رد: ليه عمري مالقى لبرده دفا الا لقاكي

يسلمؤؤ يالغلا ,

ماننحرم ,

رد: ليه عمري مالقى لبرده دفا الا لقاكي

الب الثاني والعشرين ارت






إن طبت من جرحي..وإلا..جعلني ما يوم طبت
ياصدمتي في أكثر احبابي..وياخيبة ظنوني

ياضيق صدري..لاذكرت اني عليهم ما كذبت
ياطعنة خلتني انسى من سبايبها..طعوني




قررت ترمي كل شي ورا ظهرها وتواجه مصيرها بشجاعه وتعتبر ناصر ظل اوخيال وليس روح تسكنها وتسكنه يمكن تكذب على نفسها وتخدع احساسيها لكن راح تصدق كذبتها تفرقوا بالغرف وقوفا عند رغبتها من وجة نظره ان الظغط الي جاها يكفي قدر لها رجوعها له

قامت من نومها مريحه بعد ماحست ان الغرفه لها من غير مايشاركها فيها تسبحت ولبست لبس هادي نزلت للصاله مافيها احد تعدتها للمطبخ كان فاضي واصوات الشغالات بالحديقه طلعت تشوفهم كانو يرتبون اغراض ويحطون ويشيلون ظلت واقفه تتامل الحديقه سندت جسمها على الجدار و يديها ورا ظهرها وسرحت بحياتها بمستقبلها بنهايتها مع ناصر "ناصر الانسان الي دخل بوقت غلط الشخص الي ماتخليت بيوم من الايام تكن له الحب صار اقرب لها من روحها جزمت انها لايمكن تبدل حبه كانت دائما تفكر تزوجها من غير حتى مايعرفها وكان قلبه مشغول بغيرها مع هذا ماظلمها ماعاقبها لانها اخذت مكان حبيبته ويوم حست انها صارت كل شي بحياته قدر يسوي الي سواه ابتسمت لسخرية القدر كيف ينقلب كل شي بلحظه واحنا الي نقلبه ضد انفسنا

اول مادخل كانت بوضعها وشعاع الشمس يلمع على جهه من شعرها كانت على شفتها شبه ابتسامه لكن يملاها الحزن استوقفته هاللوحه ظل ماسك الباب وواقف وهي ماحست سكر الباب بشويش ومشى وهو يحط المفتاح بجيبه لين وصلها وصار يشوف تفاصيلها الي يعشقها ..ليش واقفه هنا ؟؟
غمضت عيونها ونفضت راسها وناظرت له نظره غريبه ولاردت سئلها ..تسمعيني!!
ارخت يديها وهزت راسها بايه ..اسمعك ابد اشم هوا >>ماوقفت وهي تشوف نظراته لها
واستدارت ودخلت لداخل البيت وهو يتبعها جلست ومسكت الريموت وشغلت التلفزيون كان يحاول يسيطر على نفسه ويقاوم ضعفه قدامها
..وين امي ؟؟
التفت له ..مدري نزلت من غرفتي ماشفتها يمكن بغرفتها
خطرت على باله فكره حاول يجرب مع انه عارف الرد مسبقا ..ا نوف !!
ناظرت بملل ..نعم
..وش رايك نطلع نغير جو
قشعريره دبت بجسمها من نظراته واسلوبه ..اطلع لحالك>>
..بس انا ودي نطلع مع بعض من زمنا ماتمشينا
..قلت لك ماني طالعه كفايه مختنقه من شوفتك هنا << قامت بسرعه وطلعت تركض على الدرج
كلمتها خلت شيطاين الارض تصف قدامه لحقها على الدرج ومسك يدها..انتي عارفه وش قلتي ؟؟
بثقه وعناد ..وواعيه له
..انتي شكلك ناويه على الشر
..انت عارف نيتي زين انا ماخبيتها عنك بس انت مسوي نفسك بطل ومانت لاقي احد تطلع مراجلك عليه غيري
مهما كان حبها بقلبه كلامها صدمه وماقدر يسكت ..نوف احترمي نفسك
..انا محترمه قبل اشوفك واعرفك
..لاتحسبين اني رجعتك واعتذرت لك انك تمشين رايك على بتقعدين هنا غصبا عنك
مطت شفتها ..عادي اقعد ماعندي مشكله >كانت تستهتر فيه
تعوذ من الشيطان بعد ماحس انها تبي تطلعه من طوره صارت كل ماتقرب منها ابتعدت عنه تغيرت تغيير جذري
..زين يانوف زين >>وتركها تكمل طريقها
.................................................. .............

نوال الي كانت تخطط عشان ترضي لطيفه حست ان السالفه طولت وانها هي الخسرانه بالسالفه كلها اخذت قرار انها تتحرك تسوي أي شي كرهت موقفها خصوصا بعد مابدت امها تضغط عليها حتى تتزوج
في بيت لطيفه الي حست انها بهالحمل سكتت الشامتين واغاضت الي يكرهونها
..مومعقول يالطيفه السالفه طولت وامي ماراح تسكت
..اصبري يانوال اصبري لين تزين الاوضاع بيني وبينه
..لمتى ماعاد عندي صبر
..طيب تزوجي اذا جاك احد مناسب
عصبت منها ..هذي اخرتها بعد كل الي سويته ببساطه تقولين تزوجي
..طيب وش تبيني اسوي
..سوي أي شي اعزميه كلميه لاتستلمين
..تتوقعين يجي
..انتي حاولي وبعدين انتي تعرفين تقنعينه بعيد عن نواف بصراحه لطيفه اخوك هذا مدري كيف يفكر
..يعني انتي تحسبين نواف هو الي موقف نايف عنك لا نايف من البدايه ماهو مقتنع
..يعني نوف وش احسن مني فيه انا بنت خالته والحب يجي بعد الزواج بس انتي تحركي
..معك حق انا لازام اسوي شي انا الحين بدق عليه واعزمه
..ايوه احسن شي نضرب الحديد وهو حامي
...........................................

رجع من شغله قبل العصر وساره تستناه على الغدا
..ليش تاخرت
..مريت العمال شفت الشغل
..بدوا بالبنا ؟؟
..يعني تقدرين تقولين
..طيب تعال نتغدى
..ابدل وارجع اتغدى مع ان مالي نفس
..نواف اش فيك شكلك متضايق
جلس على الكنب ..مدري مخنوق
..تعوذ من الشيطان قوم تغدى
..............................................


..وشو الي خلاك تتذكرين ان لك اخو
..افا يانايف انا مانسيتك عشان اتذكرك
..طيب وش تبين مني
..انتم ليش تغيرتوا على ماكني اختكم
..احنا ماتغيرنا بس انتي ابعدتي وماعاد يهمك احد
..طيب عشان اثبت لك ابيك تجي تزورني
..الحين ؟؟؟
..اي الحين عادي انا فاضيه
..بس انا مشغول خليها مره ثانيه انا طالع للشركه
..زين توعدني بزياره بس تفضى
جاه فضول يسئلها ..خلينا من هالكلام بسئلك انتي ليش قايله ان زوج نوف بيتزوج
تلعثمت وخافت من طريقته في السؤال ..لا نه صحيح ناوي يتزوج
..لطيفه لاتكذبين على وش مصلحتك من الي تسوينه
..صدق مرة اخوك قليلة ادب يعني انا انصحها وهي توصل الكلام لكم
..خلينا من زوجة اخوي لاتقلبين الكلام وجاوبيني بصراحه
انقهرت من ساره كيف قدرت توصلها لنايف ..الصراحه اني بغيت اوعيها الرجال مسك عليها بلاوي ونوى يتزوج بعد سواتها الي تسود الوجه صحيح خيرا تعمل شرا تلقى
..الكلام هذا كبير
..هذا ولاشي من الي سوته هي واختها اول شي سوته لعبت على نواف لانه صغير وزوجته اختها وعلى فكره تراهم زي بعض
انخنق من داناة الكلام الي تقوله حتى لوكان صحيح مايبيها تقوله ..لطيفه حرام و عيب عليك الي تقولينه استغفري ربك
..انا قلت الحقيقه وانا مصره اخوك بكره يعرف ان زوجته الي مستانس عليها ومقاطعني عشان يرضيها مثل اختها تكلم غيره وترسل رسايل
صرخ فيها كيف طلع هالكلام من فمها ..صدق ما تتغيرين ونواف هو الي عرف لك >>وسكر التلفون بوجهها
وصلت لقمة الغضب وتعدت حدود الحقد وهذا نايف خسرته بسبتهم نوال كانت شاهده على كل شي كانت حاضره على جريمتها

..صدق شي يقهر بتصير بيني وبين اخواني تحسب نفسها تحبهم اكثر مني
..وان شالله بتسكتين لها !!
..لا ماني ساكته الحين ادق عليها اعرفها قيمتها
..لا انتي مالك كلام معها انتي كلامك مع اخوك الي ماهو قادر يوقفها عند حدها
..والله نواف ينخاف منه اليوم نايف الي ماعمره رفع صوته على و هزئني بسبتها اجل نواف وش بيقول
..اذا بتخافين منه على طول بيتمادى وتطمع فيك ساره نصيحه خلي كلامك معه
..الظاهر ماقدامي الا هالطريقه


.................................................. .................................


في جده مها رافضه فكرة الزواج قبل الجامعه لكن فهد كلم ابو نايف طلب منه يقنعها من غير ظغط وابو نايف ترك التمهيد لام بدر ماحب يتدخل الاذا ماقدرت تقنعها
..بس يمه انا بكمل دراستي
..الزواج مايمنعك من الدراسه بصراحه يامها الرجال معاه حق المده طويله عليه
..انا متفقه معه على كل شي وهو وافق
..وهو للحين مايبينا نجبرك هو يبينا نقنعك
..صعب على ادرس هناك وانتم هنا
..ماعليك منا وانتي بكل الاحوال بتروحين وتخلينا الا اذا ترجعتي عن الزواج كله
..ليه يمه فهد قايل شي
..لاوالله الولد ماشالله عليه وانا مابي ابوك يتدخل
..والله مدري بس خلوني افكر
..مايحتاج التفكير اظن انك عرفتيه زين ودرستي اخلاقك واذا شايفه انه يستاهل التضحيه ليش لا
..انا اعرفه بس وشلون ؟؟
..خلاص يامها حتى انا بصراحه مابي تطول الملكه وبعدين اخوانك هناك ماراح تحسين بالغربه
..مدري متردده تكفين يمه خليني افكر
..زين فكري زين >>طلعت وتركتها تفكر




قولوا له : أني أمنالوله ضايق البال
عله يحس .. بحالتي في غيابه ..!

لازلت هاقي و الرجا فيهلا زال
و مابيه يكسر خاطر اللي هقابه ..!





بعد الي داربينهم تركته وراحت لغرفتها تركض دخلتها وفقلت الباب بالمفتاح قلبها صار مثل الطبل يضرب بعنق خافت من نظراته توقعته بعد كلامها ممكن يمد يده عليها لانها عارفه حجم الكلام الي قالته وهي فعلا تبي تطلعه من طوره او بالاحرى تبي تجربه
دخلت سريرها وغطت نفسها بالكامل ومابان منها الاهتزازها تحته تبكي على حالها وحاله استمرت لين غفت عينها ارتخى جسمها من البكاء اذا كان البكاء تنحدر معه دموع حاره دليل انا القلب يحترق وقت مضى وهي تغط بين الكوابيس ونومه ماهي مريحه وعت بنفسها وعرقها يتصبب لان الغرفه حاره زياده على الحراره الي تحس فيها رفعت جسمها وناظرت للشباك كانت الشمس على وشك المغيب قامت وهي تسمع صوت الاذان وتردده دخلت للحمام <<وانتم بكرامه >> وتوضت وتجهزت للصلاه لبست جلالها وفرشت سجادتها وكبرت اتمت صلاتها وجلست فتره تستغفر لعل غيوم الضيق الي تلبدت بسما صدرها تتجلى كانت دموعها تسلل بهدوء وتتابع بحضنها رفعت يدها للسما تطلب المعونه وتطلب الهدايه لمت سجادتها وجلالها قبل تجلس سمعات طرقات بسيطه على الباب فتحته لقته واقف عند الباب ومدخل يده بجيوبه
..مساء الخير
..مساء النور خير ؟؟
..ابد جاي اخذ اغراضي اذا ممكن
بدون ماتتكلم ابعدت عن الباب واشرت بيدها له عشان يدخل تعداها لداخل الغرفه ومنها لدولاب ملابسه طلع شنطه من اعلى الدولاب وفتحها على السرير فتش فيها وهي تنتظره يخلص توقعت انه يكلمها يعاتبها يراضيها لكن ماتوقعت انه يسكر الشنطه ويرجعها وياخذ الاوراق ويطلع بدون مايناظر لها اول مره يواجهها ولايكلمها سكرت الباب ورجعت لغرفتها

رد: ليه عمري مالقى لبرده دفا الا لقاكي

ونيت من حرن بقلبي ونسته
صاح الخفوق يون من حر ماجاه

ضافي لباسالهم وانا لبسته
يالله دخيلك قاسي الهم اشقاه






تغدى وطلع ينام شوي تمدد على السرير لكن قبل يتمكن النوم منه فز على صوت جواله رفعه وشاف الاسم استغرب وش الي خلاها تتذكرني الحين فكر يطنشها ولا يرد لكن تراجع يمكن محتاجه شي ..الو
..هلا لطيفه
..زين متذكرني للحين انا قلت نسى ان له اخت
..لا انا مانسيت الظاهر انتي الي نسيتي سوياك
علت صوتها عليه ..ليه انا وش سويت!! عشان وقفت لاخوك لايطيح طيحتك
..الحين وش تبين ؟؟
..ابي اقولك انت وزوجتك لاتتدخلون بيني وبين نايف
..وزوجتي وش دخلها بينكم
..موهي لاقيتك وسيله توصلها الاخبار كلها الظاهر للحين عندها امل نوف تتطلق ونايف يتزوجها
بقلة صبر وبنبرة تهديد ..لط يفه عن الغلط واقصري الشر مادام النفس عليك طيبه
..وش بتسوي يعني بتخوفني عشان تعججب قليلة الادب
عصب منها ومن كلامها الي يجرح ..انتي الظاهر مانتي ناويه على خير احترمي نفسك احسن لك هذي زوجتي ومايريضيني تتكلمين عنها بهالاسلوب
..وانا يعني بستنا رضاك انت اصلا لوانك رجال ماتسحبك معها مثل الخروف
..الظاهر اسكر احسن انتي اليوم ناويه على الشر
..براحتك بس لاتتستانس عليها ترى وحده حقيره وماتستحي وماعندها دم
..خلصتي باقي مسبه ماقلتيها ساره زوجتي وبتصير ام ولدي وكلامك مايغير هالحقيقه
..وانت مستانس ان بيصير عندك ولد هذي امه هه الله اعلم منين جايبته الظاهر حامل من قبل لاتتزوجها
قالت هالكلامه بلحظه صفرت اذنه من صوتها ماقدر يكمل الكلام انخنق معقوله اختي توصل معها لهالدرجه ..حقيره حقيره>> وسكر التلفون بوجهها
فز على حيله وبسرعه لبس ثوبه كان العرق يتصبب من جبينه ويغلي من داخله فتح باب الغرفه بسرعه ونزل يركض على الدرج طلعت ساره من المطبخ كانت حالته غريبه قبضها قلبها من شكله

.. نواف وين رايح>> مر جنبها ..طالع
تعداها وهي تمشي وراه ..نواف شفيك وش صاير
دفعها عن طريقه ..بعدي عني انتي الثانيه <<وفتح باب البيت وطلع ادهشتها حالته على طول ركضت لجوالها واتصلت عليه لكن مارد عليها ..يارب وش الحال وين راح هذا وش فيه ؟؟
..................................................
..اسف حبيبتي بس انا بغيت اهلك يقنعونك
..بس المفروض قايل لي هذا شي يخصنا انا وانت
..مهاوي حبيبتي انا كلمتك اكثر من مره بس انتي معنده قلت اطلب من ابوك يقنعك وصدقيني اذا مانتي راضيه انا بعد مابي زعلك
ابتسمت لكلامه ..ماعليه فهد بس خذت على خاطري لاني تفاجئت يوم قالت لي امي
..اهم شي انك مبسوطه
..انا مبسوطه لان الله رزقني بزوج مثلك
..هههههه ترى اصدق هاه قولي وش رايك بصراحه وانا راضي
استحت منه اخجلها بكلامه ..الي تبيه سوه
..اكيييييد
تنهدت ..اكيد الوقت الي يعجبك حدده
..مشكوره حبيبتي ان شالله اشوف الوقت الي يصلح واكلمك
..صار وانا استناك
..اوكي حبيبتي بينا اتصال سلام
..سلام

نزلت جوالها ونوت تطلع من غرفتها وهي تفكر بقرارها الجديده ماكانت ناوويه تتم الزواج لين تتخرج لكن فهد قدر يقنعها
استوقفها صوت جوالها توقعته فهد هذي حركاته لكن شافت رقم ساره وعلى طول ردت ..هلا سارونه
..هلا مها مها ابي منك خدمه
..ابشري بالي اقدر عليه من عيوني
...تسلم عيونك بس نواف طلع من البيت زعلان واكلمه ولايرد ابيك تكلمين نايف عشان يقوله يرجع للبيت او يجي عنده للبيته
..انتم متزاعلين ؟؟
..ابد مابينا شي دخل ينام والظاهر جته مكالمه وقام وشكله يخوف تكفين مها بسرعه
..ساره خوفتيني
..والله حتى انا خايفه طلع يركض ماقدرت اوقفه
..طيب طيب سكري الحين وانا بكلم نايف
..زين اتصلي طمنيني
..اوكي


..............................................

يلملم اوراقه خلص شغل ويبي يرجع للبيت وخالد قاعد يستناه عشان يطلعون يشربون شي
اتصلت مها وهو مندمج رفعه وكلمها ..هلا مها
..هلابك نايف تكفى
قام واقف من مكانه حس بصوتها يرتجف خاف ان ابوه فيه شي ..خير يامها وش عندك صاير لكم شي
..لا حنا مافينا شي بس اتصلت ساره تقول نواف طلع من البيت زعلان وحالته ماتسر وتبيك تتصل فيه انا بعد اتصلت ولارد تكفى نايف كلمه وخله يجي عندك
..طيب طيب هدي وفهميني وش صار هو متزاعل مع زوجته
..نايف الله يهداك هذا ماهو وقته اكيد اذا اتصلت عليه بيرد
..خلاص انا بكلمه تطمني
..امانه معك يانايف لاتخليه الالين يجي عندك اويرجع لبيته نواف اذا زعل ينسى نفسه
..ولايهمك
سكر منه واتصل عليه ونسى خالد الي كان يستناه
..خير يانايف وش صاير
..ماعليه خالد تقدر تروح صايره مشكله بالبيت ماقدر اطلع معك
..خلاص بس كلمني
..ان شالله


......................................



واهني الطير لاضاقتيطير

في تضاريس الفضا يلقىالحلول




ساق السياره بسرعه كانت تسابق الريح نار ولعت بجوفه من كلام اخته احرقته بدون ماتدري سيل من الاتصالات من ساره ومها لكن هالمره كان المتصل نايف قرر يرد هوالوحيد الي يقدر يكلمه
..انت وينك يارجال
..مدري مدري
..نواف وش فيك؟؟
..بختق يانايف
..طيب قل وش فيك ؟؟
..الحقيره طلعت على حقيقتها
..منهي الحقيره
..قالت لي كلام ماينقال
..اسمع لاتتكلم تعال عندي للبيت انا رايح هناك
..زين زين
وسكر بدون لايسمع رده فتح ازارير ثوبه ولانتبه للشاحنه الي طلعت بوجهه وضربت بسيارته

.................................................. ........

يستناه يجي مرت ربع ساعه نص راحت ساعه وهو ماجاء اتصل عليه لكن مايرد انغزه قلبه >>الظاهر صاير بينه وبين زوجته شي وشكلها سالفه كبيره يمكن لطيفه صادقه استغفر الله العظيم قال هالكلمه ونفض راسه اتصل مره ثانيه لكن مارد طلع عند باب البيت ماعاد قادر يجلس بمكان واحد توالت اتصالات مها من قالها ان نواف جايه وهي تتصل تتطمن اذا وصل ولا لا ولارد عليها سمع جواله هذا نواف
..وينك يانواف
..انت الاخ نايف
بلع ريقه ..اي نعم
..صاحب الجوال هذا صار له حادث وانا لقيت اتصالك وقلت اكلمك
دارت الارض فيه ..حادث
..طيب هو زين
..والله ياخوي الحادث كبير انقلوه لمستشفى ال..... تقدر تجي تشوفه
سكر بدون لايشكر الرجال على ايش يشكره على الخبر الحلو ركب سيارته يركض وحركها وترك وراه غبارها يملا المكان



.......................................


..الله يستر مدري وش الي قلب حاله كان هادي
..اهدي ياساره شوي تلاقينه داخل عليك
..يارب والله قلبي خايف
..ان شالله مايصير الالخير
..ان شالله المشكله حتى نايف تقول مها انها تتصل ولايرد عليها
هالمره حتى نوف خافت ..مها تدري
..اي اضطريت اقولها عشان تبلغ نايف
..اكيد بتقلق عليه
..مسكينه قاعده على اعصابها
..الله يستر



...............................


طلع من عنده يسحب حزنه على اخوانه ودموعه تملا وجهه سمع اخر كلمات قالها له وصاه بولده امنه يهتم فيه ويربيه مايخليه لزمان يقسى عليه حقد على ساره هي السبب بموته اكيد كشفها
جلس على الكراسي بالممر فضى ماكان يتزاحم بصدره قام يسحب نفسه سحب الحمل اثقله مصيبه نزلت على راسه وشلون يواجه ابوه وشلون يقول لمها وكيف يجي ولده ولايلقاه <<<اه يانواف





واه قلبي اللي فيه مثلالمناشير
...وصارت عروقه من هموميظمايا

أردد الونه من عصير إلى عصير.....
....واخذ على روحي ل روحي وصايا




بعد يومين البيت مزدحم وصل ابو نايف زلزله الخبر واظناه لكن اللهم لاعتراض ووصل ابو سلمان وام سلمان ونوره وسلمان جو يحضرون هاليوم المرير ويواسون ساره في مصيبتها


..على سريرها لاكلام لاكل ولانوم ولاحتى بكا حتى الدموع جمدها الخبر شي كانت تحس فيه من زمان
وقفت عند راسها ..ساره حبيبتي لازام تاكلين مايصير الي تسوينه
رفعت راسها بهدوء وهزته ..ساره علشاني ولانوف مالها خاطر >>ماردت حتى بنظره <<طيب عشان الي ببطنك حرام بيموت من الجوع >>صدت عنها ولا تكلمت يئست نوف منها نوف الي ماتركتها من اتصل سلمان وبلغها مشت بدون حتى ماتقول لناصر




غلاك عندي / لو شرب منهمخلوق
يبطي ولا ذاق العطش/ في حياته ..!!



مها صارت لها غرفه تعتكف فيها من وصلت ماطلعت منها ابد صورته قدامها وتحاكيها بشويش سمعت الباب يدق ماتحركت لكن نوره ماستنت كثير فتحت الباب وددخلت
..مها
رفعت راسها ومسحت دموعها ..نعم
..فهد يبيك تحت
..ماقدر اشوف احد يانوره
..بس فهد ماهو أي احد هذا زوجك وحقه يشوفك ويتطمن عليك
..ماقدر ماقدر>> واجهشت تبكي
رتبت على كتفها ..خلاص براحتك >>وطلعت من عندها

ابو نايف ام بدر بدر نجود مشعل جود الكل احزانهم متقاربه واوجاعهم متشابهم شخص واحد غاب في هاليوم ؟؟؟؟.

.................................................. ...................
طويت فيصوت التناهيد مأساه
جرح يبكيني .. وجرح بكيته

يجتاحنيصوته وزوله وذكراه
ودرب على بعد المشارف مشيته






وصلها الخبر مثل الصاعقه ماتخيلت بيوم من الايام تكون السبب بموت نواف جالسه بغرفتها المظلمه لحالها تناجي الجدران الجامده ودمعها ماتوقف على وجهها وتاكل نفسها بنار اللوم ماحد يدري عنها ماحد حولها ماحد شايل همها طلعت من المستشفى بعد مهدئات صرخت وصرخت لكن الي يروح مايرجع انفتح باب غرفتها حست نور تسلل عليها رفعت نظرتها وشهقت قبل تتكلم ..عظم الله اجرك >>نقمه تملى قلبها عليها وعلى نفسها الي طاوعتها وركضت وراها ..لطيفه حبيبتي ادعليله الميت ماتجوز عليه الالرحمه
وقفت على ركبه بنص السرير ..انتي جايه وش تبين
ردت باستهزاء ..وش جايه اسوي جايه اعزيك
..الله لايكثر خيرك اطلعي مابي اشوفك
..الشرهه على جايه اواسيك جالسه هنا ماحد داري عنك
بصراخ ..اطلعي بررررررى انتي السبب انتي السبب
اشرت على نفسها ..سبب بايش ؟؟؟؟؟
ونت وبكت وصرخت ..انتي الي ذبحتي نواف انتي الي حرمتيني منه انتي كنتي تدعين عليه
..انا ماذبحته حقدك هو الي ذبحه انتي الي حرقتي دمه بكلامك المسموم
..انتي الي شجعتيني و كنتي تحركيني
قربت لها ..انا ماقلت لك اكرهي زوجته انتي طاوعتيني لانك تكرهينها وتبينه يتركها
..اطلعي برى حسبي الله عليك
..لاتحسبين على بس تدرين تستاهلين الي صار لك جزاك من ربك تذكرين لما كنتي تتشمتين بنوف يوم سقطت الحين جا اليوم الي تتشمت فيك
سدت اذانها ..مابي اسمع صوتك اكرهك اكرهك
صكت اسنانها وبعنف ابعدت يديها عن اذونها ..لابتسمعيني نواف مات وحملك طاح واهلك تخلو عنك ولو يدرون وش سويتي بنواف بينحروك ويشبعوبن بلحمك .... الشوارع
..اطلعي برى اطلعي
مسكت يد الباب والتفت لها ..طالعه بس بقولك شي ساره ماماتت ولدها حي انتي الي خسرتي انتي >> وطلعت وسكرت الباب بقوه
انسل جسمها على السرير مثل قطعة القماش وقعدت تون وصوت وناتها يرتد عليها ولافيه من يواسيها ويشيل عنها همها
بيوم وليله انقلب كل شي على راسها


لن اقف هنا كثيرا فالحزن موجع وايامه طويله حاره كنهار الصيف ولياليه مظلمه قارصه كبرد الشتاء
الموت هو احق الحقائق وان طالت اعمارنا فهو نهايتنا التي لاجدال فيها ومازلنا نجزع ونستاء
عزأ اخذه ابو نايف وعياله عاشوا ايام قاسيه ومؤلمه مضت كئيبه مظلمه ولكن هي كغيرها تمضي


نواف مات وترك زوجه ارمله ماكملت العشرين وطفل بيواجه الدنيا يتيم
قرر ابوها وامها يجلسون عندها ببيتها لانها بفترة حداد ومايجوز تطلع من بيتها سلمان رجع مظطر لشغله وترك نوره ببيت اهلها
ابو نايف ضاق صدره من المكان وماعاد يتحمل يجلس ورجع لجده
مها المصيبه كانت اكبرمن صبرها رجعت مع اهلها
نوف نساها حزنها على اختها ناصر ووجوده بحياتها ماشفته من اكثر من اسبوع حضر العزا والتهى بشغله
نايف بشقته مايطلع منها حتى لشغله رغم محاولات فهد وخالد....

...............................................
خل فتره بين جرح وجرح ثاني ..
وبعدها أستأنف جروحكيازمن!!

مايصير أموت وجروحي تعاني
ولو أموتمنين تلقى لك وطن!!




15يوم مضت على موت نواف
جسم سله الحزن مسلتقي على سرير ابيض بالمستشفى والا جهزه عليها كانت راح تموت لكن لها عمر تعبت ونقلوها اخوانها للمستشفى على طول قرر الدكتور توليدها بعمليه حفاظا على حياتها وحياة الطفل ماعاد فيه شي له طعم كل شي مظلم بدون الوان
وعت من البنج بدت تتضح الرؤيا قدامها لقت نوف جالسه قدامها على الكرسي من شافتها فتحت عيونها وصوت انين يخرج منها
قامت بسرعه لها ..الحمدلله على سلامتك حبيبتي
لفت للجهه الثانيه بدون ماترد رتبت على كتفها ..مبروك جبتي ولد يجنن >>لارد سوى دمعه تسللت على خدها بهدوء
..ساره حبيبتي قولي الحمد لله الذي لايحمد على مكروه سواه الله عوضك عنه بولد ماشاءلله تبارك الله وانتي لازام ترضين بقسمة رب العالمين
هزت راسها واخيرا نطقت ..الحمدلله >>حطت يدها بيد اختها ..وين امي ؟؟
..امي تعبانه خايفه عليك كانت بتجي بس سلمان مارضى
لفت مره ثانيه وهي تناظر للجدار ..شفتيه
..منهو ؟؟؟؟؟
..الولد
..شفته يجنن ماشاءالله حتى صحته ممتازه
سكتت شوي ..متعب بسميه متعب
احبست نوف دموعها ..الله يخليه لك والحين شدي حيلك ابوي بيجي بعد شوي لاتعبينه زياده خليك قويه خليني اشوف ساره الي اعرفها


لمتالزمان ولايمالوقتغلطان
حوادث الأيام من فعلأهلها
كل يغني مع زمانهعلى شأن
هذا يميلها .. وهذا عدلها





دق جرس شقته وهو جالس لحاله والنار تستعر داخله ولاحد داري عنه قام ببطئ وقتح الباب كان فهد
..ياخي ساعه ماتفتح الباب
عطاه ظهره ودخل وفهد يتبعه ..طيب قل تفضل
بعد ماجلس ..وانت استنيت لين اقولك انت دخلت وخلصت
..زين وش رايك نطلع نتمشى
نظره باستخفاف ..وين ؟؟؟
..اي مكان حتى لوتبينا نسافر
..ماني رايح ولا جاي
..طيب عندي لك خبر يمكن يخفف عنك شوي ويفرحك
..خير
..زوجة نواف الله يرحمه
استفزه ذكرها وارتباطها باسمه ..وش فيها
..ولدت
لانت ملامحه ..ولدت ؟؟ بس كنه باقي على ولادتها
.. امي تقول انها ولدت في السابع
..وش جابت
..جابت ولد
نزل راسه وتخيل وشلون بيكون ولد نواف ناظر فهد وحس فيه ..نايف ياخوي اذكر الله مايصير تسوون كذا الموت حق
انتبه انه جمع بالكلام وعرف انه يقصد مها ..مها وش اخبارها
..مها من ذاك اليوم اتصل عليها ولاترد واذا الحيت بالاتصالات تقفل جوالها
تنهد بعمق ..اعذرها يافهد
..انا والله عاذره بس حرام الي تسويه بنفسها
..الله يعين صعب يا فهد نتقبل الوضع الجديد
..استغفر الله مايجوز ياخوي نجزع
..استغفر الله العظيم
.................................................. .......
السكوت إن طال يغري بالكلام
.........والكلام إن ضج .. مايسترشعور !!




طلعت نوف من عند ساره مهدوه لانها طول الليل عندها ولاتركتها لين جاها سلمان وابوه
كان ناصر جالس مع امه وابوه بالمجلس من وفاة نواف تطلع من البيت بدون حتى ماتقوله تركها هالفتره لانها مقدر ظروفها
دخلت وعيونه عليها ..السلام عليكم
ردوا عليها ..وعليكم السلام
تكلمت ام ناصر ..هاه وشلون ساره
..الحمد لله بس اظطرو يسوون لها عمليه بالسابع لانها تعبت
..وان شالله هي والولد زيننين
..الحمدلله
..الحمد لله على سلامتها يايمه
..الله يسلمك ياخاله
..اجلسي يايمه معنا من زمان ماشفناك
..اسمحي لي ياخاله تعبانه بروح اريح قبل ارجع لساره بالمستشفى
..براحتك
طلعت وهو مازال يتبعها بعيونه ماعبرته ولاكلمته ولاحتى ناظرت له

رد: ليه عمري مالقى لبرده دفا الا لقاكي

الب الثالث والعشرين ارت



الجماجم خاوية والموت راكب دربي
تشرق العين من دمعة , وتذرف دمعه

أحتضن طعم حلمي واكتبه من كربي
قلب دامي , تناوب فيه صرعه وصرعه




قابلها على سريرها وحب راسها حست بوجوده بالمكان وناظرت له نظره ماتحمل أي تعبير عيونها الي كانت تنطق كره لكل الناس
..لطيفه !!نفس النظره كمل لانه عرفها ماعاد تقاطعه .. الي راح راح وهذي قسمة رب العالمين وما بيدينا الا ندعي له
ارتسمت على وجهها علامة الالم وردت..نواف مات ياعبدالله
..الله يرحمه
انفعلت فجئه وثارت ..لا نواف مامات نواف ما مات انا الي مت خلاص بموت بموت >>قام وحاول يهديها
..اذكري ربك وادعي له
.. اه نواف اخوي لالا نواف ولدي راح وخلاني
مسك كتوفها ..خلاص يالطيفه خلاص البكا والحزن مايرجع الي راح بتذبحين نفسك ولدك محتاجك
..بس انا ابيه يرجع
..لاحول ولاقوة الابالله وش رايك اقولك شي يفرحك
..مافيه شي يفرحني بعده
..حتى اذا قلت لك ان زوجته جابت ولد
ارمشت بسرعه كانها ماهي مصدقه ..من قالك؟؟
..انتي الله يهداك مسكره جوالك ولاتردين على تلفون البيت نايف ارسل لي رساله
بكت بصوت عالي ماتدري ليش عجزت تهدي نفسها لين اجبرها عبدالله على المهدي صارت ماتنام بدونه


........................................
قولوا له : أني أمنالوله ضايق البال
عله يحس .. بحالتي في غيابه ..!

لازلت هاقي و الرجا فيهلا زالو مابيه يكسر خاطر اللي هقابه ..!

بعد ماطلعت نوف من عندهم رقى وراها مشتاق لها ومتلهف للسوالف معها مع انها ماراح تنوله الي في باله بس يبي منها أي شي حتى لو تتكلم عليه
كان الباب مردود توقع انه مقفول لكن استغرب يوم حركه وانفتح طل براسه ماكانت باينه لين دخل وشافها نايمه على السرير بدون ماتحس بنفسها ومتكمن منها التعب من طريقة نومتها قرب لها كان الغطا تحت جزء من جسمها سحبه بهدوء ورفعه وغطاها وعت فيه وناظرت
..وش مدخلك علي ؟؟
ابتسم ..الظاهر انك مصدقه اننا بنصير كذا على طول
استقعدت بجسمها وقابلته ..صدقني هذا الي بيصير
ظغط يدها وركز بعيونها التعبانه وقرب لها وحضنها عجزت لاتخلص نفسها منه ..ناصر اتركني ترى مايصير لك خير
..وريني وش بتسوين ؟؟
سكتت ونزلت راسها وهو اخيرا تركها يبي يوصل لها شي لازم تعرفه ..تاكدي يانوف اني مطاوعك بكيفي ومافيه شي يمنعني من غرفتي ومن زوجتي هذا حقي
نزلت راسها تتامل يدها الي انغرست بيده ..مافي شي يجبرك تتحملني ؟؟
رد بعذوبه ..فيه !!رفعت نظرها له ونزلته بسرعه وكمل ..انا مجبور لاني احبك ولاني مابي اخسرك ولاني قاعد ادفع ثمن غلطتي
كلامه خلى جسمها ينتفض مالقت شي تهرب به عنه الانها تبعد يده وترفع جسمها ..وين !!
..بروح اتجهز عشان اروح لساره
.. المفروض تستئذنين مني !!
كلمته بخوف من ردت فعله صاير يعصب او بالاحرى هي تستفزه ..يعني انت بتمنعني اتطمن على اختي
هز راسه كيف تحاول تقلب الامور ..روحي ماني بمانعك
فزت بسرعه ودخلت تتجهز وهو قام ورجع لمكان ماكان يتحسر على خسارته لها وكيف بغبائه فقدها ويفكر بحالها وش الي غيرها نوف الحنونه الهاديه نوف الي كانت ارق من النسمه نوف الي تحملت واصبرت صارت اليوم تدور أي غلط عليه



.............................................
مسكت الصوره وجلست تتاملها وتمسح عليها كانها تلامس ملامحه الي تعشقها تسللت دموعها حتى استقرت في زاوية البرواز الي يحتضن صورته شهقت ..ليه يانواف ليه تخلينا نعيش بدونك>> ضمت الصوره كانها تضمه ..تدري اليوم جاك ولد يقولون انه يشبهك يقولون انه نفسك عيونك >>ابعدت عنه الصوره وركزت فيها ..لا انت مافي احد مثلك
دخلت عليها امها وشافت حالتها وقعدت جنبها من شافتها جلست مقابلتها ومن شافت امها حضنتها ومسحت على راسها
..يمه يامها حرام عليك الي تسوينه بنفسك انتي مؤمنه والمؤمن لازام يصبر على المصايب ولو البكا يرجع الي يروح ماحد راح
..يمه الحياه بعد نواف مالها معني
..لا يايمه الحياه ماتوقف بموت احد الحياه بتسمتر وبتمشي انا اردي انه غالي عليك هذا اخوك وانا مالومك بس كل شي له حد
تذكرت ابوها الي من بعد وفاة نواف ماطلع من البيت تحس انه انهد من المصيبه .. ابوي وشلونه
..ابوك تعبان ومهدود حيله وخوفه عليك زادهمه واخوانك كلهم متضايقين نواف غالي علينا كلنا بس لازام نصبر ونحتسب
..انا لله وانا اليه راجعون
..اي يامها هذا الي المفروض نسويه ونقوله تصبري يايمه بتنعمين من كثر مابكيتي
رمت راسها على صدر امها لعلها ترتاح صارت تحس بطعم المراره انحفر خدها من كثر مابكت لكن مارجعت الي راح

.............................
ياضعف حالي حزةالشوقضعفاه
و أنا الذي ف الماقف الصعب لي طنب
.......




ساره كانت تعبانه نفسيا وجسديا تهرب من الواقع بالنوم الم يعصر قلبها بدون مايرحم صغر عمرها
جاها ابوها وسلمان يتطمنون عليها جلسو مقابلينها ويتاملونها
..هاه وشلونك يابنيتي
..الحمدلله يبه صرت زينه
..ماعليك منها يبه تتدلع علينا بتشوف غلاتها عندنا
ناظر لها برحمه ..هي عارفه غلاها هذي ساره الغاليه
بللت ريقها وتكلمت بصوت متقطع ..الله يخليك لي يايبه
..ويخليك لي الا ماقالك الدكتور متى تطلعين
..يقول يمكن بعد اسبوع
..على خير واحنا قاعدين لين تطيبين وتروحين معنا للشرقيه
..ليه يبه تروحون خلكم هنا
..يابنتي اخوك شغله هناك وانتي تعرفين سلمان مايرتاح وهو مايشوفنا قدامه
..خلاص يبه الي تشوفه بس مايهون علي ابعد عن الرياض >>ونفرت دمعه من عينها تعبر عن مقدار ماتحمل من اوجاع
انتبه ابوها انها تجاهد دموعها عشان ما تضايقه ..ساره يابنيتي تعوذي من الشيطان
..وشلون بربي ولدي يبه
تكلم سلمان ..افا وانا اخوك واحنا وين رحنا ولدك ولدي وان شالله ماينقصه شي وانا حي الي خلقه مايضيعه
..تسلم ياخوي
ابتسم يبي يخفف عنها ..بس مافي شي بلاش انا بزوجه ميلاف
ضحك ابوه .. والله تلاقي ساره ونوره ماسكات شعور بعض
..عاد ساره مانخلص من لسانها تبي تمشيهم على كيفها
..يالله حنا بنمشي واختك بتجي بعد شوي تبين شي
..سلامتك يبه
..ساره اذا احتجتي شي على طول اتصلي علي باي وقت
.ان شالله بس لاتشغل نفسك فيني


.................................................. ..
ليت الألم في دنيتي غلطة إملاء..
ويصبح أمل لاغيروا بس حرفين





نايف يعاقب نفسه بالوحده كره كل شي قاسي الوادع والاقسى ان تحس لك حق عند احد وماتدري كيف تاخذه
رمى نفسه على الكرسي بمكتبه وحط يديه ورا راسه وسرح نسى الملفات والشغل الي قدامه ولاحس بدخول خالد عليه

..وين يابوالشباب
..هلا هلا خالد سرحت شوي
..وهو يجلس ..شوي بس الاقل مانت بالدنيا
..سارح بذا الشغل
..الله يقويك زين طلعت واشغلت نفسك
..الحمدلله على كل حال
..زين الشباب ودهم يسافرون تروح معنا
..لا والله انا بروح لجده اتطمن على الوالد
..ليه عسى ماشر
..نفسيته تعبت بعد موت نواف حتى شغله اهمله
..الله يكون بعونه
..امين عاد انا بروح اشوفهم
..زين براحتك
.........................




هدى كانت تحاول ترجع علاقتها بخالتها وتنسى وتنسيهم الي صار لكن بحاجه للي يساعدها ..وش رايك يمه نروح نزور خالتي ام ناصر
رافضه الفكر وتخاف شوف ناصر يجدد حبه في قلبها ..صاحيه انتي تزورينها بعد الي سويتيه
..مايصير يمه خلاص انسوا يعني بقاطعها العمر كله
..لاتقاطعينها بس ماتزورينها لين تتزوجين اما الحين اذا مشتاقه لها هي تجيك
..يعني ماهي زعلانه علي
..خالتك تحبك بس الي سويتيه بولدها ماينسي
..انا ندمت ولو الزمن يرجع ماسويت الي سويته
..الحين انتي فكري بنفسك ومستقبلك وناصر انسيه الرجال متزوج ويحب زوجته
كان درس قاسي عليها الي شافته من اخوانها بس سمعت الي حصل للطيفه حمدت ربها انها صحت قبل يطيح الفاس بالراس
..........................................

طلعت من غرفتها مع طلعة ناصر من مكتبه الي اصبح غرفة نومه مانتبهت له لابسه وناويه تطلع من البيت نزلت لام ناصر الي كانت بالمطبخ ..يالله ياخاله انا رايحه
..مع السلامه سلمي لي على امك
..الله يسلمك وش رايك تروحين معي
..لايمه روحي انتي وانا بمرهم اذا طلعت ساره ان شالله
..ان شالله يالله مع السلامه
وطلعت من المطبخ شافته منسدح على كنب الصاله ويقلب بالقنوات شافها وشافته لكن ماكلمها ولاكلمته
بعد مده طلعت ام ناصر ..انت هنا ياوليدي يعني ماوديت نوف
اعتدل وجلس ..لا ماوديتها الظاهر راحت مع السواق
..ليش ياوليدي ماوديتها
..خليها هي ترتاح اكثر
..الله يهديكم مدري لمتى ماكنكم متزوجين
..والله انا مثلك يمه تعبت وانا استناها ترجع زي اول
..ان شالله بترجع
..والله ماهو باين انا صرت احس انها خلاص كرهتني صدق
..تتدلع عليك ياوليدي بتشوف غلاتها عندك
ابتسم ..يعني للحين ماعرفت غلاها !!
..اكيد عارفه بس انت اصبرت كل هالمده اصبر لين الله يهديها
.................................................. ..........................
ياللي غيابك .. ترجم الشوقبال / همس !
قلي دخيل الله ..

~ اخر علومك




مها بعد مابدت تتحسن طلعت بعد ماضغطت عليها امها تجلس مع اخوانها وابوها
..وشلونك يبه
..الحمدلله يابنيتي صرت زين يوم شفتك جالسه مع اخوانك
جود الي كانت تعد الايام لجية نايف ..صدق يبه نايف بيجي عندنا
..صدق يابنيتي
ببراه وبكلمات عفويه وحروف صادقه ..يبه انا احب نايف
ام بدر صارت تتقرب من عيالها اكثر تحاول تواسيهم وتنسيهم حزنهم على اخواهم ..هو بعد يحبك ومشتاق لشوفك
ارتجف صوت ابوهم وهو يتكلم ..الله يخليكم لبعض >>التفت لمها ..مها ماحد ارسلك صوره لولد اخوك
ارتعشت من الي سمعته واوجعها الحزن الي بصوت ابوها ..اي يبه ارسلتها لي نوف
..عطيني جوالك بشوفها
اخذ الجوال من يدها وتامل ملامحه الصغيره كان يحمل من اشباه ابوه وامه ..الله يصلحه ويعوضني فيه
هدا المكان كلهم سكتوا ماكان فيه كلام يقولونه او وصف لمشاعرهم بهذي اللحظه


.



................................

بعد حوالي يومين وقبل سفر نايف بيوم اصر سلمان وفهد يطلعونه من جوه شوي لزمو عليه يطلع معهم عشان يكسر الضيق جلسوا بجلسه ارضيه بواحدمن مقاهي الشباب كان يسرح بالعالم الرايحه الجايه ويبتعد بفكره عنهم
..نايف ياخوي حنا جاييبنك تغير جو وانت معنا بس بجسمك !!
التفت وتكلم بصوت جامد ..ماعليه اعذروني
رد فهد بكلمات صلبه شوي ..انتم لمتى شايلين الدنيا هذا قضا رب العالمين لايشغلكم الحزن عن انفسكم نواف لوكان حي مابيرضى بالي تسوونه ولاتنسى يانايف ابوك محتاج الي يوقف معه بهالمحنه وانتم كل واحد متلبس الحزن وناسي الثاني المفروض تواسون بعضكم وبعدين تذكروا ولده الي محتاج عطفكم واهتمامكم اكثر من حزنكم>> فعلا كان كلام فهد واقعي وسليم ويمكن لقى مدخل لقلب نايف وعقله عقب عليه سلمان ..كلام فهد صحيح ترى الحزن مثل الفرح مايدوم كل شي يروح انا فقدت اخوي وانا ماعندي غيره زعلت وضقت بس ماغيرت شي اخوانك وابوك محتاجينك يانايف انت الحين الجدار الي المفروض يستندون عليه كلنا نمر بمصايب ربك بيختبر ايمانكم ياخوي احتسب واصبر وقل الحمدلله
غمض عيونه واخذ نفس.. الحمدلله سلمان ابي اشوف ولد نواف
..للحين بالحضانه تقدر تشوفه بالمستشفى او بتنظر لين يطلع وتجي للبيت الله يحييك
..الحين الوقت تاخر وبكره وراي سفر ان شالله بعد مارجع بشوفه
..بتطول ؟؟
..والله على حسب بجلس مع ابوي لين يتعدا هالفتره وودي اتطمن على مها خالتي ام بدر تشتكي لي منها
..تروح ترجع بالسلامه
..الله يسلمكم يالله انا استئذن
..وين تو الوقت
..عندي مشوار قبل اروح للبيت تصبحون على خير
..وانت بخير

...........................................
في كل يوم اشوف موتي يجيني
وحزن الزمن غطى عيوني بيده



ببيتها لحالها الكل ناسيه وهي ناسيه نفسها وغارقه بزحمة همومها الي تكالبت عليها دخل عبدالله وهي على هالوضع تقطع قلبه عليها
لقاها بغرفتها على الاراض كانها تدور مكان واسع يحتوي الحزن الي تفجر منه صدرها ..لطيفه قومي معي
بصوت بارد وهادي وبعبره .. وين ؟؟
..نايف برى يبي يشوفك
ارتجفت من اسمه تحس انه راح يشوف كل شي بعيونها راح يعاقبها ويدفعها ثمن الي صار بنواف ..نايف!! ليش جاي؟؟
نزل عبد الله لمستواها وقابلها ..وشلون ليش جاي اخوك يبي يتطمن عليك
زاد خوفها من مواجهته ليش جاي بعد هالمده يمكن نوال قالت له ..قله نايمه
..بس انتي صاحيه قومي شوفيه الرجال بكره بيسافر
قامت لانها ماقدامها حل ثاني دخلت عليه بالمجلس ومن شافها تامل شكلها ماتوقع هالانسانه الي عيونها تنطق قوه وجبروت توصل لهالحال
ماتوقع شي يهزها او ياثر فيها وقفت بطرف المجلس شافها ماتحركت تهتز مثل البناء الموشك على الانهيار قرب لها وحب راسها وبدون مايكلمها او يستئذن منها مسك يدها ومشى معها للمجلس وجلس وهي بجنبه ..وش اخبارك يام ريان
هزت راسها وعيونها تتراوغ ..الحمدلله زينه
سكتوا ماتعود منها السكوت والهدؤ المخيف تكلم متامل انه يخفف عنها ..ليش وانا اخوك مسويه بنفسك كذا
زلقت دمعه سريعه واحفرت وجهها بدون ولاحرف دموعها احرقته اكثر شي يكرهه يشوف دموع خواته ..انا كنت شايل هم مها صرتي انتي اكثر منها
بنفسها ياليت حزني مثل حزن مها مها ماتحس بنار اللوم تشب بضلوعها سمعته يكمل ..لاتسكتين ردي على انتي مانتي اختي الي اعرفها وين لطيفه القويه
ضلوعها تخلخلت من كثر ماكتمت شهقتها وغصبت نفسها على الرد ..لطيفه ماتت مع نواف
عض شفته وحاول يبتسم ماكان احسن من حالها ..ماحد يموت مع حد والحياه بتسمتر بكيفنا ولاغصبا عنا
ركت كوعها على طرف الكنب وحطت راسها بكفها ونفست النار الي تستعر بتنهيده طويله وعاليه ..اه يانواف
قام لها وهو يشوف دموعها تتدحرج على خدها بسرعه ومسكها مع عضودها ووقفها قدامه ..لاتسوين كذا لطيفه ترى انا محتاج الي يواسيني جيت ادوور عندك القوه صرتي اضعف من ماتوقعت لطيفه ابوي محتاجنا لازام نوقف معه انا بكره بسافر له تروحين معي
افلتت نفسها منه ومسحت دموعها ..ماني رايحه
..ليش؟؟
.. مابي اشوف احد خلني يانايف خلني ورح مابي احد مابي >>وركضت داخل وسكرت بابها عليها ورجعت لعزلتها
ناظر لاثرها بستياء وطلع من بيتها وهو محتار بمن يبدا ولمتى هالحال ؟؟؟

رد: ليه عمري مالقى لبرده دفا الا لقاكي

مهما يطول الحب مابين خلان..!
بكرى يموت ويصبح الحب [ذكرى]


عرفت ليه اضحك إذا قلت:ولهان
في داخلي ابكي على شأن ~بكرى..

مشت شوي شوي لامها الي فتحت يديها وقلبها لها وحضنتها بشوق
..نورتي بيتك يانظر عيني
>>رفعتها عنها تشوف الرد الي ماطلعه لسانها يمكن تقراه بعيونها وكملت >>اشتقت لك يابنيتي
رجعت ضمتها من جديد وردت عليها ..وانا اكثر وحشتيني يمه
..وشلون ولدك ان شالله صحته زينه
..الحمدلله >>لاحظت ان حروفها وهي تتكلم عنه بارده مافيها دفئ الامومه الي تعرفه زين
..اهتمي فيه ياساره هذا عوضك من رب العالمين لاتحرمينه من حنانك تراه اكثر شي بيقفده ويحس فيه
..ان شالله الله يقدرني ويخفف حملي
..يارب روحي يمه ارتاحي بسريرك
تحركت بجسمها التعبان من غرفة امها لغرفتها الي اشتاقت لها الغرفه الي احتضنت احلى ايامها
كانت جدرانها تصرخ باجمل ذكرياتها مع اختها وتنطق باجمل الايام بهموم الطفوله والمراهقه صارت ذكرى تتمنى انها ترجع جلست على السرير وعبايتها عليها وشدت على الغطا الي على السرير بيدها وبكت بصمت

..........................................

متركيه على جنبها ويدها تحت راسها ومعطيه باب غرفتها ظهرها جالسه لحالها لان ماعاد لها نفس لاي شي طلبت منها امها تبدا الاستعداد للدراسه لكن رفضت تسوي أي شي نور المكان النور خافت يعبر عن الظلام الي بداخلها سمعت طرقات هاديه ..ادخل
انفتح الباب وحست به وهو يتسكر وبحركه وراها على السرير ويد انحطت على كتفها ..يمه تكفين مابي اروح ولاجي اتركيني لحالي
..ماراح اتركك >>اسعمت صوت رجال وراها بحركه سريعه وخفيفه جلست ولفت جسمها ومسنتده على يديها لحظات تتامل بوجهه وابتسمت ...نايف !!
ضحك على حركتها الى الان ماهي مستوعبه ..وش رايك ؟؟
..متى جيت ؟؟
..طيب سلمي اول
ضحكت على نفسها وسلمت عليه ..هلا بك ياخوي وشلونك
..الحمد لله مثل مانتي شايفه بخير انتي شاخبارك
..وانا بعد مثل ماتشوف عايشه
حرك اصبعه على خدها ..طيب ليش جالسه لحالك الشعب كله تحت بس انتي معتكفه بذا الغرفه
اخذت نفس وتكلمت ..احب اجلس لحالي مالي خلق اشوف احد
تكلم يمزح معها ..وشلون اطلع يعني
انتبهت لنفسها ..لالا ياخوي انت مانت أي احد
..زين قومي نجلس معهم انا قلت لهم بجرها لكم هنا
ابتسمت مجامله له وخطرت على بالها اختها وخصوصا انها ماشفتها بالعزا ..نايف ماشفت لطيفه
نزل راسه وهزه ..شفتها
..احنا قصرنا معها اشغلنا العزا عنها وان شالله نفسيتها زينه
..والله يامها لطيفه منهاره لو تشوفينها ماتعرفينها ماتوقعت في شي يهزها
..موت نواف كان زلزال هزنا كلنا الله يصبرنا بس
حس بها تجاهد دموعها لانها ماتبي تضايقه رفع راسها بيده ..مهاوي ترى انا مثلكم محتاج الي يواسيني كلنا محتاجين بعضنا بهالمحنه
..الله يرحمه نواف رقيب مني وصعب تطيب جروحي
..ماراح ننساه عايش بقلوبنا العمر كله
..الله يعوضنا بولده
..يالله قومي معي ترى مشيعل متحديني انزلك معي
وقفت على حيلها وهي تعدل بجامتها ..انزل انت وانا بغسل وجهي وانزل وراك
نزل وهو قلبه يملاه الحزن لكن مظطر يمثل القوه عشان ابوه واخوانه
..................................

في بيت فهد كانت نوره موجوده وفهد
تكلمت نوره وهي تراقب فهد الي يطير بنتها بالهوا وينزلها وحاطه يدها على راسها ..فههههد بتطيح بنتي
وهو ماكانه يسمعها ومستمر بلعبته العنيفه قامت وهي تحاول تاخذها وهو يلف فيها يمين ويسار ..فهد تكفى لعبك يخوف
وقف وشالها زين ..هي عاجبتها اللعبه انتي شعليك
ارتاحت يوم شافته وقف ..هي وش عرفها >>وهي تمد يدها لها والبنت ماسكه ملابسه
..هههههه شفتي هي تبيني ماتبيك صح لوفي
..صدق خاينه انا خايفه عليها وهي تبيك انت
..بدينا الغيره ترى انا اخوك
..زين زين بس اجلس ارتاح
تكلم وهو يجلس ..جلسنا انتي بس روحي وخلينا نلعب
..انت ماتمل خلك من اللعب وقلي وش سويت مع مها
هزكتفه ..وش بسوي يعني جوالها ماترد عليها بخليها لين تهدى واكلمها
..الله يكون بعونها ويصبرها ما تنلام هذا اخوها
..نواف ما كان اخوها هي بس كان اخونا كلنا موت اثر فينا
..ساره المسكينه بعد تعبانه متغيره ماهي ساره الاوليه الي تضحك وتمزح
..موته كسر اشياء جميله فينا كلنا ومافي واحد منا مافتقده بس مانقول الا الله يرحمه ويرحم اموات المسلمين
..امين يارب ويصبر اهله وزوجته
.................................................. .............

اجتمعوا حول ابوهم جمعتهم حوله تسحب شوي من كم الحزن بصدره وتخفف من الالم الي يعانيه
ام بدر ..ليت لطيفه موجوده ليه ماجبتها معك يانايف
..قلت لها ياخاله بس مارضت تجي
ابو نايف ..الله يهديها لطيفه طول عمرها ماتحب تختلط مع احد تحب تكون دايما لحالها
انتبهوا لمها نازله على الدرج ..مساء الخير
..مساء النور >>وهو ياشر للمكان الفاضي ..تعالي جنبي
جلست جنبه "مشعل ..احلى نايف قدرت تنزلها وحنا لنا كم يوم نروح نرجع عليها وهي ولا تحركت من غرفتها
..اعجبك >>وهو مبتسم له
اخذ بدر الكتاب الي جنبه وقعد يقرا ..الحين كلنا مجتمعين وانت ماسك هالكتاب وتقرا
..مشعيل حل عني مالك شغل فيني
..وهو صادق ياوليدي اجلها لبعدين
رجع الكتاب جنبه ..تامر يبه >>وهو يتوعد مشعل بحركات يهدده فيها
وسط اصواتهم اهتز جوال مها على الطاوله الي بينها وبين نايف التفتو مع بعض كان صامت بس ماردت قرب لها يوم شاف الاسم وهمس ..ليش ماتردين ؟؟
استحت من اخوها ماتحسبه انتبه له ..ه هاه مالي خلق
قرب جسمه زياده ..بس هذا زوجك
..خلاص طيب وش يبي مني مابي اكلمه ولا اكلم غيره
..لا يامها وانا اخوك فهد ماله ذنب وهو يبي بس يتطمن عليك
..نايف تكفى
..خلاص خلاص بس تذكري فهد له حق يكلمك ويعرف اخبارك وانتي حاقرته
..عارفه بس اذا شفت نفسي احسن انا بنفسي بكلمه
تركها تقلب الجوال بين يديها حست الجوال اهتز لكن هالمره كانت نغمة رساله فتحتها
طمني
وخبرني وش هي
اخر علومك
اوصف لي اوضاعك
وعلمني
اشلون تقضي باقي
يومك
ولابرسالة شوق
راسلني
واكتبلي افراحك مع
همومك
واذا نويت ترد
خبرني
ابحتفل ياخليبقدومك

<ماكنت اظن اني رخيص لدرجة انك مستكثره علي اتطمن عليك >

قامت من بينهم وهي عتبانه على نفسها قبل لايعتب هو عليها طلعت لبرى البيت وجلست على الكرسي بنص الحديقه
ترددت قبل تضغط لكن بالاخير اتكلت على الله واتصلت وقلبها يحمل خليط من الحزن والحرج والخوف ومشاعر ماتقدر توصفها

رد: ليه عمري مالقى لبرده دفا الا لقاكي

اتصل ولاردت وارسل رساله وطلع من غرفته وجلس مع امه واخته وهو متضايق ماعاد يتحمل جفاها لي ماله مسبب كانت امه ونوره يتكلمون ..ومتى بترجعون ؟؟
..مدري يمه بس عمي يقول لين تطيب ساره ويطلع ولدها من المستشفى بنروح
هزت راسها باسى ..سبحان الله كنت اتمنى انك تجين واشوفك انتي وبنتك قدامي ماكنت ادري ان الي بيجيبكم موت نواف
..اي والله يمه ماحد يدري وش تخبي له الايام الله يكفينا شرها
..امين يارب >>وهي تناظر لفهد ..فهد وش عندك ياوليدي ضايق
..ولاشي يمه بس مصدع شوي
..سلامتك ياوليدي تبي اسوي لك شي انت حتى غدا ماتغديت
وهو ياشر بيده ..لا يمه تسلمين لاتعبين عمرك الحين ب >>قطع كلامه صوت جواله ماصدق انه يشوف اسمها ينور الشاشه ماتوقع ان فيه شي ينفع مع عنادها قام بسرعه
..اسم الله عليك وشفيك ؟؟
..ههههههههههه لاتخافين يمه الظاهر جته مكالمه طيرت الصداع عنه
..هههه دمك خفيف >>وطلع لغرفته وهو يستقبل المكالمه

..هلا والله
تتكلم بصوت خجل ومخنوق ..هلا فهد
..كذا يامها تسوين فيني اسبوعين ماسمع صوتك
قدرت تتحكم بصوتها لكن دموعها كانت اقوى منها ..ماعليه فهد انا كنت متضايقه ومابغيت اضايقك معي
..افا حبيبتي لاتقولين كذا هذا واجبي وحقك علي
………….؟؟
..مها وينك !!
..معك معك
..مها لاتزعليني منك حاولي تنسين
شهقت ..انسى نواف صعب يافهد صعب
ضايقه الالم بصوتها ..النسيان رحمه يامها
رفعت نظرها فوق ودموعها تسلل ..يارب ارحمني يارب صبرني
كان يستمع كلامها يوم عرف حالتها عذرها انها ماكنت تردعليه بس لازام يقول شي ..مها حبيبتي الموت حق وكلنا بنموت انتي مؤمنه والمؤمن مبتلى نواف الله يرحمه وبدال ماتبكين وتغضبين ربك ادعي له >>سكت فتره يستناها تهدى وهو يستمع لنحيبها لين هدت شوي وضبطت نفسها
..انا متصل بسئل عن اخبارك واتطمن عليك وانتي تخوفيني عليك
مازال كلامها تقطعه بعض الشهقات ..اسفه سامحني
..ماراح اسامحك لين اشوف مهاتي الفرفوشه المزوح انتي وحده ثانيه ماعرفها
..فهد
..عيونه سمي
..بغيت اسئلك عن الزواج انت حددته؟؟
ابتسم يبي يضيع البكا ويغير جوها شوي ..اذا تبيني احدده اليوم ماعندي مانع
استحت منه ..لا بس تكفى فهد اصبر علي شوي
تكلم بجديه وبصوته العذب الهادي ..من عيوني بدون ماتقولين انا مقدر ولاتنسين ان الحزن علينا كلنا انا مابي منك الا تهتمين بنفسك والزواج ماراح يتم الا بالوقت الي تشوفينه يناسبك
ردت عليه بامتنان ..مشكور ماراح انسى لك هالموقف طول عمري
..الحين حبيبتي اترك ترتاحين ومابي اتصل مره ثانيه ولاتردين ترى ازعل وانا اذا زعلت اخوف
ضحكت عليه وحست نفسها ظلمته معها ..ان شالله فهد سامحني على الي سويته معك
.. خلاص انا نسيت انتي انسي بعد
..الله لايحرمني منك
…………………………………………………………..
يعيش الصمت ..في جو الغريب ..وتنولد ضيقه
ويبقى الحب ..مشوار السنين ..وسالفة جرحين
تعبنا ..والهوى واقف هناك ..وناشف ريقه
يسافر به ..صدى صوت الغرام ..ودمعة بالعين
فراقك ..ياعز الناس ..ورب البيت ..ماطيقه
تباعدنا ..ولكنا .. ب صدر الحب .. لسا ..إثنين


توالت الايام ومر على موت نواف حوالي شهرين نايف رجع للرياض تمم بعض اشغاله ورجع لجده مره ثانيه
نوف وناصر على وضعهم ماتغيروا
فهد ومها رجع الاتصال بينهم لكن اقل من اول
سلمان يروح ويرجع لشغله بالشرقيه
ساره تحسنت حالتها واليوم طلع ولدها من المستشفى بعد ماكمل التسع شهور


اجتمعوا فرحانين بالضيف الي انضم لعائلتهم الصغيره جابه سلمان ونوره من المستشفى مبسوطين بوجوده بينهم

من شافته قلبها يضرب طبول ماشافته الا مره وحده كان بحضن ام سلمان ..بسم الله تبارك الله الله يحفظه

تكلم ابوسلمان وهو يناظر لساره الي ماهي عارفه تفرح ولا تحزن ما اصدرت أي ردة فعل
..امين الحمدلله صارت صحته زينه
ام سلمان وهي منزله راسها وتتامل فيه ..بيملا علينا البيت
سلمان كان متربع على الاراض وماد يديه لبنته الي تحبي ناحيته ..الله يمه راحت على بنتي ولد ساره اخذ الغلا وخلاها شفتي يا ميلاف متعب اخذ مكانك
ابو سلمان..هذا غلاه من غلا اسمه
..لاياوليدي كلهم عيوني الثنتين واذا كان ولد ساره ماخذ اسم الغالي بنتك ماخذه ملامحه
قرب لها ورفع يدها .. ادري يالغاليه ادري الله لايحرمنا من حنانك
التفت لساره الي كانها متوتره ..ساره يمه تعالي شيلي ولدك واحضنيه
قام سلمان وشاله وحطه بحضنها وهو ياشر على امه ..خوذي ولدك هذا مكاني انا وبنتي
ماحركت يديها وهي تشوفه يحرك راسه يمين وشمال ويتحسس الاشياء تذكرت حركته في بطنها لمت يديها عليه وجتها رغبه تقربه لقلبها تحس نفسها صغيره على تربيته والاهتمام فيه
نوره ..الظاهر جوعان ياساره
..وشلون يعني اصلح له حليب
تكلم سلمان ...ههههههه لا صلحي له كبسه ترى يحبها
..الله يهداك ياوليدي لاتحرج اختك هي بتتعلم قومي يمه جيبي الحليب ورضعيه
ناولته مها وقامت تجهز له الحليب كاول خدمه تقدمها له بحياتها وبحياته
....................................

صباح الحب يا حب يعيش ودنيته طرياكاحس انك هنا ايامي ولو ما كنت تطرينييفوح من الزهر عطره ويبقي القلب مع ذكراكوهج ذكراك في قلبي بعد صدك يدفيني

مع بداية يوم جديد وفي بيت ناصر لبست وتجهزت ونزلت لخالتها وهي تركض عشان تلحق الوقت
..صباح الخير ياخاله
..صباح النور زين لقيت احد يقابلني على الفطور تعالي يايمه افطري معي
كانت واقفه وتشرب الشاي ..اسفه ياخاله مستعجله عندي محاضره بعد شوي
حست بحركه جنبها تظن انها وحده من الشغالات لكن قرب لها يايبي يتناول الشاي الي قدامها ..صباح الخير
ارتاعت من صوته وشرقت بالشاي وصارت تكح وتكح قامت ام ناصر ..اسم الله عليك يمه
وهي مازلت تكح من الشاي الي طار بحلقها حطت يدها على فمها وهو يناظر لها رفع كاس المويه الي على الطاوله وناولها اياه وهمس لها ..ماكنت احسب اني اخوف >>تكلم وريحتها عالقه به وتتلبس جسمه واحساسه
شربت من الما وعيونها تتحركت بسرعه نزلته مكانه وهي تنوي الهروب وقبل تكتمل خطواتها السريعه بالابتعاد عنهم ..انا بروح ياخاله تامرين شي
رفعت صوتها ورفعت يدها لانه ابعدت شوي عنها ..كنت باقولك اني معزومه الليله على زواج وبغيتك تروحين معي توسعين صدرك
بلا شعور وهي حاطه يدها على فمها بسبب حال السعال الي جتها التفت لناصرنص التفاته كأنها تشاوره فهم حركتها لكن مارد عليها لين فهمت خالتها قصدها ..ناصر ماهو مخالف ولا ياناصر؟؟
لانه حس ان عندها رغبه بالطلعه وبغى يشوف كيف بتتصرف ..شكلها ماتبي تروح لاتحرجينها يمه
انغاضت منه صاير اسلوبه بارد .. بتروحين يانوف!!
التفت لامه كانها ماتشوفه ..اذا سمح لي باروح
قهرته بطريقتها انقلب السحر على الساحر لانها عارفه انه ماراح يرفض لامه طلب ناظر لها نظره ناريه تحمل الف معنى ومعنى ..بكيفها بتروح ماعندي مانع
وطلع وقلبه يشيط غيض عليها كانت رقيقه حساسه وش الي غيرها رد على نفسها وهو ماشي وبصوت مسموع ..انت الي غيرتها ياناصر انت >وركب سيارته وراح لشغله وهو يشوفها تركب مع السواق والشغاله وتنطلق للجامعه
.................................................. ........


..نعم يبه امرني
..انا بكلمك بموضوع وابيك تسمعني للاخر
..اسمعك يبه تفضل
..ولدك اخوك يانايف !!
..وش فيه ولد اخوي
من هنا بداية الكلام صعبه عليه مثل ماهي صعبه على نايف ..وش مصيره وش راح يصير عليه
متاكد انه يرمي لشي ماخطر بباله ابدا الي خطر على ابوه ..ولد نواف بعيونا ماراح نخليه ولاراح نقصر عليه
صعب الكلام ويبي منه جهد وجلاده وصبر ماتمنى انه بيوم من الايام يكون بهالموقف ..افهمني يانايف الولد محتاج ابو يريبه ومحتاج ام تحن عليه
ارتتعشت يديه يوم بدا يعرف مقصد ابوه بس مايبي يستعجل لين يتاكد من مقصده ..وش تقصد يبه ؟؟
..اقصد الي فهمته انت فاهم يانايف
بدا الكلام يتقطع بحلقه ويثلعثم فيه ..لايبه ماني فاهم فهمني قل وش تبي توصل له
الرجفه الي ابتدت بنايف وصلت لابوه وصارت سكاكين تنغز صدره بدون رحمه ..نايف ياوليدي لاتصعب علي الامور انا شايل هم هالولد
استغرب من ابوه اول مره يقسى عليه وهذي قمة القسوه ..انت تصاعبت الكلام يبه وشلون تبيني اتحمل الفعل
ماستغرب ابوه ابدا من ردة فعله شي متوقعه الا متاكد منه ..ريحني يانايف خلني اتطمن على هالولد قبل تغمض عيني
قرب له وجلس عند رجليه ..لك طولة العمر يابو نايف بس الولد ولدنا وحنا الي بنربيه وان شالله ماينقصه شي وانا حي
حط يده على كتفه كانه يشحذه العزيمه ..ياوليدي مابيه يعيش بين مرت عم ولازوج ام ابيه يحس بحنان الام وعطف الابو ولافيه احد يعوضه عن ابوه غيرك والبنت ضغيره مصيرها بتتزوج
..خلها يبه تتزوج الولد حنا اهله واحنا اولى فيه
..ياوليدي افهمني
..انت افهمني يبه صعب صعب الي تطلبه مني
نزل راسه بياس ..انا ماجبرتك وانت صغير ولاراح اغصبك الحين بس انا بزوجها بدر

..................................................
طاح الكلام .. وباقي الهرج قداموماتت حروفه .. بين جافي ومشتاقونام الغرام.. بحضن مدثور الأوهامعيا .. يصدق يالغلا .. بعد .. وفراق

باليل رجعت من العرس ماتشوف الطريق لان اليوم اربعاء وجت العصر يالله لحقت تلبس وتجهز فتحت الباب تسحب رجولها راسها ينقض من الازعاج الي بالزواج نزلت عبايتها وجلست تنزل صندلها مانتبهت للي يتابعه وهي تمشي رايحه جايه تطلع لها ملابس اخذت ملابسها وكانت تنوي تدخل تبدل ملابسها لكن انتبهت انه جالس بمكان منزوي بالغرفه افتحت عيونها وحطت يدها على كتفها العاري الا من جزء غطاه شعرها الاشقر ..انت من متى انت هنا ؟؟
وقف ومشى لها وهو يتاملها من زمان ماشافها باهالوضع ..وش فيك مرتاعه من زمان انا هنا
تاففت منه ..ناصر حنا اتفقنا وماعتقد انك بتخلف وعدك
وصل لها ونزل يدها عن كتفها ورجع شعرها ورى وريحة عطرها تخترق صدره برفق ..لاتخافين قلت لك لوابيك ماحد يمنعني منك بس بكلمك بموضوع
ارتعشت اوصلها من دفى يده على كتفها تراجعت ورى بخطوات حذره ..موضوع ايش
استدرا وجلس على الكرسي الي وراه ..اجلسي بكلمك
حست شكلها غلط ولازام تغير لبس ..طيب استنا لين اغير ملابسي
رفع يده وهو يرفض طلبها ..اجلسي يانوف الي اشوفه ماهي اول مره اشوفه
احمرت خدودها من منظرها ولانه فهم قصدها وجلست شوي ..اتكلم متشوقه اسمع الموضوع الي ماقدرت تاجله لبكره
ناظر لها ببرورد ممزوج بشي من الالم ..لانه قرار اتخذته بعد تفكير بقولك قراري قبل اغيره
ماتدري ليش حست بصوته لحن غريب وجديد متشوقه تسمع الباقي وخايفه منه مانتظرها تتكلم وكمل ..نوف انا قررت اعطيك الي تبين واريح نفسي واريحك من العذاب الي حنا عايشينه
دبت قشعريره بجسمها من الي سمعته ..وش قصدك
..انابعطيك حريتك وتقدرين تروحين مع اهلك وانا احل نفسي من العهد الي قطعته عليها اني ارجع نوف الاوليه
جاهدت دموعها ماتبيه يشوفها ويحس بقدر تاثرها حس ان ماعندها رد مهما كانت كلمة طلاق صعبه عليها كمل وهو منزل راسه ويناظر ليده..انا بسافر سفره طويله شوي ومابي اربطك معي عشان ماتكرهيني زياده على الي الكره بقلبك علي
تكلمت بصوت متقطع تحاول تضبطه ..انت بتسافر ؟؟
هز راسه ..بسافر ومابي اتحمل ذنبك خلاص انا حاولت معك بس ماعرفت اوصلك
تراقبه بكل جوارحها وهو يتكلم جاها شعور انها بتفقده وللابد ..متى
هزكتفه ..مدري بالضبط بس بغيت اقولك تجهزين نفسك
سكتت مده حست بالمراره الي يبتلعها وهو يقول الكلام مع ان هذي رغبتها لكن سمها الكلام وسئلته ..كم بتقعد ؟؟
قام وقف .. الله اعلم انا بعطيك ورقتك اذا رجعت الا اذا كنتي مستعجله
نزلت راسها بالنفي ودموعها تنزل بهدوء وسمعته ..تصبحين على خير
كان ودها تمسك يده وتقوله اجلس تو الوقت او تقوله لاتطلع الغرفه غرفتك والقلب بيتك لكن اخذتها العزه بالاثم وانشل الكلام على شفايفها المرتجفه فزت من صوت الباب الي تسكر وراه حست مكانه فضى تحس بحضوره داخلها ضربت على الكنب بيدها >>غبيه يانوف غبيه
تحبينه وتقسين عليه >>رد عليها صوت ثاني >>بس مابين بعينه الحب الي عطيته >>بدون ماتتحرك مالت على الكنب وارتخت جنبها عليه ولمت رجولها لبطنها وقعدت تهتز من مجرد الفكره والكلام

رد: ليه عمري مالقى لبرده دفا الا لقاكي

متابعينك خيتو ,

وتسلميي ,

رد: ليه عمري مالقى لبرده دفا الا لقاكي

يعطيك ألف عافية يىقمر

مابعتك =)

رد: ليه عمري مالقى لبرده دفا الا لقاكي

الب الرابع والعشرون ارت



نزل راسه بياس ..انا ماجبرتك وانت صغير ولاراح اغصبك الحين بس انا بزوجها بدر

جفل من الي سمعه وانطوى قلبه من الي قاله ابوه خصوصا انه يعرف بدر بار لدرجة انه يمشي للنار في مقابل رضا ابوه لكن حاول يثنيه
..بدر!!
بصوت واثق شققته الحسره ..اي نعم بدر ماقدامي الا هالطريقه تقرب ولد نواف لي وتخليه يصير تحت عيني
..بس بدر صغير يبه حرام تحمله المسؤليه وتضيع مستقبله وانت تدري ان دراسته اهم شي عنده المستقبل فاتح له يديه
على صوته ورفع كفه بوجهه ..ماهو صغير لاتنسى انه كبر نواف الله يرحمه ومستقبله ماراح يضيع من تربية ولد اخوه انا مابي منه الا يتزوجها ويترك تربية الولد علي
طخى راسه ..بس يبه انت تظلمه بقرارك
صرخ بصوت يرتجف ..لا انا ماظلمته انت ماتحس بالنار الي بجوفي يانايف موت نواف هدني لاتصيرون انتم والزمن على
سمع رجفة صوته ووصله معها احساسه بس قبل لايتكلم كمل ابوه .. اذا تبي رضاي ياولدي لاتتدخل بهالموضوع عيش حياتك واتركنا انا عرضت عليك ورفضت بس بدر ماراح يرفض
رفع راسه وحط يده بجيبه ..لاتستغل بر بدرلك يبه خلاص انا اولى بهالمسؤليه
انفرجت اسريره من الي سمعه لانه متاكد ان نايف قد مسؤلية تربية ولدنواف ..متاكد يانايف ؟؟
طلع يده من جيبه وحطها على يد ابوه ..متاكد يبه
..الحين بقى علي ساره
استهزا فيها بينه وبين نفسه وحده بهالاخلاق وشلون يحق لها توافق او ترفض ان تزوجتها حميت بدر من شرها واخذت حق نواف منها والله لادفعها الثمن غالي تنهد بعد صمت ..هذي عليك يبه


.................................................. ...................
. عزاه صرنا نلتقي مثل الأغراب..
عقب الغلا كلن بوجه يصدي..

من عقب ماحنا عزيزين وأصحاب..
اليوم كلن صد قصده تحدي..

لكن يطول الوقت وتعرف الأسباب..
تندم على وقتن مضى كنت ضدي..!!
.





بعد يومين من الافصاح عن قراره ماشافتها من وقته كانوا يتصادفون لكن من وقتها حتى الصدفه بخلت عليهم بلقا دقت برفق على باب المكتب الي صار له شهور مادخلته وجسمها ينتفض من الرهبه ماتدري ليه حست انه ماراح يستجيب قررت تتراجع وتروح لغرفتها لكن انفتح الباب قبل تكمتل ميلتها بسرعه رجعت بنظرها عليه ..اسفه اذا ازعجتك
سخر منها وضحك بنفسه عليها بس لوهله توقع انها تقوله انا عدلت عن قراري وانت اعدل عن قرارك ..ابد مافيه ازعاج بس كنت لاهي بالشغل
ارتجفت قبل تكمل كلامها وهي تشوفه واقف يستناها تكمل ..زين مابي اعطلك بس بغيت استئذنك بروح ازور اهلي
ابتسم لطلبها كانه اول مره من رجعت له تسئذن بطريقه مباشره ..وليش تسئذنين كان رحتي ماله داعي الاستئذان
سكتت وحست بالحرج منه كان ودها يفتح معها موضوع تبي تستفسر منه عن سفرته عن قراره هل هو قرارقلبه ولاعقله ولا وقوفا عند رغبتها ولا ولا اسئلها كثيره تدور ببالها لكن ماقدرت
..طيب عن اذنك انا رايحه
وهو يسكر الباب ..اذنك معك

ماتدري ليه جرتها رجلها لمكانه مع ان هذي رغبتها وهذا الي اجبرته عليه وهو الي كان رافض الفكره

............................................

طلع من عند ابوه بعد اتفاقهم انهم يحدد وقت يكلم ابو سلمان بخطبته لساره طلع من مجلس الي مقابل الدرج وهو طالع فتح ازارير ثوبه حس ملابسه اخنقته شي يضغط على صدره من ثقل الي تحمله مامداها يجبر كسره بموت اخوه حتى ينكسر زياده مشى بخطوات بطيئه طلع على الدرج كان ناوي يدخل الغرفه المخصصه له ببيت ابوه وقف عند غرفة مها دق الباب دخل يوم سمع صوته تاذن له بالدخول
استدارت وهي جالسه على كرسي تسريحتها يوم شافة صورته تنعكس بمرايتها الي ماخفت عليها الضيق الي مرسوم بتعابير وجهه قامت وهي تشوفه ماسك يد الباب كانه يدور شي بالغرفه تكلمت وهي تمشي يمه ..وش فيك وجهك متغير
جلس على الكنب ..مافي شي
..والله ياخوي الي يشوف وجهك يبصم بالعشر ان فيك شي انا اعرفك يانايف
تنهد بالم من حدة سكاسين تنغز صدره ومن حملا طاح عليه ووهنه ..اه ابوي يامها
جلست بجنبه وعيونها متعلقه بعيونه ..وش فيه ابوي صار له شي
ببرود تكلم ..لا لا يامها لاتخافين مافيه شي >>ناظر لها .. ابوي يبي يزوجني
ميلت راسها وهي نتاظر له وهي تحاول تستوعب في شي غلط بالموضوع في شي ماهي قادره تفهمه وبصوتها الي يحمل استفهام ..ونواف ماصار على وفاته اربع شهور فهمني السالفه يانايف عجزت افهم
غمض عيونه وركز عليها..ابوي >>وسكت
علقت عيونها به وهو يحاول يطلع منه الكلام وتكلمت .. قول وش يبي منك ابوي
قلب الكلمه بمراره داخله واخيرا لفظها ..ابوي يبي يزوجني ساره
ماعلقت لين فهمت السالفه ماستغربت ابدا نزلت راسها شوي شوي ..كنت متوقعه
فتح عيونها على كبرها من الي سمعه يعني مها توقعت الي ماخطر ابدا على بالي ..ابوي كلمك
..لا ماتكلم بس عارفه انه ماراح يخلي الولد يتربى بعيد عنه
..والله مدري يامها وشلون اتصرف مابي اغضب ابوي
..خقك انك ترفض هذا زواج يعني عشرة عمر
..خلاص ماعاد للكلام فايده انا وافقت واتفقت مع ابوي على كل شي
..ليش توافق اذا مانت مقتنع
..لو رفضت بيزوجها بدر
..يمكن بدر يقتنع ويتقبل الفكره
ماقدر يقول لها مابي يصير ببدر مثل ماصار بنواف مايبي يقولها انه شبه مجبور فضل يقوم وهو ساكت اسكت يانايف طول عمرك ساكت وماحد يعرف وش الي بقلبك ليش هالمره تكلمت وفتحت قلبك
طلع من عندها وهو مبهوت ماهو عارف اتخذ القرار الصح ولا الغلط
.................................................. ................
وصلت لبيت اهلها كانت بينهم بس بالجسم لكن قلبها وعقلها وجوارها كانت هناك ببيتها عنده وبالمكان الي هو فيه كانو مجتمعين كلهم ماعادا ساره الي سئلت عنها وعرفت انها دائما مشغوله بولدها الي صار ياخذ كل وقتها راحت لها وكانت جنبه ومنسدحه على جنبها وراسها على حرف السرير وحاطها اصبعها بيده الصغيره وسارحه فيه ماصحت الالما القت نوف السلام بعد ماوقفت تشوفها عدلت نفسها وجلست ..هلا نوف
جلست بالجهه الثانيه بحيث صار الطفل بيبنهن مسحت عل راسه بنعومه ..ليش مانتي جالسه معهم برى
..كنت انوم متعب من متى انتي هنا ؟؟
..يعني من حوالي ربع ساعه
بعد مادققت فيها عرفت انها تفكر بشي وصاير بينهم شي ..نوف صاير بنينكم شي جديد
شالت ولد اختها بين يديها ولزمت جسمه على صدرها بحنان وناظرت لساره ..ناصر بيسافر
عقدت جواجبها تدري ان الي قالته تمهيد لكلام يجي بعده..طيب ماظن هذي المشكله
حبت متعب ونزلته بمكانه وحطت يديها بحضنها ..طلب مني اروح معكم
ردت بملل تدري هذي ماهي نهاية الحديث ولا هذا الاشكال ..نوف اختصري لاتتكلمين كلام مقطع
بدت بالكلام وحيره تتخلل حروفها وتردد وندم وشعور صعب ينوصف هو الي كان غلطان وشلون صرت احسن نفسي مذنبه بحقه ..قالي انه بيعطيني حريتي وانه مايبي يظلمني معه
صدمها الي سمعته بس تلبست قناع البرود يمكن تستفزها ..ماهو هذا الي تبينه‍!!
التفت للجهه الثانيه ماتدري كيف توصف الي تحس فيه وتعبر عنه بلسانها وتلاقي احد يفهمها تكلمت بصوت بارد ..ماحد فاههمني ماحد حاس فيني ولا واحد فيكم جرب نار الغدر ولانجلد بصوط الظلم >>وهي مازالت ملتفته ضمت اصابعها وغرزتها بصدرها ..ماحد ذاق طعم الاهانه >>هنا التفت بسرعه وتكلمت بحروف اسرع من التفاتتها ..شعور صعب ياساره تتفانين بحبك وتدوسين على قلبك وبالخير تلقين جزاك كل هذا
قدرت توصل الي داخلها لاختها وعرفت كيف ترسله لها عن طريق الصوت والاحساس ..بس انتي تبينه وهو يبيك غلط واعترف بغلطته وانتي بنفسك متاكده انه ندمان ماظن يانوف يقدر يسوي اكثر من الي سواه
تدور بكلامها مشوره اوكلمه تريحها او تهدي نفسها عليه تحب بجنون لكن يحول بينها وبينه المشهد الي ماتنساه ..انتي وش رايك
قامت وقربت لها ..اسمعي يانوف لا تردين عليه بمانه مسافر اتركي الامور تمشي على التساهيل وبمانه مسافر اجلسي ببيتك فترة سفره بتكون من صالحك تفكرين وتقررين وبعدين لاتنسين جامعتك صعب بعد تتركينها بعد وتبدين من جديد
رفعت راسها لها وهي تشوفها واقفه .. بس قالي اروح معكم كرامتي ماتسمح لي
..كرامتي كرامتي يانوف انتي تدرين بحبه لك وصدقيني هو مثلك صعب يتخلى عنك بس بيستفز الاحساس الي داخلك الي حبستيه حتى عن نفسك
..من هنا لين يسافر بكون قررت واشوف وش راح اسوي والله يكتب الي به الخير
صفنت الثنتين كل وحده بحالها ومصيرها واحزانها
..................................
لابغيت ارتاح واضرب على الدنيا صليب
لج هاجوس الضماير وقمت اعوي عواه
الليالي شيبت بي قبل وقت المشيب
لاعطيت الوقت وجهي يلقيني قفاه
صرت انا والدهر مابين مطلوب وطليب
عزتي للي يصارع زمانه ماقواه






مر على هالاحداث اسبوع بدون جديد في ماعادا هواجيس القلب الي تروح وتجي داخل صدورهم
نايف يفكر بالقرار المصيري الي حدده له ابوه وكان معتمد بما انه يعتبر زواجه حمايه لولد اخوه ولبدر من ضياع مستقبله وبما ان الظروف اجبرته عليها انه راح يدفعها ثمن خيانتها لنواف
ابونايف يخطط منين يبدا باقناع ساره وابوه
نوف وناصر كالعاده كل واحد لقى لنفسه منفى بعيد عن الثاني يحبها ويعشقها لكن كره فيها العناد الي ادمى حياتهم باشواكه
وهي نفس الشي تحبه وتعشقه لكن الجرح الى الان عيا يلتئم يمكن ناصر ماعرف كيف يداوي جروحها لكن تحبه
ساره الي صارت تحمل اكبر كم من الحزن الانسان الي متاكده انه كان يحبها والي كانت دائما تحس بينها وبينه شي يخلي حياتهم مثل الوهم راح وترك برقبتها طفل كل يوم تحس انه صار يحتل اكبر جزء من حياتها



............................


الساعه 2فجرا طلع من مكتبه يجر شنطته قبل ينزل وقف عند باب الغرفه كان راح يضعف ويودعها يمكن مايشوفها بعد هالمره لكن استجمع القوه الي عنده ومشى بسرعه قبل يتراجع ونزل يركض مع الدرج يسلم على امه وابوه الي ماقال لهم عن موعد سفرته الا بنفس اليوم مايبي يضايقهم

...........................................




الموت ماهو لاتكفنت بتراب ...الموت لا فارقت حي (ن) تحبه


نايمه وكالعاده بعد ماخذت المهدئي يالله قدرت تغفى عينها حالها انقلب قلبه وحده تغير كل شي فيها الكبر والحقد والظلم كله تهشم داخلها اصبح شظايا حاده تجرح روحها بعنق ناظرها وتذكر الي دار بينه وبين امه بخصوص زواجه
مايدري وش يسوي صعب عليه الي قالته امه جلس مقابله وهو يقلب الكلام براسه
..ياعبد الله ياوليدي انا ماعاد اقدر اتحمل انت لازام تشوف نفسك
..بس لطيفه الحين تعبانه وابي اصدمها صدمه ثانيه
..لاحول ولاقوة الابالله انت كل مره تطلع لي بحجه جديد
..انتي عارفه ظروفها وحالته وشلونها الي صبرني هالسنين يصبرني كم شهر
..انت مالك ذنب بالي صابها
..افا يمه اخبر قلبك كبير وحنونه هذي زوجتي يمه وام ولدي يعني يوم انها بقوتها ماسويتها يوم احتاجت مني الرحمه اقسى عليها
..لاتفهمني غلط ياوليدي بس انت محتاج مره تقوم فيك وفي ولدك
..عارف يمه وش تفكرين وانا راح افكر بالموضوع بجديه بس انا راحمها الحين مالها احد غيري بعد الله مابي احس اني صغير قدام نفسي وقدام اهلها
..الله يعطيك على قد نيتك ويرزقك ويطول عمرك
حب يدها وحضنها..مابي منك الاهالدعوات الحلوه عشان الله ييسر اموري
..رح ياوليدي جعل ربي يفتح لك ابواب رزقه

صحى من افكاره وشال شماغه بيده وقام وطفى الضو وسكر الباب وتركها بهمها

رد: ليه عمري مالقى لبرده دفا الا لقاكي

.................................................. .....
.اه لو تدري بقلبي وش يقول؟؟
يوم تقطع خطوتك( حبل الوصال


تشهق انفاسي ويملكني الذهول !!
وتنرسم في نظرتيكلمة ( تعال





صحت من نومها قبل الفجر قلبها مقبوض كان الوقت بدري جدا على روحتها للجامعه قامت وغلست وجهها ولبست جلابيه خفيفه ونزلت بتسوي لها كوفي استغربت وهي تسمع اصوات بالصاله نزلت شوي شوي ماتدري ليه قلبها قبضها قررت تسترق السمع منهم سمعت صوت ام ناصر تبكي وابو ناصر يهديها كان صار شي ..الله يهديه لازام هالسفره
..يابنت الحلال اتركي الولد يشوف مستقبله السفره هاذي بتفيده بشغله
..وش يصبرني ثلاث او اربع شهور غيابه صعب يابو ناصر
..انتي تبينه يقعد عندك ويترك شغله
..الحمدلله وضعه زين ماهو محتاج يتغرب ويغرب قلبي معه

انتقض كل جسمها من الي سمعته وتكلمت بهمس ..سافر ؟؟
كانها تسئل نفسها او تسئل طيفه الي راح وتركها بدون حتى مايقول لها مع السلامه جلست على الدرج وايديها انسلت عن الدربزين
رصت راسها تبي تتاكد يمكن ماصحت من نومها يمكن تشوف كابوس تحس ضلوعها تطابقت على بعضها من الضيق قامت بشويش من مكانها وقبل تدخل غرفتها حطت يدها على ممسك الباب وناظرت لغرفته الي بعد غرفتها بخطوات قليله ظلت على وقفتها اتركت باب غرفتها ومشت للمكان الي كان عايش فيه بعيد عنها وقريب منها فتحت الباب ودخلت كانت مظلمه وريحته شقت صدرها شغلت الضوء الصغير الي على المكتب وجلست على كرسيه الفخم دارت بعيونها عليه "اورقه كمبيوتره اقلامه كلها هنا راح وخلاها معك يانوف" انتبهت لورقه مطويه فوق مجموعة كتب بطرف المكتب وفوقها قلم حست انها تخصها مدت يدها واخذتها وفتحتها

مدت الورقه على المكتب علشان تقدر تشوف الي فيها قريب من الاباجوره
بدت تقرا

<<حبيبتي نوف عارف انك اول من راح يدخل الغرفه بعد ماطلع منها
ولاني ماحبيت اضايقك بوداع يمكن مايعني لك شي بس فيه كلام ودي يوصلك
نوف انا تركت لك حرية الاختيار بعد مافشلت في صنع الحب بقلبك من جديد
فكري وخوذي قرارك بعيد عن أي ضغط وانا راضي
عارف قرارك لكن اذا حسيتي انك عاجزه تربطين اسمك باسمي اكثر بلغيني وتاكدي ماراح اتاخر وبلبي لك الي تبين>>>
ناصر "
بخطه الي تعرفه زين كتب كلمات لها عتاب لطيف لكن عنيف تخلل كل شي رقيق فيها وخدشه


انهت رسالته بعد ما ساحت حروفه بدموعها قامت والورقه بيدها وقبل تطلع شافت على الكنب البجامه الي لابسها قبل يسافر
اخذتها وضمتها لصدرها وطلعت من غرفته تحمل ملابسه ورسالته
شال قلبها عليه لانه ماودعها ولاقالها عن موعد سفره نست او تناست ان هي الي بدت به الشي
.................................................. .................................


في غرفة سلمان ونوره حطت بنتها بالسرير ورفعت جسمها وكلمته .. ومتى بنرجع ؟؟
..الى الان ماحددت لين اشوف وضع ساره
جلست وحطت شعرها ورى اذنها ..ساره متازمه من سالفة الروحه معنا كانها ماهي متقبله
..عارف بس لازام ناخذها معنا وماتدرين يمكن بعدها عن هالمكان تسلى شوي
..اتمنى مع اني ماظن والحمدلله بعد انشغالها بولدها يطلعها شوي من جو الحزن
مسك يدها وقام معها ..وش رايك نطلع لهم ؟؟
ابتسمت له ..يالله

طلعوا من غرفتهم للمجلس الي عادة يجتمعون فيه
كان ابو سلمان جالس ويتفرج على الاخبار وساره بزاوية المجلس الي عباره عن جلسه عربيه عاديه جدا وسارحه بعالم ماهي مع الناس
دخلوا بهدوا جلس سلمان جنب ابوه ونوره جنب ساره حست فيها وعدلت نفسها تكلمت نوره ..بايش سارحه
تنحنحت تظهر صوتها الي قطعه السكوت ..ولا شي مافي شي اسويه وين بنتك
..نايمه اقول ساره وش رايك نخلي سلمان يطلعنا نغير جوا
..لا اطلعوا انتم انا مابي
..ساره حنا نطلع دايما بس نبيك انتي تطلعين من البيت خستي من هالجدران
ابتسمت ابتسامه صفرا ..صدقيني يانوره الضيق الي فيني ما يذوبه أي شي


سلمان الي بالجهه الثانيه من المجلس ويكلم ابوه عن رجعتهم للشرقيه وام سلمان تستمع لهم
التفت لساره .. وش رايك ياساره برجعتنا للشرقيه سلمان يقول اذا تقدرين نرجع الاسبوع الجاي
ناظرت له بالم ..عادي يبه متى مابغيتوا انا معكم
..اجل على بركة الله الاسبوع الجاي حنا راجعين
قامت من بينهم وقبل تطلع ..انا بروح اشوف متعب
طلعت وكلهم عارفين احساسها لكن ماباليد حيله

.................................................. ...........
ما تقبلت الفراق وما ليدي فيه حيله,,
اه لو إن الظروووف المقبلة تكشف قدرها..

لو يعرف الشخص منا وش مع الغيب بيجي له,,
كان جنبنا المشاكل من قبل يوقع ضررها



بعد مرور كم يوم من سفرة ناصر ومثل ماقال اتخذت قرار بعيد عن أي تاثير قررت انها تجلس وتخلي القرار للايام ولرجعته
طلعت من البيت تنوي تجلس عند اهلها لين يسافرون مابقى على سفرهم حوالي اربع ايام
دخلت البيت ماكان موجود الاساره جالسه بالمجلس وامها بغرفتها وسلمان ونوره طالعين يجهزون بعض الاغراض وتاركين بنتهم عندها
مقابلتها وتلاعبها دخلت عليها نوف وسلمت عليها وشالت البنت وجلست ..وين اهل البيت
.. سلمان ونوره طالعين للسوق وامي بغرفتها
..ليش مارحتي معهم
..لا خليني جالسه هنا انتي ليش جايه الحين
نزلت عبايتها وجلست مقابلتها ..قررت اقعد هنا لين تسافرون
..يعني مانتي رايحه معنا
..لا مابي اضيع هالترم خليني كذا لين اشوف وش يكتب لي رب العالمين
..ماكلمك ناصر ؟؟
رفعت راسها فوق وسنتدته على الجدار الي وراها ..ماودعني وانت تقولين كلمني
..وش تبين منه يسوي لك اكثر
..ماني قادره اشيل ذاك الموقف من بالي
هزت راسها ..اذا مانسيتي ماراح تعيشين >>قالت كلامها وهي تمشي ناويه تدخل المطبخ
تركت نوف بحيره من نفسها من افكارها يمكن اخذت هالقسوه من الصبر وتعلمت تجرح لان الكلام الحلو ضاع وسط مرارة الايام الي عاشتها
بعد دقايق انتبهت وهي تشوف ساره داخله وبيدها صينيه قبل لاتجلس ..توني احس بشعورك يوم سافرنا وتركناك
نزلت الي بيدها وجلست ورفعت عيونها لها ..كان احساس غريب ماعرفت وشو حسيت بالغربه قبل تسافرون كان في شي مخوفني >>نزلت راسها للصينه واخذت بيالة الشاي وحطتها ..وللاسف احساسي صدق وعرفت سبب هالخوف
شربت من الشاي وهي تفكر بكلمه تقولها الكلام دايم يجيب بعضه اما ساره تراجعت ورى للجدار وكتفت يديها وتكلمت قبل يسعف نوف الكلام ..هو نفس السبب الي مخوفني من الحمل كنت حاسه يانوف كنت حاسه وكاني عارفه ان فيه شي يهدد حياتي
.. سامحيني قلبت عليك المواجع
ابتسمت لاختها بهدوء يملاه الالم ..الجروح مفتوحه اصلا ماهي محتاجه الي يفتحها
رت لها الابتسامه ومسكت يدها .. ساره ليش ماترجعين تدرسين تستفيدين من شهادتك وتضيعين وقتك
..وقتي الحين ماهو ملكي ملك متعب الحين هو محتاجني بفكر بالدراسه اذا كبر شوي
..على طاريه وينه اشتاقت له
..نايم هو من يدري انك بتجين ينام مايحب يشوفك
..مو على كيفه ينام انا الحين بصحيه باهلكه لعب
..نوف ماصدقت على الله ينام احتست بينه وبين ميلاف
..هههههه خلاص ميلاف اخذت حقها خليها لك وانا بتفاهم مع متعب
راحت من عندها وساره تتوعد فيها بس كانت جلسه حلوه ورغم مايتخللها من غصات لكن يبقى للبسمه متسع في حياتنا مهما كنا نعاني

.................................................. ..............
أغيب .. وتفقدني وأحس بوجودي
تسأل علي .. ويضيق صدرك عشاني !!
وأرجع لقلبك وأنت حبك حدودي
مابي وطن غيرك ولا حب ثاني !!






.
بعد ثلاث ايام وقبل سفر بيت ابو سلمان بيوم واحد

ولكن بعيد عن كل هذا في مكان بعيد بعيد جالس كرسيه ومقابله كرسي ماد رجوله عليه ونسمات الهو البارد تخلل عظامه من خلال بلكونة شقته الصغيره رامي الاوراق والاقلام قدامه يفكر بحاله وحالها ياترى رجعت للشرقيه ولا موجوده في الرياض وش ردت فعلها بعد ماقرت رسالته
سافر يبي يبعد عنها او يحاول يأقلم نفسه مع الوضع في بعدها خلاص الحين حل العهد الي قطعه على نفسه وعطاها الحريه رفع نفسه وتناول جواله
فتح سجل المكالمات واستقر على الوالده واتصل


كان البيت مزدحم لمه حلوه ام سلمان وام فهد وام ناصر ونوره ونوف وساره كانت عباره عن وداع لبيت ابو سلمان
ام ناصر ..تروحين معي الليله يانوف ولابترجعين بكره ؟؟
..لا ان شالله بكره بعد مايسافرون باتصل على السواق >>انغرز قلبها وهي تسمع جوال ام ناصر
ابتسمت بفرحه لاسمه الي منور الجوال ومنور عيونها ..هلاوالله بوليدي
..السلام عليكم
..وعليكم السلام هلابهالصوت وشلونك يمه
..هلا بك يالغاليه انا بخير ماينقصني غير شوفك
..الله يردك لي سالم ياوليدي
..تسلمين يالغاليه وشونك وشلون ابوي
..بخير مادامك بخير هاه يمه انت تاكل زين تتدفى زين يقولون هناك برد
ضحك بنفسه مهما يكبر يظل بعينها صغير ومحتاج لحنانها ..تطمني يمه لاتخافين على مدبر اموري ترى انا صرت رجال يام ناصر ماني بزر
..انت بعيوني ناصر الصغير الي مايكبر
..الله يخليك لي يمه عندك اصوات انتي مانتي بالبيت!!
..لا انا ببيت عمك ابو سلمان
حس انها قريبه منها البرد الي كان يحس فيه صار حر عرقت كفوفه وهو يحسها قريبه من سمعه ..هم للحين بالرياض مارجعوا للشرقيه ؟؟
..بكره ان شالله راجعين وانا جايه بسلم عليهم هذي نوف عندي بتكلمها
توترت من ذكر اسمها ومن احساسه انها بكره بتسافر ..لا لايمه انا بكلمها على جوالها
ابتسمت لانها لاماتدري بالي صاير بينهم ..براحتك يمه
..ماتوصين على شي يالغاليه
..سلامتك يمه ابيك سالم





كانت تسمع كل شي وتتشاغل بالتقهوي وبالسوالف بينما سمعها وقلبها معه وحزنت ويوم عرفت انه رفض يكلمها

وهو تنكد يوم حسها بتتركه مع انه بعيد عنها ومتفق معها الا انه ضاق من الي سمعه رمى الجوال ورجع لوضعه ولافكاره

جالسين بامان الله مايدرون وش راح تجر لهم هالليله معها اتصل ابو نايف الي وصل مع نايف بنفس اليوم ويوم عرف انهم رايحين قرر يستعجل ويجيهم بنفس اليوم جلس ابو سلمان بنتظاره وكل الي جا على باله انه جاي يشوف ولد ولده
دخل مع نايف الي كان رافض فكرة الروحه معه لولا الحاح ابوه
سلموا كان باين على وجيهم الثقل والغبن
..يابو سلمان اذا ماعليك امر نبي نشوف الولد
..ابشر يابو نايف الولد ولدك وحقك تشوفه قم ياسلمان هات متعب لجده وعمه يشوفونه
قام سلمان ودخل لداخل البيت كانت ساره وامها ونوف جالسات بعد مامشت ام ناصر وام فهد ..ساره جيبي لي متعب بسرعه
..خير وش صاير وش تبي فيه
..عمي ابو نايف يبي يشوفه
..عمي ابو نايف متى جاء ؟؟
..ياكثر اسئلتك قومي جيبي الولد بسرعه
دخلت وجابته وعطته سلمان وتكلمت بخوف وهي تتامله ..سلمان وش يبي فيه لايكون يبون ياخذونه
..الله يهداك وين ياخذونه واذا بغوا ياخذونه احنا بنوافق هذا ولدك وماحد بيربيه غيرك
ابتسمت وهي مازال قلبها خايف



يشوف سلمان مقبل عليه وهالطفل بين يديه وقلبه ينعصر من الالم وهو يشوف ولد نواف لاول مره رفع كفوفه وقلبه يستقبل قبل يديه نزل يديه بعد ماصار بينهن لمستواه وناظر له ويغالب الدمعة الي مصره تتدحرج وتتكسر على لحيته الي كساها البياض قرب لخده الناعم وحبه بحنان ..بسم الله ماشالله الله يصلحه ويعوضني فيه عن ابوه
حط ابو سلمان على جبهة الولد ..امين الي خلف مامات يابو نايف وهذا العوض من رب العالمين
..الحمدلله على كل حال >>التفت لنايف الي كان بابعد زاويه بالمجلس ويراقبهم بتوتر الموقف اصعب من ممايحتمل ..تعال يانايف شف ولد اخوك
قام ومشى لهم بخطوات ثقيله وشاله ودقق بملامحه ولاتكلم الاحديث بنفسه ..سبحان مثل عيون ابوه اخذ جمالها من نواف وحدتها من نايف واخذ البياض من امه شاف فيه نواف حبه وعطاه سلمان ابو سلمان ..تقدرون باي وقت تجون وتشوفونه
..لا يابو سلمان حنا نبيه عندنا وانتم الي متى ماشتقتو له تجون تشوفونه
بدا يغضب ويستغرب بنفس الوقت ماجا الوقت الي يطالبون ياخذونه ..بس الولد صغير وامه ماتقدر تستغني عنه هو بحاجتها
..ومن قالك انه بيبعد عن امه >>>لحظة صمت ساد المكان فتره
..وشلون فهمني !!
..انا عارف الولد محتاج امه وامه محتاج رجال يربيه معها وماظن فيه اولى بتربيته من عمه
التفتوا مع بعض لنايف الي منزل راسه ويفرك يدينه ببعض وماسمعموا منه أي كلمه
رفع ابوسلمان نظره وصوته ..انت وش رايك يانايف ؟؟
رفع عيونه وهو يحاول يراوغ بنظراته ..انا بشور الوالد
ماعجبه رده ونظراته الي تتهرب منه ..الا بالزواج يانايف لك الحق انك تقول رايك ولاتظن اني بزعل وانا عمك واذا كنت تفكر بالزواج من بنتي عشان ولد اخوك بس انا لي بوقف ضد ابوك انت ولدي مثل ماساره بنتي
حس نفسه صغير قدام الي سمعه وشلون الرجال الطيب يكون عنده بنت بهالاخلاق تكلم ابو نايف خاف ان كلام ابو سلمان يأثر عليه ..الله يهداك انت تبيه غصب يقولك مابي
..يقول الي يبي وانا اسمعه ومعه ماسمعت رايك يانايف
اخيرا رفع راسه وناظر لابو ناصر خلاص وصل لهالمكان وفتح الموضوع واتخذ قراره ..انا مانكر ان ولد نواف واحد من الاسباب الي افكر اتزوجها لكن نسبك اهم عندي من كل شي >> حروف طلعت منه بدون تفكير جابتها البديهه ودفعها كرم التعامل من ابو نايف
..بارك الله فيك ياولدي وانا اتمنى البنت مصيرها بتتزوج بس ماحد بيصونها هي ولدها غيرك
وجه كلامه لابو ناصر..بس انا باخذ رايها واذا رفضت اعذرني هذا قرارها وحياتها
..انا ابي موافقتك وساره خلها علي
..وانت تظن يابو نايف انك تقدر تقنعها ساره عنيده وشورها من راسها ولاحد يقدر يأثر عليها
كان يتابع حوارهم ويحس انه ماعاد يقدر يتنفس من الي يسمعه
.................................................. ......................


بعد مده وعند ساره بمجلسهم رجع سلمان والولد معاه
قامت ساره تشيله لاحظت وجهه مو طبيعي ..ليش وجهك متغير عمي يبي ياخذ متعب صح
سكت ولارد لكن ام سلمان ردت بصوت واثق ..من يقدر ياخذه الله يهداك الولد صغير وحضانته لك
ماتاثرت بكلام امها ..تكلم ياسلمان صح كلام امي
رد بعد حيره ..نايف
ثارت جنونها من الاول هي ماتحبه وتكره سيرته والحين جاي بياخذ ولدها منها ..نعم!! هذا صاحي انا بطلع له وبطرده بنفسي
مسكت نوف يدها تمنعها من الي بتسويه ..اهدي ياساره خليه يكمل كلامه قول ياسلمان وش عندك
..مايقول السالفه مبينه مايبي لها كلام انا بروح اجيب عباتي واتفاهم معاه دام الرجال ماهم قادرين عليه
بدا سلمان يغضب منها ويتضايق من كلامها صرخ ..ساره عيب عليك ماحترمتيني احترمي ابوي بعدين انا ماقلت انه بياخذه
تغير لون وجهه وبدت تلتقط انفاسها بسرعه ..اجل وش يبي
اشر لها بيده جهة الباب ..مو كنتي بتطلعين !!اطلعي وشوفي وش يبي منك مدام ماحنا مالين عينك
ام سلمان ..لاتزعل على اختك هي خايفه على ولدها
تنهد وغمض عيونه ..امشي ياساره عمي ابو نايف يبيك ولاتلبسين عبايتك لان نايف راح
عقدت حواجبها ماتدري بايش يفكرون شي ماهي راضيه ترتاح منه .. وش يبي مني ؟؟
..روحي له عنده كلام بيقوله لك



.................................................. ..
ضايق وأحس الحال ماهوب ينطاق
لأ الأرض تاسعني ولا الجو جوي.!


لاشان حظك والليالي .. تحدتك..!!
إصبر عليها ..والصبر زين لو طال لاتنحني للوقت ..وتروح هيبتك
تصفق بك الأيام ..من جال ..في جال


ريح الحطب يرسم مع الصمت بوحي
واكتم عباير داخل النفس قوه

وان شفت نفسي طحت من زود نوحي
بهين صبري وازفر الاه جوه

يا الله طلبتك وانت المانع المعطي

يارب فرج على | المحزون | ضيقاته







طلع من عندهم بعد كان ابوه ناوي يدخل يكلم ساره لكنه رفض وطلع هو خلا لهم المكان الي حس انه ضاق فيه

دار مده بالشوارع لين لقى نفسه قدام بيت خالد فتح جواله واتصل عليه جاه رده بسرعه ..حيالله ابو الشباب زين خطرنا على بلاك
مايدري وش يبي منه او وش يبي يقول له ..انت صاحي
ضحك يعتقد انه على استعداد للمزح معه مايدري انه كاره الدنيا ومافيها ..لا مجنون ههههههههه
..خالد بلا مزحك الحين
تبدل من المزح بسرعه للجديه يوم حس بصوته وعرف من نبرته بالشتات الي داخله ..نايف وش فيك معقوله هالضيقه وانت قريب من اهلك وضايق
..خالد اطلع انا استناك عند الباب
..انت هنا متى رجعت ليش ماقلت لي ؟؟
..رجاء خالد بدون اسئلتك الحين بتطلع ولا بامشي
..خلاص طالع طالع
دقايق الا ثواني طلع وسمعات طق بسيط على شباك السياره التفت وهو مرجع راسه ورى وفتحه ..اركب
..لا انت انزل شكلك ماتقدر تسوق
وهو يشغل السياره ..اقدر انت بس اركب بسرعه
وهو يتحرك للباب الثاني ..امري لله >>وفتح الباب الي جنبه وركب ماشاف منه أي تعبير ولاسمع منه أي كلمه
..وهذا انا ركبت قللي وش السبب الي مخليك ضايق وشايل النيا فوق راسك ومطلعني من بيتي بهالوقت
..مافي سبب بس ودي نتمشى شوي
وانطلق بسيارته بدون أي حرف نطقه وهذا طبعه كلامه قليل ولايحب يقلب بالمواضيع