رد: متقلبين الود

1)


دينا

كنت سرحانه بأفكاري ما نبهني الا صوت القهوه اللي على النار شلت الركوه وصبيت قهوتي وكملت تفكيري لان هالفتره الاحوال مش ولا بد في بيتنا صارت فيه احداث كثيره وغريبه مثلاً متخيلين ان بابا قبل يومين خطب وحده وانتشر خبر الخطبه في العايله والكل مستغرب يعني بعد طلاق ماما منه انتشر كلام ان بابا للأن عايش على ذكرى ماما وعاف الزواج اربع سنوات حتى انا استغربت بعيد عن كل شي احسه مستانس بحياته بين البر والكشتات والنياق وحتى لما كنت اسأله من باب الفضول ليش ما تتزوج كان يقول ما ابي عاجبني حالي كذا انا تزوجت عشان اجيب عيال وجبتكم وخلاص ماني شايل حمل مسؤوليه ثانيه بس احس رأيه تغير وش اللي غيره مدري شربت رشفه من قهوتي صارت فاتره يووه شكلي طولت بالتفكير بس مالي حيل اسوي وحده ثانيه غسلت الكوب ورحت اشوف احوال البيت رحت الحوش لقيت اخواني الصغار تو قبل ساعه كانوا نايمين متى قاموا غريبه ما انتبهت
ياحبيبي جالسين يلعبون بالتراب الله يعين وش ينظف شعورهم اللحين رحت لغرفه ماما لقيتها تكلم وحده من خالاتي صح نسيت اقول لكم احس ماما متأثره بسالفه الخطبه مع انها قبل فتره يوم قلت لها كلام بابا وانه عادي عنده يرجعها بس هي رفضت رحت المطبخ بسوي فطور لاخواني وانا احشي الخبز واغني اغنيه هنديه مو حافظه كلماتها بس على اللحن جاني مالك اخوي شكله تو قام وجهه للان واضح عليه النوم اخذ الخبزه من يدي وراح بدون اي صوت استغربت بالعاده ما يسكت ودايم يتكلم حتى وهو نايم ناديت اخواني الصغار وغسلتهم واعطيتهم فطورهم ورحت لماما لقيتها خلصت مكالمتها وجالسه وواضح عليها التفكير قلت خل استهبل عليها شوي اغير الجو بس سبقتني يوم سألت: اخوانك صحوا
انا: ايه ماسمعتي الاصوات الحاره كلها درت انهم صحوا
ماما: ماعلينا دريتي نوره جارتنا حامل يحليها فرحانه وماخلت احد ما بشرته
انا : امانه الحمدلله الله يتمم عليها تستاهل كل خير نوره
"نوره لها سبع سنوات من تزوجت وما حملت وكانوا يقولون انها تعبانه بس ربي رزقها الحمدلله "
ماما : يبي لي ازورها الليله او بكره جهزي نفسك بتروحين معي
انا: بس نظام نومي تغير انا الليله بنام بدري
ماما:عادي نروح بكره الوقت اللي يناسبك
يارب ساعدني صح احب نوره بس علاقتي رسميه معها واكره الجلسات الرسميه لان انا من النوع اللي اخذ راحتي بسرعه وهالشيء مايعجب ماما وبنفس الوقت اعرف ان الجيران بيتجمعون للقهوه وبتبدأ الأسئله عن بابا ومن تزوج وليش ومتى وكيف وكل اجوبة هالأسئله ماهي عندنا
بس انا بروح ادورها مو عشانهم لا عشان ارضي فضولي الشخصي رحت صليت العصر ولبست عبايتي ورحت ادور مالك يوصلني ذا وين القاه لايكون طلع بس الحمدلله لقيته عند التلفزيون
انا: اشوفك من مسلسل لمسلسل صليت العصر
مالك بدون نفس: ايه
انا : في المسجد ولا هنا الرسول قال لا صلاة لجار المسجد الا بالمسجد
مالك: شايفتني ورع عندك اعرف وين اصلي بعدين على وين
وأشر على العبايه
انا: صح ذكرتني ليش جايه ادورك قوم قوم وصلني بروح لبابا قوم بسرعه بنروح ونجي قبل اذان المغرب
مالك: لازم يعني وش تبين فيه
انا : بسولف معه
مالك :هاذا هو جوالك سولفي معه لين بكره
انا: وش دخلك انا بروح بعدين لايكون على بالك السياره لك لا ياعيني اذ ماتبي توصلني ايدك على المفاتيح اعرف اوصل نفسي
مالك : قدامي بس قدامي احمدي ربك اني فاضي

الحمدلله بس ان السياره مو له وبابا اللي جايبها ولا كان يذلني على الروحه والجيه والسر اللي ما يعرفه مالك اني ما اعرف اسوق ودايم اقول اني مو بحاجتك واقدر اوصل نفسي وهو طبعاً ما يعطيني فرصه الصدق اخاف يجي اليوم اللي يعطيني المفتاح ويقول وصلي نفسك


ملاك

تعبتتتت منهم ذول اخوان ذول استغفرالله العظيم في كلمه على طرف لساني بقولها بس اخاف ربي يحاسبني اخذت الجوال بتصل على دينا لان اذ جلست مع نفسي بنفجرر اتصلت وغريبه مافي ارسال بعد عشر دقايق رجعت اتصلت علي
دينا :هالووو هاو ار يو
ملاك: ما علي اكل ومرعى تعالي وين كنتي اتصل يقول مافي ارسال وارسل ماعندك شبكه
دينا: اييه تو جيت من الصحراء من عند بعارين باباتي
ملاك: بعارين وباباتي مرره مو لايقه اييه وش جديد باباتك
دينا :ولا شي يقول انه خطب وحده اخت صديقه مايعرف عنها شي حتى اسمها
ملاك: طيب ما قال لك مواصفاتها هاللي بتصير زوجته
دينا: اقولك حتى اسمها مايعرفه وش دراه عن مواصفاتها شاف اخوها اجودي وخطب اخته وش دخل مدري لحظه لحظه
وجلست تكلم مالك تقول وقف عند البقاله بشتري اغراض وكلام كثير ماسمعته
دينا : ايوه شفتي النذل مالك اقول وقف عند البقاله يقول هاتي ثلاثين ريال لو انك طالبه مرسول كان دفعتيها حق المشوار النذل الأستغلالي العيال الطبيعين يقولون لا يا أختي خلي عنك لاتصرفين ريال والنذل ذا يبي حق مشوار من اخته اللي اكبر منه
ملاك قلت وانا عارفه الجواب :واعطيتيه ؟
دينا : ايه وش اسوي اذ ما اعطيته بطلب مندوب خلها تروح للقريب ولاتروح للبعيد
ملاك : احمدي ربك وبوسي يدك وجه وقفى انا اخواني بيجننونيي هالحيونات استغفرالله يارب تخيلي لابسه وعلى اساس اروح مع ساره السوق رجعوني من عند الباب يقولون كيف بتروحين مع الرجال غريب واخوانك موجودين طيب الغريب ذا زوج اختك انت وياه واختك بتروح معنا بس من يفهمهم طيب يالقريبين دام حرمتوني الروحه ذي ودوني انتم انا محتاجه اغراض وكل واحد جلس يطلع عذر ويتهرب ايه ما يعرفون اني اختهم الا اذ كانوا بيتأمرون علي مالت عليهم لو وحده من حريمهم كان شالها على ظهره
دينا : وش رايك بس انشبي لهم اذ جو يودون زوجاتهم السوق يصيرون يقولون لك تكفيين روحي مع ساره ورجلها وفكينا منك وضحكت ضحكه طوييلهه
ملاك: ايه اضحكي اضحكي ما تحرق النار الا رجل واطيها تصدقين دندن افكر اتزوج اول خاطب يجيني لعلي ارتاح عشان اذ قالوا شي قلت انا على ذمه رجال مالكم دخل
دينا :ياحرام كسرتي خاطري اقول ملوكه وش رايك اخطب لك مالك صح انه ثقيل دم ويرفع الضغط بس يفي بالغرض تصيرون ملاك ومالك ولا احلى كوبل
ملاك: انا ليش متصله عليك اروح اكلم رندا وانتي خلك بعطيك حرمان من اتصالي يومين
دينا: لاتكفين زيديها ثلاث ايام
قهرتني وصكيت الخط في وجهها اهخخ تستاهل اكثر حركه تكرهها يوم اقفل الخط كذا




دينا

نزلت من السياره وادندن كلمات اغنيه وشايله الاكياس بيدي بس خلاص ماقدرت اتحمل ناديت على مالك
دينا: مالك وزفت تعال يديي تكسرت وما اشوف طريقي من الغطوه امسك كيس شيله
مالك: اللي يشوفك يقول رايحه امريكا كاهو الباب خطوتين وبعدين اغراض من اغراضك يعني انتي شيليها وركب السياره
وصاح علي :قولي لأمي بجي بعد ثلاث ساعات ومشى بسرعه مدري وين راح النذل انا قايلته المفروض بابا ما سماه مالك سماه نذل احس يليق عليه اكثر ضربت باب الحوش برجلي ودخلت اخيراً رميت الاكياس ورحت ادق الباب الجرس متعطل و نسيت اخذ المفتاح وطبعاً بجلس ادق الباب نص ساعه وجلست اطبل على الباب واغني لين فتحت لي ماما وشكلها كانت معصبه على الاخير
ماما : لا ليش وقفتي كملي كملي طق ولا اقولك هاتي انا اطق عنك وانتي غني
قلت وانا ادخل : لو ما اعرف اسلوبك كان قلت ذي تتكلم جد
ماما وشكلها مرهه معصبه تأشر على الأرض : تعالي شيلي العبايه ووديها الغرفه انا في اخوانك الصغار ولا فيك يالكبيره
انا: دقيقه يدي توجعني شلت الاكياس واحس في شد عضلي بأصابعي الا على طاري الاكياس وجلست انادي بأعلى صوتي حمني سلطه تعالوا جبت حاجه حلوه
ماما هزت راسها احس تقول وش ذا الحاله مييؤس منها وراحت المطبخ وجوني حمني وسلطه قلت روحوا الحوش تلقوا اكياس جيبوها حبه حبه ولا تفتحون شي اللي يتلقف كسرت يده ما مداني اخلص كلمتي الا ماما جايه بصينيه القهوه العربيه احبها اذ كان الجو بارد وخصوصاً بالشتاء
ماما: تقولين بتكسرين يد من ؟
انا متورطه: بكسر يد نفسي
ماما بنظره جانبيه: اييه على بالي بعدين ماقلت لا عاد تنادينهم حمني وسلطه تراهم نسوا اسمائهم خلاص ما عادوا صغار
انا: مدري احس الوضع مو حلو حمد وسلطان بالله فيه اطفال اسمائهم كذا اتوقع اصغر واحد اسمه حمد غير حمد اخوي عمره ستين سنه خلنا على حالتنا حمني وسلطه احلى بكثير
ماما : حمني احلى من حمد الحمدلله والشكر
واستوعب انهم تأخروا رحت لقيت يحاولون يفكون الاغراض اشوى ما تمت المهمه طردتهم وانا رايحه قلت ماما ترى مالك يقول بيجي الساعه عشره وين راح لاتسأليني ودخلت الغرفه ارتب اغراضي اللي شريتها


رندا

قفلت الكتاب وانسدحت على السرير احس ضاغطه نفسي بالدراسه بس غصب عني مو بكيفي في شي داخلي يقول ذاكري وتمسكي بشهادتك عشان يصير لي شأن بالمستقبل ان شاء الله مابي اصير مثل امي مهما عاملها ابوي راضيه وساكته ليش لان ماعندها مكان تروح له اذ حصل طلاق جدي الله يرحمه توفى وماعندها اهل واخوان كانت وحيدة جدي تزوجت ابوي وكانت امورنا تمام صح كان ابوي عصبي ويغلط عليها بالكلام بس يحترمها بعد وفاة جدي تغير ابوي مره تغير صار عادي عنده يكلم بنات قدامها ويغازل وانا عارفه انه ما عمره حتى قال كلمه حلوه وحده لأمي وهي ساكته بالعكس تحاول ترضي ابوي بأي طريقه لدرجه انها ايام تنساني وكل همها ابوي احيان تسوي لابوي اكل وتنتظر رأيه اللي مايتغير من صحيت عالدنيا وهو يقول لها ان طبخها يسد النفس بعد ما يخلص الصحن كله
ما اذكر امي سألتني اذ اكلت شربت نمت حتى دراستي ما تسأل عنها كل همها ابوي وكيف ترضيه ولا كأني بنتها الوحيده سمعت الجوال يرن مالي حيل اقوم اجيبه بس شكل الاتصال مهم لانه تكرر يوم قمت انقطع الاتصال اخذت الجوال لقيت خمس مكالمات من ملاك رحت القروب لقيتها هي ودينا يتناقشون على شي وكل وحده تقول رايها الصح الله يسعدهم دينا وملاك خوات دنيا هم اللي معطين حياتي لون من لما كنت بالأبتدائي تقربت مني ملاك وبعدها دينا وصرنا ثلاثي معروف بالمدرسه لين اللحظه ذي وصلت اخر سنه ثانوي وهم خواتي وصاحباتي اللي ما اشوف غيرهم


ملاك
قهرتني دينا تقول انا لوكال ولحجيه وجايه من عام الفين وحطبه بس عشان سميت نفسي اميره بأخلاقي وش دخل مدري طيب انا اشوف نفسي اميره بأخلاقي بس هي ملقوفه بشكل تحشر نفسها بكل شي اتصلت على رنود تجي تشوف وتنصفني وتقول لا عادي مافيها شي بس ماترد اكيد جالسه على كتابها تخاف يزعل منها لحظه اخيراً ردت على طول سجلت فويس اشكي من دوني وبشوف ردت فعلها كل اللي سوته ارسلت ضحكه طويله وتقول لو كل البنات يصيرون اميرات بأخلاقهم الا انتي اخر وحده ذول وش فيهم متفقين علي ووش فيها اخلاقي الحمدلله اصلي واصوم ولا ادخن بس من يفهمهم خل اغير الموضوع قلت لهم : بنات وش رايكم بكره تجون عندنا تكفوونن وربي طفش
رنود : ياليت ماعندي شي بكره والطفش الف بس ما اتوقع ابوي فاضي لي
دوني: انا بقول لماما بس ادعوا توافق لانها زعلانه لاني مارحت معها لجارتها واخاف تسوي لي عقاب
رنود:خلاص على حسب دوني اذ بتجي جيت عشان اقول لها تمرني تاخذني
ملاك: مو على كيفك غصب اخت دينا بكره اذان العصر تروحين تاخذين رنود وتجين واذ خاله ثريا ما رضت اكلمها لك
دينا: بنات غريبه
ملاك: وش الغريب
دينا: تقولين خالتي ثريا ما قلتي خالتي ام مالك
ملاك : اي تعرفين استحي بعد ما قلتي بتخطبينه لي
رنود: خيرر وش فاتني من بيخطب من
دوني: ولاشي سلامتك بس كنت افكر اخطب ملاك لمالك اخوي عشان تطلع من جحيم اخوانها ونزوجه هو وابوي في ليله وحده
ملاك : خلاص اعطيتكم وجهه بنام وانتم روحوا اخمدوا وتعالوا بكره انتظركم


>>سبحان الله وبحمده سبحان الله العظيم<<

رد: متقلبين الود

التُقى التُقى متواجد حالياً


تاريخ التسجيل: Oct 2021
المشاركات: 70
التُقى is on a distinguished road
افتراضي


(2)


دينا


صحيت من النوم على صوت المنبه وهاذا شي نادر ان صوت المنبه يصحيني رحت صليت الظهر وتروشت وانا اجفف شعري جات لي رساله من حساب غريب ما اعرفه بس اليوزر مو غريب علي لأن دايم تجيني ازعاجات من حسابات تتشابه باليوزر فتحت الرساله وكانت :
‏يَا مِن أراقبهُ و الوصَل منقطعٌ
كيّف السبيّل إلِى إعِلان اشواقِي ؟
كالغيمِ كُنت علَى أرضِي تظلُهَا
و اليومَ قد عبثَت شمسٌ بأفاقِي !

اعطيت الحساب بلوك واتذكر ماما لما قلت لها عن الازعاجات اللي تجيني من قبل فتره يمكن ست شهور كانت تقول ما فيه احد يتجرأ يرسل لك الا عارف انك معطيته الضوء الأخضر وكثيير كلام مثل كذا خصوصاً لما عرفت ان المرسل يعرف اسمي ويعرف كل شي عني ووعدت نفسي اذ انعادت الحركه بلوك بدون ما اقول لماما عن اي شيء وفعلاً ذا ثالث بلوك في الشهر ذا اتصلت علي رنود ورديت عليها بسرعه عشان اقطع افكاري
رنود : الحمدلله صحيتي مدري ليش توقعتك نايمه قلت خل اصحيها
دينا: صحيت صحيت وشوفيني جالسه البس المهم انتي خليك متجهزه لأن مالك منبهه علي ما تتأخرين
رنود: ايه انا لابسه من اليوم بس تستوي القهوه وخلاص اييه نسيت اقولك تراني سويت كوكيز
دينا: ايه سوي قهوه لان انا ما راح اسوي يكفي علي ورق العنب وتشيز كيك اللي سويتها
رنود: دونيي انتي اللي سويتيها وورق عنب مره وحده ياكبرها من كذبه
دينا : الصدق ماما اللي سوتها وانا ساعدتها عشان تسمح لي اروح
رنود : يالله بروح اجهز شنطه القهوه وانتي لا تتأخرين علي تعرفين ملاك والله لتاكلنا قالت من بدري تجون
دينا : يالله طسي خل البس واسوي شعري
قفلت من عندي رنود ورحت لبست جامبوست لونه بُني ورفعت شعري وحطيت شوي بودره وماسكرا وقلوس ولبست عبايتي وطلعت من الغرفه لان ماما اذ شافتني بلبسي ما استغرب تقول غيريه خصوصاً ان بيت ملاك كله اخوانها وعيال اخواتها صح نحنا ما نقابلهم على طول نروح غرفتها بس ماما مايعجبها


ملاك
خواتي طلعت اليوم محبتهم لنا غريبه جد جد غريبه بالعاده ما نشوفهم الا من جمعه لجمعه وش جابهم اليوم مدري وانا عزمت البنات وما راح ناخذ راحتنا باللعب والرقص بس مو سبب سخيف مثل كذا بيعيق مخططاتي رحت الصاله لقيتهم جالسين عالسفره طالعت فيني ساره اختي وهي تاكل وشهقت وشكلها اختنقت جلست تكح بعدين يوم ارتاحت سألتني :وش اللي بيدك
طالعت بيدي بشوف وش تقصد لقيتني شايله سماعات الDg رديت عليها : ذبيحه يعني وش تشوفين
ساره : مو منجدك الظهر وبتشغلين ايش لايكون اغاني والله ليجلدك ابوي تراه تو جاء يقول بيقيل
ملاك: لاحبيبي جالسه اجهز عصر البنات بيجون بعدين علمي نفسك انتي وعيالك احد يشرب شاهي ظهر
شهد اختي: الله يا بنت القطب الجنوبي نحنا كائنات صحراويه عادي وش فيها نشرب شاهي ودرجه الحراره فوق اربعين وجونا لا يعلى عليه ومدت علي تميس تقول امشي اكلي فيه قشطه وعسل بيخلصونها عيال ساره بعدها روحي حطي لك من جديد
ساره: اسم الله على عيالي شوفي فمك بالله حبه حبه الاكل ماهو بطاير
قلت وانا اجلس على الكنبه وراسي بين يديني :انتم ليش مشرفينا اليوم وش جابكم تكفون كلموا رياجيلكم يشيلونكم البنات بيجون ما ابي شي ينكد السهره
شهد تقلد صوتي :مابي شي ينكد السهره ورجعت لصوتها الطبيعي: مافيه شي ينكدها ان شاء الله حتى اعملي حسابك انا وساره ونواره بنتي بنسهر معكم
ملاك: طل اشوف وحده جايه ما بيحصل لها خير
وطلعت الغرفه اجهزها مابقي على جيه البنات الا ساعه



رندا

جالسه عند الباب عشان بس ترن دوني علي اطلع لهم قلت لنفسي خل اقضي وقتي واللعب لعبه وانا في نص تركيزي وحماسي انفتح باب الشارع بقوه ودخل ابوي يمشي كأنه دايخ واول ما شافني وقف وطالع فيه يتأمل ملامحي بعدين قال وهو يمد الكلمات :انتتي ووش اللللي جابكك هننييي روووحي لبيتكم فاطمهه وبنتتها بياكلونك روحي روحي اناا بتصلل عليك بعدينهه
ورجوله ما قدرت تشيله وجلس عند الباب
انا ببكي : امييي اميي تعالي شيليه يامي تعالي اخافف منه وهو كذا امييي تكفيين تعالي وجلست ابكي
امي جات تجري : انتي وش مجلسك هنيه روحي داخل واخذت ابوي وسندته وهو يسب ويشتم فيها وودته جوا البيت
مو سهل ولا شي بسيط اشوف ابوي بالحاله ذي انا اعرف ان ابوي يتعاطى بس حالته ذي خوفتني امسح دموعي واحاول اكتم بكوتي خلاص لازم اتعود ذا ابوي من عرفته وش اللي يبكي
رنود انتي قدها لاتخلين اي موقف منه يهز شعره من راسك انتي قويه جلست اردد انا قويه انا اقدر ما يهمني مايهمني سمعت صوت البوري ذي دوني جات غطيت وجهي وشلت سلة القهوه وطلعت لقيتها نازله اخذت مني السله وحطتها قدام وجلست جنبي اسمعها تسولف بكلام كثير بس ماني قادره اركز ليت اللي يسوق اي سواق مو مالك اخو دوني كان حكيت لها عن اللي صار صح مالك مثل اخوي ودايم استهبل معه بس موضوع كذا حساس ماحبيت انه يعرفه
دينا: هاه رنود وش رايك انتي
حاولت ارد بصوت طبيعي: رايي في ايش
دينا:في اخ مالك يقول بيروحون يزورون عماني
رندا: طيب وش فيها
دينا : فيها ان حمني وسلطه مو متعودين ولا يعرفون الناس هناك وانا مستحيل اروح معهم وطبعاً ماما مستحيل
رندا: مالك بيروح معهم
دينا: ومالك وش بيسوي يا حظي هو بكبره يبي له احد يروح معه
مالك : اقطعي بس صوتك بيسبب لي مشكله بأذني لا اسمع حسك
وشغل شيله ورفع الصوت على اخر شي ويغنيي معها
انا مدري عن تفكيره صوت دوني بيسبب له مشكله بس الشيلات عادي !!!





دينا


احس رنود مو طبيعيه تسرح وتسلك لي اذ جيت اسولف بس خلنا نوصل اقول لملاك تسحبها بالكلام ما يعرف لها الا هي ويبي لنا نص ساعه لين نوصل
انا اللحين خلني افكر بالزياره اللي طلعت فجأه عماني غريبه تذكرونا اخر مره شفتهم قبل اربع او خمس سنوات يوم كنت بالأبتدائي مو متذكره متى بالضبط واللحين اتصلت جدتي على مالك تقول تعالوا بسوي لكم عشاء واشوف اخوانك الصغار ما شافتهم من انولدوا الا مره وحده وش طرانا على بالها مدري كان نفسي مالك اخوي يعتذر بس شكله استحى وقال ابشري حتى حاول يقنعني اروح معهم بس رفضت طبعاً
انا علاقتي مع اعمامي مو مره حتى اكرههم بالذات عماتي وزوجات اعمامي والشعور ذا متبادل احسهم ما يحبوني اخر مره زرتهم كان فيه عيد وكنت جايه لوحدي بدون ماما وحاسه بالغربه بس هم جلسوني واعطوني قهوه وراحوا كلهم بغرفه ثانيه هم وزوجات اعمامي وبناتهم مرره حزت الحركه بخاطري ولا كان عندي جوال عشان اتصل على بابا يجي يرجعني اذكر كنت ابكي عشان خايفه من الجو وبالذات انهم ما يحترموني عادي يغلطون على امي وخالاتي بوجودي بس الحمدلله جاء مالك وجلس معي لين مشينا ولا كنت بستخف انا لازم اقنع مالك حتى لو يبي يروح ماياخذ اخواني الصغار


رندا
وصلنا نزلت انا ودوني وجلست اقول لمالك لا تسرع لانه مرره متهور الولد اخاف يصير فيه شي ونحنا داخلين على حوش بيت ملاك اسمع دوني تكلمني
دينا : رنود حبيبي شيلي الشنطه انا الغطوه على عيني ونسيت البس النقاب تكفين الفزعه
رندا: اشيلها كيف اشيلها يدي بتتكسر من اغراضي بعدين انتي ليش متغطيه شيلي الغشوه ملاك قالت اخوانها مو موجودين وخلاص قدنا دخلنا بالبيت
دينا : تهقين يعني كذا ؟
رندا : ايه اهقى لي ما اهقى يا كل الهقاوي انتي
دينا: بلا ملاغه اسحبيها انا اما اقدر احرك يدي
شلت غشوه دوني بقوه وطاحت طرحتها على كتفها بس عادي البيت امان على قوله ملاك
ونحنا داخلين مع البوابه اسمع دوني تقول لي: تدرين امس حفظت كلمات اغنيه باكستانيه يوم شفت الترجمه غبيه بس اللحن حلو اقول رنود ذوقي صاير غبي ولا انا اسمع باكستاني ماتصير ذي ولا بالأحلام
هزيت راسي باستنكار اخر سنه ثانوي المفروض تشد حيلها وتذاكر القدرات اللي ما فلحت فيه بس هي لازالت على وضعها تحسب انها بالمتوسط صحتني صيحه دوني واشوف الشنطه حقت الاكل وشنطتها على الارض وهي غطت وجها وراحت تركض لجوه استغربت وش فيها لقيت اخو ملاك نسيت اسمه بس اعرفه طالع فيني شوي كأنه يستوعب ثم صد
وقال : السموحه مادريت انكم وصلتوا
وجلس يلم اغراض دوني يافضيحتيي ذي جايبه شنطه المكياج حقتها وجايبه ادويه وثلاث عطور وقلم كل ذا بشنطتها استحيت وشلت شنطه الاكل حقتها ودخلت البيت لقيت ملاك تركض ودوني وراها
دوني : اجل تقولين صرفت اخواني هاه وذا اخو من اخو الجني الاحمر
وجلست تلطم خدوها وتقول: يا فضيحتي يا فضيحتي انفضحت على اخر عمري حسبي الله عليك يا ملاك يا بنت ابو سالم عشر تحاسيب انا كيف بقابل ربي وانا ما حجيت والناس شافوني
والله الصدمه اثرت على دوني وبزياده اجل وش جاب سيره الحج طالعت بملاك لقيتها ميته ضحك
ملاك : انتي يا فضيحه وش كاشفه وجهك له وبعدين قيس اخوي وصيته يجيب لي اغراض عشان تطفحين فيها انتي والاخت الثانيه يا مال التخمه وتتحسب علي بعد
قامت دوني بتضرب ملاك واول ما طلعوا من الصاله اسمع صيحه دوني ورجعت لي تركض ووجها احمر والبكوه واضحه في صوتها
قلت لها : هيي بنت وش فيك الوو انا هنا
دوني: شافني مره ثانيه انا من داعي علي يارب وغطت وجهها بيدينها وجلست تبكي
ملاك وهي جايه ميته ضحك: يالفضيحه رقبته بغت تنخلع اشوى الضربه جات فيه ولا فيني ياحبيبي يا اخوي المتوحشه لعنت خيرك انا لازم اتطمن عليه وين جوالي
رندا بنص عين: ملاكوه اخوك وش جابه ولا تقولين مو عارف ان نحنا هنا
ملاك : جاي يجيب شنطه المطفوقه ذي وبدال ما تشكره كسرت رقبته جعل عدوها الكسر
رندا : اهخخ دعيتي على اخوك ترا اللحين دوني صنفته من اعدائها بعدين غريبه وش الحب ذا لاخوك خبري فيك تتمنين تكسرين رقاب اخوانك كلهم
ملاك بوقاحه: اي اخواني المتزوجين اكيد اتمنى اكسر رقابهم بس تزوجوا المنافقات حريمهم وهم متغيرين بس قيس يحبي له للان عزابي واحبه يارب ما يتزوج ولا انا بزوجه على كيفي مع اني اشك انه كرهه جنس حواء بعد ما كسرت رقبته ذي




قيس

كنت جاي من السوق جايب اغراض لملاك الصدق ماكنت فاضي لها بس حزنتني تقول بيجيها ضيوف وماعندها شي تضيفهم وانا طالع كنت اناظر في الجوال ما استوعب الا بنت قدامي كانت تغني وبعدها انتبهت لي وغطت وجهها ومرت بسرعه من جنبي ويوم استوعبت الوضع لقيت الثانيه كأنها مصدومه اعتذرت منها وراحت
طالعت بالشنطه اللي انتثرت اغراضها ولا وحده كلفت على نفسها تشيلها كنت بتركها بس انتبهت ان فيها محفظه وجوال جلست اجمع الأغراض ياحبيبي وش ذا كل اغراض البيت معها والله يا البنات يستهبلون مابقي الا ملعقه وسكين وما استغرب لو لقيتها وانا اجمع الاغراض لقيت عطر انكسر بس يالله مأمنه مستقبلها هي جايبه غيره جمعت الاغراض وشايل هم العطر ريحته فيني والله ليمسكوني العيال طقطقه دخلت البيت وجلست انادي ملاك
جاتني ملاك بس مو لوحدها فيه وحده ثانيه معها وشكلها تحاول تمسك ملاك مادري ارجع ولا انبههم اني موجود بس فاجأتني ملاك يوم تخبت وراي وماحسيت الا ضربه على راسي سببت لي صداع ومدري وش صار بعدها اعطيت الشنطه ملاك وطلعت جلست على الدرج هي هي نفسها اللي اول تغني بس ماني عارف هي دينا ولا رندا اعرف صاحبات ملاك بس اسمائهم ما اعرف اشكالهم يوم راح الصداع طلعت وانتبهت ان فيه دفتر نوت صغير بحجم الكف طايح مكان اغراضها اخذته وكان العطر مبلله حطيته بجيبي ليش مدري بس قلت بعطيه ملاك بعدين


>>لا اله الا الله وحده لاشريك له له الملك وله الحمد وهو على كل شي قدير<<

رد: متقلبين الود

(3)


رندا

قصه دوني وقيس اخو ملاكوه تضحك بس مابي اضحك لان دوني واضح معصبه بس جالسه تتصنع غير كذا عشان خوات ملاك جلسوا معنا وانا غيرت رايي ما بعلم البنات عن الموقف اللي صار معي نحنا جايين نتونس لنا اكثر من شهر ما تجمعنا عشان كذا ما ابي انكد الجلسه انتبهت على صوت ساره اخت ملاك تناديني
رندا : هلا سارونه
ساره: اقولك اذ احتجتي شرح في الرياضيات لا تترددين لعبتي تعالي في الوقت اللي تبينه بيتي مو بعيد عن هنا
رندا : اكيد اذ مافهمت شي اول من بستعين فيه انتي بس انتي انتبهي على ملاك خلها على الاقل تجيب درجه حلوه تنقبل بأي تخصص بالجامعه
دوني : غيروا الموضوع المدرسه بعد كم شهر مابي افكر فيها
ساره : ثالث ثانوي اهم سنه بحياتك اضغطي على نفسك عشان ترتاحين عمرك كله لاحقه على الوناسه
ملاك : خلاص درينا انك تعرفين للرياضيات وتنقطين حكمه وكلامك كله نصايح الله ياحظي فيك الحمدلله انك اختي خلاص اسكتوا غيروا الموضوع على قوله دوني ولا اقول قوموا بنات هيا غرفتي انا مدري وش مجلسنا مع العجز
شهد : عجز بعينك روحوا روحوا وانا لاحقتكم بعد شوي
ملاك :تخسين بقفل الباب يالله بنات بسرعه تراهم يسوونها
وطلعنا غرفه ملاك وانا شايله هم نجلس لوحدنا اخاف دموعي تخوني بس اول ما دخلت الغرفه قلت شغلوا السماعات خل نرقص ما ابي اعطي نفسي فرصه افكر بالموضوع




ملاك


ميته ضحك على دوني هالبنت مو بصاحيه ولا كأنها اللي تبكي قبل ساعه لان قيس شافها جالسه تعلم رنود طريقه رقصه بس الصراحه مبددعه مجمعه كل الثقافات وكل انواع الرقص تعرف له بس ذا اللي فالحه فيه انتبهت على صوت رساله فتحتها لقيتها من قيس يقول لي البنات لمتى بيجلسون قلت لين نص الليل ولا اشوفك جاي قبلها هخخ عطيتها اياه بوجهه
دوني: ملاكوه وزفت امسكي الجوال
ملاك : هاه وش امسك
دوني : الجوال
ملاك : وش اسوي فيه ؟؟
دوني: ابد والله حطي عليه جبنه واكليه وش تسوين فيه يعني صورينا
مسكت الجوال وصورتهم وتصورنا وبعد ساعه خلاص كلنا تعبنا
قفلت السماعه دوني وهي تقول : ملاك انتي ماتعرفين اداب الضيوف جيبي لنا شي باررد احس تعبت
وانسدحت على سريري
ملاك: تكفين يالضيوف الضيوف حدهم غرفه الحريم مايطلعون منها
دوني: هه رنود اشهدي اشهدي تطردنا من بيتهم يا حسافه بس وين العروبه والاصاله
ملاك : ماتعرفين العروبه والاصاله الا عند بطنك تبين شي انزلي جيبيه انا والله ما تحركت
دوني: وتخيل انزل والاقي قيس اخوك لا يماما خلني اموت جوع ولا تتكرر الحركه اللي اليوم
ملاك: قيس وش يجيبه وبعدين حتى لو لقيتيه ما اتوقع انه يستوعب او يشوف بعد الضربه اعنبوك تتفرجين مصارعه كثير
دوني : هه مره ظريفه اضحكي رنود اضحكي مالت الا مالت عليك وعلى اخوك



رندا

اسمع دوني تقول اضحكي كيف اضحك وان احس داخلي نار متى اتخرج بسرعه واطلع امي من الجحيم اللي هي فيه واطلع انا بعد
وبدون سابق انذار جلست ابكي لاحد يلومني تعبت اكتم اكتم بقلبي اقول بكره بيتصلح الوضع بيتصلح والى الان على نفس حالنا
دوني تفاجأت : وش فيك حبيبي وش فيك ملاك البنت مو طبيعيه قلت لك شوف كيف تبكي
ملاك : وش فيها احد ضايقها خواتي قالوا شي قيس قال شي لكم علميني
دوني قالت وهي تضمني : لا ملاك لا من قبل اصلا من ركبت السياره كان واضح انها تبكي
ملاك : بنزل اجيب مويه وبقفل الباب لا تجي وحده من خواتي تتلقف يسوونها
وطلعت بسرعه تجري
دوني : ابكي حبيبي ابكي لاتكتمين بقلبك شي مو زين تحملين نفسك فوق طاقتها ابكييي وبعدين اشرحي لي وش القصه
ببكي ايه ببكي انا مو قويه مثل ما انا متخيله ايام اكتم بقلبي ولا انزل دمعه واقول انا قويه بس خلاص بعد المنظر اللي شفته اليوم عرفت لو اقوى شخص عنده ابو مثل ابوي لازم يبكي وتنكتب له بالتاريخ اذ ضحك او استانس



ملاك


شربت رنود المويه البنت مو طبيعيه كانت تبكي بهيستريا ودوني تقرا عليها ماحبيت اقاطعها بس ابي اعرف ليش تبكي مين اللي زعلها علاقات رندا محدوده وكل معارفها اعرفهمم انا افكاري صارت تودي لبعيد معقوله تعرضت لشيء لأن حالتها ابد مو طبيعيه ترجف مع ان الغرفه دافيه وجالسه تقول كلام ماني فاهمه منه شي مثل ابي حياه طبيعيه وقهرني وذلني وجرحني وتدعي على احد ماني عارفه مين
احد مأذيها وشكله اذى قوي سمعت دوني تقول لي: ملاك اذ عندك بنادول نايت هاتيه اذ استمرت البنت كذا بتنهبل
نطيت عند الادراج ادور بنادول والحمدلله لقيته شربتها دوني وهي مو مستوعبه للأن ترجف وتبكي ذي اسمها نوبه هلع قد قريت عنها بس ليش وكيف جاتها الله وحده اعلم
قلت لدينا: دوني انا خايفه عليها بتنهبل
دوني: لا ماعليك لو فيه شي كايد قالت لنا ذي واضح بسبب الكبت اللي عايشته مصيرها تنفجر بيوم
ملاك: طيب وش اسوي بها شوفي شكلها تعبانه واخاف اهلها يقلقون عليها
دوني: دقيقه بكلم امها اقول بتنام عند ملاك واذ ما رضت بشرح لها حالتها يارب تتفهم
وراحت اخذت جوالها واتصلت على خاله فاطمه ام رنود ورحت جنبها عشان بسمع وعادت الاتصال اكثر من مره لين ردت
دوني: ردت ردت الوو ..... سلام عليكم،...... عرفتيني خاله انا دينا ماجد صاحبه رندا ،....... ايه لا ما ابيها بقولك شي عنها .....، رندا عند ملاك وتعبت شوي ،..... اقول ماعندك مشكله اذ نامت للصباح وبعدين تجيكم.،..... هاه لا بس تعرفين تغير الجو تعبها واخذت بنادول ونامت.......خلاص ابشري ابشري ..،...... لا تمونين .،........ مع السلامه

ملاك : وش قالت
دوني: قالت عادي ماعندي مشكله بس انتبهوا لها الايام الاخيره نفسيتها تعبانه
ملاك تشد شعرها: بمووت ابي اعرف دينا وش فيها واللي فيها خطير ولا عادي ومن سبب اللي فيها عشان اقطعه بيديني ذي
دوني :ارتاحي ملاك ارتاحي مصيرها تهدا وتعلمنا باللي فيها بعدين لا تضايقين نفسك ترى رنود ضاغطه نفسها بالمذاكره تذاكر مواد السنه الجايه من اللحين اكيد انهد حيلها وذي ردة فعل بسيطه مره
ملاك: ان شاء الله انها كذا ولا هو شي ثاني لان الف سيناريو جاء ببالي للأن






قيس

صاحبات ملاك للان عندها الساعه 12 ونص بروح البيت بغير ثيابي ريحه العطر كتمتني والله يا جات احراجات اليوم بسببه لان ريحته ريحه عطر بنات بحت وخذلك تعليقات من العيال اففف ذا وقته حتى بطاريه جوال طفت بعطيهم ساعه اذ ما مشوا والله لا رجع زودوها والله حطيت الجوال بجيبي ومسكت شي طلعته لقيته الدفتر اللي كان طايح اليوم جيت اقراه بعدين حسيت غلط اتدخل بخصوصيات الناس بس خصوصيات الناس ما تنحط بدفتر كذا احتمال انه يضيع وينوخذ في كل مكان سميت بالله وفتحته لقيت اول صفحه اكثر من توقيع كأن احد يجرب توقيعه والصفحه الثانيه مكتوب فيها :
اليوم اطلب من ماما تسوي بودينغ الليمون واطلب من مالك يوديني عند خوالي يارب يوافقون
الصفحه الثانيه مكتوب فيها:
بابا اشترى لي جوال جديد يحبي له يا ناس
الصفحه الثالثه:
اجرب خطي بعد ما كسرت اصبعي سمر لا الحمدلله خط سليم

