رد: ليه عمري مالقى لبرده دفا الا لقاكي

اقيده ب اغلال عرف وقرابه
وقلوب تظلمني ولاقدر ادينه
في معتقل همي ماأحس برحابه
حريتي حرفي وروحي سجينه


"" مستقليه على السرير بعد مانام ولدها حست بحركه على الباب قامت مفزوعه تكمكمت على نفسها من الخوف سمعت دق الباب اول مره كان هادئ شوي بعدين صار يقوى قربت للباب وبصوت مخنوق من الخوف .. من
احتقرها وكان صوتها عطاه جرعه من الكرهه رد بنبره حاده .. انا افتحي
ماتعرف صوته ولاتدري هو الي عند الباب ولاغيره ترددت الف مره تسئله تكلمت بسرعه يوم الطرقات صارت خبط .. انت من ؟؟؟
استغرب اكيد تستهبل من يكون غيري بغضب وهو يحرك يد الباب بسرعه .. انا نايف افتحي لاتستغبين
وقفت متجمده في مكانها ورجعت لها حالة الغثيان من تاكدت من قربه وعت من افكارها على صوته يوم طولت مافتحت... افتحي لاكسر الباب
فتحت الباب بحركه لاشعوريه وانزوت ورى الباب وقلبها يرتجف وهي تحس انه راح يدخل عليها وتصير معه بغرفه وحده" دخل من تعدى حدود الباب شعر انه انسان ثاني من عالم ثاني وبقلب ثاني وتفكير جديد مشى وصوت جزمته على الرخام يهزها مع كل خطوه يخطوها " تلفت بالغرفه مافكر الى الان كيف يكون شكلها بقدر ماهتم كيف يبدا معها مالاحظ وجوها ورى الباب مع انها توقعته يسمع دقات قلبها الي تسارعت وتعالت مشى لغرفة متعب كانت ظلمه بس قدر من خلال النور المتسلل من الغرفه الثانيه يتاكد من عدم وجودها استدار بجسمه ولاحظ حركتها ورى الباب الي يفصل بينهم مشى بحركه غير مسؤله غير متوازنه تنافي طبعه الي غرق في اموج حقده عليها وبسرعه ازاح الباب المتفوح حتى يبتعد عنها ويسكر عليهم اثنين مالهم ثالث الا حفنه من الالام "" كانت منطويه على نفسها ماعندها قدره حتى تسمح له يشوف وجهها لانها الى الان تعتبره غير محرم لها " اتخذت وضعيه غريبه كانت ضامه يديها وحاطه راسها بينهم في محاوله انها تستر نفسها من نظراته لكن قبل يتمعن في حركتها قررت تواجه مصيرها بشجاعه وفي لحظه سريعه قررت تخليه يشوف ساره القويه وقررت توطى على احزانها وتاكد له انها ماهي محتاجه رحمته لاهي ولا ولدها رفعت راسها وهي تلبس قناع الشجاعه يوم حست بانفاسه مثل اللهب يحرقها


بمجرد مارفعت راسها صوب سهم انظاره لعيونها هنا كانه يشوف نوف الي ماشاف منها الاعيونها ورغم انه بيوم شاف كل وجهها الا انه ماركز فيها


ميته لوكان في جسمي حياه
وذاويه لو عودك خضر


أبتسم خوفي من الناس العداة
يفرحون لو شافوا دمعي انهمر




جتها قوه غريبه وقدرت ترمقه بنظره ناريه ماغره الجمال الي شافه بملامحها ولانساه جرح قلبه ظلت انظارهم تتبادل بينهم نوت تنهي هالموقف السخيف وبعد مجهود استنزف منها طاقه كبيره .. ليش تناظر لي ؟؟
من سمع جملتها انذهل ورد بعد وهله يلقى كلمه توصل لمستوى النقمه الي يحملها عليها ميل شفته .. ماشاء الله وقحه بعد !!
ابعدت عن المعزل الي دست نفسها فيه خلاص تكسر بعد الجمل الي تواردت بينهم وهي تخفي وش كثر كانت مثل الطير الجريح الي يجاهد عشان يعيش وعطته ظهرها .. بعد !! يعني فيه شي ثاني تعرفه عني !!

تقدم لين صار وراها وبصوت هامس .. اعرف اكثر مماتخيلين ومن كثرما تحمست اكتشف باقي عيوبك تزوجتك
بعد ماكانت صاره جسمها من قربه التفت بسرعه عند نهاية اخر حرف وعشان ماتسمح له يكمل .. انا مافيني عيوب
بثقه وهو يتلذذ بالي يقوله ويتفنن باهانتها وهو يأشر عليها من فوق لتحت ..انتي كلك عيوب >> ارفعت اصبعها ناويه تتكلم منعها .. اووووووص
ولاكلمه انتي تسمعين وبس وتحمدين ربك اني خليتك تشوفين ولدك
طلع من عندها وهي في غمرة ذهولها من الي سمعته كانت تظن انه يكرهها لانه مجبور عليها لكن هذا مايعطيه الحق يرميها بابشع كلام
سمعت صفقت الباب وهي على وقفتها ...الظاهر بيستذلني بجلستي مع ولدي لكن هين انت الي بديت يانايف والله لاخليه يندم على كل حرف
فجئه لحظة الضعف والانكسار انقلبت الى عنفوان وعناد وحرب طاحنه شب فتيلها نايف بجمل بسيط

من هنا كان اول نقاش واول شحن نفسي بينهم الحنق ملى قلوبهم على بعض وابتدت بينهم رحله من الضياع مشوا في غياهبها كل واحد بنظر الثاني ظالم وبنظرنفسه مظلوم لكن الحقيقه الاثنين مظلومين والظالم يختفي ورى جدار من الخوف
.................................................. ......


في مكان بعيد في جده وفي بيت ابو نايف
خلص الشغله الي راح علشانها ورجع لهم "توسط عياله وزجته بعد غياب دام حوالي عشر ايام كانت عيونهم او السنتهم تسأل عن نايف
مها الي اجتمعت عليها همومها من الخلاف الي صار بينها وبين فهد .. الحمدلله على سلامتك
..الله يسلمك
وانضمت لجلستهم .. وش اخبار نايف
.. نايف الى الان الفكره صعبه عليه بس ان شالله راح يتعود على وضعه الجديد
مها الي ماعجبها اسلوب ابوها .. انا خوفي مايتعود وتصير ساره ضحيته هالفكره
ام بدر .. ماتخيلت ساره ممكن توافق وشلون قدرت تقنعها ؟؟
.. ساره ماكانت احسن من نايف بس ضغطت على نفسها عشان ولدها
بدر .. وين بيعيشون ؟؟
.. ببيتهم بيت نايف
سكت الجميع ماتخيلوا انها تعيش حياه ثانيه بنفس البيت
.. حرام عليكم يابو نايف تفرضون عليها عيشه ماتبيها وبيت ماتبيه
.. غصبا على يام بدر مافي حل ماكان في وقت ندور بيت للايجار او للبيع المسأله يبيلها وقت
مها .. كان انتظروتوا لين تلقون بيت
.. خفت يابنيتي يتراجعون وانا ماصدقت يوافقون بس انا غيرت الي اقدر عليه من الاثاث به الكم يوم وفهد ماقصر كان يشرف على كل شي
نزلت مها راسها يوم شافت الانظار تواجهت لها كردة فعل عفويه " ام بدر .. الله يجزاه خير ماقصر
اخيرا تكلمت .. ونايف يبه ليه ماساعدك
مشعل .. هههههه خافت على فهد من التعب
ابو نايف .. مشعل عيب " التفت له وجاوبها .. نايف كان رافض يسوي أي شي
ام بدر .. ليه ؟؟
.. مدري احس وراه شي وفهد عارفه بس الاثنين ماتكلموا واظن فهد زعلان عليه اكيد نايف قايل له شي بس مدري وشهو !!
كان ابو نايف يتكلم ويتكلم عن اشياء كثيره خلال سفرته اخذ فهد نصيب الاسد منها انشغلت وش الشي الي ممكن يكون بينهم ماقاله الاثنين



وهاهو الليل يتجلى عن صباحا جديد ربما يحمل مع طلوعه الكثير الكثير وربما يمضي ولايحرك ساكن الا انه ينقص يوم من اعمارنا
نايف اتخذ غرفه في البيت تكون مكانه بعيد عن ساره وقريب من متعب
ساره قررت تكون اقوى من كل شي
نوف نامت وهي تنتظر ينتهي هاليوم الطويل وتشوف كيف عدى على ساره
مها افكار كثيره تدور براسه وشي غير مفهوم بين نايف وفهد يمكن هو السبب الي دعى فهد يزعلها
فهد وقف عن الاتصال فيها لعلها تراجع نفسها وهو يراجع نفسه
لطيفه محاولات عبدالله كانت فاشله انها تفصح عن سبب الحاله الي وصلت لها وعادت من جديد للوحده
نوره وسلمان لاجديد الا التجهيز للسفر



..................................................
فتحت عيونها وتلفت بالمكان كان السقف الي يعتلي نظرها فخم على غير ماتعودت بغرفتها المتواضعه ببيت ابوها بسرعه شريط سريع من الاحداث مر عليها بسرعه قامت متوجهه لمتعب كان صاحي ويلعب بأيديه ابتسمت يوم شقت وجهه البرئ ضحكه طاهره رفعته ومشت وهو معها لين وصلت للغرفه الثانيه وحطته على سريرها ودخلت تغسل وطلعت تدور شي تلبسه فتشت بالشنطه الصغيره الي بطرف الغرفه ولبست قميص بيت طويل لبسته تحسبا لدخول نايف وظلت جالسه بالغرفه لان اليوم جمعه اكيد ماراح يطلع مر عليها الوقت ممل قضته مع ولدها الي كسر بعض الملل مابين تغير له او تلعبه لين تعب ورجع نام ورجعت جلست وعلى هالحال لين العصر لحالها فزت بسرعه وهي تسمع جوالها
كانت نوف
.. مساء الخير
بصوت بارد ظهر فيه نغمة الالم واضحه ..اهلين مساء النور
.. شاخبارك
.. الحمدلله تمام
.. بس صوتك يقول العكس
غورقت عينها كأنها تذكرت ولملمت عبرتها .. لاتخافين بس يبي لي وقت اتعود
.. اكيد ياساره صوتك ماعجبني
.. ماعليك من صوتي المهم انتي وين
.. انا ببيتي ليش
.. كلمتي امي
.. اي كلمتها تسأل عنك ليش ماتصلتي تطمنينها عليك
.. اذا انتي انشغلتي من صوتي اكيد بعد بتحاتي خليها اذا ارتحت بكلمها
.. ساره قولي وش فيك
هنا خنقتها العبره وماعادت قادره .. خلاص نوف الله يعافيك اتركيني
.. ساره و...
قاطعتها .. نوف تكفين اذا تبيني ارتاح فقلي الحين
.. بقفل بس امانه اذا قدرتي كلميني
سكرت بدون ماترد عليها رمت الجوال وحطت راسها على وسادتها وخلت سيل من الدموع يتكفل بضيقتها لعله يغسل قلبها

طلع من الغرفه تباطئ بمشيته لانه سمع صوت بغرفتها تاكد انها تكلم احد ارخى سمعه لكن ماسمع شي مفهوم وبعد مده حس الصوت سكت فكر يدخل ويشوف بس اخر لحظه تراجع .. الايام جايه

.............................................


طلعت لغرفتها بعد مافطرت مع ابوها وامها واخوانها شيكت على جوالها الي ماشافته من البارح حصلت فيه رساله فتحتها كانت من فهد قرتها


ياصباح الورد يانور الصباح
ياصباح النور يانور العمر
ياصباح نام في جفنك وراح
ياصباح فاق .. من ليل سمر..



ابتسمت بفرح لانه له مده مايتصل شاورت نفسها تتصل فيه ولا لا وصرفت نظر عن الفكره لعل البعد احسن خصوصا في هالفتره الي تعتبرمليانه بالضغوط النفسيه للاثنين وتعهدت انها تعرف السر الي بينه وبين نايف
جلست بغرفتها تحضر للامتحانات الي مابقى عنها الاشهر وتحاول تنسى فهد والخلاف الي صار بينهم
................................
نوف الي اشغلها صوت ساره حست ان فيها شي حاولت تشيل هالافكار من راسها تمنت لو عندها احد تفتح قلبها له احد يطمنها لكن وين مافي الا امها ونوره ماتبي تزعجهم بافكارها كانت بعالم ثاني جالسه بالصاله وحاطه اصبعها عند فمها حطت ام ناصر يدها على كتفها ولفت للجهه الثانيه وقابلتها .. الي ماخذ عقلك يتهنى به.>> رفعت جسمها شوي واعتدلت بجلستها .. افكر بحال ساره
... لاتفكرين يايمه أي وحده بوضعها تحس بصعوبة الموقف بس بعدين بتتعود
ماتدري ام ناصر بحساسية موقف ساره من نايف ولاتدري بكرهها له ..ان شالله
تنحنحت بحرج قبل تبدا معها بالكلام .. اقول نوف
.. سمي ياخاله
.. سم الله عدوك بس بغيت اسئلك عن ناصر
تعرف ان خالتها عند كلام تمهد للدخول فيه وتدري انه يخص ناصر .. ناصر !!
.. أي ناصر " انتي تكلمينه ؟؟
ابعدت عيونها بسرعه عنها ماتبيها تشوف اجابتها بعيونها .. هاه أي احيانا " ليه
دققت بنظرها فيها ..لاني عمري ماشفتك تتصلين فيه ولاهو يتصل فيك
نزلت راسها وفركت راس اصابعها بيدها كملت ام ناصر .. انتي تحبينه يانوف
مازالت مطخيه راسها بالاراض بس ام ناصر عرفت اجابتها بدون ماترد .. اذا تحبينه انسي الي يحب ينسى
رفعت راسها فوق .. انتي تقولين كذا لانك امه بتسامحينه مهما يسوي بس انا غير
.. لا يانوف مو بس الام الي تسامح ومولاني امه قول هالكلام انا ابي مصلحتكم انتم الاثنين " يايمه ناصر يحبك وتحمل صدك كل هالشهور لانه متمسك فيك
نطقت بدون تحفظ .. حتى انا احبه << سكتت فتره ..خاله
..نعم يايمه
استرسلت .. تصدقيني اذا قلت لك ان بنفسي صراع احبه وماستغني عنه ولاقدر انسى الي سواه
حطت يدها على رجلها .. اصدقك يانوف بس يابنتي انتي الي مقنعه نفسك انك ماتقدرين تنسين صدقيني اذا حاولتي بتقدرين
.. حاولت بس ماقدرت
.. يعني بتقدرين تتركينه ولا بتقضون اعماركم متزوجين مع وقف التنفيذ
احمر وجهها من الي سمعته .. انا عارفه بالي يصير لاتحسبين اني غافله عنكم لكن كنت اتمنى تحلون مشكلتكم من غير ماحد يتدخل بينكم انتي لو بتشوفين احد يعز عليك يسوي الي تسوينه اكيد بتنصحيه هالعقل النظيف والقلب الطاهر انتي اولى انك تستغلينه لنفسك
ميلت شفتها بابتسامه عذبه .. تسلمين ياخاله
.. انا مابيك تشكريني انا ابيك تفكرين وتسوين الي تشوفينه لمصلحتك ومصلحة زوجك
كان أي قالته ام ناصر كلام منطقي لايشوبه الغلط لكن هل نوف تقدر تنفذه

رد: ليه عمري مالقى لبرده دفا الا لقاكي

بعض الكلام احيان خنجر وسكين
ان ماطعن شق الصدر حيل وادماه




قبل المغرب وفي معزل ساره حست انها مخنوقه واجهدها الجوع والعطش حاولت تكون جريئه وتطلع ماراح تقعد كذا على طول فتحت الباب وحرصت مايكون له صوت لين تتاكد انه ماهو موجود بالبيت تركت ولدها نايم والتفت بجهات الممر مافي صوت ولادليل يدل على وجوده بالبيت ولا ينفيه بدت باول خطوه تخطت الممر للدرج ونزلت بسرعه كانها حرامي مشت للمطبخ وصلت بسهوله لانها عارفه مكانه فتحت الثلاجه ماكان فيها شي قعدت تفتح دواليب المطبخ وبعد مالقت شي رجعت للثلاجه واخذت كاس مويه وشربته بدت تجهز مويه لحليب متعب حطته على النار وجلست على الطاوله احتارت تتركها وتطلع فوق ولا تستناها تغلي


فوق حس بالحركه وترك الشغل الي بيده وطلع يشوف شافها وهي نازله ولاحست فيه دخل الغرفه وشيك على اخر مكالاماتها كانت تقريبا نفس الرقم وكل من "اختي " عرف انها كانت تكلم نوف ترك الجوال بمكانه والقى نظره على متعب الي كان يتحرك على سريرها جلس جنبه على السرير وشاله حبه وجلس يتامل البراءه والطهاره بعيونه وقف فيه وشاله لين وصل عند الشباك وفتحه وقف يتفرج على الحديقه الي ورى الغرفه وهو بيده


طلعت للغرفه شافت بابها مفتوح طلت براسها ومثل ماتوقعت كان داخل الغرفه ماعجبها المنظر لانه واضح يبي يعلق الولد فيه .. لوسحت دخل الولد عن الشباك بيبرد>> وهو على التفاتته غمض عيونه وصك اسنانه بغيض .. مالك دخل
دخلت بابعد مكان بالغرفه .. اجل من الي له دخل
لف لها .. أي احد الا انتي
حطت يديها على خصرها .. بحكم من ؟
نزل متعب وقام لها .. بحكمي انا
قربت هالمره وحطت عينها بعينه ... وانت من عشان تصدر احكامك
قرب هو بعد وأشر على نفسه .. انا عقوبتك بالدنيا انا الي بطلع الاول والتالي منك
ضيقت عيونها كلامه يتجه بمسار ماهي عارفته ويقصد شي اكبر من كونه مسوي شي ماهو راضي عنه بكل ثقه .. بس انا ماسويت شي تعاقبني عليه وحتى لو استاهل العقاب مو انت الي بتعاقبني
ضحك ضحكه عاليه وبعدين ناظر لها .. لا ياحلوه ماحد بيوفيك حقك غيري انتي تستاهلين اصعب عقاب
انفجرت بوجهه .. وش هو قل وش بتعاقبني عليه
استمتع بمنظرها وهي حايره بذنبها .. مومهم تعرفين المهم اني انا اعرف
انطلقت بكلمه ماتدري كيف طلعت منها بجراءه تعدت حدودها وببرود .. والله موذنبي انك مالك شخصيه وتنغصب على شي ماتبيه
اسفتزته بكلمتها وسحبها من يدها بقوه وهو ينتفض .. انا ماخذت رايك انا اعرف بنفسي بس انتي اعرفي نفسك وبعدين حللي شخصيات غيرك
تضايقت من لمست يده .. اذا كنت ماتقدر تقول لا لاتطلع حرتك فيني انا مثلك مجبوره بس انا بنت وانت تنحسب رجال
عجزته يدور كلمه يكويها فيها ترد عليه بكلمه تحرقه فيها رقلها بيده بعنف .. بلا قلة ادب انا رجال غصبا عنك ويكون بعلمك انا ماحد جبرني انا الي جبرت نفسي واذا تتوقعين علشان متعب لا تكونين غلطانه متعب لو ابي اخذه بسحبه غصبا عنك انا ابي اوصل لك انتي
نفضت نفسها منه بسرعه .. وش تبي مني علمني تكلم كلام واضح لاتتكلم بالالغاز لاني بصراحه مافهم فيها
حط عينه بعينها وحرك اصبعه قدامها ومن كثر ماهو ثاير كانت عروق رقبته مشدوده .. لا انتي فاهمه وعارفه بس عهد قطعت على نفسي الا ادفعك الثمن غالي >> ماترك لها مجال ترد هذي ثاني مواجهه بينهم ينهيها بكلام مبهم ماتفهم منه شي دفعها من طريقه وطلع وقبل يتعدى حدود الباب سحب المفتاح الي كان فيه وحطه بجيبه ومشى ."" رفعت جسمها من على السرير وعدلت نفسها .. هذا اكيد مجنون


..............................................

