رد: ☆*✲ﾟ*｡(((يوميات وخواطر مبعثرة )))｡*ﾟ✲*☆

دعوة صباحية : أسأل الله الذي لا يعجزه شيء
‏في الأرض ولا في السماء ..
‏أن يعطيكم فيرضيكم ويرزقكم فيغنيكم
‏و يجعلكم من سعداء الدنيا والأخرة ..
صباح الخير

رد: ☆*✲ﾟ*｡(((يوميات وخواطر مبعثرة )))｡*ﾟ✲*☆

رد: ☆*✲ﾟ*｡(((يوميات وخواطر مبعثرة )))｡*ﾟ✲*☆

ردد معي ..

سبحان الله والحمدلله ولاإله إلا الله والله اكبر
سبحان الله والحمدلله ولاإله إلا الله والله اكبر
سبحان الله والحمدلله ولاإله إلا الله والله اكبر
سبحان الله والحمدلله ولاإله إلا الله والله اكبر
سبحان الله والحمدلله ولاإله إلا الله والله اكبر
سبحان الله والحمدلله ولاإله إلا الله والله اكبر
سبحان الله والحمدلله ولاإله إلا الله والله اكبر
سبحان الله والحمدلله ولاإله إلا الله والله اكبر
سبحان الله والحمدلله ولاإله إلا الله والله اكبر
سبحان الله والحمدلله ولاإله إلا الله والله اكبر

رد: ☆*✲ﾟ*｡(((يوميات وخواطر مبعثرة )))｡*ﾟ✲*☆



مسالخير ...

كيفكم ؟ ان شاءالله بخير !

مدرريي اش اقول بس الي اعرفه و الي بقوله ان اشتقت للمنتدى و لكل الموجودين فيهه !
دخلت اليوم ع السريع و برجع اطلع ..
بقولكم كم هرجه كدا ع السريع و ادري اشتقتوا ل لهرجي <<واثقههه الاخت ههههه

تصدقوا ان مو بس اني م ادخل للمنتدى لا حتى البرامج الباقيه م ادخلها زي الواتس و الانستا و البيبي و السناب و غيرهااا
شوقي لكم كبيررر وربي احس اني م قد غبت و م كتبت ف المدونه مواقفي و هبالتي زي هذي الفتره
وربي مضغوطة بشكل مع الاختبارات و المشاريع و غيرهاا احس اني مو قادره أتنفس بسببها !

المووووهييييم خليني اقولكم شي !
تعرفوا بقولكم شي مدري اذا قلته قبل او لا بس وربي ناسيه اذا قلتهه قبل او لا المهم احنا عندنا مشروع اسمه (فرحه و طرحه ) اذا دخلتوا ع اليوتيوب و كتبتوا اسم المشروع ح يطلع لكم هو عباره ع اننا نجهز الدبش الي هو اغراض العروسه و هو ل جمعية خيرية ف انو ح نجهز أغراضها من ملابس و مكياج و شنط وكل شي بعني تعرفوا اغراض العروسه ؟ هي هذي احنا ح نجهزها ل ٢٥ عروسه وربي متحمسهههه بشكل
مشروع ممتع و خيري و تطوعي و كل شي و شي حلو والله !

اممممممم اش كمان

ايوههه تذكرت تخيلوا صحبتي ماشاءالله نسبتها١٠٠ و م تبا تكمل دراسه !! تبا تخلص الثانوي و تجلس في البيت تقول ان ح تتخرج و تتزوج و تجلس ف البيت وربي مدري اش اسوي فيها الهبلهه هذي ! قاهرتني ياخ نسبتها حلوهه و كدا ليه تضيع مستقبلها عشان زواج ؟ وقسم بالله هباله ! يعني أضيع ١٢ سنه دراسة عشان زواج ؟ ولا ياليت شي حلو لا والله تعب و وجع قلب و تتزوج واحد عله ! أعطوني طريقهه اقدر اقنعها انها تكمل تقول لي حتى انها احتمال م تكمل الثانوي و انا الصراحهه لاني اعتبرها زي اختي ف طبيعي اخاف ع مستقبلها ف انتظر منكم طريقة عشان اقنعها !

تصدقوا شي ! لم افكر ف شخص و اقول ان اليوم بكلمه او اي شي لازم لازم ف نفس اليوم هذا ألاقي من هذا الشخص رسالة او انه يكتب شي او اي شي يعني مدري احس يقهر و بنفس الوقت حلوو يعني يقهر ان زي م قلت لكم أخطط اني بكلمه و بعدين هو يرسل مدري احس يقهر و حلو و نفس الشي حلو لان لم تفكر فيه تلاقيه يكلمك اخخخخ بس م افهم شعوري ب هذي اللحظه أحسه اهبل لاني معرف احدد اذا انا مقهوره او مبسوطة ..

اممم ايوه صح
امس كنت اسوي العشا ل اخواني وكدا المهم جات وئام و دفتني و طاح الاكل كله و انكب مدري اش اسوي فيها الهبله هذي ف سرت اقول لها انتي هبله ولا غبيه ولا ايش بالضبط <<طبعا و انا معصبه و شايفه الشياطين قدامي هههههه
و الي قاهرني ان هي تضحك و لا كأنها سوت شي و تقول انتي الي كبيتيه مو انا ف تنرفزت منها و سرت أسب فيها وكدا وربي قهرتني ف سارت تقول انتي م تعرفي تعصبي عليا و اصلا مررره م تركب عليك العصبيه و حتى لم تعصبي يعني تكوني دوبك صاحيه من النوم غير كدا م تقدري مدري اش جاني وقتها قمت اضحك و انا معصبه وربي انقهرت يعني معصبه منها و اضحك معاها وقسم بالله انقهرت من نفسي هههههه

اخر شي
تخيلوا اختبار القدرات دخلته بدون مذاكره وبس دخلت دوره قبل الاختبار بس شهر تقريبا وجبت ٨٦ وربي انصدمت بس بنفس الوقت مبسوطههه منها يعي هذي بدون مذاكره اجل لو ذاكرت كم ؟ بس الحمدلله و ان شاء الله بدخل الترم التاني محوسب و ان شاء الله اجيب اعلى بس والله م عرفتني صدمتني نفسي هههههه

و بس يكفي كلام اليوم ..
سلااام

رد: ☆*✲ﾟ*｡(((يوميات وخواطر مبعثرة )))｡*ﾟ✲*☆




مسالخير ..

كيفكم ؟ ان شاء الله بخير

الصراحه الصراحه من دحين اقولكم يعني
مدري اذا الكلام الي ح اكتبه طويل ولا قصير بس كل م تذكرت شي ح اكتبه (:

اول شي مبسوطهه باقي ٥ أسابيع تقريبا و يخلص الترم الأول شي جميل واللههه

تاني شي دحين عندنا بالمدرسة عيال الي هن ف التمهيدي و الروضة
المهم فيه واحد اسمه عبدالعزيز اخو صحبتي المهم الولد ماشاءالله لزيز و كدا يعني بس الي يضحكني فيه انه بارد و يمشي كأنه ميتان استغفرالله هههههه بس يعني عسل ف انو كل م اشوفه لازم ابوسه ع خدوده ف لم يرجع البيت يقعد يقول ل امه و أخواته فيه بنت باستني كياته هههه
اما فيه ولد تاني ف هو يكون ولد اخو المعلمة المهم هذا نويتلااا مشااءالله برضوا اسمه عبدالعزيز ف انو لم يشوفني يجي و يتكلم معايا ف انا أعطيه شكولاته و كل يوم يجي و يجلس معايا و زي كدا ف هذا الاسبوع كان غايب و م داوم إلا اليوم ف انو مسكته قلت لك عزوز ليه غايب قال لي كنت عند امي بس والله زمان عنك قمت أعطيته نوتيلا ف هو قال هذي لي ؟ قلت له ايوه قام حضني وباسني ع خدي و سار بقول ي حبني لك وقسم نوتيلاااا مشااءالله و كانت ف يده كيكه قام يقول خذي هذي مني لك اخخخ ي ربي الله يحفظه
و صحباتي الخبلات يقعدوا يقولوا لي ترا العيال هذول م ح يفيدوكي ترا صغار م ح تقدري تتزوجيهم اغبياء هههههه يقولوا انتي بس مع العيال لكن البنات لا وربي يضحكوا بس اش اسوي والله العيال فيهم كياتههه اكتر من البنات يعني البنت تستحي شويه لكن الولد لا المهم ف وحده من الابلات مسكت المعلمة الي تكون عمة الولد و سارت تقول له بعدي ولدك عن البنات ف سارت تضحك و تقول هو اذا شاف بنت حلوهه يسوي كدا اش اسوي له ههههههه
وربي مدري اش بس الي اعرفهههه انهم نوتيلااا

