الشعر أمانة


ياصاحبي واللي ورى ضيقة البال
له يمكن أكثر من سنه في مكانه

أزريت لاقوله وهو صعب ينقال
والأصعب اكثر لو تركته وشانه

الصمت وافي لكن المشكله طال
وأن طول اكثر بأعتبرها خيانه

الى متى وأنا على نفس هالحال
ان جاد صوتي قلت ماهوب أوانه!

مليت اداري خطر الناس الأزوال
حتى ملت صدري جروح الميانه

ياصاحبي كم لي وأنا ودي أحتال
على همومي لكن ! (الشعر أمانه)

ألقاه غير إذا تساون الاقوال
ويلقاني الضلع ان سعوا في طمانه

اذا كتبته أشعر ان التعب زال
واذا قراني نال قدر ومكانه

وانا التعب فيني من الجال للجال
يكبر ويبقى طيشه وعنفوانه

هذي سنه وأنا مجاهيم الأنذال
تدك صدري , بين جهل ولعانه

ياقلهم وقت الشدايد والأهوال
وياكثرهم وقت الرخا والليانه

رح قلهم ياصاحبي طيب الفال :
(عن الشجاع اللي يورد حصانه)

وعن سيفه الساطي وحده ليا مال
ماضي ولكن من يسله عشانه !!؟

وأطيبهم اللي لا غدت صلف وثقال
حملي على متني ..وحمله وزانه

ياصاحبي صبرك علي تو لا زال
عندي كلام وودي أطلق عنانه

تبي تعرف اللي ورى ضيقة البال
اللي له أكثر من سنه في مكانه

عان الشجر طايح ولا حولي ظلال
الا ظلالي يقهر الشمس شانه !

والأرض ضاقت وأنكرت وجه رجال
غريب وأكثر غربته من زمانه

الازرق


يالفاتنه, يالطاهره , يالاصيله
يالناعمه , يالهاديه , يالخجوله

يالظامره , يالراويه , يالطويله
يالناعسه , ياأم الرموش الكسوله

يالمقبله صبح تعب منه ../ ليله
يالمقفيه ليل يعيبه ../ خموله

تمشين , أقول ان الوطا فيه "ميله"
واذا وقفتي , قلت "منهو يقوله؟!"

وجهك يسولف عن كثيره ../ قليله
والقل فاضح للاوادم فضوله!!

اذا تكلمتي أعدك بخيله
حتى كلامك مايجي بالسهوله!

ولا حروفك مالها فيك .. حيله
تمر شفتك وتطيح "مهبوله"

اذا تبسمتي بروق المخيله
تعب يدرسها الزمان ل.. فصوله

ضحكتك سيل وفي عروقي مسيله
يالله لا تحرم فياضي وصوله

والأزرق اللي فوق جسمك يشيله
وده يسولف عن هناه وذهوله

كنه (سماء) لولا شجره ونخيله!
كنه (بحر) وانتي محاره ولوله

فيك الطباع الطاهرات , الفضيله
فيك الصفات المغويات , المهوله!!

أحيان , اشوفك كايده مستحيله
واحيان , أشوفك مقبله لي عجوله

الله يسماح طلتك يالأصيله
لا قلت شيء ولا تمنيت أقوله

نفس الجرح والليلة


حسبي على الشعر نوب و نوب حسبي له
نوب يخفف علي ونوب يجرحني

عساني اخطي رداه وهزله وميله
واصيب شيء ليا قلته يربحني

والله يسامح خطاه وسوء تأويله
وانا على زلتي ربي يسامحني

الناس كل على همه يغني له
وغنيت ل.. أصغر همومي وانكسر لحني

ياصاحبي صاحبك كثرت غرابيله
ولا به الا انت يشعربي ويلمحني

وين انت يا أطهر من الغيم وهماليله
ياللي ليا مر لك طاري يفرحني

جاد بك كف الزمان وشح من ليله
شف كيف الايام ماتبغى تريحني!!

وشلون ابنساه وانا اصغر تفاصيله
تسر حالي ولو حال الزمن محني

صوته , وضحكه , حور عينه , مظاليله
صباح وجهه , عسى وجهه يصبحني

ربكة يدينه , شذى عطره , ومنديله
برأته , طيشه ان حاول يمازحني

اجيه , و أوقف , و أروح ألقاني أجي له
وأضيق , و أرضى , ولا ادري من مصالحني

ادل كل الدروب اللي تودي له
وتردني عزتي والشوق ذابحني

ياكثر حزني عليه وكبر حبي له
وياطول صبري وانا اللي صدق جارحني

ياطهر من الغيم وأعذب من هماليله
ياللي ليا مر لك طاري يفرحني

أخطيت انا وانت , نفس (الجرح والليله)
وسامحك قلبي وعيا لا يسامحني!!!!

أماكنا القديمه


بعض الكلام يحق له يجرح الصمت
والبعض الاخر مايبرر ظهوري

اغيب لكن لا حضرت وتكلمت
داريت شرهة غيبتي في حضوري

أنا الذي عن منة أنوارهم شمت
حي الظلام أن كان شحوا ب.. نوري

اما انت ياللي في غيابك تعلمت
اهل ضعفي من سحابة غروري

ان قلت أحبك أشعر إني تقدمت
على الزمان اللي (حرمني) سروري

يابو جروحي كلها [لو تكرمت>
تشرح لهم "حلمي" و "حملي" و "دوري"

ولا انت يكفيني معك كل ما همت
لا قلت: حورك !! , قلت: قلبي وحوري!

ولا ليا ضاقت علي وتجهمت
ضحكتك تعطيني [منافذ عبوري>

المشكله ../ دام الشقا وأنت مادمت
إلين كثرت في عيوني , قبوري!!

مريت أماكنا القديمه وسلمت
مريت لكن مادرت عن مروري

والله ياني في غيابك تعلمت
حتى حضورك , مرتبط به حضوري

مافات مات


ساكت وأنا في داخلي زحمة أصوات
هادي وأنا هوج العواصف بعيني !!

يالشعر أنا ضاقت علي المساحات
كل الدروب لكل ( تيه) تهديني !

لله ياشعري ولو بعض الأبيات
أنا تعبت من التعب ياعويني

من كثر مافيني من الحزن مرات
أحس حتى اللي ( معي) مايبيني

ما فات مات ( العفو) مافات /مامات
مافات كله عايش بخير فيني

ولا وش اللي حدني بعض الاوقات
أرمي على راحة يديني ...جبيني ؟!

وش فيك ساكت ؟؟ ماورى هذي سكات
عجل علي ...قصايدي تحتريني

خذني لهن (واحد) غدى كله شتات
من سهد عيني لإرتجافة يديني

مشتاق أرددهن من الذات للذات
وأحكي لهن وأحكي بهن و أحتويني

ولا الأكيد إني رغم كل مافات
عجزت لا ألقى لي (كلام) يحكيني

فهد


يا "فهد" من شفت زولك بينهم روح خيالي
يقطع بحور الزمان الاولي عرضه وطوله

قمت اهوجس واتذكر طيشنا ذيك الليالي
يوم كنا صغار تحكمنا براءات الطفوله

يوم كان اقصى طموح لنا نروح ل.. بيت خالي
وكيف كنا ننتهي من واجب (الخط وأصوله)

اذكرك , يومك تجيني كنت انا جالس لحالي
واتفقد جيب ثوبي وألعن الفقر وفضوله

يوم شفتك هل دمعي (يافهد دور ريالي!!)
وأنت تمسح دمعتي ب.. إيديك وأحساس الرجوله

تقطع ريالك تقول (أمسك ولاتبكي قبالي)
وكننا من بعد هذا كل مانبغى , ننوله

وأذكرك , يوم انت تلبس غترتي ولا عقالي
ثم تجلس في مكان ابوي وعيوني ذهوله

والله انك يا "فهد" في وقتها شكلك خيالي
والله انك كل مالديت , اقول الزول زوله

يافهد والخمسه وعشرين مرت ياظلالي
قدر الله والسنين ب.. طبعها دايم عجوله

يا "فهد" وانت الوحيد اللي يعرف ان ضاق بالي
قبل ماأشكي قبل ما دمعي يبادر في هطوله

يا "فهد" وان شفت دمعي يوم عرسك لا تبالي
كل مافي الامر فرح ماقدرت انطق واقوله !!

بلادي


بح صوتي ... وأنا أصوت لك وأنادي
يابلادي ....ودي أكتب عن بلادي

قال من فينا بلادك يامحمد
أسألك باللي ذكر: ( قل ياعبادي ..)؟

وأبتديت أذكر (علم) داري وأخيله
فالسما وإن شاغبته الريح هادي

مايلام إن ماتأثر بالعواصف
لان كله (عزه) و ( صدق ) و ( مبادي (

وأتذكر كل شبر في ثراها
وكل( ضلع) وكل( خد) وكل( وادي(

والبياض اللي طغى في كل أهلها
فالقلوب وفالوجيه والأيادي

وأتذكر وجه) أبو متعب) و ( دمعه(
كيف سال لحزن طفل إنسان عادي!!

وكيف خلانا بدل ( شعب ) و ( قياده(
تحت ظله كلنا ( شعب قيادي(

وكيف كنت أحن فالغربه لداري
وكيف أعاف ف بعدها شربي و زادي

ماشعرت إلا وأنا (أقبل ) ترابك
يالسعوديه وأصوت لك وأنادي

يابعد كل البلاد ومن سكنها
يابلادي يابلادي .....يابلادي.

السهر


هب السهر وأنا على حروة نعاس
وأشعلت ضوي للسهر ياحروفي

إن زارني شعري مع الليل لا باس
أهم ماعندي كرامة ضيوفي

قل للشعر ماينحني للشعر راس
يقوله اللي لا عطا عهد يوفي

أنا رجاه اذا غديتو له الياس
لا تاقفون اذا لمحتوا وقوفي !!

ياللي وصالك غيث وفراقك يباس
أبطى سحابك عن صحاري كفوفي

ليتك تجي وتشوف جرحك على ساس
لاطاح حملك ماتعاتب كتوفي

جرحك على خبرك ورى حدب الاقواس
وأنا على خبري ظروفي ظروفي !!

على كثر مامر شوفي من الناس
أكذب عليك إذا تجاهلت خوفي ...

أخاف من موت الحكي بين الانفاس
من غيبتك يا أعز من مر شوفي

الضيف


الضيق ضيف زارني مادعيته
كنه غمرني في وفاه وغمرته

وان ماعمرت من اصدق الشعر بيته
ولا سكت ولا غلطت ودمرته

جرحي وله مني صبرت ورضيته
وحزن ملى عيني لعينه ذخرته

الوقت تمدح هرجة الناس صيته
وانا ماشوف الا تجهم غبرته!!

ليته تجمل فأول العمر ليته
أن كان يمديني رضيت وشكرته

كم قلت لي شيء وانا مابغيته
وكم شيء ابيه ولا قويت وذكرته

الا غرامك لا سرحت ولقيته
في درب بالي دون ماشعر نثرته

على الورق يمكن لو انك قريته
تدري عن اللي في غيابك شعرته

جفني على جمر السهر كم حديته
وقلبي على رمضا الرجا كم جبرته

واذا سهيت ومال دمع كنيته
صديت عنه وقبل الومه عذرته

كل عرف جرحك وانا ماحكيته
اخاف اقوله واعتبرني هجرته

خله بقلبي كل ماضقت جيته
ولا متى ماجيت فالبال زرته

الى هنا قلي وش اللي نسيته
عن حال حالي في جفاك وخبرته

الى هنا ماقلت شيء بغيته
واللي تعبت ولا قويت وذكرته

علم يخايلني وانا ماسقيته
أخاف يظهر ونتقاسم ثمرته

غيابي


البارح القلب يكتب والسهر يقرا
و الليل دفتر عجز يستوعب عتابي

قلت انقض الجرح واجعل سيرته مسرى
مليت اروح بقصيد مابعد جاء بي !!

حنيت لك يالغرام العذب وانت ادرى
ياأغلى وأجمل واعز واطهر احبابي

يامرحبا وان لفيت وصادفك غدرا
عزاي بانك تميزني عن القابي

من غبت والناس كن نفوسهم قشرا
أشواهم اللي كسر روحي وهلابي

الجرح يبرى لو ان الوقت ...مايبرى
شف وقتي اللي خذلني ويش سوى بي !!

ماقلت لك بأجعل من السالفه مسرى
لك يالقصيد الصدوق رضاي وإعجابي

أكتبك سيل(ن) يجي له فالورق مجرى
واذا كتبتك ...نبت فالطرس غيابي

تدري بلاش ...اكتبك ...والناس ماتقرا
يكفيني انك مقربني من أحبابي