حبتين ツ

**نفركويس** · 10-04-2017, 10:34 AM

رد: حبتين ツ

اسعد الله صباحكم
امس كان يوم جميل واليوم اجمل
امس كان فيه لقاء سريع مع الشيخ سعد العتيق وباذن الله تكون داية تعاون
اليوم كان فيه اجتماع مع جمعية خيركم لتحفيظ القران عندي بالمكتب وخرجنا باشياء جميلة
كانت اكبر مشكلة عندي قصر وقت الدورات الرسمية ومنهج الجمعية للقران الطويل
ما يمدي خلال ثلاثة اسابيع اخلي واحد يحفظ جزء عم ( النبا) واليوم في الاجتماع اعتمدنا حفظ نصف جزء
وباذن الله نشتغل عليهم من اليوم حتى عندي محاضرتين تقريبا انتهت من شرح موادها يحاول اخليها للقران
لانه مابقي غير الاسبوع والاسبوع القادم وفرغت واحد من الشباب لتدريس القران ولابد يجيب نتيجة
دعواتكم نتوفق بهذه الفكرة الجديدة وينفع الله بها
كان فيه نقاشات وسواليف على هامش الاجتماع وذكروا قصة واحد معلم بالجمعية اثرت فيني
هذا المعلم شغلته يصحح التلاوة ويسمع للبائعين اللي في مركز الشرق ( سوق معروف بجدة )
تخيلوا يلف عليهم محل محل واللي مو جاهز يرجع له وخرج على يديه مجموعة من المتقنين للقران وبعضهم قطع شوط في حفظ القران
العجيب ان دوامه 3 ساعات فقط لكنه يجلس معاهم 5 ساعات واحيان اكثر ومسوي لهم برنامج عمره لمن يرغب الذهاب وبرنامج صلاة الجمعة في الحرم لمن يرغب
كل هذا ليس من عمله لكنه اجتهاد من عنه وحرص على استمرار الخير صراحة نماذج مشرقة لو يعطوني اثنين زيه وواحد اداري زي حنين العتيبي اتوقع بتكون نقله نوعية
-
اليوم بدانا نرتب برامج رمضان يعني باذن الله على الاثنين القادم يكون جاهز
على ما نعرضه على المدير وتجي الموافقة ويعتمد يكون دخلنا بشهر شعبان
شهر شعبان يكون تجهز للاشياء اللي نحتاجها وباذن الله يوم 1 رمضان نبدا باول البرامج
يوم 1 حيكون يوم سبت اجازة وعشان ما يكون الموضوع فيه تكلف على شخص دون اخر
سويت حركة تدشين البرنامج عشان محد يحس انه انظلم يدوام باجازة واول يوم رمضان وكذا
فباذن الله بنكون كلنا موجودين والمدير المناوب يفتتح البرنامج
دعواتكم
هالسنة جاني عرضين برمضان وكلها حلوه بس رفضتها
الاول اني اروح انتداب المدينة لمدة شهر دوام مسائي فقط
الثاني عرض الذهاب لامريكا اصلي فيهم التراويح وبقية الصلوات وخطب الجمعة
فترة رمضان فقط وكل شي عليهم الاجراءات والرسوم والطيران والسكن واكل ومعها 5000 دولار احتمال تزيد
ابي عروض سنعه زي تزوج وحده واحصل على ثلاث مجانا ( ناس تبي الدنيا ما تبي الاخرة ههههههههههههه
الله يبلغنا رمضان ونصوم تعرفون احنا يالشيبان صيامنا صعب

**نفركويس** · 10-04-2017, 12:07 PM

رد: حبتين ツ

خلصنا من الرياء والسمعة والاستعراض بالاعمال
نجي للهربته وكيذا
اللي يسالون عن السفر وكيف كانت السفرة ( هم ثلاثة بس الي سالوا
شوفوا سفريتي هذي عشان احضر زواج في ديرتنا وبعدها هجينا في ارض الله انا والحب
لذلك من بعد الزواج اللي حضرناه الى رجعنا جدة كلها مشفر
لكن كانت سفرية ولا اروع ودشرة محترمة وصلنا البيت على الساعة 1 بالليل يوم السبت والصبح داومنا زينا زي اي مواطن سعودي
وبس هذي السفرية من طقطق لين سلام عليكم

