تويت
رد: ديوان الشاعر عبدالله بن عون
من قصائده
من قصائده
| الله من قلب رمع فيه رماع وأخلف يمومه عن طريق التسانيع |
| هجس رمع ماله عن القلب فراع علي غاراته تشن المفازيع |
| مركز بنوده بين محني الأضلاع ليا ناموا العربان سوى مشاريع |
| يشري بقلبي كل ليل ويبتاع وله الجوارح خاضعات مطاويع |
| أسباب ورق بالتغاريد سجاع طرب على روس العياد النعانيع |
| ورق غناه من النياحه به أنواع صوته يزيد ملوع القلب تلويع |
| يا ورق كف غناك مال الطرب داع ياشين مالك في عذابي منافيع |
| هو ليه يوم تروجع الصوت روجاع قصدك تزيد مولع القلب توليع |
| إن شفت من قلبه جزوع ومولاع على النياحه لاتوريه تشجيع |
| أسهرت عيني والمخاليق هجاع وذكرتني خل بعيد المراميع |
| راعي جديل فوق متنه إليا إنداع كنه شليل اللي تتل المصاريع |
| ليا جا نهار فيه صايح وفزاع والخيل بأطراف الجهامه شواريع |
| بيوم مثل يوم الرحى عجه أمزاع نهار أخو نوضا يفك المجاميع |
| مخلي سروج الخيل من كل صعصاع عقايره سرد الرمك والمداريع |
| كم راس شيخ دق به روبة القاع وخلي عشا لذياب نجد المجاويع |
| يدلي بهندي للأرقاب قطاع في روس ضده غاديله لعاليع |
| سيف شقير ويامره قلب وذراع ضربه يطوع مخطي الدرب تطويع |
| يومه على ضده مخاييله أتباع نهار يفرق شملهم عقب تجميع |
| غيمه عجاج الخيل غاره ومرجاع وشمسه بواريق السيوف اللواميع |
| يشيب منه اللي على الديد رضاع يوم العذارى من ذهلهن مفاريع |
| لا والله ألا صاحبي شد نجاع بيني وبينه يهرع الذيب ويريع |
| عنه أتحذى العلم مع كل ذعذاع أنشد ولاعينت للعلم تسنيع |
| عليه أصابتني عواريض وأوجاع نار الغرام تميع القلب تمييع |
| أتلى العهد به يوم مظهوره إنزاع جلع ضعنهم طلعة الشمس تجليع |
| بدو يبون بشرقي النفد مرباع ولهم على أطراف الصداوي مراميع |
| راحوا بعد حطو على الكبد مرقاع وعسى لهم من عقب الإقفا مراجيع |
| ليا من نبت الصيف جاله تمرياع وأضفى على روس العبال المصاليع |
| ليا حف زملوق الطواليع وإنصاع وأقفا خضار النبت حتى الطواليع |
| والأرض صفرا عودها والثرى ضاع وإستبدلت عقب الخضار البلاقيع |
| وجونا تباريهم زهازيم الأقطاع كنه يقلطهم عقيد الطماميع |
| أقفا الربيع وعودوا للشفا أرياع لعلو نجد اللي هبوبه ذعاذيع |
| ليا من نبت الصيف جاله تمرياع وضفى على هاك العبال المصاليع |
| اللي طويل عدودها عشرة ابواع وأقذالها مثل الطيور المواقيع |
| يزمي بها طافح سراب ليا ماع كنه من القصدير ياخذ تلاميع |
| دار بها تركي ومحسن وهزاع من حبها مال الثلاثه مناجيع |
| ماكفت البره وجزعا وجزاع وأجنب جنوب إليا القهب والمجاضيع |
| ولهم على منثورة العرق مرماع هاك النفود اللي غضاها مهانيع |
| أظني أضرب للغظي درب الأسناع وأشوف زوله عقب صد وتمانيع |
| وفي غير شوف العين مانيب طماع ليا حصل لو هو سلام وتوديع |
تعليق