وحده من افكاري ايام الطيش كنت ابغى اسمي يكون كذا لونه
شكل الصمت والشباب اللي معاها قالو خلنا نعطيه باند
ذا يحسب نفسه ببيته !

م عليكم

اشوف عداد التقييم وقف عند 214 مليون يا للهول وربي رقم خلعه
لو تحلونها لي فلوس بس

بجد كرم البعض معا يستمر طويلا جدا الله يسعدهم يارب
يحرجوني بكرمهم وبكلامهم اللي يجيب العافيه والله


شكرا لكم

وايوه وش كنت بقول وربي ناسي < تذكر طيب
يمين نسيت وش بقول

م عليكم

تصير في افضل العوايل اهم شي كل واحد يصلح سيارته
ياخي احيان نبلش ماندري وش السالفه ونجي مدرعمين وكذا

هذه الحاله اللي صايره لي الان
متحمس اكتب والان ضيعت

لو دريت مريت المدونات قبل اجي هنا بس فاتن ذا الشي
بروح امر المدونات اشوف كيف احوال الشعب وجايكم

لحد ييغير القناه .. سلام

بالضبط هذه حالة اغلبنا مع الحجر والفعاليات اللي فيه
نلف بنفس المكان الضيق ونعيد بعض الامور
نفس امس وقبل و نفس بكره واللي بعده

وتستمر الحياه !!

اكتشفت طريقه جديده تمشي الوقت اسرع شي
صرت انام وصحى عشان ارجع انام

واجي اكتب هنا بكل الاوقات تقريبا شكلي اخر شي بقلب مدونتي صور
عشان انتهت سوالفي

صح على طاري السوالف وكذا
تذكرون سالفة التلفزيون واللي الحادثه من احدهم يوم يططق
جاتني تعليقات على السالفه من اكثر من شخص

سبحان الله نظرتنا للامور دايم تختلف قليل نتفق على شي
وهذا طبعنا نحب الاختلاف ونشوف الامور من زوايا متفرقه

الاراء اختلفت او التعليقات خلونا نقول
فيه من اخذ الموضوع من باب المزح والطقطقه وكذا
وفيه من ازعجهم الموضوع واخذوه من باب الاستهتار بالوقت الغلط
وفيه من اخذه ان ثقاله دم مالها داعي



شوفو فيه ناس عندنها الامور سهله وياخذونها كذا يعني نوعا من الدعابه
او المزح وبس والله

ترا انا اخذت الموضوع من هذا الباب ويوم جبت السالفه هنا
والله من باب الوناسه وكذا بس

واحد يقول عطنا من سوا معاك كذا بيقلبها هوشه شكله
م عليكم والله الموضوع حلو واعجبني وقلت اقوله لكم بس

والقصد كله مزح ترا ولازم اللي يمزح يتحمل او لايمزح
وخويكم صاحب ذا المدونه ماقصر مع العالم من سنين يطقطق عليهم
خلوهم ياخذون راحتهم بالطقطقه عادي والله

ف الاخير

خلوها تمشي زي ماجات والامور والله طيبه والصدور وساع الحمد لله
وش بعد !

لا لا خلوها بوقت ثاني بكمل نوم
اي والله تو اصحى افطرت وتغديت بنفس الوقت شيكت ع الشغل
قفلته وجيت هنا اسولف والان بطلع انام

" كونو دائما بخير انظرو للغد بتفائل اكثر كونو اكثر تسامح واقل عتاب
اجعلو من يهتمون بكم في مقدمة اولوياتكم وردو بعض جمائلهم بوقتها
لا تتاخرون حين يحتاجون منكم بعض الامور "

وبس والله !!

ســـلآم

اي والله .. ان بعض البلا كله فـ الاوادم !!

تخبرون مع الحظر تدور لك اي شي يضيع وقتك لو كان
مشي حالك ومو هذاك الزود وكذا

المهم

رجعت اغلب حساباتي في مواقع التواصل لاني مسجل
فـ اغلبها ورجعت لتطبيق قديم كنت مسجل فيه ! ماودي اجيب اسمه

هذا برنامج حق سواليف مباشره من اصحاب الحسابات تدخل
على الشخص او المذيع على قولتهم وتشوف و ش عنده وكذا ما انصح فيه لانه برنامج تافهه

مو هنا المهم

اللي قاهرني ثلاث انواع من الاوادم قابلتهم كثير هناك
ودك من يمسكهم وعلى شهار على طول وحجر لين يقوولون امين

الاول الشاب اللي مسوي درباوي وحاط الشماغ على الكتف
والسروال اصفر ومتربع ويسولف ويستخف دمه
ويخلي الناس تتمسخر عليه على اساس ان عندي متابعين

الثاني البنت اللي جايه ولابس النقاب وتشغل اغاني وترقص
وتعطي العالم فكره زي الزباله عن البنت المحجبه
لا والعيون مرسومه بطريقه تسد النفس وربي والعدسات كل شوي بلون
لا مو كذا يرحم ابوكم

الثالث المطوع اللي جاي ينصح بمكان زي كذا ويستضيف ضيوف
يكلمهم عن غض البصر او ترك الاغاني
وهو عارف ان المكان ماهو مكان هذه الامور
لا وبعض ضيوفه بنات

بجد اشياء ترفع الضغط والله ... والمشكله اغلب المشاركين بذا البرنامج
انمسكو قبل فتره لاسباب كلها اخلاقيه واستخاف ماله حد

مدري ليه مثل هذه التطبيقات مايصير لها حجب
المشكله اغلب متابعينها بزارين والله يمكن اشنابهم لسى مااخطت
او بنات توها بالمتوسط



والله حاله تحزن بجد الامور هناك تخليك تعاف وتخاف من النت بكبره
وبس والله سلامتكم

سلام

شكرا لأولئك الذين يتغافلون عن الزلات
من أجل بقاء الود !!
لمن لا يحكمون على النوايا سوى بحسن ظن

شكرا لأصحاب القلوب الكبيرة
التي تعرف أن الحياة لا تستحق عناء الأخذ والرد
للذين يتعاملون معنا كبشر !!

وأننا لسنا معصومين من الخطأ والنسيان والتقلب
شكرا لمن لا نحتاج للتبرير لهم
لأنهم يعرفوننا حق المعرفه .. !!

شكرا لكم دائما .. وبس والله ...

ســـلآم

, والله نفسي بسجاره احس ذا وقتها !
ك العاده تو اصحى مع اني موقت جوالي على 12 ب مافاد
شكلي ولفت على الصحوه وتقفبله بدون ما انتبه له !!

شكلي بغير نغمة المنبه يمكن يفيد وادري يفيد
جربوها لاني جربتها اذ منبه الجوال معاد يصحيك تراك تعودت عليه
وتصحى وتقفله وانت نايم فغيرو النغمه وبتضبط معكم

م عليكم

نفسي بسجارة والله من يوم صحيت وهي بمخي
يازين ريحتها الصبح او ماتصحى لها بنه على قولتهم

وش بقول !!

ايوه صح تذكرت للشباب هنا استغرب من اختفاء توقيعي
وليه مختفي من فتره والله ماني شايفه قلت يمكن ع الكل طلع لا
الغالبيه تواقيعهم فيه الى خويكم اللي هو انا

ثاني شي !!

عداد التقييم عندي متوقف من فتره ماعاد يتحرك رغم ان التقييم
من الناس ما توقف يجي نفس العاده
هذه عاد يبغالها الصمت يشوف وش الحل ليه عداد التقييم عندي توقف
تراه من الاشياء اللي تحمسن ادخل هنا

ثالث شي !!

جاتني اساله عن حذف المدونات فتح مدونات جديده وكيف الطريقه وهل يقبل
ايوه يصير كلم اي مراقب هنا يحذف مدونتك وافتح غيرها الامور سهله
الى اذا الشباب مغيرين النظام مدري عاد
وايوه صح ترا مالي علاقه كنت فيما مضى من الزمن لي علاقه الان
لا والله نفسي نفسكم مجرد مخربشاتي وبس

رابع شي !!
عندي باللاب حرف السسسين بالقوه اضغطه ويكتب طفشني
ادري مالكم دخل بس قلت بتحلطم عليه شوي طفشني والله

فـ الاخير

" التردد دائما يجعل كل شي يموت معه لا تترددون في قول ماينبغي قوله
اتركوا التردد عنكم وبادرو بالكملة الطيبه لان بعضهم يستحقون ان يسمعونها منكم
لنكن نحن الأكرم دائما والمباردين لا تتنظرون ان يبادركم احد فاجو من تحبون دائما "

وبس والله .. سلامتكم

ســــلآم

انا لله وانا اليه لراجعون

( 1349- 1443 )

يوم اكمل عامه 94 او قبل اكماله بليله واحده اختاره ربه ليكون بجواره وتحت رحمته
رحمك الله ابي ..

لي اكثر من سنه ماجيت هنا ... دخلت اليوم لاجعل لأقسى حدث ممرته به منذ ولادتي
لاكتب عنه رحمه الله وعن وداعه وفراقه
اكملنا اليوم العاشر منذ وفاته رحمه الله
كانها عشر سنوات من اطول الاسابيع التي ممرت بها اي والله اسبوع كانه سنه
رحمك الله ابي ..

لا احد ابدا يذكره الى بالخير كنت اصغر ابنائه بعد سته
يكبرني بستون عاما رحمه الله لم اعرفه الى شيخا كبيرا محبا للخير مقيما للصلاه
داعي للمعروف وامر به دائما رحمه الله
رحمك الله ابي ..

رافقته فتره ف المستشفى قبل ان يحال للعنايه الفائقة وتمنع زيارته
كنت اخر من تحدث معه قبل ان يفقد قدرته على الحديث رحمه الله
كان يردد دائما رغبته الكبيره في ان يدفن بالبقيع بجوار صاجبه رسول الله صلى الله عليه وسلم
وان لايرد الى ارذل العمر ويكون سبب في المشقه على احد
من اهله او ابنائه رحمه الله
رحمك الله ابي ..

لم طل تعبه في اخر ايامه حياته كثيرا اسبوعين دخل بعدها الى العنايه
ومنها حملته الى قبره رحمه الله تعالى
حقق له ربي ماتمنى موتا وهو بكامل قواه العقليه رغم انه قد بلغ 94 من عمره
رحمه الله تعالي حتى اخر ايام حياته كان يسالني كثيرا عن اوقات الصلاه
رحمك الله ابي ..

لان سمعه قد ثقل ولم يتكمن من سماع الاذان الى حين نخبره بذلك
الى ان عقله وصحته ومشيه كان سليما لاخر ايامه رحمه الله
رحمك الله ابي ..

كم كان صعبا فراقك والجلوس اما جسدك طويلا وهو في كفنه
كم كان صعبا ان تكون من ابلغ اخوتك بوفاته ان تكشف لهم عن وجهه
لا اظن انني سانسى ذلك ابدا
رحمك الله ابي ..

كانت كل التواريخ متساويه عندي الان اختلف تاريخ وفاته عن باقي التواريخ
29 - 7 - 1443
السابعة صباحا اعلنت وفاته
الرابعه عصر تم دفنه في بقيع الغرقد بجوار صحابه رسول الله
رحمك الله ابي ..

اللهم قدرني وامي واختي واخوتي على فراقه
ويسر لنا السبل لان نكون معيننا له في الدعاء وطلب الاجر والثواب له
رحمه الله تعالى

والى لقاء في جنات النعيم باذن الله ابي

رحمك الله ابي ..

شكرا للجميع بدون استثناء شكرا لاقلام لها سنين لم
يكن لهم تواجد وكان حضورهم لتقديم العزاء والتعزيه
شكرا للجميع شكرا للاصحاب هنا والاصدقاء

كان لحضوركم وكلامكم ورسائلكم اثر كبير ووقع جميل
كم هي رائعه تلك المشاعر التي وصلت لي منكم
شكرا لانكم اعدتوني للايام الجميله هنا

شكرا لكم لكرمكم غير المستغرب ووقفتكم الجميله
رحم الله ابي واسكنه فسيح جناته

وجزاكم الله كل خير

مدري كيف اشكركم او اقول لكم
بجد تعجز الكلمات امام كرمكم وشهامتكم ونخوتكم واخوتكم الرائعه

اعتذر للناس اللي ماقدرت ارد عليهم بوقت ابكر من كذا
انشغلت واكيد بيقدرون وضعي ويعذروني باذن الله

يشهد الله انكم كفو جميعا

بجد عند المصائب او المحن يظهر معادن البشر
اي وربي ماشفت منكم الى كل طيب وكل خير

رغم تقصيري الكثير ونفسيتي اللي تاخذ ولا تعطي
رغم كل شي كانت وقفتكم معي رااائعه بحق

فيه اقلام وربي من سنين ماشفت لها تواجد
كان من اوائل المعزين والمواسين شكرا لكم

يالله مهما تبعدنا الدنيا عن هذا المكان
الى ان جماله لايتغير ابدا
كل شي في عبير جميل

دعواتكم لابي في هذه الليله المباركه الكريمه
وان يشمله ربي برحمته ويغفر له كل ذنب
ويسكنه فسيح جناته ويبدله بدار خير من داره
ويجمعنا به وجميع اموات المسلمين في جنات
النعيم

اللهم امين ...

سلام يا اصحابي يا اخواني واخواتي
لي عوده باذن الله قريبه

تصبحون على خير

خودافس

يالله .. ما اجمل واكرم اهل عبيرنا
وربي انكم كفو وتستاهلون كل خير استمرار كلامكم
ومشاعركم الطيبه .. يسعد صاحب هذه المدونه كثير

والله نفسي انزل الكلام هنا
بس خلوني اضبط الامور زين وباذن الله بنزلها
وربي انكم تنحطون ع الجرح يبرى

اي والله العظيم

بجد ماندمت يوم جيت وكتبت هنا
والله كنت محتاج شوي للدعم وابشركم
اني لقيته وفوق ماكنت متوقع او متخيل

يازين كرمكم وتسامحكم وكلامكم
مشكورين وربي

لي رجعه .. كونو دايم بخير ..

سلام

ونختم هالاسبوع بهالطله مع الناس الطيبه
ونقول اجازه سعيده للكل ويارب تتسهل امور الناس اللي عندها اختبارات وكذا وبالتوفيق يارب

احيان نحتاج نقدر الامور ونحسبها بشكل اكثر ايجابيه
وناخذ الطيب منها ونترك الثاني

التقدير الصح هو الاهم

لاننا في اوقات كثيره مانعرف بالضبط كيف الوضع عند غيرنا
فنحكم بالظاهر لنا وننسى الامور اللي ماتكون ظاهره للكل

مو كل شي ينقال او يكون للكل
لازم شوي اشياء تكون فيها الخصوصيه اعلى من غيرها

المشاركه دايم طيبه لكن بحدود المعقول
ياليت الكل يقتنع بهذا الكلام

وبس والله سلامتكم

سلام واجازه سعيده للكل يارب

ودعوواتكم الله يسعدكم

في امان الله وحفظه .. سلام مره ثانيه ..