.. زهـايـمر حكـي .~

**تنهيدهـ** · 16-10-2016, 02:47 PM

رد: ✒ .. خآصرة حرف رمآدية

يكمن الجمال في أرواحنا التي تصنع الجمال فإما أن نسمو
بخير أو ننظر للخير من حولنا ونبتسم ..

من أجمل المشاعر التي ممكن ألا نستطيع وصفها دائما لحظة
حفظنا لبعض آيات الله وجميل أن نرى اهتمام من حولنا ينصب
حول ذلك ..

مبارك ماريا هذا الإنجاز الفخم جدا .. ومن نجاح إلى آخر ..
سعدنا بما حققته ولك منا أجمل المشاعر ..

بعض من نزف الحرف أهديه لك

**تنهيدهـ** · 16-10-2016, 03:51 PM

رد: ✒ .. خآصرة حرف رمآدية

اكتشفت إني آخر الفترة ماحب أخرب مزاجي بأي شي يعني
حتى لو تصير مشكلة ويضيق صدري أحاول إني أحلها بشكل سريع
أو أتجنبها اذا كان التجنب حل ..
أوك .. أنا صبري ماله حدود على الإساءات لكن تجيني حالة ملل
توصل معي طرف خشمي خلاص ودي أتخلص من الشخص اللي
يزعجني بأي شكل حتى لو كان تصرفي فيه نوع من القسوة ..

بعض الناس تشوفك مبتسم وصبور تصير تدور على طريقة تستفز
فيها وجهك الثاني اللي ماتستخدمه إلا للضروره ..
مب دايما يكون الشخص هادي ويتحمل كل اللجه اللي حوله ترى !!
أنا من باب ثقتي بنفسي اللهم لك الحمد أطنش أمور صغار العقول
لو صارت لهم انحدرو لها ..

محتاجين نعزز ثقافتنا باحترام الآخر .. حرفه .. ميوله .. صداقاته
خصوصياته .. حتى آداب المزاح ..
طبعي اذا دخلت في نقاش أتحمل كل تبعاته حتى لو كان فيها سوء
والطف الجو بنوع من المزح علشان اللي يناقشني يرتاح ويحس
إن الوضع ماهو متأزم ولا رسمي ..

لكن إذا دخلت مكان وانت بكامل احترامك ويجي هذا من يمين يهمز
والثاني يلمز .. ترى عيب جد عيب .. أوك اعطيك جوك اول الامر
بس اذا زادت تحمل ردة فعلي وغالبا ماتكون إني امحي الشخص
وكأني ما أشوفه قدامي ..
ويبقى بيننا الإحترام للمكان والصحبه القديمة ..
حنا حلوين كذا على طبيعتنا .. والحياة أبسط من موقف نشيل
بقلوبنا بعده في عالم افتراضي !!

اعرف الحب اللي من أميال بعيده كيف يوصل وشعوره رهيب
لكن ماجربت الكره كيف يكون لأني أقول إن الكره لشخص خلف
الشاشه نوع من الجنون ..
بس كونك تعبر لي بطريقتك عن كرهك عادي جدا واتقبلها المهم
أنها مش مني ..

محتاجين دروس في سلامة الصدر .. والله .

**تنهيدهـ** · 16-10-2016, 11:40 PM

رد: ✒ .. خآصرة حرف رمآدية

أكثر فكرة ممكن تضرك الفكرة اللي تترسب عن موقف
ماصار لك لكن عشت تفاصيله عن بعد .. تصير تخاف
إنك تعيشه أو يعيشه شخص تحبه ..
أنا تقتلني فكرة زوجة الأب رغم إني ماجربتها لكني عشت
تفاصيل أربعة مواقف اقربها كان ضحيته جدي الله يرحمه
متوفي من عشر سنوات لكن مازلت أذكره كل سجده وكل
ماكنت لحالي وتدمع عيوني ..

طيب هذا الشخص تزوج بغض النظر عن كل سوء يشوبه .. لكن
هل الغيرة وحب المال ممكن تقتل مشاعر الرحمة جواتنا أو
تخلينا نخطط لضرر .. أسئلة كثيرة اذا طرحتها ألاقيني اجاوب
انه مهما كان الشخص يحب أو فقير جدا ما له حق انه يغتال شخص
كانت حياته حلوه من قبل معرفته ..

علشان كذا أنا اشوف انه فكرة اكتفاء الشخص بنفسه تغنيه عن كثير
أمور سيئة وتعطيه بعد نظر وتخطيط مميز حتى لو ارتبط بشخص
مايكون معتمد عليه كليا .. لأنه جرب جمال شعور الاكتفاء
فسهل عليه يتعايش مع الطرف الثاني ..

والله صرت لما اشوف حالة شخص مراهق أو طفل غريبه أو فيها
عداوة للحياة والأشخاص .. يثير فيني الفضول إني أعرف كيف
يعيش هذا الشخص ومن اللي متولي أمره ..

الموضوع مش مختص بزوجة الأب بس برضه العكس زوج الأم ..
لكن انا اتكلم عن الشي اللي يوجعني والطرف اللي عايشته
و آلمني .. مؤسف إنه يقتل طفل يتيم على يد زوجة أب أو
تعذب أم الزوج أو يعذب شخص كبير في السن حب يجدد حياته
وتزوج لكن مات على يد زوجته ..

نفسي أعرف وين المتعه بالموضوع وايش شعور الشخص بعد
ما يرتكب هالجريمة .. كيف يعيش أساسا باقي حياته ..
أوك كلنا نخطي وربي غفور رحيم وهذي أقدار سلمنا بكل هذا ..
لكن فيه أشخاص مازالت قلوبهم تنزف بسبب كل هذا صعب
ننسى والله .. أتمنى أغفر لشخصين بحياتي لكني كل ما أتذكر
الجرم اللي ارتكبوه تسوء جدا حالتي ..

فضفضة ..

**تنهيدهـ** · 17-10-2016, 08:47 AM

رد: ✒ .. خآصرة حرف رمآدية

‏كون طيب..
واترك اللي يستغلك !! يستغلك
واحتسب اجر انتفاعه..
انت ماتدري من اي معروف منك ترضي الله،
ممكن انك تدخل الجنة .. عشانك كنت طيب.

**تنهيدهـ** · 17-10-2016, 09:19 AM

رد: ✒ .. خآصرة حرف رمآدية

ودي أسألكم سؤال على الصبح بس بالله جاوبوني يالموظفين
من يوم نزلت ذا الموضوع اللي هنا كم وفرتو من رواتبكم
أحس اني صايره مشغله الحاسه السادسه على طول قلت
لكم شخصية استخباراتيه فخمه
اكيد ما وفرتو ولا شي كالعاده .. الحين علموني وش بتسوون
في رمضان الجاي بدون رواتب علموني

بس دايما الشي اللي أدخل فيه انا يكون بركه شوفو كل الأبراج
تواريخ تسليم الراتب فيها يوم خمسه وسته إلا برجي يوم أربعة
الحين راتب شهر انزرف ياجماعة وراح عليكم لو كنتو وفرتو
هالراتب من رواتبكم السنين الماضية وش صار لكم

لازم يعني الحكومة تأدبكم وتعلمكم كيف توفر من رواتبكم
ولا انتم مافيه تخطيط < اللي فيهم كافيهم يابنت

إلا على الطاري وش ابراجكم عطونا خلونا نشوف وش صفاتكم
الحلوة مع تواريخ الرواتب فيها
بس يعجبني الشعب يطقطق حتى وهو في أسوأ الحالات سمعتو
اللي بيتسلف لين نهاية الحمل ويرجعها ولا لا < تتسيمج عليكم

طيب خلو سماجتي على جنب وقولولي تفكرون تخططون بعد هالقرار
ولا لا .. اجلطوني وقولو لا علشان أترك لكم عبير واطلع < تكفين
ياجماعه والله الوضع محتاج توفير علشانكم مب علشان أحد
لو سمحتو المطانيخ برا السالفة مب مأثر فيهم الزرف ..

هاه وش تقولون

**تنهيدهـ** · 17-10-2016, 08:30 PM

رد: ✒ .. خآصرة حرف رمآدية

43 مكالمه 655 رسالة .. وألف عتب من صديقات عمري
اللي عزمتهم اليوم على كوفي ونمت بالغلط
هذولي لو صار زواجي مختصر وما عزمتهم وش بيسوون لي
من جد أتساءل .. !

المشكله إن بابتي ومامتي مسافرين يعني انا ما اقدر اتاخر لين
بعد الساعه سبع برا البيت لأني الكبيره ومنظمة الوضع
فغالبا طلعاتي الصبح أو العصر لين العشا وارجع ليه البعض
مايعذر اذا الأمر مش بيدينا

بس لقيت الحل طالما إن الزعل على نومه بالغلط ومو بيدي
قررت ازعل عليهم كلهم بعد ما كتبت لهم كم سطر جامدين في
القروب كنوع من الترهيب

اقدر الصداقة بشكل محد يتوقعه قبل كم سنه أيام هبتي بالفيس
يمكن ست سنوات كذا تعرفت على صديقة أردنية جدا رهيبه كنت
اسولف معها وانا بعمر 22 أو أوائل 23 كانت رائعه في التوجيه
بشكل وكنت اغبط نفسي على صداقتي هذي .. أول مره تقابلنا
انصدمت إن أولادها أكبر مني
عندي تفاهم وانسجام مع الكهله يوصل لدرجة تبادل الأفكار السريع
أحسهم محبين للحياة ومتونسين صح .. تعلمت منهم هالشي والآن
جدا مبسوطه ..

لي عوده مع موضوع الصداقة بس بحط لكم صوره من الزعله المرتده
وتعلمو مني

كيفني بس

**تنهيدهـ** · 17-10-2016, 10:24 PM

رد: ✒ .. خآصرة حرف رمآدية

‏سكوت الصبر، غير سكوت العجز،
غير سكوت الرضا، غير سكوت اللامبالاة، غير سكوت التعب،
ولكن كله سكوت ..
في النهاية .. السكوت ما ينحسب إلا سكوت .

**تنهيدهـ** · 17-10-2016, 10:30 PM

رد: ✒ .. خآصرة حرف رمآدية

كل مافي الأمر أنني بت أتحدث بشكل خاطئ دعوني
أصمت قليلا أمام هيمنة الأدب .. استمتعو ببوحي
فقط ..

**تنهيدهـ** · 17-10-2016, 10:37 PM

رد: ✒ .. خآصرة حرف رمآدية

بوح قديم ..

**تنهيدهـ** · 18-10-2016, 02:22 AM

رد: ✒ .. خآصرة حرف رمآدية

.. زهـايـمر حكـي .~

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget