت من عندكم حتى جوالها مقفلته
ندى: تقصدين من
نوف: اقصد دينا يعني من
ندى وهي تلطم خدودها: نوف انا ابكي على حالتي على نفسي ماذكرت دينا
نوف باستغراب: وش فيها حالتك
ندى : امس ابوي زوجني وملك لي متخيله قال لجتعالي وقعي على طول بدون ما يشاورني حتى
نوف بصدمه: علمتي امك
ندى: علمتها امي ضعيفه وش قالت قالت ابوك ادرى بمصلحتك ياليت خاله ثريا ولا سمر امي والله ما تكون حالتي كذا
نوف: من عيال عمك صح
ندى تهز راسها علامه لا: عم دينا مشعل
نوف بفرحه: طيب اهون مو انتي تقولين مشعل ولا عيال عمي
ندى بقهر: مو بالغصيبه مو بالغصب انتي لو تدرين وش اللي خلاه يجي يقول لابوي بملك ؟
نوف : وش
ومع كل حرف تقوله لي ندى انصدم وانصدم مره ومرتين وعشرين يعني هو حتى ما يبي ندى ويبي زواج طبيعي كل ذا رده فعل !! يوم سمعنا صوت بالصاله سكتت ندى وقامت بتغسل دموعها وفي نفس اللحظه اللي قامت فيها دخلت سمر وواضح شبعانه نوم
سمر بتثاوب:النثيه دينا ماجاكم منها خبر ماعندها شيكه واتصل جوالها مقفول
نوف: لا واضح نايمه بالعسل الله يهنيها
سمر: اهخخ فاتتني اسوي بها مقلب وابدل بجايمها بقمصان نوم عشان تجيها سكته
نوف بمصخره: بتستانس ماعندها مشكله
سمر: على قولتك وجهها مغسول بمرق
ندى بهدوء: بنات خاله ثريا مجهزه صحون جبنه وحلاوه طحينيه وهالحركات احطها اللحين ولا متى
سمر: لاحطيها بنفطر وروحي نوف قومي مها لا تنجلط ليش خلصتوا الفطور علي خبرك فيها ماتحب تاكل لوحدها
قمت اصحي مها وانا افكر بمشكله اخت ندى انا ماعندي الا دينا هي اللي بتساعدنا صح بخرب شهر عسلها بس مو مهم حياة ندى اللحين اهم لاحقه دينا عالعسل



حنين

خلصت من بخار وجهي للمره الثانيه اليوم وهذه هو انا اذ احترت وفكرت يجيني حب للعنايه ببشرتي مى طبيعي من امس لليوم كم ماسك حطيت
رميت نفسي على السرير واتذكر الموقف اللي صار امس المليون واللي هو قصه راشد لما قلت لسمر تكلمه يجي يتصور معي ورفض ليش يرفض؟ على حسب معلوماتي ان راشد للحين ماتخلى عن صفه الخجل اللي فيه من ايام كنت ارجع من المدرسه مع سمر كان اكبر منا بس كان مره خجول وذا الشيء اللي استغربته عندنا والصوره اللي انا ماخذتها عن العيال انهم عادي واخر شي يفكرون فيه الحيا او الخجل بس راشد لا العكس صح يمزح ويضحك بس اذ كنت انا او بنت غريبه عنه موجوده يصير مره مؤدب وانا اللي صرت زوجته للحين مافكر يكلمني او يتواصل معي
اخذت الجوال وشفت الرقم اللي حفظته من ليله الملكه من عند سمر بدون ما افكر ارسلت عليه بيت شعر شوي جريىء بالنسبه لوضعنا بس ماعلي اذ هو ما بيبادر انا مستعده ابادر ودي الزواج يتعجل باسرع وقت لاني حياتي كذا فاضيه لا دراسه ولا انقبلت بجامعه ولا هم يحزنون بدل ما اجلس اهش ذبان اخلي شي بروتيني اللي من عشر سنين يتغير
رجعت اشوف الرساله اذ وصلته ولا لا وفي دقيقتين وصلته ولا قراها بعد
رجعت اقراه من جديد بشوف لو قريته من اول مره وش بحس فيه
-أخفيتُ حُبك عن جميعَ جوارحي
فَوشتْ عيوني والوشاةُ عيونُ
ووددتُ أن جوانحي وجوارحي
مُقلُُ تراك ومالهُن عيونُ
ياليت قيسً في زمان صبابتي
حتى أُريهِ العِشق كيفَ يكونُ
ماقدرت اعرف وش احساسي لانه رد علي برد محايد واشوفه تقدم بالنسبه للفكره اللي ماخذتها عن شخصيته
- قيس والله عانيه عند بنتاخي بس والله رهيبه القصيده لو مافيها اسمه





ملاك

عساك يا سالم ماتربح ضروري تسوي فيها راعي موقف وعندك كرامه وش صار لابوي انجلط كله بسببه كله بسبب سالم يوم انه ماحضر عرس قيس تفشل ابوي قدام العرب ان ولده الكبير ماحضر وياقلبي يابوي كتم كتم بقلبه لين بغت تجيه سكته يوم جاء ينام بس والله يا الظاهر دينا بتلحق ابوي وتنجلط لان سفرتها تأجلت وكله بسبب قيس نقوله يا بني ادم والله ابوي طيب عدت سليمه بس يده ما يقدر يحركها وقالوا شهر مع العلاج الطبيعي كل شي تمام بس انه نعند الظاهر السلوقي لقاها فرصه عشان ما يصرف مصاريف زياده
يوم سمعت جرس الباب عرفت ان يا دينا وقيس يا ساره اختي وصلت بس طلع الخيار الاول صح بس دينا بدون قيس قمت لها على طول جات ضمتني
دينا: ملاك كيفه ابوك
ملاك: اجلسي واستريحي بخير والله بس يده تعبانه والله هو طيب جابر يقوله لنا
دينا تكلم شاهيندا الخدامه: بوتل ووتر بليز
ملاك: وش فيك انتي انخطف لونك
دينا: انتي لو شفتي اخوك وش صار فيه والله يا ملاك طول الطريق اتشهد وتمر من قدامي لحظات حياتي حسيتني ما بوصل
ملاك: ليه
دينا: يسوق كنه في سباق الله يستر عليه شوفيه رايح المستشفى
ملاك بعياره: ايوه دينا قبل يتجمعون علينا بسألك
دينا: هاه
ملاك بغمزه: منتي مخبيه لنا شي
دينا وهي تزط علبه المويه مره وحده: وش خبيت عنك
ملاك: مافي حمل منا ولا منا
دينا: تلايطي ملاك ارجوك
ملاك: خلاص سكت سكت بس انتي عروسه امس زواجك ولا طالعه من عزا عبايتك ليه علاك ووجهك ليه كذا مافيه ذره ميكب
دينا: والله لو فكرت بس اغير لبسي كان تترحمين علي قيس معصب ومتوتر ماحبيت ازيده
ملاك: والله انه اوفر
دينا: بس هو خايف من ان يصير لابوك شي واظن فيه شي بينهم لان يقول بسببي
ملاك: لا عشان سالم ماحضر ابوي تضايق وقيس شكله قصده بسببي انه عاند سالم وكان سبب ان سالم ما يحضر
دينا براحه: اييه قولي كذا من الاول يختي الله يبشرك بالخير
ملاك: قومي هيا غرفتي تلبسين براحتك حريم العيال بيجون اكيد
دينا: انا بروح لبيتنا للحين عند ماما وبستغل الفرصه امر عليهم
ملاك: خساره فوتوا سفرتكم عالفاضي
دينا: السفره بدالها سفره اهم شي صحه اخوك النفسيه والله كنت شايله هم يكون اللي في ابوك كايد
ملاك: خليك من ابوي انتي كيف شفتي اخوي قيس سيد الرجال
دينا: شفته ادمي طبيعي
ملاك: دينا انتي تعرفين قصدي
دينا: هو عشاني عارفه قصدك مارح اجاوبك يالله قومي جيبي ليه نسكافيه سوداء خل اشربها قبل لا اروح لبيتنا
ملاك: بكلم شاهيندا تجيبها انا مالي حيل
دينا: كيف شاهيندا ذي مهتمه بالنظافه يعني
ملاك: مدري اذ جابته لك شوفيه نظيف ولا لا



ثريا

والله يالبيت بدون دينا كئيب مع ان خواتي للحين عندي بس اشوفه كئيب وممل صح انا متعوده على غياب دينا بس على الاقل كنت اعرف وينها ووش تسوي هالحين البنت مقفله جوالها والمفروض مسافره من ساعتين وانا مدري وش سوت والله يا انها عوبا ماصدقت تزوج قفلت الجوالات بوجيهنا
شلت صح الغداء وطلعت للمجلس اللي فالحوش عند ابو مالك والعيال
ثريا: وهذي هي كبسه الحاشي بالعافيه عليكم
سلطان: شكراً ماما
حمد: شكراً يالله شكراً ماما
مالك: الله يسلم يدينك
ثريا: حبايبي عافيه
ماجد بهدوء: ماجاك عن بنتك
ثريا: لا شكله قاعده تلعب عالبنات ومقفله جوالها ونستنا
مالك: لاتدري انكم قلقانين عليها والله ماترد شهر قدام
ماجد: يقول عمك ابو طلال ابو سالم تعب علاهم بعد ما ضيف الضيوف امس
مالك: افاا ياذا العالم هو صادق
ماجد : لايمزح معك
ثريا: ماقال نسيبك وينه
ماجد: لا ماقال بس يقول ان ابو سالم طيب جت خفيفه ملوك هالحين تخلص غداك وتروح لعمتك الكهرب خربانه تجيب عامل وتقعد معه لين يخلص شغله
مالك: كم يبي لها اكثر من ساعتين مقدر مواعد لي عيال
ثريا: روح ياعين امك انبسط منت ملزوم فيها
ماجد بنظرات حاده: انا لاقلت كلمه تسويها ان شاء الله تقعد للمغرب ما ترد علي حرف
مالك مجبور: ابشر ابشر
قمت من عندهم وانا ضايقه هالحين وين اخوانها ووينه هو مقصر لايجيب لها عامل ماخذ ولدي خدام لها والله لو ماني بخايفه انه يقلب علي كان حلفت على مالك مايروح بس مجبوره اضغط على نفسي لين يهون كل شي ان شاء الله


دينا

اعد اللحظات قيس وين راح مابا تجي وحده من خوات ملاك وانا بحالتي ذي بعد صلاه العصر بالضبط اسمع ملاك تكلم قيس في الصاله
ملاك: عاد والله قلت لها يابنت خلك وتعشي وامرحي عندنا وهي قعدت تقول لا ولا بروح لبيتنا الغبيه مادرت انها اذ تزوجت يصير هذه بيتها خلاص
قيس: هي وينها هالحين
ملاك: في الغرفه هذي تستناك
شفت قيس يدخل وشماغه على كتفه واضح انه تعبان مالومه اذ يقول من فجر صاحي
قيس: يا مساء الخير
دينا: مساء النور هاه كيف شفت عمي
قيس: زين زين عدت على خير
دينا: الحمدلله
قيس: هاه بتمشين ولا بتقعدين
دينا : لا لا ماشيه بمشي
ملاك: خساره والله بدايه الدراسه قربت متى يمديكم تسافرون
دينا: اصلاً المود مو مود سفر بس نستقر ونعرف وين حنا نسافر ذيك الساعه
قيس: لايك
ملاك: اكيد لايك مو انت اللي جايب الفكره
دينا: لا مو هو اللي جابها كلنا اتفقنا مع بعض
ملاك بهمس واضح لقيس تبي تستفزه:شوفي قيس اسراره كلها عندي بس حسيتي نفسك متضايقه رني علي افضحه لك
قيس: انا لو العالم كله يعرف اسراري انتي بالذات اخر وحده اعلمك
دينا اكمل اللي بدته ملاك : مو شرط تعلمها ترا كذا من ربي تعرف كل شي عنك بسبب رابطه الاخوه
قيس وهو رافع حاجب: يعني مثلاً بتقنعيني ان اخوك يعرف اسرارك
دينا بتفكير: من .. آه ملوك ايه بالعكس اكثر اسراري عنده
ملاك بخيانه : كذبك
دينا: والله بس لانه دلخ مايدري انها اسرار
ملاك: طيب يالله بتمشون واشوف حلت لكم الجلسه
دينا: يمه لاتاكلينا يالله طالعين
ملاك ترافقنا للباب: دريتي دينا بتسكنين فتره من الزمن مع حمولتك لان البيت ماجهز ميه بالنيه وجهزنا اكم جناح هنا ياشماته رنود
دينا: بالعكس بتنقهر
ملاك: ما بتلحق تفكر فينا انقبلت طب البنت دوبها في دروسها
دينا وانا اسلم على ملاك قبل اطلع: الله يوفقها يالله سلمي لي علو خواتك اذ جو
ملاك: ماتبين اسلم لك على رحمه وساميه
دينا: ولو الاولويه ذول
قيس: يالله عن الهذره تعالي
رحت وركبت السياره وكالعاده حاره بسبب الشمس
دينا: احمد الله مافكرت احط ميكب الجو يجنن صراحه
قيس: وهاذا المكيف وشغلناه امري اي طلب غيره
دينا: لا خلها تجي مع الوقت .. الا شفت قيس مايحتاج قلقك اللي اليوم ما يصير الا اللي كاتبه ربي
قيس: تكفين بين كل كلمه والثانيه جيبي اسمي له رنه خاصه بصوتك
دينا: لا مروق الحمدلله دوم يارب
قيس: السلوقي جابر ماعرف يعلمني الا الصبح خرب علي مشروع كنت ناوي اسويه بس مايخالف نسويه بيوم ثاني
دينا بتغير الموضوع: جوالي يووه نسيت اتفقده تدري من ليله امس مقفل
قيس بضحكه: مسويه تصرفيني افتحي جوالك وانزلي تونسي مع اهلك ومصيري بستفرد بك



رندا

سويت لي انا وابوي رز ودجاج ولامي سويت لها شربه لانها للحين ماتقدر تاكل اشياء ثقيله على معدتها خلصتا غداء وقمت غسلت المواعين وسويت شاهي حطيته عندهم ورحت الحمام غسلت الملابس كلها اللي بسله الغسيل ويوم جيت اجلس اسمع امي تناديني تقول امسحي البلاط بكلوركس طالعه له ريحه
رحت شلت سطل المريه ومسحت بلاط المطبخ والصاله ورجعت طلعت الملابس ونشرتها في الحوش وبس جلست بديت استوعب انا وللحين بإجازه ماني قادرة اخلص شغل البيت فما بالك اذ بديت كيف بلحق اسوي غداء وعشاء امي وعشانا انا وابوي وارتب واغسل مواعين وثياب
انا اذ مشيت في التخصص ذا بيكون كله من توفيق ربي لان مضغوطه بشكل من كل جهه يارب ماتضيع لي تعب



