زينب : ترا منصور امسوي صفقه مدري شو سالفته في البحرين.. و اذا نجحت ممكن تزيد عليه الارباح وايد ..و امطرش فارس اونه علشان فارس خبره بها السوالف و الحبيب ماخذ زوجته و عايشين بشهر عسل ناسي الشغل ..

كان المفروض زينب ما اتقول هالرمسه حق مها لانها بتحرج من فارس بس بيني و بينكم كنت مستانسه و انا اجوف الغيره و الحسد بعيون عليا و مها ..

وقفت مها فجاه زينب وين رايحه: بجوفهم شو يسون في المكتب ..
زينب : تعالي عندهم اجتماع..

طالعت عليا حسيت انها بتصيح و كانت سرحانه ...غيري ممكن يقول انزين مها شو يخصها اتحرج بس عليا ممكن لانها كانت خطيبته بس مها مالها علاقه.

.بس مها اتذكرني بايام ما كنت الح ع عمور يتزوج خوله.. و فرقت بينها و بين جابر علشان تتزوج عمور .. و تزوجوا .. الحينه مها اتسوي نفس الاسلوب و الطريقه تنهدت الله يستر بس ..

طلعوا منصور و خالي حسن من المكتب يايي صوبنا ..
منصور: خالي انته لازم اتجوف حل ل ولدك ما يصير جي ..

حسن: ادري فارس غلطان ادري ..

طالعتني زينب كانت تبا تضحك بس ابتسمت لها..قلبي و عيوني كانوا ع باب المكتب الي داخله فارس و خالد و الحينه مها راحت لهم..شويه و ظهر خالد ..سلم علينا و قعد حسيت اني متلومه قاعده مع خالد و منصور و فارس مش موجود ..

حسن: وين امج ..؟؟

زينب: اتصلت ب فيصل ايي ياخذها بيت عمي تعبانه حرمة عمي..
سال عليا: شو بلاها امج ..؟؟

عليا: الضغط عندها مرتفع ..
حسن : الله يشفيها ..

زينب : نوره شو رايج انحط العشى لرياييل ..
وقفت ابسرعه جني ما صدقت خبر : يالله ..

حسن: ما يصير اتشغلين حرمة اخوج عيب ..شي شغالات في البيت
ابتسمت له : لا و الله ما يحتاي كل هاه ..يالله زينب
زينب : يالله بنتسلى ..

عليا: بيي معاكم ..
زينب : حياج..

سرنا المطبخ.. قلبي ياكلني ابا اعرف شو يدور بين مها و فارس يالله تستر ..هالبنيه كل ما اترمسه ينجلب علي ..حطينا العشى في الحجرة المجابله للصاله ...

نوره: زينب بنتعشى ارواحنا !!
زينب: لا كلنا يماعه ليش تستحين ..
نوره: هي استحي فضيحه جدام خالد و منصور ..

عليا: ليش دوم نتيمع ويا بعض كلنا اهل..
نوره: بعدني ما تعودت عليهم ..

زينب : ما يهمج نحن البنات بنفرش صفرتنا في الصاله الثانيه ...

حطينا العشى و كل شي .. و راحوا الرياييل حجرة الثانيه ...سمعت خالي حسن يقول لي
حسن: بنتي نوره ازقري فارس ...

بلعت ريجي : ان شاء الله ..خالي
زينب: خبري مها اتيي صوبنا ..

هزيت راسي بمعنى نعم فرصه ادش عليهم اجوفهم شو يسون ..دقيت الباب ماشي رد دقيت مره ثانيه ..
فارس : دشوا ..

فجيت الباب جفت مها يالسه ع الكرسي و كان فارس واقف جريب منها ..
كأنه اول مره يجوفني : نوره !

طالعت مها جفت ملامحها جامده رجعت اطالع فارس : خالي يباك اتروح تتعشى ..
فارس: زين الحينه يايينكم ..

مها: خالج يباه يروح يتعشى ولا انتي تبينه..
طالعت فارس علشان يرد عني بس جفته سكت فرديت: و ليش ما اباه ريلي ..

وقفت منفعله: ها اخوي قبل لا يكون ريلج ..
فارس: نوره روحي الحينه بنيي ..

مها : جفت كيف اسلوبها معاي ..

شو هاي الهبله تبا اتسوي مشاكل بيني و بين فارس من غير سبب ..
فارس : بس مها ..

مها: شو بس جفت كيف كان ردها علي ..."طالعتني" انتي من دشيتي حياتنا غيرتي اخوي علينا..
رديت ابسرعه لانها استفزتني : شو غيرته عليكم..انا اصلا اعرفه قبل لا انتي اتجوفينه ..."سالت فارس" هذي صاحيه..

حرج علي و ها شي قهرني : نوره قلتلج روحي الحينه

صكرت باب المكتبه بغيض ليش يحرج علي جدامها اصلا ليش يحرج علي ..انا ما غلطت الله ياخذها و افتك منها ..اففففففففففففففف رحت الصاله الثانيه صوب زينب و عليا ..

زينب: شو بلاج ..
رديت : ماشي ..

و ليش اتضايج و اشمت عليا و مها فيني ... قعدت ع الارض و يلست اتعشى ..زينب و عليا يسولفن كنت ارد عليهن بكلمه او كلمتين ...يعني كان بالي مشغول في فارس ..قهرني ..شويه و دشت مها علينا....قعدت ع الكنبه

زينب: ما تبين تتعشين ..
مها: ما اشتهي ..

وقفت و قلت ابصوت عالي : الحمدلله شبعت ..
و سرت اغسل ايدي ..كانت اصواتهم توصلني ..
عليا: شو بلاج ..؟؟

مها: يعني ما اتعرفين شو بلاني ..

سمعت صخه ..رديت ابمكاني ..حاولت وايد اتحاشى مها و تعليقاتها ..ما فيني ع المشاكل مع فارس بسبب هاي الغبيه .؟.و كل ها علشان الدبه الثانيه عليا ..

.بعد العشى طلعنا يلسنا كلنا ..انسولف ..لاحظت ان مها نفسيتها صارت اوكى و الدليل انها قامت اتسولف مع فارس و تضحك معاه..كنت بدوامه ما اعرف شو الي يصير حولي ..فارس واقف: يالله نوره انروح ...

مها : لا تنسى اتحل واجباتي ترا ابا الورقه يوم السبت
فارس: ما يهمج كم مها عندي ..يالله نوره
خالي حسن: وين تو الناس..

منصور: خالي لا تنسى الريال ياي من سفر و تعبان كارف عمره كراف في البحرين خله يرتاح..
فارس: ههههههههههههههههههههههههههههههههههههههههههههه

كلنا ضحكنا ع ضحكة فارس ابتسمت حسيت براحه و انا اجوفه يضحك مستانس ..

طالعت عليا جي غريزيا جفتها تبتسم و حاضنه ايدها بصدرها ..قهرتني ما يخصها ب فارس هذا مالي ليش ما تفهم ..طالعت مها جفتها تبتسم و اطالني بنظرات غيض ..

طنشتها شلت شنطتي علشان افهم فارس اني ابا اروح خلاص ..يا الله باجر الجمعه .. و يتيمعون ع الغدا ..خلوني ادور حجة علشان ما ايي باجر هني ...

و نحن انسلم ..دشوا خالة فارس حصه الي هي ام فيصل و فيصل و كان وليد معاهم ..
فيصل : الحق ولووووود نوره هني خبرها

زينب : شو تبا اتخبرها خبرنا كلنا ..
وليد: لا لا فيصل انت خبرها استحي انا ..

ابتسمت: شو سالفتكم اونكم عاد متلومين..
فيصل + وليد= ههههههههه

مها : وليد كل سوالفه عن الريس يالله احلف ان هاي هي مب السالفه..
فيصل : هي صح يوم السبت ب عوافي ..يقولج بفوز بس علشان ياخذ الكاس و اتصدقينه..

طالعت وليد و ابتسمت : امصدقتنك ..يالله بالتوفيج ..
حصه: وين رايحين ..

فارس: بنروح البيت ...يالله نوره ..

تجدم ووقف عدال باب الصاله ...سلمت ع خالته حصه ..جفت وليد يطالعني و يبتسم و كأنه يباني اشجعه بس انا ما قلته شي رديت الابتسامه طاحت اعيوني بعيون فارس فماتت الابتسامه من شفايفي يوم جفته يطالعني بنظرات و كأنه بجتلني بلعت ريجي بصعوبه .. و رحت صوبه ..
حسن: تعشيت حصه..
حصه: الحمدلله ..اتسلم عليكم شريفه..

الكل: الله يسلمها ..

عليا بصوت واطي اترمس مها: جفتي فارس كيف طالع نوره يوم ابتسمت ل وليد..
مها اتهز جتفها مب مهتمه: و شو يعني ..

عليا: شو شو يعني و اتقولين انهم ما يحبون بعض انتي ما جفتي نظراتهم لبعض كيف كانت ..
زينب: شو عندكم انتوا .تتساسرون ..

خالد: دام مها و عليا مجتمعات شي مصيبه بتصير ..

وقفت مها وويرت عليا : ما يخصكم ..تعالي انروح برع انسولف ع راحتنا ..
طلعوا في الحوي ..

مها: اقولج عليا انا اتاكدت ان فارس مب وايد ويا نوره و الله العظيم و الاهم من كل هاه انه ما يرضى علي ..من ساعه حرج عليها يوم ردت علي مع انه اني انا الي بديت

عليا: عيل ليش تزوجها و هدني "تنهدت" خلاص مها انسي ان فارس بيرجع لي شرات قبل خلاص تزوج و انا مالي غير احفظ كرامتي..

مها: افففففففففف شفيج انتي ..تدرين ان في المكتبه بس قاعد يراضيني .. ووعدني ان يفكر في الموضوع مره ثانيه..

عليا مستانسه: قولي و الله العظيم..
مها: و الله المهم انتي طنشيه لا تبيين انج ميته عليه خلاص..بس جدام نوره علشان نغايضها ...
عليا: باجر ع الغدا شو رايج..

