ساور الشاعر يقينه
في النجوم
البرتقال اللي يقشر عاشقينه
طفل .. طفل
في القوافي مجدنا الحافي
يبللني جفافي
في السفينه ناقة البحر الحزينه
يرتحل يرتحل يرتحل
ارخته شفاة عذرا
قبلته بشهوة ثيب وجغرفها الكحل
في المواني
ماسوى الغاير في روحي
من جروحي
يعرف الليله مكاني
كل درب وعر شعر
وكل ماهبت غصونك
مالت الريح
وتشظت في دم الشيح
المعاني في الجسد
يامنافينا نمى فينا بلد
من سلالات التباريح اجتباني
كل ماهو نافر
هذا نقيضي يابس ماراود الأعشاب عن نفسه
ولكن
كيف ابكتب
كيف أبخدع كل هذا اللب
وأغويه يتخلى عن قشوره
قلت أبرمي رغبة القارئ
في عرض الحيط
وأرمي عرض هذا الحيط للبحر
الذي برميه للأسماك
واستغني من النقد الكريم عن المشوره
خربيني
غربيني في الصدى
جربيني في المدى
احطبيني للضلالات الطرية غصن
يابس من هدى
أعربيني فاعل للمبدأ
خربيني .. خبريني ..بخريني
كيمياء الغي
أمنحيني بهجة الجهل
واعطيني فتنة الأشيء
عقرب الساعة نحاس
يسرد الكبريت وحدي
كنت في الغرفة
ووحدي شفت
كيف اغتصبت الظلما كتاب الضي
غصت الغرف ظلام
ناشف صلد يتناثررغبة ملسا خرجت
الباب
كان بعشرة أقفال وصايا
وانكسر من ركلة مرتبكة
ماكانت الشمس اسبلت
لحظة خرجت عيونها
كان النهار باخر انفاسه
وكان الإنهيار بأكثر اجناسه شبه
بالفلفل
أما الناس
بين اللي بقى في غرفته يلغيه ورث
باذخ في الصمت يستشري
وبين الخارجين بركلة مرتبكة
للشارع المبحوح شمس
تلفظ اخرماتبقى من شعاع
بعضنا قال أرجعي ياشمس
لكن بعضنا قال انطري حتى نشر هدومنا
ياشمس
قالت طفلة يتلعثم التفاح في ترتيلها
غيبي
حبيبي قال أنا الشمس
سألني صاحب كنا تعرفنا على بعض
فقصيدة
بعد خمس سنين
ليه الشمس تسهر وحدها
قلت
أذكر اني قلت شي مبهم حتى علي
الشمس صابون تنامى رغوته
واليل ذقن الأرض
قالت مومس يكتظ فيها التبغ
والدهن الرخيص
اليل شمسي
غابت الشمس
وتشكك بعضنا
مادام حتى الشارع الواسع ظلام ليه
مانرجع
صرختي
كنت شفتك قبل هالمره
ثلاث مرات في كبد الزحام
وماتنبهت لوجودك في
دمي
لاترجعون
الشمس ترجع والظلام
أهون من الظلم
ألتفتك
كنت الأشبه بعشبه ويوم
طاح احجابك الأبيض وشلته
كانت الريح أثمرت في قذلتك
مهر خصيب
ماعلى الناقد
سوى انه ياخذ اخر كلمتين
وكل مافي السطر الأول
والسفينه
ناقة البحر الحزينه
بعدها يسفك ثلاث أربع عبارات ويثرثر في جريدة
مو قصيدة
لين فواح هذا الليل
شفاف امطري
يستوطن الكراث باطرافه
ومع هذا نخافه ؟
أبرقت أوهي طعوني
أرعدت أو هو أنين
والسهر يحطب عيوني
رمث وأوراق وحنين
الفواصل
كانت أقرب للمراجيح الصغيرة
ليه ترسمها مقاصل
.. يالقصيدة
لاتواصل
.. اه لو تدرين شلي
لاتواصل
.. فيك حاصل
لاتفاصل ردها مثل المراجيح الصغيرة
مثل حبات الذرة
شيطنت لاعب كرة
ظل شعره طيرتها الريح
من قذلة مره
كل ليلة
يخرج من الما
ويدخل في القصيدة
طفل
يبادل ضيا القنديل
باسرار الفراشات
ويضج بدفتري
الشتا تلويحة المنفي إلى الأرض
البعيدة
والمسا نادل وانا في حزنك العشرينيا
واستبدل اسمك بالفراغ البربري
من حصاتين .. لحصا تين
استدار اليانع المجبول بالأوتار في العاشق
بلادي
مثل ماتغرق سما في نجمها
أعلنت نعناني على صدرك
ومرغتك في وجه بنيت ماشاغبت نسمه
طرف فستانها إلا
ونورست احتمالاتي
حليب عاري حتى من العري و
بطاقه
أكثر الأشيا قرف قارئ يقلب في كسل
حزنك تماما مثل ماسيل المجلات القديمة
في صوالين الحلاقة
انطلاقة
ماتوحش في دم الباذر سوى الأخضر
بلادي من حصاتين لحصا تين
ارتبكتك
ارتكبتك
وابتكرتك
كيميا وغي
تك تك
مرحبا
تك تك
ومر بي حبا
تك تك
قصيدة
تك
فوجه طاعن في اليتم
تك

هينه دام هي هذي فهي هينه
والله اني حسبت العاقبه عاقبه

عاد تدري هي من أول وهي بينه
شوفها مايبي له نظرة ثاقبه

بنت ستين كلب وزفت ومطينه
قصة النجم والخبل الذي راقبه

مابعد ماشفت من همي سوى عينه
كيف أجل لو همومي جتك متعاقبه

جيتك بغصن طيب زهرته لينه
كيف لو ييبس وتصفر الأوراق به

من رجا خير في شرواك ماعينه
لاأنت سباق طيب ولاأنت لحاق به

مومس الوقت لو صلت ماهي دينه
يعرف البير واللي فيه ومن واق به

لا تحلف اليمين .. ولا نبي بينه
فارق الصدر يالسر الذي ضاق به

كل شخص له من الذل مافينه
وكل شخص له من العز مالاق به

زين اللي تبي واللي تبي شينه
مانت حول الطنايا لحيتك عاقبه

الكتابة :
إبرة مثقوبة من لامكان
في لازمان
إبرة يدخل بها خيط الدخان
وينسج الشاعر ثيابه !!!
غرغر الما في نراجيل العطاشا
قلت له مهلك ؟
اه ياهذا الدخان اللي تلاشا
ليتني مثلك !
لافقدت اهلك
ولابكوك احباب
علمك ف جهلك
صادق كذاب
تهلك وتهلك !!
الدخان اللي يسافر في زوايا شهوة البارود
شاف وجهه _ كانت عيونه مرايا :
جثتين ودود 00
في الليالي السود
ثرثت طلقة !
الزمان : جلود
والفضا : خرقة
والحدود : حدود
لي حبيب كل ما افض الرسايل
اوقظ نعاسه
البخور اللي لفظ وسط الجدايل
اخر انفاسه
صب لي كاسه
كلمة كلمة
من فقد ناسه
لاذبل حلمه
يشهر احساسه

يوم كنت( صغير) يقولون جني
ماخبر واحد على امي ماشتكاني

كنت موذي والوذا مخلوق مني
كنت اشقا طفل مولود بزماني

اتشخص ب(الطقيه) ياعنني
صرت اغازل واعرف اسلوب الغواني

كل بنات الحارة كانن يعشقني
ابتسام..وهند واحلام.وتهاني

من قبل لاقول .. طيري.! يلحقني
ويحبشني من قبل لاصل مكاني

كنت ب (الحاره) من الطيش احسبني
سندباد اللي عرف سر المواني

كنت أوسوس بالشعر من صغر سني
والمس جروحي على شانه واعاني

لين في مره .. وانا ماشي واغني
رايح لدكان .. (عدنان اليماني ) ..

مرني خنجر غلا عشق وطعني
جايني من وين ؟ مدري بس .. جاني

وش تبون بقصتي .. ؟؟ يخرب مطني ..
ما ضحك غيري علي ولا بكاني

اسمعوا بوح الحنين اللي سكني
واعذروني لا خذل حرفي لساني

لا تعدون السهام اللي رمني
وتسئلوني ويش كثر عوج المحاني

احسبوني طفل محتاج لتبني
عن حسدهم حافظ السبع المثاني

وازرعوني بالعيون اللي جفني
واقطفوني من على خضر المعاني

اطعنوا صدر اليقين بسيف ضني
واشربوني دم لو جرحه نساني

و اسمحوا لي بين( قوسين ) التجني
اخذ المجني عليه بذنب جاني.

أه منه . واه منكم. وا ا ا ه مني
من نبش فيكم ورى الصمت وحكاني.؟

ايه اموت بدونه .. وأحيا كأني
عايش بدوني . ! غياب انسان ثاني .

والله انه بالوهم يوم يحضني
طيفه يصدق . !! وانا اذوووب بحناني

أكذب الصدفه واصدقها !.. واهني
واجرح الساعه . لاجل خاطر ثواني ..!!

اسألوا بنهاية المشوار فني
من وشم جرحي على صدور الاغاني.؟؟

وعلموني ويش يقول الشعر عني
هو أخذ من حسرتي.؟ والا عطاني

بلغوه اني تعبت من التمني
ولا لقيت اريح من احلام الا ماني

وصدقوني موغرور ان قلت اني
ماخلق ربي قصيد الاعشاني.

جت بأول الشارع و(جفنى) بين سجده واعتدال
ومرت وذابت بى قبل.. تسجد من الجفن شعره

تجر..ثوب.. الغطرسه.. والعنجهيه........ والدلال
تمشى تقل تمشى على.. شى تخاف تكسره

ساق يعزم ساق /وخصر/ ان مالت السيقان مال
ينثر (عناقيد الغنج)...... والشوف... يتليه بشره

حتى ( الرصيف) استانس لخطواتها فوقه..وطال
كل ما وطت حجر... (غمز).. للى وراه.. يبشره

شربت زمزم حسنها.. حتى سكرت من الجمال
مثل الذى ما شاف خير..او شاف.بس استكثره

وظليت( لا نايم) واقول:.. اسرفت يا حلم بخيال
ولا واعى اشهد غيرها.. ما خلفت (حوا) ..مره

تكلفت ..،..عبث،... تبى تستر...(بغربال)..شال
ولا كلف الله.. نفس ذاك الشال... فوق المقدره

وجه.. تنفس به صباح..... من صباحات الشمال
اصفى من الطيبه بياض....ان ما تنرفز... احمره

تفاحتين..ليا ضحكن،... قل مات سوق البرتقال
وليا بكن،..... توردت مكانهن.......... الف ثمره

وتوت.. طغى...واستفحل..وعاث بشفايفها زلال
تستطعم.... ليا بلته ( بالريق)...... نكهة سكره

و(ثغر)... يحج الشوف غصب لقبته من غير بال
الله يرحم.. من لمس ركنه..... ومن حب حجره

و(جفن) ان تثاوب زلزل العقل ونفش عهن الهبال
تقوم... بالروح القيامه... قبل ما....... تستغفره

وهذا لحال ، ..و (قدها) المنحوت من جوهر لحال
سبحان من قال..( لعجينة طينها).... كن جوهره

تقفى...( بردف ).. ما تقول الا تقل ينده .. تعال
وتقبل..( بصدر )..ما تقول الا..... من اللى زرره

والثوب ..ما كنه مصدق..تلبسه..ابن( ال..حلال)
حتى.. حضنها حضنة....يا( عل ربى)..... يقهره

حسن سفك.. دم الانوثه..وانتهك..عرض المحال
ومن( كفها الغض).. انتهض.. نور...تكاسل اكثره

جت بأول الشارع.. ولا ادرى.. عقبها من لا يزال
ما يلقط انفاسه....ولا عقله.....ولا... غض بصره

هذا وانا.. ما شفتها الا...بين.. سجده.. واعتدال
من جفن.. يقسم غيرها..ما شافت عيونه.. مره

ف سينما الجهرا
كان الواحد يدفع مية فلس ل "عنتر : يغزو الصحرا" !
ميه وخمسين فلس لعنتر : "يغزو الصحرا " !!
ميتين فلس لعنتر 00 يغزو
الصحرا ,00والمتغطرس من ظلمتها ينبت شمسين !
(طبعا غزو الميتين احسن من غزو الميه وخمسين )!!
000000
ف سينما الجهرا00
مية فلس لعنتر: يغزو الصحرا
ميتين فلس لعنتر: يغزو الصحرا
ميتين وخمسين ل عنتر : يغزو النعمان بن المنذر !!
ويرجع داحس والغبرا !!
(وف الاعياد ويوم الجمعه يغزو كسرى )!!
0000
لكن لو ماعندك تدفع ايش راح يجرى ؟!
:000
أبدا 00
يسحب عنتر كرسي عند الباب ويجلس يقرا !
يقرا ف أرقام مفكرته
يوطا خد امه بالنعل
وعنتر تتخنزر عنترته !!
تفرك عبله بين اثنين وعنتر لا ينكر معرفة الخزي ولا يعرف منكرته !!
عنتر سينما الجهرا هذا :
عبد لمن يدفع تذكرته!

كانت الصوره جميله ... و كان في الصوره طفل
و خلفنا كانت مره تلبس عباه
و اطرف الصوره ولد يضحك صباه
و قربنا حطت حمامه .... قربها حطت حمامه
تذكرين اش كثر كانت ابسط الاشياء تثير الانتباه
و في البعيد احتفظت الصوره بمنظر مهر جامح
و في البعيد فاخر الصوره شخوص بلا ملامح
تذكرين ايش كثر كان
الوقت ... شفاف و ... حنون و ... طيب و ... مبهج و ... دافي متسامح
و كان في الصوره و هذا اجمل اللي كان في الصوره ... طباعك
نظرتك و الشيطنه في داخل عيونك جنونك ... و اندفاعك
بسمتك لما تطوقني ذراعك
اذكر انك قبل ندخل هذي الصوره في لحظه التفتي لي و قلتي قول احبك
قلت اخاف ليا تكلمت احرم اذني من سماعك
كانت الصوره جميله ... كنتي في احلى نفانيفك
كأن الصبح ضيفك
او كأنك من كثر ما كنتي انتي كنتي طيفك
كنتي في اكثر مواعيدك وفا
و كنت انا في ايديني دفا
كانت الصوره جميله ... و كان في الصوره طفل

على حد العطش أرسم فمي غيمة وخمس أطفال
على حد الظلام أشعل يدي عصفورتين وشمس

مكاني مو مكاني والزمان يشوفني أشكال
أجي مرة صراخ أقوى من الحكمة ومرة همس

أنا كرهي خبال ولا عشقت أعشق بعد بخبال
ولا أعرف الوسط بين الحلول وذي طبيعة نفس

وأنا عشقي لباكر ولاجل ذا باركض رفيق ظلال
وفي زوادتي تمر النخيل اللي زرعني أمس

معي في الذاكرة بنت توصيني بمشط وشال
وصوت أمي يوصي لا تجي ربعك بخاطر عمس

وأنا أمك لاتنام بليلة وأنت خلي البال وخل
أدنى طموحك لانظرت لنجمتين اللمس

وأنا أمك لاصعدت إصعد مثل دعوة فقير الحال
ولامنك نزلت إنزل مثل غيث بيحيي غرس

وعلى حد العطش إرسم فمك غيمة وخمس أطفال
وعلى حد الظلام إشعل يدك عصفورتين وشمس

قالت وش العلقم الترياق؟
ومحد ضمادة سوى جرحه

كل اللقا لو نظرت فراق
وكل البكا من ورا فرحة

محدربح كود لما باق
محد خسر كود من ربحه

مابه خلوق وعديم أخلاق
للكل نسبة من الصحة

يا شاعري والوهم حراق
أجدى من مصافحة ذبحه

خذها حقيقة من الاعماق
صدرك هو اللي طعن رمحه

مافي الكتابه جديد افاق
كم تشبه الكسرة الفتحة

قلت اسمعيني صوتي تاق
يجمع لك الكل في شرحه

ان قلت بعض الفراق عناق
أو قلت بعض الكفن طرحه

لاني بكاذب ولا افاق
لكنها النظرة السمحه

أكبر خطا اننا نستاق
تعريف للبحر من ملحه

انتي اتبعيني..أنا أوراق
أو تهجريني..أنا صفحه

للشعر للحب للاشواق
لليل في داخله صبحه

بيني وبين القلم ميثاق
يهدني..وأبني في صرحه

ذي راحتي وإسألي العشاق
العاشق كتابته مسحه

هنا نجلس أحسن أو هنا؟ وين ماتبغين
أنا احب هذا الركن لكن على أية حال

هنا أحسن ،، أرمي معطف الفرو ، للتخمين
وفيه تعرفين إننا احب هذا الشال

علامك ، علامك ساكته ،، ليه ماتحكين
تبين أبتدي؟ حاضر ، على امرك براحة بال

على نفس هذي الطاولة ، من ثلاث سنين
رمت بنت دبلتها الذهب ، وانكسر رجال

تمسك بها حاول وحاول ، لين بلا لين
كان يحاول بكفت الأشكال

وشدت ايديها ، وارتفع صوتها وبعدين ؟
أنا لازم امشي ، وأنت يكفيك لعب عيال

على حر من قلب انهدم حاول المسكين
وعلى قل من مهل الندم ، باعدت تختال

هنا ، مات حب و، يبس قلب و ، تملت عين
من الملح ، وأندفنت حكاية فرح وامال

وجيتي تبين انرجع اللي مضى هالحين
أنا من ثلاث سنين بطلت لعب عيال