رد: ديوان الشاعر عبدالكريم الجباري




مابين ابو بكر وعثمان وعلي
رحماك ياربي ورب العالمين
يالواحد الوالي ولاغيرك ولي
ياحافظ حقوق العباد الطايعين
يامفرجن كربي وعرشك معتلي
خلقتنا نطفه ومن ماء مهين
من غير عفوك ماينجحني عملي
اخطيت واغفر لي وعينن يامعين
وادمح خطا ربعي وناسي واهلي
واسكني عند الخلفاء الراشدين
مابين ابو بكرن وعثمان وعلي
حنا بعفوك يا الاهي طامعين
والا القصيده نكتبه فيما يلي
ماهو بموجز واقعدي يالنشرتين
لاوالله الا شي يغليني غلي
شفت العجايب في بلاد الرافدين
وانا اتصفح بالجرايد بمهلي
واخذت افكربه وبالله استعين
بلوى ويالله انك تعين المبتلي
واخذت اناظر بالعرب والمسلمين
ناسن تسحبهم مثل سحب الطلي
واحذت اناظر من يسار ومن يمين
واخذت احسب من معي والي علي
بلاش اكمل كلبوكم فاهمين
محدن عن الاخبار بالعالم خلي
يالله ياربي تعين الصابرين
بلوى ويالله انك تعين المبتلي

رد: ديوان الشاعر عبدالكريم الجباري




مع السلامه
مع السلامه مابقا لك معي شين
كود الغلا لاتاخذه لو تكرمت
كانك تبي بالدين خذها على الدين
وكانك تبيها بالعقل .....?ماتندمت
لاني عرفت ان كلبونا مساكين
ياما على حالي وحالك ترحمت
فكر وشوف دروب قلبك على وين
وشفيك طالع طقتك... ماتعلمت؟
والله صافطلك وشفت الطريقين
ماني عدوك لو كذا ماتكلمت
يابوي ربي ماقسم بين الاثنين
وش حيلتي ياما وياما تعشمت
مبطي وانا من عام تسعه وتسعين
ايه اعترف عن شوف غيرك تلطمت
لا عاد لي قلبن ولاعاد لي عين
ايه اعترف والعام هذا تفهمت
حطيت نفسي بعدها بين قوسين
عرفت بأنه حلم لو ماتحلمت
نضحك على انفسنا واحبك وبعدين؟
لاعاد ترجع للورى ولاتقدمت
يابوي والله كلبونا مساكين
مع السلامه واتركن لو تكرمت

رد: ديوان الشاعر عبدالكريم الجباري




يقولون اللذي يهوى غرق واغتر بوهامه
عيونه تصدق النظره وعين الناس كذبها
يصير الزين في خله لزيم وثاني اتوامه
قمر يمشي محد يمه ديار الشين عاقبها
خفوق الي هوى شخصن عمى وانسد صمامه
عن اهروج الملا والنصح والفود وقرايبها
حقيقه قالها منهو يهيم بحب غرامه
تولع في وصوفن معجبن فيها ومعجبها
لقيته فارس احلامي لقاني فارس احلامه
لقيته نور هالدنيا لقاني من عجايبها
لقيته ريحت الدنيا لقاني اروع انسامه
لقيته فرحت الدنيا لقاني من طرايبها
لقيته اعذب اشعاري لقاني مبدع الهامه
لقيته من زلال الما لقاني من سحايبها
اقيس الوقت باللحظه اقيس وصرت رزنامه
احسب للقا وانتم تبوني ما اقاربها
لو الشيطان يتوظى يتوب ويعلن اسلامه
ولو الدنيا تهد الناس ثم تترك مصايبها
ولو ان المعتمر يسعى يطوف وتارك احرامه
واشوف القدس ماتبكي وفكت من حرايبها
بذاك الوقت كان امدى اجي واهزز الهامه
وابعد وابتعد وانظر متى تقفي ركايبها
حشى لله مستهزء يجل وتشكر انعامه
ولاكن اقصد العاذل ابي روحه يانبها
ابي يبعد ويتركني يرد اللحم لعظامه
ابي يبعد ويتركني خلاص الروح عذبها
يكسرلي مجاديفي واعيد واجمع احطامه
تعاندي عباد الله تناشبني واناشبها
اشوفه ورد ياعالم الا يازينه اللثامه
حبيبي عمري الغالي زهور الورد يجذبها
وصرت امن اللذي ناظر تفرج لعبة الدامه
يشوف اشياء ماتطري على من كان يلعبها

رد: ديوان الشاعر عبدالكريم الجباري

قام يطويني من فراق الحبيب طاوي
ويل من حده زمانه عن لقى محبوبه

اشهد ان الوقت وعيون البشر ماتاوي
كل ماتاصل لحد الغلا قفووبه

سامح الله الهنوف اللي بعدها ذاوي
ماقدرت القى حلاها نادره واعجوبه

خصرها كنك توصف دلة الضلماوي
بس فيها عروتين وماهي بمربوبه

لا لفت كن القمر يوم اكتماله ضاوي
كن من رقة قدمها للمشي مغصوبه

اه لا شفت العيون ولبسها البداوي
قلت يارب العباد المغفره والتوبه

لاحكت كنه مسولف لي أديب وراوي
بس زادتها دلع وهروجها بعذوبه

هرجها بين القصيم ولكنة الزلفاوي
كان ماهي منها حول المكان وصوبه

انا وين الله بلاني بالحلا الجهراوي
من ثلاث سنين عارضني ودوبي دوبه

مانلومه لاخسر راعي حلا الصيداوي
كل مانزل بضاعه كنها مضروبه

ذيك من شدة غلاها اشهد اني غاوي
يقطع الله الغلا ويقطعك يامندوبه

خص لا اطربني غناء ميادة الحناوي
كن مضمون القصايد يمها مكتوبه

من يلوم المنتظر والا يلوم الهاوي
كل ماهب الهوى طالت عليه دروبه

والقهر لاشفت مضنونك ولا إنت بقاوي
عزتك تطغي عليك وغلطتك محسوبه

رد: ديوان الشاعر عبدالكريم الجباري

لحظه .. بوادعك قبل إنك توادعني
ماني من اللي تروح ويمشي خلافك
لي عزة ياوليد الناس تمنعني
لوقلت .. مابيك تمزح .. خاطري عافك
قد قلتها لك قبل ماكنت تسمعني
واليوم فعلك هو اللي حطم أهدافك
يابن الأوادم نصيحه واخذها طعني
ماكل شخص يذل النفس لا شافك
صحيح زينك بعض أحيان شجعني
لكن زود الكرم زودت بسرافك
ماهوب أنا اللي تنزلني وترفعني
لو دريت في نيتك كسرت مجدافك
تبي الصراحه .. تصدد لا تطالعني
أخاف من دمعتك ولا أنت ماخافك
ماغير واحد .. ولا مخلوق ولعني
الحب يجرف ولا تختار جرافك
لو قلت لحد تحب.. وقال لك يعني
خله وبعد مادام الوقت ماطافك
أصارع النفس والدنيا تصارعني
والفرق واضح بمغرافي ومغرافك
ياخي ترى القلب عيا لا يطاوعني
يابن الأوادم توكل خاطري عافك

رد: ديوان الشاعر عبدالكريم الجباري

الأقراب


يالله دخيلك كلهم صاروا احباب
تب الزمن ماهو إل هالناس تبه

لو جيت تحسب مالقيته ف الأقارب
مجموع الأعداء اكثر من الأحبه !!

أنا و انت و انت ف قلوبنا إعتاب
لكن بعض إيامنا مستتبه ..

نخاف نفتح قلبنا ينفتح باب
خص القريب ودنا ما نسبه

والله يا بعض المعارف ف الاجناب
اخلص من قريب النسب ف المحبه

هذا إن تردى ينحسب مية حساب
ولا القريب لو فعل .. ما تكبه

محدن يبي يبتر ذراعه ولو عاب
عمر السفينه ماتعاكس مهبه

لو جيت تقطف من عناقيد الأعناب
لابد ما ترمي منه كم حبه

تلقى السبب يوم إتمعن ف الأسباب
و اللي جهل يلقى السبب عند ربه

واللي وطت رجله على جرة الداب
تلقاه حرص بمشيته و يتنبه

و اللي يقول إن البحر سهل كذاب
ما اظن يعرفه زين حتى .. يطبه

واللي يدور مدحته عقب ما شاب
ماتنفعه لا صار مثل الجلبه

أنا احمد الله مست لبيتنا أطناب
نثبت ولو زاد الهوى في مهبه

و الليا هقيت إني تكاسلت ارتاب
سارعت في كيفق الرجال و مشبه

و يطري علي شطر بشرهات و إعجاب
ياكليب شب النار يا كليب شبه ..

رد: ديوان الشاعر عبدالكريم الجباري

بعض الوجيه
يالله تصبرني على بعض الوجيه
والوقت من غدره ومن غرايبه
والي على ضيق الدهر تقصر يديه
ببعد عن مصافح يديه العايبه
لو كان ماجتني على الي مشتهيه
نفسي عن السان المجامل طايبه
يالله تبعدني عن الي ما ابيه
من مدت السانه ومن طلايبه
انا هواوي والهواوي وش عليه
غير الذنوب وذنب غيره جايبه
عاقل وكني لابسن ثوب السفيه
متسلطن على النفوس التايبه
من وين مالديت بالفكر النزيه
في لدتي كل الدعواوي سايبه
العدل ضايع يرحم الله والديه
وان مالت امه يرحم الله شايبه
من يعشق الفتنه تبع سعد الفقيه
ومايتبعه غير الوجيه الخايبه
لو كان في سوقه ريالات وجنيه
غطى على سوق الوزير ونايبه
عينه اذا تقدر تعلى حاجبيه
تلقى الثرى عالي على سحايبه
من عاش وسط المستحيل ويرتجيه
تبرك على دار الامل ركايبه
الفرق واضح للبسيط وللنبيه
ماهو بتفكير العقول الذايبه
الي عرف علوه عرف معها بريه
والي عرف ربعه عرف نسايبه
ومن صد عنا نطلب الله يهديه
والي خسر نفسه خسر حبايبه
نمشي على سنه رسول نقتديه
من دلنا سير الامور الصايبه
ولو حدني وقتي على الي ما ابيه
نفسي عن السان المجامل طايبه
وان مال عدلي يرحم الله والديه
وان مالت امه يرحم الله شايبه

