السموحه علي التاخير




الجزء الحادى عشر
سعود جلس بين يدين أبوه...وهو يترقب كلامه بعد ما ناداه عشان يكلمه بخصوص زواجه...
أبو محمد:قلت لي يا سعود إنك تبي بنت أبو بندر؟؟؟...
سعود بتردد:إيه طال عمرك...
أبو محمد:يعني ماتبي بنت عمك منال؟؟؟...
سعود:إنشالله تلقى لها منال من هو أحسن مني...
أبو محمد بتفكير:والله لو علي كان زوجتك منال بنت عمك...بس بنت أبو بندر ما تنرد...نسب طيب وناس لهم مكانتهم...
سعود بارتياح:يعني بتخطبها لي يباه؟؟؟..
أبو محمد بابتسامه:يشرفني يا ولدي إنك تاخذها ولا وين بنلقى مثلهم...
سعود:أجل خل نتوكل على الله ونربط حزامنا ونسافر الرياض نخطبها...
أم محمد يضحك(وهو نادر ما يضحك):ههههههه وراك مستعجل يا سعود...
سعود ضحك من ضحك أبوه اللي نادر ما يضحك:هههههههه أخاف تروح البنت يباه من بين يدي...
أبو محمد:لا تخاف بإذن الله مارح تروح البنت علينا...وبأكلم تركي على الموضوع...
سعود:تكفى يابو محمد كلم تركي اليوم...
أبو محمد:اركد ياسعود لا تصير خفيف...
سعود:مهيب خفه يباه بس أنا مستعجل بالحيل..
ابو محمد بعينيه الجاحظتين:سعود خلك رجال واثقل..الخفه والعجله ماهيب زينه...ورجل أختك باكلمه اليوم...
سعود بامتعاض وهو يلوي بوزه:إنشالله يباه...
أبو محمد بسرحان:والله كيف ماطرت بنت ابو بندر ببالي...صدق نسب يشرف ويرفع الراس...
سعود بصوت واطي:الحمدلله لك يارب إنك فكيتني من منال..وإنشالله تبدلني من هي أحسن منها بألف مره...وهذا العشم في بشاير...

***

رجع تركي للبيت من الدوام وهو ماله نفس حتى يطالع بشذى ويتمنى إنه ما يشوفها بوجهه...
دخل البيت وهو طالع الدرج...سمع صوت شذى تناديه من المطبخ...
تركي من دون ما يتكلم لف عليها ناظرها وبعيونه ألف نظرة احتقار وازدراء...
شذى تبتسم:تركي...الغداء جاهز تبيني أحط لك الغداء؟؟...
تركي ناظرها بإحتقار...ولف وكمل طريقه لفوق...
شذى:احط الغداء؟؟؟...
تركي من غير ما يناظرها:لأ مالي نفس...
وطلع من عندها...لمن شافت إن الحاله ازدادت تعقيد...امتلت عيونها بالدموع..ليش تركي كذا؟؟؟...والله خلاص اسفه...أنا غلطانه بس مو من حقك تعاقبني كذا....
قررت إنها تطلع وتكلمه....
طلعت ووقفت عند الغرفه اللي استقلها تركي لنفسه..بعيد عنها وهي مخصصه للضيوف...سحبت لها نفس طويل...ودقت الباب...وبعدها فتحت الباب ودخلت...
شافت تركي منسدح على الفراش ببدلته العسكريه ومغمض عيونه...فتحهم لمن شافها...
تركي باستنكار:نعم وش تبين؟؟؟...
شذى:تركي خلاص...
قطع عليها كلامها:إنتي كيف تدخلين علي كذا؟؟...
خجلت شذى من عمرها وطلعت...وهي عند الباب..
شذى:سورى ما كنت أقصد...
تركي سكت وقعد يناظرها متى بتطلع...
حست شذى بالإهانه وكرامتها ما سمحت لها تتجاوزها أكثر...فطلعت وصكرت الباب بقوة...وقعدت تصيح على الكنبه اللي بالصاله في الدور الثاني...
والله ماتوقعت كبر غلطتى كذا...وماتوقعت زعله كبير علي كذا...

أما تركي اللي كان من الداخل حزين عشان شذى ومن شذى...كان شعور غريب عنده...تكسر خاطره و قاهرته...كان خليط من المشاعر وده يسامحها بس هو مهوب قادر...صعب عنده إنه يغفر لها جرمها.. تمدد على الفراش وقعد يتأمل النقوش اللي بالسقف...يارب أنا ماني قادر أسامحها.. وماني قادر على بعادها...إلى حد تملكت شذى مشاعره إلى حد إنه صار مايلاقي مثلها إنسانه...كان يشوفها جوهرة مكنونه له وحده هو وبس.. وهو ما توقع إنه بيحبها إلى هالدرجه...بس ماراح أسامحها ألحين خلها تتأدب وتعرف من تركي...

***

عايشه:ارتحت ألحين يا سلمى عمي وافق...
سلمى تلعب بأطراف شعرها:لأ ما ارتحت...متى يجي تركي نفسه يخطب هذي الساعه ارتاح...
عايشه مبتسمه:طبعا ألحين ما فيه عادل؟؟؟...
سلمى معصبه:عادل مالك دخل فيه...خليه بحاله...
عايشه بتحذير:سلمى لا تلعبين على الحبلين...صدقيني بتطيحين ومارح تستمرين...
سلمى باشمئزاز:إنتي أي حبلين؟؟؟...أنا فكرت بكلامك...بس تركي ما اكن له أي مشاعر ألحين..
عايشه:وأول كنتي تحبينه؟؟؟...
سلمى تناظر الجهه الثانيه:تسأليني إن كنت أحبه...أنا كنت أحبه إلى درجة الفتنه..بس ألحين أعتبره حب غبي....
عايشه بسخريه:يعني عادل حبه ذكي...
سلمى تبي تقهر عايشه:ما راح تفهمين إنتى إنسانه جاهله...
عايشه:سلمى عادل والله ما راح يجيب لك إلا الخيبه...
سلمى:الخيبه فيك إنتي وولد عمك هذاك البدوي...
عايشه تضحك:تكفين يا الحضريه...
***