مشعل


بس شفت رقم دينا يدق علي عرفت ان العلم وصلها رديت عليها بسرعه بشوف وش بتسوي
مشعل: هلا بحرم قيس الغاليه بنت الغالي
دينا بعتب: مشعل وش اللي سويته
مشعل: وش اللي سويته
دينا: انت عارف مشعل لاتسوقها
مشعل: انتي معليك فينا تونسي مع رجالك وش لك تصدعين راسك بمشاكلنا
دينا بنبره عصبيه: لا رايق ما شاء الله انت لو تدري البنت وش مسويه ونفسيتها الزفت كان انسحبت من الموضوع ذا من زمان
مشعل بدفاع: انا تحت تأثير موقف سويت اللي سويته وكلنا عارفين كذه كذه عليا اختي كلمت امها وش الجديد بدون دراما
دينا: الجديد اخ مشعل انك ماتصرفت الا بعد ماسمعت كلامها انت ماتعرف ندى والله يا مشعل ان قلبها ممكن اطيب قلب تعرفه بس مشكلتها لسانها شوي متسرعه ولا اللي بقلبها غير والله غير لاتكون حقودي وتحقد عشان سالفه تافهه مثل ذي اصلاً اكبر دليل على كلامي انها قالت عنك حلو وانت مع جنبها
مشعل بهدوء: هي علمتك باللي قالته
دينا: ايه علمتني وما اشوفه شي من كلام ندى المعروف مشعل عندنا نقول ندى ماعليها شرهه مهما قالت كلنا عارفينها وعارفين لسانها
مشعل يفضفض: والله لو تشوفين ابوها كيف يوم كلمه ماجد استانس وحتى كان بيكلم المملك قبل لانغير راينا وبعد ماتمت الامور يسألني اذ حلال ابوي له كله ولا لي من حلال ابوي ونياقه شي
دينا: شفت يعني البنت في ظروف الله اعلم بها اولها ابوها لاتزيدها عليها
مشعل بعتب: دينا انتي وش شايفتني اي كلام قلته لها تراه وقت ماكنت معصب ولا انا مستحيل باخذها بذنب كلمه قالتها كل اللي صار كان تحت تأثير موقف وبس تخطيت خلاص لازم اتحمل السالفه اللي بديتها
دينا: يعني منت بمخطط انك تنتقم ولا تسوي لها شي
مشعل: لا لا والله ما يصير الا اللي يرضي خاطرك وخاطرها انا رجال ابي استقر واتزوج وكل كلمه قلتها لها مجرد تخويف ولا ويين الانتقام ووين انا
دينا بوناسه: يالله بقفل انا ماجلست مع البنات اول مادخلت استلموني شكاوي عليك وجيت احاسبك هاللحين برجع اكمل سوالف مع ماما سيو ليتر
مشعل: تحاسبيني يا بنت ابوك هين
دينا : الله معك

رد: متقلبين الود

٤٧

دينا

المكان مقلوب رأساً على عقب حطينا كل حيلنا في تجهيز الزواج ونسينا البيت فاضي حاولت اتعدى الصناديق اللي مليانه بالصاله ورحت جلست على الكنبه الشيء الوحيد الموجود في الغرفه
دينا: قيس خل من يدك والله من مغرب وانت ماسك ذا الليت
قيس: خلاص حطيت في بالي اركبه والله لاركبه
دينا بسخريه: لك فيه ثلاث ساعات لو جبت عامل في خمس دقايق خلصها
قيس: وانتي وش تبين يعني وش الفايده خليني اركبه بدون ازعاج
دينا: مو على كيفك استعجلتني ماقدرت احلل احداث ليله الزواج وتقول تعالي وتعالي اخرتها ماسك الليت وانا جالسه والله ملل
قيس وهو يجلس جني على الكنبه: وهه هذي جلسه امري وش بغيتي
دينا: بسوي قهوه تركيه تبيها بسكر ولا بدون
قيس: وشلك تشربين قهوه ما انحمست لك هذي قهوتنا الشقراء ما احلى منها
دينا: عارض جانبي الله يكفيك شره
قيس يمسك يدي بنظره اعرفها زين: وانا عندي عارض جانبي وماعنده الا دواء واحد
دينا بتصريفه: ملاك توها مكلمتني تقول بتجيب سينابون تكفى قيس لا تفشلنا
قيس بقهر: احوول انا اذ غلطت غلطه عمري فهو اني جيت هنا انا ليه مارحت اي ديره ان شاء الله النظيم هاللحين بتقضونها انتي وملاك سهرات
دينا: مو هاذا السبب الرئيسي اللي خلا ملاك تفكر تشبكنا مع بعض
ملاك: يهودد انتم منتم بتاركيني بحالي ادخل تلقاكم تحشون فيه
دينا وانا اخذ الصحن منها: ملاك اعترفي انتي مسويته ولا من
ملاك: والله انه انا
قيس بنرفزه: هاللحين ماتعرفين تدقين الباب تدخلين مدرعمه كذا ليش
ملاك بخبث: ليه وش كنتم بتسوون
قيس: قسم كف يهد سنونك كلها
دينا بنذاله: شكراً ملوكه حبيبي يالله مع السلامه على غرفتك عيب حنا تونا بنجلس مع بعض ونسولف
ملاك بصدمه: هاتي صحني اذ بتطرديني
دينا وانا رايحه المطبخ بحط صحون للحلا: فات الاوان
ملاك تلحقني بالمطبخ: غريبه وعجيبه جيتي توقعتك بتجلسين لاخر الليل عند اهلك
دينا بقهر: كنت بجلس بس اخوك قال مفيش قعده
ملاك: البيت وش فيه كذا عاري مافكرتوا تأخذون يوم قبل الزواج وتأثثونه
دينا وانا احرك القهوه اللي على النار: والله ولا جاء على بالي
ملاك بخبث: البيت كله ما تأاثت الا غرفه النوم ايا عيال اللذينا كان شفتوا المطبخ اذ اللحين جعتوا وين بتاكلون
دينا وانا اروح لقيس: من مطبخكم يالله قدامي خلصي فنجال قهوتك ويابخت من زار وخفف
قيس بضحكه: ملاك تخفف معجزه
ملاك: هيه انت، تراني تاركه جابر ومرته تحت وجالسه معكم احترموا شوي
دينا بحب: خلاص لا تزعلين نمزح معك
قيس: تكلمي عن نفسك انا ما امزح
دينا: خلاص انا بس اللي امزح معك حتى اجلسي وشوفي موڤي معي
قيس : ابلش


ندى

يخي والله دينا كفو بنت كفو ريحتني قسم بالله يوم سمعت المكالمه مع عمها وانا ارتاح هو صح يمكن الكلام اللي قلته قوي شوي بس ماتوصل يفكر ينتقم بس صراحه حزت في خاطري يوم تكلم مع دينا عن ابوي وكيف انه يسأل عن حلالهم الله يهديك حتى الواحد لو كان على قد حاله يبقي شوي كرامه اذ مو عشانه عشان عياله دخلت علي امي وقطعت ام تفكيري
سعاد: شنطتك ما جهزت يالله بسرعه بنروح اكيد البيت يحتاج تنظيف هالحين
ندى وانا اقوم بتعب: الله اكبر يالبيت كلها شقه عشر متر بعشره متر لاتكبيرنها وتظلمين البيت
سعاد بلا مبالاه: اللي هيه بسرعه ضبي شنطتك وانزلي تحت فيه مواعين بناخذها
استغربت؟؟ لا طبعاً هذه احنا اذ زادت مواعين من عند جده وخالاتي ناخذها بيتنا اصلاً حتى سمر عشان ماتحرجنا اذ بغت تهدينا تهدي طقم مواعين ولا استشوار ولا شنطه ميكب
مها تدخل مدرعمه: تخيلي بنرجع للحبس
ندى : اص انا خلقه مكبوته لاتذكريني
مها: والله بفقد بيت خوالي وبفقد ايامنا مع دينا
ندى: خلااص بدون دراما اللي فيني كافيني
مها: لازم نجيب فكره نخبي شناطنا نسرق مفتاح البيت ونضيعه اهم شي ما نروح
ندى: انتي شايفه امك كيف فرحانه عشان رجالها عطاها وجهه خلينا نسايرها
مها : على قولتك .. الا دريتي سمر تقول رعشد يقول بيحدد معود الزواج
ندى باستغراب: غريبه تحرك ماهو كان يقول كل شي بوقته حلو
مها: سمر تقول لقيته يراسل وحده وبعد التحري عرفت انها حنين قاعد يسوق الادب قدامنا وطايح مكالمات معها بعدين ذهن انه لازم يقدم العرس
ندى وانا رافعه يدي ادعي: الله يوفقه ويارب عقبال ما ولد فهد يقدم عرسي
مها: مهبوله منتي كنتي ماتبينه
ندى: انا بعد ماسمعت كلامه امس حسيتني اوفر بعدين حتى لو ماسمعت شي على الاقل اروح لمكان اضمن ان فيه واي فاي ان شاء الله المريخ
مها: وش رايك نروح المريخ ونفتك من البشر وحنتهم
ندى بضيق: قسم مو فاضيه نصيحه روحي ادعي ان متعب يقدم عرسك تراني مستبشره فيه خير
مها: انا كل ماجيت ادعي وقلت اسمه تحوشني نوبه اكتئاب لا ما ابي
ندى : بكيفك


حنين

مثل ماكنت متوقعه راشد حاط على نفسه هاله خجل وتوتر بس يحتاج من يكسرها وبس بديت اسولف معه قص كل قصص حياته لي احس نقدر نفهم بعض اذ استمرينا على هالحاله
رجعت اقرا رساله اللي من امس اضحك منها
-اذكر امك ماتسوي بشعرك الا قرون ان شاء الله تعدلت الاوضاع
زين وحلو انه يذكر اشياء بالماضي واكيد يتذكر ايام الماسنجر لما مان هو وسمر بنفس الحساب وكان تحيا يسولف معي صح كنت بالمتوسط بس ايام حلو وبريئه انا لازم احاول استرجع حسابي بس عندي فضول ارجع اقراها



مشعل

مشعل: ايه ملكت وش فيها انا رجال واطنخ وشوري اخذه من راسي ماهو من الحريم
مالك: كفو ابو فهد
مشعل: كفوك الطيب
تذكار: والله العوبا اختك الها دخل لان مشعل سبيكه يحتاج من يمشيه
مالك: خافوا ربكم تظلمونها هذه وهي من امس كل سوالفها عماتي وش سوو بعرسي وعماتي حطوا
عليا بنص عين: تحش ولا تمدح
مالك: لا والله انها ماتشوف فيكم شي مغير تمدح
تذكار: هي جتكم امس
مالك: ايه جت عصر وكانت بتسهر بس قرشعت لها
تذكار بتأثر: ايا الضعيفه اكيد رجالها مسوي لها شي او قايل لها كلمه عشان كذا بتقعد عندكم
مشعل بيأس: مافي فايده مافي فايده هالحين يسونها قصه ويصدقونها واذ مانشروها كثر الله خيرهم
تذكار: انت سد حلقك اسولف مع بناخي لا تدخل اللي مايطيع اهله محد بيكلمه
مشعل بلا مبالاه: ميت على كلامكم انا ..ملوك عاني رايح مع تركي ندور لنا دباب مابتخاوينا
تذكار: خل مالك عندي جايبه له عروسه ابيه يقول تم عشان نحجزها له
مالك: منهي
عليا: سُلاف بنت عمك ابو يوسف
مالك: ماهو ذيك محجوزه لطلال
عليا: ذيك الكبيره حور لا ذي توها ورعه بالمتوسط
مشعل: البنت ماتدري وبي وين حاطها وانتم تحجزون لها انا البنات ذولي ليه مايتعلمون من شيختهم دينا لو درت بس انكم متدخلين بموضوع يخصها صردعتكم
عليا: قصدك عوبا ولسانها يرش ويمسح بناتخييه الثانيات اجوديات مايطلعن من شور عماتهن
مالك: اذ كانت الجياده كذا الله لايجعل احد اجودي والله الله يسلم يدك يا امي ربت دينا زين صح انها وقحه ومافوجهها حيا بس تنفع احسن من تكون معدومه شخصيه
تذكار: خلك من اختك هاه وش قلت في بنت عمك
مالك: انا مثل مشيعل لابغيت اتزوج طنخت واخترت زوجتي بنفسي ماهو انتم اللي تختارونها
عليا: الله يهيني سيعد بسعيده
مالك: امين ويهنيكم ان شاء الله الا على سيره سعيده عمتي دلال وين
عليا: مقفله على نفسها في بيتها وماسكه وراعانها تذاكر لهم
مالك: انتم ليه ماتصيرون مثلها حرمه اجوديه في حالها
تذكار بضيق: انت ورا ماتطس مع عمك تدورون دباب خلاص عطين الوراعين وجهه قعدوا يسولفون
مشعل: ملوك الحقني انا رايح السياره وخل خواتي طويلات العمر يدورون معاريس لبنات اخوهم



اليوم التالي
دينا

يخي والله اجواء العرس تجنن بس شغله ان يكون الضيوف رايحين جايين ما احبها تو ام ملاك تتصل وتقول خواتها جايين بيشوفوني مدري اشحك ولا ىش القصه بس حسيت عيب قمت ولبست فستان بنفسجي فاتح هادي مره مصمم بطريقه الفساتين الريفيه حطيت ايلاينر خفيف نفس فون الفستان وروج وشويه بلشر وماسكرا حسيت كذا توب التوب رحت ادور الكعب اللي يناسب فستاني بين الشنط ودخل قيس وانا على هالحاله
قيس بهمس: اميرتي تحوس بين الشنط مايصير
دينا بقهر : لا يصير المشكله اخاف انكت الشنط فالاخير تطلع سمر نست تحطها
قيس: شوفيني نزلت سلمت نص ساعه وطلعت صيري مثلي والحقيني
دينا: والله فشله اطلع كذا بس اذ قدرت القى تصريفه ابشر .. واه اخيراً لقيتها
قيس وهو يتأمل شكلي النهائي بعد ماوقفت: دينا وربي قنبله معليش قدام الحريم لاتبالغين بزينتك واللحين سملي وتعالي فيه شي بقوله لك
دينا بعدم فهم وانا رتب شعري: وشهو
قيس بهمس: شي خاص مقدر اقوله بصوت مسموع
يووه ذكرتني الكلمه ذي بشيء ركزت في ملامح قيس لاحظت يبتسم فهمت وش قصده
دينا بتغير للسالفه: اذكر يوم العيد ناظرت فيني نفس النظره ذي لو تدري ماما وش سوت قالت معد بتقابلينه
قيس: وش فيها نظرتي
دينا: لا مافيها شي يالله انا نازله بحاول ما اطول
قيس بصوت عالي قبل لا اقفل الباب: لا تحاولين تعالي بسرعه




رندا

وانا في السوبر ماركت اقضي اغراض البيت لشهر قدام عشان مالي نفس انزل البقاله كل شوي شفت لي ذيك الشوفه اذ ماخاب ظني هذه عم دينا وهذه احوها جالسين يسولفون مع بنت ياحبيبي انا اعرف كل اللي يقربون لهم ومحارمهم البنت غريبه هين والله لاعلم دينا وندى دينا تربي اخوها وندى تنقذ نفسها من الثاني
ارسلت في القروب الكبير اللي فيه كل البنات وحكيت لهم وش شفت
دقايق وكانت ندى على الخاص تسأل وين شفتهم وعلمتها بس الصدمه اللي خلتني اوقف شغلي اللي هي ان ندى تقول ملكت علاه طيب متى وانا مادريت وتوهم امس يهددها ويتوعد فيها واللحين ضايقت خاطر البنت من فراغ استاهل والله استاهل وش دخلني فيه يغازل يطير يوقع والله اكبر حشريه في العام انا اللحين كيف اصلح اللي سويته!!


ملاك

ناديت دينا بشكل طبيعي عشان لحد يشك وفي نفس الوقت عشان اعفيها عن الاحراجات لان خالاتي وحريم اخواني كالعاده استلموها اسأله وهي ما شاء الله قدرت تحافظ على مظهر البنت الانيقه المؤدبه
سحبته لين دخلت غرفه صغيره على جنب
دينا: خير ملاك وش فيك
ملاك: افتحي القروب
فتحت القروب وجلست تقرا تحاول تستوعب
دينا بصدمه: رندا الدلخه تقول لاتوافقين عليه والبنت املكت وخلصت
ملاك: اما ملكت متى
دينا: سالفه معقده خليني اتصل بمشال اسمع تبويره الصايع
شفتها تتصل بعمها وشغلت التسجيل عشان بسجل المكالمه مثل ماهي وارسلها للبنات اشرت لها تفتح السبيكر يوم رد
دينا: مشيعل وش تسوي
مشعل: ياهلا بعروستنا في ذمتي انها مرحباً في مرحبا تسبقها مرحبا وتتبعها مرحبا لين ما يبقى من المرحبا مرحبا
دينا: خلك من البربره يقولون صايدينك تغازل
مشعل بصوت عالي: اقطعي واخسي ماعاد الا مشعل بنت فهد يخربط
دينا: اليوم في بنده شايفين البنت معك
مشعل: تدرين دينا مهوب بشغلك ومهو انتي اللي تحاسبيني وبعدين اغازل ببنده انتي حماره ولا تستحمرين
دينا: والله الكلام وصلني مثل كذه
مشعل: انا اعرف من وصل لك الكلام قولي لها حسابك عندي عشان ثاني مره تتدخل احد بينا يعني مافيها صبر كم يوم وبعدين تسالني براحتها قول يلها رصيدك عندي كثير ماتضر ذا الموضوع زياده
دينا بعصبيه: هي انت تهدد البنت وهي ببيتها على وش شايف نفسك بعدين ماهو هي اللي قالت انا صاحبتي عرفتك بمالك وعلمتني استح يا وجهه كل ما صار شي بتحطه براس الضعيفه
مشعل وكنه عرف غلطته يوم اتهم ندى: اللي معنا اليوم ليلى مرت ابوك ابوك يتزوج ويبلشنا ودو فلانه السوق وجيبوا عمال لها خلاص انا طقت كبدي منك ومن ابوك ومن بمت خالتك وبصكك حظر وارتاحي حبي خلاص
دينا بعد ماقفل باستغراب: ذا شفيه شوي ويبكي
ملاك: يمكن يوم استوعب كله غبي يتهم ندى استحى على وجهه
دينا: اخر واحد يفكر يستحي ذا
ملاك: يالله اللحين ارسلت الفويس للبنات وانتي لاترجعين للحريم هيا غرفتي
دينا بمياعه تجيب المرض: ماحزرتي اخت ملاك انا طالعه لحبيبي قيس
ملاك بقهر وانا اشوفها طالعه: ياعساك انتي وحبيبك قيس استغفر الله ياربي



‏xxبعد اسبوع xx
دينا

الاحداث كما هي بالعاده الا ان راشد تحدد زواجه بعد كم شهر ومشعل اصر على عماتي يكلمون خاله سعاد عشان يتفقون على موعد الشبكه بينهم بين ونوف قالت لريم تخلي اخوانها يجون يكلمون خالي خالد وللان يدورون وقت مناسب لان يشوفون نوف صغيره بس يوم قلت عادي الشيخ ملك لندى وهي بعمر نوف ذكرتني خاله سعاد ان ندى اصلاً بعمري وعادي جداً لو بتملك بس مشكلتها تاخرت سنه بالمدرسه لان ايام كانت اصغيره ابوها ما سوا اوراقها الثبوتيه اما نوف لا اصغر مننا بسنه ومدري وش يصير معها عاد شكلها بتنتظر سنه ثانيه
اما عني انا الجامعه من بكره بتبدا ولازم بكره اروح اشوف اوضاعي انا وملاك امل علاقتي مع قيس هالفتره متوتره منه يومين صاير يسهر برا كثير يعني انا تحملت ظروفه ما طلعت طول الاسبوع الا مره رحت اتعشى بمطعم واضغط على نفسي قدام حريم اخوانه لما يقولون ليش محبوسه اقول مرتاحه معه بس هاللحين الاخ نادر يجلس وانا بين الجدران طفشت ماني متعوده بعد ما طلعت من بيوت مليناه بكل انواع الناس اجي بجناح ضيق حتى ما اقدر اخذ راحتي فيه
سمعت الباب ينفتح دليل ان قيس وصل اخيراً سويت نفسي مشغوله على اللاب ولابسه سماعات عشان لا يكلمني
بس انه صامل جلس يأشر لي لين سويت اني انتبهت له
دينا وانا انزل السماعات: هلا
قيس: اقول وش تبين بطلب عشاء
دينا وانا انتبه ان الساعه وحده كثر الله خيره عشاء هالحين: بالعافيه انا مو جوعانه
قيس يجلس قبالي باستغراب: ملاك تقول مانزلتي اليوم وش اكلتي
دينا وانا اشر على مكان قهوتي: تو خلصت قهوه واكلت شوكلت احس مالي نفس
قيس: ترا مو بزين القهوه السوداء تشربينها اكثر من مره باليوم
دينا:صح عليك
قيس بنظرات: فيك شي
دينا:لا وش بيكون فيها
قيس: وش رايك طيب بكره نروح اي مكان نغير جو نروح مزرعه ابوي شرايك
دينا بيأس: حتى مو عارف اني من بكرا ببدا اداوم
قيس: ااه صح انتي بكره اول محاظره لك
دينا: بدري
قيس وهو ينسدح ببرود على الكنبه: معليش هالايام ما افكر وعقلي مرهق
يارب صبرني انا وش بيخليني اتحمل انا ليش تزوجت وقسم اعصابي فل الفل
دينا بغيض: طلع شوزك المكان نظيف طلعت روحي وانا انظفه ذا اولاً ثانياً عقلك مرهق من ايش المباراه اللي شفتها بالديوانيه
قيس وهو يقوم جالس: مرهق من بيتك اللي ضاغط نفسي عليه
دينا بعصبيه: خلاص دام خلصنا تاثيث هنا حبه حبه في البيت ماتوصل تضغط نفسك انا كم لي يوم ماشفتك وجلست معك ويسمونا عرسان جدد هزلت وقسم بالله
قيس: واحد صوتك مايرتفع اثنين انا اعرف وش اسوي محتاج احد يعلمني
دينا بمصخره: صوتك عادي انت يرتفع بس انا لا ما يحتاج اسمع جوابك بتقول رجال مايعرفون من الرجوله الا رفع اصواتهم
قيس وهو يضرب كف بكف: بزر اقسم بالله متزوج بزر دينا حبيبي خلاص اجيب لك بيضه كندر اللحين وما يصير بخاطرك الا طيب
دينا بانهيار عصبي ونفسي وكل شي: تنكت ياحليلك ظريف وخفيف دم
قمت من عنده مابشوفه لاني اعرف لساني لازم يغلط رحت غرفه النوم وقفلت الباب ورحت ابكي على السرير هاه جاء اليوم اللي يعايرني بعمري ويقول انا متزوج بزر والكلام ما قاله من فراغ اكيد الفتره اللي راحت بعد ما خلص زواجه الباشا قال ليتني متزوج وحده مخلصه جامعه من اول
اسمع صوته يضرب الباب بس والله مافتحت غطيت نفسي بالبطانيه وكل شي تركته برا جوالي واغراضي ابي استكن مع نفسي بدون تدخلات خارجيه



رندا

واخيرا اليوم اول يوم لي كطالبه طب دخلت الكليه وانا اوثق للبنات اللحظه شعور حلو ويخوف بنفس الوقت انا اقدر ولا لا ؟ ذا اكثر سؤال يتكرر في بالي دخلتت ورحت ادور عمادة شوؤن الطلاب باخذ معلوماتي عشان ابدا ارتب جدولي وكل شي شفت شوق وحده من بنات الثانوي جات يمي
رندا: شوق صح
شوق: اي شوي يا رندا قولي بس انك بتدرسين هنا
رندا: ايه وانتي
،شوق : وناسااه ايه انا بعد وكنت شايله هم الغربه اشوى انتي معي تطمنت
جيت برد عليها بس شفت الدكتور فراس جاي من بعيد شكله عارف اني جيت وحطيت اسمي يخي ذا فكل مكان يطلع لي
فراس: صباح الخير رندا كيفك وكيف الوالده
رندا برسميه: بالف خير
فراس: بدايه موفقه ان شاء الله اسمعي ماده البايلوجي اذ جيتي تسجلين الجدول سجليها عندي ان شاء الله اكون عند حسن ظنك
رندا بتوتر عشان ابيه يروح: ان شاء الله ان شاء الله
راح فراس واخيراً يوه نسيت شوق واقفه وعلى راسها علامات استفهام
شوق: ذا يعرفك ولا يقرب لك
رندا بتصريفه: اي يقرب لي
شوق : يالله تعالي اعطيك ارقامي وحساباتي عشان خلاص بعتمدك رفيقه المشوار
رندا: حاضر

رد: متقلبين الود

٤٨


قيس

ولمتى يعني لمتى بنستمر على ذا الحال سجلت في دوره تتعلم الانقلش صبح تداوم وعصر تداوم اون لاين وانا معطيتني اكبر طاف ياخي مولهدرجه كلمه وقلتها سوت فيها كل ذا دخلت الجناح وكالعاده مو موجوده اكيد عند ملاك رحت جلست في مكان جلستها اذ جلست تذاكر كوب القهوه واغراضها للحين على الطاوله شكلها ما بتطول عند ملاك حتى الشمعه ما طفتها لفت انتباهي ورقه ايفور مكتوب عليها اخذتها شفتها كاتبه اسئله ومجاوبه عليها
س:ضعي قيس في جمله مفيده بحيث يكون مسكين مره متخلف مره سعيد مره
١-خرج قيس فضربه الباب وسقط(متخلف)
٢-افلس قيس واصبح لا يملك ريالاً للغداء(مسكين)
٣-غلط قيس وشتم دينا (ناقص عقل)
٤-سامحت دينا قيس واصبحت تعطيه وجه (سعيد)
رجعت الورقه مكانها ومو شايف قدامي من الضحك يارب رحمتك قسم بالله بزر مو طبيعي كيف كبرت الموضوع عشان كلمه الظاهر يوم تقعد طول الوقت انا احسبها تذاكر وهي تحطني بجمل مفيده
دينا: وش اللي يضحك
هو انا سمعت صوتها ولا يتهيأ لي ؟رفعت راسي شفتها واقفه قدامي
قيس: ذكرت موقف وضحكت هاه لايكون ممنوع
دينا وهي تفتح اللاب وانفتح على شاشه مسلسل: لا بكيفك اضحك واستانس
قيس: بذاكر وبذاكر اخرتها تتابعين مسلسلات
دينا: وش شايفني رنود طبعاً مو كل ذا مذاكره بس اقضي احياناً وقت فراغي
قيس: وليش ماتقضينه معي
دينا باستغلال: لا يمكن عندك مباراه ولا انا بزر مايصلح تجلس معي
قيس بتعب: دينا الوضع اللي بينا مايصير انا بروح يومين في البر اختلي بنفسي وانتي اجلسي هنا واخذي تاحتك شوفي اذ الكلمه تستاهل الزعل ذا كله ولا زله لسان
دينا وكنها قلقت: مو حزه البر
قيس: ومن متى لنياقي حزه انا اقصد بروح يم النياق يومين اخذ راحتي
دينا وكنها ما اهتمت : الله معك
قمت اخذت لي ثوبين وتوابعها وهي على نفس جلستها وتعض يدها اعرفها حركتها اذ توترت بس جالسه تسوي انها مو مهتمه بس انا بروح يومين اخليها تفكر براحتها ان شاء الله تطلع نتيجه



رندا

اسمع البنات بالقاعه يقولون ان اللي اخرت زواجها عشان دراستها واللي قلبت نظام نومها عكس اهلها عشان تاخذ راحتها وتذاكر مدوي كيف اصارحهم اني انا لا اللي تزوجت ولا انا اللي سلمت مسؤليه البيت صعبه من ناحيه طبخ وتنظيف وغسي ملابس ومشاوير السوق وامي وابوي الله يطول باعمارهم كل واحد له نظام غذائي وهالشيء اللي متعبني وحتى الميزانيه متعبها ياربي في وش افكر وش اخلي خلصت غسيل تلمواعين نشفتها وصفيتها بالدولاب طلعت من المطبخ بعد ما سويت لي شاهي عشان اذاكر شفت امي وابوي بالصاله يتابعون برنامج مسابقات ويجاوبون مع الاسئله بحماس ياقلبي انت لو اترك عمري كله مو بس دراستي عشان اشوف ضحكتهم وبعدين انا اذكر فيه قصه بنت كانت تهتم بامها يوم مرضت وراحت الاختبار بدون ما تذاكر ووفقها ربي كله بسبب برها بأمها واحس ربي اذ وفقني بيوفقني عشان خاطر عيونهم وتعبي معهم الله لا يضيعه