وخرابيط كثييره منها اللي فهمته ومنها اللي ما فهمته شكله دفتر تكتب فيه يومياتها بشكل مختصر ذا اللي عرفته منه والدفتر لدينا لان هي اللي اخوها اسمه مالك اعرفهم واعرف اهلهمطالعت بالساعه الوقت تأخر خلاص برجع البيت ولا علي فيهم



دينا

ماما تتصل تسأل عني تقول تأخرت ومالك ارسل عليه ما يرد الصدق قلقت عليه ولا علمت ماما انه مايرد اخاف تقلق هي بعد قلت لملاك اللي تشد شعرها وواضح انها تفكر بحال رنود النايمه :
اللحين ماما ما بتهدأ لين اجيها ومالك ما يرد وش الحل بالله اطلب اوبر ؟
ملاك : لاوش اوبر بذي الساعه صاحيه انتي ناقصين مصايب
دينا: طيب وش اسوي ماما قلقانه ومالك مختفي وش الحل
ملاك ببساطه : روحي مع قيس اخوي انا اكلمه لك
دينا : لاقيس لا فكيني ملاك بدون احراج
ملاك : قيس لا بس اوبر عادي يا سلام دوني مو وقت احراجك امك قلقانه و اوبر تحلمين تطلبين عندك حل واحد واللي هو قيس اكلمه ولا لا
دينا بتردد: كلميه بس تروحين معي عادي
ملاك : خليني اكلمه بعدها يصير خير
اتصلت وراحت تكلمه بعيد وبعدها رجعت تقول لي مشوار نص ساعه وجاي طمني امك
دينا : ملاك بتروحين معي
ملاك وهي تتأمل رنود : روحي لوحدك وانا برسل الخدامه شاهيندا معكم انا مقدر اروح اخاف تقوم رنود ما تلقاني وتنهبل
سكتت صدق حرام ملاك مضغوطه وبعدين خير يا طير قيس وش فيه لاهو اول ولا اخر واحد شافني بالغلط اهم شي ارجع اطمن ماما واتطمن على مالك وقيس مثله مثل اي سواق اوبر ليش مكبره السالفه انا



قيس

اتصلت ملاك تبيني اوصل وحده من صاحباتها تقول عندها ظروف
غريبه وحده نايمه عندها ووحده يطلبون مني ارجعها ما علي انا بساعد ملاك لانها طلبتني اوقف معها الليله وقالت تكفى وانا اعطيتها كلمه وقفت السياره عند باب البيت واتصلت على ملاك قلت قولي لها تنزل
ملاك: قيس ترا دوني شوي خجلانه بعد الموقف اللي صار اليوم سو نفسك ما انتبهت لشيء
قيس:ماعليك حصل خير بس ارسلي احد معنا مي حلوه اوصلها لوحدي
ملاك : ايه شاهيندا بتروح معكم يالله باي بروح اناديها
قفلت الجوال يعني اللحين وش الصدفه ذي نفسها اللي شفتها اليوم بوصلها وش قالت اسمها ملاك ايوه دوني دوني اي هي دينا اعرف ابوها وعمانها بس ناسي طريق بيتهم ان شاء الله انها تعرفه انفتح الباب اللي وراي واسمعها سلمت بصوت واطي رديت السلام ويوم تأكدت انهم ركبوا حركت السياره بعد خمس دقايق قلت لها عشان اتأكد : انتم بيتكم اللي قريب الصناعيه في اخر الشارع صح؟
ردت علي : لا ذاك بيت بابا بيتنا دقيقه بعطيك اللوكيشن
استغربت بيت بابا وبيتنا ليش كم عندهم بيت ذول سمعتها تتكلم بصوت واطي مره ما انتبهت وش قالت
قيس :هلا قلتي شي
دينا: تفضل الجوال شوف اللوكيشن
اخذت الجوال حفظت الطريق بسرعه قريب شوي ربع ساعه ونوصل ورجعت الجوال لها بس شكلها مو منتبهه لي
قيس : دوني جوالك
!!يوهه انا وش سويت الله لا يربحك يا ملاك دوني ودوني لين صرت مثلها حسيتها انصدمت بس ماعلقت قلت خل ارقع
قيس : اسمك غريب اول مره يمر علي اسم دوني مميز شوي
دينا : ايه صح عليك مميز
هخخ تسلك لي بس اشوى رقعتها وصلت عند البيت اسمعها تكلم الخدامه تقول لها انتبهي يمكن ملاك تنام خلك منتبهه لرنود واشياء كثيره حشى وش ذي التوصيات ونزلت قبل لا تقفل الباب قالت: يعطيك العافيه ازعجتك
قيس: الله يعافيك بالخدمه



دينا

رجعت البيت وكانت الانوار مقفله سلمت على ماما وقلت خاله ام ملاك تسلم عليك ماما ارتاحت وراحت تنام رحت غرفه مالك اشوف اذ موجود ولا لا بس الغرفه فاضيه يا رب استر اخاف صاير له شي واحد عمره 16 ومعه سياره الوضع مايطمن اعوذ بالله منك يا ابليس لا توسوس لي
رحت غرفتي تروشت وصليت الوتر ودعيت لرنود ربي يهدي بالها ورحت انام مع اني اشك يجيني نوم
جلست افكر باللي صار اليوم رنود وحالتها مو طبيعيه وقيس يوم ضربته ضحكتت شكله تفاجئ فيني بس يارب ما يدري انها انا اللي وصلها خله يشك برنود صح لفت انتباهيي دفتري كان على المقعد الامامي في السياره شكله لقيه مكان الشنطه وشاله حاولت اتذكر وش كاتبه فيه ما قدرت بس اللي اعرفه كله كلام عادي وسخيف
جربت اتصل على مالك اخر مره يمكن يرد وفاجأني لما رد
دينا :مالك الوو انت بخير طمني يا ولد
مالك: هلا هلا ايه بخير يالله لك الحمد وش ذي الاتصالات تبين شي
دينا قهرني بروده : انتي وينك ليش ما جيت ترجعني البيت
مالك: يوووه نسييت تبيني اجيك اللحين
دينا: لا خلاص تصرفت بس انت وينك لي مارديت جاوبني بسرعه تراني بنام
مالك: ابد مع عيال عمي طالعين البر تبين شي
دينا : لا انتبه على نفسك
قفلت من عنده غريبه عيال عمي من متى يطلعون مع مالك ووش فيهم عماني يحاولون يرجعون العلاقه بيننا مره يعزمونا ومره يتصلون علينا مالك عادي ياخذ الامور بسهالات يشوفها عزيمه بسيطه اما انا ما ارتحت عارفه ان جدتي ام ابوي يوم عزمتنا مو حب لا حاجه في نفسها بس ما راح اروح وبحاول امنع اخواني الصغار جتني رساله من اكاونت جديد واضح حتى بدون افتار ومافيه فلورز ما يحتاج استغرب تعودت كنت بمسح الرساله بدون ما اقراها بس شي بداخلي يقول اقري لان انا اموت واعرف مين ذا فتحت الرساله وكانت بيت شعر وكلام تحته:
‏
"أَرى طَرفي يُشَوِّقُني إِلَيه
‏كَأَنَّ القَلبَ يَعلمُ ما أُريدُ"

"واخيراً يا دينا سمعت صوتك اه لو تدرين قد ايش اشتقت له"

وين سمع صوتي ذا اليوم ما قابلت احد غريب ابد وجلست افكر من غريب سمع صوتي معقوله لا ماني قادره استوعب يالله بس هو الوحيد الغريب اللي سمع صوتي اليوم بس ذا يقول دينا قيس على باله اسمي دوني ياربب اللحين كيف بنام من التفكير ليتني ما فتحت الرساله بس خلاص انا لازم احط النقاط على الحروف ارسلت عليه انت قيس ؟ وبنتظر رده
دقيقه بس ووصلتني رساله:
"هو صح انا عاجبني اسلوبك وشكلك بس ما وصلت لدرجه عشق قيس يا ليلى هههههههههههههههههههههههههههههههههههههههههههههههههه هههههههههههههه "

وش القصه لا مو اسلوب قيس صح ما اعرفه بس لايمكن يكون هو رديت عليه :"ابي اعرف انت مين وانا اعرفك ولا لا"
طول يكتب ويمسح لين رد اخيراً: "انا مين بتعرفين الايام الجايه اما اذ تعرفيني ولا لا اتوقع تعرفيني بس اسم ما عمرك قابلتيني الا وانتي صغيره"
اعرفه بالأسم بس ما عمري قابلته كيف صارت جاني مسج منه فتحت لقيته:
"طالعي حواليك ممكن تشوفيني بعد مو بس تعرفيني "
اعطيت الحساب بلوك بعد ما كتبت "حسبي الله وكفى"
منجد حسبي الله تعبت من بدت المضايقات ذي تصير لي واوضاعي تغيرت وماما تغيرت لما علمتها الصدق قهرتني ماما وش دخلني انا بس دايم تقول ما يتجرأ احد يكلمك الا شاف عليك شي استغفرت ربي وقريت اذكاري ونمت

<<اللهم صلِ وسلم على سيدنا محمد>>

رد: متقلبين الود

(٤)


دينا

صحيت الساعه ثمانيه صباح يارب اغفر لي فاتتني صلاه الفجر قمت توضيت بسرعه وصليت واتصلت على ملاك بتطمن على رنود اتصلت وردت بسرعه كعادتها
دينا: صباح الخير كيفكم
ملاك بهمس: بالنور عادي بخير
دينا: اجلس اسحب منك الكلام رنود كيفها
ملاك:ذا الشي الغريب قامت عادي ما كأن فيها شي بس قالت امي سألت عني قلت ايه اتصلت كم مره وانتي نايمه واحسها فرحت ياويلي من ربي
دينا: ليش يا ويلك من ربك !
ملاك: لأن امها ما فكرت تتصل ولا تسأل عنها وحتى هي كانت متوقعه ذا الشيء استغربت لما قلت لها اتصلت
دينا: ملاك انا جايتكم بقول لماما بروح الصيدليه وبمر عليكم
ملاك: اي بالله ممكن تقدرين تفتحين معها الموضوع
قفلت من ملاك ورحت لبست واخذت عبايتي وشنطتي ورحت لماما لقيتها تسقي زرعها اللي بالحوش
دينا : صباح الخييير ماما .... ماما صباحوو ......الشمس حاره غريبه طالعه بهالوقت
يووه ماما وش فيها مو حولي ابد صحت بصوت اعلى : ماااااماااااا ايه اخيراً انتبهت لي اعطتني نظره من فوق لتحت وكملت شغلها وقالت : وش بغيتي وعلى وين العزم ان شاء الله
دينا: بروح الصيدليه
ثريا: مالك مو فيه والسياره معه
دينا : ماما طالعي فيه شوفي يدي كيف جافه وشعري يبي بلسم عادي بطلب اوبر تكفين بسرعه اعطيني ساعه تلقيني عندك
ثريا: طيب حصني نفسك
ما صدقت ماما تسمح لي طيران على باب الشارع غريبه وش عندها ماما بالعاده اقنع فيها نص ساعه عشان توافق بالذات اني بروح مع سواق اوبر بس يالله ما اتعب نفسي بالتفكير بأشياء مالها داعي اهم شي اروح لملاك اللحين





ملاك

كنت عند الباب عشان اول ما توصل دينا افتح لها لان الشمس حاره ومشوارها طويل سمعت صوت سياره فتحت الباب وشفتها تمشي حبه حبه كأنها دايخه اول ما دخلت الحوش
ملاك: اسم الله عليك فيك شي ليه تمشين كذا
دينا: الشمس صرعت راسي اهخخ تراني ما اشوفك اللحين خل ندخل بسرعه
وسبقتني للبيت وهي تمشي يارب تقول ما تشوف اخاف تضرب راسها بالجدار بس الحمدلله وصلت بسلام
ملاك: البيت كله نايم يعني ابسط صوت بينسمع خلينا نطلع فوق
دينا: اصلا ما جيت الا عشان اطلع فوق
ونحنا طالعين مع الدرج طلع في وجهنا قيس وشكله ما عرف اللي معي يحسبها وحده من خواتي لانه وقف قدامنا وسد علينا الطريق بيده
قيس :هاه كيف الطريقه تهريب ولا بستأذان
ملاك بأحراج: قيس وعمى ما تشوف البنت متغطيه بعد عن الطريق
قيس : ليه متغطيه بعدين انزلوا قدامي حطوا فطور وافطروا معي
دينا: ملاك خلاص انزلي مع اخوك وانا اطلع لرنود ادل الطريق
اهخخ يحليله قيس انصدم شال العمامه وحطها على كتفه الثاني دليل انه انحرج
قيس : يهلا حياك ملاك الحقيني
ونزل بسرعه كأن فيه احد يطرد وراه



