حبتين ツ

**نفركويس** · 26-10-2010, 01:53 PM

رد: شخابيط نفر

فيه اعضاء صراحه ودك تشوفهم كل يوم ولهم مكانه خاصه جدا جدا جدا
لكن مثل ما قالو اولاد الحرام ماخلو لاولاد الحلال شي
يعني بصراحه اعتذر منهم لاني ما اقدر اعطيهم ايميلي ولا جوالي
يكفي الي صار لي من ناس كنت اعتبرهم اخوة واخوات
واتضح العكس
يكفينا نتقابل هنا وعالخاص
ومحد عارف وش يصير بكره يمكن نتقابل مو بس جوال ومسن
ارجو تقدير وضعي واخذ الموضوع بدون حساسيه

**نفركويس** · 26-10-2010, 01:57 PM

رد: شخابيط نفر

الدنيا حلوه ..

بس لما تحطون كلمة حلوه براسكم راح تفهمون هالشعور ..
وربي بتصير شي شي وهي ولا شي ..

عيشوها بالرجه والفله والاستهبال ..وراح تنبسطون ..

جربو ماراح تخسرون شي ..^_*
والي بيخسر انا بعوضه <<افلقني ^_^ههههههه

صاير حكيم ياولد ماشاء الله عليك
حاولت اقييمك بس ماجاء معايه
يقول قييم الاعضاء كلهم الا كحيلان لا
ليه طيب
قال تو مسوي مدونه ودخل قلوب الكل
قلت وي وي وي وش ذا يستاهل كح كح
قلت قهر دامك ما تبي تقييم
بنزل اقتباس بالمدونه

ترا جد مارضا يقيم يقول قيمت اكثر خلال 24 ساعه

لك تقييم عندي بس استلم الراتب وارده لك هع هع

**نفركويس** · 28-10-2010, 12:15 PM

رد: شخابيط نفر

خوش امديد يالربع

منورين

**نفركويس** · 28-10-2010, 01:03 PM

بقر راكبين همر

بقر راكبين همر
منظر صراحه مقزز
قبل كم يوم رحت اجيب المدارس
وفيه 3 بنات راكبين لوميزين وداخلين عالشارع الي فيه المدرسه
طبعا طالبات ومن لبسهم من المرحله الثانويه
وصح نه مالهم حق يكشفون ويتدلعون ويسون حركات
بس نقدر نمشيها بحكم ما يتعرضون له من اغراءات
لكن المقزز والمقرف
انه في 2 راكبين همر يعني لو هم صغار اعطيهم 35 سنه مع اني اضنهم اكبر
كانو يطاردون الليموزين ويحاولون اناياخذو ارقام البنات وفعلا حصل ما رادو
وكانو يسجلون الارقام بشغف والفرحه تعلو وجيههم انهم استطاعو ان يحصلو على ارقام البنات
يارجل هذي بسن بنتك يعني حتى لو هي بقره ما تفهم ولا تفرق بين كبير وصغير
انت بعد تسير بقره مثلها

الله يخارجنا من هالبقر

**نفركويس** · 28-10-2010, 10:03 PM

رد: شخابيط نفر

عجوز متهمينها بجريمة قتل

قالت : أنا بريئة والله صدقوني

قال القاضي : بس كل الأوصاف منطبقة عليك (بنت جميلة ورشيقة وجذابة)

إستحت العجوز وقالت : بس ماكان قصدي أقتله

**نفركويس** · 30-10-2010, 10:23 PM

رد: شخابيط نفر

السلام عليكم
نفر بن كويس يحيكم
مراسلكم في مزدلفه

الحين مافيه حجاج ( احلف
زحمت عسكر عالفاضي

وابشركم اسلم واحد من الصينيين الي يشتغلون بمشروع القطار

ياربي ل تشوفونه وهو ينطق الشهاده شي جووووونان
حتى اخوياه الي مو مسلمين فرحوا ويصفقون له

ويجيهم الدور ان شاء الله
بس عاد كثروا لنا الدعاء

**نفركويس** · 13-11-2010, 03:04 AM

رد: شخابيط نفر

عيدي مبارك فيك يا عيد الأيام
وحلوه سنيني فيك يا عيد روحي
***
سعادتي في شوفتك حلم الأحلام
وشعري وأحاسيس المحبة وبوحي

**نفركويس** · 22-11-2010, 03:36 PM

رد: شخابيط نفر

كيفكم يالربع عساكم بخير
وكل سنه وانتم طيبين بعد الزحمة
اليوم اول دخول لي بعد رجعتي من مزدلفه
اول شي احب اعتذر من الاخوة والاخوات اللي راسلوني خلال هاليومين
لاني والله كنت مسجل دخول وانا مقفل الجهاز ونزلت جده ( فهمتو السالفه والا اعيد شرحها لاني انا ما فهمت خخخ
المهم
بعد ما اعطيت لنفسي اجازه يومين من النت
اليوم رجعت لمشاركه والتفاعل باذن الله تعالي
واحب اشكر الاخت نواره على تفهمها لضروفي وغض الطرف عني اى ان انتهاء وقت الحج
واشكر الجميع على السؤال واطنهم اني بخير وعافيه وما فيني غير الدجه وصاير دب من العافيه
ونشوفكم على خير قولو وانت من اهله ههع

**نفركويس** · 27-11-2010, 09:36 AM

رد: شخابيط نفر

صباح الخير
اصعب ما في الدنيا انك تمشي بين ناس وهم ينظرون لك بنظرة الشك والريبه
صراحه كان وضع صعب جدا جدا مريت فيه
كنت بالحج هالسنه
المهم ومره من المرات اخذت معاي اشياء ونزلتها لجده
عادي كل سنه اخذه زيها
لكن هالمره اضن دخل الشيطان بيني وبين واحد شغال معاي بنفس الشغله
واستغل فترة نزولي لجده وكان وقتها فيه جهاز حكومي مفقود
قام الاخ الله يسامحه وراح قال لهم انا شفت احمد اخذ الجهاز معاه
وحطه مع الكراتين الي نزلها لجده
طبعا المدير والي حوله ما صدقو لكن دخلهم الشك
وانتشر الخبر في المقر الي شغالين فيه
ومنهم الي مصدق ومنهم الي مكذب ومنهم الي مو داري عن الطبخه
جلست يومين ماني عارف وش السالفه
بس حاسس فيه شي مو طبيعي
النظرات متغيره والتعامل لك عليه والشغله كلها مو على بعضها
الين جاء يوم واتصل عليه مديري المباشر وقال
احمد وش الاشياء الي اخذتها
قلت اي اشياء ( راح عن بالي انه يسال عن الي اخذتها قبل 3 ايام
قال الي نزلتها جده
قلت ابد اخذت ( وقلت له غالب الاشياء
قال متاكد ما فيها شي غير كذا قلت ابد
وجاء على بالي اني اخذت من الاشياء الخاصه
قال متاكد ما حصلت شي غريب او شي طايح كذا والا كذا
قلت ابد
قال خلاص شكرا
قمت انا اخذت الفواتير الي عندي ورحت عالمستودع واتصلت على المدير وقلت له انا بالمستودع ابيك ضروري
ما قصر جاء
قلت شوف هذي الاشياء الي اشتريناها وهذي الفواتير
لا يروح بالكم اني اخذت منها شي
قال ياحمد الموضوع اكبر
فيه جهاز رسمي مفقود واحد شافه معاك في السياره
انصدمت صراحه جاء الخبر عليه زي الصاعقه
قلت وانت وش رايك
قال مدري
قلت وش يعني مدري
قال فيه واحد شافه معاك
قلت اجل كم قيمت الجهاز انا بعطيكم قيمته
لكن الي من جد مفقود هو السنين الي راحت وانا شغال معاكم باخلاص
حريص على اشيائكم اكثر من نفسي
قال لا تاخذ الموضوع بحسايه زايده
قلت انا لي كم يوم احس انه فيه شي مو طبيعي الحين
الكل شاكك فيني ويمكن خلاص صار الموضوع رسمي انا سارق الجهاز
قال احنا واثقين فيك
ماشاء الله عالثقه
عالعموم تونا باول العمل هذي اشايئكم كامله زي ماهي
والي راح مسجل بالدفتر الي على المكتب
وخرجت لغرفتي وجلست افكر
مين ممكن يقول عني كذا ومن المستفيد
وسبحان الله كل التفاكير تقودني الى شخص واحد وانا
احاول ابعد عنه التهمه
جاء صاحبي الي معاي بالغرفه
واعطيه دش على كيف كيفك
قال والله ياحمد اني لو اشوفك بعيني تاخذ شي اني اكذب عيوني واصدقك
بس هم قالولي لا تعلم عشان مصلحة احمد
طيب علمني بالي تعرفه
وسدح لي عشرين قصه
كل قصه مختلفه عن الثانيه
بس كلها في الاخير اني اخذت الجهاز
قلت طيب من مصدر هالقصص
قال فلان وفلان وفلان
قلت خلاص انا بتصرف
بس انت خلك زي مانت كانك ما قلت لي شي
ورحت لمديري وقلت له
انا الحين ابي تنصفني من 3 اشخاص موجودين معنا
يانا غلطان ويبشرون بالي يبون
ياهم الغلطانيين فتاخذ لي حقي منهم
قال خلاص نشوف الموضوع
قلت لا ابي الموضوع رسمي وتحقيق
قال ماله داعي نحاول نحل الموضوع ودي
قلت ابد اذا انت ما تبي بروح للمدير العام
خلاص عطني بس فرصه لبكره الصبح
جينا من بكره
والا كلنا الثلاثه مطلوبين للتحقيق
وبعد التحقيق صفيت على انا وواحد معاي بنفس الشغله
ولا زال مصر انه شافني وانا اشيل الجهاز واحطه بسيارتي
وانا انكر بس هو موقفه اقوى لانه يقول انه متاكد انه شافه
قال لي المدير خلاص ارتحت الحين وصار الي تبيه
خلاص احنا مسامحينك ولا نبي منك شي
وارجع لشغلك وانا باتصرف في موضوع الجهاز
قلت لا والله
شغلتي الاوله ماني راجع لها
وخليني باي شغله ثانيه
كل هذا صار بيوم واحد
بالليل جاء واحد يقول لي المدير العام يبيك
رحت غيرت ملابسي ورحت له
لقيت عنده مديري وصاحبنا الي يقول اني اخذت الجهاز
و2 من الشباب
قال لي المدير العام تعال استريح
قلت امر
قال وش فيك زعلان علينا وما تبي الشغل
عاد ما صدقت خبر وانفجرت بالكلام
ليه اربع سنوات معاكم وتحت يدي مبالغ كبيره
واجهزه ما عمري فكرت حتى اطالع فيها خل باقي اخذها
واضف الى هذا اني تعبان من ذي الشغله اصلن ولا ابيها
بس انتو الي مصرين اني امسكها واشارك معاكم في الحج
واخرتها تطلعوني حرامي
يعني خلصت الاماكن وما اسرق الا بالحرم وفي العشر الاولى من الحج
وانهديت كلام ما خليت شي ماقلته
قال طيب تعطينا فرصه بس بكلمتين
قلت تفضل
قال الجهاز وحصلناه
والموضوع كله مجرد غيره وحسد
وهذا زميلك يبي يقول لك شي
قام زميلي يعتذر ويتاسف
قلت وش الي حدك على كذا
قال والله مدري بس قلت ليش انت بيدك كل شي وانا لا
قلت افرح الحين كل شي بيدك
انتهى الموضوع بالنسبه لهم بس بالنسبه لي مانتهى
اصريت اني ما ارجع للحسابات والمستودع
وان شاء الله السنه الجايه ماني رايح معاهم لو ايش
ورغم انا كنا بالعشر الاولى حاولت اني اسامح
ما اقدرت
كل ما دعيت احاول ادعوا لهالادمي احس ماني قادر
عدت ايام الحج والحمد لله
لكنها اسوء ايام مرت عليه في حياتي
بس احسن ما فيها
اني جلست مع الله اكثر من اي وقت
وهذا احنا يالبشر نقترب اكثر من الله وقت الحزن والمصايب
الي يومك هذا لا زلت اشعر بشعور اول يوم عرفت فيه الخبر
موقف صعب جدا جدا جدا

**نفركويس** · 28-11-2010, 10:10 PM

رد: شخابيط نفر

تعال نجنن العالم بقصة عشق مجنونه ..
مامرت ولا بالحلم على قلبين عشقانه..
تعال ندرس العشاق معنى الحب وفنونه ..
ودنيا عشق مافيها ولا أي لحظة خيانه ..
وكيف الفرحه والضحكات وكلام مايعرفونه ..
وطير الحب ياخذنا لدنيا غير بجناحه ..
وعن عاشق اذا اشتاق يضيع وينخطف لونه ..
وكن عيونه من شوقه تصرخ موت ولهانه ..
يدري بي أحبه موت وتلخبطني عيونه ..
يحبني وانا أحبه بكل عيوبه وجنانه ..
دليل العاشق احساسه أبد ماتخونه ظنونه ..
وعلى ما قالت الامثال كتاب وبان عنوانه ..

حبتين ツ

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget