تويت
رد: أطلآلـي ملت وقوفـي ! (روآيه عن شله مـرآهقآت) مـرة روعه
انتظروني مع الجزء العاششر ~
انتظروني مع الجزء العاششر ~
-
-
رد: أطلآلـي ملت وقوفـي ! (روآيه عن شله مـرآهقآت) مـرة روعه
ننتظرك عسسسولة ..
تابعي ^_^تعليق
-
©أطلالي ملت وقوفي©
للكاتبه/ (أم الظفاير)...
[الجزء العاشر]..
يوم الأثنين...
(12/13)
₪ياهلي إن مت..لاتدفنوني
خلوني وسط "قلبها" شوي..
ومن ثوب (أمي الغاليه) كفنوني
يمكن ترد روحي.. وأرجع لكم (حي) ₪
عذاري: هذا المسج ياعمتي من ميار,, توها أرسلته لجوالي عشان أقرأه لك..
لولوه: ياخطيره ياميور المسج جاي بوقته!!!
مرام: الله يسهل عليها وتوصل بالسلامه إنشاءالله..
"أم ميار وهي تتكلم بمراره": يابعد عمري يابنيتي الله يوفقها ويريحها مثل ماريحتني.. هي وحيدتي بهالدنيا مالي غيرها وونيستي بالبيت..
إذا شافتني جالسه تقعد معي وتسولف بس عشان ماتخليني لحالي.. وتشغل بالبيت ماتخليني أمسك شي عشان ماأتعب نفسي.. ومجتهده بدراستها تقول; يمه أبصير مدرسه عشان تفتخرين فيني..
"سكتت أم ميار وهي تمسح دموعها ويزيد حاط أيده على كتفها ويحاول يهديها": الله يحفظها ويخليها لك ياخاله..
أم يزيد: بس ياختي قلبتيها صياح على ميار بكره إنشاءالله بعد المغرب إنتي عندها..
"أم ميار بصوت مبحوح": إنشاءالله....
^..^..^..^..^..^..^..^..^..^..^..^..^..^..^..^
-: خلاص إنتوا الثنتين كلها أربع أو خمس شهور وتشوفون بعض..
"زهره وهي حاضنه ميريام وتصيح": ثلجه لاتقاطعيني وكلميني كل يوم..
يوسف: حلوه ذي كل يوم ماوراكم ثانويه عامه..؟
"أم محمد وهي شايله شنطتها": يوسف جهزت شنطتك وسيارتك.. لاتخرب علينا بالطريق ترى بدون شي هي مقربعه..!!
يوسف: إيه كل شيء جاهز,, بعدين أحترمي سيارتي ولا تغلطين وإلا أهون وأسافر لحالي وأخليكم..
"أم محمد وهي تضرب يوسف على كتفه": عجل بس ترى تأخرنا وراح الوقت الساعه صارت أربع العصر..
(طلعت أم محمد ونزلت تحت وتم يوسف واقف يناظر بميريام وزهره وهو مكتف أيدينه ومبتسم)..
"ميريام وهي تمسح على راس زهره": لاتنسين هذاك اليوم اللي ضعنا فيه لما كنتي واقفه فوق السياره مع دحمون وطحتي بالأرض..
"زهره وهي تضحك وتمسح دموعها": وأنتي لاتنسين الولد الكويتي اللي يتطنز على كشتك بالملاهي..
ميريام: خايس فشلني قدام البنات_خلاص أنا قررت أغير اللوك حقي من بكره إنشاءالله..
يوسف: والله ماأظن ياثلجه الظاهر أنقل لحايل عند أمي وأترك الرياض وإنتي للحين على حالك ماتتغيرين بعد عمر طويل أنشاءالله..
(ميريام حست بغصه لما قالها يوسف كذا وهي ما حسبت حساب لهذاك اليوم اللي يخلا فيه بيتهم من يوسف..!!! خنقتها العبره وماحست إلا وهي راميه حالها بحضنه وتصيح بقووووه)..
"يوسف وهو حاضنها ويضحك": مريومه وش فيييييك؟ أمزح معك إنتي مجهزه دموعك اليوم على غييييير العاده..!!
ميريام: ..........
"يوسف وهو يبعدها عنه ويحط إيدينه على وجهها": خلاص حبيبتي أزعل منك_ قلبتيها حزن وأنا كلها أربع أيام وراجع إنشاءالله _ترى إلا الان ما نقلت لحايل وفري دموعك لذاك اليوم..
"ميريام وهي تشاهق من الصياح": لاتطري النقل قدامي ترى من جد أزعل عليك..
يوسف: ياشيطانه قولي الحقيقه إنتي زعلانه عشاني وإلا عشان زهره..؟
"ميريام وهي تأشر بيدها": الأثنين ..
"يوسف وهو يمزح": والله ماأصدق إن ثلجه تحس وتتضايق زي الناس.. ههههههههههههههههههههههه
"دخل محمد وهو ينادي يوسف بصوت عالي": يا خالي يالله تأخرنا..
"ألتفت عليه يوسف وهو مستغرب": ياجماعه وش فيكم مستعجلين؟ طفشتوا من الرياض..؟
محمد: لأ بس جدتي تقول بنمشي قبل الليل..
يوسف: الله وأكبر عاد لو مشينا الحين بنوصل قبل الليل..
محمد: أمك تقول كذا أنا مالي دخل..
"يوسف وهو يمسكه بقوه من ثوبه": وش هالألفاظ السوقيه هذي (أمك) خلاص لما بغيت تسافر قمت تقل أدبك..
"محمد وهو يضحك ويبعد يوسف عنه": ياخالي عاقبني بالسياره أو بحايل براحتك بس مو هالحين يالله بنسافر..
~~~~~~~~~~~~~~~~~~~~~~~~~
تعليق
-
(اليوم ملكة راشد ومنى)..
نسقوا أهل العريس لحفل مخصتر ومقتصر على أهل العريس وأهل العروس وعماتها وخالاتها وبناتهم.. وكان الكل فرحان ومبسوط ماعدا رنا وسميه خوات راشد لأن لهم تحفظات على أخلاق منى بس كانوا ساكتات ويبتسمون لأن أم راشد وصتهم قبل الحفله تكون نفوسهم حلوه قدام الناس عشان مايكدرون أجواء الفرحه...
وكان راشد مانع التصوير وهذا المنع شمل العروس وأهلها بعد والكل رضخ لطلبه...
ولما لبس راشد منى الشبكه وسط زغاريد الأهل والبنات..طلعوا كل اللي في غرفة الأستقبال وظل راشد جالس مع منى لحالهم....
ماألتفت راشد وناظر بمنى ولا ركز بشكلها ولا بحركاتها حتى الوقت اللي يلبسها فيه الشبكه كان جامد وبارد بس راسم على شفاه (إبتسامه خفيفه) فسرها البعض حياء من الحضور.. وفسرها البعض الاخر أعجاب بمنى,.,
لكن الحقيقه كان مبتسم يداري الصدمه..!!!!
لأن منى بغض النظر عن أخلاقها اللي عرفها قبل الخطبه!! ماكان فيها شيء يلفت نظر راشد كرجل له موصفات خاصه لزوجة المستقبل تتوزع عالأخلاق والجمال والإهتمام وتتجنب وتبتعد عن الجرأه )....
"راشد بصوت هاديء وهو يناظر الأرض": مبروك .. إنتي من هاللحظه هذي صرتي زوجتي وأنا مسؤول عنك وأي شي تحتاجينه ترجعين لي..
(راشد ماكان عارف وش يقول وقال هذا الكلام وكأنه يبي يختصر الجلسه معها ويقوم)....
"منى وهي مبتسمه": مابي إلا سلامتك والله يقدرني وأسعدك إنشاءالله..
(سكت راشد دقايق وهو يفكر بكلام يقوله عشان يطول الجلسه شوي لأن الكل بيستغرب لو قام و طلع بسرعه..
فكر يتكلم عن حياتهم مستقبلا كيف راح تقدر توزع مسؤولياتها بين البيت والوظيفه..!!!)..
"راشد وبنفس الهدوء": مرتاحه بوظيفتك..؟
"منى بحماس": كثيييييير ..
راشد: تفكرين تتخلين عنها بعد الزواج إذا حسيتي إنك عاجزه عن التوفيق بين البيت والمدرسه؟
منى: لأا أتخلى عن روحي ولا أتخلى عن الوظيفه..
"ألتفت عليها راشد وهو مستغرب": الوظيفه عندك اغلى من روحك..؟
منى: عفوا أنا خانني التعبير بس كنت أقصد إن وظيفتي حلوه وممتازه ليش أتركها..
"سكتت ثواني وهي تناظره بشك": إنت تسألني عشان الراتب وإلا ع.....
"يقاطعها راشد وهو يعدل جلسته ويسألها بتعجب": أي راتب...؟
منى: راتبي.. يعني أنا أقول إنشاءالله مانختلف على الراتب بعد الزواج..
راشد: أحد جاب سيرة الراتب وش فيك إنتي..؟
منى: أجل ليش تسأل عن وظيفتي..؟؟
(سكتت راشد وهو فاتح عيونه عالاخر ومستغرب من كلامها وحس إنه عاجز يبرر لنفسه ويجاوبها عن سبب سؤاله)..
"منى بتوتر": شوف راشد من الحين خلنا نتفق..
راشد: نتفق على أيش؟؟؟
منى: راتبي مالك علاقه فيه ولا تاخذ منه ولا فلس؟!
"راشد بصوت عالي": من جاب سيرة الراتب,, أنا ماهمتني وظيفتك من أساسها عشان أهتم بالراتب..
"منى وهي تتكلم بسخريه": مستحيل ماتهتم لأن ما فيه رجال بهالدنيا يتزوج موظفه إلا طمعان براتبها..
"قام راشد وهو معصب والشرر يتطاير من عيونه": أنا مو طماع ياأستاذه منى هذبي الفاظك وعيب عليك اللي تقولينه..
منى: أنا قلت لك نتفق من الحين عشان مانختلف بعدين لأني بصراحه ماأثق بأي أحد غير أبوي..
"صرخ راشد وهو واقف قدامها ووده يذبحها": أي إتفاق يامتخلفه أنتي يا جاهله يا.......
(أنفتح باب الغرفه ودخلت أم راشد وأم منى ورنا وهم مفزوعين من سبب الصوت العالي وكأن الجو الرومانسي اللي من المفروض إنه يكون_أنقلب لمشكله)..
أم منى: وش فيكم إنتم ليش أصواتكم طالعه برا الغرفه..
"منى ببرود وهي جالسه": عادي قاعدين نتناقش بس الظاهر إن راشد عصبي..
"راشد بإنفعال": لا عصبي ولا بطييييخ إلا إنتي اللي من الحين توصين وتحذرين على راتبك..
"أم راشد وهي ماسكه راشد": أي راتب وش السالفه..؟
"منى بخبث": راتبي ياعمه ماله علاقه فيه..
"راشد وهو يتهدد بيضربها بس أمه ماسكته": هذي اللي بتذبحني إنتي شايفتني بطالي وإلا ولد فقر عشان توصين على راتبك وتسولفين فيه ..؟؟؟؟
"أم منى وهي تحاول تهديه": محشوم ياولدي, أقعد وتفاهم إنت ومنى..
"راشد بتهديد": أنا لي تفاهم ثاني مع أستاذه منى بس مو ألحين.. وتأكدي لو مانتي مسميه لي من وإحنا صغار يحرم علي أتزوج وحده جشعه وبخيله زيك..!!!
"شهقت منى وهي تضرب على صدرها": أنا...؟؟؟
(طلع راشد وهو معصب ولحقته أمه و رنا.. ثواني بس لبسوا عباياتهم ورجعوا للبيت بدون مايواجهون منى وأمها ويناقشونهم بالمشكله)...
>>>>>>>>>><<<<<<<<<<
يوم السبت...
(12/18)
*بداية الفصل الدراسي الثاني*...
وفي صباح دراسي جديد وبعد السلام والصراخ والضحك وسرد موجز صغير وقصير بأهم الأحداث اللي صارت لأفراد الشله يحكونها لبعض عالسريييييع>>وقفوا الكل بالطابور الصباحي...
"معيضه وهي تهمس لراويه": مو كأن كشة ميريام صايره كبيره وكأنها شجره الظاهر طولت زياده بالإجازه..
"راويه وهي تكتم ضحكتها": تصدقين من تعرفنا عليها وهذا شعرها ماني متخيلته ناعم ابدا..
"معيضه وهي تشد شعره من شعر ميريام الواقفه قدامها": لمي شعرك لاتوقفك (فؤاد) مع المخالفات.. أخاف تحرمك من إنك تاخذين نتيجتك اليوم..
"ميريام وهي تلتفت على معيضه ببرود": إذا ماسكتي وتركتي شعري بحاله بتوقفك معي وتتوهقين مثل ذيك المره تذكرين...؟
معيضه: لا خلاص براحتك مابي فؤاد تسحبنا كلنا (وهي تقلدها) إنتي وهيا وديك...!!
"سحايب بهمس": سميه وش فيك متضايقه وزعلانه من جيتي الصبح وإنتي مو طبيعيه؟
"سميه وهي تتنهد": راشد..
سحايب: وش فيه راشد؟
سميه: أقولك بعد شوي بالفصل.. ميار وينها ليه تأخرت؟
سحايب: شكلها ماراح تداوم امس كلمتها تقول مريولها الجديد ماطلع من الخياط..
"وهي تضحك" عاد ميار تموت عالتغيير لزوم المعجبات ههههههههههههههه..
وبعدما دخلوا الطالبات الفصل كانت الحصه الأولى فراغ قضوها البنات بالسوالف,., وبفصل الأدبي . .
"سميه بضيق": وهذا كل اللي صار...
"سحايب وهي حاطه إيدها على خدها": معقوله سوت كذا.. ليه هي تفكيرها مادي لهالدرجه هذي..؟
سميه: ماأدري بس راشد مره مصدوووووم من صارت المشكله بينهم وهو يحن فوق روسنا يبغى يفسخ الخطبه..!!!
سحايب: لأ.. ليه يفسخ الخطبه هو خلاف بسيط ويزول بالتفاهم..
سميه: بس هالخلاف ترك له أثر سيء بنفسه ولا تفاهموا إلى الان.. وراشد يقول ماراح أنساها لها ..
سحايب: ليه هو ما كلمها بالتليفون بعد الخطبه؟
سميه: ولا فكر يكلمها ولا يسمع صوتها ليوم العرس هذا إذا ما فسخ الخطبه بعد..
سحايب: أحس إنه بنظر أهلك مكبر الموضوع عالفاضي بس بالنسبه له (أنمسحت كرامته بالأرض) لأن رجال وما يصلح تناقشه بموضوع مو مهم بالنسبه له..
سميه: إيوه.. وبصراحه اللي هذا أوله ينعاف تاليه.. إحنا متخوفين من المشاكل اللي بنواجهها سواء لو فسخ الخطبه أو تم الزواج..
سحايب: ماعليه سميه أسمحي لي بهالكلمه,, أمك وأبوك ظلموا راشد بالإختيار الفاشل لشريكة حياته..
سميه: أمي وأبوي دقه قديمه وكبار بالعمر.. وش نسوي إحنا مضطرين نطيعهم بهذي المسائل لأن هذا تفكيرهم وما نقدر نغيره..
سحايب: صادقه إنتي حتى أمي وأبوي كذا تفكيرهم..بس ياربي شلون نفهمهم أن هذا زواج,, عشرة عمر مو يوم وإلا يومين..
"سميه وهي تتنهد": الله كريم,, إنشاءالله كل شيء يتصلح ويرجع مثل ماكان وأحسن.. والله إني تعبت ومليت من كثر التفكير بهالموضوع..
سحايب: خلاص سميه إنتي إنسي الموضوع وأتركيه لأهلك وأهتمي بدراستك..
سميه: مو ناخذ النتيجه بالأول ونشوف إذا النسبه تأهل إننا نكمل وإلا ننسحب..
تعليق
-
<<وبفصل العلمي>>..
