صاغ من نبض القلوب المؤمنه عرشه وتاجه
خدمة البيت الحرام ورفعة الإسلام همه

للرزايا كن وكر طيور أبابيل ف(حجاجه)
وللعطايا كن للطوفان بكفوفه تتمه

عجل معروف .. متريث شوف .. وإما عن سراجه
تستدل الشمس به بإشراقها وتروح يمه

الشجاع إللي يسله سيفه بيوم المواجه
تلبسه شلفاه من حور وبواريده تشمه

الكريم أبطا عطاه لمن نصاه وقال حاجه
وأنقضت له بعد حرف الجيم ماوصل لفمه

الفطين من إعوجاج السيف تقويم إعوجاجه
راعي العوجا شف بعوجاه نهضة كل الأمه

الأمين إللي يخاف إليا رمش وارجف رواجه
خوف لا يسأله رب الخلق عن عظم المهمه

ويم مايمطر سحاب المدح بكفوفه نتاجه
الإمام .. ابن الإمام .. ابن الإمام .. أبو الأئمه

اعرب اللي في كفوفه خط سير
رفعة الشعب السعودي في الحياه
فاعل للمبتدا من كل خير
مبتدا فعل الجميل ومنهتاه
فهد بن عبدالعزيز المستنير
في كتاب الله وسنة مصطفاه
يابلاد خصها الله بتعميم الرسالة
الف صلى الله على اللي به انورتي وسلم
ماترك عبدالعزيز لحماك الا عياله
خيرة رجال الزمان الذي منهم تعلم
كيف يغزل راية المجد بخيوط العداله
لين مايبقى على الارض مظلوم يتظلم
والفهد دام الفهد شال حملك وارتكاله
فابشري لافيه جايع .. ولاطفل يتألم
حافظ ربي دروبه عن ثلوم ومياله
وكل قاع من سحابه تمايل واتثلم
كل شعب غير شعبه تمنى ليتنا .. له
مير خص الله به المملكه ياللي تحلم
ماعرف كفه الا من عطا .. غير الجزالة
وماعرف غير الجزاله لسانه لاتكلم
كل حبة رمل شمس ساطعة
والله احد
وكل صدر امال خضرا مشرعه
في هالبلد
السعوديين له والله معه
قبل وبعد
للعدا ضيق ولاصاحيبه سعه
علم ومدد
الضرر كف العهد والمنفعه
كف الفهد
شرع الفهد في قوانينه
ماشرع الله فقرانه
يارب تحفظه وتعينه
وتديم عزه وسلطانه
طاهر فظنه وتخمينه
واطهر من ظنونه ايمانه
زاكي فدنياه وفدينه
وازكى من انفاسه احسانه
كن الذهب جمر فدينه
وفي يدينك كبود عدوانه
ولاكرم من اذنه ..سوى عينه
واكرم من عيونه .. لسانه
شعر ركض في ميادينه
معفي من النار شيطانه
الفهد عزمه وحزمه وفعل ذراعه
واليقين اللي مشابه وطاهر ظنه
والسحاب اللي حسد ماوطى من قاعه
في خطاه اللي على عزها مستنه
مستحق بلا فروض وسنن للطاعه
كيف عاد وطاعة الملك فرض وسنه
قدم الخادم على اسم المليك وذاعه
للخلايق والسعودية اضحت جنه
ماشبر شبره بشر كيف عاد افباعه
مخطي من قال شبه ومثيل وكنه
حاجتين اثنين ابد ماهن من اطباعه
الرجوع فكلمة قالها والمنه
الفهد بن عبدالعزيز الرياسه
تلوق له والتاج يزها بظله
عزمه قوي .. رايه سديد .. وباسه :
شديد وايدينه هي الطيب كله
يارب عزه كثر ماعز ناسه
بخفظه من الرحمه جناح المذله
لليل نجم وسامر
وللعاشق انفاس ولهى
يالله عسى البيت عامر
بالفهد والتاج يزهى
كف به الظي غامر
اكرم من الظي وابها
يامر بما الله يامر
وعما نهى الله ينهى
لامن حكوا في مسقط الراس نودي
غصب ورضا على غلا الناس للناس
وكل يقول في مسقط الراس جودي
ياغيمة التحنان ذكرى ونوماس
الا على هذا التراب السعودي
لان رمل المملكة يرفع الراس
عزك جديد وقديم وحاضر خالد
يامملكتنا السعودية رعاك الله
بعبدالعزيز الامام الباني الوالد
اللي له من القمر نور القمر كله
بشيمة سعود بعزيمة فيصل وخالد
بحكمة فهد وبسماحة وجه عبدالله

الفجر بين وينكم
هذي هي شموس الصباح

ما عميت الا عينكم
عن نور ربي والفلاح

السو حمل يدينكم
هذا هو الحمل السفاح

لا ديننا هو دينكم
ولا دينكم دين السماح

لا عان من يعينكم
ربي بفتوى وأقتراح

مسيلمه يهينكم
وتهينكم فتوى سجاح

افشو السلام بينكم
كيف انقرت افشو السلاح

نجد شامت لأبو تركي وشيدنا
موطن من كتاب الله دستوره

نحمد الله جتنا مثل ما ردنا
قل هو الحكم لله ثم لأخو نوره

قاب قوسين من كف الفهد وادنى
غطرف الصبح بأشجاره وعصفوره

نكره الحرب وان عدتو لها عدنا
كلنا للفهد بأمره وفي شوره

أيه حنا هل التوحيد به سدنا
كل قاع لنا بالعز ممطوره

أيه حنا هل العوجات وحدنا
راية دوم لأبن سعود منصوره

رصاصة الجهل أجهل من الرصاص
من يعكس الإرهاب باير لقاه

أردى من الوحل الذي فيه غاص
يالدما يبي يغسل ثياب المياه

مهما استقام الصف مهما تراص
على كذا ما تنقبل له صلاه

من حاول هدايه بشر بإنقاص
روحه هو من يهتدي في هداه

الدر ما يجلب من أيت مغاص
والعلم ما يوخذ من أية شفاه

والجهل ذيب اعما يجيد اقتناص
فريسته واهل الجهاله شياه

يالي من الناس ابتغيت الخلاص
الدين للناس الخلاص أبتغاه

إرهابكم على الحياه قصاص
وفي ديننا لك في الحياه قصاص

كل فكر يتبع التعتيم زيف
واضحها لأهل العقول الراشده

ومن جهل جاله من التعليم سيف
علم يسمع به وعلم يشاهده

والله انك تشرب من الضيم حيف
ما يعز الله مياه راكده

منتهى الفوضى غضى التنظيم كيف
وكيف الإستثناء أصبح قاعده

مثل شربه للفناجيل يشربك الفهد
يالمصايب كن ربي خلقك مهيله

عل ثوب العافيه ما شربه قبل وبعد
للأمام الي رعاها علوم ومرجله

رافع روس اصدقاه ومعادينه بعد
لا ورفعت رؤس الأعداء تجيك مجلجله

حي فاله والله انه مليك امن انولد
الجواب الي شفت به صدور الأسئله

هو أعز وأكرم وأطيب وأوفا وأشد
هو أعف وأعدل وأقرب وأرحم صله

طال عمرك يا فهد عد ما ساجد سجد
في صلاه وما جرت في الشفاه البسمله

ربي انت الخالق الواحد الفرد الصمد
دم على هذا الوطن وحدته واحفظ هله

وإن ظمر لك جاهل بسوء يا أكرم بلد
يبشر بسيل من العلم يجتث جهله

رجل الأمن الي على مهرة الشيمه لكد
حي فاله يوم يجتث روس ممحله

هو حزام ظهورنا في المهمات الأشد
ثوب الأمن الي لبسناه بالعمر غسله

شر خلق الله على الدين وانفثهم عقد
الخوارج واخر الكفر اشد من اوله

والفتن خيل المنافق خبيث المعتقد
ربي لا ترفع لمثله مقام ومنزله

واذكر اني ..
ليتها ماكانت عيونك مرايا :
* التفت للباب حزنه
- التفت - ومالقيت احد معي -
للباب حونه
للستاير .ز حزنها ..للقلب مزنه
للقصايد وزنها ..!
في وجهي شظايا !
واذكر اني ..
جيت اغير وجهة الارض..
بشظايا لهجة رثه
مادريت ان الكتابه:
ثعلب .. ينهش لحم جثه !
وموت وسط موت
والورق تابوت !!
واذكر اني ليتها ماكانت عيوني قصيده :
إدخليني !!
*....
واذكر اول مادخلتيني في ليله
عرسها المبروك :
وجهك صار شوك ..
وبعت انا وجهي لحرفين بجريده!
والتقينا اخر الدرب
لايدينك صارت انهار السلام
ولا.. يديني صارت الحرب
......!
واذكر اني ..
صارت الدنيا بنا ألغاز !!

سلامتك
الله يرجع للدروب خطاك
للصبح ابتسامتك
سلامتك ...
من قلب يرسل مع سلامه خفقته
سلام ....
.... تك !
سلامتك
ياللي الرياض ان ذعذع الما
واسفهل القحويان
أضيع في غمازتين خدودها ..
وثمامتك!
أعرف احسك
بس ما اعرف كيف اصيغ معناك
أغسل بشمسك
ظلمتي .. واقول انا مضناك
.........
........
مثل الرياض أنتي حنونه مبهجه
مثل اغنيه للبدر عبد المحسن
تغافل ضجيج المركبات .. وتتجه
لهناك
.........
.......
أنا ضلوعي أثل , وانتي
مثل .... مالك مثل ..
إلا الرياض ان ذعذع الما
واسفهل القحويان
وضعت في غمازتين
خدودها
وثمامتك
سلامتك

قلت للقلب - استفزه-:
والله اني لأتركه !
قال : له عندي معزه
ماأنت - والله - محركه !!
خل عنك الهرج هذا
.. اللي بلا معنى
ورح له واعتذر منه ورده !
وان حصل لك بوس يده !
قلت للقلب - استجيره - :
والكرامه ؟!
قال : يارب السلامه !
قلت لك رح واعتذر له
وإن حصل لك بوس رجله !
والله ان الله خلقني فيك
.. لأجله !
قلت للقلب :
البنات كثار به من كل لون
الجوافة / الكرز / الزيزفون
قال : انا شالله بلاني
... بالعفون ؟!
قلت : انا شالله بلاني بك
حبيبك ما يبيني ..
قال : انا ادري
مير ماهي في يديك ولا يديني !
قلت : انا بقطع وصاله
قال : انا بقطع وصالي !
قلت : يا قلب استحاله
قال : يارجال غالي !
قلت : ادور لك بداله
قال : دور لك بدالي !!