رد: ديوان الشاعر عبدالكريم الجباري

طعنتن بضلوعي
طعنتن بضلوعي
الحبيب الي غرامي صار بين ضلوعه
ليه وجه في يدينه طعنتن بضلوعي
ماهقيت انها تغير نيته و طبوعه
اما انا هذي محاسن نيتي وطبوعي
والله انه من غلاته كلمته مسموعه
لو تدخل في خصايص روحتي ورجوعي
حتى انا عندي خبر في روحته ورجوعه
من قبل تطفي جميع معلقات شموعي
لين حدتني فعوله ديرتن منزوعه
ماقدرت ادوج فيها واخترب مشروعي
لو نقول انه غشيم وما نصحوه ربوعه
الخطا ماهو خطاي اني سمعت ربوعي
دام ماصان الغلا خله يذوق اللوعه
يكفي اني من عذابه جد شبعت بلوعي
يعني اتكون العلاقه بيننا مقطوعه
من سببه ومن يلومن لو مشيت بطوعي
لو عرف لعب العيال ولويعرف هجوعه
ليه انا ناقص ذراع......؟الا اعرف هجوعي
من غصبه انه يسفح بالخطا بطلوعه
بس انا مانيب مثله والصحيح طلوعي
مو غرور ولاظنه منفتح موضوعه
بس من حد الخطايا يبتدي موضوعي
والله انه فعلته هذي مهي مشروعه
كن دستوره مسوى في يدين شيوعي
يالله انك من سواته لاتكثر نوعه
ويالله انك من سواتي انك تكثر نوعي
ذيك حزة ماعرفته ليلتن مسبوعه
ليت والله ماعرفته واكتنزت قنوعي
اشهد ان حبه تكاثر في حشاي فروعه
وانصدم لامن نظرت .....!الله ياكثر فروعي
الله اكبر ياحبيبن صورته مطبوعه
داخلي واقول عمري هذا هو دلوعي
والله اني لو تركتك قيمتك مرفوعه
وش بسوي مو بديني جد حصدت زروعي
لاتحاول لاتحاول ردتك ممنوعه
والغلا باقي مكانه لو فتشت ضلوعي

رد: ديوان الشاعر عبدالكريم الجباري

عطلة الصيف
الصيف قالو به طرابه ولذات
وانا كرهت الصيف ياعطلت الصيف
لو كانها بالحر قلنا سهالات
مير البلا فرق قلوب المواليف
لو جيت اسافر به على غير مشهات
لو كثرت السفرات ماهي على الكيف
هذا يبي لندن وهذا الامارات
وهذا حجز للهند وهذاك لجنيف
وهذا يبي يخرج حدود القريات
وهذا تونس بالقريات وطريف
وهذا ولايعرف طريق الجوازات
وهذا يقظي عطلته داخل السيف
الوقت ظايع في جميع المجالات
من فضل ربي منحسب للتكاليف
لاكن وقتي ماهو بمثل الاوقات
لي صاحبن فارق عيوني ولاشيف
مرات اقول اليوم فايت ولافات
راح الكثير ومابقا الا تناتيف
اضحك على نفسي واراوي مراوات
واغير ايامي واحرف تحاريف
ياليت والله يسحبون الجوازات
والله كرهت الصيف ياعطلت الصيف

رد: ديوان الشاعر عبدالكريم الجباري

لاتبعد وكلمني
ان قلت مابيك....لاتبعد وكلمني
والله مقدر اعيش العمر من دونك
ان شفتني ظايق ...ارخ الصوت وافهمني
بس قل ..حاضر وحاولبي على هونك
بالعقل وقت الزعل مالله ملهمني
مجنون خلقه وكيف ان صرت مجنونك
ان رحت عني بقول الله يرحمني
والله اني طيب ومت بسبة اطعونك
ماتعرف الي يبيك ارجوك علمني
والله والله يموت لخاطر اعيونك
لاتقول احبك اذا به ناس واحشمني
اخاف بلسانهم عندي يطرونك
ان قلت كذاب عزالله تظلمني
كله على شان خوفي الناس يذونك
وان كاني اخطيت جعل الله يعصمني
بس الوكاد اني لو اخطيت ماخونك
يابلسم الروح بس اشوي بلسمني
لامن تبسمت تكفي ضحكت اسنونك
ارجوك في ميزة التجوال عممني
بضيع بالحب لامن صرت مفتونك
وان قلت مابيك .........اخذ اشوي......وازهمني
اقول لبيه...والا اقول.......ياعونك