.. اتصلي على ساره قولي لها تجي ودي اشوفها كلمتها وصوتها ما عجبني
.. يمه تعرفين بنتك مايعجبها العجب ساره صعبه وفكرة سفركم مضايقتها
.. ودي اتطمن عليكم بالي مشغول ولاني مرتاحه
قامت ومشت لين قربت لها .. لاتنشغلين يمه احنا بندبرانفسنا انتي بس اهتمي بصحتك
ابتسمت من الفكره الي طرت ببالها .. تدرين يانوف اني ماشفت زوجك ولازوج ساره
قعدت وقابلتها .. صدق يمه ماشفتي ناصر
صغرت عيونها تتذكر اخر مره شافته فيها .. لا يايمه اخر مره شفته فيها ببيتنا الاول كان صغير عمره مايتعدى عشر او احد عشر سنه بس من تزوجك ماشفته
مسكت يدها .. ان شالله يرجع وتشوفينه " ونايف !!
.. نايف كان يجي عندنا اول مانزل للرياض ماكنت اشوف الامن برى برى لانه كان رجال بس كان دايما يسئل عني وانا كنت اعزه هالولد له مكانه بقلبي
غمزة لها .. اكيد يام سلمان من زمان تعزينه ولا لانه صار زوج بنتك الغاليه
ضحكت من قلبها ... ههههههههه شكلك تغارين من اختك
حطت راسها بحضنها ..اكيد اغار بعد انا بنتك
قعدت تلاعب شعرها وتسترجع الزمان الي مضى .. تدرين يمه زوجك يوم هو صغير كان مؤدب وخجول مع انه الولد الوحيد وابوه حالته ميسوره ومانحرم من شي كل هذا مأثر عليه
ظلت تستمع لكلام امها عنه وتستعذب الحكي عنه لانه يهدي الشوق له ماوعت الا بهزه قويه من كتفها .. نوف
رفعت نفسها بسرعه .. نعم نعم يمه
.. وين سرحتي يمه اناديك وماتردين " اشوف السوالف جازت لك
ابتسمت بخجل .. نعم يه تبين مني شي
.. أي ابيك تتصلين على ساره تخلينها بكره تجي لانا بعد بكره مسافرين ودي اشوفها واتطمن عليها
.. ان شالله يمه الحين اكلمها
...............................................

.. اقول فهدشاخبارك مع مها
هز كتفه .. عادي مافي شي جديد
..وليش تقولها كذا كانك زعلان
.. وشلون تبيني اقولها اغنيها لك مثلا
غلته مستغربه من اسلوبه .. فه د علي انا هالحكي انا نوره اعرفك زين
بتملل .. ولاشي صاربينا سوء تفاهم
.. والسبب ؟؟
.. ياكثر اسئلتك
.. طيب تبيني اتوسط بينكم
.. لا تتوسطين ارتاحي بس كلها مسألة وقت وتلقينا راجعين زي اول واحسن
.. طيب قل لي وش مزعلها عليك
.. اقول نوره انا رايح وانتي روحي لامي تناديك تقول بنتك تبكي مشتاقه لك
فتحت عيونها كل كبرها ومطت شفتها..كل هذا سمعته وانا ماسمعته
التفت لها وهو يمشي وأشر على اذنه.. لانك صمخا سلام
تركها لحالها تضحك عليه يعرف يهرب من المواجهه .. هين يافهد >> ودخلت لامها وبنتها بالغرفه
......................................

تنتفض بي عبرتي بين الشهيق
وتحترق من حرها بيضالثياب !
افتقد في غربتي معنى رفيق
امسكه لاهزني كثر المصاب


يوم الاحد

بعد ماتصلت عليها نوف وعلمتها بسفر اهلها وهي محتاره ماتدري كيف تقوله ودها مايحس ابدا انها تحتاجه بشي بسيط فكرت تمشي بدون ماتقوله ماتدري ليه خافت من هالفكره الف طريقه وطريقه خطرت ببالها كيف تقدر تقوله
شالت متعب وطلعت من الغرفه للخارجها للدرج ومنه لاسفل البيت ومن الصاله لقت نفسها بنص الحديقه الصغيره جلست على الكراسي الي فيها كان الوقت المغرب وهو مارجع خافت مايرجع توترت من فكرة سفر اهلها
حست بالباب الكهربائي انفتح بس مالتفت له انبسطت لانه جاء عشان تطلبه
من وقف السياره شافها لان المكان محدود بمساحه صغيره نزل من السياره بس ماكان لحاله
قرب لمكان ماكانت جالسه بيحرق دمها شوي وهي صاده .. هاتي الولد
التفت له وناظرت له استغربت وهي تشوف الحرمه الي معه كانت كبيره وواضح عرفت بدون مايقول انها شغاله .. من ذي ؟
قرب لها وشال متعب من بين يديها بدون ماتقاوم وعطاه الشغاله .. خوذيه داخل >>والتفت له .. وش رايك شغاله
وقفت حيلها ناويه تدخل داخل وهي تحاكيه بدون ماتنار له .. ياسلام شغاله وتعطيها ولدي
صرخ فيها قبل تبعد .. وقفي عندك
تجمدت بمكانها من صراخه ومشى لين وصلها .. الشغاله أأمن منك على تربيته
تكابر على خوفه وتتشح بوشاح من القوه .. وليه ماربيه انا
وهو ماشي لداخل البيت .. انتي تبين لك احد يربيك
لحقته بحركه جريئه .. هذا رايك بس انا مايهمني ماسمح لك ترمي ولدي للشغالات يربونه
مشى من غير مايرد عليها استوقفه صوتها وهي واقفه وشاده نفسها وكاتمه انفاسها .. بروح لاهلي بكره بيسافرون
اول مالتفت منه راسه وعلى وجهه ابتسامه تشفي وبعدين استدار باقي جسمه.. وان شالله تبيني اوديك!!
بلعت ريقها وهي تشوف نظراته .. لاتوديني انا بتصل على سلمان ياخذني
.. انتي تستئذنين ولا تعلميني انك بتروحين
سكتت ماتدري وش ترد عليه انتبهت لصوته .. مافيه اجلسي هنا
علت صوتها .. ليش
حط اصبعه عند راسه .. كذا بدون سبب مابيك تروحين
.. بس انا بروح ومو لازام تسمح
ببرود .. روحي وجربي حظك
ومشى عنها وهي مولعه من تصرفاته غريب كيف كان مخبي هالشر بصورته الهاديه

.................................................. .........................


.. وش رايك يمه نتصل على خالتي نقول لها تجي عندنا
..غريبه وش المناسبه
.. انا من زمان ماشفتها مشتاقه لها لمتى وحنا متقاطعين
.. ناسيه انك انتي السبب
.. خلاص يمه لاتعورين قلبي بهالسيره اذا مابتكلمينها انا بكلمها
.. لا انا بكلمها بس خليها بكره لين نستعد وبصراحه مدري وش اقول لها
.. خالتي تحبني وبتسامحني
.. والله واثقه تحبك صح لكن مانتي اغلى عندها من ناصر وهي الحين ودها تقطع العلاقه لانها تعتبرك خطر يهدد حياة ولدها
جلست جنب امها وتسائلت بصوت مسموع .. يالله مدري كيف قدرت اسوي الي سويته
.. حذرتك ياهدى بس انتي طعتي لطيفه ونوال
ابرقت عيونها .. لطيفه خذت حقها بس باقي نوال
.. ليش وش صار لها
.. مات اخوها وحملها الي انتظرته خمس سنوات نزلته من زعلها على اخوها
.. سبحان الله يمهل ولايهمل
.. لطيفه كانت دايما تسولف عن زوجها وان امه كانت بتزوجه لانها ماتحمل وهو رافض لانه يحبها تصدقين يمه عندها زوج خساره فيها
.. ماعليك منها يمه اتركي الخلق للي خلقهم والحمدلله الي صحيتي من غفلتك قبل تندمين
.. الحمدلله الف مره
كانت هذي هي الهدى النسخه الجديد بعد الضغوط الي جتها صقلتها وصنعت منها شخصيه جديده او بالاحرى عادت هدى الاولى قبل لاتنجرف في شر نفسها
..........................................

بعد ماطلع من البيت هربا من تساؤلات نوره ولانه يحس انه مفتقد صوتها كان جالس لحاله بكوفي شوب ويتفرج على الشباب الي مالين المحل وحاط يده على خده سمع نغمة جواله رفع الجوال كان نايف فتح الخط .. الو
نايف الي حس ان مافيه احد يقدر يكسر معه بعض الحواجز الافهد ولانه حاب يعتذر منه ويحاول يبرر له يمكن يقدر يتفهم ..السلام عليكم
.. وعليكم السلام
مابغى يطول معه الكلام وحب يواجهه .. فهد انت وينك
.. انا بالكوفي الي تخبره
.. طيب دقايق انا جايك لاتروح
.. اوكي انا استناك
نزل جواله ورجع مثل ماكان يفكر بمها



اعتيادي ....في غيابك صعب
واعتيادي على حضورك اصعب
عند نوف وفي بيت اهلها بعد ماقرت المسج الي وصلها منه كل حرف يزيد شوقها له
الغصون يهزها الشوق للشوق
والقلوب الي غزاها الغلى يحتلها
الغلا والبعد والجرح ودموع تسيل
اربع الغازا صعيبه والاصعب حلها

قرت المسج اكثر من مره ماعاد له حيله الا الرسايل تمنت لوعندها الشجاعه ترد له الرساله لكن خافت انها بلحظة شوق تقول حروف ماتقدر تنفذها اذا شافته
جلست مده مختليه بنفسها ماتبي امها تلاحظ ضيقتها .. الله يسامحك يا ناصر عذبتني وانت حاضر وذبحتني وانت غايب
............................................. ...


وصل عند فهد والحروف تتحشرج بصدره خنقته لاهو قادر يتكلم ولاهو مرتاح بالسكوت نايف كان يستمتع وهو ساكت لكن هالمره الصمت كان اكبر من طاقته جلسوا فتره جالسين بدا نايف بالحوار .. فهد انا اسف
يحرك الشاي ويناظر للاشئ ..على ايش ؟؟
.. ا انا عارف ان الي قلته لك زعلك مني بس انا كنت امر بازمه
ناظر له .. وان شالله هالازمه عدت على خير
.. فهد لاتكبر الموضوع انا ماقلت شي يخليك تقاطعني
ركز النظر عليه .. بعض الكلام ماحنا مظطرين نقوله والي بقلوبنا مو لازام احد يعرفه
شاف ساكت ويستمع وكمل .. يانايف انت تعترض بكيفك بس لاتستكثر عليها الحياه مثل غيرها انت حطيتني بموقف خليتني استحقر نفسي اناعارف انك رافضها وتشوف انها ماتصلح لك وسكت هذا شي ماهو من طبعي
.. خلاص يافهد انس الموضوع
.. ومها كيف انساها
استغرب .. ومها وش عليها
.. للاسف كنت سلبي ماقدرت اواجهك او اوجه عمي وطلعت الي بقلبي عليها
.. يعني انتم متقاطعين
.. ل من مده ماترد على اتصالاتي
.. ان شالله سحابة صيف وتعدي
.. مدري المهم انا بروح الحين
.. ماراح اخليك تمشي لين تقولي طاح الحطب
هز راسه .. انا عتبان عليك لكن تظل غالي
.. طيب قول طاح الحطب
.. طاح الحطب

...........................................


.. انتي مجنونه
.. ليش مجنونه لاني باجي اسلم على اهلي
.. بس تقولين نايف رافض انك تجين
.. مو لازام يرضى
.. لاتتهورين وتندمين بعدين
.. وش بندم عليه بييذبحني ولا بيطلقني خلي يسوي الي يبي
..ثلاث ايام ياساره سوو فيك كذا
.. انسان متخلف يانوف مدري كيف يقولون عنه محترم
..طيب وش سوا ؟؟
.. ارسلي السواق واذا جيت قلت لك
..ماقدر اطاوعك بالغلط
.. اسمعي ربع ساعه اذا ما ارسلتي لي السواق والله والله لا اخذ تاكسي واجي وعلي وعلى اعدائي
.. طيب اسمعي اتصلي عليه وحاولي بالهداوه
.. ههه ضحكتيني اصلا ماعرف رقم جواله
انذهلت نوف من الي تسمعه مهما كانت الظروف ما توصل لهالدرجه نايف المعروف عنه انه انسان محترم وساره مهما كانت عنيده ماتوصل انها تمشي بدون اذنه ومو معقول بايام قليله ينولد هالكره الي تحسه من اسلوبها بالكلام عنه .. طيب اكلم سلمان واخليه له
ثارت بجنون ماعاد تقدر على نفسها خصوصا ان جدالها مع نوف هو المتنفس الوحيد للضيقه الي هي فيها .. نوف مثل ماقالت لك ربع ساعه اذا ما..
قاطعتها .. خلاص خلاص الحين برسله وياخوفي عليك من عنادك
................................
الناس ي بسمة المجروح منخدعه
كم بسمة من وراها النار بانفاسي ؟؟
بعض المواجع لها ماتنع الفزعه
وبعض المواجع وجعها من ووجع ناسي
عودت نفسي على الصدمات والفجعه
ولو ست جمر الزمن ماينحني راسي


وقف يناظر بوجهها ألي يختفي وراى ابتسامته الم "حاس فيها فراق اهلها ماهو سهل والاصعب انها تحاول ماتبين له وتتحامل على نفسها

رفع يدها وحبها .. نوره حبيبتي ادري فيك متضايقه لانك بتبعدين عن اهلك
.. الف مره قلت لك ياسلمان انا معك لو تروح لاخر الدنيا
.. الله لايحرمني منك " الله يقدرني ارد لك تعبك ووقفتك معي
.. اولا انا ماشكيت ثانيا تعبك راحه
راقب عيونها الي تصارع دموعها بهاللحظه وكان راح يتكلم " حطت يدها الصغيره على فمه تمنعه لايكمل " رص يدها على شفايفه وشاف دموعها تنساب بهدؤ ابعد يدها وظغطها .. مع اني اكره دموعك لكن ابكي يانوره بدال الكتمان اريح لك واريح لي
ضمته ونثرت على كتفه دموعها الهاديه وهو مامنعها انها تفضي عبرات صدرها


.................................................. ......


بغرفتها لحالها مالقت احد يشاركها فرحتها المزيفه شيكت على اغراضها وقاست فستان المتكلف فيه وجلست على تسريحة غرفتها ومسكت المشط وقعدت تنزله على شعرها بعشوائيه وهي سرحانه لين نبهها الباب الي انفتح كلمت امها الي وقفت بالغرفه تتفرج على اغراضها .. وشلون تذكرتيني
.. انتي مانتي محتاجه احد
.. وهذا الي ذابحكم تحسبوني بموت اذا ماحد ساعدني انا فلوسي تخدمني
ناظرت للفستان على السرير .. ليش الفستان وزوجك مايبي زواج كبير
.. بلبسه لنفسي وللتصوير
جلست جنب الفستان .. ليش يانوال تنازلتي عن الزواج
.. مصاريف مالها داعي
.. بس هو قادر يسوي زواج كبير
.. مصاريف الزواج انا اولى فيها
.. كأنه يبي يعطيك منها
.. لا وانتي الصادقه بتصير كلها لي
ملت من الكلام معها قامت وتركتها مصدقه كذبتها على نفسها

.................................................. ...........................



