,
،



،
,

صباحكم ابيض وطاهر زي ضحكه الصغيرون هذا وابتسامته
وبدايه صفحه جديده ونهايه اسبوع سعيده ع الكل

خلصت اسبوع معكم من رجعت من المنفى حقي
يامسرع الايام معكم ويازينها مع انها تشغلني احيان كثيره عن اشياء واجد المفروض اسويها

تخبرون مشغول حبتين !!

،

حيا الله الناس اللي رجعت بعد غيبه وتركو بصمات في ذا المكان هلا والله
حيا الله الناس اللي يدخلون على استحياء في مدوناتهم ويكتبون بشوي خجل

حيا الله الناس الرايقه اللي تدخل الصبح عشان تترك بصمه في مدوناتها
بكل هدوء العالم

حيا الله الناس النايمه اللي يدخلون بدون مايسجلون دخول
وتلقاهم فوق السطوح طول الوقت وودهم يدخلون

حياكم الله جميع

،

متهاوش اول ماجيت اليوم مع خوين لي في الدوام عشان توزيع الشغل
يقول انت ولفت عليا صرت بس تحول عليا

اقول له مع نفسك نص الثنين واحد وانت ماشي
كل مازاد عن الواحد ينقسم ويقبل القسمه على ثنين ورافض !!

ماظني ظلمته او شي بس احيان يكون العدد فردي فلا اراديا اديه عدد فردي واخذ الزوجي
من الخمسه اخذ ثنين وهو ثلاثه من السبعه له اربعه ولي ثلاثه

بالله وين الظلم في ذا التوزيع

،

ماعليكم من خوينا اشوف طيف امس مستلمه العالم استلام في مدونتها
بس احسن شي مخلياني فارس بني عبس مدري قيس بن الملوح المهم اني فارس

بس اللي اعجبني بقووه

ولا تدرون خلوه بالرد الجاي وبفطر اول

بس بجد بدعتي طيف وربي فـ الصور والتصوير وكل شي
اهنيك على اختياراتك صراحه

،

وبس سلامتكم لي رجعه باذن الله
اذ تاخر الفطور رجعتي بتكون اسرع من اتصال ولد على خويه

اما اذا جا الفطور رجعتي بتكون زي اتصال بنت على خويتها ويحشون في
خويتهم الثالثه

خودافس قبل اجيب العيد

ســــلأم

ابشركم خلصو المكالمة اللي يحشون بخويتهم وماطولو هالمره
المهم آآأآأم بآأأآك

،

وش كنا نقول !!

ايون تذكرت كنت بقول لكم ان طيف عجبني ردها وتشبيها بالصور اللي
جابتها في مدونتها امس واكثر صوره وقفت عندها

وفطست من الضحك التشبيه يكتل وربي

ههههاي وربي فـ الصميم الله يسعدك يابنت قسم صادتهم صيده حلوه
نفر وينك وش رايك بالتشبيه ههههاي

عاد فيه ثلاث يتحركون فيه امل يطلعون من الشرنقات بس يبيلهم تكه

البلا فـ اللي بالطرف ع اليمين بالصوره متشرقنه وماتفكر تطلع
مدري ليه جات ببالي تنهيدهـ

يعين طيف اسمحي لي بحط اسماء ع الصوره

ذول شهرزاد وورده وتنهيدهـ ومعهم بقايا او عهود دايم انسى انها
غيرت اسمها

بس صراحه بدعتي طيف وربي اكتب واصفق واضحك
عاد شي بعد الفطور وكاسه الشاهي واليوم خميس ياربااااه

لا والنصر عندنا بالمدينه اليوم وبحضر المباراه ان شاء الله
يعني الامور كلها تقول الزود عندي

باقي بس شرنقات طيف يطلعون ويصيرون فراشات



ســـلام وخودافس وكل شي

يتمتع بشخصية قوية غير متهاونة
هو بنفس الوقت شخصية محبة للجميع متواضعة يساعد الآخرين





يدافع عن مواقفه بقوة وثبات مع تقديره للمسؤولية مرتبط بعائلته وأهله بشكل كبير
ويحب أن يتواصل معهم بشكل واضح، يفضل الأماكن الهادئة

وهو ممن تمتاز أشخاصها بتخطيطهم الطويل الأمد
مع السعي لتحقيق تلك الأهداف التي غالبا ما يصلون لتحقيقها وبشكل باهر جدا

وبالرغم من حبه الشديد لعائلته والاستقرار إلا أنه لا يفضل الزواج
في مرحلة عمرية صغيرة وذلك نظرا لتفكيرهم المتصف بالعمق


مع تميزه بالحب والاخلاص !!

