رديت مصدومه : فارس !!! شو مسوين انت و فارس ..
عمور: شو اقولج نوره شو اقولج ...؟؟
رديت عليه: يا ما حذرتك من هالحثاله قلتلك ها الاشكال ما وراها الا المشاكل ..
عمور: يا ليتني سمعت رمسج يا ليتني..
رد عمور خوفني..وايد.. و كانه ندمان من الخاطر ..اتجدمت منه و انا اتمنى هالليله كل شي يعدي ع خير ..
سالته: شو مسوين انت و فارس ...؟؟
عمور: فارس يطالبني ...نوره يطالبني
حسيت من نبره صوته فيه غبنه..عمور بيصيح !! يسويها انا بحياتي ما جفت دموعه ...بغيت احضنه و اخفف عنه بس ابتعد عني وراح صوب الدريشه...فتح الدريشه


و قال: احس ابعمري مخنوووووووق نوره مخنووووووق ..
رديت عليه: تباني أأدبه...
عمور: انتي شو قاعده اتقولين..
انا مب مصدقه أي كلمه يقولها عمور: معقوله كل هالعلاقه الي تربطك ب فارس الحينه ياي و امورطنك .. عمور لا ترمس بالالغاز ..
سكت ثواني ماشي رد..
نوره: شو رايك انخبر عليه خالي احمد..
رد علي ابسرعه: مينونه انتي..تبين يفسخ خطبتي من خوله..
يلست ابمكاني و انا ارتجف: لها الدرجه شو مستوي زين ...ارمس لا اتم جي تحرق اعصابي ..
عمور تنهد: انا خدعت فارس...قصيت عليه و الحينه يطالبني...


تميت ساكته لاني مصدومه و بنفس الوقت مب مصدقه أي كلمه ينطقها عمور بس كمل كلامه:
جفت فارس صارت عنده شركه سيارات.. و غير شغله و مركزه العالي في بوظبي اتجربت منه علشان اكون شراته و يساعدني..دخلني شريك معاه في شركته الخاصه بالسيارات ...و خلني مدير الماليه للشركه كنت اخذ البيزات و اصرف ع كيف كيفي..وقت ما اكون محتاج.. و برجعها بعد ما ينزل راتبي كنت اسحب البيزات من غير ما احس...
استغربت:: ليش لها الدرجه انت امفلس..!!
قعد ع اجرب كرسي: لا كنت ابا افتح شركه ثانيه خاصه فيني و من ورا فارس علشان جي كنت اخذ سيوله من شركته..بس قصدي ع شكل دين و بردهم عقب ما تكبر شركتي..
سالته: كيف كيف تفتح شركه و انت بتسافر ع اساس الدوره ...؟؟




بلع ريجه و قعد يلعب باصابعه مرتبك: كنت ابا افتحها ع الاقل و و أوظف أي واحد يتولى امرها ل ما ارد من السفر ...و كنت ناوي افتح فرع في لندن..
همست:انت مينون مينون
رد علي بحرقه : مب مينون الا غبي ...
نوره: كشفك فارس
هز راسه بمعنى نعم : كان كاشفني من البدايه.. و جمع المبلغ الي خذته من شركته من غير ما يدري ..
نوره: يطالبك بالمبلغ ..هاي سهله عمور ..راتبي ع راتبك بنمشي الوضع..
نش بعصبيه: ما يبا بيزات ما يبا ..
رديت عليه: ليش ما يسامحك بحكم العشره الي بينكم..
عمور: تبين يسامحني بحق العشره..و انا ما سويت أي حساب ل عشرتي وياه و انه فتح لي ذراعه و انا جازيته بالسرقه..
كنت بصيح بس يودت عمري : ليش سويت جي..
عمور: الغيره نوره تمنيت يكون لي مثل الي عند فارس..من صغرنا و نحن كل شي مثل بعض..
ما توقعت عمور يسوي جي سالته: شو ناوي يسوي ..؟؟
عمور: بخبر خالي احمد..و اذا درى خالي مستحيل يأمني علي بنته ..




يعني فارس كان صادق في يوم عرس خليفه قال انه رافض الزواج..علشان جي الخبيث الحقير ..
عاتبته: قلتلك مليون مره لا ترابع هالاشكال ..
عمور: نوره انا مب ناقصنج..انا ابا ...
قاطعته: كم يطالبك انا بدبرها لك ..
صرخ علي: من وين لج ستمية الف
حسيت بدوره فيلست مب رايمه اوقف عمور صج ورط نفسه..يعني انتهى كل شي بلحظه ماشي زواج ولا سفر ..
عمور: نوره لو ما دفعت بيدمر مستقبلي ..بنسجن و بضيع عني الدوره و و خوله و كل شي بحياتي بنتهي..
همست: شو الحل...؟؟
عمور: مدري انا بورطه مستقبلي ضاع بلحظه ..
سالته: ليش ما تدفع له بالاقساط و انا بساعدك ...
عمور: ما يبا بيزات..
استغربت: شو يبا !!
عمور: انسي..
ألحيت عليه: شو يبا ..عمور ..ارمس ..لا تتهاون بمثل هالموضوع مستقبلك بيضيع و انا بضيع معاك ..
همس: يباج حليلته ..
حسبت للحظه ان تهيأ لي الكلام الي قاله عمور سألته مره ثانيه
بغيت اتاكد: شوه يبا..
كرر عمور: ما يبا مني شي مستعد يسامحني اذا تزوجتيه و انتي طبعا ما بتزوجينه فهمتي الحينه ليش اقولج محد يقدر يساعدني ...





وقفت ابمكاني و كاني مخدره مشلوله فارس يباني انا !! يباني انا !!! رحت حجرتي من غير ما انطق ولا كلمه ...انخشيت تحت لحافي..كان كل شي اباه في هذي اللحظه اني انخمد ..عل و عسى انش من الرقاد يكون كل الي صار بيني و بين عمور مجرد حلم ...



ياني عمور المطبخ و كنت اشرب الحليب.ووو سرحانه ...ما تكلم ولا كلمه شرب ماي و طلع من المطبخ...بغيته يقولي الكلام الي صار البارحه مجرد صادوووووه..بس للاسف ما قال شي ..مستقبل عمور صار بيد فارس.. و مستقبل عمور صار بقرار لازم اتخذه..قرار مستحيل اتخذه..لو شو صار او استوا...حطيت ايدي ع الطاوله و يلست اصيح بصوت عالي...معقوله ها عقاب لي..بالي سويته ف حميد .. و نهله و جابر و خوله و عمور..معقوله ربي جازاني بان يكون فارس" ........"حتى اني مب رايمه انطقها..مستحيل..

.انا ها الحقير مستحيل ارتبط فيه...انا ما اطيقه ودرت قوم خالاتي ابسببه ..انا اخذ ها الي سود ويوهنا..مستحيل..يا ما نصحت عمور بس ما سمعني ...اليوم اسوأ ايام حياتي..اتصلت بالدوام و قلتلهم اني ما بداوم ..يمكن عمور يقص علي ما يباني اسافر معاه هو و خوله... ابسرعه اتصلت ب خوله..
خوله بكسل: نوره انا راقده..
نوره: عطيني رقم فارس ...
خوله: شو فارس !! فارس مب هني في بوظبي ..
نوره: اقولج عطيني رقمه ...ابسرعه..
خوله: زيييييييييين




شويه و عطتني رقمه..اتصلت و ع اخر رقم غيرت رايي ...صكرت الموبايل امبلى اكيد عمور جذاب...ما يباني اسافر معاه..ركضت صوب حجرة عمور..فتحت ادراج حجرته ادور ع أي شي يثبت كلامه الي قاله البارحه ...فتحت كذا درجت مالقيت شي...عمور جذاب كنت في داخلي ابا اريح روحي ..و انا طالعه لمحت كندورة عمور ع الشماعه ..كان لابسنها البارحه..
.سرت صوبها دخلت ايدي بجيب كندورته ادور ع شي..لقيت ورقه..فتحتها بيد ترتجف و انا ادعي ربي ..ان ما اتكون ورقه تتعلق بشركه فارس ...قريت الورقه مره ما فهمت شي..قريتها اكثر من مره استوعبت هذي الورقه نسخه ..اموقعه باسم فارس .. انه يطالب عمور بالمبلغ الي قاله عمور.
.طحت ع الارض..مب مصدقه يلست اصيييييييييييح من الخاطر قعدت اضرب ايدي ع الارض ليش عمور سويت جي ليش ...سويت المستحيل علشان تاخذ احسن البنات... و الحينه تبا تزوجني ارد و اشقى من ع الارض..اكررررررررهك عمور..






.تميت اصيح...لي ما حسيت اني خلاص ميهوده...مسحت دموعي انا بحياتي ما صحت جي..عمور غلط و يتحمل غلطته..نشيت رحت حجرتي..حاولت ارقد بس ما رمت..ورجعت اصيح..حتى عبراتي خانتني..مب راضيه توقف ..كانت تنزل بغزاره..رقدت نشيت عقب ساعه و نص..قررت اتصل ب فارس و اجوف شو اخرتها معاه..
سمعت صوتها ع الطرف الثاني: الو ...؟؟
خفت ارمس...................؟؟
فارس: الوووووو
رمست بصوت واطي: انا نوره ..
فارس................؟؟
رديت : انا نوره اخت عمور .
فارس: هلا هلا نوره كنت متوقع اتصال منج بس مب هاي السرعه...
مسكت عمري: ليش سويت جي..
فارس: شو سويت اخوج صرقني و انا ابا فلوسي
صرخت عليه: بس عمور ما قال انك تبا بيزاتك..
فارس: هي صح..ما ابا بيزات ..لان عندي اضعافها و اضعاف ..
تنهدت: شو تبا مني..
رد علي: اباج حليله..
عصبت عليه: و انا ما اباك..
رد ابرود: و انا ما جبرتج..اسمحيلي عندي شغل..
صرخت عليه: فارس يا الحثاله..
سمعته يقول: متصله علشان تسمعيني كلامج الوصخ...
يلست منهاره ع الشبريه: لا اتسوي فينا جي..
فارس: اخوج صرق ولازم ياخذ جزاته..
رديت عليه: بدمر مستقبله هذا بيكون ريل اختك..
سمعت ضحكته:ههههههههه ما يشرفني.. ابوي لو درى اتعرفين شو بيسوي...
ذكرته: عمور رفيجك و صديق عمرك..
فارس: قولي اخوج هالرمسه مب انا ..اخوج الي خاني ...يالله انا مشغول ..اتريا رد من اخوج مب منج..في أمان الله..
رديت بسرعه: لحظ.................."بس صكر الخط بويهي





فريت الموبايل بكل عصبيه ع الارض ..و يلست ع الشبريه اصيح..كل شي انجلب ضدي كل شي ...اكررررهك فارس اكرهك..اتمنى لك الموت من كل خاطري..مستحيل اضيع كل شي مستحيل كل شي ينتهي ابسبب فارس..فكرت اخبر خوله بالسالفه بس عرفت ان خوله ما بتسوي شي ..احترت شسوي...يلست بالفراش طول اليوم و انا كاره حياتي حتى عمور ما مر يطمن علي..طبعا ماله ويه .ورا .باجر ملجه عمور..ما اعرف شو بيسوي...مالي خص انا مستحيل اساعده...ممكن افديه بكل شي الا بزواجي من فارس...غمضت عيوني و يلست اصيح بصوت عالي حسيت للحظه اني بوهم...صخيت يوم دش علي عمور...
وقف جريب من الشبريه..مسحت دموعي و عطيته ظهري..كانت حالتي ا لنفسيه وايد تعبانه ..و مالي خلق اجابل عمور..من عرفته هو يسوي هالبلاوي...
سمعته يقولي: ورا باجر ملجتي..
ماشي رد من صوبي...................؟؟
عمور: انا بروح حق خالي احمد و بفسخ خطبتي منه..
رديت بنبره حزن: يكون احسن...
اتجدم مني باسني فوق راسي: سامحيني نوره سامحيني...ادريبج متضايجه مني هاليومين الي مروا علي حاولت بكل الطرق اتفاهم مع فارس بس ماشي فايده..
رديت بنفس النبره: كيفك...
سمعت تنهيدته : انتي جاسيه و كنت عارف انج ما بتساعدين بس اطلب منج طلب واحد..اتذكري اخوج عمور و زوريني ف السجن و لو مره بالشهر...





نزلت دموعي من عيوني من دون اسئذان...حطيت المخده ع ويهي و يلست اصيح..اتخيل وناسه خوله...اتخيل كيف بتكون حياتنا..بس فارس دمر كل شي ...علني فداج خوله...مدري كيف بتكون نفسيتج يوم بتعرفين ان عمور غير رايه...رن موبايلي و كان المتصل خوله...بغيت المح لها ان عمور غير رايه علشان ما تنصدم من خالي احمد...
سمعت صوتها: انتي وينج ادقلج ما اتردين فكرت اطب عليج بس قلت ما يستوي اروح بيت خطيبي..
صحت يوم سمعت صوت خوله و كانت مستانسه ..
خوله: الوووووووووو
ابتسمت احاول اخلي نبرة صوتي عاديه: شحالج..

خوله : بخير ..لا تزعلين سرت اجوف فستان عرسي ما خذتج علشان تكون مفاجاه..بس خلود عيبها وايد..
صكرت الموبايل و اغلقته ما اتحمل..ما اتحمل كل شي ينتهى بلحظه..انا مستحيل فارس يغلبني و يخرب حياتنا...عفدت ادور عمور...دشيت حجرته جفته قاعد يتعصم..عفدت صوبه..مسكته من ايده

اترجاه: دخيلك عمور لا اتروح ل خالي احمد حرام عليك خوله طايره من الوناسه ..
عمور: ما اقدر نوره ما اقدر...
اترجيته: دخيلك.لا اتخرب كل شي دخيلك..
حرج علي :شو الفايده و انا بنسجن شو الفايده..
بلعت ريجي: خبر النذل انا موافقه بتزوجه بس انت ما تنسجن منو بيكون سندي في دنيتي...
طالعني عمور مب مصدق: انتي بوعيج!!
طحت ع ركبي اترجاه: لا تأذي خوله لا تكسر خاطرها كافي اني حرمتها من جابر ..
وقفني عمور مصدوم من رمستي: جابر ..
هزيت راسي بمعنى نعم..بس ما بغيت اوضح له اكثر ...
سالني :شو سالفته جابر؟؟؟
مسحت دموعي ع ظهر ايدي: ماشي بس قول فارس اني بتزوجه بس بشروطي...
عمور: انتي متاكده من الي قاعده اتقولينه..
صرخت عليه: هييييييييييييه اتصل به الحين قبل لا اغير رايي ...
خذني عمور حجرتي و رقدني ع فراشي: زين ارتاحي و انا بتصل ب فارس ...و بخليه ايي المغرب نتفج ع كل شي زين جي..
رديت عليه: هي بس تحمل يوقعك ع أي ورقه..
عمور: لا الغاليه دام وافقتي هو المفروض يوقع لي اني ما خذت من بيزاته شي..

ارتحت يوم جفت عمور مرتاح و مستانس...حسيت برجفه..اتغطيت زين..احاول ارقد بس ما ياني رقاد..نشيت بعد ما ظهر عمور...رحت المطبخ اسوي لي كافيه ...شربت و يلست افكر كيف اخدع فارس ...اوكي بكون موافقه ف البدايه.. بنتزوج ..بس عقبها بسافر مع عمور ..مب ع كيفه يغير حياتي بنكد عليه حياته لي ما يطفر و يطلقني...كلماته رنت في اذوني مره قالي بتدفعين الثمن نوره..اكيد يقصد ها هو الثمن..الحقير.الحينه بس ندمت لاني فسخت خطبتي من حميد..جان بكون بالف خير ...بس انا اروايك فارس ... اتصلت بخوله...

خوله: شفيج صكرتي الموبايل بويهي ...؟؟
جذبت عليها: البطاريه فضت ...
خوله: انزين شو بلاج انتي هالايام مب مستانسه شو فيج..؟؟
نوره: كيف عرفتي ...؟؟
خوله: مدري انقطعتي فجاه ترا باجر ملجتي ..نسيتي..
ابتسمت: ما ما نسيت بس صار شي انتي ما اتعرفينه...؟؟
خوله: شوه ..!!
نوره: اخوج خطبني ..
خوله: اخوي من تقصدين !!
ضحكتني خوله: ههههههه شو من تقصدين خليفه توه راد من شهر العسل مستحيل يفكر يتزوج ع حرمته.. بجى فارس عندج غيره..
صرخت خوله من الصدمه: فارس خطبج..
رديت عليها: نكتة الموسم..
خوله: كيف ما خبر حد...ها بس اتصدقين كنت الاحظ هو و ابوي بينهم رمسه..عمور قالج
نوره: هي..
خوله: شو رايج..
تطنزت: طبعا موافقه ما صدقت يخطبني فارس حبيب القلب ..
خوله: و الله انتي موافقه !!ما اصدق..
نوره: و ليش ما تصدقين كل شي جايز..
خوله: بس احيدج ما اد...
قاطعتها: هذاك الاول كل شي تغير..
خوله: و الله مب فاهمه شي..
نوره: عقب تفهمين يالله بصكر عنج..
خوله: اوكى مبروك مقدما في أمان الله..




صكرت خوله و يلست اصيح من الضيجه و الهم الي انا فيه... بحط له شروط اكسر ظهره بجلب حياتك يا فارس نكد و انا لك..علشان تتأدب و بنجوف من بدفع الثمن...صليت المغرب و لبست...اتكشخت علشان اغايضه..و اقهره..
شويه و دش عمور علي الحجره..
عمور: تعالي فارس ياه..
رديت عليه و انا البس شيلتي: الحينه طالعه...
اتجدم مني: نوره انتي من صدقج موافقه ..

هزيت راسي بمعنى هيه موافقه...طلع عمور و حسيت للحظه ان روحي بتطلع معاه..يا ويلي شو صار ب حياتي..كيف اتغيرت ..حسبي الله عليك يا فارس..خذت نفس طويل .. وطلعت من حجرتي و من الصاله الصغيره ..و دشيت الصاله..كنت اسمع اصوات بس صارت صخه يوم جافوني..ييت و قعدت ...
فارس: عليكم السلام...
طالعته بنظره و صديت عنه ...طالعت عمور بنظرة لوم و عتاب فصد عني ...
سمعت عمور: نوره روحي يبي شي ..ضيفي الريال..
طالعته: ما عندنا شي ..المطبخ فاضي..
حسيت فارس يكتم ضحكته بعكس عمور الي انحرج...
فارس: ما يخالف عمر ما يحتاي "وطالع ساعته" انا مشغول يا ليت انخلص موضوعنا..
الحقير تمنيت اكفخه .اكسر راسه شو يتحرا عمره يايي صفقة عمل ..



