رد: ديوان الشاعر عبدالمغني بن معيض العيلي

ان كان ماجو رموزً يلفتون النظر
والله ماتغريني الشهره وحب الظهور
اهم شي لا حضرت ألفت نظر من حضر

رد: ديوان الشاعر عبدالمغني معيض العيلي

لا تاخذك ريبه ولا ياخذك شك
لو شفتني مشغول ماني بفاضي
تراي اجي وروح والصدر منضك
ماغير امضي الوقت والوقت ماضي
مدري متى الاحصار والحضر ينفك
وفرح ليا شفتك على جال حاضي
وان كان قفل دونك الباب ونصك
مؤمن بحكم الله وقانع وراضي

الشاعر عبدالمغني العيلي

رد: ديوان الشاعر عبدالمغني معيض العيلي

يقول بد اللي في خاطرك بده
وانا بموت امن القهر والغبينه
ما يقهر الرجال ويبيح سده
غير الخيانه والردا والضغينه
ايجود من جوده ومن ود وده
مير العرب تجحد مكارم يمينه
شرذمةً متعمده مستبده
قومً على قولة نعم حاسدينه
يلبسونه ثوب ماهو بقده
ثوب الردا ماهو بمن لابسينه
مير البري مهما تظلم لابده
يطلع طلوع الشعره امن العجينه

الشاعر عبدالمغني العيلي

رد: ديوان الشاعر عبدالمغني معيض العيلي

غريب عايش في زمان الغرايب
وتستغربوني الناس وستنكروني
من شافني قال انت مالك قرايب
وانا وفي والربع ماهم بدوني
والاخويا والاصدقاء والحبايب
ايواصلوني وصل ويكلموني
كلاً يناديني ولاني بجايب
واللي تراسلني على تيلفوني
لكن انا موجود والفكر غايب
وليا لفيت الربع وستقبلوني
اعيش جوي بينهم جو شايب
لا ناسبو جوي ولا ناسبوني
ولا يطيب الجو ويصير طايب
ويطيب تفكيري وغني لحوني
الا ليا هبت علي الهبايب
ارتاح وهوجس وهيض شجوني
عن كثرت الاصوات مبعد وتايب
اخاوي افكاري وخاوي ضنوني
حاله تجيني يا عجيب العجايب
قد غيرت وضعي وحالي ولوني
جنون مدري هم مدري مصايب
منها ذهب بصري وعميت عيوني
مير الصراحه قبل كشف السبايب
عن حالتي بالله لا تسالوني
ماني في حاجه للدوا والطبايب
هذا دواي اللي يداوي جنوني

الشاعر عبدالمغني العيلي

رد: ديوان الشاعر عبدالمغني معيض العيلي

اليوم طاري لي طواري كثيره
ياليت لي حيله ورد الطواري
جارت على قلبي وحاست مريره
وبدت على وجهي رسوم ومواري
الاوله والثانيه والاخيره
كيف اتجاوزها وهي في مساري
والواقعه والفاجعه والخطيره
اخاف تجبرني في لفه جباري
وجيك مسرع والهقاوي كبيره
وصدم وانا مسرع وموت انتحاري
يالله عونك والعوض والستيره
هذا هواي وغايتي واختياري
عساني ادرك ما روى ابو هريره
وما رواه الترمذي والبخاري
والنفس تفتح لي ثمانين سيره
يبغالها واعي وكاتب وقاري
وين الصديق اللي ازهمه وستشيره
عندي يساوي له طبيب استشاري
في داخلي نار وشرار وذخيره
غير الدواهي والسباع الضواري
افكار واسرار وطموحً مثيره
تجعلني اسافر وغادر دياري
مدري على وين وعلى ايات ديره
بس الاكيد اني مصدر قراري

الشاعر عبدالمغني العيلي

رد: ديوان الشاعر عبدالمغني معيض العيلي

اقصى طموحاتي زواج وظيفه
مالي ورا الدنيه الدنيا مناوي
الساس جيد والمناسب شريفه
وانا بمرجلتي وديني غناوي
افاخر ابنفسي ونفسي عفيفه
وفاخر ابوجهي ووجهي حياوي
ماني بسوقه للوجيه الضعيفه
لو كان يطويني من الوقت طاوي

