رد: روايةة الدنيا ياصاحبي كلها مآسي وأحزان ما تضيق الا بالصبر تهان / منقولةة

رد: روايةة الدنيا ياصاحبي كلها مآسي وأحزان ما تضيق الا بالصبر تهان / منقولةة

صباح الخيير رووعه الروايه
امممم بتوقع انه راكان يكون بخير
منتظرينككككك
ويعطيك العافيه


"عرفنا قدرنا وابتعدنا بكرامه "

رد: روايةة الدنيا ياصاحبي كلها مآسي وأحزان ما تضيق الا بالصبر تهان / منقولةة


ان شاء الله يكون توقعكك صح وإنتي الروعةة ^.^

رد: روايةة الدنيا ياصاحبي كلها مآسي وأحزان ما تضيق الا بالصبر تهان / منقولةة

الجزء الثالث
البداية
ابراهيم ببكاء: راكان لا تموت راكان.. من لي غيرك راكان.. تكفى قوم لا تخليني
حطيت راسي على صدره وانا ابكي.. اه الدنيا خذت مني كل غالي.. من بقالي في هالدنيا من؟
راكان بألم: ابراهيم دق على الاسعاف بسرعة .. احس اني بموت اه
رحت اخذت الجوال وانا امسح دموعي: طيب بدق بس تكفى راكان تحمل.. ولا تموت وتخليني
دقيت على الاسعاف وانتظرتهم يجون
ابراهيم: تحمل راكان الحين بيجون الإسعاف.."مسكت يده" انشالله إنك بتتعالج وتشفى.. ماراح تموت وتخليني انا متأكد
راكان: ........................ (لا رد)
ابراهيم ببكاء: اه راكان لا
دفنت وجهي بصدره وانا ابكي
بعد ربع ساعة
طولوا الإسعاف ما جوا ... وراكان أحسه بيموت
يارب لا تفجعني بموته يارب... يارب اشفيه واحفظه لي.. يارب انت اخذت مني امي وابوي مابقى لي غير راكان... يارب احفظه لي يارب واشفيه انت الشافي
رفعت راسي عن صدره وانا اهزه: راكان ... راكان تكفى قوم
انا لازم اسوي شي ... البكاء مراح ينفع ... اخذت سكين وشقيت قطعة من بلوزتي.. وربطت فيها يده المجروحه
جو الإسعاف وشالوا راكان ... رحت معهم وانا ادعي ربي يشفيه ويحفظه لي
@@@@@@@@@@@@@@@@@@@@@@
بالمستشفى
دخلوا راكان للطوارئ و لغرفة العمليات على طول
صرت ادور في السيب رايح جاي ودموعي على خدي... مرت ساعة ساعتين ثلاث اربع خمس... صارت الساعة 5 صباحا والدكتور للحين ماطلع
كل دقيقة تمر وقلقي يزيد عليه.. لين أخيرا طلع الدكتور
رحت له بسرعة البرق: بشر يادكتور؟
الدكتور بعد مافصخ الكمام .. "يابرودته" : الحمدلله نجحت العملية.. والمريض بخير
فرحت وتهلل وجهي.. الحمدلله يارب الحمدلله: طيب يادكتور اقدر اشوفه؟
الدكتور: هو الحين تحت تأثير البنج.. بس اذا تبي تشوفه ادخل ولا تطول
ابراهيم بفرح: انشالله .. مشكوور يادكتور
وانطلقت بسرعة للغرفة .. دخلت بهدوء.. كان منسدح ونايم وشكله يكسر الخاطر .. الحمدلله اللي رده لي بالسلامه
وقفت عند السرير وانا اتأمله ... قربت له وقبلت جبينه بهدوء
راكان صحى بتعب: ابراهيم
ابراهيم ببتسامة: الحمدلله على سلامتك يالغالي... طهور ان شاء الله
راكان يبتسم بتعب: الله يسلمك
ابراهيم: وشلونك الحين؟ وشلون يدك؟
راكان: الحمدلله
ابراهيم: تعورك يدك؟
راكان: ايه شوي... راج وينه؟
كشرت يوم سمعت اسمه: انحاش الله لا يرده ولا اللي معه
راكان: انحاشوا؟ ليش ما بلغت عليهم
ابراهيم: بعدين ... المهم سلامتك يالغالي
راكان ببتسامة: وقفتك هذي ما انساها لك... لولا الله ثم وقفتك معي كان انا الحين طايح بالاستراحة محد درى عني
ابراهيم: ما يوفيك جزاك يالغالي .. احاول ارد شوي من المعروف اللي سويته لي... انت ياراكان سويت لي معروف ما انساه طول حياتي
راكان: ههههه حبيبي انت
@@@@@@@@@@@@@@@@@@@@@@
بعد 5 ايام
طلع راكان من المستشفى وتحسنت حالته كثير.. بفضل الله
حاليا انا وراكان جالسين عند المسبح نسولف ونضحك
راكان: ههههههههههههههههههههههههه صدق اني كنت نذل
ابراهيم ببتسامة: ههههههههه امانه شسويت؟؟ قولي شوي من جرايمك وانت صغير
راكان: أي والله جرايم.. يومني صغير كان عندي عصفور صغير وكان يعيي يشرب مويه... قمت غطست راسه بالمويه دقيقتين.. لين مات
وكان عندي ارنب متهاوشين عليه انا واخوي.. قمت عصبت ورميت الارنب من السطح... المسكين تكسر
ابراهيم: اوح اوح ههههههههههههههههههه وش هالاجرام اعوذ بالله ههههههههههههههههههه
راكان: ههههههههههههه وهذا يعتبر ولا شي.. اصبر ماسمعت جرايمي بالمدرسة
ابراهيم: ههههههههههههههه وش سويت
راكان: كان فيه طالب يحبني مره... وكنت كل ما اقوله شي يسويلي... مره قلتله انحاش من المدرسة ورح اشتري لي من البقالة ... وتعال وانا اعطيك فلوس... والغبي طاعني وسواها... واول ما انحاش من المدرسة... انا رحت علمت المدير عليه... ويوم جاء اخذت منه الاغراض وقلتله روح للمدير بسرعة بيكرمك ويعطيك فلوس... وراح بس مالقى فلوس لقى كفوف ... هههههههههههههههههههههههههه
ابراهيم: هههههههههههههههههههههههههه حرام عليك
راكان: ههههههههههههههه... ومره اخذت فلوس ابوي كلها وحطيتها بالمسبح... وقلت لاخوي يلا نسوي مسابقة من اللي يقدر يطب و يمسك الفلوس... المهم ابوي طب في المسبح يحاول يمسك الفلوس بس ماقدر... طلع وطير وجهي بكفوف وحرمني من الطلعة شهر .. اصلا عادي ههههههههههههههههههههههههههه
ابراهيم: ههههههههههههههههههههههههههههه اف وش ذا الاجرام... انا لو اسوي بأبوي كذا كان صلخ جلدي وسوى فيه نعال ... ههههههههههههههههههههههههههههههههههههههههه
راكان: هههههههههههههههههه ومره حرقت شعر ولد خالتي بالولاعة... صار شعره من فوق كأنه اناناس... ههههههههههههههههه
ابراهيم: هههههههههههههههههههههههههههههههه اه بطني هههههههههههه راكان دمعت عيوني من الضحك... وش ذا الاجرام
راكان: ههههههههههههههههههههههههههه كنت نذل صح
ابراهيم: بزياده هههههههههههههههه
راكان ببتسامة: عاد كانت طفولة جميلة.. احلا شي انك تصير مجرم وانت صغير مو حلو انك تصير مؤدب... عشان تصير لك ذكريات
ابراهيم ببتسامة: أي والله.. الله يازين ذكريات الطفولة
راكان: انت كان عندك ذكريات حلوه بعد؟
ابراهيم: ما كانت حلوة كثير... الذكريات مهما كانت مره إلا انها تكون جميلة وانت تفكر فيها وتتذكرها
راكان: أي والله صادق
ابراهيم: ماكانت طفولتي جميلة جميلة مثلك.. بس انها اجمل مما انا عليه الحين.. عشان كذا صارت ذكريات حلوة
راكان: أي والله .. يالله قوم أذن المغرب
رحنا للمسجد وصلينا.. بعد ما طلعنا من المسجد
راكان: مالي خلق ارجع الاستراحة ... شرايك نتمشى؟
ابراهيم ببتسامة: قدام .. أي صح انا ابي اروح السوق محتاج اشتري اغراض
راكان ببتسامة: اجل يالله مشينا
ورحنا للسوق... اشتريت كل اللي احتاجه من ملابس واثواب وبدل.. واغراض شخصية وكل اللي احتاجه..
اخيرا حسيت بالحرية والراحة بعيد عن ظلم ابوي واضطهاده... اخيرا حسيت اني اقدر اسوي اللي ابيه بدون ما اخاف ولا اجبر على شي
الحمدلله يارب
راكان: هاه خلصت ؟
ابراهيم: ايه
راكان ببتسامة: اجل يله نروح كافي
رحنا لدكتور كيف وجلسنا
راكان: ابراهيم كم عندك اخو؟
ابراهيم: ثلاثه... فهد عمره 16 سنة ومحمد 14 وزياد بسادس ابتدائي
راكان: هم نفس الشي يتأذون من ابوك؟
ابراهيم: لا بلعكس ابوي يحبهم.. انا اللي مدري شفيه علي
وصل الطلب وجلسنا نشرب وحنا ساكتين
راكان: وزوجة ابوك ؟
ابراهيم: وش فيها؟
راكان: تكرهك مثل ابوك؟
ابراهيم: لا عادي.. بس انا اكرهها لانها تشوف ظلم ابوي وساكتة
راكان: يمكن هي اللي تحارش ابوك عليك
ابراهيم: والله مادري الله اعلم.. المهم الله فكني منهم الله لا يردهم لي
راكان ببتسامة: امين
راكان: صح باقولك... بكرا اهلي بيجون عندي بالاستراحة.. لاني علمتهم بالسالفة وخافوا علي وقالوا بنجيك نتطمن عليك
ابراهيم: ايه اوكي.. وانا بقولك تراي أباخذ الملحق اللي ورا وبقعد فيه.. عشان اهلك ياخذون راحتهم
راكان: خلاص اوكي.. واذا راحوا اهلي ترجع للغرفة اوكي؟
ابراهيم: لا وش حقه؟
راكان: اجل تقعد بالملحق؟
ابراهيم: هذا المكان الطبيعي للحارس
راكان بعتاب: لا عاد تقول هالكلام ترا ازعل منك
ابراهيم: وش دعوا .. ماقلت الا الحقيقة
راكان: بس انت صديقي واخوي مو حارس وبس.. فرق لما تكون حارس عادي ولما يكون لك معزه بالقلب ..يفرق كثير.. عشان كذا لا عاد اسمعك تقول هالكلام فاهم؟
ابراهيم: ههههه ان شالله.. تصدق راكان انا اول ما شفتك ما ارتحت لشكلك ... بس الحين عزيز وغالي
راكان: هههههههههههههه انا اول ما شفتك حسبتك كيس زبالة ههههههههههههههههههههههههههههه
ابراهيم: هههههههههههههههههه الله يقطع شيطانك
@@@@@@@@@@@@@@@@@@@@@@
اليوم التالي
كنت قاعد اشيل اغراضي عشان انقلهم للملحق
حطيت الفراش والملابس والاغراض كلها
كان الملحق صغير شوي بس فخم.. مطلي باللون البني الفاتح والذهبي.. وجدرانه خشب فيها مربعات قزاز شفاف تخلي اللي جوا يشوف اللي برا والعكس.. تصميمه حلو جدا
خلصت من نقل اغراضي.. بالوقت اللي جو فيه أهل راكان
وجلست انا عند الاصطبل اناظر الخيول
جتني بنت صغيره تهبل عمرها 5 سنوات
البنت ببراءه: وث تثوي هنا "وش تسوي هنا"
ابتسمت لها: اناظر الخيول.. تعالي هنا
جات وشلتها: تحبين الخيول؟
البنت : لا اخاف منها
ابراهيم: هههه .. وش اسمك ياحلوه
البنت: اثمي ثوق.. بس ماعرف اقول اثمي ذين (بس ماعرف اقول اسمي زين)
ضحكت على برائتها.. ياناس تجنن
ابراهيم: اخوك راكان؟
شوق: ايه .. وانت ؟
ابراهيم: وش ؟
شوق: وث اثم اخوك ؟ "وش اسم اخوك"
ابراهيم ببتسامة: اسم اخوي فهد
شوق: ايه .. وين امك ؟
ابراهيم بحزن: امي في بيتنا
شوق: انا ماما داخل.. تعال ثلم عليها "تعال سلم عليها"
ابراهيم: ههههههههههههههههههههههه... لا مايصلح
شوق: ليه؟
ابراهيم ببتسامة: لان انا كبير .. والمفروض ما اشوف امك
شوق: طيب .. يلا بروح داخل
ابراهيم ببتسامة: لحظة.. سلمي علي أول
توها بتروح الا رجعت وباستني وراحت.. يا حليلها تهبل الله يخليها لاهلها
@@@@@@@@@@@@@@@@@@@@@