عمور: انا كلمت نوره.. عن سالفه خطبتك و هي موافقه..
تمنيت بهذيج الساعه تنشق الارض و تبلعني.. ولا يصير زلزال اتطيح البنايه فوق رووسنا ولا اجوف البسمه الي انرسمت ع محيا فارس يتحسب روحه انتصر ..
كمل عمور كلامه: بس عندها شروط...
فارس: و انا حاضر اسمع شروطج..
بلعت ريجي و قلت: اسافر مع عمور اخوي
عمور: نوره كيف جي..
قاطعته: يباني اتزوجه اسافر معاك انت و خوله ...
فارس: خلها عمور.. شو بعد...
كملت: اممممممممم ما اعيش معاك ف بوظبي بتم هني ف راس الخيمه ...
فارس حط ايده ع خده و كانه قاعد يتسلى: و بعد..اتفضلي..
كملت: ما يخصك فيني ولا لي خص فيك...
عمور: نوره ..

طالعت عمور: عيبته شروطي هلا و سهلا مب عايبنه علك اتعفن بالسجن ما يهمني...
فارس: اوكي انا موافق ع شروطج بس عندي شرط واحد و من حقي اشرط...
طالعته باحتقار بس عمور رد عليه: طبعا من حقك..
فارس: نملج ف يوم نفس ملجه خوله و عمر ..
شهقت من الصدمه بس عقب راجعت نفسي ابسرعه ابرايه دام انه وافق اني بسافر مع عمور و خوله..
وقفت: ما عندي مانع ...
جفت عمور يطالع فارس و كانه الوضع مب عايبنه ...
رديت و قلت: ما ابا عرس و لا قاعه ولا فستان ولا شي موليه ما ابا شي
فارس: كيفج
كلمت فارس: ما ابا الناس تشمت و ترمس عني و اتقول جوفوا ريلها واحد حثاله ....شو تتريا خلصنا رمستنا اطلع برع ...
عمور: نوره عيب ..
فارس: خلها عمور..هذي نمره و يبا حد يروضها..



اتخبلت يوم سمعت جملته كنت شويه و بتفل بوييه لانه حثاله و حقير ...طالعته من فوق ل تحت و دشيت حجرتي..قفلت علي الباب و يلست منهاره اصيح ...اكرررررررررهك فارس اكررهك عمور اكرهكم كلكم..

.نشيت ع رنة الموبايل كنت نودانه رديت و انا مدوخه ميته فيني رقاد..مع اني المفروض مثل هالوقت اكون خلاص نشيت...بس نقزت ابمكاني يوم سمعت صوت خالي احمد..
_سلام عليج نوره
رديت: عليك السلام خالي اشحالك...؟؟
سمعته يقول: ابخير راقده شوه
ضحكت منحرجه: ههههههه لا عادي...
خالي احمد: قالولي نوره نشيطه و اتنش من صباح الله خير و الحينه الساعه عشر و انتي بعدج كسلانه...
حلفت له: و الله العظيم بس اليوم..

خالي احمد:ههههههههههه زين صحصحي معاي علشان ابا ارمسج ف سالفه اظني تعرفينها...
بلعت ريجي و يلست: خير خالي ...
خالي احمد: فارس يباج حليله...شو رايج...
انحرجت ......................"ماشي رد"
خالي احمد: ما رديتي..
نوره: خالي انا شرات بنتك و اذا جايف فارس امناسب لي "غمضت عيوني" انا ما عندي مانع ...
خالي احمد: ع بركة الله ...رمسني فارس البارحه و قال لي البنيه ما تبا اترد خبر الا اذا انت رمستها شخصيا..
ابتسمت بداخلي حتى انت قصوا عليك محد طراك واصلا ما تفرق عندي رمسوك او لا بس ها النذل قص عليك...

خالي احمد: انقول مبروك..
اتصنعت ضحكه: ههههههه قول ..
خالي احمد: مبروك بنتي...فارس يباج تملجين باجر مع عمر اخوج و خوله..بس انا مب راضي لان ابسرعه..."ويضحك" هههههههه بس هو خايف اتغييرين رايج شرات ما سويتي ف حميد...
نوره: هههههه لا ما بسويها"تسواه انت حميد يا فارس" بس انا قلت عمور اخوي اني بسافر معاه و مع خوله...

خالي احمد: هي قال لي فارس و ها سبب ثاني يخليه يملج باجر...عيل بنتي ع بركة الله مبروك بنتي...
حسيت بالغصه : الله يبارك فيك...
خالي احمد: في أمان الله..
صكرت عنه و انا اقول: مع السلامه..





شو هالحظ لي انا فيه شو الهم الي انا فيه...ليش يا ربي ..ليش عمور سوا جذا ..انا شو ذنبي..انا شو ذنبي ادفع ثمن غلطته...كنت بصيح..بس فريت اللحاف عني بعصبيه..حق شو اصيح بسني صياح.. طاحت عيني ع شنطة السفر.. و ليش اصيح..و انا بروح مع عمور و خوله..رحت الحمام اتغسلت و رجعت ابدل ملابسي...يلست في الصاله..كل شي مر ابسرعه...انا بحلم ولا علم يا عالم...معقوله انا بتزوج فارس..بمووووووت...يا ريت اقدر امنع ها الزواج...سالفه ما تدش العقل ولا بالافلام...يا ربي ...حتى لو سافرت و ما برد الا عقب سنه و نص.

.بعد بحس بعمري مقيده....غريبه انه وافق ع شرطي و هو السفر..اخاف يلحقنا يسويها هالرزه...الغريب بالسالفه كلها..الاحظ ان علاقه عمور ب فارس ما اهتزت ...يمكن علشان المصالح الي بينهم...الله يا الدنيا ..معقوله الاخوه و الصداقه ممكن تتحول ل مصالح شخصيه...ابتسمت اتطنز ع روحي..انا ابروحي استغليت حميد.. و استغليت نوف..علشان اوصل للي انا اباه..
....

بها اليوم كنت كل شويه اطالع الساعه.. و كل ما مرت ساعه ..احس بداخلي شي يحسسني بالخوف...كنت ابا اتصل ل خوله اسالها عن نفسيتها...بس غيرت راييي ...الظاهر انها مشغوله حتى انها ما فكرت تتصل بي..بس وقت المغرب الظاهر انتشرت سالفه خطبتي ع فارس...وصلني كول من خالوه عايشه.. و نهله.. و خليفه و خالوه مريم و خلود..الكل كان يبارك لي ع الخطوبه..بس بها اللحظه حسيت ان صج باجر بتزوج..

..اتصل فيني خالي احمد مره ثانيه.. و طلب مني باجر من الصبح اروح بيتهم..يباني اتغدا عندهم...الظاهر بتكون ملجتي هناك في بيت خالي احمد....لاحظت عمور كل شويه ايي البيت و جني غامضتنه ولا سواه فيني...عادي مسامحتنك...دام بتاخذني معاك لندن...

هالشي الوحيد الي كان مطمني و مريحني ...بعد ما صليت العشى حاولت ارقد بس ما قدرت..كنت اتجلب..مدري شو صابني..يلست اييير شعري و اضرب راسي..يمكن احس بالتعب و ارقد بس ماشي فايييده ....اتذكرر باجر فيلست اصيييح..

.ما ابا اعرس ..ما اكون زوجة فارس هالحثاله..ها المقزز..اشمعنى انا اتزوجه بعد ما سود ويه خالي احمد كان المفروض يتزوج نهله..يا ليت خالوه عايشه تعرف سواد ويهه جان زوجته نهله غصبن عنه ...سرت صوب الدريشه و يلست اصيح..انا ارتبط بواحد ابوه راغه ثمان سنوات برع بيته...اتنهدت.. و يلست ع الارض.قرفصاء و يلست اصيح..و انا اتذكر ..هذاك اليوم الاسود...و أي يوم مر علينا..

.كانت اول ايام اجازة عطلة الربيع ..خالي احمد كان متعود يشتري لنا هدايا..بمناسبة النجاح...اشترا لي و ل خوله و خلود.. ونهله عرايس...كل وحده كانت عندها..عروسه.. و اشترى للخليفه و عمور و فارس و حميد و محمد دراجات ..استانسنا وايد بها العرايس..طلعنا وقت العصر بعد ما خلص المطر...نلعب برع..و كل الصغاريه بهذاك اليوم كانوا يلعبون برع حتى قوم عمور طلعوا بدرجاتهم يلعبون بالطين...نحن البنات تمينا نلعب عدال باب بيت خالوه مريم...بعرايسنا...
حطيت عروستي بالارض: خوله جوفي لعبتي بروح اشرب ماي..
خوله : انزين ..

ركضت داخل صوب المطبخ..جفت فارس داخل يشرب ماي من الدبه ابصراحه انا ما انتبهت له متى دش داخل..
.اتجدمت منه: وع عليك ليش ما تشرب بالكلاس بخبر عليك خالوه...
فارس: انا دوم اشرب جي من حلج الدبه اذا خبرتي يا ويلج مني...