ثريا

يخي ش ذي الصياعه عيال اعمارهم اقل من عشر سنوات وش عرفهم بذي العلوم والله يا عيالي ماخربوا الا بعد ما اختلطوا بعيال عمهم
ثريا لحمد: خلاص انت روح غرفتك ووعد ما اقول انك انت اللي علمتني
قمت بعد ما طلع حمد ورحت غرفتهم سويت نفسي بستخدم جهاز الكمبيوتر حق سلطان وبس رحت سجل البحث شفت اللي قاله لي اخوه
ثريا بتمثيل للصدمه: مين اللي بحث عن ذي الاشياء
سلطان متورط: شكله تهكر
ثريا بعصبيه: لا ماتهكر بس عشان قله الادب اللي فيك هاللحين احلم يرجع لك جهازك
سلطان: ماما عندي مشاريع
ثريا: يا سلام عليك يابو المشاريع عندك مشروع تسويه على كمبيوتر حمد الاجهزه ذي سووها للفايده مو لقله الحيا والشيء الثاني ياويلك لو عاد طلعت لسانك وطولته على اخوانك الكبار ومعك لين نهايه الفصل اذ شفتك رجال كفو ابشر باحدث جهاز بس مو هالحين الحين انت معاقب لين اشوف نتايجك اللي تسر
ماجد جاء على صوت بكاء سلطان وشكله تو وصل لانه للحين بثوبه: وش فيه الشيخ من بكاه وزعله
حمد: ماما سحبت كمبيوتره عشانها لقته يبحث عن بنات بدون ملابس
ماجد بضحكه صدمه: لا ذا مشروع مشعل ومالك الولد خربان الله يرجه
سلطان وهو يبكي: ليه يرجني شايفني ديو
ثريا: بس انا وش قلت لسانك ماتطوله على اللي اكبر منك
دخل سلطان الحمام ياويلي يقولون مهوب زين يبكي في الحمام
ماجد: انا رايح ابدل ثيابي الغداء جهز
ثريا: ايه بس افرغه عشر دقايق ويكون جاهز
ماجد: ماكلمتك بنتك اليوم
ثريا وانا طالعه: لا ام س اخر رساله منها انها كانت تذاكر وشكلها اكيد نايمه صعبه تجمع بين بيت ودراسه
ماجد: انا قايله بس ذا قرارها خلها تتحمل
طلعت ودسيت كمبيوتر سلطان وبديت افرغ الغداء وانا احسني مبسوطه هاذي حياتي اللي كنت اباها ترجع لي بعد ما سكنت لوحدي كم سنه وكنت مطلقه وتزوجت اتعس زواج على وجه الارض وصرت ارمله هاللحين اقدر اقول ان الحياه اللي اطمح لها عندي زوج متفاهم وعيال حواليني يالله لاتحرمني



دينا

حطيت كيكه جاهز في المايكرويف كذه عايشه اكل الكيك ذا واضرب قهوه ذي ثالث حبه اكلها اليوم طلعت الصحن من المايكرويف وشلت كوب قهوتي ورحت حطيته على الطواله وفي نفس الوقت لفت انتباهي اشعار جاء لجوالي اخذت الجوال لقيته من قيس كان تسجيل صوتي فتحته
-اسمعي دينا بطاقتي في الدرج الاول اللي جنب الباب اي شي تحتاجينه اصرفي منها لا تكابرين تكفين ولا تستحين وقولي لملاك تكلم سواقها حق الجامعه تروحين بكره معه عشان .....
غريبه وش فيه اسمع صوت هواء مو واضح بس بعد ما سمعت صوت تكسر القزاز عرفت ان فيه مصيبه وفقدت اخر حبه عقل فيني طرحت الجوال من يدي وطلعت بدون ما اغطي نفسي ولاني مهتمه اذ احد من اخوان قيس فيه ولا لا جيت بالصاله لقيت ملاك فيه
ملاك: دينا فاتك نص عمرك تخيلي
دينا بخوف: ملاك قيس ملاك كلمي اخوانك يشوفونه ملاك قيس فيه شي
ملاك بصراخ: قومي دقيقه دينا قومي شاهي تعالي يمه
وكان ذا اخر شي سمعته


ملاك

جالسه افكر بعرض الزواج هاذا بشكل جدّي شوي لان الرجال مافيه عيب وجاء من طرف خالاتي يعني ناس راعين خير وسمعه طيبه بس يخي انا اخذه على نفسي عهد ما اتزوج اعرف نفسي لحظه حماس وبعدها يبرد كل شي واتورط بعدين من قال السعاده بالزواج انا اشوف السعاده يوم اكون اندبدنت ويمن اذ حتى دينا وقيس عصافير الحب من انل شهر بدت المشاكل ووجع الراس بينهم انا وش بيصير فيه انا انسانه ما اعرف اسكت واتغاضى وكالعاده تفكيري انقطع بس هالمره واضح فيه شي مهم شفت دينا تحاول تشرح لي شي بس كأن فيها بكوه ماقدرت افهمه وحسيت عقلي مشوش يوم شفت دينا اغمى عليها قدامي قدرت استوعب كل شي قيس فيه شي ودينا تحاتيه بس مو شرط شي كبير لان دينا لو شفتت قطره دم يغمى عليها شي طبيعي
ناديت شاهيندا وامي قلت لهم البنت تعبانه تصرفوا معها ورحت غرفتي دورت جوالي وارسلت نفس الرساله على كل اخواني
-روحوا تفقدوا قيس علمي فيه رايح لنياقه وبعدين صار فيه شي روحوا شوفوا جهازه مقفل وزوجته مغمى عليها عندنا تحاتيه
قفلت جوالي ورجعت الصاله شفت امي فرحانه تحسب دينا حامل ياربي ان اللي في قيس ماهو بكايد مثل ما انا مفكره بس عشان قلب امي حاولت احافظ على برودي وانا اصلاً على نار دينا للحين على حالتها بس شبه متعوده عليها انا يغمى عليها ساعه ساعتين وتقوم طيبه وما ودي اصحيها اخاف تموت من القلق
بعد نص ساعن بالضبط جتني رساله من جابر اخوي مقطع صوتي
-بدري تو تعلميني المهم والله يا كان بيروح فيها بس ربي سلم والحمدلله انه مكلمني قبل يمشي ولحقته يوم بغى يودع كل ما في القصه انه بغى يضرب في ناقه كانت بالخط تعور شوي بس طيب ان شاء الله جاينكم هالحين جهزوا قهوه
واخيراً اللحين صار وقت اروح اصحي الخبله واطمنها على زوجها واروح اعلم امي انها مو بحامل لا تفرح المسكينه على لا شي


سمر

للأبد كل ما حاولت اتخلى عن شخصيتي القياديه انجبر ارجع لها اللحين اخ راشد حدد زواجه وبدون محد يقول لي كلفوني بكل الاشغال من حجوزات تأثيث حتى ما طلبوني انا عرضت من نفسي واللحين اعض اصابعي ندم بس والله انا الوحيده اللي فاضيه ما عندي الا ولدي اما البنات حرام ندى ونوف اخر سنه ثانوي وكل وحده شاده حيلها اقوى من الثانيه ودينا توها مستجده ومحرصه عليها ترفع معدلها من اول مستوى عشان ترتاح ومها اهخخ يا مها البنت ذي حالها يبكي تخيلوا ولد عمها كلم ابوها انه مايقدر يسوي زواج ومعازيم وقال ابوها خلاص سوو عشاء وجمع عليه اهلك وزوجتك متى مابغيتها اخذها انا قاهرني البنت لامهر زي الناس ولا حفله شبكه زين الناس حتى الدبله فضه وفوق كل ذا بيحرمها تفرح والله ما الومها لو فكرت تغار او تحسد من الحياه اللي عايشتها اهخ بس لو اقويها واخليها تصير مثل دينا حلفت ما يبقى لها حق عند احد بس اللي اخاف منه ان ابوها كل شي متوقع وسعاد معطيته وجهه اخاف اذ فكرت تتمرد يذبحها ولا يسبب لها عاهه تراه يسويها صح انه مايدري عنهم بس اذ فكروا يخالفون رايه بشيء تراه وقح ويده طويله وذا السبب اللي مخلي سعاد اغلب وقتها عندنا تكون يا شارده منه عشانه ضربها ولا عشانه ما جاب لهم غرض او شي


ندى

يا الله وش جابني للضيم كنت مدللـه بعد الغرفه اللي شهور تعودت عليها غرفه يسرح فيها الخيل لي لوحدي صرت بغرفه عشره متر ولا مع مها اختي طالعت في جهه مها لقيتها للحين مغطيه نفسها بالبطانيه ومن طريقتها طريقه ان الشخص اللي تحت البطانيه يبكي ماودي اخرب عليها حلوها تبكي لين بكره اصلاً وش تقدر تسوي غير البكاء بس وبي مايضيع حق احد على كلام امي ان متعب بيسرع الزواج عشان عنده مهمه بالجنوب اذ كان مجبور الله يساعده ويسخره لها احاول اتذكره مقدر مو مره علاقتنا مع عيال عمي اصلاً حتى السلام مانرده عليهم عكس دينا واهلها يمونون مع بعض بزياده انا اللحين لو سلمت على ابوي ولا حضنته ما استبعد يصقني كف ماعنده هذي الحركات اما دينا عادي عندها تسلم وتضم ابوها ومالك يعني صح بنات خالات ومتربيات مع بعض بس شتان بيننا وبينها
شفت جوالي يتصل يماماي هذه رقم مشعل يوم كلمته ذاك اليوم عشان اقوله كنسل وش يبي متصل سالفه انه يغازل ببنده صارت قديمه وش يبي
مافكرت واحد اثنين اخذت الجوال ورديت واسمع هدوء
قلت عشان ينتبه اني رديت: الووو ؟
مشعل باستعجال: يا هلا اسمعي انتي بالبيت
ندى: بيت مين
مشعل: بيتكم اللي نقلتوه له جديد
ندى باستغراب: ايه في بيتنا ليش
مشعل: اسمعي انا عند اللفه جايب لك هديه بسيطه بمناسبه العام الدراسي الجديد متأخره كم اسبوع بس مو مشكله اطلعي لي
ندى بصدمه: وين هديه جايبها انتت صاحي اطلع لك وين
مشعل: ياحول خطاء تعبير اقصد خلك عند الباب اخذيها
ندى: لا خلاص اتعبر هديتك وصلت وش وضعي
مشعل:نستهبل حنا يالله شوفيني عند الباب اي شقه انتم
ندى بتوتر: الشقه اللي تحت على اليمين
مشعل: يالله انتظرك
ندى :حطها عند الباب وانا بجي اخذها لان حنا بالسعوديه مو بفرنسا
مشعل: انا لله عموماً ماتطلعين دقيت الجرس انا مقلت بشوفك اقول اخذي اللي معي وتوكلي
ندى: طيب تصد بظهرك
مشعل: بصد بظهري يالله استعجلي
ندى: واذ وسوس لك الشيطان وقال عادي طالع فيها وش بتسوي
مشعل بنرفزه: باستعيذ منه يعني وش بسوي تراني للحين مانسيت شكلك يوم العيد لو تبيني ارسمك رسمتك
انتبهت على مها قاطه معي بالمكالمه قمت من عندها وطلعت
ندى: خلاص جايه يالله
فتحت الباب وصح كان عند الاب ومعطيني ظهره اخذت الكيس وقفلت الباب واضحك من حالتي
ندى بضحكه وانا ناسيه الجوال: اقسم بالله حاله الله يشفينا
مشعل: سجلي عندك هاشتاق اول دعوه تجمعنا
ندى بخجل: خلاص هديتك ووصلت كثر الله خيرك اقدر اقفل ؟
مشعل: لا ماتقدرين لاني انا اللي بقفل
قفل واحس كنه زعل بس وش متوقع مني انا ذا اسلوبي اذ متوقع لانه جاب هديه لي بستانس واصير امدحه واقول كلام حلو غلطان انا ما اقول الا اللي احس فيه صدق شفت مها طلعت من الغرفه وواضح مستغربه
ندى بشرح: تركها مشعل عند الباب يقول تديه بدايه فصل دراسي او شي كذا
مها بخمول: الله يهنيك انا بنام اذ فقدتني امي قولي تعبانه
ندى بشفقه: خلاص ابشري
والله اخاف خاطرها ينكسر اذ شافتنا مستانسات ومرتاحات وهي الوحيده اللي تعاني ولا الومها صراحه
فتحت البوكس وكان فيه: علبه شوكليت شكلها من الغاليه من اسمها -دفتر يجنن غلافه جلد مايصلح للمذاكره ابداً يصلح تنكتب فيه ذكريات او شي كذا- علبه صغيره يوم فتحتها كان فيها اسواره اتوقع ذهب تجنن مكتوب عليهاnada - هاذا غير الورد اللي مزين البوكس
انبسط صراحه كون انه فكر فيني لو جاب لي ورده عادي راضيه بس ما اعيش بجفاف مشاعر وبعدين لما استرجعت قصص دينا عن عمها القديمه ماعمره كان متخلف او رجعي بالعكس كان خفيف دم يعني حتى يوم عصب ذاك اليوم يحق له اجل البنت اللي بيتزوجها تقول عنه جنس ثالث ؟؟!!!