مها: زين نستفزها علشان فارس يهزبها و الله انه يضربها يا عليا..
عليا: اشوووووووووه مستحيل فارس يمد ايده ع حرمه..

مها: ههههههههه هي يمد ايده عليها لان لسانها طويل و انتي ادرى ..المهم عرفنا ان فارس و نوره مب ع وفاق ها الاهم ..

عليا: الله يعينا ..
مها : ميته غيض منها ...مرات افكر اروح شقتها و اقعد اهزبها و اجرحها بالكلام ..
عليا: مستحيل اتسوينها خليها ابرايها ..

مها: و الله اسويها انتي نسيتي كانت هاي شقتي و شقه خالد عقب خذها فارس مفتاح الشقه للحين عندي ..
عليا: انصحج لا تتهورين خلينا انعق نغزات من بعيد لبعيد ..

مها: هههههههه و ها الي بنسويه ..

نزلت من سيارة فارس من غير ما نتكلم ولا كلمه..كنت عارفه انه محرج مني و خفت ارمسه و يطلع حرته فيني ...

زين وليد مراهق اصغر عني باربع سنوات يالله هالانسان كيف يفكر ..معقوله فارس يغار !! هي يغار مني ..ابتسمت عيل شو افسر حركاته و تصرفاته .

.شغلت التلفزيون ادور من محطه ل محطه شي حلو..ياني فضول اعرف فارس شو يسوي ...

سرت صوب حجرته جفته مب موجود يعني في حجرة المكتب دقيت الباب تعرفون امحرم علي هاي الحجرة ...

مدري ليش تذكرت الكمبيوتر و الفايل المكتوب فيه عليا ...

غمضت اعيوني ..يا ربي انا في دوامه ...ما اعرف انا شوه بالنسبه ل فارس ..
فارس: تعالي نوره ..

فتحت الباب وقفت ضاعت من كل الكلمات سالني:شو بلاج..
رديت بغباء : شي فايل مخزن عندك في الكمبيوتر ..

طالعني مستغرب : فايل !!

بلعت ريجي بصعوبه انا الغبيه شو قاعده اخربط فسكتت ..
فارس : تعالي تعالي يلسي عن اي فايل ترمسين .

تميت واقفه ما كنت ابا ادش فقلته : لا ماشي بس تبا شي انا ابروح ارقد..

لصقت بالباب يوم جفته يقوم من مكانه و يتجرب صوبي ..رفعت راسي اطالعه ..جني ياهل تتريا عقابها ..
سالني : شو فيج "وحط ايده ع يبهتي " مسخنه شوه..

رديت راسي لورا و كأن لمسه حرقتني : لا ما فيني شي ..انا بروح ارقد..
طالعني و كأنه اول مره يجوفني حسيت اني متلومه يوم جفته يدرس ملامح ويهي ..نزلت راسي بالارض
رجع ابمكانه : تصبحين ع خير ..

كنت بقوله و انته من اهله بس سكت صكرت الباب و رديت حجرتي ..غطيت جسمي و كأني ابا اهرب من شي ..انا تعبت و صرت وايد خايفه من الياي ..

غمضت اعيوني و اطلقت لنفسي العنان انها تبحر في احلامي مع فارس ...

في اليوم الثاني يلست افكر بحجة اطلعها علشان ما انروح بيت خالي حسن ما ابا اجابل مها خير شر ...فكرت صح انا من يومين احس بعمري غير ..بخبره انروح العياده ..

و نتغدا برع ..زين ماشي عيادات بها الحزة و اصلا يوم الجمعه اجازه !! و الحينه شسوي ..؟؟يلست افكر و افكر ..طلعت مليون حجه غبيه بس كلها ما تنفع ...انفتح باب الشقه ...

قلته ابسرعه: ابسرعه خلصتوا صلاة الجمعه ..
طالعني متفأجا من كلامي : لا و الله مب ابسرعه ..."رفع حياته" ليش ما لبستي للحين ..؟؟
وقفت : ما ابا اروح بيت خالك ..

فارس: روحي لبسي عن نتأخر عليهم ...معلوم كل جمعه انكون هناك يالله روحي ..
يلست امعانده: ما ابا ..

سالني: ليش ..؟؟
قلته : بس

طالعني بنظرات ما فهمتها موليه : تدرين ان وليد ما بيكون موجود ..
طالعته : انت مينون اكيد مينون ..

رد بانفعال : عيل ليش ما تبين اتروحين هاه ..
رديت بعصبيه لانه استفزني : كيفي ما ابا روح ابروحك ..
خذ نفس و قال : كنت ناوي اروح ابروحي بس دوم جي رديتي و بهالاسلوب روحي البسي ابسرعه ..
طالعته و ترجيته : ما ابا دخيلك ..

فارس : لا لا ماشي اونج عاد تغيرين اسلوبج ع بالج بغير رايي ..يالله روحي..
نوره: اففففففففففففففففففففففففففف شو هالارف الي انا عايشه فيه..

صرخ علي : ابسرعه ترا و الله ابدل لج ملابسج ..يا الياهل انتي..
صرخت عليه و انا رايحه حجرتي : انت الحثاله

جفته ياي صوبي ركضت صوب الحجرة و قفلت الباب ابسرعه ..سمعته يقول من ورا الباب
فارس : ما عليه انا براوييج ..خلصي بدلي ابسرعه..

نوره: اول بضاربني..
فارس: لا يالله بدلي يتريونا ع الغدا
نوره: اول احلف انك ما بتضربني..

فارس : و الله ..
نوره: و الله شوه ...

فارس طفران : اوووووووووه نوره بكسر الباب فوق راسج يالله ابسرعه..
نوره : اول و الله شوه ..

صرخ ابصوت عالي و الظاهر دول الخليج كلهم سمعوا صوته : و الله ما بضاربج خلصينا ..
نوره: هههههههه اعصابك ..

فارس : ما عليه يا الدبه ..
نوره: بتضاربني ..

ماشي رد ................
..
نوره : تراك حلفت
ماشي رد ................

الظاهر انه روح الصاله ..بدلت ملابسي ابسرعه علشان ما يحشرني ...لبست عبايتي و شيلتي ..فجيت الباب ..شهقت يوم جفت ايده زخت ارقبتي ..حسيت ان السكته بتييني من الزيغه ..

فارس: و الحينه شو اسوي فيج ..

رديت بخوف و انا احاول اشيل يده عنه: انت حلفت ..زين حلفت ..
سمعت ضحكته : ههههههههه يا الياهل ..

كنت برد عليه بس حبني ع رقبتي مكان ما كان زاخني و قال ابسرعه : يالله انروح .."ومشى "

حطيت ايدي ع رقبتي كنت بخنق روحي ابيه فارس يحبني و الله انه يحبني ..
.بموت بتخبل شو اسوي افر روحي من البنايه ..يحبني ..نقزت ابمكاني يوم سمعت صوته و كان واقف عند باب الشقه

فارس : ايه وينج..
ربعت ابسرعه .. ادور نعالي جني هبله و ركضت صوبه ..ابتسم لي رديت الابتسامه بس كنت ميته من الربكه .. في الطريج ..
كان امبين عليه مرتاح.. كان يكلمني عن كذا مكان مرينا عليهم و صارت له مواقف مع ربعه ..لي ما وصلنا بيت خالي حسن ..الظاهر كنا متاخرين .. كانوا كلهم يتريونا .

.اتنهدت يوم طاحت عيني ع عليا و مها ...حسيت ان فارس سمع تنهيدتي طالعني فابتسمت له علشان ما يفهمني غلط ..رد الابتسامه ..

فيصل: متاخرين و فوق ها واقفين و يوزعون ابتسامات حق بعض ..زين تعالوا سلموا ذبحتونا من اليوع ..
فارس : السلام عليكم ..

الكل : عليكم السلام ..
منصور : ما سدهم في البحرين ..

فارس : هههههههه ذليتني منصور ..

سلمت عليهم ... و رحت يلست صوب الحريم ...كانت يلستنا و الحمدلله هاديه و خفيفه للحين ما صار شيء ..تغدينا و سولفنا ..

بعد الغدا حسيت ان جبدي لايعه..فكرت اقول زينب اتروح معاي العياده لاني كنت شاكه في شي ...رجعت و غيرت رايي مستحيل فيني شي ..تو الناس ...

عايشه: بلاج نوره سرحانه ..

نوره: لا ماشي ..
مها: يمكن متضايجه من شي

نوره: ابدن ..
عليا : مها تعرفين تقرين الافكار ..

نوره: بس انا مب متضايجه من شي ..
مها : تدرين الوحده امبين عليها اذا كانت مرتاحه مع ريلها او لاء ..

بديت اشك ان فارس يوصل الي بينا حق مها ..لالالا مستحيل ..فارس يسويها ..ليش مستحيل كيف كنت اجوفه ..من حبيته صار ملاك بعيوني ..عيل كيف عرفت هذاك اليوم ان ايدي متورمه ابسببه ..

عايشه: حرام عليكم شككتوا البنيه ..جوفهن سرحت وين
مها و عليا = ههههههههههه

ما عرفت شو اقول ..بس الحمدلله نقذتني زينب يوم وقفت و يرتني معاها : تعالي نوره انروح فوق ابا اراويج الوسايد الي طرزتها

طلعت معاها فوق دشينا الحجرة الي كانت مخصصه ل زينب و ريلها كان ميود راقد داخل ..جفت اشكال و اول ابصراحه رهيب ..

نوره: روعه ..كل ها اتخلصينه ابسرعه..

زينب: لا وقت فراغي بس ..انتي بديتي ف مالتج..
هزيت راسي بمعنى لا : اتصدقين للحين الكرتونه ابمكانها ..

زينب: شو ما عندج وقت فراغ فارس مالي عليج حياتج..

ضحكت : ههههههههه هي اتصدقين بس باجر السبت بيداوم يعني بيكون عندي فراغ
زينب : شو رايج العصر تظهرين معاي ..؟؟

نوره: وين انروح ..
زينب: نتمشى ف المراكز ..شو قلتي ..