وهو يسفط السياره بمكانها ويكلم بجواله .. اخيرا عبرتينا
.. كنت تعبانه شوي
.. لطيفه تكفين لايشيل قلبك علي
.. لا يانايف ماني شايله عليك بس انا موت نواف اثر فيني
.. اوكي ليش ماتزوريني بالبيت
ماردعليه لكن سئلته .. نايف تقدر تجيب متعب لي اشوفه
.. انتي تعالي للبيت وشوفيه
.. ماقدر اروح هناك
.. البيت بيتك وانا اخوك تعالي باي وقت
.. ارجوك يانايف انت اذا فضيت هاته لي
..خلاص ان شالله باقرب وقت باجيبه بس اوعديني تزوريني بالبيت
.. اوعدك
انهى المكالمه ونزل ودخل البيت شاف الشغاله بالبيت لكن ماسئلها طلع على طول للغرفه يبي يودي متعب للطيفه فتح الباب بقوه مو موجود فيها احد استغرب لاهي ولا متعب بس جوالها مرمي على التسريحه << تركت الجوال متعمده >> نزل يركض توقع انها سوت الي براسها بسرعه نزل للمطبخ وسئل الشغاله .. وين المدام؟؟
.. مدام روح
.. مع مين ؟؟
.. مافي يعرف
جنون الاراض تجمع قدامه " مشت شورها وتجاهلت نهييه لها ماجاب فايده ماتخيل توصل معها قواة راسها انها تعانده تحلف فيها بصدره
طلع يركض وركب سيارته .................

رد: ليه عمري مالقى لبرده دفا الا لقاكي

يعطيك العافية

تابعي =)

رد: ليه عمري مالقى لبرده دفا الا لقاكي

الب الثامن والعشرين ارت





ماعاد لي قلب ضلوعه تضمه ..
وش كثر راح من الشقى وش بقى كم ؟؟
اللي رضع من ثدي الأيام همه ..
يموت قلبه ما تعافى من الهم ..
ياليت لي جرح وينشاف دمه ..
مير البلا من جرح ما شيف له دم..


خلصت مكالمتها ورمت الجوال جنبها وهي تتخيل كيف ممكن يكون شكل ولد نواف رعب من شوفته تعتقد انه حتى هالطفل ممكن ينطق ويعاتبها لانها كانت السبب بحرمانه من ابوه " بالمنديل الي بيدها مسحت اثار الدموع وقبل ترجع ترخي جسمها على السرير انتبهت لعبدالله الي كان قاعد يراقبها متركي على الباب ومكتف يديه .. من متى وانت هنا
افلت يديه من بعض ودخل لها .. من كنتي تكلمين" نايف !!
ناظرت ليديها الي تقطع المنديل بتوتر .. ابي اشوف ولد نواف
.. ليش ماتروحين هناك وتشوفينه
تكلمت ببرود ماغاب عن عبدالله الي تخفيه وراه .. المهم اني اشوفه هنا اوهناك مايهمني
عدى يديه من ورى رجولها الي ممتده على السرير واتكى عليها .. لطيفه انتي لازام تطلعين تشوفين الدنيا وتغيرين منظر هالجدران انتي من وفاة نواف ماطلعتي من البيت
.. وين تبيني اروح ؟؟
.. روحي لاي مكان لاهلي لبيت اخوك انتي حتى الروحه لجده تراجعتي عنها ولدك يالطيفه تمر اليومين والثلاث وهو ماشافك
سكتت تدور لنفسها عذر سئلها عبدالله .. وش الي غيرك مايجوزنوقف عند الحزن ونهمل انفسنا وننسى الناس الي تحبنا
رفعت راسها ودموع تتدحرج مثل الخرز على خدها.. عبدالله تكفى خلني بحالي
..الى متى وانتي دافنه عمرك بهالغرفه وتحاكين نفسك
ناظرت بتساول .. من تبيني احاكي
.. قولي الي بقلبك تكلمي انا اسمعك
هدت شوي ونزلت راسها ..وش اقول
.. لاتردين على باأسئله قولي الي بقلبك وش السر الي ماتبين او ماتقدرين تقولينه لاحد
ادهشها عبدالله بمعرفته لها لفت للجهه الثانيه ودفنت وجهها بالمخده وصوتها طلع رغم انها تحاول تحبس وناتها
لكن ماتكلمت فضلت الصمت
................................................


بعد ماوصلت لبيت اهلها وسئلتها امها عن حالها ترددت تقول ولا تسكت لكن لاحظت نوف الي تأشر لها بانها تسكت ولانها ماتبي تضايق امها قررت تسكت وتواجه نايف بشجاعه اخفت عن امها وضعها مع نايف واختلقت كم كذبه دخلت ام سلمان تدفع كرسيها بيدها لغرفتها حتى تصلي
اخيرا انفردت بساره وبدات اسئلتها بعجل قبل تنكسر خلوتها ... يالله الحين تكلمي قولي وش الي صار
نزلت بيالة الشاي من يدها .. وش اقول وش اخلي طلع انسان ثاني غير الي نعرفه
مادخل كل هالكلام راس نوف مستحيل نايف يكون بهالصوره البشعه اكيد في سر "خافت تكون ساره استفزته بشي اوغلطت عليه
.. طيب ماسئلتيه يمكن عنده سبب وبعدين ياساره قدري ظروفه صعب عليه ....
تكلمت بسرعه .. بس هو صعب عليه انا اشوف الموت كل يوم ودي اتراجع
صدت بوجهها ولفتها نوف لها .. الغريب ياساره انك ماقلتي لامي مع ان الي يسويه شي يستاهل انه ينسئل عنه
.. انتي نبهتيني لاتكلم قدام امي
.. لا انتي مايهمك اذا حطيتي براسك شي
عرفت ان نوف وصلت لشي داخلها .. اخاف ياخذ متعب عيونه تقول انه ناوي على الشر وانتي شفتي كيف بايام قليله صار الي صار
.. طيب من ناحية متعب
على طول عرفت وش تقصد .. هذا الي مجنني اشوف الحنان بعيونه لما يناظر لمتعب لكن نظرته تتغير اول ما يحط عينه بعيني
.. اكيد في شي وشي كبير وانا عند رايي نايف انسان زين
حدقت فيها وهي تتكلم عنه خافت تشوف نظره ثانيه بعيونها وهي ماهي محتاجه ضيقه زياده "لكن مالقت نفس البريق الاول لما تتكلم عنه والي صارت تحسه بنبرة صوتها وهي تتكلم عن ناصر .. هذا رايك فيه من زمان !
فهمت مقصدها بدون لاتفصح.. حتى لوكنت اكرهه وكان عدوي كلمة الحق باقولها
..تصدقين حسدتك انه ماصار من نصيبك تعتقدين يانوف اني تسببت ان جروح تتفتح صار فيني الي صار
حست بمعانتها وعرفت انها ماهي مقتنعه انها شالته من راسها .. ارحمي نفسك من الوساوس يمكن هذا الي مخليك ما تقدرين تقبلين العيشه معه تكفين ياساره انسي وارحميني وارحمي نفسك ماتعرفين اختك رجال صار زوج اختي اعتبره اخوي وبعدين افهمي قلبي مافيه الاناصر ولايمكن يوسع احد ثاني معه
.................................................. ................


قعدت تستمع لامها وهي تكلم خالتها وتحاول تلقى كلام يدمح الي صار ودها تعرف وش صار بينهم
.. والله يام ناصر مستحيه منك ومدري وش اقول
قبل تسترسل بموشح الاعتذار قاطعتها .. لاتقولين ياختي الكلام الحين مامنه فايده بنتك غلطت واظن الغلطه الي سوتها للحين ناصر يدفع ثمنها
خاب املها ظنت انها بعد مده من الانقطاع راح تنسى وتسامح .. عارفه انها غلطت وهي معترفه وودها تسامحينها
.. اسامحها على ايش ولا ايش على الي سوته بناصر ولا نوف ولا انها كانت سبب انها سقطت هدى تحملت ذنبهم كلهم يوم خلت حياتهم شتات ماهم عارفين كيف يعيشون
رفعت عينها لهدى الي تترقب ردة فعلها .. لهالدرجه هنت عليك انا وبنتي يام ناصر تبيعينا
.. انا مابعتكم انتي اختي وبتظلين اختي مهما صار وقلبي وبيتي مفتوحه لك بأي وقت بس هدى ....... وسكتت
.. هدى وش فيها ؟؟
.. مثل ماهي بنتك وتحبينها بعد ناصر ولدي وودي يرتاح بحياته
..بس يام ناصر ..... وقبل تكمل انسحبت السماعه من يدها
ام ناصر على الجهه الثانيه حست انها سكتت فجئه جاها صوت ثاني .. الو
عرفت ان هدى مصره على استرجاع الوصل بينهم وخافت انها تكون المعبر الي من خلاله توصل لناصر .. نعم ياهدى وش بغيتي
.. خالتي انا ندمانه على الي سويته ومو هاين على مقاطعتكم انتي وامي بسبتي
.. بس انا ماقطعتها وتقدر تزورني باي وقت
.. بس انتي ماتبين تجين عندنا
.. المهم انا نشوف بعض
كملت هدى الكلمه الي ماقدرت ام ناصر تقولها .. والاهم انك ماتشوفيني
.. انا ماقلت كذا !!
.. ماقلتيها لكن قصدتيها اخبرك شجاعه ياخاله ليش التردد ؟؟
.. هدى قولي وش عندك
.. ابيك تسامحيني ياخاله واوعدك انها اخر مره
.. اطلبي السماح من ربك اول شي وبعدين من الناس الي ضريتهم
.. صدقيني ياخاله انا تبت والي صار ماراح يتكرر
.. وش الي يثبت لي ؟؟
.. انا بثبت لك بس عطيني رقم نوف
تفاجئت ام ناصر من طلبها وشهقت بخوف من نيتها .. وش تبين فيه ؟؟
.. بصلح غلطتي
.. مستحيل اعطيك رقمها انا ماراح امن لك وبعدين مثل ماوصلتي رقمها اول مره وخربتي حياتها اظن الاصلاح اولى انك تطلعينه بطريقتك
.. اول شي هي غيرت رقمها وثاني شي انا طلبته منك انتي لاني صادقه بنيتي قدام ربي وقدامك وان صارشي بتعرفين ان رقمها معي وانا المسؤله عن الي يصير
كأن ام ناصر اقتنعت ببعض كلامها رغم مايتخللها من الشك .. طيب راح ارسل لك الرقم بعد شوي واعتبريها اخرفرصه وان سويتي شي ثاني لي كلام ثاني
..مشكوره ياخاله وهذا الي ابيه منك وان شالله اثبت لك حسن نيتي
.. زين ننتظر ونشوف و ان اذيتيهم ياهدى انسي ان لك خاله
.. اوعدك ياخاله والحين خوذي امي بتكلمك
.................................................. ....

وقف قدام الباب وده ينزل ويسحبها من قدام اهلها لكن اشياء كثيره كانت تمنعه اولها احترامه لابوها واخوها وللبيت الي ياما احتضنه واكل وشرب فيه مقهور مخنوق محتار مايدري كيف تطلع له يفكر وش الاسلوب الي لازام يتبعه معها انسانه عنيده لأبعد درجه وممكن تسوي شي ينقلب كل شي عليه واهلها اكيد بيكونون معها وهو مايبي يخسرهم انبسط يوم شاف سلمان طالع من البيت نزل ينبهه بوجوده لان السياره بعيده شوي
ابتسم سلمان وهومقبل عليه وماد يده لمصافحته .. السلام عليكم
.. وعليكم السلام هلا والله
.. هلابك
.. اقلط تقهوى الوالد بالمجلس
.. اعذرني عندي شغل بس ياليت تنادي الاهل يطلعون >> نايف الى الان من صارت زوجته مانطق اسمها يحس انه ثقيل بلسانه
.. تو الوقت وانا اخوك ليش مستعجل ؟؟
.. ماعليه بس وراي شغل بكره وبنام بدري
.. براحتك بدخل اناديها >> دخل سلمان ونايف واقف ينتظر ويدعي انه يضبط اعصابه ويتحكم بنفسه لين يوصل البيت " فكر يتركها لكن تراجع لان هذا الي هي تتمناه قرر يأدبها ويعرفها على نايف الي صنعه موت نواف .......


...........................................
تدري وش أسوي الى أضناني الشوق

..........أسوي بعيوني كذا وأتخيلك


وأقربك واتوق .. واتوق .. واتوق

..........وأكثرك وأحلف ما عاد أقللك


وأصورك في الموق .. وتكبر على الموق

..........وتطيح مع دمعي على ايدي وأقبلك



وفي مكانه البعيد ووسط الكتب وهو يصارع الشوق بصمت ناصر الانسان الصامد امام عواصف الحب الي اجتاحت قلبه مر تين المره الاولى كان حب مراهقه برئ صغير ماكبر لانه مات في منتصف عمره والمره الثانيه حب ناضج صادق بداء ببرود واستوا على نار هاديه وصار باحلى نكهه
ترك كتبه الضخمه وحط راسه بين يديه وصورتها وابتسامتها تنرسم وسط الحروف المعقده
قام للكنب المطل على بلكونة شقته وهذا المكان الي يحب يرسم بخياله احلى اللوحات لها ويحاول يمرر بذاكرته صوتها ونبرتها الهاديه الي تعبر عن شخصيتها الهاديه المتزنه ضحكاتها صراخها كل انفعالاته احيانا الشوق يضنينا ونسلي انفسنا بالخيال
غمض عيونه يفضي مساحة عقله من أي شي ثاني لعل لهفة الشوق تبرد وضل على حاله مسترخي ورافع راسه لورى وطاير بذكريات عمرها قصير لكن طعمه الذ من الشهد
.......................................


بلعت ريقها من قال لها سلمان عن وجود نايف ماتعرف كيف غزاها شي من الخوف لكن كابرت ناظرت لاهلها المجتمعين وعيونها تراقبهم واحد واحد تكلمت ام سلمان الي ماشبعت من شوفها .. ليش ما قلت له يخليها شوي ما بعد شبعت من شوفها
.. قلت له بس قال مستعجل وراه شغل بكره
..الله يهداك يام سلمان ترى ماعادت بنتك الصغيره الي الي تنام بحضنك الحين صارت مره مسؤله عن زوجها وولدها >>لمعت دمعه بعينها وهي تشوف امها تكفف دموعها ونوف تنتقل بنظرها بوجيههم .. راح تظل ساره الصغيره وعمرها ماراح تكبر
بسرعه قامت من مكانها ونزلت بجسمها عليها وخطفت يدها وحبتها وحبت راسها وخدها .. بشتاق لكم يمه ياليت اروح معكم
مسحت شعرها .. لا يايمه روحي مع زوجك الله يوفقك
نوره من شافتهم ماحبت المنظر وبسرعه انسحبت لغرفتها تعبت من تكرار هالمنظر و عندها احساس ان ساره تعبانه من شي
اما ساره باستسلام قامت ..اشوف وجهك على خير يمه
شالت ولدها ومشت من وسطهم بدون حتى كلمة وداع يمكن لان اقسى شي لحظة الوداع
وصلت للحوش ونوف تتبعها بخطوه بعيده وصلت لنصه وشافت نوره تتعداها بسرعه لين وصلت قريب من ساره المقفيه وقفت على بعد خطوات منها وبصوتها المرتعش.. س اره
استدارت لها بسرعه قبل ما تعرف من الي يناديها شافتها تقرب لها وتحط يدها على كتفها .. انتي اكثر وحده تعرف وشلون كانت حياتي مع سلمان
ناظرت بصمت نظرة استفسار عن مقصدها الي مافهمته او ش تطلب منها رصت على كتفها بزياده وناظرت لها وتكلمت بنبرة رجاء .. استفيدي من تجربتي ياساره
عضت شفتها وابتسمت مجامله وهزت راسها وحضنتها حضن سريع لانها شايله متعب ابعدوا عن بعض وبسرعه توجهت للباب قبل يغلبها قلبها وتتراجع كل هذا كان تحت نظر نوف الي استغربت من حركة نوره الي ماخطرت على بالها اكبر دليل انها قريبه بقلبها منهم مع انهم ماكانوا يقولون لها كل شي رجعت لنوف الي تعدتها بدون ما تنتبه ومسكت يدها ودخلت معها

...............................
جلس بالصاله يقرا الجريده انتبه على الصراخ الي طالع من غرفة لطيفه وقبل لايقوم طلع ريانه حاط يده على عيونه قام له بسرعه وشاله
.. وش فيك حبيبي ليش تبكي
تكلم ببراءه .. ماما هاوشتني
.. ليش وش مسوي
بلجهتة الطفوليه ... ماسويت شي بس طلعت معها على السرير قالت لي روح عن وجهي
هز راسه على حال هالطفل الي يتمته امه من حنانها .. خلاص انت روح الحين وانا بعدين بوديك لبيت عمك تلعب مع عيال عمك
ابتسم وانفلت من يده وراح للشغاله الي صارت ام له بدل امه الي اهملته زياده
اما عبد الله دخل عليها بغرفتها وكالعاده ماتبي تجلس مع احد او تشوف احد
وقف قدامها وسئلها .. ليش زعلتي الولد
خزته بعيونها .. ازعجني وانا ما ني رايقه له
.. لطيفه انتي باسلوبك تخسرين ولدك وتكرهينه فيك
.. يعني لاني خانقته ترى انا امه ومن حقي ادبه
.. بس مو كذا الولد ماغلط يمكن حاول يقرب منك لانه شافك تبعدين
.. عبد الله لو سمحت لاتكبر الموضوع انا ضايقه فيني الدنيا بدون شي
.. بس ريان ماله ذنب ولا يفهم هالاعذار
هزت راسها لان عبدالله دايما يضيق عليها بكلامه ويحسسها بفشلها .. خلاص رجاء سكر الكلام راسي بينفجر
.. طيب انا باخذه اطلعه يغير جو
.. وين بتوديه ؟؟
.. بوديه عند عيال اخوي يلعب معهم
تنهدت لكن ماعارضت مثل كل مره .. براحتك

رد: ليه عمري مالقى لبرده دفا الا لقاكي

.................................................
..الصدق لو يجرح ترى دايم اريح
قسوة وضوح ولاغموض يضيع ..

ركبوا السياره ومشوا وطول الطريق وهم ساكتين كل واحد منهم يظن انه بيرحم الثاني ويضبط اعصابه لين يوصلون البيت احسن ماتصير فضيحه بالشارع نايف كان يحاكي نفسه ويشاورها بالعقاب الي تستاهله وكيف يخليها تندم وخصوصا انها عرف عنادها اما ساره تفكر وشلون تعرفه قدره وتغير هالنظرات الناريه بعيونه
ماحسوا الا وهم عند البيت نزل ونزلت وراه دخلوا للبيت نايف وقف بالصاله يستناها تدخل وهي ابدا ماستقرت رجلها في المكان كانت ناويه تكمل طريقها لفوق من شافها تعدته صرخ .. وقفي "" افزعها صوته لكن قدرت تسيطر على خوفها وتتلبس ببرود الاعصاب وتلتفت بحركه هاديه فورت دمه فيها .. نعم امر بغيت شي
مشى لها وهو يصرخ على الشغاله وياخذ الولد منها شبطت فيه .. اتركه وين بتوديه ؟؟
.. هاتيه ولاتعاندين لاني ماخذه ماخذه
مازالت ماسكته بطريقه ماتروعه فيها .. اتركه باي حق بتاخذه مني !!
.. بحق ان بيننا حساب نبي نصفيه >> قدر ياخذه منها ويعطيها الشغاله الي اخذته وطلعت من المكان
.. انت وشلون تاخذه قلت لك ولدي ماسلمه لشغاله
.. اذا اخذت رايك تكلمي وبعدين هذا ماهو موضوعننا الحين
مشت من عنده ناويه تجيب متعب .. ماعندي موضوع ثاني اكلمك فيه متعب هو الشي الوحيد الي بتكلم عنه
مسك معصمها ولفها بسرعه جهته خلى جسمها يبترم وكانت راح تطيح لوماقدرت تتوازن باخر لحظه ..انتي من سمحك لك تطلعين من البيت بدون اذني "انا ماحذرتك !!
المتها مسكته ليدها .. أي اتركني كسرت يدي
لوا يدها زاياده يأكد لها انه ماراح يرحمها .. واكسر راسك >> صرخ .. ردي علي ليش طلعتي
تكلمت وهي تتئلم وعيونها بهروب وعوده عنه مره تحاول تخفي الالم ومره تحاول تبين انه قادره على مواجهته .. ماتقدر تمنعني عن اهلي انا قلت لك وانت رفضت
.. ومادامك عارفه اني رفضت ليش تروحين >> كان يكلمها ويحرك يدها بقوه وهي صابره عشان ما توريه لحظة ضعف عاشتها بين يديه
.. لان الظاهر لو باطيعك بكل شي بتحرمني حتى الهوا اتنفسه
قوا من هزه لها بيده وبيده الثانيه كان يأشر عليها .. اسمعي هالمره بمشيها بمزاجي لكن لو مره ثانيه تعتبين الباب احش رجولك حش
سكتت واكتفت بنظره تحاول تستخدمها كاخر سلاحه لها قدامه فورته صرخ مره ثانيه .. فاهمه؟؟
بدا وجهها يتقلص وتبين علامات الالم عليها .. فاهمه بس فك يدي كسرتها
اخيرا حس بشي من النشوه لانه قدر يوصل ولو لشي بسيط من الي كان يتمنى يشوفه نفض يدها من يده .. انا كنت ناوي اذبحك واشرب من دمك لكن لا الموت راحه وانا مابيك ترتاحين
رفعت راسها بعد ماكانت تناظر ليدها الي صارت حمرا من لويه لها وتفركها .. فهمني وش تعاقبني عليه ماذكر اني سويت شي يستاهل كل هالعقاب
ابتسم لها قبل ما يلتفت .. قلت لك كفايه انا اعرف واعاقبك بقدر ذنبك >> كمل استدارته وطلع على الدرج " لكن قبل لايتوسطه سمع صوتها العالي ولحن الحقد والحيره تبرق بين حروفها .. اطلع من حياتي واتركني اعيش اربي ولدي انت ناسي انك ضيف غير مرغوب فيه وهالبيت بيت نوا .. >> سكتت قبل تكمل كلامها لانها تذكرت شي كانت ناسيته ووطت راسها يوم مال بنص جسمه وحط يديه على الدربزين
.. الظاهر انتي الي نسيتي ان هالبيت بيتي وانتي الضيفه الغير مرغوب فيها >> مشى وتركها تحسست اقرب مكان تجلس فيه
فعلا كانت ناسيه ان البيت بيته لكن ابدا مايبرر الي يسويه فيها في شي ورا قسوته عليها

...........................................


بعد ماترك ريان مع عيال عمه مر امه الي فاجئته بالخبر الي قالته له وحطته بحيره رافضومقتنع بنفس الوقت راحم لطيفه وراحم نفسه محتاج زوجه تعوض النقص الي عمر لطيفه ماحاولت تكمله متردد وحاب يرضي امه


.. خلاص انا خطبت لك وماعاد لك عذر
.. وشلون يمه بدون ماتقولين لي
.. لو باقولك راح ترفض وتطلع بحجه جديده
.. كان مصبره شوي يمه مايصير تخطبين بدون علمي لازام اكون مقتنع
.. انت مانت مقتنع بفكرة الزواج كلها وماراح توافق على أي بنت الا اذا بتحرج امك مع الناس
جلس على الكنب مقابلها وفرك عيونه .. ومن هي البنت ؟؟
فرحت وهي تحس انه استسلم ورضح للامر الواقع .. هذي وحده قالت لي عليها وحده من معارفنا تقول بنت مؤدبه وحلوه وتناسبك انا قلت لها تكلم امها وتاخذ لي موعد
ناظر لها بشك.. وشلون يعني تناسبني
وقفت عند اصعب نقطه بالموضوع .. ا البنت مطلقه
.. مطلقه ؟؟
انطلقت بسرعه بالكلام .. أي ياوليدي تزوجت ولد عمها وماتوفقوا وطلقها
..وليش طلقها اكيد في سبب
.. زوجها كان صايع وسكير وكان دايما يضربها
.. يايمه مو كل شي نسمعه نصدقه يمكن العيب منها هي
.. انا متاكده من الكلام واقدر اجيب اسم طليقها وتقدر تسئل عنه وعنها ياوليدي انا اخترت لها لك لانها حملت من قبل وسقطت وان شالله الله يرزقك منها
.. بس لطيفه يمه ماودي ازعلها
.. انت ماقصرت معها تحملتها سنين واذا هي تحبك بتضحي مثل ماضحيت انت جا الوقت الي تشوف نفسك ياوليدي
جلس مقابلها وفرك عيونها ..خلاص يمه كملي الي بديته
اخيرا نطقها نطق الكلمه الي تمنت تسمعه سنين كانت عارفه انه ماراح يغضبها ومن زمان كانت تقدر تسوي هالشي لكن تريثت لعل وعسى يهتدي من نفسه .. الله يكتب الي فيه الخير
...........................................

ياصدري اللي غزتك البارح الضيقه
لليوم وانته بوسط الضيق ياصدري

في جده

بدر كان مقابل الاب توب وغارق بشغله وبنفس الصاله كانت مها جالسه والاملزمه بحضنها وهي تناظر قدامها وتحرك شعرها بالقلم
دخل مشعل مستعجل لكن هدا حركته يوم شاف السكون يلف المكان الا من صوت طقطقة بدر بجهازه مشى على اطراف اصابعه لين وصل عند مها وباعلى صوت ..بووووووووم
وقفت على حيلها وطارت الملزمه والقلم من يدها اما بدر رفع راسه بسرعه ما ارتاع لانه تعود على حركات مشعل
مها .. مشيعل حسبي الله على شيطانك وقفت قلبي
..هههههههههههههه شكلك يجنن وانتي خايفه
.. هين يامشعل ان ماقلت لابوي ماني مها
شاركهم بدر .. للحين ماتعودتي على حركات هالمطفوق
جلست .. حسبي الله عليك من ولد طيرت الي ذاكرته
.. عاد صدقتك انك تذاكرين انتي كنتي سرحانه شكلك وصلتي للرياض >> وهو يغمز بعينه
احرجها بكلامه او يمكن لانه عرف لها .. مشعل انقلع عن وجهي لا به الي برجلي على راسك
.. افا مهاوي اخوك حبيبك لاني مزحت معك تسوين كذا
فتحت عيونها .. اخلص وش تبي ؟؟
.. ابيك تلعبين معي بلاي ستيشتن
.. تدري انك فاضي الناس على وجه امتحانات وتذاكر وانت بتلعب ذاكر يابابا بدال هالاستهترار
عرف انها ماراح تلعب معه.. اروح العب مع نجود هي الي ماتردني اما انت خليك سرحانه بحبيب القلب
ركض وهي وراه وبدر يضحك عليهم ... ههههههههه والله غير جوك مشيعل اشغلك شوي بدال مقابل هالكتاب الي مامنه فايده
جلست .. هالولد يرفع الضغط يخليك تعصب غصب
.. مها انتي لك كم يوم متغيره وش فيك بينك وبين فهد شي
.. الي بيني وبين فهد مشكله بسيطه كل يوم تصير يمكن انا الغلطانه يمكن هو الغلطان بس انا مشغلني نايف
.. نايف وش فيه ؟؟
.. مدري ماعاد مثل اول يتصل و يسئل حتى لما اكلمه احس انه يبي ينهي المكالمه بسرعه
.. تتوقعين غيره الزواج
.. لا لا نايف فيه شي مغيره قبل الزواج
.. يمكن مايبي يتزوج وابوي اغصبه
ابتسمت وسئلته .. انت لوكنت بمكانه بتواقف
هز كتفه .. مدري بس يمكن عشان خاطر ابوي بوافق
.. تدري يا بدر ان نايف كان رافض ويوم ابوي بغا يزوجك ساره وافق علشانك
رفع نظره لها وارمش بسرعه .. معقوله ماحد قال لي
.. عشان تعرف قيمته
.. انا عارف يامها نايف ماعتبره اخوي اعتبره ابوي
.. الله يوفقه ويعوضه خير ويقدره على تربية هاليتيم


هامت بي الدنيا وضاقت في عيوني الامكنه
والفرح غايب وضايع في متاهات
ليت السعاده تقترب مني وتصبح ممكنه
ليت الحزن ماعانق جروحي ولالحظه يبين


بعد ماودعت اهلها حست بفراغ ووحشه تملئ روحها الرقيقه اهلها سافروا وساره راحت لبيتها وناصر مسافر اضافه على الحيره الي تعيشها خليط من اشياء مريره تصبغ حياتها رجعت لبيتها وجلست لحالها تلتفت عيونها بالصاله العريضه المتكلف بديكورها عواصف قويه من الغربه تهزها بعنف
اغرورقت عيونها وماحست الا بصوت جوالها رقم غريب لكن بدون تفكير ردت .. الو
.. السلام عليكم
.. وعليكم السلام من معي
.. انتي نوف ؟؟
.. من معي ؟؟
.. انا هدى
وقفت على حيلها .. خير وش تبين بعد
.. لحظه لحظه يانوف انا هالمره كلمتك ابي مصلحتك وابيك تسمعيني
.. ماراح اسمعك وبعدين وشلون جبتي رقمي
.. انا اخذت الرقم من خالتي
.. خالتي ! مستحيل خالتي تعطيك الرقم
.. تقدرين تسلئينها بس ارجوك يانوف اسمعي كلامي واذا ماعجبك سكري وانا راضيه
ترددت قبل تعطيها الموافقه والاذن بالكلام .. قولي الي عندك واختصري
..الي بقوله لك ان ناصر حبك بأخلاص واذا كان غلط هذا ماينفي حبه لك
.. هذا الي تبين تقولينه وبعدين وشلون استنتجتي يمكن هو الي قالك !!
.. ارجوك يانوف اسمعيني للاخر وتاكدي ان الي سبب المشكله بينكم ماهو اول كلام وصل ناصر وصله قبله كلام ورد عليه رد قاسي
.. من الي قال له هالكلام ؟؟
بخجل ردت لكن قرارها ماراح تتراجع عنه ..انا
ابتسمت بستهزاء .. وش الرد القاسي الي رد عليك فيه ؟؟
.. ضربني
وقف كل الي كان يتحرك بجسمها من هول الصدمه .. اضربك ؟؟؟؟؟
.. أي يانوف ضربني علشانك ولاني قلت كلام مو زين عنك وهذا الي خلاني اتاكد من حبه لك وانك انتي الي ملكتي قلبه
.. وش مصلحتك من الي كان يحرضك ؟؟
.. مالي مصلحه الا اوهام انه ممكن يطلقك ويتزوجني والي كان يحرضني احسن لك ماتعرفينه
.. طيب والحين وش المطلوب مني
.. يعني بعد كل هالي قلته ماتدرين وش المطلوب منك "سامحيني يانوف
سكتت تفكر بالكلام الي قالته ردت طلبها .. سامحيني يانوف
استنشقت شوية هوا .. الله يسامحك
.. صدق يانوف سامحتيني
.. لهالدرجه يهمك السماح
.. اكيد يهمني ويهمني اكثر انك تسامحين ناصر لانه كان ضحيه مثلك وتعذب مثلك
.. هدى انتي طلبتي اسامحك وعطيتك طلبك والي بيني وبين ناصر شي يخصنا احنا
.. صح بس لاني السبب بالخلاف ودي اكون سبب بالصلح
.. ممكن تسكرين الحين
.. اسفه لاني ازعجتك مع السلامه
وسكرت بدون ماترد عليها
رجعت لوضعها ولتاملاتها ولعالمها الموحش رغم الاناره الي اشعلتها هدى بكلامها بهاللحظه محتاجه شي ماتدري وشو محتاجه لاحد تكلمه وتفضفض له خطرت على بالها ساره لكن وين المسافه بينهم صارت بعيده ابعدها القدر



...انا ليل (ن )فقد صبحه ...
انا اللي ضره الواقع وتبخر بالهوا حلمه

انا اللي عاش بالحاضر وهو مضا مأسور


من تركها" ليله مرت ماشافته اخذت متعب من الشغاله وجلست بغرفتها حست بشئ من الانكسار والاهانه ماتدري عن اهلها سافروا ولا لا انقطعت عن العالم من دخل نايف بحياتها" ماتدري عنه موجود ولا طالع تتحرى بأي لحظه يدخل عليها كانت حذره بتصرفاتها حتى بداخل غرفتها كأنه بسجن حست بطرق ناعم عرفت انها الشغاله
.. ادخل
تقدمت لداخل الغرفه وبيدها صينيه فيها اكل خفيف .. مدام انتا مافي اكل
ابتسمت لها وتكلمت بكلام مافهمته .. والله فيك الخير طلعتي احسن منه رحمتيني وهو مادرى عني
..نعم مدام
... لا مافي شي نزلي الاكل وخوذي اغراض متعب نظفيها
.. اوكي مدام
نزلت عندها الاكل وطلعت واتركتها لحالها بسجنها مع ولدها حطت راسها على طرف السرير الي وراها وصفنت بنهاية هالحال ولوين راح يوصل


................................................

كل ماضاقت بعيني يامعيني ابتسمت وصارلي ليلي نهاري
فلا سكت تروح بالطيش تحكيني رجعي بطبعك وباسلوبسك حضاري
ماذبحني فيك الا انك تبيني وماسحرني الاحكاك الاستعاري






دخلت عليها ام ناصر بعد مشوارها " استغربت من وضعها لامه جسمها الصغير على الكرسي الهزاز بزاوية الصاله وحاطه راسها بين رجولها وتهز نفسها بحركه هاديه مسحت شعرها لانها توقعت ضيقتها بسبب سفر اهلها حست بها ورفعت راسها .. سافروا اهلك ؟؟
هزت راسها .. أي اليوم
جلست مقابلتها وابتسمت .. عشان كذا ضايقه
بللت شفتها اليابسه .. خالتي انتي عطيتي هدى رقمي ؟؟
.. أي والله يابنتي ليه هي ضرتك بشي
..لا لا ياخالتي هي اتصلت تعتذر
..زين والله خفت تأذيك بس حلفت انها ماتبي الشر عاد انتي حره تتصرفين معها بكيفك هذا قرارك بس يابنيتي ترى المسامح كريم
تنهدت من الاحساس الغريب .. الله يسامحها " وين كنتي؟؟
.. طلعت عند جيراني البيت صاير فاضي من بعد سفر ناصر وانتي تطلعين لبيتك اهلك واجد
..خلاص الحين سافروا بجلس في البيت ماراح اطلع الا للجامعه "وبرقت عيونها بدموع ساحت بسرعه من الحراره والضياع الي بداخلها
.. انتي ببيتك وبين اهلك البيت بيتك يانوف واحنا ضيوفك
.. تسلمين ياخاله الله اعلم بحالي لولا وجودك >>
.. بس مابي اشوف دموعك ابي اشوف نوف الي اعرفها لا تضايقين نفسك يايمه مصيرهم ان شالله بيرجعون
..احس الحياه مممله مالها طعم بعد اهلي وبعد ناصر حتى ساره انشغلت بحياتها صارت بعيده عني
.. ان شالله عن قريب تتصلح الاوضاع >> قامت ام ناصر للتلفون الي نبهها صوته رفعت السماعه .. السلام عليكم
ناظرت لنوف بابتسامه مافهمت معناها .. وعليكم السلام هلا والله بهالصوت
..هلابك يالغاليه وشلون صحتك يمه وشلون ابوي
..بخير جعلك بخير نبي بس شوفتك
.. الله كريم " وش اخبار نوف ؟؟
.. انا اقول هالاتصال عشان نوف كأنك حاس
خاف يكون فيها شي .. ليش يمه وش فيها
.. لا يايمه لاتخاف مافيها الا العافيه بس متضايقه لان اهلها سافروا
.. طيب يمه تقدر تكلمني ؟؟
قررت ام ناصر تحطها قدام الامر الواقع لعل كلامه يريحها واحساسه انه قريب منها يريحه .. أي يايمه تقدر بس لحظه شوي
عقدت حواجبها وهي تسمع ام ناصر وتشوفها جاي والتلفون بيدها مدت لها السماعه وهي تدري لكن سئلت .. من ؟؟؟
ابتسمت لها خالتها وهي تراقب عيونها الي تراوغ .. هذا ناصر يبي يكلمك كانه حاس فيك
قعدت بسرعه تناظر بعيونها التعبانه بين السماعه وبين ام ناصر احتارت ماتدري كيف تتصرف ترفض ترد عليه وهي تحس فعلا انها بحاجه لقربه وانها تسمع صوته يمكن اكثر شي تتمناه بهالوقت ارتفعت يدها بربكه للسماعه واخذتها وبصوتها ذو النبره الهاديه .. الو
توقع انها ترفض تكلمه بس تمنى يحسسها بقربه وبالامان الي فتقدته صارت وحيده ويبي يكون لها مثل ظلها الي مايفارقها ويبي حبه واحساسه يطوي كل المسافات ويوصل لها .. مساء الخير
نوف كانت تستمتع بهالاحساس وتطرب اذنها وروحها بصوته .. مساء النور
بصوت شجي كان يعبر عن كل احساسه بدون مايوصفه .. وشلونك يانوف اشتقت لك
لامست كلمته كل شي منها عقلها قلبها حستها مثل البلسم الشافي الي ابرى كل عللها لكن الى الان ماتقدر تفصح انصدمت وتخاف تجود له باحساسها ويخذلها وهي ماعاد تتحمل .. الحمدلله بخير
من جهته عارفها وعارف انها تقسى على نفسها بس حب يكون هو احن عليها من نفسها .. امي تقول انك زعلانه لان اهلك سافروا
سكتت وماردت ولانه عرفها تاكد انها تسمعه بس تسكت .. اهلك ماهم بعيد اذا احتجتيهم وصدقيني انا بعد اقرب منهم بس اشري " انتي ببيتك والي تحتاجينه بيوصلك
مسحت دمعتها بطرف اصبعها .. انا ابيهم قريبين مني ماني محتاجه الاقربهم >> وقفت عند هالكلمه
كان وده تعبر عن شوقها له وحاول يفتح صندوق صدرها بكلمته .. انتي متى امتحانتك
تاكدت ان ورا سؤاله هدف .. بعد عشر ايام" ليش ؟؟
.. ابد هانت مابقى الا مده بسيطه وتروحين لهم
عرفت مغزاه من الكلام وزلقت من لسانها كلمه عجزت لا تتحكم فيها .. بس انا ودي اشوفك
انبسط من كلمتها بس استمر معها .. دامك زوجتي وعلى ذمتي حتى لورحتي باجيك واشوفك وتشوفيني قبل ل .... وقف عند كلمتها وقبل تلاحظ .. والحين ابي منك تشدين حيلك وتنجحين ولا تضيعين ترم كامل بسبب كم يوم
اسئلته شي بسرعه خطر على بالها .. الي يشوفك توصيني على دراستي وعلى نفسي مايقول تبينا ننفصل
عرف مراوغتها وعرف انها بدت تلف وتدور وتحاول توصل له شي بشكل غير مباشر .. لاتقولين تبينا انتي الي طلبتي الانفصال وانا وعدتك انفذ لك كل الي تبين ولاني للحين احبك وكل ألي سويتيه ماغير هالحب بقلبي ورغم كل شي اتمنى لك الخير
قرر يوقف هو هالمره لانه كل مره هي تطلب نهاية النقاش ..والحين انا بسكر بتجيني الفاتوره ضربه " يالله مثل ماوصيتك لاتفكرين باي شي الابدراستك واهتمي بنفسك
الجمها كلامه وحست انها بشكل او بأخر خذلها بعد ماكتشفت موقفه مع هدى وانه مد يده عليها على شانها وهو تاكد من انه نجح معها فكرت شوي بالاهتمام بصوته وتذكرت الانفصال طلبها وان اتمامه وعده لها ابتسمت رغم الدموع وقامت من مكانها تذاكر وتتناسى كل شي على القليل هالفتره

رد: ليه عمري مالقى لبرده دفا الا لقاكي

بعد حوالي خمس ايام


رفعت راسها بعد ماخلصت امها من الكلام .. والكل يمدحه " هاه وش قلتي
حطت عينها بعين امها ..تعرفين يمه من الرجال الي تتكلمين عنه
..لا والله يابنيتي ماعرفه شخصيا بس ابوك سئل عنه ومدحوه له وقالوا انه ولد ناس زينين
.. عبدالله يمه الي لك ساعه تتكلمين عنه وتقنعيني فيه انا اعرفه اكثر منكم كلكم ولو انكم سئلتوني انا بعلمكم عنه
.. اسم الله عليك يابنيتي وش تخربطين منين تعرفينه
.. هذا زوج لطيفه بنت خالة نوال صديقتي
استغربت امها .. هذا هو انا قالوا لي انه متزوج وعنده ولد بس والله ماخطر على بالي انه هو
.. وهذا انتي عرفتي وش رايك ؟؟
.. اول قولي وش الي تعرفينه عنه
..كل الي قالوه عنه صدق رجال ماشالله عليه دين بار بامه حنون على زوجته وابو مثالي
.. اجل ليه يابنيتي يابي يتزوج
.. لانه مثل ماقلت لك بار بأمه وهي الي تبيه يتزوج
.. طيب وزوجته ؟؟
.. زوجته يمه ماتصلح تكون زوجه لرجال مثله لطيفه الله سخر له زوج تحسد عليه واخوان ماشالله عليهم وابو وخوات كلهم كانت هي عيبهم الوحيد اهملتهم كلهم وقررت تعيش لنفسها
.. ماكنك تبالغين يابنيتي حطيتي كل مسبات العالم فيها
.. لا مابالغ انا عاشرتها مده اكتشفت انسانه غريبه تحسد حتى اخوانها
مطت شفتها مذهوله من كلام هدى ومستغربه معرفتها له .. طيب وش رايك
هزت راسها بتاكيد .. موافقه
.. وشلون وزوجته
.. لو اني ماعرفت انه هو ماكان وافقت عبدالله يايمه فرصه لاي وحده ناويه تعيش بظل رجال يكون لها ظهر تستند عليه وتقدر ترتاح وتأمن على نفسها معها انسان مخلص لابعد حدود الاخلاص ولطيفه ماقدرته وان شالله انا الي بقدره
.................................................. ..............

اليوم زواج نوال

حفله مختصره وضيقه جدا جدا عشا بسيط ببيت اهلها مافيه الا المعرس وعياله وابوها واخوانها
انتهت المراسم البسيطه وارسل واحد من اخوانها يقولها تطلع مرت من عند امها الي جالسه بالصاله وتبكي
.. ماراح تودعيني يمه !!
..ياخوف قلبي ان غيبتك ماهي طويله
.. انقهرت من امها .. الشرهه على انا الي جايه اسلم عليك >> وطلعت تجر فستانها
ناظرت امها لظهرها .. ماكان له داعي هالفستان كان وفرتي حقه مع الي وفرتي
التفت لها بقهر حتى امها صارت ضدها تاففت وكملت طريقها بدون حتى ماترد

...........................................
في الشرقيه اتصلت على ساره كلمتها ماحست انها مرتاحه وهي دايم تشيل همها بالذات لانها متهوره ولسانها يعجزها
جلست مده لحالها لين دخلت نوره وسلمان راجعين من السوبر ماركت يتقضون للبيت جلسوا معها ويسولفون وهي ماهي معهم
..اقول يمه كنك تعبانه
.. اكيد متصله بساره ونوف خالتي واعرفها
ضحكت عليها ..هههههه وش دراك ؟؟
.. ادري فيك من تكلمينهم تنقلب حالك ماكنا حنا عيالك بعد
.. أي يمه ترى نوره تغار ودايما تقولي انك تحبين ساره ونوف اكثر منها
فتحت نوره عيونها واشرت على نفسها ..انا ؟؟ متى قلت لك
.. ذاك اليوم قلتي حتى قلتي انها تحبهم اكثر مني
.. سلمان لاتقولني كلام ماقلته
..هههههههه ماعليك منه يانوره سلمان يمزح معك
حمر وجهها وحست انها بتبكي .. والله ماقلت ياخالتي يلعب عليك انا ماغار منهم بالعكس انا احبهم مثل خواتي
.. أي واضح
.. خلاص ياسلمان بكيتها نوره انا اعرفها ماتفكر كذا
.. الله وناسه من زمان ماشفتها تبكي
غلت امه بعيونها ..وش فيك صاير بزر وش خليت لبنتك
.. عن اذنك ياخالتي بروح لغرفتي>> وطلعت من عندهم تركض وسلمان مبسوط وهو يشوفها معصبه
قعد هو وامه الي هزئته على حركته مع نوره وهي عارفه انه يبي يستفزها
......................................


تمطر لغيري من حنانك سحابه..
ويموت قلبي ظامي بين اياديك ..




ساره بغرفتها عايشه للملل والضيقه تمددت على الكنب ولفت رجولها على بعض وتناظر لديكورات الغرفه استرخت شوي وهي تلعب بطرف شعرها وتبرمه على اصبعها جلست بسرعه وهي تسمع صوت الباب ينفتح بسرعه .. خير وش فيك داخل بدون استئذان
ناظر لها بأحتقار .. ماني محتاج استئذن منك اذا بغيت ادخل >> وهو يتلفت.. وين متعب ؟؟
صغرت عيونها .. وش تبي فيه ؟؟
وهو يدخل للغرفه .. مالك شغل بسرعه جهزي اغراضه باخذه معي
.. وين بتاخذه ؟؟
.. انتي ماتفهمين قلت لك جهزيه من غير اسئله
.. ماراح اجهزه وماراح تاخذه
.. انتي ليش عنيده
.. يعني اذا خليتك تاخذه باعجبك
هزراسه بابتسامه .. ماراح تعجبيني مهما سويتي لاتحاولين
حقدت على نفسها لانها تعقتقد انه فهمها غلط بس هو عارف قصدها بس حور الكلام على كيفه .. مايهمني اعجابك بس متعب ماتاخذه
وقبل لايتكلم انتبه لجواله.. جهزيه على ماكلم واجي
.. هلا يبه
.. هلابك ياوليدي وشلونك وشلون متعب وامه
.. الحمدلله طيبيبن انتم وش اخباركم
..بخير اسمع يابوك اختك بكره الصباح طيارتها وابيك تستقبلها
.. منهي ؟؟
.. مها
.. ليش يبه وش عندها
.. انا ابيها تقعد عند ساره اعرفك بتكون دايما مشغول
.. زين يبه بكره ان شالله انا في المطار
.. على خير مايحتاج اوصيك اهتم فيها
.. توصيني على مها وصها هي علي
.. يالله في امان الله
..في امان الله
بعدمكالمة ابوه قرر يأجل الزياره لين تجي مها ويروحون مع بعض وقبل يطلع من البيت رجع فتح جواله وطلع الرقم "اتصال "


.........................................


طلع لغرفته بعد شوية استهبال على امه غير ملابسه ورمى نفسه على السرير فتح جواله بعد ماشاف الاسم
.. انت وينك ؟؟
..الناس تسلم اول
.. يوه فهد والله رايق
.. اوف الاخلاق تجاريه " انا البيت لاتقول لي ابيك لاني بانام
.. دجاجه انت الساعه ماصارت تسع ونص
.. مانمت الظهر ووراي شغل بدري
..لا بكره فض نفسك الصباح ابيك
.. ياكثر اشغالك وش تبي؟؟
.. مالك شغل انت فض نفس وانا بمرك الساعه ثمان بالبيت
.. طيب فهمني وين تبي تاخذني
.. تطمن ماراح اسوي لك شي بس خلك جاهز بدون كثرة حكي
.. اوكي الله يعيني عليك
.. يالله الحين انثبر نام>> وسكر التلفون بوجهه
هز يده .. هذا يكلمني كني اصغر عياله >> وهو يزين المخده تحته .. بيذلنا بهالنسب مايسوى علينا انثبر وانام احسن لي والصبح باشوف وش عنده >> قال اخر كلمه وهو يتثاوب ويتذمر مايدري نايف وش بيفاجئه فيه
.................................................. ...........................


واقفين عنده كلهم وهو يكلم نايف وبعد ماخلص .. انت من صدقك يابو نايف تبيها تروح
.. شايفتني فاضي امزح معكم انا حجزت لها وكلمت نايف يستقبلها
..طيب ليش يبه ؟؟
.. يعني ماتبين تروحين
.. لا موقصدي بس وش السبب
.. والله بدون سبب محدد هي خلصت امتحانات وبدال ماتقعد بملل وخوانها يذاكرون قلت تروح عند نايف ابيها تصير حلقة وصل بينهم لانها قريبه منهم اثنينهم
.. وبعد عشان تقرب من بعض الناس
.. مشيعل تعليقاتك الي زي وجهك وفرها لنفسك
.. ماعليك منه روحي جهزي شنطتك وراك سفره بكره بدري
.. اصلا احسن شي بهالسفره اني بريح عيوني من شوفته المتعبه للعين
.. لا وانتي الصادقه احسن شي انها للرياض بالتحديد
ودها تخنقه لكن محترمه ابوها ...سخييييييف
رفع لها حواجبه .. طالع عليك
.................................................. ...


لوللقلوب قلوب ماتجرح اقلوب
ولوللزمان احساس محد شكى باس
ياكيف رغبت قلبه بدموعه تذوب

بعد الوصل نحياء على هامش انفاس
نهدر اماني عمر والوقت محسوب
نبكي جفا ناس وناس تبكي جفا ناس

سمعت مكالمته مع ابوه ولا فهمت منها شي بس خمنت ان في احد بيجي من جده ما سوت الي قاله لها كانها ناويه تقهره
لكن قهرها يوم دخل الغرفه وبكل برود .. نومي الولد ماراح اخذه
ثارت منه بارد وهي تفور .. ومن قالك اني بخليه يروح معك
مشى لها .. بتخلينه غصبا عنك لو ابي لكن انا هونت من نفسي
غيض طلع منها بدون ماتحس .. اصلا انت انسان مريض ومرضك ماله علاج الا الحقر
حط وجهه عند وجهه .. من المريض !!
تكلمت بتحدي.. انت مافي غيرك
صفقه قويه حرفت كل جسمها خطف فيها فمها الي حطت يدها عليه تحسس المكان الي تخدر من ضربته وجهت له نظره حاره اكلته فيها ..جعل يدك للكسر ان شالله
طريقته الي يفضلها لوا يدها ورا ظهرها .. صدق ماتستحين وانا بربيك من جديد عشان تتعلمين تقصرين لسانك
وهي تتألم .. تحلم والله مامشي على كيفك لو تحرقني لو تقطع من جلدي لاعلمك منهي ساره
فورت دمه بعنادها يابي يهنها وهي تزيد بعنادها دفعها على الاراض بعد كف ثاني على خدها .. مايحتاج تعلميني اعرفها وحده حقيره ماتربت
صرخت بارضها .. انت الحقير
ركلها برجله على عضدها ..ولا كلمه مابي اسمع صوتك
.. ماتقدر انت ضعيف الرجال مايمد يده على مره
جلس قريب منها مسك ذقنهابقوه تحسه تكسر من .. ماراح يأثر كلامك فيني ولو الذبح مايريحك كان ذبحتك
اخذ الجوال الي طاح من جيب قميصها وطلع وهو ماشي اخذ منديل مسح دمها الي علي يده وهي بأرضها وتلمس شفايها الي صار الدم يصب منها
.................................................. ...
قام من النوم مصحصح دبر نفسه بدوامه واستئذن لبس وجلس ينتظر نايف يمره مثل ماتفقوا وقبل الساعه ثمان بدقايق اتصل فيه
.. جاهز
..اي انت وينك
.. دقيقتين انا قدام البيت اطلع
.. طالع بس لاتلطعني اخاف الشمس تخرب بشرتي وبعدين انت المسؤل
تكلم بملل .. اقول فهد انت مفطر على راديو
..ههههه حلوه بس ماقلت لي وين بنروح
..خلصت الدقيقتين وصلت اطلع وعن الهذره
.. طالع لك يالله
وفعلاطلع ولقاه يوقف بسيارته
.. صبح الخير
..صباح النور
.. نايف ترى ماطلبت منك شي بس علمني وين بتاخذني
وهو يلف السكان .. للمطار
.. ليه بتسافر ؟؟
..انت وش فيك صاير غبي
.. والله انا مثل مانا بس انت الي صاير كبريت
.. ماني بستقبل رجال للمطار
.. وانا وش دخلني ساحبني معك
.. هذا عزيز عليك واكيد بتفرح بشوفته
سكت لحظه يفكر من يكون .. منهو
.. اذا وصلنا للمطار بتعرف
.................................................. .............

..والله يمه متصاعب اقول لها وفكرت اكلم اخوها واخليه يبلغها بطريقته يمكن يقدر يهديها لو تثور
.. اكيد بتزعل بس راح ترضخ اذا شافت مافي فايده من الي تسويه
..ماودي اقول لها ولاودي تعرف من غيري
.. يايمه واجهها وهي معذوره بالي تسويه بالاول بس اذا فكرت بتتذكر ان زواجك صار شي اكيد
.. الله يعيني على مواجهتها
.. امين يعني الملكه يوم الخميس
.. أي والزواج بعدها باسبوعين ماراح نسوي عرس حفله صغيره هنا بالبيت وخلاص
.. بكيفك بس يمكن البنت ماتبي
.. اذا اقتنعت فيني ماراح تهتم بشي ثاني وبعدين انا وهي ماهي اول مره نتزوج يعني لازام نختصر السالفه

رد: ليه عمري مالقى لبرده دفا الا لقاكي

وصلوا المطار وجلسوا ينتظرون الطياره فهد يسئل ونايف حاقره اعلنوالوصول وقف نايف وفهد يسوي زي مايسوي وهم ماشين ..ياخي احس شكلي غلط مثل الاطرش بالزفه
.. امش وانت ساكت وصلت الطايره
نفخ بتذمر منه صاير ماعنده وسط يا بارد ياثاير وقفو شوي مانتبه فهد للمره الي اشرت لنايف بيده لكن حس بنايف يوم رفع يده .. هاه وصل وينه
... وصل وصل
قربت لهم مها وهم واقفين على طول عرفها لانه مستحيل يخليه يروح يستقبل وحده من خواته وهو معه الا اذا كانت هي مدت يدها لنايف وسلمت عليه ارتبكت وهي تشوف فهد معه بصعوبه مدت يدها لانه تصاعبت انها ماتسلم عليه .. هاه عرفت الرجال الي بنستقبله
.. عرفت احلى رجال والله >> التفت لها .. الحمدلله على السلامه
بحرج منه وحيا من وجود نايف .. الله يسلمك
.. وش هالمفاجئه الحلوه وهالصباح الاحلى
دفعه نايف مع كتفه .. اقول ماهو وقت غزل امش نوصلها للبيت " مشو وهي تتبعه قرب فهد من نايف
.. اقول ابو نسب
.. اشوف صرت ابو نسب وش عندك وش تبي ؟؟
.. ابي سيارتك ساعه
.. وسيارتك !!
.. سيارتي عند البيت بنزلك عند بيتك وارجعها لك
.. خلاص نزلنا انا ومها وخذها ماتغلى عليك >> لانه حس وش يمهد له
.. لا ابيها ومها فيها اذا مها بتنزل خلها لك مابيها
..هههههههه والله عارف حركاتك افكر من هنا لين نوصل البيت
تقدمت منه مها بسرعه ومسكت يده التفت لها .. نعم مها وش تبين ؟؟
..نايف ودي اشتري لمتعب شي تعرف ابوي ماقالي الامتاخر واماداني اسوي شي
.. خلاص امشي معي هناك محل هدايا نشتري الي تبين
.. فهد اسبقنا للسياره واحنا بشتري غرض ونلحقك
.. سواق عندك انا بروح تراها زوجتي يعني يصير اروح انا وهي بس وانت تسبقنا للسياره
.. لاحول ولاقوة الا بالله انا من زمان قلت انك بلشه بس ماحد صدقني خلاص امش معنا
ضحك عليه فهد ومشو لمحل هدايا لفت انتباها على طول دب كبير بلون سكري طلبت من البياع يعطيها اياها قرب لها نايف .. صغير يامها مايعرف هالاشياء
.. الصغير يكبر ان شالله انا عجبني وباخذه
مد فهد يده على لعبه وشغلها طلعت صوت عالي وقريع وازعاج وانوار ضحكوا مها ونايف .. ياقفك لقفاه
.. وش دراني قلت بجربها
تكلمت مها .. باخذها بعد الي بعمره يحب الاصوات والانوار
استانس فهد انها اعجبتها .. اقول مهاوي ماتبيني اطلع وحده ثانيه
رد عليه نايف .. اذا بتطلع بتحاسب
.. اذا مها تبي أي شي انا بحاسب عنه انت مالك دخل
اخذوا اغراضهم وطلعوا من المحل وفهد اشترى بوكيه ورد اهداه مها
.................................................. ............

دفنت وجهها بيدها ماتبي تشوفه بعد الي قاله لها كانت حاسه هالايام عنده شي وده يقوله ويتراجع
جلس معها بنفس الكنب .. لطيفه مابيك تزعلين مني انا تزوجت لاني ابي عيال يكونون سند لي واخوان لريان
.. بعد عني لاتكلمني انت تغيرت ياعبدالله وطاوعت امك بكلامها
.. ليش يالطفيه ماقدرتي صبري عليك
.. هذا شي ماهو بيدي
.. وانا مالمتك بس انتي بعد لاتلوميني
..خلاص اتركني لحالي
.. مايهون علي اخليك تاكلين بنفسك
.. اطلع واتركني لحالي انا طول عمري لحالي ماحد يدري عني
ومازال الكلام بينهم يهديها وهي النار تشتعل داخلها لان هذي اللحظه أي مبرر ماراح تفهمه او تقتنع فيه او يبرد حرتها بس يمكن اذا هدت تفكر فيه

............................................



نزلوا كلهم من من السياره .. وين يالحبيب ؟؟
.. خبل انت انا ماقلت لك باطلع مع مها
عفس وجهه بتفكير ..مصمم يعني
..اكيد
.. خلاص اسئلها
.. ماعليك هي بتوافق ماتقدر ترفض لي طلب >>التفت لها .. هاه مها وش رايك اذا ماتبين ماعليك منه
قعدت تطالع لهم وهم وافقين ينتظرون ردها تكلم فهد .. السكوت علامة الرضا
ضربه على كتفه .. اصبر انت لاتنسى انها زعلانه " تروحين يامها
اخيرا .. اروح اذا ماعندك مانع
.. ياسلام " هذي هي وافقت يالله يالله قبل تغيرين رايك
ضحكت عليه وركبت معه بسيارة نايف ضرب لنايف تحيه ومشى وتركه يضحك عليه صرخ عليهم وهو ياشر لساعته .. ساعه بس
ودخل للبيت

قامت من النوم كل عظم بجسمها يعورها وندب زرقا بيدها ووجها مشت وقربت للمرايه شافت وجهها متغير ومطموسه ملامحها غسلت وجهها بمويه كثيره غرقت بها شعرها وصدرها تحس نفسها تشوف وحده ثانيه ماتعرفها وبعمرها ماشافتها حقدت على نفسها "ليش انا ماقدر اسوي به مثل ماسوى بي باي حق يمد يده على "
نزلت للصاله لحالها لان متعب عطته الشغاله لانها ماتقدر تقوم فيه لقتها شايلته وتلعبه طلبت منها تتركه وتروح تسوي لها كوفي علها تصحى سوت لها مثل ماقالت لها وجابت لها اكل خفييف اخذت القهوه ورشفت منها ونزلتها كان حلقها سكر ماعادت تبلع شي غزته بنظره بارده وهي تشوفه يدخل للصاله مر ماكنه يشوفها وطلع فوق
.......................................

.. وين بتاخذني
.. مدري انتي وين تحبين نروح
.. انا عادبي عندي أي مكان
نزل راسه شوي .. مها انا اسف على الي سويته
تنهدت .. خلاص يافهد انسا السالفه حنا عيال اليوم
.. يعني مانتي زعلانه علي
.. انا ماني زعلانه من الكلام الي قلته لان فعلا كنت على حق لاني المفروض ما اخلي اتصالاتنا كلام عن غيرنا انا الي زعلاني انك تخبي على اشياء تخصك
استغرب من كلامها .. وش قصدك انا ماخبيت شي
.. انت كنت زعلان مع نايف بس مدري وش السبب وابوي لاحظ هالشي
ماقدر يرد عليها .. وش السر الي بينك وبين نايف
.. ماراح اقولك لا مافي شي بس ودي نايف هو الي يقولك
.. وليش ماتقولي انت اذا كان يخصك او يخص نايف اثنينكم تهموني
.. لاني ماحب اتكلم بهالموضوع بالذات اتمنى نايف يقولك يمكن تعذريني وترضين عليك
.. ولايهمك انا متاكده ان عندك سبب
.. اوكي خلصنا من هالموضوع وش رايك نروح للبيت امي مشتاقه لك
.. ماعندي مانع بس بشرط تتصل على نايف وتستئذن منه
.. عارفه مستحيل يوافق
.................................................. ..........................
وهي غافله قرب منها وحب خدها بسرعه " ابتسمت له وبسرعه اخفت ابتسامتها لانها تذكرت انها زعلانه عليه من الموقف الي سواه معها
.. للحين ماخذه على خاطرك مني
لفت لجهه الثانيه ولف لها .. حقك على حبيبتي بس انتي ما تتحملين المزح
.. ومادامك تعرف اني ماتحمل المزح ليش تضايقني
.. لاني احب اشوفك معصبه
.. ياسلام يعني تحب تضايقني
.. لا حبيبتي تطلعين حلوه وانتي معصبه بتصيحين
.. يعني ماطلع حلوه وانا مبسوطه
.. انتي حلوه بكل حالاتك
ابتسمت له ونست وهي تشوف مبتسم لها كل شي لان قلبها عمره ماشال عليه
................................................

فتحت لها الشغاله الباب استغربت من وجودها والبيت متغير عورها قلبها وهي تشوف كل شي تغير فيه دخلت للصاله مالقت الا متعب وساره كانت تصلي الظهر بسرعه قربت وشالته ودموعها خذلتها وهي توزع القبلات على خدوده وراسه .. ياحياتي احلى من الصور
حضنت وهي تحس نفسها تحضن نواف وهو استكان بهدوء لحضنها مالاحظت دخول ساره عليها انصدمت من المنظر الي تشوفه ساره المشرفه حالها انقلب لو ما دققت بملامحها ماعرفتها ومن صوتها وهي ترمي السلام على طول تسارعت خطواتها لها ..مها
حضنتها بسرعه شفقانه لصدر تحضن وترمي همها عليه مها كانت ساكته من هول الصدمه رفعتها عنها .. ساره وش فيك وش سوى فيك كذا
بكت بصوت عالي وهي ترجع تحضنها وبدون ماتتكلم رفعتها .. وش فيك ياساره تكلمي
رفعت راسها عن كتفها .. الزمن جار علي يامها
عقدت حواجبها .. وش هالي بوجهك من الي ضاربك
.. نايف
ماستوعبت الي سمعته .. نايف ؟؟ وش تقولين نايف مستحيل يمد يده
.. اخوك مريض يامها مريض وكل العقد الي فيه طلعت على
.. ماصدق أي احد ممكن يسوى كذا الا نايف طيب قولي وش السبب فهميني
.. مافي سبب صدقيني انا مثلك ماني فاهمه
جلست تحكي لها الي صار ماصدقت تلقى احد تسولف معه وجيت مها كانت بوقتها
مها ماهي قادره تتصور صوره حتى بالخيال ماتقدر تصورها

رد: ليه عمري مالقى لبرده دفا الا لقاكي

الب التاسع والعشرين ارت


الموت حظ القلم والمجد للدفترحبر القلم غلطتي وايامي اوراقي

الخوف يجتاحني وجه الطريق اسمرراح اكثر العمر ياخوفي من الباقي

ياجرح رافقتني للناس لاتظهروان عشت في نظرتي ما مت بأعماقي


ماستوعبت الي سمعته .. نايف ؟؟ وش تقولين نايف مستحيل يمد يده
.. اخوك مريض يامها مريض وكل العقد الي فيه طلعت على
.. ماصدق أي احد ممكن يسوى كذا الا نايف طيب قولي وش السبب فهميني
.. مافي سبب صدقيني انا مثلك ماني فاهمه
جلست تحكي لها الي صار ماصدقت تلقى احد تسولف معه وجيت مها كانت بوقتها
مها ماهي قادره تتصور صوره حتى بالخيال ماتقدر تصورها ..طيب ليش ساكته وش الي يجبرك تتحملين
نزلت راسها وحطت يدها على جبهتها .. مدري اخاف يسوي شي وياخذ متعب
بعد مدة سرحت مها نفضت راسها .. صدقيني ياساره نايف ورا معاملته لك شي وشي كبير اخوي واعرفه "بس انتي ماسئلتيه ليش كل هذا
بندفاع وبكلمات سريعه .. سئلته رده على كان كلام مو مفهوم يحاول يبين لي فيه انه فعلا يعاقبني بس على ايش مدري
رجعت سكتت تحاول تصدق الي تسمعه "
لين حست بصوت نايف يدخل عندهم كان يناظر لساره نظره غريبه فيها شي من التهديد وهو يجلس .. جهزي نفسك بعد العصر بنروح نزور لطيفه
كان يغل ساره بعيونه .. وناخذ متعب معنا
وعت مها من افكارها وتكلمت .. وليش هي ماتجي هنا احسن
.. ماتبي تبي تشوفه هناك ببيتها
رفعت شعرها وهي تحس بشوية دوخه وسندت ظهرها ورا وعلت راسها على الكنب كان يتوقع انها تتكلم لكن ماكان عندها قدره ترد عليه او بالاحرى ما سمعت وش كانو يقولون ركز النظر عليها ومها مواجهته وماهي منتبهه كان يلاحظ ضعفها اول مره ماتهتم انه يشوفها بقوتها مع نظراته التفت مها وراها وبسرعه مسكت يدها .. ساره وش فيك
ماردت كانت تسمع وماتقدر تتكلم لين وقفت مها وحطت يدها تحت راسها ورفعته وشافتها فتحت عيونها .. لا مافيني شي بس دايخه شوي
كان يراقب وخالجه احساس انه قاسي وضعيف قدامها لانه ماقدر لها حتى لما مد يده كانت تكابر رغم ماتحس فيه نادت مها الشغاله وجابت كاس مويه نبهت مها .. مدام مافي اكل من زمان
.. طيب خلاص شيلي الولد ورحي
اخيرا نطق .. لا خليه هنا
التفت له ساره حس انها راح تقول شي ماتوقع ابدا انها راح تعدي السالفه بسهوله لكن مشت مع مها وهي تساعدها تقوم .. يالله ياساره قومي معي لغرفتك
وفعلا طلعت من المكان مع مها الي كانت بحاجتها وظل نايف رفع جسمه وقرب لمتعب وطلع من الكيس اللعبه الي اختارها فهد وشغلها وحطها قدامه فرح وهو يشوفه يتابع اضواءها وصوتها العالي وسرح بنفسه انشغلت عنه بالانتقام مافكر يجيب له شي ولاحظ انه كبر وبدا يستوعب بعض الاشياء ورجع سرح بمنظر ساره وشكلها الغريب لاول مره يتقابلون بدون ما تحاول تستفزه ولاول مره مايحاول يذلها
.................................................. ........................
في بيت ناصر
طلعت من مدخل البيت وكتابها بيدها ومرخيته بدون اهتمام سحبت الكرسي وجلست وقعدت تتامل منظر الغروب والشمس تودع الاراض رمت الكتاب على الطاوله قدامها وحطت يدها على خدها تحس بفراغ قاتل ينهشها مافي شي يسليها الامناظر الكتب المعقده الي كرهته
بقت على هالحال ومشهد كل يوم يتكرر لين تسمع اذان المغرب وتدخل لداخل البيت نفس ماطلعت المهم تعدي ايامها باي طريقه تتمنى ترجع تقدم الايام لعل بعد هذا الضيق فرج او ترجعها ورى للايام الخوالي لكن للاسف لازام تعيش اليوم وتودعه ويصير ذكرى مثل امس وتنتظريوم جديد تعيش
هذي هي نوف الي صارت تعيش للصمت وللوحده وللحنين لامس بحلاوته وبمرارته وللامل ولبكره وللخوف من الجاي
................................................
ارخت جسمها على السرير بتعب ومها تراقب ومازالت تعيش بلحظة ذهول ما مرت عليها بحياتها جلست جنبها على طرف السرير .. الحين ترتاحين وتصيرين زينه
هزت راسها .. ان شالله " بس يامها ليش خليتي متعب عنده
.. ليش انتي تخافين عليه من نايف ؟؟
بثقل وبهدوء عمرها ماعاشته .. بالعكس الشي الوحيد الي فاهمته بنايف ولا اشك فيه حبه لمتعب
.. طيب هذا شي يأكد ان وراه سر
..ماني فاهمه ليش تلتمسين له الاعذار
..لاني اعرفه هذا ماهو نايف "المهم انتي ارتاحي والحين بارسل لك اكل تغدي ونامي شوي ورانا سهره
مسكت يدها قبل تقوم من السرير .. مها خليك عندي لاترجعين لجده
ضحكت لها ورتبت على يدها .. ماراح اروح لين تطرديني << وقامت من عندها
.................................................. ..................
رجع لبيته مبسوط ترضى مع مهاوعدت هالسحابه وتجلت كان يدندن بصوت واطي مر امه جالسه لحالها قرب لها وبصوت عالي وهو يحط يده جنب راسه .. السلام عليكم
.. وعليكم السلام " غريبه جاي بدري
.. ارجع يعني
.. لا ترجع اعوذ بالله ماتنسئل
جلس جنبها وحب راسها .. اسئلي يالغاليه خوذي راحتك
..الله يجعلك كل يوم مثل اليوم مبسوط والابتسامه شاقه حلقك
.. مبسوط لانك مبسوطه
وهي تقوم .. الله يخلف علي الولد قاضي الظاهر بزوجك يمكن تركد
.. وين رايحه ؟؟
.. بروح احط الغدا ولا ماتبي
..لا مالي نفس
.. غريبه المفروض على وناستك تكون نفسك مفتوحه وتاكل الي قدامك
.. انا غير السعاده تشبعني ماحس بالجوع
.. اه الله يديم عليك الوناسه
وطلع من عندها مثل مادخل مبسوط ويدندن

.................................................. ..............

بعد العصركانت في زياره لبيت اهلها متغيره والحماس الي كانت متمسكه فيه صار ولاشي تفرقوا خواتها من عندها ولاحست فيهم لانها تفكر بحربها الضروس مع زوجات زوجها وبناته كانوا مسوين احزا عليها والزوج كان تبع لبانته والبنات تبع لاماهاتهن وهي ماقدرت تسوي لنفسها حزب ولاحتى تتحايل وتنضم لاحد منهم مجتمع مادي يحارب للماده والكسبان بنظرهم هو الي يحصل اكثر
.. ليش ماتجلسين مع خواتك بدل هالافكار الي مدري وين وصلتي معها
تلفت للمكان كان فاضي مافيه الاهي وامها واقفه على راسها ... هاه الحين بروح اجلس معهم
.. المفروض تقعدين معي وتقولين لي عن حياتك مبسوطه ولا لا مرتاحه مع ضرايرك ولا لا
تكابر الا الان وماتبي تعلن انهزامها ويجيها صوت من داخلها المريض تو اللعب وبدري على الثقيل .. يمه انا ماصار لي عشر ايام متزوجه واظن مده ماتكفي اني اتعرف عليهم او حكم على العيشه بينهم
.. نوال لاتكابرين الجواب مبين من عنوانه وواضح بوجهك
.. يمه ليه ودك تشوفيني مكسوره ومنهزمه
بكل برود وبثقه كبيره .. لان هذا الي بيصير يانوال
.. لا ماراح يصير ان تزوجته وضحيت بشبابي علشان استفيد واعيش حياتي مانحرم من أي شي اتمناه
.. انتي بنيتي على اساس غلط وراح ينهار فيك مهما ظل واقف
.. والله انك غريبه انا اعرف ان الام توقف بصف بنتها وتكون معها الانتي ماكأني بنتك
.. اوقف معك على الغلط ضد نفسك لو تعرفين الي بقلبي ماقلتي هالكلام
..اوف انا اول مره اشوف ام تحب تنكد على بنتها مثلك >> وطلعت عند خواتها
.................................................. .............

طلع للبيت مستانس لان الامور تسهلت والي يسعى له قرب يوصل كان يسعى بدون مايعلم احد بالي يسويه امنيته يفاجئهم ويفرحهم بس يستنى كل شي يتم وصل ودخل والكل جالس ينتظره .. السلام عليكم
.. وعليكم السلام
.. ليش تاخرت ياوليدي خوفتنا
.. يمه الله يهديك انتي دائما خايفه وتحاتين
.. ماعليك منها ياسلمان العجايز اذا خرفوا يصيرون يخافون على عيالهم
..الله يسامحك مقبوله منك يابو سلمان
قرب لها وجلس عند رجلينها .. امي شيخة البنات عسى الله يخليها لي
.. ويخليك ياوليدي
التفت لنوره الي جالسه سعيده بالجمعه الحلوه رغم البعد لقت ناس تسد الفراغ الي كونه بعد اهلها لقت بام سلمان الام وبعمها الابو وبسلمان الاهل والقرايب .. وين ميلاف؟؟
.. نايمه
قام متوجه للغرفته ناوي عليها ونوره تركض وراه ماتبيه يزعجها ظلو على حالهم لين سوا الي براسه وصحاها ولا سمع تهديدات نوره
.................................................. ........

المغرب وبعد ماصحت من نومها ولبست وجهزت عندها مشتاقه بجد لشوفة اختها مع انها عارفتها ماتشفق على احد ولاتشتاق لاحد جلست بالصاله تنتظر نايف ينزل فتحت جوالها كان مليان رسايل كلها من فهد ابتسمت وهي تتذكر مواقفه " نزل نايف لقاها على وضعها
وسئل .. جاهزه
هزت راسها .. أي
.. طيب استني شوي بروح اجيب متعب
خافت يصير بينهم مشاده ويتهاوشون وقفته بصوتها .. لحظه يانايف
التفت لها .. خير
.. انا بروح اجيبه انت اسبقني للسياره

طاوعها ووقف عند رغبتها .. خلاص لاتطولين
طلع برى وهي طلعت لغرفة ساره


الا يا طفل لا تكبر .. كذا احلى .. كذا اطهركذا لاهم يتراكم.. كذا لا ضغط لا سكرترى اسخف كذبة عشناها .. حكاية ليتنا نكبريا طفل احلم على كيفك .. احلم قد ما تقدرواذا مليت .. خبي حلمك بدفترترا الايام سراقة .. و الاحلام تتبخرتتبخر!!... تذكر

حاطه يدها على الوساده وتراقب ولدها يلعب ويصدر اصوات حست انه سعيد وقلبه خالي هنته وتمنت ترجع فيها الايام لورى وتعيش طفولتها من جديد لكن الي يروح مستحيل يرجع سمعت دق الباب .. ادخلي يامها
دخلت بأبتسامه عريضه .. ماشالله تحسنتي
.. الحمدلله
تقدمت لها .. ساره بطلب منك طلب
.. من عيوني بالي اقدر عليه
.. ابناخذ متعب معنا شوي
عصبت ماتتخيل انهم ياخذونه وهي تجلس من دونه .. وين ؟؟
.. لطيفه طلبت من نايف تشوف متعب وبنوديه لها
.. يعني لازام تودونه لها من حضرتها ليش ماتجي تشوفه
.. ساره حنا مانبي نناقش الصح والخطا " ساعه بس ونرجع بعدين لاتخافين عليه معي
.. بس يامها
.. علشان خاطري
تنهدت بضيقه ..خلاص بس تكفين بسرعه
وهي تشيله ..ولايهمك بسرعه ماراح نطول
ساره وهي تناظره وتتبع مها بنظرها .. انتبهي له
.................................................. ................................
________________________________________
تنتظرملكتها الي صار يفصلها عنها يومين بس وماراح تطول المده الي تفصل بينها وبين اليوم الي تصير ببيته وتعوضه عن صبره على لطيفه الي عرفتها حق المعرفه واخذت منها صفعه لايمكن تنساها بحياتها وتعلمت درس قاسي وهو انه لايمكن نغير القسمه بيدينا ومكائدنا والا ما ماوصلها عبدالله من دون كل البنات بدون معرفه بدون أي علاقه سابقه النصيب هو الي حكم وهالمره ارضاها حكم ماتخيلت ترتبط فيه وهي الي كانت تسمع عنه من لطيفه اعجبتها شخصيته ولاءه اخلاصه تنهدت وتكلمت بصوت مسموع .. ماحافظتي على النعمه يالطيفه
قامت من مكانها لاهلها الي صارت تنعزل عنهم بافكارها وخيالها الواسع وتنتظر اليومين يعدن
.................................................. ..........
الليلة هذي من تعب !
.....
الليلة ( لايمكن تفوت ) !
الليلة أحياني صعب !!
.....


الليلة .. ماودي أموت !






ماحست بالي دخلو عليها بمكانها وحاطه يدها على خدها وتناظر للارض اكبر شعور بالانكسار والخساره تحس انها تعيش ايام ضعف تتوقع انها راح تعيش فيها طول العمر " البيت فاضي عليها حتى عبدالله يطلع من البيت وياخذ ولدها لبيت امه لانه مايلقى بهالبيت الا القسوه والوحده ارتفع نظرها وهي تسمع مها تسلم .. السلام عليكم
سندت يدها على نهاية الكنب الي تجلس عليه وقامت بعجز ردت السلام وعينها على متعب ما راح تفكيرها ابدا بعيدا عرفته او توقعته .. وعليكم السلام
قربت منها مها وسلمت عليها .. وشلونك يالطيفه >>كانت تقول كلامها وهي تشوف التغييرالكبير الي طرى عليها
.. الحمدلله بخير >> ماقدرت تمد يدها وتشيله تخاف ينبذها حتى هالطفل او يقول كلام ماتبي احد يسمعه سلموا عليها وهي بوادي غير واديهم
ابتسمت مها لها ودها تشوف ولو ابتسامه تكسر الجمود المرسوم بملامحها .. شفتي متعب يالطيفه بسم الله عليه يجنن
سحبت نفس وغمضت عيونها .. شفته >> وميلت شفتها بشبح ابتسامه سرعان ماعصفت عليها هبايب الالم ومسحت اثرها
تكلم نايف الي كان متوقع ردة فعل غير هذي ما تخيل تقابله بهالبرود .. وش رايك فيه ؟؟
قامت من مكانها متوجهه لامها ومركزه النظر عليه .. يشبه نواف >> وبكت
قام نايف ومسك كتفه .. لطيفه ان جبته لك عشان تستانسين بشوفته وتذكري نواف مانقطع مادام متعب موجود >> وجلسها واخذه وحطه بحضنها
حضنته لصدرها رفعت راسها وهي تسمع سؤال مها .. وش الي سوى فيك كذا يالطيفه
جاوبت على سؤالها ببرود وهي تلاعب يدين متعب بيدها .. عبدالله بيتزوج
سكتوا اثنينهم ولطيفه صارت تهتز بمكانها من عنف البكا الي كانت تبكيه جتها مها وحطت يدها ورا كتفها .. ولايهمك ان شالله عبدالله ماراح يغير معاملته معك وتاكدي انه حتى لو تزوج انتي الاصل >> زاد بكاها واستغربوا منها الي يعرفونه انها تسب تلعن ممكن أي شي الا انها تسكت هذي ماهي لطيفه ولا هذا طبعها داخلها شي مكسور فيها الم ماهي عارفه تحدد موقعه هذا الي يظنونه والي مايعرفونه انها عارفه علتها تفجرت اخيرا وزمجرت بصوت عالي وهم يراقبونها .. بعدي عني يامها انا ماستاهل احد يواسيني هذا عقوبة الي سويته
مافهموا قصدوا او ماهتموا للي قالته .. لطيفه حبيبتي ليش تقولين هالكلام احنا اخوانك ونحبك
.. قلت لك مابي احد يواسيني ومابي احد يحبني هذا جزء وعقوبه
صرخ فيها نايف .. عقوبه على ايش انتي وش سويتي تتشفين من نفسك فيه
حطت يدها على صدرها بأشاره لنفسها .. انا يانايف الي ...... انا الي تسببت بموت نواف !!!!!!!!!!!!
&&

&&

&&


سكت بعد ماكان متجهز لرد يصحيها فيه لكن حرارة الي قالته بخرت الي كان ناوي يقوله وقف على حركته ماتغير ولا تكلم وبهالموقف تذكرت مها اتصال ساره عليها والي نسته من وفاة نواف وكانت اجلد واشجع من نايف على السؤال .. انتي!! وشلون وليش؟؟
بعد ماقالت اول كلمه حست انها قابله لسحب الكلام بسهوله .. انا الي ضايقته بالكلام وخليته يطلع من البيت من متضايق وصار الي صار
لحد الان نايف فاتح فمه من هول الصدمه مستحيل الي يسمعه مستحيل تحرك قريب منها بعد مانزلت متعب وهزها من كتفها .. وش قلتي له
ماتكلمت ماعندها كلام الاشهقات متابعه تصدر منها صرخ مره ثانيه .. وش قلتي له تكلمي
خلاص ماعاد ينفع الانكار او التراجع خط مافي مجال للرجعه عنه .. قلت له كلام عن ساره ومن كثر ماكنت مقهوره منها قلت لها انها حمل قبل لايتزوجها >> دفعها على ورا وطاحت على الاراض وصاحت فيها مها .. منين جبتي هالكلام وعلى أي اساس
.. من نفسي ومن خوفي انها تاخذه مني
جلس نايف على الكنب وفك ازارير ثوبه وغرز يده بشعره .. يعني انتي الي اتصلتي عليه والكلام الي كنتي تقولينه كذب
وهي تتمرغ بالارض هزت راسها بخوف .. وحتى نوف وصلت لها ببيتها ولقيت الي يخرب حياتها ويشب النار بينها وبين زوجها
مها وسط دموعها خساره كبيره خساره تخسر انسان بجسده وبروحه وبقلبه وبحبه وبكل شي تعشقه فيه وخساره اكبر تخسر انسان مايبقى منه الاجسد او اسم انسان بينما هو حقيقته شبح او صوره مشوهه تشبه الانسان بالشكل .. ليش يالطيفه ليش وصل فيك الحقد لهالدرجه
وقفت على حيلها بعد معاناه وهم يتفرجون ماقدروا حتى يمدون ايديهم ويساعدونها .. الشيطان لعب على والله ماكنت ابيه يموت هذا اخوي وانا احبه
اعتلى صوت مها بقهر وبحقد وبذهول واستنكار .. لاتقولين اخوي انت اخت نفسك ماتبين احد ولاتحبين الانفسك
حاولت تقرب منها .. سامحوني انا ... ماكملت كلمتها وقبل تكمل وتلمسها ابعدت عنها .. بعدي عني لاتلمسيني انا مايشرفني انك تكونين اختي
كل هذا نايف كان يسمعه ويشوفه ولكن عباره عن ضجيج وتشويش براسه انتبه لنفسه ومها تهزه وتوعيه .. وانت صدقتها ومشيت وراها و حاسبت ساره على ذنبها وين عقلك
نفض راسه وقام .. وليش ماقلتي ليش ماتكلمتي وخليتنا مخدوعين ونواسيك ونرحمك ونظن انك زعلانه
.. خفت منكم خفت من ابوي >> وهي تاشر على متعب .. حتى متعب خفت انه يتكلم ويقول انتي الي ذبحتي ابوي
اخذت مها متعب وهي طالعه من المكان .. انتي لازام تموتين حرام تعيشن انتي عاله علينا وعلى نفسك حتى ولدك عاله عليه >> وقبل تطلع مسكت يدها .. مها تكفين لاتروحين
نفضتها بقوه وغبن .. تبيني اجلس اصفق لك واقولك ماقصرتي >> وطلعت تركض من البيت كله
نايف ظل وراها يتفرج عليها مشى وصار مقابلها وحط اصبعه قريب منها ..خدعتيني مرتين يالطيفه لعبتي على يابنت امي وابوي وش ابرر وش اعتذر للبنت الي عذبتها بذنبك وش اقول لها اسف اختي هي الي ذبحت اخوي >> هزها بقوه.. انتي حرام تعيشين حرام >> ودفعها بقوته وطلع ورى مها

رد: ليه عمري مالقى لبرده دفا الا لقاكي

ربما كانت غلطه ولكن ضاع بها انسان وتيتم بها طفل وظلم بها بريئ وتغيرت بها قناعه وكسرت بها ارواح
ربما هي عثره ولكن لايصححها الاعتذار ولاتنسى مع الايام ولا يهونها التبرير ولا ينهيها الزمان
لامجال للسماح لامل في الصفح اغلقت كل الابواب بعدها وتبعثرت حروف الوصف عندها
..........................
احيان..! اعيش بداخلي لحظة ايمان
واحيان احس اني مجرد اناني
\
احيان اقول ان الزمن كله احيان !!
واحيان اقول احيان كذبة زماني
\
هذا انا..؟ والا أنا حالة جنان ؟؟
والا أنا عقلي ؟ وهذا جناني ؟





بالسياره وهم راجعين مافي بلاغه توصف الحال ولا أي ناقش بالموضوع ممكن يوصلهم لنهاية الحيره صامتين مجرد انفاسهم الملتهبه
لفت مها لنايف الي ماسك الدريكسون وكانه راح يكسره وتكلمت .. يعني هذا السبب الي يخليك تعامل ساره كذا
بدالها النظره ورد بالم .. صدقيني يامها انا ماتاثرت بكلام لطيفه بس انا اكثر شي شتتني لما تذكرت كلام نواف الله يرحمه عنها
..وش كان يقولك كان يقولك ساره خاينه
ناظر للطريق قدامه خنقته مها بكلامه واوجعته باسلوبها .. مها لاتقلبين الكلام على كيفك
..انا ماقلب الكلام انا اقولك وين عقلك وانت تطيعها وخصوصا انها مو اول مره ومايحتاج اذكرك
هز راسه راسه .. كل شي توقتعته الا انها تكون عارفه وساكت كانت تشوفني اتعذب وهي تتفرج وساكته
.. وش تبيها تقول تعلمك بالحقيقه وترفع يدك عن ساره وتنكشف هي
بدون احساس منه رفع يده قدام عيونه وصار يتأملها نظره غريبه ماعرف يفسرها حس انه وصل للبيت
.. يالله خوذي متعب وانزلي
ناظرت له بأستفهام .. وانت ؟؟
..انزلي يامها واتركيني بحالي
.. نايف تكفى انزل لاتروح وانت بهالحاله
..مها رجاء اتركيني اروح ورجاء لاتزعجين فهد وتخلينه يدورني اذا ارتحت من نفسي بارجع للبيت
.. بتطول ؟؟
.. مدري سكري الباب خليني امشي
.. نايف تذكر انا حريم بالبيت ماعندنا احد
.. لاتخافين ماني ناسي
سكرت الباب وهو مشى اسرع من الريح مايدري وين يمشي صارت الدنيا بعينه اضيق من خرم الابره

الالم في خافقي دمعة قهر

سيلت في داخله حزن فظيع

رفعها عن الارض الي احتضنتها وتقبلتها بعدالي صار قامت وهو يمسك يدها سئلها لكن بدون رد مشى معها لين جلسها باقرب مكان
.. قولي وش الي صار
نزلت كاس الماء الي عطاها من يدها .. مافي شي كنت متضايقه
ناظر لها بشك .. مدري ماني مصدق
القت نظره لعيونه تاكدت انها ماراح تلقى احديتقبلها غيره هو الوحيد الي ممكن يصفح ويسامح ندم ياكلها على كل لحظه تسببت له بالعذاب ومع كل هذا تحملها ولاطاع الكلام فيها .. عبدالله تزوج انا ماراح ازعل بس لاتتركني
.. وليش تقولين كذا حتى لو تزوجت ماراح اتركك او انساك
.. اخاف اخسرك وتنساني
حط يده على شرها ... لاتخافين انتي زوجتي وام ولدي وحقك ماراح يقصر منه شي
غمضت عيونها ريحها كلام عبدالله بعد لحظات الرعب الي عاشتها مع اخوانها صحيح لحظات قاسيه لكن حمل رمته وارتاحت منه على الاقل من عذاب الضمير


......................................



قامت بسرعه من شافت مها داخله ومتعب بين يديها شالته من يدها ومها وقفت ف تتامل بساره وهي تشيله كانها ماشافته من زكان تمنت لو متكشف الغطا عن وجهها لانها راح تثير فضول ساره وراح تسئلها والرد يخزي ويحرج ولكن شالت النقاب عن وجهها وساره مشغوله بولدها ولكن انتبهت لوجهها وعيونها الحمر شلدت شوي فيها .. وش فيك كنتي تبكين ؟؟
وهي تمشي داخل في محاوله انها تهرب من اسئلتها .. مافيني شي بس ضايقني حال لطيفه >>ومشت عنها وهي تكلم نفسها " والله الي يبكي حالك ياساره " وساره ضامه متعب على صدرها وتراقبها وهي تركض بسرعه

.............................
الموت ياملا فرقا العين
0000000000000 ياما خذا الموت من غالي




شغل الانوار وهو يشم ريحة الماضي من خلال باب الشقه الي اقشعر جسمه وهو يفتحه
قفله اخر مره وهو معزم مايفتحه مره ثانيه لكن شاف روحه تلقى امانها فيها وبعد وقفه عند الباب بسرعه دخل وشغل باقي الانوار وفتح الابواب المسكره والشبابيك عل الهوا يدخل وينقذه من الاختناق ويونسه من الوحشه الي يعيشها دار داخل مساحته الصغير كأنه يدور في الماضي و يتمنى يطلع من هالحلقه الي يدور فيها شعور ضيق عليه الدنيا وبعد مالقى هالدوره نهايه رمى نفسه وحذف المفاتيح على الطاوله الزجاج قدامه حذف ا لشماغ فتح باقي زارير ثوبه ومد رجوله قدام " هذا انسب مكان ينفرد بنفسه ويهرب من الناس تمنى لو يهرب من نفسه لكن نايف داخله لايمكن يكون انسان ثاني

..................................................



بغرفتها لحالها تسمع الاصوات والازعاج برى غرفتها ناس تروح وتجي وهي حاطه يدها لى خدها حتى زوجها من ثاني يوم بدا يطلع لشغله من الصباح ومايرجع لليل ماحست للحظه انها عروس تدللت وعاشت ايامها بسعاده حتى الهدف الي تزوجت علشانه ما قدرت تحصله لانها ماتشوفه الاوقت النوم اضافه الا انه حريص وما ينولها الي براسها وهذا الي ماخطر ببالها وكانت واثقه بذكائها وانها راح تقدر توصل للي تبي جتها رغبه انها تكلم امها لكن كابرت وخافت انها تتشمت فيها وتردد عليها الكلام الي دائما تقوله لها هذا وصف لحالها يعتبرونها غير موجوده





...................................
حاول تسيء الظن في بعض الاحيان
أكبر خطا تتعامل ب حسن نية

ما فيه أحد كامل .. ولا يوجد انسان
معصوم عن درب الخطا والخطية

يمكن تشيل اصحابك قلوب عدوان
ويمكن عدوك ما يجيك ب أذية





اخر الليل تاخر نايف وهي لحالها جالسه تستناه وعلى ضوء خافت نزلت ساره وهي ما توقعت ان فيه احد جالس وكانت تظن نايف موجود بالبيت قربت يوم لاحظت وجود مها .. ليش جالسه لحالك
رفعت راسها لها .. ابد ماجاني نوم "وانتي
.. انا مثلك مافيني نوم ومتعب نام واحس بطفش انتي من رجعتي من لطيفه بغرفتك ماطلعتي
.. طيب تعالي اجلسي معي
وهي تجلس ..كنت مجهزه نفسي للسهره بس روحتك للطيفه خربت مزاجك
ماتحب تتذكر الموضوع ولاتبي تسولف نهائيا عنها .. عادي بس مانمت وحسيت اني تعبانه
..اوكي انا بروح ادور بالثلاجه شي نشربه >> وطلعت وهي شفقانه على الدردشه والكلام الحر
ومجرد ماختفت بالمطبخ دخل نايف حاط شماغه على كتفه ووجهه شاحب ومثل ماتوقع لقى مها تستناه .. السلام عليكم
ارتاحت انه رجع لكن و ماريحها الضيق بعيونه ..وعليكم السلام "ليش تاخرت
جلس قريب منها وتكلم ببرود .. هذا انا جيت
لفت لها بجسمها .. نايف ترى ماحنا ناقصين خوف الي شفناه يكفي علينا احنا محتاجينك ومتعب محتاجك
رمى ظهره على الكننب وحط يديه ورى راسه .. الي سمعته وشفته صعب علي يامها صعب
.. عارفه انه صعب بس انك تنهزم وتوقف عنده تضيع نفسك لاتوقف عند شي يانايف انت جربت الوقوف عند لحظه اين كانت وش سوى فيك
نزل يديه وحطهم بحضنه ونزل راسه للارض وقبل يقول شي سمع الصوت وهي مندفعه ماهي منتبه لوجوده بسبب الدرج وشايله صينية العصير .. جبت لك عصير........ ووقفت يوم رفع راسه بدون شعور منه وبدون شعور تعلقت عيونها فيه تكلمت مها الي لاحظت احراجها .. تعالي جا بوقته
مشت بحرج وببطئ وهي تكررنظرته الي تجردت من النار الي تحرقها كل مره يشوفها نزلت الصينيه على الطاوله .. انا بروح اشوف متعب
حاولت مها تمنعها .. اجلسي معنا اكيد اذا بكى تسمعينه
.. لا الغرفه بعيده وصوته مايوصلني <<وطلعت على الدرج حقدت عليه لانه خرب وناستها ومها عرفت انها ماتبي تجلس معه
كلمت نايف .. كانت متحمسه للسهره لكن الظاهر ماتبي تجلس معك
مد يده واخذ كاس العصير .. بكيفها >>شرب نصه ونزله .. وانا بعد طالع انام
كتفت يديها وحطت رجل على رجل وشردت بحالهم

.......................................

اليوم الثاني وفي الصباح
ملكة عبدالله
طلع من المحكمه معه اخوانه بعد مانهى الملكه وخلاص تزوج كان يشوفها معهم من بعيد بس ماهتم ولاحرص انه يشوفهاو يكلمها اسبوعين وتكون عنده بالبيت على عكسها فرحانه بدرجه غير طبيعيه وتتمنى يطلب يكلمها او يشوفها تراقبه وهو يمشي ويكلم اخوانه ولاهو مهتم تفرقوا وكل واحد راح لحاله على موعد بلقاء قريب رجعت للبيت لقت امها تستناها باركت لها طلعت من عندها وهي تفكر كيف تعرف تكسبه "خلاص ياعبدالله اليوم دخلت حياه جديده ربما تكون احسن من حياتك مع لطيفه والقساوه الي عانيتها رغم التودد الي حاولت تتقرب منها فيه
رجع للبيت وقبل يدخل وصلته زغاريد امه تملى المكان .. الف مبروك ياوليدي
حب راسها .. الله يبارك فيك يمه
.. ان شالله اشوف عيالك يملون البيت
.. الحمدلله عندي ولد يكفيني عن عشر عيال
..الله يخليه لك بس ماحد يعاف رزق رب العالمين وبعدين ولدك ان شالله بيكبر وهو يشوف له اخوان ومايتربى لحاله
..ان شالله يمه ان شالله بس لطيفه كاسره خاطري
.. انت ماتقول هي بنفسها قالت لك تزوج
.. أي يمه بس اول مره احسها ضعيفه وتقسى على نفسها وانا احس اني اعذبها بهالزواج
.. انت ماقصرت معها وان شالله ماراح تقصر هذي ام ولدك وله حق عليك
.. ان شالله انا رايح للبيت توصين شي يمه
.. سلامتك ياوليدي
..........................................



الظهر وفي بيت نايف وفي المطبخ بالتحديد وقفت وعيونها تدور بالمكان ودها تسوي تغيير بروتينهم الملل بعد ماعرفت من الشغاله ان نايف ماياكل ابدا في البيت وساره عمرها مافكرت تطبخ لنفسها او له دائما هي الي تجيب الاكل لها من الموجود بدت تطبخ والشغاله معها بالمطبخ بعد ماحطت الاكل على النار رفعت جوالها وكلمت نايف .. انت وينك
.. بالشركه ليش ؟؟
.. انا اليوم طابخه لك الغدا وابيك تجي تاكل معي
..لا وش هالنشاط الي نزل فجئه
.. والله" قلت اذوقك طبخي ولا انت ماتبي
.. شكلك ناويه تجربين علي
..ههههههه انت تعال تغدا معي ماحب اكل لحالي
.. ليش ماتنادينها تتغدا معك
سئلته مع انها تعرف من يقصد وتعرف انه مايبي ينطق اسمها .. من ؟؟؟؟
تلعثم يحسه اسمها ثقيل بلسانه بس لازام يجاوبها .. ساره
.. لا ساره نايمه ماراح تقوم للعصر اذا قامت تتغدا بكيفها
.. امرنا لله بنتحملك ضيفه
.. اوكي انا انتظرك
.. خلاص الساعه ثنتين انا عندك
قفلت منه ورفعت جوالها للمره الثانيه واتصلت بسرعه جاها الرد .. هلا والله
.. هلابك وش اخبارك يالقاطعه
.. انا القاطه ولا انتي من تروحين لجده تنسينا
.. بس انا ماني بجده
مطت شفتها.. اجل وين ؟؟
.. انا هنا بالرياض ببيت نايف
فرحت بوجودها عند ساره .. صدق وليش ماقلتي لي
.. والله المفروض اختك تقول لك
.. اختي اغبى منك "من متى انتي هنا
.. امس الصباح جيت " عندك اصوات انتي بالجامعه؟؟
.. انا طالعه الحين اليوم خلصت اخر امتحان
... حلو وش رايك تجين الليله تسهرين عندنا نبي نفلها وننبسط
بتفكير .. اليوم مدري انا حالفه بعد ماخلص امتحانات انام اسبوع
.. اجلي نومتك لبكره اليوم ارتاحي وتعالي بعد المغرب
..ام خلاص " بس شكلك لحالك وين ساره عنك
.. يعني ماتعرفين ساره اذا نامت تنسى انها بتقوم
..هههههههه بس صدقيني هذي ساره الاولى الحين هي ساره ثانيه
مابغت تخوض بالكلام بهالموضوع .. المهم نستناك لاتنامين وتنسين
.. لا ان شالله بعد المغرب تلقين لاصقه بخلفتك
.. الله يعيني " اوكي لاتتاخرين سلام
.. سلام
وسكرت منها ورجعت لشغلها بحماس
.................................................. ....................
كل هم ساقني للموت سقته للنهايه ..

ماعاد باقي بي روح تتحمل هموم ..

وكل قلب زاد بأوجاعي وشقايه ..

بعته رخيص مايسوى قيمة السوم ..





دخل عليها وهو شايل هم القاء بينهم بعد زواجه اكيد القء بيكون غير شافها حاطه يدها لى خدها وتراقب التلفزيون مع ولدها الي كان يتابع افلام كرتون وهي بعالم ثاني تفكر وبحالها وكيف وصلت لحالها تنحنح ينبهها بوجوده التفت له وهو مقبل عليها على طول سئلته .. خلاص
جلس جنبها وهز راسه ورجعت سئلته .. شفتها
.. لا بس بعد اسبوعين الزواج " ماتخيل انه يتكلم معها عن زواجه وهي بها الهدوء مايدري انها تحترق بس اخيرا عرفت قيمته وقررت تحافظ عليه لانه الوحيد الي بقى لها هو وولدها .. وش اسمها ؟؟
نزل راسه .. امي تقول اسمها هدى
فكرت وبسرعه خطرت ببالها على طول هدى الي تعرفها لكن ماسئلته اكثر فضلت انها تترك كل شي للمواجهه
واهم قرار اتخذت بتتحمل عشان ماتخسر عبد الله لكن هل هدى بترضى ولا؟؟؟؟؟

...................................

وصلت للبيت مهدوده راحت للجامعه مواصله ولقتهم جالسين ينتظرونها على الغدا
.. السلام عليكم
.. وعليكم السلام
.. تعالي يابنيتي تغدي معنا
وقفت قريب منهم .. ماني مشتهييه ياخاله ودي بس اطيح بفراشي وانام
سئلها ابو ناصر .. خلصتي امتحانات ؟؟
.. أي الحمدلله مابغت تخلص ونرتاح " انا طالعه لغرفتي >> تذكرت موعدها مع مها وكلمت خالتها .. على فكره ياخاله بروح المغرب لساره
ابتسمت لها .. ماعليه يايمه روحي استانسي عند اختك " وترى ناصر اتصل ويسئل عنك وقلت له انك بالجامعه وانك اليوم تخلصين
مشت من عندهم " ياترى كيف يفكر وهو يعرف اني اليوم بخلص
............................................



تركض على الدرج وتسحبها معها وهي تركض غصبا عنها لين وقفت قدام الطاوله الي حطت الغدا عليها .. وش رايك ؟؟
ناظرت للطاوله باعجاب .. والله مانتي بسيطه يامها متى سويتي كل هذا
رصت يديها ببعض وحركت جسمها بطفوله .. عشان تعرفون قيمتي
.. ياحظك يافهد ياولد عمي الله رزقك بمره سنعه وتعرف تطبخ
نطت بوجهها .. سويره قولي ماشالله لاتحسديني
وهي تسحب الكرسي ولافه لمها .. تف تف لاتخافين عيني بارده تعالي بس خلينا نتغدى
حطت يدها على الكرسي .. ساره نايف بيجي يتغدى معنا
بسرعه وقفت وجت بتمشي ومسكتها مها .. تعالي وين رايحه
.. متوقعه اني اجلس معه على غدا ولا عشا مستحيل
ثبتتها .. ياساره مايصير الي تسوينه مايصير خلاص انتم ببيت واحد ماراح تظلون العمر كله تتهربون من بعض وان تلاقيتو تهاوشتون كانكم بزران
.. قولي لاخوك هالكلام لاتقولين لي انا
.. لا بقولك انتي ياساره لازام تواجهينه بشجاعه هروبك منه ماهو فصالحك ولا صالحه
.. اخر شي اهتم فيه مصلحته
.. طيب اجلسي بس ولاكل مره لازام اقولك عشان خاطرك عشان تجلسين
..مها لاتحرجين نفسك وتحرجيني
.. اسمعي لازام يتعود يشوفك واذا مايبي يطلع من البيت مو معقول تحبسين نفسك عشان ماتشوفينه
تقريبا عرفت تلقى مدخل لها وتقنعها بالجلوس ..هاه وش قلتي
.. انا بجلس بس اذا تكلم باكبر صحن بوجهه بضربه
انفجرت ضحك عليها ..ههههههههه خلاص الله يستر منك شكلك ناويه تشوهين اخوي
رجعت جلست وببرود .. هو مشوه خلقه مايحتاج
وهم بحوارهم دخل نايف والابتوب بيده استغرب منها وهي جالسه على الطاوله وتقلب بالملعقه ولارفعت راسها سحبت مها الكرسي الي على راس الطاوله .. تعال اجلس وقل وش رايك
عقد حواجبه وجلس ارتاحت لانه ماسوى مثل ساره .. طيب ليش واقفه اجلسي
.. انا رايح اجيب المويه لحظه بس"وراحت تركض
تحسبت عليها ساره بنفسها وحست انها متعمده هالحركه ماقدرت ترفع راسها عن الصحن وهو انحبست حتى انفاسها لكن لوهله رفع عيونه وانتبه ليدها الي ماسكه الملعقه وتقلب الاكل ولفت انتباهه الندب الي بيدها وبسرعه نزل راسه جت مها والمويه بيدها .. يالله سمو ولا تنتظرون لين اجي وقفت ساره .. الحمدلله شبعت
عرفت مها انها ماراح تقدر عليها وتركتها براحتها .. المغرب خليك جاهزه عندي لك مفاجئه
بسرعه زلقت الكلمه منها وماقدرت تحبسها .. الله يستر منك ومن مفاجئاتك
ضحكت عليها مها ووجها الي تغير من الاحراج طلعت ساره وتنفس نايف وكلم مها .. ماتغدت !!
ابتسمت مها بانتصار بدت تحس ان شي من الثلج بينهم يذوب صحيح ببطئ لكن احسن من اول
قام نايف .. الحمدلله
..تدرون الشرهه على انا متعبه نفسي وطابخه لكم
مسك خدها .. ماعليه مهاوي بس والله تعبان وانتي عارفه امس وشلون كانت حالتي انا طالع انام صحيني العصر

رد: ليه عمري مالقى لبرده دفا الا لقاكي

تسلمين حبوبه ,

متابعتك ,