رد: ديوان الشاعر عبدالمغني معيض العيلي

يا غاليً بعدك الغالين راحو سدا
اقبلت ثم جتني ايام السعد مقبله
افداك وانا اعرف دوني تحب الفدا
واللي ما يفدا حبيبه ويش ينحب له
الطايف اللي جمع بين الشفا والهدا
لارحت عنه اكره ارضه وسهله وجبله
قلبي غدا في غرامه صدق قلبي غدا
وش لون افهم قلوب اهل القلوب البله
النقص فيه بدا والشك فيه بدا
يعني جماله مهبل عقلي امهبله
ان كان حبه شرف وان كان حبه ردا
اهم شي اعشقه ورضيه وقبله
مشتاق لك يابعد عمري ولا لي جدا
مثل ما يشتاق راعي الابل لشوفة بله
صاحبك من حرة اللهفه وطول المدا
اقرب وقرب له امن الدله وصب له
يلين يفرح ويمرح ويهدا ويهدا
انت دوا جرحه وحلمه ومستقبله




الشاعر اللي كل ما دكت على صدره ضيوف
يذبح لها من خيرة الافكار فكره جيده
اغلا من اجمال البدو ومن النعيمي والخروف
امخصصه لاصحابي الغالين والمتسيده
مير الضيوف اتقدر اضروف الرجال اهل الضروف
والحال يشكي والامور امعقده ومقيده
حتى الضيافه من ثلاث ايام والسلم امعروف
وضيوف صدري من سنه متواجده ومعيده
يالله دخيلك من مقادير الليالي والصدوف
اللي تحد الرجل وتفور دمه وتبيده
وانا همومي حاصرتني بين امان وبين خوف
والكل منها عز قصره فالفؤاد وشيده


ينقضي ليل على ماش والعالم هجوع
ساهرً من حرك الشوق وفرك سبحتي
من على شان الغلا الفاتن الفذ الجزوع
واحد ً من بعد ربي بيده ذبحتي
اترقب جيته من سبوع اليا سبوع
ليته ايقدر شعوري ويدرا طيحتي
الله اللي ميزه بالحلايا والطبوع
ما تحرا سبتي ما تحرا مدحتي
عاد من بيني وبينه وعد يوم الربوع
يالله انك يالآهي تتمم فرحتي



اتصدا وتحدا وتحمل
والزمن ماهو بجاي على شفوفي
الرفيق اللي لاجاء الميقاف صمل
ما تكاثر. فيه طيبي ومعروفي
والله. اني ودي افزع وتجمل
مير بعض احيان تحداني ضروفي



حي والله وجهك اللي تجلا ونجلا
والوجه الابيض فداه الوجيه المعبسه
الوصل يحيي المعاليق ويزيل البلا
والجفا نشف دمي فالعروق ويبسه
من وفاي اهل دمعي ليا رحت الخلا
مير قدم اصحابي اكف دمعي وحبسه
والله اني صدق احبه من زود الغلا
احشمه وقدره ولبس اللي يلبسه


سمعت لي كلمه وكلمه ماتنقال
تعدت احدود الادب والميونه
لكن شمت وقمت عن بعض الاشكال
نمونةً ياخيبها من نمونه
مايجحد افعول الرياجيل رجال
من ينكر امجاد العرب ينكرونه
هذا مثل يكفيك عن كثر الامثال
ياليت بعض الناس يستوعبونه
من شان نسلم من هل القيل والقال
اللي الكفو بالذات يستنقصونه
والكفو اذا جات المواقف والافعال
والله يفعل فعل مايفعلونه


يا بنت ياللي تعشقيني عشاقه
امن الغلا والحب لا تحرميني
لا تحسبين الحب مثل الصداقه
اما خذيني حب ولا اتركيني
لان الصداقه صارت اسوء علاقه
بعد الصديق الاولي بار فيني
واليوم انا محتاج ولف ولباقه
خفي علي امن العتب وسعديني
والله ما عفت الربع والرفاقه
عفت الحياه وعفت قلبي وعيني
قلبي صدوق ولا يعرف الحماقه
وعيني تحب وحبها مبتليني

رد: ديوان الشاعر عبدالمغني معيض العيلي

انص الرجال الغانمين النشاما
اللي تقدر جيتك وتحشمها
خل البخيل اللي يدينه تواما
نفسه من اعلوم المراجل حرمها
عينه على الدنيا ومال اليتاما
ويعذرب اصحاب الكرم في كرمها
وانا من الايام ياما وياما
احرمت نفسي والزمن مارحمها
نار الفقر ماهي ببرد وسلاما
لاوالله الا ويل من يقتحمها



قلبي اللي كل ماحب له وحده وتاب
اعترض له وحده فالطريق وحبها
كل ماقفل باب ينفك لي عشرين باب
المحبه حاجةً ماقدرت اكبها
خص لاجت من عيونً لها وقع وصواب
ماتصيب الا القلوب وتفتت حبها
ياغناة الروح انا وين اروح امن العذاب
شوفتك عندي علاج الجروح وطبها
من يلوم القلب فالمغريه طيش الشباب
تشعل النيران جوف الحشا وتشبها
حبها خلاني اطب وقدم للصعاب
الامور اللي صعيبه على من طبها
دلةً من شرب منها نسى همه وطاب
والخساره والحسافه على اللي صبها
علموه انها ذهب من ذهب مال الذهاب
كيف يتركها كذيا عمد ويكبها




ياعاشق الدنيا تمعن وفكر
واعرف ترا دنياك رحله قصيره
فيها الغني لا كثر خيره تكبر
ولا يطالع فالنفوس الفقيره
تكثر محبينه والاصحاب تكثر
وتقل لامن قل ماله وخيره
الادمي مع لذة العمر ينغر
والمال والدينا في عينه كبيره
تدري متى منها المزاج ايتعكر
وتصير عنده ماتساوي شعيره
لامن دنا حاله وطاح وتعثر
في وقتها تصبح في عينه صغيره
دنيا تغر الجاهل اللي تبختر
وتمتعه ما بين سيره وسيره
والمدرك اللي يتعظ ويتعبر
ويشوفها مثل الرحااااا المستديرة
وليا لحقه اهموم وعلوم يصبر
لعل من بعض المعانات خيره




صاحبك من ليله البارح اصبح ماهجع
الغرام امسهره والحنين امطيحه
ايتذكر صورتك كل ما الورقا سجع
وماتشوف الا الحزن والدموع امسيحه
اشهد ان الحب ذباح والذكرى وجع
توجع الرجال وتنرفزه وتبيحه
والذي من مامضى مايحس وبنفجع
عالمً ماقول غير انها متريحه



يامتعب الدنيا دروس وتعجب
شفني من الدنيا مريض ومتوه
البارحه همي في قلبي تنصب
همً قديم وهم قد صار توه
غرتني البسمات والوجه الاشهب
لو ان قيل الرجل يعرف عدوه
لكن هذا الوقت صار ايتقلب
ماعاد تفرق بين خيره وسوه
والناس فيه امسيره بالتعصب
والشخص ماتعرف مزاجه وجوه
ماني مطول فالكلام ومحسب
جاني من الاصحاب نقص وجفوه
من واحدً لحقني الهرج والسب
وانا احسب انه من رجال المروه
بعد كشفتك يالرفيق المحردب
مافيك خيره ولا في دمك حموه
اليوم ان شرواك صرت اتجنب
من عقب ماكنت اتعنا عنوه
هذي الحقيقه والكلام المجرب
من ذاق مر الوقت يذكر حلوه



انت ياجذاب قلبي ياراقي يارفيع
مثلك وشرواك عجزان شعري ينصفه
الوكاد انه كما الروض الاخضر والربيع
لاستوى والريح قامت تهب وتعصفه
اعشقه وضيع بين العيون السود أضيع
وان بغيت اوصفه ماقدرت اوصفه
كل نظرة كنها الرمح والسيف الوريع
واحدً. تمن ضميره وواحد تقصفه
لا طرا طاريه وانا مع الخط السريع
والله اني خايف اصدم في بعض الارصفه



الفقر مارد راعي الوجوب اعن الوجوب
يوم بعض الأغنياء لا زكاه اولا عطا
يجمع الماده وتلعبه الدنيا اللعوب
يحسب انه معتلي مادرا انه فالوطا
دام ماله مع هل الطيب منهاج ودروب
اعتبر تصرفاته خطا واكبر خطا
لو يقول انه سنافي ووافي ومحبوب
والله انا نعرف البئر ونعرف الغطا


من زود حبك كل يوم اتصل بك
حب ووجوب ومعترف وتعمد
ونته يبن الاجواد يا قوى قلبك
مره تصرفني ومره تجمد
ماني بلا عبدك ولاني بكلبك
رفعني الله واشكره وتحمد
لكن انا يوم اعشقك وحتفل بك
على كتاب الله وسنة محمد

مع السلامه روح ماني براجيك
الله يسمح لك طريقك ومنحاك
عزالله اني كنت اصونك وداريك
في حسبة اخواني ولا يمكن اجفاك
واليوم لا حبك ولا احب طاريك
بالمختصر عيدت من بعد فرقاك


شذابت العرقوب ما تفعل ولا تطفي غضب
ماغير تسعى بالنفاق وبالحكاوي والعلوم
يا صاحبي ومقابل الابطال من شد الكرب
ونته تقفا بالهروج ومثلك ومثل الرخوم
ايردني عن ردعتك حلمي وعلمي والادب
ولا اقدر ابينك ولينك يالنذل الظلوم
ما دامك اتحب النميمه والظليمه والكذب
انبيع رفقة مثلك وشرواك لاول من يسوم
اقسم بربي كنت اعدك حد سيف ودرع جنب
اثرك تدور طيحتي جعلك تطيح ولا تقوم


على شانك نظمت القصايد والتعابير
ابيك اتحس في وتخفف من حزوني
عيونك ترقد الليل وعيوني مساهير
من اسباب الفراق السهر والف عيوني
ياوجه الخير جيتك ولا عينت لي خير
تراك احرمتني الصحه وضحكة سنوني


اهرج ونافق وبالغيبه تقفانا
مالومك امن الحسد والحقد والحرقا
وان عودت للتحدي لا تحدانا
حنا رقينا النوايف ونت ما ترقا
الله رفعنا عن امثالك وعلانا
ما فوقنا الا السحايب والسما الزرقا
ودك تعدي وتبطي ما تعدانا
الفرق هذا هو اللي سبب الفرقا



يا ليل وين النديم اللي يونسني
لا ضاق صدري وضاق الكون في عيني
الوضع مزري وبالخيبه يحسسني
يالله دخيلك من الدنيا تكافيني
ياصاحبي الوقت علمني ودرسني
وش لون افرق عدوي من مصافيني
امن اول ابغا الجليس اللي يجالسني
اعطيه سري وخاويه ويخاويني
واليوم ما عاد به شيً يحمسني
حتى الرفيق الكفو ما عاد يعنيني

رد: ديوان الشاعر عبدالمغني معيض العيلي

الله اللي كافل طول الدهر شربي وزادي
العروش اعروشه المتعالية والكون كونه
الحياه امكافحه ومسامحه والعمر غادي
والحضيض اللي طلب قربه من الخالق وعونه
هيض أشواقي حمامً من على الأغصان شادي
وانجرف شعري على عذبة غوانيه ولحونه
ثم قمت اطلق سبوقي وعتلي وعلن هدادي
وتخير في خيار الصيد من وصفه ولونه
اشهد ان الجو هادي مير انا ماني بهادي
لين اسوق الشعر وصخره وصوغه وصونه
اتفقد وتركد بين قربي وبتعادي
واتقنن وتفنن فالقصيد وفِي فنونه
ناقدً نفسي قبل لا يأصل الناس انتقادي
خل عنك اللي يقول النقد نوع امن المهونه
الخطا وارد وبعض احيان يصدر لا رادي
والرجل لا خطا الرجال الفاهمين يفهمونه
والخطأ ماهو بعيب العيب فالعيب التمادي
والصحيح يصح لو بعض الاودام ينكرونه
يامتابعة الرياضه يامشجعة النوادي
ابك انا ماشجع الا الجيش والشعب وحصونه
والمثل قد قال مادون الحلوق الا الايادي
المثل هذا جميع اهل المعرفه يعرفونه
والوطن من دونه ومن دون حكامه نفادي
حي من يحمي ثراه ونعنبو منهو يخونه
سارعي للمجد ورقي يابلادي يابلادي
والمعادي ياعناه وياعماه وياغبونه
كل شعب المملكة من حضر ولا من بوادي
الولا في كل وقت وكل حين ايجددونه
للدهاه اللي مافيهم لا ذليل ولا حيادي
هم حماة الجار واهل الكار والدار وركونه
اسرة الا سعود نسل العود والراي اتحادي
تنهج النهج السليم وغيرهم ماينهجونه
منهج امحمد شفيع الخلق في يوم التنادي
والكتاب اكتاب ربي بالصحيح ايطبقونه
والوطن ينعم ويصفر بالرخاء الاقتصادي
والمواطن فيه ماخابت مساعيه وضنونه
الرياده والرشاده والركاده والمبادي
والتلاحم والتراحم والتلايم والمعونه
كلها متوفره والحد له حد وحوادي
والله ان الشعب دونه والملك سلمان دونه
عاش سلمان العروبه عاش سلمان القيادي
عاش سلمان الزعيم اللي العرب يستفزعونه
يوم بن هادي لجابه قال تبشر يبن هادي
كان للحوثي جنون اجنودنا تظهر جنونه
ونتخا شعبه وجوه وفعلهم ماهو بعادي
الدخيل ايومنونه والخصيم ايجندلونه
بالفلاح وبالسلاح وبالرماح وبالهنادي
والصلابه والمهابه والمجابه والخشونة
والأمير امحمد اللي من على الأشهاد بادي
كنك اتشوف الفخر والعز في نظرة عيونه
واقفً وقف شجاع وصابر ً صبر المهادي
راعي الرؤيه وراعي المد والمجد وزبونه
كنه الزير المهلل لا تصدا للاعادي
وان عطا يخلي يدينه كنه الغيث ومزونه
والعدو لاعلن هجومه فالاذاعه والروادي
لا طرأ طاري محمد ياخذه خوف وسخونه

رد: ديوان الشاعر عبدالمغني معيض العيلي

سلام رديةً تنصا ديار الحبيب
اللي جفاني من الديره بليا خطا
غايب وهذي حقيقه كل غالي يغيب
اما خذاه القدر ولا خذاه البطا
ولا هذاك الذي ما فيه نفعه يهيب
في كل يومً مع الشارع يجر الخطا
الخايب العايب المخذول قطع النصيب
ما كنه الا على قلبي برجله يطا
جعله فدا النادر الحر الاصيل الاديب
اللي وداده وحبه في فوادي سطا


عذل العواذل ما يزعزع ثباتي
تبت نصايحهم وتبت يديهم
لو بعضهم وده يسوي سواتي
لكن عيون الزين ما تهتويهم
الفاتن اللي جددت ذكرياتي
فتنه تشد اهل الهواء وتغويهم
احبها اكثر حب من حب ذاتي
واحب اهلها حب واللي يليهم
هي مكسبي هي مطلبي هي غناتي
قلبي وعقلي لاعبه لعب فيهم
ادعي لها حتى ونا في صلاتي
ونسى الثنين اللي موصى عليهم


يا زين وضعي بعد فرقاك ماهو بزين
عمايلك والبنادم ينشد اعن اعمله
عطيتني حب وعطيتك غرام وحنين
وجتاحني الشوق والحض العديم اكمله
اليوم انا ما جداي الا الشكا والونين
البعد ما استحمله والصد ما استحمله
ماغير اكابر وصابر والعرب شايفين
اني عليل وغليل وحالتي مهمله
ذكر الحيا مثل ما قالو يشاف ويبين
وصاحبك شاف الحيا يمك وساق اجمله
ياوجد روحي على شوفك وجود السجين
اللي يبا العفو مير العفو ما يشمله


الضعف ما صيغه ولا هو بينصاغ
يا واحدً قوله ما يحمى فعوله
ان كان عندك قلب حساس ودماغ
حشم وقارك وعرف اللي تقوله
ما دمت لا جات المواقيف رواغ
النعم لا حولك ولا انته بحوله
رجال في نقل النمايم ولداغ
وتحسب انك من رجال الحموله
اذا الرجوله عندك اعقال وشماغ
ماهي رجوله نعنبوها رجوله



سبحتي العب بها والليل ساري
ما تفارقني ولا هي بتعصيني
والله انها من يميني لا يساري
والله انها من يساري لا يميني
ليت محبوبي كماها بختياري
اتلعب به على راحة يديني
كان ما هليت دمعي والعباري
وحترق قلبي وبان الحزن فيني
يا جميله كل شي الا انكساري
واجهيني بالصحيح وعامليني
انتي اكبر من خطايه واعتذاري
ونتي اغلا من نظر عيني وعيني




ماعاد في صدري لضيقي مساحه
ضاق الفضا والكون عرضه وطوله
ادور الراحه ما حصلت راحه
لو اتظاهر بالسعد ويش هو له
اهموم في صدري وضيق وجراحه
اليا انتهت جوله تصديت جوله
ما طببتها التمشيه والسياحه
ولا قصيدي يوم اعده وقوله
مدري متى صدري يشوف انشراحه
ورتاح والعقده تصير امحلوله
الواقع البين وقول الصراحه
اتخلي العاقل يدرهم ذلوله
اليا رفيقي قام يرفع سلاحه
على ولد عمه ويسرج خيوله
قل احترام وقل دين ووقاحه
تضيق بي الدنيا ليا شفت زوله
والبعد عن شرواه فرصه متاحه
لابوه لابو عالمً صفقوله
انا عدو المهزله والشفاحه
اقدر الطيب وقدر فعوله
رفيقي اللي فيه خير وسماحه
اشيل عن متنه ثقال الحموله
واللي خلي امن الضفر والرجاحه
يبغا الجفا جاهل ونفسه جهوله
لم الشمل جمع الشمل في صلاحه
والوقت يجري والمشاكل عجوله
لو كافح الدنيا بكامل كفاحه
مصيرها تحداه وتطق جوله
والطير لا من صار منهك جناحه
يطيح من دون السماء ورقبوله


يا لطيف الروح ما للروح عندك شي باقي
غير تطلقها وتعتقها من النار ولهبها
والله انها اتشتعل وتشب في داخل عماقي
والحشا والروح وانا كل ابونا من حطبها
يا حبيبي لا تفارق ونت فارق ونت راقي
ونت روحي يا طموحي فالحياه ومكتسبها
لك وعد مني وخذ وعدي وعهدي وتفاقي
اني اموزعك من قلبي ليا العين وهدبها
راضيً حكمك لو انه حكم صدام العراقي
مير فكر فالنهايه وعتبرها وحتسبها


الهاجس اللي تالي الليل وعده
بيني وبينه وعد ما ينتغير
يحتاج له براد شاهي وقعده
وتجيني ابيوت الشعر ما تحير
مثل السحاب ان زان برقه ورعده
ولا كما البستان طب وتخير
والشعر انا معروف قبله وبعده
اسير اللي فالزمن ما تسير
امع الوافي وافي ويبشر بسعده
ولا مع الملعون ملعون خير


احيان احس الشعر عقده مالها عندي حلول
واحيان افر الشعر في يدي فر المسبحه
خصً ليا جيت اوصف المتغطرس الظبي الجفول
اغوص بحر الشعر من حده لا حده وسبحه
وان جيت اعبره عنه فالابيات مدري ويش اقول
مير الوكاد انه حلو يا حض من هو صبحه
ياصاحبي مدري متى تقبل مثل ذاك القبول
صاحبك شوفك يسعده ويكسبه ويربحه
مشتاق لك ماعاد فيني صبر يازين الدلول
قلبي تحت رحمة يدك يا تعتقه يا تذبحه



يفوح صدري فوح ويفوح ويفوح
الظاهر انه فاح عشرين فوحه
عليك يا غالي يا حالي يا مملوح
يا جامعً بين الحلا والملوحه
انته طموحي كان لي شف وطموح
يوم ان كلاً يفتخر في طموحه
الك السموحه لو غدا قلبي اجروح
ولا خذيته مني الك السموحه
مير المهم اقبل علي ونعش الروح
لا روح روحة من غدت به جروحه




يا وقت ما بجهلك مادام فكري ذهين
واعرف سلوم القبايل واعرف اطبوعها
اقدر اهل الوفى واقدر الطيبين
لكن بعض الاوادم ويش موضوعها
يا صاحبي ما معك حجه وعذرً سمين
والقصه اللي مضت لي مختلف نوعها
وش لون اجاملك واضحك لك وقلبي حزين
والصدر ضايق وعيني هلا ادموعها
البارحه تهت ما بين العنا والونين
اضروف الاقدار مشتني على طوعها
تكاتفت بي الذيابه من يسار ويمين
ومسيت ما بين طامعها ومطموعها
اصيح وزهم ونادي والعرب غافلين
وتخيل ان الرجال اتغير بدروعها
ان جيت ابسري كذا مسراي ماهو بزين
وان نمت بصبح عشاء للدار وجموعها
ماغير اكابر وغمض عين ونظر بعين
حتى انجلا الليل والشمس اوشك اطلوعها
لولا الله ثم العقل واعي وقلبي فطين
كان افرستني ذياب الضلع من جوعها



