صباح الامطار والخير على دار ابو متعب صباح البرد
وبوادر البروود اللي جايه بقوه ها اليومين صباحكم غير يا هلي
صباحكم منعنش بالحساوي والقهاوي !!

يالربع انتم وش بلاكم ماتوحون زين ترى يوم اتكلم قبل
كم يوم هنا ماعندي نيه والله للوداع يشهد علي ربي صارت زحمه

عندي بالتقييم بالرسائل هنا وف الاسك وف تويتر
كلها تسال وش صاير ياهووو والله ماصار شئ ولا به شئ

بس يوم اقول كذا ترى كنت ماخذ بخاطري شوي وحطيتي حرتي
بالمدونه هذه كل السالفه !!

نفر انت ولنو واسير ومرامي تراني ماني برايح ولا شئ بس بغيب
كم اسبوع اختباراتي الاسبوع الجاي بتبدى دعواتكم

هذه كل السالفه !!

بالصدفه جت مع روحت ام شوشه المشكلجيه لمدري وين وطلعتها
من هن ا وبعدين هلا والله باسير لحقي يالنو انت وميمي طلع لنا
اسير ولد عمنا هلا والله وانا اقول الولد وش بلاها مدونته فله

اثاريه طلع من عيال عمي هلا والله اسير ونعم فيك

يالله حبيت اقول لكم ذا الشئ وترى بوصيكم على مدونتي الله الله فيها
كل يوم والثاني واحد يشوف كيف وضعها
يسقي الزراعه ويعطي الحمام حب ويطفي النور ف النهار ويشغل
الدفايات تالي الليل تخبرون الاجواء بارده

يالله خودافس شباب وصبايا مدري اذ لقيت وقت دخلت
بكره او لا بس زي ماقلت دعواتكم جعل ربي يسعدكم

والله الله بالتقييمات واللايكات ودي ازل واحد ببالي مسوي
لي قلق من فتره

ياني فايق وصاحي من بدري اليوم تدرون
لانه اخر يوم لي بالدوام عندي اجازه اسبوعين بحلل اوم النوم فيها

مع اني اشك بس ماعليك لو اقعد طول الاسبوعين الجايه صاحي ماعندي
مشكله اهم شئ دوام بح بابح مافيه !

عاد بها المناسبه تخفيضات للي يجون هنا اليوم لحد يدفع
رسوم الدخول ولا رسوم شئ >> من جد ماخذ مقلب بنفسك

تذكورن قلت لكم قبل فتره وارجعو للصفحه اللي قبل هذه
قلت لكم عندي شي بسويه او تجربه بتهور واسويها

ابشركم من ذاك اليوم وانا قاعد اشتغل على ذا الموضوع
وبزياده كمان ياطلعت معاي امور والله من جد كنت شاك انها بتصير !!

بس ماتوقعت تصير بذا الشكل تقلع ابليس نيوتن
هو ونظرياته كل فعل له رده فعل ومن ذا الخرابيط المهم

ماراح اقول لكم النتايج لين ارجع بس ذكروني لان بعضها
يحسسك انه لسى الامور زينه وبعضه اثبت لي شئ كنت
شاكن فيه من فتره بس كويس عرفت اللي ابغاه

وتوووبه بعد ها النوبه !!

اتحداكم لو احد قرا وفهم شئ بس ماعليكم
افيري ون تيك يور كار ويصلحها

وخلوني اشوف واحد جالس ببيتهم بكره وبعده الاجواء تقول
طلعه طلعه برا برا بر بر يعني لحد يجلس !!

والله مع انه عندي السبت بلاوي بس بطلع واللي
يصير يصير ماهي اجواء جلسه بالبيت

قبل اطلع فيه ناس من جد زمان عنهم هنا الله يذكرهم بكل
خير وان شاء الله يكونون باحسن الاحوال

دمتم سالمين وهبي نيو وينز دي بلاش نقول
ربوووع امتحنونا العالم

اردت ان يكون اخر رد لي في هذه الصفحه
هذه الصوره واهديها لك من كان هنا وقادته الخطوه او الصدفه
او العاده او ...



