أطلالي ملت وقوفي ! (روايه عن شله مراهقات) مرة روعه

**لحن آلأمل** · 14-07-2011, 08:43 AM

رد: أطلآلـي ملت وقوفـي ! (روآيه عن شله مـرآهقآت) مـرة روعه

وفي ثانوية البنات الساعه 12 ونص فتحت بوابة المدرسه وكان ميكرفون الحارس بعد خربان..
طلعوا سميه وميار وسحايب وراويه من بدري عشان يلحقون على باصاتهم أما معيضه تتأخر لأنها تروح مشي بيتهم قريب من المدرسه وميريام تنتظر السايق ودرر على حسب موعد خروج أبوها أو أخوها من دواماتهم..
أنتظرت سحايب عند البوابه ربع ساعه والجو كان بارد مره
شافت أن باصها تأخر كثير دخلت داخل المدرسه عشان تتصل على أهلها..
حصلت ميريام ودرر ومعيضه جالسات يسولفون..
أبتسمت وهي رايحه لهم وتأشر بأيدها:
جيب ثاني ههههههههههههههههههههههههه

"ضحكوا البنات على حركتها وجلست معهم سحايب":
باصي شكله ماراح يجي أبتصل على أبوي أو ياسر ياخذوني..

معيضه: أستريحي بس المديره مقفله على تليفون المدرسه وش كثر بنات راحوا بيتصلون وصرفتهم الأداريه..

سحايب: يوووووه وش أسوي الحين أهلي بيقلقون لو تأخرت..

معيضه: وين باقي البنات اللي معك في الباص..

سحايب: نص راحوا لبيوتهم على رجولهم والباقي جالسين في الساحه..

ميريام: خلاص تعالي معاي أوصلك لبيتك..

سحايب: لا والله عشان يذبحوني أهلي_ مايرضون أطلع مع أي أحد غريب..

ميريام: أنا بوصلك مع السايق مو مع أحد من أهلي.. يعني وش فرق سايقنا عن سايق باصك..

درر: سحايب روحي مع ميريام ترى مو من صالحك لو تأخرتي على أهلك وإنشاءالله ماراح يخانقونك..
"وهي تقوم" أنا بطلع أخاف أتأخر على أخوي أشوفكم بكره باي..

"قامت معيضه وطلعت مع درر"..

ميريام: معيضه شوفي السايق إذا جاء أرجعي ناديني..

"طلعت معيضه ورجعت أشرت لميريام من بعيد تطلع..
تأخرت ميريام على السايق وهي تحاول مع سحايب تطلع معها لأن مابقى بالمدرسه إلا شوية بنات,, وبالأخير وافقت سحايب وركبت السياره مع ميريام وقلبها بيتجمد من الخوف"..!

___________________________

وقف السايق قدام بيت سحايب وكانت بتنهار وتصييييح لما شافت ياسر واقف عند باب الشارع بلباس الدوام مع فواز وهو يتلفت حوله بتوتر توقعت إنه معصب عشانها..
نزلت سحايب وهي تسحب رجولها بالأرض وحاضنه شنطتها وأيدينها ترجف من الخوف..
ولما شافها فواز نزل راسه بالأرض ونزل الدرج وهو متجه لبيتهم..

"ياسر والشرر يتطاير من عيونه بعدما سحبها من عباتها لداخل": مع مين راجعه بالسياره ذي وليش تأخرتي..؟

"ماردت عليه سحايب وركضت لداخل وحصلت أمها واقفه بالصاله,,تخبت بسرعه وراها وهي تصيح": مع صديقتي مريم..

"ياسر وهو يصرخ بوجهها بدون مايحترم وجود أمه اللي واقفه بينهم":
طيب ليييييييييه تأخرتي لييييييه؟

"سحايب وصوتها كله صياح": والله أني كنت أنتظر باصي شفته تأخر جيت مع مريم عشان ما أتأخر عليكم أكثر..

ياسر: عذرك أوقح من ذنبك يالسافله كان دقيتي من تليفون المدرسه علينا عشان نجي ناخذك.. فشلتيني قدام فواز الله لايوفقك راجعه مع سايق صديقتك؟

سحايب: المديره مقفله على التليفون وما.....

"ياسر وهي يتهدد عليها بيضربها بس أمه أمسكته": أسكتي ياكذابه..أعترفي وين كنتي وليه تأخرتي..؟؟؟

"صرخت أم ياسر وهي ترجعه على ورى": ياسر أستح على وجهك تشك بتربية أختك عيب عليك..

ياسر: يايمه كان أنتظرت شوي بالمدرسه,,أنا كنت بروح اخذها لو تأخرت دقايق زياده بس هي ماصدقت خبر جت مع صديقتها ليه البيت مافيه رجال عشان تتصرف على كيفها...؟

أم ياسر: خلاص ياسر ماصار إلا الخير خلي أختك ترتاح ترى وراها أمتحان بكره..

"ياسر وهو يصرخ": وش ترتاح أنا أبي أربيها هالحقيره عشان......

"قبل مايكمل كلامه هجم عليها فجأه وضربها كف على وجهها"..

"صرخت أم ياسر": ياسر لاتضرب أختك!! هذا وأنا عايشه تسوي بأختك كذا شلون لامت؟؟؟؟

"خنقتها العبره أم ياسر لما نطقت اخر كلمه ومسكت طرف طرحتها وهي تمسح دمعه نزلت من عينها..
دخلت سحايب متجه لغرفتها وهي تشاهق من كثر الصياح..
ضعف ياسر لما شاف دمعة أمه وهدأ بسرعه.. قرب منها وهي يحب على راسها ودموعه تحجرت بعيونه": سامحيني يمه والله مو قصدي أزعلك..

"ام ياسر وهي تبعده عنها":
تشك بأخلاق أختك وتكذبها قدامي بدون ماتحترمني وتبغاني أسامحك؟
ما أخذت شوي من حنية قلب أبوك على خواتك؟
أبوك اللي بحياته مامد أيده على وحده من بناته تجي أنت تتهدد على سحايب وتضربها؟ هذي اخرة التربيه فيك..

"حاول ياسر يبرر لأمه موقفه لكنها صدت عنه ورفضت تسمعه وهي رايحه لغرفة سحايب"..
طلع ياسر من البيت وهو يحس الدنيا ضاقت فيه وركب سيارته وهو مايدري وين يروح..
دخلت هاجر البيت مع أبوها واللي كانوا راجعين من الصيدليه دورت على أمها وهي تناديها عشان تعطيها الدواء اللي طلبته حصلتها واقفه عند باب غرفة سحايب..

هاجر: يمه وش عندك واقفه هنا بغيتي شي من سحايب..

أم ياسر: أطق عليها الباب أبغاها تجي تتغدى ومافتحت الظاهر نامت..

"ماحكت أم ياسر لهاجر عن مشكلة ياسر مع سحايب خافت يزل لسان هاجر قدام أبوها ويتضايق ويعصب على ياسر"..

هاجر: تلاقينها تعبانه من الأمتحانات وماتشتهي الأكل زياده إلا أنتي وش فيك باين عليك متضايقه..

أم ياسر: مافيني شيء بس راسي مصدع بروح أرتاح..

هاجر: سلامتك يمه أنا بجيب لك كأس ماء مع الدواء لغرفتك..

**********************

**لحن آلأمل** · 14-07-2011, 08:44 AM

رد: أطلآلـي ملت وقوفـي ! (روآيه عن شله مـرآهقآت) مـرة روعه

بعد الظهر كان جالس عبدالرحمن بالصاله يتفرج عالTV ‏..
دخل عليه يوسف وهو يناظر فيه..

يوسف: وش قاعد تسوي..

"عبدالرحمن وهو ياكل شيبس": أتفرج عالفيلم الاجنبي..

يوسف: ‎ you must be joking‎...?‎ ‎

عبدالرحمن: هاه.. عمي الله يخليك لاتحكي معي أنجليزي تراني مدلخ ماأفهم شي باللغه ذي..

يوسف: إنت تمزح..! جالس تتابع أفلام وتارك الدراسه على جنب؟

عبد الرحمن: مادة بكره سهله وماتحتاج لدراسه (تفسير) بس أحفظ معاني الكلمات والأسئله وخلاص..

"يوسف وهو يطفي الTV‏"‏:
أنت ذاكرت عشان تحكم على سهولة الماده..

"عبدالرحمن وهو يعفس وجهه": بالله عمي شغله أنا متابع الفيلم من بدايته باقي شوي وينتهي..

يوسف: لأ يعني لأ..
المهم قولي وش سويت بإمتحان القواعد اليوم؟

عبدالرحمن: كل شي حليته ماتركت ولا سؤال أصلا الأسئله سهله مره..

"يوسف وهو يخز عبدالرحمن يبغى يشككه بنفسه":
شلووووون حليت عدل وإنت ماذاكرت شي كل وقتك جالس على المباراه..؟

"أرتبك عبدالرحمن وبسرعه جاوب": والله ياعمي ماحد(غششني) أنا حليت الأسئله لحالي...

"أنفجر يوسف بالضحك وكان صوته عالي وواصل لاخر البيت":
هههههههههههههههههههههههه دحمووووووون!!! أحد جاب طاري الغش..إنت بكذا فضحت نفسك ههههههههههه.. أعترف من اللي غششك..؟

عبدالرحمن: هو مهوب غش يعني تقدر تقول مساعده..

"يوسف يسايره": طيب ياشاطر مين اللي ساعدك؟

"عبدالرحمن بخوف": أقولك بس أوعدني إنك ماتعلم أبوي وأمي..

"صرخ يوسف عشان يخوفه": جاوبني بسرعه..!!

عبدالرحمن: أأأأ.. أستاذ مصطفى اللي يدرسنا إنجليزي كان هو المراقب علينا في القاعه..

"يوسف بأبتسامة خبث": والله إني توقعت.. حركات العربجه والمرجله اللي عندك ماتطلع إلا على بزران الحاره وإلا على أساتذتك اللي من جنسيات عربيه..! حركاتكم يالطلاب ماهي خافيه علي..
هو غششك أقصد..هو ساعدك من نفسه وإلا أنت طلبت منه..؟

"عبدالرحمن يناظر للأرض": لأ هو من نفسه..

يوسف: ساعدك أستاذ مصطفى بدون ماتستفزه وتسوي حركات تقهره وتطلعه عن طوره؟؟ مستحيل..

عبدالرحمن: ..........

"يوسف وكأنه يكلم نفسه":
شاطر يابطل شاطر..

"عبدالرحمن بضيق": عمي تكفى لاتعلم أبوي..

"يوسف بصوت هادي ومسموع": إنت خايف من أبوك وماأنت خايف من ربك؟
ترضى إنك تبني مستقبلك على حرام؟
قال عليه الصلاة والسلام: [من غشنا ف ليس منا]..إشاره إلى إن الغش خارج عن أخلاق المسلمين..
وإنت بغض النظر إنك غشيت في الأمتحان أسأت الأدب مع أستاذك مصطفى وعيب هالحركات هذي إنت تروح للمدرسه عشان تتعلم وتستفيد وإلا عشان تسوي مشاكل..

"عبدالرحمن يناظر يوسف بذهول": وشلون عرفت؟

يوسف: من مصادري الخاصه وإلا أنا ليش أسألك عن أمتحانك؟

عبدالرحمن: أكيد قالك تركي؟

"يوسف وهو يعدل جلسته": تركي يقول إن أستاذك دخل غرفة المدرسين وعلمهم بحركاتك داخل القاعه وأنصدم تركي لما درى إنه ولد أخوي اللي هو إنت!!!

"عبدالرحمن وبخاطره": النشبه هذا تركي قاعد لي عالوحده بهالمدرسه كل حركه أسويها يخبر عمي وبالتفصيل.. متى ينقل لحايل وأفتك منه..

"قطع تفكيره يوسف": توعدني إن اللي صار اليوم مايتكرر..

"عبدالرحمن وعلى باله مسوي فيها ذكاء": عمي ترى الإسلام حرم الفتنه بعد.. وما يصلح يفتن علي تركي عالطالعه والنازله........؟

"ضرب يوسف عبدالرحمن ضربه قويه على راسه زلزلت نظارته":
قم أنقلع ذاكر يالله.. ومره ثانيه لو بتسوي حركتك اللي بالقاعه اليوم أنا بفتن مديرك عليك فاهم.. وتأكد إن أبوك بيعرف بالموضوع وباخليه يأدبك بعد..

"عبدالرحمن بسخريه": من سكنت عندنا وإحنا كلما غلطنا قلت بتعلم أبوي علينا وما تسوي شي بس كذا تخوفنا..

(قام يوسف بيسوي نفسه يبي ضرب عبدالرحمن ورجع جلس لما شافه هرب .. قعد يضحك على غبائه مع إن دايم يعصب عليه بس عصبيته مو جد لأن عبدالرحمن حنون وقلبه أبيض ولو كذب تفضحه عيونه ويخونه أسلوبه)...

/,,/,,/,,/,,/,,/,,/,,/,,/,,/,,/,,/,,/,,/,,/,,/

وفي المغرب في بيت أبو ياسر كانوا قاعدين في الصاله..

"هاجر وهي توجه كلامها لأمها بوجود أبوها":
غريبه سحايب نايمه لهالوقت.. بالعادة تنام ساعتين بالكثير وتصحى بدري عشان تذاكر..

أم ياسر: ........

"كملت هاجر": حتى ياسر من الصبح ماشفته لما رجع من دوامه الظهر أنا كنت بالصيدليه.. وهو مايطوف قهوة العصر واليوم ما جلس معنا نهائيا..

أبو ياسر: أصلا ماجاء للبيت أتصلت على جواله مقفل وسألت فواز عنه قال إنه ماشافه بس أكيد إنه مداوم الحين..

هاجر: عنده فتره ثانيه؟

أبو ياسر: أكيد ياسر دوامه على فترتين وأمس أستأذن من دوامه بالفتره الثانيه عشان يتابع المباراه..

"شهقت هاجر وهي تحط أيدها على صدرها": لايكون زعلان من خسارة النصر بمباراتهم أمس عشان كذا معصب وماجاء البيت....!!

أبو ياسر: ليه هو أول مره يخسر فريقه اللي يشجعه..

"ضحكت هاجر": هههههههههههه يبه لايسمعك ترى بيزعل.. أمس بغى يكفخ عيالي لما خسر فريقه بس الحمدلله لحقنا على أعمارنا وهربنا...

"أبو ياسر وهو قايم": ماعليك منه.. المهم أنا بروح أشوف أختك سحايب وش عندها نايمه لهالوقت..

"أستدرك كلامه وسأل أم ياسر" لايكون فيه أحد مزعلها..؟؟

( أم ياسر ماقدرت تخفي ضيقتها على حالة سحايب واللي كدر خاطرها إنها بفترة أمتحانات ثانويه عامه والمشاكل بتأثر على نفسيتها ومعدلها وبنفس الوقت ماكانت تبغى أبو ياسر يعرف بالموضوع )..

"كانت سحايب في غرفتها وماكان لها نفس للأكل ولا المذاكره ولا لشيء عقب الموقف اللي صار لها مع ياسر.. حطت راسها عالمخده وهي تتلمس خدها ودموعها تنزل ومهي قادره توقفها..
سمعت صوت أبوها عند الباب يناديها يبغاها تفتح له..
قامت من السرير بكسل ووقفت عالتسريحه تعدل شكلها عشان ماتحسس أبوها إنها زعلانه.. وتدري أن أبوها لو عرف بالسالفه بيعصب على ياسر وماتستبعد يضربه"..

"سحايب بخاطرها": يا الله!!! شكلي مو طبيعي أبدا.. عيوني منتفخه من فوق وتحت ماتبين وخدودي بتنفجر من كثرة وحرقة الدموع عليها.. واضح على شكلي إني كنت أصيح وش أقول لأبوي؟
اه.. بقوله زفتت بإمتحاني مع إن مادة الحديث سهله وكذبتي بايخه..
فتحت سحايب الباب وهي منزله راسها وتجيب شعرها على وجهها عشان ماينتبه أبوها..

"أبو ياسر وهو مبتسم": هلا بنتي حبيبتي وش هالنوم الثقيل ماوراك مذاكره بكره؟

سحايب: ........

"أختفت الأبتسامه من وجه أبو ياسر وهو حاط أيده ورا ظهرها ويجلسها عالسرير":
ليش زعلانه أحد مضايقك وإلا مخانقك..؟!

"سحايب وهي تشاهق من الصياح": .........

أبو ياسر: ليه تصيحين؟ أحد مزعلك بهالبيت قولي مين والله لأقلبها على راسه..

"سحايب تهز براسها يعني": لأ..

أبو ياسر: ماحليتي زين بالأختبار اليوم؟

"سحايب تهز براسها وهي تناظر بالأرض وتمسح دموعها": إيه..

أبو ياسر: يابنتي خوفتيني عليك أحسب صاير لك شي يضرك.. وش كان أمتحانك اليوم؟

"سحايب بهمس": حديث..

أبو ياسر: الحديث ماده سهله وإنشاءالله ماراح تأثر على النسبه.. خلاص أنسي مادة اليوم وشدي حيلك بالمواد الثانيه وذاكريها عدل.. طيب الأختبارات اللي فاتت حلوه؟

سحايب: إيه..

أبو ياسر: تمام .. وبعدين بنيتي شاطره وماينخاف عليها..صح وإلا أبوك غلطان؟

سحايب: صح..

"أبو ياسر وهو يمسح على رأسها": خلاص بابا قومي غسلي وجهك وتوضي وصلي لك ركعتين عشان تهدأ نفسيتك شوي وذاكري.. وش عليك أمتحان بكره؟

سحايب: جغرافيا..

أبو ياسر: ركزي بالمذاكره وأنسي مادة اليوم وحطي ببالك إنك بتنجحين وشيلي من بالك مسألة هالرسوب خلاص بابا..

"حاولت سحايب ترسم أبتسامه على شفاها": أبشر يبه..

طلع أبو ياسر وجلست سحايب ترتب مكتبها وتطلع كتاب الجغرافيا وكراسة الخرائط..
دخلت عليها هاجر وهي شايله بنتها ديمه ومبتسمه:
وش عنده الحلو زعلان يتدلع!!

"حطت سحايب راسها عالمكتب وضمت أيدينها حوله وبخاطرها": رايقه!!!!

"هاجر وهي واقفه بجنبها": وش فيك يادبا ماشبعتي نوم..؟

سحايب: هاجر تكفين خليني لحالي مالي خلق لك..

هاجر: بتذاكرين؟

سحايب:........

هاجر: أمي تقول تعالي أكلي حطينا العشاء..

سحايب: أووووف مابي أكل أطلعي برا..

هاجر: وجع سحايب لاتتأففين .. إنتي وياسر ماتحترموني أبدا الواحد لسانه وش طوله علي هذا وأنا أختكم الكبيره وقدوتكم..

سحايب: طيب ياقدوتنا أبغى أذاكر خليني على راحتي..

هاجر: أرفعي راسك وكلميني وش فيك كذا..

سحايب: أوووووووف وبعدين..

هاجر: بسم الله خلاص فهمنا.. عن أذنك..

**حسين الاحمري** · 14-07-2011, 08:46 AM

رد: أطلآلـي ملت وقوفـي ! (روآيه عن شله مـرآهقآت) مـرة روعه

رووووووعه الله يعطيك العافية

**وردة العمر** · 15-07-2011, 06:57 PM

رد: أطلآلـي ملت وقوفـي ! (روآيه عن شله مـرآهقآت) مـرة روعه

يعطييك العافيه

مرا حلو البارت

كملي ننتظر الباقي ...

**لحن آلأمل** · 30-08-2011, 02:04 AM

يوم الثلاثاء..
(11/23)

في المدرسه:
ميار: سميه ممكن تعطيني كتابك أبى أحل اسئلة من تمارين (الفصل الثاني)..
"سميه وهي مندمجه في المذاكره": تكفين ميار أبى أذاكر_ أطلبي غيري..
ميار: مين أطلب يعني.. مافيه غيرك..
سميه: أنتظري سحايب تجي وخذي كتابها..
"ميار وهي تناظر الساعه": سحايب تأخرت وما ألحق أحل الأسئله وأذاكرها........

(قطعت كلامها لما شافت سحايب متجهه صوبهم وهي ماسكه كتابها بأطراف أصابعها وتمشي ببطء وباين على ملامح وجهها الحزن)..

"ميار وهي تكلم نفسها بصوت مسموع": أوف أوف أوف.. كذا يسوي فيك الجغرافيا ياسحايب..؟؟

(جلست سحايب وهي مغطيه عيونها بإيدها اليسرى وحاطه كتابها بحضنها بحركة فهموها الشله إنها أرهاق وتعب من المذاكره)..

ميار: بشري سحايب,,كيف المذاكره..؟
سحايب: ............
"ميار وهي تأخذ كتاب سحايب وتتصفحه": إنتي حليتي تمارين الفصل الثاني مع الأبله..؟
"سحايب وهي حاطه أيدها على خدها وتناظر بالأرض": .............
"ميار وهي تحل اسئلة التمارين بسرعه": وش تتوقعين تجيب لنا أسئله أبله خوله..؟
"كملت بدون ماتسمع أجابه" أنا حاسه إن بتجيبها صعبه مره.. لأن باخر حصه لها عصبت على بنات بالفصل مشاغبات.. وحلفت يمين إنها راح تصعب الأسئله عقابا لهم.. وإحنا اللي أكلناها..
سحايب: ............
"دزتها ميار من كتفها":
ياهوووووووه وين وصلتي! أنا أكلمك ليه ماتردين علي..؟
"سحايب بشرود": هاه..
ميار: وش فيك؟ كل هذا خوف من الأمتحان..؟
... "نزلت سحايب راسها وهزته ب نعم" ...
"ميار وهي تواسي سحايب": إحنا درسنا وتعبنا بالمذاكره والله يعطينا على قد مجهودنا.. وماتدرين يمكن على كثر خوفنا من صعوبة الأسئله تصير سهله مره لأننا ذاكرنا وحفظنا المنهج عدل..

"لاحظت سميه على سحايب إنها من دخلت المدرسه ووجهها متغير ومتكدر خاطرها.. بس حبت تأجل أسألتها عن السبب لبعد الأمتحان.."

*رن الجرس ودخلوا البنات قاعاتهم*..

وبعد الأمتحان جلسوا بزاويتهم المعروفه بجنب المعمل..
ماعدا سحايب اللي أتجهت لدورة المياه مباشره بدون ما تجي عند الشله..

سميه: بنات.. سحايب اليوم مو طبيعيه ابدا..
ميريام: ليه..؟
سميه: ماأدري من جات الصباح وهي متضايقه وباين على وجهها إنها شبعانه صياح!!!
درر: صياح؟؟ يمكن ما ذاكرت عدل وخايفه إنها ترسب أو......؟
"تقاطعه سميه": لأ..أنا حاسه إنها متضايقه من شي ثاني مو من الأختبار..
راويه: صح.. لأن سحايب إذا ماذاكرت تتكلم و(تتحلطم)
أما أنها تسكت كذا معناه فيها شي..
معيضه: طيب هي وينها الحين؟
ميار: أنا شفتها راحت لدورة المياه..
معيضه: وإحنا جالسات هنا وش نسوي! قوموا نشوف وش فيها..

( قاموا بيروحون لها لكنهم رجعوا جلسوا لما شافوها مقبله لمكان جلستهم )...

"جلست سحايب وهي مغطيه وجهها بشعرها"..
"سميه وهي تبعد شعر سحايب عن وجهها": سحايب إنتي تعبانه..؟
سحايب: .............
ميار: أكيد ماحلت زين في الإمتحان لأن أبله خوله الله يهديها جايبه أسألة تعجيزيه مره..
"معيضه وهي بتلطف الأجواء": ولا يهمك سحايب.. إنشاء الله أنتي قد هالأسئله الصعبه ونص.. وتصيرين مثلي (ماحلتش..!!) .. ههههههههههههههههههههههه..
"ضربت ميريام أيدها على رأسها لأنها تذكرت شيء راح عن بالها.. وبسرعه سألت سحايب": نسيت أسألك وش صار معك لما وصلتك لبيتك أمس الظهر...؟
"تنهدت سحايب تنهيده حاره وتحجرت الدموع بعيونها":.....
ميريام: أهاه .. الحين عرفت ليه أنتي متضايقه.. أكيد صارت لك مشكله مع أهلك لأنك طلعتي معي بالسياره..؟
درر: وليه تصير مشكله.. بالعكس أنا أشوف إنها تصرفت صح لأنها لو تأخرت زياده راح يخافون عليها أهلها خصوصا إنهم بيتوقعون أن باصها لما أخذهم من المدرسه صار عليه حادث أو شيء كبير لاسمح الله.. وكل الأفكار السوداء تدور بعقولهم..
ميريام: هي كانت خايفه من ردة فعلهم عشان كذا توقعت تصير مشكله.. وشكله اللي خافت منه صار..
راويه: طيب ياسحايب_ كان أتصلتي على أهلك من تليفون الإداره عشان يجون ياخذونك من المدرسه..؟
"معيضه بأنفعال": المديره حسبي الله عليها مقفله عالتليفون..
راويه: أستغفر الله العظيم.. معيضه_لاتدعين عليها ترى مايجوز..
ميريام: قولي لي ياسحايب وش صار لك لما دخلتي بيتكم..
سحايب: ...........
ميار: سحايب أحكي,, فضفضي اللي بقلبك,,مايصير تسكتين كذا..
ميريام: أحد من أهلك زعلك؟ أمك!! أبوك!! أخوك!!..

"سحايب بحزن": ياسر!!!

(خنقتها العبره وماقدرت تكمل.. سكتوا البنات حتى تهدأ شوي..
مسحت دموعها وخبرت صديقاتها بكل اللي صار لها مع ياسر)..

"سميه بضيق": أهدي ياسحايب أهدي.. وتعوذي من الشيطان.. كل مشكله ولها حل...
"ميريام بتهور": ليه يسوي فيك كذا ليه..؟ يهزأ ويسب ويشتم ok‏ هذا شي راجع لأخلاقه.. بس إنه يمد أيده عليك ويضربك (لأ) هذا اللي ماينسكت عنه..
درر: المفروض أنك خبرتي أبوك بكل اللي صار عشان يوقفه عند حده وإلا بيتمادى ويصير عادي عنده يضربك..
معيضه: عاد أخوك الله يهداه ما أجل تفاهمه معك ل بعد الأختبارات.. أبدا مو وقته!!!
"سحايب والدموع ماليه عيونها": أنا أول مره أشوف ياسر بالحاله هذي.. مو من طبعه الضرب خصوصا إحنا خواته مره حنون وطيب بتعامله معنا..
سميه: معناته فيه شيء مضايقه.. صايرة له مشكله بداومه أو مع أحد من أهله أو أصدقاءه.. وأنتي (طلعتي بوجهه) شي طبيعي يطلع حرته فيك..
"ميريام وهي شوي وتطلع من طورها": لا والله!!!
والواحد كل ماضاقت الدنيا فيه رجع لخواته وعلى ضرب وسب وشتم.. وعذره بجيبه؟؟ متضايق ومهموم..!
"تقاطعها معيضه وهي تتبسم": أأأأحم أأأأحم.. جت معجبة ميار تغشوا....!!!
ههههههههههههههههههههه
"ميريام وهي تتأفف": طيري..والله إنك رايقه..
"أشرت ل ميار" قومي روحي للبنت قبل لاتقرب لنا وتشوفنا بهالحاله..

"قامت ميار بسرعه وراحت للبنت.. ألتفتت سميه لسحايب":
أبسألك.. أنتي ماسألتي أحد من أهلك ليش هو معصب..؟

"سحايب وصوتها كله صياح":
ماسألت ولا أبي أعرف.. أنا كل همي أمتحاني اليوم وبس.. لو رسبت فيه ماأسامحه طول عمري لأنه هو السبب..
راويه: لا تقولين كذا.. صدقيني إن مستقبلك ودراستك تهمه.. وهو أكيد بيعتذر منك إذا هو مثل ماتقولين طيب وحنون..
"ميريام بأنفعال":
وش فايدة الإعتذار.. وبعدين هو لو يهمه مستقبلها ماكان سوا اللي سواه.. حرام عليه..
راويه: ميريام.. إحنا قاعدين نهون عليها وأنتي تزيدين الطين بله.. مايصلح كذا تتعبين نفسيتها زياده..
"معيضه وهي تغمز لميريام": خلاص مريوم خلاص.. قومي إنتي ودرر أشتروا لنا فطور ترى متنا من الجوع..

"قاموا ميريام ودرر.. وظلوا سميه وراويه ومعيضه جالسات مع سحايب...
تنهدت سحايب بضيق وهي تمسح دموعها": اه وش أسوي.. إمتحاني الجغرافيا زفت ماحليت شي.. وخايفه أرسب بالماده..

سميه: لا إنشاءالله بتنجحين وتتخرجين بنسبه حلوه.. ولاتشيلين هم الماده لأن درجتك بأمتحان الشهر كامله ومشاركتك ممتازه..
"معيضه وهي تمسك خدود سحايب": أضحكي وأستانسي وفرفشي.. شوفي كيف يومنا كئيب لأنك زعلانه ومتضايقه..
"راويه وهي تأشر على معيضه": تعلمي وأستفيدي من تجارب ماحلتش...!!
"سميه وهي مبتسمه وتناظر سحايب": أعتبري ولا شي صار.. وكل شيء ودك فيه بيصير بأذن الله..
سحايب: بس أبغي أنجح بالجغرافيا وتكون نسبتي عاليه..
سميه: الله يعطيك على قد نيتك..

"ميار وهي تجلس": مرحبا شله.. عسى ماتأخرت عليكم.. إلا وين الباقي ليه ناقصين..
معيضه: غريبه ماطولتي..
ميار: عطتني رساله معطره وطلبت مني أقرأها..
"معيضه بإستياء": حركات المعجبات بايخه ومالها داعي..

*أنتهى اليوم الدراسي وكان مملل على غير العاده بسبب المشكله اللي تمر فيها سحايب لأنهم ماتعودوا يعدي يومهم بالمدرسه بدون الضحك والفرفشه والأهم دفتر الصراحه اللي أغلقت صفحاته مؤقتا ...*

**لحن آلأمل** · 30-08-2011, 02:06 AM

.,.,.,.,.,.,.,.,.,.,.,.,.,.,.,.,.,..,.,.,.,.,.,.,. ,.

وفي المساء... كانت جالسه لجين تكلم أعز صديقاتها واللي جمعتهم مقاعد الدراسه المتوسطه والثانويه وفرقتهم الدراسه الجامعيه لكنهم مازالوا على تواصل سواء بالزيارات أو بالمكالمات..

-: ماأعتقد إن أي وحده موظفه في القطاع الخاص أو المؤسسات الأهليه تحس بالأرتياح والأمان.. بالعكس تظل دايم خايفه تنتظر يقولون لها بأي لحظه (مع السلامه)..

لجين: أنا أشوف أن الوظيفه الحكوميه مضمونه أكثر وراتبها ممتاز.. يعني لو تتركين المدرسه الأهليه اللي إنتي تدرسين فيها وتحولين لحكوميه يكون أفضل وأريح لك..

رنا: وينها حسره علي..؟ حاصل لي وقلت لأ بس صعبه أنتي تعرفين نظام النقل ومشاكله..

"لجين وهي تضحك": أجل خليك بالأهليه_ وعلى قولة المثل (أمسك مجنونك لايجيك أجن منه)..

رنا: وإنتي الصادقه أمسك مدرستي هذي أحس مايطيروني برا الرياض..

لجين: إنتي صار لك سنه "مدرسة جغرافيا" فيها يعني كل هالفتره ماتأقلمتي فيها..؟

رنا: تعبت يالجين ومليت..أنا في المدرسه الأهليه أدرس وأتعب بالأخير الراتب 1800 ريال_أدفع راتب السايق وأسدد فاتورة جوالي وأشتري لي كم غرض وخلاص طارت مايبقى لي ولا ريال لاخر الشهر..

لجين: ماعليه أصبري وتحملي لما يفرجها ربك..
بعدين إنتي دايم تقولين إن الراتب مايهم كثر حرصك على إنك تضيعي وقتك بشيء مفيد وتستفيدين من شهادتك الجامعيه بدل جلستك في البيت..

رنا: وأنا للحين عند رأيي بس لكل إنسان طاقه!!! أنا ماعاد أتحمل الإهانات والتجريح من أدارة المدرسه والطالبات. . .

لجين: الطالبات إنتي معلمتهم وتعرفين كيف تسيطرين عليهم.. و اذا إنتي تأدين واجبك على أكمل وجه وش المشاكل اللي تواجهك مع الإداره..؟

"رنا وهي تتنهد": كثير يالجين_ ومو بس المدرسات في المدارس الأهليه يواجهون المشاكل والمتاعب.. عموما حتى الموظفات في القطاع الخاص يعانون بعد نفس المعاناة.. كأنهم حاسدينا على الراتب الزهيد اللي ناخذه وبيحللونه بتعاملهم السيء معنا.. يفتقدون لأبسط معاني الإحترام..

لجين: مافيه أحد في هالدنيا راضي بحياته يارنا.. الكل يشتكي ويتذمر والكل يتعب ويعاني في ظروف الحياه الصعبه..
شوفي أنا موظفه بمستشفى حكومي ولا سلمت من معاناتي مع المرضى..

رنا: إنتي(مساعدة لطبيب أسنان) مو دكتوره.. وش اللي يتعبك بالعكس وظيفتك بسيطه وراتبها عالي..

لجين: أي بسيطه اللي يهديك.. المرضى لما يجون للعياده تكون نفسياتهم تعبانه من ألام أسنانهم.. بعض الأحيان يعصبون ويصرخون وتلفظون علينا بألفاظ سيئه وتوصل للأعتداء بالضرب وأنا والدكتور نتقاسم النصيب في مشاعرهم وأنفعالاتهم واللي خارجه عن أرادتهم وبدون قصد للأساءه لنا شخصيا...

"رنا وهي تضحك": معقوله كل هذا يصير لك.. وأنا كنت أتوقع إنك أحسن مني صرنا كلنا في الهوا سوا...

"لجين وهي تضحك": بس إنتي أحسن مني صح؟ . . حبيبتي رنا أنا ماأقدر أطول معك لأن راويه أزعجتني_ واقفه فوق راسي وتحن تبغاني أقفل عشان أشرح لها قواعد الأنجليزي مو فاهمه شيء بالماده وبكره أمتحانهم..

رنا: إنتي راح تشرحين قاعدات الأنجليزي لراويه وسميه جالسه تنتظر راشد يصحى من النوم عشان يشرح لها..

لجين: يرحم أيام زمان.. أنا وإنتي كنا شاطرات مانحتاج لمساعدة أحد.. إحنا نعتمد على أنفسنا مو أخواتنا طاح حظهم إتكاليات..
يالله حبيبتي أكلمك بوقت ثاني..

رنا: سلمي على الوالده وجدتك وراويه..

لجين: يوصل فمان الله..

¥¥¥¥¥¥¥¥¥¥¥¥¥¥¥¥¥¥¥¥¥

وفي بيت أبوعبدالرحمن كانت ميريام منسدحه عالسرير وتفكر بمشكلة سحايب وضميرها يأنبها لأنها هي اللي ألحت على سحايب تجي معها في السياره ومع إن اللي سوته مو غلط بس تضايقت من موقف ياسر اللي كبر المشكله على ولا شي..
قطع تفكيرها صوت ضربات خفيفه عالباب..

"ميريام بدون نفس": مين...؟

-: ثلجه إنتي صاحيه وإلا نايمه؟

"ميريام بإنفعال وهي مو مميزه الصوت": وش رأيك يعني أرد عليك وأنا نايمه بالعقل يعني..

"ضرب الباب ضربه قويه لدرجه إن ميريام فزعت من السرير بسرعه وفتحت الباب وهي خايفه"....

ميريام: بسم الله الرحمن الرحيم..شوي شوي عالباب خرعتني..

"يوسف وهو رافع حاجب": خير عسى ماشر_ توك صاحيه من النوم وتتريقين..؟ وبعدين ماصارت كل هذا نوم الساعه صارت 8 بالليل..

"ميريام وهي تسند راسها على الباب بتعب": مانمت إلا ساعتين.. من ال5 ل7 بس..

"يوسف بإهتمام": ليه؟ غريبه مهي عوايدك تنامين ساعات قليله.. فيك شي؟!

"ميريام بيأس": متضايقه..

"سكتت وهي تعطي يوسف ظهرها وتجلس عالسرير..
دخل يوسف و سحب الكرسي وجلس قبالها.."

"يوسف بحنان": وش فيك ياعمي_مين اللي زعلك وكدر خاطرك..

"ميريام وهي تتحلطم": قهرني!!! والله قهر اللي يصير لنا.. ليه مستكثرين علينا الراحه النفسيه اللي أحنا بعز حاجتنا لها وبالفتره هذي بالذات فترة الأختبارات.. الظاهر مايرتاحون إلا لما نرسب ونفشل في الدراسه..

"يوسف وهو يضحك": الحين عرفت وش اللي مضايقك.. المعلمات وأسئلتهم الصعبه.. ياحبيبتي هذي مثل مايقولون (سنة الحياه) إحنا المعلمين نسميها(سنة الدراسه) الصعوبه ثم الصعوبه ثم......

"تقاطعه ميريام": عمي إنت وش تتكلم عنه..؟

"يوسف بإستغراب": إنت وش تقصدين؟ مين اللي تقولين قهرك؟

"ميريام بنعومه": ياسر..

"وقف يوسف وهو فاتح عيونه للاخر": مين ياسر؟؟؟!

ميريام: أخو صديقتي..

"يوسف بإنفعال": تحكين بالقطاره.. قولي لي مين هذا ياسر وش علاقتك فيه؟

"ميريام وهي تضحك وتحاول تهدي أعصابه": ههههههههههههه عمي أنا بنت أخوك تشك بأخلاقي والله ماهقيتها منك.. طيب أجلس وأنا أفهمك السالفه من...إلى...

"جلس يوسف وهي مكتف أيدينه": Please tell the truth ‎,,Dont lie to me ‎,, o.K ‎

,,,"حكت ميريام المشكله ليوسف.. وهو بسرعه هدأ وأندمج مع ميريام وهي تحكي وخنقتها العبره بنهاية كلامها وهي تقول ليوسف": أحس إني السبب في اللي صار لها.. إنت وش رايك.....؟

"أبتسم يوسف وهو يرتخي بجلسته": بالبدايه أحب أهنيك على شعورك الطيب والنبيل تجاه صديقتك وهذا دليل على إن لك (مشاعر وأحاسيس) زي الناس اللي يتضايقون وتحترق أعصابهم ويصيحون.. يعني إنتي مو (ثلجه) بكل ماتحمله الكلمه من معنى..

"صرخت ميريام وهي تضربه بالدبدوب": الشرهه علي أنا اللي أشكي لك.. ماهقيتك تتريق علي وأنا في عز ضيقي.. يالله قوم عني مابي أسمع رايك..

"يوسف وهو يقاوم الضحكه": لحظه لحظه مريوم والله باتكلم معك بجد خلاص..

ميريام: تفضل..

يوسف: أنا أشوف إن هذي المشكله بين صديقتك وأخوها أنتي مالك علاقه ابدا ولا تتضايقي ولا تعطي الموضوع أكبر من حجمه لأنه خلاف بسيط ويزول أكيد..

ميريام: بس ياعمي.......

يوسف: بس ياعمي أنتم يالبنات حساسات وعلى أي سبب تافه تزعلون وتتضايقون وما تقدرون للشخص ظروفه وتتلمسوا له الأعذار.. صح وإلا لأ..؟

"ميريام بضيق وهي تناظر بالأرض": صح.. بس ليه هم بعد مايقدرون حساسيتنا عشان نعذرهم....!

يوسف: والله يقدرون بس مايحبون يبينون هالشيء وعموما الرجال بطبيعته عقله يغلب على عاطفته ومشاعره..

"ميريام بعصبيه": عقل إيوه بس عاطفه لأ.. أجل أخو يخانق أخته ويضربها وين العاطفه بذمتك وين؟!

"يوسف وهو يتنهد ويحط يده على خده": مريومه ترى الحياة قصيره مهما طالت.. والإنسان العاقل هو اللي مايفرط فيها ولا يرضى يضيعها ويضيع وقته في المشاكل والعداوه مع أهله ومع الناس.. يلوم هذا ويزعل على هذاك ..
صحيح أن الظروف هي تجبر الواحد يتصرف تصرفات ماتعجب غيره بس المفروض إن إحنا بعد نتحامل على أنفسنا ونتقبله لأن مثل ماهو إنسان له عيوبه إحنا بعد لنا عيوبنا.. وما يصلح نكون أنانيين لهالدرجه نبغى غيرنا يتحملنا وبالنهايه إحنا مانتحمل أحد...؟؟

ميريام: هذا رأيك أنت لأنك بطبيعة شخصيتك تنسى بسرعه وما تشيل بقلبك على أحد ولو زعلت وعصبت وهاوشت يظل قلبك أبيض وما تنام إلا والكل راضي عليك.. بس وش الحل مع غيرك؟

يوسف: مثل مين؟

ميريام: مثل الأخ المتسلط على أخته وقلبه قاسي مثل الحجر..

يوسف: أنا أخالفك الرأي بعبارتك هذي بس أبسألك..؟ فيه أخت قلبها حجر مثل الأخ؟

"ميريام بثقه": لأ طبعا.. لأن الأخت قلبها طيب ويسع الكل ومطيعه لأمها وأبوها وووو......

"يقاطعها يوسف": وعلى أي أساس حكمتي على إن كل أخت في هالحياة قلبها طيب..؟

ميريام: لإن الأخت ما تتصرف بطيش مثل الأخ ولا تأذي أحد ودايم حقها مهضوم ولا تتصرف على هواها..

**لحن آلأمل** · 30-08-2011, 02:07 AM

"يوسف وهو يعدل جلسته": ما أقتنعت بكلامك أشرحي لي أكثر..

"توهقت ميريام ونزلت رأسها للأرض وهي تفكر"..

يوسف: أبي أفهمك على حاجه تجهلينها وأستوعبي كلامي..
إن أهم شي بالرجل (قلبه)..!! إذا كان قلبه طيب خلاص ناخذ الطيبه ونغض الطرف عن كل عيوبه..!!!!

"ميريام بتردد": وشلون نعرف إذا كان قلبه طيب وإلا لأ...؟

يوسف: إذا غلط بحقك وزعلك وخانقك وسبب لك أذى نفسي وجسدي......

"قاطعته ميريام بإنفعال": لاتقول إن هذا قلبه طيب.. لأ لأ لأ أسمح لي عمي والله ماأسامحه..!!

يوسف: لحظه ياعمي خليني أكمل ولا تقاطعيني..

"ميريام وهي تتنوفخ بزعل": اسفه عمي كمل كلامك..

"سكت يوسف ثواني وهو يناظرها وينتظرها تهدأ"...
ميريام: كمل....

يوسف: لا تقاطعيني..

"ميريام وهي تحط إيدها على فمها": لأ خلاص..

"يوسف بصوت هادئ": إذا زعلك ورجع أعتذر وتسامح منك وأهتم برضاك عليه... وإذا حس بالذنب وأعترف بغلطته وأنا أقولك; (أعترف) لإن الرجل عزة نفسه ماتسمح له إنه يعترف بغلطته_ لكن هذا أعترف وبين لك أسباب تصرفه الخطأ معك.. قولي لي وين القلب الحجر الجامد بهذا الإنسان؟؟؟

ميريام: ...........

يوسف: لو كانت العيوب كثيره بشخصيته ولو كانت تصرفاته شينه ولو كانت الناس تذكره بسوء!! أهم شي قلبه ،، جوهره ،، معدنه..
كثير من الشباب قلوبهم كذا_ ألاحظ إنه بنظر الناس طايش ومستهتر لكن لما أجلس معه ويتكلم عن نفسه وعن حياته أكتشف إنه ونعم الرجال.. تعرفين ليه...؟

ميريام: ليه؟!

يوسف: لإني أشوف فيه أشياء تعجبني وتعجب غيري مثل الرجوله والشهامه والنخوه والغيره على دينه وديرته.. لكن الناس مالها إلا الظاهر وتحكم على الرجل من شكله وهيأته مع إن من جواته هو إنسان طيب بس ما يلقى اللي يقدره ويفهمه..

"ميريام بملل": طيب وش علاقة هذا كله بموضوعنا..

"تفاجأ يوسف": الحين صار لي ساعه أحكي ولا أقتنعتي؟

"ميريام بنفاذ صبر": أقتنع بأيش..؟؟؟

يوسف: ماغلطنا لما سميناك ثلجه!!!

ميريام: لحظه عمي فهمني وش علاقة الرجوله والنخوه بمشكلة صديقتي؟

"يوسف وهو يفهمها بصوت عالي": يعني أخ غلط بحق أخته خلاص يصير بنظر أهله والناس ,, فاشل/ عاطل/ مستهتر/ حقير/ مايستاهل الإحترام..؟؟؟
مافيه إنسان معصوم من الخطأ.. هو أخوها ويخاف عليها حتى لو ضرها بشي هذا نابع من حرصه على مصلحتها..

ميريام: وهي أخته وتحترمه لكن ماله حق يتصرف معها على أساس إنه أبوها..

"سكت يوسف وهو يناظر ميريام بحيره لإنه عجز يقنعها"..

ميريام: ok‏ عمي كلامك صح ومقنع بس أنا لي وجهة نظر ثانيه تختلف..

"يوسف وهو يتنهد": تمام دام كذا أتفقنا.. وش عندك أمتحان بكره؟

"ميريام وهي تحضن المخده": اسفه عمو إذا ضايقتك وشكرا لإنك عطيتني من وقتك؟..

"أبتسم يوسف وهو قايم": العفو.. ماقلتي لي وش أمتحانك بكره..؟

ميريام: English..

يوسف: تبغين مساعده..؟

ميريام: ‎ Thanks for your care.. ‎

يوسف: عفوا.. أنا أبطلع مع أصدقائي للمقهى إذا تبغين أي مساعده أتصلي علي.. خلاص
ميريام: o.K‏
‏
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

**لحن آلأمل** · 30-08-2011, 02:10 AM

قامت سحايب من نومها وصلت العشاء وطلعت من غرفتها لقت أمها جالسه في الصاله..
حبت على رأس أمها وجلست بجنبها..

"سحايب بضيق": يمه وين هاجر..؟

أم ياسر: راحت للسوق مع ياسر تبي تشتري ملابس وأغراض لها ولعيالها..

سحايب: وأبوي... وينه؟

أم ياسر: طلع من بعد صلاة المغرب معزوم على العشاء عند أصدقاه..

سحايب: طيب يمه أنا أبدخل غرفتي أذاكر.. تبين شي؟

أم ياسر: سلامتك يابنتي ذاكري وأجتهدي والله ينجحك ويوفقك أنشاءالله.. "وهي تقوم" أنا بجيب لك الأكل بغرفتك وكلي يابنتي عشان خاطري ترى أمس ماأكلتي شي أبدا..

سحايب: أستريحي يمه.. أنا باخذ الأكل بنفسي..

,,,قامت سحايب ودخلت المطبخ وشالت الصينيه اللي على الطاوله وأخذتها لغرفتها وهي متضايقه ومالها نفس تاكل بس عشان ماتزعل أمها..
حطت الصينيه عالأرض وطلعت كتاب الأنجليزي وجلست تذاكر قرابة الساعه... بعدها دخلت هاجر وهي شايله أكياس كثيره وعيالها حولها..
ناظرت فيهم سحايب بملل لكنها فجأه صدت ورجعت ناظرت بالأرض لما لمحت ياسر مقبل على غرفتها وبيدخل ومعاه أكياس...

(أخذت هاجر عيالها وطلعت برا بعد ماأشر لها ياسر وهي فهمت عليه لأن بالسياره حكالها كل شيء)...

نزل ياسر اللي بيده بجنب سحايب وإنحنى وحب على راسها وباس خدها وهو يعتذر لها..
إنفجرت سحايب بالصياح وهي تشاهق ومغطيه وجهها بيدينها,,,

"جلس ياسر بجنبها": سحايب أنا اسف وحقك علي.. سامحيني غلطت بحقك..
أنا كنت متضايق من مشكله صارت لي بالدوام ورجعت للبيت وأنا تعبان وكاره نفسي وكل شيء حولي..
سكتت عن الإهانات اللي مسؤولين شغلي ماقصروا فيني وعلى سبب عادي ماأستاهل كل هالتجريح منهم.. ومع ذلك أحترمت سمعتي الطيبه قدام زملائي وسكتت سكتت عن حقي!!!! وما حسيت بنفسي إلا وأنا أنفجر فيك واطلع كل القهر اللي فيني عليك...

سحايب: ...........

ياسر: أدري إنك بتلوميني لأن مالك ذنب بس تراي عجزت أتصرف وقتها.. رجال وسكيرتي ودوامي على فترتين وراتبي على قدي ومايسد حاجتي بعد ومع ذلك راضي بحالي ومقتنع.. وبالنهايه أنفصل من الشغل بسبة (نادي النصر)..

"سحايب وهي تناظره من بين الدموع": وش دخل النصر..؟

ياسر: لأني طنشت الدوام في الليل عشان أتابع المباراه خصموا من راتبي ولما أحتجيت وعارضت ودافعت عن نفسي.. فصلوني.....!!!

"شهقت سحايب": حرام عليهم ليه يسوون فيك كذا؟

ياسر: أنا أساسا مرتاح بوظيفتي في المستشفى ومافكرت أتركها مع أن الراتب قليل.. بس دامها جات منهم أعتبرها خيره يمكن الله يفرجها وأتوظف بوظيفه مناسبه لي أكثر..

"سكتت سحايب وهي تناظر فيه وتمسح دموعها"

"أبتسم ياسر": الحين الوظيفه طارت و(لعيون النصر ترخص مدينه).. أهم شي إنتي تسامحيني وتنسين اللي صار أمس..

سحايب: مسامحتك ياخوي ..

"ياسر وهو يفتح الأكياس": شوفي وش أشتريت لك.. عطر على ذوقي وشنطه للمدرسه بس تراها ذوق هاجر عشان إذا ما أعجبتك أنا مالي دخل.. و(دونات) من
اللي يحبها قلبك..

"سحايب ورجعت تصيح": ياسر ليش تكلف على عمرك أنا مسامحتك بدون ما تشتري لي هالاشياء..

ياسر: ماعليه إنتي تستاهلين أكثر وهذي حلوان اخر راتب لي في وظيفتي..

"سحايب وهي معصبه": كله من النصر.. عاد ليتهم فازوا بالمباراه وفرحوا قلبك شوي.. أنت خسرت وظيفتك والنصر خسر في المباراه..

ياسر: بس يظل عالمي وفارس نجد للأبد....

********************

**لحن آلأمل** · 30-08-2011, 02:11 AM

يوم الأربعاء...
(11/24)

دخلت درر الساحه وهي مبسوطه ومتجهه لزاوية الشله وتترقب ردة فعلهم من الشيء
المميز اللي لابسته...

"درر وهي واقفه": وش رأيكم بنات...؟
ميريام: واو حركات طاقيه ولفه على الرقبه حرف (A)..
ميار: خربتيها يادرر_ من وين لك؟
"درر وهي تجلس": شفتها على أخوي راكان سحبتها وأخذتها منه غصب ..
"سحايب وهي تمزح": لو يدري علاوي إن فيه بنت تحبه وتمووووت فيه وحياتها كلها ‏(A+D) والله لايبيع الدنيا عشان خاطرها..
"صرخت درر وهي تضرب سحايب": خلاص أسكتي لاتحطميني ترا بجد يضيق صدري لما أتذكر إني أحبه وهو مادرى عني..
سحايب: أنا أقولك (لو) درى والحين بقولك (إذا) ماتزوج غيرك.. نفس هذا اللي أسمه صقر تتذكرين ؟!
"ميريام تبي تستفز درر": اللي ما أمداها قالت (حبيته) إلا وهو خاطب وحده من قرايبه؟ يابنات هو نفسه وإلا أنا غلطانه؟
سحايب: لا ماأنتي غلطانه_ أذكر ظلت أربع شهور تحكي عنه وتتحلم بعدها ماعاد جابت طاريه..
ميريام: بس لما تزوج مر زواجه مرور الكرام ما تأثرت حيل ولا حزنت..
سحايب: أتوقع إذا تزوج علي بيكون حزنها أعمق لأنه طول ماتزوج من صارت تحبه..
"صرخت درر وهي تكتم ضحكتها": ياخايسات تتريقون....؟

"ضحكت ميريام وهي تضرب يدها بيد سحايب"..

ميار: ماعليك منهم حبيبتي طنشيهم وراجعي الحين وبعد الإمتحان تفاهمي معهم...

بعد الأمتحان وطلعوا من القاعات تسابقوا البنات للزوايه ماعدا معيضه تمشي ببطء وماسكه كتابها وتراجع إجاباتها..

"سحايب بصوت عالي": ماحلتش تعالي بسرعه والله راح تنجحين..
سميه: سحايب اليوم رايقه مره وش صاير لك؟ بعدين تعالي قولي لي وش صار معك إنتي وياسر أمس؟ سألتك قبل الأمتحان وماجاوبتيني..

"ميريام بتحذير": لاتقولين ماصار شي_ ترى أمس ماذاكرت كل وقتي أفكر فيك..

"إبتسمت سحايب": جاني أمس بالليل وأعتذر مني_ وشرا لي شنطه وعطر ودونات(قالتها وهي تضحك) لأنه كان راجع من السوق مع هاجر وسامحته بس..

"تذكرت ميريام كلام عمها يوسف وتفاجأت بتصرف ياسر وبرهن لها إن فعلا أهم شي بالرجال قلبه وأقتنعت برأي يوسف بس تمت ساكته وتفكر"..

سميه: ماعرفتي ليه كان معصب..؟

"سحايب بحزن": قالي إنه تخانق مع مسؤولينه بالدوام وووو........ ترك الوظيفه..!!

سميه: وش السبب؟

سحايب: على سبب تافه مايدخل العقل_يقول ياسر لأنه طنش دوامه الفتره المسائيه يبي يتابع المباراه صاروا يخانقونه ويستفزونه وهو كله -سكيرتي- ماتسوى عليه الأهانات..

سميه: طيب هو متضايق لأنه ترك وظيفته..؟

سحايب: لا بالعكس مرتاح فوق ماتتصورون وعنده قناعه إنها خيره..

سميه: فعلا.. دامها جت منهم خيره.. لكن شلون راح يتم جالس بدون وظيفه أكيد هالشي بيأثر بنفسيته..

سحايب: لأ عادي لأن ياسر أكثر شي يميز شخصيته بإنه قنوع ويتحمل مسؤولية نفسه وتصرفاته وهو عارف إنه غلطان بس مع ذلك مسلم أمره لله ويبي يصبر ويدور له على وظيفه ثانيه..

"سميه بخاطرها": سبحان الله عكس شخصية سعود بالضبط مع إن أعمارهم متقاربه بس فيه فرق كبير بشخصياتهم... الله يهديك ياسعود....

"ميار بمياعه": بنات خلونا نغني..

"معيضه بأستياء وهي ماسكه كتابها وتجلس": الظاهر إنكم على برودكم وراحة بالكم بتحصلون نسب عاليه بالتسعينات وأنا اللي راح أكلها بالسبعينات بعد مو أعلى من كذا...

روايه: والله إنك صادقه_ تدرين مع إني جالسه وأتسمع لسوالفهم إلا أن بالي مشغول بالأمتحانات وشايله هم.. مدري ليه عكس باردات الأعصاب هذولا..

"ميار وهي تلعب بخصلات شعرها بدلع": إحنا نذاكر ونتعب بالبيت لكن لما نجي للمدرسه نرمي الدراسه ورانا_بس نبي نسولف ونضحك ونرقص..

"درر وهي تغني وتطبل على باب المعمل والبنات يصفقون بحماس كأنهم طقاقات": (كل الإيزي كلهم.. لافرق الله شملهم.. يازين ميور بينهم.. عاشت حرم لزيز عاشت)..

"سحايب وهي تلتفت على راويه اللي ساكته وماده البوز": خلاص راويه خليك إيزي وأستانسي معنا.. إنتي بكذا بتخربين شعار الشله.. خلي الدراسه تولي وإنسي..

راويه: شلون أستانس وأنا ماحليت عدل..

سحايب: أوووووه يابيخك ترى أزعل منك اللي يسمعك يقول كلنا حلينا عدل_ ترى إحنا يالشله (ضايعات) بالإنجليزي ماعدا ثلجه مكتسبه اللغه من عمها..

"درر وميار خربوها وجلسوا يغنون بصوت عالي (معجبه) ويطبلون على باب المعمل وأغلب البنات بالساحه ألتفتوا يناظرونهم"..

درر: ( حد يأولو_ إني بحبوا الحب دا كلو.. حد يحنن ألبو عليا أنا مكسوفه أروح لوا وألوا.. معجبه مغرمه )..
ميار: ( أيوه خطفني بسحر جمالوا.. شوإي باين لو وعيني أيلالو.. خايفه ماكونشي أنا اللي فبالو.. بعد دا كلو....)

"سميه وهي تكتم ضحكتها": فضحتونا أسكتوا خلاص ترى كل البنات بالساحه يناظرون فيكم..

درر: خليهم يشوفونا ويسمعونا أبي كل الناس تدري إني أحب علياء..

"ميريام وهي تضحك": علي صار علياء هههههههههههههههه

درر: خبرك يعني عشان السمعه بالمدرسه..

ميار: اه متى تخلص الإمتحانات عشان أطير ل (لزيز)..؟
درر: اه متى تخلص الأمتحانات عشان أشوف علي بأي مكان وزمان المهم أشوفه..!!

"أخذت سحايب دفتر الصراحه وفتحت على صفحه وكتبت"..
( أكبر جريمه ترتكبها في حق نفسك,,
حين تحلم بشيء أنت أدرى الناس أنه لن يكون لك يوما..
وتستمر في طريقك بإصرار مميت,,
وأنت أعلم الناس أن الطريق لن يوصلك إلا إلى جدار تستند عليه وتبكي حلمك عجزا..)...

"قرأت سميه اللي كتبته سحايب وهي مبتسمه... وكتبت"..
(إحساس مر..
أن تحمل في داخلك إحساس غير مكتمل النمو <واقعيا>..
وتصر على الإحتفاظ به وبرغم قناعتك أنه ولو ولد يوما...
<<فسوف يولد ميتا>>..

"أخذت ميريام الدفتر من سميه وقرأت الكلام مع درر وميار"...
درر: الله يستر من جرائمكم وأحاسيسكم.. ليه كل هالتشاؤم ؟
سميه: بالعكس هذا الواقع؟
ميار: الواقع إننا ندفن مشاعرنا ونحرمها من الأحاسيس الحلوه يابتاع علم النفس؟..
سميه: أنتم تحبون بخوف!!
ميريام: ياعيني ياخوف_ أبتدت الفلسفه..
سميه: إنتي ياميار تحبين يزيد من سنوات وهو ولا درى عنك,., مع ذلك إنتي مصره تحافظين على هالحب وبنفس الوقت خايفه تقدمين على أي خطوه ممكن تضر بسمعتك وبكرامتك..
ميار: ............
سميه: وإنتي يادرر حبيتي علي مجرد إنك سمعتي عنه,., وعلى قولتك (الأذن تعشق قبل العين أحيانا) وتحطمتي فيه زياده لما شفتي صوره له بزواج أخوك.. وصرتي تهذرين فيه صار علي أهم من كل شيء بالنسبه لك.... وبعدين؟ لا إنتي اللي حكمتي عقلك وتخلصتي من إهتمامك الزايد فيه وهو مادرى عنك!! ولا إنتي اللي حاولتي تحولين حلمك لواقع بأي طريقه..
درر: يعني وش أسوي تبيني أروح لأهلي وأقولهم "زوجوني علي وإلا أنتحر".. إيزي إيزي تطنيش..
سميه: حيرتيني معك حددي بالضبط وش يعني لك علي؟

"درر بهدوء": يعني لي (اللحظه)..

"أنفجرت ميريام بالضحك وهي تطيح على سحايب": حركات (لحظه) صايره تقطين درر يادرر الظاهر تأثرتي بفيلسوفة الشله سميه ههههههههههههههههههه
درر: قصدي إني أحب أعيش (إحساس الحب) لفتره عشان أغير من روتين حياتي,.,
أجرب كيف البنات يفكرون ويهيمون ويسرحون بالأغاني والأشعار ويهتمون بالشخص اللي يحبونه بس.. ومع ذلك لو طار مني راح ألاقي غيره وأنساه..
سحايب: طيب لما يطير على قولتك ماتوقفين على (أطلال) هذا الحب وتسترجعين الأحاسيس والأشعار والأغاني اللي تذكرك فيه..
"أبتسمت درر بأنكسار": فعلا هذا أكثر شيء يأثر فيني ويحسسني بأني خسرت شيء ثمين وغالي ولو ماكان بذاك الأهميه..
ميريام: خطييييييره ياسحايب الظاهر إنك مجربه من ورانا الأطلال..
سحايب: لا مجربه ولا أبي أجرب بس أنا متأثره بالمسلسلات شوي..
درر: سبحان الله الإنسان ممكن يهرب من كل شي إلا الذكريات الحلوه والمره..
سميه: وإنتي ياميار ماقلتي لي وش يعني لك يزيد؟

ميار: (طفوله)..

ميريام: خلصنا من اللحظه جتنا الطفوله... كملي . .
ميار: ماأدري ليه أحس نفسي طفله لما أكون قريبه من يزيد_أرجع سنين لورا.. أنتم تشوفوني قدامكم إيزي(قالتها وهي تضحك) بس لما أكون مع عذاري أو خوالي"وجابوا سيرة يزيد" أنواع البرود والتبلد والخجل والهدوء_ أصير ميار ثانيه مو نفس اللي قدامكم الحين..
سحايب: وإذا طار يزيد؟
"ميار بضيق": لا والله إذا طار مني أطق وأموت.. أحس لو راح مني مافيه شيء بهالدنيا يسوى إني أعيش عشانه..
سحايب: هذا وهو مادرى عنك كذا أحساسك أجل كيف لو حبك وتحطم فيك..؟
"ميار وهي تتنهد وتاخذ دفتر الصراحه": اه تعودت على حالي كذا وصار يخونني التفكير لما أتخيله يحبني بس أحب أفضفض بالأشعار......

"راويه وتحاول تغير الموضوع": بنات وش راح تسوون بالإجازه؟
معيضه: قصدك بكره..؟
راويه: لأ_ الإجازه الطويله..
معيضه: ياه إنتي تحكين عن الإجازه وكأنها بكره مو الثلاثاء الجاي..
ميريام: أنا راح أطلع مع أهلي لمخيمنا..
درر: وأنا أبطلع للبر مع أهلي وعمامي بعد.. وحشني الدباب والمطر..
ميار: أنا بسافر للشرقيه.. وحشني لزيز هههههههههه..
سحايب: أنا راح أنطق وأقعد بالبيت ومالي إلا كنوده..
سميه: وأنا حالي من حال سحايب بس ماعندي كنوده..
معيضه: وأنا بالبيت وشكلي راح أنجن من كثر تفكيري بالنتيجه..
"راويه وهي تمزح": خلاص أكتمل العدد بقى أحد ماقالنا وش راح يسوي بالأجازه؟ ماعليه بنات أنا سألتكم هذا السؤال عشان أعور قلوبكم وأقولكم بكل حزن وأسى أن باقي لنا أربع (هموم) قبل الإجازه وأنسوا الإجازه وخليكم إيزي مع الدراسهok.. هعهعهعهعهعهع

"ضحكوا البنات وهم يضربونها_ وميار سرحت تكتب بدفتر الصراحه.. وكانت هذي مشاعرها"...

*[... كان ياما كان...
والقلب العليل اللي بصدري لالمح زولك_خفق خفقه عن الباقي
غريبه..!
تنتشي عيني فرح بك وإنت عن حالي ماتدري,,
حتى أنا مدري
ولكن؟
أشعر لطلتك "هيبه"..
وأتعلق بك عيوني لين أشوف الزول يسري
وأقول:
"ياربي تجيبه"..!
فزتي لك طيش,,
مدري حب,,
مدري حس فطري,,
بس الأكيد إنك نهبت القلب من جوفي نهيبه..
يعني وش أكثر من أني لالمحتك (فز عمري)
وصار يوم اللي أشوفك (عيد) عندي,, وأحتفي به..
يوم أشوفك أحفظ التاريخ ميلادي وهجري..
وأرسم لعين المحبه"قلب" به سهم يصيبه..
وأتهجى كلمة: (أ ح ب ك) وأغنيها بشعري وأكتبك بين القوافي.. وأتسمى لك "حبيبه"..
من كثر ماأسعى لوصالك أذكر إنه كان نذري;_
"لو يجي,, والله لأجي لين أصير أقرب قريبه".....]*

وووووبس "هذا اللي حافظته من القصيده وأدعو إن الله يجيب لي لزيز"....

<<<<<<<<<<<<<>>>>>>>>>>>>>

**لحن آلأمل** · 30-08-2011, 02:13 AM

(( أنتهت فترة الأختبارات كانت الإجازه راحه للشله بعد الأسبوعين اللي مرت عليهم وتعبوا فيها من هم ونكد المذاكره.. اللي سافرت فيها واللي أستغلته بزياره لقرايبها.. واللي أستقبلت فيه ضيوف صارلها زمان ماألتقت فيهم.. واللي كشتت للبر لمخيماتهم))..

يوم الثلاثاء...‎
‏(‏11/30)

دخلت لغرفة النوم وهي تطقطق بنعالها الكعب شغلت النور وهي ترمي العبايه على الشماعه بدون إهتمام..

"قالت بصوت عالي وهي ترفع اللحاف": قووووومي
ماشبعتي نوم يالخايسه!!

"فتحت عيونها بتثاقل":
مييييين... أوووووووووه...
عذاري..

عذاري: إيه عذاري يالقاطعه...

"حضنتها ميار وهي على وشك تصيح": أشتقتلك والله وحشتيني موت موت..

عذاري: واضح والدليل إتصالاتك اللي أحرقت موبايلي..

ميار: وغلاتك انشغلت بالإمتحانات وأنتي تدرين إني حريصه أجيب نسبه عاليه.. حتى أبوي وأخواني ماأشوفهم كثير 24 ساعه قاعده أذاكر واليوم خلصت إمتحانات وأرتحت..
وكنت ناويه أزورك اليوم وأسويها لك مفاجأه بس أنتي سبقتيني..

عذاري: o.k‏ سامحتك ياقلبي أزعل على الكل بس ماأزعل منك ..
أنا أنتظرك بالصاله لما تغسلين وتبدلين ملابسك_

قعدت عذاري مع عمتها بالصاله وأخذتهم السوالف..
بدلت ميار ولبست بنطلون بني مقلم مع "تونيك" من الحرير باللون البيج أختارت صندل لونه بيج متناسق مع أناقتها..
دخلت على عذاري وأمها بالصاله..

عذاري: عدل هذي ميار اللي أعرفها كشخه وأنيقه مو قبل شوي لابسه بيجامه والشعر محوس والوجه رايح فيها..ههههههههههههههههههه

"ميار بدلع": الحلو حلو حتى لو.....'

"تقاطعها أمها": عن الغرور وقومي بواجب الضيافه لبنت خالك ترى من زمان مازارتنا.. أنا بروح أعزي جارتنا بوفاة أبوها.. خذي راحتك يمه عذاري البيت بيتك عن أذنك..

>>>>>> صرخه قويه:-
شخبار يزيد ....؟!

ميار: تسأليني أنا؟ ماأدري عنه إنتي شفتيه بالشرقيه..

عذاري: ميار لا تستخفين بعقلي يعني لما جاء مع عمتي للرياض وجلس يومين ماصار
بينكم شيء!!

"ميار تتنهد": عادي مثل ماجاء راح.. ماشفته ابدا وكنت مشغوله أحضر وأذاكر للأمتحانات أصلا نسيت أنه موجود..
ياشيخه خلاص أحس بديت أيأس منه وفقدت الأمل خلاص..

"صرخت عذاري": ليييييييييييه كل هالتشاؤم لسه عندك فرص كثيره أنتي بتسافرين بكره للشرقيه وبتكونين قريبه منه ولا تنسين أننا بنسكن في بيت خالتي أم يزيد ومستحيل ماتصير لك مواقف وأكشنات معه ..

"تكمل بحماس" نبغى نفلها مع لولوه ومرام سهرات للفجر وطلعات للسوق والكورنيش وكشتات للبر.. أنا باخر سفره للشرقيه مع أبوي ماكان ودي أرجع وناسه تمنيتك معي ..

ميار: قولي لي وش أكثر شيء عجبك وفرحك بسفرتك الأخيره؟!..

عذاري: أممممممم أكثر شيء؟ أقولك بصراحه وبدون ماتتضايقي وتزعلي..

ميار: أحكي بسرعه لاتعلقيني كذا..

عذاري: (يزيد)..!!!

"ميار وهي تحط أيدها على خصرها": نعم؟ وش فيه يزيد..؟

عذاري: أنا وش قلت لك.. بدون زعل..

"ميار وهي تضحك": أمزح معك_ يالله كملي كلامك..

عذاري: بصراحه ميار أكتشفت أن يزيد شخصيته توب.. الكل يحبه ويحترمه لدرجه ماتتصوريها.. إنسان هادي جدا وطيب وحنون ودمه خفيف مره بس إنه غامض وكتوم يعني مايتكلم عن نفسه ابدا و شوي عصبي هذا عيبه الوحيد..

"أبتسمت ميار وهي تتنهد وتسند راسها للجدار": اللي يحب ياعذاري مستحيل يشوف عيوب محبوبه.. صدقيني ما أبالغ لو قلت لك أن حتى (عصبيته) تحببني فيه أكثر وأكثر وأكثر.......

عذاري: مجنونه أنتي.. لو شفتيه كيف يعصب على خواته تكرهين الساعه اللي حبيتي فيها يزيد.. صرخته بس كفيله إنها تعيشك برعب أسبوع كامل.. أسأليني أنا مجربه...

ميار: ياخايسه.. من شوي وإنتي تمدحينه بسرعه غيرتي رأيك فيه..

"عذاري وهي تضحك": أنا أتكلم عن السلبيات والإيجابيات في شخصيته..

ميار: خلينا في الإيجابيات أحسن..

"عذاري وهي تحط أيدها على خدها": أمممم.. أخذنا بسيارته للسوق أنا ولولوه ومرام بعد وصولي للشرقيه بيومين وانتي تدرين أن عشقي للshopping‏ ماله حدود..ووووو حضرت زواج ناس من قرايب عمتي هناك.. رقصت لما تعبت كانت الطقاقه مره روعه..

ميار: أكيد أعجبتي العجايز وقهرتي البنات بجمالك وأناقتك بالزواج صح..

عذاري: هههههههههههههههه..

ميار: كم وحده طلبت رقمك؟ أكيد الطلبات لا تعد ولا تحصى..

عذاري: مرام ولولوه يتريقون يقولون لي; والله صرتي هيفاء وهبي..

ميار: وتغطين عليها بعد..

عذاري: هههههههههههههههه يالله عاد قومي ضيفيني صار لي ساعه قاعده أبي أتحلى..

£££££££££££££££££££££££££££

الساعة 8 بالليل صحت سحايب من النوم على صوت ياسر وهو يناديها فتحت عيونها ببط وقامت ببط أكثر وفتحت باب غرفتها لقت ياسر واقف وشافت تعابير وجهه وكأنه معصب..!

ياسر: سحايب.. ترى كنوده أزعجتنا صار لها ساعه واقفه على السلم تنادي وتضحك مثل (الهبله) روحي شوفي وش تبي وقولي لها لاعاد توقف كذا وإلا تراي بعلم فواز عليها..

سحايب: حرام عليك لاتقول عنها هبله ترى تزعل لو عرفت أنك حكيت عنها بالطريقه هذي.. وبعدين كان قلت لها إني نايمه بدل ماتتركها تناديني..

ياسر: أما عاد ذي! تبيني أنا أقولها.. لا عيب ما يصلح..

سحايب: طيب خلاص أنا بقولها.. بس ماقلت لي وش عندك كاشخ وين بتروح؟

ياسر: معزوم على العشاء عند زوج هاجر تبين شي قبل ماأروح؟

سحايب: لأ سلامتك..

"طلع ياسر وراحت سحايب لشباك الصاله لقت كنوده حاطه أيدها على خدها وتنتظر بملل"..

كنوده: هلا والله وأخيرا مابغيتي تصحين؟

سحايب: أهلين يا مزعجه
ما أختفى صوتك وإنتي تنادين؟

كنوده: وش أسوي محد يرد علي مع أن لمبات البيت كلها شغاله.. يعني فيه أوادم موجودين!!

سحايب: أودام..! الله يرحم حالك.. تعالي عندي أنا بالبيت لحالي_ أمي راحت عند خالتي وياسر راح لبيت هاجر لأن زوجها عازمه عالعشاء..

كنوده: على طاري ياسر صحيح الخبر اللي سمعته إنه فصل من شغله..؟

سحايب: والله إنك قديمه توك تعرفين إنه فصل..

كنوده: أدري من الأسبوع اللي فات خبرني أخوي فواز .. بس وش السبب؟

سحايب: بسبب النصر.. سالفه طويله عريضه تعالي عندي وأقولها لك..

"كنوده بإنفعال": أيييييييش..أخوك هذا لمتى بيظل عقله عقل بزران مباريات وتشجيع وخرابيط!! لا يكون إذا تزوجنا بيقلب حياتنا (أصفر بأصفر) وينحر عياله إذا شجعوا الهلال.. لا هذا الوضع ماينسكت عنه ابدا.. خلاص أنا هونت ماعاد أبيه..

سحايب: تكفييييييين عاد
لو تسمعين وش قال عنك قبل شوي تكرهين نفسك..

كنوده: أنا من زمان أكره نفسي بس أبعرف وش قال عني ياسر عشان أكرهها زياده هههههههههههههههههه..

سحايب: تعالي بس من زمان عنك وإذا جيتي بقولك ياسر وش قال عنك..

كنوده: o.K‏ بس جهزي القهوه والشاي والحلا..

/////////////////////////////////////////////////////

دخلت كنوده وهي تمشي على أطراف أصابعها.. حصلت سحايب سرحانه وتنتظرها..
:بوووووووووه..

سحايب: بسم الله!! خرعتيني..

"كنوده وهي تحضن سحايب": وحشتيني..

سحايب : ياحياتي ياكنوده أشتقت لك موت...

"كنوده وهي تجلس": شخبار أمتحاناتك صار لي زمان عنك..

سحايب: تمام الحمدلله..توك تسألين عن أمتحاناتي مو من شوي تصارخين وتخانقين..

"كنوده وهي تضحك": هذي ضريبة الجيره هههههههههههه..

"سحايب وهي تتنهد": خايفه من الجغرافيا ياكنوده أحس ماحليت فيه زين..

كنوده: إنتي داهيه.. من يومك وإنتي صعب وماحليت وبالأخير الدرجه كامله..

سحايب: بسم الله علي.. وبعدين معيضه هي الداهيه مو أنا!

كنوده: معيضه حاله أستثنائيه أتذكرها من أيام المتوسطه كأنها (فلسطينيه) عليها عقليه دراسيه مو طبيعيه.. أبسألك هي للحين بس تتحلطم وتدعي عالمدرسات بالأمتحانات..؟

سحايب:ههههههههههه أيوه.. أحنا يالشله دايم نناديها
"ماحلتش"...!

كنوده: المهم قولي لي ياسر وش قال عني؟

"سحايب بتردد": أخاف تنجرح مشاعرك مع أني أشك أن عندك مشاعر زي الناس..

"أنفجرت كنوده بالضحك": هههههههههههههههه لا تخافين قلبي قوي متعود على الصدمات..

"كنوده وهي تغني موال عراقي" . .
[اويله.. ياويلي ياويلي ياويلي معود على الصدعات قلبي.. أقول وقد ناحت بقربي حمامة.........]..

"تقاطعها سحايب وهي تصفق": أيووووووه حيوا أبو الشباب حيوه .. ههههههههههه على هالموال كسرتي خاطري.. لألأ ترى ياسر كان يمدحك مره هههههههههههههه

كنوده: مطر صيف يمدحني!

"صرخت سحايب وهي تمسك ثوب كنوده بقوه": مين هذا مطر؟؟ أعترفي ترى مافيه مجال تنكرين..

"كنوده أنسدحت على الأرض وهي ماسكه بطنها من الضحك"..

"سحايب بنظرات حاده": متى تعرفتي عليه أكيد بالسوق وإلا ب.....

كنوده: هذي كلمه تنقال يعني شيء مستحيل.. ههههههههههه

سحايب: هأهأ.. أدري بس كنت بستفزك شوي..

كنوده: على طاري السوق رحت الأسبوع اللي فات مع بنات عمي نحضر أفتتاح سوق(.....) مع السايق شبعت ضحك وجيت..

سحايب: أخبر الناس تروح للسوق تتسوق ماتضحك أكيد إنك مسويه شي غلط..

"كنوده تسولف بحماس":
تمشينا بالسوق وما أشترينا ولا شي لأن الأسعار خياليه..
وقفت أنا وبنت عمي عند كشك الذره ومر من جنبي شاب كاشخ عالاخر ويمشي بهدوء وبرزه ((يعني شوفوني)) وأنا تعرفين عاد غير ياسر ما يملى عيني..

"سحايب وهي تضحك": وياسر اخر بنت بهالدنيا يفكر يحبها ويتزوجها إنتي..كملي السالفه وبعدين..؟؟

"ضربت كنوده سحايب كف على وجهها": والله المنه عليه لو وافقت أتزوجه يحمد ربه إنه بيتزوج هنادي..

"سحايب وهي حاطه إيدها على خدها": اي يادفشه!! الله ياخذك.. ليه تضربيني..؟

كنوده: هههههههههه تعورتي؟ عادي ترى أنا هذا أسلوبي مع أخواني الصغار حتى مع فواز...

سحايب: أمحق أسلوب.. كملي سالفتك وكف ثاني تطلعين برا فاهمه..

كنوده: ok ههههههههههههههه
لما مر من قدامي أنا وبنت عمي_مديت له طرف رجلي بس,, وبلمح البصر تعثر وتمايل والناس يناظرون فيه.. واللي أبتسم واللي صد عنه عشان مايحرجه والبزران يأشرون عليه ويضحكون على بالهم أفلام كرتون..! ههههههههههههههههههههههههه
وانا أضحك بصوت عالي شكله نكته لما تعثر..
وقف وهو يناظر فيني وعيونه بتطلع من مكانها من الصدمه يحسبني(مجنونه)!!
نزل العقال من راسه يبي يعدل شماغه وأنا خايفه أحسبه بيضربني سحبت يد بنت عمي وهربت داخل المحل اللي قدام الكشك...

"سحايب وهي حاطه أيدها على راسها": مجنووووووونه!!! ليه سويتي كذا فيه حرام عليك..

"تكمل كنوده وهي مازالت تضحك": وأحنا ماشيين لسيارتنا بنطلع مرينا من جنب بوابه وكان حارس الأمن يقفل البوابه بالسلسله وكان فيه ثلاث شباب في سيارتهم يبغون يدخلون بس هو رفض.. مشى الرجال بطريقه لداخل السوق وشوي يسمع صوت السلسله تضرب بالارض بقوه..

>> أنا فتحت البوابه للشباب وهم مبسوطين ويضحكون علي_ ألتفت علي وهو يركض للبوابه ويصرخ
"يابنت"..
أنا حطيت رجلي وهربت لسيارتنا ماأدري وش صار.. بس قالوا لي بنات عمي أنه تخانق مع الشباب وهو يدعي علي ..! ياويلي ههههههههههههههههههههه
سحايب: وربي مانتي صاحيه إنتي فضيعه,,عليك حركات مجنونه!! متى بتعقلين؟
كنوده: مطر صيف..ههههههههههههههههههههههه

""""''""""""""''"""""""""""""

أطلالي ملت وقوفي ! (روايه عن شله مراهقات) مرة روعه

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget