اعترف لك بانتصاراتك علي
واعترف اني خسرت المعركه

في ضياعك ضاع مني كل شي
ياسراب عاجز لا امسكه

تهت انا ما بين ميت وبين حي
مع فؤاد ذنبه انك تملكه

بالمثل اخر علاج الناس كي
وانت حدتت الطريق ومسلكه

احرقي يانار ما خطت يدي
انتهت قصة عذاب مظحكه

انتهت قصة فراش شاف ضي
اقترب من شان نوره واهلكه

يابحر الاحباب جزرك شين
حي المنازل تحية مد

ما به على القلب كثر اللين
قاسي متى ما الحنين اشتد

يدفيني الضم في التنوين
يا شهوة الضمتين بود

حرفي حطبته من التخمين
واشعلتني له ف ليلة برد

والشعر جوله اثنين اثنين
قبلي وبعدي وجيته فرد

من قبل اجي له وانا : البعدين
ومن بعد ما جيت جيت البعد

لاقرب من ( الحمد ) كثر امين
لابعد من ( امين ) كثر الحمد

جمعتك والحطب بيني وبين الذاكره فواح
وشبيت الكلام بدفتري .. واحرقت خلاني

شكت عيني من اثار الدخان وجفن عيني صاح
وشديت الجفون لبعضها لاشك مامداني

بكيت ويوم شفت اني لحالي ماكتمت نواح
وسيلت الاحبه كلهم واحد ورا الثاني

من اول مانت خابر ..لاخر اللي مانت خابر طاح
ولاخليت احد منك انت لين العاذل الشاني

اذا الجرح انخلق لانسان نا انسان انخلق لاجراح
واذا الاحزان لابن ادم ..انا ابن ادم لاحزاني

عزيز القوم ذل بلعبة الغفران والتفاح
ولاني سائل رب العباد يجيك ماجاني

ولاني طالب الا اني الا مني بكيت ارتاح
ولاني طالب الا ان انت ماتشمت بوجداني

لقيتك تلتفت لي في الدموع وغامرتك افراح
ومت من القهر .. حتى بهذي .. وتحداني

اخافك تواعدني ولا توفي الميعاد
واخافك تواعدني وتوفي مواعيك

لانك اذا اخلفت مات الهوي ببعاد
ولانك اذا اوفيت مات الهوي بايدك

وانا ابغاك لايامي فراش وغطا ووساد
اذا الليل بعيوني نهاري علي جيدك

وانا ابغاك مينا لاغترابي وابيك الزاد
لجوعي وابي حريتي تدخل في قيدك

وابيك الشبك والطعم والصيد والصياد
وانا ابيك تطلبني وانا اعطيك وازيدك

أخافك نعم..والخوف في داخلي يزداد
لانك تسيدت الزمن... والزمن سيدك

هذا القلم وش كتب .. هذا الندم وش محى
في ايدي رعشه ولاظني على شي قاوي

حبيبتي قربي هاتي يدينك .. صحى
في داخلي طفل مري به .. حمام وغناوي

الحب حنطه هقيت ان المفارق رحى
فارقت زاد الغلا رديت ولا بلاوي

أثر الهوى لاتمكن منك اخيذة ضحى
اثر الغلا الصدق صدق ان ضج ماعاد ياوي

ونا اخر اللي يدور صادقين نصحا
في الحب ياشينها تنوي تقل مانت ناوي

لاهي صعيبه ولاني لاقي اللي وحى
ولاهي قريبه .. ولاهي اللي تجي بالهقاوي

ولاهي بحب الخشوم ولابدقم اللحى
ولالقينا لها عند المطوع فتاوي

ماعاد ينفع خجل فيها ولامستحى
برد يفطر خشوم البل وعاشق خلاوي

سلامي ياهدوء الأرض هذا أول الإعصار
توحدت بجراحي والمدى وجهي واياتي

تشربت الهموم وبعض حلم في عيون صغار
وسميت الفضى جلدي وسميت الشجر ذاتي

لذا يممت وجهي عكس وجه الريح والتيار
نعم مادام ذيب الوقت عمدا مطلبه شاتي

رميتك ياحطب ذكراي في برد المسافة نار
وشفتك ياحطب تخلص وأنا بأول مسافاتي

رمادك في يدي شلته سؤال وشوكة استفسار
يجدد بي حريقة وأشتعل تولد بداياتي

وكملت الطريق بحلم باكر تنبت الأشجار
على أرض تسميها احتضاراتي حضاراتي

وباكر أضرب برجلي الصحاري تنفجر أنهار
وأشق البحر بعصا من غصن اهاتي

أقول مسامحك ياللي رفض يدخل معي في الغار
وأقول مسامحك ياعنكبوت عد خطواتي

بعدها يرجع العشق القديم لجمرة الأسفار
وأيمم وجهتي ومن ثاني أفرش مصلاتي

أنا وش أطلبك خلاص ماعاد بي أعذار
ألا ياسمعي أجمل دروبي درب زلاتي

كتبت اللي كتبت ولا قصدت ألفت لي الأنظار
ولكن قصدت ألفت لجوع الناس نظراتي

وأنا عامد أوضح شي وأترك شي خلق استار
ولا أقعد ليلة إلا وأغير قاع مرساتي

وأنا شفت الجمال يكون أجمل لو عليه أغبار
لذا لف الغموض أوراق لفتها كتاباتي

احيان احس ان انا غمازتين وسنا
لبنية سيلتها حشمة زايده

واحيان احس ان انا موسم حصاد وجنا
في قرية نايده في بلدة نايده

واحيان احس النفل بعضي يمر الغنا
راعي غنم يحطب من ضلوعي البايده

واحيان احس ان انا ويا الهبوب تننا
للغصن نلبس ثياب الصبح ونعايده

واحيان ..واحيان احس ان الضبا بي هنا
واليا تحركت اخاف اذير القايده

واحيان اوقف عدوي واسأله اينا
بنا انا..وايني بك جمرة قاديه

في صوت فيروز انا الصفصاف والميجنا
وانا مع حجاب شرق وطايره عايده

كلي من احيان من أشيا بسيطه بنا
تمر في صمت واستسلام ومحايده

أحرث من الداخل اقصاها هدام وبنا
لغاية الارض ماتصبح بنا مايده

وانا اكتب الشعر لي أو لي ولك أو لنا
كذا بلا ايدلوجيات ومزايده

الشاعر اللي من الخارج عذاب وضنا
في داخله همت المتمنعه رايده

الشاعر اللي مثل شمع نحيل فنا
حقيقته شمس تستلقي على المايده

اياك ترثين لي ..أو تحسبين ان انا
غالطت نفسي بلا داعي ولافايده

ماهو صحيح ان انا اباعدت عما دنا
فقط لأني أحب الوعر والكايده

غنى المغني ودار الرقص في الحفله
والضي شعشع وضج الطار بالعالي

وانا اسرق الشوف لعيونه على غفله
وادور اوصاف تحلابه وتحلالي

صارت حروفي معه ريمية جفله
لكني امسكت بالمعنى على التالي

اصدق من الجوع واطهر من بكا طفله
واهدى من الليل وادفا من عتب غالي

له في الحنايا عصافير ترفرف له
ليت المغني يمول له بموالي

واصابعي من لظى شوقي تكاتف له
يفرك بعضها بعض واصيح عزالي

وانا ادري ان الذي جنبه يسولف له
عني وهو يبتسم ويقول : انا مالي

كيف انت مالك وانا ماجيت للحفة ؟!
الا علشان اشوفك يابعد حالي

الليل موحش غريب وحية رقطا وديجور
والليل طيب ودفا واخت تمازحني ونوار

ساعات احس ان هذا الليل : نبش عظام وقبور
وساعات احسه : فرح بنت برسالة حب واسرار

كم ليلة كان فيها الليل : عبد .. رطب .. محفور
وكم ليلة كان فيها الليل : ((جيفارا )) وثوار

يا ما تكدس .. وهو يشتم (( عيال الكل.. )) مخمور
وياما (( تسندس )) .. وفاح اللون الأخضر وأربك الدار !!

له ألف مليون صيغه .. في يديه النار والنور
وهو شيئ ثالث .. بعيد عن انفلات النور والنار

يا ليلة .. ليلها زرنيخ منفي يابس .. بور
لي ليلة كان حضن أم .. وثلاثة أيتام وصغار

ليل اتشمشم به اللي مر ..نكهة خبز تنور
وليل اتجشم به اهوالي لحالي .. واصبح كثار

انا اصدق الناس .. واعدلهم .. وانا البهتان والزور !
يا قطعة النرد .. شوفي وش بقى لي .. بي .. من اعذار !

في داخلي قصة غياب غريب يشعل حضور
هذا اليباس بعروقي .. يلعن ام الوقت ..لا ..جار

غاب الطفل ، قلت طيب .. غاب بعد الطفل عصفور !
طيب .. وغاب الثمر .. طيب .. وغابت كل الأشجار

غابوا محبين .. طيب .. غبت أنا طيب .. بكت دور
طيب وبعدين يا طيب ؟! .. وش اللي ظل ما صار ؟

تبسمت لي مرة .. قالت تعال .. وطاش بللور
بالحكمة اللي تضاحكنا عليها دمع وغبار

ما دام دنيا .. وترفعها قرون السيد الثور
وش يزعل العاقل ان نادى عليه حمار : يا حمار ؟

فتنة الحفل زيدي مشيتك بختره
كل خطوة بروق وكل نفحه صهيل

باقي بين عقلي والجنون شعره
اقطعيها ياشينه عاشق .. مو هبيل

خلي الارض تاخذ شكل غير الكره
خلي النار تاخذ رمز غير الفتيل

من غدى الليل شعرك قلت انا بسهره
ومن غدى الصبح وجهك قلت مالي مقيل

ارقصي بين حد الذنب والمغفره
ارحلي في سكونك واسكني في الرحيل

ارجفي كنك الما.. فززته حجره
واثبتي كنك الفضه بعين البخيل

وانحني مثل غصن في طرفه ثمره
واوقفي مثل فزعات بدوي اصيل

والفحي علمينا كيف تقدر مره
تزرع الليل صبح .. وتزرع الصبح ليل

في عيونك سواد يستحيل اخره
كامن في بياض .. اوله يستحيل

واحد تخزرين وما يجيك خبره
اشهد انه عزيز واشهد انه ذليل

اتركي العقد بين الجد والغشمره
يخبر الناس وش معنى جميل في جميل

كن في الصدر ظبي عيوننا تذعرة
ينتفض يذعر الي مذعرينه قبيل

ومفرق الصدر حبة العرق تجهرة
كن لك عقد در وعقد من سلسبيل

بينهم حسد ربي بعد ما صوره
عقد وده يجف وعقد وده يسيل

اه ولا لمحتك مقبله مدبره
شفت مثلي نحيل زم حمل ثقيل

دام ذا عجز وش للناس بالمقدره
دام ذا خصر وش لي بالخواتم بديل

وسط ثوب خيوطه صمت في ثرثره
به قليل كثير.. وبه كثير قليل

كل شيء بجسمك يفضحه يستره
فيه فتنه قصير وفيه حشمت طويل

كنه المخطي الي يطلب المعذره
وكنه الدامح الزله عن الي يعيل

في ردونه نقوش له سنابل ذره
الله اعلم لو ان الريح هبت تميل

كل شيء ونقيضه فيك بالمسطره
اقرب من النفس وابعد من المستحيل

كنك الكذب لكن ماحد ينكره
وكنك الصدق لكن مافي يدينا دليل

باشت الغيد زيدي مشيتك بختره
لاجل اطاول بحرفي شامخات النخيل

شاعر تلمس ايدينك على دفتره
تغرق في اوسط اوزانه بحور الخليل