دينا

طالعت مع الشباك شفته وصل مع اخوه ودخل في بيت الشعر اكيد بيطمن امه وابوه بعدين يطلع لي رحت جلست على الكنبه انتظره والله خفت مره خفت عليه تخيل لو اللي ببالي وخيالي صار تخيل وتخيل كان انا كيف بعيش وهو رايح زعلان علي انا كيف قوى قلبي ؟ طالعت في نفسي لابسه بجامه حرير موديلها عادي لونها عنابي وشعري على نفس حالته يوم غسلته اليوم الحمدلله شعري ناعم مايحتاج تمشيط لان ما في حالي اسوي شي او اتعدل انا بس اشوف بخير ويهون كل شي ثاني
سمعت الباب حق الجناح ينفتح وسمعته بعد يكلم احد يقوله لا خلاص اقدر اكمل لوحدي قفل الباب والتفت لي ياقلبيي واضح تعبان يعني هو صح يمشي بس اكيد تعور شفته جاي يمشي بشويش ويتأملني ولما قرب مني رفعت عيني له يالله ليه اللحين مع انه تعبان اشوفه طالع حلو او يمكن لاني بذي اللحظه شفته بعين مختلفه وباحظت توني فرق الطول اللي بيننا
دينا بهمس مخنوق من البكاء: ليش تأخرت انتظرك من زمان
قيس بنبره ثقيله: كنت اسلم على اللي تحت وتعرفين الاسأله بس خلصت جيتك
دينا بنفس النبره: جوعان تبي شي
هز راسه بعلامه لا وهو يهمس : مابي وبس تكفين
دينا بقلق احسبه يقصد لا تسألين: والله ماسويت شي
قيس يمد يده يمسح على شفتي: بسك عض في شفاتك ذبحتيني من اول مادخلت وانتي مرتبكه تعضين في شفاتك وتدعكين اصابعك بس تكفين
دينا بخجل: ماقصدت
قيس وهو يحضني بقوه لين حسيت بدخل جوه صدره: ادري ماتقصدين واللي ذابحني انك ماتقصدين وياكثر ما تذبحيني وانتي ماتقصدين



قيس

تعبان هلكان احسني مكسر وكنت اقول حتى لو صدتني بتنازل لها اعرف ان دواي عندها في حضنها
بس حضنتها واستقرت في حضني حسيتها تبوس ذقني وطرف وجهي ورقبتي شفيها ذي بسم الله الرحمن الرحيم ؟استخفتت؟؟
انتفضت روحي بقوه كأن لاسعتني كهرب يوم سمعتها تقول
: اشتقت لك يالظالم وخفت عليك والله خفت يصير لك شي
ابعدتها وحطيت يدي على جبينها: ملاك تقول انك تعبتي انتي مريضه فيك شي
دينا بضحكه من بين دموعها: يمكن
رجعتها لحضني بقوه اكبر وبهمس ثقيل : زين طالبك خليك مريضه على طول

رد: متقلبين الود

قايز بقي 2 part على النهايه في احد متابع معي ؟

رد: متقلبين الود

(٤٩)

‏xxxبعد مرور فتره من الزمن اقرب ما يقال عنها طويله xxx



ندى

فستاني شنطه مكايجي والكعب خلاص كل شي تمام انتبهت ان مشعل صحى يووه حريصه من اليوم اني ما اطلع صوت وانا اجهز كيف قام امس نام متأخر
مشعل بنعاس: كم الساعه
ندى: اثنين ظهر .. هاه تحس نفسك للحين تعبان
مشعل: عادي سخون خفيفه اسمعي جهزي المجفف حق الشعر بتروش وشايل هم البرد
ندى: لا تدفى بس لا تحط شي على شعرك عشان مايتغير ويبقى كيرلي
مشعل رافع حاجب: ليش تبينه يصير كيرلي
ندى بعفويه: عشان تطلع حلو
مشعل شدني يجلسني جنبه عالسرير: بلاها سالفه حلو هاذي لاتطلع سكوني عليك
خربت شعره بمزح وبهمس: اما انك غريب في احد يزعل انه حلو
مشعل شدني له وطبع بوسه على شعري: انا ازعل ايه....انتي بنت وقمر ينقال لك حلوه بس انا اللي يقول لي حلو اقص له لسانه وانتي اول وحده اعديها لها وترا مو كل مره
تفهمت موقفه لانه قص علي قصص له ايام كان صغير وكيف يتنمرون عليه لمجرد انه جميل وواضح انها صارت عقده له
احتضنت خصره شوي ثم افلته
ندى: يالله هدني لاتاخرني
مشعل يفلتني وباستغراب: ين بتروحين
ندى: بروح مع خلود اخوي لبيت جداني تعرف عندنا مناسبه
مشعل بعصبيه: وما تصحيني ولا تعلميني ولا قلتي لي
ندى : كنت تعبان وحشمتك
مشعل بنفس العصبيه: ليه ما وراك رجال كنت مكبر المخده وماكلفتي على نفسك تعطين خبر لاتحشميني اذ ذا مفهوم الحشمه عندك
"يا مسرع ما يقلب ذا الرجال قبل شوي كان يهبل"
ندى: خلاص يالله ماني بماشيه واللحين بكلم خلود اقول بروح مع مشعل
قام وراح للحمام بهدوء هذه هو مشعل صح تعودت عليه بس احيان يحيرني بس الحمدلله انه افضل من الصوره اللي كنت ماخذتها عنه بمليون مره
سمعت جواله يرن رحت لقيته ابو ماجد ذا اكيد مالك رحت عند الباب بعلمه
ندى: مشعل ملوك يتصل عليك
!!! يووه انا ناويه على روحي مو بصاحيه كيف نسيت
ندى بترقيع: مالك مالك يتصل عليك
مشعل: هين
تركت الجوال عند الباب ورجعت الغرفه يحول انا سنين وانا اقول ملوك كيف بتعدل واصير اقول مالك لازم يتفهم انه غصب عني مو بيدي !!!



مها

لفيت سلوم زين مدري ليش احس الصغار يبردون في الجو العادي وشلته حطته بهندوله جنب ابوه اللي جاء وكان تعبان بس فتحت معه سالفه صرت مأجلتها ايام وجاء الوقت اللي افتحها فيه
رجعت بذاكرتي ساعتين ورا
متعب جاي من الدوام: سلام
مها : قوه ان شاء الله
متعب بتعب وهو يتمدد على الكنبه : الله يقويك
مها: تبي غداء احط لك
متعب: اذ بتغدين معي حطي
مها : ابشر اقول ابو سالم
متعب: هلا
مها : اقول وش رايك اجلس عند اهلي شهر وانت ترجع للجنوب لوحدك
متعب: لا مافيه
مها بقهر: انت هناك طول يومك بالدوام وانا بس جالسه في الخلا مع ولدي اخاف عليه واخاف على نفسي
متعب ببرود: مافيه شي يخوف وبعدين انا ابي زوجتي معي وين ماروح
مها بعصبيه: لا فيه انا اللي احدد وش اخاف منه وبعدين زوجتك ماتبا تجي معك غصب هو
متعب: خلاص ابي ولدي معي
مها وانا ما اشوف قدامي: العب معك شايفني ولا استهبل اقولك انا مقدر اجلس لوحدي اكثر من كذه
متعب : تراك متزوجه وش بتقعدين عند اهلك وحنا جينا هنا عشان تحضرين مناسبه وبنمشي بنفس الاسبوع
مها بانهيار من التعب النفسي : وش دخلك انا بنهبل بنجن بقطع ثيابي انت عند اصحابك واهلك انا ماعندي احد ناسي كلهم هنا اهلي هنا كنا لوحدي وساكته ومتحمله بس اللحين مع ولدي ما رح اخاطر واعرض حياتنا للخطر ...

واللي استغربته ان متعب سكتني وقطع موشحي الطويل ذا اتحداكم كيف طبعاً اكيد يجي ببالكم انه سكتني بكف ولا بطراق لان ذا الشيء اللي جاء في بالي وانا اقول الكلام له
بس هو لما مسك ذقني بيد وحده وسكتني ببوسه طويله حاولت اخلص نفسي منه ماقدرت لين افلتني بتفسه وتركني راح جهه دورة المياة
مها بقهر : ياحقير انا ام ولدك ماني وحده رخيصه تسوي لي كذا
متعب يلتفت لي بهدوء وببرود: انتي ام ولدي وانا ماني اصمخ اسمع زينوكل ما طولتي صوتك بسكتك بذي الطريقه ظنك عارفه ان ولدك راقد ماله داعي تصحينه وثاني شي انا سمحت لك تعصبين بس ماسمحت لك تسبين ذي المره بعديها بكيفي بس اياني وياك تعيدينها
مها بغضب مكتوم : اكرهك اكرهك
متعب ببرود: كذابه
انتبهت ان الوقت تاخر خلني اقوم اسوي له قهوه عربيه يحب اذ صحى من نومه يشربها مهما كان الوقت وبعدها يوديني عند خوالي صراحه متعب مو مثل ماكنت متخيله صح بارد وكنه ثلجه ونادراً ينقط كلام حلو بس محترمني ولا غلط علي يمكن اذ تربى في بيئه ومجتمع غير طلع مافيه غلطه بس للاسف عاش بمجتمع يعلمونه التفكير الذكوري قبل الدين


ثريا


ثريا: قدامي مافيه
سلطان : يا يمه انا لابس وخالص هو اللي مالبس غيري الباسورد وافتحي الشبكه الي انا بس
ثريا: ما راح افتح الواي فاي لين اشوف الاغراض كلها بالسياره
حمد: بنمر دينا ولا بتجي مع ابن الملوح
ثريا: لا بتجي بنفسها اختك لاهي في حاجتك ولا حاجة زوجها تجي وتروح بنفسها
ماجد جاي من برا: هاه ماشيين
ثريا: ايه خلاص بس يخلصون ويشيلون الاغراض ونطلع ..تبي شي قبل لا نمشي
ماجد: اههخ ياظهري .. لا مابي شي بس سلطان وحمد واحد منكم يروح يجيب برسيم حق ست شهور قدام ويوديه عند النياق قبل المساء واذ لقيتوا مالك ولا مشعل قولوا له يخلي عند كل شبك عامل السباع شاده حيلها والثاني يروح يم عمته ليلى يشوف وش مقاضيها وش تحتاج ويجيبها
حمد: انا اللي بروح اجيب المقاضي
ماجد: خلاص هاك البطاقه تجيني وجايب فاتوره معها القى ريال ناقص بس ومو مسجل بالفاتوره
سلطان بشماته: لم تزبط معك
طلعت بيجيب عبايتي وانا متضايقه من ناحيه ان عيالي صايرين سواقين لطبينتي بس كل ما انذكر انها محرومه من العيال ومحرومه تجرب انها تكون ام اشفق عليها خصوصاً ان طول الشهور ذي ماشفت منها غلط حالها حال نفسها عينها ماترفعها فيه بس مثل ما يقولون الطبينه تحر لو هي فالقبر مو بسهله عالحرمه ان فيه وحده تشاركها رجالها حتى لو كانت الوحده ذي تمشي جنب الحيط
اخذت اغراضي وقفلت الكهرب ونزلت وانا مستغربه من الرساله اللي جتني من دينا بتقول لي شي بس وجه لوجه مابتقوله في الجوال !



رندا

خلصنا غداء الحمدلله ناديت على حليمه تجي تشيل السفره عشان بسرعه نمشي لانا تأخرنا بالغداء اليوم وورانا مشوار
يووه صح انتم ماتدرون من حليمه حليمه ذي الله يسلمكم وقت كنت المستوى الثاني فكرت اسحب كم ماده من الضغط اللي جاني من ناحيه بيتنا ودراستي بس فراس الله يسعده جاب حليمه تساعدني في طبخ وغسيل وكل شي وقال انا بدفع الراتب ومتى مابغيتي تردينه رديه لي لو على شكل اقساط وبعدها بكم شهر جونا ناس ما نعرفهم يخطبون طبعاً استغربنا يوم اتصلوا لان مانعرف اسم عايلتهم ولا عندنا علاقات اجتماعيه عشان يجونا بس اللي صدمني يوم طلعوا اهل فراس استحيت ارفضه وهو مقدم لي الجمايل كلها بس كلمته وقتها وقلت معليش نأجل كل شي لين اتخرج بسلام والحمدلله ما اعترض او قال لا وذا الشيء فرحني كونه عنده امكانيه يتزوج بس ينتظرني لين اخلص يعني اول مره احس احد معطيني قيمه وبعد حركته ذي اقدر اقول اني موافقتي عليه جايه لا محاله بس اخلص الجامعه اللي ما بتخلص بس الحمدلله ماشيه تمام واحسن من التمام بعد من ناحيه معدلي المرتفع وموادي اللي قد ما اقدر اخذ اكثر عدد ممكن من المواد

رد: متقلبين الود

٥٠

دينا

دينا :يالله شنطتي جاهزه قود باي
قيس : انا بفهم هالحين ليه ماخذه شنطه وبتروحين من عصر اجلسي لين بعد العشاء البسي وخلصي وروحي
دينا: لا جو التجهيز مع البنات يونس بعدين ابي اكون مع نوف لحظه بلحظه ومها بعد مشتاقه لها من زمان ماشفتها
قيس: وانا طيب
دينا باستغراب: وش فيك انت
قيس: لاتمشين هالحين بقولك موضوع
دينا وانا اجلس قريب منه: وش
قيس بتنهيده: ملاك
دينا وانا اهز راسي فهم: موضوع الزواج
قيس: يادينا عمرها يمشي عليها اخاف لاكبرت تندم فهميها
دينا: ملاك عقلها قفل مو مستوعبه وتشوف نفسها مو قد مسؤوليه وحمل زواج صراحه احسن لها تجلس كذا دامها عارفه نفسها لا تغامر بحياتها وحياة شخص ثاني وبعدها يخرب كل شي
قيس: انا ماعندي مشكله اختي واخدمها بعيوني بس امي وابوي متضايقين وشايلين همها ابيها تريحهم
دينا: خلاص بدخل لها من مدخل امك وابوك وحلال وحرام يارب بس تفهم
قيس: ما اظن بعد ما لقت لها وظيفه استانست على قولها صارت مستقله حتى ذاك اليوم بغت تجلط سالم اخوي تقول بدور شقه واسكن لوحدي
دينا بضحكه: ما تسويها تبي ترفع ضغطه بس
قيس: الله يكتب اللي فيه خير لنا جميع
دينا بحماس: يالله انا رايحه اللحين حالفه اسبق مها وسمر
قيس بنغزه: اكيد بتسبقينهم هم عندهم عيال يجهزونهم وانتي لوحدك
دينا: الظاهر خلصت من مشكله ملاك وبديت بمشكلتك
قيس: جد وش فيها خلاص مابقي شي على تخرجك ولنا فتره متزوجين ابي شي يغير جو لنا
دينا بزعل: مليت مني
قيس يسحبني لعنده ويحضني: اهخ انا امل من نفسي ومن جمعاتي كلها ولا امل منك بس ربك قال المال والبنون زينه الحياه الدنيا وانا ابي لي ولد ولا بنت فيه ناس تزوجوا بعدي واللحين عيالهم بين يدينهم
دينا وانا افلت نفسي منه وارتب شنطتي وبشجاعه كذابه: والله يا قيس يا حبيبي انت اتفاقنا كان ما اجيب عيال الا بعد التخرج اصلاً حتى لو بس طرف طرف الموضوع يجي ببالي اتغاضى عنه وانت وافقتني من البدايه قلت نقدم الزواج واللي يصير يصير
قيس بتنهيده حسيتها بقلبي: ما اقدر اقولك لا ولا اقدر اجبرك طبعاً الله يكتب لي الصبر
دينا بتهرب من نظراته لا يدري اني مخبيه شي: والله انا عن نفسي اشوف الاطفال كائنات مزعجه يعني انا تركت روحات بيت خوالي عشان عيال سمر وعيال راشد تبيني اجيب انا صعبه هالفتره مره صعبه
واضح من عيونه انه ضد كلامي بس مايبي يزعلني ياحبيبي هو
قيس يغير الموضوع: خلاص يالله لا تتأخرين عن بنت خالك وفي نفس الوقت شوي لا تتأخرين علي
دينا وانا احط طرحتي على راسي واشيل الشنطه: هات بوسه وايدك على المفاتيح
قيس بضحكه: تفضلي ماتعطين شي لله انتي
دينا: تربايتك
طلعت السياره حطيت اغراضي بالمقعده اللي ورا وركبت قدام قبل لا احرك ارسلت فويس على قروبنا قلت تجمعوا بدري عندي سالفه بقولها لكم وجهاً لوجه
حركت السياره وشفتهم محترقين يبون يعرفون وش القصه بس خلاص احب احمسهم انا
مدري ليش يوم مسكت الخط تذكرت اول مره اسوق لوحدي يوم عيال عمي كانوا بيمنعوني اروح مشواري وكسرت كلمتهم قدام عينهم عز يا مال العز يا انا اشوى بس ما اعطيتهم وجه كان اللحين متحسفه على كل شي
يووه على سيره عماني ماعلمتكم ان لي فتره عنهم صرت مثل قبل نادراً ما اروح لهم وازورهم الا بالمناسبات طبعاً السبب الاول هو رجوع يوسف عسا ما يوسف وانا مابيه يختلط بقيس ولا ابي قيس يختلط بهم كلهم لاني اعرفهم واعرف طينتهم الوحيد اللي للحين معه تمام تركي وعذره انه يصير عمي اخر مره كلمني من ثلاث ايام يبي اقترح له بنت يبي يتزوج وذا الشيء اللي بسويه بذمه وضمير تركي مسكين لا اهل ابوه توفى وامه تركته مابيه تمشي حياته بيدين عماتي عندهم عادي يعطونه اي وحده بس عشان مجاملات وينسون ان فيه حياة لشخص قاعده تتدمر عشان كذا افكر اقترح ملاك لان ما اعرف وحده عزباء الا هي بس مدري عنها توافق ولا لا لازم اكلمها قبل عشان ما يتحمس على الفاضي
انتبهت ان فيه رساله جات حسبتها من قروب البنات بس طلعت من قيس راسل صوته يغني شغلته في السياره وعشت جو مع الكلمات ياحبيبي حتى يوم اني عارفه كيف هو متشفق على العيال وسويت نفسي انانيه وماهمني الا نفسي ما تغير ولا سوا ردة فعل
ما انسى لما نزلت الحوش ادوره ولقيته يلعب مع عيال اخوانه ودايم ياخذ بنات شهد وساره للسوق بشكل شبه يومي وانا من ذيك اللحظه فكرت انه لازم يكون اب يستاهل قيس اضحي عشان عيونه


ملاك


ياخي والله حياه الاستقلال صعبه تو جيت من دوامي بصلي العصر وامشي اروح للبنات بس على صعوبه حياه الاستقلال الا انها رايقه وهاديه كل اموري اسويها انا متى مابغيت محد يكسب جميل مساعدته لي ولا احد يصرفني ويأجلني الحمدلله اني اخذت ترم صيفي وتخرجت بدري ورحمه اول مره تسوي خير بحياتها كلمت اخوها يتوسط لي في مدرسه اهليه اداريه انا عارفه ان الهدف من حركه رحمه انها تكسر عيني واستحي واقبل ولد اخوها اذ جاء يخطبني بس انا اخذت اللي فيه مصلحه لي وبكيفها انا ما طلبتها شي هي اللي فكرت وقررت من نفسها بس المسكينه دينا تكاسلت تاخذ ترم صيفي معي وللحين تعافر في الجامعه بس نستاهل العبيه نصحتها مره ومرتين بس خلو مقابل قيس ينفعها اللحين
جهزت بنجابي حلو وقررت اسوي لوك هندي دينا تموت على الهنود وانا ملامحي تساعد بلبس واشوف رده فعلها اكيد بتطق هي ملامحها ابعد مايكون عن الملامح الهنديه بيضاء شعرها خفيف وناعم عكسي انا اللي سمراء وشعري اسود طويل يعني صدق لو امثل بفلم هندي تتوقعون يقبلوني ؟؟ شكلي بعرض الفكره هذي على سالم عشان تجيه سكته مره وحده اذ هو بس ضحكت معه وقلت بستاجر شقه لوحدي بغينا نصلي عليه وش بيصير فيه اذ درا عن افكاري


سمر

سمر: هيثم روح السياره انت بلحقك شوي
هيثم: مابا مابا باستناك
سمر بعصبيه: طس السياره
طلع يوم صحت ايوه مايمشي الا بالعين الحمراء ونزل ابوه في نفس الوقت
ابو هيثم: شفيك عليه نقزتي الولد
سمر وانا اتطمن ان الكيكه ما اختربت: مجهزه له جاتوه صغير عشان عرف يقرا وباخذه مع البنات نحتفل فيه واقوله اطلع مابي اخرب المفاجأه بس رفع ضغطي على بال ما طلع
ابو هيثم بعتب: اللحين مناسبه كذا ليه مانحتفل عائلياً بها بس بيننا بين ليش كل شي مع اهلك
سمر : لان هي لهيثم وهو ماينبسط الا اذ كانوا الصغار معه ولا مناسباتي الخاصه ما احتفل فيها الا معك اصلاً
ابو هيثم: نسيتي حفله كشف جنس وتين اللي سويتيها بين اهلك وانا اخر من يدري عنها
سمر باحراج: مدري وقتها وش كنا افكر فيه مع تعب الحمل قالوا البنات بنسوي وقلت سووا
ابو هيثم : ما يخالف ولا هو وقت معاتب وينها حبيبه ابوها انا باخذها واطلع وانتي جهزي اغراض ولدك والحقيني ترا اعرفه بيصج راسي على كثر هذرته
سمر وانا اعطيه وتين اللي لفيتها عشرين مره خوف عليها من الهواء: يالله البس نقابي بس وجايه امسك وتين زين انتبه عليها
ابو هيثم: تعلميني بالله عليك
اخذت الاغراض وحطيتها بصندوق السياره ركبت ولقيت هيثم يتحلطم لانا تاخرنا بس خلاص هي كلها كم دقيقه ويستانس لان بنحتفل فيه عصريه عشان ما تفصل علينا نوف وتقول اكلتوا الجو عني




نوف

والليله ليله عمري ياهه يا بنات بقولكم شي من ترك شيء لله عوضه الله خير منه وهاذا انا اكبر مثال تركت وائل لان كنت اشوف علاقه عابره وذنوب على الفاضي بس اللي حصل ان وائل كان جاد ومتمسك فيني وذا الشيء اثبته من بدأ يتقرب من راشد ومعتز اخوي وخلا اخته تتعرف علي بس اليوم خلاص ما نحتاج كل ذول لان رح ينعقد القلب بالقلب واصير له وهو يصير لي يااه متحمسه
سمر وهي تبوس يدها وجه وقفى: يالله تحفظ لنا نعمه العقل
نوف : انتي جيتي
سمر: لا رحت احد جاء
نوف : لاتوك اول وحده
سمر: اكيد شفتي رساله القروب يالله قبل تتجهزون نبي نحتفل بولدي
نوف: الله اكبر تراه عرف يقرا كلمه من ثلاث حروف اوفر
سمر: دافعه مع جيبك شي
معتز وهو يدخل بحماس: فيه قهوه راسي مصدع يبي له مهيله شقراء ريحتها تكيف قبل طعمها
سمر : ماتعرف تختصر وتقول ابي قهوه
معتز: انا اكيف كذه من الوصف
سمر: الله يشفيك
معتز: راعي تكفين ان اختي بتتزوج الليله تراني متضايق
سمر: تراها بتتزوج مو بتموت
معتز: الزواج موت بطريقه ثانيه عاني دينا من تزوجت صارت معد تمون وتسولف بس كيف حالك حتى ندى ندى اللي من يومي سنه تلعب سوني معي صارت السلام ماترده علي والله يا دنيا تغير الاوادم
سمر: ياغبي لان ذول مو خواتك ورياجيلهم طبيعي يغارون لانهم يكلمون واحد مو محرم لهم بس اختك غير
معتز توه يستوعب: اييه عشان كذا
سمر: الله يخلف على ام جابتك
دينا داخله عرض وللحين بنقابها: درب ياولد
معتز يقوم: تقولي درب الحمدلله والشكر
قام معتز وطلع وجات دينا طلعت عبايتها ونقابها بحركه وحده مدري كيف
نوف : من جابك
دينا بغمزه: جيت بنفسي
نوف: خافي ربك انا ذاك اليوم شفتك تصورين وانتي تسوقين تراك غشيمه وماتدرين ربي وين حاطك انتبهي
دينا: زين لاشفتك تجين تترجيني اوديك مكان بعطيك اشكل
نوف: ايه بالله اعطيني اشكل معتبر لاجيت ترجيتك لان مستحيل اترجاك الا اذ صابني شي في مخي
سمر مسويه زحمه: يالله قوموا اربطوا البالونات ذي
دينا : ياذا النتفه ما تسوى الكم حرف اللي عرف يقراها كل ذا
سمر بعصبيه: ولدي واحتفل فيه لو مشى خطوتين وش دخلكم كانكم دافعين شي من جيبكم
نوف: ايه دينا وش اللي بتقولينه لنا وجه لوجه
دينا تسحب طاوله تحطها على جنب عشان تنسق البالونات حقت هيثم: لا اكتمل العدد وجات ماما وندى وامك ورنود وملاك وحنين قلت لكم
ندى بمرح: اذ جات ندى وش بتسوين
دينا بس شافتها: تعالي مشعل وين
ندى: عانيه مع معتز وراشد يسولف وترا حنين جات وتسحب في كرشتها افسحوا المجال لاتولد علينا اليوم
دينا تغطي شعرها بحجاب: انا رايحه اقول لمشعل اذ شاف مالك يسحبه للبيت غصب ماما فاقدته ومايعرف دواه الا مشعل
ندى: انتبهي معتز فيه
دينا بغرور: واذ معتز فيه لاتحسبين زوجك اللي انتي تحسبين له الف حساب يقدر يقول لي كلمه
ندى : لا زوجي مايقدر بس الحصني يقدر
دينا بتهديد: عيديها مره وقولي حصني قسم لاوريك
طلعت دينا واستغربت وش دخل الحصني
نوف: وش جاب طاري الحصني
ندى: عشان لون عيونه حسيت يصير نقول له حصني
نوف يوم فهمت القصه: الحمدلله والشكر



حنين

مافيه حل وسط يا جريئ مره يا خجول مره والله يا راشد معد صار يعرف لك الواحد
سمر: استح فيه بنات هنا
راشد بلا اهتمام: والبنات وين رياجيلهم عنهم انا بتغزل بزوجتي وش عندك انتي وياها
دينا: مشكلتنا مو مع فكره انك تتغزل بزوجتك مشكلتنا مع الغزل الهابط اللي قاعد تقوله
ندى تسوي اظافرها وتأيد كلام دينا: صح اجل ياليتني اصير معمول وش دخل راشد لاحد يسمعك تضحك العرب علاك
راشد: وش دخلكم على اساس بن الملوح ولا المعقد ذاك لسانهم ينقط عسل بس ذا كله غيره عشان علاقتي انا وحنونتي
دينا: اترك حنونتك في حالها والحق بنتك اسمعها تصيح يارب هيثم مصفقها
راشد يفز: عشان اكسر له الكم سن اللي عنده
سمر: ياقلبي ياولدي حتى ماخلوك تتهنى بيوم فرحتك
حنين: وش فرحته ترا بس عرف يقرا
سمر فصلت علينا ياليتني ماتكلمت: داربه داريه انه عرف يقرا وذا يوم فرحتي وش دخلكم
مها جايه : خلاص مبروك المهم ترا وصلوا البنات وحتى ريم وصلت الغبيه نوف محرصه عليها تجي من بدري وهي للحين ماطلعت من عند الارتست البنت تنتظر لوحدها
دينا تاخذ فره على شكلها النهائي: ليه تنتظر لوحدها انا رايحه لها من زمان ما جلست معها



ملاك

ملاك: مو منجدك اقولك العيب مو في ولد عمك العيب فييه انا انا اللي عازفه عن الزواج
دينا: كيفك هو قال دوري لي وحده تعجبك وبعد اللبس الهندي ذا اعجبتيني وقلت بخطبك له
ملاك: بقوم اطلعه قبل لاتفكرين تخطبين لي مالك
رنود بهمس: خلاص العالم يشوفونكم تتجادلون يحسبون عندكم مصيبه
دينا: منهم العالم ريم واختها وخاله نوف وماما وسعاد خالتي وامك وساره اخت ملاك
رنود بغيض: وذولي ايش
دينا : اوادم مو بعالم
ملاك: دينا تعالي وش رايك باخت ريم الصغيره لولد عمك
دينا : تتوقعين كم عمرها
رنود: بثالث ثانوي مناسبه نفس الفرق اللي بينك وبين قيس
دينا: خلوني اراقبها تراها سنعه ولا لا
ملاك: مالت عليك وعليه وعلى قيس
دينا: ملاك لانزعليني ثم تخليني ما اقول لك السر اللي بقوله
ملاك: ياذا السر اللي من عصر وانتي مزعجتنا فيه
دينا: مايسمح الموقف خلي بعد ما تخلص زفه نوف ويطسون الضيوف اعلمك بس تراه حاجه تفرح والله
ملاك وانا اتصفح جوالي: زين محتاجه حاجه تفرح والله
جلست امر على البرامج وبالصدفه دخلت تويتر شفت دينا قبل ١٢ دقيقه مغرده بـ
:‏"لقدّ كنت اؤمن بأن هناك سعادةً كبيرة تنتظرني في مكانٍ ما، ولهذا السبب ظليتُ هادئة بينما تمر الأيام"