شكرا لكم لانكم جعلتم من تواجدكم هنا دافعا لي للاستمرار
شكرا لكل من كان هنا واطال البقاء او فضل التواجد وهو صامت

شكر لكم على مسانتدكم ودعمك لي
شكرا لانكم تجعلون تواجدي له قيمه لو بالمرور فقط لاني

ارى عدد المشاهدات وكيف انها تزيد على الدوام
شكرا لكم بدونكم لم يكن لتواجدي اي طعم ولون





شكرا لك من سال وحاول ان يكون لتواجده شكل اخر عن تواجد
الاخرين شكرا لكم لانكم جعلتم اخوتي يزيدون كل يوم

شكرا لكل من قبل تواجدي بكل علاته شكرا لكل من عرفت
شكر لكم لانكم انتم من حببني في هذا المكان الصامت

شكرا لكم لانكم ستظلون في صفحات ذكرياتي على الدوام
شكر لمن ساندي ودعمني وكان له فضل كبير معي هنا

شكر لكل من تابع وقيم وكتب واعجب وشرح
شكرا لكم على دعواتكم الصادقه ونياتكم الطيبه

شكرا لكم الان وانتم تقرؤن شكر لكل من اتجه في هذه اللحظه
الى الاعجاب ليترك بصمته وكل من وصلت يده الى
لوحة التحكم ليقول رايه وشكرا لكل من ذهب ليرسل لان السمعات
وقفت في طريقه

شكرا لكم مني جزيل الشكر اشوفكم وانت بخير
احببت ان يكون اغلاق هذه الصفحه هكذا ولي عوده
باذن الله بعد اسبوعين من اليوم !!

دمتم في رعايه الله وحفظه

وسمي

سلام

سلام عليكم يالربع شلونكم كل واحد باسمه يعلم الله ان لكم وحشه
ياهذا كبرها تدرون من جد مدري وش اقول لكم بس

بختصر الكلام تدرون تو راجع ومتحمس وجعان هرج
لو بتكلم ماراح اسكت

بشكر العالم اللي قيمت وارسلت ولا تستعجلون علي برد
بس على مهلكم لين اخذ نفس

تشكرات لك من سال ومر وسلم

يالله بتركم شوي بقوم اشوف احوال الشعب هنا كيف
الامور وكيف صايره المدونات من جد شكلي

بقعد كم يوم بس بحوس في مدونات العالم بعرف الاخبار ثم بجي اقرقر
عليكم لين تقولون يازينك وانت ساكت

والله تعبت وانا الف بالمدونات صاير ما اشوف زين مدري
هو من الدوفره ولا من البرد والهجوله تالي الليل ولا من اللفله هنا اليوم

ياولد دشيت من اول لين ذحين فوق ستين مدونه
شوفو الرد اللي قبل هذا متى وقته وذا الرد كل ذا الوقت وانا احوس

بالمدونات من جد التدوين عالم حلو يخليك تعرف نص احول الشعب
الحمد لله ابشركم الامور زينه والعالم اغلبهم مبسوطوين

ومع نفسهم عايشين اجواء حلوه ياربي لك الحمد


بس فيه كذا مدونه متغيره علي الامور فيها اول كانت كلها فرفشه وضحكه
اشوف اصحابها قالبينها شوي احزان واشعار ياهو روقو المنقا

وبعدين تو انتبه انهم رجعو اختيار افضل مدونه ف الشهر
والله اني فرحت يوم شفت ذاك الموضوع باعلى الصفحه فوووق

اللي قاهرني الاقبال مو بذاك الزود على الموضوع يعني لا زم يسون لكم عزيمه
عشان تروحون يالله كل واحد يمر من هناك ويحط اعجاب ترى

نهايه الشهر في توزيع جوائز



ايه نسيت اقول لك اليوم اول يوم لي دوام من ثلاث اسابيع
لا وفله يوم اجي اليوم القى الاره مغيرين كل الاجهزه باجهزه

مواصفاتها عالميه وشاشات 21 بوصه يعني لو نمله تعدت تعد خطواتها وانت تضحك

بصور لك الاجهزه الجديد وانزلها المشكله الفتو شوب طار مع الاجهزه الجديده
ويالله على ما انزله تكون الفرحه بردت ههههههههاي

قايل لكم اذا تكلمت ماراح اسكت خلوني اروح اتقهوى احسن
من الصبح مغير هجوله ف النت والمدونات

يالله اشوفكم ف اقرب وقت لا تنسون روحو فوق وشوفو اختيار افضل مدونه
لا تخلون العالم تتعب وانتم بس تتفرجون من بعيد



خودافيس

صباح البرد من جد اليوم البرد زايد حبتين والنوم كابس على من اوول
اوم القلق مع الصبح والدوام اللي ماله داعي يالله مصيرها تتعدل الامور !

المهم ساعات الواحد يكون في مود لكم عليه ياليت العالم تقدر شوي
يعني اليوم لو ودي كل من كلمني اتهاوش معاه الله يستر ويجينا مراجع من الناس اللي ماتفهم

شكل واحد فينا بيصير له !!

من جد ساعات نبغى الناس غصب عنهم يكونون زينا يعني اجي فايق
ودي اشوف كل العالم فايقه وانواع الرجه والاستهبال اللي ماله داعي

وتجي والنفسيه مقفله ونفسك براس خشمك ماودك احد يكلمك ويا زين الهدوء
سبحان الله طبع فينا مانغيره لو مهما صار !!

عشان كذا يمدحون الركاده ولازم تحافظ قد ما تقدر على اسلوب ثابت او خلونا نقول
شبه ثابت عشان العالم يعرفون كيف يتعاملون معاك

مو تمسك يوم راعي هروج وسوالف وساعات ما د البوز وماسك ركن وساكت


شايفين وش طول ها المقدمه كل عشان اقول لكم النفسيه مقفله اليوم
عاد يابعد الربووع تقال انه بيجي السنه الجايه قاعد يتسحب ها الاسبوع

كويس ان في بطوله ها الايام على الاقل تمشي الوقت شوي
صح اني شاك ان المنتخب بيخربها اليوم مع العراق بس وش نسوي هذا الاخضر

وهذه خلاقينه تعودنا عليهم !!

بها المناسبه وقبل انسى اذا فازت العراق اليوم عشانا عند الدوافير
عصفوره وقناديل وبلاك وشلتهم مالي شعل خلونا نشجع معهم

دام الشغله فيها عشا وحركات !!

ايه كمان مع البرد ترى ساعات المخ يجمد ويقفل شوي فلحد يزعل
والله من امس ما رديت ولا على احد لا هنا او ف الخاص او بالتقييم او بالاسك

مالي خلق خاصه بالاسك لي اسبوعين ودخلت امس شوي ويجيني شد عضلي
بمخي وش ذا فوق اربع ميه سؤال اكثر من النص تلوع الكبد على قولت الكوايته

فقاعد اسوي تشفير من امس للاسئله اللي ماينجاوب عليها وبشوف كم
بيطلع معاي بعد التصفيه شكلها بتصير عشرين

بكمل اول شفت اني كثرت الرد قلت العالم لا شافت الرد طويل
مايقرون وبعضهم بس يدفك بلايك لو ما قرى انت وش تقول يعني انتبهو شكلي مره بحش

بكم واحد بين السطور والكلام يكون كثير وخله يحط لايك
بصور الشاشه وبخليه يتوب يحط للعالم لايكات بدون مايقرا وش قاعدين يكتبون !!

المهم على طاري جاني تقييم امس من قامه كبيرررررره هنا بعبير والله لو تقعدون لين
السنه الجايه تتوقعون اتحدى اللي يتوقع صح !!

وعشان احمسكم معاي اللي يتوقع صح والله له جائزه هذا كبرها مني
بس ابغاه يتوقع من اللي تهور وقيمني امس !!

ولا راح اقرب لكم ولو بقرب وبقول اول حرفين اتحداكم تتوقعون مين !!

مالكم في طولت الهرج اللي يتوقع صح والله له جائزه وتوصل له باسرع من ما يتوقع !!


وعلى طاري قبل فتره اكلم واحد يقول والله اني ادعي لك واذكرك بالخير واشكرك
كل فتره والثانيه بس بيني وبين نفسي ههههههههههههاي والله شوي واطيح من الكرسي يوم قال لي

ذا الكلام تدرون ليه لاننا بعالم النت والنت بالذات ماينفع فيه ذا الكلام
نفسي اعرف وش بيضرك لو ادية اعجاب او تقييم للشخص اللي كنت تقرا له او تمر بالصدفه من مكانه

يعني بتطيح هيبتك او بياخذ عنك فكره غلط اللي قيمته او اديته اعجاب
ياناس متى نفهم اننا هنا نحب انه يكون اثر الشي اللي نقوله او نسويه ملموس او مشاهد او ...

حلوه بينك وبين نفسك لا تعبت نفسك يابو هههههههههاي


يالله شكلي زودتها شوي يالله بطلع جاتني شغله خلوني
يمكن ادفا شوي ف امان الله

خودافيس

صبحكم الله بالخير يالربع ش لونكم عساكم بخير وهاه كيف عدت الموجه
البارده ف الايام اللي راحت الدنيا من جد بررررد !!


كم واحد يسالون كيف عدت اختباراتك
اقول أه علي ايام الدوفره بس يوم كانت الاختبارات تسليه نخليها

ع العموم الامور لين ذحين تمام نزلت اربع مواد وباقي ثلاث
اللي نزل ميه الميه الامور كانت والباقي الله يستر منه !!

واللي يسالون عن الوالد الحمد لله ان شاء الله ان اموره تمام
في فتره نقاه ذي الايام !!

صح قبل انسى فيه تقييم لافضل المدونات في ملتقى العضاء
لا يفوتكم ومدري وش خلاهم ينزلون مدونتي مع الدوافير هناك

هو الافضل دائم للمضمون والتنوع مو للشخبطه والكلام
اللي نصه مايوكل عيش !!

المهم اللي يمر من هنا لا يقصر يروح هناك
وانت وضميرك لانه فيه اكثر من عشر مدونات مطروحه للتصويت

مدونه اخوكم المخربشاتي معهم


للمشاهده والمشاركة

بالله لا هنتوا بنزل تقييم وصلني قبل شوي ورد على ردي
اللي قبل هذا وابغاكم تقرون التقييم زين وتقولون وش رايكم

صراحه انا انعقد لساني بحلقي وكل ذا الوقت ماني داري وش اقول
لصاحبه التقييم



من جد كلام والله مدري وش ارد عليه او وش اقول فيه صراحه بعضهم
تقييمه وودك تطلع له مع الشاشه وتصفق له وتوقع له شيك على بياض

الله يسعدك دنيا واخره على ذا الكلام اللي من جد بيخليني اشوف
نفسي على الشباب هنا يمكن لشهرين قدام


قبل انسى صاحبه هذا التقييم مشرفه الشعر a7taryk يعني لا تستغربون
ابداعها في التقييم وهي صاحبه قلم راقي

شكرا سيدتي

قوووود مووورنينق ايفري بدي << بالله وش رايكم بالانقلش حقي

مسكت صح تحس انك تكلم بنقالي توه جاي السعوديه
ومسوي فيها يعرف عربي !!

ماعليكم المهم وربي فيه ناس لها وحشه وفقده كبيرررررره الله يردهم بالسلامه
ويرجعون ينورنا فيذا المكان !!

وبعضهم صايرين بخيلين في ردودهم يعني حتى تواجدهم يغلب عليه الغياب
لو سجلو حضورهم على استحياء !!

وبعضهم قلبوا مثقفين ورجعو للاحزان والكلام اللي نصه ما افهمه تخبرون
فهمي ف الخواطر زي فهم جورج بوش ف الرئاسه كلنا من جنب القده

ياولد ولا هانو البنات اللي هنا قبل كم يوم سالت وقلت فيه شخصيه
لها وزنها هنا قيمتني وتحديت اللي يعرف مين صاحبها وجاتني رسايل تتوقع

المشكله اني قايل شخص وبعضهم الله يصلحه مرسل اسماء اربع او خمس اشخاص
ويقول واحد منهم لا من جدك تعبت نفسك يابو عشان كذا بحجب الجائزه

لاني قايل شخص مو ثلاثه او خمسه ركزو شوي
ولا تبون احذف لكم اجابتين كمان


صح قبل انسى كمان يسعدك ربي نفر كلامك في مدونتك عني اسعدني
الله يسعدك من طيبك وذوقك واخلاقك وترى من جد حضورك هنا
يخلي الاجواء احمس بكثير ليتك لاعب من المنتخب البارح والله شكلنا غير نفوز وش دخلها
مدري بس ساعات اذا تحمست اجيب العيد

ف الاخير قبل امشي او اطلع بقول من الناس اللي لهم وحشه وربي
بذا المكان وغيابهم مسوي فراغات هذا كبرها هنا

لنو الله يذكرها بكل خير ويردها بالسلامه ... مرامي البدر مع طيف عابر .. ومجرد حلم وراح
وقلب صافي او هدوش .. راعيه النياق او اتعبت حسادي .. شغب الدافوره .. وورود المحبه
واميره مملكتي ... ودوافير العراق كلهم ... عصفوره .. قناديل .. بلاك .. ورود البنفسج ..

مدري ليه احاول اتذكر شاب واحد ماني لاقي الى العريس
انكسار الله يذكره بالخير وش فيهم الشباب هنا شوي وينقرضون
من جد البنات ماكلات الجو علينا اكل !!

دمتم سالمين وفي رعايه الله
خودافيس