تالت شي مدري اش بس يعني مشاءاالله كل نص الناس عندهم برد و الجو حلو وبعض الاحيان ينزل عنهم مطر إلا احنا بجده استغفرالله
تقول اش مدري المهم بس يعني حتى برد زي الناس مافيه مطر ؟ مافي غير الجمعه الي راحت شي يقهر يعني استغفرالله ياربي
بس يعني والله نفسي كدا احس بالبرد الحقيقي و المطر وكدا
عند اختي توصل عنهم درجة البروده باليل ٨ و بالصباح ١٤ شي جمييييل قلت لها خذيني عندك ههههه
و ماما و بابا يقعدوا بقولوا برد ! برد ايش ودرجة الحرارة دحين ٢٧ و بالنهار عاد توصل ٣٠ وشويه ف انو مدري ع اي اساس يقولوا برد !
بس يلاا عادي
احس اني معد سرت اتكلم كتير اشتقت لنفسي و انا اتكلم بس يعني مدري خلاص
سلام ...

رد: ☆*✲ﾟ*｡(((يوميات وخواطر مبعثرة )))｡*ﾟ✲*☆

الشيخ : نبيل العوضي

انت مهوم ؟ اقرا هذا الكلام !

مشكلة بعض الناس انه يبي يكون على طول مبسوط و فرحان ما يبي اي مشكلة ما يبي اي شي يضيق خلقه
و مايدري هذا المسكين ان هذي هي الدنيا
دنيا كلها كدر
(لقد خلقنا الانسان في كند )
يعني في تعب و مشقه
ثم ان مافي حال يستمر على الانسان
( كل يوم هو في شأن )
سبحانه و تعالى
يخفض و يرفع
يعز و يذل
يمرض و يشفي
يغني و يفقر
يسعد و يحزن
(وتلك الايام نداولها بين الناس )
اذا كنت اليوم مبسوط بكره زعلان
و اذا كنت اليوم زعلان بكره مبسوط
( وانه هو اضحك و ابكى )
سبحانه و تعالى
لو كانت الدنيا كلها سعاده ايش الفرق بينها و بين الجنهه ؟!
الدنيا سجن المؤمن و جنة الكافر
مهما حزنت ف ان المئال بأذن لله
الى الجنه هي دار السلام ..

رد: ☆*✲ﾟ*｡(((يوميات وخواطر مبعثرة )))｡*ﾟ✲*☆

صباح الخير ...

‏ولنآ في آلصبآح
‏حيآهہ آخرى , تنبض بآلجمآل
‏صبآح نقي ، وهوآء باآرد ويوم جميل
‏ﺎللهم ﺎدم علينا نعمگ وعافيتگ .
‏⁧
جمعه مباركهه ع الجميع
لأول مره من بعد فتره ادخل بالصباح و كدا
بس بقول شي صغنون و بعدها بطلع اكمل حفظ
باقي ٥ ايام ع مسابقة الحديث حماسي ؟ بحححه خلاص راح سار بدل الحماس خوف و الله المستعان
و مسابقة القران يوم الثلوث مدريي مع ان مو اول مسابقههه بس يخوف ياخي
بس ع قولة صحبتي انتي توكلي ع ربنا و استودعي حفظك و ربنا مش ح يسيبك لحالك و ح يوفقك ربنا يسهلك يختشي<<ربي يسعدها

كمان فيه شي ابا اقوله ادريي اني متأخرهه ف الرد عليه بس عادي
فيه تقييمات بتكلم عنها (:
اول شي تنهيده ربي يسعدك و انا كمان احبكك يعيني ☹️❤️

تاني شي لكل الي دعوا لي ان ربي يساعدني و يوفقني ع المشروع امين يارب ربي يسعدكم الله لا يحرمني منكم ..

اخر تقييم بتكلم عنه كان من اخويي تفاصيل
واللههه ضحكتنيي ربي يسعدك بس تعرف يعني الاسم هذا تعودت عليه "موزه" بحكم ان ال(د) جنب ال(ز) و كمان لان دايما ينادوني موزه بس يعني للمعلوميه اسم موزه بالنسبه لي رحمههه
فيه الي يقول دوده و زيتونه و صبوحه و مودي و ارنوبه و هبوله و غيرها ف انو يعني الاسم هذا جنب الأسماء دي رحمه ههههه لا تسألوني اش دخل الاسماء دي ف اسم موده بس يعني خلاص عادي تعودت ف خذ راحتك موده موزه اي شي عاديي هههه

و ان شاء الله معد اغيب فتره زي اول لاني ادريي لم اغيب اشتقتوا لي <<ابو الثقه بس ههههه
لا جد يعني بس انا اشتاق لكم و كمان اشتقت لنفسي و انا ادخل للمنتدى يعني والله لم وحشه و مدونتي حبيبتي اشتقت لها يعني و كدا

وبس هذا كل شي ف بالي دحين و الله يحفظكم
سلام ..

رد: ☆*✲ﾟ*｡(((يوميات وخواطر مبعثرة )))｡*ﾟ✲*☆

رسالة مسائية : عن جمال هذه الجملة "تشاء ياآ عبدي و أشاء فإذا رضيت بما أشاء .. أعطيتك ما تشاء " فـ الحمد لله

رد: ☆*✲ﾟ*｡(((يوميات وخواطر مبعثرة )))｡*ﾟ✲*☆

رسالة صباحية : كن مع الله و لا تبالي

صباح الخير ...

دحين و انا اكتب الساعه ١١:٤٥ بس ابا اصبح عليكم لاني معد ح اصبح عليكم إلا يوم الجمعه الجاية ان شاء الله
المهم من الصباح جايه أهرج الله يصبركم عليا
تخيلوا معد سرت اقدر اكل احس قلبي يعورني
يعني انا عاديي عندي يجيني اي شي إلا اني مقدر اكل و خاصة النوتيلا
يعني سرت لم اكل اي شي معدتي ع طول تعورني لا فطور لا غدا لا عشا و لا حتى حلويات ولا عصيرات معد سرت اقدر اكل ولا شي من دا !
والله شي يعني بقهر لاني لم اكل ع طول معدتي تعورني لو اكل بس ملعقه ف انو قاعده اقول ل صحبتي قالت ع كدا ح تختفي ي بنت ! لان انتي نحيفه و اذا دحين م اكلتي ح تنحفي زياده ف ح تختفي !
و ماما تقول روحي للمستشفى وانا من سابع المستحيلات اروح لان لو رحت لازم يسوو تحاليل و إبر و خرابيط وانا من اشوف الإبر عاد تبدأ المناحه بكا و كدا ف انو م ابا لأنو يعور المهم مالي دخل ماني رايحه حتى لو اطر الوضع اني اختفي ف عادي بس اهم شي م اروح !
كمان فيه شي كمل الوضع و حلقي رجع التهب مدريي اش يحس بوه جسمي الأهبل استغفرالله يعني اش مو كل شي مرره وحده !

اخر شي بكرهه م عندي اختبار بس الاتنين عندي اختبار رياضيات و عاد الفصل دا مو راضي يدخل مخي ابدا و الثلوث مسابقة القران و الخميس مسابقة الحديث ف دعواتكم

وبس والله يلا سلااام ...

رد: ☆*✲ﾟ*｡(((يوميات وخواطر مبعثرة )))｡*ﾟ✲*☆

مسافات البعد،ماتشيلك من قلبي أبدا.❤️