صباح الخير ... صباح النقاء .. صباح الكسل .. صباح الحب << الاخيره لحد يدقق عليها
صباح كل شي زين !!

كيف الحال شباب وصبايا العبير صراحه زعلان عليكم اغيب يومين
القاكم مودين مدونتي للصفحه الثانيه !!

هذا الكلام مرفوض عطوني المدير هنا خلوني اكلمه ليه كذا



بس تدرون ليه سامحتكم >> ايه سامحتكم
مهوي من يومي ازعل واسامح بنفس الوقت وساعات اللي زعلت عليه مايدري اني زعلت عليه

تبون اقول ليه سامحتكم !!

قبل اقول شي بوريكم صوره شفتها اليوم اول ماسجلت دخول
لحظه بس بقصها وبحملها واجيبها فيذا اوعا ايدك من الريموت كنترول شايفك




لقد عدنا شوفو الصوره اللي قلت لكم عليها بالله كيف تبغوني ازعل او اتضايق على احد
في هذا المنتدى

يومين اغيب قبلها كتبت كم رد ف ذا المدونه وكم شخبووطه رجعت اليوم
ولقيت التنبيهات زي منتم شايفين

بالله مين مايسامحكم خلاص سماح لكل الاعضاء بعد الكرم اللي لقيتيه ف اليومين اللي راحن
وخلاص برز مدونتي معكم فوق

وعاد دعواتكم اختباراتي تبدأ الاسبوع الجاي زي ذا اليوم
وربي بطني مغصتني يوم تذكرتها

يالله في امان الله

خودافس

تذكرون الاسبوع اللي راح سألت سوال ؟

ليه البنت سهل تزعل وكمان سهل ترضى وبسهوله !
جاتني بعض الردود من بعض اخواتنا العضوات الفاضلات ف المنتدى هنا << ماسكه لغه عربيه اليوم

المهم ماعليكم بطرح بعض الردود هنا وبعلق عليها واكيد بتكون لي
رجعه معكم ومع اصحابها اذ شفت لهم ردود على دردي >> كم داء في ذلك

طبعا ماراح اقول مين اللي ردو عليا



قولو بسم الله بنبدا

اول رد ( 1 ) !!

يارباه الرد هذا كله اناقه ومقدر اقول شي
وصراحه صادقه يوم تقول ليس كل النساء هكذا بس نتفق ان الغالبيه كذا

بس مدري تتفقون معها ان ذا الشي يكون ميزه للبنت !!


ثاني رد ( 2 )

اعجبني ذا الكلام مباشر وف الصميم
بس اتفقوا الثنتين انو مو في كل البنات بعضهم !

يعني الين الان ماعرفنا هل تعتبر ميزه او لا البنت اللي كذا !!


الرد الثالث ( 3 )

هنا باختصار ومستعجله ماعندها وقت
وزي مانشوف لين الان ماعرفنا هي ميزه او لا !!



الرد الرابع ( 4 )

هنا فيه تحكيم العقل اخذ مكان كبير وفيه بعد عن طيبة القلب !
بس ما قالت شلون يزعلون بسرعه اختنا هنا ركزت ع المسامحه بس

يوم اقول التعليم والفهم اقصد انها يوم تزعل تقول ساعات كلام
كبير ويضايق بدون ماتحسب حساب شي ! وتنسى اللي تعلمته وكل شي

البعض طبعا مو الكل وهنا اتكلم عن وقت الزعل مو يوم تجي تسامح او ترضى


وسلامتكم اشكر العالم اللي تفاعلوا مع السوال ربي يسعدكم !

يالله ف امان الله

خودافس

سلام عليكم يالربع

خلوني اكمل معاكم الردود اللي وصلت على تساؤلي قبل كم يوم

تصدقون نسيت كم الرقم فوق

نقول الرد رقم ( 5 )


الله يسلمك صراحه رد يختلف عن كل الردود اللي قبل !
كلامك صراحه يقنع بالنسبه للمسامحه حنيه الامومه فيكم طاغيه

اشوف العناد في بعض الرجال يكون قوي عشان كذا تلقين وتسمعين
عن رجال ماتو وماتسامحو عندنا مشكله ف العناد

ع العموم مشكوره ع الرد دمتي بود


نجي للرد رقم ( 6 )


صراحه ذا الرد اشوفه من اقوى الردود واشملها ابدعت صاحبه الرد
ف الكلام والتوضيح اضم صوتي لصوتها



معاك في كل اللي قلتيه صراحه كلامك وافي شامل

ف الاخير احب اشكر الكل اللي تعنو وجاوبو في مدوناتهم او بالتقييم
صراحتن تفاعلكم اسعدني ورب البيت

جعلكم دوم في احسن الاحوال !

بالنسبه للعالم اللي فيه شويتين كسل ويقول انه اكتفيت بردود العالم ومافيه
داعي انه يزيد اقول ماقصرت بس ياخي مايضر لو قلت شي

ع العموم مشكوووورين كل ابوكم ربي يسعد ايامكم

يالله ف امان الله

خودافس

هذا التصميم ليا مناسبته تعور القلب بس يبقى ذكرى غاليه عليا والله
يمكن له اكثر من سنتين والله تو انتبه للتاريخ كويس كنت حاط التاريخ فيه

التوقيع كمان لي سويته من زمان ورزيته توقيع من سنين



نجي للصورتين الثنتين اللي في هذه الصفحه لا التصاميم ماهي لي
بس الصور حلوه ولطشتها وحطيتها فيذا المكان

لانها من جد حلوه ويركب عليها التصميم بسهوله

هذه جوابي للي يسالون عن التصماميم اللي هنا

وشكرا شاكرين

خودافس يالربع

سلام رجعت بعد مافرنكت ساعتين عن الدوام المشكله رحت ادور النوم
وماجاني النوم شكله زعلان لاني مطنشه البارح ساعه وهو يابن الحلال تعال تعال وسحبت عليه

اليوم يوم جيت ادور النوم سحب عليا بن اللذينا

ماعلينا مصيرنا نتقابل بعد الظهر

<< لحد يدقق تحشيش تايم

الموهم يوم رجعت ولفيت بالمدونات لقيت الحبيب اللزم ذيبان نفر
يتكلم ف مدونته شوفو وش يقول !!

الله يحفظ لنا سلمان ويطول لنا بعمره ويعز شعبنا فيه
ويعزنا به !!

المهم يابو الانفار سويت لك ذا التوقيع ع الطاير اتمنى يكون قد المقام ويعجبك سعادتك
طال عمرك هاك تفضل دوك التوقيع والرمزيه بعد فوق البيعه












عاد تقول فتح قسم نسائي عندكم بالعمل يالله اكشخ فيه قدام العالم

وذا تو فتحو قسم نسائي عندكم عندنا القسم النسائي شغال من قبل اتوظف

يالله ف امان الله

خودافس يالطيب

يطر جيبي طراه يارباه شووفو مين مديني لايكات

ش غ ب

يارباه مالذي يحدث ياشباب من وين طلعت هالدافوووره يارباه
وربي زمان ماشفت لها تواجد فيذا

حياك الله شغب وحمد لله ع السلامه يابنت

مشكوره وربي يسعدك !!



صراحه غبرتي اوم المدونه تغبير بس مايهم حياك الله الدار دارك

الله يعننا على التنظيف

نفر وينك اليوم يوم القدماء العالمي باقي بس لنو ومرامي وصافي وحنين
وتكمل شلتهم

ياويلي ويلاه وربي زمان عن الهوشات معهم اذكر من كثر ما اتهاوش
صرت من المغضوب عليهم بذا المنتدى وفجاه صرت صديق الكل



يالله دوامي بينتهي دعواتكم بالسلامه للكل والله يرد الغايبين عننا
وحمد لله على سلامه العالم اللي رجعوا

في امان الله

خودافس !!!

اليوم وش رياكم لو اقلب رومنسي شوي بجرب ولا تدرون لا خلاص بطلت
تكفي الصوره اللي فوق اليوم وبكره اذ صحيت زي اليوم

اقلب لكم رومنسي اليوم صحيت ماسكه رومنسيه معاي مدري ليه
شكل العشا له دور ولحد يقول وش تعشيت

المهم ماعلينا خلونا نرجع للردود على سوالي حق الاسبوع اللي راح

عاد جاني رد وفيه تهديد اني انزله غصبني عني مع انه متاخر شوي
بس وش السواه صاحبة الرد حيل ذكيه عرفت كيف تخليني انزل ردها هنا مع اني كنت

خلاص ناوي اقفل على الموضوع وربي
بس طريقتها مدري ليه اقنعتني فيها وكلامها صراحه على متمه على قولتنا

نشوف الرد رقم ( 7 )

شايفين بالقوه وتحت التهديد حطيت الرد مع انه متاخر
اما انه بيلحي المدونه هذا اترك الحكم للعالم اللي تجي هنا بالنسبه لي اشوف

مدونتي مافيها شي حلو كلها هرج وشخمطه

نجي لردك صراحه انا معاك في كلامك ان البنت بشكل عام يلفت نظرها
أي تفاصيل صغيره باللي حوليها وياثر فيها بقوه احيان كمان

وهذا بلا ابوك ياعقاب لو يخفون شوي من ذا كان اشوا

ع العموم اسعدني زي ماقلت لكم ردودكم وتفاعلكم لاجل كذا شكلي بكثر
ذا النوعيه من الاسئله بشوف ردود البنات عليها

او خلونا نقول ابغى اشوف الردود من طرفكم لاني اعرف وجهه نظر الشباب
وشبعان من فلسفه الشباب ف بعض المواضيع

ابغى اشوف فلسفتكم انتم في كم موضوع ومن زمان ودي اسال فيه مجموعه
منكم اعجبني تفاعلكم مع سوالي الاول



عاد انتظرو سوالي الثاني بس خلوني اضبط السناريو حق السوال
ثم بسدحه فيذا المدونه


خودافس

هذه حالتي اليوم وفي ايام كثيره ماعندي شي اكتبه او اقوله راسي مليان كلام وافكاري
ماتوقف ابد !!

بس اضيع كيف اكتب اضيع ايش اقول !!
اظن تصير لكثير منا هذه الحاله ماتعرف وش تكتب او وش تقول بالوقت اللي المفروض تتكلم فيه !

عاد احسني بالوقت اللي المفروض اتكلم اصير زي الجدار اللي وراي مدري ليه
اوقات كثيره مرت فيني ومواقف واجد وقفت قدامها زي الابكم ولا كلمه

يمكن ساعات لاني اكون الغلطان فما عندي تبرير لخطاي الى اني اسكت !!
سكوت يرفع الضغط بوقت اهبل

بعد فتره يتغير الوضع اروح ابغى اتكلم القى الطيور طارت والقلوب امتلت
والنفوس شالت مالحل ؟

ماني عارف صراحه !!

هذه حالات اذ مرت فيني لو ودكم ماتعرفوني بجد كذاب اللي يقول الصمت حكمه
هو يمكن يكون راحه بس راحه وقتيه مو اكثر !! وتجر وراها اسئله هاذا كبرها

يالله العافيه طيبه والجنه الجنه

والله مالي نفس اكتب او اتلكم اليوم النفسيه صراحه مخيسه شوي
بس وربي يوم دخلت اليوم الصبح كالعاده اول ما اجي المكتب على طول

ادخل صفحتي ف الاسك
وبعدها اجي هنا المنتدى

على طاري الاسك اللي فاضي يشرفني بزياره هناك ماراح تندم بالعكس
حياكم الله في اسفل التوقيع تحت ع اليسار شرفونا

وش كنت بقول ضيعت !!

ايه صح تذكرت قلت اني ماكان ودي اكتب شي داخل بس بشوف
وبطلع بس لقيت ذا المنظر ورب البيت فتح نفسي ادخل المدونه واكتب ...





ويلموني بعضهم في حبي لذا المنتدى واهله ياشيخ رورحوا عسى ربي يسعد ايامكم
وربي بدون تفاعلكم وتواجدكم ما لي أي داعي انا ومدونتي !!

من جد شكر للكل شكر لكل من تعني وترك له بصمه يالله يارب ان تسعده


هيا عاد !
الحين بطلع بجد بعد ما اخذت منكم دعم والله من انه يخليك تشتغل بنفس

في امان الله يالطيبين

خودافس

سلام عليكم يالربع كيف الاحوال

هيا تعال

والله مشغول واليوم اختبرت ولين الحين مافكيت الماده
اللي عندي بعد بكره هلوست فينا الكوره هلوسه
وداخلن من الجوال وتعرفون المعاناه مع الجوال بالمنتديات

هيا تعال

بس بها المناسبه مقدر ما ادخل واكتب هنا رجونا الهلاليه
وناصرهم ازعجنا بكل مكان

هيا تعال

واخرتها فشلونا مع العربان وقدام جهورهم الله لايبلانا
فضيحه مابقى الى يطرد لاعب وتتوقف المباراه لعدم التكافوء

هيا تعال

رجعنا الدوري لدولابه

هيا تعال

واللي فاد بالاخير الصمله مبرووووك لكل نصراوي هنا
الف مليووون مبرووك وعقبال الابطال باذن الله

هيا تعال

وينك عزوز عساك طيب ربي يسعدك اكثر واحد جا ببالي لاشي يستحق
المشكله وربي اليوم هلالي يلاحقني لين عند سيارتي يوم طلعنا من الاختبار

وهيا تعال

من الغبنه كان ودي ادعسه ههههههاي


يالله ف امان الله اشوفكم على خير

قبل اطلع طيف ياويلك لو تتريقي على تختيمي لردودي
شفتك تقولي خنافس

خووودافس

وهيا تعال

سلام يالربع شلونكم عساكم بخير كلن باسمه
ياويلي ويلاه بوه عالمن زمان ما اشوفهم هنا واليوم راجعين


صح غبرونا تغبير وصدعو بروسنا عاد ماحنا فاضين
من الصبح او من امس وانا احوس في تصميم دعوه لواحد من عيال عمي زواجه
الاسبوع الجاي عقبال العزابيه



المهم خلوني نرحب بالعالم اللي غبرونا وهلا والله فيهم وحياهم الله وسطنا
ببيتهم ربي يحييهم

قلب صافي ، وميمي ، وانا 2 ، وحكايا ، وغندوره ، والنشميه لحن

حياكم الله يالربع والله حياكم الله ماتزين الى فيكم
بس ها مو يوم وماعاد نشوفكم خلوكم فيذا

رحبوووووو

نفر العشا بكره عليك انت وعزوز قولو تم
الحلى والحركات عند شهرزاد وطيف

ولاتشيلون هم المويا والعصير انا بتكفل فيه

نقطه ونهاية سطر !!

صح قبل انسى نزلتي لي خمس مواد من سبعه والحمد لله
عديتها على خير باقي ثنتين وخايف من وحده فيهن

اذ شفتوني اختفيت بالكم يوم اللي جايه اعرفو ان ابوي سوى لي حظر تجول
عاد عندي مايعرف يفرق بين جامعي او ثانوي تدرس يعني تنجح

شلت وحملت ووطيت ماتفرق معاه انت ناجح او راسب



المهم الله يعدي المادتين الباقيه على خير واللي يقهر اكثر كلها
من مواد التخصص يعني لو اجيب العيد بوحده مشكل كبير

يالله خلوني اطلع وراي حبس شكلي بعد كم يوم

خودافس

وهلا بالعالم اللي نوروا وربي المدونات بتواجدهم
والف مليوون حمد لله ع السلامة