ملاك وانا اوري رنود التغريده: واضح انها حاجه تفرح
دينا : ايه انا كل ما انبسطت او زعلت جيت كتبت بتويتر والله اني فضيحه
رنود بحماس: حمستيني دينا وش فيه
دينا تتلفت: تعالوا الحوش مقدر الجو هنا مايساعد
طاوعنها بسبب فضولنا وتركنا الجلسه ورحنا الحوش وجلسنا ننتظرها وكنها طولت وهي تفكر
ملاك: خلصينا
دينا: تذكرين قبل كم يوم دقيت عليك وقلت انا طالعه من الجامعه وبمر الصيدليه اجيب بنادول واذ تبين شي ولا لا
ملاك بطفش: انتي جالسه تقصين قصه حياتك لاتطولينها لاقول عساها تنتهي
دينا: اسمعي جاك العلم وانا رايحه الصيدليه اشتري بنادول عشان صداعي لفت انتبهاي تيست الحمل وتذكرت ان الدوره تأخرت علي فقلت خلوني اشتريه
انا ورنود بحماس: وبعدين
دينا بسرعه:واشتريته وحللت وطلعت حامل ولا بالثالث بعد



رندا

سجدت سجود الشكر واخيراً جاء اليوم اللي وحده فينا بتصير فيه ام الحمدلله
دينا: اي ملاك اتركيني الله لايعيدها من فرحه بتذبحيني
ملاك بفرحه ودموعها بعينها : اكلي تراب تراني فرحانه للحد اللي فوق الطبيعي
دينا بتآثر تحضنا: حبايبي بنات الله يحفظكم لي
ملاك: ايه وقيس وش سوا
دينا: اص قيس ماعلمته
ملاك بصدمه: قبل اسبوع ولاعلمتيه
دينا: اول في البدايه ماكنت مستوعبه بعدين بوم استوعبت ماحبيت اقولها بطريقه ناشفه له فتره ينتظر خبر مثل كذا لازم اسوي فكره حركه اي شيء وذاداللي كنت ابي منكن مساعده فيه وبقول للبنات وماما اللحين يعني يوم علمتكم قبل قيس حبيبي مو حب فيكم بس لاني للاسف مضطره
ملاك: ياعم طيري بلا حركات وخرابيط روحي وقلي استانس انا حامل وانتهينا
دينا: لامدري ودي اسوي حركه او مفاجأه
رندا: والله كلنا عوانس خلي نوف تخلص الزفه واستشيري المتزوجات خالتك وبناتها
ملاك وهي تسحب دينا لجوه: اشوفك محتره لانك عانس كلمي الدكتور يجي ياخذك
رندا: ظلام ما اسمع
دينا تسحب يدها بعصبيه: ملاك ايدي انخلعت شفيك
ملاك: الجور برد ادخلي جوه
دينا بصدمه : ياحبيبي خايفه على الوريث الشرعي ولاخفتي على صاحبتك اللي من وانتي بالابتدائي معك
رندا: لازم حركات حريم الاخوان ماتعرفينها بس حظك دينا بالدلع
ملاك بعصبيه : خلاص تكرهون الواحد يهتم فيك احسن اقعدي بالبرد انا داخله جوه
دينا: الله معك والقلب داعي لك ولاتجيبين لاحد سيره لين اجي
رندا بضحكه: تهبل ملاك ماتحب تبين انها خايفه عليك او تهتم لك
دينا: خليك منها على سيره الدكتور للحين صامله على قصه انك لازم تتخرجين
رندا باستفزاز: اكيد انا مو زيك يوم قلتي والله مااحمل لين اتخرج وكسرتي كلمتك انا كلمتي سيف و اذ قلت كلمه اكون قدها ما امشي وارمي بالكلام
دينا بصدمه: لا ياشيخه طسييي لا اتوطاك
يوم شفت وتوقعت وش بتسوي حطيت رجلي جوه لاتجي تنتف الكم شعره اللي براسي ورحت جلست جنب امي هاهاي اللحين ماتقدر تمسكني ولا تسوي شي



نوف

ابي ابكي شي غريب يعني اللحين المفروض هو اللي يدخل بس لا هنا انقلبت الايه وصار هو اللي بالمجلس وانا اللي لازم ادخل علاه احس استقويت كل ماتذكرت ماضينا وائل مو اي شخص استحي منه شفت معتز يفتح الباب ودخلت حتى ما رفعت راسي سحبني ابوي لين جلسني على كنبه وكل ذا وعيني بالارض
راشد بملاغه: نوف اطلع ولا اجلس
نوف بتوتر: بكيفك
راشد: الله يرحم بعض الناس اللي قلت بجلس وطردتني تقول عندنا سوالف خاصه المهم عشان قلتي بكيفك بطلع واخذوا راحتكم بس مو مره
خلص راشد ملاغته وطلع رفعت راسي وشفتهه وااههه يا بنات والله شفته وائل هو هو ماتغير صح كانت ريم توريني صور له بس على الطبيعه احلى والله احلى حسيت اني طولت وانا اطالع فيه وشلت نظري عنه
وائل:مبروك النوفي
نوف بتوتر لانه قاعد يذكرني بذكريات قديمه: الله يبارك فيك
وائل: اجل كنتي تقولين احيان ماتحبين شكلك كل ذا الجمال وش اللي ماتحبين فيه
نوف بصدمه: انت تتذكر سوالفي
وائل يقرب مني ويجلس: وانا طول السنين هذي وش مصبرني غير ذكرياتك
نوف: طيب تذكر كم مره سولفنا وتخيلنا اللحظه ذي
وائل: على كثر ماكان التفكير والخيال يسعدني على ان اللحظه ذي والشعور ذا ما اقدر اوصفه نوف انتي مثل الحلم لاكن واقعيه
نوف: خلاص احسني بدمع
وائل يطبع بوسه على جبهتي: لاتدمعين الا اذ كانت دموع سعاده لان اذ الله يقدرني من اليوم ما اذوقك لا قهر ولا زعل
راشد يدخل فجأه: ماصارت انا كل ماتركتكم متفرقين اجي القاكم جنب بعض مو اول مره ترا
نوف بخجل : خلاص انا بطلع
قمت طلعت وانا شايله فستاني الطويل ما رحت صوب الضيوف لا طلعت فوق غرفتي وجلست عالسرير مو مستوعبه اللي انا فيه حلم كان شبه مستحيل تحقق بغمضه عين سبحانك ربي ما اعظمك

رد: متقلبين الود

تابع٥٠



ثريا

دينا: ثري..تو..ون جاهزيننن
سمر: خلصينا بسرعه
دينا بتصفيقه: انا حامل
وماقدرت اشوف شي لان كل اللي حولي راحوا يضمونها ويسلمون عليها دينا حامل ياعالم مدري افرح ولا اشيل هم دينا للحين مقضيتها هي وزوجها مطاعم للحين ماقدرت تقوم بنفسها كيف بتقوم باللي ببطنها
طردت ذي الافكار من راسي مابي ابين لها شي وقمت باركت لها
ثريا: مبروكك يامك مبرووك
دينا: الله يبارك فيك
دينا رجعت تصفق: ياهوو انا ماني جايه اعلمكم عشان تستانسون انا ابي مساعدتكم
حنين بتعب: مساعدتنا ماشاءالله عليك الله لايضرك تقولين بالشهر الثالث وانتي من اليوم تناقزين من مكان لمكان والطاولات هذي كلها انتي شايلتها
ثريا: امانه صدق
دينا متورطه: حنين تمزح ماتعرفين اسلوبها
مها : وش تبينا نساعدك فيه
دينا: مثل ماقلت لكم منذ زمان ان قيس كانت ذي امنيته وهو للحين ما درا ف ابي تعطوني افكار شي ابي يدري بطريقه تونس كل وحده وتقول يوم حملت وش سوت
مها بسخريه: فيه طرق بعد انا عن نفس حملت ولا كنت داريه جلست فتره ما اكل بسبب نفسيه العرس الجديد وانتقلت من مكان لمكان لين اغمى علي وعرف زوجي ان انا حامل قبلي وتبين تعرفين كيف علمني جاء وقال قومي نرجع البيت مافيك الا الصحه بس حامل يعني حياتنا سلسه وسهله بشكل لايعقل
سمر: انا بهيثم من الصدمه اول ماخلصت التيست طلعت ولقيته قدامي وعلمته وبوتين بعد كشفت عند الدكتوره ويوم نزلت السياره علمته ببساطه
ملاك: دينا رحتي دكتوره
دينا: رحت ايوه هي اللي قالت اني بالثالث
سعاد: وانا ناسيه والله كيف قلت اني حامل
حنين: انا يوم حملت بوجن بنتي سويت قهوه وحلا او بالصح كيكه الزعفران تعرفون قد ايش يحبها راشد وقلت له تراني حامل وذا اللي ببطني مثل سمر نزلت من عند الدكتوره و علمته
دينا: اوف كميه جفاف مشاعر وافكار عندكم
ندى وهي تاكل : جيبي بلونه واكتبي جوتها حامل وافقعيها بوجهه
دينا: قله ادب اروح اسأل متابعيني في تويتر احسن
ثريا: دينا تعالي انا ما اخذتي فكرتي
دينا : صح ماما ام الافكار وش فكرتك
ثريا وفي بالي فكره: البسي عبايتك وهيا البيت وكلمي زوجك قولي ببات الليله عند اهلي شوفي وش رده
دينا: ماما انتي تعرفين راي قيس في ذا الموضوع الظاهر بتخربين المفاجأه بكبرها
ثريا: سوي اللي قلته لك بدون ماتردين
نوف جايه تركض: ليش اخر من يدري انا
دينا: لانك ماحضرتي الاجتماع توك تتبكرين وش قال لك الياباني يالله انا بروح البيت عندنا سر انا وماما
ملاك: وانا من بيوديني
دينا: بكيفك انتي مستققله دبري حالك
ملاك بغيض: انا مستقله ماني سوبر هيرو
دينا: كيفك تصرفي يالله ماما بجيب شنطتي والحقك


دينا

كلمت قيس وانا بالسياره قبل لانحرك وجالسه اتخيل الف تخيل لرده فعله بس رد علي خفت يقول كلمه او شي وتصير زعله بيننا بس لا انا ابي استخدم بروده الدم
ماما تأشر يعني تكلمي ولازم تخلينه يوافق عشان تضبط الخطه
دينا وانا ارفع السبيكر: الوو
قيس: هلا ومرحباً
دينا: قيس انت وينك بالبيت
قيس: جالس مع العيال في مباراه للمنتخب وبنتابعها
دينا : طيب ممكن اطلب منك طلب
قيس: امري لو هي عيوني ماتغلى عليك
دينا : اقول مره اشتقت للبنات وودي اليوم انام عند جده وش رايك
قيس بضيق لاحظته: دندون حبيبي حنا وش اتفقنا عليه
دينا: قيس انا متضايقه والبيت يضايقني طقت كبدي انا على وجهه تخرج ونفسيتي زفت
قيس: يادينا صعبه
دينا: ولد خالي وولد خالتي ماهم بالبيت تطمن
قيس: مافيه
دينا بتهديد: والله لو ما جلست الليله ورجعت اني لازعل منك انا طفشت بغير جو عن البيت واللي فيه
قيس بهدوء وبزعل بان في صوته ياحبيبي هو: مثل ماتبين
وقفل الجوال خفت في البدايه اكون زعلته بي انا واثقه في ماما يارب ماتجحفلني بس
دينا وانا احرك السياره: على وين هاللحين
ماما: على البيت بعطيك اغراض واعلمك وش تسوين
حركت على بيتنا ووقفت والحمدلله لقيت سياره بابا ومالك يعني انهم جوه وانا لي اسبوع عنهم نرلت بعد ماقفلت السياره
ماما تفتح الباب: ابوك شايل همك على باله ان التأخير حق الحمل غصب عنك
دينا: وين هو ابي ابشره بنفسي
دخلت البيت ودورته مالقيته تحت اكيد في غرفه مالك اووه صح قيس يقول فيه مباراه للمنتخب يعني اكيد يتابعها في غرفه مالك
دخلت الغرفه برفسه للباب
مالك: من هذه اكسر رجله
دينا: هاذا انا
مالك: على بالي واحد من التوم ارحبيي انتي وينك لك اسبوع ماشفناك
ماجد: هلا هلا بالاميره هلا بحبيبه ابوها
دينا: هلا فيك يالغالي
مالك: وش تدورين في نص الليل
ماجد: بيت ابوها تجي متى مابغت وش دخلك انت
دينا: جايه ابشركم واخذ البشارات واروح
مالك: استعجلي عندنا مباراه
دينا : مبروك يا ابو مالك بتصير جد
ماجد بضحكه: يالله لك الحمد والله اني احاتيك يا عين ابوك
دينا: ياقلبي يا بابا بس هاه كم بتعطيني بشاره
مالك: ايا النذله نافقي وجاملي شوي
دينا: اص انا بستفيد من حملي وبجمع فلوس
بابا طلع اللي بجيبه كله واعطاني اياه
ماجد: كل اللي في جيبي اخذتيه كيفك تطلع كثيره قليله انتي وحظك
مالك بغت تطلع عينه: وين قليله اشوف اشياء لونها ازرق كثير
دينا: وانت ملوك هات اللي بجيبك
مالك: حامل انتي مبروك خلاص لاولدتي جبت لك ميتين
دينا بزعل: ميته على الميتين حقتك يالله انا رايحه ماما تقول بتعطني شي
مالك: والله غض اكيد بتعطي فلوس كل ذا ذنبي اني ولد ما اقدر احمل
ماجد: افا يا ذا اعلام انت هبيله يوم تقول هالهرج طس من قدامي طس
مالك بوقاحه : غرفتي بتابع المباراه
ماجد بعصبيه: طس مابقي الا تطلعني
مالك يتعداني : انا رايح لمشعل والعيال اتابع معهم كنت اقول ضعيف ابوي خلوني اتابع معه بس طلع ما ضعيف الا انا
ماجد بضحكه بعد ما راح: ذا الدلخ عند الفلوس ينسى نفسه الله يستر علاه
دينا : يالله بابا انا بنزل تحت لاني لو جلست دقيقه ماما بتقصقصني
ماجد: الله معك يا عين بوك
نزلت لماما بعد ماخبيت المبلغ الدسم اللي معي ولقيتها بالمطبخ
دينا: شفتي بابا احسن منك عطاني شي قريب السبع الاف وشوي
ثريا: اسكتي تعالي اعلمك وش تسوين
دينا : وش
ماما : هاك ذا وذا وذا
طالعت وش تقصد لقيت فيه كيكه صغيره مكتوب عليها مبروك بالانقلش وفيه بعد حذيان لبيبي مره مره صغيره من ذيك اللي تجيك بقماش يمكن اصغر من اصبعي وفيه بعد ثلاجه قهوه
دينا: كيف يعني
ثريا: هاك حطي الكيكه والقهوه هو يحب العربيه صح
دينا: قيس يتغذى على القهوه العربيه ايه
ثريا: حلو وحطي ذي على جنب في نفس طاوله القهوه واذ قال ذا وش واستغرب علميه
دينا: ماما هو بيستغرب بس مو من الشوز مني انا بنام عند جداني وبعدها يلقاني مسويه كيك وقهوه بعدين متى لحقتي تشترين الكيكه
ثريا وهي تضبط الاغراض بشنطه: كلمت الخدامه تطلبها قبل لانمشي المهم هاك والبسي واكشخي لاتقعدين بنفس حالتك
دينا: وانا وش دراني انه مو بالبيت
ثريا: اسألي ملاك قولي سيارته عند البيت واذ ايه خليها تناديه وتصرفه لين تخلصين



