سلام !

والله اليوم ماني فايق مره وادور الهوشه بشمعه
يعني لحد يدف ولا احد يناظر بنص عين

ترى يمكن اخرم له جبهته << خف علينا يابو
عاد تو شايف فيلم تفقيع وجيه وكذا

المهم وش كنت بقول ايه صح تذكرت بشكر كل اللي تجاوبوا مع سوالي
اللي مدري كيف جاي

اليوم من الكسل مافيني حيل انزل شي طلع الزول اللي جواتي
المهم بضبط الاجووبه كلها وبنزلها هنا اذ مو بكره بعده

على حسب النفسيه اه يالندن

يعني بديكم كمان يوم اشوف الاجوبه لين راح توصل
بصراحه في ثلاثه اجابات احسها من احس الاجابات اللي وصلت لين الان

وحده فيهم صاحبتها تنازلت عن الهديه الرمزيه اللي مع الجواب
ريحتني وشكلي بفوز اجابتها عشان ارتاح

بحه قاعده تهدد وتصيح وهي ماتدري يمكن ماتاخذ الى المركز الاخير
مدري ليه العجله بذا البنت المطفوقه !!

نفسي اقبل ينتهي اليوم وبكره اشوف اجابه لخويتها مدري ليه
احسها من النوع اللي يحب يتفلسف كثير

يالله جعت وربي ولا حولي لا سنكرز ولا رز مغير شاهي رايح
شاهي جاي ليه خضرت بطني من الشاهي

فتكم بعافيه ياشباب ولا هانوا البنات

سلام

تصدقون !!

والله المدونات نعمه بعضنا مايعرف كيف يستغلها
والله كنت مطنقر ونفسيه من الصباح ومع ضغط العمل زادت الطنقره

الطنقره = اللي روحه فوق خشمه ومغير ينافخ على عماها

المهم مافضيت الى الان من الصباح تسجيل وبيانات وكذا لين احس اصابعي
تورمن من الكتابه !!

من بعد الظهر لين الان واشكال الحوسه بمدونات العالم
بعضها والله لو ودك تطلع مع الشاشه تسلم على راسه وترجع عاد الشباب بس

البنت تعطيها ورده بيضا وانت مغمض بعد



من جد التواجد هنا والكتابه تريح كثير يمكن لاننا نلقى تجاوب وتفاعل من الناس الطيبين
ويمكن لانه هو المكان الوحيد اللي ناخذ راحتنا فيه بالكلام

فيه بعضهم يستغرب من طريقة تدوني

بس هذه اللي احبه اكتب وخلاص وساعات وربكم ارجع اقرا واقول وش ذا القلق
من جدي يوم كنت اكتب كنت بكامل قواي العقليه او لا !!



شايفين ذا الفيس الللي يدور والله ياهو يمثلي بقوه من كم يوم
اذ جيت هنا ادور مدونات العالم المنقطعين واللي رجعتهم لنا المدارس

خاصه القدام الله يسعدهم والله لتواجدهم شكل ثاني

سوالي امس طلع لي ناس والله ماكنت احسبهم يتابعون طلعو
يتابعون هنا اكثر من الناس اللي مسجلين دخول على طول

يارباه كم انتي رائعه ايه المدونه

استمري في منحنا هذه الثقه التي نفقدها في بعض الاحيان
فرب صديق لك لم تراه ولكن يعني لك الكثير

شكرا للجميع بلا استثناء ولي عوده باذن الله قريبه

ولا اشوف احد ماخذ خودافس لمدونته ترى اهكر مدونته

يالله سلام ....

سلام وصبحكم الله بالخير يالنشاما هلا بالعيال ...
صراحه ماتوقعت ذا التفاعل من نواعم عبير ماشاء الله عليكم ماخليتو شي ماقالتوه

والله احرجتوني بتفاعلكم وكل رد ف الغالب يطغى على الثاني
اقوى رد قريته اليوم في مدونه قريبه من هنا والله واقولها بكامل قواي العقليه

ابصم لصاحبته بالعشره ان كلامها في محله وصابت الهدف بكل جداره
وهي راح تكون صاحبة التوقيع والرمزيه اللي وعدتكم فيها !!

وماله داعي تزيدي وتشرحي النقاط كلها واضحه وبدون شرح خلي كل واحد يقراها
يفهم بطريقته احيان الشرح يخرب من روعه النقاط

ما راح اقول مين صاحبة افضل اجابه بترككم تدورنها
امزح بكره بنزل التصميم هنا بالمدونه لاختنا الفايزه معنا في مشاركتها

طبعا ماكان قصدي وربي الفوز بقدر ابغى اعرف شي ضروي وملزم فيه
لاني الان بنص المشروع وبكمله باجاباتكم وراح تشوفون النتيجه بعد ما اخلص منها !!

المهم بعد شوي بنزل السوال الثالث لاني نزلت لين الان سوالين واحد قبل رمضان
والثاني نزلته قبل امس والثالث راح يكون بعد شويتين بس خلوني افطر

واتقهوى واعين من الله خير ولي رجعه بالسوال الثالث !!

طبعا بما ان تفاعلكم كان يحمس بالسوال الثاني بستعجل بالسوال الثالث مبغى اتاخر
اخاف تاخذكم الدوفره والمدارس من المنتدى واصير

اقابل نفر وابو العز وبركان المشاعر يقول علينا قصايد

ف الاخير ربي يسعدكم جميع والله تفاعلكم اسعدني

طيف ربي يسعدك والله مشاركتك بدخلها موسوعه جينس لاطول اجابه على سوال
في المنتديات

يالله خلوني اقوم افطر واجهز لكم السوال الثالث هالمره
بيكون خونفشاري بجد

سلام

هذا كان سوالي الاول اللي قبل رمضان
جايبه للعالم اللي مافيها حيل تدور

المهم ماعليكم

جاتني شغله لازم اطلع بعد الظهر بكون فيذا وان شاء الله بنزل السوال
شي الاعلانات

يالله سلام

خودافس

هذه بحه ماخذه جزء من انجازات الشباب وقاعده تدور مشاكل وكذا
يابنت هذه انجازات سنين مو يوم وليله اصلا باين

من القلوب اللي عايشين فيها اصحابها

تصدقون تو انتبه اعلى معدل تقيم ف المنتدى عندي باقي شوي
واكمل عشرين الف

بحه اذ تبين سلف اعطيك الفين من معدل التقييم بس امسكي ارضك وبلاش
مشاكل وهوشات ومظاهرات ومدري كيف !!

اعقلي يابنت العمام



شوفوا ذا الفيس حصري لمدونتي اشوفه بمكان ثاني
ترى اسوي سالفه اشتريته اليوم

وصار حصري هيا خلوني اشوفه بمدونه احد ثاني

سلام

سلام عليكم ..

الان نجي للجد والجد الله الله عليه ..

سؤالي :

كيف نحافظ على قلب احبنا وكيف الطريق الافضل لإرضاء صاحب ذلك القلب ؟


كالعاده تكفون الاجابه تكون على شكل نقاط واذ سرد يكون بشكل مختصر
لان المكان اللي بودي الاجابات له مايحتمل السرد !!

وهالمره الاجابه بتكون مفتوحه للبنات اوالشباب

مافيه تحديد شي

وهالمره الجائزه بتكون من اختيار صاحب افضل اجابه
يجيب لي الصوره اللي يحب وراح اسوي عليها التصميم اللي يبغاه
وحتى الكلام اللي بيحطه ف الصوره من عنده بكون مجرد
مصمم لا اكثر ما اراح اختار صور ..

بعطي العالم فرصه يختارون يمكن ذوقي يكون مخيس ومايحبونه
عاد تعرفون ماعندي الى التصاميم اللي اكون فالح فيها الباقي من جنب القده


ف الاخير

اتمنى التفاعل يكون كالعاده يبيض الوجه عاد في مدونة العضو او برساله او بتقييم
او في اي مكان يحب يرسل اجابته

لان امس جاتني اجابات على حسابي ف تويتر

ناس مستغله التقنيه صح !!

ع العموم شاكر ومقدر تعاونكم معاي ربي يسعد الجميع

خودافس تلحقها سلام



واسف ع الازعاج وكذا

سلام

سلام عليكم ياهلي وناسي بالنت اخباركم عساكم بخير
والله من جد اليوم عيوني اول مادخلت صارن كوذيه

من جد فيه ناس نافضه اوم المدونه نفض الظاهر
من كثر ماكانوا يلفون فيها ناموا هنا كمان

ربي يسعد الجميع واولهم اللي نفضوا المدونه نفض
شوفوا وش تاركين وراهم



من جد انفجعت يوم شفت العدد كذا !

المهم ماعليكم اليوم خميس ومالي خلق ازعل



جاني رد على سوالي اللي امس من عضوه الظاهر لها ميه سنه مادخلت المنتدى
شكلها متكيه بكهف وتتابع بدون اي صوت

المهم مرسله لي رد هنا اليوم

صراحه ماكنت متوقع انها تتابع اصلا

المهم بحط لكم الرد لانه صراحه رد قوي ولان صاحبته زمان مالها حس
فيذا فقلت بذكركم فيها وبنزل ردها وهو حار هنا

هذا رد او اجابه على تساؤلي من الاخت : ش غ ب


الله يسعدها ويذكرها بالخير عاد القدام هنا اكيد بيعرفونها والجداد الظاهر اول مره
راح يمر عليهم الاسم

بس بقول لهم بكلمه وحده تعرفون طيف وبحه هذول خريجين مدرستها

يالله بالتوفيق للجميع وتشكرات شغب ربي يسعدك



وايه جات ردود كمان غير ذا الرد بس هذه لان صاحبته من الطيبين اللي ينشافون بالسنه مره
صعب ردها اعلقه كم يوم لين يبرد

يالله سلام لي رجعه قريب خليكم قريبين



خودافس

سلام ..

اضم صوتي لصوت ابوريان الشيخ عزوز الهلالي والصديق الصدوق نفروس >> قلبك يوناني
صح وش السالفه نسسيت والله من الردعمه جاي اجري

ايه صح تذكرت اضم صوتي لهم في ان الشباب ومنذ قديم الازل وعلى مر
العصور والازمان هم اصحاب المبادرات في الحب ولهم اليد الطولى فيها واكثر اساطير الحب من الرجال

من عنتر مرورا بقيس والفرزدق والزير ابو سالم المهلهل وطقتهم
حتى الخواجات اساطير الحب والكلام ذا من الرجال

اتحدى كل بنات عبير مجتمعات يجيبون لنا اسطوره نسائيه ف الحب
وقصه حب اسطوريه بطلتها كانت سيده !!

دائما الرجل هو صاحب القلب الحبيب هو الاسطوره ف كل القصص

الحق مايزعل



ازيد على نفر

أنطونيو وكليوباترا ذول في العصر الروماني القديم وجسدها شكسبير في
مسرحياته انطونيو هذا كان قائد جيوش ف الحرب جاه خبر وفاة كليوبترا وانتحر ف الحرب

دودي الفايد عشيق الاميره ديانا مات بسبب الحب

الزبده الرجال اكثر وفاء لحبهم ويقدرون يوزعونه بكل اريحيه هذه مايبغى لها كلام !!

ماني مع نفر يوم يقول الرجال اللي نقز من فوق العماره عشان ينتحر هو وحبيبته
خروف لا يانفر ماهو خروف ذا قالته الحوب


يارباه وصف يستحقه الرجل صراحه ابدعت عزوز
خشمك ياخوي

شوي واصيح من كلام عزوز عن صفاتنا نحن الرجال
نفسي اعرف انتم ليه ماتقدرون مواهبنا وجمايلنا معاكم هاه

ف الاخير قبل انطرد

تحيه طيبه للشباب هنا احمد وعزوز واخونا بركان المشاعر << شوفوا الاسم كيف
لحاله حاله فريده

يالله في امان الله



سلام

سلام ...

من زمان ماكتبت بذا الوقت او دخلت المنتدى اليوم جاي هنا
صراحه ماعندي سالفه ولا بوه وقت ومستعجل وراي خط بعد شوي

دخلت بشوف شي وطالع لقيت تقييم وكذا رساله زعلانين
ليه يابنات الحلال ماقلنا شي كله تاريخ وتكلمنا فيه شوي

ليه منحرق رزكم وكذا مدري وربي ..

روقوا اول شي وقاعد بستني رد شهرزاد واحتريك بشرف وش عندهم
بس عساهم يكتبون قبل اطلع بشوف

يالله وش مستعجل فيني تطلع الشمس وتملا البلاد

قبل اطلع ..

الله يحمي المسلمين اجمعين بكل مكان

قولوا امين

سلام

سلام ..... عليكم ....

ياخوان احب هذه الصوره لانها جات بوقت عصيب شوي ولها ذكريات
مدري كيف بس والله كل ماشفتها ارتاح مدري كمان ليه !

المهم ماعليكم كيف الحال يا هلي وناسي اخباركم وش مسوين بها المدود >> كلمه صعبه صح
ماشاء الله امس واليوم وقبل امس الجو بالمدينه يقول حط رجلك بلا دوام بلا هم

بس اللي زي مايقدر ما داومت الى امس كنت في اجازه !
يالله ماعلينا العافيه طيبه والجنه الجنه

اخر دخول لي كان يوم الجمعه اللي راحت ومادحلت الى اليوم يعني بكره
بكمل اسبوع مادخلت ماني مصدقني

للي يسالون وينك اقول لهم موجود هذاني قدامكم ياربي لك الحمد
بس كان عندنا عزا باليومين اللي راحن الله يرحم جميع اموات المسلمين !!

ويعظم الاجر ويصبر الاهل .

نقطه ونهايه كلام طبعا للعالم اللي تسال وبعدين فيه ناس تقول انت وين
شردت بعد ذاك اليوم حق الاساطير احس الكلمه هذه تعبت ناس كثير

كله من ابو العز ونفر

ع العموم بوريكم شي يمكن لكلامنا ذاك اليوم دور فيه بالله شوفوا



التنبيهات واصله لين 500 ومدري كم وانا غايب سته ايام يعني اليوم محسوب عليا بمية
المهم ترى بقول لكم ولا رد من كل الردود اللي قريتها بنفس الموضوع اقنعني

يعني بس عصبوا البنات وبنسوي ومدري كيف ولا اقنعونا بشي
شهرزاد واحتريك تهديد ف الهواء

الباقين مشاركه بعصبيه ولا اقنعوني بشي يالله ماعليكم كل واحد يصلح سيارته

مع اني حطيت بكلامي ذاك اليوم اسطورة نسائيه ف الحب وضحت بحياتها ومكانتها
عشان الحب ولا احد انتبه لان الجميع كانوا معصبين

الاميره ( ديانا ) ضحت بملك بريطانيا وولي عهدها عشان دودي الفايد وراحت ضحيه حب
وهم يقولون مافيه بنت عاقله تروح ضحيه حوب ديانا راحت ضحيه حب

يالله ماعليكم زي ماقلت كل واحد يصلح سيارته !!

والله حتى الشغل اللي كنت بسويه لين اليوم راكنه وموعد التسليم فات
بس قدروا ان عندي عزا ومددوا لخوي الوقت

الان خلوني اتقهوى واخذ لفه ف المدونات بشيك عليها ولي تعليق
ماراح اترك الموضوع يعدي بدون تعقيب طبعا

ياويلكم جايكم فايق واليوم خميس وجعان هرج وعاي سنكرز وش بقى

هيا سلام