نوره: تبين تشتري حايه ..
زينب: انتي بتيين ولا شوه ..

نوره: خبري فارس اذا انا قلتله ما بيرضى ..
زينب: ما عليج بيطيع المهم انتي عادي عندج..

نوره: هي ما عندي اي مشكله ..
جفتها تتصل ب فارس من موبايلها ...

زينب: هلا فارس اعلومك....هههههههههه.. زين قول تم ......قلت تم ترا .....هههههههه...امممممم باخذ نوره معاي نتسوق......ليش سكت .؟؟ شو قلت ... ايه ...اول شو قلت ...الدريول ....ما بنتاخر يالله عاد فارس لا اتسوي سالفه .....مشكووووووور هاي نوره ..

خذت عنها الموبايل : الو ..

فارس: اونج مطرشتنها علشان اتسوي لج واسطه ..؟؟..

ما عرفت شو اقوله جدام زينب : لا ..
فارس: جذابه...

رديت عليه : فارس ..

سمعته يضحك: هههههههه ابرايج بس لا اتاخرين و بعدين ردي الشقه لا اتروحين بيت زينب..
ابتسمت ع اسلوبه : ان شاء الله اوامر ثانيه ..

فارس : لا عيوني "ووطي صوته و جنه ما يبا الي جدامه يسمعونه و قال " بشتاق لج نوره ..
كنت بطيح من طولي ..والله اني ما توقعت يقولي انه بشتاق لي اقولكم انه يحبني ...يا ويلي حالي ضربتني

زينب جنها انتبهت اني انجلبت قالت : شو بلاج شو قالج ..

صديت عنها و عطيتها ظهري سمعتها تضحك ...ما عرفت شو اقول اتريا فارس يرمس بس الظاهر هو كان بعد يتريا جواب مني بلعت ريجي و قلت بارتباك : زين يالله ..

فارس : شوه زين يالله ع كيفج ..

ضحكت وكان امبين علي متلومه فقال : يا ويلي حالي ع الي يستحون ..اخر ما تتوقعه في نهاية هالسنة ..نوره تستحي
رديت عليه: لا تستوي سخيف ..

فارس: هههههههه انزين انتي ما بتشتاقين لي ..
نوره: .................ز"فارس ناوي يدفني اليوم "

فارس: ردي ..
نوره: ما اقدر ..

فارس: تستحين من زينب ..زين قولي هي ولا لاء ..
نوره: ههههههه "متلومه"

فارس: لالالالالا ماشي ما بصكر ..و لو صكرتي بييج فوق يالله قولي
زينب: ايه شو اتقولون ...؟؟

نوره : فارس يالله صكر..
فارس: ماشي اول قولي بتشتاقين لي ..

رديت ابسرعه: هي وايد .."ما سمعت رده لاني صكرت ابويهه
زينب : هههههههه تستاهلين السلامه ابوي شو صار في حالج ..

كنت احس ان ويهي صار حار فغطين ويهي بايدي : بس زينب

زينب: ههههههه سوالف ..يالله اتصل بدريول ..

نوره : اتصلي ..

طلعت زينب من الحجرة و قعدت ابروحي بالحجرة..فارس يقول انه بشتاق لي علني فداه ..يالله هالانسان كيف جلب حياتي ...خلني اكرهه و احبه و سوا فيني كل شي ..

رحت صوب الدريشه ..اطالع الدنيا..ترا الدنيا ابكبرها ما اتشيل فرحتي .

.سمعت باب الحجرة ينفتح ع بالي زينب التفت جفت مها و كانت واقفه عند الباب ...طالعتي و رديت اطالع برع يالله شو تبا مني هالعقربه ...

مها : اجوفج ابروحج ...

رديت من غير ما اطالعها : اتريا زينب ....حتى انتي ابروحج غريبه عليا مب وياج ..؟؟
سمعت ضحكتها و كانت استفزازيه: ههههههه قلت ايي ارمسج ..

طالعتها : مها جان ناويه ع الشر دخيلج ما فيني ع المشاكل ..

مها: من قالج اني ابا المشاكل ..بس انتي ما اتحسين ان موقعج في حياتنا غلط..
اتنهدت و خذت نفس طويل : مب مهم المهم عايشه مع زوجي مرتاحه ..

مها: اتقصين علي ولا على روحج اصلا فارس يقولي كل شي من بينكم ...لا هو مرتاح معاج ولا انتي مرتاحه معاه...

صديت عنها ما ابا اسمع كلامها ..هاي عقربه تبا اتفرق بيني و بين فارس .. مستحيل فارس يخبرها أي شي عن حياتي فارس مب من ها النوع بالعكس فارس انسان كتوم ...

مها : تدرين ان فارس كان خطيب عليا..

رديت اذكرها : كان

مها : هي كان ..فسخ خطبته فجاه مع انهم كانوا يحبون بعض ..غمضت اعيوني اضبطي اعصابج نوره لا اتخلينها تستفزج ..رديت : بعد كانوا

صرخت : و للحين..بس انتي فرقتي من بينهم ..

طالعتها بنظره: و انت شو حارقنج ..

مدري ليش تذكرت علاقه عمور و نهله و الحينه نفس الشي يتكرر معاي يالله سترك ..

مها : لانج خربتي كل شي "تجدمت مني " انتي حقوده من جفتج عرفت طينتج انتي لو فيج خير ..ما عشتي ويا واحد ذالنج داش امكفخنج و طالع امكفخنج..

صرخت عليها: فارس عمره ما مد يده علي ..
ردت بانفعال : جذابه و الله انج جذابه لو صج مرتاح معاج ما دور راحته مع وحده غيرج ..
طالعته بنظرات مب فاهمه قصدها !! فارس يخوني لا مستحيل هاي اتقص علي مستحيل ...

سمعتها اتقول : انا مستغربه من ناس ما عندهم كرامه و عايشين ذليلين "ابتسمت" كل ها علشان الفلوس ..عادي بعطيج جان تبين كل الي تبينه بس بتغ........

ما خليتها اتكمل كلامها انا بحياتي ما سمحت لمخلوقه اتكلمني بها الاسلوب ..

ما كان مني الا اني سكتها بصفعه خلتها تنجعم حطت ايدها ع خدها و كانت تتنفس ابسرعه من العصبيه .. بالنسبه لي كنت ما بين مستغربه من موقفي و ما بين مستانسه...

قالت لي : ما عليه نوره بتندمين و الله انج بتندمين ..

و طلعت من الحجرة .. نزلت مني دموع مسحتها ابسرعه اتنهدت وين بجوف الراحه و ها المريضه اتلاحقني من مكان ل مكان ...يتني الشغاله اتقولي ان زينب تترياني برع .. نزلت ..

.الحمدلله ما صادفت حد ف طريجي كلن لاهي بدنيته ...تسوقنا ...كانت زينب تشتري وايد اشياء ..مرينا كذا مركز و كذا محل بس انا في بالي شي واحد ..فارس شو بيسوي فيني يوم بعرف اني مديت ايدي ع مها يالله سترك ..

زينب: ما شريتي شي ...شو بلاج نوره شكلج تعبان ..؟؟

رديت لها: لا ما شي ..بس ما عندي شي اشتريته توني راده من البحرين و شريت لي وايد اشيا ..
زخت ايدي : زين تعالي اندش هالمحل ابا اخذ رايج في شي ..

دشينا محل الذهب ما اذكر شو كان اسمه ...المهم ..كانت زينب تبا تشتري طقم الماس ..كانت وايد اشكال رهيبه ...احترنا شو نختار ..

و زينب كانت مصره انها تاخذ ع ذوقي فاخترت واحد رقيق ..يخبل وايد روعه ...خلصنا من المشتري بعد المغرب ...عقب ما ظهرنا من المصلى يانا الدريول و كان بو منصور موجود في السياره ...

بو منصور: هلا ببنياتي شحالكن ..؟؟

نوره + زينب: ابخير الحمدلله ..
بو منصور : محبوب روح البيت.

قلت زينب بصوت واطي : ايه خبريه بروح بيتي بجتلني اخوج..
زينب: عمي نوره تبا اتروح البيت خلي محبوب بالاول ينزلها ..

بو منصور: افا راكبه ويانا و تبا اتروح بيتهم ما يستوي عشاج الليله عندنا..
نوره: مره ثانيه عمي .انا ما خبرت فارس .

بو منصور : ابرايه خبريه الحينه وين رايحه انتي يعني ..؟؟

اففف من هالشواب عنيدين ..طلبت موبايل زينب لان مثل ما اتعرفون موبايلي ما اطلعه من الشقه مدري ليش تعودت ..المهم اتصلت بفارس ما ايرد ...

زينب: يمكن مشغول ..عقب بنرمسه ما عليج ..

وصلنا بيت بو منصور ...اتصلت زينب بريلها عرفت انه مشغول و معاه فارس .

.المهم قالت ل منصور انه يخبر فارس ان نوره موجوده في بيت زينب ..طلع بو منصور من البيت و تمينا انا و زينب وولدها مايد.

.فكرت اخبر زينب السالفه الي صارت لي مع مها بس مدري شو منعني ..دشينا المطبخ و يلسنا انسوي عشى ..تعشينا و سولفنا ..زينب وايد طيوبه غير عن مها الي يعرفهن ما يقول هذيلا خوات ...دش علينا وليد..
وليد: عفانا الله اعزمونا ..دقوا عطونا خبر ..

زينب: ههههههه نسيتك و الله .
وليد: الله يا الدنيا..

نوره: زين تعشا علشان تستعد باجر حق عوافي ..

وليد: صدقج ذكرتيني ..

قعد وليد يتعشى ..عقبها خلصنا و قعدنا انسولف ..فاجأتني زينب يوم عطتني علبة الطقم..
طالعتها مستغربه ابتسمت و قالت: من زمان كنت ابا اهديج بس ما لقيت فرصه الا الحينه.
حضنتها : مشكوره زينب و الله انج احرجتيني ...

وليد: يا ويلي ع منكر الحريم انا ..
زينب: هههههههه صخ انته..