**نفركويس** · 11-04-2017, 10:51 AM

رد: حبتين ツ

صباح الفل
هاليومين هواش انا وعقلي الليل كله
وفي الاخير نتفق اني خلاص تعبت خل ننام
ثم نختلف مين ينام اول ونعيد ونزيد لين يغلبنا النوم
ودي اصير مثل بعض الناس اللي يجي ع باله يسويه
يبي ينام ينام يبي ياكل ياكل يبي يضحك يضحك
اعرف ناس ينام وهو جالس يسولف معاك ماتدري الا فجاءة ساكت
تطالعفيه تحصله نايم طيب احترم اللي داخل جو مع السالفة
-
بعيدا عن كل اساليب المدربين في كيفية التغلب على المصاعب وكيف تنام وكيف تتخلص من الارهاق
اقول لكم طريقتي الخاصة اذا تعبت او خلصت شغله بعد تعب
ادق سلف السيارة واخذ معاي شخص ارتاح له ( معروف مايحتاج اقول اسمه
وامسك خط جنوب او شمال واشغل شيلات واقلبها رقص وهبال لين يتفرمت راسي ويسوي سفت وير
وارجع شد بلدي زي قبل الشغل والحوسة وارجع البيت وانام
تراها طريقه زينه فرفرة بالسيارة مع شخص طربان تعيد البرمجة
-
انا عاشق ولست طائش
انا فقط متهم بشي من الجنون
ومن ابسط حقوقي ان امارس جنوني مع من احب
لا يهمني ان كانت سمعتي ضبابية
فانا عااااشق يمارس عشقه فقط لا غير
الحب احيان يجعل بين العقل والجنون خيط رفيع جدا لا يميزه الا العشاق
فهمت ياسمك ايه
-

متى فتح البيك عندنا !! مافيه بالرياض فرع للبيك أبدا

طيب لاتدفين
الله العالم انهم استغنوا عنا يوم فتح عندهم او قريب منهم
امس اتصلت على واحد من هل الرياض يقول يجينا لحدنا نطلبه الظهر ويجينا بالليل
ع العموم هو ذا اللي صاير
بس تعالي وين الى الحين ما شفنا شي من التهديدات شكلك مالقيت اللي يثبت السلاح
-
عز حبيبنا تراني صاير زي ايقونات الايفون لابغيت تحذف واحد منهم
تقول لك رجعة للتعليق على بعض المدونات وانا اقول يارب سترك وين بتجيني بالجبهة والا بالخشم
-
جولة سريعه ونعود

**نفركويس** · 12-04-2017, 10:06 AM

رد: حبتين ツ

سايق الخير ساقك يم عاشق جمالك
لو تأخرت ابصبر لو هي ألفين عام

أسفرت و انورت من يوم شعشع هلالك
فز قلبي لفزك يا ياعلي المقام

إنزل القلب و آمر ما به الا حلالك
أشهد إنه حظيظ اللي غدى لك مقام

ما يسد بمكانك غيرك احد بدالك
باني لك قصور و باني لك خيام

**نفركويس** · 13-04-2017, 08:12 AM

رد: حبتين ツ

صباح الخيرات ( من وين يجي الخير وانت مصبح علينا بقنبله
هذي الصورة اللي فوق سببت لي حوسة
طبعا انا حاطها صورة للواتس
واشوف ناس لها فترة ما ترسل وفي ناس خرجت من قربات انا فيها
ياولد وش السالفة اراسل محد يرد وفيه ناس كانت كل فترة ترسل
الحين صار لها الشهر وشوي ما ترسل انا صرت كوذا

لين امس كلمني واحد وشكله قبل ما يكلمني استخار وصلى صلاة مودع
وفتح الموضوع معاي وقال طبعا بعد السلام وكسفك وكذا
وش الصورة ذي قلت عادي صورة معبرة مره وعجبتني
قال انت مقتنع فيها
قلت اذا الداخلية مومنة فيها اكيد انا مومن بها ومقتنع
قال وش دخل الداخلية وشكله رجع ورى شوي وحط ثوبه باسنانة يبي يشرد
قلت انت عارف وش مكتوب وايش معنى الصورة
قال هذي قنبلة وش تعني غير التفجير
قلت ممكن تحفظ الصورة وتكبرها وتشوف وش مكتوب زين وانتظر ردك
شوي قال بس ياخي مو طريقة هذي
قلت اذا عندك شي روح اعترض على مصمم وزارة الداخلية مدري الامن العام
هم اللي صمموها هذا اولا ثانيا فعلا المواقع الالكترونية اصبحت قنابل اخطر من القنابل العادية
والصورة معبرة جدا جدا جدا
وباختصار سالفة التصميم انه من ضمن عدت بنرات صممت بمناسبة حملة هذه سبيلي
وهي حملة امنية تهتم بالامن الفكري للعاملين في الداخلية لتحصين افكارهم ضد الافكار الضالة
المهم خوينا رجع لبعض اللي يعرفهم وفهمهم السالفة لاني رفضت ابرر اي شي لانهم هم المتسرعين
والحمد لله راحت عني تهمة الارهاب وطلعت ماني داعشي
طبعا كل هالمشكلة بسبب المصممة حقتي الله يصلحها سحبت علي معاد ترد ع جوالها
فغصبن عني طبعتها زي ماهي بدون تعديلات تناسب ادارتنا
تصدقون احس حبيبنا ابو العز من اللي انخلعوا من الصورة
له فترة مايرسل واتس وهنا اللايك مو على خبرك الاول

**نفركويس** · 13-04-2017, 08:35 AM

رد: حبتين ツ

نهربت حبتين
--

“أهل تظن الهوى يبقيك ذا بأس
الحب ضعف ونبض الحب فتاك
لا تحسبن دروب الوجد مزهرة
فإن تذق شهده تدميك أشواك”
هذا صاحبه ماعاش الحب

ذلك الحب الذي يعصف في أعماقك ويبرق في عيناك ويرعد في أفكارك
وتعيش معه حرارة تموز وبرد نوفمبر يستحق كل نبضة قلب
ومهما مر عليه الزمن سيكون هو اجمل ما عشت

هذا صاحبه عاش حب

(( قل هل يستوي الذين يعلمون والذين لا يعلمون ))

**نفركويس** · 17-04-2017, 08:34 AM

رد: حبتين ツ

دور عثمانك

https://v.3bir.net/367542/

**نفركويس** · 18-04-2017, 12:12 PM

رد: حبتين ツ

صباح الخيرات والمسرات
من كم يوم انتظر تعليقات على كلام تنهيدة اللي اصلا هو تعليق على كلام ملكة بشموخي
اللي اصلا بنفس اليوم كتبت تدوينه عن نفس السالفة بس شفته مو مرتب قمت حفظته
المهم ننتظر المشاركات عشان اسدح تعليقي
دام سعادة فضيلة معالي المراقبة تنهيدة فتحت سالفة التعدد وكذا
اول شي مو شرط يميل القلب يميل حتى يتزوج الثانييرة ولا هو يشرط يكون عن نقص في الاولى
ثانيا دائما نذكر الغيرة ونبرر لها وهذي شي جيد لكن ليش ما نذكر الجانب الاخر من الحياة الزوجية للنبي صلى الله عليه وسلم
كان احيان اذا خطب وحده اللي يتولى تزينها وتجهيزها له هي واحدة من زوجاته
وكان اذا جاء عند احداهن تساله عن زوجته الجديدة وكيفها وعساك تهنيت او فيما معناه
فلا ننكر وجود الغيرة واحيان المكيدة ( ان شاء الله اجد قصة مكيدة بعض زوجات النبي حتى يطلق زوجتهالجديدة )
كما اننا لاننكر حسن التعامل والتودد للزوجات الثانيات بدون هظم حقوق
لابد ان الوحده تعرف قيمتها عند زوجها وتحافظ على هذه القيمة ولا تحاول تنزل من قدرها ببعض التصرفات
ولابد كل وحده تعرف مكانتها عند زوجها وترضى بهذا الشي ولا تسعى في تخريب علاقة او السعي التنزيل من قدر احد
يعني مثلا كان النبي صلى الله عليه وسلم يحب عائشه وتزوج عليها 8 وكلهم كانوا يعرفون انه يحبها اكثر منهم
حتى ان بعض زوجاته اذا شافوا انه زعلان منهم او شي كذا راحوا لعائشة وقالوا اصلحي بينا وخذي يومي الجاي لك
لانهم يعرفون مكانتها عنده وماسعوا ان ينزلون من قدرها لان ذا شي ماهو بيدها ولا بيد النبي صلى الله عليه وسلم
-
دام وصلنا للكلام عن المكانة وكذا خل اتكلم عن موضوع قريب منه
اللي هو لابد الزوجة تعرف طريقة زوجها في التعبير عن حبه وتقبل بهذا الشي وتحاول تعدل حبه حبه اذا ماجازت لها الطريقة
يعني كثير من الازواج تعبيرهم عن الحب مو بالكلام والرومنسيات لا تعبيره عن الحب بالاهتمام والخوف عليها والحرص ماينقصها شي
يكون قريب منها وقت الازمات لكن يمكن عمره ماقال احبك والا ياحياتي وكمان الزوجة احيان يكون تعبيرها عن الحب بالاهتمام
يعني تجي اكلك جاهز وافضل اكله هدوء بالبيت عشان تنام وترتاح ما تشغلك بكثرة روحاتها وجيتها لكنها تستحي تقول احبك وكذا
هذا حب وحب قوي كمان بس ينقصه التعبير بالكلام فلابد اننا نعرف طريقة الحب ونقدرها ونحفظ حق هالحبيب ونحاول نعبر نحن بطريقتنا
وما نطالب الشخص المقابل باكبر مما يستطيع ولا نقول زوجي ماهو رومنسي ولا تقول زوجتي ماهي مثل هالحريم لا تلبس ولا تتزين
ياخي اللي خلاها ما تلبس ولا تتزين هو حبك انشغلت باللي تعتقده هي الصح في التعبير عن حبها
انشغلت باكلك وراحتك وعيالك لكن ممكن مع الزمن تتعدل الطريقة لا تستجعلين ولا تستعجل

بقي نقطه نخليها لبكره اذا الله احيانا وهي مهمة ويمكن اكثر شي منتشر
وكان ماشي غيرها

**نفركويس** · 19-04-2017, 07:58 AM

رد: حبتين ツ

السلام عليكم
اسعد الله صباحكم
بصراحة مصدووم بقوة
شكل الي صدم طيف رجع ورى وصدمني
لا جد مصدوم من الردود اللي في موضوع دور عثمانك
تصدقون ان ذا الموضوع بالذات قررت اني ارد على المشاركات وكذا
لان جتني مصارحة تقول ماترد على اللي يشاركون بمواضيعك
بس يوم شفت الردود الصادمة بصراحة ما عرفت وش ارد وش اقول
ليش هذي النظرة التشاؤمية عن الاصدقاء ليش ليش ليش
دقايق بصلح الصدمة وارجع لكم

**نفركويس** · 19-04-2017, 10:44 AM

رد: حبتين ツ

[ العذر ] يقبل فى كل شئ …
إلا إذا تحركت النقطه إلى اليمين قليلا
حينها لا مجال للاعذار .!!

حبتين ツ

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget