للأوجاع قلوب .. لا تسيرها - عاطفه !



البارت الرابع




أمور أفتقدها :

- يد صديقتي اليسرى .
- ضحكتها التي لابد لها بكل نيسان بأن تذهب لنزهة قصيرة .
- أقلامنا المتشابهة .
- قصص الحب التي رويناها تحت الدرج وفوق الكتاب , خلف أذن المعلمة .
- البرد الذي يسكن مقلتنا فترة الاختبارات .
- صوتها الدافىء .. لطالما ترك الحزن خلفي !










تعلمين .. أن الحنين لك يستيقظ في كل ليله .. يبدو نحيلا ولكنه بدين بالأشواق التي تضج
رأسه .. أراك تتدلين من رأس الكتاب في كل مساء يعج بذكراك ويتخبط بي ويثير كل الذكريات
المعلقة بالبارحة .. لن أعاتبك فالعمر قصير وأنا سأعد الأيام الصافية التي قضيناها سويا
أنا وأنتي ك زهرة الفل التي تسكن أيادينا ..


أريد الوجه الذي كان معك خاليا من تجاعيد الزمان .. أريد لك بأن تعلميني كيف
لي أن أضحك بفم مكسور .؟
في جيبي كلامنا الممضوغ سابقا .. وأذكر تماما الدعاء الكبير الذي منحته لصدري
ذات عشية عقيمة من الفرح .. قلت سابقا : " اللهم أودعني حزنها العظيم الذي
يتمطى ويجوب مساحات صدرها .. اللهم اقطف لها من السماء أماني محققة " ..


صدقا .. لطالما وددت أن أطير معك على متن جناح واحد لا يحوي سوانا ..
وصوتك الذي لطالما وجدت به نوعا فريدا من البحة .. أنتي القصيدة يا شقيقة
الروح التي رسمتها عن ظهر قلب ..




سبابتي لن تنسى الطريق الطويل " أنفك " الذي تسلكه حين تطرق عليك
بالعتب .. أحن لأحاديث المساء التي تقودنا للسير على مساحات الحب
القابعة بين صدرونا ..









لو تعلمين ماذا أفتقد بك بعد .. يا جميلة
أفتقد يدك اليسرى التي تزيل عن عيني مرارة البكاء .




ذات لحظة حنين طرقت قلبي



ღ.
ღ.
ღ.




اليوم الثاني على العصيريه ..




خرجت وهي أخلاقها صفر .. كل ماتدق عليها ماترد .. دخلت السيارة مع أخوها احمد ..
هنوف: أحمد رجعني ..
أحمد: هنوفه الحين خايفة من الابر ..
هنوف: اي تعووور .. حمود تكفى رجعني ..
أحمد: هنووووووووووووف ..
هنوف: اوووووووووووف .. يعني لازم تحرجني ..
قهقه من قلب: أثرك منحرجه من عريس الغفلة ..
ضربته على كتفه: سخيف ..



وصلت للمستشفى .. وأنا مابي انزل بس متأكدة من كلام حنين اللي للحين يرن بإذني ادق ولا ترد: اووووووووف ياحنين هذا وقتك .. دخلت للمستشفى ..
وبعد ماكتب هو الباينات .. جاني اخوي أحمد .. استحيت وقلت له: حمود خطي مو صاحي ..
أحمد: يالليل .. زين دخلي يالله عاد ..
تمسكت ب أحمد: احمد ان ت قلت له عن مرضي ..
أحمد بحنان: ايوه قلت له يا أخوك دخلي الله يرضى عليك ..
دخلت وشفت النيرس تبتسم لي .. ابتسمت لها بتوتر قلت لها بخوف: لا تعوريني طيب ..
هزت راسها علامه الموافقة .. رفعت عباتي وبلوزتي وغمضت عيوني بقووووة ..
النيرس: كلاس ..
فتحت عيوني ببطئ: ها ..
ابتسمت لي: خلاص مدام ..
صرت ارمش ببلاهة .. المهمة خلصت وأنا اعد على اصباعي: بدون ما اصرخ وإلا ابكي ولا أهاوش رفعت يدي بحماس: يس ..
انتبهت على نفسها وهي تتأوه .. نزلت يدي وسنعت نفسي وخرجت لأخوي ..
أحمد: ها خلصتي ..
هزيت براسي ..
أحمد: خذي اشربي ..
تماسكت به: اه ..
أحمد: هنووووف ..
تقرب منه بدر: عسى ما شر ..
أحمد: ما شر إن شاء الله .. أخذ أخته وجلسها على الكرسي: هنوف اخذتي دواك ..
وهي تهز ب راسها بتعب ..
أحمد: متأكدة ..
هنوف: أحمد أنا بخير الحين ..
أحمد: زين قومي الحين ..
قامت هنوف ولا قدرت تتوازن مسكها أحمد وهو يعاتبها: عاجبك حالك ذا الحين .. أمشي قدامي ..


دخلها على دكتورها الخاص ..
دكتور: أخ أحمد المريضه لازم تسمتر ب دواها ولا تقطع عنه ..
أحمد: إن شاء الله دكتور ..
وخرج هو وأخته من المستشفى ..


أحمد: هنوف .. إلا صحتك لا تتهاونين فيها .. فاهمة علي ..
هنوف هزت راسها وهي تبكي: إن شاء الله ..
سكت عنها .. عشان تفهم اللي سوته غلط وأكبر غلط بعد ..



ღ.
ღ.
ღ.



وبعد ذلك اللقاء باسبوعين تغيرت نفسيتي واحوالي وصار موضوع هذا المكتب والاشقر لايغادرني لافي صحوتي ولا منامي حتى اني في احدى الليالي صحوت من منامي الساعه الواحده او الثانيه ليلا وأخذت اخي عبدالعزيز وذهبنا للمكتب ووجدت امامي المدير الفذ حسان الاشقر ولم يعد نصابا كما كان في اول لقاء بل بدى رجل عظيم ذو هيبه وشخص سعودي يدعى ظافر الغامدي وادعى انه مالك المكتب ووجدتهما وكأنهما ينتظرانني حيث المكتب لم يكن فيه سوى الموظفين
وبدأت اتخاطب معهم وابلغتهم اني ارغب الاستثمار مع المكتب فقال الاشقر: جيت يا سلطان برجليك وهاك اليوم رافع خشمك انت بالذات لن اسمح بمشاركتك وانا حسان الاشقر اسأل عني في سويسرا يخبروك عني ..


فبدأت ارتجف واتصبب عرقا وطرى علي حالة من الخوف لم اعرف لها مثيل في حياتي كلها ثم رجوت الاستاذ حسان الاشقر ان يسامحني ويعفو عني وكان لي ذلك بعد موافقته الكريمه فاعطاني صور العقد وامرني بالتوقيع دون قراءة العقد وبعد ان وقعت العقد رفض تسليمي الا بعد تحويل المبلغ فوافقت ونفذت الاوامر بدون تردد وخرجت من المكتب وداخلي احساس ان هذا الاشقر نصاب ودجال ولن اسلمه مالي .. وبعد المغادره
اخذ اخي عبدالعزيز يلومني ويقول: انت مجنون هذا شكله نصاب ..
فثرت عليه غاضبا مبوخا اياه بانك لاتفهم ولاتتدخل في امور لا تخصك مع انه في داخلي يقين جازم بانه محق ..



ღ.
ღ.
ღ.



الحنين ذابحه من بعد ما أثرت عليه الحمى .. أحن لأمه وعاتب نفسه: كيف يروووح ويخلي أمه وخطيبته اه يافجر وش حالكم الحين أنا جيت يايمه جيت يافجر ..
دخل هو وخالد والحنين وشوق ذابحهم وهم أول ماوضعوا خطواتهم بأرض المطار انحنوا سجود الشكر للباري .. والحمد والاستغفار ما غابت عن ثغرهم ..
وصل التاكسي ووقف بالحارة عطاه قيمة مشواره وخرج من السيارة .. ودع خالد ووصل لبيته وقف البيت نفس ماهو والحارة أول ما دخلها نفس ماهي بعد متغير شيء الوحيد اللي تغير وجوده هنا بعد مرور السنين الطويلة .. فتح الباب وشافها وقلبه يخفق ويذكر الله على جمالها .. متغطيه بجلال الصلاة ..


حست بخطوات: صدق الله العظيم .. وباست المصحف رفعت نظرها وشافته وسكتت .. تذكرت نفسها وغطت عمرها ودخلت داخل ..
أم عساف: شبلاك يمي ..
فجر وعيونها تلمع وخدودها توردت: خ التي .. عس اف ..
عساف: يمه .. ي أم عساف ..
ماقدرت تستند بطولها مسكتها فجر: خالتي أنتي بخير ..
دخل هو وجري وهو يحضنها ويبوس رجلها وراسها ويدينها ودموعه تحكي عن المعاناة اللي عاشها: يمه سامحني .. ساحمني يمه ..
أم عساف بعتب: اساحمك على وشو .. من رحت ولا طمنتني عليك وحتى ماخذت شوري وتزوجت من هالكفارات ..
عساف: والله يمه خفت اطيح بالحرام والله يمه .. والله ماتزوجتها رغبه فيني لا تفكرين ولا قدرت اجي ببسب صعوبة الخروج وأنا لسة ما خلصت دراستي .. تكفين يمه سامحني وهو يبوس راسها مالي غيرك يمه أرجاك ..
أم عساف بكت بقهر الأيام اللي غاب عنها بكت جور وقهر وظلم وهي تحمي بنت أخيتها من الفقر والظلم اللي تتجرعه .. حضنها عساف: يمه رد علي سامحني يمه ..
أم عساف: مسامحتك يمه ..



اه يا منظرهم بكاني ضميت نفسي: يمه وينك عني .. اه يارب صبرني يارب ..
دخلت الحمام وغسلت وجهي وابتسمت: عساف رجع عساف ماتزوج إلا عشان يصون نفسه ولا يطيح بالحرام ابتسمت وقلبها يررف ويهلي به ..


أم عساف: علومك يمي وغلي عليك وش له تنحف ..
عساف بحب: من شوقي لكم .. يمه وش حال فجر ..
أم عساف: ايه يايمه حالها ما يعلمها إلا الله ..


اندق الباب

أم عساف: عساه خير إن شاء الله ..
عساف: أنا بروح اشوف ارتاحي انتي .. قمت وفتحت الباب ..
صقر: هذا بيت أبو عساف ..
عساف: اي وصلت خير .. حياك تفضل
دخل صقر وهو متقرف وجلس بالمجلس ..
عساف: يمه سوي قهوة في رجال ..
أم عساف: إن شاء الله يمه .. يمي يا فجر ..
فجر: ابشري يا خالتي .. دخلت المطبخ وجهزت دلة القهوة والبن والهيل ..


عساف: سم ..
صقر: سم الله عدوك ..
بعد ما رشف من القهوة: أنت عساف ..
عساف: ايه .. امر أخوي ..
صقر ابتسم له: ما يأمر عليك عدو .. أنا عم فجر ..
عساف تلاشت ابتسامه: أي خدمة ..
صقر: ابي اشوف فجر ..
عساف: وش يضمني أنك عمها ..
أخذ بوكه وطلع بطاقته الهويه: هذا أنا وذا أكبر دليل ..
عساف يرد له البطاقة: والمطلوب ..
صقر: مثل ما قلت لك ابي اشوفها ..
عساف: طيب دقيقة بس ..

خرج عساف وهو ينادي أمه: يمه ..
أم عساف: علامك يمي ..؟
عساف: هذا عمك يا فجر ..
فجر بفرح: عمي ..
عساف بغيظ: ايه عمك .. على اخر عمره جاي يشوفك ..
أم عساف: عساف ..
عساف: انجزي يبي يشوفك ..
فجر: إن شاء الله خالتي اروح ..
وافقت لها وهي تناظرها بحنان ..

ابتسمت ودخلت مع عساف ..
قام صقر: أنتي فجر ..
فجر: ايه ..
صقر: عساف ممكن تتركنا بروحنا ..
عساف بعد والقهر شاعل قلبه ..

صقر: أخبارك يافجر ..
فجر: بخير ..
صقر: أكيد مستغربة جيتي ..
هزأت راسها بعفويه ..
ابتسم بألم: جيت عشان أخذك لأبوك ..
قامت بإنفعال وعصبية: عشان كذا وأنا اقول عمي غريبة جاي أثره مو لله ..
صقر: أبوك مريض يا فجر ويبي يشوفك قبل ما يسافر ..
نست غضبها شوي: مريض ..
صقر: ايه مريض معه الخبيث وهو محتاج يشوفك ..
فجر: ب س ..
صقر: أدري أنك مو مصدقه .. بس لازم تروحين معي والحين لأنه بعد بكره أبوك مسافر لل علاج ..
هزت راسها ..
صقر وهو يمسح شعرها بحنان: الله يمكلك بعقلك .. يالله أنا انتظرك بسيارتي ..


عساف: مالها م راح يايمه ..
أم عساف: عساف يايمه أبوها تعبان خله تشوفه .. هي ما بتظل عندهم
عساف: حتى ولو يايمه أنا ما ارضاها على فجر .. روحي معها يمه ..
أم عساف: الله يهديك يا عساف يمي هذا ابوها ومن حقه تشوفه ..
عساف: انتي معها يايمه .. وأنا وصلكم اوقف تاكسي ونروح ..
فجر: ما عليه يا خالتي خليه براحته ..
عساف: ليه مجنون اخليك بروحك ..
فجر: تراني مع عمي أنا مو واحد غريب ..
عساف: وش قصدك ..
مسكت فمها وبعدت ودخلت أخذت عباتها وخرجت ..
عساف: لحظة من هو الغريب ..
نزل بهالوقت صقر: عسى ماشر ..
عساف: بنتنا ماتروح مع ناس غربيه ..
صقر: وانت شكو أنت ولد خالتها لا رحت ولا جيت .. لكن أنا عمها .. امشي يافجر ..
عساف بعناد طفولي: ما راح تروح معك .. افهم الكلام ..
صقر: والمطلوب ..
عساف: أنا وصلها بنفسي .. دخلي داخل ..
دخلت فجر .. وعساف خرج يوقف له سيارة أجرة ..




ღ.
ღ.
ღ.




ترف: والله ما قدرت ياخوي ..
مناف: انتي وش تقولين .. هنوف راحت لغيري خلاص ماعاد هي لي ..
ترف: الله يعوضك يا اخوي ..
مناف بجنون: عوووووووووض شنووو وأنتوا قتلتوا كل شيء فيني .. دخل غرفة أمه: يمه ..
وهي تفسخ ذهبها: نعم ..
مناف: يمه أنا وش قلت لك .. ما قلت هنوف لي ولا احد يأخذها غيري ..
أم مناف ببرود سطحي: طيب هي اللحين ماهي ب لك هي لغيرك .. وبعدين غلا وش زودها عن الهنوف ..
مناف: زودها اني احبها يمه ..
أم مناف: وغلا بتحبها بعد الزواج ..
مناف: يمه اننتي بتهبليني ..
أم مناف: مناف غلا هي بنت خالتك وهي اولى من الغريب ..
مناف: الحين هنوف بنت عمي صارت غريبة ..
أم مناف: ايه غريبتين بعد .. روح ارتاح ترى توك جاي من السفر ..
مناف: وليت ماجيت .. وصفق الباب وخرج ..

ترف: زين يايمه هذا هو خرج ..
أم مناف: ب يزعل ويرضى ..
ترف: لا حول ولا قوة إلا بالله ..




ღ.
ღ.
ღ.




بعد ما قعدت عند زوجها ماقدرت تظل أكثر من كذا ودخلت غرفتها وفكت شعرها بعصبية ورمت ثوبها بإهمال ودخلت دورة المياه وفتحت الدوش وجلست تحته وهي تضم نفسها .. تذكرت يوم تطابق تحليل وخدعة حنين لها .. اه مابي ليش ليش ياربي اهئ ..

دقت الباب صباح: هنوفه حبيبتي فتحي الباب ..
هنوف: مابي .. اه ..
صباح: عشاني ..
فتحت الباب ورمت نفسها بحضن أختها وهي مبلوله ..
صباح: الله يهديك بس غير تأخذين برد الحين ..
هنوف: خليني .. اه يا صباح احبه والله احبه ..
صباح: هنووووف مايجوز انتي على ذمة الرجال ..
هنوف: البلا اني مغصبوبة عليه .. اخوك وابوك ما قصروا فيني ..
صباح: لا تنسين مناف لا تقدم ولا غيره حتى يوم أنك انخطبتي لا تحرك ولا شيء وفوق كذا شفتي أمه اليوم جايه تبارك لك وهديتها قدامك ..
رمتها بقهر: بس أنا ابيه مابي خايفة صباح والله خايفة ..
صباح وهي تقرأ عليها المعوذات .. وشوي سمعت أنفاسها المنتظمة عرفت أن أختها نامت سدحتها على سريرها ولحفتها وباستها بحنان: الله يهديك يا هنوف ويوفقك يارب ..

خرجت من عند أختها قابلت أخوها أحمد ..
أحمد: اخبارها الحين ..
صباح: نامت انا رايحه .. تأمرني على شيء ..
أحمد: سلامتك ..



ღ.
ღ.
ღ.




وفي اليوم التالي توجهت للبنك الراجحي وبعت اسهمي في السوق بسعر السوق مم سبب لي خساره ثمانمائة الف ريال وحولت المبلغ الذي قدره اربعه مليون وخمسمائة الف ريال الى البنك الاهلي ومن البنك الاهلي الى البنك السويسري حسب اوامر المدير حسان الاشقر وظافر الغامدي واتجهت فورا الى المكتب لأخبر حسان الاشقر الذي وجدته في سيارته امام المكتب وعند دخولي المكتب ناداني تعال يانقيب سلطان باسلوب ساخر حولت الفلوس فقلت نعم وسلمته صورة الحواله الدوليه ثم ابتسم وقال: انتظرني عشر دقايق وراجع لك .. وانتظرته من الساعه الخامسه عصرا حتى الثانيه ليلا ولكن لم يحضر وغادرت وانا بي حسرة عظيمه واسألة في داخلي لا اجابات لها ..




ღ.
ღ.
ღ.




هيا: خايفة من التحصيلي ..
جمانه: كم جبتي بالقدرات ..
هيا: 86 ..
جمانه: ما شاء الله حلووووة .. يالله شدي حيلك باتحصلي ..
هيا: دعواتك ..
جمانه: الله يوفقك يارب وأشوفك دكتورة أطفال ..
هيا: امين ..
جمانه: وكيف اختبارات الثانوية ..
هيا: لا حمدلله تمام أنا مستهمه التحصيلي ..
جمانه: متى اختبارك ..؟
هيا: الاسبوع الجاي ..
جمانه: يالله بالتوفيق إن شاء الله ..
هيا: الله يسمع منك ..
جمانه: يالله ما اطول عليك ياحبيتي ..
هيا: ياهلا فيك ..

قفلت من عند بنت خالتها .. ودخلت ليونفر: هيا ..
هيا: نعم ..
ليونوفر: سعود يقولك يالله تعشي ..
هيا: طيب جايه الحين ..




ღ.
ღ.
ღ.




شوق: فهد والله كنت بخبرك بس نسيت ..
فهد: إذا تذكرت تعالي وقول لي ..
شوق: فهودي حبيبي .. والله العظيم كنت بقولك بس لهيت والله العظيم ..
فهد: ما عاد تعودينها ..
شوق وهي تمد اصبعها: والله والله والله ما عاد اعيدها ..
قربها من حضنها: دوووووووبه اشتقت لك ..
شوق: وأنا بعد .. بس كنت مشتوقه له ..
فهد وهو يقرص خدودها: الله يعوضنا ..
شوق حضنته: امين .. فهد ..
فهد: يا روحه ..
شوق بحب كبير له: أحبك



ღ.
ღ.
ღ.




ارائكم وانتقاداتكم ..
أتمنى ألاقي ردودكم وتحليل الشخصيات عليكم ~..





بقلمي:
نيروز أحمد ,