ديوان الشاعر عبدالله بن عون

***مزون شمر*** · 18-03-2016, 02:50 PM

رد: ديوان الشاعر عبدالله بن عون

من قصائده :

يالله ياقادر على بعث الأموات
ياجاعل" بين الأوادم تفاوت

وغير التفاوت بالهياكل والأصوات
أرزاقهم وعقولهم ماتساوت

يارب الأرض ويابديع السماوات
فرج هواجيس" بقلبي تخاوت

وإبرج لعين" ماتهنا بغفوات
دايم تشاوتها الطواري مشاوت

وروح" يلايمها من الهم لقوات
هاذي لها أكثر من سنه ماتشاوت

وقلب" يخمنه هواجيسه أفوات
مثل الطيور الجارحه لاتهاوت

خطر" بعد قلوا رجال المروات
يلذع كما تلذع فيوز الكتاوت

***مزون شمر*** · 18-03-2016, 02:52 PM

رد: ديوان الشاعر عبدالله بن عون

من قصائده :

يالوضح ماحدك على حاجر الشيح
ومنابت الحرمل شمال المسما

وهاك الخشوم اللي حجرها صلافيح
ألا الزمان اللي ماهوب أخو شما

البر ضاق وضايقوك المشافيح
وإحتدك الضامي على اللي مضما

مير إطلبي منشي السحاب المراويح
يرزقك رزاق المخاليق لما

بمزن يجي من يمة الغرب طفيح
وليا ومره الله رعد وإدلهما

نو" عروض" للرعد فيه تسبيح
إليا توهل عالية نجد سما

مدة كريم" ساقها مرسل الريح
من حد كشب ليا الوريعه وحما

قدمه ربابه كالنعام المشاويح
ربد" تقول أقطاع بدو" تلما

فيه الرعد كنه مصلي التراويح
إليا قرا سورة تبارك وعما

يأخذ شهر وثعول وبله مدابيح
نوب" على الهادي ونوب يتحما

يغنيك عن مرتع قراش الفلاليح
اللي دبشهم هامل" مايضما

وأسلاك شايكة" تجرحك تجريح
وأرض" بها أكياس النفايه ترما

***مزون شمر*** · 18-03-2016, 02:55 PM

رد: ديوان الشاعر عبدالله بن عون

من قصائده :

ليا دير فنجال الدلال المباهير
في مجلس روس الرجال احضرتبه

يستاهل الفنجال الأول ليا دير
شيخ نبيلات المواقف زهتبه

النائب الثاني مهابه وتكبير
رحبت به والمملكه رحبتبه

وهجيت باب مسجنات التعابير
للشعب والراس الكبير ابتدتبه

باسما التهاني والفرح والتباشير
ومادار بأفكاري وماهوجستبه

ازفها لك ياحبيب الجماهير
على سلامة من صفاتك سمتبه

زيزوم الأمن اللي فعوله مشاهير
مواقفه يم الثريا رقتبه

ماخاب ظنك فيه من توه إصغير
ماجاه منك من الدروس اثمرتبه

لو هو لحق هاك السنين المدابير
فاز بلقب خيال من قربتبه

المملكه من حد الأردن لخرخير
تحيزمت بك والأمان إشعرتبه

يسلم لنا راس يقود المغاوير
شيخ على ممشاك رجله مشتبه

شيخ وقف للملكه وقفة الزير
ولاخاب فيه الظن يوم اعتزتبه

ضيق على اصحاب الظلال المعابير
اللي تبنت منهج ما افلحتبه

شرذمة تخلف ضعاف التفاكير
كم جاهل بأفكارها غررتبه

ترسم له الخطه على غير تبصير
وماراح راحتبه ولاعودتبه

مثل الفيوز ايقص من دون تبرير
هو ماسلم منها وهي ماعتنتبه

ياللي زرعت زراعة نوعها غير
اقطف ثمر محصولها اللي نبتبه

عقب افتدتبك دون ستر الغنادير
اللي تبي تذبح به الناس متبه

وألا ولد نايف طويل الأشابير
نيه عدو الدين عنه إقصرتبه

وانجاه ربي من جميع العواثير
والنيه البيضاء على مانوتبه

***مزون شمر*** · 18-03-2016, 02:56 PM

رد: ديوان الشاعر عبدالله بن عون

من قصائده:

ياسعود كان إنك تهدد على النوح
تعال أنا وياك ننعى هنيا

تعال أنا وياك نأخذ عن الروح
عطني وأنا بأعطيك مما تهيا

صبري وصبرك عقب فراج مشحوح
ماعاد فيها يالبناخي كنيا

وإن كان صبرك شح والصوت مبحوح
خل إنهتانك بالخفايا خفيا

واصبري اللي عقب فراج ملحوح
والغبن ماله في ضميري نهيا

أون وأتبع ونة الصدر بفحوح
ولا فرجت من ضيقة البال شيا

واطيري اللي لأبرق الريش ذابوح
مبعد عمس راعيه صبح وعشيا

تعرضه يوم أظلم الليل ساموح
وعليه ماسيت الفجيعه مسيا

جيته على جثة حباراه مذبوح
وأمست همومي داهيتني دهيا

وأصبحت أنا عن دبرت الطير مصفوح
ماعاد لي في نقل غيره شهيا

ماراح جعله مايعود على اللوح
وألا عساه إليا رجع مايحيا

ليت النقيصه فالرواقي ومجروح
وفي كل كابوج سوات الحديا

وليته غدا وأرجيه مع كل طاروح
في المقبله يملابه الله إيديا

لوهو غدا ياسعود ماحسف الروح
بس الحسوفه ميتته هالسويا

وفراج مشروهه على كل ممدوح
يأخذ قضاه اللي برأسه حميا

***مزون شمر*** · 18-03-2016, 02:58 PM

رد: ديوان الشاعر عبدالله بن عون

من قصائده :

لجتي لجت خلوج تحنس بالمراح
تندفع وتعود لا اتلا العهد بحوارها

حنجة في حروته ماتبي عنها مراح
ولالها من حيله إلا هميل اعبارها

من غروب الشمس لين انبلج نور الصباح
مامرحت من ماهجدها ولامرح جارها

جارها يوم أذن الفجر صلى وإستراح
وهي على ما صابها واصلت مشوراها

وجدها بالمثل وجدي على ظبي البراح
درة وسط البحر مفلس بحارها

العشير اللي بعد راح معه القلب راح
وافترق شمل الأحبه بدون اخيارها

ياعذولي كف عذلك وكف الأقتراح
مقدر اسكن في ديارا ماهيب اديارها

لو شوتني نارها لين تنجحني نجاح
ابرك الحزات يوم احترق في نارها

***مزون شمر*** · 19-03-2016, 02:26 PM

رد: ديوان الشاعر عبدالله بن عون

مساجله بين الشاعر عبدالله بن عون و الشاعر سعد بن غازي

يقول الشاعر / سعد بن غازي

قلبي لشوف الوضح توميبه النود
اللي سنه ما شفتها غير مره

هن رغبتي فالصفر والشعل والسود
و هي سلوت الخاطر وللعين قره

وضحن اليا طبيتها جتني ورود
تقول وحدتهن عليه تشره

من البطا ماهو من النقص والزود
وانا غلاهن وسط قلبي مقره

لو غبت في قلبي غلا الوضح موجود
في واجب مافيه شخصن يغره

مارحت سايح يم حامد ومحمود
سياحتي نجد وصحاصيح بره

دار الكرم والطيب والعز والجود
وربع لهم في صفحت المجد جره

من شم ريحت نجد ماعنه منشود
لو يشتكي من زود برده وحره

لاجاه ليل كله بروق ورعود
وقامت مواخير السحايب تغره

ودارت قصايد شاعر يمدح الذود
وقمنا على المنكوس بيته نجره

اليا سمعت أبياته الغفل ياسعود
تصير عندي كل الابيات مره

جواهر ماجابها كل مجهود
راع الهوايه لاسمعها تسره

نفخر بشعره بين سيد ومسيود
الله يجيره من صواديف شره

عبد الله النايف ذرا كل مضهود
لاشانت اخلاق الوجيه المكره

عنزت معناها على نايف الطود
شيخ طواريق الغلا ماتغره

غلا البكار اللي نهديه ويزود
وضحى شناح تشعف اللي تمره

عيدية عجله عسى عيدك يعود
بالخير وايام الفرح والمسره

رد الشاعر / عبدالله بن عون

بيت القصيد اللي على الدال مشدود
من شاعر فالغرب لله دره

ما طمنه راعيه لمغازل الخود
نجل العيون اللي هواهن مغره

نبي نرد لطيب الساس مردود
وناخذ مع الهاجوس فره وكره

يامرحبا ما هوبل الرود للقود
وماشيف من نجم بحضن المجره

باللي مساجلته على الكبد قرهود
والمدح يمه كل سلك يجره

تغيب عنا يابوسلطان وتعود
وتشوف وضح حبها لك مبره

عن غيرها تمتاز بارقاب وخدود
وتذكر غلاها وسط قلبك مقره

اللي يماريها من الغبن ملهود
غير الذرور اللي بعينه تذره

تضوي بحضن ام المناشير وتقود
يم الشعيب اللي عريض مجره

واد الهييشه زال ما لولح العود
ولا للنعيم وللنجد فيه جره

لاجا لمكنانه عناقيد وعضود
يبني على العرا سنام وسره

ولا في غيابك يابيض الوجه منقود
في واجبات ترفع الراس حره

غيبتك مع شيخ له الجود مشهود
كل العتيبي تنفعه ماتضره

ولسان حال الشعب ماقاله سعود
(ياليتنا بينه وبين المضره)

صبرك يابوسلطان والصبر محمود
الوسم جا حله وسيله تحره

ونبي نشوفك جارك الله من الكود
في وسط بيت كبر فندق مسره

فالمجلس اللي قد عزمنا به العود
وجيناه فيه امرار ماهيب مره

مافيه يوم ماعقر فيه مفرود
وبابه على مصراع للي يمره

***مزون شمر*** · 19-03-2016, 02:31 PM

رد: ديوان الشاعر عبدالله بن عون

مساجله بين الشاعر عبدالله بن عون و الشاعر نجر ابن فيصل

البادي الشاعر/ عبدالله بن عون

يا نجر انا حاولت اجنب هوا الغيد
وعيت يدي لا تطلق من شعفته

وعمرت له بالنفس يا نجر تخليد
لعلي اقضي ما بقا من حسفته

أثر العرب معهم مع العلم تاكيد
عود قسى ماتنتعدل هدفته

وبالصدفه اللي ما سبقها مواعيد
وفالموقف اللي ليتني ما وقفته

عرضت شناح الطول ممشوقه الجيد
اللي بها من قايد الريم لفته

يانجر عادت لي ليال التواديد
واحيت بقلبي ذكريات شعفته

ومن عقبها ذقت العنا والتناكيد
وسهر الليال اللي يطرا عرفته

واليوم ابا ارفع لك من العلم تسنيد
حيث ان رفع العلم يبرد حسفته

يالشاعر اللي ما تدوس المناقيد
وصرح الكرامه معتلي في شرفته

ويوم اني اسند لك وافندك تفنيد
قدام ذا جربت غيرك وعفته

ماتنتنوخ للحمول المفاريد
وجنيف انا وش حاجتي في جنفته

يانادر ما في هدادك تصاديد
فعله ينومسني لو اني كتفته

مانته هذاك اللي ليا ازرا عن الصيد
عود على راعيه ينقل علفته

انا ادري انك يا نزيه المواريد
فنجال عذري الهوا قد رشفته

عشقك هو عشق الفاضلين المحاميد
اللي حصيله ما يلاقي كلفته

وانا ليا جا من طرفك المراديد
اما هجرت العشق والا ردفته

واقبل تحياتي مع اطلالة العيد
باللي عليك من المكارم عطفته

واغلا نقود سيق ما راح بزهيد
لو البضاعه غاليه ما صرفته

رد الشاعر/ نجر بن فيصل

حلو الهدايا من يدين الاجاويد
من الكريم اللي بسط لي صحفته

عبدالله اسند لي من الشعر تمهيد
لبس الشرف عيدت به والتحفته

واختصني من بد كل القواصيد
قصده يعبر عن ظروف صدفته

وهجدتني فاخر صيامي مهاجيد
واشتلت حمل فوق متني نسفته

وشكى علي وزادني منه تعقيد
راي يناسبني وراي حذفته

راي الهدا يامجرد السيف تجريد
كمل على مشوارك اللي نصفته

والحب قبلك ساق عنتر وابا زيد
وانته بعدهم يابن عون استضفته

ورقيت فوق وفي سنامه مجاويد
وبنيت له صرح رفيع وسقفته

ذكرتني باللي جرالي تراديد
عهد من الماضي وحلف حلفته

والله ما اخبر لك عن الحب تجليد
لو عنه يوجد لك علاج وصفته

وليا حصل فيضة ربيع وتجديد
زان الطرب واللي تبا العين شفته

وانا ثلاث سنين لا انقص ولا ازيد
ارخيت في حبل الشداد وجعفته

قالوا علامك قلت يالربع ما اريد
يوم الهوا دشوه ناس عسفته

والا انت حبك معتلي فوق وبعيد
في راس عيطا ثابته ما شطفته

واخفيت خافيها على زيد وعبيد
والا ترى ما فيه ذنب اقترفته

ما انته بعارضها لرماي وقعيد
وخبل على النمه تزايد رجفته

والناس فيهم طيبين ومقاريد
اللي يدق الصيخ واللي يعفته

وانته وانا مشوارنا يقطع البيد
وشوفي بعيد ومركز الخوف طفته

جنبت عن عرعر وحزم الجلاميد
وجنيف ما اعرف قوته من ضعفته

ويا وسع نجد ليا عطيت الجراهيد
والتمر يعرف طيبه من حشفته

ياللي علي تعمد العلم تعميد
الراي جاك وسرها ما كشفته

***مزون شمر*** · 19-03-2016, 02:34 PM

رد: ديوان الشاعر عبدالله بن عون

من قصائده :

عسى السحاب اللي على كان يافهيد
من غرب يجتاحه رياح" بشده

وإليا تقافا كنه الريم شريد
مايعترض ممشاه ريح" تصده

أبيه يطمن يم دار الأجاويد
وأول هماليله على سيف جده

ويمتد له من سيف جده تماديد
ويركد هواه ليا قرب من مصده

شمال من جده لحزم الجلاميد
وجنوب من جده شروره تحده

مدة كريم" مال جوده تحاديد
ليا عطى مايقدر أحد" يرده

وأبيه يسقي نجد من غير تفنيد
ماكفته ريدا ليا المستجده

وليا غدا لأرقاب نبته عناقيد
مافيه ألذ من الرخا عقب شده

يطيب كيف مخازرات المفاريد
اللي لها بقلوب أهلها موده

وإن صادفت محدار وألا مسانيد
دايم وهي للأوله مستعده

وإن صار محش جنوب وألا تواعيد
وألا هجيج" يتبعه طول شده

محصان عندي سبقته كنها العيد
ونبا نعدلها من اليوم عده

بوضح" تبارا كنها ذاير الصيد
ماتقضب المقطاره المسمهده

اللي يجيك مزايده فيه تزويد
إن زاد زد له وإن تراجع تعده

واللي يوسد حامض العلم توسيد
ماعاد له مشروه لوجاه ضده

الله على قدام بعد وتباعيد
من يقضبه في سهلة" مجرهده

***مزون شمر*** · 19-03-2016, 02:36 PM

رد: ديوان الشاعر عبدالله بن عون

من قصائده:

واطيري اللي / ما تحدد طلوعه
لاعتني الفجعه / على ضيعته لوع

أخذت عنه / وتل سبقه بفوعه
على خريش / ناحرت لأيسر القوع

تنحرت مبدا سهيل / وطلوعه
وصارت لي الحره / عن الطرد قاموع

وقفت بالدربيل / أخطف سنوعه
وأخفيت شوفه / يصعد الجو بطلوع

أبيه يرجع / مير صعب رجوعه
أصيح وأرمي اللوح / في كل مرفوع

لين الدماس / أضفى علينا قنوعه
وأنكفت مثل اللي / به السلم مقطوع

وأمسيت هاك الليل / نفسي جزوعه
والقلب كنه / من محانيه مشلوع

مانيب يم الحكي / من حيث نوعه
من وجهه يمي / فلا هوب مسموع

بس أكهف الماء / والتوجد قدوعه
لازل قرطوع / تليته بقرطوع

ضاعت به اللي / فالمتاقي خدوعه
ربدا صغير حجمها / طايرة شوع

في قلبها قد عقب الطير / روعه
من خلقتي / ماشفت لطيارها نوع

الله يلوم الطير / ما أقشر طبوعه
أنا أشهد إن خيار أساميه / مقلوع

لو كان تمشي له / برسم المطوعه
فالجو يبدي له / ثمانين مشروع

لابد مايفجع / خويه بلوعه
ويغير الموضوع الأول / بموضوع

هذا وأنا أمشي له / بنفس خضوعه
مثل الحشيم / اللي له الأمر مطيوع

***مزون شمر*** · 19-03-2016, 02:38 PM

رد: ديوان الشاعر عبدالله بن عون

من قصائده :

يادحيم لوشفت شعوى / شفتها اليوم
تلعب بعشاق الهوى / لعب دامه

وضحى عليها / طابع الحسن مختوم
والملك مرسوم / عليها وسامه

غزيزة اللي يصفق / القوم بالقوم
شقحى يقلدها / العقيد العمامه

لو شفتها صامت / عيونك عن النوم
وألا بعد قامت / عليك القيامه

يوم أنت في تلعات الأرقاب / ملحوم
دايم / وطلعك فوق ناض العدامه

مقسوم / وألا كان مانيب ملزوم
عقب إدخلن السوق / شفت الندامه

ماني بقاصدها / ولاشك مقسوم
عرضة صدف / بالسوق مع ريم رامه

قابلتها بالسوق / والسوق مزحوم
ولا حصلي عن لقاها / إنهزامه

أغضت بنجل / صابت القلب بسهوم
مال المولع / من سهمهن سلامه

بغيت أناديها / ليا فوقنا حوم
وذليت / من بعض اللغاء والشتامه

وأنا على الهسات / مانيب متهوم
والسلم الأول / ماأقدر أخلف نظامه

تردعني الشيمه / عن الشوم واللوم
وأخاف من شي / يمس الكرامه

وأقفيت قلبي بين الأضلاع / مجزوم
جزم العسيب / ليا تقارب صرامه

من عقبها يادحيم / والقلب ماسوم
وسمين / والثالث بكبدي علامه

وسم الدواسر / مطرق عرض ورقوم
هذي كواياهن / على القلب شامه

ديوان الشاعر عبدالله بن عون

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget