اليوم ماسكه معاي الوطنيه مع الصباح الله يحفظ بلدنا من كل شر
ويحفظ قادتنا وشعبنا ويرد كل غايب لاهله سالم غانم ..




قبل فتره اذكر اني قايل لكم ترى ما ابغى رسايل خاصه عشان التقييم وكذا
اشوف ولا كاني كنت اتكلم يعني تبغوني اعصب عليكم

تراني اذ عصبت اصير احول واجيب العيد !!

لين هنا وضحت الصوره مدري شكل فيه بعضهم لسى الصوره ماهي واضحه عندهم
يمكن من النوع اللي ماتوضح لهم الصور الى مع التكرار عشان كذا

بكرر ذا الكلام لين ماعاد توصل لي رسايل بسبب تقيمي لكم

المشكله اللي يقول انت تعرفني يوم تقيم
وانا اول مره اشوفك بالله وش رايكم بذا الكلام !!!

خلاص المره الجايه اذ جيت بقيم لي مدونه برسل مع التقييم صوره من البطاقة



تصدقون ساعات اعذرهم لاني بالتقييم اخذ راحتي واسوي اني اعرفك ولو ماكنت اعرفك
بس هذه عاده ما احب التقييم اللي احطه لاحد يكون كلمتين وكذا لا زم اكتب لين يقول بس

ع العموم اعتذر للعالم اللي ازعجهم بكلامي ف التقييم
واللي ماخذ بخاطره يعذرني

حلوين كذا يالله اجل بروح افطر من بعد عشا البارح ما اكلت شي
اللي قريب يتفضل حياه الله المكان مكانكم

ف امان الله

سلام

هذه للعالم اللي تتعب نفسها وتمر من هنا وتترك لها بصمه
فيذا ربي يسعدكم جميع !!



عاد تدرون خويكم صاحب ذا المدونه من الناس اللي ماتنعطى وجهه
امدح فيه بكم كلمه يشوف نفسه على العالم

وياخذ كم يوم شايف نفسه عشان كذا اذ شفتوني بيوم شايف نفسي عليكم
اعرفوا ان فيه من قعد يمدح فيني

بس لا تشيلون هم كلها يومين وانسى وارجع لوضعي الطبيعي

نقطه ونهايه سطر


ساعات ف النت بالذات تقابل ناس من جد اذكياء بشكل يخوف
يلقطها ع الطاير !

عاد اللي كذا وي وي التعامل معهم صعب شوي مدري ليه ماخذين الامور
بشوي تعقيدات يابن الحلال عديها وتعدي لا تدقق تتعب

بجد عاد احيان الذكاء الزايد يورط صاحبه لو تقول كلمه وانت تمزح
تلقاها تسوي معاه الهوايل وبنات عمها !!

الدوفره زينه بس عاد مو بكل وقت الغباء او الاستغباء فن ترى كمان

نقطه ونهايه سطر



ف الاسك

ساعات تجيك اسئله تقول اللي سالها مدرس فيزياء بثالث ثانوي ومستقعد للطلاب
ياهو خفو علينا !!



ف الأخير

استغرب ساعات من عزل البنات ببعضهم مدري ذا الشي عادي بمجتمعهن
او لا !!

لو يجيني واحد من الشباب بالاستراحه ويقول وحشتني حبيبي الظاهر ابات بالسجن
وهو يبات ف المستشفى

ياخي مدري ليه طبعنا صحراوي كذا



التقييم مميز ووصل 17 الف ياويل اللي يقيمني خلوني اكشخ فيه كم يوم !!

يالله خلوني اروح شكلي طولتها اليوم

سلام

سلام !!

صبحكم الله بالخير في نهاية الاسبوع وبداية الاجازات رسميا !!
الله يعيننا ف الكم اسبوع الجايات ياشين يوم تداوم واللي حولك 90% منهم اجازات مو شي !!

كل شي يقول لك اسهر كل شي يقول لك غيب لا تداوم كل شي يناديك تنام بالنهار
بس الدوام يسوي لك كذا هيا تعال



ماعليكم الامور عاديه اصلا النوم ماهو زين بعد ثمانيه يجيب لك تورم بساقك

صح قبل انسى الحين ليه اغلبنا في الايام اللي يكون فيها حزين يركز على
الكتابات الحزينه والخواطر اللي تبكي يبغى يوري العالم كله مقدار الحزن اللي فيه !!

واذ كان في عز افراحه ولا تسمع او تقرا له كلمه يفرح اللي حوله فيها
بالعربي عطو افراحكم نصيب زي ماتعطون احزانكم !!



احس العالم او بعضهم عشان التعميم ف بعض الاحيان نكبه نقول بعضهم
يدور الحزن بشمعه عشان يبدع او يكتب !!

ترى الكتابه مو شرط تكون حزينه عشان تخلي العالم تقرا لك
خدعوك اللي قالو لك كذا !!

يمكن العالم تتعاطف مع الجو الحزين مدري ليه شعب يمشي مع الحزن اكثر
خلو الطيب مرضان والفرحان حزين وش هو له مدري والله !!

بالله خذو لكم فره بالمدونات القريبه من هنا اغلبها حزينه وفراق ومدري كيف !!

انا وش دخلني مدري والله << حشيش

نقطه ونهايه كلام ...

بس قبل اطلع اليوم خميس لا تستفزوني مالي خلق ازعل

فيه عالم جو ببالي مع نهايه ذا الاسبوع وعلى ايام كان نهايه الاسبوع ربوووع
الله يذكرهم بالخير وين ماكانوا !

طيف المهويه وشغالتهم اللي شكل وحده فيهم بتذبح الثانية
مرامي البدر الله يذكرها بالخير .. لنو المطفوقه .. حنين .. مجرد حلم ..

اللي يعرف عنهم شي يقول !!

يالله ف امان الله

سلام ...

سلام !!

من الصوره باين النفسيه ماش لا تصدقون امزح صوره اعجبتني وقعدت العب فيها
بس على طاري النفسيات المقفلة واللي اغلب وقتها متضايقة وكذا !!

اللي مودهم الحزين هو الغالب على كل شي
ترى عادي يعني تورينا انك ساعات تكون مروق وامورك زينه ماراح يخرب البرستيج تبعك !!

تصدقون عاد اشوف ان الكتم سبب اول للضيقه سبب اول للوصول للنفسيه التعبانه
اتكلم مع أي احد ف أي مكان المهم لاتترك شي بنفسك كذا !!

مشكلتنا احيان نحتفظ باغلب الامور اللي تضايقنا لانفسنا ما اتكلم عن الاسرار وكذا
لا قصدي بعض المواقف والامور اللي يكون فيها البوح سبب ف راحتنا

مافيه احد بذا العالم ماعنده صديق يشكي له اغلب همومه ويسمع منه عادي
بس المشكله ف اللي متقوقع على نفسه تصدقون ساعات اسولف مع نفسي او اكتب باي مكان

واشكال تفريغ للطاقات السلبيه في الفكر ارتاح بعدها !!



قبل كم يوم اكتب عن بعض الاقلام اللي بس حزينه هنا بالمنتدى جاني هذا الرد بالتقييم
صراحه ماقدرت ارد عليه بوقتها لاني تذكرت اشياء حزنتني وربي فما قدرت ارد !!

اليوم بسوي فاهم عليكم تحملوني شوي واوعا ايدك من الريموت كنترول !

ما احب النظره هذه للامور اللي الفرح ماهو من نصيبه ياحاول يصنعه
اصنع الفرح افرح للي تحبهم افرح معهم ياخي عيش دور الطفل في بعض الاوقات ليه معقد الامور

اذ بتصعبها على نفسك بتصعب انت سهلها وتسهل ش المانع تدور على امور كانت
تفرحك وتصنع لك الفرحه وتعيشها ليه ندور ف الامور اللي تزعلنا بس !!

ذحين خذوني مثال عشان محد يفهمني غلط مريت في امور وعدت ياربي لك الحمد
وفقدت ناس غالين وعشت ايام مخيسه وربي وتعرضت لمواقف بايخه

والله اذا قعدت اتذكرها اتذكر وكذا ان مودي ينقلب للاسوأ بشكل ماهو طبيعي
على طول اغير الموجه واترك التفكير بذا الامور واتعوذ من ابليس واتذكر الاشياء اللي تفرح

واعيش جوي

باختصار اذ بنقعد نعيش في اماكن تجيب الحزن اكيد يقلتنا الحزن وبيروح عنا الفرح مهما
كان ف الاخير بعد العسر دائما يسر وليس قبل الفرح الى الضيق !!

خلهم متساوين ولا يصير واحد فيهم طاغي على الثاني

زودتها صح وانا من جنبها يا اخوان

هيا خلوني اطلع يكفي اليوم اني مداوم مواصل أي وربي لسى مانمت
على صحوتي امس المغرب معوضين خير



سلام

لي فتره بتكلم بذا الموضوع وشايل هم العالم تفهم كلامي بشكل ثاني !!
بس خلاص اليوم بعقلها واتوكل وكل واحدن يصلح سيارته



وش سالفتنا بمواقع التواصل الاجتماعي تويتر انستجرام منتديات سناب أي شي
ايش سالفتنا مع الخوف من الرد والتفاعل مع العالم !

ليه دايم نعتقد اذ كلمت احد او رديت على احد خصوصا من الطرف الثاني يعني
الشاب يوم يرد على بنيه والعكس ليه فيه عالم لسى تخاف من ذا الشي وتحسب له الف حساب

ترى هي مواقع تواصل اجتماعي عادي اشوف الامور !!

لا وبعضهم كاتب الخاص ممنوع خف علينا يالوليد

لا وفوق كذا بعضنا اذا ردت عليه بنيه يحسبها تبي شي خف علينا ياتوم كروز
تراها شافت شي وحبت تعلق عليه عاد يا يكون بالاعجاب او الرفض

ف التحديث الاخير لتويتر صار تقدر تتلقى رسايل من ناس لو ماتتابعهم حلو ذا الشي
لان بعض الاحيان توضيح وجهه النظر بعيد عن العام افضل واكمل !!

بعضنا الله يهديهم يتحسس من ذا الشي ليه طيب فاتح لك صفحه باي موقع للتواصل
اسمه تواصل يعني تطرح لك شي لازم تتقبل اللي يجيك !!

لا والبعض كمان تلقاها حاطه المتابعه للبنات فقط خفي علينا يا كيم

هنا كمان بالمنتديات تحصل لك موضوع تعلق عليه او تقييم يجيك سوال ع الطاير طيب
خير وش تبغى احسن مافي عالم النت ومع وسائل التواصل هذه

انك تقدر توصل وجهه نظرك باسهل طريقه بس عاد تحمل اللي يجيك !

نقطه ونهايه سطور ...

بالله بوريكم شي جاني امس وانتم تحكمون !!

واذ ماني هلالي طيب
من جد احيان اختيار المفرده المفروض يكون بعنايه شوي !!

بس حبيت اقول تراني ماني هلالي والف مبروك للهلاليه البطوله رغم انهم جابوها من قدمنا

يالله بالتوفيق للجميع

سلام

سلام !!

لحقو ياشباب وانتم ياصبايا !!
بسررعه لايفوتكم مسكوني اليوم واشكال التحقيقات وكبرت راسي

كله من الافلام !!

اقول لهم ماني متكلم الى اذ جبتو لي محامي وكذا << تخبرون هياط الافلام
ماتوقعت ان المحامي موجود عندهم

وهات يا اسئله وانا ماني مسوي ش كل المشكله اني فاتح مدونه معكم هنا
بالله هذه فيها شي انك تفتح لك مدونه ؟؟

المشكله اساله واجد تعبت وانا بس اقراها كيف بجاوبها حاولت من هنا من هنا
ما اجاوب بس لقيتهم مسوين لسته باسماء اغلب الاعضاء

يعني انت ياللي قاعد تقرا الان ترى دورك جاي جهز نفسك من الان

لا تطالعني كذا جاي دورك جاي وليد هذا ماهو تارك احد ابو الشباب
معاه جيب اسود وغير يشيل من العالم وللاسف كنت الضحيه الاولى له !!

المهم لا اطولها عليكم اللي يبغى يعرف القصه بالكامل

قصه القاء القبض على الوسمي والتحقيق معاه يدخل

القصه بالكامل

اتبع الرابط تلقى القصه كامله !!

الحمد لله الذي اتمم علينا واكرمنا ببلوغ شهر رمضان ونحن بصحه وعافيه
اللهم اتمم نعمتك علينا واعنا على صيامه وقيامه على الوجه الذي ترضاه لنا !!

كل عام وانتم بخير يالربع ورمضان كريم ومبارك على الجميع
والله يعنكم وييسر اموركم ويسهل صومكم ويتقبل منكم



بطبعنا دايم تمر علينا اوقات نحب نتذكر الاشياء بحلوها وبمرها
نعيش اجواء حلوه مع ذكرياتنا بكل مافيها من فرح او اسى !

عاد بالنسبه لي اشوف احسن شهر هو ذا الشهر رمضان تتذكر ايام زمان
تتذكر العالم اللي تعرفهم والان غيبتهم ظروفهم او غيبهم الموت !!

الله يرحم من مات منهم ويغفر له ويجعله من اهل جنات النعيم
ثاني رمضان يغيب عني اقرب صديق وابن اخي العزيز الله يرحمه ويغفر له

عاد بما انا ف شهر الخير الذكري تنفع المسلم عشان يدعوا لكل عزيز
فلا احد يبخل بالدعاء في ظهر الغيب لعزيز حاضر بالصحه والعافيه

ولعزيز غائب بالسلامة ولعزيز لن يعود بالرحمة والمغفرة !!



من يوم جيت الدوام الين الان مرت يمكن اقل من ساعة اشوفها طووويله مدري ليه
بالقوه افتح عيوني عاد باقي اربع ساعات يارباه كيف بتعدي الله يخازجنا

نفسي بإجازة طويله اريح وارتاح مين يجيب لي اجازه واعطيه نص راتبي حلال عليه



يقولون اطول نهار راح يمر علينا صايمين هو ذا العام وراح يكون اخر رمضان بعز الصيف
يامسرع الايام أي والله ..

لسى اذكر ايام كان رمضان بالبرد هو بداية صومي مايمداك تنام الى ماذن المغرب
كنا بزوره ونص حكاوي اهلنا يوم نشتكي من الصوم يقولون حنا كنا نصوم بعز الحر

لفت الايام وجاتنا ذا الايام وهذه هي بتعدي وبنرجع نصوم بالبرد بعد فتره !!

عاد تحطمت مره قريت ان اللي يصوم رمضان مره بالبرد ويلحق البرد مره ثانيه ويصوم
رمضان يكون عمره (33) الرقم مميز بس وش بقى على الاربعين
يالله العافيه والسلامه !!



المهم ترى من زود الفضاوه اللي اعيشها الدوام كله كسل واتحدى لو تشوف مراجع
اصلا مين بيصحى عشان يجي راجع بس مجبورين نداوم من الفضاوه عاد
شكلي بلف بالمنتدى واللي القاه حاط توقيع عن رمضان باخذ الصوره واحط عليها اسمه

بس والله من الكسل مافيني حيل الفلف اليوم تخبرون صايم ومافيني شده
المهم اذ قدرت اطرد الزول اللي جواتي ولقيت صور ببصم فيها وبلعب شوي




ف الاخير

شكل فيه احد مشتكيني للمراقبين هنا كل يوم وانا ف قسم صرت خريج اقسام
وسجون الله يستر من اخرها !!

رمضان مبارك ع الجميع وكل عام وانتم بخير
والله يكتب لنا جميع اجر الصيام والقيام ويجعلنا من عتقائه من النار في هذا الشهر الفضيل

سلام

شايفين كيف سهله الامور فقط " كن راقيا "

في عالم النت بالذات محد يعرف عنا اي شي الى الاشياء اللي نتركها لهم ليطلعوا عليها
لا يعرفون حتى اسمائنا كيف هي اشكالنا لا شئ !!

ومع هذا نجد من يتفاعلون معنا وينجذوب الينا بل وقد تصل الامور لاكثر !
فقط لانهم وجدوا عندنا هذا الرقي الذي يبحثون عنه

حسن الخلق ورقيها وحسن التعامل والبعد عن التطاول على الشخص
الاحترام والتقدير هي من يصنع الفوارق في العلاقات

هي من تكون الفكره وتصنعها وتشكلها عن الشخص الذي امامك
بعضهم نقابلهم ف الشارع باي مكان عام ترتاح له للرقي اللي تلقاه عنده لاحترامه لنفسه
قبل احترامه لغيره !!

خلونا ف هذا الشهر نحاول نبدا نعدل من امور كثيره في حياتنا
اتركوا عنكم الانتقاد لمجرد النقد التقليل من عمل اللي حولك لو كان عمله بسيط

ادعموهم بكلمه طيبه !

يقال ان بعض الكلمات تقول لصاحبها دعني يعني اطلقني لا تجعلني ابقى معك
فبقائي معك لن يفيدك بقدر افادتي للمتلقي لها !!

اطلق الكلمه الطيبه وستجد اثرها واضحا عليهم
امسك غيرها واحتفظ بها لنفسك لان اطلاقها مصيبه !!

خلونا راقين في كل شي لا لشئ فقط لاننا نريد ذلك

نقطه ونهايه كلام

اليوم قالب ابو العريف خويكم احس بصداع مدري هو من الجوع
او من الفلسفه مع الظهاري

يالله صيام مقبول باذن الله للجميع وافطار هني وشهي وبالف عافيه

سلام عليكم

سحور هني وبالف عافيه عليكم وصيام مقبول باذن الله
والله يعينكم ويتقبل صيامكم ويكتب لكم اجر
صيام وقيام رمضان ويختمه لكم بكل خير

ياهوو ترا ماعندي سالفه جاي بس بعلمكم انهم مددو اقامتي بالسجن
وخلوها اسبوع تحت التحقيق في غرفه كرسي التحقيق !!!

لثالث مره اتحول للتحقيق وكذا

هالمره التحقيق والمحاكمه بتكون مباشره والاسئله من الجميع
على بالهم بيخلوني اعترف وكذا ...

المهم اذ طلعت قيلتي ومذنب ومدري ايش
لا اوصيكم بالمدونه الله الله فيها بخروها وزينوها للعيد
لا تتركونها مقفله وخويكم وصديقكم محبوس ههههاي

الزبده

مكتب التحقيق هنا

اللي يبغى يسال او يقرا ويكون شاهد على الحكايه
يدخل المكتب حياكم الله

بس اللي يعرف عني شي يكون محضر خير ولا يتهور
تراني ماني ناقص فوق السجن احدن ينكبني

يالله سلام

سلام عليكم يالربع كيفكم مع الاجواء الرمضانيه وسط اهلكم
ياجعل جمعكم مايتفرق ويحفظ لكم غالينكم ...

يازين اجواء رمضان ويامسرع ايامه ...
اكثر شهر بالسنه اقلب ذكرياتي فيه هذا الشهر مدري ليه شريط

حياتي كله ينعتد قدام كثير في هالشهر !!

اللي زيي يرفع يده من كثر ما الف شريط ذكرياتي انام وانا واقف !

الله يتقبل من صيامنا ويستر علينا ويحفظ غالينا
وييسر امورهم قولوا امين ..

مشكلتي في رمضان ما افضى هذا وانا عندي اجازه ولا اداوم الى بعد العيد ان شاء الله
بس بجد ما افضى ...

مشكلتي الثانيه ماعندي حاسب او لاب توب بالبيت من يوم طلعت ذا الجوالات
معاد صلحت او اخذت لي لاب توب جديد < زول وربي

عشان كذا دخلاتي هنا قليله لان الكتابه بالجوال تمغص بس احيان ياخذني الحماس
وتلقوني فيذا اطامر ...

صراحه سوالف شهرزاد ونفر تحمس تخلي الواحد يكتب هنا غصب
خاصه شهرزاد صايره الشرهان على غفله وسوالفها ونيسه وربي

ادخلو مدونتها وشوفوا وربي توسع الصدر بحكاياتها الشهرزاديه !!

نفر مايحتاج كلام بس قول اسمه تحس انك مبسوط

فاقد وربي طيف وسوالفها احسها ذبحت شغالتها او هجت معها ؟

فاقد كثيرين هنا لو بعدهم بيجيكم النوم وانا ماخلصتهم
الله يسعدهم وين ماكانوا وييسر امورهم

............

الله يرحم اموات المسلمين اجمعين لي كم يوم اشوف ولد اخوي ف احلامي
الله يرحمه ويوسع له بقبره ويسكنه فسيح جناته

ثاني رمضان من توفى وكل شي في رمضان يذكرني فيه
ساعات انادي اخوه باسمه بالغلط اشوف .. صعب الفراق وصعب ذكرى الغالين

......

سوري ضايقتكم شوي بكلامي بس لاني اكتب اللي ببالي على طول اعذروني
احب مدونتي بشكل ماهو صاحي لاني اكتب فيها اشياء لو اقعد مليون سنه

ماقلت اللي اكتب فيها لاحد ابد !!!

اذكر كلمت واحد من اخواني عنها قراها يقول انت يامجنون يامجنون
وش ذا اللي ف المدونه قلت استر ماواجهت ...

......

مدري ليه هنا اطلع براحتي وانا اعرف ان فيه ناس كثير يعرفوني من اهلي
الشباب معنا بالاستراحه اخواني عيالهم كمان بنات اخواني كلهم يعرفون مدونتي

وبعضهم يتابعن على طول هنا بس اكتب براحتي فيذا ولا شلت هم شي

اذ جيت اتكلم مع احد مباشر البشه تبلع لساني ...

.....

واحد من عيال اخواني مسجلني بجواله الوسمي !!!!

كلامي كثير اليوم بس والله واحشيني وايد واجد كثير اوي خيرات الله برشا برشا
يالله بطلع بروح انام الساعه جات سته ونص الصباح ولسى مانمت

يازين رمضان ويازين لياليه ..

اللهم اجعلني ومن قرا هذه الاسطر من عتقائك من النار في هذا الشهر الفضيل
وانعم علينا بكرمك وجودك واختم اللهم شهرنا على خير وقد غفرت لنا
ذنوبنا وتقبلت منا صيامنا وقيامنا وصلاتنا ...


ف الاخير وع الطاير

شهرزاد لاتغيري اسم مدونتك تراها من احسن اسماء المدونات
بعد مدونتي << برا برا هههههاي


يالله في امان الله


خودافس