ميريام: أووووووف نبي نسولف على راحتنا شلووون؟
"درر بملل": عمى بعينها هذي قاطه أذنها معنا من بداية الحصه وش مانسولف تسمع..
راويه: كانت جالسه قدام بالفصل وش جابها ورانا..؟
معيضه: غيرت مكانها بكيفها بدون ما تستأذن من الأبله.. إنتم تكلموا بالألغاز عشان ماتفهم..
"درر وهي تصر على أسنانها": صار لنا ساعه نسولف ب(علياء»» علي وسلطانه»» سلطان) علياء قال وسلطانه راح.. واضحه ماتتغير..
"راويه وهي تضحك": أحسن شيء ميريام لما قالت (تركيه»تركي)..هههههههههههههههههههههههه
"درر وهي تتلفت": مو معقوله البنت هذي, الظاهر أحد مسلطها علينا.. إذا ظلت جالسه ورانا طول الترم رحنا فيها..
معيضه: طنشوها..؟
ميريام: طيري إنتي على كيفها تتعدى على خصوصياتنا ونطنشها الدنيا فوضى..؟
درر: أنا ملاحظه عليها من نهاية الفصل الأول وهي تلاحقنا بنظراتها وتتعمد تجلس قريب منا..
معيضه: ولا مره أنتبهت لها..
راويه: صح أنا ملاحظه عليها بس وش الحل...؟
درر: اسمعوني عدل إحنا ماراح نتكلم ولا راح نتخانق معها "عشان مانضر بسمعة الشله".. بس إذا جلسنا وأندمجنا بالسوالف وحسينا إنها تتسمع أو شفناها جلست بجنبنا وقت البريك نقول كلمة السر (قطه)..!!
معيضه: إيش قطه؟ مافهمت؟
درر: يعني (قاطه إذنها معنا)..
ميريام: إذا على كذا كل سوالفنا تصير قطه قطه قطه..
درر: وش نسوي عاد زاويتنا مستحيل نغيرها ومكانا بالفصل مستحيل نغيره وتطير هي على قولتك..!
_____________________________
وبعد أنتهاء الحصص أتجهوا الشله لزاويتهم المعروفه على يمين باب المعمل الواقع باخر ساحة المدرسه..
سحايب: ها ماحلتش بشري كم نسبتك..؟
"معيضه بإستياء": 97% بس مو عاجبتني توقعتها أعلى من كذا..
"سحايب وهي تجلس": يخرب بيتك يالدافوره وش تبين أعلى من كذا؟
"سميه وهي ترمي شنطتها": مو عاجبتك بدليني, خذي نسبتي وعطيني نسبتك..
معيضه: إنتم كم؟
سميه: أنا 92% ماشي الحال وسحايب 89% ..
معيضه: ميريام وراويه نسبهم مو حلوه حيل واطيه ودرر89% وتقول بتجتهد عشان تحافظ عليها..
سميه: ليه ميريام وراويه كم؟
معيضه: ميريام 84% وراويه %86..
سحايب: أوف أوف ليه كذا..!
معيضه: ميريام عادي مطنشه ومو مهتمه بس راويه كسرت خاطري قطعت حالها بالصياح..
سميه: والحين وينهم ليه تأخروا..
معيضه: الحين يجون راحوا للمقصف يشترون مويه..
+++++++++++++++++++++++++++
-: وأنا كم نسبتي؟
سحايب: توقعي كم؟
ميار: بلا ثقالة دم أحكي بسرعه لا تحرقين أعصابي..
سحايب: بس ترا حلوه إذا حافظتي عليها..
ميار: سحايب وبعدين معك؟
سحايب: 90% حلوه صح..!
ميار: ماشي الحال..
سحايب: ابسألك بكره بتداومين؟
ميار: ...........
سحايب: الو.. ميار إنتي معي..
ميار: إيوه ..
سحايب: إذا مشغوله راح أقفل..
"ميار بهمس": قاعده أشوف جوال أمي لقيت مسج من لزيز..
سحايب: أمك تعرف تقرأ عشان يرسل لها؟
ميار: لأ ماتعرف.. هو يحب أمي ودايم يكلمها بس أول مره يرسل لها..
سحايب: ما أستخدم ذكاءه شوي وفكر كيف راح تقرأها..
ميار: يدري إن مافيه غيري يقرأ لها المسج ..
سحايب: إذا مرسل قصيده أكيد يقصدك فيها..أفهميها ياشاطره..
ميار: لأا.. واضح يقصد أمي بس أنا بصراحه قاهرني و تعبني لزيز مدري متى يحس فيني وتصير هالرسايل لي مو لأمي..
سحايب: مو على أساس معتمده على عذاري وهي اللي بتساعدك..؟
ميار: عذاري تقول طول ماأنتي خجوله كذا بيطير يزيد,, وأنا الظاهر أبخربها عن قريب شوفي متى عاد بعد أسبوع.......أسبوعين.....؟ وبدون مساعدة عذاري..
سحايب: بتطيح كرامتك ياغبيه..
ميار: الحب تنازلات ولازم أضحي عشان حبيبي لزيز..
سحايب: ماأدري بس أنا عندي قناعه إن الحب يولد بعد الزواج أما قبل كذا أعتبره حب ميت..
ميار: أوف الله يستر من قناعاتك.. سبحان الله مع إننا شله إلا إن كل وحده شخصيتها تختلف عن الثانيه أختلاف كبير ومع ذلك حبينا بعض وتقبلنا تفاوت شخصياتنا وتفكيرنا الصعب..
سحايب: يقولون دايم,, إذا حبيتي إنسان تقبلي كل عيوبه ولا تحاولين تغيرين من شخصيته شيء لأنك راح تخسرينه.. وعلى هذي السياسه مستمره صداقتنا..
ميار: فديت هالسياسه الحلوه وحشتني موت..
سحايب: حتى إنتي وحشتينا والله يومنا بارد بدونك ومع النتايج بعد أوووف طفش..
ميار: بكره راح نفلها رقص ووناسه_ومره وحده أحتفل بنسبتي ومريولي الجديد..
سحايب: ok حبيبتي أنا بقفل الحين عشان أصلي المغرب وأنتظر كنوده يمكن بعد شوي تجي..
ميار: كنوووده والله لها وحشه.. بسألك هي للحين تحب أخوك ياسر..؟
سحايب: أي حب الله يهديك.. كنوده موزعه مشاعرها على كل شباب العالم ما بخلت على أحد.. على حب حقيقي ولعب واستهبال وإعجاب وتعاطف ومساعده ورحمه و.....كل شي..
ميار: أووووه كل هذا أجل قولي لها لا تبخل علينا إحنا بعد.. عالعموم سلمي عليها.. وأشوفك بكره باي..
تعليق
-
قفلت سحايب التليفون وراحت لغرفتها ترتبها.. بعد أقل من عشر دقايق دخلت كنوده للغرفه بهدووووء على غير العاده حتى سحايب ماحست فيها إلا لما سمعت ضربات خفيفه على باب الغرفه وهي متعوده إذا وصلت كنوده لازم يسبق وصولها صوتها العالي لما تنادي أو صراخ ياسر لما يتذمر منها...
"سحايب وهي تجلس كنوده على السرير": غريبه مهي عوايدك تدخلين بهدوء..
"كنوده وهي تبتسم غصب": مافيني شي.. بس ربي هداني مو عاجبك يعني تبيني أصير مزعجه أحسن..!
سحايب: الله يسمعنا الأخبار الطيبه.. أبشرك إنا اليوم أخذت نتيجتي ونسبتي مقبوله بس راح أجتهد أكيد..
"ما أنتبهت كنوده وسرحت ثواني تفكر وألتفتت على سحايب وهي تسألها": وش صار على جار معيضه اللي يتاجر بالمخدرات ما مسكوه الشرطه..؟
"أبتسمت سحايب": فز قلبي لما قلتي الشرطه اه ياحبي لهم.. تدرين أنا قلت لمعيضه إذا صاروا يراقبون جارهم أبنصب خيمتي بجنب بيتهم عشان أطالع وأشوف رجال المباحث بهيأه تنكريه ياي وناسه..
كنوده: ليش تنصبين خيمتك بعيد.. قدام بيتكم أقرب لك بتشوفين شرطه ومباحث على كيفك وبأي وقت تبين؟
"صرخت سحايب بعفويه وهي مستانسه": ياليت ياكنوده بس كيف ومتى؟ أقصد.....
"سكتت سحايب فجأه وبسرعه تلاشت الإبتسامه وهي تناظر كنوده بتعجب.. وكنوده تناظرها بضيق..."
"سحايب بهدوء": ليش تسألين عن جار معيضه؟ ومن الشخص اللي تراقبه المباحث في حارتنا..؟..
"كنوده وهي تنسدح عالسرير": أنا أكثر شي يعجبني فيك إنك خبله!!! وقلبك طيب وماشيه على النيه.. وتفكيرك بسيط ومحدود بشغلات تافهه وصغيره بس تعني لك الشي الكثير أقل شي تفرح قلبك.. يابختك على هالقلب المرتاح..
سحايب: وش فيك إنتي أسألك من هنا تتفلسفين من هنا وش صاير بعقلك اليوم؟؟
كنوده: شي بخاطري وبقوله لك بس..
سحايب: لأ جد كنوده أنتي مو طبيعيه وأحس باين عليك التعب.. أخاف مو ماكله عدل أو ما أخذتي إبرة الأنسولين؟
"كنوده بهدوء": أنا تعبانه وبس .. ارتحتي..؟
سحايب: أبقولك شيء أحس وجهك صاير أسود.. إنتي صح سمراء بس لون بشرتك متغير ماأدري أحسه مو طبيعي ابدا..
"كنوده بإستهزاء": يمكن بشرتي بتصير بيضاء بعد شوي وهذي مقدمات..
سحايب: طيب ماجاوبتيني على أسألتي من الشخص.....
"تقاطعها كنوده بإنفعال": يوووووه عاد إنتي خلقه خبله وما تستوعبين بسرعه خلاص أنقلعي أسألي أهلك..
سحايب: ليه معصبه طيب أنا سألت سؤال بس..
"كنوده بإستياء وهي قايمه": إلا طفشتيني بالأسئله.. وأنا تعبانه وكارهه نفسي..
سحايب: وين رايحه؟ بدري أجلسي شوي..
كنوده: أبروح أرتاح وأجهز شنطتي عندي موعد بكره..
سحايب: ليه بتهاجرين عشان تجهزين الشنطه.. المهم طمنيني وش يصير معك بكره ok..
"فتحت كنوده الباب وألتفتت على سحايب": معك سلف 20ريال؟
سحايب: سلف؟ عيب كنوده حنا مابينا هالسوالف معي 30 بس أنتظري أجيب لك الفلوس..
¿¿¿¿¿¿&i quest;¿¿¿¿¿&iqu est;¿¿¿¿¿&iques t;¿¿¿¿¿
(دخلت كنوده بيتهم وهي تحس بدوخه وهبوط في الضغط والام حاده بالبطن ومن شدة التعب ماتشوف اللي قدامها..
وكانت أمها جالسه في الصاله وفواز واقف يصلح سلك التلفزيون لأن كان خربان)..
فواز: كنوده تعالي صلحي التلفزيون صارلي ساعه أحاول وعجزت..
"وقفت كنوده وهي ساكته وتقاوم الألام"..
"أم فواز بإستهزاء": كنوده مهي فاضيه تصلح تلفزيونات بس تبي تروح وتجي عند سحايب.. ترى البنت شاطره ومجتهده مو فاضيه لبنت فاشله زيك 24ساعه مقابلتها..
فواز: يمه مو وقته هالكلام الحين.. تعالي ياكنوده ترى تعبت من الوقفه..
(مشت كنوده خطوتين فجأه طاحت بالأرض مغمى عليها وبسرعه شالوها أمها وفواز وأخذوها للمستشفى)...
~~~~~~~~~~~~~~~~~~~~~~~~~~
وبغرفة درر كانت أسماء ترتب شنطتها عشان ترجع لتبوك مع زوجها حسين واللي جاء للرياض يوم الجمعه عشان يسلم على أهل أسماء ويسافرون الساعه 9ونص لتبوك..
درر: أسوم تكفين مو تنقطعين شهور تعالي بعد شهر ok وأجلسي شهر بعد..
"أسماء وهي تضحك": حلوه هذي شهر,, أجي وأخلي زوجي لحاله حرام ..
درر: العمر يخلص وشغل زوجك مايخلص.. دايم مشغول ومو فاضي..
أسماء: وش أسوي زوجي ولازم أتحمل ظروف شغله.. بعدين ليه تبيني أجي الرياض وأنتي عندك دراسه ومو فاضيه لي..
درر: إيوه بس...! خلاص تعالي ببداية الصيف على طول..
أسماء: درر وش فيك؟ أكيد أجي بالصيف ليه قاعده تحنين علي الحين..
"درر بضيق": ما أدري أحس ماشبعت منك ووووبالي مو مرتاحه لسفرتك..
أسماء: درر .. بسم الله على عقلك وش صار لك قمتي تحوسين؟ أول مره أسافر! صار لي خمس سنوات وش الجديد؟
درر: أووووه أنا تفكيري متشتت على الدراسه والبيت وأنتي..!!
أسماء: أنا وش فيني؟
"درر بتردد": يعني مسألة أن.... صار لك خمس سنين وما حملتي.. وووو الزفت حامد إلى متى يظل يفكر فيك أخاف هالشيء يأثر على حياتك بعدين.. يعني و.....
"تقاطعها أسماء": أوف أوف درر أنتي ليه حساسه لهدرجه وتفكرين بأمور مالك علاقه فيها؟
درر: ...........
أسماء: كل شيء بهالدنيا قضاء وقدر وأنا وزوجي راضين بحياتنا وباللي الله كاتبه لنا ونصبر والله يعوض صبرنا خير.. ماصار لنا خمس سنوات متزوجين!! فيه ناس يصبرون ست وتسع و12 سنه بدون عيال والله رزقهم بعيال بعد طول الصبر..
درر: وحامد؟!
"أسماء بإنفعال": وش جاب سيرة الزفت حامد؟ خليك منه لا تفكرين وتعطينه أكبر من حجمه..
هذا إنسان حقير وهو مقهور لأني مرتاحه مع حسين ويبي يحاول بأي طريقه ينكد علي بس مو عارف كيف.. أسمعيني يادرر هذا موضوع أنتهى وخلاص لاعاد تحكين فيه قدامي أو قدام غيري خصوصا لطيفه.. ترى يظل اخوها وأكيد ما ترضى أحد يغلط عليه أو يسب فيه فاهمه..!!
"درر بخوف": لا أكيد ما أجيب طاري قدام طفطف أصلا هي تدري إني ما أطيقه عشان كذا ما تتكلم عنه ابدا ولا تجيب طاريه_ مجنونه أنا أخرب صداقتي أنا وطفطف بسبب حامد..
أسماء: شاطره أختي خليك صاحيه وواعيه لنفسك وللي حولك.. وإنشاءالله ماتتخرجين من الثانويه إلا عادل خاطبك بأذن الله..
"درر وهي فاتحه عيونها عالاخر": مين عادل...؟
"أسماء بعفويه": هذا اللي تحبينه ودعمتي بالدباب قدامه؟
"صرخت درر وهي تضرب أسماء": إنتي مانسيتي الموقف!! بعدين أسمه علي مو عادل..
"أسماء وهي تضحك": خلاص نسيت أنا اسفه هههههههههههههههههههههه
درر: أدعي لي أسوم أنه يخطبني..
"أسماء وهي قايمه": يارب يخطبك عن قريب.. أنا أبروح اجلس مع أمي بالصاله قبل ما أسافر تعالي معي..
""""""""""""""""""""""""""""
تعليق
-
رد: أطلآلـي ملت وقوفـي ! (روآيه عن شله مـرآهقآت) مـرة روعه
متابعتك ي قلبي..
وتستحقي التقييم ع هذ النقل الرائع..
تحياتي:
ساندراتعليق
-
رد: أطلآلـي ملت وقوفـي ! (روآيه عن شله مـرآهقآت) مـرة روعه
يوم الأحد...
(12/19)
-: أنتحرت!!!
لييييييييه...؟ ومتى...؟
أم ياسر: أمس لما تعبت بالليل أخذوها أهلها للمسشفى وطلعت ماكله علبتين من حبوب مسكن الظاهر (بندول) وبسرعه سوولها غسيل معده وحولوها للطب النفسي..
"شهقت سحايب وهي تحط يدها على فمها": معقوله كنوده تسوي بحالها كذا؟ طيب وش اللي يخليها تنتحر.....!
أم ياسر: وش خلاها غير ظروف أهلها وسمعة أبوها تاجر المخدرات..
"شهقت سحايب شهقه أقوى وهي تضرب يدها بصدرها": مخدرات..!! معناها أبوها هو الشخص اللي تقصده أمس بكلامها..
أم ياسر: أي كلام..كنوده أمس جابت لك طاري أبوها؟
سحايب: إيه أمس كانت متضايقه وتسألني عن جار صديقتي أسمه(أبو غازي) تاجر مخدرات والظاهر إنه يعرف أبوها أو صديقه... يمه أنا مالي خبر إن أبو كنوده تاجر مخدرات كنت أعتقد إنه دايم يسكر وبس..؟
أم ياسر: صار له سنتين من طلع من السجن وهو يتاجر مع هذا اللي أسمه ابوغازي.. أم فواز دايم تشتكي من أبو فواز وتتمنى إنه يبعد عنهم هو وتجارته ويترك لهم البيت يعيشونه براحه..
"سحايب بتعجب": ولا مره جبتوا لي طاري_ حتى كنوده دايم تقول; أبوي منشغل عنا_ ولا أفهم وش قصدها ولا فكرت أسألها..
أم ياسر: الحين أفطري بسرعه قبل مايجي باصك..
"سحايب وهي قايمه": لأ ماأشتهي بس ترى من أرجع من المدرسه أبي أزور كنوده..
أم ياسر: مافيه زياره الظهر بس العصر أقول لياسر يوديك..
"سحايب وهي تلبس عبايتها": يمه أبسألك أمها وأخوانها راح يزورونها اليوم؟
أم ياسر: لأ امها معصبه عليها وحلفت ماتزورها لا هي ولا أخوانها..
"سحايب بحزن": ليه حرام وش ذنبها البنت هذا بدل مايساعدونها يتخلون عنها؟
أم ياسر: أنا قلت لأمها نفس كلامك بس أمها معصبه وما ردت علي...
"سحايب وهي مستعجله": باصي جاء يالله فمان الله..
++++++++++++++++++++++++++++
وفي المدرسه:
~{ترى ذاك المكان اللي جمعني بالصدفه وياك'
يعيد الشوق والذكرى تعيد اللي مضى فيني..
سنه مرت على اللهفه سنه مرت على لقياك'
سنه وشهور مرت بس..! تراها تعشقك عيني..
أنا مدري وش يجيبك لقلب ماقدر ينساك'
يتيه بعالمك وحدك وينسى ماضي سنيني..
سنه مرت وأنا فيني دروب الشوق تستناك'
على جمر الألم تبكي وطيفك دوم يبكيني..
سنه مرت وأنا قلبي يعيش دوم في ذكراك'
معك يحيى,, معك ينبض,, معك يلقى عناويني..
حبيبي العمر يمضي وحلمي أعيش أنا بدنياك'
ولكن حال هالدنيا تباعد "بينك وبيني" }~
"درر وهي تسكر دفتر الصراحه وتعطيه سميه": يالبى قلبي ياعلي..
ميريام: يابنت الناس مامليتي من هالحب الفاشل..؟
درر: لأ.. لما يتزوج..
ميريام: لازم تنصدمين وتصيحين وتسوين حركات أفلام بعدين تتوبين وتنسين؟
درر: ماتدرين يمكن يتزوجني أنا...؟
ميريام: متفائله مررره اليوم بسم الله عليك.. يالله يمكن تكون هذي اخر قصيدة حب تكتبينها فيه.. بعدها تكتبين بدفتر الصراحه (بحضر زفافك/ مبروك زواجك)..
"ضحكت درر": لأ ياحبيبتي أصير أكتب بالحب الجديد.. يعني بعد عرس علي بفتره يمديني ألاقي غيره هههههههه
ميار: درر حبيبتي أبيك تكتبين المسجات اللي أرسلتها لك لما كنت مسافره بدفتر الصراحهOk..
درر: كتبتها وأنتهيت.. أمس أخذت الدفتر من سميه عشان أكتبها..
ميار: صدق؟ عطيني سميه الدفتر..
"أخذت ميار الدفتر وجلست تتصفح القصايد وهي تتنهد..كانت درر كاتبه كل قصيده بصفحه ومسجله تحتها اليوم والتاريخ"..
درر: وش رايك؟
"ميار وهي مستانسه": تجنن روعه..!!
درر: باقي تكتبين تحت كل قصيده و(بصراحه) وش مناسبة كل مسج بذيك اللحظه؟
"أبتسمت ميار وجلست تكتب وهي ساكته وكانت شوي تتنهد وشوي تضحك...
معيضه وراويه كانوا بعالم ثاني وبنقاش حاد عن الدراسه.. راويه ودها تنقطع عن الدراسه وتكمل السنه الجايه عشان تجيب نسبه عاليه ومعيضه تحاول تثنيها عن قرارها واللي أهلها من الأساس رافضينه خصوصا أختها لجين...
أما سحايب كان بالها مشغول بكنوده وتفكر فيها وقالت للشله إن كنوده تعبانه بالمستشفى بس ماخبرتهم بالسبب الحقيقي عشان ما ينصدمون فيها.... أخذت سحايب دفتر الصراحه بعد ماأنتهت ميار وسجلت مشاعرها بمراره",,,
* نقسو علينا,,
على أنفسنا..
حين نبحر بها إلى جزر المستحيل..
ونملؤها بحلم زائف..
ونضخمها بحزن أسود..
وننزعها فوق محطات الأنتظار..
ونحملها فوق طاقتها..
_____________
نقسو على قلوبنا,,
حين نحب من لا يشعر..
ونحلم بمن لا يستحق..
وننزف أحساسنا في حضرة من (لا يبالي)..
ونتحول إلى عشاق من طرف واحد...
_____________
نقسو على الظروف,,
فنعلق تخاذلنا في رقبتها..
ونلقي فشلنا عليها..
ونبرر بها عجزنا الدائم..
ونتخذ منها حجه لا تنفد..
_____________
نقسو على عقولنا,,
حين ندخل أنفسنا في حاله من (الجنون)..
ونتجرد من نضجنا..
ونبحر فوق سفن الطيش..
ونرسو فوق شواطئ التهور..
ونتصرف بمراهقه مرفوضه..]*
__________________________
رن الجرس وطلعوا البنات لباصاتهم (راويه+سحايب+سميه) وميريام مع السايق ومعيضه مشي لأن بيتها قريب من المدرسه.. وظلت درر جالسه تنتظر أخوها سلطان اللي تأخر كثير وكان الجو بارد مره.. راحت لغرفة الإداريه عشان تتصل على أهلها لقت التيلفون داخل الغرفه المقفله.. جلست وأنتظرت نص ساعه زياده وتوترت مره لما خلت الساحه من البنات ماظل إلا هي والأستاذه المناوبه..
نادى الحارس بالميكرفون أسم<سلطان> وبسرعه قامت درر ولبست عباتها بالمقلوب من الربكه وركبت السياره ونفسيتها عدم من طول الإنتظار وكان سلطان جاي ياخذها ومعه راكان..
سلطان: عسى ماتأخرت عليك..
"درر وهي تفرك يدينها ببعض من البرد": مابقى غيري بالمدرسه وذبحني البرد بعد..
سلطان: ماعليه حقك علي بس أنا كنت بالمستشفى وديت رهوفه تعبانه شوي وتعرفين طريق المستشفى بعيد..
درر: سلامات وش فيها رهوفه..
سلطان: تعبانه من...........
"درر ماسمعت سلطان وش قال_ هي مو مركزه معه من البرد وكانت تتلفت بتوتر_ لقت بجنبها (جاكيت بني) وبسرعه أخذته ورمت عباتها عشان تلبسه بس ماأنتبه لها سلطان ورجعت لبست عباتها وهي ترتخي بجلستها"..
"سلطان وهو يطفي السياره عند الصيدليه": أنتظروا دقايق بس أبي أشتري أدويه لرهوفه وراجع..
"نزل سلطان وألتفت راكان على درر الجالسه ورا": مادريتي اليوم مسلسل(ليالي الصالحيه) الحلقه الأخيره..
"درر بملل": لا مادريت.. بعدين إنت ماتمل من هذا المسلسل عشرين مره تابعته وعلى كل المحطات..
"راكان وهو يلتفت لقدام": ولا راح أمل منه.. أحسن شي شخصية (المعلم عمر) رهييييييبه..
"فزت درر من مكانها بسرعه وهي تسأل راكان بصوت عالي":شخصية ميييييييييين؟
"ألتفتت عليها راكان ببرود": المعلم عمر..
درر: إنت قلت المعلم علي وألحين عدلت الأسم صح..؟
"راكان بتعجب": أنا قلت عمر بس أنتي ماسمعتي عدل..
"درر بتأكيد": والله إنك قلت علي لاتنكر..!! أنا سمعتك نطقت علي مو عمر..
"راكان بإنفعال": أنا قلت المعلم عمر.. وأنقلعييييي أنا الغبي اللي أسولف عليك غصب تطلعيني غلطان ..
"ضحكت درر وهي ترتخي بجلستها وتحضن الجاكيت بقوه"...
~~~~~~~~~~~~~~~~~~~~~~~~~~~تعليق
-
رد: أطلآلـي ملت وقوفـي ! (روآيه عن شله مـرآهقآت) مـرة روعه
-: ياي مو مصدقه إن لجين بتصير عروسه..؟
"لجين وهي مبتسمه وتجلس بجنب راويه": عروسه مره وحده تو الناس ماصار شي رسمي هم بس أتصلوا أمس وخطبوا ومنتظرين الموافقه..
"راويه بحماس": تكفين وافقي عشان نقهر عذالك (خطيره وأتباعها)..
لجين: عيب وش الكلام ياراويه إحنا ما تربينا على كذا نسوي أشياء عشان نقهر غيرنا_ بعدين مو نسأل عن الرجال بالأول؟
راويه: أكيد جدي وأبوي راح يسألون عنه.. بس ماقلتي لي ولد من؟ وش يقرب لنا؟ وش وظيفته وشخصيته؟...
لجين: يقرب لنا من طرف جدي من بعيد.. أسمه عبدالعزيز وعمره 30سنه ووظيفته مدير بنك العربي بالفرع اللي بالخرج أما بالنسبه لشخصيته ماأدري بس أكيد إن شخصيته عندي أهم من كل شي..
راويه: على أسم خالي أكيد أمي فرحانه هعهعهعهع_ تصدقين حلوه وظيفته بس المشكله إن وظيفتك بالرياض وهو بالخرج وشلون تجتمعون..؟
لجين: ماأدري بس إذا واقفت عليه عاد تنحل أكيد..
راويه: أبسألك.. بتخبرين خوالي وعمامي بموضوع خطبتك..؟
لجين: أكيييييد واجب إننا نقولهم هذي الأصول.. عشان ما يزعلون لو عرفوا متأخر وعشان يسألون عن الرجال..
"راويه وهي تتنهد": الله يكتب اللي فيه الخير_أنا أبقوم أتغدى وأنام...
£££££££££££££££££££££££££
وفي المستشفى:
"سحايب بضيق": ليه سويتي بحالك كذا يا كنوده كلنا عندنا ظروف ومشاكل بس ماتوصل لدرجة الإنتحار...
"كنوده وهي تحاول تضحك": اللي يسمعك يقول إني أول مره أحاول أنتحر..
"فتحت سحايب عيونها عالاخر وهي مستغربه وتنتظر كنوده تكمل كلامها"..
"كنوده بصوت حاد": قبل شهور لما كنت ببيت عمي وسبحت بالمسبح اللي ببيتهم مع البنات......... لما خلصت سباحه مارحت نشفت جسمي.......!!!! وش سويت؟ جلست قدام المكيف وجسمي مبلل....... وتعبت وأسعفوني عمامي....(هذا مو محاوله للإنتحار)؟؟
سحايب: ...............
كنوده: ولما تخانقت مع أمي بعد أسابيع من السالفه هذي.. رحت للكهرب اللي بجنب الدرج ولعبت فيه وضغطت بالأزره وحركتها فوق وتحت بشكل عشوائي........وإيديني مبلله بالماء..........وش صار فيني وقتها.......؟ أنفجرت الكهرباء بوجهي وصار وجهي أسود وشعري كشه زي أفلام الكرتون...(هذا مو محاوله للإنتحار)..؟
سحايب: ..............
"كنوده وهي شوي وتصيح": سحايب أنا ضايعه وتايهه.. أنا أبي أموووووت مابي أعيش بهالدنيا مابي أعيش..
طول عمري أتمنى إني أعيش حياه نظيفه زي العالم والناس.. أبي أعيش مرتاحه بدون مشاكل.. كل الهموم تحاصرنا أنا وأخواني من طلعنا على هالدنيا وهذي حياتنا نكد في نكد.. لا أبو يحتوينا ويخاف علينا ولا أم حنونه تحبنا وتهتم فينا.. أنا وأخواني مظلومين.. مظلومين بسبب الظروف اللي ما أرحمتنا ولا ريحتنا...
"سحايب وهي تمسح دموع كنوده": خلاص كنوده مافيه داعي هالكلام إنتي تعبانه ولازم ترتاحين.. بعدين أحمدي ربك إنتي أحسن من غيرك_ شوفي المعوقين والمشلولين يتمنون ربع اللي فيك_ إنتي تتحركين وتتكلمين لكن هم محرومين.. وبالنسبه لأهلك كثير بنات عايشين بمثل ظروفك وأسوأ بعد ولا سووا بعمرهم اللي إنتي تسوينه..!!
"كنوده بملل": الحمدلله والشكر لك يارب وكلامك هذا حفظته هذا عاشر مره تقولينه لي...
سحايب: وبظل اردده لما يخف جنونك شوي.. أبسألك ما حولوك للطب النفسي أحسك تعبانه ولا هدت نفسيتك إلى الان....؟
"كنوده وهي تتنهد": حولوني للطب النفسي ورفضت وأنجنيت وعصبت عليهم مابي ولا دكتور نفسي يقرب لي_أساسا كلهم مجانين يعدلون حياة غيرهم وهم مو متعدلين..
سحايب: ماحد مجنون غيرك وإلا تنتحرين لأن أمك ماتعطيك مصروف؟ تتخانقين معها وتوصلين نفسك للحاله هذي؟ بالله عليك هذا سبب..
كنوده: لأ عشان سبب ثاني..
"سحايب بهمس": عشان تشوفين مصعب.....؟؟؟؟؟؟
(رن التليفون اللي على الطاوله وبسرعه ردت كنوده وهي فرحانه.. ثواني بس وسكرت)..
كنوده: مصعب واقف برا يبي يدخل.. خلاص إنتي روحي وأشوفك لما أطلع من المستشفى ok..
"قامت سحايب وهي تتأفف": أنا أبمشي لكن لي كلام ثاني معك بس تطلعين من المستشفى.. الله يهديك بس..
(طلعت سحايب من الغرفه وبسرعه أخذت كنوده الكحل من الشنطه وتكحلت وحطت حمره على شفايفها وتعطرت عالطاير..
وقفت سحايب عند باب الغرفه وهي تتلفت تدور على ياسر ولفت نظرها رجال واقف قدام الباب وكان عمره يوحي بالأربعينات ولابس ثوب قصير وملتحي وهيئة شكله تدل على إنه ملتزم..!!!! ظلت سحايب واقفه تناظر فيه بذهول بس هو مو منتبه لها.. كان ماسك أكياس بيده و يكلم بالجوال ويهمس بكلمة; أدخل......؟؟
جاء ياسر من اخر السيب معصصصصصب ويمشي بسرعه بإتجاه سحايب)...
"ياسر بإنفعال": خييييير إنشاءالله.. أستحي على وجهك أكلتي الرجال بعيونك..
"سحايب وهي تتمتم بصوت غير مسموع": هذا هو مصعب...!
ياسر: وش قلتي؟
"سحايب بإرتباك": هاه
ولا شي ولا شي..
ياسر: أمشي خلصينا_ يالله قدامي للسياره..
________________________
(ركبوا السياره وهم يحكون عن حال جيرانهم والظروف اللي يمرون فيها في هذي الأيام)..
"سحايب بدهشه": هرب؟ وين راح؟
ياسر: أختفى من يومين لما حس إن رجال المباحث يراقبونه هرب وماحد يعرف عنه شي..
سحايب: وشلون حس بتحركات رجال المباحث مو كلها بالسر..؟
ياسر: يعرف ويدري لما يشوف حركات غريبه حول بيته..
سحايب: مثل إيش..؟
ياسر: مافيه داعي تعرفين..
"سحايب بعصبيه": ياسر تكفى علمني عشان أشوف..!!
ياسر: وش تشوفين هاه؟ تبيني أعلمك عشان تسنترين عند باب الشارع كل ماضيعتك أمي وإلا إنتي عند باب الشارع تتلفتين وتدورين على شرطه ومباحث.. ما أستبعد منك شي ساعات تجيك حركات مو طبيعيه..
"سحايب وهي تضحك": يا لبى قلبي يالمباحث فديتهم يهبلوووون..هههههههههههه
"ضربها ياسر على رأسها وهو يمزح": عيييييب عليك أحترمي اللي جالس بجنبك عيييييب ..
سحايب: لا تضرب صاير كنوده على غفله.. كنوده لما تعصبت علي تضربني على راسي..
ياسر: بصراحه ما ألومها فيك إنتي صايره ترفعين الضغط..
سحايب: حرام عليك..
"سكتوا ثواني وقطع الهدوء سؤال سحايب": أنت تزور بيت أبو عيسى دايم وإلا تقطع فيهم؟
ياسر: ليه تسألين؟
سحايب: لأني ألاحظ أن الشباب دايم يزورونا من رجعت علاقتنا معهم مثل أول..
ياسر: هم ناس طيبين ومره محترمين.. ومع إن ما صارلنا فتره معهم بس تشوفيني 24ساعه مع بندر..
سحايب: قصدك الشاعر بندر؟
ياسر: أنا عرفت بندر كشخص عادي قبل ما يكون شاعر.. ولما أجلس معه ما يحكي بالشعر أبدا ولا يقول لي قصايد.. أحيانا يسرح ويقول بيتين من قصيده..
سحايب: لأنك ما تهتم بالشعر.. وعموما يقولون لك إن الإنسان مايحب يتكلم بمجال عمله كثير..
"ياسر بصوت شبه ضاحك": أخس يالفيلسوفه والله صايره تطلعين كلام.. ذكرتيني بفواز..
سحايب: وش جابني لفواز أنا..؟
"ياسر وهو يكتم ضحكته": فواز لما يجلس مع بندر يصير عاقل وساكت ويستحي.. يقول; أحس (كذب) ماني مصدق إني قاعد مع شاعر مشهور..ههههههههههههههههه
"ضحك ياسر وضحكت سحايب": حتى كنوده بالعيد لما شافته من الشباك تقول مو مصدقه عيوني هههههههههههههههههههههههه
"تلاشت الأبتسامه من وجه ياسر وألتفت عليها وهو يناظرها بشك": أي شباك...؟
"أرتبكت سحايب وبسرعه ضبطت السالفه بتوتر": ممممموووو شباك,, هي تقول; لو لو أشوفه عالطبيعه من الشباك أأأأأو في الشارع ما أصدق.. الله يهديك يعني وين بتشوفه بغير المجلات والتلفزيون..
ياسر: لا مو لهالدرجه تراه إنسان متواضع فوق ماتتصورين ودمه خفيف وحيل نكوتي أنا حبيت الجلسه معه حتى فواز بعد..
سحايب: الله يخليكم لبعض..
¤_¤_¤_¤_¤_¤_¤_¤_¤_¤_¤_¤تعليق
-
رد: أطلآلـي ملت وقوفـي ! (روآيه عن شله مـرآهقآت) مـرة روعه
يوم الأثنين...
(12/20)
الساعه 6 صباحا..
"يوسف وهي داخل المطبخ": صباح الخير.. وين العيال للحين ماصحو؟
أم عبدالرحمن: مريم تبدل ملابسها ودحمون بطلعة الروح قام وغسل وجهه..
يوسف: الجو بارد اليوم أبرد من أمس..
أم عبدالرحمن: إيوه بارد حيل ..
"يوسف وهو طالع من المطبخ": أبشغل سيارتي وراجع ..
"دخل عبدالرحمن المطبخ وقعد على الكرسي عشان يفطر"
"عبدالرحمن ببرود": يمه صبي لي حليب وعطيني خبز أبي... "ماكمل كلامه وقعد يتثاوب وهو يحط رأسه عالطاوله"..
أم عبدالرحمن: فيه (توست) بس مافيه خبز..
"رفع راسه عبدالرحمن بكسل": ليه مافيه أبفطر ميت من الجوع..
أم عبدالرحمن: ماعليه أكل توست مع حليب.. وإلا روح للبقاله جيب خبز..
"عبدالرحمن وهو يتأفف": أووووف مشوار مالي خلق أروح_
"قام وطلع من المطبخ ودخل يوسف وجلس يشرب شاي"..
يوسف: مريومه وين ما صارت كل هذا لبس؟
أم عبدالرحمن: مايأخرها إلا شعرها بس يبي له نص ساعه تعدل فيه..
"يوسف وهو يمزح": شكلي أبوديها للحلاق طفشتنا بكشتها.. بس بصراحه مو متخيل شعرها ناعم تعودت على شكلها كذا..
"دخلت ميريام المطبخ وهي نعسانه حيل": صباحو ..
يوسف: هلا والله مريومه الطيب عند طاريه توني قاعد أمدح فيك..
ميريام: إيه واضح عن الكذب ترى سمعتك..
"يوسف وهو قايم ويضحك":
الظاهر سمعتي غلط وإلا أنا من عندي أغلى من مريومه؟
ميريام: تسلم يارايق.. على وين..؟
يوسف: للمدرسه اليوم لازم أكون موجود بالمدرسه من بدري... فمان الله..
(طلع يوسف من المطبخ وراح لسيارته....... ثواني ورجع وهو ينادي أبو عبدالرحمن بصوت عالي وكان مرتبك ومتوتر.. راحوا ميريام وأمها ليوسف بالصاله وأم عبدالرحمن خافت من صرخته لأن جاء ببالها ولدها عبدالرحمن إن صار له مكروه لا سمح الله)...
أبو عبدالرحمن: خير عسى ماشر_وش فيك..؟
"يوسف بتوتر": سيارتي أنسرقت ياخوي تركتها شغاله ورجعت وما لقيتها..
أبو عبدالرحمن: دور عليها يمكن أحد أخذها؟
يوسف: ياخوي وش فيك اللي أخذها يعني سرقها.. أتصل على الشرطه وبلغ الله يعافيك..
أبو عبدالرحمن: قصدي يمكن دحمون أخذها..
أم عبدالرحمن: دحمون راح للمدرسه.. وبعدين هو ولا مره أخذ سيارة يوسف بدون علمه..
يوسف: ياخوي شوف لنا حل.. خلنا نلحق على اللي سرقها قبل يطلع من الحي..
(طلعوا أبوعبدالرحمن بالشارع وهو يتصل عشان يبلغ الشرطه ويوسف واقف بجنبه ويتلفت بتوتر.. وبالصدفه مرت دوريه من قدام باب البيت وبسرعه وقفوها وخبروا الضابط بالحادثه.. تجمعوا الجيران الشباب والشياب وصار الشارع زحمه والكل يفسر ويحلل السرقه..!!! ويوسف واقف يشرح لهذا ويبرر لذاك وأبو عبدالرحمن واقف مع الضابط يخبره بمواصفات السياره..
وفجأه . .
تمر سيارة يوسف من اخر الشارع مسرررررعه وأنتبه لها يوسف وعرف إنها سيارته ميزها من لونها بس ما قدر يميز شكل السايق من سرعة السياره..
تحركت الدوريه بإتجاه الشارع ويتبعها أبوعبدالرحمن بسيارته ومعه يوسف..
راحوا وراء السياره واللي كان سايقها يهدي من السرعه لما قرب من محلات (التموينات و البوفيه).. وقف السايق السياره ونزل عشان يدخل المحل وألتفت على وراء لما سمع صوت الدوريه)..
"أبو عبدالرحمن بصوت شبه ضاحك وهو ينزل من السياره": هذا ولدي دحمون؟
"صرخ يوسف وهو متجه لدحمون بعصبيه": هذا أنت ياغبي؟ ليه ماقلت لي إنك بتاخذ السياره ليييييييه..؟
(ضرب يوسف <عبدالرحمن> كف على وجهه ورفعه من القلابي ولزقه بالسياره بقوه.. وأبو عبدالرحمن والضابط يفكونه ويسحبونه عنه.. وعبدالرحمن مصدوم ومو مستوعب السالفه)..
أبوعبدالرحمن: أتركه يايوسف خلاص مافيه داعي تضربه.. الولد ماكان يقصد..
"يوسف بعصبيه": ليه يحطني بالموقف السخيف قدام الشرطه؟ لييييييييييه؟
"عبدالرحمن بخوف": أنا أخذت السياره عشان اجيب خبز من البقاله ولقيتها مقفله وجيت للبوفيه عشان أشتري ساندويتش وبيبسي..
الضابط: إنتم تعرفون الولد هذا؟
أبوعبدالرحمن: هذا ولدي أخذ سيارة عمه بدون علمه وصار سوء فهم..
الضابط: تبونا ناخذه للمركز ونحبسه وإلا تسامحونه؟
"يوسف وهو ماسك عبدالرحمن من طرف ثوبه": خله علي أنا والله لأربيه من جديد وأعاقبه,, أخليه يلعن الساعه اللي تعلم يسوق سياره..
أبوعبدالرحمن: إحنا نشكركم على مساعدتكم ونعتذر عن اللي حصل..
"ضحك الضابط وركب الدوريه وأبو عبدالرحمن أحتار يضحك على الموقف لأنه بالفعل يضحك وإلا يهدي من عصبية أخوه يوسف"...
€..€..€..€..€..€..€..€..€..€..€..
وفي المدرسه:
"سحايب وهي تضحك": أحسن شي إن الشرطه تدخلت وحلت المشكله ياقلبي فديتهم..ههههههههههههههههه
ميريام: عمي يوسف عصب وأنقهر من دحمون لأن حطه بموقف محرج قدام الضابط..
درر: طيب وش صار لما رجع للبيت..؟
ميريام: دحمون قعد يصيح وحط راسه ونام مارضى يروح للمدرسه.. وعمي راح لدوامه متأخر مره.... مسكين دحمون ياكثر مايحصل تهزيء من عمي..
درر: بس عمك بطبيعة شخصيته يثور ويهدأ بسرعه صح..!
ميريام: بالضبط_ حتى لما ضعنا في البر سوى لنا حفله بالتهزيء و خوفنا بالتهديدات اخرتها لما رجعنا للمخيم ماسوى شي عشان خاطر جدتي وغير كذا هو حنون وقلبه طيب مايعرف الزعل..
"درر وهي تتلفت": وينها ميار تأخرت؟ كل هذا الوقت تتمشى مع معجبتها..
"سحايب وهي تناظر الساعه": من طلعنا من الفصل وهم مع بعض..
سميه: بنات وش راح تسوون الترم هذا بتجتهدون وإلا تظلون على حالكم الترم الأول ماتتغيرون..
سحايب: إحنا أكيد ما راح نتغير إلا إذا تغيرت أيامنا يا إنها تفرحنا وإلا تحزنا..
سميه: إنشاءالله يكون ايامنا الجايه كلها حلوه وتفرح قلوبنا..
سحايب: أنا عندي إحساس كبير إن راح تمر علي أيام صعبه بحياتي ومالها علاقه بالدراسه ماأدري ليه يراودني هالأحساس من كم يوم..
"سميه بتعجب": أوف أوف ليه كل هالتشاؤم ياسحايب؟
"سحايب بضيق": مو تشاؤم بس هو مجرد إحساس..
"سميه بتأكيد": إنتي تفكرين بشيء هاليومين عشان كذا تحسين الدنيا سوداء بعينك مع إن هالشيء مالك علاقه فيه..
سحايب: أنا مرتاحه بحياتي وكل شي ok.. بس يمكن لأني أفكر كنوده والضغوط النفسيه اللي تمر فيها صرت أشوف الحياة عموما بلون أسود..
سميه: لا ياعمري الحياه ألوان والإنسان الفاشل هو اللي يشوفها بلون واحد.. ياسحايب حلو تتعاطفين مع كنوده بس بحدود بحيث إنها ما تأثر بتفكيرك بشكل سلبي.. بعدين إحنا بعد كم يوم ندخل سنه جديده المفروض نكون متفائلين سواء بحياتنا الخاصه أو في دراستنا..! إحنا تونا صغار على الهموم_أضعف من أننا نتحمل فوق طاقتنا......
"تقاطعها ميريام وهي فرحانه": stop فلسفه please.. وناسه شرايكم نحتفل بالسنه الجديده..؟
سميه: إحنا وين وإنتي وين.. خلينا بدراستنا أحسن لاتنسين إننا ثانويه عامه..!!
معيضه: وبعدين حرام الإحتفال بالسنه الجديده تبغين تقلدين الأجانب تقليد أعمى..
"صرخت ميريام": طيروا أنتوا الثنتين بلا أخلاقيات.. نبي نستانس ونضحك ونفرفش ونغير جو_ خلاص ثانويه عامه ناكل هم الدراسه ونسكت؟
درر: صح أنا مع مريومه وأأيد فكرة الحفله وراح أتبناها وأسويها عندي بالبيت..
"ميريام وهي تضرب يدها بيد درر": كفو ياحرم علي.. خلاص أتفقنا يوم الخميس الجاي يصادف 1/1 وراح تكون الإحتفاليه ببيت درر..
راويه: وأنا من الحين أقولكم إني ماراح أحضر..
درر: ليه؟
راويه: لازم أجتهد وأذاكر عشان أقل شي أحافظ على النسبه,, تدرين أن أهلي مارضوا إني أنقطع ومافيه قدامي حل إلا أني أضغط على نفسي واجتهد..
"درر وهي تسكتهم وتصفق": قطه قطه سكووووووت...
"سحايب وهي تهمس وتأشر على البنت": هذي هي اللي تتسمع لسوالفكم بالفصل..؟
"درر وهي تصر على أسنانها": لا تأشرين عليها لأنها تشوفك..
"ميريام بهمس": شوفوا السخييييفه جلست جنبنا؟ شين وقوة عين!
سحايب: وش أسمها؟
درر: خلود..
سحايب: يعني نناديها (القطه خلود)..
معيضه: وش قطه هذي؟
درر: يعني قاطه إذنها مع سوالفنا فهمتي؟
معيضه: فهمت_ خلاص مره ثانيه إذا جلست جنبنا وما أنتبهتوا لها أنا راح أنبهكم..
درر: فيك الخير ماحلتش!!!
رن الجرس وقاموا البنات وهم يشيلون شناطهم عشان يطلعون.. رجعت ميار وهي متملله من معجبتها..
سحايب: تحملي اللي يصير.. ليه تعطينها وجه من البدايه؟
"ميار بملل": دمها ثقيل واسألتها كثيره مره فضوليه..
سحايب: صرفيها.. إنتي مو مجبوره تتحملين سخافاتها..
ميار: شلون أصرفها؟
سحايب: قولي لها أنا مشغوله بدراستي وما عندي وقت أضيعه معك..
ميار: لا فشيله؟!
سحايب: أجل تحملي ثقالة دمها..
ميار: خلاص بكره أشوف لي صرفه معها..
/#/#/#/#/#/#/#/#/#/#/#/#/#/#/#
تعليق
تعليق