بعد صلاة المغرب طلع تركي وهو طالع مر على الصاله شاف شذى تطالع التلفزيون..ناظرها شافها ما ناظرته...شكلها مهيب مهتمه…تبيني أراضيها معصي أراضيها...تغلط و تزعل بعد...وقف وكلمها..
تركي:أقول شذى أخوك سعود يبي بشاير أختي؟؟؟...
استغربت شذى من وين عرف...اكتفت إنه تناظره من دون ما تجاوبه...
تركي وهو معقد حواجبه:وش فيك ماتردين؟؟؟...
شذى: مين قالك؟؟؟..
تركي:دق علي اليوم أبوك بعد صلاة المغرب وقاللي..كنتي تدرين؟؟...
شذى:إيه..
تركي بعصبيه:ليه ماقلتي لي طيب..
شذى:خلاص أبوي قالك...
تركي:مشالله اللي معي بالبيت يدرون واللي برى يقولون لي...
شذى بغصه:تركي واللي يعافيك تراني ماني ناقصه مشاكل..إنت تعرف الوقت مو مناسب إني أقوله...
تركي عصب زياده:منت ناقصه مشاكل..مو أنا راعي مشاكل هاه؟؟..ولا إنت يا شذى ملاك...أبد لا تهشين ولا تنشين...
شذى بعصبيه:ما قلت ملاك...بس إنت اللي تسوي من الحبه قبه..
تركي يفتح عيونه:أنا أسوي من الحبه قبه؟؟.. شذى احترمي نفسك إنتي ما تشوفين عمرك.. محد يجيب المشاكل إلا إنتي...
شذى نزلت دمعتها:تركي خلاص عاد...كفايه مشاكل..إذا إنت بتقعد كل يوم نازل طالع تهزيء فيني عشان غلطت وكنت غلطانه...ما أتوقع كبر غلطتي كذا.. وهذا مو من حقك بعد إنك تقعد تهزيء فيني..
تركي بعصبيه:مو من حقي ؟؟...
شذى عصبت وهي تصيح:إلى هنا وبس...وما أسمح لك إنك ترفع صوتك علي...
تركي بعصبيه يزمجر:مشالله يا شذى...أشتغل عندك أنا؟؟؟(يرفع صوته) إلا برفع صوتي.. إذا ما ينفع معك إلا كذا..
شذى تبكي ومعصبه:ولا أنا خدامة أبوك تقعد تهاوش و تهزيء فاهم؟؟؟...
وطلعت من الصاله تصيح للدور الثاني...وسط ذهول وعصبية تركي...
*
*
*
أبوبندر:مشالله عليهم ناس طيبه...
أم بندر:متأكد من كلامك يا تركي؟؟؟...
أبوبندر:أكيد متأكد ولا وشوله جا يقولنا....
تركي:إيه يا يمه...كلمني عمي أبومحمد وقال يبي بشاير لسعود ولده...
أم بندر:طيب وش رايكم بالولد؟؟؟...
أبوبندر بإبتسامه:اللي أنا شفته رجال والنعم فيه مشالله...
تركي:وأنت صادق يابو بندر...والله إنه رجال ولد رجال...اخلاق وعلم...
أم بندر:إذا هو مثل شذى بأخلاقه أجل هو مشالله ما عليه كلام..
تركي يحاول يجاري أمه في مدح شذى مع إنه موصل منها:نفس الشي بأخلاقهم...كلهم نفس التربيه...
أبو بندر:أبوهم أبو محمد...ما عليه كلام...
أم بندر:أجل أروح أقول لبشاير؟؟؟...
تركي بابتسامه:وش عندك يمه مستعجله؟؟؟
أم بندر:خير البر عاجله...
وقامت أم بندر...
بعدها فاتح أبو بندر تركي بسالفة خطبته لسلمى...
أبو بندر:وأنا قلت إن تركي ولدي ما بيردني...
تركي واللي كان مصدوم:وش قاعد تقول يباه الله يهداك...أتزوج وحده ثانيه..
أبوبندر:بس مو أي ثانيه...هذي سلمى بنت عمك ومنك وفيك...
تركي:لا يباه الله يهداك مستحيل أنا اتزوج وحده ثانيه...
كان تركي فيه وفاء لشذى ولا يفكر إنه ياخذ غيرها على مشاكلهم...

أبو بندر:بس أنا قد كلمت عمك...
تركي بإستغراب:في إيش؟؟؟...
ابو بندر:إني خطبت سلمى لك...
تركي:بدون ماتشاورني...مايصير كذا يباه...
أبوبندر:بس أنا أبوك وحتى لو ماشاورتك...أنا أعرف مصلحتك..
تركي:بس حتى ولو...هذا أنا رجال وش طولي كيف مالي راي...
أبو بندر:بس أنا قضيت قد كلمته...
تركي عصب:وش السبب اللي خلاك تخطب لي؟؟...
أبو بندر:أنا شفت سلمى...وقلت ما أبيها تطلع من بينا...
تركي قطع كلامه:وطبعا ما طرى ببالك إلا تركي وقلت خلي أخطبها له...
أبو بندر بعصبيه:تركي عيب عليك تقطع كلامي...
تركي بضيق:اسف يباه...بس وش معنى أنا من بين أخواني..
أبو بندر:أخوك بندر ماخذ أختها...ومتعب ماخذ بنت عمتك ومايصلح أدخل سلمى على سارا وهم رابيين مع بعض...فشفتك أنت أنسب واحد لها وبعدين إنت كنت تبيها...وهذا أنا خطبتها لك...
تركي يحاول يتحكم بأعصابها:بس أنا متزوج ألحين...
أبو بندر:وش دخل ذا...انا لي دخل إنك لازم تاخذ سلمى...
تركي:بس أنا ما أبي سلمى...
أبو بندر:وإذا أنا أبوك قلت لك لازم تاخذها...وأنا مو اطلبك يا تركي تاخذها أنا امرك أمر...
تركي عصب:بس يباه كذا بدون ماتكلمني قبلها ولا تعطيني خبر...
أبو بندر:هذا أنا أخبرك...
تركي بعصبيه:بعدين إيش..بعد ما كلمت عمي ولا حتى شفت وش رايي...
أبوبندر بعصبيه:أنا ما طلبت رايك يا تركي...سلمى غصبن عن خشمك بتاخذها...
استغرب تركي من أسلوب أبوه معه فعصب زياده:والله الزواج يباه مهوب غصب عن خشمي...وسلمى ما اخذها لو يكون...
أبو بندر بغضب:تركي...سلمى لمن قلتلك إنك تاخذها...انا مهوب قاعد أخيرك...أنا امرك أمر...وبعدين لا تعاندني يا تركي لأن العناد ما بينفع معي...وبالأخير أنا أبوك يعني إني لمن أقولك حاجه تنفذها...
سكت تركي وحاول إنه يتمالك أعصابه وهو باقي مستغرب من كلام أبوه مستحيل إن هذا أبوي...مستحيل...وش اللي قلب رايه كذا...
تركي بتوتر:طيب يباه وش أسوي ببنت الناس اللي عندي ألحين؟؟؟...
أبوبندر بتفكير:هذا شي راجع لك...خلها ببيتها معززة مكرمه...



***


فاطمه تكلم أمها: من جدك يمه تتكلمين؟؟؟...
أم بندر بفرح:إي والله يا بنيتي...والله ماني مصدقه بتتزوج بشاير وتصير عروس...
فاطمه باستغراب:خطبوا بشاير؟؟؟...
ام بندر:إيه وينتظرون ردنا...
فاطمه عصبت:طبعا رافضين وما فيها كلام...
أم بندر:وش رافضين؟؟؟...أنا عني موافقه...وأبوك ما عنده مانع.. بس بيسأل عن الولد شوي مع إنه متاكد إنه ماعليه كلام...
فاطمه عصبت حيل:ما لقيتوا إلا اخو شذى...هذي بشاير خطبوها كثير مالقيتوه إلا هو...
ام بندر ماعجبها كلام فاطمه:ليه وش فيه الولد ما نعطيه بنتنا؟؟؟...
فاطمه بضيق:مايصلح والله ما يصلح...
ام بندر بإصرار:ليه ما يصلح؟؟؟...عاد هو مشالله متعلم برا ومنصبه حلو على صغر سنه...
فاطمه:كيف بتاخذه وهم أقل مستوى مادي منا...
أم بندر عصبت:والله هذا من صغر عقلك إنك تقعدين تقارنين فلوسنا بفلوسهم... إحنا بنشتري رجال بأخلاقه وأصله...مو بفلوسه..
فاطمه زعلت:الله يسامحك يمه عقلي صغير؟؟؟...
ام بندر بتراجع:اسفه يا أم ريان..بس ما توقعتك كذا بترفضين عشان فلوسه يا فاطمه لو يسمعك أبوك يزعل..هذا هو دايم يقول ما بالحريم مثل فاطمه..
فاطمه:طيب وش قالت بشاير...
أم بندر بابتسامه:سكتت وما قالت شي مبتسمه بس...ولمن سألتها عن ردها قالت كيفكم...والله ماتوقعت بشاير تستحي...بس شكلها موافقه...
فاطمه:لا تاخذه والله إنه زواج فاشل لو تاخذه..
ام بندر زعلت:يا الله يا فاطمه...توقعتك تفرحين لأختك..والله لو تسمعك بتزعل بشاير...
فاطمه:خلاص يمه ما أطول عليك...مع السلامه...
ام بندر بضيق: في حفظ الرحمن...
*
*
*
في بيت أخوها بندر...
بندر:هلا والله فاطمه شخبارك؟؟؟...
فاطمه:تمام...
عايشه:وش هالمفاجأه السعيده؟؟؟...
فاطمه تبتسم:لا تكون تعيسه؟؟؟..
بندر يمزح:إلا مفجعه...
عايشه ضحكت:ههههههههههههههه أي مفجعه الله يهداك إلا مخيفه...
فاطمه مسويه عمرها زعلانه:أنا مفاجأه مخيفه...هين يصير خير...
بندر يمزح:عاد فاطمه زعلت...لا مانقدر على زعلك...
عايشه:ترى نمزح...لا تزعلين...
بندر طالع:يالله مع السلامه أنا طالع...
فاطمه:لا يكون عشاني جيت؟؟؟..
بندر يضحك:ههههههههه لا والله...بس معزوم على سهره عند واحد من اخوياي...
فاطمه+عايشه:مع السلامه...
بعد ما طلع بندر...
عايشه تناظر فاطمه...
فاطمه:وش فيك تناظرني...
عايشه:شكل عندك كلام...قولي يا وخيتي مالنا إلا بعض...
فاطمه بعد زفره طويله:وش أقولك يا أم فارس...صدمه قويه جاتني...
عايشه بتردد:لا يكون أخوك تركي رفض سلمى؟؟؟...
فاطمه:لأ...مو هذي السالفه..بس ترى إذا جد أبوي قال لأبوك إنه موافق أجل غصب عن تركي إنه يوافق...
عايشه بعد ما ارتاحت:أشوى...طيب وش السالفه بسرعه قولي لي؟؟؟...
فاطمه:ما أتوقع إن السالفه أصغر من كذا...
عايشه:فاطمه قولي بسرعه...ترى خوفتيني...
فاطمه:شذى يا جعلها الماحي اللي يمحيها...
عايشه:وش فيها؟؟؟...
فاطمه:تخيلي تبي تبسط نفوذها بالعايله...قامت خطبت بشاير لأخوها...
عايشه بصدمه:الله لا يوفقها بنت ال(.....) حسبي الله عليها... هذي مؤامره منها...

فاطمه:اللي أكبر من ذا كله أهلي...اهلي موافقين وماعندهم مانع حتى بشاير شكلها موافقه...
عايشه:شكلها لحست عقولهم...طيب وش بتسوين؟؟؟...
فاطمه:يعني وش بأسوي باخوها ذا؟؟؟....ما أدري...
عايشه:إيه صح ما قلت لك...ترى أبوي ما قال لعمي اللي هو أبوك خل تركي يطلق شذى...
فاطمه بعصبيه:ليه؟؟؟...
عايشه:قال أبوي مايقدر إنه يطلبه طلبين بوقت واحد...
فاطمه:يعني؟؟؟...
عايشه:يعني بالملكه تشترط سلمى إن تركي يطلق شذى...
فاطمه بابتسامه:والله فكره حلوة...بس خلي عمي يعجل بالملكه...
عايشه:لا يا حلوه..هذى عليك إنتي كلمي أبوك فيذا...
فاطمه:إيه صح وإنتي الصادقه...أنا اللي بأكلمه...
عايشه:خلينا من تركي وسلمى....ألحين وش بتسوين بسالفة بشاير؟؟؟...
فاطمه تفرك يدها بعصبيه:مالي حل يا عايشه غير إني أروح أكلم بشاير بنفسي...
عايشه: تبين أجي معك أكلمها؟؟؟...
فاطمه:لأ..تعرفين بشاير ماتتقبل منك..
عايشه معقده حواجبه:تكفين إنتي اللي تتقبل منك ألحين...
فاطمه:بس عسى إني أقدر اخذ وأعطي معها...


***


بعدها ما عرف تركي وين يروح...حس إن خاطره مره ضايق... ما وده يرجع للبيت ويشوف شذى... شذى اللي حاس إنها أكبر ضحيه للي بيسويه أبوه معه...يعرفها ويعرف غيرتها الزايده...وش راح تسوي لو عرفت باللي مخطط له أبوبندر... قعد يفكر تركي باللي قاله أبوه له... مو معقول هذا أبوي المتفهم المحب...اللي عمره ماجبرنا على شي... وش اللي خلاه يفكر إنه يزوجه سلمى ليه ليه؟؟؟...يعني يوم شافني متهني مع شذى؟؟...لا مو معقوله هذي أفكار الوالد...طيب ليه كذا أبوي يسوي فيني.. وش تبي ذي سلمى... وش الحكمه اللي ينشدها أبوه من قراره هذا؟؟
راح لعمته حصه...صاحبة مفاتيح صندوق أسرار تركي... صاحبة القلب الرحب...والوجه السمح... راح لها وشكى لها همه ونفض عن قلبه كل همومه عندها...من دون مايذكر سبب خلافه مع شذى...غير إنه سبب خلاف بسيط بين وبينها...قدرت حصه كل هذا بإبتسامه هو حر وهذي أسراره الخاصه مع شريكة حياته...
حصه:وبعدين...
تركي بضيق:أي بعدين يايمه... أقولك يقولي تزوج سلمى بنت عمك...
حصه:طيب وش سبب هالقرار؟؟؟...
تركي باستغراب:مدري...والله ما أدري... أنا تفاجأت من طلبه...
حصه:طيب هو قالك شي عن كذا من قبل...
تركي:لا...عمر أبوي ما غصبنا على شي أنا وأخواني...ألحين بيغصبني على سلمى ويقول بتاخذها يا تركي سواء رضيت أو ما رضيت...
حصه:طيب وش أنت رديت عليه؟؟؟...
تركي:قلت له..سلامتك يباه سلمى ما باخذها لو وش يصير...
حصه:هو إيش رده؟؟؟..
تركي:قال والله إن ما أخذتها يا تركي تزعل مني طول عمرك... عاد سألته وش حكمته من هالشي قاللي سلمى بنت عمك مننا وفينا... وأنا ما أبي سلمى تطلع من بينا...
حصه:طيب ليش ما قال كذا قبل لاتتزوج شذى؟؟؟...
تركي بعصبيه يحاول يكبتها:ما ادري عنه...سلمى ما أبيها... أقوله طيب وش أسوي ببنت ألناس اللي معي يقول خلها ببيتها...
حصه تحاول تخفف عنه:معليه يا تركي...حاول ترجع تكلمه بعدين وخذ الأمور باللين لا تعصب وتتسرع بكلامك مع أبوك...أبوك يبيله اللين والهدوء معه لمن تتكلم صدقني إنه بيقولك السبب...
تركي:ما أدري يا يمه.... وش أسوي..لا ويقول لي نروح نخطبها الشهر هذا...
حصه بإستغراب:غريبه وش عنده أبوبندر؟؟؟...تدري بكره بروح له أسأل وش عنده على هالسالفه...
تركي بتحذير:لا تروحين تكلمينه بالموضوع...هو وصاني إنه يكون سر بيني وبينه...وبعد مانخطبها نحط الجميع قدام الأمر الواقع...
حصه زاد إستغرابها:لا هذا مهوب اخوي أبو بندر...وش عنده على هالنيه...
تركي:ما أدري... خلاص أحس إن الدنيا ضايقه فيني...
حصه:اسم الله عليك يا تركي...لا إنشالله أبوك بيهون عن قراره...
تركي:وين بيهون...إنتي لو شفتي شكله بس وهو يقوللي...
حصه:طيب وشذى وش بتسوي فيها؟؟؟..
تركي بحزن:والله محد راح ياكلها غيرها...ماني متوقع وش راح تكون ردة فعلها غير إنها راح تكون عنيفه...
حصه:ما ألومها عندها تركي...
تركي بابتسامه بارده:أنا وين...وإنتي وين يمه...انا أقصد حياتي معها تتوقعين وش تكون بعد اللي ناويه أبوي...شذى من جد احبها موت موت وما أبي غيرها من الحريم...ما أبي سلمى ولا غيرها...إنتي ماتدرين عن النار اللي تشتعل بجوفي الحين...شي ودي أمنعه بس ماني قادر ماني قادر...أحس بالتوتر يا يمه....خبريني عن حل أسويه؟؟؟...أول مره أحس إني عاجز....وماني قادر أقول لأ...شذى على مشاكلي الأخيره معها... وحركاتها اللي ماتعجبني بعض الأحيان...بس أبيها والله أبيها...
حصه بنظرات حنونه:قول يا تركي لا إله إلا الله...
تركي:لا إله إلا الله...
حصه:ما عليك وتعوذ من إبليس.. وشذى بنت ناس وإنت إشرح لها موقفك...
تركي باستغراب:وش أقولها؟؟؟...أقولها سامحيني يا شذى أبوي بيغصبني إني أتزوج بنت عمي وقدري موقفي....يمه هذا راي مايدخل العقل...
حصه:اعذرني يا تركي ماعندي شي أقوله لك...ومابيدي شي أسويه لك.. ولو بيدي شي أسويه كان سويته بدون أي تردد...
تركي بابتسامه:يابعد عمري والله يا يمه...ماتقصرين...
حصه:وانا مين يستاهل اخدمه غير ولدي تركي...


***

قعدت تصيح شذى بعد ماطلع تركي من عندها...صاحت ماتدري ليه تركي يعاقبها على أكبر من جرمها...بكت وبعدها راحت تصلي وقرت قران لعله يخفف عنها للي بقلبها...بعد اقرت حست إنه ألقى الكثير من هموم الدنيا عن ظهرها...حست بالإرتياح اللي يخالطه الطمأنينه...بعدها سمعت صوت جوالها يدق...شافت ريم تدق عليها...ابتسمت كانها حست فيني هالريم...
شذى:هلا...
ريم:هلا والله بشذى أخبارك؟؟؟...
شذى:زينه وإنتي؟؟؟...
ريم:الحمدلله...
وقعدوا يسولفون وخبرت شذى ريم إنه سعود بيخطب بشاير اللي فرحت ريم من الخاطر لسعود وإن بشاير بنت ولا كل البنات...
ريم:والله من حظ سعود إن خل الشينه تبعد عن دربه...
شذى بشرود:إيه صح...
ريم:شذى...فيك شي؟؟؟....صوتك مهوب طبيعي...
شذى:لا...ما فيني شي...
ريم:تخبين علي أنا...خبي عن الناس كلهم إلا أنا...
شذى تحاول تكون طبيعيه خاصه بعد مادقت ريم على الوتر الحساس عندها شذى تحاول الضحك:دايخه شوي...
ريم:وش اللي يضحك الحين...
شذى بكذب:لا بس الشغاله بغت تطيح...وشكلها كان يضحك...
ريم:طيب...مع إني مومقتنعه باللي تقولينه...بس شذى فضفضي لي ترى مهوب زين إنك تكتمين بقلبك...
شذى موصله معها:ريم ...إذا في شي بأقولك...لا تصيرين شكاكه..
ريم بعدم إقتناع:شكاكه؟؟...بأحاول مع إني متأكده إن فيك شي مثل ما أنا متأكده إن إسمي ريم...


***

قعدت سلمى تفكر بعادل...حبيبها اللي أغرقها بحبه...شاب طموح ينتمي لعائله غنيه من عوائل جده...جنسيته سعودي...بس أصوله مهيب سعوديه أصوله من تركيا...كان يدرس الطيران بالأردن تعرفت عليه سلمى عن طريق المجموعه اللي تدرس معهم...كانت أول ماجات تدرس بالأردن قلبها مشغول بتركي تركي وبس...بس مع مرور الأيام صار حب عادل ينمو ويكبر مثل الجنين..كان تحس بدقاته كانت تحس بنبضاته...كان عادل من النوع اللي يستهوي سلمى...كان حبيب لبيب...وصار حبه يغلب حب تركي...يمكن لأن عادل قدامها طوال الوقت عكس تركي اللي ماتشوفه.. وبعدين كان يميز عادل بعد إنه كان حلو التعامل مع الجنس الناعم.. وسلمى كانت من النوع الفاتن اللي مستحيل يمر مرور الكرام قدام عادل...توطدت العلاقات خاصه إن عادل بعد كان توه خارج من علاقة حب فاشله مع فتاه أردنيه...ولقى سلمى دوى لجراحه...حبوا الإثنين بعض...حتى صاروا أحلى ثنائي بالشله...سلمى لمن كانت بالأردن كان اخوها عبدالكريم ومرته مشغولين عنها أربع وعشرين ساعه...فكانت مفلوته على حل شعرها... محد يسأل عن طلعاتها ولا رجعاتها...كان عادل من النوع اللي يشجع العلاقات بين الشباب والبنات بهدف التعارف...كان يمنع الإنغلاقيه والتطرف...بحسب أقواله؟؟؟..الحب غلف قلوبهم....الحب اعماهم... صاروا محور تفكير بعض...نست سلمى تركي...فعادل أطربها حبا و عشق...كانت تشوف قصتها مع عادل احلى من روميو وجولييت... قصة الحضري والبدويه اللي ينتمون لبلد واحد وجمعهم بلد ثاني؟؟؟...

رجع تركي للبيت وكانت الساعه 12 بالليل..كان مهموم وزعلان..أول ما دخل شاف أنوار الصاله والبيت طافيه ماعدا بعض الأنوار البسيطه.. راحت عيونه تتلفت بلهفه تدور على شذى ومالقاها..قاس شعوره و إختلافه من لما خرج من عندها بالمغرب وألحين...يمكن بعد ماعرف سالفة أبوه مع سلمى...طلع فوق وراح لغرفتهم اللي له فترة هاجرها..دخل بدون مايطق الباب شاف ظلام دامس بالغرفه..فتح اللمبه وشافها نايمه.. كانت مغطيه جسمها وراسها كله باللحاف...راح يبي يشوفها..بس ماقدر كانت مغطاه كلها حس بنفسها المنتظم إنها نايمه..راح تمدد جنبها وقعد يناظر فيها.. وقعد يفكر..أعتذر لها أو لأ؟؟؟...طيب من الغلطان أنا أو هي؟؟..مين لازم يجي يعتذر للثاني...بس هي حاولت معي...طيب وش أقولها سامحيني.. وش راح تقول لو تعرف عن سلمى...خاصه إنها بالبدايه قالت إني أبي سلمى وبخطبها أول ماتجي...ابتسم تركي بسخريه وقال والله شكلك يا شذى إنك متنبئه لهالشي..وحاسه فيه..وأنا اللي كنت اتهمك بالسخافه والخرابيط..
قعد يفكر تركي إلى ماغلب عليه نعاسه وراح بنومه...
*
*
*
بعد ماقامت شذى الصباح شافت تركي نايم جنبها...إستغربت منه...تذكرت إنها كيف بكت الليله اللي قبل إلى مانامت بسبب مشكالها الأخيره مع تركي....معقوله رجع عادي معقوله...
وبعدها قامت...وبعدها بفتره بسيطه قام تركي وراها...شافها إنها قد قامت.. راح غسل وجهه وراح يصلي ويلبس لأن وراه دوام...نزل ما لقاها سال الشغاله عنها قالت إنها مانزلت...رجع طلع فوق وهو مستغرب وين راحت..شافها نايمه بالصاله بالدور الثاني...راح جلس عندها قومها بهدوء فتحت عيونها مبين إنها صاحيه...
تركي بصوت هادي:إنتي صاحيه؟؟؟...
شذى تناظره بدون ماترد...
تركي:طيب ليه قمتي من الفراش؟؟؟...
شذى وهي تناظر عيونه:مو إنت ما تبي تنام معي...حتى أنا ما أبي أنام معك...
انصدم تركي من كلامها...
تركي بعصبيه:هذا جزاتي إني رجعت وسامحتك...وقلت نبدى من جديد..
شذى وهي تعدل جلستها:تركي لا تتوقع بنات الناس يمشوون على هواك مو على كيفك متى ماتبي تزعل تزعل ومتى ماتبي ترضى ترضى وأنا مالي راي...
تركي عصب وقام:إنت يا شذى على بالك إنك إنتي المسكينه المظلومه وانا اللي سالب كل حقوقك...
شذى ببرود:محشوم حد قال كذا؟؟؟...إنت ملاك تمشي على الأرض مشالله...
تركي:ملاك؟؟؟...شذى ترى لسانك طويل هاليومين...
شذى وهي رايحه لغرفتها وتتكلم بأنفه:اسفه طيب...
مسكها تركي مع ذراعها بقوه وقال:شذى تراني مهوب أصغر عيالك تتعامليني معي كذا...
شذى تفك ذراعها منه:تركي خلاص عاد...كافي مشاكل...ما صارت حياه هذي...
تركي:مو كله منك ما شفت المشاكل إلا من يوم خذيتك...
شذى ناظرته وفكت يدها منه وراحت وهي تقول:حتى أنا ما شفت المشاكل إلا معك...
وطلع تركي وهو معصب على صباح الله خير...أما هي فبدت صباحها بنوبة بكاء طويله حست إن روحها بتطلع من بين ظلوعها...


***


بعد مرور كم يوم...دق أبو بندر على أبو محمد يبشره إنهم موافقين...
أبومحمد:والله يشرفنا نناسبكم مره ثانيه يابو بندر...
أبوبندر:ويشرفنا بعد...ولا تنسى شذى و سعود حسبة عيالي والله...
أبو محمد:هذا من طيب أصلك يابوبندر...
أبوبندر:والله يحييكم...متى ماتبون تجونا الرياض العين توسعكم أكثر من الدار...
أبو محمد:ماتقصر يا أبو بندر...بس بإذن الله الكريم...نجيكم على الأسبوع الجاي...
أبوبندر:الله يحييكم إحنا بالإنتظار...
أبومحمد:وإذا ماعليكم كلافه أو أي إحراج نبي سعود يشوف العروس...
ابو بندر بإبتسامه:هذا من حقه سعود...ومافيها كلافه أو أي إحراج يابو محمد...
أبومحمد:الله يعزك...ومشكورين وماتقصرون...
أبو بندر:تامر على شي يابو محمد؟؟؟...
أبومحمد:ما يامر عليك عدو...
أبو بندر:أجل يالله ما أطول عليك...
ابو محمد:أبد...مع السلامه...
أبوبندر:مع السلامه...

***

بشاير بعصبيه:فاطمه رجاءً صكري الموضوع...
فاطمه:بشاير أنا أختك الكبيره وأفهم أكثر منك...
بشاير:فاطمه...مالك دخل بحياتي الشخصيه أوكيه؟؟؟...
فاطمه عصبت:بشاير والله هذول ناس طماعين...
ناظرتها بشاير بسخريه:إنتي وش تخربطين؟؟؟...أي طماعين تتكلمين عنهم؟؟...
فاطمه:أتكلم عن الشينه شذى واهلها...ولا تقولين لي مره ثانيه خرابيط...
بشاير:أولا للمعلوميه فقط إن شذى ماهيب طماعه...بس كلن يشوف الناس بعين طبعه...وثانيا اخوها باخذه والله لاخذه لو يكون زبال طيب؟؟..
فاطمه:خذي لك زبال عادي بس يحبك...ولا تاخذين واحد يحب فلوسك؟؟...
بشاير قعدت تناظر فاطمه من فوق لتحت وقالت بسخريه:لا والله لا تسوين عمرك إنك مهتمه فيني...وإنه لازم يحبني إنتي ماتبينه عشانه هو أخو شذى...
فاطمه بعصبيه:إيه عشانه اخوها وش عندك؟؟؟...
بشاير وهي معقده حواجبها:أنا نفسي أعرف إنتي ليش تكرهينها؟؟؟...
فاطمه:طماعه...لأنها طماعه...
بشاير:في إيش تطمع؟؟؟...في فلوسنا؟؟..وهي وش عرفها فينا إلا لمن خطبناها...
فاطمه:إيه...بس لمن عرفت إن أخوك ولد فلوس..قالت باخذه..ولا هي على قولتك وش يجبرها على إنها تاخذ واحد ماتعرفه..
بشاير:النصيب...وبعدين أنا شايفه شذى تنحب...وهي بصراحه أكثر وحده ارتاح لها...انا ما أعتبرها مرة اخوي انا أعتبرها أختي وأكثر من أختي بعد..
فاطمه عصبت وانقهرت من كلام بشاير إن تكون شذى استفحلت فيها لهالدرجه..
فاطمه:هذي تضحك عليك يا الخبله...إنتي يا بشاير على نياتك وطيبه وهي إستغلت هالشي فيك...
بشاير حبت تنهي الحوار:فاطمه...أنا موافقه على سعود أخو شذى ومارح اخذ غيره...واللي عندك قوليه واللي براسك سويه...
فاطمه بغضب: تتركين هالعز اللي إنتي فيه...وتروحين للفقر... والله بطر..
بشاير بأسف:هذي محدوديتك بالأفكار...أهم شي الفلوس...الفلوس وبس...
وقبل ماترد فاطمه عليها قامت بشاير من عندها...عصبت فاطمه من هالحركه وقالت بصوت عالي...
فاطمه:بتشوفين بشاير والله بيقطك بعد ما يستفيد منك...
بعدها إنقهرت فاطمه من اختها اللي شكلها مصره عليه وماتبي غيره..قعدت تفكر وش تسوي بأخوانها مع شذى وأهلها..اللي كل ماتبي تفتك منهم يثبتون أنفسهم بهالعائله أكثر وأكثر...


***


بعد ما إستوعب محمد السالفه من أبوه إنهم يبغون بشاير بنت أبوبندر لسعود بدل منال بنت عمهم راح يكلم أبوه..كان مايحب عائلة تركي واللي كان ناقصه إن اخوه ياخذ بنتهم...سبحان الله فاطمه بالرياض ومحمد بالشرقيه...
محمد:يباه...إنت من جدك تبي بنت أبو بندر لسعود؟؟...
أبو محمد بابتسامه:إيه...وإنشالله على الأسبوع الجاي رايحين الرياض نخطبها...
محمد يحاول يناقش أبوه:متأكدين إنكم موافقين عليها؟؟؟...
أبومحمد:إيه وش اللي يمنعنا ويخلينا مانوافق...
محمد:لا...بس أقصد يعني سعود يبيها...اخاف بعدين يقول ما يبيها...
أبومحمد:لا من هالناحيه تطمن..بالعكس سعود يبي نخطبها اليوم قبل باكر..
محمد:وش معنى بنت أبو بندر إخترتوها من بين البنات؟؟...
أبو محمد:والله هالسؤال إسأله أختك وأخوك..بس لمن قالوا لي قلت أبوبندر نسب مانقدر نقول قدامه لأ...
محمد:حتى لو تكون بنت أخوك...
أبو محمد:وش دخل منال بالسالفه ألحين...أنا أصلا قعدت أفكر ليش أغصب سعود على وحده مايبيها...ومنال الله يعطيها اللي أحسن من سعود...
محمد بصوت هامس:الله يعطيها احسن من سعود هاه؟؟؟...ما أقول إلا ياليت إن سعود خذاها هي كان أبرك لنا ولها...
أبومحمد: وش قاعد تقول؟؟؟؟...
محمد:ها..ما أقول غير الله يوفق سعود بس...
محمد ما بغى يجادل أبوه لأنه يحس إنه مادام سعود يبيها ماقدر يرفض لأنه ماله راي...أو بمعنى أصح ما رح يكون له صدى اللي يبيه وماله أهميه لأن الراي كله لسعود...


***

أبو بندر:وبعدين معك يا تركي وش قلت؟؟؟...


تركي:في إيش يابو بندر؟؟..
أبو بندر:في بنت عمك...
تركي بضيق:يباه الله يخليك ذخر لنا...ما أبيها والله ما أبيها...
أبو بندر بعصبيه:يعني وشو ماراح تاخذها؟؟؟...
تركي عصب:إيه ما راح اخذها...حلوة ذي الزواج بالعافيه يعني...
أبو بندر:إيه بالعافيه...لا تكسر كلامي يا تركي قدام أخوي..وبعدين سلمى ولا ألف واحد يتمناها..
تركي:بس أنا من برى الألف هذول...
أبو بندر:يعني عطني من الاخر يا تركي؟؟...
تركي:يعني يباه الله يطول بعمرك ما باخذها..وشوله أجمع بهالحريم على كبدي...أنا ألحين متزوج ومرتاح مع زوجتي...ومافي سبب يخليني أتزوج وحده ثانيه...وبعدين أنا مالي كذا شهر متزوج...
أبو بندر:طيب إذا انا قلت لك يا تركي إن زواجك من سلمى بيتم وبعدين انا في زواجك ذا ماطلبت رايك يا تركي...
تركي بعصبيه:لا يا يباه هذا شي يخصني كيف مالي راي؟؟؟...
أبوبندر:مالك أي من بعد كلامي...والله لو ماتاخذها يا تركي راح اكون غضبان عليك على يوم الدين....
تركي:يباه الله يهداك...هذا الزواج بعدين ليش ماقلت لي هذا الكلام قبل لاخذ شذى...بعدين أنا وحده وماني ملحق معها تبي أخذ ثنتين...
أبوبندر بعصبيه:سلمى بتاخذها غصب ولا طيب...وبعدين أنا خليتك تاخذ اللي تبي عشان لا أظلمك..خليتك تاخذ اللي تبيها وبخليك تاخذ اللي أبيها..
تركي بضيق:يابو بندر...بصراحه مارح أقدر على سلمى وشذى مع بعض...
أبو بندر:لا بتقدر...
تركي:والله لأظلم وحده على حساب الثانيه..وقلبي وعقلي كله مع شذى صدقني سلمى مالها مكان بحياتي...
ابو بندر:تركي...بتمشي غصب عنك معي لأخوي...وبتخطب بنته..وإذا ما إنت قادر على الثنتين طلق شذى...
انصدم تركي من كلام أبوه وماتوقع هذا كلام أبوه...
تركي:وش اطلقها؟؟؟...مستحيل أطلقها...
أبوبندر:أجل خلاص خذ الثنتين على قلبك...
تركي انقهر من كلام أبوه:لا يا يباه مارح اخذ الثنتين على قلبي...طيب ما فكرت شذى وش موقفها من هذا كله؟؟؟...
أبو بندر:وأنا وش دخلني فيها...
تركي:أكيد هالشي ماراح يرضيها...وأكيد بعد إنها بتزعل وتروح لأهلها...
أبو بندر:والله مهوب مشاعر شذى راح تخليني اكسر كلامي قدام أخوي...
عصب تركي وقام:اوووه وبعدين مع هالكلام اللي ما تبيه يتكسر... ليه وش شايفني يباه سلمى هذي سبحان الله ما أبغاها..لا تقعد تضغط علي...إذا إنت على بالك هذا شي يسعدني أقولك بالعكس...
قطع كلامه أبو بندر:ومن قالك إني أدور سعادتك...وشوف إذا ما راح تاخذ سلمى والله يا تركي والله لتندم..واحمد ربك إني ما قلت لك طلق شذى..و هذا يدل على رأفتي فيها...
طلع تركي وهو مقهور مايدري وش يسوي يرضي قلبه..ولا يرضي أبوه...


***


أبي توقعاتكم لباقي الجزء.....
اموووووووووووووووووووووواة للحلوات

حان موعد السفر لأراضي العاصمه...كان سعود حاس بسعاده ونشوه كبيره...كان يحس بالراحه والإطمئنان باللي هو مقدم عليه..كيف لا وهو يشوف إن منال بعدت عن طريقه...ويشوف ورود بدت تظهر على حياته حب بشاير من اول ما كلمته شذى عنها...حس إنها قريبه من ستايله وتفكيره...
وبعد الوصول...راحوا لبيت أخته شذى...لأن اللي جا بس أبو محمد وسعود...كان في إستقبالهم شذى..أما تركي كان طالع لمشوار وراجع..
شذى بفرحه تطل من عيونها:هلا والله تو ما أنورت الرياض...
وراحت سلمت على أبوها وعلى أخوها سعود اللي كان السلام بينهم شوي دافئ...
وبعد ما جلسوا وارتاحوا...
أبو محمد:وين رجلك يا شذى؟؟؟...
شذى:طالع...شوي وراجع...
أبو محمد بجديه: وش اخبارك معه؟؟؟...
شذى بخاطرها((كل اللي ما يسرك يباه..مشاكل لو تعرفها بتذبحني))..
شذى بابتسامه:الحمدلله زينه...
سعود وهو يغمزها:أقول شذى وش هالقصر اللي مشالله ساكنه فيه؟؟..
شذى تضحك:ههههههه أي قصر لو تشوف بيت أبو بندر بتعرف وش معني قصر...
سعود يحاول يكون جدي:الحمدلله والشكر لا تصيرين كذا بنت فقر ما شافت خير..
شذى بإستغراب:مين الفقر...
قطع كلامها سعود:اقول شذى..شفتي بشاير قريب؟؟؟...
شذى وهي ترفع حاجب وتنزل حاجب:إيه توني قبل أمس شايفتها...
سعود بهمس عشان مايسمع ابوه...اللي كان يناظر عياله بإستخفاف...
سعود:قلتي لها شي عني؟؟؟...
شذى:لا...وخير يا طير اجيب طاريك؟؟؟...
سعود بقهر:ليه ما كلمتيها عني؟؟؟..
شذى تبي تقهره:وش أقولها؟؟..
سعود:أي شي...بس مدح..
شذى:للأسف الشديد..إنت مافيك شي أمدحه..سجلك أسود...
سعود:أنا سجلي الأسود؟؟؟..تكفين إنتي يا ناصعة البياض...
شذى بابتسامه:على الأقل أحسن منك...
أبو محمد يقطع الحوار:شذى...
شذى:هلا...
أبو محمد:إلا شخبار عمك أبو بندر...
شذى:الحمدلله..بخير...
أبو محمد:وكيفه بعد طيحته اللي كانت بالصيف؟؟؟..
شذى:الحمدلله أحسن من أول...وصاير يهتم بصحته أكثر..
أبو محمد:الحمدلله..
بهاللحظه دخل تركي...اول ما شافته شذى غابت الإبتسامه عن شفاتها...
بس حاولت تبان طبيعيه..حتى تركي أول ما دخل حاول يكون طبيعي...لأن مشاكله مع شذى زادت كل واحد يبين للثاني إنه سبب مشاكله بالحياه..
وبعد الترحيب اللي كان من تركي...
تركي:عسى ماتعبتوا بالسفر؟؟؟...
أبو محمد:الحمدلله..مع الطيارات ألحين مابه تعب مثل أول...
تركي:سلامات الأسفار والله...
سعود:سلمت من كل باس..
تركي بابتسامه للسعود:وش عندك جاي مع الوالد؟؟؟..
سعود:أبد شم هوى بالرياض...
تركي يناظر شذى:قالت لي شذى إن أبو محمد بس هو اللي بيجي يسلم عليها ويمشي...
شذى حاولت تبتسم..((يا شينك بس يا تركي))...
سعود يناظر شذى:تبتسمين أنتي مع هالخشه اللي تقول هنديه مسوين لها فيزا...
ضحك تركي وقال:هههههه إنت هيه شوف لا تقعد تضحك على مرتي ولا ترى ما فيه زواج عندنا...
شذى تناظر تركي وتحاول تبان طبيعيه:شفت يا سعود لا عاد تتطنز علي فاهم؟؟؟...
سعود بإبتسامه:لا وش دعوة إنتي أختي الحبيبه والوحيده...وركزي على كلمة حبيبه...
تركي:ليه تركز؟؟؟...
سعود يبي يفشله مثل ما فشله تركي قبل شوي:وش تبي انت؟؟؟...يا لقافة اهل الرياض؟؟؟..
تركي بنص عين:يا لقافة أهل الرياض؟؟؟..تبي تعرس عندنا بعد أنت ووجهك...ما فيه عرس خلاص...
سعود:عاد أنت ألحين مصلحتنا عندك..الله يعين حكم القوي على الضعيف..
شذى تبي تقهر تركي:ياهو الحين بيطلع هالزواج من عيونك...
تركي يناظرها:هو بحاله بس...لا تخافين فيه ناس بيكونون معه...
أبو محمد:خلاص يا تركي بكره بنروح نخطب عند الوالد...
تركي:الله يحييكم...
سعود يناظر أبوه:الليله يباه...وشوله باكر؟؟؟..
أبومحمد بحزم:بكره يعني بكره...
تركي يبي يقهر سعود:وشوله العجله يا عمي...خليها بعد بكره...وبكره إنشالله نروح الإستراحه...
إبتسم أبو محمد..أما سعود كانت ملامحه مطلعه اللي في قلبه...

باليوم الثاني وببيت أبو بندر...كان أبو محمد و ولده سعود موجودين وتركي ومتعب...عشان خطبة بشاير لسعود...أما عند الحريم داخل كانت شذى موجودة وسارا..أما فاطمه وعايشه ما جو...وهذا الشي ريح شذى..

كانت مشاعر بشاير صعبه أوصفها...كانت بين فرح ودهشه..كانت تحس إن الدنيا مو سايعتها...كان ودها ترقص فرح وطرب ونشوة... أي حب هذا؟؟؟...أكيد كل البنات بيحسدوني عليه...يا قلبي لا توقف من الفرحه.. كان ودها إنها تلون الدنيا بالفرح...كان ودها عن العالم كله يشاركها فرحتها ...كانت تحس كل أبيات الشعر ما توصف فرحتها...

أما سعود..كان حاس بالفرح...بالإنتصار لذاته إنه نفذ بجلده من منال..كان يحس إنها مثل الحاجز تعداه...كانت بشاير هذا الوقت شاغله تفكيره وعقله وقلبه وجميع أنحاء جسده...

كانت شذى و بشاير وسارا جالسين بالصاله مع أم بندر اللي لاحظت ذبول شذى...
أم بندر:وش فيك يا شذى ذبلانه؟؟؟...
شذى:لا مافيني شي...بس يمكن السهر...
بشاير:تسهرين...طبعا لأن ماعندك كرف مثلي...
سارا:أي كرف...
بشاير:الجامعه...عليها من الله اللعنه...
أم بندر:إستغفري ربك يا بنت...
بشاير:أستغفر الله ليه يمه؟؟؟...
أم بندر:وشوله تلعنين...فيه ناس يحبونها ويستفيدون منها العلم نور..
بشاير:خلاص يمه...واللي يرحم لي والديك..بلا محاظرات...
شذى:بشاير..
بشاير:سمي...
شذى بابتسامه:ترى بتشوفين أخوي اليوم...
سارا بخبث:وأنا أقول وش عندها بشاير مستشورة شعرها...مو نافشته بالجل مثل كل مره...
بشاير بغرور مع خجل:إنثبري بس...انا بس قلت تغيير لوك...
سارا:تغيير لوك؟؟؟...أقول شذى قولي لأخوك الحقيقه عن مرته شعرها مو كذا...
بشاير:والله أصلا أنا شعري ناعم...هذي هي الحقيقه...
سارا تناظر شذى بإبتسامه:شذى وش رايك ادخل إنجود معهم؟؟؟...
بشاير بإندفاع مع تهديد:ياويلك إن دخلت نجيد والله لتلعب بالدنيا..
بعدها كلن ضحك على كلام بشاير...اللي استحت مرره وتحسفت على إندفاعها...
*
*
*
بعدها راح تركي وسعود لمجلس ثاني عشان يشوف بشاير...
تركي يبي رفع ضغط سعود:يا حيا الله سعود...
سعود:الله يحييك...
تركي وهو يجلس:هاه إنشالله الرياض أعجبتك...
سعود بضيق:حلوة...
تركي يضحك:حلوة...روح إخطبها ههههههه...
سعود:كركركركر...ما تضحك...شكلك يا تركي راعي طويله...
تركي:الله يسامحك انا ما أضحك...
سعود:تركي..أقول أختك وينها..أنا جاي اشوفها...مو اقابل خشتك...
ضحك تركي من كلام سعود وقال:طيب لحظه...
وقام ولمن هو عند الباب...قاله:تبي أنادي شذى؟؟؟..
سعود:وش أبي أنا بشذى....
تركي:أختك...ولا ألحين الاخوة مالها مكان...
سعود بضيق:ياليل ما اطولك...ألحين يشتغلي نصايح...
تركي:خلاص طيب بروح أناديها...
وراح تركي ونادها...هي في البدايه اصرت إن شذى تدخل معها...بس شذى رفضت وقالت عن تركي معها...وبعدين عشان ياخذون راحتهم...


***


بالليل...وبعد مانام أبو محمد في بيت تركي...اللي رفض إقامتهم في الفندق..ورضخوا بعد ذلك لطلبه..كان تركي وشذى سهرانين مع سعود..
تركي يحاول يبين قدام سعود إن علاقته بشذى طبيعيه بعد ما حس إن سعود لاحظ إنه بينهم شي..
تركي:فاتك اليوم يا شذى لو دخلتي وشفتي شكل بشاير مع سعود كان متي ضحك...
شذى واللي مستمره في التمثيل:ليه؟؟؟...
تركي:كل واحد ملصق عيونه بالأرض...وما يتكلمون...زهقوني...أنا بحالي أتكلم..وأضحك بحالي..حسيت إن فيني حاله نفسيه...
سعود بطنازة:بسم الله عليك من الحاله النفسيه...يا مرهف الأحاسيس...
شذى تضحك:ههههههه وش فيك متحامل كذا على تركي؟؟؟..
سعود:زوجك العزيز...اليوم مسوي لي فيها أبو دم خفيف ينكت..
شذى مستمرة في التمثيل:تركي دمه خفيف...غصب عن اللي مايرضى..
تركي:مشكورة...والله هذي شهاده اعتز فيها ووسام أحطه على صدري..
شذى:لا وش دعوه...هذي هي الحقيقه يا زوجي العزيز...وما عليك من الحاقدين...
سعود:الحمدلله والشكر...من الحاقدين؟؟؟...
تركي:تقصدك إنت يا المملوح...
سعود:ما رح أرد عليكم...بأكبر عقلي...
تركي وهو قايم:يالله أجل أسئذن أنا بروح أنام...
سعود:لا أقعد يا بو دم خفيف...السمره ماتحلى إلا بك يارجل اختي...
تركي:والله عندي دوام ياخو زوجتي...أو يارجل أختي..يالله اسئذن أنا..
شذى:إذنك معك...
سعود:كوابيس تعيسه ولا أحلام سعيده...
إبتسم تركي وراح...
لمن شافت شذى إن تركي راح...لفت على سعود عشان تاخذ راحتها بالكلام أكثر...
شذى:هاه إنشالله أعجبتك بشاير؟؟؟..
سعود بإبتسامه أظهرت غمازته:وش أقولك يا شذى...قمر والله قمر...
شذى:يعني خلاص تبيها...
سعود يناظرها:أبيها اليوم قبل بكره...ما ادري كيف راح أصبر للزواج عنها...
شذى:الله الله...كل هذا بشاير سوته فيك وأنت شفتها بس...
سعود:أبوي كلم أبو بندر إنه الملكه بتكون بعد أربع شهور...
شذى:بسرعه...ليه ما فيه خطبه؟؟؟...
سعود:ليه الرسميه؟؟؟...لا الملكه مثل ماقلت لك...والزواج في الصيف...
شذى:الله يتممها على خير...
سعود:امين...


بعدها اليوم الثاني سافر أبو محمد وسعود وقبل السفر...
أبو محمد:يالله مع السلامه يا شذى...
شذى:مع السلامه...ياليتكم جبتوا أمي معكم..
أبو محمد:إنشالله بالملكه...
شذى:وصلوا لها سلامي...
سعود:يوصل والله بيوصل...
شذى:إنشالله توصلون بالسلامه...
سعود:أجل يالله نستأذن مع السلامه(وبهمس)سلمي لي على بشاير...
شذى بإبتسامه:يوصل...


***

في بيت أبو عبدالكريم...
أبوبندر:وإحنا جايين لك يابو عبدالكريم نطلب يد كريمتك سلمى لتركي...
تركي:وإحنا كلنا امل إنك توافق ياعمي...
أبوعبدالكريم:موافق يابو بندر...موافق ياتركي...بس خل نشاور البنت...
تركي:ولو...لازم رايها...
وبعدها بفترة جا المرسول...
سلمى موافقه؟؟؟....


هل شذى بتعلم باللى صار
وان عرفت شو ردة فعلها؟؟؟؟؟؟؟؟؟؟؟؟