الشاعر عبدالمغني العيلي

رد: ديوان الشاعر عبدالمغني معيض العيلي

حطيت فيه يارفيقي عذاريب
وانا عطيتك شيً ازود من الزود
اتقول انا وانا حصان الاطاليب
فعلي ومعروفي منكر ومجحود
وانا لك الله ماجحدت الاصاحيب
اودهم وعدهم ونت موجود
ماعاد لك عندي حقوق ومواجيب
ترفع لي البيضا وترفع لك السود
والله ماني ذيب ولا ولد ذيب
ان كان ماحطيت لك حد وحدود
ياما على شانك بذلت التسابيب
وثرك مثل ماقيل جاحد ومقرود
خيب تودي اعلوم وعلوم وتجيب
طيب وطيبك مع هل المال محدود
من شان تلقا من وراهم مكاسيب
لك من ورا طيبتك غايه ومقصود
عزالله انه عيب واقوى من العيب
وعزالله انه ياسود الوجه منقود
حنا نطيب امع الرياجيل ونطيب
ولا ندور من ورا الطيب مردود

الشاعر عبدالمغني العيلي

رد: ديوان الشاعر عبدالمغني معيض العيلي

نرفع يدينا لله اجلال واكبار
اللي على وجه البسيطه جعلنا
يارب فالجنه وعفوك من النار
يوم الحساب ويوم يكشف عملنا
نستغفرك ونته للانسان غفار
ياواحدً منك وعليك اتكلنا
والهرج له زبدة وللشعر شعار
والشاعر المبدع ليا هاض غنا
يطب بستان القصايد ويختار
الطيبه من كل غصنً تثنا
ولا قليل العرف يبلش ويحتار
ايجيبها منا وتعصاه منا
وانا في حبك البيت متقن وبيطار
امضى من الماضي ورمح المطنا
احرس على الجزله وتجديد الافكار
وتعب وفكر وابتكر وتعنا
من شان احوز الفوز في كل مضمار
وعتز وفخر يوم امجد وطنا
مهد الرساله منبع الرسل الابرار
قبل الشريف وقبل غزوة مهنا
مواطن ووفد وطراقي وزوار
الكل منهم ياجد اللي تمنى
امن ومان وريف والكيف يندار
سوايرً ماسيرت في فينا
والود والتقدير والخير مدرار
طاهر وزاهر والعمائر تبنا
يارب صونه عن عديمين الابصار
وعلى عدو الدين يارب عنا
ابلادنا وملوكنا الطهر الاخيار
من دونها. حنا وسيفاً محنا
يا جاهلاً عنا ترا مالك اعذار
روح انشد التاريخ وش قال عنا
حنا حماة الدار يابايع الدار
حنا حماة الدين لاقيل حنا
سطوة وحزم وعزم واقدام واصرار
وليا دعانا سيد العرب قلنا
اضرب بنا العدوان يانسل الاحرار
من غربنا لا شرقنا لا يمنا
هذا الغلا هذا الولا سر وجهار
حب ووفا وخلاص من يوم كنا
للجاليه واللاجيه عون وستار
والله ماينظام حيً زبنا
انقول للجالي لا تقلق لا تنهار
ريح في دار السعود وتهنا
الساده القاده بعيدين الانظار
الزحل الساطين زبن المجنا
اعيال راعي السن والعن والكار
مامنهم اللي فالشدايد خذلنا
فارس بعد فارس ومغوار مغوار
متاملين ولا تخيب املنا
واليوم حكم اللي حما الدار والجار
يوم انتخوه اهل اليمن ماتونا
سلمان دواس الظلايم والاخطار
مواقفه نفخر بها في زمنا
على السلوم الاوله سير وسار
جوده ومعروفه وطيبه شملنا
ومحمد امحمد عصامي وجبار
القايد الكايد شبيه المثنى
نسمع كلام اعلام واعلام واخبار
ومنها ومن من قالها ماشحنا
ولا لحقنا شك فالشامخ البار
واهل الحسد واهل النكد ماتصلنا
لو هبت الانسام من كل الاقطار
والله تالله ماتزعزع جبلنا
قاسي وراسي بامر علام الاسرار
الواحد اللي به جميع استعنا

رد: ديوان الشاعر عبدالمغني معيض العيلي

الخاطر اللي يرزم ارزامة الخلج
على وليفً فالمحبه دخل بي
ازعل عشانه وفلج المدعي فلج
اليا اعتزيت ابفعلي وصلب صلبي
فرقاه نار وقربه ابرد من الثلج
اجتمعت الثنتين في قلب قلبي

الشاعر عبدالمغني العيلي

رد: ديوان الشاعر عبدالمغني معيض العيلي

اه يا وقت المواجه ويا وقت اللقاء
قبل ما الغربي يحرك غصون يالاراك
يوم كان الوصل عادي على وضح النقا
كنت اشوفك شوف وجيك وسلم علاك
لين جاء وقت الجفا والتصدي والشقا
ونتهى وقت التلاقي وودعنا حماك
من بعد ما طول البعد قلي وش بقا
ما بقا غير الحكي من عداي ومن عداك
الزمان اللي جمعنا حبايب وصدقا
جعل يسقى من مزون العقارب والسماك




راعي الوجه الحسن راعي الهرج الدقاق
ودي انه مال موروث وانا وارثه
لانه ايفوق الوصايف وحبه فالعماق
زارعه ما بين عوج الضلوع وحارثه
يا حبيبي لا تذكرني ايام العناق
يمكن اسوي مصيبه وضوي كارثه

من يخبرني عن الوجه البهيج
كيفها وش حالها وش لونها
من بعدها فالصدر ضيق وضجيج
جادلً كل العذارا دونها
ماني ابيمة سوالف وتهريج
كنها ليلا وانا مجنونها
من بحر جده ليا بحر الخليج
ما ملا عيني يكود اعيونها

البارحه يا طول ليلي على الكوع
عيت انام وعيت النفس ترتاح
افك لي موضوع وصك موضوع
ورهي على الارباح وتضيع الارباح
غديت انا والوقت طامع ومطموع
ايحفني ويلفني لف مسباح


من شان مع بعض العرب ما تصادم
دور على الربع النشاما وتلقا
يا جعل بيتً ما يذريك هادم
ويا جعل ديرة طيب الاصل تسقى
انا حزامي كل وافي وقادم
اللي على الطالات عجله وسبقى
وان ضاع معروفي في بعض الاوادم
اقول خيره ما تغارب ولا اشقى
ماني على بذل المعاريف نادم
العمر يفنى والمعاريف تبقى


يا موادع لا توادعني وانا قلبي مودع
والله انه ودع اضلوعي وربع في ضلوعك
ابك انا راسي من التفكير والتاثير صدع
والدوا شوفك وحوفك حوف يا مزين طبوعك
ماقدر اقدع وتقدع لين ترجع وتقدع
غير هذا ما تقدع غير منك ومن قدوعك
اتشرف وتصرف وتحرف وتبدع
في تواصيفك وتوضيفك وتعريفك ونوعك
عاد حبك في ضميري ما يهون ولا يردع
معجب ومغرم في تكوينك وحتى في دموعك
المهم اني مني خادع ولاني بمتخدع
ليتني لك جار جنب الدار ولا من ربوعك




ياواحدً ماني عليك ابمشبه
ملكت كل الزين واخذت تاجه
يشهد علي الله وانا اقول احبه
محبة ً ماهي على شان حاجه
محبةً فالقلب من عند ربه
ويبين حبي له نهار انتواجه
تكفى يا وقتي لا طلب شي لبه
اهم شي الولف يضحك حجاجه
بالوصف راقي والمثل ينضرب به
حتى مزاجي يتفق مع مزاجه
والله لو ان الموت دونه لا طبه
وكلاً مثل ما قيل يتبع خراجه
وش لون اكبه عمد وش لون اكبه
الحب سلطه خل عنك العواجه
واللي يقول الحب ضعيف ومسبه
عزالله انه خبل ولا خواجه



لا تنزعج مني لا كثر اتصالي
لو منت غالي يالغلا ما تصل بك
غالي ولا غيرك من الناس غالي
اشغلت فكري والضمير انشغل بك
وليا انهبلت انت السبب في هبالي
اتهبل الصاحي وعقلي انهبل بك
كامل وشامل بالحلا بري حالي
لو حللك لي خالقك وحلل بك
متى حلالك يجتمع مع حلالي
وضمك ويرتاح قلبي وقلبك


البارحه دمعي على الخد منصب
بين التوجد والرجاء والتمني
حبيت لي مخلوق والناس تنحب
لكن هذا بالوصايف فتني
من يوم شفته صرت عاشق ومعجب
ضاعت علومي والعقل طار مني
جسمه نحيل وعين صقر ومهذب
ما شفت مثله فالبلد حسب ضني
ناظرت فيه وصد عني وجنب
يالله دخيلك لا تغيبه عني


دام الضروف اتحدك وتحداني
ماعاد لي هجعه ولا لك هجعه
روحي في درب وانا في دربً ثاني
قدام لا ذوق الندم والفجعه
الله يصبرني على ما جاني
والله يسهل لك طريق الرجعه


يلف بي وقتي مثل لف مكره
ويبين اصحابي ويكشف حصيلي
يا حب علي من باب الانصاف شكره
لانه بدالي شي ما ينبدي لي
عينت لي في تالي الوقت نكره
عيت طواريق الهواء تستوي لي
لو اتوجد من هنا لين بكره
ما بردت حره ولا شفت غليلي
عليك يا حرً تعلا في وكره
كوا فوادي كي وظهر حفيلي
غايب عن الابصار وان مر ذكره
يزيد همي هم ويطول ليلي
يامن خذيت العقل واخذت فكره
رده عليه فيك ما ثمر جميلي
انا بعد فرقاك في وضع سكره
اسكر من اللهفه ويعمى دليلي

اول الليل هم وتالي الليل ضيق
يعني العين حلو النوم ماهو لها
جمرة الشوق شبت في خفوقي حريق
والرساله في يدي مات مرسولها
هيه يا بنت شوفي لي حلول وطريق
والله النفس منك تطلب احلولها
انقذيني وانا قدمك شريق وغريق
في بحر حبك الامواج يا هولها


قمت اتذكر غطرستك ورحابك
والحب والتذكير للقلب فاجع
ما تدري ان طيفك معي في غيابك
حتى وانا في غبة النوم هاجع
راحة يديك وشفتيك وجنابك
وليا تخيلتك تزيد المواجع
احيان يا خذني الوله لين بابك
وخاف ربي وذكره وتراجع


المعرفه والفلسفه والسياسه
وهايبً ماهي بتصنع صناعه
والمرجله ماهي بكرسي وماسه
ولا هي ببشت اشقر وشريه وباعه
المرجله فعل ووجوب وفراسه
ما نالها راعي الردا والخداعه
والطيب فطره ما يجي بالدراسه
لو تدرسون اربع وعشرين ساعه

اسرارك وقوتك والضعف والخله
احفر لها حفرة فالصدر ودفنها
قدام تظهر لا قومً ما تخاف الله
قومً تدور على الشينه وتعلنها
تلبسك ثوب الغلط والنقص والزله
ونته شريف ونظيف وفي غنا عنها

الشوق لك يا كامل الزين ساقني
ايشوقني ذكرك وغيرك ما شاقني
لانك جمعت الحسن والخلق والبها
وانا نويت اجيك والحض عاقني
لكن اذا خايف عليه من الخطر
دوس الضروف العوج وعجل ولاقني


عزالله ان قلبي على طرقته نوى
ماعاد له خاطر ولا عاد له هوى
عزيت نفسي رغم ضرفي وحاجتي
يرزقني اللي يرزق الذيب لا عوى
في ديرةً ما طبها الضبي والوحش
ولا يجيها الا العواصيف والهوى


يا صاحبي لا تحسب اني مجافيك
ترا الجفا ماهو بلي ونت تدري
لكن لا يدخلك ضنه وتشكيك
وتحس اني بالهرج وتهد جدري
جتك الرساله ونت عقلك يقديك
رسالةً تشرح عن اللي في صدري
تراني اعزك وبالحيل مغليك
معزةً ترفع في قدرك وقدري


البارحه يا صاحبي هبت الريح
على فوادي من جميع النواحي
ريحً من الذكرى تزيد المجاريح
وانا الجريح اللي انت سبت جراحي
ماعاد باقي الا ارفع الصوت وصيح
ويردني نقد العرب عن صياحي
وعود ارسلك رساله وتوضيح
قلي متى ترجع وتطلق سراحي
ترا العرب نامو وطفو المصابيح
وانا الوحيد اللي اترقب صباحي
اون من ما في واقوم واطيح
صاحي لكن والله ماني بصاحي

كم لي وانا للخلا والبر متشوق
لكن تجبرني اضروفي على افراقه
ماني بمتسيوق ولاني بمتسوق
نفسيتي للمدن ماهي بعشاقه
اضيق من نشرة الاخبار وروق
لا شفت نوى الربيع يلوح براقه
في وقتها تضبط الاخلاق وتوق
في موترً يمسح الطبلون سواقه
وخوة خويً بفعل الطيب متفوق
ماهو من اهل الردا قطاعة الساقه
هذا وانا للوفى والطيب متذوق
ولا شبت النار والامطار والناقه