ياناعم الاحساس يالغصن الرطيب
من يوم شفتك كثرت الاجراح بي
ازهم علي وجيك ي العسر الصعيب
اما جري ولا سعي ولا حبي
لكن تكفى لا تصد ولا تغيب
اعلم ترا هم المفارق راح بي
واليوم تجحدني وتقفي يالحبيب
عزالله ان برق الموادع لاح بي
ثلاث مرات ازهمك ولا تجيب
ياصاحبي ياصاحبي ياصاحبي


خلوني امشي فالدير واتخير
الصاحب اللي ما تغير صفاته
حتى ولو شهب الليالي تغير
ماغيرت طبعه وميزة حياته
وانا ليا ضقت وتعومست اسير
يم الرفيق اللي الوفى من سماته
اليا زهمت فالعسر ما تحير
يفداني ابحاله وماله وذاته
ابيض وجه وابيض نوايا وخير
قليل والله من يسوي سواته


يا صاحبي لن كان بالعمد تقسى
ترا القساوه ما تفيد القساوي
انا تراي اقسى من الضلع ورسا
لكن لي قلبً رهيف وهواوي
خصً ليا من هود الليل ومسى
اون ونات الغريب الشقاوي
وشلون ابنسى الحب وشلون ابنسى
وانا ضحيت لابسين الغطاوي

رد: ديوان الشاعر عبدالمغني معيض العيلي

ذعذعي يا ريح ولا استريحي وركدي
الجبل يبقى جبل ما تاثر فيه ريح
ليت بعض الناس يا ناس يفهم مقصدي
ويتريح من كثير العلوم ويستريح
لو يطيح اطويق ما طاح عزمي وجهدي
لو يطيح الجدي وسهيل نحمي مايطيح
ما يزعزعني كلام المنافق والردي
مثل ما قال المثل ما يصح الا الصحيح


الصوره اللي جنبتني عن الغير
ما زينتها المكيجه والفلاتر
اسرج حصاني لجلها وعكس السير
ما قول غير الله ليا الحين ساتر
يا قمة الابداع يا جمة البير
يا موترً مركبك غير المواتر
مشتاق لك والشوق فالقلب تعبير
ماهو بجرحً تكتشفه الدكاتر
ماعاد لي فالوضع دبره وتدبير
قصايد الفرقا تعبي دفاتر


نصيحتي لك يا خبيث التواصيف
انك تفارق هذي اخر نصيحه
حنا شريفين ورقينا المشاريف
ولا انت فايز فالعلوم القبيحه
وان جيت ابوصفك بالذات توصيف
غديت مثل الدلو كلاً يميحه
من جاك عبا راسك امن السواليف
والسر منك ادناة واحد يبيحه
تشرد وتبرد يالردي فالمواقيف
وتطرد ورا الريحه ليا اروحت ريحه
راح الزمان اللي عليه التحاسيف
عزاه يا اصحاب القلوب الصحيحه
ما باقي الا اهل المناقيد يا حيف
شريحةً تنعاف وردا شريحه
الخايبين العايبين الملاقيف
اطيبهم اللي ما يذكي الذبيحه
ما تسعد الناصي ولا تكرم الضيف
والوافيه في معتقدهم فضيحه
اعقولهم وقلوبهم ماعرف كيف
بس الوكاد انفوسهم مستريحه
ما فكرو وش لون رد المعاريف
الروس خليا والايادي شحيحه
ذولا حلال في روسهم ضربة السيف
يلين واحدهم يطيح ابمطيحه



الضيقه اللي ضيقت لي طريقي
الله يستر لا تثبت مع الوقت
اضيق حتى من سواليف شقيقي
واضيق من نفسي وتايه ولا فقت
هذي الحقيقه والكلام الحقيقي
حاولت اجامل وتحمل ولا طقت
ضايق وانا مدري وش اسباب ضيقي
ليت الحبيب ايحس بي كل ماضقت




صوتك في سماعة الجوال يجذبها
اليا سمعته يناسبني ويجذبني
ياشين الاصوات من بعدك ومكذبها
ما حركت في شي ولا تناسبني
انته لك حساب ومورك محسبها
حتى لو انك ما تحسبني ما تحسبني
يا قمة الذوق روحي لا تعذبها
تراك في غيبتك قاعد تعذبني
بالبعد والصد وعلومك مخربها
من بعد قفيت يالله لا تعاقبني
وهموم صدري تراك انته سبايبها
يلين خليت خلق الله تعاتبني
بلاش تشغل تفاكيرك وتتعبها
وبلاش تكثر معاذيرك وتتعبني
ان قلت دنياك يا مكثر عجايبها
اعذارك املفقه ماهي بتعجبني
وان قلت هذي مصيبه من مصايبها
بقلك انته مرض فالقلب صايبني


وينكم ياهل المروه وينكم ياهل الحمايا
كل منكم للعلوم اللي حصلت داري وحاضي
التهدد والتصدد والتعدد والخطايا
عالجوها بالتسامح والتصافح والتغاضي
والله ان بعض الشكاوي والبلاوي والقضايا
قاضيه متقاضيه من دون شيخ ودون قاضي
قال ولا قيل ولا اقول يابعض الدعايا
فاضيه والفاضيه ما جابها ياكود فاضي
اعرفو ان الطيب يبقى والردا ماله بقايا
وعرفو العمر قاضي وعرفو ان الوقت قاضي
يالله اجمع ربعنا جمعً على طيب النوايا
والتكاتف والتالف والتحالف والتراضي



روح الليل وسرا مالي ونيس الا هجوسي
كان ما صخرتها في ام الوصوف اكبر خساره
الغلا لو ينشرا بفلوس وش قيمة فلوسي
ونتي اغلا عندي امن المال وكنوز التجاره
الين امن اللين يا محبوبتي يا عيطموسي
وزين امن الزين وطهر من مفاهيم الطهاره
من لهيب الشوق ومن الضيقه ووحشة جلوسي
لا تلوموني لاسقت الرجل من حاره لا حاره


صدري من الصدمه تضايق ونهشم
والنفس لو ضاقت بعد مالومها
من بعد خاب الظن فيهم والعشم
الشله اللي ماعرفت اسلومها
ناسً مطافيق ومصافيق وغشم
فيها الرخامه والردا من يومها
ما تحشم الطيب ولا هي تنحشم
نقل النميمه من كبار اعلومها
النوعيه ذي ما تبي حبة خشم
تبي لها واحد يدق اخشومها


الحب منتوجه معانات وهموم
كل الهموم اللي تجيني من الحب
ياصاحبي منك اتعذب ومحروم
حتى وانا فالنوم منك اتعذب
نويت اطب احماك وصادم القوم
لو يذبحوني المهم اني اطب
فيه طب للمرضان ويطيب ويقوم
لكنه المشتاق ماله ولا طب




المهمله بدون نقاط


ولا همً سطا وسط الصدر حول عام
كل ما حاول أدله ماحصل ماحصل
طول الهم والوسواس والحال سام
والملل صدر صدر الصدر سوى محل
الحلو صد والمحصول هم واآلام
طار حلو الكرا والحلو حل ورحل
الحلو اسمه حلا محلول ماهو حرام
العسل حلو وهو احل وأحلا وأحل
الدلع والحلا والسلهمه والكلام
والعلو والسمو والهمهمه والعدل
كله الا على كله طهور ومرام
مالك الملح ملح وما لملحه ملل
مع رسول الكلام ارسل كلام وسلام
له ولدار وأهل الدار كل الأهل


انفلج جنح الظلام وبان درب الخير امامي
بعد ما وجهت للقبله وصليت الفريضه
كيف ما حقق مناي وكيف ما حقق حلامي
وانا كلي في رجاء عطفه ولطفه وتعويضه
الله اللي عزني سبحانه وعزز مقامي
عن هل الالحاد واهل الشرك وعداه البغيضه
اتهجد له توال الليل ونهض من منامي
والعوض من خالقي رحمه وجناتً عريضه
القدير المقتدر ذات الجلاله والتسامي
يا عسى نفسي برضوانه وغفرانه حضيضه
العريضه ترهب الرجال لا جت من محامي
كيف يا بنادم نهار العرض لا شفت العريضه



اربع وعشرين ساعه كملت بالتمام
ما ذاقت النوم عيني من معاناتها
وانا ادري ان الشقاوه سبت ام الزمام
من بعد غابت علي وطول اسكاتها
يمرني طيفها بالذات لا جيت انام
وذكر سواليفها وذكر حركاتها
يابنت ان كان باقي من غرامك غرام
انا دخيلك من الفرقا ولوعاتها
الله عطاكي اختيارين وعليك السلام
يقولها اللي حياته بالقهر ماتها
اما عطيني غلا ياغاليه وهتمام
ولا احرميني من الدنيا ولذاتها


اضروفنا من ميلة الوقت تشكي
ولغير ربي ما نعرف الشكاوي
وان جيت ابشكي للاوادم وبحكي
لي عزةً تجعلني اكبر غناوي
وانا رصيدي في حياتي وملكي
فعلً ينومسني وراسً حماوي
ولا خويً فالمواقيف يركي
اقهر به العدوان وطنخ وخاوي


جامعت الاوصاف والنفس الرفيعه
ماله عندي شبيه امن الغواني
التغنج والغلا فيها طبيعه
والتحلي والتجلي والتفاني
اشهد ان القلب في يديها وديعه
اخذته كني وهو ما عاد جاني
ثم تعاهدنا ما نبدا بالخديعه
لو جبل سنجار ينزل فالمحاني
والزمان دوار والفرحه سريعه
راحت ايام الفرح مثل الثواني
وبتدا وقت المفارق والقطيعه
وكل منا راح في دربه يعاني


يا ولد عمي سم لازمك سمه
وابشر بعزك وحتزم يبن عمي
والله لا طوح غترتي والمعمه
وشيل همك مثل ما شيل همي
ان كان ما وقف معك فالمهمه
عيبً على وجهي ولحمي ودمي



يا عين لدي له ليا مسه الباس
ونتي يا رجلي وين ما سار سيري
وانا ليا شفته محزن ومحتاس
اقبلت له كلي بشري وخيري
يا غلا من المرجان والدر والماس
يا هقوتي يا سلوتي يا عشيري
لك مني احبك من احساس الاحساس
ونته تعاهدني وتسكن ضميري
وان شفتني دورت غيرك من الناس
في وقتها دور من الناس غيري

رد: ديوان الشاعر عبدالمغني معيض العيلي

اعز الناس عندي في حياتي
ثلاث الكل منهم له معزه
ابوي العود والام وخواتي
هذا الحب الحقيقي والمنزه
واحب اخواني وربعي وذاتي
واحب المسلمين اللي في غزه


ياشاكي امن الزمان اصبر وخلك شجيع
دورات الايام تقوى من سنه لا سنه
ما دام ما طاعك الوقت الردي فانت طيع
ماعاد به شي في هذا الزمن تضمنه
غلق لزوم الوجوب وخل شانك رفيع
وزبن بعيد المدى والخبل لا تزبنه
واكب زمانك وحث السير واشتر وبيع
الزبده اكثر علاقات العرب وجهنه
قبلك تراني ترفعت وتركت الجميع
اقول ابمشي طريق العدل والميمنه
لكن دنياي وقفت لي على كل ريع
واليوم اجامل واقول الوضع يا محسنه
امشي مع اهل الوفى ومزح وصدري وسيع
وليا تماديت اكف الهرج وثمنه
لساني احشمه عن قول الكلام الشنيع
وقلبي تراه ابيض امن الثوب وطهر منه
ونته تخير هل الرفقه وخل الوضيع
لا تقترب منه يالطيب وبعد عنه
وليا تضايقت من دنياك ربك سميع
اطلبه قادر يبدل سيتك بحسنه
لا رضيت ربك ومن رباك فلا تضيع
ولا رضا الناس لايدرك ولا تتقنه
اللي بيرضي جميع الناس ما يستطيع
الا اذا المستحيله عودت ممكنه


ذوقي وتفكيري على ذوق ذوقها
وشلون ابهجرها وبهجر طروقها
الفاتن اللي يوم تقبل وتبتسم
ماكنها الا الشمس باول شروقها
ما ودي اكمل وبين وصوفها
اخاف بعض الناس تنشف حلوقها
بس الاكيد انها بالاوصاف زاهيه
والشعر وجزال الوصايف تفوقها
عزالله اني دونها اموت وحترق
مابين هم وغم النفس اسوقها
مزيونة مصيونة العرض والشرف
بين اربعه جدران والسقف فوقها
لكن ما دامت بالاخبار تنذكر
مازلت انا بد الرياجيل شوقها
واللي ابيه انها ما تنسى محبتي
وتحفظ حقوقي مثل ما حفظ حقوقها




يا مينتي وشلون ماني بخايف
والوضع مزري مير فالله عوضنا
ان كنت منته عايف القلب عايف
يا ليتنا مما نشوف اتعضنا
اللي بجاملنا مثل منت شايف
واللي مع الخط السريع اعترضنا
والبعد شتتنا وحنا ولايف
يلين صرنا تستحي من بعضنا



استوى جو اللقاء بين ساع وبين ساع
واستوت لي فرصةً ما هقيت اوصل لها
بعد حددنا الوعد والوصل والاجتماع
وعلمت بني غلاه الوحيد وخلها
وجهها ساطع ولامع وله نور وشعاع
والحلا والزين تقبل له ويقبل لها
المهم انها من الزين تشرا ما تباع
كامله متكامله مستحيل املها
كثر ماني خايف امن البعد والانقطاع
ودي اني كل لحظه تمر ارسلها
مير يحداني الزمن حد ويزيد الوجاع
ولتفت واقول يا ليتها يا علها
والله اني احبها حل لا حد النخاع
وهتويها بين جمع الملا وجلها
ذا شعوري نحوها والغلا والانطباع
قلها يا قلب ولا بدون اتقلها
بين ساعات التلاقي وساعات الوداع
ساعة ً وحده وتسوى حياتي كلها



يا راسي تحمل لو جفاك الزمان الشين
وقلت معاوينك وكثرت معاوينه
ترا كل هم يهون يا كود هم الدين
عسى الله يعين الوافي اللي كثر دينه
ماغير ايتصدد عقب ما كان طلق ايمين
حدته الليالي عن مواجه ديايينه
تواعد معاهم بالوفى ليلة الاثنين
على انه يسددهم ويرتاح من حينه
وجو في وعدهم وهو محتار بين امرين
مواجهتم شينه وتطنيشهم شينه
ولا يملك الا قولة الله يعين ايعين
ولا باقي الا بنزل الدمع من عينه
وانا لي ثلاث ايام كنها ثلاث اسنين
وحلو المنام ولذته ويني ووينه
احب الوفى ووفي مع اصحابي الوافين
لكن الضروف اتحول من بيني وبينه


اغليك وفاديك كلك يا ملاك
يابو الحلايا والوصوف النادره
الله ما روع زولك وما حلا شفاك
والوجه الابيض والقرون الحادره
الله عطاك الزين يا زين وعطاك
ما لا عطا اصحاب الوجيه الوادره
وانا اعشقك والعلم ماهو بيخفاك
نفسي على فرقاك ماهي قادره
ولا عليه من عداي ومن عداك
اهم شي اسمك يجي فالصادره


والله اني قاسيً والقلب لين
قلبي اللي ما تمسك في وصاتي
كل ما شفت الهنوف اللي تزين
ماعاد افرق في حياتي من مماتي
المهم اضمها والامر هين
هي ضياع فالحياه ومغرياتي
لي شهر ما ودي اهرج وتبين
مير انا ما عاد يلزمني سكاتي
كنت مستانس وبالخير امتعين
مثل ما قال المثل عايش حياتي
لين قالت بتطوع وتدين
ضاقت ارضي والسماء وربع جهاتي



الله ولا غيره اشكي له من الضيقه
اللي من البارحه عيت تفارقني
اخذ بي الهم تغريبه وتشريقه
نوبه يغربني ونوبه يشرقني
همً تجمع علي وصعب تفريقه
من وين ماروح ولا اسج يلحقني
حلق في قلبي وعلق في معاليقه
ماباقي الا يجيب الشيب في دقني
وان قلت هذي من الحب وطواريقه
يمكن كثير الاوادم مايصدقني


على طاري الذكرى وذاك الزمان الزين
وعلى طاري الاحباب والحب واسراره
بدعت اللحن والقاف والبيت والبيتين
وسطرت للمحبوب مكتوب وعباره
يا ريم الغلا يا غلا من اغلا من الغالين
فداك العقل وبليس والنفس الاماره
عليك اتشقق وحترق وصفق الكفين
وعليك اتصدا وصدم الغاره الغاره
غلط الحرام اني بدونك ذريف العين
مهو ضعف مير الحب ما تنقرب ناره
على القلب تصلاني يلين الدموع اتبين
وعزالله صدق من قال الايام دواره
ذكرت اتصالك يا حلو ليلة الاثنين
يوم انك تكلمني وانا ماسك الطاره

رد: ديوان الشاعر عبدالمغني معيض العيلي

آه يا مقشر ايامي ومقسا ضروفي
اجبرتني وحدتني على قولة آه
يا ضروف الزمن خفي عليه وروفي
ورحمي حالي اللي واصلً منتهاه
كل ما جيت ابين للنشاما وقوفي
قام يحداني الوقت الردي من رداه
والردي يحسب ابن معيض ماهو بيوفي
والعرب تعرف الوافي وتعرف وفاه
والله انه يهون العمر ويهون شوفي
بس ما هين نفسي للبخيل وعطاه
ليلة البارحه والهم في جوف جوفي
على مركاي اهوجس لين اذان الصلاه
وتوضا وصلي الفجر ورفع كفوفي
يالله الرزق منك والعفو والغناه





الله من حبً في قلبي تسلط
حبً قديم وتاليته التناهيت
على الوليف اللي عليه تعبط
وقفا وقفتني علوم الشماميت
والساعه اثنعشر وانا كنت بالضبط
في شارع الزينه ومتوجه البيت
ويدق جوالي وانا ماسك الخط
من حين شفت اسمه ورقمه تفاجيت
اخذني الوسواس والشيل والحط
شيً عجيب وشتت الفكر تشتيت
من قوة الصدمه تلكلك ولخبط
وانا ماغير اقول حييت حييت
كيفك عساك العافيه قال انا بسط
قلت اشرح الموضوع من كيت الى كيت
قال ابك قلبي في فراقك تورط
عهدي بنفسي عنك من يوم قفيت
رجعت عند البيت ضايق ومحبط
مدري غبا مدري جنون وعفاريت
ومن قوة التفكير والحل والربط
عرفت بأني معك قصرت وخطيت
محدً تدخل لك ولا احدً توسط
انا اللي من بالي زعلت وتراضيت
وان كان عندك شرط ف انته تشرط
وان كان تبغا حق فانا استحقيت
وانا بعد شفت اسمه ابشاسة الخط
اقسم بربي اني فرحت وتعافيت



الا يا هواجيسي تعالي وسجل لي
بيوتً لها في صفحة المجد منزلي
الا قربوني الكيف الاشقر وسبحتي
انا صدري امن البارح ايفوح ويغلي
على هالزمان اللي تكاثر مصايبه
وبه ناس تتراخا وبه ناس تعتلي
وانا نفسي من اضروف الاقدار ضايقه
وانا كنت اقول اني شمالي وما علي
يلين العنا والهم والغم الشقا
تولتني ولا غير رحمتك يا ولي
ياربي تهون الامر وتسهل الصعب
انا مبتلي ونته فرج كل مبتلي
اجامل بعض الاحيان وضحك مجامله
وانا قلبي من اصدوف الايام ممتلي
ومن قوة الوسواس والضيق والقلق
تضايقت من نفسي ومن ربعي وهلي
همومً تجيني لاقبل العصر والمسا
ولا تنجلي الا بعد ما الليل ينجلي
ثقيله علي اثقل من الحمل والجمل
مثل ثقل ضلع النير بالوصف والحلي


مبطئ عن الهاجوس واليوم يادوب
يادوب صغته بعد ما كنت حاير
يطري على بالي هجيني ومسحوب
وصد عنها وتعدا وخاير
يلين جاء طاري فراقك يا محبوب
كتبت لك مما تكن الضماير
سيطر علي العشق والعشق منكوب
ما يلتزم بسلومنا والسواير
لازم تكون اذهين وسلوبك اسلوب
وتراعي اضروف الزمن والدواير
عامين من فرقاك والقلب محجوب
والحب ماله طب والهم جاير
سلمت لك قلبي مسالم ومرغوب
لين اكتشفت انك مع الوقت باير
من عقبها صديت راضي ومغصوب
ما للخيانه بين الاحباب ساير
منته مثل منته مقدر ومحسوب
لكن طرا طاريك والدم فاير
وحبيت اوصل لك رساله ومكتوب
ان الخيانه من كبار الكباير



يا هاجسي لا ياخذك كثر السهر
خابرك بحرً تصتفق الامواج به
ولا مثل حرً على العليا شهر
في قفر خالي والرعي ماداج به
عزالله ان قلبي تقهقر ونقهر
هم وندم والوضع ماهو عاجبه
الزور ما يثمر ولا ينبت زهر
يا واحدً ما يفرح المحتاج به
وانا يقول الصدق وجهربه جهر
علمً صريح ولا يجي الاحراج به
الكفو لو وقته معرضه الظهر
تلقاه مستبشر ويضحك حاجبه
واللاش لو تصفي له ايام الدهر
ما سر من جاله ولا اكمل واجبه


يا روح روحً غير عن كل الارواح
يا عنق ضبيً جعل الاعناق تفداه
والله وتالله كل ما بارقً لاح
اني اتذكر طلته وتمناه
يا فوح قلبي فوحت البن لافاح
على سواليفه وشوفة محياه
يالله يا معطي العطايا يا فتاح
تفتح له ابواب السعاده بدنياه
من حيث ما وجه ومن حيث ما راح
انك تسهل له طريقه. وترعاه
حيث ان حبه بين الاضلاع ما باح
وسمه على بالي ولا يمكن انساه
يا من يوصله الرسايل والايضاح
ويقله اني واحدً من ضحاياه


العين تبغا النوم والقلب صاحي
اليا غفت ساعه صحت من ونينه
يا ون ونة من حكم بالقصاصي
بكره بسيف الحق متواعدينه
واهل القضا يبون فيه الخلاصي
والامر نفذ والعفو مبعدينه
وليا نصاهم من هل الخير ناصي
يقلون ماغير الوعد خابرينه
شاب السجين وراح بيض النواصي
ماهو كبر خيبه وهم وغبينه
ايس من الاجواد داني وقاصي
لكن ما خيب دعاء والدينه
يوم ان ربه راد والشر حاصي
جاه العفو ودخل عليه السكينه
هذا ملخص سيرتي واختصاصي
بعد الوفى قفا وقفت سنينه


الفاتن اللي بعدها الحال صدق اندمر
حسبي على شايب الرحمن وخوانها
الهم خيم علي وقرب ساقي شمر
صوت اتمنى مماتي عقب حرمانها
انا دفعت المهر والعود يامر امر
دمي ولحمي المهر والقلب مسكانها
انشهد انها في عيني مثل طلع الثمر
انا فدا الثمره الخضرا وبستانها
يا ناس ويش القمر خلوه يرعى القمر
هذي تهز النجوم بنظرة اعيانها
الشوق في خاطري يحرق سواة الجمر
الله من ليل سراني على شانها
الحب ماله دوا والبعد موتً حمر
لا هزك الشوق ونته منت بوزانها
انا تجرعت امر امر ودها وامر
غير الهموم الذي فالصدر مرحانها
عزالله ان الحزن بين الضلوع استمر
من بعد ضيعت هاتفها وعنوانها
ياقلب تدري متى برتاح طول العمر
اليا اقبلت ولتفت وقلت لي عانها



الحزن سادني والضيق والاقتئاب
والهموم احتوتني دون قوه وحول
ما في يدي سلاح ومامعايه زهاب
وما بجنبي عوين وما بفكري حلول
كلها اسباب حلمً في غلاف الكتاب
ما بزيله ويبقى لين عمري يزول
وتكالي على الواحد شديد العقاب
فاتح ابواب رزقه ماعليها قفول
يالله الرزق منك والصبر والثواب
والعفو والمغفره والرضا والقبول
البشر من تراب وتنتقل للتراب
ما يعقب الطلوع الا يجيك النزول


صحيح ان نفسي راودتها ضنونها
حوالي ثلاث ايام جنت جنونها
خذتني الطواري والوساويس والندم
سبايب حمامه هيضتني لحونها
من اليوم الاول تسجع الصوت واللحن
على شجرة خضرا تمايل غصونها
وتلت خفوقي من خفوقه وتلني
وطرت لي العذرا وضحكت سنونها
لو ان الوصل من بيننا مات ونقطع
وروحت في شاني وهي في شؤونها
لكن الوعد من بيننا والوعد عهد
نبا نلتقي ووعودنا ما نخونها
هي اللي تصون الود والحب والغلا
وانا والله اني يا رياجيل اصونها
لو ان البعد والوقت الاقشر يحدني
انا كيف ابنساها وبنسى عيونها
عيون ً ليا من ناضرتني وسلهمت
اشوف الحياه المترفه جوف نونها


روس الرياجيل احشمهم وقدرهم
ولا الوجيه الدنيه ما تقبلها
الطيبين ان نصوني ما تعذرهم
العزوه اللي تجملني وجملها
يا صاحبي عطني اسماهم بسطرهم
عن باقي الاسماء بحفظها وفضلها
وصحابي الخائبين الله لا يشكرهم
جيب القلم ومسح اسماهم من اولها
شطب عليهم من اصغرهم ليا اكبرهم
وان جتك شرهه فانا اللي با تحملها

رد: ديوان الشاعر عبدالمغني معيض العيلي

يبا يتعب ابنادم ورا لقمة القوت
ويقضي حياته بين شده وقامه
يطارد ورا الارزاق ويفوته الفوت
يجيه الاجل ولا تقوم القيامه
وانا صاحبي غيب ولا عاد له صوت
ولا له على وجه البسيطه علامه
الا يا رفيقي جاتك ابيوت ابيوت
وصديت عنا كبر مدري رخامه
وانا خابرك رجال منته بسربوت
ومنزلك بين اهل الوفى والزعامه
لكن اختفيت وغبت والعلم مثبوت
وجاء فيك شك امن الغياب وملامه


فقدت الوليف اللي ولف قلبي وخلاه
وهذي مقادير الزمان ومكاتيبه
على الوصل والعشره تعاهدت انا وياه
وحال البعد من دونه وطالت الغيبه
وجودي على قربه وجودي على لاماه
وجودي على ضمه ولمه وترحيبه
وجودي وجودي وجد من حدته دنياه
على واحدً ما يظهر القرش من جيبه


يالله بحضً يوصلني على القمه
بامر الذي خالق الانفس ورازقها
ودعته الامر كله خالق الامه
يوم المخاليق ترجي رزق خالقها
كم لي مع الوقت اصيب الدرب وخمه
ودوج في رحلة ً كثرت عوايقها
لي غاية ً غاليه بالحيل ومهمه
غاية كبيره تعانقني وعانقها
عزالله اني بذلت الجهد والهمه
لكن يا خاطري عييت احققها


يابنت انا مشتاق والشوق ذباح
الشوق ذابح والفراق المصيبه
الجرح ساد وزاد والهم ما زاح
ونتي الدواء ونتي لجرحي طبيبه
ليتك تعودين لي على خف وجناح
ما رضى بعد فرقاك ادور حبيبه
خلي الزعل نبا التسامح والاصلاح
يا بنت لك وحشه وهجرك غليبه
مالوم قلبي عقب ما روحت راح
اخذته مني طيب مدري غصيبه
الجادل اللي تبهر وتجمح اجماح
اوصافها بين العذارا عجيبه
اللي تعب من وقته وكافح اكفاح
لا ضمها ينسى الحياه الكئيبه
والشايب اللي عود وجراحه اجراح
لا شافها يقفز وهو عود شيبه
وابن معيض في ذمتي عنده طاح
لكن قولو جعلها من نصيبه




ان كان في نفسك تخاف الظليمه
اعرف مكانتها وثبت خطاها
قدام فيها ترتكب لك جريمه
وتحوس خلق الله وتلعن ثواها
اخذ الهدوء والنيه اللي سليمه
وعوج الحنايا طلع اللي وراها
وامش الدروب السمحه المستقيمة
وعرف وجوب اهل الوجوب ووفاها
ليتك تطبقها بصدق وعزيمه
يصير لك محبةً ما كماها
وان كان نفسك فالحكي والنميمه
عزالله انه طايحً مستواها
اتصير سلعه مالها ايات قيمه
الرابح اللي باعها ما شراها


فكرت قصيده لها عامين مرسومه
لكن عييت اسجلها وطلعها
كله على شلت شيخ ً تعرف اسلومه
اخاف ينقد علومي بعد يسمعها
كنيتها فالحشا والجوف مكتومه
في كل يوم اتهجاها وراجعها
يفز قلبي لها ويطير من نومه
والعين من حبها تذرف مدامعها
واليوم قدمتها جزله ومنظومه
والمسك والعود والريحان مطلعها
في حب عذرا شريفة عرض محشومه
اسلوم اهلها عوايدها طبايعها
لكن غطت على قلبي بديمومه
وصبحت خاتم ذهب ما بين اصابعها
واللي يلوم المحبين الله ايلومه
تلقاه ما حرب الفرقا ولواعها
هذي القصيده بريح الطيب مختومه
فكره وموضوع والتقدير تابعها
كنيتها فالحشا عامين مكتومه
واليوم ابي الشيخ يوحيها ويسمعها
ان كان راقت له وزانت لي اعلومه
كني ملكت الفضاء والارض وربعها
وان كان قال القصيده شبه معدومه
ابدفن ابياتها وبندفن معها



الرسايل من الغالين مثل العلاج
تشفي الخاطر المجروح وتطيبه
ونت ياراعي البسمه يا طلق الحجاج
والله اللي سواتك ماقدر اسيبه
الغلا والحلا والضحك والابتهاج
كلها فيه مابه شيً ايعيبه
واحد ً لابس امن الزين نجمه وتاج
مير خايف يغر القلب ويخيبه

رد: ديوان الشاعر عبدالمغني معيض العيلي

لا يا رفيقي خل عندك طيب ذات ووسع بال
وانا حزامك وسندك ونته حزامي وسندي
عزالله انه ما يعد امن الرجال الا الرجال
هذا المثل عند العرب قد قيل قبلي وبعدي
ولا الردي يبقى الردي لو كان تسقيه الزلال
ولا تفرشه الذهب يبقى ردي يبقى ردي
والصدمه اللي فالبدي ركز معي وضرب مثال
الحمدالله والشكر من بعد ما جت فالبدي
ونت الرفيق اللي بعد ربي عليك الاتكال
وانا على خبرك خوي الجنب وابشر بسعدي
واللي يطيب ويختلف من بين حال وبين حال
جعله فدانا ماهو اغلا من غدا جعله فدي
اقطع يدي لن كان حطيت سناد وراس مال
وان كان عديته رفيق ودرع جنب اقطع يدي
يا هيه انا فوق الجدي صيتي وفعلي لا يزال
ونته فعولك سود والخيبه وانا فوق الجدي


البارحه ونيت من قلبي وشعور
ونه تخلي نايم القلب يصحى
على وليفً صد له خمسة اشهور
دونه دروب الوصل ماهي بسمحى
صد وغدا وانا على البعد مجبور
وعروق قلبي عقب فرقاه جرحى
اهم شي ارضيه وسلم من الجور
لو يطلب امن الابل ثلاثين وضحى


جتني رساله مالها ايت عناوين
تحكي عن اضروف الزمان العنيفه
من واحدً يشكي من الفقر والدين
وامره وعمره ما تعدا النصيفه
ومن ميلة الدنيا ومن حضه الشين
ومن المواقف والليال العجيفه
سند علي وحطها بين قوسين
وتوجتها بالمستكه والقطيفه
نصيحة ً منها تقر الموازين
لا خفت اصحاب العقول الخفيفه
لو ان عمري ما وصل للثلاثين
مير المعرفه للرجال العريفه
وهبه من اللي كون الكون تكوين
والضعف من قسم النفوس الضعيفه
كم واحدً عمره تعدا الثمانين
ولا يفرق فالشداد ورديفه
مير اخذ مني العلم واستوعبه زين
لن كان لك عزمً ينوش الكليفه
علمك وحلمك يا طليق الحجاجين
ثم التمسك بالسلوم الشريفه
والوعد عهد وثمن الهرج تثمين
والصبر والحكمه وستر العفيفه
وان كان ما صليت ضمن المصلين
وش مكسبك من هالحياه القصيفه
دنياك هذي ما صفت للنبيين
ولا صفت لاهل الرتب والوظيفه
دنيا تغر التايهين المريحين
تزها لهم مير العواقب مخيفه
فيها البنادم يخبط ايسار ويمين
ماهي بتاتي له على كيف كيفه


يا ما خذاً قلبي وتفكيري وعقلي وش بعد
ما باقي الا تاخذ اعيوني وتاخذ شوفها
الراحه النفسيه وطيب المعيشه والسعد
اعيشها في شوفتك رغم الضروف وخوفها
خذني على راحة يدك وانا تراني مستعد
الف الارض الواسعه وطوفها وطوفها
جتك القصيده من خلال أحروفها حب ووعد
قصيدةً من دم شرياني كتبت أحروفها





يا قوم ياللي شفتم الغيره في
خفو علي امن الزعل والمشاريه
لو شفتموني وحدي اروح واجي
تروني ادله ضميري وسليه
لعلني انسى من ذبحني وانا حي
ويلي على شوفه وحوفه وماضيه
محبته فالقلب ما زيها زي
حبً ثبت وعروق جسمي تغذيه
لكن رحيله شين الوضع مزري
حالي نحل والراس كثرت طواريه
تطويني الذكرى على شوفته طي
وقتً جمعنا اغراب ماني بناسيه
سبحانه اللي صادف الحي بالحي
وصرنا على درب الغرام ومباديه
واليوم قفا لا رسايل ولا شي
ما يدري اني يا عرب ميتً فيه


السهر والشعر والفكر والليل الطويل
والهواء والريح والوحشه ونوح الحمام
كل منها ذكر القلب بالطرف الكحيل
لين سراني من البيت وحرمني المنام
يالله انك لا توقفني ابموقف ذليل
دلني للخير وبعدني ادروب الاثام
شاعرً فيني مشاعر وهذا اكبر دليل
جيت كلي من سمعت المحبه والغرام
الصبر والصبر يحتاج عزم وقوى حيل
يالله اني طالبك فالصبر والالتزام
الحياه امرور وعبور واخرها الرحيل
والحريص اللي حفظ دين ربه وستقام
وامري وحسبي على الله وانعم الوكيل
كان قد دليت وخطيت في بعض الكلام


النفس لك يا منوة النفس هاويه
لو دونها شهب السراحين عاويه
وعروق قلبي والمعاليق كنها
اعروش نخلً لاقبل الليل خاويه
الحب خلاني عن الناس منزوي
تزويني الافكار في كل زاويه
وسلومنا ماتعرف الحب والهواء
ووجيهنا للعيب ماهي بقاويه
عليك ياللي غبت عني وانا الذي
احس نارً بين الاضلاع شاويه
لو قلت لك قلبي من البعد مرتوي
العين من شوفتك ماهي براويه
من بعد ما صديت ونويت بالهجر
نفسك على الحرمان والبعد ناويه
مالي خويً في حياتي وطرقتي
الا الهموم اللي لصدري مخاويه