نوره: مشكوره زينب ...

زينب: العفو تستاهلين نوره ..هدية عرسج ..
وليد: متى بعرس انا ..؟؟يا ربي يمكن انحصل هدايا..

نوره + زينب = هههههههههه

وقف وليد كان يبا يطلع مع فيصل ..جفت الساعه 11 ف ليل و فارس ما اتصل او ياه ياخذني ..
نوره: وليد بتوصلني بدربك..

زينب: ليش قاعده..
نوره: تاخرت يا الغاليه ..ما فيني ..اقعد وايد..

زينب: زين ما فيها شي اتريي لي ما ايي فارس .. او منصور علشان انوصلج..
وليد: وين بتتريا خلاص حصلت طقم الماس...

زينب: هههههههه
نوره: يا ثجل دمك ...

وليد: شكرا ..يالله تعالي ...
نوره: ها لا تقعد تحرق ويلات بالشوارع ..

زينب: ما عليج ممنوع هني بخالفونه ..

شليت شنطتي : زين بعد ...
وليد: يالله يالله ...

زينب : اطرش الشغاله معاج ..
نوره: يا ليت ما يصير اروح ابروحي

وليد : يا ويلي ...انا بسرعه زين ..

طلعنا من البيت ... ركب وليد سيارته .. و انا تميت واقفه برع اتريا الشغاله ...

شويه ووقفت سياره جريبنا كنت متغشيه و ما جفت السياره زين .

.سمعت وليد يقول لي : هذا هووو ريلج وصل يالله بروح انا

ركبت سيارة فارس و انا ميته من الخوف فاجأني انه ساكت ...ها الشيء يفسر انه معصب ع الاخر ..

سكت انا بدوري ...جفته يسوق ابسرعه ..وبدا قلبي يدق ابسرعه من الزيغه
ترجيته: فارس لا تسرع ..

فارس بصوت واطي بس كانت نبرته تهديد: جب ..

حطيت ايدي ع جتفه: فارس لا تسرع جي ..

شل ايدي عنه و كأنه متجزز مني ..تميت ساكته ..فارس مينون ..كنت اصيح بداخلي لاني أي حركه ممكن انولي و انموت حضنت ايدي بصدري و كاني اخفف عن نفسي طالعته جفت محرج ..رجعت اطالع الشارع بدقايق وصلنا الشقه ..

امرني : نزلي ..

نزلت ابسرعه من غير ما اقوله شي .. و نزل معاي ..كنت ارتجف ..مدري كيف وصلت الشقه ..فارس محرج ووايد اسباب تخليه يحرج مني .. من دشينا الشقه ..كنت بركض حجرتي بس زخني من جتفي و يلسني ع الكنبه ...صحت ع طول شرات الياهل الي خايف من عقاب والديه ...

سالني بعصبيه : ليش اتصيحين ..؟؟؟ هاه ...

قلته و انا احاول امنع عبراتي من انها تنزل : مما سويت شي غلط...

صرخ علي : انا قلتلج لا اتروحين بيت زينب و رحتي .. و سبق قلتلج لا تتحرشين في مها قمتي و مديتي ايدج عليها ... و الحينه لو ما وصلت بيت زينب كنتي حضرتج بتركبين مع وليد صح ..

رديت ادافع عن نفسي : كانت الشغاله بتيي معاي ..

صرخ علي : انا ما يهمني بتكونين وحدج او لاء ..كل الي يهمني اعرف ليش رحتي بيت زينب هاه ..؟؟

ما قدرت ارد احس صوتي اختفى من صراخه ..كنت ميته من الخوف و اول مره تزوجت فارس ..اجوفه جي محرج و اجوف نفسي جي خايفه منه ..

زخني من جتوفي و قعد يهزني : ردي ليش رحتي بيت زينب ..

قلته و ما اظن انه فهم كلامي : بو منصور اصر اني اتعشى في بيته ..حتى اسال زينب ..
فارس: و ليش ما اتصلتي اتخبريني ..

قلته : اتصلت انت ما رديت علي ... و عقبها زينب قالت منصور يخبرك...

فارس: منصور ما قالي شي ...انا كنت متوقع انج بتروحين هناك ..انتي اصلا ما بتفوتين ..
ها شو يقصد ..غبي اذا كان يفكر اني سرت عشان وليد ..رفعت راسي اطالعه جفته يتاملني و نظرات الغيض و الغضب تارسه عيونه ..ترجيته: بروح حجرتي ..

ابتسم يتطنز : مب قبل ما نتفاهم حبيبي ..

ما انكر ابتسامته استفزتني بس ما قدرت ارد عليه لاني كنت خايفه منه موت ...
تجرب مني : تبين وليد ..

صرخت عليه : لالالالالالا
زخني من لحيتي : عيل شو تفسرين تصرفاتج هاي ...

طالعته مب فاهمه كلامه كمل رمسته: انتي ع بالج اذا قمتي تعانديني في كل شي اطلبه منج ..تتحرين هالشي بيخليني انفر منج و ارجعج راس الخيمه ..

قلت بصوت ضعيف : ما عاندتك ..

رص ع لحيتي فغمضت عيوني متألمه منه : عيل شتسمين تصرفاتج هذي اتمدين ايدج ع مها و عقب تبين وليد اونه يبا يوصلج البيت و مناك مدري وين بتروحين معاه..

كرهت اتهاماتها كرهت عذابه لي ..ما قمت اتحمل كلامه قعدت اضرب ايده و اشمخها باضافري بس يا جبل ما يهز ريح ما تحرك ابمكانه ..ولا كأني قاعده اضربه ..

صرخت : انا اكرهك و بسوي أي شي علشان اتطلق منك يا الحثاله ..

صك ع اسنانه : لا اتقولين حثاله ..جوفي تصرفاتج بالاول ..

صرخت عليه: هدني هدني يا اللوث ..

صرخ علي : جب
ها الكلمه خلتني انطم ..الظاهر هاليوم ما بيمر ع خير ..يالله كم بتحمل هالانسان الغبي
سالني بس كانت نبرة تهديد: ما تبيني ..

رديت ابسرعه من دون تفكير : لا ما اباك روح ل عليا و رجع قصة حبك معاها علشان ترتاح مها
كلماتي له كانت شرات الصفعه بالنسبه و ها الشي الي عبرت عنه ملامح ويهه

كملت كلامي و كأني استخدم الهجوم خير وسيله لدفاع : ع بالك ما اعرف انكم كنتوا اتحبون بعض ..
هددني : صخي نوره ..

صرخت عليه : ليش مب عايبنك كلامي ...انت احمد ربك اني متحمله و عايشه معاك ع وصاختك..مره نهله و مره عليا الله يستر منوه بعد و منوه غيرها ...

شهقت و غطيت ويهي ابيدي لانه عفد صوبي و غيض الدنيا كله فيه ...ييرني من ذراعي وخذني صوب باب الشقه..قلته: هدني هدني ..

بس سحبني شرات ما يسحبون الذبيحه..زين اني قدرت اغطي شعري وويهي..ياني شعور انه بذبحني و بفرني في الزباله ...خفت ركبني السياره و شغلها ..و تحرك ..

صرخت : وين ماخذني ..
ماشي رد و كان يسرع فيلست اضربه علشان يوقف السياره ..

.زخني من رقبتي و حط راسي ع فخذه و كانه يبا يقطع انفاسي ..

.يلست اصيح و حسيت ان حيلي انهد خلاص ...يوم جافني سكت و هديت فج عني .. رفعت راسي جفت طريجنا برع بوظبي

همست : وين بنروح...

حسيت به محرج و ما كان يبا يرمس
ترجيته: ما ابا ارد راس الخيمه ...

طالعني : لا و الله ع كيفج .. و من قال انج بتردين راس الخيمه ...

بلعت ريجي من الخوف ..تميت ساكته ..طلعنا من بوظبي و صرنا في شارع الامارات شهقت يوم جفته يطلع من الشارع و يدش بصحرا ..

صحت من الخوف : وين بتاخذني ...

رد بغيض : ما تبيني ..حتى انا ما اباج .. و مثل ما خذتج شرات الوحده مالها اهل من غير حفله ولا غيره بفرج هني و دوري عاد وليد يوصلج راس الخيمه ...

مرات كنت اشك ان هالانسان مينون و بس الحينه تاكدت يبا يفرني بصحرا و بها الوقت .. وقف سيارته و يييرني و طلعني من الباب الي صوبه ..

ترجيته و انا ميته من الصياح : حرام عليك ...حرام

كان يبا يدزني و كأنه مشمئز مني بس انا كنت زاخه ايده بقوه يلست اترجاه : لا اتخليني هني ابروحي ...
فارس : انتي مكانج هني

ودزني دزه قويه طيحتني ع الارض زخيت اريوليه ما كان حولينا شي غير نجوم متناثره ع صفحة السماء و صوت الهواء :فارس دخيلك لا اتسوي فيني جي انا محتاجتنك ....

حمدت ربي انه طلع فيه احساس وقف ابمكانه رفعني من ع الارض
و قال لي : حسي بالي انا حسيت به هذاك اليوم ...حسي نوره ...

طالعته مب فامه كلامه طنشته و قلته: لا اتخليني ابروحي هني انت مينون .."ويلست اصيح "

دزني ع السياره و لصقت فيها ما سده يبا يضربني ...بس حضن ويهي بيده حسيت بدفأ بس فارس احساسه و مشاعره موليه عكس مشاعري ...

فارس : هذاك اليوم ابوي راغني بعز البرد و المطر ما سوا احساب لي وين بروح ولا وين برقد بليلة ما فيها الا المطر و صوت الرعد و البرق ..

.كلها لانج انتي اشرتي و قلتي انج جفتيني انقز من فوق يدار بيت خالتج عايشه ..
بس ها الي صار و الله العظيم ها الي صار ..

رص ع ايده حسيت ان ويهي بتكسر غمضت اعيوني متعذبه : بس انتي يا الياهل ما اتعرفين شي ..