في المجلس:
(راكان)
كنت جالس مع عماني وعيالهم ومعنا جدي
عبدالله: راكان قول للحارس خل يجي يقهوينا
راكان: ايه ماقلتلك.. الحارس انحاش.. باللي مايرده
سالم: لا ما انحاش .. انا شفته اليوم
راكان باستغراب: وين شفته؟!
سالم: بالملحق .. مادري اذا هو او لا... المهم انا شفت صبي عندك بالملحق
ركان: الله يهديك أي حارس.. هذا صديقي
سالم: ماهقيتك تخاوي شباب هالشكل
راكان: ليه وش فيه هذا ؟!
سالم: مادري شكله ما اعجبني
راكان: ويعني تبيني ما أخاويه عشان شكله ما اعجبك؟
سالم: هد وش فيك متنرفز.. وبعدين انا اقول يعني شكله من شباب هاليومين المايعين اللي يطولون شعورهم
راكان: لا تحكم عليه من شكله .. تراه اخلاق
عبدالله: قوله يجلس معنا طيب
أي والله فكرة ورا ما أناديه يجلس معنا..بس مادري ابراهيم يحب جمعة الشباب ولا لا... اخاف اناديه وما يعجبهم ويجرحونه
عبدالله: وش فيك يالله ناده
راكان : طيب
ودقيت عليه: الو
ابراهيم: هلا راكان
راكان: ابراهيم تحب جمعة الشباب؟
ابراهيم: ايه طبعا... قصدك اجي اجلس معكم؟
راكان: ايه تعال
سكت شوي وهو يفكر.. وشكله متردد: اوكي خلاص
راكان: يالله نحتريك
ابراهيم: طيب
وسكرت
وبعد عشر دقايق دخل ابراهيم: السلام عليكم
الكل: وعليكم السلام
جا وجلس جنبي.. بهدوء
جدي يناظر: منهو ذا اللي دخل؟
راكان: جدي هذا خويي ابراهيم
جدي: اييييه .. من انت ولده انت؟
ابراهيم ببتسامة: ولد الفهد
جدي: انت من الرياض ؟
وبدأ جدي باسألته اللي ماتنتهي .. تعرفون لقافة الشيبان
ابراهيم: ايه.. بس انتقلنا هنا من اسبوعين
جدي: وش اسم ابوك؟
ابراهيم: احمد فهد الفهد
جدي: اعرفه
ابراهيم التفت لي بسرعه .. حسيت كأنه خايف ان جدي يعرف عن ابوه شي شين
ابراهيم: بس هو ماقالي انه يعرف احد من الشرقية
جدي: انا من الرياض يا خبل
ضحكنا كلنا.. وابتسم ابراهيم.. الله يهديه جدي ماعنده اسلوب
راكان يغير السالفة: ابراهيم تبي قهوة؟
ابراهيم: ايه اذا ماعليك امر
عبدالله: ابراهيم وين تدرس؟
ابراهيم: خلصت الثانوي وماكملت
عبدالله : ليه؟
الله يهديهم .. انا قايل انهم بيجرحونه
ابراهيم: بس.. انا قلت لابوي مابي اكمل قال براحتك
عبدالله: ياحضك ... انا لو ابوي مثل ابوك كان انا مرتاح
ضحكت انا وابتسم ابراهيم بسخرية
ابو عبدالله بعصبيه: عبدالله يالهيس الأربد.. اجل تبيني اخليك تقعد عطالي بطالي بدون شغل ولا مشغلة... انت بروحك مامنك فايده
الكل: هههههههههههههههه
عبدالله ببتسامة: مشكور يالغالي.. يجي منك اكثر
ابو عبدالله ببتسامة: عفوا يا ولدي عفوا
الكل: هههههههههههههههههههههههههههههههههههههههههههههههههه ههه
عبدالله يهمس لابراهيم: شفت شلون... انا ماعمري سويت شي زين ومدحني.. لازم يقول ما منك فايدة
ابراهيم ببتسامة: احمد ربك.. كافي حبه لك ووجوده حواليك
عبدالله استغرب وانا تأثرت .. عبدالله قام يأشرلي يعني وش معنى كلامه ؟ .. اكتفيت بإني هزيت كتوفي بمعنى مدري
عبدالله: يبه شفت ابراهيم وش يقول؟ ... يقول كافي وجوده حواليك.. يعني اهم شي انك معي اما المدح والثناء هذي نصبر عليها.. سأظل صابرا ومهما تسوي فيني ستظل ابتسامتي شاقتن وجهي "وابتسم ابتسامة غبيه"
ابو عبدالله ببتسامة: اقول العقل يا ولدي ولا العقال؟
( قصده تتأدب وتعقل ولا أجيك بالعقال ؟ )
جدي بعصبيه: محمد
محمد "ابو عبدالله" اخترش: سم يبه
جدي: وراك ع الولد؟؟
عبدالله بضحكه: ايه ياجدي شفه بس يهاوش
الكل: ههههههههههههههههههههههههههههههههههههههههه
وكملنا سواليف وضحك لين جهز العشاء
راكان: حياكم اقلطوا ع العشا... حياك ابراهيم اقلط معنا
وقلطتهم ع العشا .. وتعشينا
ابراهيم: انعم الله عليك
راكان: صحة وعافية
ابراهيم: وين اخوانك ماشفتهم؟
راكان: ماجوا
ابراهيم: ليه؟
راكان: بصراحه ... حتى انا مدري
سكت وشكله استغرب
ابراهيم: كم عندك اخ؟
راكان: 8 ثلاثه أولاد وخمس بنات
ابراهيم: الله يخليهم لك
راكان: امين
ابراهيم: يلا بروح انام
راكان: اقعد معنا شوي.. شفيك تنام بدري ؟
ابراهيم: ههههه مايبيلها ذكاء لاني اقوم بدري ... يلا تصبح على خير
راكان: وانت من اهله
وراح ابراهيم... وانا رحت اجلس مع اهلي
@@@@@@@@@@@@@@@@@@@@@@
اليوم التالي
الساعه التاسعه صباحا
(ابراهيم)
قمت الصبح.. واستغربت ان الاستراحة فاضيه
كان راكان جالس في الحديقة ويشرب قهوه ... رحت له
ابراهيم: وين اهلك؟
راكان: راحوا من ساعه ... مايقدرون يطولون عندهم دوامات
ابراهيم: اها .. "ببتسامة" وانت غريبه وش مقعدك بدري؟
راكان: انتبهت وقمت... وعجزت ارجع انام مره ثانية
جلست جنبه وانا ساكت
راكان: وش رايك نطلع نفطر ؟
ابراهيم: اوكي
وركبنا السيارة ... وفي الطريق:
ابراهيم: صح راكان وين ابوك؟ ماشفته امس
راكان بتكشير: ما جا
استغربت: اجل مين جا من اهلك؟
راكان: امي وخواتي ... بس
ابراهيم: ابوك في الرياض؟
راكان بطفش: لا
ابراهيم:اعصابك وش فيك تكلمني كذا ؟
راكان بدون مايناظرني .. بهمس: مافي شي
سكت وبالتالي سكتت عنه
دخلنا للمطعم وجلسنا نفطر .. وبصراحه ماكان لنا نفس
مادري شفيه راكان انقلب مزاجه كذا ... من يوم جبت طاري ابوه وهو مو عاجبني
راكان: خلصت؟
استغربت وش فيه هذا ما امداني اكل ... لكني فضلت اقوم: ايه خصلت
راكان: يلا مشينا
بالسياره:
ابراهيم: راكان وش فيك ؟
راكان: ............... (لا رد)
ابراهيم: وش فيك ساكت رد علي
راكان بقهر وصراخ: مافيني شي انت ماتفهم
ابراهيم بعصبية: لا تصرخ علي ماني بزر عندك
راكان ياخذ نفس عميق..بهدوء: انا اسف... بس كنت معصب ومنقهر ... وفرغت عصبيتي عليك
ابراهيم: عسى ماشر ليش عصبت كذا فجأه !
راكان: مافي شي حبيبي .. بس عشان تذكرت ابوي
ابراهيم بصدمه: ابوك مات !!
راكان باستغراب: بسم الله عليه لا حي
ابراهيم باستغراب: اجل وشلون تذكرته ؟
راكان: لاني من زمان ماشفته
ابراهيم: ليه؟
راكان: هو مسافر برا وما يزورنا الا قليل
ابراهيم: طيب ليش كشرت يوم جبت طاريه؟
راكان: لاني اشتقت له
ابراهيم: واللي يشتاق يكشر !!!!!!
راكان: لا ابراهيم انت مافهمتني ... انا زعلان ومنقهر لاني من زمان ماشفته واشتقت له وهو ولا على باله يجي يزورني
ابراهيم : لايكون نفس ابوي !
راكان: لا حرام عليك ... ابوي حنون وطيب والله بس انه مسافر وما يزورنا الا قليل ... مو كره لنا لكنه مايقدر يجي كثير بسبب شغله
احبه ... واشتاق له ... بس يقهرني اني ما اقدر اشوفه كثير
ابراهيم: مو ذنبه والله ... هو يشتغل ويشد حيله عشان يوفر لكم اللي تبونه ويعزكم لانه يحبكم
راكان: أي والله
وسكتنا شوي
راكان يناظر المرايه الأمامية وهو مستغرب ومعقد حواجبه
ابراهيم: وش فيك؟
راكان: من هو ذا اللي يلاحقنا
استغربت وناظرت بالمرايه
ابراهيم بخوف: راكان !! .. راكان هذا ابوي
راكان بصدمه : قل قسم
ابراهيم: أي والله هذا ابوي
راكان: وش يبي؟
ابراهيم بخوف: يبيني انا أكيد ... هو قال بطلعك لو من تحت الارض ... راكان تكفى اسرررع
راكان بقلق: طيب بس انت هدي شوي
ابراهيم: اسرررررع هذا هو ورانا
راكان: هذاني دايس بأقوى ماعندي شوف العداد واصل 100
ابراهيم: طيب لف يمين يسار ضيعه
راكان صار يلف يمين يسار ويدخل في الحواري ويطلع ويروح عند الاسواق ويلفلف ويدور بس هو ورانا ورانا ماقدرنا نضيعه
ابراهيم بخوف: وجعلنا من بين أيديهم سدا ومن خلفهم سدا فأغشيناهم فهم لا يبصرون ..يارب مايشوفني يارب
حالتي كأني قاعد على جمرة ماغير انطنط واناقز واتلفت من الخوف وادعي انه مايشوفني
راكان : اركد يا ابراهيم خلني اركز
ابراهيم بقلق:راكان ادخل هذا السوق
راكان لف من جهة السوق ودخل وصار يلفلف ويدور لين اختفى فجأه... والظاهر اننا ضيعناه
راكان: وينه
ابراهيم: مادري .. شكله ضيعنا
راكان: اخاف يطلعلنا فجأه
ابراهيم بخوف: لا انشالله لا
راكان دخل في الباركينق حق السوق .. ووقف
وانا صرت اناظر راكان بخوف ... الله يستر... هو الحين عرف اني في هذي المنطقة وأكيد بيجي يدورني مره ثانية
ابراهيم بحزن: عرف الحين وين مكاني... وأكيد بيدورني مره ثانية... الله يعين متى بارتاح من هالعذاب
راكان بهدوء: ابراهيم .. مابيك تخاف ولا تحزن .. أنا معاك

أنا معاك
شكثر أثرت فيني هالكلمة
وحسستني إني مب وحيد... حسستني إن لي سند في هالدنيا القاسية يوقف معاي ويدافع عني ويواسيني.. يشاركني لحظات الفرح والحزن ...حسستني إن لي أخ ماولدته أمي
حقا رب أخ لك لم تلده أمك
وأنت يا راكان أخي اللي ماجابته أمي
شفنا بعض صدفة وكانت أحلى صدفه بحياتي
الله يحفظك لي يا مصدر فرحي وسعادتي
@@@@@@@@@@@@@@@@@@@@@@
نهاية الجزء الثالث
إيش سر حب راكان لابراهيم؟ هل هو تعاطف ولا صداقة و محبة حقيقية؟
تتوقعون أبو ابراهيم يتغير؟ ولا بيظل على ما هو ؟
ايش سبب كره أبو ابراهيم لولده وفلذة كبده؟ أم انه بدون سبب؟

روايةة الدنيا ياصاحبي كلها مآسي وأحزان ما تضيق الا بالصبر تهان / منقولةة

......

رد: روايةة الدنيا ياصاحبي كلها مآسي وأحزان ما تضيق الا بالصبر تهان / منقولةة

الجزء الرابع
عمق الأحداث
(راكان)
رجعنا للاستراحة .. وانا كنت فرحان لإننا رجعنا بسلام... وفشلت خطة ابو ابراهيم في إنه يلقانا
جاني شعور غريب من بعد ماتعرفت على ابراهيم ... حتى انا ماعرفت روحي واستغربت هالشعور
صرت حنون عليه كثير ... قبل انا ماكنت كذا وماقد حنيت على أخواني أو أحد اصدقائي كثر ماحنيت عليه وتعاطفت معه
صرت أحب اشوفه مبتسم ومبسوط ... يجيني شعور حلو إني قدرت أرسم بسمة على شفاة يتيم ... وادخل السرور على قلبه
أحب اواسيه وامسح دموعه ... شي داخلي يقولي انت اللي بتعوضه عن حنان الأب ... وفعلا هذا اللي بسويه
بأعطيه الاهتمام والحب والحنان ... اللي مالقاهم بأقرب الناس له
راح أكون له الأب والأخ والصديق والسند في هالدنيا ... بعوضه عن كل شيء فقده وانحرم منه ... واحتسب الاجر من الله .
.....................
ابراهيم خلوني اوصفه لكم :
اسمر ونحيف وجسمه هزيل .. ملامحه تدل على الطيبة والعفوية ... ناعم وطيب وحساس وشخصيته ضعيفه بسبب اللي صار له .. بالعربي " يكسر الخاطر"
شعره طويل إلى كتفة وناعم.. وسيم ملامحة دقيقه أنفه مستقيم عيونه ناعسه وحواجبه مرسومه ... ابن حلال واخلاق ماشالله عليه ومحافظ على دينه.. غامض وهادئ وكتوم جدا ... ابتسامته حلوة
.@@@@@@@@@@@@@@@@@@@@@
الساعة 6 مساء
جاني ابراهيم يركض: راكان
راكان ببتسامة : لبيه
ابراهيم بسخرية: شوف اخر نكتة وصلتني " ووراني جواله"
كانت رسالة نصية :
( ابراهيم
ابشرك عرفت وين مكانك يا حلو
وحفظت رقم السيارة اللي انت فيها
انشالله يوم يومين ولا ني لاقيك ومجرجرك عند ابوك مثل الكلب
تحسب إنك بتنحاش ؟
انت مالك الا بيت ابوك سامع ! بيت ا ب و ك >> يمطط الكلام عشان يقهره
لا تحاول تتغبى ولا تنحاش لاني لاقيك لاقيك
وبأجيب فشار عشان اتابع ابوك وهو يجلدك واستمتع 
باي يا حلو
عمك وتاج راسك بسام)

راكان بصدمه: مين هذا بسام ؟
ابراهيم:هذا واحد يشتغل عند أبوي .. كلب حاقد علي مدري وش سويت له كني ذابح أبوه وانا مادري
راكان: انت دايم توصلك رسايل تهديدات منه ؟
ابراهيم: لا هذي أول مره .. شفت يقول انه عرف مكاني .. وش اسوي الحين؟
راكان: ماعليك منه مايقدر يلمس شعره منك .. وان سوالك شي كسرت يده
ابراهيم: انا اصلا ما اخاف منه .. بس عشان وراه ابوي
راكان: ابوك اللي يطلب منه كذا ؟
ابراهيم: ايه .. وهو عاد لقاها فرصة وانبسط الكلب .. يحب يشوفني متضايق وحزين يستمتع الحقير
راكان : وش كبره هو ؟
ابراهيم: 30 سنه على ماضن
راكان: الله لا يطول بعمره
ابراهيم: امين
سمعنا صوت الباب يطق
ابراهيم: بروح افتح الباب
وراح
@@@@@@@@@@@@@@@@@@@@@@@
(ابراهيم)
فتحت الباب لقيت شاب اول مره اشوفه
: السلام عليكم
ابراهيم: وعليكم السلام .. هلا اخوي ؟
بدا يناظرني باستغراب: مو هذي استراحة راكان؟
ابراهيم: الا ياخوي وصلت خير
: من انت ؟
ابراهيم: انت اللي من انت ؟!!
: انا واحد من ربعه .. انت السواق الجديد ؟
ابراهيم: نعم !!! انا سواق ياللي ماتستحي .. يله فارق يله .. يله
وسكرت الباب بوجهه
رجع يطق مره ثانية
فتحت الباب بطفش : نعم ؟
: ياخوي وش فيك كذا معصب ؟
ابراهيم: والله اسأل روحك .. اجل انا تقولي سواق !
: وش دراني انا .. اسفين ما عرفناك
ابراهيم: ابراهيم .. صديق راكان
: ابراهيم ! ماقالي ان عنده صديق بهالاسم .. طيب هو موجود
ابراهيم: ايه موجود .. انادي لك اياه ؟
: لا وخر ابدخل
ووخرت عنه ودخل .. وصار يدور وينادي بصوت عالي ويزاعق
: راكان راكان .. راكان
طلع راكان بستغراب : خير وش فيه ؟ .. راشد !!
راشد: ايه راشد .. زين مانسيت اسمي بعد .. راكان وش هالقطاعة اعوذ بالله .. نسيتنا مره وحده
راكان: انت ناسي اللي صار بيننا ؟
راشد: ماصار شي بس انت الله يهديك تكبر الموضوع
راكان: سوري راشد .. انا ماقدر اماشي هالاشكال
راشد: هالاشكال ! .. ليه وش فينا مو مالين عينك استاذ راكان !
راكان: راشد كلمني عدل .. انا ماتركتكم الا يوم شفتكم ماتناسبوني وانا طبعي غير عنكم .. وماتصلحون لي ولا اصلح لكم
راشد: ايييييه كبر راسك علينا .. الله يالدنيا .. نفخت راسك علينا بهالدرجتين اللي ماخذهم في الجامعة
راكان بهدوء: راشد افهمني .. انا ما أناسبكم .. انتم شباب ضايعين فالينها ومايهمكم شي .. وانا انسان نظامي وابغى اكون ناجح في دراستي ومتفوق .. وانتم بتخربون علي وبتضيعوني.. أنتم بوادي والدراسة بوادي
راشد: اها يعني تركتنا عشان الدراسة ؟!!
راكان: عشان كل شي
راشد: شكرا ياخوي .. يجي منك اكثر
راكان: انا اسف .. بس ماقدر اماشيكم .. انا بطريق وانتم بطريق والله يوفقنا جميعا
راشد: يعني ما باذنك ماي ؟
راكان: لا
راشد: اوكي .. على راحتك
وتوه بيطلع الا استوقفه راكان
راكان: راشد .. وش اخبار طلال ؟
راشد بحقد: احسن منك .. "وطلع"
تنهد راكان ومرر أصابعه بشعره بضيق
ابراهيم: راكان .. ماعليه لو اسألك؟
راكان: تفضل
ابراهيم: وش قصتك معاهم ؟
راكان: هذولا كانوا اصدقائي من أيام الثانوية .. كانوا ساكنين معي بالرياض وتخرجنا مع بعض وانتقلنا للدمام مع بعض ورحنا لنفس الجامعة .. انا وراشد وخالد وطلال وعبدالعزيز .. كانت أيام حلوة ايام صداقتي معهم بالثانوية وهبالنا ووناستنا وشغبنا.. لكن يوم جيت الجامعة ما دخلنا نفس الأقسام .. بعدين انا عرفت انه لازم اشد حيلي خصوصا إني بالجامعة وفيه صعوبة بالمواد ولازم أشد حيلي عشان أجيب نسبة عالية .. بعكسهم هم كانوا مهملين ومايهتمون .. طول حياتهم لعب ب لعب .. ما انكر إني كنت مثلهم لكن تغيرت .. وهم مازالوا على ماهم.. حتى إن راشد كان لعاب وداشر ومغازلجي وانا كرهت هالشي .. ف قررت إني اتركهم لانهم مايناسبون لي.. وبيني بينك هم اصدقاء سوء .. يعني بيأثرون علي من ناحية الدراسة والسلوك والدين
ابراهيم:اها .. حلو إنك تركتهم ما دامهم اصدقاء سوء .. انتبه لا ترجع لهم
راكان: ايه طبعا
ابراهيم: الا ماقلت لي انت أي تخصص ؟
راكان ببتسامة : طب
ابراهيم: حلو .. يعني بتصير طبيب .. الله يوفقك
راكان ببتسامة: امين .. وانت ماودك؟
ابراهيم: بإيش ؟
راكان: بإنك ترجع تكمل دراستك
ابراهيم: لا أبدا
راكان: ليه ؟ .. لا تخلي أحد يأثر عليك هذا مستقبلك .. قولي وش طموحك؟
ابراهيم: كان طموحي أصير مثلك طبيب .. لكن الحين خلاص .. انكسرت عزيمتي وهمتي
راكان: ارجع ابني كل شي من جديد .. لا تيأس
ابراهيم: راكان .. اللي انكسر مايتصلح .. وبعدين خلاص انا عافت نفسي كل شيء .. ماعاد ودي احقق طموح ولا احلام ولا خرابيط.. ابغى اعيش وبس
راكان: على راحتك مثل ماتبي .. ماني ضاغط عليك بشي .. بس متى مافكرت ترجع تكمل وتبني أحلامك من جديد .. تأكد إن انا معك وبوقف معك
ابراهيم بابتسامة: انشالله
رغم إني أنا وراكان بنفس العمر .. إلا إني أحسه اكبر مني بعشر سنين .. عقله رزين وتفكيره واسلوبه تدل على ذكائه وثقافته .. ماشالله عليه.. عقله اكبر من عمره بكثير
@@@@@@@@@@@@@@@@@@@@@@@@
اليوم التالي :
صحيت الساعه 9 صباحا .. وكالعاده رحت اسوي شغلي من تنظيف وترتيب
تبون الصراحة .. خفت كثير من بعد رسالة التهديد اللي ارسلها لي بسام
ممكن بأي لحظة يلقاني ويمسكني ويوديني عند أبوي .. وارجع مثل قبل وكأنه ماصار شي .. تيتي تيتي مثل مارحتي جيتي
وش هالحالة بس .. عمركم شفتوا أحد يخاف من أبوه خوف الموت ؟ ويهرب منه كأنه عدو مو أب !
استغفر الله بس .. اللهم لا اعتراض
تركت الي بيدي ورحت اصحي راكان .. تأخر عن الجامعة
دخلت الغرفة بهدوء .. وكانت ظلام وهدوء والمكيف ثللللج
شكله مو ناوي يقوم الأخ .. سحبت الغطا واللي كان متغطي كله فيه
ابراهيم بهدوء: راكان .. راكان يله قوم تأخرت عن الجامعة كثير
راكان: همممم
ابراهيم: يله اصحى الساعه 9 ونص
راكان صحى وقام يتثاوب .. نومه خفيف بسرعه يصحى
راكان وكله نوم : ليش قومتني ؟
ابراهيم: مو عندك جامعة ؟
راكان: الا .. بس تونا بالليل
شكله مضيع الأخ .. مايدري هو في الصبح ولا الليل !
ابراهيم: أي ليل الله يهديك.. الحين الساعة 9 ونص الصبح
راكان شهق : هئئئئ الساعه 9 ونص !
ابراهيم: ايه
راكان: وتوك تقومني ؟!
ابراهيم: وانا شدراني على بالي بتقوم .. يوم شفتك تأخرت قومتك
راكان: زين زين .. ابراهيم الله لا يهينك جهز الفطور بافطر ع السريع واطلع
ابراهيم: اوكي.. يله قوم
راكان: ابراهيم ترا اليوم بنروح مشوار
ابراهيم: مشوار ؟ وين ؟
راكان: باقولك بعدين .. بس حبيت يكون عندك علم .. يله عن اذنك بروح اتجهز
وقمت انا وجهزت فطور خفيف بيض وجبن ومربى وقشطة وزيتون وقهوة نسكافيه

كل يوم كذا انا وراكان .. نصحى الصبح الساعه 9 ونفطر مع بعض بعدين يروح لجامعته وانا ابدا شغلي انظف وارتب غرفتي وغرفة راكان والصالة والمطبخ .. ثم اروح اسقي الزرع والاشجار ثم اعطي الخيول أكلهم واذا كنت فاضي اغسلهم .. اشتغل الى الظهر ثم ارتاح شوي واكل لي شي خفيف للغداء .. واحيانا راكان اذا ماكان عنده محاضرة بهالوقت يجي للاستراحة ونروح نتغدى انا وياه .. بعدين يرجع الساعه 6 المغرب واكون انا مسوي القهوة والشاهي واشب الضو ونجلس على الزرع نسولف وهكذا
رغم انه روتين متكرر الا اني ما احس بالملل أبد .. المكان الحلو والنفسية لهم دور .
قام راكان وجلسنا نفطر انا وياه
راكان: ابشرك .. الشرطة مسكوا راج
ابراهيم بفرحه: والله ؟ .. شلون؟
راكان: انا بلغت عليه ومسكوه .. احسن يستاهل وقليل بحقه بعد
ابراهيم: أي والله .. اللي سواه مو شي قليل.. تخيل كان يعطي البنات فلوس عشان يزني بهم .. ومبسط باستراحتك على كيفه .. استغفر الله بس
راكان بقهر: الله يعلم كم مرا سوا هالشي باستراحتي .. وانا يا غافلين لكم الله .. لولا الله ثم انت كان للحين انا على عماي والكلب يلعب بذيله من وراي
ابراهيم: الحمدلله مسكته الشرطة وافتكينا منه .. لاعاد تجيب طاريه هالوصخ
راكان: أي والله
خلص راكان الفطور وراح للجامعة وانا قعدت انظف واسوي شغلي الى العصر
الساعه 4 عصرا
دق علي راكان
راكان: اليوم ماعندي محاضرات كثير عشان كذا بجي الحين .. عشان المشوار اللي قلتلك اياه .. انا بالطريق الحين
ابراهيم: اوكي .. بأبدل واجي
رحت ابدل ملابسي وانا مستغرب وش هالمشوار اللي بيوديني اياه .. يلا نشوف وش ورانا
خلصت تبديل ملابسي وقعدت عند المسبح انتظره يجي
ماحسيت نفسي الا وانا طاير بالهواء وطايح بالمسبح بقوه
واسمع راكان يضحك : ههههههههههههههههههههههههه
ابراهيم: هههههههه يالنذل ليش كذا ... توني مبدل ملابسي
راكان:هههههه برهومي لي ساعه اناديك ماترد .. اللي ماخذ عقلك يتهنا به
ابراهيم: والله ما اخليك
واطلع من المسبح بسرعه والاحقه وينحاش وندور حوالين المسبح فجأه
الا هو زالق وطاير فوق ويطيح ع الارض بقوه
ابراهيم: سلامات هههههههههههههههه
راكان: اي ظهري تكفى ابراهيم لا تدف اصبر شوي اه
ابراهيم بضحك: علي الحرام دافك دافك
وامسكه مع رجله واسحبه ع الارض ابي اوصله للمسبح ووجهه على الارض ودخل التراب في فمه وعيونه وهو يتمسك في الارض وحافة المسبح بقوه
راكان :اي ابراهيم اتركني خلاص والله اسف
واسحبه واطيحه في المسبح : ههههههههههههههههههههههههههههههه احسن
راكان بعد مادخل الماء في فمه وخشمه وعيونه : كح كح والله ما اخليك يالنذل كح
واشوفه يطلع من المسبح بسرعه وانحاش وادور حوالين الاستراحة وياخذ هو تراب من الارض وطبعا يده مبلوله فصار التراب الطين ويصفقه بظهري
عصبت انا واروح اخذ جيك ماء واكبه على التراب وهو سوا مثلي وابدا ارمي عليه الطين وعاد بدت الحرب العالمية الثالثة وضرب وكفخ وتكفيخ ولعن وسب وشتم وانواع الدعاوي
راكان: ههههههههههههه ابراهيم خلاص تكفى هههههههههههه
صرنا مليانين طين كأننا طالعين من مقابر
راكان اخذ طين كثير بيده ومعهم حصاة ويفلق ظهري بأقوى ماعنده
طبعا ماكان يدري ان فيه حصاة واعصب انا والله ما اخليه الدب والاحقه
ويروح عند السيارة ويدور حولها واجي منا واحاول احده لكن بدون فايدة
ابراهيم بعصبية: تعال يالدب والله لا وريك
راكان: ههههههههههههههههه ابراهيم والله اسف مادريت
ولاحقه ويرقى فوق السيارة وارقى معه فجأه طبببب طاح من فوق السيارة على الارض
ابراهيم بحقققد : احسسسن
راكان: اه ظهري ههههههههههههههههه خلاص تكفى ههههههههههههه والله توجع اه
ابراهيم ببتسامة: تستاهل
ومسكت يده وقومته
راكان وهو ينفض ثوبه: بروح اتروش .. شف شكلي بس كلي طين كله منك يالثور
ابراهيم: ههههه والله مادري من بدى
@@@@@@@@@@@@@@@@@@@@@@@@
ورحنا كلنا نتروش ونغير ملابسنا
راكان: خلصت؟
ابراهيم: ايه .. الحين صدق بسألك وش المشوار اللي بنروح له ؟
راكان: الحين اقولك
وركبنا السيارة .. وفي الطريق
راكان: ابراهيم كم نسبتك بالثانوية ؟
من يوم سمعت طاري النسبه كشرت: تفكى لا تذكرني
راكان: كم طيب ؟
ابراهيم: 78%
راكان: طيب معاك شهادة كمبيوتر ؟
ابراهيم باستغراب: لا
راكان: ولا دورات ولا شي ؟
ابراهيم: لا .. ليش كل هالاسئلة ؟
راكان: بادور لك وظيفة تحصل منها راتب ينفعك .. انا ماني دايم لك يا ابراهيم
( راكان كان يقصد إنه ممكن يتزوج وينشغل عن ابراهيم أو يرجع يسكن في الرياض مع أهله أو لا سمح الله يموت أو أي شي يصير له يخليه ينشغل عن ابراهيم عشان كذا مو دايم له .. وابراهيم فهم غلط )
ابراهيم "حسيت كأنه يبي يفتك مني .. يبيني اتوظف عشان استاجر بيت او شقة واطلع من الاستراحة .. واضف وجهي عنه ..أكيد مايبيني اشتغل عنده عشان مايصرف علي .. حزت بخاطري صراحة
هين يا راكان.. ان قمت الصبح ولقيتني عندك في الاستراحة ما اكون انا ابراهيم"
ابراهيم بقهر: اصلا مامعي اوراقي ولا شهادات ولا شي .. يعني وفر على نفسك التعب
راكان: ليش؟ وينها اوراقك ؟
ابراهيم: مع ابوي اكيد
راكان: أي صح نسيت .. اففف مشكلة والله
متضايق يبيني اطلع من عنده بأسرع وقت .. طيب ياراكان بكرا بيتحقق لك اللي تتمناه يالنذل .
ابراهيم: والحين وين بتروح ؟
راكان: بارجع للاستراحة يعني شبسوي .. مافي فايدة
ابراهيم باحتقار: لو انك قايلي وش المشوار اللي بنروح له كان قلتلك ان ماعندي اوراق من زمان .. وبلاها هاللطلعة البايخه
راكان طير عيونه باستغراب: ابراهيم وش فيك قلبت؟ ريلاكس حبيبي ريلاكس
سكتت عنه ... أذن المغرب ورحنا صلينا في المسجد ورجعنا للاستراحة
طبعا كنا دايم نفرش على العشب عند مشب النار.. ونحط دلال القهوة والشاي.. ونجلس بهالمكان بعد اذان المغرب
اول مادخلت للاستراحة قعدت بهالمكان بطفش .. حتى راكان اللي كنت معلق كل امالي فيه يتضايق مني ويبي الفكة بسرعه .. وش ذا الحاله ياربي
جا راكان قعد جنبي ..قال وهو يفصخ جاكيته: اليوم الجو حلو .. مو بارد ولا حار..
حتى الجلسة حلوه صراحه
سكتت ومارديت
راكان ببتسامة: لو اننا بالرياض كان طلعنا للثمامه .. لكن دامنا بالشرقيه نروح للبحر .. احلى صح ؟
انا لا رد
راكان: نفسي نطلع للبحر ونروح نشوي .. انت وش رايك ؟
نفس الشي ما رديت
راكان: تدري اني قاعد اكلم جدار
مارديت عليه
راكان: ابراهيم ياهووه .. لي ساعه اكلمك شفيك ما ترد
انا جالس اتأمل النار وساكت
راكان: اليوم انت مو عاجبني ابد .. طول الوقت تفكر وما ترد علي .. وش شاغل بالك ؟
نفس الشي مارديت
راكان: خلاص اوكي لاترد .. انا عارف وش شاغل بالك
ابراهيم بسخريه: وش ؟
راكان: ههههههه شفت خليتك ترد
ناظرته باحتقار ولفيت وجهي عنه
راكان: لا صدق ابراهيم وش فيك ؟
ابراهيم بطفش: راكان اسكت تكفى
راكان: ماني ساكت لين تقولي .. وش فيك حبيبي؟ ضايقتك انا بشي صح ؟
سبحان الله .. راكان دائما فاهمني وحاس فيني .. لكني طالع من الاستراحة طالع .. فكرت اني لو سكتت اكثر بيستمر بالاسئله والالحاح .. ف قررت اني اكذب عليه
ابراهيم: ما فيني شي .. بس راسي مصدع .. واكيد اللي راسه مصدع ما يحب الازعاج
راكان: اها .. زين على بالي ضايقتك بشي وانا مادري
أي والله ضايقتني وزعلتني بعد .. افف بس متى يجي بكرا عشان اطلع بسرعه
ابراهيم: لا ابدا .. ماعمرك زعلتني بشي
كانت واضح انها سخريه لكن راكان ما انتبه .. قلت هالشي عشان ما يشك اني بطلع ويمنعني .. اصلا مو على كيفه لو ابي اطلع طلعت .. لكنه اكيد بيلح علي وبيزعل وبيكسر خاطري ف بالتالي بتراجع عن قراري على طول... اصلا مادري صدقه من كذبه .. شكله يمثل انه يحبني ويبيني عشان ما يحرجني .. لكن انا فاهم
سكت راكان وسكتت انا ... وخيم الصمت علينا
لين أذن العشاء ورحنا نصلي أنا وياه بالمسجد.. ثم رجعنا للاستراحة
ابراهيم : انا بروح انام .. تصبح على خير
بالحقيقة ماكان فيني النوم .. بس بروح اخطط كيف اطلع بكرا بدون ما يدري .. و باقعد بغرفتي ما ابي اشوف وجهه .. كرهته خلاص .. ادري بتقولون اني كذاب .. انا احاول اقنع نفسي اني كرهته عشان ما يأنبني ضميري لا نحشت
راكان باستغراب: بتنام الحين؟! بدري مره ! .. شكلك تعبان.. تبيني اوديك للمستشفى ؟
الحين قلتله راسي مصدع قال باوديك المستشفى! .. لا تمثل إنك تحبني ياركان .. خلاص انا كشفت كل شي
ابراهيم : لا مو تعبان بس راسي مصدع شوي .. باكل لي بنادول وانام .. وبعدين طبيعي انام بدري انا اقوم الساعه 9 او 8 ونص كل يوم .. يلا تصبح على خير
راكان: وانت من اهله .. لا تنسى الاذكار
ابراهيم: انشالله
ودخلت غرفتي وسكرت الباب .. وانسدحت على السرير وانا افكر
الحين راكان يقوم يصلي الفجر الساعه 4 .. ثم يرجع ينام ويقوم الساعه 9
لازم بين هالوقتين اطلع بسرعه وبدون ما يشوفني .. ممم يعني الساعه 7 مناسب
ابطلع وبادور لي مكان اسكن فيه .. الحمدلله معي فلوس صح انها قليلة وما تكفي .. لكن احسن من اني اقعد هنا على حساب كرامتي
بسكن في أي مكان حتى لو شين .. نموت لكن ما تموت الكرامه
واستمريت افكر ساعه كاملة
قطع تفكيري دخول راكان المفاجئ للغرفة .. خفت كنت افكر بصوت واكلم نفسي.. الله يستر لايكون سمعني بس
راكان: ابراهيم ! غريبه ما نمت
الحين داخل علي عشان يسألني اذا نمت او لا .. صدق سخيف
ابراهيم: لا توني .. تبي شي ؟
راكان تقدم لين وقف عند سريري: جاتني رسالة .. توقع من مين؟
ابراهيم: مين؟!
راكان: بسام .. مادري شلون عرف رقمي
ابراهيم بصدمه: و وش يقول ؟؟
راكان: يقول اعترف وينك وطلع ابراهيم لا اوريك شي عمرك ماشفته .. يهدد ويهايط هو ووجهه يحسبنا خايفين
بلعت ريقي بخوف: والحين وش الحل
راكان: لا تخاف منه مايقدر يسويلك شي .. لا تخاف دامني معاك
هه! انت بروحك مو مستحملني .. كيف تدافع عني بعد !
ابراهيم بحزن: ما اقول الا حسبي الله عليه ونعم الوكيل.. وكفى بالله حسيبا
راكان: الله بيجازيه على ظلمه انشالله .. صدقني ماراح يسرح ويمرح في هالدنيا وهو ظالم .. الظلم ظلمات يوم القيامة
ابراهيم بتنهيده: الله يصبرني بس
جلس راكان بجنبي على السرير .. وحط يده على كتفي مواساة لي .. ابتسمت له .. الله يعيني على فرقاك
راكان ببتسامة: ما قلتلي وش فيك اليوم ؟
ابراهيم ببتسامة: مافيني شي
راكان: تراك مو عاجبني اليوم
ابراهيم: ليه وش فيني ؟
راكان: وش فيك ! .. نسيت يوم اكلمك وما ترد
ابراهيم: كان راسي مصدع ومالي خلق للازعاج
راكان: وحسيت كنك تتهرب مني يوم تقول بنام .. وشكلك مافيك نوم اصلا
ابراهيم: لا صدقني فيني النوم وراسي مصدع .. بس ماقدرت انام فيني ارق
راكان: طيب دامك لسا ما نمت قوم صل الوتر "ببتسامة" بتنفعك ومراح تخسر شي
ابراهيم ببتسامة: انشالله
وصليت 3 ركعات .. بعدها رحت انام
@@@@@@@@@@@@@@@@@@@@@@@@
الساعة 9 صباحا
(راكان)
قمت وانا نصي نوم ومالي خلق ونفسي في خشمي
تروشت ولبست ملابسي وتجهزت أي كلام ورحت المطبخ
ابي شي اكله يفتح نفسي .. من امس على لحم بطني
لقيت المطبخ فاضي وعلى ماهو من امس
غريبه وين ابراهيم ماجهز الفطور ؟
خمنت انه بالاسطبل ينظف او يسوي شغله
بالتالي طنشت وسويت فطوري بنفسي .. وقعدت افطر على الطاولة بكسل
مرت ربع ساعة
لاحظت شي غريب .. هدوء وسكون قاتل .. مافي الا صوت الهواء .. وانفاسي !
راكان: ابراهيم .. ابراهيييييم !
معقولة للحين نايم من امس ! .. بروح اشوفه يمكن تعبان
رحت لغرفته وطقيت الباب .. وفتحته بهدوء .. وكانت الغرفة فاضيه
أكيد قايم بس وينه ؟ .. رحت دورته بالاسطبل مالقيته .. دورت بالملحق والصالة والغرف الداخلية وعند المسبح وبكل مكان .. زاد قلقي ورجعت لغرفته مره ثانية
لقيت ورقة على السرير ما انتبهت لها .. فتحتها كانت رسالة بخط ابراهيم :
راكان .. انا اسف
لكني اضطريت اطلع من عندك .. ماكنت ابغى اجلس عندك واكلف عليك بدون فايدة تسوى ... ولا كنت بجلس على حساب كرامتي .. خصوصا بعد ما طلبت مني اتوظف ... كنت عارف اني كلفت عليك بالمصروف .. وانا مقدر حالتك صعبه ان الواحد يصرف على شخص وينفق عليه كل اللي يحتاجه وهو مو مكلوف بهالشي
راكان انا اسف انا حبيتك وتعلقت فيك كثير .. لكن شنسوي القدر اكبر من كذا .. يعني لو ظروفي احسن .. لو اقدر اتوظف واساعدك بالمصروف واشيل عنك بعض التكاليف كان احسن من قعدتي بدون فايدة .. لكن شسوي لا فلوس معي ولا اقدر اتوظف ولا شي .. راكان لا تقلق علي انشالله اني بلقى مكان اسكن فيه .. لو كان هالمكان صغير ومو حلو لكن مثل ما قال المثل " مد رجلك على قد لحافك "
وانشالله بيرزقني بوظيفة واقدر ارد لك شوي من اللي عطيتني اياه
اخيرا اقول الله يوفقك واهتم بدراستك ومستقبلك وانتبه لنفسك
كنت خير أخ لي في هذي الدنيا القاسية .. الله يوفقك وين مارحت ويعيني على فرقاك
راكان.. لاتنتظرني لاني ماراح ارجع .. فمان الله يالغالي
ابراهيم
....................
قريتها للمره السابعه .. يعني خلاص ! .. انتهى كل شي ؟! .. رميت الورقة بقهر .. ليه يتركني ليه ؟ .. بعد ما تعلقت فيه وحبيته كثير ..لكن ليش؟.. عشان كرامته ! ... اصلا انا ماعمري ذليته ولا اهنته .. ولا قد منيت عليه بالفلوس اللي اعطيه اياه
كنت اعتبره اخوي واكثر من اخوي .. والاخوان ما بينهم كرامه
اخذت الجوال ودقيت عليه .. ومثل ماتوقعت جواله مقفل
ابراهيم والله انك فاهم غلط .. انا ماكان قصدي اهينك ولا احسسك بإنك عالة علي ... انا كنت ابغاك تتوظف عشان تعز نفسك وما تحس إني متفضل عليك .. هذا كان قصدي ..لكن انت تسرعت بظنك لي .. الحين من يقعد معي ويونس وحدتي؟ .. الحين بصير وحيد بهالمكان اتكلم ولا القى من يرد علي .. هدوء وكابه ووحده موحشه هذي حالتي بدونك يا ابراهيم ... يارب يحس ضميرك وترجع يارب
@@@@@@@@@@@@@@@@@@@@@@@@
نهاية الجزء الرابع
توقعاتكم :
وين بيروح ابراهيم ؟

رد: روايةة الدنيا ياصاحبي كلها مآسي وأحزان ما تضيق الا بالصبر تهان / منقولةة

الجزء الخامس
عمق الأحداث
(ابراهيم)
صار لي يومين من فارقت راكان
ورحت اشتغل حمال في احد المحلات في سوق الخضار .. المحل كان صغير وعلى قد حاله .. كان صاحب المحل اسمه ابو محمد .. وهو فقير وعلى قد حاله .. وبنفس الوقت بخيل وعصبي واخلاقه شينه
كان شغلي اشيل الصناديق والأكياس واوديها للسيارات .. واحيانا يعطوني فلوس واحيانا لا
على حسب كرم الشخص
اشتغل من الساعه 10 الصبح الى بعد صلاة العشاء .. ثم ارجع للبيت
عفوا للسكن .. واخيس شقة في السكن .. سكنت في سكن عمال مع عمال من الجنسية الهنديه .. طلبوا مني اشتغل عندهم واسويلهم الغداء والعشاء وانظف المكان مقابل السكن معهم لاني مادفعت فلوس
كانوا يكرهوني بشدة .. ويتامرون علي كني اصغر عيالهم.. واحيانا اطبخ لهم بس مايعطوني اكل
زود على ان المكان ضيق ووصخ وشين .. معاملة سيئة بعد
حياتي صارت جحيم من بعد ماطلعت عن راكان .. لكن راكان اكيد مبسوط الحين افتك مني وارتاح لانه مايصرف علي .
قطع علي افكاري صرخة راعي المحل : انت يا هيييييه .. لي ساعه اناديك
ابراهيم: نعم ؟
الراعي "ابو محمد" : قم شيل صندوق الطماط هذا ووده للسياره يله
ابراهيم : انشالله
ورحت اشيل الصندوق ووديته لسيارة الزبون .. ورجعت
ابراهيم: ترا قرب يأذن العشاء .. وانا بروح الحين
ابو محمد : روح انا ماسكك !
ابراهيم بكراهيه: لا ماقلت كذا .. بس عطني فلوسي
ابو محمد طلع من جيبه 20 ريال وعطاني اياه
ابراهيم : عشرين بس ! .. من الصبح وانا اشتغل واخرتها عشرين !
ابو محمد : ايه مو عاجبك ؟ .. ترا حتى احنا على قد حالنا مو بس انت
ابراهيم بحزن : الله كريم
وطلعت من المحل ورحت للمسجد لين أذن وصليت ودعيت الله يفرج همي وهموم كل المسلمين .. امين يارب
طلعت من المسجد بروح للعمارة اللي ساكن فيها .. وكانت بعيده .. لازم امشي مسافة على رجولي ..يالله
وصلت العمارة ودخلت الشقة .. كانت صغيرة ومكونه من صالة وغرفتين ومطبخ وحمام واحد .. رحت للغرفة وانسدحت ع الفراش الخفيف والمقطع .. ونمت
بعد ساعه .. حسيت بأحد يصحيني بعنف ويرفس ظهري
بعصبيه: قوم يلا سوي عشا .. انتا ليش في نوم الهين "الحين"
كان هذا واحد من الهنود اللي ساكنين معي .. وهو ال big boss كل شي يقوله لازم نسويه انا والعمال اللي معي .. كان متسلط وكريه جدا
الهندي: يلا سورئه سوي عشا .. خمسه دقيقه انا في شوف عشا خلاص
بعد خمسه دقيقه هو وجهه .. وش يمديني اسوي فيها هذي .. قمت بقهر وغسلت وجهي ورحت المطبخ
الحين وش يبون عشا ذولا .. يلا اكيد نفس كل يوم فول وفلفل .. الله يسد نفوسهم
انا ماعرف شلون اسويه اصلا .. رحت خذيت علبة الفول وحطيته في قدر وحطيته على النار لين حسيته ذاب شوي وحطيته في صحن وحطيت خبز ووديته لهم .. وحطيته ورحت
وانا رايح سمعت اصواتهم وتذمرهم : ليش مافي ملح .. ليش مافي طبخ زين .. وين فلفل
احمدوا ربكم اني مسويلكم بعد
رحت للغرفة وكنت جائع وفيني النوم .. فتحت دفتر اشتريته قبل فتره
عشان كلما ضاق صدري كتبت .. بافرغ همومي كلها ع الورق
فتحته وكنت اول مره اكتب .. وما اتوقع انها اخر مره
سأنام بهدوء وكلي يقين **** بإن ربي سيكون لي معين
لعل غدي يكون افضل **** لعل بالصبر الفرج يأتين
سكرت الدفتر ونمت ... وأملي بربي كبير .
@@@@@@@@@@@@@@@@@@@@@@@@@
(راكان)
كنت منسدح على السرير افكر ... الحين صار له يومين من طلع .. ومايرد على الجوال ولا شي
اه وش حالتك يا ابراهيم .. شبعان ولا جوعان ... متضايق ولا فرحان ... مرتاح ولا تعبان ؟
بس لو انك انتظرت شوي ... لو انك ماتسرعت بفهمك وظنك لي .. ولا لو انك ترد علي بس اتطمن انك بخير ... كان ماصرت بحالتي هذي
انا خايف وقلق عليك كثير ... يارب يحس ضميرك وترد علي
دقيت عليه بالجوال بمحاولة يائسه .. لكن مارد ... مثل ماتوقعت
تنهدت بحزن ... ونمت وانا مهموم
وناموا ابطالنا ... وكل واحد يحمل على صدره جبال ثقيله من الهموم ....
@@@@@@@@@@@@@@@@@@@@@@@@@@
صباح جديد لأبطالنا الحلوين ☺
الساعه التاسعه صباحا
(ابراهيم)
قمت الصبح بدري كالعاده ... دخلت المطبخ ادور لي فطور .. افف مافي شي اكله
ثلاجة هنود وش تتوقعون يكون فيها ؟
قررت اروح السوبر ماركت اشتري لي ... بس تذكرت ان ماعندي سيارة
دخل واحد من الهنود المطبخ وجلس يشرب ماء ... وانا اناظره
: ايس فيه ؟
ابراهيم: يعقوب ماتعرف سوبر ماركت قريب من هنا ؟
يعقوب: ايوا فيه سوبر ماركت قريب .. قدام هذا هوسبيتال >مستشفى
ابراهيم: مشكور
وطلعت ورحت للسوبر ماركت مشي .. وصلت ورحت اشتري اغراضي
وانا اتسوق شدني منظر اب مع اثنين من اولاده
الولد1 : يبه وش نجاحتنا ؟
الولد 2: ايه صح .. باقي اسبوع ونخلص من الترم الاول
الاب بضحكه: بس توكم ماخلصتوا السنه .. باقي لكم ترم ثاني
الولد 2 ببتسامة : عادي يبه
الاب ببتسامة: خلاص انشالله اذا طلعت الشهادات لكم مني اللي تبون
الولد 1: يبه اذا خلصنا ابغى اشتري بليستيشن 3
الاب ببتسامة: انشالله .. كم عندي من تركي انا ؟
الولد 2بفرحه: وانا بعد ابي اشتري لاب توب
الاب ببتسامة : انشالله من عيوني .. انا بشتري اللاب توب والبلايستيشن من الحين .. وبالاجازه بعطيكم اياه .. بس هاه لا يلهيكم عن دراستكم
الاولاد: مشكووور يبه
الولد 2 بفرحه: يبه صدق انت فله
الاب: ههههه حبيبي انت
ابتسمت بحزن وانا اطالعهم .. انا محروم ولا عمري حسيت بهالشعور .. ياحظهم بهالأب الحنون
الاب انتبه اني اطالعهم بحزن: في شي يا اخوي ؟
ابراهيم بغصه : لا .. بس باقولك شي .. مافي اصدق من نصيحة انسان عاش التجربه .. وانا بقولك نصيحتي .. انتبه لعيالك زين وعطهم اللي يبونه ..لا تقصر عليهم بشي .. لا تخليهم يحتاجون لأحد ... لاتخليهم محرومين .. مثلي
الاب تأثر وبنفس الوقت استغرب والعيال مصدومين .. شلت اغراضي ورحت عنهم
حاسبت وشلت اغراضي وطلعت
ورحت عند البحر .. البحر جميل .. تحس انك ودك ترمي همومك كلها عليه ويجرفها البحر لبعيييد .. وتتخلص منها للأبد
جلست على صخره كبيره نوعا ما وانا اتأمل البحر .. والسفن تسري عليه ..ومنظر الطيور وهي تطير وتحوم حوله وتبحث عن طعام.. حتى الطيور واثقه ومتيقنه بإن الله بيرزقها ما تسد فيه جوعها .. وانا كيف ايأس من رزق ربي ؟! .. تذكرت قول الرسول صلى الله عليه وسلم ( لو أنكم كنتم توكلون على الله حق توكله لرزقتم كما يرزق الطير تغدو خماصا وتروح بطانا) .. حتى الطيور ماينساها رب العالمين .. تروح في الصباح وهي جائعه وترجع وهي مليئة البطون .. وانا عبد من عباد الله كيف ايأس من رزق ربي ورحمته .. كيف ما اتوكل على ربي وهو حسبي .. (وعلى الله فتوكلوا ان كنتم مؤمنين) .. اللهم إني توكلت عليك فارزقني من حيث لا احتسب وانصرني على من ظلمني يا ارحم الراحمين
قمت من عند البحر وشلت اغراضي ورحت للشقه وحطيتها.. ثم رحت الشغل وانا متفائل ومحسن الظن بالله
@@@@@@@@@@@@@@@@@@@@@@@@@
(راكان)
قمت الصبح وانا نصي نوم وطفشان ومنسده نفسي
تجهزت على السريع ورحت للمطبخ وأول مادخلت انسدت نفسي اكثر
الله لايوريكم شكل المطبخ كيف كان
المواعين الوصخه واصله للسقف من كثرها .. والفرن وصخ ومواعين عليه من 3 ايام ماحد شالها .. والثلاجه مفتوحه والاكل طالع برا .. لاني امس شريت اغراض من السوبر ماركت وكانت الثلاجة مليانه من الاصل وماعرفت ارتبها واحطها زين .. حطيت الاغراض كلها بأكياسها وكراتينها بالثلاجة وسكرتها بصعوبه .. يمكن هذا اللي خلا الثلاجة تنفتح والاغراض تنكب لان شكلها انفجرت امس بالليل
يالله شكل مافي فطور اليوم .. باضطر افطر من المطعم واتأخر نفس كل يوم .. جيت باشرب مويه بس طلع مافيه كاس .. او بالاصح مافي ولا كاس نظيف
يالبيه يا ابراهيم .. كان كل يوم ينظف المطبخ ويغسل المواعين ويكنس ويجهز الفطور .. اقوم الصبح القى المطبخ يلمع من النظافة والطاولة مليانه اكل تنفتح نفسي لا قمت .. مو الحين لا دخلت المطبخ تلطمت من الريحه الخايسه
هذا وهو ماصار على طلعته الا 3 ايام بس .. الله يعيني بالايام الجاية
انا فاقده من جميع النواحي .. من ناحية التنظيف والترتيب والاهتمام .. ومن ناحية اني مو لاقي احد يسولف معي ويونس وحدتي
مستحيل اجيب عامل ينظف ويرتب .. لاني من بعد سالفة راج ماعاد صرت اثق في احد .. اجل يجيني واحد الله اعلم باخلاقه أأمنه على استراحتي واخليه كل يوم يجهز لي الاكل والله اعلم بنظافته
اففف بس .. وش هالحاله ياربي
اخذت سيارتي ورحت للجامعة .. ووصلت متأخر
دخلت المحاضرة ووقفني الدكتور : راكان وش فيك متأخر ؟
راكان: عندي ظروف يا دكتور
الدكتور: تدري هذي مو اول مره تتأخر.. وكل مره تقولي ظروف وظروف
راكان: اسف بس مضطر اتأخر
الدكتور: الحين راحت نص ساعه من المحاضرة .. اذا تأخرت مره ثانية مراح ادخلك .. ادخل يله
اففف اليوم يومي كله زفت .. خاربه خاربه
@@@@@@@@@@@@@@@@@@@@@@@@@
(ابراهيم)
رحت لسوق الخضار ودخلت المحل
ابو محمد: زين جاي بدري .. تعال عد الفلوس
ابراهيم: ما جوا زباين اليوم ؟
ابو محمد: لا .. اليوم حتى الذباب ما مر .. الظاهر يوم جيت انت نحشت الزباين من المحل
طنشته: يلا عطني الفلوس
وعطاني وجلست اعدها
ابو محمد: ها كم صاروا؟
ابراهيم: 435 ريال
ابو محمد: زين .. عطني اياه "وعطيته"
جا رجال للمحل: لو سمحت بكم كيس البصل هذا ؟
ابو محمد: هذا ب 15 ريال .. وعشانك بخليه ب 10
يا كذبه.. هو اصلا من الاساس ب 10 ريال .. وابو محمد زوده عشان يخصم منه للرجال ويورينا انه كريم
صدق ما يستحي
الرجال: مشكور ماتقصر .. "وعطاه الفلوس"
ابو محمد: الله يغنيك .. ابراهيم قم شيل الكيس بسرعه
لييش! .. الكيس صغير وخفيف وش حقه اشيله ؟
قلت هالكلام بقلبي طبعا .. أي انا من وين لي القوة عشان اعترض واهاوش .. لو قلت شي ابو محمد بيطلع البصل من الخيشه وبيدخلني مكانه
شلت الكيس ووديته لسيارة الزبون .. وعطاني 10 ريال .. اخذتها وشكرته ورجعت للمحل
قلت وانا اناظر الطماط: ابو محمد الطماط خربان
ابو محمد: خله .. محد راح يشوفه
ابراهيم: بس حرام هذا غش
ابو محمد بعصبيه: وانت وش عليك ؟ رزقي ذا ولا رزقك؟ شف شغلك وانت ساكت
بسم الله اكلني بقشوري .. جعلك تخسر كل فلوسك امين
جا زبون اخر: بكم الجزر ؟
ابو محمد: 20 ريال
الزبون: والطماط
ابو محمد: ب 30 ريال
الزبون: ليش 30 غالي
ابو محمد : ايه هذا نوعيه ممتازه بارك الله فيك
ناظرت الزبون وغمزت له واشرت على الطماط .. والحمدلله فهم
وقام يقلب الطماط فوق تحت
الزبون: حجي هذا خربان وانت تقولي ممتاز ؟
ابو محمد بفشله: ايه اسف مادريت اكيد خرب من الشمس .. الحين اجيب لك واحد ثاني
الزبون: لا مابي اشتري منك يالغشاش "وراح"
هههههههههههههه احسن تفشل
ابراهيم كاتم ضحكته: قلت لك الطماط خربان ليه ماغيرته
ابو محمد بعصبيه: انت جب ولا كلمة
كتمت ضحكتي لا يعصب ويطردني
أذن الظهر وطلعت من المحل ابي اصلي
وانا طالع ناداني الرجال اللي فشل ابو محمد .. ورحت له
ابراهيم: سم ؟
الرجال طلع من جيبه 100 ريال : هذي هديه لك على أمانتك وصدقك
ابراهيم: لا شكرا .. هذا واجبي
الرجال ببتسامه: يله اعتبرها هديه .. خذها ولا تردني
اخذتها: مشكور الله يغنيك
الرجال: انت تشتغل في هذا المحل؟
ابراهيم: ايه
الرجال: حسافه
ابراهيم: ليه؟
الرجال: لا بس يعني شاب صغير بعمرك .. وحلو .. حرام يشتغل هالشغله
ابراهيم بحزن: وش اسوي .. الحاجه هي اللي اجبرتني على كذا
حط يده على كتفي: الله يرزقك على قد نيتك
ابراهيم: امين .. مشكور ياخوي
الرجال: العفو
ورحت اصلي الظهر .. ورجعت للشقة ارتاح واتغدى
وصلت للشقة ودخلت للمطبخ .. وفتحت للثلاجة ومالقيت اغراضي .. اغراضي اللي شريتها اليوم من السوبر ماركت وينها ؟؟
فتشت في المطبخ كله مالقيت شي .. رحت للصاله لقيت اكياسي فاضيه وما فيه الا قراطيس الاكل
اكلوه الهنود حسبي الله عليهم
فتشت في الاكياس يمكن القى شي نسوا ياكلونه .. بس مالقيت الا حبة بطاطس طايحه على الارض
حسبي الله عليهم جعله سم في بطونهم .. ياربي الحين وش اكل ؟
دخلو الهنود للشقه راجعين من شغلهم
صرخت عليهم: ليش اكلتوا اغراضي يا كلاب ؟
واحد من الهنود: ايش اغراض مافي معلوم وش يقول انتا
ابراهيم بعصبيه: الاكل اللي اشتريته اليوم الصبح وين وديتوه ؟
طلع الهندي المتسلط و ال big boss من غرفته : ايس فيه ؟
ابراهيم بعصبيه: اكيد انت اللي اكلته
الهندي بهمنير > رحبوا فيه شخصية جديده بروايتنا ☺
بهمنير ببرود: ايوا انا أكل
صرخت عليه: ليش يا حمار ؟
طراخ
عطاني كف قوي على خدي
شهقوا الهنود من الصدمه
انا مسكت خدي بألم .. وانا مصدوم كيف يتجرئ الكلب
كان نفسي اضربه وارد له الكف كفين .. لكن انا وين وهو وين
هو دب وطويل وعريض .. وانا نحيف وصغير .. وين بقدر عليه هذا
بهمنير بتهديد: كلوا نفر صرخ على انا .. انا في سوي سمسم كذا
ودخل لغرفته
وانا رحت للغرفه على طول وسكرت على نفسي
حاولت امسك نفسي ما ابكي .. لكن دموعي نزلت غصب .. وبكيت
مو من كف بهمنير لا .. من كف الدنيا القاسية
بكيت على حالتي .. اللي كلما حسيت انها تفرجت القاها تضيق اكثر واكثر
بهاللحظه ما تمنيت يكون بجنبي الا راكان .. هو الوحيد اللي يقدر يواسيني ويطيب خاطري .. هو الوحيد اللي احسه ينزع الالم من صدري بكلامه الحلو والحنون .
استمريت على هالحال ابكي.. الا دخل علي واحد وكان باكستاني
كان اطيب واحد فيهم .. جا وجلس جنبي يقاله يواسيني
الباكستاني: كلاص ابراهيم كلاص هبيبي .. لا تبكي كلاص .. هذا واهد مجنون كبير .. مافي ابكي كتير بئدين يصير تئبان .. كلاص هبيبي قوم غسل وجه
انا اذا كل واهد عطي انا كف وابكي كان كل يوم انا ابكي .. بس انا قول مافي شي يزعل انا .. اذا احد زعل انا تعرف وش يسوي انا ؟ .. انا في انسى كلوا شي كلاص مافي فكر كتير .. اذا احد قول حق انا كلام مو زين انا مافي يرد .. بعدين هو يصير مقهور >> حكيم بصراحه ☺
يلا قوم غسيل وجه وصير قوي سيمسم انا
ابتسمت بحزن .. ياحليله .. قمت اغسل وجهي وانا اتحسب على بهمنير
@@@@@@@@@@@@@@@@@@@@@@@@@
(راكان)
الدكتور يتكلم وانا بالي مو معاه .. تفكيري رايح لبعيييييد
الدكتور: راكان وين وصلت ؟
راكان بفهاوه: هاه
الطلاب ضحكوا علي .. عدلت جلستي وانتبهت
الدكتور ببتسامة: تقدر تقولي وين وصلنا ؟
ماعرفت اجاوب وتورطت.. القيت نظرة سريعه على دفتر زميلي اللي بجنبي .. ولقطت اول كلمة وقلتها
راكان ببتسامة واثقه: طب التشريح
الدكتور: بدري .. صح النوم .. هذا متعدينه من زمان
اففف مالت على الكسلان اللي بجنبي ... ليه متأخر بالكتابة >> والله مادري من هو الكسلان ☺
الدكتور: شفت انك مو معي .. تفضل برا لو سمحت .. انا مو محتاجك عندي بالكلاس
ناظرته بقهر ... وطلعت وانا اتحلطم
افف جوعان ما افطرت اليوم .. بروح للمطعم اتغدى .. وبرجع للاستراحة خلاص مالي خلق محاضرات .. هي خاربه خاربه خلني اعميها
ورحت للمطعم وطلبت غداء واكلت.. ورجعت للاستراحة
مالقيت شي اسوي الا اني انام .. حطيت راسي ونمت
@@@@@@@@@@@@@@@@@@@@@@@@
(ابراهيم)
غسلت وجهي وطلعت من الشقة على طول .. مابي اقعد بالشقة تجيب لي الكئابة .. ماراح اجي الا وقت النوم بس
رحت للمحل .. وكملت شغلي كالعاده
@@@@@@@@@@@@@@@@@@@@@@@@@
نقف هنا
ردودكم وتوقعاتكم حبايبي

رد: روايةة الدنيا ياصاحبي كلها مآسي وأحزان ما تضيق الا بالصبر تهان / منقولةة

الجزء السادس
عمق الأحداث
(ابراهيم)
غسلت وجهي وطلعت من الشقة على طول .. مابي اقعد بالشقة تجيب لي الكئابة .. ماراح اجي الا وقت النوم بس
رحت للمحل .. وكملت شغلي كالعاده
ابو محمد: ترا بتجي البضاعه الجديده بعد شوي .. شيل الصناديق وحطها في المحل
ابراهيم: طيب
وجت الشاحنة بالبضاعه .. صرت اشيل الصناديق انا والعمال واحطها في المحل
اشتغلت كثير وحسيت اني تعبت .. خصوصا مع هالشمس الحاره
جلست على الكرسي ارتاح شوي .. مادري وش فيني
أي صح تذكرت .. اليوم ما اكلت شي ما تغديت ولا افطرت ولا تعشيت امس .. احس اني تعبان ودايخ
ابو محمد: وش فيك قعدت ؟؟ .. يلا كمل شغلك وساعد العمال
قمت من الكرسي بتعب .. ومع حرارة الشمس والجوع والدوخه ..
طحت ع الارض وغبت عن الوعي ...
@@@@@@@@@@@@@@@@@@@@@@@@@
الساعة 6 مساء
قمت ولقيت نفسي في المستشفى .. وحاطين لي مغذي وكمام بخار
مادري كم صار لي مغمى علي .. مادري من جابني للمستشفى
دخل الدكتور علي وشال الكمام عني
ببتسامة: ها شلونك الحين ؟
ابراهيم: تعبان شوي .. من جابني لهنا ؟
الدكتور: جابك شايب وحطك وراح .. حتى بطاقتك ماعطانا اياه .. مين هذا الشايب؟ ابوك ؟
ابراهيم بحزن: لا .. هذا واحد اشتغل عنده .. دكتور انا وش فيني ؟
الدكتور بأسى: عندك فقر دم حاد .. وسوء في التغذية .. وضعف عام في الجسم
حبيبي ليش ماتاكل زين ؟ .. "مسك يدي" شوف كيف انت نحيف وضعيف .. ليش مهمل نفسك ؟
تنهدت .. وش اقوله الحين ؟ .. اقوله اني مو لاقي اكل عشان اكل ؟
سكتت وما رديت .. وما عندي رد اصلا
ابراهيم: دكتور متى اطلع ؟
الدكتور: اذا تحسنت حالتك شوي .. اما الحين انا اسف ما اقدر .. حالتك سيئه جدا
ابراهيم بحزن: وش اسوي طيب ؟
الدكتور: كل أكل صحي ومفيد .. وانا بكتب لك اكلات معينة تاكلها .. ولا تجهد نفسك كثير .. وتحتاج للراحة خصوصا ان فيك فقر دم واجهاد
ابراهيم: ما اقدر يا دكتور .. انا اضطر اشتغل من الساعه 10 الصبح الى العشاء
الدكتور: طيب ماتقدر تاخذ اجازة ؟
ابراهيم: لا
الدكتور: انا بكتب لك اجازة مرضية .. مايصلح تتهاون بصحتك عشان شغل
هه ياحليله !
ابراهيم:يادكتور انا ماشتغل بشركة ولا دائرة حكومية عشان تكتب لي اجازة
الدكتور بحيرة : اجل وين تشتغل ؟
ابراهيم بتردد: اشتغل في محل .. وصاحب المحل ماراح يعطيني اجازة
الدكتور: كلمه وانشالله بيرضى
ابراهيم: لا ماراح يرضى .. ا هو عصبي ومايحبني اكيد بيرفض
الدكتور بتعاطف: طيب يا اخوي عطني رقمه ابي اكلمه .. مو معقوله يخليك تشتغل وانت بهالحاله .. اصلا ماراح تقدر .. عطني رقمه وانا بتفاهم معه
ابراهيم بعد تردد: طيب
وعطيته الرقم .. وكلمه شوي ورجع
الدكتور ببتسامة: انا كلمته وانشالله انه وافق
ابراهيم: انشالله
الدكتور: بسألك سؤال ممكن ؟
ابراهيم: تفضل
الدكتور: وش اللي حادك تشتغل عنده بما انه عصبي واخلاقه شينه؟
ابراهيم بحزن: الحاجة ياخوي
الدكتور بحزن: انا اسف ماكنت ادري انك فقير
ابراهيم: لا مو فقير
الدكتور باستغراب: اجل ايش ؟
وقلتله سالفتي كلها .. بس ماقلتله عن ابوي شي .. قلت ان ابوي وامي ماتوا واني يتيم
الدكتور بتعاطف: حسبي الله على من ظلمك .. وربي كسرت خاطري ماكنت ادري ان فيه ناس كذا .. يعانون تحت مجتمع ما يرحم
الله ينصرك على من ظلمك ويرزقك على قد نيتك .. شوف يا اخوي انا بعطيك رقمي .. واذا حسيت انك حزين ومتضايق .. دق علي وفضفض لي .. يمكن اقدر اواسيك واساعدك بشي .. واذا احتجت مساعدة مالية قولي .. تراني اعين واعاون .. لعل الله يكتب لي اجر فيك
لا حول ولا قوة الا بالله .. شاب صغير بعمرك المفروض ينبسط ويعيش احلى مراحل عمره .. مو يتنكد ويتضايق ويشيل هموم اكبر منه
انا بدعيلك بصلاتي كل يوم .. الله يفرج همنا وهمك ياخوي .. لاتنسى تدق علي كل ما احتجت شي .. كلما تضايقت دق علي .. وانا انشالله اني بدور لك وظيفة مناسبة غير وظيفتك .. تلقى منها رزق ينفعك
ابراهيم: مشكور يا اخوي الله لا يحرمك الاجر
الدكتور: العفو .. هذا رقمي **********
اخذت الرقم وسجلته بجوالي
الدكتور: يله يا اخوي انا استأذن .. بخليك ترتاح شوي
ابراهيم: اذنك معاك "وطلع"
الناس نوعين .. نوع يذلوني ويستغلون ضعفي ويتكبرون علي .. ونوع يشفقون علي
ولاني مستفيد من ذولا ولا ذولا .. بكل الحالتين انا حاس بنقص .. وحاس اني مهان
@@@@@@@@@@@@@@@@@@@@@@@@@@
بعد مرور يومين
اليوم ثالث يوم لي بالمستشفى .. يقول الدكتور حالتي تحسنت الحمدلله .. لكنه مو راضي يطلعني
ابراهيم: دكتور ترا والله طفشت طول الوقت منسدح مليت ابي اطلع
الدكتور ببتسامة: مراح تطلع لين اتطمن عليك
ابراهيم: هذاك تطمنت علي وانا بخير .. يله طلعني
الدكتور: اخاف يصير لك شي لا سمح الله
ابراهيم: لا انشالله مو صاير لي شي .. انت بس اكتب لي الادوية اللي احتاجها .. وانا باخذها بانتظام .. لاتخاف تطمن
الدكتور: اوكي خلاص .. بس توعدني انك ترتاح وما تجهد نفسك ؟
ابراهيم ببتسامة: اوعدك
وكتب لي الادوية .. وبعض النصائح .. ثم سجلت خروج
حبوب ذا الانسان .. يا حليله
طلعت ورحت الصيدلية وعطاني الادوية .. كانت كثيرة وكلها فيتامينات وحديد
رحت للشقة ودخلت .. لقيت الهنود مسنترين بالصالة ويلعبون كيرم
ابراهيم: السلام عليكم
الكل: وعليكم سلام
رحت وجلست بعيد عنهم
يعقوب: انت وين في روح ؟
ابراهيم: للمستشفى
يعقوب باستغراب: ثلاثه يوم ؟
ابراهيم: ايه ثلاثه يوم .. قصدي ثلاث ايام > من عاشر قوما اصبح منهم
سكت .. وكملوا لعبهم
دخل بهمنير وقاموا كلهم من الخوف وتخبوا ورا بعض > صدق هنود
بهمنير: وين ابراهيم ؟
ابراهيم: خير ؟
جا وقرب مني: انت مافي معلوم شنو شغل ؟ .. شغل انت سوي طبخ غسل كنس .. ليش مافي نظف غرفه انا ؟
ابراهيم: كنت بالمستشفى وقبل شوي جيت .. وبعدين ليش انظف غرفتك؟ .. انت اصلا عمرك طلعت من الغرفة عشان انظفها
بهمنير: غرفة انا حق انا .. اطلع اذا انا يبغى .. انت مافي شغل .. "بعصبية" يلا روح كنس غرفة .. يعقوب
يعقوب بخوف: نعم بابا ؟
بهمنير: روح شوف ابراهيم .. مافي خلي ياخذ شي مني ولا مني "يعني يسرق"
ناظرته باحتقار وكره
يعقوب: انشالله بابا
بهمنير يصرخ علي: يلا روح .. نفر سعودي كله كسلان .. غبي
ابراهيم بعصبية: اذا مو عاجبتك السعودية انقلع للهند ليش جاي هنا .. صدق وقح
واخذني يعقوب ورحت معه للغرفة .. اول شي سويته تلطمت من القرف والريحه
واخذت مكنسة وبديت اكنس .. ويعقوب يساعدني
يعقوب: ابراهيم انت ليش في اقعد هنا ؟ .. انت مافي بيت ؟
ابراهيم: لا .. انا فقير
يعقوب: الله كريم
ابراهيم: يعقوب انت وين تشتغل؟
يعقوب: انا شغل في ورشة سيارات
ابراهيم: وراتبك زين ؟
يعقوب: 800 ريال
سكتت وكملنا شغل كنسنا ونظفنا ورتبنا الغرفة .. حشى مو غرفة مزبلة .. حوسه لأبعد حد تقول ثايره فيها قنبله ذريه
ماخلصنا الا بعد ساعة ومنهده حيلنا من التعب .. صارت الساعة 11
اخذت شور ثم رحت اغسل ملابسي .. تذكرت لما كنت اشتغل عند راكان.. انظف واغسل وارتب زي كذا .. ابتسمت
ما اشبه اليوم بالبارحة .. ولكن أين اليوم واين البارحة
اشتقت لراكان كثير .. هو الوحيد اللي كان يقدر يرسم الابتسامة على وجهي بسهولة .. هو الوحيد اللي كان يفرحني ويبعد حزني بسهولة .. ماقد فرحت وانبسطت كثر فرحتي وسعادتي معه .. الله يسعده مثل ما اسعدني
ياترى هو وش يسوي الحين ؟ .. مشتاق لي ولا مرتاح من همي؟ .. زعلان على فراقي ولا مبسوط ؟ .. يفكر فيني ولا ناسيني ؟
ع العموم .. بكل الحالات انا ما اكرهه وماراح انسى فضله علي .. الله يوفقه وين ما راح
@@@@@@@@@@@@@@@@@@@@@@@@@@
اليوم التالي
صحيت الساعة 10 الصبح .. قررت اروح لابو محمد اشوف وش عنده .. من امس وهو يدق علي
رحت ودخلت المحل: السلام عليكم
ابو محمد: اخيرا شرفت؟ .. كان ماجيت احسن
ابراهيم: يا ابو محمد انت تعرف ظروفي .. انا كنت مريض بالمستشفى وانت بنفسك اللي وديتني .. ومقدر اشتغل وانا تعبان
ابو محمد: ايه انا عارف .. عشان كذا باقولك اطلع خلاص انا مو محتاجك عندي في المحل
ابراهيم بصدمه: ليييش ؟ .. انا غبت يومين بس عن الشغل .. صدقني مراح اعودها مره ثانية
ابو محمد: وانا مو مضطر ادفع لك فلوس كل يوم وانت شغلك كذا .. حتى لو ماغبت من زين شغلك عاد
ابراهيم بترجي: تكفى يابو محمد طلبتك عطني فرصة ثانية .. والله بشد حيلي بالشغل وماراح اغيب ولا اتأخر ولا يوم
ابو محمد: بعطيك فرصة يومين بس .. وان شفت عليك غلطة ولو بسيطة على طول بطردك .. فاهم ؟
ابراهيم: ايه والله فهمت
ابو محمد: يلا قوم شيل الصناديق هذي وحطها في المحل
وبديت اشتغل واشيل الصناديق وهو يتامر علي .. شيل هذا حط هذا سو كذا ولا تسوي كذا.. كأني خادم عنده
ويقسي علي لا اخطأت ولو خطأ بسيط .. ويتلفظ علي بكلمات جارحه
وانا كنت اصبر واتحمل .. ومن لم يصبر على ذل العمل ساعة صبر على ذل المسأله طيل حياته
اشتغلت كثير لين أذن الظهر
ابراهيم: ابو محمد.. أذن انا بروح اصلي
ابو محمد: ايه بس اول ماتخلص من الصلاة ارجع على طول
ابراهيم: طيب
ورحت للمسجد اصلي .. وبعد ما خلصت صلاة قررت اقرأ صفحتين من القران لمدة خمس دقايق .. وقريت اول صفحتين .. وحسيت بالراحة .. ومع هالشعور الحلو نسيت نفسي وكملت قراءه وصرت اقرأ واقرأ ....
@@@@@@@@@@@@@@@@@@@@@@@@@@
(راكان)
رحت لسوق الخضار اشتري .. الثلاجة فاضيه ومحتاجه اغراض
رحت لأول محل على دخلة السوق .. وكان دكان صغير شوي
راكان: السلام عليكم
ابو محمد يكلم نفسه: شفيه ابراهيم الغبي تأخر .. ويقول بعد عطني فرصة ولا تطردني .. هذا ما يستاهل
راكان: لو سمحت
ابو محمد انتبه: هاه هلا هلا
راكان: عطني خيار وخس
ابو محمد: انشالله "وراح يجيب الاغراض"
جلست انتظره .. وشفت جوال على الطاولة وفيه ميداليه شكلها غريب .. هذا الجوال كأني شايفه من قبل !
انا وين شايف هالجوال من قبل ؟ .. حتى الميداليه شكلها مميز مو غريب علي ؟
جلست افكر شوي
أي صح تذكرت ! .. ابراهيم !!!!!
انصدمت .. هذا جوال ابراهيم انا متأكد .. بس وش جابه هنا ؟
قطع علي افكاري البائع وهو يجيب الخيار والخس ويحطهم في كيس
ابو محمد: تفضل
اخذت الكيس وعطيته الفلوس .. وتوني بروح الا رجعت بسرعه .. ما قدرت احبس فضولي
راكان: هذا جوالك ؟
ابو محمد: ليش تسأل ؟
راكان: جاوبني هذا جوالك ؟
ابو محمد بتشكيك: ايه جوالي وش تبغى فيه ؟
راكان: لا بس اسأل
معقولة يكون ابراهيم بايع جواله ؟ .. ايه صح هو مايرد على مكالماتي ودايم جواله مقفل .. اكيد باع جواله
بس ليش باعه؟ .. اكيد احتاج فلوس واضطر يبيعه .. يا عمري يا ابراهيم
تنهدت بحزن .. يعني مافي امل اكلمه ولا اعرف اخباره للأبد
تنهدت بضيق .. واخذت الكيس وطلعت
@@@@@@@@@@@@@@@@@@@@@@@@@
بعد دقيقه
(ابراهيم)
شفت الساعة وانصدمت .. الحين مرت ساعة من انتهت صلاة الظهر .. وانا مارجعت !
سكرت المصحف بخوف وطلعت من المسجد ورحت للسوق ركض

وصلت السوق .. وانا اركض شفت سيارة سوداء كشخه طالعه من محل ابو محمد (طبعا هو جاي من ورا وما شاف الا قفا السيارة .. وما شاف راكان )
اكيد صاحبها غني .. وش جابه لمحل ابو محمد المخيس ؟ .. طنشت الموضوع
وصلت للمحل وانا اتنفس بتعب : انا اسف على تأخيري .. كنت اقرا قران وما انتبهت للوقت
ابو محمد بسخريه: ايييه غريب عليك التأخير اول مره تتأخر
حسيته يتطنز علي .. مالت عليه
ابو محمد: خذ جوالك نسيته .. كان واحد حاط عينه عليه شكله ناوي يسرقه > سوء ظن
ابراهيم: مشكور
وكملت الشغل كالعاده .. لين اذن العشاء وخلص شغلي .. اخذت راتبي واللي سميته راتب ولا هو مايستاهل اصلا .. ورحت للشقة
وقعدت مع الهنود
ايه تذكرت .. الدواء ما اكلته اليوم .. رحت للغرفة وفتحت علبة الادوية
انا ما اكلت شي اليوم .. ومقدر اكل الدواء على معدة فاضيه
سمعت صوت بهمنير يزاعق : ابراهيييم .. ابراهييييييييييييم
لاحوول وش يبي هذا ؟
ابراهيم: خيييييييير
دخل علي الغرفة: يلا قوم
ابراهيم: وين؟
بهمنير: شنو وين ؟ يلا قوم سوي عشا
ابراهيم: اففف
بهمنير بعصبيه: مافي عاجب انت روه برا "مو عاجبك اذلف برا"
ابراهيم بقهر: زين زين لا تنافخ
ورحت اسوي للكلاب عشا .. امحق عشا
شوفوا هو شكله حلو .. لكن طعمه يلوع الكبد
يلا يحمدون ربهم ويخب عليهم بعد
رحت حطيته لهم .. وما اخذت لي شوي لاني انا بنفسي مو مشتهيه
حطيته واول ماذاقوه اللي راح للحمام وانتوا بكرامه.. واللي شرب جيك ماء واللي تفله من فمه على طول
ههههههههه احسن
بهمنير بقرف:اععع ايش هذا .. اعوذ بالله .. انت مافي معلوم طبخ
ابراهيم ببتسامة: اللي مو عاجبه يشمر اكمامه ويدخل المطبخ يسوي له .. انا هذا طبخي
بهمنير: يعقوب .. روه مطعم جيب اكل كويس .. هذا اكل مافي زين ابد
يعقوب: انشالله بابا
بهمنير: جيب مال خمسه نفر بس
الهنود كانوا خمسة وانا السادس .. وواضح انه كان يقصدني
بهمنير: ايوا جيب مال خمسه بس "وناظرني" مافي جيب حق هذا .. معلوم يعقوب
يعقوب يناظرني بشفقه: انشالله بابا .. "وراح"
يالييل الحين شلون باكل الدواء وانا ما اكلت شي ؟!
رحت للغرفة بقهر .. ونمت وانا جائع
@@@@@@@@@@@@@@@@@@@@@@@@@@
(راكان)
انسدحت على السرير وجلست افكر باللي صار اليوم
الحين يوم سألت الرجال عن الجوال ليش عصب وكأنه مسوي شي غلط .. لو كان جواله كان جاوب بشكل عادي وبهدوء
يمكن يكون سارقه .. أي ممكن ليش لا
فجأه تذكرت الكلام اللي سمعته وهو يكلم نفسه
"شفيه ابراهيم الغبي تأخر .. ويقول بعد عطني فرصة ولا تطردني .. هذا ما يستاهل"
ربطت سالفة الجوال باسم ابراهيم اللي سمعت الرجال يقوله
قمت من السرير بصدمه .. معقوله !!
معقوله ابراهيم يكون قاعد عنده .. او يشتغل عنده !
يمكن ابراهيم يشتغل بسوق الخضار .. بس وش يشتغل ؟
انا لازم بكرا اروح للمحل باقرب وقت واعرف بنفسي
بس بكرا علي جامعة .. اففف شلون بروح .. بحاول اطلع من الجامعة العصر واروح للمحل على طول
ودي يجي بكرا بسرعه .. يارب القاك يا ابراهيم يارب
@@@@@@@@@@@@@@@@@@@@@@@@@
الساعة الثانيه ليلا
(ابراهيم)
كنت نايم .. وحسيت بأحد يصحيني .. قمت وكان الباكستاني اللي ساكن معي
الباكستاني: ابراهيم يلا قوم .. انا في يجيب اكل حق انت .. انا يعرف انت جوعان صح ؟ .. يلا كل هبيبي .. مافي زعلان كثير من بهمنير هذا صرصور كبير >
.. هذا مافي زين أبد .. هذا مافي كويس عند الله .. مافي زعلان كثير .. يلا كل هبيبي
ابتسمت .. ياحليله حبوب ذا الانسان
ابراهيم ببتسامة: مشكور والله .. الله يوفقك ويعطيك العافية
الباكستاني: امين .. يلا انا في روه الحين .. بعدين بهمنير يشوف انا .. ممكن ذبح انا
ابراهيم: هههههههههه .. بهمنير صدق مبهذلكم .. ومبهذلني معكم .. الله لا يوفقه
الباكستاني: امين .. ايوه هذا مافي زين أبد .. يلا انا روه
ابراهيم ببتسامة: شكرا مره ثانيه "وراح"
ياحبيله .. جلست اكل والحمدلله انه جاب لي اكل زين .. مو اكل هنود
شبعت وخلصت اكلي ورحت اكل الدواء .. تذكرت نصائح الدكتور
يقولي التزم الراحة ولا تجهد نفسك .. وانا شلون ارتاح وانا بهالمكان ؟
لا وبعد كاتب لي اكلات محدده اكلها .. ومفيدة لفقر الدم
الحين خلني القى لقمة تسد جوعي .. وبعدين اكتب لي اكلات معينة
يالله باخذ الدواء و بانتظم عليه لعل وعسى يفيدني
اكلت الدواء .. ورحت انام
@@@@@@@@@@@@@@@@@@@@@@@@@@
نهاية الجزء السادس
تتوقعون راكان يلقى ابراهيم ؟
وتتوقعون كيف بيلقاه ؟
هل ابو محمد بيكون له دور في هالشي ويساعد راكان؟ ولا بيكون نذل كعادته ؟
انتظر ردودكم وتوقعاتكم حبايبي

رد: روايةة الدنيا ياصاحبي كلها مآسي وأحزان ما تضيق الا بالصبر تهان / منقولةة

هذا البارت لعيون بقايا شتات

الجزء السابع



عمق الأحداث
(ابراهيم)

قمت من النوم الظهر .. شفت الساعة 1 ظهرا

قمت بسرعة بخوف .. ياويلي تأخرت عن ابو محمد 3 ساعات

هو يقول لو تتأخر 10 دقايق طردتك .. اكيد بيطردني الحين

نقزت من الفراش بخوف وغسلت وجهي بسرعة ولبست ثوبي وطلعت

ورحت للسوق ركض .. وانا متوقع القى ابو محمد معصب وثاير

دخلت المحل بسرعه .. ناظرني ابو محمد بعصبيه

ابو محمد: توك تشرف حضرتك؟ .. شايف الساعة كم الحين ؟

ابراهيم: ادري .. انا اسف راحت علي نومه

ابو محمد بعصبية: كل مره تتأخر وتقعد تتعذر لي باعذارك البايخه هذي .. انت مو قايلي انك مراح تتأخر ولا يوم ؟

ابراهيم بحزن: انا اسف والله ما انتبهت للوقت .. تكفى هذي اخر مره

ابو محمد بعصبية: كل يوم تقولي اخر مره ؟ .. انا مو محذرك و قايلك لو تغلط غلطة ولو بسيطة بطردك ؟ .. يله انقلع مابي اشوف خشتك

ابراهيم: ابو محمد تكفى عطني فرصة اخيرة .. مالي احد غيرك اشتغل عنده

ابو محمد: وتبيني اشغلك عندي و ادفع لك فلوس على شغلك الزفت هذا وتأخيرك؟ .. انت ماتستاهل .. يله انقلع برا

ابراهيم بحزن: ابو محمد انت تعرف ظروفي .. لو طلعت من عندك وين اروح؟ .. من وين احصل فلوس واشتري لقمة تسد جوعي؟ .. تكفى شغلني عندك واعتبره عمل خيري .. واجرك على الله

ابو محمد: عمل خيري على اللي يستاهلون .. مو عليك انت .. لو انك صدق حريص على الشغل كان شغلتك عندي .. لكنك تتكاسل وتتأخر كثير .. لو انك حريص على الشغل كان التزمت بمواعيدك وما تأخرت .. والحين يلا انقلع برا .. مابي اشوفك يله

ابراهيم بحزن: ابو محمد ما باذنك ماي ؟

ابو محمد بعصبيه: انت ماتفهم؟ .. انا قلتلك لا يعني لا

تنهدت بحزن .. وطلعت من المحل ومن السوق بكبره .. ياربي الحين من وين بحصل فلوس ؟ .. من وين بحصل لقمة اكلها

ظليت امشي بالشوارع بلا هدى .. وانا بنفسي ماني عارف وين اروح
@@@@@@@@@@@@@@@@@@@@@@@@@@
الساعة 4 عصرا
(راكان)

استأذنت من الجامعة وطلعت .. ورحت للسوق على طول

يارب القى ابراهيم يارب

وقفت سيارتي عند الدكان وماشفت احد .. ونزلت

راكان: السلام عليكم

ابو محمد: وعليكم السلام

راكان: ياخوي بغيت اسألك سؤال

ابو محمد: خير ؟

راكان: انت عندك ولد يشتغل ؟

ابو محمد: لا ياخوي .. انا عيالي كلهم صغار ومايشتغلون

راكان: لا مافهمتني .. قصدي في ولد يشتغل عندك؟ .. واسمه ابراهيم ؟

ابو محمد: ايه كان عندي

راكان بلهفة: طيب وينه ؟

ابو محمد: هو كان يشتغل عندي .. والحين خلاص

راكان بحيرة: شلون يعني خلاص ؟

ابو محمد: يعني راح عني خلاص .. انا طردته

راكان بصدمه: طردته؟ .. متى طردته ؟؟

ابو محمد: قبل ساعتين

جاني احباط قوي .. يعني لو اني جاي قبل ساعتين كان شفته

راكان بحزن: طيب ماتعرف وين راح؟

ابو محمد: وانا شدراني؟ .. طردته وراح

راكان بقهر: ليييش تطرده ؟

ابو محمد بعصبيه: هاه ! وانت وش يخصك ؟

راكان بصوت واطي: الله يطردك من جنته قول امين

ابو محمد: وش قلت ؟

راكان: لا ولا شي .. انا ماشي مع السلامه

اففف ياربيه وش هالحاله .. انا ماصدقت اني عرفت مكانه ويوم جيت القاه طالع

لا وبعد مراح يرجع ابد .. يعني مافي امل اني القاه

ضربت على الدركسون بقهر .. الحين كيف بلقاه وانا ما اعرف ارضه من سماه ؟

الله يردك لي يا ابراهيم .. بصحه وسلامه
@@@@@@@@@@@@@@@@@@@@@@@@@@
الساعة السادسه مساء
(ابراهيم)

رجعت للشقة بقهر .. وانا ضايق خلقي

احس الدنيا تقفلت بوجهي

كل ما اقول انها تيسرت القاها تضيق اكثر واكثر

دخلت الشقة وماكان فيها الا يعقوب .. وواحد معه

دققت في ملامح الهندي اللي معه .. وجهه مو غريب علي !

كني شايفه قبل كذا بس وين ؟

التفت لي الهندي ويوم شافني حسيته انصدم وخاف ووجهه صار احمر

استغربت .. ودققت في ملامحه اكثر .. وحاولت اتذكر .. ياربي مين هذا؟

بعد تفكير ...

تذكرت .. هذا الكلب الخسيس صديق راج .. وهو اللي بنفسه اطلق الرصاص على راكان !

ثار غضبي وجن جنوني وقربت منه بعصبيه

ابراهيم بعصبية: هذا انت يا ككككككلب !

عطيته بكس باقوى ماعندي .. وانقضيت عليه مثل الوحش

وضربته بقوه وكفخته .. طلعت حرتي من ابو محمد كلها عليه

صرت ارفسه برجلي على صدره والكمه بأقوى ماعندي .. وطلعت مفتاح الشقة

ومشخت وجهه بالمفتاح .. وعطيته بكوس مع وجهه لين تورم وصب خشمه دم

من الاخر لعنت خيره وبردت حرتي كلها عليه

احسن يستاهل

كل هذا ويعقوب منهبل ويحاول يفككنا انا وياه

بس ما قدر لاني كنت معصب وثاير ومحمق وفرغت كل عصبيتي عليه

وتركته وهو يصب دم وشبه مغمى عليه .. وانا ماجاني الا مخوش وضربات خفيفة .. بس تعور

توجهت له وتفلت على وجهه : تستاهل ما جاك يالخسيس

وطلعت من الشقة بقهر

وانا راضي تماما على اللي سويته .. اللي سواه مو شي قليل ويستاهل ماجاه وقليل بحقه بعد .. هذا المفروض يكون مع راج بالسجن

والله لو يدري راكان كان دفنك وانت حي

@@@@@@@@@@@@@@@@@@@@@@@@@
( راكان )

كل هالوقت كنت جالس في السيارة عند الدكان .. لعل وعسى يمر ابراهيم او يرجع لهنا

لكن مافي امل .. صار لي 3 ساعات انتظره هنا

ياربي وش الحل ؟ .. جاتني فكرة حلوه ونزلت من السيارة على طول

راكان: لو سمحت

ابو محمد: انت للحين ما رحت ؟

راكان بترجي: ممكن تسوي لي خدمه بسيطه ؟ وباكون شاكر لك

ابو محمد بطفش: امر ؟

راكان: ممكن تدق على ابراهيم من جوالك

ابو محمد: بعطيك رقمه ودق عليه

راكان "والله من البخل": لا انا ادق عليه بس مايرد علي .. انا وياه متخاصمين .. تكفى دق عليه من جوالك

ابو محمد بملل: طيب وش اقوله ؟

راكان بتفكير: قوله ممممم قوله شي حلو يخليه يرجع بسرعه

ابو محمد: شي حلو مثل ايش؟ .. وبعدين لاتنسى اني طارده تبيني اقوله ارجع !؟

راكان: لا مو يرجع عشان يشتغل عندك .. قوله بس يجي للمحل على اساس انك بتكلمه بس .. عشان اشوفه انا واكلمه

ابو محمد: زين

افففف اخيرا رضى

ابو محمد يدق: الو

اشرت له يعني حط سبيكر

ابو محمد "حط سبيكر": الو

ابراهيم: هلا ابو محمد

ابو محمد: تقدر تجي الحين؟

ابراهيم: ليه ؟

ابو محمد: ابي اكلمك شوي

ابراهيم: كلمني هنا بالجوال

ابو محمد: لا شي ضروري .. ابي اقابلك تعال الحين

ابراهيم : يووه مقدر اجيك الحين .. بكرا اوكي ؟

لييييش تعال ! .. جاني احباط قوي

ابو محمد: ليش ؟

ابراهيم: ماقدر .. تعبان ودي ارتاح وانام .. بكرا اجيك انشالله

ابو محمد بطفش: بس انا ابيك ضروري الحين

ابراهيم: انا اسف يابو محمد بس المسافة بعيده .. ماقدر امشي على رجولي خصوصا وانا بهالحاله .. ماتقدر تصبر الين بكرا ؟

اففف كأنه حاس إني فيه .. وش ذا الحاله ؟ .. ووش فيه يقول تعبان .. ماتعب الا يوم جيت ؟؟

همست لابو محمد: اسأله وش فيه ؟

ابو محمد: وش فيك تعبان ؟

ابراهيم: متضارب مع واحد .. وتعبان .. وماقدر اجيك كل هالمسافه الطويله

راكان بهمس: قوله ابي اقابلك بأي مكان

ابو محمد بطفش منا الاثنين: طيب ابي اقابلك بمكان قريب .. وين ؟

ابراهيم: خلاص اوكي تعال عند البحر .. الجهة اللي عند دكتور كيف

ابو محمد: طيب باجي والقاك هناك

ابراهيم: اوكي

ابو محمد: مع السلامه "وسكر"

راكان بفرحه: مشكووووور الله يعطيك الف عافيه

ونطيت وحبيت راسه من الفرحة .. وعطيته فلوس شكر له "مع انه مايستاهل"

رحت وركبت السيارة بسرعه .. فرحان ياناس اخيرا بشوف ابراهيم .. صار لي تقريبا اسبوعين من فقدته .. اشتقت له كثييييير

حركت السيارة .. وتوجهت للبحر على طول
@@@@@@@@@@@@@@@@@@@@@@@@@@
( ابراهيم)

كنت جالس على صخرة عند البحر .. وافكر

الحين وش يبي ابو محمد الغثيث؟ .. اففف مالي خلق اشوف وجهه .. بعد ماطردني واهان كرامتي

لايكون يبيني ارجع للشغل .. ايه انا صرت خدام عنده متى مايبيني اشتغل عنده اشتغلت .. ومتى ما مل مني طردني

وش ذا الحالة بس .. اللهم لا تحوجني لأحد من خلقك وارزقني انت الكريم

سمعت صوت خلفي .. صوت اعرفه واميزه من بين كل الاصوات .. صوت فز له قلبي وخاطري

راكان يغني : ياصاحبي وش فيك قاعد لحالك ليش انت متغير ومشغول بالك
صارحني قاسمني عناك وهمومك ماطيق اشوفك متعب الهم حالك

ابراهيم: راكان !!!!

راكان ببتسامة: ايه يا قلبي راكان "وفتح يدينه كنه يقول ضمني"

ركضت له وارتميت بحضنه كني طفل .. فرحان بشوفة امه

راكان ضحك .. وهو يدري اني فرحان ومشتاق له كثير

راكان: اشتقت لك كثير ياعمري.. ليش طلعت وخليتني بروحي؟ .. قسم فقدتك بقوه .. الاستراحة بدونك ممله وكئيبه .. وليش ما ترد علي ؟ .. كان نفسي بس اعرف اخبارك وانت بخير ولا لا .. ابراهيم كيف هان عليك تسوي كذا ؟

ابراهيم بندم: انا اسف والله كنت غبي وحساس بزيادة .. كنت احس انك ماتبيني ومتضايق مني

راكان بحب: انا اتضايق منك يا ابراهيم؟ .. احد يتضايق من هالوجه الحلو والروح الطاهره والقلب الابيض النظيف الخالي من الحقد واللي ما يأذي أحد؟ .. احد يتضايق من هالنفس الطيبه والابتسامة الحلوة اللي كل من يشوفها تفتح نفسه؟ .. والله انك مثل العسل على قلبي يا ابراهيم ولا اتضايق منك

حسيت ان كلامه من صميم قلبه .. ياحبي لك يا راكان .. انت الانسان الوحيد اللي يستحق اسميه " لزيم الروح"

ابراهيم بفرحه: يا حبي لك بس .. انا ماقد قابلت انسان يحمل كل هالطيبه والحنان والنيه الحسنه والقلب الطاهر .. احبك يا راكان احبك .. ولو وش اقول ما اوفيك حقك

راكان ببتسامة: واللي يحبني مايروح ويخليني صح ولا لا ؟

ابراهيم بضحكه: ههههههه عارف والله عارف .. وانا ندمان اشد الندم اني تركتك .. مادري كيف كنت افكر .. سامحني ركوني والله ماعاد اعودها

راكان ببتسامة: وقلبي يطاوعني ازعل عليك؟ .. يلا شيل اغراضك وتعال معي

ابراهيم: ما معي شي .. حافي منتف هههههههههههه

ركان ضحك .. حط يده ولم كتوفي: يلا تعال قوي وش ناقصك ووش محتاج ؟

وقبل لا اتكلم قاطعني: لا تقول لي كرامة وما كرامة .. انا وياك اخوان واكثر من اخوان بعد .. أنا وياك مابينا كرامة سمعت ولا لا .. "بقهر" ماطلعك من عندي وخلاني افقدك الا هالكرامة

وقرص اذني بقهر .. ضحكت لاني حسيته معصب

ابراهيم بضحكه: خلاص والله ماعاد اقولك كرامه ولا خرابيط .. كل شي احتاجه باخذه منك .. بخليك تفلس في يومين

راكان بضحكه: اصير لك بنك الراجحي ماعندي مانع

ابراهيم: ههههههههههههه .. الله يخليك لي

راكان: امين ولا يحرمني منك .. يلا تعال معي

وركبت معه السيارة .. وانا مبسوط وفرحان

خلاص ماعاد فيه بهمنير واوامره ونذالته .. ماعاد فيه شقة ضيقه ووصخه مع هنود وصخين .. ماعاد فيه ابو محمد وعصبيته واخلاقه الزفت

ما عاد فيه حزن وضيقة خلاص

الحين فيه راكان .. وحنان وطيبه راكان .. واخلاقه العاليه .. وكلامه الحلو اللي يجيب العافيه .. ويشرح الصدر

الحين فيه سعادة .. وفرح ووناسة .. فيه أمن وأمان .. فيه مكان اقعد فيه براحة بدون ماحد ينكد علي .. فيه أكل اكله بدون ماحد يذلني عليه

من يوم ماشفت راكان .. وانا بس اضحك ومبسوط .. راحت كل احزاني وضيقتي .. شوفة راكان شرحت صدري واسعدتني

اول شي سويناه رحنا للسوق وشرالي راكان كل اللي احتاجه من ملابس واثواب وبدل وجزم واغراض كثيييرة .. وانا امشي وراه كأنه ابوي .. فديته والله

ما خلصنا الا على الساعة 11 .. ورحنا للاستراحة

اول مادخلت الاستراحة ابتسمت .. تذكرت هالمكان الحلو اللي جمعني بأعز الناس راكان .. هالمكان اللي حبيته ولعبت وفرحت فيه .. اشتقت لقعدتنا انا وراكان على العشب وشبة النار والسواليف .. اشتقت لغرفتي والسرير الحلو المريح .. اشتقت للمسبح .. اشتقت للخيول .. اشتقت لمنظر الاستراحة لما اقوم الصبح اللي يشرح النفس .. اشتقت لكل بقعة بهالاستراحة الحلوة

راكان: ها انشالله مبسوط؟

ابراهيم: اكييييد وش اقولك بس .. كله بفضلك انت بعد الله سبحانه وتعالى .. الله يكتب لك بكل خطوة سعادة وكل نظرة عبادة وكل بسمة شهادة وكل رزق زيادة

راكان بضحكة: كملي عجوزتنا كملي

ناظرته: يعني مايدعي الا العجايز

راكان: ايه

ابراهيم بضحكه: الشرهه مو عليك على اللي يدعيلك

راكان: ههههه المهم ماعلينا .. روح حط الاغراض بالغرفة .. وحط ملابسك بالدولاب

ابراهيم: بعدين مو الحين .. تعبت من المشي بالسوق

جلسنا انا وياه ع العشب

راكان: ايه صح بسألك .. وش فيك تقول تعبان اليوم ؟

ابراهيم: ايه صح ماقلتلك

راكان بمقاطعه: قولي كل شي صار من يوم طلعت الى الحين

ابراهيم: طيب .. اول شي رحت اشتغل حمال عند ابو محمد .. وسكنت في سكن عمال هنود وكانوا يتامرون علي ويذلوني و........... (قلتله كل شي)

راكان برحمه: ياعمري كل هذا صار لك !.. ابراهيم لا عاد تطلع من عندي ابد .. بتحزن وتخليني احزن معك .. هذا وانت ماكملت اسبوعين .. الله يهديك بس .. اكثر شي زعلتني فيه يوم طلعت من عندي .. تخيل كنت طول الوقت افكر فيك واحاتيك واقلق عليك كثير .. احيانا ما اقدر انام بس ابي اتطمن اذا انت بخير ولا لا ..كنت ابي اتطمن بس انت جوعان مرتاح متضايق تعبان ؟! حتى الجوال ماكنت ترد علي فيه .. ابراهيم لا تعودها مره ثانيه

ابراهيم: ولا راح افكر اني اعودها مره ثانيه .. هي غلطة وغلطتها وماراح اكررها ابد

راكان بعتاب: بصراحة تفكيرك مادري شلون جاي .. يعني عشان قلتلك توظف خلاص انا مابيك وماحبك ومتضايق منك ؟! .. بلعكس انا ابيك تتوظف عشان تعز نفسك وماتحس انك مهان او محتاج لاحد .. وماتحس اني متفضل عليك .. هذا كان قصدي

ابراهيم بندم: والله اني ندمان بقوه .. انا اسف بذيك اللحظة كنت حساس بزيادة وكنت افكر انه ممكن بأي حركة اضايقك .. كنت حاس اني كلفت عليك .. انا اسف سامحني

راكان ببتسامة: مسموح يامن ملكت القلب والروح

ابراهيم بضحكه: احلى يالشاعر .. اقول شرايك تشارك بشاعر المليون على هالبيتين اللي قلتها

راكان: يعني بيعطوني جائزة على بيتين بس لا ومثل وجهي بعد !

ابراهيم: اشوى انك عرفت .. يعني لا تقعد تسوي نفسك حامد زيد وتتفلفس مره ثانيه

راكان: اقول يلا مناك .. قم غسل المواعين بس .. ونظف المطبخ .. ترا ماحد نظفه من بعد ماطلعت "ببتسامة" ترا الاستراحة من دونك وصخه ياروحي

ابراهيم: لعنبو بليسك مأجر صبي عندك ؟

راكان: ههههههههههه لا محشوم

ورحنا نغسل المواعين انا وياه .. كانت كثيرة بس خلصنا بسرعة .. وماخلصت الا وانا مترطش من المويه .. كله بسبب راكان واستهباله .. و ما بقى صابون ولا فيري ماكبه على ملابسي .. الزبدة روشني بمكاني

ياحبيله .. ما استغني عن استهباله وخفة دمه .. فديته والله

غسلنا المواعين ونظفنا المطبخ وماخلصنا الا الساعة وحده ونص ومنهده حيلنا من التعب .. وتعشينا بعد عناء صار سحور مو عشا .. رحت انام بجسم مرتاح ... و بال متهني
@@@@@@@@@@@@@@@@@@@@@@@@@@
نقف هنا
ها كيف البارت

رد: روايةة الدنيا ياصاحبي كلها مآسي وأحزان ما تضيق الا بالصبر تهان / منقولةة

الجزء الثامن

(راكان)

قمت الساعة 4 العصر .. بسبب سهرتنا امس انا وابراهيم


رحت صليت العصر مع الظهر اللي فاتت


وفتحت الجوال ولقيت 5 مكالمات من امي


خفت انه صار لها شي ودقيت عليها


وردت وطمنتي انه ماصار شي بس انها اشتاقت لي وحبت تكلمني .. ياحبي لها


وجلست تعاتبني لاني من زمان ماكلمتها ولا دقيت عليها .. قلتلها اني مشغول هالايام واعتذرت لها ..


وصارت تقولي انها مشتاقة لي وجلست تمدح لي في الرياض وانها احسن من الشرقية وتبغاني ارجع وانورها ..


قلتلها وين ارجع واترك دراستي .. ووعدتها اني ازورها بأقرب اجازة .. والحمدلله رضت


حلو حب الامهات وحنانهم وخوفهم .. الله يخلي لنا امهاتنا


جلست اسولف معها تقريبا ساعة .. وسكرت


ودقيت على ابراهيم: الو


ابراهيم بصوت منخفض: الووو


راكان: لاتقول لي انك للحين نايم !


ابراهيم: ليش راكان السامي انا عشان انام كل هالوقت


ضحكت .. ابراهيم دايم يعايرني بكثرة نومي


راكان: ههههه ياخي نفسي يوم اقوم قبلك


ابراهيم: بالاحلام حبيبي


راكان: مالت عليك يالدجاجه .. وش فيه صوتك كذا؟ حسبتك نايم


ابراهيم: طايح على السرير


راكان بغباء: طايح على السرير؟ .. لايكون تعورت بس ؟ .. انا اعرف اللي يطيحون على السرير مايتعورون .. اللي يطيحون من السرير هم اللي يتعورون


ابراهيم بسخريه: لا والله ؟


راكان: ايه والله


ابراهيم: ياغبي قصدي تعبان وطايح على السرير


راكان بعصبيه: كان قلت تعبان وخلصتنا .. "واقلد صوته باستهزاء" طايح على السرير


ابراهيم: هههه وش اسوي فيك تفكيرك بطيء


راكان: لا صدق وش فيك ؟


ابراهيم: مادري حاس بدوخه


راكان باستهبال: مبروك حامل .. كلولولووللوش


ابراهيم: هههههه الله يقطع شيطانك .. انا وين وانت وين


راكان بضحكه: هذاك تضحك وتكلمني بالجوال يعني مافيك الا العافية


ابراهيم: انا تعبان ما قلت مشلول


راكان: طيب قوم سولنا فطور


ابراهيم: فطور الساعه 4 العصر !


راكان: ياخي الفطور مو لازم الصبح اهم شي توني قايم من النوم لو اني قايم الساعة 8 العشاء


ابراهيم: طيب تعبان


راكان باستهبال: تعبان مانت مشلول


ابراهيم بقهر: كل تبن ماني مسويلك لو تموت شمر عن اكمامك وادخل المطبخ وسو بنفسك


راكان: ههههه اعصابك اعصابك وش فيك ترا امزح


ابراهيم بعصبيه: ومزحك مثل وجهك


راكان: ايه عادي انا عارف ليش انت معصب


ابراهيم بسخريه: ليش؟


راكان بضحكه: وحده حامل اكيد بتكون معصبه وضايق خلقها


ابراهيم بعصبيه: الله ياخذك انقللللع


راكان: يلا قوم سو فطور


ابراهيم: لا


راكان: لا تخاف ماني قايلك سو بيض ادري فيك تتوحم


ابراهيم بعصبيه: كككككككككككككككككككككلللل تببببببببببببببببببببببن "وسكر"


راكان: هههههههههههههههههههههههههههههههههههههههههه


مت ضحك عليه وقمت رحت للغرفة .. ودخلت عليه وانا اضحك


لقيته منسدح على السرير ومغطي نفسه ووجهه باللحاف


سحبت اللحاف وانا اضحك


ابراهيم بنرفزه: انت؟ وش جابك ؟


راكان بضحكه: اتطمن عليك ياروحي .. ههههههه الا ماقلت لي ولد ولا بنت


ابراهيم ببتسامة: راكان ان ماسكرت السالفة البايخه هذي بصقعك على جبهتك بالمزهرية


راكان بصدمه: هئئئ ابراهيم


ابراهيم بخوف: وش؟


راكان: وجهك اصفر "واشرت على وجهه" ايه والله اصفر هههههههههههههه لا تكذب كشفناك ههههههه حامل هههه


ابراهيم: لاحووول هذا اللي كذب الكذبة وصدقها


راكان بضحكه: ضايق خلقك ووجهك اصفر ودايخ وش تفسيره هذا ؟


ابراهيم ببتسامة: راكان خلاص عاد


راكان: هههههههههههههههههه


ابراهيم بعصبيه: خلاص


ابراهيم سكت ولف وجهه وما رد علي .. اكيد انه زعل


وانا سكتت شوي استوعب .. صدق ابراهيم وش فيه ؟


جلست جنبه على السرير ببتسامة: لا تتضايق مني ترا احيانا يفصل المخ شويتين


ابراهيم ببتسامة: لا عادي


راكان باستغراب: صدق وش فيك كذا فجأه مرضت؟ .. امس كنت تتطامر ومافيك الا العافية


ابراهيم ببتسامة: مرضت عاد الشكوى لله .. يلا قم جب لي شي اكله جوعان


راكان : لا والله ؟ .. قم سو لنفسك مانت مشلول


ابراهيم بضحكه: مايصلح اتحرك بعدين يموت الجنين


طقيت كتفه: هههههههههههههه حيوان كنه جازت لك السالفة هاه ؟


ابراهيم: امزح .. فيني فقر دم .. ارتحت الحين "يقلدني بطنازه": ووجهك اصفر يعني حامل ههههه


متت ضحك عليه وهو يقلد ضحكتي بطنازة


ابراهيم بعصبية: يعني كل من صار وجهه اصفر يعني حامل ؟


راكان: هههههههههههه انا ادري فيك تتوحم وضايق خلقك


ابراهيم ياخذ المزهرية ببتسامة: سكر السالفة هاه .. سكرها ولا والله لاخلي المزهرية توقع بجبهتك الحين


قلت وانا امسح دموعي من الضحك: لا خلاص .. قوم غسل وجهك وأكل شي .. من كذا جاك فقر الدم عشانك ما تاكل


ابراهيم: طيب


ومسكت يده عشان اقومه .. وقام وهو متسند علي


ابراهيم بتعب: احس انه بيغمى علي


راكان: بسم الله عليك .. تسند علي باوديك المطبخ


وتمسك بكتفي وكان شوي ويفقد توزانه


وديته للمطبخ بسرعه ورشيت على وجهه ماء خفيف


وكان يغمض عيونه بتعب وشكله تعبان مره


راكان: ابراهيم بوديك المستشفى .. شكلك تعبان مره


هز راسه بإيه


سندته علي ووديته للسيارة اللي كانت بعيده باخر الاستراحة


وسدحته على المرتبه .. وطيران ع المستشفى


وصلت المستشفى ودخلوه على طول .. ودخل الدكتور يكشف عليه


طلع الدكتور بعد ماكشف عليه (هو نفسه اللي عالج ابراهيم المره الاولى)


الدكتور: انت اخوه؟


راكان: لا صديقه .. هو كيفه الحين ؟


الدكتور: للأسف الولد تعبان مره .. انا كشفت عليه قبل كذا وكتبت له ادويه بس الظاهر انه ما انتظم عليها .. عشان كذا تعب زياده .. وهو عنده فقر دم حاد وسوء تغذية


راكان بقلق: وش الحل يا دكتور ؟


الدكتور: حاليا انا عطيته ابرة تغذية .. وحطيت له مغذي .. بس نحتاج لمتبرع بالدم


راكان: انا باتبرع له


الدكتور: مايكفي واحد لازم اثنين يتبرعون له .. لانه يحتاج دم كثير


راكان بقلق: مافيه الا انا .. عادي يادكتور خذ مني كل اللي يحتاجه ابرهيم


الدكتور ببتسامة: مايصير .. بعدين انت يصير فيك فقر دم


راكان: عادي .. انا جسمي قوي واقدر اكل واهتم بنفسي واعوض اللي فقدته .. اما ابراهيم لا .. ابراهيم جسمه ضعيف


الدكتور: انا اسف ما اقدر .. لازم تجيب شخص ثاني يتبرع ..لاننا نحتاج تقريبا لتر من الدم .. واخاف يصير فيك فقر دم او تجيك دوخه واغماء


وجلست احاول فيه واترجاه وقت طويل لين طفش مني


الدكتور: اخوي انت ماتفهم .. اقولك ماينفع


راكان بترجي: الله يخليك تكفى .. ابراهيم ماله غيري


الدكتور بطفش: انت وش قصتك مع الولد ؟ .. اخوك؟ يقرب لك؟


راكان: لا صديقي .. واعتبره اخوي واعز من اخوي بعد .. تكفى يادكتور خلني اتبرع له .. ماله غيري واخاف يموت


الدكتور: بعدين انت تتعب وبتفقد دم كثير


راكان بحزن: فداه .. اذا ماضحيت علشانه اضحي عشان مين ؟ .. اهم شي يكون بصحة وعافية


الدكتور: طيب خلاص .. بس انا مو مسؤول عن أي تعب او اغماء يصير لك .. واذا صار فيك فقر دم لا تلومني


راكان بحماس: اكييد "ورفعت كمي" يلا اسحب


الدكتور بضحكه: لا وين انت شكلك مطفوق .. لازم افحص دمك اول .. يمكن تكون الفصيلة مو متطابقة


راكان: طيب يلا استعجل


وسوا فحص لدمي .. وطلعت الفصيلة متطابقة الحمدلله .. انا O وهو B


انسدحت على السرير وبدأ يسحب دمي .. واشوف الدم يطلع كثير والكيس كل ماله يتعبئ .. حسيت بدوخه وغثيان ..لانه سحب مني دم كثير


خلص وناظرني ببتسامة: ها اشوفك دايخ؟


راكان بتعب: شوي


الدكتور: هالحين انت ارتاح بحط لك مغذي .. ولا تنسى تاكل زين وتهتم بنفسك خصوصا بهالفترة .. والتزم الراحة ولا تسوي رياضة ابد .. وفي اكلات معينة لازم تاكلها .....


وبدا يقولي النصائح وانا اسمعه واهز راسي بدون مافهم وش يقول .. كنت دايخ لين غفت عيني ونمت


@@@@@@@@@@@@@@@@@@@@@@@@@

الساعة 9 مساء


صحيت قبل شوي .. وجابولي اكل صحي .. كان شين وماله طعم وماسخ بس غصبني الدكتور اكل


واول ماخلصت رحت لابراهيم على طول


دخلت عليه بالغرفة .. كان منسدح وواضح انه تعبان .. وجهه اصفر وشاحب .. وجسمه هزيل .. شكله يكسر الخاطر


راكان بهدوء: ابراهيم


كان مفتح عيونه .. لكن شكله دايخ و فاقد الوعي .. مادري اذا منتبه لي او لا


راكان: ابراهيم .. تسمعني؟


كان غايب عن الوعي .. ويهذي بكلام غير مفهوم


راكان: ابراهيييم


ابراهيم صحى بتعب: ها


راكان ببتسامة: الحمدلله ع السلامه ابراهيم .. ماتشوف شر ياخوي.. شلونك الحين؟


ابراهيم بهمس: بخير الحمدلله .. انت شلونك؟ .. قالولي انك تبرعت لي بدم كثير .. ليش تخاطر علشاني ؟


راكان: عادي يا اخوي .. حنا اخوان .. اذا ماوقفنا مع بعض وقت الحاجة متى نوقف ؟ .. وقت المصالح !


ابراهيم بتنهيده: اخ بس ياليتني تعرفت عليك من زمان .. ونعم الصديق انت يا راكان .. قهر ماتعرفت عليك الا متأخر .. وانا بهالحالة


راكان ببتسامة: ياذكي لو انك مو بهالحاله وظروفك زينه كان ماتعرفنا على بعض


ابراهيم: صادق والله .. بس يعني قهر اشوفك تعطيني وتساعدني وتوقف معاي وانا ما اسويلك شي .. دايم تساعدني بدون مقابل


راكان: ههههه ماعليك اصبر بس .. بيجي يوم واحتاجك والله ماخليك ترتاح ولا دقيقه


ابراهيم: ههههههههه بعدي والله


راكان: المهم .. الدكتور يقول انه عطاك ادويه .. وينها ؟


ابراهيم: اييه نسيتها بالشقة


راكان: شفت انك مهمل ؟


ابراهيم ببتسامة: ياخي انت حريص بزيادة وتكبر الموضوع .. كله فقر دم


راكان: هذا وهو فقر دم بس شوف وش صار لك .. وجهك اصفر وشاحب تقل طالع من القبر


ابراهيم: بسم الله علي وش ذا التشبيه ؟


راكان بضحكه: ونحيف مره ماباقي الا نلفك بشاش ابيض وتطلع مومياء


ضحكت وابراهيم طق كتفي بقوه


ابراهيم بخوف: وجع بسم الله علي .. عليك تشبيهات ياخي


راكان ببتسامة: هههههه وليته يأثر فيك وتحس شوي .. ابراهيم صدق انت مهمل نفسك بزيادة


ابراهيم ببتسامة: خلاص طيب .. اوعدك اني اهتم بنفسي اكثر .. أي اوامر ثانيه عمي ؟؟؟


راكان: حرام عليك كبرتني .. كان قلت جدي ارحم شوي


ومادريت الا وانا طاير من السرير وطايح على الارض


ابراهيم: ههههههههه تستاهل على خفة دمك اللي مادري وش تبي .. وبعدين فيه مليون كرسي مالقيت تقعد الا جنبي .. ابي انسدح اتمدد عجزت


راكان بصراخ: اي الله ياخذك


دخل علينا الدكتور: لو سمحتوا هدووء ممنوع ازعاج المرضى


ابراهيم: اييه يادكتور جابك الله تكفى خذه معك فكني منه


قمت بقهر: تبي تفتك مني هاه؟ .. انا اورييييك


الدكتور: لو سمحت تفضل برا خل المريض يرتاح


ناظرت ابراهيم لقيته مبتسم ويطلع لسانه .. هين انا اوريه


طلعت من الغرفة ومن المستشفى بكبره .. وركبت بسيارتي ومشيت


وانا في الطريق دق علي ابراهيم


انا اسوي روحي زعلان: نعم ؟؟


ابراهيم: السلام عليكم


راكان: وعليكم السلام .. من الحين اقولك لا تحاول تراضيني


ابراهيم بضحكه: ياخي خلاص وهذي بوسه على خشمك


راكان: و وش تبي ؟؟


ابراهيم: راكان ممكن خدمه بسييييييييييييطه


راكان: ولك عين بعد ؟


ابراهيم: اوهوو خلاص مو قلنا تراضينا ؟


راكان:لا والله من قال ؟ .. انا عن نفسي ماقلت


ابراهيم: خلاص طيب سامحني يالغالي


راكان باستهبال: ايوه وبعد؟


ابراهيم: انا اسف


راكان بضحكه: ايه كذا خلك سنع


ابراهيم: انطم قاعد تذلني ؟


راكان: هههههه لا .. أي هلا وش تبي امر ؟


ابراهيم: بعدي والله .. راكان اذا ماعليك امر ابغاك تجيب لي غرض نسيته بالشقة


راكان: انشالله .. وش هو الغرض ؟


ابراهيم: دفتر كبير لونه رمادي مزخرف بأسود


راكان باستغراب: دفتر ؟ .. اشتر لك دفتر ثاني غيره


ابراهيم: لا ابيه هو .. وبليز لا تفتحه.. امانه لا تفتحه هاه


راكان باستغراب: اوكي


ابراهيم: الشقة بمنطقة .................


ووصف لي الشقة .. ورحت لها واول مادخلت العمارة


انصدمت .. صغيرة مره وقديمه وبعض من جدارها مهدم وعلى وشك يطيح


استغربت كيف ابراهيم كان عايش فيها ؟!! .. الحمدلله انه رجع لي


دقيت الباب على الشقة اللي قالها لي ابراهيم


فتح لي واحد هندي .. وناظرني من فوق لتحت .. كنه يقول وش جابه ذا هنا ؟؟


الهندي: نعم ؟


راكان: ابي الاغراض حقت ابراهيم


الهندي: ابراهيم ؟ .. فين هذا روح ؟


راكان: هو عندي الحين .. روح جيب اغراضه


ودخل يجيب الاغراض .. وتأخر شكله سحب علي


دخلت للشقة بشوف ليش تأخر .. والتفتت للصالة لقيت واحد منبطح وكرشته مترين قدام .. وشكله مقرف


اكيد هذا بهمنير اللي كلمني عنه ابراهيم .. التفت لي باستغراب وخوف


لهالدرجه شكلي غريب ؟؟ .. او انهم اول مره يشوفون واحد كشخه


جلست افكر ..الحين انا كاشخ وشكلي ينفع ضابط ..جت ببالي فكرة حلوة .. قلت خل العب عليه


ناظرته باحتقار: انت بهمنير


بهمنير بخوف: ايوا بابا


راكان: تفضل معاي مركز الشرطة


بهمنير بخوف: شنو شرطه !! .. ليش انا شنو يسوي بابا ؟!


راكان ماسك ضحكته: تفضل معاي المركز وتعرف وش انت مسوي


بهمنير بترجي: لا بابا انا مسكين .. انا مافي سوي شي


متت ضحك عليه وهو خايف ويترجاني وشوي ويبوس رجلي .. فكرت بشي قوي يخليني انتقم منه


راكان: اقوول بلا كلام فاضي .. انت مطلوب بمركز الشرطة


بهمنير: ليش انا شنو يسوي


راكان بعصبيه: جاني بلاغ عن تمردك وتسلطك على العمال .. انت وش شايف نفسك هاه .. ماخذ راحتك وتتامر على هالعمال على كيفك على بالك مافي قانون يمنعك ؟؟


بهمنير بخوف: خلاص بابا انا واجد سوري .. انا مافي سوي سمسم كذا مره ثاني


راكان بعصبيه: حلوه ذي سوري .. قوم معاي للمركز الشرطة يالله .. بنحطك بالسجن لين تتأدب يالكلب


بهمنير بخوف: سجن ! .. لا خلاص بابا انا مايبغى سجن .. انا مسكين انا في اولاد كتير بليز انا مايبغى سجن


ضحكت عليه شوي ويصيح .. طلع على حقيقته هالرخمه


راكان باحتقار: اسمعني .. انا ماراح ادخلك السجن بس بشرط .. تطلع من الشقة الحين والعماره بكبرها .. ولا اشوفك جاي لهالشقة مره ثانيه .. وان شفتك جاي لهالحارة بس قطعت رجولك سامع ؟؟؟


بهمنير بحزن: بابا انا وين روح .. وين في سكن انا ؟؟ وين في نوم انا ؟؟


صرخت عليه: مو شغلي .. يلا قوم ضف اغراضك واطلع


قام بسرعه وبخوف .. وراح يلم اغراضه .. وانا ناظره مبسوط اني قهرته احسن يستاهل > السالفة حقيقية


شال اغراضه كلها ويوم جا يطلع مسكته مع ملابسه


راكان بتهديد: ان شفتك مره ثانيه جاي وتوطوط بهالحارة قطعت رجولك قطع وبالسجن على طول.. لا تحسب اني ما ادري انا مراقب هالحارة زين .. والحين يلا انقلع ولا اشوفك مره ثانيه .. سامع ؟؟؟؟


بهمنير بخوف: انشالله بابا معلوم والله معلوم


دفيته : يلا انقلع برا ... "وطلع"


ابتسمت بانتصار .. والهندي الثاني يناظرني بخوف


راكان: اسمع .. انت عندك جوال ؟


الهندي: يس بابا


راكان: سجل رقمي عندك .. واذا رجع بهمنير للشقة علمني ولا تخاف .. وانا اتصرف معه الكلب


الهندي: انشالله بابا .. هذا بهمنير واجد مو زين


راكان ابتسم: طيب سجل رقمي عندك *********** .. وش اسمك انت ؟


الهندي "بعد ماسجل الرقم" : يعقوب


راكان: يعقوب .. روح جيب اغراض ابراهيم


وراح جاب الاغراض وعطاني اياه .. كيس فيه ادويه وكيس فيه ملابس شوي ومعاهم الدفتر .. اخذت الاغراض وطلعت


اول ماركبت السيارة تذكرت الدفتر .. وش ممكن يكون كاتب فيه ؟؟ .. افتحه ولا لا ؟؟


كنت بفتحه لكن منعت نفسي .. ابراهيم امني على هذا الشي .. وماراح اخون الامانه


بس ياناس فيني فضوول اعرف .. تعوذت من ابليس وحطيت الدفتر بالدرج


دق علي ابراهيم: هلا راكان


راكان ببتسامة: هلا ابراهيم .. تراني جبت الدفتر وهو معي الحين


ابراهيم: الله يجزاك خير .. بس طلب ثاني ممكن ؟


راكان ببتسامة: من عيوني امر بس ؟


ابراهيم ببتسامة: تسلم عيونك .. اذا ماعليك كلافه جيب لي شي اكله .. ترا اكل المستشفى يجيب المرض


راكان: ههههه أي والله اكلهم ماسخ لا طعم لا لون لا ريحه لا شي .. باجيب لك خلاص .. بس مادري هم يرضون ولا لا


ابراهيم: لا يرضون انا سألتهم


راكان: اوكي خلاص


ابراهيم بامتنان: مشكور تعبتك معي كثير اليوم


راكان ببتسامة: تعبك راحة


وسكرت منه ببتسامة.. ورحت اجيب اللي طلبه مني .. احب اخدمه وافرحه وازرع الابتسامة على وجهه .. كلما اتذكر الاجر اللي بيجيني كلما احسنت له .. افرح لا شعوريا .

@@@@@@@@@@@@@@@@@@@@@@@@@
انتهى الجزء

ايش رايكم بتصرف راكان مع بهمنير ؟


و وش سالفة الدفتر ؟؟


وليش ابراهيم مايبغى راكان يشوفه ؟