ياكثر اللي يصير لنا نفس كذا تجينا نصايح كثيره
في بعض الاوقات تحس انك مخربها او انك ماتعرف تسوي شي اصلا

وبعضهم اصلا احسن الناس يوم ينصح لكن يوم تشوفه
تلقى ابعد الناس عن الكلام اللي ينصح فيه !!

احيان النصيحه تصير فضيحه وبعضهم قد ماتكلمه بذا الشي تلقاه ماينتبه
وودك من يطبق على فمه كل ماحاول ينصح !

اشوف انه احيان نتعمد نسوي ماحنا فاهمين افضل
نخلي الامور تمشي على اولها ازين تدرون ان اكثر شي يرفع الضغط
يوم تسوي ما انت فاهم وخوينا الى يزيد ويعيد يبغاك تفهم

يعني ش نسوي معاهم اللي كذا نقول والله فاهمين بس هات جديدك
ولا نكرشهم من اولها !!

ماعليكم اصلا اهم شي الاخـلآق

ايوه صح قبل انسى خليكم قريب شكلي جبت العيد والله
افطر واذ مانسيت علمتكم بالسالفه

سـلآم

صبحكم الله بـ الخير يارباه وربي البرد خلاص نتجمد
حقين الطقس وينكم عطونا العلم وش بقى للبرد وينتهي يكفي خلاص
بس والله مع كذا البروود والاجواء يبقى لجلسات البرد شكل ثاني
ياخي تحس بطعم الجلسه فـ البرد افضل من الحر !!

بجد شبة النار والجمعه حولها وريحه النار هذه اصلا لحالها حفله
يارباااه بجد اجواء البرد شي حلو

<< ياولد هذا وش يقول توه يحش وبعدين يمدح

هلا بصوت الضمير وينك زمان ماعاد اسمع لك صدى صوت
شكل البرد ماثر عليك وكذا >> م عليكم اكلم نفسي

المهم وش كنت جاي بقول وربي ناسي
ايووه صح تذكرت نفر جاي بكلام عن خويكم صاحب ذا المكان
شفته بمدونته اليوم ومن وقتها وانا معدل الجسله وطاق رقبه

احيان الكلمه الطيبه تغير المود للأفضل بجد اتكلم
ماتاخذ من صاحبها شي بس للمتلقي تكون اكبر دعم له وبعضنا
ينتظرها بشمعه

مشكور ماتقصر يابو عبدالله من طيب اصلك وانا اخوك
بس والله منكم اتعلم عاد حضورك انت وابو العز لاشي يستحق
يختلف بين الحاضرين واتعلم منكم الصراحه

طبعا ولا يهون اخونا الكبير نور الفجر
اتكلم هنا عن الشباب فـ المنتدى بس اما الاخوات خليكم على جنب شوي الان

يعطيك العافيه نفر انت وطلعاتك هذه
ومردوده للك بالافراح ان شاء الله اهم شي لا تهبطون الدوري بدونكم ماله طعم

وبس والله سلامتكم

ايوه قبل اطلع خليكم قريب في تساؤل عند نفر قلت بشارك برايي فيه
بس خلوني افطر الان واعدل الجسله واعطيكم رايي بالموضوع

فـ امان الله

ســـلآم

هذا الورد جايبه معاي عشان بنتكلم شوي عن الزواج والاهداف وكذا
طبعا لايفتى ومالك فـ المدينه بعد ( نفر ونور ) مالي كلام فـ الزواج اصلا

بس حبيت اشاركم شوي من وجهات النظر وبنفس الوقت
اشارك نفر وسواله اللي جايبه فـ مدونته

سوال صغير من اربع كلمات بس يارباااه الاجابات عليه تكون طويله
والواحد فينا يقدر يبحر في الاجابه ويتشعب لين يقول آمين

عشان كذا باتفلسف معاكم شوي ويمكن اطولها وهي قصيره فـ تحملوني
المفروض ان الزواج يكون هدف او ينبغي ان يكون هدف لوسيله >> شلوون

يعني اني ابحث عن وظيفه لاحصل على بيت لاستقر واهم شروط الاستقرار الزواج
لو اخذناها مجتعه كلها وسائل لتحقيق هدف مـــا !

اذن الزواج يكون في قمه الشي او منتهاه لكن اذ وصلنا له هل نتوقف او لا ؟

لان بعضهم يحسب الوصول للهدف هي نهايه الشي
لا في حياة الانسان الهدف الاسمى المفروض
يكون كبير ويحاول دايم ان يوصل له

عشان كذا جا اللغط بين الزواج وهل هو هدف ام وسيله
يمكن يكون وسيله للوصول لشي !

والزواج اكبر وسيله لطاعه الله ولعفه النفس وتكوين العائله وتربيه الاطفال والبدايه
في تكوين مجتمعات وكذا !

عشان كذا خلونا نتفق ان الزاواج هو وسيله لهدف اكبر وتحدي اعظم واشمل
لا يكون الزواج هو نهايه الاهداف واسوي كل الوسائل عشان اوصل له
وبعدين اوقف او اقول خلاص وصلت لهدفي الاكبر واكبر المخده وكذا
لا لازم تكمل في صناعه الوسائل للاستمرار فيه بشكل طبيعي وحياه طيبه سعيده
يتبادل فيها الجميع الحب والتحترام والتقدير وكذا

فـ الاخير

بالنسبه لاخوكم صاحب هذا المكان اقولها وانقلوها عني
ان الزواج هو وسيله للوصول لاهداف اخرى وليس هدفا محددا بعينه ابدا !

وهذا الكلام لا يعني ان الذي لم يتزوج لن يصل لتلك الاهداف ولكنه
لم يأخذ الزواج كهدف من تلك الاهداف وواصل حياته وسعادته
في مكان ما وحقق اهداف اخرى بوسائل مختلفه لان الوسائل كثيره
لتحقيق الغايات والاهداف

وبس والله سلامتكم واسف على الآطالة

واتمنى المشاركه معنا في مثل هذه التساؤلات وشكرا لك نفر على طرح هذه المواضيع
اعتذر مره ثانيه ع الاطاله

ســلآم

ونقوول صبحكم الله بـ الخير مع هالموجه البارده يارباااه
وربي البرد حلو بجد رهيب اويلاه ليته يطول اكثر بس عاد اهدى من كذا شوي

الحمد لله على كل حآآأآأل

ياخي انتم مثلي او انا اللي غير !!
احيان من كلمه يتغير المود تتبدل الاحوال تصير كل الدنيا تضحك لك
تحس انك ودك تطير من قو الوناسه اللي براسك

بجد من كلمه طيبه من ثناء على عمل لو كان بسيط من دعوه تحسها طالعه من قلب
ياربااااااه والله بجد احيان السعاده سهل نحصل عليها
بشرط اننا نعرف المكان اللي المفروض نتواجد فيه عشان هذا الشي

نترك كل شي وندور هذا المكان ونتمسك قد مانقدر بالاشخاص الطيبين اللي لقينا فيهم
هذه الاشياء هذه بعد من الحاجات المهمه

بعضهم يبادر بالكلمه الطيبه وماينظرك تطلب منه شي
يحرجك بكثر جمايله معاك وبتعدد طرقها ياربااااه كم هم رائعين بعض البشر

خلونا بقد مانقدر نكون من هذول الناس اللي يجيبون السعاده لمن حولهم
احاول وربي احيان كثيره اكون منهم اوصل للبعض قليل من الثناء الذي يستحقونه

والقصد والله ابتسامه خفيفه تظهر على من يصل لهم هذا الامداد
حلوه امداد متعوب عليها

ماعليكم شكرا لكل من كان له موقف طيب مع صاحب هذا المكان شكرا لهم بحق
بكم استمر ومعكم اسعد ويارب اكون سبب لو بسيط في سعادتكم

وبس والله سلامتكم

ســـلآم

ونرجع لكم من ثاني .. ادري ماطولت بس مايصير لازم اعلق شوي
على سالفه وصلت لي وشفتها قبل شوي !!

احيان تجينا اخبار لناس طيبين عرفناهم هنا اخوه واكثر
كنا معهم في اوقات كثير مكملين لبعض في التوجيه او الارشاد او الخدمه
جمعتنا فيهم لحظات جميله وومتعه وكانو بجد في حسبه الاخوه

اليوم جات رساله من احدهم يخبر ببعض احوالهم حزنت لبعض تلك الاخبار
وقفت والله طويل مدري كيف ارد لان الرساله فيها كميه حزن والم
ماهي بسيطه والله !!

احيان نوقف طويل عند كذا تضيع الكلامات من قواميسنا نتحول الى جمادات
ماندري كيف نرد او نواسي او نطمن ونتامل افضل بالقادم من الايام

سبحان الله !

فقد عزيز فقد امل بالغد فقد العمل عدم القدره اصلا على التفكير
وكيف هي قادم الايام من اصعب المواقف اللي ممكن تمر على الشخص

اللهم لك الحمد من قبل ومن بعد هذا اللي نقدر نقوله
جربت فقد اعزاء وجربت كيف يكون الشعور والتبلد والاحساس بالضعف
يعني حطيت نفسي بمكان صاحبنا لاني عشت مثل هذه المواقف

والله مدري ش اكتب بجد ومدري اصلا ليه اكتب هذا الرد اللي كله حزن
بس شكلي بوريكم كيف يكون تبدل الحال من حال الى حال

شوفو الفرق بين الردين الاخيره هنا فـ المدونه
الاول قبل اشوف الرساله الثاني بعدها !!

الحمد لله على كل حال ... اسال الله الرحمه والمغفره لمن انتقل الى رحمته
والسلامه والعزه لمن مازال حيا في هذه الدنيا

وبس والله سـلآمتكم

ســلآم

سلام من تحت الماء لاشفتوني جايب ذا الصوره اعرفو اني جبت العيد
تقريبا في بعض الامور او شفت شي ماتوقعته
وطحت من عين نفسي

احيان نستعجل في ردودنا او تساؤولاتنا ونرسها يوم يجينا الرد نعرف
قد ايش كنا مستعجلين او ما انفهم الشي اللي ودنا نقوله
هنا ودك الارض تنشق وتبلعك

عن نفسي ياما صارت معاي هذه الامور هنا وفي الحياه العاديه
ياما كثرت اساله وتلقفت واكلتها على وجهي ورحت فيها الى شوي
بس بواصل اللقافه الله لا يعوق بشر

نقطه ونهايه سطر

ياخي فيه ناس هنا ماشاء الله عليها والله ياخذون الكلمه من فمك
بدون ماتقول شي تلقاهم انتبهو للي تقصده وعلقو عليه بطريقه حلوه

قبل فتره شفت كلام فـ مكان قريب من هنا وكتبت وقتها وانا معصب ومضغوط وكذا
وطلعت من البكره جاني كلام صاحب الكلام اللي علقت عليه بدون ماحدده
يقول انت عطيتني كتف قانوني ودفه ع الطاير بس تمون

فصرت اركد شوي قبل اكتب عشان ماجيب العيد لان ماشاء الله كثير
هنا صارو حافظين وش ابي بالضبط وسهل يصيدوني

مبغى اجيب اسماء بس والله كثار اللي حفظوني

فـ الاخير

خلونا دايم نتفائل بالافضل ونتوقع الاجمل لبكره ونعيش اليوم بتخفيف
التفكير في بكره وننسى اليوم وسلامتكم

صح على طاري احيان لحد يرد على احد وهو معصب او في حاله نفسيه سيئه
لان جاتني صراحه باين ان صاحبها معصب واجد كلمتين ويطردني والله

ومكثر شوكلاته هناك

يالله ســلآم

بجد فقدت الأمل !

احيان كثير نوصل لهذه المرحله مع ناس تعبنا وحنا نفهم فيهم وكذا
حدك تتركه فتره وترجع له تلقاه يسوي نفس الشي كل مره !!
يابن الحلال وش فيك ليه كذا !!

يقعد يلف ويدور او يدور شي ثاني يتكلم فيه
ودك من يمسكه ويحذفه من اقرب شباك سلامات وش قاعد تقول !!

احيان نسكت افضل من الكلام اللي ماله داعي ينقال
لانه يقال ويحسب انه في مكانه وهو والله ماهو مكانه ابد ابد !!

بعضنا يبغى يسوي شي او يقول شي ومايدري وش يقول بس
في نفسه شي وماهو عارف يعبر عنه بالطريقه الصح !

احيان كثيره يخوننا التعبير بس نبغى نعبر لو غصب
مايقدر يمسك نفسه الى يعبر ويقول لو اللي يقوله خطا ويقلل من الشي اللي انت تسويه
بس هو بوقتها شافه زين وقال لا واللي يرحم والدينك كذا غلط

انت قاعد تقلل من الشخص ماتمدحه والله ابد !

لانك نظرت لشي ماهو مهم ابد وقاعد تتكلم عنه وتارك باقي الاشياء
كانك ماشفتها او شفتها وودك توصل كلام ثاني من تعليقك على هذا الشيء
الذكاء شي حلو احيان عن طريقه نوصل امور للبعض فيها

المشكله يوم تتكلم مع شخص كمان ذكي وفاهم بهذه الطريقه
تحرج نفسك وتكون بموقف غبي والله لانك تقلل من ذكاء شخص بطريقه تحسبها انت ذكيه

<< اذ احد فهم وش يقول يفهمنا بالله

ماراح اقول السالفه بشكل مباشر بس يارب خوينا يفهم اللي ابغاه
وما اضطر اتكلم بشكل مباشر مع احد لاني مو فاضي وربي

ولا ودي والله ازعل احد !!

المهم لحد ينظر للجهه الغلط ويترك الجهات الثانيه لكل مكان اكثر من جهه
تقدر تنظر للموقف من خلالها لاتخلون نظرتكم تقتصر على زاويه وحده
عشان حكمكم على بعض الامور مايكون ناقص

احيان نحتاج اننا ننظر من اكثر من زاويه ونفهم الموضوع صح
مو على اولنا وهب طب ونجيب العيد ترى بجد قربنا نفقد الأمل

فـ الاخير

بالله لا تخلونا نفقد الامل ترى هو الشي الوحيد اللي نلعب به هنا
ان بكره يكون افضل وبس والله سلامتكم

هذه حلطمه اللي بيسوي سكيب براحته
واللي مافهم صح بالله لايعلق ويتعب نفسه الامور ماعاد تستحمل

ســلآم ســلآم

هيا تو اكتب معلقه كلها حلطمه ويجي خوينا هذا وهو متربع
او متسدح ويقول

ماني معصب وربي بس هذه مشكلة اللي ينام متاخر ويصحى بدري
يقوم وهو ماله خلق احد ابد ويجي هنا ويلقى كلام بعد ماله داعي او انه فهمه ماساعده
يفهم القصد صح المهم ان خويكم اللي هو انا طنقرت

وجيت هنا وقعدت اخبرط واتحلطم ولحد يدور فايده من عندي ابد !!

نايم يمكن 3 ونص وربي واصحي 6 كلها ساعتين ونص اللي نمتهم
والان بالدوام كل تفكيري كيف اطلع اروح انام لي شوي قبل الظهر

بدون ما اكذب او اجيب عذر للطلعه زي وجهي

وربي مدري وش قاعد اقول احد يفصل النتي عني لا جيب العيد
خويكم فيوزاته ضربن والله او قربن يضربن

ماعليكم به موضوع بكتب عنه قريته قريب من هنا
يارب افضى وما انسى السالفه لاني ابي اكتب عنه من يوم قريته واليوم
هذا ثالث يوم مر بدون ماتكلم عن الموضوع شكلي صرت اخاف

مو زي اول من سطر اجي هنا اكتب معلقات

وش بعد !!

والله مدري خلوني اطلع افطر واشوف لي صرفه عشان اروح انام
كونــو دائما بخير

واللي ماهو فايق لا يقرا الرد اللي قبل هذا لانه يغث وربي
وصح لحد يحسبني اكلمه ترا كلامي زي ماقلت لكم مجرد حلطمه سببها قل النوم
والسهر والصحوه بدري

فـ حذاري من تكرار هذا الامر وشكرا

ســـلآم

بعض التعليقات ع الكلام

خلونا نقلب الصفحه وننهي هذه
ونقول بـسم الله فـ صفحه جديده

نحول معاها للقناه الثانيه

المهم لاتقلب الصفحه لين تقرا السطر الأخير