حسيت ببروده ضربت جسمي فارتجفت لا ارادي حطيت ايدي ع ايدينه الي كانت حاضنه ويهي ..و كأني اطلب منه الدفى بس طنشني
و كمل : انتي ما اتعرفيين ان بهذاك اليوم عفدنا انا و عمور و خليفه انصكر ع الحمام يوم طاحت الامطار ..ولا
كنتي اتعرفين ان عمور رغم صغر سنه كان يجابل نهله دوووم ورا بيتهم بها المكان الي كانت فيه نهله اتصيح و منهاره ..

فجيت اعيوني مب مصدقه جذب فارس يجذب علي ..ما قدرت اقول شي من الصدمه ...

فارس : كنا فوق السطح عند الحمام و سمعنا نهله و حميد يتضاربون .. لان نهله مخربه سيكله الي شراه له

ابويي ..فضربها و بهدلها و كان يبا يكسر عروستها بس ما خلته ..علشان جي ضربها و عقب ظهر مع امه و محمد ...ما اذكر وين راييحين..وما ادري اذا نهله اتصلت فيه بس كنا فوق السطح ..

عمور كان يعرف ان نهله بتتصل فيه ..علشان جي قال بنزل بروح لها انا منعته لان محد كان موجود في البيت غيرها و ما يستوي بس كانت نهله كاسره خاطره ..

لانها متبهدله و حميد ضاربنها ضرب كل ها علشان سيكله ...بس عمور عاندني .. خلينا خليفه فوق السطح مع الحمام .


.و رحت مع عمور اترياه فوق اليدار كانت نهله تتريا عمور ...

مع انه ما رد عليها بس كانت واقفه بنفس المكان الي يتجابلون فيه ..

علشان جي تفاجأت يوم جافت عمور طلع لها فجأه فقعدت اتصرخ ع بالها حرامي ...كان بيقولها انا عمور بس انتي مدري من وين طلعتي لنا..

و للاسف نهله ما عرفت عمور لان الدنيا كانت مظلمه و غير ان المطر يشوش النظر فاندس ورا البيت و انا نقزت ف بيتنا لاني كنت فوق اليدار ...و انتي جفتيني ..و خمنت ع كيفج ...

جذب جذب ما اصدق حاولت اتذكر الموقف الي مر عليه سنين ..
.معقوله انا ظلمته ..
علشان جي عمور كان يدافع عن فارس ..

و علشان جي دوم عمور يقولني نهله مالها ذنب.

.و علشان جي نهله سكتت عقب ما ياها خالي احمد و خالوه مريم وودها البيت ما نطقت ولا كلمه ..

.يعني نهله ما كان حد يبا يعتدي عليها كل ها كان حميد متضارب معاها ..

.ليش يا ربي يصير جي ليش يا ربي ... تميت اطالع فارس ادور الصج بعيونه ...

حاولت اجذبه بس كافي الدموع الي جفتها نازله من اعيونه اتخليني اجذب روحي و اصدقه ..بغيت احضنه اضمه الملم جروحه الي كانت ابسببي اداويها اسوي أي شي بس ما اجوف دموعك يا فارس يا ويلي من الي سويته ما بسامح روحي .موليه ...

.بس ما قدرت خفت ..شي منعني يوم سمعته يشهق و عبراته تنزل و اتوه بين لحيته قال لي : انتي خليتي ابوي يروغني من دون سبب ...حرمتيني من ابوي حرمتني من اهلي شوهتي سمعتي ..حملتيني ذنب انا ما سويته بس بسبب حقدج و كرهج لي ..

ما تحملت كلامه وايد وايد علي ما تحملت غطيت ايدي بويهي و يلست ع الارض اصيح بصوت عالي .. و انا شدراني ليش ما دافعت عن روحك ...

كان المفروض نهله ترمس ..او عمور أي حد ..قعدت منهاره ..بس دموعي و عذابي ما كنت تسوى عند فارس لانه نزل ع ارض

و قال لي بكل حقد: الحينه ادفعي ثمن غلطتج..ذوقي الي انا ذقته ..

و هدني ورجع يركب سيارته ..شغلها تخبلت ..بتم ابروحي في صحرا ما فيها انيس ولا ونيس .. ما فيها غير رمال ..يلس اصيح بصوت عالي فارس لا اتخليني ابروحي ...

فجأة خطر ع بالي الحلم الي حلمته و نحن رايحين جزيرة قشم.. يوم طحت بالحفره و قعدت ازقر فارس يطلعني بس ما طلعني .عرفت اني خلاص ..بتم هني ل ما اموت ..

.زخيت الرمل و انا ميته صحت صياح...وكأني خلاص استسلمت للواقع الي انا قاعده امر فيه ..يالله اشكثر ظلمتك يا فارس يالله اتسامحني ..

.الي يسويه فيني فارس شويه بحقه ...رفعت راسي المح سيارة فارس ..

ع بالي اختفت بس جفته وقف فجاه .. و نزل و ياه صوبي ...طالعته بنظرات عذاب نظرات اني اترجاه انه يسامحني ما كان أي تعبير مرسوم ابوييهه ...قومني و قادني صوب سيارته ...

كنت احس برجفه ..من كل الي قاعد يصير و كأني ب حلم ..عقبها ما اذكر شو الي صار لان الدنيا ظلمت بعيوني و فقدت الاحساس بكل شي ...

بطلت اعيوني مدري كيف وصل حجرة فارس ...ما اذكر شيء كل الي اتذكره دموع فارس و هو يحكي لي انه ظلمته...يا ليته خلني في الصحرا ابروحي يا ليتني مت ...يالله أي احساس بالذنب بخوز عني الحينه ...حضنت المخده و يلست اصيح بصوت عالي ....

يا ويلي اشكثر ظلمت هالانسان.. زين عمور ليش ما قالي ...ليش فارس ما ادافع عن نفسه جدام خالي احمد .... يا ربي انا شو سويت بها الانسان ..

.طاح الخاتم بحضن ايدي ..خاتم فارس الي كنت معلقته بسلسله ع رقبتي ...حضنته بقوه و يلست اصيح ...سمعت صوت باب ينفتح..ضميت الخاتم تحت ملابسي .

.و صديت الصوب الثاني ...ابصراحه مالي ويهه اجابل فارس ...اصلا كيف بعيش معاه ...حطيت ايدي ع بطني يا رب يا رب شكوكي تطلع غلط..و ما اكون حامل ..يا رب ...حضنت ايدي يوم سمعت صوت اريوله تجرب مني ...
سمعته يزقرني : نوره ..راقده ...

غمضت اعيوني بقوه ................."ماشي رد"
فارس : نوره ..
ما تحملت فيلست اصيح سمع شهقاتي شل عني اللحاف جافني مغطيه ويهي بايدي ..

سالني بصوت هادي : حق شو اتصيح الحينه ما تعبتي ..؟؟؟
نوره .............."ما عرفت شو اقوله .."

قعد جريب مني و حاول يشيل ايدي من ويهي علشان يجوفني بس انا ما طعت ..
فارس : بسج صياح..

مسح دموعي حسيت بلمسته كانت حنونه و رقيقه ..مدري كم طاف من الوقت.. بس اكيد فتره طويله ولا ليش اعصاب فارس هدت .. و غير معاملته معاي ..

رديت له: مالي ويه اجابلك..
تجرب مني اكثر : ليش ...؟؟

طالعته و كنت شويه برجع اصيح: شو ليش ...الي سويته فيك مب شويه ..حطيت ويهي ع ركبي و لفيت ويهي يذراعي و رجعت اصيح .

.حسبته بحضني بسكتني بيقول سامحتج خلاص بس قام عني وراح بعيد..رفعت راسي جفت يطالع برع ...

همست : سامحني انا استاهل الي ياني منك ...
طالعني ابتسم و كانه يتطنز : بعدني ما سويت شي ..

طالعته كان كلامه تهديد بس نبرة صوته عادية جدا فاستغربت منه ...رجع و قعد ع طرف الشبريه جريب مني زخ ايدي ..ما صدقت رصيت ع اصابعه ...كنت ابا أي شي يطمني صوبه ...

قلته: اكيد تكرهني موت ...ما الومك الحينه ليش فكرت تزوجني و تنتقم مني ..بس عمور ..

قاطعني : مدري ليش تبين تفتحين السالفه و تعيدين فيها و اتزيدين ...نحن تزوجنا خلاص

رفعت ايده و حطيتها بين عيوني و يلست اصيح : انا انا ....."ما عرفت شو اقول ضاعت كل المعاني الي كنت ابا انطقها ..و أي كلام بيعبر عن الي سويته ب فارس ..

لف ذراعه ع جتفي و تجرب مني : نوره لا اتصيحين ..ما اتحمل اجوفج متعذبه جي ..مدري من ساعه كيف سويت الي سويته بس كانت لحظه غضب ..مينون انا اذا خليتج ابروحج هناك ..

رفعت راسي اطالعه : استاهل ..

ابتسم: كنتي ياهل ..ياهل و بتمين بنظري ياهل علشان ما احاسبج ع الي بسويه فيني ...

ترجيته : انا مستعده اقبل باي قرار تتخذه بعلاقتنا بس سامحني
ابتسم باسني فوق راسي ووقف :ارقدي علشان ارقد باجر دوام..

سالته مستغربه: كم الساعه ..؟؟
فارس : ثلاث الفير ...

نوره: مب لازم اتروح الدوام تم معاي ..ابا ارمسك "كنت ابا احط النقاط ع الحروف ..و احط حد لكل شي "
فارس : بعد ما ارجع من الدوام ..تبين منصور ياكلني ..

سالته: ابا افهم منوه المدير انته ولا هوه ..

فارس : هههه انا بس من دونه ما اسوا..ولا وصلنا للي وصلنا له ..

حسيت براحه يوم جفت فارس رجع يسولف و يضحك معاي ...بس ما اعرف شو موقفه مني ..للحين ما قال انه سامحني او قال انه يحبني .

.مدري مدري شو موقفه مني بالضبط ...حسيت به رقد من حط راسه ع المخده بس انا تميت اتجلب ..افكر بالي صار زمان ...صليت الفير .. حاولت ارقد ما قدرت ...ما صدقت طلع الصباح قومت فارس علشان يروح الدوام ...نش بكسل ..

حسيت رغم كل الي صار بينا بعد شي حاجز من بينا .. و ها الحاجز امبنى و كبر يوم جفت موبايل فارس يرن و ظاهر بالشاشه اسم عليا ...

مت من الغيض ...باي حق احرج و اعصب ..كافي اني بهدلت حياته...رحت المطبخ اسوي له ريوق ...بس ما طاع يتريق اللهم شرب حليب و طلع مستعيل ...

كان خاطري اعرف كلم عليا او لاء و ليش اصلا متصلبه بها الوقت ...قمت ارتب الشقه و انظفها ..طاحت اعيوني ع الهدايا الي يبتها انا و فارس لاهله من البحرين .

.الله ع الايام الي قضيناها في البحرين ...خطرت ع بالي فكره احط فيها حد و نهايه ل علاقتي ب فارس يا اما يختارني و يسامحني او يختار عليا ....

كتبت له رساله

" فارس ..سامحني ع هالحركه بس كان لازم انحط حد لكل شي ...كتبت لك هاي الرساله ..علشان اخبرك اني في ضاحيتك اترياك ...بس قبل لا اتيييني فكر زين في القرار الي بتتخذه ..اذا جفتك اليوم في الضاحيه بعرف انك سامحتني و قبلت اتعيش معاي حياتك..و اذا ما ييت بعرف انك مستحيل اتسامحني و انك رديت ل خطيبتك و الي عمرها ما ضرتك و ابصراحه تستاهلك اكثر مني .
.بس انا بتم بالضاحيه يومين ..و اذا ما جفتك برجع راس الخيمه و بنسى اني عشت معاك في يوم ...سامحني ما عندي غير هالطريقه ..و ما اخترت الضاحيه الا لاني اول مره احس اني اموت بك و احيا و اني ما اقدر اعيش من دونك يوم كنا في الضاحيه علشان جي ابا ابني حياتي معاك هناك...اتمنى اني اجوفك ...هناك
"نوره"

يتني الصيحه و انا اكتب الرساله بستها و حطيتها ع الطاوله..و زهبت لي شنطه حطيت لي ثياب الي احتاجها كم يوم ..اكيد فارس بييني مستحيل يودرني ..

.فكرت اشيل الموبايل بس قلت ما يحتاي اخرتها قررت اخذه للضروره و غلقته .....شلت شنطتي ..ووقفت تاكسي كنت ميته من الخوف ...لان الضاحيه وايد بعيده ..حسيت الي اسويه جنون ...

بس حركه بتعجب فارس ..خذت نفس طويل و انا اتخيل كيف بستقبله في الضاحية ...
**
مها : يالله صكري وصلت الشقه ..؟؟
عليا: مشكوره خليتني ارمس فارس بحجة اوراق واجباتج ...

مها: زين زين اقولج ما ابا حد يعرف اني رايحه شقة فارس ..ابا اتطمش ل نوره اكيد جسمها متكسر ..ههههه خبرت عليها فارس و هو حرج مدري شو صار من بينهم ..؟؟

عليا: زين بتتاخرين ع دوامج..
مها: ابرايه الا هي ربع ساعه بروح اتطمش لحرمة اخوي ..وين قالج الاوراق موجوده ..؟؟
عليا : مدري قال بخبر نوره وين بحطها ...

مها : زين يالله ادعي لنا
عليا: هههههههههه مع السلامه ..

مها: فيمان الله ..

دقت باب الشقه كذا مره ما فتحت ..شو السالفه وينها !! معقوله ظاهره مكان بها الوقت ..طلعت مفتاح الشقه الي عندي و فجيت الباب ..كانت ريحة الشقه دخون ...

طاحت اعيوني ع ورقة موجوده ع الطاولة الطعام ..عقدت حياتي معقوله فارس حط ورقة واجباتي هني !! و ليش مربعنها جي ..
زقرت : نوره ...؟؟
ماشي رد ...؟؟؟

هزيت جتفي و شلت الورقه من ع الطاوله ...طلعت من الشقه ..و قفلتها ..فجيت الورقه اشيك ع الواجب ...بس شي ثاني مكتوب شو الي قاعد يصير يعني نوره راحت الضاحيه !! مينونه هذي ..

.ابتسمت .. و شقيت الورقه و عقيدتها باقرب زباله و فارس شدراه .زين يت منها و فرت علي و على عليا.و طلعت من البنايه ...اتصلت ابفارس

مها: فارس محد فتح لي باب الشقه ...؟؟
فارس : و الله يمكن نوره رقدت

مها: و الحينه شو بسوي برسب بسببك ..
فارس : هههههههه لا ما بترسبين ..انا بروح الشقه و بيبها لج ...

مها : امممممممم تدري خلاص بعتذر من الاستاذ باجر باخذها مب مشكله ولا اتعب روحك ..
فارس: اكيد..

مها: هي اكيد "بس ما ابا يكتشف ان نوره طلعت من الشقه ابسرعه ..خلها تبعد اكثر و اكثر .."

**

نزلت من التاكسي ..كنت متيه من الخوف الحمدلله طلع عنده ضمير .. ووصلني بأمان ...دقيت الباب العود..فج خان دريشة حجرته الظاهر عرفني لانه ع طول من جافني عفد و فج لي الباب ... و يلس يدور كأنه يدور فارس ..

قلته: فارس بعدين بيي
خان: بابا فارس ما في يسوي تلفون ...

نوره: ما عليه انت لا اتسوي له عن تخرب علي كل شي ..هو ابروحه بيي اليوم ..المهم انا بتم هني كم يوم ..
هز راسه دشيت و انا اقوله : اشك انك فهمت شي ..

دشيت ..خذت نفس طويل و انا اطالع الضاحيه يالله اشكبرها ...حسيت بالانتعاش يالله يا نوره عدي الساعات لي ما يوصل فارس ...رحت صوب الفله ..دشيت المطبخ ..

جفت الثلاجه فاضيه امممممم لازم اسوي اكل حق فارس ... زقرت خان ..ياني يتراكض من بعيد ..طرشته يشتري سامان ...

ف البدايه كنت خايفه اتم ابروحي هني مع ها الهندي بس اذكر خالي حسن مره قال انه معاهم من كان صبي و الحينه اجوفه شيبه يعني عادي ينوثق فيه ...

.دشيت الفله و قفلت علي البيباب علشان اتطمن ...ادري فارس بعصب علي .بس ييته لي كم بتسوى حياتي كلها بتتغير .....يالله يوصل ابسرعه ...

**
فج فارس باب الشقه .. كان متعود يجوف نوره قاعده ع الكنبه اطالع التلفزيون او يمكن انها تترياه ...عقد حياته يوم جافها مب يالسه ابمكانها ...

فارس : نوره ...؟؟ نوره ..؟؟

سرت المطبخ جفته فاضي .. و الظاهر انها ما طبخت .!! لا يكون زعلانه و راحت بيت خالي حسن ..؟؟اتسويها !! ما اظن ...قمت ادور عليها في الحمامات شرات المينون ...

اخرتها انتبهت ان شنطتها الصغيره محد..فجيت كبتها جفت ماخذه من ثيابها بس باجي اغراضها موجوده ..؟؟ وينها !! راس الخيمه ..؟؟ اليوم وليد عنده سباق ب عوافي !!لالا نوره ما اتسويها ...اتصلت ابسرعه ب منصور ..

منصور: هلا فارس ..
فارس يرمس ابسرعه: وليد وينه ...؟؟
منصور : وليد مب موجود ليش !

صرخ عليه محرج: اقولك وين وليد ...
منصور: نزل راس الخيمه من الصبح ..تدري عنده مسابقه في عوافي ..

فارس يرتجف : كم رقم موبايله ..
منصور : فارس شو مستوي ...؟؟

فارس محرج عليه: انته يا البارد عطني رقم موبايله ولا ترمس زود ...

منصور يعرف ان فارس يوم يحرج تطلع منه أي رمسه ..بس منصور كان خايف ان وليد امسوي شي جايد.. و عادي فارس يجتله ...عطاه رقم وليد..و ما يعرف كيف فارس حفظه مره وحده ..

اتصل فارس ب وليد و كانت اصابع ايده ترتجف ..بس ماشي رد ..اتصل فوق العشر ماشي رد..كان يمشي بالشقه شرات الوحش المفترس باي لحظه بنقض ع فريسته ..

.لمح التلفزيون ماشي فوقه موبايل ..يعني نوره ماخذه موبايلها ..اتصل برقمها ..بس عطاه خارج عن نطاق الخدمه ...


حس فارس انه فقد اعصابه معقوله نوره اتقص عليه ..هي ليش لا ..بعد الي سويته البارحه ..اكيد ما بتم معاي لحظه وحده رن موبايله جاف المتصل خان

فارس : متفيج ها داق الحينه ...

..فر موبايله بعصبيه ع الارض ..و قعد ع الكنبه...شو بخليها اتروح مني جي بها السهوله ...شل مفاتيح سيارته ..و طلع ناوي يلحق وليد و نوره ..

.و حلف بداخله اذا جافهم بجتلهم ...حرك سيارته باقصى سرعته ....يا ويلج مني نوره يا ويلج مني ...انا الغلطان جان خليتج البارحه في شارع الامارات ابروحج زين.

.و ضرب صدره بقوه..مالت على ها القلب الي يموت و يضعف جدام حرمه ....و هو يضرب صدره فقد تحكم بسيارته و خاصه انه كان يسرع ..فانجلبت فيه .. و ظلمت الدنيا بعيونه ...و فقد الاحساس بكل شي ..
**

ابتسمت نوره و هي اطالع الحوض الي كان موجود ورا الفله .. هني و بها المكان ...حست بشعور ..غريب بالنسبه لها بس حلو .
.ما كنت تعرف ان الي يحب لازم يحس بها المشاعر ...

توها بس من جريب عرفت انها اتحب ..اتحب فارس ..اتجدمت .. و يلست ع الكرسي و غمضت اعيونها تذكر قبل كم شهر ..