ملاك

ايه هين يوم انها بتمشي مع امها سحبت علي سحبه محترمه واللحين تبيني اقوم من غرفتي الدافيه ادور زوجها تراه وينه بس للاسف لانها دينا ما اقدر ارفض لها طلب شفت مع الطاقه مالقيت عند بيتهم شي يعني قيس مو بالبيت لان سيارته مو فيه استنتاج ذكي
دقيت عليها : اسمعي زوجك مو فالبيت تعالي واخلصي علي تراني تعبانه وبنام
قفلت الجوال قبل لا اسمع ردها ورحت تسطحت على سريري ياحبيبي يادينا والله فرحت لها الحيوانه من كل قلبي الحمدلله اني قدرت تجمع بين دينا صديقه عمري مع قيس احسن اخ عندي وجالسه اشوفهم كيف متفقين مع بعض وما كان يكدر عليهم الا قصه الحمل وهه هاذي هيه حملت الله يديم عليهم السعاده يارب


قيس

رجعت للبيت هلكان تعبان بس السبب تعب نفسي وش فيها ذي حركاتها اليوم قبل تمشي ما اعجبتني بس ماعلقت واللحيت متصله تقول بتقعد عند بيت جدتها وهي عارفه رأيي زين في الموضوع بس السبب انا ليتني اقدر اقسى عليها شوي بس مقدر انا لو زعلت بس نظره من عينها تخليني ارضى وامسح كل زلاتها اهخخ يالحب قطع قلوب البعارين وش عاد بالاوادم
دخلت الغرفه واول شي صدمتي ريحة عطرها ريحه العطر ذي تذكرني بايام حلوه والعطر ذا بس بالمتاسبات الخاصه تستخدمه عطرها وريحته محتفظ فيه بكل خلايا عقلي
لكن الصدمه الاكبر كانت صاحبه العطر اللي جالسه وواضح تناظرني ونفس حرمتها حقت الاصابع اذ توترت ابتسمت لها يوم وقفت لي لما دخلت مستحيل تكون فيه انسانه بهاذا الحسن الموجع الشفاف
الى اللن مافكرت اذ هاذا خيال ولا واقع المهم انها قدامي لابسه طقم حرير سماوي كأنها نجمع اي بالله انها النجمه الي اضوت لي حياتي كنت موتوقع اني اشوف خيال لو ما انتبهت على تنورتها القصيره اللي تحت الركبه ذي التفاصيل حتى في خيالي ما اقدر اتخيلها
دينا وهي تدعك اصابعها: انتظرتك توقعت مابتجي
قيس بهمس ثقيل: كنت ما ابي اجي بس قلت انام هنا عند ريحتك ولا انام تحت
دينا بمرح وواضح فيه توتر : خلاص اجلس شوف القهوه والحلا مافيه نوم لا هنا ولا تحت اليوم السهره صباحي
قيس رافع حاجب: نسهر ليه مانسهر من عيوني

شكلي فهمت قصتها بعد الموقف اللي اليوم عصر بتراضيني بس هي فكرت واخيرا جلست جنبي ولاحظت قدامي فيه ثياب لورع صغير مدري حذيان هاذي وش تحس فيه قاعده تذكرني ولا شكلها رضت على سالفه الحمل قطع تفكيري صوتها وهي تهمس عند اذني
دينا: وين وصلت بتفكيرك
قيس: هنا مارحت مكان
دينا: مدري احسك غريب
قيس وانا اشيل اللي على الطاوله: هذي حقت من جبتيها بالغلط شكله
دينا وهي تاخذه وترجعها مكانها: لا ذي شريتها مخصوص لنا
قيس : ليش لنا
ومن نظراتها وتوترها عرفت انها بتقول وافقت واستعديت احمل بس الصدمه اللي كنها كهرب لسعني يوم قالت انها حامل ولا لها كم شهر !!!!


دينا
يماماي ذا وش فيه احسه لا فرح ولا زعل اسلوبي مفاجئ ولا وش السالفه
دينا: قيس وش رايك انت
توقعته يرد علي بس اللي ماتوقعته انه يشيلني ويدور بي في العرفه لين حسيت اني بدوخ تمسكت برقبته احتياطاً
دينا: قيس خلاص تكفى والله دخت
قيس ينزلني بس للحين انا يدي على رقبته : لك ثلاث شهور وتو تعلميني
دينا بضحكه: وانا تو عرفت من كم يوم والله
يمسك وجهي وبنفس نظراته الناريه اللي تعودت عليها
قيس بهمس: وجودك في حياتي نعمه رح احمد ربي يعليها صبح ومساء
دينا بدلع : انا نعمه في حياة الكل
بعد بوسه طويله منه حسيت فيها بكل مشاعره فرح وعتاب وشوق وولع
قيس: ولي انا بشكل خاص اللي صرتي لي حليله
دينا: طيب اللحين لو بيدك تختار جنس البيبي وش تبغاه يكون
قيس: ابيها بنت لها نفس عيونك ونفس نظراتك
دينا: نقول يارب
وهو يرجعني لحضنه بقوه
قيس: انا من بعدك صرت اؤمن بالمعجزات يا وليفية روحي

رد: متقلبين الود

(واستمرت حياة ابطالنا ما بين حزن وفرح وهذي حياتنا كلنا مافي حال يدوم في هذي الدنيا )
ندى ومشعل: بعد اول سنه لزواجهم رزقهم ربي بولد سماه مشعل مالك على مالك ولد اخوه ومالك الكبير طاير عقله فيه اول مره احد يعطيه وجه ندى مرتاحه مع مشعل وودها ترد الجميل لدينا اللي جمعتهم بس كل اللي تقدر تسويه تدعي لها كل ماحست بالطمأنينه معه
مها ومتعب: صح مها مارجعت وسكنت بديره اهلها بس نقدر نقول ان فكرتها عن الموضوع تغيرت لان شهر بعد شهر عرفت قد ايش كان متعب شخص عظيم وحنون بس مغلف نفسه بأسوار البرود اللي فرضها عليه المجتمع
راشد وحنين: حياتهم مع بنتهم وولدهم من احلى مايكون وراشد نادم الف ومليون مره على كل لحظه فوتها تحت مسمى التردد
رندا وفراس: تخرجت رندا وصارت تتدرب في نفس المستشفى اللي يشتغل فيه فراس ملكوا من فتره وحطت رندا شرط من شروطها ان بيتها يكون جنب بيت اهلها وفراس مافكر يعارض ولو بحرف لانه لقى برندا الشخصيه العصاميه اللي مهما تكالبت عليها مصايب الدنيا تحاول تستمر في حياتها بكل قوه واصرار وهاذي الصفه كانت الصفه الوحيده اللي يتمناها في شريكه حياته
ملاك: بعد ما تخرجت وكملت دراسات عليا لقت لها وظيفه احسن من الاولى في شركه وبدت تشتغل على نفسها وتسوي محلات وبيوت تأجرها والزواج مو حاطته من ضمن حساباتها ابداً حياتها المهنيه اهم من حياتها الاجتماعيه وتفكر هي وندى يفتحون مشروع ملاك عليها تجهز كل شي مادي وندى تصمم ملابس بنات صغار والمكسب النص بالنص والفكره ارضت جميع الاطراف و مره طاير عقلها في ملك بنت قيس اخوها وهاذا الشيء اللي مخلي زوجات اخوانها يحترون منها لانها تفضل بنت قيس على عيالهم ومو بس ملاك حتى ابوها نفس الحاله
ثريا: مرتاحه في بيتها ومع عيالها صارت تحزن على ليلى من بعد ما تقريباً قطعوا عنها اهلها وكل يوم والثاني تعزمها على قهوه ولا عشاء ليلى تشوف ثريا كأخت كبيره وثريا لو لاحظت غلط بسيط عليها يمكن مارحمتها بس الادميه في حالها وتحاول ترضي ثريا بكل شي تقدر عليه اما عن حياتها مع ماجد فهي حياة كلها حُب واحترام ماجد كان حب مراهقتها وشبابها ومتأكده انه رح يضل حُب الشيخوخه
تركي ووجدان: تزوج تركي على رأي دينا وجدان اخت الريم وتركي شاكر لدينا مليون مره على اختيارها له بنت ماتقول لا ابداً له تركت دراستها الجامعيه بس عشان توافق تروح معه لما جاه انتداب لباكستان مثال على الزوجه اللي كل همها ترضي زوجها ولا تزعله صار اختلاطه باهل عمه قليل هو بس اللي يواصلهمجده وجدته ومشعل اما الباقين حرص انه يخلي حياته بهم رسميه لانه هو ادرى في نيتهم وتفكيرهم وهو بعد حياته المستقره ما يبي شي يزعزها
نوف ووائل: تم زواجهم ووائل مايشوف غلط بنوف ولا نوف تشوف غلط فيه كانوا في بدايه القصه علاقه محرمه بين مراهق ومراهقه بس يوم عرفوا ربهم وتابوا هيأ لهم رب العالمين اسباب عشان يتجمعون نوف حامل في شهرها السادس ويقولون احتمال ولد ومن اللحين الحماس له هي ووائل حتى جهزوا غرفته
سمر: بعد ما حست ان كل اللي حولها مرتاح في حياته قدرت ترتاح بحياتها هي بعد مشكلتها ان شخصيتها مسؤوله وابعد ماتكون عن الانانيه تحب تقدم غيرها على نفسها بالذات اذ كان هاذا الشخص من اهلها بس بعد ما استقرت حياه الكل قدرت هي تستقر وتركز ببيتها ودراسه عيالها
اما عن حبايبنا قيس ودينا: دينا تخرجت وبعدها جابت بنتها ملك انذت من امها لون البشره والشعر اما لون عيونها فهو لون عيون ابوها اما عن شخصيتها مره البنت خجوله وهاديه اللي يشوفها مايقول بنت دينا قيس مرتاح واذ فيه وصف ابلغ من الراحه تراه قاعد يحس فيه حبه لدينا يزيد يوم عن يوم دينا مهما كبرت يلاحظ فيها تصرفات طفوليه من ناحيه تكفيرها او ركاتها بس دايم يحاول يبين لها انه يثق فيها جلساته في البيت كثرت بعد ماحملت دينا بحملها الثاني وملك صار عمرها سنتين فصار لازم يجلس في البيت لان حمل دينا ذا عكس الاول صايره مره تتعب وتحتاج مغذيات حتى اخذت اجازه بدون راتب لمده سنه ودينا كل يوم والثاني تشكر ربها اللي خلاها توافق تروح لملاك ذاك اليوم وتقابل قيس اللي تشوفه اهم نعمه في حياتها مع قيس حست بالاستقرار والانتماء اللي ماحسته وهي بين امها وابوها

رد: متقلبين الود

الخاتمه

كان هدفي من البدايه اني اسلط الضوء في القصه على جانب تأثر الابناء بعد الطلاق وتشتتهم النفسي حتى لو اثبتوا عكس ذلك
ايضاً وضحت ان التردد مقبره الفرص مثل ماحدث مع راشد لان في الحياه الشجاعه والثقه هي اللي بتحدد طريقه حياتك واسلوبها
وحبيت ابين اهميه الشهاده يا بنات الشهاده مهمه مو شرط تقصرون بحياتكم الاجتماعيه بس شهادتك هي سلاحك
وبعد حبيت اقول ان الغيره مو شرط يكون صاحبها عدو او سيئ عادي جداً ان اقرب الناس يغار منك مثل ماحدث مع مها ممكن يكون الشخص محروم من ابسط حقوقه فـ اكيد يدخل في نفسه شي من الغبطه
ونصيحه مني يا بنات الشخصيه القويه والجريئه مطلب في كل وحده منكم مو شرط توصل بكم لدرجه الوقاحه ولكن لان المجتمع ما يرحم الضعيف شوفوا الفرق بين دينا وليلى اللي تسكت عن حقها وما تقول ستوب تعطي مجال ان كل من هب ودب يتدخل بحياتها ورح تكون خصوصيتها معدومه بعكس دينا اللي ماترضى احد يتدخل بشيء يخصها ومحافظه على ابسط حقوقها انها تمشي حياتها مثل ما تبي
وبعدين يابنات اللي تتعرض لأي مشكله تهديد،ابتزاز،مضايقات اياً كان نوعها لاتسكت تعلم احد اكبر وافهم منها وهو يتصرف
ولو تلاحظون ما اسرفت بالحوارت الرومانسيه عشان ما يصير زياده حشو على الفاضي لان ذا الشيء اللي ما احبه في بعض الكاتبات مماطلتها بالقصه بذي الحوارات >> شكلي بس انا اللي لاحظت لووول
وبس في النهايه احب اقول لكل من قرأ انا راضيه لو بس عدد قليل وياليت كل وحده قرأت القصه تشاركني رايها من ناحيه الموقف اللي ضحكها او زعلها لان هالتفاصيل تهمني
اذكروني بدعوه ودمتم في سعاده وحفظ الله

<<سبحانك اللهم وبحمدك اشهد ان لا اله الا انت استغفرك واتوب اليك >>


تمت في٢٩/١٢/٢٠٢١ ١١:٢١pm