من أفضل الأصدقاء التي يمكن أن تجدهم في وقت الحاجة
ومن دون انتظاره لأي مقابل، كما ويعد متعاطف جدا، حكيم مسيطر وقيادي

وهو من الشخصيات الإنطوائية التي تميل للعزلة
وتفضل البقاء في مكان هادئ بعيد عن الناس والمناسبات

إلى جانب تفضيله لقلة الكلام والمجاملات !

ونمن سلبياته أيضا تأخره باتخاذ القرارات
الحاسمة التي تختص العمل والعائلة

غالبا ما تظهر علامات الحزن على هذه الشخصية، تحديدا على ملامح الوجه
بسبب الطبيعة الجدية الصارمة التي يتبعها في حياته

وهو دائما بحاجة إلى الدعم لأنه يشعر من الداخل بأنه يستحق الأفضل
دائما وبأنه ليس كما يعتقده الناس عنه، فهو
شخص يحب النجاح والثناء على هذا النجاح ممن حوله !!

هذا برجي وهذا انا لاني من اهل برج " الجدي"

المهم اللي فيه من هذا الصفات يصف معاي ويصير صديقي

بجد بجد 99.9% من الكلام ينطبق عليا
وركزو ع الكلام اللي باللون الاحمر لاني كذا بالضبط

وبس سلامتكم

كانت هذه فقره الابراج معي

خودااافس

آأإأآم باآأإأك بعد فقره الابراج وكذا !!

لحظة بس بجيب لكم شي لاني كالعاده افرفر بالمدونات واحب اقتبس منها
احسها تحمس النقاش في المدونات يعجبن بصراحه

هالمره كنت في مدونة الشيخ نفروش ربي يسعده دايم مبدع
لكن هالمره يانفر بختلف معاك شوي يمكن ادونا عين او شي مدري بس بختلف معاك

فيه ناس كذا تسمح لناس تتحكم في بعض ارائها انا معاك ومانختلف هنا
الاختلاف وانا اخوك انهم يبعدون عن الحياه والسعاده والصداقه

لا هنا ماضنيت الحياه مستمره حتى لو شابها بعض الاحيان شرنقه
يمكن لتغيير الاجواء وتصفيه الاذهان مو اكثر

السعاده طبعا دايم تتغير من شخص للثاني واغلبنا مو شرط الشي اللي يسعده
انه بيسعد غيره زيي طبعا اشوف التدوين سعاده والتعليقات على بعض
خربشاتي قمه ف السعاده لو كان الكلام شوي سلبي

غير يشوفها تضييع وقت

الصداقات وما ادراكم مالصداقات

احيان ترى يحكمها المصداقيه وصدق الشخص في صداقته
وبعده عن الكذب والخداع اذ ابعدنا عنها صدقني وانا اخوك بتكون الصداقه قويه وعميقه
ومحد يقدر يغير بين اصدقاء جمعتهم الخصال اللي فوق

من صدق واخوه

فلا تصدقون انه بيتغير احد على احد بسبب احد الى اذا هذا الشخص
كشف للطرف الثالث امور مايعرفها زين عن صديقه وثبت له كذبه في امور كثيره
كان يقولها او يسويها !!

هنا اكيد ومليون بالميه بتهتز الصداقه ويتغير كل شي !!

شكلي طولتها وهي قصيره بس زي ماقلت لكم يازين النقاش بذا الامور
يخلي الشخص يبدع احيان لو ماعنده سالفه

فـ الاخير

الشرنقه ماتعني الحزن والتعاسه وقلة الوفاء
وكل شخص يقدر يحكم ع الامور بمجرد ان تتضح له كامل الصور

وبس سلامتكم هذا اللي حبيت اضيفه على كلام نفر ابو الاكواس
كويس وبس

كونو بخير

ســـلآم

,



هذا ولد اخوي مطوع ماشاء الله عليه امس مرسل لي هذه
الصوره فـ الواتس !!

طبعا ماكان فيها الى الكلام اللي فوق ( ماذا اعددت للرحيل ! )
عاد من الفضاوه كتبت عليها الكلام اللي تحت ورجعت ارسلتها له !!

على طول رد سلامات وش فيك عسى ماشر

قلت لا سلامتك بس صورتك بجد اعجبتي وقلت بكتب عليها وبنزلها بمكان
الناس اللي راح تشوفها فيه بتفهم انا وش اقصد

وللا انت خلك على جنب مافي اشرح لك ش السالفه بالضبط
المشكله انه يعرف مدونتي يعني اكيد راح يمر من هنا اذ مانسى مع اني متاكد بينسى

اعرفه ماهو فاضي لي اصلا !!

بس بجد الصوره حلوه بس الكلام مو ذاك الزود اجل وش اعددت للرحيل
لا والله يالطيب لسى مافكرت وش باخذ معاي

المفروض يكون التساؤل ماذا ستصنع للغد !

احس كذا اشيك شوي بس ولد لابس كذا ورساله من مطوع
اجل تحس ان فيها تذكير بالموت والرحله الاخير مو قصدهم شي ثاني !!

مدري بس الزبده عجبتني الصوره وقلت ارزها فيذا للذكرى مو اكثر
وعشان اوري العالم المتشرنقه انهم بجد وحشونا وربي !!

شكلي بمسك على كلام طيف حق التشرنق لين تعود بعض الطيور
المهاجره وكذا !!

وبس سلامتكم

خوداافس

الحين بسالكم ... امزح امزح مهنا اساله !!

بس ودي اشوف مين زيي كذا اغلب وقته كل راسه اساله تفكيره بس اساله
وده يمسك العالم اساله لين يحلل اوم الاسئله !

يافي راسي اساله وربي هذاااا كثرها

مدري بس يمكن لاني احب اجاوب على التساؤولات وكذا فمدري وربي !!

,

لكن بوه اساله براسي واجد وربي مدري ش الحل معها
شكل بسوي لي صفحه فـ الصراحه وبحط الاسئله كلها هناك واللي يبي يجاوب عليها
يجاوب براحته لاني ماراح اعرفه !!

مدري اسويها ولا كيف !!

بس لحظه وين انزل الاسئله اللي ابغاكم تجاوبون عليها بصفحه الصراحه
قسم اني مهوي بجد ؟

تدرون شكلي ببدا اكتب بالاسئله في اوراق عندي وبعدين بنقحها واضبطها
وانزلها بالترتيب هنا بالمدونه

وعاد انتم جابو عنها في صفحه الصراحه اللي راح اسويها
عشان اتلقى الاجابات وكذا

قسم انها فكره منتازه !

بس على اللي بيطبقها اعرفني اتحمس للشي
ثمن انكس واتكاسل واطنش !!

يالله ماعليكم تراني افكر بطريقة جديده التفكير بالكتابه
يعني بغير يوم يقولون التفكير بصوت مرتفع عشان الناس يساعدوك بالحلول

يالله خلوني اقوم افطر واتقهوى جا وقت البصمه الاولى
والفطور والسوالف عاد الموظفين يوم الاحد مبطين عن بعضهم

فـ السوالف كثيره تكون والهياط واجد

كونو بخير

وبس والله .. سلام

,



,

السلام عليكم .. بريك ع الطاير امس انشغلت شوي الله لايشغلنا
الى بطاعته قولو امين !!

ببدى بشوي محشات وكذا

ليه بعضكم يصر انه يعلق قلبه كذا ومايرتاح الى اذ علقه !!
ياخي اطلقوووه خلوه براحته لا يتعبكم قسم بجد احيان ودك من يمسكه ويقطعه
ويرميه للتسلاب

بس وش نسوي خلاص ذا بلا ابوك ياعقاب قلوبنا بالغالب ماهي ملك لنا
صار املاك للغير وتاركينها معنا بس عشان نحن وكذا >> هذا الدراما ياشهرزاد

صح حمد لله ع السلامه وعوده حميده ومظفره باذن الله وبدايه رجعه مو كم سطر
ثمن ترجعين للسبات ترا ماينفع المدراء يكونو منعزلين عن المجتمع النتي >> حلوه النتي

بالتوفيق ان شاء الله وربي يكتب لك الترقيه والمكانه المناسبه ويبعد عنك
اذى الناس وحسدهم وانتي باذن الله قدها وقدود

احسكم انتي وطيف كانكم خايفين من التدوين قوو قلوبكم محدن اكلكم

عقبال رجعه كبار القوم كلهم وربي بجد لتديونهم فقده هذا كبرها !

،

صح على طاري الغيابات وكذا ياناس بالله خلوها ببالكم ترا الغياب مايعني الزعل
ولا يعني اي شي ثاني بقدر مايعني الراحه او الملل او بيشوف صاحبنا الغايب قدره عندنا

قسم بالله كلكم غاليبن ولغيابكم فراغ هذا كبره ورجعتكم بتزين المكان اكثر

خذو رجعت شهرزاد امس وربي يوم شفت مدونتها اليوم كاني شايف
لي اخو زمان عنه بجد فرحان لرجعتها اقوى شي

ان شاء الله يكمل الستف برجعه ابو العز وتنهيده وورده وبحه وتتنازل انه الحرف
وتكتب في مدونتها وتكثر شمس من تواجدها

بجد لكتاباتكم وربي شكل ثاني !!

وبس والله

لي رجعه مع الشيخ نفر اشوفه قاعدن يتحلطم من امس
مدري ليه تذكرت عبدالله السدحان يوم ناصر سحب عليه

وسلامتكم

خودافس

,



,

تصدقون عاد احيان كثيره نركتب اخطاء كبيره لاجل اشياء ثانيه
مالها اي علاقه بالشخص نفسه بقد مالها علاقه باشياء ثانيه !!

<< وش تقول انت ؟؟

ماعليك مني خلني اتكلم وربي جعاااان هرووج ومشتاق بقووه
عاد اذ اجتمعت الاشواق وانطلق اللسان اكيد العيد قريب

لخبطني صوت الضمير بس ماعليكم

هذا ياخوان احيان تاخذنا الامور ونسوي اشياء نندم عليها بس
دايم الندم مايفيد لان الصوت مايوصل زين او يوصل متاخر

وكد اختلفت شوي الموازين وقل قبول الاعذار وزاد العتاب
بس تدرون احيان بعضنا يتعمد يشوه صورته قدام الناس عشان يبعد عنهم

الاذى باي شكل كان !!

يخليهم يتاكدون ان الخطا منه عشان مايتعبون نفسيا وكذا فيخلي الخطا كله
عليه فيه ناس كذا يحب الخطا يكون عليه ويتحمل كل شي

بس عشان الناس اللي يهمه امرهم يكونو مرتاحين من الكلام ووجع الراس

مدري ذا الشي صح او احيان يكون فهمنا خاطي للامور ونسوي فاهمين
وحنا ماعندك احد مدري والله !!

بس اكتشفت شي اننا مهما نسوي نكرر نفس الامور ونعيش بدائره وحده
نلف حولها على طول تردنا للمركز حقها بدون ماننتبه زين الى اذ مرينا بالمركز من جديد

نقول حنا كنا هنا قبل فتره ونحاول نعدل الامور بعدها ونفرح لنا شوي
وتمشي الاحوال ونلقانا نكرر كل شي وشوي الى وحنا راجعين للمركز من ثاني

بجد اللي مايكرر اخطائه ماهو من البشر

مانقول الى " اللهم احسن اعمالنا وارضى عنا واغفر لنا انك انت الكريم الرحيم "

نقطه ونهايه سطور مدري كيف جات وربي بس كذا جات معاي

فـ الاخير

عمي تعبان شوي وبيسوي عمليه فـ دعواتكم ان الله يقومه
بالسلامه ويرجع لاهله وناسه بالسلامه

وبس والله

ســـلآم

,

خلصنا قرقره وسواليف مالها سنع والحين نجي للجد
هذا احمدووف يشتكي بس بتسائل حلو لحظه بروح اجيبه من مدونته

بالله بالاول شوفو الاسماء اللي يبغاها تجاوب على تساؤوله ياربااااه
قسم هامات كبيره في عبير ياربااااه قسم بجد اني ارمز واتنفض اذ حطوني معهم

اقلام بجد كبيره وتخوف اي احد اقلام ماهي سهله الله يحفظهم

نفر اسمع وانا اخوك كلنا محتاجين نتحرر شوي من بعض القيود
ونفكر باكثر ايجابيه واقل حده ومن اكثر من زاويه ونخفف من النقد اللي يكون بشكل عام
في اماكن مثل المنتديات او تويتر او اي وسائل تواصل مايجمعنا فيها الى الحروف

ولا نعرف ايش ورى ذا الحروف !!

ملاحظ لك فتره تتكلم بنفس الموضوع عن الاشخاص وتاثيرهم على بعضهم
وان بعضهم يسلم عقله لغيره ويفقد صداقات بسبب تسليمه عقله لغيره

ومن ذا الكلام وتتكلم بشكل عام وذا من ابسط حقوقنا في مدوناتنا نتكلم باللي نبيه
بس التعميم في النقد والتكرار يحسس بعضهم انه هو المقصود

وتكون رده فعله زي نوعيه الكلام اللي جاك بالصراحه !!

فنصيحه من شخص مهوي مثل صاحب ذا المدونه تجاوز بعض النقاط ولا تعلق عليها
وتكررها ترا ماراح يجد جديد وانا اخوك

على قول خوينا او اختنا في الصراحه عندك

حرر نفسك بس مو الحقد لا حاشاك انك تكون حاقد وكذا
بس حرر نفسك من التفكير اللي يعقد الامور اكثر كون نفر وخلي كونان عنك

مانكب عفش نص الشعب عندنا الى اننا صرنا كلنا كونانيه على اخر ايامنا
كل واحد يشوف اشياء ويفهمها على كيفه بدون مايخذ المفيد ويترك التفصيل

ويحاول يكون اكثر ايجابيه في نظرته للامور

وين المشكله لو مايصير اللي نبيه عادي الهلال له سنين يدور العالميه للان ماحصلها
يعني ريحو روسكم والله الواحد ماهو فاضي يتعب نفسه وماهو محتاج اصلا

بجد " كل اناء بما فيه ينضح "

دعوا الخلق للخالق وقد ماتقدرون استانسو باللحظات الحلوه ولا تحاولون
تخلونها حصريه لكم شاركوها وكذا

فـ الاخير

المهم لن يصبح مهمل لمجرد الاختلاف معه والطيب يبقى طيب
حتى لو خانه التعبير واختلف معك

يجمعنا مكان واحد لنرتقي به ومبعد خلافاتنا الشخصيه عنه قد مانقدر
وبس سلامتكم

اتمنى كلامي هذا يكون مفهوم وواصل

ســــلآم

,




,


يقولون القدماء اصحاب الحكم والاقوال السديده !!

ابحث عن " مسببات " الاشياء الجميله في يومك في حياتك في كل شي
ابحث انها حولك حواليك بالعربي حقنا

ابحث عن سبب ابتسامتك ودوامها واستمرارها ابحث عنه دايم
ابحث عن سبب سرورك سبب ابتهاجك سبب سعادتك

ابحث عن من يجعلون ليومك شكل مختلف وتنتظر بلهفه تواجدهم وطلتهم
اليوميه عليك !

لانهم من اسباب سعادتك !

اصحاب الحكم يقولون ابحثوا عن من يخلوقون تلكم " السببيه "

حتى لو كلفكم ذا الشي بعض الوقت ابحثوا عنهم وحافظو عليهم
بكل ماتقدرون وكونو لهم نعم الصديق

فمن نحن بدون من لهم يد في خلق اسباب السعاده !!

فـ الاخير

ياليت بعد البحث نكون نحن من يخلق تلك السببيه لغيرنا لنجعلهم
سعداء بقدر مانستطيع لنكون لهم مصدر بهجه واصدقاء ينظرون قدومنا كل صباح

لنخلق لهم بعضا من هذه السببيه "

وبس سلامتكم

كونو بخير .. خودااافس ..