شو صار بينها و بين فارس ....الله يا روعة هالانسان يخليج اتحبينه غصبن عليج ان كان رايق او محرج ...طالعت الساعه جفتها وحده فارس جريب يوصل ..ربعت صوب المطبخ.. و طبخت له برياني...اخيرا ضبطت هاي الطبخه..سويت السلطه و الشاي ..ورحت اتغسل ...

طبعا دوم الفله مخلتنها مقفوله ...علشان احس بالامان اكثر ...خلصت يلست اتريا فارس ...ماشي هني تلفزيون..؟؟ و الواحد يرتاح بها المكان يصفي افكاره ...غمضت اعيوني ..و غفلت..

.نشيت طالعت المكان..لمحت الساعه 4 العصر ..فارس ما ياه ..ربعت ادور عليه من حجره ل حجرة رحت المطبخ ...ما في شي يدل ع انه ياه...مستحيل فارس ما ايي ..مستحيل ....؟؟

حضنت ايدي مب امصدقه فارس ما يباني ... كنت واثقه اني بجوفه...اكيد صار له ظرف و تاخر انا متاكده ..
.ركضت صوب شنطتي .. واتصل بموبايله بس ماشي رد...شو يعني !!! اتصلت اكثر من مره ...

ما ايرد علي اخرتها غلق الموبايل ...طاح الموبايل من ايدي كنت مصدومه فارس ما يباني ما صدق اني طلعت من عنده..يلست ع ركبي منهاره و قعدت اصيح ..

.طوال هاليوم ما اذكر اني كلت شي ...كنت كل اصيح ...اخرتها خففت عن نفسي ..اتذكرت نظرات فارس لي ابتسامته..لمساته لي ...
مستحيل ما يحبني ..معقوله ..كل جذب ..طالعت روحي بالمنظره جفت حالي ..اتذكرت كلماته "بتدفعين الثمن " صج فارس حطمني دمرني و الدليل جوفوا حالتي خلني احبه و اعشقه عقب ما كنت اكرهه ... لا لا ...

فارس يحبني ...بترياه هالاسبوع .. و اذا ما ياه هذيج الساعه عندي حق ..اني اقول ما يباني
مرت علي الايام و انا كل يوم ادعي ربي ..ان ايي فارس ..

مرات بلحظات ضعف افكر اتصل ب زينب بس ارجع بقراري انا سويت كل ها علشان اعرف موقف و مشاعر فارس صوبي بس للاسف ..طلعت الخاتم الي كان متعلق برقبتي عن طريق السلسه ..دمعت اعيوني ..

معقوله فارس باعني ..ما يباني ..يستوي !! باجر الاربعاء مرت خمسة تيام و انا عايشه ما بين جدران هذي الضاحيه حفظت كل شبر فيها ... كنت اعد الدقايق و الساعات ...

و انا اتريا طيف فارس اييني بس للاسف ...الظاهر لازم اروح راس الخيمه ...حتى ما فكر يتصل فيني ...طلعت موبايلي ...اممممممم منوه بياخذني راس الخيمه !! ما اتذكر رقم خليفه او حميد ..!! حميد ..

علشان يشمت فيني !! يا الله شو اسوي .

.فريت شنطتي بالارض و قعدت اصيح منهاره ...شسوي الحينه ..طاحت اعيوني ع ورقة صغيره ..رقم نوف ..نوف هني ...محد بساعدني غيرها ..

طلعت موبايلي و اتصلت بالرقم الموجود ع الورقه و اصابع ايدي ترتجف ..ماشي غيرها ..واذا ما لقيتها ..خلاص بكون ضعت ...

ارتحت يوم سمعت صوت نوف : الو ..
رديت ابسرعه : نوف انا نوره ..

نوف : هلالالا نوره وينج انتي ..وين الي بتتصل ..
صحت منهاره: نوف ساعديني ..

نوف خايفه: الو نوره شو بلاج نوره ...؟؟
مسحت دموعي و مسكت اعصابي : محتاجتنج ..؟؟

نوف: بعدني ربيعتج لو فرقتنا الظروف ...وين انتي ..
نوره: انتي الي وينج ما بتنزلين راس الخيمه..؟؟

نوف : لا ما بنزل ليش ..
يلست منهاره : قولي و الله ""وصحت "

نوف: نوره ارمسي عدل شو بلاج .. وين انتي ...؟؟

بلعت ريجي و حاولت اتمالك اعصابي : انا بضاحيه فارس بالعجبان ..انا ابرجع راس الخيمه انا ابروحي هني ما عندي غيرج ..
نوف : وينه ريلج..

نوره تمسح دموعها: مممممدري نوف ممممدري ..

نوف: سمعي حبيبتي ..اخوي بنزل بنزل معاه مب مشكله بس دليني وين الضاحيه بالضبط..
نوره : ما اعرف ادليج بالضبط ..متى متى بتييني ...

نوف : بتصل باخوي و برد لج خبر ..
نوره: لا اتخبرين حد دخيلج..

نوف : ما يهمج بنكون ع اتصال ..بس لا اتصيح و اتسوين ابروحج جي ..
نوره : زين ردي لي خبر ابسرعه ..

نوف : ما يهمج ..

" خذ راحتك صبري على بعدك كبير ... لا تنزعج مني أبد دنياك عاشرها وسير لا تتعب أفكارك معاي أنا مجرد ذكريات ... راحت مع أحلام السنين هذا المقدر والمصير ...خذ راحتك عيش الهنا عيش الوفا مع من تريد ... عسى الليالي تسعدك وتهنى مع الجو الجديد "

وغلاك عندي ما حسدك ما دامك إنته المستفيد ... لكن ما خبي عليك ما عود لك مهما يصير"\مستحيل اعود لك يا فارس ...مسحت دموعي ..لو كان عندي اهل ..ما صار هذا حالي .. لو كان عند اخوي يعتمد عليه ما كان صار ها حالي ...لكن عهدا علي يا فارس ...ان جمعتنا الايام في يوم ما اردلك ... ابوي صد عني ما ترجيته .ولا فكرت ادوره .و انت من تطلع علشان اترجاك
عقب خمس ساعات ...وقفت سيارة اخو نوف حذال باب الضاحيه ...

كنت اجوف علامات الاستفاهم ابويه خان ...بس ما عطيته فرصه يسأل شكرته و عطيته بيزات ..علشان الخدمه الي خدمني اياها مدة خمسة اتيام..

و بالمره عطيته موبايل فارس بعد ما اغلقته و طلبت منه يعطيه ل فارس اذا جافه ف يوم ...

ركبت سيارة نوف ...
حسيت بالاحراج لاني تعبت الجماعه معاي ..تميت طوال الدرب ساكته ..

و الدموع اتبلل غشوتي ... ودعت بوظبي وودعت اجمل و احلى ايام عمري قضيتها مع اغلى انسان سكن و اتربع في عرش قلبي ...

دخلت شقتي..شقتي انا و عمور .. انتهت رحلة عذابي .. رجعت ما معي غير دموع و اهات ...و ذكريات حلوه بس تجرحني ..انتهى كل شي ...يلست اطالع الشقه .. و كأني كنت في حلم .. و صحيت منه ..فارس اه يا فارس .. انت سبب جروحي و عذابي ....غمضت اعيوني و اطلقت ل عبراتي العنان ...

مسحت ادموعي يوم رن تلفون الشقه ..منوه بتصل فيني !!اكيد نوف انا عطيتها رقم الشقه ..عقب ما عطيت الموبايل حق خان ..
نوف: شخبارج نوره ..

همست: الحمدلله ع كل حال ..
نوف: جان تبين بيي اقعد معاج هاليومين تدرين ريلي ما نزل ...شو قلتي ..

ابتسمت من خاطري فديتج نوف : مشكوره نوف ما ابا اتعبج معاي بس ..وقت ما اتجوفين روحج فاضيه زوريني ..
نوف: ما يهمج ....تبين حايه اماره..

نوره: نوف ما ابا حد يعرف اني رديت راس الخيمه دخيلج أي حد يسالج عني قولي مدري ..؟؟
نوف: ليش كل ها شو مستوي لج ..
نوره: بعدين بخبرج المهم مشكوره ع كل شي ..

نوف: العفو ..و ما يهمج ترانا ارباعه ..
نوره: تسلمين ...
نوف: يالله فيمان الله ..

نوره: مع السلامه ..

صكرت عن نوف .. و قررت اني انسى كل شي و ابدا حياه يديده ابعيده عن فارس و غيره ...و خل تتحسن اوضاعي عقبها بدور الحجه المناسبه علشان اخبرها حق قوم خالاتي ....اتنهدت ..بس شغلي ..؟؟ من وين بدبر ل عمري ...رحت صوب شنطتي و طلعت بطاقة احسابي ...

اذكر انا امخليه مبلغ بقزر به اموري لي ما احصل لي وظيفه بس وين ...؟؟ اتنهدت و الله انك حطمتني و دمرتني ..يا فارس ..صليت العشى..ما كان لي نفس اكل ..رقدت ع طول ..حاولت ارقد تميت اتجلب و اتجلب ..خيال فارس و صورته ما اتفارقني موليه ...يلست اصيح و اضرب المخده ..ليش جي سوا فيني ...ليش ...؟؟


سميت بالرحمن و يلست اقرا قران لي ما حسيت ابراحه و رقدت ع طول ...فجيت اعيوني يوم جفت اشعة الشمس متسلله ع غرفتي ..عفدت ابسرعه و صليت الفير ...حسيت اني متكسره وتعبانه ...قعدت ع الكنبه ...رقدت ساعه عقبها نشيت ..مدري من وين يايني هالخمول كله ....

رحت المطبخ..شفته و كأنه مهجور من سنين ...يلست انظف الشقه و ارتبها ...دشيت حجرة عمور ...هاجت فيني الذكرى..يلست ع شبريته و قعدت اصيح..ها يزاتي ...سويت و سويت بس علشان ازوجك الي تسعدك و انت جوف شو سويت فيني ...؟؟
طلعت من حجرة و عمور و حلفت اني ما ادشها موليه ... عقب ما خلصت تنظيف البيت ..طلعت ...جفت سيارتي اموقفه..ابتسمت ..مدري ليش يمكن كل شي رد مثل اول ..بس في داخلي ما ودي ارجع مثل اول بالعكس ابا اكمل حياتي مع فارس ..بس فارس ما يباني ..

.اتنهدت تنهيدت عذاب ...حاولت اشغل سيارتي بس ما طاعت تشتغل و كيف تشتغل و هي صار لها شهور ما اشتغلت ....وقفت تاكسي .. و رحت البنك ...

علشان اسحب لي مبلغ ادبر به حياتي بها الايام .... كانت صدمه بالنسبه لي ...ما صدقت حسبت ان شي غلط او افلوس نازله لي بالغلط..دشيت قسم الحريم ..استفسر و اتاكد من رصيدي ...

طلع صح ها الفلوس بالرصيد ..لي .. و ماشي أي غلط..طلبت منهم يخبروني متى نزلت هالبيزات يمكن من عمور يستوي ...؟؟ عقب ما يلست اتسوي بالكمبيوتر قالت لي كانت تنزل لي كل بدايه شهر ..خمستلاف درهم ...
شهقت : من أي شهر ..
ردت علي : اممممم من شهر سته ..
نوره: مشكوره خلاص عرفت ..

و طلعت من البنك فارس كان ينزل لي بحسابي كل بدايه الشهر ..بدال دوامي ..اه يا فارس ..شو اقولك عنك..بس ..بس حلفت بداخلي اني ما اصرف منها شي ..كافي البيزات الي عندي بتكفيني .سحبت مبلغ يكفيني اشتري لي موبايل .. و رحت طلعت لي بطاقة تلفوني رقم جديد..

.احسن علشان محد يعرف رقمي ...عقبها رحت اشتري كم غرض ..لان ما بقى شي ع شهر رمضان غير اسبوع ...فكرت امر العياده علشان اقطع الشك باليقين بس كنت خايفه .. و بالمره حسيت اني تعبانه لاني اليوم لفيت وايد ..علشان جي ..طنشت و رجعت الشقه ...

طارت افكاري صوب فارس ..ليش ما قال لي انه كان يحط لي مبلغ شهريا ...شو قصده من هالحركه يعني كان متوقع ان نهايه علاقتي فيه ..بتكون جي ..ابتسمت اتطنز يمكن ما يبا يحس انه ظلمني ..يوم طلعني من دوامي ...يلست اطالع السقف ..و ادموع تنزل مني ..كنت احس اني اذوق طعم العذاب ...شسوي ..اروح لمنوه ...؟؟

منوه بساعدني ...؟؟ يالله شسوي ...بها العالم الكبير ابروحي ...في اليوم الثاني اتصلت بي نوف .. و اتفجت معاها انروح العياده .. كنت متلومه لان اخوها بياخذنا ..بس عقب قالت ان طريج العياده ابدربه ..

عقب ساعه كنت عند الدكتور ...فحصت لي و كنت ادعي ربي من كل خاطري ...ان شكوكي تطلع مب في محلها ...بس للاسف ..مثل ها الاحساس صعب انج تنخدعين فيه .
.بشرتني اني حامل من شهر و نص .. و باركت لي بس للاسف ما تدري انها طعنتني في الصميم.. ها الخبر ما ياه في محله ابد ..طلعت و انا كارهه حياتي بس شو اسوي كتبت ربي و لازم ارضى بقدري ...تميت ساكته طول الدرب مب رايمه اتكلم ...

نوف : نوره هاتي مفاتيح سيارتج بخلي عقاب يصلحها ..
رديت : لا ما يحتاي ابروحي بتصرف ..
نوف: لا انا خبرته خلاص هاتي لا تستوي سخيفه ..

ما تحملت حطيت ايدي ع ويهي و يلست اصيح منهاره ..شو اسوي ابروحي من غير ريال لا شغل ولا مشغله و باجر بيكون في حياتي طفل كيف اوفر له حياته صحت كنت يأسه من حياتي مب عارفه شسوي
حضنتني نوف : بلاج فديتج نوره شو صار لج ...

نسيت روحي و نسيت ان اخو نوف موجود حاولت امسك اعصابي بس ما قدرت كانت مشاعري و دموعي اقوى مني بوايد ..

نوف: علشاني خاطري نوره لا اتسوين ابروحج جي ..
اخيرا وصلني الشعور يحسسني الي قاعده اسويه سخيفه ..نزلت ع طول من السياره متلومه من اخو نوف ..
عطيتها مفاتيح سيارتي ... و رحت شقتي ..غطيت ويهي بايدي شسوي الحينه .. فارس ما يدري اني حامل ...يالله شسوي ..حطيت ايدي ع بطني و رصيت عليها .. ما ابا ولدي يطلع شراتي ..ينولد ع الدنيا و ما يعرف منوه ابوه ..انهرت ..و يلست اصيح ..

.ما ابا ولدي يطلع شراتي ..طحت ع الارض اصيح ..منو بخفف عني معاناتي ..منو بمسح عني دمعي و يحضني .. منوه و منوه ..بت في ها العالم وحيده ...لا لي انيس ولا ونيس ..محد يعرف عني شي ..حتى فارس ما تنزل يحاول يوصل لي ...ولا اهلي ..معقوله ما خبرهم انا انفصلنا ....


"من الهجر يا صاح شفت المضره...جرحي مثل جرحك له سنين ماطاب..حتى النظر مايفيد وان جاك عذره..حبه سطى في الجرف والوجد نهاب...زوله وسط عيني وقلبي مقره...لو غاب عني طيفه اليوم غاب...شوقه عذاب وشوفتي له بالحسره...ليته درا في قلبي صار ...حتى النظر مايفيد وان جاك عذره...عمري مضى مابين حلوه ومره....والعمر فاني والهوى كله اسباب...احبس دموعا سالت اليوم نثره...واكتم وداري دمعتك عند الاجناب"

..فتح فارس اعيونه طالع المكان مستغرب جاف كل حوليه اجهزه ...عرف انه ف المستشفى !!حس بصداع ..و جسمه و كأنه ذبلان مب رايم يتحرك ...

رجع و غمض اعيونه ..ما يتذكر شي شو الي صار له و ليش هو هني .. و من متى ...؟؟؟ رجع مره ثانيه و فتح اعيونه يوم سمع حوليه اصوات ..طالع ريال مجابلنه..
منصور: فارس فارس ...تسمعني ..

تميت اطالعه منوه ها شكله مب غريب علي ..؟؟ ربع منصور برع يزقر الدكاتره ..شويه جاف الغرفه امتلت بالممرضات و الدكاتره كنت اطالعهم مستغرب شو السالفه !! ..

سمعت الدكتور يقول : كل شي تمام ..الضغط و ضربات القلب كلها تمام ...

رفعت ايدي بصعوبه احاول اشييل الاوكسجين من ع ويهي ..ساعدني الدكتور و شاله عني ..
الدكتور: الحمدلله ع السلامه ..أيه النومه الطويله دي يا فارس ..
حاولت ارمس ارد عليه بس ما قدرت ...
الدكتور : طبعا انا عارف ..مش قادر تتكلم..لسه ارتاح شويه و مع الوقت ان شاء الله كل حاجه ترجع زي ما كانت ...
غمضت اعيوني شو السالفه شو مستوي ...رجعت بطلتها يوم سمعت صوت واحد يزقرني
منصور: الحمدلله ع السلامه فارس ..
تميت اطالعه منصور ها منصور ..ريل زينب اختي !!!
رفعت ايدي و زخني ..جفت دموعه ع خده ..ابتسمت له اطمنه اني انا ابخير ...

منصور : كلنا خفنا عليك.. كلنا انحاتيك..توني اتصلت بخالي حسن الحينه كلهم يايين ...يتطمنون عليك ...
الدكتور: ما تتكلمش كتير يا منصور ...
منصور: يا دكتور فارس حي ..

الدكتور: الحمدلله ...
عرفت اني كنت في غيبوبه بس مدري كم صار لي ...هني ..

منصور: متى بتاخذونه القسم ...؟؟ هو ابخير الحينه ..
الدكتور: حنعمل اشعه و تحاليل بعد ما نطمن ح، ننقله القسم ..

منصور: مشكور دكتور ما اتقصر ...
الدكتور: انا عارف انك اتصلت باهلك..بس مش عاوز امة محمد كلها تدخل الغرفه دي شخصين شخصين بس ..
كنت اطالع الدكتور و منصور يسولفون ولا ادري شو السالفه ... ..دش علينا خالي حسن ..بديت اتذكر هم واحد واحد ...
خالي حسن: دكتور ولدي ما يتكلم..

الدكتور: ان شاء الله بكره دلوقتي ما يقدرش يبذل أي مجهود ..سيبوو براحتو ..يالله يا فارس شد حيلك ..عاوزين هم و عزيمه علشان ترجع زي ما كنت و احسن بكتير اوى ..

دش علي خالتي حصه كانت اتصيح و منهاره .. حتى مها كانت اتصيح ..و زينب كانت تترجاهم انهم يسكتون علشاني ..ابتسمت لهم مرتاح ...ابا اقولهم انا ابخير بس ما رمت احرك لساني كنت احس بثجل ..و اني ميهود ..في اليوم الثاني فتحت اعيوني ..

لقيت ابروحي بحجرة ثانيه .. بس من دون اجهزه ولا شي اللهم مغدي ...صديت الصوب الثاني جفت خالد راقد ...

ابتسمت له : خا...خالد..
خالد :راقد ما يسمعني "
فارس: خالد ...


بطل خالد اعيونه ابكسل ثواني و عفد صوبي ..زخ ايدي :سلامات سلامت بو الفوارس ما اتجوف شر ..
رديت عليه و كنت احس بحالي احسن عن امس بوايد : الله يسلمك ...
يلس جريب مني : افا و الله افا جي اتخوفنا عليك ...