قيس
يوم سمعت صوتها احسب يتهيأ لي امس موصلها بيتهم وش جابها اليوم مع الصبح بس خلني استفرد بملاك واسألها فيه شي غريب وصاحبتها الثانيه ليه نايمه عندها دخلت ملاك وقفلت بابا المطبخ وراها
ملاك: هاه وش تبي سيد قيس عندي ضيوف ينتظروني
قيس: وهالضيوف صاروا من اهل البيت ما شاء الله وش جابها ذي الصبح امس موصلها بيتهم ما جات ثمان ساعات من افترقتم
ملاك: يا حبيبي عرفتها صح عليك هي نفسها اللي وصلتها بيتهم وهي نفسها اللي كسرت رقبتك وهي نفسها اللي جبت شنطتها وانا اشوفك تتميلح وتسولف على بالك صدقت كذبتك انك تحسبها ساره ولا شهد اصلا البنات ما يجون الا وعيالهم وراهم منت بهين يا قيسوه تعالوا افطروا معي اييه وانا اللي الايام العاديه ما تطالع بوجهي على كذا كل يوم بنادي اخت دينا عشان تصير الاخ اللطيف اللي يقول لاخته ابي.....
قيس : بس سدي حلقك لاحد يسمعك سوت قصه وصدقتها اللحين بسألك وش عندها جاييه والثانيه ليش نايمه هنا مو حلوه بحقها البيت فيه انا وابوي
ملاك: رنود تعبانه ونامت هنا ودوني جات تطمن عليها وبتمشي اي خدمه ثانيه او معلومه تبيها
قيس : لا طسي
طلعت ملاك وهي تغني مصدقه نفسها انها قفطت شي يارب رحمتك اخاف تقول للبنت الكلام السخيف اللي قبل شوي بس لا لا ملاك صح انها رجه بس توزن كلمتها




دينا
دخلت الغرفه لقيت رنود عند اله القهوه سلمت وردت علي السلام بصوت خفيف بعدها جات ملاك تسألني اذ قالت شي اشرت عليها لا وجلسنا قد عشر دقايق كل وحده تنتظر الثانيه تتكلم لين تعبت من الحاله ذي قلت خل ابدأ
دينا: رنود كيف تحسين
رندا: بخير الحمدلله بس راسي مصدع يارب القهوه تشوف شغلها معه
دينا: فيك شي يعورك تعبانه نروح مستشفى ؟
هزت رنود راسها بأستغراب لا
دينا: اجل وش فيك احسك مو على بعضك فضفضي عيني الكلام ما بيطلع من هنا صح ملاك
ملاك: اكيد صح
رندا بأبتسامه استهزاء ذا اللي فهمته منها : مافيه شي سري لهالدرجه كل مافي السالفه اني امس شفت ابوي جاي البيت سكران وجلس يكلمني على اساس اني خويته وتضايقت استغربتم لا اصلا كل العالم تدري عنه وتعرفون وقت الدوره ادور سبب ابكي عليه
ياويلي انا تخيلت الموقف واقشعر جسمي طالعت بملاك لقيتها تاكل باضافرها اعرفها اذ توترت
دينا : اشوفك تتكلمين عن الموضوع كأنه عادي يعني مو متضايقه انتي
رندا: واذ تضايقت خير يا طير بيتغير ابوي ويصير مطوع بريده لا وعلى فكره اخت ملاك تقولين امي كم مره اتصلت تسأل عني ؟
ملاك بأرتباك اعطتني نظره وقالت : ثلاث مدري اربع مو متأكده
رندا وهي تسند راسها على مقعد الكرسي اللي هي عليه وتطالع فوق : ماش وكذابه شفت سجل الاتصالات عندي وعندك مالقيت اي اتصال منها تحسبيني استغربت طبعاً لا اصلا بغت تجيني جلطه من الصدمه يوم قلتي سألت عنك المهم كثر الله خيرك بروح البيت احس نفسي اتروش بمويه دافيه جسمي مكسر وين عبايتي
دينا : تعالي معي انا بطلب اوبر يرجعني بس قبلها بنمر الصيدليه بشتري كم غرض عشان ما اطلع كذابه قدام الماما




رندا

طلعت مع دوني اخيراً انتظرنا ساعه عشان توصل السياره ركبنا وراسي زاد صداعه من الشمس مو متعوده على مشاويير الصباح جلست اجامل دينا واضحك على تعليقاتها ما خلت ادمي ما علقت عليه وتنكت وتحكي قصص عارفه ليش هي تسوي كذا تبي تغير المود تبعي وصار اللي تبيه
ملاك ودينا اكثر ثنتين احمد ربي عليهم جالسه اتخيل حياتي لو ما كانوا موجودين يالله حتى التخيل صعب يارب تحفظهم وتوفقهم شفت السواق وقف عند بيت دينا نزلت وودعتني وبعدها مشت السياره مشتاقه لغرفتي ابي انام فيها جسمي مكسرر من الانهيار اللي صار امس واللي سببه وقت عذري الشرعي اصير حساسه بزياده وبعد قهرني اكثر اني خليت البنات يقلقون علي ما انسى شكل ملاك يوم قمت كانت تمشي بالغرفه وواضح تفكر اقدر اتخيل وين راحت بأفكارها دخلت البيت ومثل عادته كان هدوء مريت من عند الصاله لقيت امي تتابع التلفزيون يوم شافتني سألتني : انتي تو جيتي وانا مستغربه ما جيتي تدورين فطور كعادتك كنك بزر ابو خمس سنوات ما يعرف يسوي لنفسه شي
رندا: امي صباح الخير صباح الخير راسي مصدع وبنام حتى غداء ما ابي انبسطي
ام رندا : ايه امس كلمتني وحده تقول رندا تعبت وبتنام عندنا قلت خلها على راحتها انا اعطي بنتي حريه شخصيه
رندا: ياحظي فيك الله يحفظك لي
ام رندا :علامك انتي مع الصداع
رندا قلت وانا اللعب بحواجبي : مدمنه وتأخرت على جرعتي تبين اعمل حسابك
ام رندا: لا ابوك ما يقصر يالله روحي نامي عشان الصداع يروح
رندا : رايحه ولا تنسين تقولين لرجالك يسدد الكهرباء بيفصلونها اذ ما سددها
طلعت غرفتي وتروشت بمويه دافيه وجهزت مكاني شغلت قرآن ورحت بنومه هاديه وحلوه




دينا

لقيت سياره مالك واقفه عند البيت استانست اشتقت له الغبي بالذات بعد قصه امس والافكار اللي جات ببالي ابشع التخيلات تخيلتها دخلت البيت لقيت اخواني حمني وسلطه ياكلون ولابسين كأنهم بيطلعون مكان فاجأني صوت من وراي : يالله حيها من وين جايه ووين رايحه تهيتين
دينا: شوفه عينك كيس الصيدليه بيدي انا ما اطلع الا للأشياء المهمه ما اروح اقنص مع عيال عمي من زود الفضاوه يعني
مالك يكلم الصغار ويتجاهلني : يالله خلصوا بسرعه اذ طولتوا بمشي واخليكم
دينا: وين بتوديهم مع الشمس ذي
مالك: معزومين على غداء
دينا: عند مين وانا معزومه ولا لا
مالك: عند جدتك وايه معزومه بس مدري وش راكب راسك وماتبين تروحين
انصدمت مو ماما تقول ما راح يروحون اجل ليش وافقت التفسير الوحيد ان مالك ما قال لها وبياخذهم بدون اذنها
دينا: ماما قالت لا ماتبيهم يروحون اما انت بكيفك مع اني انصحك كنسل بس
مالك: ماتبين تروحين خلاص خليك على جنب انا واخواني بنصل رحمنا وش دخلك
انفعلت مالك اسلوبه اسلوب تحدي : لا يا عين جدتك توك تعرف صلة الرحم بس وش علي فيك انا طس لو تبي تبات عندهم تبي تقنص تبي تطير ماعلي فيك اخواني ما يطلعون من هنا
طلعت ماما من المطبخ وببرود: اذ كنتي كبيره البيت حلي واربطي على كيفك انا الكبيره وذول عيالي وانا اللي اقرر وين يروحون ووين يجون
لا انا انهبلت بتجيني جلطه: ماما انا وش قلت لك يوم رحت ذاك اليوم والله محد قال كيفك انتي بخير جالسين يشتمونك انتي وخاله سمر وخوالي قدامي وما قالوا عيب علينا نجيب سيره اهلها قدامها اسمع صوتهم يرقصون ويضحكون وانا لوحدي محد كلف على نفسه يجلس معي تبين اخواني يروحون عشان ينهانون ولا وش تبين بالضبط
ماما ببساطه: ابي عيالي يواصلون اهلهم
دينا: اي اهل متى نعرفهم نحنا اصلا لعلمك تراهم يتعاملون معنا على اساس عيال ثريا وبنت ثريا حتى ما يكلفون ينطقون اسامينا ما كأنا عيال ولدهم مو متقبلينا ولا يبونا وانتي تقولين اهل
ماما : اجل تبين الناس تقول بكره ثريا تمنع عيالها عن عمانهم؟
دينا: لا ابي يقولون بنت ثريا منعت اخوانها عن عمانها لانها تشوفهم مو من مقامها ولا تبي اخوانها يلطخون نفسهم ولا ينتمون لهم
مالك: بنت استحي ذول اهل ابوك
دينا : اهل ابوي مو اهلي فهمت وابوي على عيني وراسي
ماما: ابكي وتكلمي لين بكره ما احد درا عنك ووجهت كلامها لمالك :
مالك يا حبيبي اخذ اخوانك وانتبه لا تسرع يالله حمد سلطان روحوا مع مالك وهاه خلوكم رياجيل عشان دايم ياخذكم معه
طالعت فيهم يوم طلعوا من عندي ورجعت اطالع بماما اللي تشرب قهوتها ولا كأني موجوده مو مستوعبه اللي يصير وش فيها وش غير رايها لا انا اذ جلست هنا بغلط عليها اتصلت على خالي راشد ما رد سجلت له رساله صوتيه اقول فيها تعال اخذني بجي ازوركم
ومتى ما قام بيجي ليت بيت خوالي قريب كان رحت على رجلي لهم طلعت فوق ارتب شنطه لي
بجلس يومين عند خوالي وببعد عن البيت واخليه لهم

<<اللهم كن لنا عون وسند يالله>>

رد: متقلبين الود

(٥)
ملاك

قفلت من دينا ياقلبي عليها واضح شايله وبقوه على عمانها اكيد مو متعوده هي دايم عن عند خوالها الكل بالكل وعند ابوها لانها البنت الوحيده له فتخيل من وحده تعودت انها تكون محط اهتمام الجميع تروح مكان محد يعبرها ولا كأنها موجوده الغريب جدتها عجوز النار طلقت امها من ابوها وزوجت ابوها وجايه بترجع العلاقه بعد ايش ياحجه اهخخ اتمنى اشوفها فالخاطر كلام كثيرر بقوله لها
قيس : تشوفين مين
يوهه شكلي فكرت بصوت عالي ذا طبعي اذ انسجمت مع نفسي لساني يتكلم
ملاك : وحده مضايقه شخص عزيز علي
قيس وهو رافع حاجب : ومن هالشخص
ياربي منه قيس عله مرات ما كأنه يشوفك ومرات يتدخل بأبسط شي
ملاك: صديقتي
قيس: صديقتك مين
ملاك: دينا
قيس :ومن اللي مضايقها
ملاك : جدتها
قيس: وانتي وش دخلك خلصتي من المناقر مع حريم اخوانك طلعتي للي برا
يووه قهرني ىش قصده انا اللي اسبب مشاكل صار الواحد اذ دافع عن نفسه مشكلجي
ملاك: ماطلعت لاحد ولا احد جاني بس هي متضايقه دوني ومو بس من جدتها حتى عماتها يكرهيي لهم ذاك اليوم شفتهم بزواج صديقه شهد وش جابهم مدري بس شكلهم عرفوا دوني لانها كانت معي ويعطونها نظرات عاد دوني ما عرفتهم ما الومها كل اللوان الطيف حطوها بوجييهم عجايز ابليس ولا انا عرفتهم بس سألت امي عنهم حتى يتهامسون ويأشرون عليها ما قلت لدوني عشان ما تخرب ثقتها ورزتها ويستانسون عليها لانهم ميتين من الغيره وفاتتك عاد قلت لدينا قومي ارقصي مع سمر خالتك لانهم يكرهونها وجلست انا وخواتي نعزز لهم وربي افكار جهنميه علي
قيس بضحكه : افكار جهنميه عشان قلتي قومي ارقصي اقري على نفسك بس لا تجيك عين
يووه واضح يتمسخر بس خلاص انا اذ بديت اتكلم مابي اسكت بطلع كل اللي بخاطري
ملاك تكمل: وعاد اقولك عزمتها جدتها ذاك اليوم هي واخوانها ودينا ما كانت تبي تروح ولا اخوانها الصغار يروحون بس امهم اجبرتهم وهي مقهوره من امها
قيس: انا اعرف ماجد ابوها وعمانها ذاك اليوم متعشين مع بعض عند نياق ابوي والله انهم عرب اجاويد وفيهم الخير
ملاك : عمانها مو عماتها تدري قيسوه كلهم يتشابهون عماتها وحريم عمانها كأنهم ذيك الممثله
قيس يخلص فنجال الشاهي حقه ويقوم وهو يعدل ثوبه ويضحك: الله يقطع سوالفك المهم احفظي طريقه العجه ذي عشان اذ قلت سويها مره ثانيه ما تخبصينها وطلع من عندي وهو يصفر انا مدري لمتى بيجلس عاله على ابوي عنده شهادة تو تخرج قبل ثلاث شهور ويقول باخذ راحه سنه بعدين افكر اتوظف وكل يوم رايح للنياق يخوفي بس يعتمد عليها ويسحب على الوظيفه والله يا النياق ما توكل عيش





ثريا

جالسه اطالع التلفزيون اللي يشوفني يقول مهتمه باللي فيه بس بسوي نفسي ما دريت عنها اشوفها مجهزه شنطتها ولابسه العبايه بتطلع مكان بدون ما تقول لي ما كلفت على نفسها تستأذن بس من شفت شنطتها عرفت بتروح تبات عند اهلي وذا المطلوب ابغاها تبعد عن البيت ابغاها تعتمد على نفسها واخوانها ارسلتهم لعمانهم عشان يتعودون على بعض قبل يصير الشيء اللي ببالي لان اذ صار بينجبرون كلهم يعيشون عند بيت جدهم حتى دينا غصب عنها بتروح ماحد بيآخذ رايها بس بنتي واعرفها لو شكيت نص شك انها بتنهان وتنكسر ما سويت اللي سويته دينا تغيرت من بعد طلاقي من ابوها صارت شخصيتها اقوى واللي يغلط عليها او على اخوانها تسكته وتوقفه عند حده حتى لو كان ذا الشخص اكبر منها وذا اللي مريحني قمت بسوي نفسي اقفل باب الحوش بشوف وش تسوي لقيتها مغمضه عيونها وتسوي تمارين التنفس سبحان الخالق اختي سمر نفسها والله نفسها ونفس الحركات تشابه اختي اكثر مني




دينا

جالسه في الحوش بعد الظهريه ومو حاسه بالشمس ليش لان الغضب والنار اللي بداخلي اكثر انا ابي اعرف ماما ليش وافقت وليش كانت تغطي عني موافقتها وليش تعطي الناس فرصه يفرحون علي اللحين اكيد اهل بابا وصلهم الخبر يوم رفضت انا واخواني نجي وش رده فعلهم بالله يوم يشوفونهم اهه الله يسامحك يا ماما سمعت صوت سياره ماغيره راشد جاي طلعت لقيته نازل ويعدل نظارته الشمسيه
راشد: الله الله الشنطه اكبر منك والنفسيه زفت علامك يقول شغاله منحاشه من كفيلها
دينا : ماني في حال ملاغتك استعجل الشمس صرعتني
راشد: لحظه بدخل اسلم على اختي فضيحه جاي لين بيتها ولا اسلم دقايق بس
ركبت السياره يعع قرف ما اوسخ من مالك الا هو وش ذا عندهم مشكله مع النظافه ذول طالعت ورا لحظه هاذا ايش يووه حتى قدر الضغط موجود بالسياره الله يستر ما تنعدم شنطتي من الغبار شفت راشد طالع من البيت وجاء ركب جنبي
راشد: يالله وش عندها الشيخه عشان تطلعني من دوامي عشان اوصلها تكلمي كلي اذان صاغيه
دينا: مالك دخل
راشد: الله الاعصاب فلفل كل ذا عشان اخوانك راحوا يزورون اهلهم ما تستاهل
دينا وهي تضغط على سنونها: انا بكيفي اشوفه يستاهل ولا لا ولا تقول اهلهم لا ما يصير لك خير
راشد: ابشري بس انتي روقي



رندا
قمت بعد اذان العصر احسني جوعانه طلعت من غرفتي رحت المطبخ كالعاده مافيه طبخ جاهز بس الحمدلله فيه خبز رحت الثلاجه اخذت خيار وزبادي واكلت اللحين برجع غرفتي قبل امي تنتبه لي ليش مدري بس بشوف اذ طولت ما اكلت بتجي تجيب لي اكل ولا لا اول ما طلعت لقيته جالسه يتفرج عالتلفزيون قناة اخبار ياحبيبي غريبه وش جلسه بالبيت اليوم
قال لي بدون ما يطالع فيه: امك راحت تجيب مقاضي ماهي بهنا
يمهه كيف عرفني والله ينخاف منه
رندا: ما سألت عنها
ورجعت لغرفتي بس وقفني صوته
ابو رندا: تعالي وين هاجه اجلسي هنيا افركي راسي
رندا: بذاكر انا
ابو رندا: تذاكرين ايش المدارس فكوها ؟
رندا: لا اذاكر للتحصيلي تعرف يعني ايش ذا اختبار اذ نجحت فيه ادخل الجامعه
ابو رندا: تعالي تعالي افركي راسي بري ابوك عشان ربي يوفقك عاق الوالدين ماينجح بدروسه
هزيت راسي باستنكار اذ يبي شي من مصلحته يا حبيبي يطلع ولا احسن شيخ جيت جلست عنده
رندا: خمس دقايق بس وبروح مو بفاضيه
ابو رندا: ماعينتي لي وحده مثل هاذي تخطبينها الي
طالعت بالتلفزيون لقيت مذيعه الاخبار انا اشوفها عاديه والله امي احلى منها بس وش اسوي عينه زايغه




دينا
صحيت على صوت راشد يقومني يا الله شكلي غفيت جو السياره والمكيف جاب لي النوم نزلت وقلت لراشد يجيب الشنطه دخلت بيت خوالي من زمان لي اسبوعين عنهم رحت الصاله لقيتها فاضيه طلعت فوق لقيت خالتي سمر تمشط شعرها ومعطيتني ظهرها مشيت حبه حبه وحطيت يدي على عيونها
سمر: دينا زفت شيلي يدك لا تخرب الظفيره
يالهووي الساحره ذي كيف عرفتني
شلت يدي عنها وسألتها : جنيه انتي كيف عرفتيني
سمر وهي تظفر شعرها كذا خصله تسوي ذيك التسريحه الافريقيه: ريحه عطرك يا ذكيه
دينا: على سيره عطري شريت جديد قبل كم يوم وضاع حتى قبل شوي تعطرت بالعلبه القديمه وفاضيه
سمر وهي تنهي اخر خصله : تعالي سلمي وجع بعدين ما تستحين تجين فجأه كذا افرضي ارتعت وطاح ورعي
دينا: كان زين ابعرف كم لك حامل احسك مطوله من قبل تسع شهور حملتي
سمر وهي تضربني: سدي حلقك قبل تسع شهور ماكنت متزوجه لاحد يسمعك ويشكون بأخلاقي الفاضله انا توني بالسابع
دينا: ايه جدتي وين
سمر: مدري تلقينها عند وحده من جاراتها اليوم جيت افطر معها وتركتني راحت تفطر مع جارات الفلس ماتقر ببيتها
دينا: تراب امك ذي
سمر: شوفوا من يعلمني بس
دينا : دريتي عن اختك ووش سوت
سمر : توني ماخلصت كلمتي اختي هي امك لو تقول روحي يا دينا وسلمي على راس حريم عمك كلهم تروحين وانتي ساكته وبعدين لاتكبرينها انا حاسه انهم بس عزموا عشان تروحين لهم ويجلسون يمدحون مرت ابوك على اساس توصلين الكلام لأمك قديمه هالحركات
دينا: يعني نيتهم شينه ليش تعطيهم فرصه لييش اعلمها واقول مايحترمونك لا انتي ولا اهلك بس من يفهم
سمر وهي رافعه حاجب: اوفر اوفر مو طبيعي كيف تكبرين السوالف
دينا بضحكه: ماقلتي هالكلام لنفسك يوم عمتي قالت عنك عانس وبايره اشوفك لو تدلين طريق بيتها نتفتيها
سمر تضحك: ايه اذكر اذكر الله لايعيدها من ذكريات المهم ما عليك تعالي اوريك وش شريت لل بيبي



ملاك
اكره يوم الجمعه عشان حريم العيال يجونا حسبي الله عليهم كرهوني حتى باليوم الفضيل مديت يدي لترمس القهوه وصبيت لي يعع الله يديم النعمه ذي مويه لونها اصفر مو قهوه ما يحتاج افكر من مسويها ذي اكيد جنان السوريه بس ما الومها انا اللي هي قهوتنا ما اعرف اسويها تركت الفنجال وصبيت لي من وحده ثانيه ايوه ذي كنها تنبلع سمعت صوت ساميه مرت اخوي سالم الكبير: علامك تصبصبين بالفناجيل وتتركينها ترا كلها واحد
ملاك: اذ جيت صبصبت بفنجالك تعالي انصحي
ساميه: بس عيب المره جالسه وتشوفك عايفه قهوتها ما تعرفين الذرابه انتي
ملاك: لا ما اعرفها خلصتيها علي وبعدين جنان ترا قهوتك ما اعجبتني عندك اعتراض
جنان بصدمه: عادي زؤقك ماحكيت شي تشربي اللي بدك اياه ما خصني
ملاك: ايه ذا الكلام السنع علمي محامي الدفاع ما عاد يتدخل باللي ما يخصه
يحليها جنان احسن حريم اخواني من ناحيه اللسان الحلو بس مشكلتها تجي عندي تقول انها تحبني وتكره سلفاتها بكره اروح الاقيها زايرتهم وجايبه لهم هدايا يعني بأختصار ام وجهين بس وش علي في وجييها انا علي بالوجه اللي تقابلني فيه
سمعت شهد اختي تسأل رحمه عن اهلها كيفهم عاد رحمه اوقح انسانه من حريم اخواني تصير بنت عم ساميه بس رحمه وقحه وتستقعد لي
رحمه: والله كلهم بخير بس ماخذين على خاطرهم
شهد : عادي النصيب ماله داعي يشيلون بخاطرهم شي
"هين قصدها انا يوم رفضت اتزوج اخوها اللي مطلق مرتين وشخصيته ضعيفه امعه خواته يمشونه على كيفهم"
ملاك: الا رحمه ما زوجتوا اخوك ولا للآن تدورون له
يويليليي خواتي يعطوني نظرات الحمدلله امي مو فيه ولا كان علمت ابوي
رحمه: لا لسا ندور له بس امي تقول انها تعرف بنت بنوت عمرها ١٨ حلوه حلوه يقولون تطرح الطير من السماء
ملاك بسخريه: حشى بندقيه ماهي ادميه
رحمه تطنشني وتكمل: وتقول امي ان امها اللي قالت لي لو تجون تخطبون من عندنا ما رديناكم ولو تشوفينها ذربه وهاديه وخجوله ولسانها مو طويل
ملاك : ياعزي عنها عمرها ١٨ وكل ذي المواصفات وتاخذ اخوك اللي رجل بالدنيا ورجل بالقبر ومطلق وعياله صاروا طوله اكيد مغشوشه
رحمه : لا بس يقولون نحنا نشتري الرجال ولو على ثلاث نزوجه
ملاك: ايه الله يوفقهم
ساميه: كل تأخيره فيها خيره الحمدلله ما استعجلتوا وزوجتوه اللي بالي بالك الله يستر على المسلمين
"شوف الحقيره بنت الحقير تقصدني هين يا ساميوه"
ملاك: ليش كم خطبتوا له وحده ورفضوا شكل ما بقى بيت بالسعوديه الا دقيتوه وانرديتوا
رحمه: اقول ملاك انتي ليه رافصه الزواج قال لي ابو بسام عن اللي رفضتيه قبل اخوي
ملاك: والله مالك دخل كيفي ارفض اللي ابيه
جنان: صح عليك ملاك بدري على لجواز بس تخلصي جامعتك وتاخدي شهادتك يصير وقت تفكري فيه
رحمه: اي اعذار بنات هالأيام بكمل دراستي وهي الله العالم وش عندها
ملاك: عندي اللي عندي مالك دخل ابلعي قهوتك والسم اللي جايبته معك وانتي ساكته ويا بخت من زار وخفف ترانا نعسانين صح بنات وطالعت بخواتي لقيتهم يتوعدون فيني اكيد خايفين من العيال يعصبون عليهم
ساميه : يحليلك يا ملاك تمونين بس اصبري متى ما قال اخوك سالم مشينا مشيت
رحمه: ملاك وش اسم صاحبتك ذيك
ملاك: اي وحده ياكثرهم صاحباتي
رحمه :اللي عمتي تقول انها باتت عندك امس
انقهرت من امي ليش تسولف معهم عني وعن خصوصياتي
ملاك: رحمه كم مره قلت لك مالك دخل اتركي الأسئله وعلمينا عن البنات اللي يغارون منك
هخخ رحمه من عرفتها وفلانه تغار مني وفلانه تتمنى جمالي وفلانه حطت وسوت واضح فهمتني اتمسخر عليها
رحمه: خلك من اللي يغارون مني جعل ربي يعطيهم من ما عطاني بس ذكريني وش اسم بنت السكران ابيه بحاجه
انصدمتت تقصد رنود الكلبه بنت ست وستين كلب
ملاك: مالك دخل بعدين كيف عرفتيه لايكون يجي يشتري من عند ابوك ترا ابوك مو بعيد عنه كلنا عيال جماعه وحده ونعرف عن بعض اللي يخليك تمشين وراسك بالارض فسدي حلقك لا اسده بطريقتي يا مرت اخوي
سمعت شهقه من ساميه بس طنشت وعطيتها نظره حقت فكري تتدخلين
جنان: شو لنا بالماضي ملاك نحنا ولاد اليوم اييه شهد ما تغيري الموضوع لأني طقيت بدي سولف ومو معطيني فرصه
رحمه بصوت عالي: خلي السوالف بعدين يا ام اسيل تعالي يا ست ملاك كل ذا عشان قلت بنت السكران وبعدين كل العالم تدري ان ملاك اخت زوجي ما لقت تصاحب الا بنت المطلقه وبنت السكران وش فيها بتنكرين؟ اسلوبك ذا وانتي تحاولين تغطين دليل انك غارقه بوحلهم
ساميه: ملاك سمعتك من سمعة بناتي حافظي عليها
لا والله اللي بيجننوني نثرت القهوه بوجهه ساميه وكنت بروح اتفاهم مع رحمه الزفت بيدي بس ساره وشهد سحبوني و طلعوني غصباً عني من الغرفه وقفلوا الباب كأنهم عارفين اني بسوي مصيبه بس والله يارحمه اني ما نسيتها لك والله لاذوقك الحزن والقهر سكت لك كثير بس اللحين عشان الاتهامات علي وعلى البنات ما بتمر بالساهل يا بنت ابوك اصبري علي



ساره
طلعت ملاك ورجعت عشان اوصل كم كلمه لحريم اخواني لو ملاك تغلط عليهم الكلام اللي قالوه كبيير ويبي احد كبير يسكتهم دخلت الغرفه وقفلت الباب وراي زين عشان لا تجي ملاك لانها معصبه وبقوه اذ جات بتروح ارواح طالعت فيهم لقيت رحمه تقول لساميه اوقفي قدام المكيف يؤؤ نسيت ساميه المحروقه بس اصلا حرق بسيط بس حمار بالجلد كم ساعه ويروح
ساره: رحمه كلمتين بس بقولها لك اذ تبين تحافظين على علاقتنا اسمعيها اللي يجلس على بساطنا يجلس بأحترامه ويحترم اهل البيت اللي جاي عندهم ملاك اختي ولا احد له دخل من تصاحب ومن تترك سامعه اخت ساميه سمعه بناتك حافظي عليها انتي ولا بيجيك خلاف واللي مره ثانيه بتجلس بدون احترام تكلم في ذا وتسمع علوم ذا والله لاخلي امي توصل الخبر حق عيالها وتعرفون تأثير امي انتم ما تحتاجون تذكير
وطلعت لقيت ملاك ماسكه خدم رحمه وساميه تهزييء ياربي المريضه ذي بتفضحني رحت لها
ساره: والخدم وش دخلهم بكامل قواك العقليه اختي
ملاك: وش دخلك وش دخلك فهمتيها
ساره: اذ ما فهمتها كيف بتفهميني
ملاك : احسن لك لا تسألين لان الطريقه ما رح تعجبك
وطلعت غرفتها يووه والله معصبه منجد



دينا
قمت من النوم الساعه ثمانيه صباح احس تطمنت على اخواني بعد كلام سماره امس قالت ان وضعهم غير وضعي رح يجلسون مع مالك وابوي وما بيختلطون بالعالم اخذت جوالي لقيت رساله من حساب ما اعرفه مسحتها بدون ما اقراها نزلت للمطبخ لقيت توست محمص مع جبنه مالحه وشاهي عالطاوله ياحبي لها سمر كانت تقول اذان الفجر بيآخذها زوجها ولان تعرفني ما اكل طبخ الخدم جهزت الفطور لي على بالها انا للآن ما اعرف اسوي شي اكلت وطلعت الحوش وانا ماسكه كوب الشاهي اليوم الجو بارد شوي يونس قربنا من اكتوبر بس في نفس الوقت المدرسه بتبدا قريب
وانا اتمشى لقيت راشد وجدتي جالسين عند النخل رحت لهم
راشد: هلا هلا حياك اقلطي
دينا: الله يبقيك بس مالي نفس
جدتي: تعالي افطري قال مالي نفس الفطور فيه الصحه كلها
دينا: يا جده الله يصلحك احد يفطر عريكه شوفي السمن والعسل ذي لو اكلتها ارتفع علي الكولسترول من اول لقمه
راشد: كذبك بس تقلدين حقين تويتر ذاك اليوم شايفك تحطين عسل مع الجبنه
عرفت ان راشد بيستفزي يبيني اناقشه وقلت عشان اخرب عليه
دينا: صح عليك اقلد حقين تويتر
جدتي: عينتي جارت امك اللي هاك اليوم يقولون حملت ببكرها بعد سبع سنين
دينا: امي زارتها
جدتي : زين وجدتك شحالها
ياربيي جده لو تعرف ان اللي ينقال لها جدتي الثانيه ما تحبها ولا تطيقها لاهي ولا عيالها وش كان سوت
دينا: بخير بخير
ويوم انشغلت جده عشان تقنع راشد يتزوج السالفه المعتاده دخلت البيت اخذ جوالي بكلم مالك يخليني اسمع صوت الصغار وحشووني اتصلت وكعادته ما يكون مالك اذ ما لطعني لين يرد
بعد الاتصال الخامس: يالله حيها الشيخه بنت ماجد
قلت لازم اسوي نفسي زعلانه : هلا كيفك
مالك: من الله بخير
دينا: اذ حمني وسلطه عندك اعطني اياهم بكلمهم
مالك: لا ماهم عندي انا طالع في راس الضلع ادور ناقه ابوي
دينا: طيب انتبه على نفسك بكلم ماما تعطيني اياهم
مالك: ماهم عند امي حطيتهم عند جدتي انبسطت فيهم وقالت خلهم يباتون عندي وقلت لامي قالت عادي تعالي اخذ شنطتهم وجدتي ماكودت قالت خلهم اسبوع عندي
جلطه اقصد جتني جلطه وش اللي يباتون لا لا ماما فيها شي صغار يباتون في بيت غريب بدون احد مننا كيف مستأمنتهم عجزت استوعب
دينا: مالك تنقلع تاخذهم مثل ما وديتهم وتجيبهم البيت معك نص ساعه ولا والله مايصير لك خير
مالك: اذ كلمتني امي وقالت لي ذا الكلام ابشري غير كذا ماني مسوي شي وقفل الجوال بوجهي
يدي ترجف رحت اتصلت على ماما ردت علي بسرعه شكلها على الجوال
دينا: لو سمحتي ماما اللحين تتصلين على مالك تخلينه يرجعهم وش اسبوعه وش مستوعبه انتي عيالك بيغيبون عن نظرك اسبوع مو على اساس بس غداء وتنتهي القصه وش بلاهم طولوها
ماما:وعليكم السلام
دينا: ماني فحال سلامات تكفيين اتصلي عليه
ماما ببرود: جدتهم مشتاقه لهم توها مابعد استانست
دينا بأنفعال: تستانس ايش لعبه هم لعبه صاروا دمى مو اودام والله العظيم هي ساعه ما يرجعون فيها لا ارجعهم انا بطريقتي والله لافضحكم وتشوفون
ماما: تستفزعين بمن يابنت بطني
دبنا: ساعه بس ما يرجعون اعلمك استفزع بمين


<استغفر الله العظيم واتوب اليه>





انتهى

رد: متقلبين الود

هاه بنات اكمل ولا

رد: متقلبين الود

متابعين بشغف

اكملي الله يسعدك متشوقين لبقية الرواية

رد: متقلبين الود

ابشري

رد: متقلبين الود

(٦)

ملاك
قريت رساله دينا مره مرتين ثلاث عجزت استوعب وش تطلب مني بس كأني فهمت طلعت من غرفتي ادور قيس وين ذلف ذا ما يهجد بالبيت يجي عشان ينام وبعدها مدري وين يروح دقيت باب غرفته وكان موجود الحمدلله دخلت لقيته جالس يسوي خيوط الجزمه حقته شكله بيروح النادي او مدري وين جيت سلمت وجلست يا الله ليش ماني قادره اتكلم ممكن عشاني متوقعه الرفض بس دقيقه كيف الناس يبدون الكلام ماني عارفه بس هو كلمني بدون ما يطالع فيه
قيس: اعرفك اذ كان بفمك هرج ومو هرج الا طلب ايوه وش تبين
ياحليله سهل الموضوع الله يفتحها بوجهه
ملاك: امس سولفت مع دينا شوي وعلمتها انك تعرف عمانها وكذا يعني
قيس وهو يرفع نظره لي: وطيب؟
ملاك: عاد هي اشتاقت لأخوانها وبتروح تشوفهم واخوها مالك مو بالديره كلها متلقي البر
قيس: وطيب
عاد هي قالت بما أن اخوك يعرف مكان بيتهم ابيه يوصلني لان هي ما تعرف اللوكيشن
قيس: صعبهه ملاك عادي اعلمها المكان بس تخيل شكلي رايح لعمانها والبنت معي انسي انسي
ياربي كيف اقنعه الله يسامحك يا دوني على هالورطه
ملاك: قيسوه حبيبي انت بتوصلها وتمشي ما راح يدرون انه انت بس ساعدها البنت ندمت تقول انها بتسلم على جدتها وابوها مستلم بالدوام واخوها مو موجود تكفى الفزعه
قيس: بتخاوينا
ملاك بصدمه : وش دخلني انا
قيس: ذا اللي عندي تبين اوصلها تروحين معي انتي بعد اذان المغرب يعني معكم ساعتين غير كذا احلمي
ملاك: وش نسوي خلاص طيب بس خلني اكلمها اشوف هي وين اللحين





قيس

الله من الورطه كله بسبب موافقتي الاوليه يوم وصلتها اخذوها حلا ولا انا الغلطان يوم قلت اعرف بيت عمانها وصلت عند بيتها وطلعت بسرعه شكلها جد مشتاقه لاخوانها حتى ما ردت السلام
دينا: الحمدلله توقعت بتأخر تخيلي راشد جاء جابني هنا واخذ ماما لخوالي
ملاك : ايه كنت شايله هم تتأخرين المهم يالله خل نخلص هالمشوار بسرعه
دينا: يحبون بناخيهم هاه ذابحهم الحب ان ما طلعت الحب ذا من عيونهم ما اكون انا دينا
وش تقول المهبوله ذي يوم تكلم كأنها رايحه حرب مو رايحه تزور جدتها
ملاك: دندن جهزتي كلام تقولينه رتبتي مصطلحات عشان تبانين كذا مثقفه
دينا: لا ما احب افكر وش اقول احسن شي يجي كل شي ارتجالي
وبعدها سكتت تدور حاجه بشنطتها بعدين صدمتني يوم سألتني
دينا: بتمسك الخط الرايح يمين صح
قيس:صح
دينا: هي وقف هنا بشتري لي بلاك كوفي الصداع عيا لا يروح
الله يا قيس صاير ملطشه الغلط علي انا ونوقف ليه ما نوقف يوم رحت عند المحل اللي تقصده عند طلبات السياره سألتهم
قيس: يالله وش تبون استعجلوا علي
دينا : ابي بلاك كوفي ملاكي تبين شي
ملاك: على ذوقك قيس جيبلي
دينا: اسمع بطاقتي في الشنطه ومالي حيل ادورها باشر علينا
قيس بأستغراب: طيب مثل ما تبين
دينا: يحليلك ملاك والله اخوك اجودي
استغربت البنت وش فيها المره اللي فااتت صوتها يا دوب اسمعه واللحين ماخلت قصه ما تكلمت فيها جتني رساله من ملاك وانا انتظر الطلب
: ادري مستغرب بس هاذي هي اذ توترت تحاول تنسى توترها بالسوالف وكذا
قفلت الجوال واخذت الطلب واعطيتهم اياه ومشيت وانا افكر وش موترها ذي الله يستر لا يجيني شي من وراها بالذات يوم جلست تغني حسيت حالتها مستعصيه




رندا

الحمدلله اليوم خلصت اخر ماده ان شاءالله الترم ذا بركز على المشاركه يارب اخذها كامله اخذت جوالي استغربت مالقيت رسايل ومكالمات من البنات ارسلت بالقروب لي مختفين جات لي ملاك خاص تقول :مو مختفيه جالسه ارقع ورا المهبوله بتفضحني على اخر عمري والله يا قيس اذ زودتها ليخليني اقطع علاقتي معها توقعي مصيبه في الساعات القادمه
فهمت الهبوله تقصد دوني بس استغربت وش جاب دينا لقيس بس خلني انتظر شوي الخبر اللحين بفلوس بعد ساعه بيبقا ببلاش طلعت من غرفتي البيت فاضي امي وين مختفيه الفتره ذي رحت سويت لي بيض وكم حاجه جاهزه واكلت ورجعت نمت لاني مقدر انتظر بنام واذ خلصوا مصيبتهم بيتصلون علي




دينا

يماماي بطني يوجعني كأني في اول يوم مدرسه انا وش كنت ابي نسيت بس خلاص دامني وصلت ابي اوردها مواريد الأبطال يارب ساعدني وقف قيس السياره عند حوش كبيير فيه كذا عماره ياربي نسيت كل شي سمعت قيس يقول يالله انزلي
دينا: معليش سؤال بس جدتي وينها اللحين
قيس بصدمه: وش دراني عن جدتك انزلي بس لاحد يشوفني
دينا: حشى عايش جو المافيا اسألك بيت جدي اي واحد نسيت والله
قيس بطوله بال:ذاك اللي بثلاث ادوار اللي بالوسط
دينا : يلا شكراً فيري ماتش انتبهوا على نفسكم واستودعتكم الله
رحت امشي على طريق بيت جدي بس لفت نظري قدام شوي اصوات كم خطوه الا الاقي مجلس كذا كأنه استراحه فيه رياجيل كثير قربت شوي احس رجولي تضرب ببعض من التوتر بس ماني مضحكتهم علي خل امثل الثقه يالهوووي جدي موجود جدي الوحيد اللي احيان القاه عند بابا واسلم عليه اخر مره شفته قبل شهر بس لحظه وش اللي اسمعه واحد قاعد يقول لاخوي سلطه الرجال ما يبكي ليه تبكي يارخمه ما تحملت دخلت عليهم وكل الانظار التفت لي ناديت سلطه وجاء حضني وهم مصدومين سلمت عليه ثم قمت بتفاهم مع اللي كان يكلمه
دينا: هي انتت يا اخ وش الرجال ما يبكي وش رخمه طفل عمره اربع سنوات تنقال له هالكلمات
واحد جالس يسوي سلك المكيف: ما تشوفينا كلنا رجال استحي وارجعي من مكان ما جيتي
دينا: ما في وجهي حيا انا
جدي: وش فيك انتي ثايره جنونك ما تشوفين عيال عمك ماهم مالين عينك
دينا وانا اتأمل العيال الكثير اللي متجمعين: لا لا مالين عيني وعين اهلي انت شايف عددهم
واحد شكله اذ ما خاب ظني عمي الكبير: اهبي اذكري الله لا تنظلينا ابوي ذي من
جدي: بنت ماجد ما تخبرها
دينا: صح جدو نسيت اسألك كيفك وش علومك
جدي : من الله بخير ادخلي عند البنات بيجونا اغراب
دينا: ماني داخله مستعجله بس وين حمني نادوه لي
يويلي شفت نظرات الاستغراب قلت عشان اوضح لهم: حمد حمد اخوي وينه لايكون واحد من بناخيك ماسكه ويعلمه المرجله سببتوا لاخواني عقده
عمي : بنت ماجد جايه مع من انتي
دينا: اشياء شخصيه لاحد يسألني عنها بس يا عم ارسل احد يجيب لي مويه بارده بالله بسرعه
واحد اعطيه عمر١٥: الثلاجه وراك
رحت الثلاجه وفتحتها اخذت مويه جيت برفع النقاب اشرب وتذكرت شي
دينا: اللي يتغطى عني يلف بشرب مويه
يماما وش ذي الصرخه لفيت لقيت واحد مدري وش وضعه : على اساس تعرفين الحيا يا بنت ثريا جدي لاتقول بنت ماجد عمي ما بيعجبه
دينا بدون اهتمام: بنت ثريا اطلق منك ومن اللي خلفوك روح بس دور حمد اخوي بسرعه صار لكم ساعه لاطعيني
عمي: وش تبين بأخوانك خلهم يتونسون وانتي ادخلي استانسي
دينا: استانس وين ويستانسون وين لايكون جبتوا موسم الرياض في حارتكم بس
اللي يعدل سلك المكيف: خلاص مصخت يا بنت الناس عودي وراك واخوانك بنرسلهم لكم بعد العشاء
دينا: طل اخليهم ساعه زياده بتسببون لهم نفسيه
اللي كان يكلم سلطه اول ما دخلت: عزي عنكم يا عيال عمي ضيعتكم تربيه النسوان
دينا: تربيه النسوان اجل ياليتك لاقيلك وحده تربيك واضح مليان عقد نفسيه يالله لا تبتلينا
جدي: بنت ماجد عودي وراك ولا اقول اجلس استريحي وانت يا طلال انجز ناد عيال عمك اختهم تبيهم
دينا: ايه ياحبي لك ياجدي تعرف الذوق مابغيت تقلطني
واحد كان على جواله تو انتبه لي: ابوي هذيه من وكيف مره جالسه وسطنا
دينا: مو بعاجبك شوف ذا باب تطلع منه ولا ترجع لين تقوم المره من وسطكم واللي مو عاجبه يلحقه يالله
دقيقتين وسمعت صوت اعرفه زين اهلاً بالعيد هاذا صوت بابا دخل المجلس بلبس العسكريه الرسمي
بابا: سلام عليك ورحمه الله
دينا بتوتر: يالله حيه اقلط تفضل
بابا وكأني شفت ابتسامه: اثر العيال صادقين يوم يقولون ماخذه راحتها اجل تقلطيني
دينا: العيال وينهم وين لقيتهم
بابا وهو يشرب قهوه: هناك عند السياره تليموا علي يشكونك
غريبه بابا رايق ولا قال لي كلمه سمعته يكلمني
دينا: هلا ابوي
بابا: اقول ادخلي جدتك بتسلم عليك
عاد قلت بما اني جيت خل ادخل ازعزع الوضع اللي هناك بعد طلعت من المجلس لقيت العيال اللي قاموا من شوي متجمعين يتناقشون اكيد عن بنت العم اللي ما تستحي رحت لهم
دينا: مين الشطور اللي يعلمني وين عماتي وجدتي مجتمعات في اي بيت
كلهم يتصددون ولا احد يرد بس فيه واحد هاديي مره هاديي لفت انتباهيي من اول حتى يوم بديت اتكلم طلع على طول وهو يأشر للباقين اسمه تركي مدري ولد عمي مين قال لي: سيده البيت اللي قدامك
رحت لين عند البوابه اخذت نفس وبدخل المواجهه هنا تختلف بشيل النقاب ويشوفون تعابير وجهي ضحكت على افكاري ودخلت لقيت مدخل كبير قدامي واصوات ماقدرت اميزها شلت النقاب ونفشت شعري كم مره وحطيت زياده قلوس وعطر ويوم جيت امشي سمعت صوت وراي



رندا

قمت من النوم وشفت ملاك كاتبه لي انها ساعدت دوني تروح لعمانها وغير كذا ماتعرف بتنتظر ونشوف اخر التطورات طلعت الصاله يوم سمعت صوت قزاز يتكسر لقيت امي كانها جايه من برا وبيدها كيس صيدليه مستشفى والطاولات اللي بالصاله مكسره طالعت فيها بدون ما اقول شي من دموعها عرفت انه ابوي
امحق ابو انتظرت كم دقيقه يوم شفتها قامت رحت لها
دينا: سلامات وش فيه
فاطمه: ارتفع الضغط وعندي فيتمينات ناقصه ورحت اخذ الادويه اطلعي من الصاله بطلع عبايتي واجي اكنس

حسبي الله بس وش عنده غريبه بالعاده امي ما تقول له لا ونادر يعصب اللحين فيه شي معصبه بس ماتعبت نفسي بالتفكير لان مهما فكرت ما اقدر افهمه رحت المطبخ ادور اي فاكهه اسوي بها عصير لي ولامي لقيت برتقال وجزر ورحت طلعت العصاره وانا افكر احسن ما بـ ابوي صح يشرب ويدخن بس مايقصر علينا من ناحيه اغراض المطبخ صح ما يجيب كل اللي نحتاجه بس الاشياء الاساسيه مثل طحين لحم رز خضروات وفواكهه قهوه وشاهي
احمد ربي الف مره لان قريت قصص ان الاب يكون مدمن ومقصر من ناحيه البيت بعد ذول الناس حالتهم تحزن اكثر





دينا

شلت النقاب ونفشت شعري كم مره وحطيت زياده قلوس وعطر ويوم جيت امشي سمعت صوت وراي لفيت لقيتها عمتي يووه اذكرها ذي هي نفسها اللي ما تحب سماره
عمتي: هالزول ماهو بغريب علي خلني اتذكر لحظه سكتت شوي وبعدها شهقت :دينا بنت ماجد اخوي تفضلي تفضلي
يحليلها ما كأني سامعه جدي اول يقول بنت ماجد بتجيكم تستهبل على مين رحت للمجلس اللي آشرت عليه دخلت وش ذا الاشكال اللي فيه تذكرني بالممثلات اللي يجون بالمسلسلات الكويتيه قديم
كالعاده قاموا يسلمون علي بنات ماعرفتهم بس عماتي وزوجات اعمامي يعطوني نظرات جلست واقفه عند الباب سلمت على البنات برسميه وبعدها وجهت كلام للجده: هاه انبسطتي وشبعتي من اخواني ولا لا
جدتي: بيجلسون عندي شهر لاحقه انبسط معهم
ذي وش تقول كان اسبوع وش بيخيلهم شهر بس والله لتحلم
دينا: لالا الحقي انبسطي معهم لان عندك خمس دقايق ونمشي اذ عندهم اغراض جهزوها
وطلعت من الغرفه هنا الجو يوتر كل الناس سكتت تسمع كلامي والنظرات اللي تقيمني تخرشش طلعت الحوش لقيت اخواني يلعبون مع الصغار حقينهم حسيتهم مستانسين بس خلني اخذهم بوديهم احلى مكان يلعبون فيه مع عيال بعمرهم على راحتهم سمعت صوت وراي لفيت لقيتها شغاله ماسكه شنطه اعطتني اياها اخذتها رحت بودع عماتي عيب اجي لعندهم واروح كذا بس سمعت اصوات في الغرفه:
١: يا يمه فكينا فكينا منها ترا العالم يقولون مو بطيبه فيها نقص بعقلها خلها تاخذ اخوانها وتذلف لا تسوي لنا مصيبه
٢: انا حلفت ما يعتبون باب البيت وش فيها اذ بغيت عيال ولدي شهر عندي لين اشبع منهم
١:يا يمه العيال من جو وهم برا بالمجالس ما جلستي معهم انا مدري وش عندك بالكلام ذا بس ماظنتي شوق وبعدين تراها مشت
خلاص مو لازم اسمع كل شي طلعت اخذت اخواني ورحت لين عند المجلس ركبتهم السياره ورحت لبابا لقيته يسولف مع عيال اخوانه ناديته وقال خمس دقايق وبعدها جاء وصلنا لبيت خوالي مابي اروح بيتنا واتناقر مع مالك طاقتي انهدت بس كذا اقدر اقول نجحت المهمه





قيس

ثارت جنوني ابليس واعوانه كلهم يجرون بدمي يوم قالت لي ملاك عن اللي سوته اجل تلعب علي وتاكل بعقلي حلاوه وتقول بسلم على جدتي وهي رايحه تلاسن عيال عمها قلت لملاك تعطيني رقمها اليوم ورفضت كأني ناقصها رحت ودخلت الغرفه بدون ما اطق الباب حتى
قيس: اللحين تعطني رقمها اللحين ولا ما بيحصل لك خير
ملاك: مقدر وش شايفني اعطيك ارقام صاحباتي وش دخلك فيهم
قيس بطوله بال: اذ بغيتي سواق يوصلكم ما قلتي وش دخلك فيهم معك خمس دقايق القى الرقم جايني وما عليك بكلمها بشيء رسمي وماني قايل اخذت الرقم منك بدور اي تصريفه
طلعت من عند ملاك ورحت غرفتي جلست على السرير واسمع صوت رساله من ملاك اخيراً لقيتها مرسله لي رقم وتقول تكفى وثقت فيك لا تخيب ثقتي ذي وش شايفتني بسوي الحمدلله والشكر




دينا
ياربي من هالرقم مستمر يتصل صرت اخاف ارد ويكون نفسه صاحب الحسابات اللي ترسل ليتي بالبيت لان سمر بدت تشك ان فيه شي وخاله سعاد تعطي نظرات استغفرت وقمت برد اول ما رديت هدوء مافيه الا صوت المكيف قلت خل ابدأ
دينا:الو
قيس: سلام عليكم
يابطني الصوت مو غريب علي اعصر ذاكرتي بشوف مين ما قدرت
قيس: انتي دينا
دينا: ايوه بغيت شي
قيس: عندك احد
دينا: وش دخلك تبي شي هات اللي عندك
قيس: اسمعي كلمتين عالسريع الحركه اللي صارت اليوم مو حلوه بحقك كيف تكلمين عيال عمك وهم اغراب عنك انا عذرتك وقلت ماعندها احد يوجهها بس لو عرفت نيتك من البدايه ما طاوعتك ولا وصلتك وبعدين مالها لزمه القصه ذي كلها لو رحتي وناديتي جدك على جنب وفهمتيه وتفاهمتوا مو احسن من يوم تسمعين الغرب صوتك
اهلاً ذا اللي ناقصني شايله هم مالك وهو له حق يحاسبني ذا وش دخله
دينا: قلتها عيال عمك اقرب لي منك وبعدين انا اعرف الصح والغلط مابي احد يوجهني وانت لا تقعد تذلني على هالمشوار خلاص بعطيك حقه ولا تعطي نفسك مره ثانيه حق تحاسبني لان دورك بالقصه ذي كلها دريول
وقفلت الخط بوجهه



>‏سُبْحَان الله والحَمْدُلله ولاَإله إِلا الله وَالله أكبَر.<