رد: ليه عمري مالقى لبرده دفا الا لقاكي

بسم الله الرحمن الرحيم

كانت تائهه في طريق غريب لاتعلم ماهي نهايته
لاتستطيع ان تحكم عليه لاتعلم هل تخاف ام تطمئن
وفي وسط افكارها امتدت الى يدهالمرتجفه الصغيره يدا ضخمه لتسحبها الى المجهول احست للوهله الاولى بالخوف لكن سرعان ماحست بالامان لتجد نفسها في حديقه صغيره اخذت عيناها ها تدوران فيها وقدماها تتجولان في جنتها الصغيره
ولكن بغته وجدت نفسها في ارض جردا مقفره لاحياة فيها ولامان اخذت خطواتها تسرع تبحث عن حديقتها ولكن بداء اليئس يتسلل الى حناياها والخوف يرمي شباكه عليها .................................................. ..


عندما تقف الايام ضدنا وتعاندنا الظروف

عنما نخدع انفسنا ونقنع انفسنا بما لم نقتنع به

عندما نجد من يكرهنا بلاذنب اقترفناه

عنما نضيع في دروب الايام

ونصبح ضحيه لانعلم لمن

عندما تتوه خطواتنا عن الطريق الصحيح

عندما نحتار في انفسنا

كيف ؟ لماذا؟ اين؟متى ؟

كيف نكون اقوى من الايام ؟

لماذالانرمى الاقتعه ونواجه انفسنا بصراحه ؟

اين سنجد ضلالنا ونجمع شتات ارواحنا ؟

متى سنتغلب على حيرتنا وضياعنا ؟

اليوم سانفش لكم سطور تدور في خيالي

واجملها لكم بزخارف من الواقع

ساروي لكم قسوة الايام

سنبحر معا في المجهول

سنفرح ونحزن ونضحك ونبكي
سنحب ونكره

قصتي عن الحياه البسيطه والشخصيات المتعدده

عن الاخوه والابوه
عن الصداقه ولاخلاص
وعن الحب الذي ليس في ذلك كله

.................................................. .............................................
الجزءالاول

صحت من النوم مفزوعه والعرق يتصبب من جبينها

انتبهت لها اختها الي كانت تذاكر في نفس الغرفه توجهت لها تركض

نوف... ساره وش فيك اسم الله عليك

كات تلتفت بارجاء الغرفه المتواضعه كأنها تدور على شي

نوف..ساره حبيبتي ردي علي لاتخوفيي عليك ..وقعدت تقرا عليها

بدت تحس بالاما ن وتستوعب الوضع وتيقن انها كانت تحلم

ماتدري ليش حست ان هالحلم شي مرعب وليه تحس انه وراه تاويل لايعلمه الالله


ساره ...اعوذ بالله من الشيطان الرجيم الظاهر شفت كابوس الله يكفيني شره

نوف...خوفتيي على بالي بتموتين وتجهزت ابي اسمع الوصيه واخذ نصيبي من التركه

ساره .. ياشين خفت الدم لاصارت بغير وقتها

نوف..وش اسوي هالامتحا نات ماخلت فيني مخ

ساره ..لاماعليك هانت بكره تخلص الامتحانات وتروحين للجامعه ويرجع مخك وتروقين وتفكينا

نوف..الله يمضي هالسنه على خير وانجح واجيب نسبه

ساره ..بس لو تطيعين شوري وتتركين عنك هالعذاب

نوف... ايه تبيني زيك مريحه راسي وماخذه الدراسه لعب

ساره ... الدراسه ياحبي بالنسبه لي وناسه روحه ورده

نوف...انتي الكلام معك ضايع اقول قومي بس صلي ترى اذن الفجر

ساره انسانه مرحه صاحبة قلب ابيض وتمتلك لسان سليط بيضا وجسمها مليان قصيره نسبيا وشعرها اسود متوسط الطول ملامحها حلوه عيونها كبار وفمها صغير ورموشها ظليله
نوف.اختها الكبيره ونصفها الاخر عمرها19تشبه ملامحها بس نوف سمرا متوسطة الطول شعرها اشقر لتحت كتفها شخصيه هاديه بس المواقف الصعبه تبين قوتها

السبت 6\45صباحا

.....ساره ساره ساره سسسسسسسسساره


...عمى وش فيك فجرتي اذني

....احسن لي ساعه اقومك

.....خير وش تبين؟

....سلامتك مافيه شي مهم بس الساعه قربت على السبع وانتي نايمه قومي ياماما

....يوه متى تخلص هالامتحانات وتجي العطله وانام على كيفي

....هانت مابقى الاهالاسبوع وتفتكين وتنامين على كيفك الحين قومي سلمان وابوي يستنونك





في مكان ليس ببعيد

....اخيرا قمت ..انا ابي اعرف متى تصير رجال وتقوم لحالك

...نايف الله يرحم والديك اتركني بحالي

نايف ..طيب قم ترى راح عليك الوقت انا طالع خالد يستناني برى

نواف ...زين يالله قمت

نايف ..يالله سلام

نواف ..سلام


نايف ونواف شخصيات رئيسيه في قصتنا
نايف الاخ الكبيرعمره28انسان عصامي وجدي كون نفسه بنفسه وهبه الله الذكاء والجمال والشخصيه القويه والمركز المرموق يمتاز بطوله وجسمه الرياضي والشعر الكثيف والنظره الحاده

نواف الاخ الاصغر عمره 22سنه انسان يظهر على شخصيته الاستهتار لكن يضمر في داخله انسان قوي صاحب موقف معروف بمرحه جماله يتعدى الوصف متوسط الطول يمتلك عيونه كحيله دائما مبتسم وبشره سمراوانف كالسيف يمتاز بابتسامته الرائعه سريع الغضب لكن طيب القلب وبسرعه يتبخر غضبه......



نايف ونواف ساكنين بالرياض بحكم وظايفهم ومستاجرين شقه والدتهم متوفيه من سبع سنوات بسبب مرض

ووالدهم ساكن برى الرياض متزوج وحده غير امهم وله منها 3بنات وولدين

ولهم اخت من امهم وابوهم لطيفه عمرها 25سنه متزوجه وساكنه في الرياض

عندها ولد واحد عمره 5سنوات جابته بعد علاج 4سنوات واحتمال ماتنجب غيره
خوفها بس زوجها يتزوج عليها

.................................................. .................................................. .........................

يوم الثلاثاء الساعه 11ونص الظهر في احد الشركات الكبيره

جالس على مكتبه الفخم ومقابله صديق عمره خالد

خالد...انت ماتقولي لمتى وانت كذا لازواج ولاشي

نايف ...لاحق على الهم اللحين خلني اكون نفسي واشوف وش يصير على نواف

خالد ...نواف؟؟؟ وش بيصير عليه ماشالله عليه موظف مو ناقصه شي

نايف... بس مادري يعني صعبه اتزوج واجيبه عندي وصعبه اخليه لحاله

خالد ...ليش صعبه تخليه لحاله انت قعدت 4سنوات ماعندك احد

نايف .... والله مادري انا للحين افكر كيف باتصرف معه


خالد ..توكل على الله يانايف انت مانت صغير ونواف سنه سنتين ويتزوج

نايف .. ...ان شالله بس مو نواف السبب الوحيد

خالد صديق نايف وزميله في العمل يعتبره اخو له كبر نايف متزوج وله ولد عمره سنتين

.................................................. ....




الاربعاء الساعه 10ونص الصباح

اخيرا خلصت

سلمان... الحمدلله ارتحنا من حالة الاضطراب الي مسببتها بالبيت

نوف ...انت ماتقول لي انت ليه حاقد علي

سلمان ...غيران منك يا فلتت زمانك

نوف ...اكيد غيران بكره بكمل دراستي بصير شي ثاني

هجوم كاسح على المكان وازعاج وصراخ

.....نويفه اخيرا خلصتي مابغيتي

نوف ....هههههههههه انت ماتعرفين تدخلين بركاده؟

ساره.... اسفه ماعرف ,,,,,الاماقلتي لي متى تطلع نتيجتك على الله بس ماتفشلينا وتجيبين نسبه تفشل مثل العاده

نوف ....لا ان شالله راح اجيب نسبه زينه وسواد الوجه مخليته لك الي كل سنه تنجحين بالدز

قبل لاتهجم ساره بالكلام

سلمان ... لاعاد كل اش ولا سارونه اختي حبيبتي لاحد يتكلم عليها هي حره تنجح ترسب ماحد يناقشها

ساره بعد مالانت ملامحها وابتسمت ابتسامة شكر لاخوها الكبير

ساره ..ياعمري ياخوي فديت عمرك ماحد عارف قيمتي غيرك ....التفت على نوف ..بعدين مخلين النحاح لك يالمصريه

نوف ...مصريه بعينك يالفاشله

وابتدت حرب الكلمات الى رح تتحول الى حرب المخدات بعدين الى شي اخر

نتركهم في حربهم الطاحنه ولكن مو قبل لانعرفكم على سلمان

سلمان الاخ الكبير لساره ونوف عمره 26سنه انسان هادي وجميل يشتغل برى الرياض ومملك على بنت عمه نوره



في نفس الوقت وفي مكان ثاني

...فهد الله يخليك ساعه ا ترجاك ماكأني اختك

فهد ...والله انا ماقلت لك ترجيني و للسوق ماوديك

بدت علامات الغيض تظهر على وجهها البرئ

...تدري الشرهه على الي معطيك وجه ويترجاك

كأنه اعجبه الوضع يحب قبل لاينفذ لها أي طلب يلعب باعصابها لكن ابدا ماتهون عليه

فهد ....طيب نواره وش رايك تدقين على سلمان تطلبين منه يوديك للسوق

اجتمعت على وجهها علامات الحياء والغضب

نوره ...فهيد انت هوايتك تنزفزني اقولك ودني السوق تقول دقي على مدري من يوديك للسوق

فهد .... ههههههههههههههههه مدري منه ؟ اول مره اعرف واحد بهالاسم

نوره .. خلاص ماعاد ابي منك شي كثر الله خيرك

توجهت لباب غرفته ناويه تجمع خجلها الي غطته بوشاح من الغضب وتطلع من الغرفه

لكن يد اخوها كانت اقرب ليدها ومسكها

فهد ... امزح معك يالخبله انتي تهونين علي تدقين على مدري من وانا موجود

حست ان كلمات اخوها بخرت كل الي فيها

نوره ...الله يخليك لي ياخوي

فهد .. اقول بسرعه لاتكثرين الهرج البسي وان تاخرتي باروح واخليك وانتي عاد كيفك تروحين بتكسي ولا تدقين على سل

ماكمل كلامه الانوره برى غرفته حتى لاتتعرض لكم تعليق من اخوها الكبير

فهد شاب خلوق مملوح مع ان ملامحه عاديه ولد عم سلمان وصديقه ونسيبه عمره 26

نوره بنت حبوبه بس اكثر صفه تمتاز فيها الحيا جميله بمعنى الكلمه عمرها 20وهي خطيبة سلمان

اكثر انسان تعشقه اخوها فهد وهو الي اقنعها بسلمان ابوهم متوفي وهم صغار

والي ربتهم امهم وطبعا عمهم ابو سلمان ماكان يقصر عنهم بشي



بعد عشر ايام

....الحمد لك يارب ماخيبت تعبي واستجبت دعاي

....الف مبروك يابنتي عقبال ان شالله الزوج الصالح يارب

..يارب يبه الله يسمع منك وتزوج واتوسع بالغرفه

احمر وجه نوف ليس من الحيا ولكن من الغيض

نوف ...سويره انتي ماتخلين اللقافه عنك وبعدين اشدراك يمكن تتزوجين قبلي وانا الي اتوسع بالغرفه

ساره وهي تأشر بيدها بمعنى النفي

ساره .. لا ياحبي انا بكمل دراستي واكون نفسي وبعدين افكر اتزوج

نوف ...هههههههههه والله ضحكتيني من الي بتكمل دراستها ,,,وهي تاشر بيدها عليها من فوق لتحت ,,,,لايكون انتي ؟

ساره اغتاضت منها نوف هاديه ولاتتقن فن الاستفزاز

ساره ...نويفه لاترفعين ظغطي ترى مانتي قدي

نوف رمقتها بنظرة عدم الاهتمام وجت بتطلع من المكان

........نوف ........

التفت لمصدر الصوت وهي تكتم ضحكتها ......نعم

ساره .... انا ماقلت لك مبروك؟

نوف اعلنت ابتسامتها وبدت خطوتها تجرها لاختها ببطئ

هزت راسها بالنفي

بينما ساره اسرعت اليها الخطوه

ساره .....مبروك يالمصريه

قربن لبعض تعانق بالايدي ثم الاجساد ثم الارواح

نوف ...الله يبارك فيك

ساره ..عقبال الرجال السنافي الي في بالي
كانت تقصد شي وصل نوف وكانت تقصد ترسم ابتسامه على شفاة تؤام روحها

لكن بدت الدموع تلمع في عيونهالواسعه وتعاندها لتتدحرج على خدها الناعم

ساره ارتسمت على وجهها نظرة استفسار

نوف ..تدرين ياساره انتي قلتي هالكلام وابوي قاله قبلك ...

لحظة صمت اوبالاحرى مقاومه لدمعه تجاهد حتى تتبع اختها

كملت ...بس باقي انسان ادفع كل عمري واسمعها من فمه او على الاقل اشوفها بعيونه

صمت ساد المكان

ساره .....امي ؟؟؟؟؟؟؟؟

نزلت نوف راسه للارض واعلنت دموعها الانتصار على هدبها

وبدت الدموع تغزو وجنتها البرونزيه

نتركهم يفرغون الحزن المكبوت داخلهم

.................................................. ...............................

.....هاه وش قلتي يام فهد

ام فهد ...والله يابو سلمان الولد ولدك والبنت بنتك انت تفصل وحنا نلبس

ابوسلمان ....يام فهد اذا البنت جاهزه خلاص ليش التاجيل

ام فهد ..البنت جاهزه لكن بناديها لك تسئلها

ابو سلمان ..لايام فهد نوره لو باسئلها بتضيع علومها بنت اخوي واعرفها ماتنسئل

ام فهد.. خلاص يابو سلمان انا اشاور البنت والي نتفق عليه بقوله لفهد يوصله لسلمان

ابو سلمان ..اجل الله يكتب الي به الخير

ام فهد ...امين

ابو سلمان ..يالله في امان الله

ام فهد ..مع السلامه

سكرت منه وكانت تناظر بنتها الي ملتهيه بجوالها وظلت تراقبها حتى انهت مكالمتها

ام فهد ..انتي ماتهدين الجوال ابدا؟

نوره ..يمه انتي تدرين جديد ومستانسه عليه

ام فهد...الله يهدي اخوك مدلعك مدري ليه هالجوال

نوره ..الله يخليه لي واشوفه عريس واشوف عياله وازوجهم واشوف عيالهم وافر.................

قاطعتها امها ..بس بس خلينا من اخوك الحين بتفرغ له بعدين اللحين بكلمك بموضوع ثاني

نوره ...خير يمه

ام فهد وهي تشرب القهوه

ام فهد ....نوره انتي تدرين من الي كلمني قبل شوي

نوره ..لا من يمه ؟

ام فهد ببتسامه ..عمك ابو سلمان

نوره حست باظطراب بجسمها ورعشه تحولت الى مغص كأنها فهمت وش السالفه

نوره ...خييييير وش عنده عمي ؟

ام فهد ..نوره انتي عارفه عمك وش يبي وماله داعي اقولك

نوره... يمه الله يخليك اجلوها لبعد العيد

ام فهد ...ليش يابنتي ؟ الرجال اجل بما فيه الكفايه واظن خلاص مابقى لنا عذر

نوره ..بس يمه

ام فهد ...لابس ولاغيره الناس كثر الله خيرهم اصبرو علينا ومانبي نزودها معاهم ولهم حق يحددون العرس باي وقت

نوره ....خلاص يمه الي تشوفونه

ام فهد ...الله يوفقك والخوف الي داخلك شيليه سلمان رجال وماعليه
تركت نوره امها وتوجهت لغرفتها حتى تنفرد بنفسها



بنفس اليوم الساعه 8مساء

جالس بشقته ينتظر اخوه على العشا

دقايق دخل عليه وهو يشمر عن ذراعه

..شوي شوي الاكل ماهو طاير

عارف ماهو طاير بس بتعشى بسرعه وراي صياعه مع الشباب

يقلده... وراي صياعه مع الشباب ماتستحي انت ؟

بكل برود ,,,,,لا.........

نواف ترى السهر وملاحق بنات الناس بيضيعك ولاتنسى انت عندك خوات

نواف ...نايف ياخوي لاتخاف على اخوك ماعشت الي تضيعه انا صحيح اسهر بس مالي بملاحق البنات ماهي هوايتي

نايف ...اتمنى... الله يهديك

في هاللحظه يدق الجرس

نواف وهو مندمج بالاكل من هذا الي حماته بتحبه

نايف ..قم وشف من الي حماته بتحبه عل قولتك

قام نواف وهو رافع يدينه المليانه بالدسم فتح الباب

كان وراه مره ومعاها طفل عمره 5سنوات على طول انحنى عليه وشاله

هلا والله بريان والتفت للمره.. وام ريان

......هيه انت... وسخت ملابس ولدي

نزل الولد

نواف ....اسف اسف مانتبهت

والتفت لاخته ...وهو يضمها هلاهلا باختي حبيبتي

لطيفه ....نواف ابعد عني وسختني الله يقطع ابليسك

نايف ...اتركها يانواف ,,,حيالله ام ريان تفضلي

لطيفه ....هلابك ياخوي وشلونك
نايف وهو يقوم لها

نايف ... الحمدلله تمام ...حيالله خالي

ركض ريان لخاله الي كان فاتح يدينه له وضمه بقوه

لطيفه ...ذبحت ولدي وبعدين يوم انك تحب الاطفال ليه ماتتزوج اتضم عيالك بدال مانت ذابح ولدي

نايف ....عن قريب ان شالله

نواف ...لاوالله وانا وين رحت ماتزوجونه الانا معه

لطيفه...وانت على طول قاط وجهك انت صغير على الهم

نواف ..انتم بس زوجوني وانا راضي بالهم

نايف ....اقول نواف وش رايك تروح لشغلك الي وراك

نواف...اي والله انك صادق وراي هياته

لطيفه ...اي والله رح لربعك ترى الصياعه ماتحلى بدونك

نواف ....تسلم لي اختي الي عارفه قيمتي,,,, وقام يضمها من جديد

نايف ....هههههههههههههههه حسبي الله على ابليس بتحرم تجينا والسبه انت

لطيفه ...نواف اتركني ولا مازوجك

نواف ....لا لا الا العرس تكفين يالله انا رايح لخوياي.

لطيفه ...نواف انا مالحق اشوفك من اجي تروح انت

نواف ...وش اسوي اشغالي لفوق راسي

نايف ...الله والاشغال الله يسمعك يقول وزير

نواف ...يعني ماينشغل الالوزير ؟..اروح لشغلي احسن لي

نايف ...تسوي خير

نواف ...مع السلامه

الطيفه ...في حفظ الرحمن

طلع نواف وترك نايف ولطيفه ليبدو حوارهم المعتاد


ثاني يوم في احد المقاهي

...انت تتكلم من جد يافهد

فهد ...وليش اكذب عليك

سلمان.... محشوم بس ماني مصدق اخيرا وافقت على تحديد يوم الزواج

فهد ...هل المره الوالده تدخلت

سكت سلمان ونزل راسه مده وبعدين رفع راسه

رد: ليه عمري مالقى لبرده دفا الا لقاكي


وعليكم السلام ورحمةة الله وبركاتةة ~
يعطيك العافيةة ~
بإنتظار الاجزاء ~

رد: ليه عمري مالقى لبرده دفا الا لقاكي

....فهد

فهد ...سم

سلمان ....نوره مغصوبه علي؟؟

استغرب فهد من كلام سلمان

فهد ...ليش تقول هالكلام ؟؟

سلمان ...فهد لما كانت نوره تاجل الزواج كنت احيانا افكر انها ماتبي الزواج يتم

فهد ....مافي شي يخلينا نجبرها عليك اوعلى غيرك

سلمان ...احيانا اخاف يكون موافقتكم علي نوع من رد الجميل لابوي

فهد بدون تردد ...لا لا ياسلمان مواحنا الي نجبر بنتنا على رجال ماتبيه ولاهو انت الي الرجال الي ينرفض

سلمان ...طيب ليش سنتين وهي تاجل الزواج وماخلت بينا أي اتصال وترفض تكلمني او تقابلني

فهد ...سلمان نوره من النوع المتردد الخواف واكثر من كذا نوره خجوله لابعد حد يعني التاجيل بس عشان كذا

سلمان..متاكد يا فهد ؟؟

فهد ..افا ياولد عمي يعتي ماتثق فيني بعدين انت غلاتك مثل غلاة نوره ولايمكن ارضى عليك تتزوج وحده رافضتك علشان عيب تشوفه فيك

سلمان ...طمنتني الله يطمنك ويرزقك ببنت الحلال الي تسعدك

فهد...امين ..واللحين يالله انا بروح بكره وراي دوام وانت روح بلغ الاهل وسو تجهيزات العرس

سلمان ...يالله في امان الله

فهد ..في امان الله

وتفرق الاثنين وهم يحملون فرحه لاتوصف فهد لانه قدر يبدد الحيره الي كانت ساكنه ولد عمه وصديقه وفرحه لاخته الي رزقهالله برجال يستحقها
وسلمان فرحته لاتوصف ان الله اراد يقرب اجتماعه بالانسانه الي تستحوذ مكان كبير داخله
ولان همه الي كان يثقله انزاح مع كلام فهد



الف الصلاة والسلام عليك ياحبيب الله محمد ككككككككلللللللللووووووووشششششش

ههههههههههه لا لالا مانتي صاحيه

ليش ان شالله ماني صاحيه؟ فرحانه بعرس اخوي بعدين مخليه العقل لك

.... بدري على العرس بعد شهر و بدال هالهبال خلينا نشوف وش نسوي

ساره ....اي والله صادقه ماعاد يمدينا لازام من اليوم نبدا الدواره بالاسواق

نوف ...انا قلت لسلمان يودينا بعد العشا

ساره ...وامي ؟؟؟؟؟

نوف ....تطمني بتجي خالتي وتجلس عندها لحد مانجي

ساره ...نوف لمتى بنسكت على حالة امي لها اكثر من اربع سنين على هالحال

نوف ...الله يشفيها الصدمه هزتها الى جاها ماهو قليل

ساره ...امين يارب تتخيلين يجي يوم تفتح لي امي يديها وتضمني؟

نوف ....الله كريم ادعي لها ياساره

.................................................. ....................................

...انا اليوم كلمته بالموضوع وقال دوري لي

...توكلي على الله و دوري له قبل لايغير رايه

...الله يهداه بس كن الدنيا وقفت على هالبنت

....قولي ان شالله ان الله يرزقه ببنت الحلال الي تنسيه اياها

...امين

...السلام عليكم

...عليكم السلام ياهلاوالله بوليدي

...هلابك يمه

...وشلونك ياناصر ؟

.ناصر ...بخير يبه

ابو ناصر ...انت معزم ياولدي

فهم قصد ابوه لان هو الحديث المتداول بينهم

ناصر ...ان شالله يبه

ابو ناصر ...اسمع ياولدي ترى بنات الناس ماهي لعبه لاتظلمهم بشي مالهم ذنب فيه والي ماترضاه لاهلك لاترضاه لناس

ام ناصر ...ناصر ياولدي لاتحرق قلبي عليك وخلني افرح وانا رايحه اخطب لك

ناصر ...افرحي يام ناصر ماهو ناصر الي يحرمك الفرحه وهو يقدر عليها

ام ناصر ...انت تدري ان فرحتي يوم اشوفك مبسوط واشوف عيالك حولك

حب راسها ,,,,ناصر ....بتشوفينهم ان شالله

ابو ناصر ...اجل نتوكل على الله وندور

ناصر ....توكل على الله

ناصر ...شخصيه جديد في قصتنا .شاب وسيم من عائله ميسورة الحال وحيد امه وابوه عمره 29سنه كان ميال لبنت خالته لما خطبها رفضوه اهلها لانها محيره لولد عمها وقعد فتره رافض فكرة الزواج انسان غامض


بعد صلاة العشاء

...يالله ياساره سلمان ينتظرنا بالسياره

ساره ...يالله يالله نزلت

طلعو وهم قدام الباب مدت نوف يدها لباب تفتحه كانت ساره موطيه تزين ربط الصندل

نوف ...يالله خلصينا بيروح سلمان ويخلينا

ساره وهي ترفع جسمها وتنزل البرقع على وجههها ....ترى ازعجتيني سلمان سلمان يالله امشي قدامي ودفعتها بقوه حتى تطلع مع الباب الي كان مفتوح وبحكم نحفها ماتملكت نفسها وضربت بباب السياره الي كانت مقابله الباب مباشره
نوف ...حسبي الله على ابليسك يالدبه

ساره ...هههههههههههههههه اقول بس قدامي يالعصلا

نوف كانت بترد لكن انتبهت للرجال الي كان واقف مع سلمان ويخفي ابتسامته

هالنظره ماهي غريبه عليها تعرفها عز المعرفه وجه من زمان ماشافته كانت تحس بشعور ماتعرفه غض النظر عنها

...يالله انا استئذن ياسلمان

.سلمان ...اذنك معك وخلنا نشوفك

.....ان شالله... يالله سلام

سلمان ..مع السلامه

توجه سلمان لسيارة وهو الثاني توجه لسيارة وركبها وحركها وعيون نوف تتبعها
ركب سلمان السياره وانطلق الى مشواره

رد: ليه عمري مالقى لبرده دفا الا لقاكي

الجزء الثاني

بعد حوالي اسبوع التجهيزات لعرس سلمان قايمه
ام ناصر حتى الان ما لقت البنت الي تصلح زوجها لولدها
نوره ارتباكها يزيد وتقريبا خلصت تجهيزات عرسها الامن اشياء بسيطه

.................................................. ......................................

ياوليدي العمر يركض وانت للحين ماعندك الاهالولد من حقه يصير عنده اخو

يمه الله يهداك انا راضي بقسمة ربي وبعدين الحمدلله انا عندي ولد غيري ماعنده

ياعبدالله ياولدي انا ماقلت شي الحمدلله بعدين غيرك الله ما اراد لهم بس انت ليش تحرم حالك من نعمة ربك

عبدالله ...يمه انتي تعرفين اني احب زوجتي ومابي ازعلها

ام عبدالله ..ومن قالك اني اكرها يعلم الله اني احبها بس مواكثر منك غلاها من غلاك وغلا ريان

عبدالله وهو يحضن امه ...ادري يمه وعارف غلاي عندك بس تكفين سكري الموضوع على الاقل الحين لين اشوف وش نتيجة العلاج مع لطيفه

ام عبدالله ...انا بسكت بس لاتظن اني بظل ساكته بظل وراك لين تطيع شوري

حوار دائم يدور بين عبدالله وامه ودائما نهايته وحده

عبدالله زوج لطيفه شخص محترم يحب زوجته بكل عيوبها تزوجو وهم صغار وصارت جزء من حياته

لكن لطيفه ماهي عارفه قيمته ... تتوقعون بتعلمها الايام وش اهميته بحياتها ؟؟؟



.................................................. .............................................


اقول نايف احنا من زمان مازرنا ابوي

نايف ....والله اشغالنا نستنا حقه علينا

نواف ....انا عن قريب باحاول ازوره اشتقت للحمير اخواني

نايف ...وهم حمير مشتاق لهم اجل لو هم اوادم شبتسوي ؟؟

نواف ...لاصارو اوادم افكر ؟؟؟الاماقلت لي بتخاويني
نايف ..والله مادري بس اشوف اذا قدرت اروح معك ولا اروح بعدين
....................................

كانت تدور بالغرفه وتانظر باعجاب
الف الف مبروك ياخوي الله يهنيك
سلمان ....الله يبارك فيك
ساره ...ذوقك يجنن والله مانت هين
نوف ..قولي لالله الا الله خلي الولد يتهنى بعرسه
ساره ..لا الله الالله الف مره
سلمان كان باين بعيونه شي من الحزن البنات ملتهين بالفرجه على جناح اخوهم الي كان روعه بدايه من غرفة النوم الي كانت قمه في الذوق رغم بسطتها وكانت لمسات سلمان واضحه فيها حتى الصاله الصغيره بالوانها الرائعه
تدرون يابنات ؟؟؟
التفت الاثنين لجهته كانت عيونه تلمع بشئ غريب
كنت اتمنى امي تدور معي بغرفتي وتبارك لي
نوف ماكانت احس من اخوها لكنها كانت تداري الي بقلبها حتى تخفف عنه
نوف ...الله يشفيها الي راح منها ماهو بهين عليها ولاعلينا لكن هي ام ماحد منا يقدر يحس بالحريق الي داخلها
ساره كانت عيونها تدور مابين اخوانها
ساره ..احس البيت موحش من غير صوتها اشتقت لعتابها اشتقت لداعاها لي اتمنى بس اسمع صوتها ابغاها تصارخ علي ابغاها تضربني بس احس فيها وتحس فيني
وطلعت من الغرفه كانت كلمات مكبوته حان الوقت ان تخرج انفجار دوى في قلب سلمان
رمى بجسمه على السرير نوف ظلت واقفه لحظات وكانها جزمت ان الموقف يحتاج لتدخل منها وانها لازم تطفي الحريق الي اشعلته ساره بجوفه مشت ببطئ وجلست قريبه منه
نوف ..سلمان ياخوي الي تسويه غلط
سلمان ...صدقيني انا مازعلت من كلام ساره بالعكس هي قالت الكلام الي ماعرفت اقوله حتى انا محتاجها ومشتاق لها بس وش اسوي
نوف ..تاكد انها تحس فيك وفرحانه لك حتى لو ماعبرت
سلمان ...بس هي موجوده تشوفنا وتسمعنا
نوف ..هذا مرض يا سلمان لازام نعذرها
سلمان ....هي اهملت الاحياء ودفنت نفسها مع الميت
نوف ...سلمان انت عارف ان الي هي فيه لانها كانت تحس بالذنب انت بس قول الله يشفيها
سلمان ..يارب

.................................................. ............................

كانت جالسه بغرفتها بالفتره الاخيره تحب تجلس مع نفسها

كانت منسدحه على جنبها وحاطه يدها تحت راسها وتفكر بالجاي الايام صارت تمشي بسرعه واليوم الي كانت تحاول تبتعد عنه اقترب منها
بعز تفكيرها انتبهت لصوت جوالها الرقم غريب وهي ماتحب ترد على ارقام ماتعرفها مسكت الجوال تحاول تتعرف على الرقم لكن للاسف الرقم مامرعليها انقطع الصوت لحظات اتصال من نفس الرقم ونفس الشئ ماردت
خمس دقائق دق للمره الثالثه لكن هالمره تعرفه زين

هلا فهودي
فهد ...هلا نوره
نوره ..خيروش عندك متصل على علمي انت مع امي
فهد ..انا مع الوالده بس وحده من صديقاتك اتصلت تقول انها مغيره رقمها وتتصل من رقمها الجديد ولاتردين
نوره ...ايه ايه جاني اتصال مرتين ولارديت بس ماقالت من هي ؟
فهد ..نوره ماخبرك غبيه البنت متصله على تلفون البيت تبيني اسئلها من انتي ؟
نوره ..خلاص خلاص لاتشغلني برد عليها يالله سلام
مانتظرته يرد وسكرت الجوال
خمس دقايق ثانيه سمعت نغمة جوالها
بدون تردد ...الووووووو
المتصل...........
نوره ...نعم من معي ؟
المتصل ...السلام عليكم
نوره انتفض الجوال بيدها وصمت
......قلنا السلام عليكم
نوره ...نعم اخوي من بغيت
المتصل ...ابغاك انتي
نوره ...من معي ؟
المتصل ...في وحده ماتعرف صوت زوجها ؟
نوره صابتها رعشه باطرافها وظلت ساكته
سلمان ..نوره
نوره ........................ن.نعم
سلمان ...شلونك
نوره .تمام
سلمان..وانا بعد تمام
نوره غصبا عنها طلع منها صوت ضحكه
سلمان ...مادري اني اعرف انكت
نوره بصوت اشبه بالهمس ...شلونك ؟
سلمان ...قلت لك تمام دوري غيرها
نوره ...شلون نوف وساره ؟
سلمان ..طيبين بس زعلانين عليك
نوره بندفاع وبصوت عالي ...ليه ؟؟؟
سلمان كانه عرف منين يبدا معاها وحب من هنا يبدا بكسر الحواجز الي بينهم
سلمان ...مادري بس الظاهر يانوره شئ كبير مارضو يقولون لي
نوره ...والله مازعلتهم بشئ ...وصار صوتها يرتجف
سلمان ...هم ماقالو لي بس لما طلبتهم يدقون عليك يشوفون محتاجه شي رفضوا وقالو انت كلمها
نوره صوتها يرتجف بزياده والدموع تجمعت بعيونها
نوره ....صدقني يا سلمان مازعلتهم نوف وساره كل شي لي الله حرمني من الخوات وعوضني بهم
سلمان ...اجل ليش من يوم حددنا الزواج ماعاد اتصلتي عليهم
نوره ...سلمان نوف عندك ؟
سلمان ...ماعندي احد
نوره ..سلمان الله يخليك ناد لي وحده منهم
سلمان ...وانا ماكفي
نوره ماعاد تقدر تحبس دموعها وبدون شعور سكرت الجوال وحذفته بعيد
توتر زاد عليها باتصال سلمان وحقد من المقلب الي سواها اخوها فيها
نتركها بالي هي فيه ونروح لشقة نايف
......................................
فوضى عارمه الغرفه مكركبه على بعضها كان واقف قريب من دولابه يدور له على ملابس نظيفه لكن محاولات كثيره بائت بالفشل كان يتكلم مع نفسه بصوت عالي

نواف....ساعه ادور على شي نظيف البسه ما لقيت انا قايل لهم زوجوني عشان القى احد يهتم فيني عشان لاجيت ابي اطلع القى ملابسي نظيفه
.....وش قاعد تسوي
نواف ...ساعه وانا احوس مالقيت شي البسه
نايف بكل برود... احسن لاتطلع

نواف ..لاوالله اقعد اقابل وجهك يالمعقد
نايف ..احسن من الدواره بالشواع على الفاضي
نواف ...نايف اسكت عني ترى الي فين كافيني
نايف ..الله يصبرك على مصيبتك عادي ياخوي البس من ملابسي ماتغلى عليك
نواف ...تنكت حضرتك ملابسك ماتصلح لي يالعملاق
نايف...توفر يالقزم
نايف كان طويل اما نواف متوسط الطول لكن ماهو قصير
زعل نوف من كلام اخوه
نواف...اخ بس لومانت اكبر مني كان عرفت اتفاهم معك
نايف ...تصدق خوفتني .
نواف ..نايف ترى ماني رايق لك
نايف قام لغرفته وخلى نواف يواصل رحلة البحث


صدقيي يانوره ماني زعلانه عليك لانا ولاساره
نوره ...طيب ليش ماعاد تدقون علي
نوف ...انشغلنا بتجهيزات العرس وبعدين حنا لايمكن نزعل عليك
نوره ..سلمان خوفني يانوف
نوف ...سلمان يلعب باعصابك هو ما طلب منا نكلمك
نوره بدت تخنقها العبره هي تحس بشعور غريب واحسساسها انها بتترك البيت الي تربت فيه وانها راح تبعد عن امها واخوها دائما يضايقها
نوره ...يعني اخوي واخوك لعبو على البارح مانمت وانا افكر
نوف ...هم يمزحون معك وبعدين اخوك عندك خوذي حقك منه وسلمان بعد الزواج عاقبيه بالطريقه الي تعجبك واي مساعده انا وساره حاضرات
نوره ...الله يقطع ابليسك ...
نوف ا...اهم شي لاتضايقين نفسك
كانت تكلمها وتناظر لاخوها الي دخل الصاله
نوف ...يالله حبيبتي اكلمك بعدين
نوره ...سلمي على ساره
نوف ...الله يسلمك يالله مع السلامه
نوره ..مع السلامه
سلمان ...سلام على الحلوين
نوف ...سلام
سلمان ..من الي ماتبينها تضايق نفسها
نوف بنظرة عتب ..زوجتك
سلمان ...نوره ؟؟؟
نو ف ...ليه انت متزوج غيرها ؟
سلمان ...وش فيها وش الي مضايقها ؟؟؟
نوف ..الي يسمعك مايقول انت الي مضايقها
سلمان يأشر على نفسه ...انا ؟؟
نوف بنفس حركته ...لا انا
سلمان ...ليش وش ضايقتها فيه ؟؟
نوف ..انت وش قايل لها ؟
سلمان ...ماقلت لها شي يزعل
نوف ...ليش تكلم عني انا وساره وتقول لها انا زعلانين عليها
سلمان بابتسامه مستغربه ...يعني هذا الي مضايقها ؟
نوف شافت الندم باين عليه وحبت تلعب باعصابه وتبالغ شوي
نوف ...يا سلمان البنت كلمتني تبكي
سلمان ...تبكي ؟؟؟؟؟؟
نوف ...تقول انك واخوها لعبتوعليها وانها البارح مانامت وهي تفكر
سلمان بحرركه سريعه قام من مكانه وطلع الجوال من جيبه
نو ف ..وش بتسوي ؟
سلمان ..باكلمها
ظل يتصل لكن للاسف ماردت

رد: ليه عمري مالقى لبرده دفا الا لقاكي

في مكان ثاني
هاه يام ناصر لقيتي احد يصلح
ام ناصر ...لاتستعجل يابو ناصر البنات كثير بس انا ادور بنت تكون جامعه الجمال ولاخلاق والاصل الزين
ابو ناصر ...ودي افرح به ناصر مو صغير والي كبره عندهم عيال
ام ناصر ...اصبرنا عليه هالمده نصبر بعد شوي وان شالله تفرح به عن قريب
ابو ناصر ...ان شالله بس استعجلي شوي
ام ناصر ...الله كريم

.................................................. ............
عيونها معلقه في السقف
كأنها تدور على احد ضايع منها
دخل زوجها عليها
الى متى وانتي على هالحال يام سلمان ؟؟

ام سلمان ....لارد

ابو سلمان ....يام سلمان الي تسوينه حرام

ام سلمان ...لارد

ابوسلمان ...ام سلمان الي صار قسمة رب العالمين ولو يرجع الزمن ماراح نغير المكتوب

ام سلمان .....لارد سوى الدموع الحاره تجري بصمت

ابو سلمان ...لاحول ولاقوة الابالله

من اربع سنوات اواكثر هذي حالتها عزله بكاء وحزن اصبح يلازمها وتلازمه

طلع ابو سلمان بدون أي نتيجه

............................................
قبل العرس بيوم

حطت راسها على رجل امها وتناظر للفراغ
بينما امها تمرر اصابعها في شعرها وتنتظرها تتكلم
لكن طال صمتها
ام فهد ...بكره بتروحين لبيتك وتخليني لحالي
نوره بهدوء ...يمه الله يخليك لاتضيقين خلقي
ام فهد ...لايايمه لايضيق خلقك هذي سنة الحياه انا تركت امي بيوم من الايام وبيوم من الايام يتركونك بناتك
نوره ..يمه انا خايفه مدري مرتبكه مدري متوتره
ام فهد .....ههههههههههه ارسي على بر وبعدين هذا شي طبيعي
نوره ...يعني مو بس انا الي احس بهالاحساس؟
ام فهد ...لامو بس انتي
واستمر الحوار الدافي بين نوره وام فهد حتى غفت على رجل امها

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,
اليوم عرس سلمان

ساره ...نويفه خلصتي تاخرنا على المشغل

نوف ....انا جاهزه بس من يودينا
ساره ....تخيلي ابو سلمان بنفسه بيودينا ويرجع ياخذنا
نوف ....من قدك ياسلوم اليوم معرس ومرتاح من المشاوير
ساره بحزن ...لوكان عايش كان واقف معنا بهاليوم
نوف ....الله يرحمه راح واخذ الفرح معاه
ساره ...وتر ك العذاب لامي
نوف ...ساره اليوم عرس سلمان واجبه علينا انا نفرح معه يكفي الفراغ الي خلته امي
ساره ..والله انك صادقه لو الحزن يرجع الي رح كان بكينا لين يرجع
انتبهو لصوت ابوهم يستعجلهم راحو له يجرون احزانهم معاهم لكن على شان اخوهم بيفرحون وينسون حزنهم
.................................................. .......................................


في القصر

الساعه 9مساء امتلئت اللصاله بالنساء القريب والجار والصديق

ساره كانت قمه في الجمال بفستانها التفاحي كان مبرز بياضها البرئ والمكياج الناعم الي زاد على روعنها روعه

نوف نوف اليوم كانت صوره رائعه للسمر بفستانها الاسود المزين بالذهبي كانت ايه من ايات الجمال ببشرتها السمراء وعيونها الواسعه كانت بنات ابو سلمان محط الانظار قدروا يسدون مكان امهم في القصر لكن المكان الي ملوه بالقصر ماقدرو يسدونه داخلهم

في وحده من الطاولات كانت وحده من المدعوات تجلس مع ام سلطان خالة نوف وساره
ام سلطان ..حيالله ام ناصر نور المكان
ام ناصر ..الله يحييك يام سلطان الف مبروك
ام سلطان ..الله يبارك فيك.وشلونك يام ناصر
ام ناصر.. بخير الله يسلمك انتي وشلونك وشلون ام سلمان
ام سلطان ..والله حالها مايسر لكن الله كريم
ام ناصر ...كنت اتمنى هي الي تستقبلني بهاليوم
ام سلطان ..وش نسوي يام ناصر دفنت نفسها وحملت نفسها ذنب موذنبها
.............................
في طاوله ثانيه
كانت لطيفه جالسه مع ام زوجها
ام عبد الله ...ما شالله قريباتك جمال ودلال واخلاق ولسان حلو
لطيفه ...لايغرك ياخاله بسلامة المكياج يطلع القرد قمر
ام عبدالله ...حرام عليك الا الزين كله
لطيفه ...انا مدري وش مسويات لهالناس كلهم مبتهرين فيهم ؟
ام عبدالله .. لطيفه البنات ماعليهم كلام والناس اعجبتها اخلاقهم وسنعهم
لطيفه ...ناس ماعندها نظر
ايقنت ام عبدالله ان الكلام لايجدي معها فضلت انها تنهي الحديث وتسكت

في صالة الرجال

فرحه باينه على وجهه الوقور فرحان انه قدر يسلم الامانه لصاحبها البنت الي صار مسؤل عنها وهي بنت الثمان سنوات صارت عروس سعيد لانها صارت قريبه منه
وفرحان انه عرف يربي ولده وشافه يكبر حتى يصير رجال وحط ين ايديه دره يتمنى انه يحافظ عليها
لكن على قد فرحته الانها فرحه ناقصه سعاده مكسوره الي رح راح صحيح ماهو بسيط لكنه رجال مؤمن بقضاء الله وقدره
لكن الحزن على الجسد الحي في الروح الميته اكثر شي كان يتمناه هاليوم ان شريكة دربه تكون عون له تهنيه ويهنيها
لكن اللهم لاعتراض
ابوسلمان كان باين على وجهه التعب رغم فرحته الكبيره


في صدر القاعه سلمان كان جالس فرحان وسط المعازيم سماره زاد من جماله وهيئته البدويه عطته هيبه كان حاس بابوه وخايف عليه
جالس بجنبه صديقه وقريبه نايف
نايف ...مبروك ياسلمان
سلمان ..الله يبارك فيك وعقبالك ان شالله .
سلمان كان يناظر لابوه
سلمان ..نايف
نايف ...سم
سلمان ..انا خايف على ابوي
نايف ..ليه عسى ماشر وش فيه عمي ؟
سلمان ....ابوي وجهه اصفر تعب اليوم وهو فيه القلب انت تعرف انه مافيه احد يساعده وفهد مشغول باخته اشتغل اليوم واجد من الصبح رايح جاي وهو الي يرجع البنات للبيت وخوفي يتعب بالسياره ومامعه الاحريم
نايف ...افا ياخوي وانا وين رحت
سلمان ...بس هو مايطيع وخ
قاطعه نايف ..انا بتفاهم معه انت لاتشيل هم ولاتفكر الابعرسك
سلمان ...ماتقصر ياخوي الله يريحك مثل ماريحتني
نايف ..لاتقول هالكلام ابوك جمايله مغرقتني وانا مانسى فضله على هو وخالتي ام سلمان
نايف كان يحمل لابو سلمان معزه خاصه خصوصا اول مانزل للرياض وقبل لايستقر كان يتابعه ويجبره يجيه للبيت وكانت ام سلمان مثل الام له دائما تسئل عنه وتهتم فيه
فاصبح ممتن لهم بتبديد شعور الغربه وانهم قدرو يحسسونه انهم اهل له
<ابو سلمان ولد عم ابو نايف >
.اقبل عليهم نواف بعد ماسلم على عمه
نواف ..مبروك ياولد العم
الله يبارك فيك
..اخيرا اعرست يالشايب
..ماتشوف اخوك تراه اكبر مني
لاعاد اخوي راحت عليه ماحد بيرضى يزوجه
نايف ...حتى ولو ماتزوج انت لين القى الي ترضى فيني
نواف ..عز الله ماعرسنا
...............................


حان وقت زفة العروس
انطفئت الاضواء ونورت عروستنا الصاله
ونزلت بهيئتها الملائكيه
كانت تنزل من عتبات الدرج بهدؤ وكانت الانوار والانظار مسلطه عليها
مثل البدر بليلة كماله بفستانها الابيض الضخم الي مغطي نعومة جسمها لكن ماقدر يخفي نعومة ملامحها كان بدون اكتاف وبتطريز فضي وذيل طويل وطرحه خليجيه
وصلت ارض الصاله وصارت خطوتها تقصد الكوشه الي رح تجمعها مع شريك عمرها
اليوم نوره اسم على مسمى

ياهنوف سحرها غازل خجلها
واجتمع مع حسنها زين الخصايل
اشغلتني والزعل عني شغلها
ماوصل من عنده رد الرسايل
العيون الهايمه للشوق ولها
وانتثر ليل السهر فوق المثايل
تغري القلب المولع في غزلها
و الزعل من شيمة نفوس الأصايل
بالغلا لك منزله ما احد وصلها
من غرامك شفت با الحب الهوايل
ما تصدق فيك روحي من عذلها
وما ندور فيك يا شوق البدايل
صدقيني يامنى روحي وأملها
خاطرك كانه على شايل

وصلت مقصدها والمصوره تتبعها بكاميرتها
وام فهد تسمي وتذكر الله وتخفي عنها دموع الفرح والفراق
جلست على الكرسي المتكلف فيه كانت متوتره قربت امها ومسكت يدها وظغطت هي على يدها حتى تخفف من توترها وخجلها

اعتلى صوت المسجل وحمي الرقص كان الكل فرحان ابو سلمان وام سلمان وام فهد احبابهم كثير
رقصن خوات العريس وكثير من الحاضرات
بعد حوالي نص ساعه اعلنو دخول المعرس نوره زاد توترها وخجلها
دخل سلمان يتوسط ابوه وفهد كانت عيونه على المكان الي تجلس فيه عروسته وصل لمكانه سلم على عروسته وبارك لها لكن ماسمع منها رد يمكن ماقدر يسمعها من الاصوات العاليه ما هتم المهم انها ملكه وبين ايديه
والاهم ان امله انه يعيش معها بسعاده
وقفت نوره لما اقبلو عليها بعد ماسلم عليها سلمان وبارك لها قرب لها عمها هالانسان تحس بقربه بريحة ابوها الي افتقدة حنانه
ابو سلمان ...الف مبروك يابنتي
بصوت اقرب للهمس.. الله يبارك فيك
التفت لولده ..الف مبروك ياسلمان .
سلمان ...الله يبارك فيك يبه
ابو سلمان ....لاوصيك على نوره حطها في عيونك
سلمان ...ابشر يابو سلمان نوره في عيوني
ابعد ابو سلمان حتى يفسح لفهد المكان
فهد ...الف مبروك يانواره
نوره ...الله يبارك في عمرك
وبدون ماتحس حطت يديها ورى رقبته وهو بدوره لف يديه على ظهرها
ابعدها عنها ...ترى يحقد على سلمان
احمر وجهها وتركت اخوها
لف لسلمان ...مبروك يالنسيب
سلمان ...الله يبارك فيك
فهد.... لاوصيك عليها ياسلمان
سلمان ...اقول لاتسوي فيها ولي امرها جتني تعليمات اعلى منك
فهد ..اجل باتطمن عليها الله يخلي لنا ابو سلمان
ودع فهد اخته ومسك يد عمه وطلع من الصاله
شالت نوف وساره غطاويهن وراحن يسلمن على اخوهن ويباركن له بعد المباركه رقصن قدام اخوهن
طول جلسة سلمان مادار أي كلام بينه وبين نوره لانها للحين شايله بخاطرها عليه من المقلب الي سواها فيها فضل انه يترك الكلام اذا وصلو للفندق
بعد التصوير طلع سلمان ويده بيد عروسته متوجهين للسياره الي كان يسوقها فهد
ودعت ام فهد بنتها وسلمتها لزوجها ولسانها يلهج بالدعاء لها
حرك فهد السياره والي تحمل معاريسنا
دعواتنا لهم بالتوفيق


داخل القصر كانت لطيفه واقفه مع نوف
لطيفه ...الف مبروك يانوف
نوف ...الله يبارك فيك
لطيفه ...عقبالك ان شالله
نوف بخجل ...ان شالله
لطيفه ...ماشالله عليك اليوم كنت روعه
نوف ...ترى اصدق يام ريان
لطيفه ...صدقي ليش ماتصدقين
نوف اكتفت بابتسامه
لطيفه ...اليوم اكيد بتنخطبين
نوف ...هههههههه لهالدرجه
لطيفه ...ليش لا ؟؟يمكن على يدي
نوف ...عن اذنك ساره تناديني
تركتها وراحت لاختها

ساره ...وش موقفك مع هذي ؟؟
نوف ..ليه ان شالله ماوقف معها ؟؟؟ترها تعتبر بنت عمنا
ساره ..اصلا لوانها اختي اتبرى منها
نوف... حرام عليك المراه ما ضرتك بشي
ساره ..وانا لازام انتظرها تضرني عشان اكرها
نوف ...انا ابي اعرف ليش تكرهينها ؟
ساره وهي ترفع يدها وتشير باصبعها ....كذا من الله ماحبها
نوف ...المهم اتركينا منها وشتبين تناديني ؟؟
ساره تضرب جبهتها ....يوه نستني خالتي تقول نادي نوف وتعالي في حرمه تسئل عنكم
توجهة نوف وساره للمكان الي كانت ام سلطان جالسه فيه

ام سلطان ...هذاهم يام ناصر بنات ام سلمان
ام ناصر ...ماشالله تبارك الله غزلان الله يخليهم

في هالوقت وصلو البنات لخالتهم
نوف ..سمي ياخاله تبين شي؟؟
ام سلطان ..سم الله عدوك يابنتي بس ام ناصر جارة امكم ببيتهم الاول وصديقتها تبي تسلم عليكم \قالت هالكلام وهي تشير على ام ناصر
نوف ...حياك الله ياخاله
ام ناصر ...الله يحييك يابنتي وشلونكم وشلون امك
نوف ..بخير الله يسلمك
ام ناصر ...ماشالله وش هالزين
نوف بخجل ..تسلمين ياخاله
ام سلطان ..وهذي ساره
ساره ..وشلونك ياخاله
ام ناصر ..بخير يابنتي
نوف ...يالله حنا نستئذن واخذت اختها وراحت

انتهى الحفل ركبت لطيفه وام عبدالله مع عبدالله
عبدالله ..ان شالله اسانستو بالعرس ؟
ام عبدالله ..ايو الله ياوليدي العرس زين مع ان ام المعرس ماهي موجوده
عبدالله ..اجل من الي قام بالعرس ؟
ام عبد الله ...خواته ماشالله عيلهن قومن العرس وماخلن ينقص شي
لطيفه ..يعني وش سون زود عن الناس ؟ قهون المعازيم ؟ وقدمن الحلويات ؟ولا لايكون طبخن العشا ؟؟؟كله على هالعاملات
ام عبدالله ....العرس يالطيفه يابي اشراف وترتيب والعاملات على تدبير اهل العرس
كان هذا حديثهم وبالاخير تسكت ام عبدالله وتبقى الكلمه الاخيره للطيفه

قدام باب القصر
نايف اسمع يانواف انت اركب سيارنك واستناني عند بيت عمي ابو سلمان
نواف ...ليش ؟؟؟
نايف ..انت سو الي قلت لك وبعدين اعلمك
نواف ..خلاص اجل استناك لاتاخر

وقف نايف عند سيارة ابو سلمان ينتظره
طلع ابو سلمان من القصر وتوجه لسيارته يبي يفتح الباب
نايف ...تسمحلي ياعمي بمفتاح السياره ؟
التفت ابو سلمان لنايف ....نايف وش عندك ياولدي ؟
نايف ..انت تعبان وانا الي بوصلكم للبيت
ابوسلمان...مانبي نتعبك ياوليدي
نايف ...تعبك راحه
ابوسلمان ....طيب وسيارتك ؟؟؟
نايف ...لاتخاف انا جيت مع نواف وهو ينتظرني عند بيتكم
ابو سلمان ...سديت علي الطريق توكلنا على الله..... وسلمه المفتاح
نايف ابتسم له واخذ المفتاح وتوجه لباب السياره وفتحه ركب وركب عمه بجنبه اتصل ابو سلمان على البنات يستعجلهم
طلعو البنات على ان ابوهم الي يسوق
وهم في نقاش ماكانو منتبهين للرجال الي بمكان السائق
ساره ...من الحرمه الي طلبت تسلم علينا ؟
نوف ..تقول خالتي جيرانا قبل وصديقة امي
ساره ...تصدقين ارتحت لها
نوف وهم على بعد خطوات عن السياره ..الحمدلله الي عشت وشفت ساره ترتاح لاحد
ساره ركبت السياره بدون كلام اما نوف بحكم انها الكبيره فكانت بتفتح الباب الي جنب السايق
لكنها شافت ابوها راكب وايضا بدون كلام ركبت جنب اختها
ابو سلمان ...وشلون ابوك يانايف
نايف ..بخير ويسئل عنك ويبارك لك
ابو سلمان ...الله يسلمه ويبارك فيك الاهو مايبي ينتقل للرياض ؟
نايف ...لاوالله ياعم كل اشغاله وتجارته هناك ومدارس اخواني واظن انه بعد تعود على المكان
ابو سلمان ...طيب انتم ماتنتقلون له بجده ؟مايصير ياولدي تظلون بدون اهل
نايف ...والله بعد اشغالنا هنا وهو يبتسم بعد تعودنا على الرياض
ابو سلمان ...اجل ياولدي تزوج عشان تلقى الي يهتم فيك انت مانت صغيرولا ناقصك شي
نايف ..من كثر ماطلبوا مني هالطلب بديت افكر وان شالله عن قريب تسمع الخبر
ابوسلمان ...الله يوفقك
وصلو للبيت ونواف ينتظر اخوه عند الباب
دخل نايف السياره ونزل منها وتزل ابو سلمان وكانت ساره نازله قبلهم
نايف ...يالله تصبح على خير
ابو سلمان ...وين ياولدي مايصير توقف عند بابنا ولاتدخل نضيفك
نايف ..لاوالله انا بروح انام وانت تعبان لازام ترتاح
كانت السياره قريبه للجدار فما يقدر احد يعدي اظطرت نوف تمر من الجهه الثانيه ولان المكان صغير كانت قريبه من عندهم نايف صدفه عينها طاحت عليها ولانها كانت تمشي ببطى بسبب فستانها الطويل قدر يميز عيونها حتى بالمكياج الصارخ عرفها يذكرها قبل لاتغطى عنه لما كان يجي عندهم اول مانتقل للرياض ماكانت تعني له اكثر من قريبه يعز اهلها عرفها قبل مده يوم دفتها اختها وضربت بباب السياره كل ماتذكر هالموقف يحس بشي غريب
سلم على ابو سلمان طلع متوجه لسيارة اخوه وهو شايل بخياله منظر عيونها


في الفندق
فتح سلمان باب الغرفه ودخلت نوره ودخل وراها
الف مبروك يانوره
ابتسمت ابتسامه مرتجفه وبدون رد اجلست كانت متوتره
سلمان ...خذي راحتك انا بطلع اطلب عشا
طلع سلمان تنفست نوره بقوه كانها كانت كاتمه انفاسها كل هالمده
استغلت الفرصه وعلى طول عالحمام<وانتو بكرامه > تسبحت عالسريع
ولبست قميص نوم ساتر من الستان طلعت ولقت سلمان ينتظرها
سلمان ...يسلملي الحلو تعالي تعشي
قربت نوره من الطاوله وقابلته وجلست كان حاس بخجلها وخوفها بس ماكان عارف كيف يبعده عنها
كان ياكل وهي منزله راسها للاراض
سلمان ..نواره ليش ماتاكليتن ؟؟
نوره بصوت مخنوق ...ماشتهي
سلمان ..شلون ماتشتهين امك تقول انك ماكلتي شي من الصبح حبيبتي اذا الاكل ماعجبك اطلب غيره
نوره ....لا صدقني ماشتهي
....خلاص براحتك ماراح اجبرك بس اذا حسيتي بجوع لازام تقولين لي
كالعاده نوره هزت راسها
قام سلمان وجلس جنبها ..انامادري شلون ماتتعب رقبتك من هز راسك
اربكها قربه ماقدرت تبتسم حط يديها بين يديه حاولت تفلت يديها لكنه كان محكم قبضتها
كانت يدينها بارده وترتجف
سلمان ...انتي بردانه ؟؟؟
نوره بصوت متقطع ..للللللللا
سلمان ....طيب ليش يديك بارده وترتجفين؟؟
سكتت نوره
سلمان ..نوره انتي للحين زعلانه علي لاني سويت فيك ذاك المقلب
سكتت نوره ولاردت تدري ان الموقف مايستدعي الزعل لكن كانت تختلق الاعذار عشان ما ترد عل اتصالاته
سلمان ...انا اسف
ابتسمت له
..طيب يالله نقوم ننام
اتفضت وقامت بسرعه ...لا لا مافيني نوم
ابتسم على حركتها ...تصدقين كنت اشك انك خرسا
انتبهت لنفسها ونزلت راسها
كمل سلمان .....لها الدرجه انا اخوف عالعموم ماراح اضايقك انتي نامي على السرير وانا انام عل الكنبه
كانت تبي تتكلم وتشرح وضعها تبي تقول انا ماكرهك تبي تقول تحملني
لكن لسانها ما طاوعها
سلمان انسدح على الكنبه هو مازعل عليه هو عارف ومقدر وماحب يظغط عليها



في سيارة نواف
نواف ...لاطعني ساعه ومسوي فزعه ورايح توصلهم لبيتهم
نايف .. الرجال تعبان وبعدين ابو سلمان له جمايل علينا وهذا اقل شي نسويه
نواف ..تعبان ماقلنا شي وله جمايل بعد ماقلنا شي بس ليش ماخليتني اوصلهم اتميلح عند هالمزين
نايف ...نواف عيب عليك هذولي لحمنا ودمنا وبعدين وش دراك انهم مزين
نواف ...اذكرهم يوم هم صغار الله ياساره ياهي حلوه بس دبه
نايف ...يمكن نحفت ؟؟؟
نواف ...عادي راضي فيها
نايف ...ليه ناوي تزوجها
نواف .اي والله ياخوي عشان اتصبح بوجه حلو ماهو وجهك يالضفدع
نايف ..انا ضفدع يالتمساح

رد: ليه عمري مالقى لبرده دفا الا لقاكي

البنات في غرفتهم
نوف ....تصدقين ياساره من زمان ماشفت نايف
ساره ..اشتقتي للحبيب القلب
نوف تحاول تصريف الموضوع ..هو مايعني لي شي بس اخته دايما تلمح لي
سا ره ..نوف لطيفه ماينئمن لها والرجال مايندرى وش يفكر فيه
نوف...وش مصلحتها انا احس بعيونه شي خاص لي انا
ساره ...انتبهي يانوف لاتكذبين الكذبه وتصدقينها وتصيرين ضحية نفسك الرجال ما بين شي

خبطه قويه على الارض بدون شعور ساره ونوف اتجهو لمصدر الصوت كان المكان مظلم الا المكان المقابل لغرفة ابو سلمان اقتربو للمكان وبصوت واحد

يبببببببببببببببببببببببببببببببه

كان ابو سلمان طايح على الاراض ووجهه ابيض ولايتحرك نزلت نوف لمستواه
نوف وهي تهزه ....يبه يبه يبه
رفعت راسها لاختها الي كانت ترتجف في مكانها
نوف ...ساره اتصلي بسلمان
ساره ....وش فيه ابوي؟
نوف بصوت عالي ....ساره اتصلي بسلمان
استوعبت الي صار وبسرعه اخذت جوال ابوها حاولت تتصل على سلمان جهازه مغلق
....نوف جواله مسكره
.....اتصلي بفهد بسرعه
وبسرعه دورت رقم فهد وحصلته

دقه ..دقتين ...ثلاث
لايوجد رد

....فهد مايرد وش اسوي يانوف؟؟

اتصلي بنايف !!!!!!!

....................................
كان جالس مع اخوه بالصاله
نايف ....نواف متى بتروح لابوي
نواف.. احتمال الاسبوع الجاي
نايف ..بحاول اروح معك
وسط حديثهم سمع جواله
نايف ...غريبه الحين ياذن الفجر من الي متصل بهالوقت ؟
نواف ..قوم شف من الي متصل بدال الفوازير الي مسويها
قام لجواله شاف رقم ابو سلمان بسرعه استقبل الاتصال
نايف ....هلا عمي ابو سلمان
ماكان يسمع الاشهقات عرف ان الصوت صوت بنت
..............نوف ؟؟؟؟؟
ساره ...الحقني يانايف ابوي مات .......... وهي تصيح
نايف ...وينه ومن معه
ساره ..حنا بالبيت وماعندي الانوف
عرف انها ساره
نايف ...لاتخافين ياساره انا الحين جاي
سكر التلفون واخذ مفتاحه وحط شماغه على كتفه
نواف ...عسى ماشر وش فيه ابو سلمان
نايف ...طاح عيلهم ولافيه عندهم احد
نواف ...انا جاي معاك
نايف ...بسرعه
طلعو نايف ونواف وركبوا سيارة نايف الي انطلق بسرعه يقصد بيت ابو سلمان
.................................................. ..............................
بعد مانهى حديثه مع امه وتوجه للحمام <وانتم بكرامه > حتى يتوضا لصلاة الفجر انتهى من وضؤه
اخذ جواله وانتبه ان فيه مكالمه من عمه بسرعه اتصل عليه بعد دقتين جاه رد لكن ماكان عمه هو الي رد
فهد ...من معي
نوف ...انا نوف
فهد ...عسى ماشر وش فيكم
نوف وهي تبكي ....ابوي طاح مدري وش فيه
فهد ...انتم وين ؟؟؟
نوف ...احنا في البيت
فهد ...دقايق وانا عندكم

وصل نايف لبيت ابو سلمان بوقت قياسي اتصل نايف على جواله

.................................................. ................................
نوف وهي ماسكه الجوال وتبكي ابوها زاد تعبه
اهتز الجوال بيدها كان المتصل نايف مانتبهت للمتصل بسرعه ردت
نوف بصوت علي اقرب للصياح ...انت وينك؟ ابوي بيموت
نايف ماعرف الصوت ....افتحي الباب انا برى
سمعها قبل لايسكر التلفون ....ساره جيبي عباتي
انقطع الخط بينهم
البيت صغير خلال ثواني لبست ساره عباتها وراحت تفتح الباب
دخل نايف ونواف البيت بدون كلام وهم يتبعون ساره
كان ابو سلمان طايح على الارض بدون حركه وكانت نوف جالسه بجنبه وتحاول تصحيه لكن دون فايده
حست ان فيه احد قريب منها
نوف ...ابوي مات يانايف مات
....لاتقولين هالكلام ان شالله ماعليه الا العافيه
نواف ...وش تستنى يا نايف خلنا نشيله
دخل فهد
فهد ...وش فيه عمي ؟
ساره وهي تبكي ...ابوي بيخلنا مثل ماخلتنا امي ومتعب
كانت هالكلمه مثل الخنجر الي انغرس بصدور الجميع
نواف ..يالله نشيله الاسعاف بيتاخرون
نايف ..لا اللحين يجون
وبمده قصير وصلت سيارة الاسعاف
وهم يشيلون ابو سلمان
نوف ...انا بروح معاكم
فهد ...وين تروحين الله يهداك ؟؟
بدون كلام دفعته وراحت وراهم نوف الخجوله الهاديه كانت بحاله لايعلم بها الالله نست انها وسط ثلاث شباب كلهم ليسو محارم لها كانت تركض حتى وصلت الباب الي يوصل للشارع حط فهد يده على الباب
فهد ...وين بتروحين يانوف ؟
......بركب معه
فهد ....ماراح اخليك
نوف ...مو على كيفك بروح معه
نايف ...اتركها يا فهد ما ترتاح الاتروح معه وتشوفه
ابعد يده عن الباب وطلعت نوف مثل المجنونه ساره ماكانت احسن من حال اختها لكن الي قدرت نوف تعبر عنه انربط لسانها عنه كانت حاطه يدها على صدرها وتصدر شهقات عاليه كانت تمشي وهي تترنح الاراض تدور فيها وكانت فيه عيون تتابعها فجئه اختل توازنها كانت رح تطيح لكنها حطت يدها على الجدار وقدرت تجلس على درج الباب الداخلي
...تبين تروحين تشوفين ابوك ؟
رفعت راسها وشافت رجال توقعت انه نواف بما انها تعرف نايف وفهد
هزت راسها بالموافقه
حزت بخاطره وقفتها بدون حول ولا قوه وكسر خاطره منظرها وهي تتبع المسعفين بعيونها
تعاطف معها كانت ماتقدر توقف شهقاتها
توجه لداخل البيت دقايق وهو راجع يحمل بيده كاس ما بارد
نواف ...ساره
رفعت راسها له
نواف ....خذي اشربي الما
اومئت بيدها علامه للرفض
...اشربي ياساره عشان نوديك لابوك
اخذت كاس الما وظلت منزله راسها بدون ماتحطه بفمها تذكر انها ماتقدر تشرب وهو واقف
على طول عطاها ظهره وراح
كانوا واقفين ينتظرون سيارة الاسعاف تنطلق
وهم داخل السياره
فهد ...نوف راحت لكن وشلون نخلي ساره بالبيت لحالها
نايف ..لازام ناخذها معنا
فهد ..وشلون ؟؟
نايف ..الله يهداك يافهد هذا مو وقته ناخذها انا وانت بسيارتك ونواف يلحقنا بسيارته مانقدر نخليها
فهد ..طيب وام سلمان ؟
نايف .. وش رايك نخلي نواف يجلس بالمجلس عند ام سلمان على مانتصل على احد يجي عندها وناخذ ساره معنا
فهد ..امرنا لله مضطرين

اخذوا ساره معهم لانها صعب تظل بالبيت مامعها احد وصعبه تجلس هي ونواف بالبيت ونواف بقى بالمجلس الخارجي

وصلو للمستشفى نايف وفهد وساره كانت نوف جالسه في الانتظار ومنزله راسها وحاطه يديها على راسها شافتها ساره وركضت لها
ساره ..نوف وشلون ابوي ؟
نوف ...مدري
نايف ...ماطلع الدكتور؟؟
نوف ...لا
فهد ...انا كنت حاس انه تعبان ولما سئلته قالي مافيني شي
نايف ...حتى سلمان كان حاس فيه ووصاني انتبه له
فهد ...الله يقوم بالسلامه
ماكمل كلمته الا الدكتور طالع
بسرعه ركضوا له نايف وفهد بينما ساره ونوف اكتفن بالاستماع
فهد ...بشرنا يادكتور
الدكتور ...تطمنو الحمدلله سليمه مجرد ارهاق وتعب
نايف ...يعني ماعليه خوف
الدكتور ...لان شالله ماعليه لكن بحاجه لراحه لان القلب تعب شوي
فهد ...نقدر نشوفه ؟؟
الدكتور ..لا الحين لازام يرتاح ماتقدرون تشوفونه قبل ثلاث ساعات على الاقل
استئذن الدكتور منهم وراح
نايف ...يالله يا بنات لازام تروحون اللحين ترتاحون
نوف ...ماني رايحه لين يصحى واشوفه
فهد ...بس خالتي ام سلمان بالبيت لحالها
ساره ...انا باتصل على خالتي ام سلطان تروح عندها
فهد ..لاحول ولاقوة الا بالله
نايف ...طيب روحوا الحين والصباح تجونه
نوف ...ماراح اتحرك لين اكلمه
نايف... براحتكم
كان صوتها وهي تصارخ له وقع على اسماعه واحساسه ومع انه مجرد يسمع صوتها الناعم المزين ببحه بسيطه الانها قدر يتسرب من خلاله شعور غريب داخله
الايام الاخيره شافها اكثر من مره يمكن القدر رماها قدامه


راح نايف للبيت ومر نواف الي كان جالس عند ام سلمان بعد ماجتها اختها وتوجهوا لبيتهم

الساعه عشره الصبح كانت صاحيه من بدري صلت وغيرت ملابسها وجلست على السرير كنت متضايقه وفيه شي موترها يمكن تصرفها مع سلمان او لانها اول مره تبعد عن امها

الساعه 11صحى من النوم والتفت حوله المكان غريب تذكر ان البارح زواجه رفع راسه شاف نوره تناظر له ابتسم لها وقام متوجه للحمام <وانتم بكرامه >
اخذ شاور بسرعه طلع لقاها على وضعها
سلمان ...نواره
نوره بابتسامه خجوله ..نعم
سلمان ...افطرتي ؟
نوره ...لا بس ماشتهي
سلمان ..موعلى كيفك انا بكلم ابوي اتطمن عليه ونطلع نفطر تحت
كان يكلمها وهو يفتح جهازه فتش في الارقام وعند رقم ابوه وقف
بعد دقتين انفتح الجوال
...صباح الخير يابو سلمان
...اهلين سلمان ماكان صوت ابوه نغزه قلبه
...نوف ؟؟؟ وين ابوي ليش مارد على جواله
..ابوي طالع وناسي جواله
..انتي ماتعرفين تكذبين يانوف
..صدقني ابوي طيب
...نوف صوتك يخوف ووجه ابوي البارح يخوف اكثر
انفجرت نوف بالبكى
..نوف ليش تبكين ؟؟
..ابوي تعب علينا البارح ووديناه للمستشفى
....وانتم باي مستشفى ؟
بمستشفى .....
سكر بدون لايسلم عليها
كانت تسمع كلام سلمان وعرفت ان عمها تعبان كان يدور بالغرفه موعارف وش يسوي وكانت تدور وراه قرب منها فجئه مسكت يده
نوره ...سلمان عمي وش فيه؟؟
سلمان ...انا كنت حاس فيه
نوره ببكى.... سلمان تكفى عمي وش فيه ؟
سلمان ....ابوي تعبان يانوره تعبان وانا تركته هو وخواتي لحالهم
نوره ...وهي تبكي ابي اشوفه
سلمان ...البسي بسرعه
راحت تركض لبست عباتها وركبوا سيارتهم وانطلقو للمستشفى

رد: ليه عمري مالقى لبرده دفا الا لقاكي

الساعه 11وربع
الحمدلله على سلامتك يبه
....الله يسلمك يابنيتي
نوف وهي تجاهد عبرتها ....كذا تخوفنا عليك
ساره ...الحمدلله على سلامتك يابو سلمان
ابو سلمان ....الله يسلمك شوفوني مثل الحصان
دخل الغرفه بسرعه وعيونه على المكان الي يرقد فيه ابوه
سلمان بسرعه ............ماتشوف شر يبه
ابو سلمان ..........الشر مايجيك ياولدي
سلمان ...قلت لك يبه خلني اروح للبيت بس انت اصريت الا اروح فندق لو ما ستر الله كان الله اعلم بحالك
ابوسلمان ....لاتلوم نفسك وتلومني ماحد يموت قبل يومه,,, مد راسه للي واقفه ورا سلمان وتبكي
كمل ابو سلمان ...انا اهم شي عندي راحة نواره وهو يبتسم لها
نوره .....سلامتك يا الغالي ماتشوف شر
مد يده لها ....الشر مايجيك يابنيتي
قربت منه ووطت على يده وشالتها وحبتهاورفعت نفسها على راسه وحبته
نوره بصوت باكي ودموعها تنزل بغزاره ....ليش تخوفني عليك ياعمي ؟؟؟
ابو سلمان ...لاتبكين يابنتي مافيني الا العافيه
نوره ...تكفى ياعمي انتبه لصحتك ترانا بدونك مانسوى
كان سلمان يراقبها ماكان يدري بحجم معزة ابوه عندها كانت دموعها تجمل وجهها صارت مثل الألئ
وتتكلم بعفويه كان يتمنى انه يجي يوم وتكلمه بهالطريقه ويكون له مكان بقلبها علشانه هو مو علشان ابوه
انتبه ان الباب يدق توجه للباب وفتحه شاف نايف واقف
نايف ....السلام عليكم
سلمان ...عليكم السلام حي الله نايف
نايف ...الله يحييك وشلون الوالد ؟؟
سلمان ...الحمدلله احسن
نايف ..الحمدلله على سلامته
سلمان ...الله يسلمك
نايف ...اقدر اشوفه ؟
سلمان ..اكيد بس خلني اقول للبنات يطلعون
دخل سلمان ...يالله يابنات اطلعو نايف يابي يشوف الوالد
طلعو البنات نوف من سمعت اسمه حست برجفه داخلها طلعت مع البنات كانت تسترق النظر حتى تشوفه
شافته بنهاية الممر عشان يفسح لهم الطريق منزل راسه ولايناظر لاحد جلسو البنات على الكراسي الجنب باب الغرفه

سلمان وهو واقف عند باب الغرفه ...تفضل نايف
انتبه ورفع راسه....يزيد فضلك
قرب من الباب ورمى السلام على البنات
نايف ....السلام عليكم
سمع الرد بس من ساره بينما ردت نوره ونوف بصوت غير مسموع
نايف ....الحمد لله على سلامة الوالد
ساره ...الله يسلمك
ودخل الغرفه نوف انربط لسانها من قربه لها
داخل الغرفه
نايف ...الحمدلله على سلامتك ياعمي
ابوسلمان ...الله يسلمك ياوليدي
نايف ...وشلونك الحين
ابو سلمان ...الحمدلله احسن مشكور ياوليدي على وقفتك انت واخوك
نايف ...لاتقول شي ياعمي انت مثل ابوناوالي سوينها واجب نسويه مع أي احد لكن لك انت هذا شي بسيط قدام الي سويته لي ولاخوي يوم احتجناكم
سلمان ....مشكور ياخوي والله مدري وشلون اجازيكم انت ونواف وفهد لكن ان شالله نردها لكم بالافراح
نايف ...سلمان ياخوي الي سويناه ما يستاهل كل هذا
سلمان ...لولا الله ثم انتم كان حال ابوي وخواتي مايعلم بها الا الله
نايف ...سلمان ترى تزعلني بكلامك قلت هذا واجب المهم انا استئذن باروح للبيت ابي ارتاح شوي
.ابو سلمان ....اذنك معك ياولدي
طلع من عندهم ودخلن البنات جلسو مع ابوهم شوي
سلمان .....تبي شي يبه بروح اودي البنات للبيت للبيت بعدين اروح انا ونوره نجيب اغراضنا من الفندق
ابو سلمان ....ليه ياسلمان خلكم يومين بعد
سلمان ...اسمح لي يبه ماعاد اطيعك واتركم بعد الي صار
ابوسلمان ..طيب بتسافرون ؟؟؟؟
سلمان وهو يناظر لنوره ....لا
ابو سلمان ...لا ياسلمان نوره من حقها تسافر
نوره بعد ماطال سكوتها نطقت اخيرا ...لا ياعمي مانقدر نسافر وانت تعبان اصلا ماراح نستانس وحنا بعاد عنك
ابو سلمان ...يابنتي مايصير تحرمون نفسكم السفر عشاني وبعدين الدكتور يقول بكره ان شالله اطلع
نوره وهي تبوس يده ....عمي الله يخليك لاتفكر الابنفسك وصحتك وحنا بس تطيب لاحقين على السفر
ابو سلمان ...الله يرضى عليكم ويوفقكم
نوره...وانا هذا الي ابغاه دعواتك لنا
نوف ..اللحين سلمان ماقدر عليه وانتي بكلمتين فريتى راسه
ساره وهي ترفع راسها لفوق ...الله لنا راحت علينا

قدرت نوره تقنع عمها انه يصرف نظر عن سفرهم ومع انه كان يتمنى انه يسافرون الا انه فرحان برفضها علشانه

.................................................. .................................................. ......................................
...والله نعم ماختارتي يام ناصر
ام ناصر ....وش اقولك جمال واخلاق واصلن زين
ابو ناصر ....اجل شاوري ناصر وشوفي
ام ناصر ...كلمته واللحين يجي واقوله
ابو ناصر .....هههههههههه مستعجله اشوف من اول ماخذه راحتك
ام ناصر ....البنت يوم عرس اخوها كانت مثل البدر واخاف تنخطب
دخل عليهم ناصر وحب روسهم
سمي يمه داقه على واجيبتني من الشغل وش عندك ؟؟؟؟
ام ناصر ....لقيتها ياوليدي
ناصر ...من هي يمه الي لقيتيها؟
ام ناصر ...البنت الي بزوجك اياها
ناصر وهو يصطنع الاهتمام ....ومن تكون ؟؟؟
ام ناصر .....نوف
ناصر ....نوف ؟أي نوف ؟؟؟
ام ناصر ....نوف بنت محمد ابوسلمان عرفتهم
ناصر ...عرفتهم الي كانو جيرانا
ام ناصر ...اي هي ماشالله تبارك الله جامعه كل شي حلو
ناصر ..ماكنها صغيره ؟
ام ناصر ...لاصغير ه ولاشي البنت داخله العشرين
ناصر ...والله اذا عاجبتك يمه انا مارد ك
ابو ناصر وام ناصر ...على بركة الله

.........................................
...لا لا ماتصلح لك
...ليه ماتصلح لي
...انت تشاورني ولا تعطيني خبر
...طيب عطيني سبب مقنع
...ماتقدر تقول اكرها ولافيه سب يخليها ترفضها هي عارفه ومقتنعه ان البنت ماعليها كلام طال سكوتها
...لطيفه تكلمي البنت وش فيها ؟؟وش الي يخليك رافضتها
ضيق عليها الخناق
لطيفه .....مادري يانايف بس سمعت انها مخطوبه
نايف ...مخطوبه؟؟؟؟؟؟
لطيفه برتباك من كذبتها ....ايه
نايف ...ماسمعت انها مخطوبه
لطيفه وهي تهرب من عيونه الي تطاردها ...هي من زمان متكلم عليها ولد عمها
نايف باستغراب ......فهد ؟؟؟؟؟
لطيفه ...ايه فهد
نايف ....بس فهد عمره ماقالي
لطيفه ....لازام يقولك ؟؟وبعدين ليش هي بالذات الي اعجبتك وانت الف من يتمناك
نايف ...بس انا بديت اميل لها عالعموم الله يوفقها
لطيفه ...ولايهمك فيه الي احسن منها
نايف .....لاتقولين لي نوال
لطيفه ...وش فيها نوال ؟؟
نايف ..مافيها شي بس انا اعتبرها مثل اختي
لطيفه ....بس تتزوجها بتصير زوجه وبس
نايف ....خليني افكر
.................................................. ...
بعد ماوصل خواته للبيت وتطمن على امه اخذ نوره عشان يجيبون اغراضهم من الفندق
بالسياره
سلمان ......اقول نوره تصدقين ماكنت اظنك تعرفين تتكلمين وتعبرين
كانت تسمع كلامه وساكته ماعندها رد تقوله وعارفه انه يبغى يستفزها
سلمان يكمل كلامه ...وماكنت احسب لابوي كل هالمعزه عندك
تشجعت نوره وتكلمت ...ابوك عمي وهو الي رباني انا واخوي
سلمان يبي يحرجها .....يوه وانا الي احسب هالمعزه لانه ابوي
نوره بدت تتجرا على محاورته ...انا من فتحت عيوني وهو قدامي يوديني ويجيني والي احتاجه كنت اطلبه منه هو يعني مغرقني بفضله
سلمان خاطر في باله شي على طول قاله ...على شان كذا لما خطبك لي ماقدرتي ترفضين حتى مايزعل
سكتتت نوره ونزلت راسها ردت فعلها اصعب من أي كلمة رفض ممكن تتلفظ فيها
سكت سلمان وكمل طريقه

.................................................. ....................
نواف ....ماشالله غزال ياعمي
فهد ....الحمدلله ازمه وعدت .
ابو سلمان ....تعب وراح لحاله والفضل لله ثم لكم
نواف ...اقول عمي خلنا من الكلام الي لايودي ولايجيب انا ابي فعل
فهد ...بدت قطة الوجه والاستغلال
نواف ...انت مالك شغل انا وعمي نتفاهم
ابو سلمان ...ماعليك منه ابشر بالي تبي
نواف يبي يجس النبض ....والله افكر ا اخطب وابيك تروح معي تخطب لي
ابو سلمان ......هههههههههههه والله صدقت ان عندك شي
نواف ...وليش ماتصدق ؟ انا ماناقصني شي
ابو سلمان ...حاشاك ياولدي بس انت للحين صغير على شيل الهم و اخوك اكبر منك ماتزوج للحين
نواف ...انا قد هالحمل و اخوي متى مابغى الزواج تزوج
ابو سلمان ....هههههههه مجهز نفسك طيب وابوك
نواف ...انت وابوي واحد
فهد...ومن الي بتوافق عليك
ابو سلمان ...نواف ماشاء الله كثير الي يتمنون يناسبونه
نواف ابتسم ابتسامة نصر هذا الي ييحاول يتوصل له




.................................................. .....

بعد يومين تحسنت صحة ابو سلمان وطلع من المستشفى
نوف بدت تقدم على الجامعه وكل يوم احساسها بنايف يكبر وبد يحتل مساحه كبيره من تفكيرها
نايف تراجع عن خطبته لنوف عكس نواف الي كان حاط ساره براسه ويتردد علي بيتهم لعله يلمحها
لطيفه بعد كذبتها بدت محاولاتها لاقناع نايف بخطبة نوال
ساره كانت الى الان انسان خاليه وهمها اليوم وبس ....لكن ياترى هل تدوم هالحال؟
ام سلمان مازالت كما هي بدون تقدم
سلمان ونوره حتى الان يعانون من حياه زوجيه بارده
ناصر استسلم لقرار امه


.................................................. .................................................. ....

نوف وساره جالسين بغرفتهم وكانت كل واحده جالسه على سريرها ساره كانت تقرا بمجله ونوف مستلقيه على ظهرها وتناظر للسقف واضح انها تفكر
نوف ....اقول سارونه
ساره ...خير ؟؟؟
نوف ...شفتي نايف ذاك اليوم بالمستشفى وشلون كان اهتمامه بابوي
ساره ...اي واحد بمكانه يسوي الي سواه
نوف ..انت ليش ماتحبين تعترفين بفضل احد؟
ساره ...لان الي سواه له ابوي ما يقدر يرد لو جزء منه
نوف ...لاتمننين ياساره بالي سويناه
ساره وهي تسكر المجله ....اناماتمنن بس ابيك تصحين انت تحبين تتكلمين عنه فهد ونواف كانو معاه ماتكلمتي عنهم ولاهتميتي لهم
نوف سكتت فجئه اختها مع انها اصغر منها الانها على حق ...ماني قادره ياساره مافكر فيه عجزت لاشيله من بالي
ساره ....هذا الي انا خايفه منها انك تغرقين نفسك بنفسك
دق جوال نوف كانت لطيفه المتصله على طول ردت هالانسانه من ريحة نايف
...هلا ام ريان
لطيفه ...هلا نوف شاخبارك
نوف ....بخير شاخبارك انتي وريان
لطيفه ..بخير .الحمدلله على سلامة عمي
نوف ...الله يسلمك
لطيفه ..كيفه اللحين
نوف ..الحمدلله احسن
لطيفه ...اسفه ماتصلت مادريت الا اليوم من نايف
نوف هالاسم له تاثير عجيب عليها
نوف ....ماتقصرين
لطيفه ...سلمي لي عليه وعلى سارونه
نوف ..الله يسلمك يوصل ان شاء الله
لطيفه ...مع السلامه
نوف ...مع السلامه
وانهت لطيفه المكالمه كانت في كلمه حابه تقولها لكن ماجت فرصه لكن بيجي يوم تقولها وهي الي متعهده على نفسها الاتحطم نوف فيها
سكرت من لطيفه مبسوطه
نوف ...شفتي قال لاخته على تعب ابوي
ساره ...عادي وش الي مخليك مستانسه
نوف ....يمكن هو الي قال لها تتصل
ساره ..نوف لاتغمضين عيونك عن الحقيقه وتلحقين وهم لطيفه مكاره تذكرين امي كانت دايما تحذرنا منها
نوف ....انا ابي اعرف وش سوت لك المره ؟
ساره ...وانا ابا عرف متى تستوعبين قلت لك من الله

نوف صابتها حالة عمى في أي شي يخص نايف لكن ساره دائما تواجها بالحقيقه الي ماتحب تسمعها
.................................................. ..........................

ههههههههههههه ماعليك انا بس اتسلى فيها واكسر خشمها على هالغرور
....انتي تضيعين الوقت تتسلين فيها وناسيه مخططنا
لا ماني ناسيه والي قلت لك وعد مني لازام انفذه بس اصبري اشوي حتى تعرف قيمتها
بس يالطيفه امي تقول ان نايف ميال لها ويبي يخطبها
لطيفه ....نوال انتي ماتثقين فيني وبمهارتي
نوال .... اناثق فيك بس خايفه يعاند ويخطبها
لطيفه ...اي يخطبها الله يهداك انا قلت له ان مخطوبه ومشت عليه الكذبه ونايف ما يخطب وحده مخطوبه اخوي واعرفه
نوال...طيب يمكن يسئل ويعرف
لطيفه ..لا لا نايف مايحب يتكلم خلاص
استمرت بمكالمتها مع بنت خالتها كانت تكلمها بشقة اخوانها وكان نواف يسمعها
نواف ..منهي الي نايف يبي يخطبها وكذبتي عليه ؟؟
التفت لاخوها الي كان ورا ظهرها
لطيفه ...نواف ؟؟؟
نواف ...ايه نواف وش فيك مستغربه
لطيفه ...ماني مستغربه بس ليش تتجسس على
نواف بغضب ...مو انا الي اتجسس بس كلامك مع الحقيره بنت خالتك شد انتباهي
لطيفه بصوت عالي ...نواف احترم نفسك انا اختك الكبيره وهي بنت خالتك
نواف ...انا محترم غصبا عليك و مخلي الاحترام لك ولبنت خالتك الي تركض ورى واحد مايبيها
لطيفه ...صدق ماتستحي انا اروح لبيتي احسن لي
نواف .. بتروحين بس بعد ماتقولين لي منهي الي وقفتي بينها وبين نايف ؟؟
لطيفه ...مو شغلك
نواف ...ماشي يالطيفه بس صدقيني مثل خربتي خطبت نايف من البنت الي اختارها راح اخرب خطبته من الي اختارتيها
لطيفه ...تتحداني يانواف ؟؟؟
نواف ...اتحداك
طلعت لطيفه وهي مقهوره من اخوها لانه وقف ضدها وكرهها لنوف كبر
اما نواف صدمته كانت قويه في اخته الكبيره كان عارف انها حقود لكن ماتصور ان حقدها يوصل انها تحطم اخوها
.................................................. .................................
نهاية الجزء

نايف وبذرة الحب الي انغرست داخله واجتثتها لطيفه تتوقعون ممكن ترجع تحيا من جديد ؟؟
نواف وفكرة الزواج الي كانت مزح وصارت جد وش تتوقعون يصير عليه وهل يكسب التحدي مع لطيفه؟؟
ناصر وخطبته لنوف هل تتم ؟؟؟
ام سلمان من هو العزيز الي فقده الزمها العزله لاربع سنوات ؟؟
بانتظار توقعاتكم وارائكم وتشجيعكم وحتى انتقادكم

رد: ليه عمري مالقى لبرده دفا الا لقاكي

يعطيك العافيه
استمري متابعه لك ...

رد: ليه عمري مالقى لبرده دفا الا لقاكي

تسسلم يدينك ياقمر ..
متابعتك =)