رديت عليه باشمئزاز: اخييييييييييج عليك و نحن نشرب من نفس الدبه.. و الله بخبر عليك خالي احمد...
رجع دبة الماي الي شرب منها داخل الثلاجه...شليتها و صبيت الماي كله داخل المغسله...
اتجدم مني: ليش اتصبين الماي..
رديت عليه: شو تبانا نشرب من ها الماي وع من حلجك..
وقف حذالي و كنت عارفه انه بضربني: شو فيه حلجي...
نوره: اذا ضربتني بخبر عليك خالي احمد..

ييرني من شعري..قعدت اصرخ أأأأأأأأأأأأأي...يلست اضرب ايده.. فعطاني كم بكس ع ظهري.. وربع برع المطبخ لاني سمعت عمور يزقره: فارس تعال بسرعه...

يلست ع ارضيه المطبخ اصييييييح ..مشيت دموعي.. وانا احقد عليه.. و نويت اخبر عليه خالي احمد هالقذر..صبيت لي ماي و شربته.. و عقب ..طلعت من المطبخ رايحه صوب باب الحوي...وقفت ابمكاني يوم جفت خوله شايله لعبتي: نووره فارس دعسها بسيكله..
يلست اصيح بصوت عالي: شو ها كسر لعبتي ..
طلعت برع ادوره و اخبر عليه عمور مع اني ادري ان عمور ما منه فايده ..
خوله: راحوا بعيد ...ما بتلحقينه...
قعدت اصيح و اقول: و الله بكسر سيكله بيجوف...
طلعت لنا خالوه مريم ع صراخي: شو فيج نوره..
رجعت اصيح: فارس كسر عروستي..دعسها بالسيكل "و كملت صياحي" واع
خالوه مريم: يبي اجوفها يمكن تتركب..
خوله: ما تستوي امايه..
سرنا صوب خالوه مريم و عطيتها لعبتي ورجعت اصيح: واع ما بتستوي واع
خالوه مريم: برايها زين بخلي خالج يشتري لج وحده غيرها ..
عاندت: ما يخصني ما يخصني واع
خالوه مريم: و ابوي هاي منو بسكتها يوم اتصيح.."صرخت ع خوله" وينه اخوج ...
خوله: راحوا بعيد خليفه و عمور ..

فتنت عليه: جفته يشرب الماي من الدبه من دون كلاس...
خالوه مريم :- منوه..؟؟

جاوبتها: فارس و يوم قلته بخبر عليك خالوه مريم ضربني بكس في ظهري.واع."ورجعت اصيح"
خالوه مريم: ما عليه انا براويج فيه...ان ما خليت خالج احمد يكسر ظهره بالخيزرانه..يالله دشن داخل...اتغسلن و اتسبحن ..بيأذن المغرب ..

رجعت اصيح: و لعبتي واع
خالوه مريم: باجر بشتري لج احلى عن هاي..

دشينا داخل ...بعد ما اذن المغرب و رجعت الدنيا اتمطر...اتسبحنا و بدلنا ملابسنا...عقبها يوو قوم عمور..سمعت خالوه مريم تهزب فارس.. و عمور و خليفه لانهم تموا برع و تاخروا و الدنيا اتمطر ...و استانست يوم سمعتها تضارب فارس ع سالفه دبه الماي ولانه كسر لعبتي...اترييت خالي احمد يرجع البيت...علشان اخبر علي فارس..بس كالعاده خالي احمد يرجع متاخر....

علشان جي كلنا رحنا نرقد.بعد ما تعشينا خبز حار امسوتنه خالوه مريم .....البنات في حجرتهم ..و الشباب في الحجرة الثانيه ...انقهرت يوم جفت خلود و خوله كل واحد محطيه عروستها حذالها و حاضنتنها ..و انا عروستي متكسره...خطر ع بالي اروح اخذ عروست نهله ...نشيت من مكاني و طلعت ..جفت خالوه مريم طالعه...
جافتني: وين رايحه ...؟؟
ما عرفت شو اقولها ..................."ماشي رد"
خالوه مريم : تعالي البسي كوتج..بعطيج خبز وديه بيت خالتج عايشه انا بترياج عدال الباب ..
استانست زين يت من الله ..ركضت البس كوتي.. و شليت المظله لان كانت الدنيا اتمطر...لحقت خالوه مريم سمعتها اتقول: خوله و خلود راقدين ..
رديت عليها : هي

خالوه مريم: ما شفت اخوانج جان طرشتهم بيت خالتج بس يالله هذا الا البيت ..جدامنا بالمره..يالله اركضي و انا بترياج عند الباب..



غطيت راسي وشليت الصحن و ربعت بيت خالوه عايشه....دشيت جفت الصاله فاضيه حطيت صحن الخبز .دشيت حجرة نهله..جفتها محد شليت عروستها.عدت حياتي يوم جفتها بعد متكسره ..بس مب وايد المهم .و ربعت برع..
قبل ما اطلع سمعت صرخت نهله بصوت عالي...أظني راس الخيمه كلها سمعت صريخ نهله..كانت اتصارخ بشكل هستيري كان الصوت ياي من ورا البيت..ركضت صوب الصوت..جفت فارس يعفد من ع اليدار ابسرعه من جافني ... و نهله لاصقه باليدار اتصارخ....فريت اللعبه الي كانت بيدي..لاني للحظه حسيت ان نهله روحها بتطلع من الصريخ..سرت صوبها..

نهله شو فيج نهله..قعدت ع الارض اتصيح بصوت عالي ...جفت خالوه مريم و خالي احمد يايين ركض من صريخ نهله...
و سألتني خالوه مريم بعصبيه: شو السالفه ...شو مستوي
من شده صدمتي حسيت ان لساني انربط..كان شكل نهله يغمض..امبلله تحت المطر شعرها مب مرتب و كان امبين مقطع و ثوبها منطر من صوب الكم كانت تصيح..شلها خالي احمد.. ووداها بيته....هدتها خالوه مريم...
خالي احمد محرج : منو سوا فيج جي...؟؟؟
ردت نهله و كانت ترتجف و تصيح: مدري منوه مدري...
خالوه مريم: امج وين رايحه كيف تخليج ابروحج ف البيت ليش ما يابتج بيتي هاه...
عقبها ..قامت خالوه مريم و خذت نهله داخل اتبدل ثيابها .علشان ما تبرد و تمرض ..و خالي احمد طلع برع البيت يمكن يجوف من الي سوا بنهله جذا ..عقب دقايق رجع .
خالي احمد يتحرطم : النذل شرد
جفت فارس داش الصاله و مرتبك.. و معاه عمور و خليفه..
خالي أحمد: انتو من وين ياييين بها الحزه..
خليفه: رحنا انغطي ع الحمام فوق السطح...خفنا لا يتخرسون من المطر

همست: خالي احمد..
طالعني و كان محرج...
خفت ارتجفت و انا اقول: انا جفت فارس ينقز من فوق اليدار يوم نهله صرخت ...
اول مره اجوف الصدمه بعيون خالي احمد .. و كأنه مب مصدقني..رجع فارس لورا و حركته بينت ع اني كنت صادقه..اتجدم منه خالي احمد..و كان يرتجف من الغيض ...
فارس طالعني بنظرات ما فهمتها: جذابه ...

كافي نبرة صوته كانت اتبين انه هو الجذاب و ملامح ويهه ...طلعت خالوه مريم يوم سمعت\

خالي احمد يصرخ ع فارس: شو كنت اتسوي هناك...
عمور يدافع عنه: فارس كان معانا فوق السطح عند الحمام...
خالي احمد: اسكت انت ولا كلمه لا تدخل ..."اتجدم خالي من فارس و زخه من رقبته" شو مودنك بييت خالتك عايشه...

تم فارس ساكت ابد ما يرد و هالشي رفع ضغط خالي احمد.. و قعد يضربه..و يرفسه. حسيت اني السبب بالي صار بس حالة نهله تغمض...و يستاهل فارس..قامت خالوه مريم و عمور يمسكون خالي احمد ...

فأجانا خالي احمد يوم قال: قم اطلع من بيتي اطلع طلعت روحك عسره لا بارك الله فيك و في اليوم الي جفتك فيه..سودت ويهي
خالوه مريم اتصيح: بس احمد حرام عليك..
خالي احمد: شو بس سود ويهي لو كانت اختج ف البيت شو بصير فينا قولي...فضيحتنا ع كل لسان
عمور: خالي فارس ما سوا شي

قاطعه خالي احمد: عمر تبا تتواصل مع فارس اظهر من بيتي و بيت خالتك..."وطالع فارس" قم اطلع من بيتي ولا اتفكر ترجع هني ابد..و إذا عرفت في يوم من الايام أي واحد منكم رمسه ولا كلمه يظهر من بيتي لا اعرفه ولا يعرفني
كان يرتجف يوم يرمس من العصبية

كان عمور بتكلم و بيرد ع خالي احمد يدافع عن صديق العمر ... بس خالوه مريم قبضته من ذراعه
تترجاه
: بس عمر اسكت لا ادخل عمرك بشي ما يخصك.. خلي خالك و ولده ابكيفهم لا اتخلي خالك احمد يحرج عليك..

كنت اجوف الي صار ب فارس يستاهل...لان الي سواه مب شويه.. و حسيت اني انتقمت منه لانه كسر لعبتي و ضربني في المطبخ و الله جازاه بطرده من البيت...رفعت راسي اطالع فارس..نش فارس من ع الارض طالعني بنظرات حسيت انه يبا يجتلني بس

خالي احمد صرخ علييه : اطلع من بيتي اطلع ..
طلع فارس هذاك اليوم حتى من غير ما يشيل ثيابه او أي قطعه... حتى ما ندري وين رقد بهذيج الليله..يلس عمور يصيح..و حضنته خالوه مريم...انا و خليفه كنا انطالع الموقف بس ...

هددنا خالي احمد ان ما نطري السالفه ل قوم خالوه عايشه...علشان فارس صج سود ويهه ...هذاك اليوم نهله رقدت ف بيتنا.. و الغريب حتى هي ما يابت أي سيره لامها و اخوانها ...رجعت حجرتي و انا ارتجف مدري من البرد و الي من الي صار بس اكتشفت ان خلود و خوله نشوا من الرقاد ع صراخ خالي احمد و كانوا يصيحون...

حطيت ايدي ع رقبتي و انا اتذكر نظرات فارس هذاك اليوم....كان وده يجتلني..اكيد الحينه يبا يتزوجني علشان يجتلني...بس انا الي جفته قلته ...كلمة الحق ما ينسكت عنها ....

اتروعت يوم عمور فتح باب حجرتي و جافني يالسه ع الارض ..
سالني: شو فيج نوره..
صحت من غير ما ارد عليه شو فيني يعني ما يعرف شو حالتي..باجر بتعدمني يا عمور و تسالني شو فيني ...اتجدم مني..

و يلس حذالي ع الارض: ليش اتصيحين..
مسحت دموعي: ماشي ..
عمور: علشان باجر بتملجين...كل البنات جي يصيحون ولا بس انتي علشان ما تبين فارس
رديت عليه و دموعي تنساب ع ويهي: كل البنات يكونن مستانسات الا انا...كلهن يتريون هاليوم الا انا احس باجر يوم اعدامي...كيف ترضى ع اختك تزوجها مثل هالانسان..

حضني عمور يوم جافني اصيح منهاره: نوره لا تحسسيني اني غصبتج...اذا ما تبين و الله من الحينه بخرب السالفه..
رفعت راسي اطالعه: شو الفايده..خلاص الي صار صار..المهم بسافر معاك صح...
ابتسم و هز راسه: بس تذكري زين ان فارس غير مثل ما قلتلج زمان
نوره: ما اتعرفه كثري..
عمور: ههههههههه يمكن...
نوره: متفيج تضحك..
باسني فوق راسي: نشي ارقدي..
نشيت من مكاني و انسدحت ع الشبريه و انا اتمنى اني ما اجوف الشمس باجر..بند عمور علي الليت و صكر باب حجرتي بعد ما طلع منها....رقدت ع طول ...اتريا باجر..بكل ألم و حسره

نشيت ع اذان الفير كالعاده..رحت اصلي و تميت اقرا قران لي ما طلعت الشمس...ما كنت ابا افكر بشيء موليه..اتصلت بي خوله غريبه اكيد مب راقده..ولا خوله مب من عوايدها اتكون وعيانه هاليوم..
نوره: السلام عليج..
خوله: عليج السلام..شحالج..؟؟
نوره: ابخير..غريبه ناشه من وقت..
خوله: طبعا ..اليوم بملج ما تبيني انش من وقت..اصلا ما رقدت ...شو نفسيتج..
تنهدت شو بتكون يا حسره: الحمدلله زينه ..و انتي.
خوله: طايره من الوناسه ...متى بتين بيتنا ...
نوره: العصر ..
خوله: ما بتيين تتغدين..
نوره: لا ...خالي احمد يباني ايي اتغدا بس انا ما ابا...
خوله: خايفه انج تجوفين فارس..
نوره: يمكن ...خليني ايي وقت العصر احسن ..
خوله: زين ابرايج...
نوره: يالله بروح اسوي لي حليب
خوله: زين في أمان الله..
نوره: مع السلامه...



دشيت حجرة عمور جفته راقد..رحت صوب المطبخ...سويت لي حليب ...عقبها..بدلت ملابسي علشان اروح الدوام..مدري كنت ماخذه اجازة بس الحينه غيرت رايي ..يمكن علشان اهرب من افكاري...سرت الدوام.. و يلست اسوي شغلي و شغل غيري..حتى اني ما خبرت رباعتي ف الدوام اني اليوم بملج..

مصخره هاي مب ملجه...رديت الشقه و انا هلكانه..جفت عمور قاعد يتغدا طنشته حالي مب شرات حاله..صليت الظهر.. و انخمدت ع الشبريه ..كنت اتجلب كيف اليوم بتزوج يا ربي ماشي حل..ما ابا ارتبط ب فارس..ما اريد..ع هالافكار رقدت..و ما نشيت الا و عمور يوعيني يباني انش ...
عمور: قومي نوره ...نشي شو فيج من متى مب راقده..
بطلت عيوني بكسل

رجع يهزني: قومي الساعه خمس العصر و انتي ما صليتي ..
فجيت عيوني اطالع الساعه اووه هذي اول مره ارقد جي..

عمور: شو ياج يالله نشي صلي و بنروح بيت خالوه مريم..




ما رديت عليه ولا نطقت باي كلمه خلوني ساكته احسن لي...خلاص جربت ساعة اعدامي ...صليت العصر..حسيت فيني صيحه بس تعبت من الصياح بسني ترا قالوها من قبل الدموع ما اتسوي شي لو كانت اتسوي شي كان البشر كلهم بجوا ...

لبست ثوب مخوره ...لمحت موبايلي كانت كذا مكالمه من خوله.. و مكالمه وحده من خالي احمد..شاد حيله خالي احمد الظاهر نسى شو سوا فارس زمان ...لبست عبايتي و شيلتي.. جفت عمور يترياني في الصاله..ابد ما توقعت ملجه خوله ل عمور جي بتكون نفسيتي ...وقف يوم جافني..
قلته: ابروحي بسير بسيارتي..
عمور : ليش انا بوصلج
سكت اصلا مالي نفس اسوق و اشك لو سقت ما بوصل بيت خالوه مريم سالمه...صخيت..ما جفته كاشخ لا يكون ما بملج ع خوله..

و في السياره سالته : ليش مب كاشخ..وين غترتك..؟؟

ابتسم: بالدوبي..بعد ما اوصلج بنطلع انا و فارس..بمر الدوبي و بكشخ لا تحاتين ما بفشلج اخوج..

طالعته بنظره و صديت عنه..و الله يسوي بلاوي و يعقها فوق راسي ...وصلنا بيت خالوه مريم...من دخلت حسيت الجو ربشه مدري ليش...دخلت الصاله..جفت شيما موجوده...بالصاله و معاها خلود و خالوه مريم..وقفن يسلمن علي.. و هذي اول مره اجوف شيما بعد عرسها..باركن لي..

سويت روحي مستانسه..بس صحت من الخاطر يوم حضنتني خالوه مريم...و صاحت معاي..ع بالها اصيح ع امايه الي ما بتحضر عرسي..بس انا كنت اصيح ع حالي .. و حظي ...سالت عن خوله ...قالولي بحجرتها ...و قافله ع روحها الباب...سرت صوب حجرتها..دقيت الباب فتحت لي..سلمت عليها ...كانت مستانسه..اتصدقون اول مره بحياتي احس اني بحسد خوله...

خوله: شو بلاج كنتي اتصيحين..
هزيت راسي بمعنى نعم : امج صيحتني و صاحت معاي..
خوله:ههههههه شي عادي اتحسين بها الشعور ترا انا اول مره جي حسيت..ما عليج ان شاء الله بنستانس قولي امين..

طلعت مني تنهيده معانات ع الايام السوده الي يايتني : امين ..
نوره: الي مريحني اني بسافر معاكم
خوله: خلاص عيل ليش مضايجه..؟؟
نوره : مدري ..فيني ضيجه..
خوله: ايه اليوم ملجتج لا اتسوين ابروحج جيه...

اذن المغرب و صلينا..عقبها دشت علينا شيما.. و خلود الي كانت تبا اترقد جسوم...
شيما: تعالي بحطلج ميكاب نوره..
نوره: لا مشكوره ما اريد..
خلود: شو ما تريدين...ع كيفج شو اليوم ملجتج..
رديت : بس ملجه ماشي ربشه و عرس..
شيما: حتى و لو علشانج مب عشان غيرج..

صدقها شيما علشاني مب علشان غيري يالله شو وراي يمكن تتحسن نفسيتي ...حطت لي ميكاب .. و خوله ابروحها حطت لعمرها لان ما يحتاي حد يسوي لها ما شا الله عليها خبيرة تجميل..شهقت يوم طالعت عمري
سالت شيما: مب جنج بالغتي
شيما: هههههههه لا مب مبالغه عادي تراج عروس ...
خلود: اجوفج...اممممم اتصدقين غيرت شكلج يالله مبروك..
خوله: و انا شو رايكم فيني..
قلناها : عسسسسل

حسيت بطني يعورني ما بجى شي ع الملجه...دش علينا خالي احمد..اتروعت يلست ع الشبريه..حسيت ابعمري مخنوقه يا رب فارس غير رايه يارب ...سلم علي...و ظهرن خلود و شيما من الحجرة.يبا يرمسني استانست اكيد فارس غير رايه ...بس ماتت كل ذرة أمل فيني يوم جفته يطلع من جيبه بيزات..

طالعته:شو هاه خالي....؟؟
خالي احمد : فارس عطاني مهرج..ما يصير تملجون من غير مهر..
مديت ايدي ارجع البيزات: ما يحتاي..
خالي احمد: ما يستوي يا بنتي هذا من حقج...
حتى اني ما عرفت كم مهري : انزين خالي خلهن عندك امانه يوم بحتاجها باخذها عنك...
خالي احمد: زين ما اتسوين "وباسني فوق راسي" اتزهبن ترا الملاج ياه.. و المعاريس داخل ..
خوله: عيل ما بستني..

ضحك و حضن خوله و باسها..اه يا عذابي ..ذبحتني يا عمور و انا الي سويت و سويت علشان اضمنلك خوله ها جزاتي ..يا ريتني ما فسخت خطبتي من حميد وينك يا حميدان...شويه و دش علينا خليفه بالكتاب...وقعت خوله.. و عقب ما فر الصفحه وقعت بيد ترتجف..ابا كل شي يخلص و ينتهي ..سلم خليفه ع خوله و بارك لها.. و بارك لي..

خليفه: مستعيل بعدين بعلق عليج..

ابتسمت و انا مدري الي انرسمت ع شفايفي ابتسامه.ل خليفه..ولا ابتسامه للايام اليايه...الي بتكون عذاب ف عذاب حسيت برجفه يوم اتذكرت فارس يقولي بتدفعين الثمن..يلست ع الشبريه ...اتجدمت مني خوله حضنتي ..و حست فيني ارتجف...

خوله: شو فيج نوره بردانه..
هزيت راسي بمعنى نعم...
دشن علينا الحجره خالوه مريم و عايشه..و نهله و خلود و شيما ...يلسن يباركن لي و ل خوله كنت اطالعهم مب رايمه ارمس او ارد عليهم و انا اجوف ضحكتهم و وناستهم مرسومه ع ويوهم..كنت كل الي اباه اروح البيت..حطوا العشى .. و اصلا بالاساس كان العشى للريايييييييل ...

نوره: خوله ابا اروح البيت ...
خوله: تو الناس..
نوره: تعبانه..
خوله: شفيج..
صحت: ما ابا ما اباه ...محد يحس فيني

حضنتني خوله: شو صاير لج نوره..وين هيبتج و قوتج.. وين قناعتج و عنادج ..وين راح كل هاه...حرام عليج لا اتخربين ميكابج.كلهم مستانسين و انتي تبين اتخربين علينا وناستنا ...

كلام خوله كان اثر كبير علي..بس هي ما اتعرف شو الي يصير..طاحت عيوني ع شنط خوله..اتذكرت السفر.. صح و الله و انا ليش اسوي ابروحي جي..تراني بسافر مع عمور و خوله.. و فارس اكيد ما بتحمل يترياني سنه او اكثر برع .. و بجي بطلق..ابتسمت ل خوله ابتسامه شكر..بس هي ما فهمتني ...طلعنا نتعشى مع قوم خالاتي و البنات ...حاولت انسى و انسى.

.دش علينا خليفه شكرته في سري من كل قلبي لانه غير علينا جو القعده و قعد ينكت و يسولف..ما توقعت اندمج معاه هالكثر ...طالعت خوله الي كانت تضحك ع تعليق خليفه..كافي خوله مستانسه و ها اهم شي ف حياتي ...اتصدقون من حالتي الرديه نسيت اراقب نهله كيف بتكون نفسيتها يوم بتجوف حبيب القلب سابقا ارتبط ب خوله..بس جفتها عاديه جدا. و تضحك وقت ما كنا نضحك..اتولي .

..اتاخر الوقت ..اتصلت ب عمور علشان يوصلني الشقه..سلمت عليهم ..و طلعت..صوب سياره عمور..لمحت حميد واقف برع يسولف مع خالي احمد...سلم علي خالي احمد مره ثانيه و بارك لي...
سمعت حميد: مبروك نوره الله يسعدج..

حسيت من نبرة صوته فيها رنه غريبه ..بس استاهل الي صار لي لاني جرحتك...طالعته ..جفت بعيونه كلام وايد يبا يقوله بس وجود خالي احمد امسوي عائق ..

.احسن بعد مب ناقصه فلسفته.. و يفهم الي يفهمه ...طلعت من بيت خالي احمد جفت عمور و شخص طويل قاعد يسولف معاه ما غيره هالحثاله..عفوا اقصد فارس..لازم اتعود انطق باسمه..علشان ما اغلط جدام الناس و اقول هالحثاله صار ريلي ؟؟؟؟
ركبت السياره..بلحظه ما فتح خالي احمد الباب: عمر تعال سلم ع حرمتك ...؟؟
عمر جنه ما صدق خبر: ان شاء الله ...

الغبي الحمار شو اسبه قولوا شو اسوي به..كنت بقوله لا اتروح ...لا اتروح ..بس صوتي ذاب ف الهواء..و كأنه خالي احمد متعمد يسوي هالحركه..لان من دش عمور البيت..عفد فارس و ركب سياره عمور..كنت بقفل
بيبان السياره بس لاحظ و سبقني...

من غير ما اطالعه : نعمممم
رد علي: نعم الله عليج..انا ريلج..
طالعته بعدني ما استوعبت السالفه ريلج !!!: بس ع الورق..
فارس : هي صح بس ع الورق بس مب من حقي اقولج مبروك..
رديت عليه بوقاحه: الله ما يبارك فيك قول امين حطمت حياتي ...
طالعني : بسوي روحي ما سمعت هالكلام الحلو منج...

شهقت يوم شغل السياره.. و حركها..عفدت ع مقبض الباب كنت بفتح باب السياره بس زخني من ايدي ..
سمعته يقول لي : اصطلبي ...

صرخت عليه : وقف السياره اقولك...وقف السياره يا الصراق
ضحك ابصوت عالي يوم قلت كلمه الصراق : ههههههههههههههههههه
حسيت من ضحكته ان يتمصخر علي..يعني اخوج الصراق مب انا ما عليه فارس..

يلست اصرخ عليه :
طلقني طلقني

فارس: حاضرين لطيبين بس قري ابمكانج و عن حركات اليهال ..
انتبهت انه للحين زاخ ايدي.ييرت ايدي بالقو عنه : هذي اخر مره تمسكني جي..
فارس ابرود : ان شاء الله..

صرخت عليه : لا ترمسني جي شو تتحراني ياهل ...
طالعني : اسف بس حركاتج توحي لي جي..

قفطت ما عرفت شو اقول سكت و تميت ابمكاني اطالع الدرب وين صرنا..كان ودي اشوه ويهه باضافري بس تعبت..كنت هلكانه بذلت مجهود كبير و انا اتصارع معاه اباه ينزلني من السياره ..أأأأأأأأأأأأه يا ليت اتحسون فيني ...و العذاب الي بداخلي...

سالني : تعشيتي..
طنشته:..................."ماشي رد"
سمعته يقول: امممممممم انا تعشيت بس مدري اذا انتي تعشيتي اولا لاء..
طالعته و سالته ابسرعه: ابذمتك انت مصدق روحك معرس ...؟؟
رد علي بابتسامه : طبعا و انتي ..
احتقرته و صديت عنه و قلت : زواج بالحيله...
رد علي : منوه المحتال انا ولا اخوج..
رديت عليه : ما يخصك باخوي...تفهم او لاء..
ابرود: ان شاء الله"سكت شويه" ملاكي...

صديت عنه اطالع الشوارع وين رايحييييييين !! ما بغيت اساله عشان ما يحط في باله اني مهتمه ..رن موبايله.. و كانت رنه عاديه جدا...سمعت صوت عمور ..مدري شو قال ..بس فارس نقع من الضحك ..معلوم يضحك انسان سخيف و قليل ادب ...بس ليش يضحك هالكثر عمور شو قاله !!!

سمعته يقول: ما عليك خذ سيارتي ولا اقولك..خل حميدان "قلد صوتي يوم نطق باسم حميدان" يوصلك..و انا بوصل حرمتيه و بمر عليكم ..اوكي .يالله مع السلامه

ادري يستفزني خل ينقع...ع باله برد عليه.. و الله لاطنشك لي ما تطفر .. وليش اتريا ل ما تطفر عقب اسبوعين انا مسافره و بفتك من شيفتك ...قال حرمتيه قال عمىىىى ابعينك ..

.دشينا سوق راس الخيمه...تميت ابمكاني ما اتحركت...وقف السياره عند محل الذهب.. و بند السياره و شل السويج معاه .يتحراني بروح عنه .. و الله كنت بسويها بس الهيس فهمني ...نزل من السياره من غير ما يقول أي كلمه..راقبته شو يبا ..جفته طلع من المحل و راح المحل الثاني...

دقايق.. و ظهر شايل معاه علبة ..هاه لا يكون هديه..امصدق روحه متزوج هاه ...حسبت اول ما بيركب بفتح العلبه و بلبسني الدبله..بس جفته يحط العلبه ابمكان و يشغل السياره ...عيل ل منوه هاي العلبه..يستهبل ها ولا يتحراني ميته ع هديته..تعالوا انا اصلا ليش حارقه اعصابي...ما يهمني..طالعت برع..جفته وقف السياره ابمكان مظلم...ما اسمع غير صوت الموج..

سالته : نحن وين...؟؟
فارس : لا اتخافين انتي بامان ...

التفت يمين و شمال ابا اعرف نحن وين بالضبط..بس ما عرفت لان كل شي من حولينا ظلمه...ماشي غير قمر متربع ع صفحة السما.. و حوليه درر من النجوم...و صوت الموج الي يهدد باي لحظه بيثور علينا..بلعت ريجي..طالعت فارس جفته يطالعني..خفت..هذي اول مره اخاف فيها هالكثر و من فارس..حضنت ايدي و ضميتها بصدري و كأني اصد نظرات فارس عني ..

سالني : ليش خايفه..
حاولت اتمالك نفسي ..و اجاوبه بنبره عاديه: مب خايفه..بس شيل عيونك عني ..

ابتسم..يمكن ابتسامته كانت مصدر الراحه الي حسيت فيها..بس كنت خايفه لا يكون الهدوء الي يسبق العاصفه...حسيت انه الموج .. و انا القمر ..بند السياره و نزل...يلس ع السياره من جدام ...يتامل الموج الي كان يضرب الصخر..بكل قسوه...رغم هاي القسوه بس ضوء القمر كان ينعكس ع صفحات البحر الهايج...بلعت ريجي حسيت بالبروده ..وينك يا زلاغي.. وينك يا كوت عمور وينكم..هالمينون باخر الليل يابني هني اخاف يجتلني..

.سمعته يزقرني: تعالي ..انزلي جوفي البحر وايد حلو..
طاوعته من غير ما احس.. و كاني كنت ادور الامان ف مكان معزول عن العالم..رصيت ع شيلتي الي كان الهوا يداعبها ..وقفت الصوب الثاني من السياره..اطالع البحر..

سالته: اتحبه..
رد ابسرعه : وايد ..بشكل جنوني...
طالعته هذا فارس ولا قيس بن الملوح !!
قلته : انت اتبالغ..

بصوت هادي بس نبره خوفتني وايد : لا ما ابالغ تدرين ليش لان هالبحر يذكرني فيج...اني مثله جي .."واشر عليه" طالعته مستغربه شو قصده ..ما فهمت ..

.بس صخيت يوم سمعته يقول : و الشيء الثاني الي يجذبني فيه..لانه فتح لي حضنه.. و ضمني ف يوم راغني ابوي من غير ما يسوي حساب وين بروح بها الجو ..

بلعت ريجي ياك الموت يا تارك الصلاة..تميت ساكته خفت ارد عليه بكلمه يقوم يجتلني و انا السبب بكل الي صار له ...شو ها الحجر الي في قلبه ..ما كملنا 12 ساعه من ملجتنا و هو يذكرني بالي سويته فيه و انا شو لي الله يا كثر حقدك يا فارس ...ما تستحي تطري لي سالفه سواد ويهك امف عليك
غمضت عيوني اتخيل حجرتي و شبريتي..ابا اكون لحينه هناك..ابا اهرب من كل شي ..فتحت عيوني يوم سمعت باب السياره ينفتح.كنت بربع صوبه خفت يحرك و يخليني ابروحي هني بها المكان الموحش...بس ريولي انشلت ابمكانها من الخوف ما رمت احركها .

.اتجتفت من البرد كنت ارتجف.. و بداخلي ميته...بس حسيت الدم رجع يسري بجسمي..يوم جفت فارس ياي صوبي و بايده علبه الذهب الي من ساعه شراها ..راقبته يفتح العلبه...رصيت ع اصابعي ..ما ابا منك شي...لا تجرب مني ..غصب اتحسسني و اتحسس روحك انا متزوجين..حالنا حال أي زوجين..بس فكرت اطاوعه لاني خفت يخليني هني و بها المكان ...لو عاندته يسويها هالمجرم...يير ايدي طالعت البحر...حسيت ايده دافيييييييييه ..و الله تمنيت ان اتم ايدي بحضن ايده ادفيني...

فجيت عيوني يوم سالني: بردانه نوره...
هزيت راسي بمعنى نعم من غير ما اطالعه..حسيت بالخاتم الي صار بصبعي.. و كانه يقول لي خلاص ملكتج نوره..طالعت الخاتم و كانه دره من الدرر الي فوق محاوطه بالقمر...يلست اتامله معقوله انا بحلم ولا كابوس..
سالني : عيبج..

حتى لو ما عيبني بقول هيه..متروعه منه..لانا ابروحنا..و يمكن يسوي لي أي شي ..
سالني مره ثانيه : عيبج..
همست : هي..
اتفاجات يوم جفت يطلع خاتم ثاني.. و زخي ايدي الثانيه.. و لبسني الخاتم..
طالعته : وايد علي..
ابتسم : و انتي جي هاديه تستاهلين كل شي ..
عقبها طلع العقد..
قال لي : افسخي شيلتج علشان البسج العقد..
رصيت ايدي ع الشيله : مب لازم كافي الدبله..
بس اصر : لا ابا اجوفه فيج..
رديت لورا: ما اريد..
رد بعناد : افسخي شيلتج..
رديت عليه بحده : انت مينون تباني افسخها هني برع ...
طالع حوليه : منوه غيرنا هني بس انا و انتي "و ابتسم" و الشهود..
رديت مستغربه : الشهود..
ضحك : هههههه شو فيج..الشهود البحر و القمر مب شاهدين..

اوووووووه ..قامت تطلع علوم من ها معقوله انا جدام فارس ..اكيد انا بحلم..
سمعته يقول : يالله افسخي شيلتج ..

نزلت شيلتي ع رقبتي..حسيت بالهوا البارد يضربني ع رقبتي ..ارتجفت...اتجدم مني غمضت عيوني يوم تجرب مني ..اكثر.. و لبسني العقد..كل شي مر ابسرعه بس انا كنت احس كانه ساعات ..طالعته يوم يطلع الشغاب.. و يلبسني..كنت بصرخ من الويع غصب يلبسني..ما يعرف جتلني اذوني عورتني بس استحملت و استحملت لي ما خلص ...كانت انفاسه دافيه..بس جذبتني ريحة عطره جنان...نقزت يوم باسني ع راسي
و قال : مبروك .." وضحك" ههههههههههههههه يا العروس
دزيته بكل قوتي حسيت للحظه انه قاعد يتمصخر علي ..ضحكته كانه يستهزأ مني..
فارس : حلو شكلج و انتي امصدقه روحج عروس ...

حسيت بنار تطلع من ويهي..حيوان شو يتحرا عمره..مب منه مني انا الحماره الي طاوعته ..اوهمت عمري انه ممكن يفرني هني..بس ايخسي شو ما عندي اهل..يدورون علي...اكررررررررهك فارس ..تتمصخر علي..
حسيت بنار تغلي في صدري..و انا اسمع ضحكته..شليت الرمل. و فريته بويهه.. و ركضت صوب السياره

..سمعت صرخته يوم يتويع : أأأأأأأأأأأأأأي عيووووووووني ..
فكرت للحظه اعفد ع الكرسي و اسوق السياره..بس سبقني.ركب السياره ابسرعه.. و زخني من رقبتي ..جفت بريق الغضب الي لمع بعينه ام عينه الثانيه الظاهر كانت اتعوره..كانت يحكها ابيده..
يلس يهزني : يا الشقيه يا الشيطانه الصغيره عورتي عيني..

غمضت عيوني خفت منه و حسيت روحي بتظهر..هدني و دزني بعيد عنه .. و يلس يحك عيوني..صحت..هذا اول يوم لي..معاه..شو بستوي عقب..حطيت ايدي ع ويهي و يلست اصيح ...ابصوت عالي كنت منهاره.طنشني تم ساكت و كأنه عايبنه صوتي و انا قاعده اصيح بس .

سمعته يقول : حقج علي ...انا الغلطان اسف ..
صرخت عليه : ليش تزوجتني انا اكرررررهك اكرهك..
فسخت الدبله و فريته ابويهه : ما اريد منك شي طلقني طلقني ..
و يلست اييره من ثيابه و فريت غتره من ع راسه كنت ابا اطلع كل غيضي.
صرخ علي :نوووووووووووووره..

نقزت يوم سمعت صرخته ..هديته..خفت لا يمد ايده علي مره ثانيه..لصقت ف باب السياره..سمعت صوت نصخه عرفت انه محرج ع الاخر..يلست اصيح بس بصمت..حرك السياره....ارتحت اخيرا برجع شقتي ...تمينا طول الدرب ساكتين ...مسحت دموعي..يوم جفت البنايه الي عايشه فيها..وقفنا عدالها ..عفدت ع مقبض الباب..بس قفل السياره عني ..

طالعته فأشر ع الدبله و كانه منقز منها : شيلي الدبله معاج..

كنت ابا كل شي ينتهي بسرعه ابا انزل من السياره كنت احس مخنوقه.. و ادري اذا عاندته بعاندني..شليت الدبله باصباع ترتجف..سمعت صوت القفل ..فتحت باب السياره و قبل ما انزل زخني من ايدي ..ما طالعته بس سمعته يقول بنبره ما اعرف شو كانت معانتها: حقج علي ..

هدني نزلت من غير ما اطالعه او ارد عليه.. و صكرت باب السياره..سمعت صوت السياره تتحرك بعد ما دخلت البنايه..دشيت الشقه.. و عفدت ع شبريتي..ضحكته يوم يتمصخر علي مرت في بالي فيلست اصيح منهاره ..معقوله حياتي من اليوم ما بمر عليها يوم الاو اصيح...حرام حرام..و الله حرام..قمت بدلت ملابسي..و فسخت الذهب الي لبسني ياه تأملته شكله كان حلو ...بلعت ريجي.. و انا اتذكر يوم كان يلبسني الحيوان يعرف يمثل بالقو...حطيت الذهب و الدبله في بكس صغيرون..

و دشيت الحمام..اتغسل علشان انخمد و استعد للمصايب الي يايتني في الايام المجبله .
تمنيت بيوم الخميس اروح بيت خالوه مريم اتغدا بس ما اقدر اكيد هالحثاله هناك...سويت لي اكل خفيف ... و رجعت حجرتي اتفاجات عمور طالع من حجرته و ياي صوبي ..وقفت اطالعه ...

ابتسم لي : البارحه تاخرتي مع فارس ان شاء الله استانستي..
قعدت ع الشبريه اتطنز: هي استانست وايد ....و انت ..؟؟
عمور: حتى انا ...خوله فنانه

الي يقول ما يعرفها من قبل الحينه بس صارت فنانه..ما حبيت اعلق..الحينه هو يبا مني شي..ولا متى ياه رمسني يالله تعالوا نجوف شو الزبده...رفعت راسي اطالعه ...ياه و قعد جريب مني جفتوا يبا مني شي ..
جفته مستانس : نوره ورا باجر..بخلص اوراقي ف الدواوم .. اوراق الدوره.. و قدمت خوله كمرافقق
رديت ابسرعه : و انا !!

ضحك : انتي هههههه بعد لا اتخافين...
ابتسمت : عمور يعني بسافر معاك بتم معاك..
رد علي : هي..بحجز عقب اسبوعين بنسافر ...
استانست من الخاطر : علني فداك عمور ...
عمور : هي بس فارس يبا ياخذج بوظبي ..
رديت بإنفعال : شووووووووه انت قاعد اتقص علي..
زخني من ايدي : افهميني يا نوره..انا و انتي و خوله بنسافر عن طريق مطار بوظبي تبع الدوام كلهم بسافرون من هناك...ها مب موضوعنا...اهل فارس خاله و خالته يبون يجوفونج...

صديت الصوب الثاني : انا ما ابا اجوفهم...
عمور : ليش تعاندين..

صرخت عليه : انت شو مستوي ذيل فارس كل الي يبا اتسويه له..مب كافي الي سواه فينا...بعد امرابعنه ...
صخ عمور و عقب رمس : تذكري زين ما زين انا الي ضريته بالاول..

سالته : زين و ليش للحين مرابعنك شو يبا فيك مب المفروض خلاص تنتهي الثقه من بينكم..
عمور : قلتلج ما اتعرفين فارس ..فارس قلبه عود ..

صرخت عليه: لو قلبه عود ما ابتزك و خيرك بيني و بين مستقبلك هاللوث الحثاله..
قاطعني عمور: بس صخي صخي .عنبوه محد يروم يرمسج انتي !!..اتحملي هاليومين عقب بتسافرين و ما بتردين البلاد الا عقب سنتين ..

سكت و رجعت اقوله: ها الشي الي امخلني ساكته و صابره ...
وقف : اقولج خالي احمد اتصل بي..عازمنج باجر ع الغدا..بمناسبة ملجتج انتي و فارس ...و شي ناس بيكونون هناك..زهبي روحي...
وقفت و سالته : شو يعني زهبي روحج...

عمور و كانه طفر: اووووووووف انتي صج شرات الياهل الواحد لازم يستعمل معاج الف طريقه علشان ترضين يا الله ..منج..بخلي خوله اترمسج .انا خلاص مب رايم اسولف معاج اكثر..

و طلع من الحجره..هاي ثاني مره تنقال لي ياهل...شو بلاهم..كلهم يعاملوني جي لها الدرجه انا صعبه !!!و الكل يسوي لي الف حساب ههههههههههههه يسون لي الف حساب ليش منو انا و شو اطلع ..شي يضحك..

و يحزن ب نفس الوقت ..طلعت من حجرتي و سرت الصاله اطالع التلفزيون..نفخت روحي سويت روحي شيخه الكل يهابني و يسوي لي الف حساب ضحكت هههههههههههههه مدري شو الي خلني اتذكر الموقف الي صار لي مع فارس .
.حيوان قص علي..صج جرحني حتى ما اتصل يعتذر..لا بعد يبا ياخذني ابوظبي ع جثتي يا ولد فلان ...غفلت بس نقزت يوم سمعت رنة جرس الشقه..نشيت افتح الشقه...كانت خوله

اتغشمرت معاها: انتي ما تستحين يايه بيت ريلج..
خوله: ههههههههه يايه امطج من شعرج و اخذج معاي ...؟؟
نوره: ع وين ان شاء الله ..
خوله: عازمتنج ع الغداء ف المنار ولا ما تبين..
ابتسمت : لا ابا.. و كيف ما ابا و يايتني عزيمه ببلاش ...صبري ببدل ملابسي..
خوله: اوكى بترياج...بس مب المفروض تستأذنين من فارس
عقدت حياتي: نعم ..

خوله: هي ها المفروض الي يصير الحينه ترا هو الحينه مسؤل عنج ..
أشرت ع الكنبه: اقولج يلسي هني ولا تكثرين عن افرج من البلكونه و اجتلج..
خوله: ههههههههه تسوينها..

دشيت حجرتي و الله كل واحد قام يقولني شي..انجلعوا كلكم..بدلت ملابسي..و طلعت..

سالتها : طبعا انا الي باخذج..
خوله: اذا ما عندج مانع
ركبنا السياره و في الطريج سالتها : مب جنه اليوم الخميس زحمة خولووه..
خوله: ما بنتاخر ..بتغدا ابسرعه و بنروح صوب اليشمك او أي حد من هالمحلات..
طالعتها : ليش ..؟؟
ابتسمت لي : ما قال لج عمور ابوي مسوي عزيمه...

نوره: زين و عزيمه ما يحتاي انج تلبسين و تكشخين هالقد محد بيي
خوله: هههههههههه مب لي ..هاي الكشخه لج..

دشينا المنار..ما حبيت اسولف معاها و اخذ و اعطي معاها بالكلام ابا اتغدا ع راحتي ..يوعانه...تغدينا ابسرعه لان ابصراحه ماخذنا راحتنا....المطعم كان زحمه..و ما تاخذين راحتج...

يلسنا نشرب تركش كوفي ..
:قلتها : خوله انا ما ابا اكشخ حتى افكر اني ما ايي اتغدا باجر..
شهقت خوله: تبين تفضحين اهلج انتي
استغربت : ليش افضحهم ان شاء الله..

اتجربت مني : جوفي حبيبتي..بنروح بنشتري لج فستان ..و عقب..بنروح الصالون علشان تتحنين..علشان باجر بعد الغدا..فارس بياخذج حق اهله ف بوظبي ..يعني لازم اتروحين كاشخه...
ما عرفت شو اقولها..كنت بصرخ عليها بس ما ينفع المكان ..جافتني ساكته فسألتني

خوله: شو قلتي..

رديت عليها بغيض : و انتوا ع كيفكم تفصلون و تخيطون من غير ما اتقولون لي شو تتحرون لعبه بايدكم..
حسيت خوله انحرجت فسكتت ..

كملت كلامي : شو تتحرون اعماركم ..عاد انا ما بسوي شي من الي قلتيه.. و ما بروح مع فارس بو ظبي راويني شو بتسوين...
نشت خوله ابسرعه : كيفج انا اسفه..

و سارت عني..انجلعي بجوف منو بوصلج البيت..انا يابتنج..قعدت و انا ارتجف من الغيض شو يتحرون عمارهم هذيلا...جفت خوله اختفت عن انظاري الظاهر طلعت..ويه اخاف يصير لها شي...خوله من النوع الحساس..ربعت وراها..جفتها يالسه ع الكراسي الي برع.. و جنها بتتصل ل خليفه او فارس ايي ياخذها..ييرت عنها الموبايل..حطت ايدها ع غشوتها و يلست اتصيح..

رمست: فديتج خوله ما كان قصدي اسفه..
ما ردت علي كملت صياح ....
ترجيتها : و الله بلحظه غضب..سوري سوري..بسج صياح قطعتي قلبي
خوله : خلاص ما يخصني فيج ما تبين كيفج تبين هم كيفج..

نوره : خلاص انزين انا تعبانه محد حاس فيني..اسفه خوله اسفه..
طالعتني: بالاول بتروحين تتحنين..

رديت ابسرعه: هي بتحنى و بتكشخ بس علشان خالوه مريم و خالي احمد الي مسوين العزيمه..
خذت عني موبايلها..
.ووقفت : عيل يالله اندش داخل ..

رجعنا داخل المنار ..و دشينا كذا محل..اخر شي اخترت ثوب..لونه بنفسج فاتح..و كنت احس ان الثوب وايد فخم يعني ما اتناسب هذي المناسبه الخفيفه..بس يالله علشان نرضي ست الحسن و الدلال خوله...عقبها رحنا صالون غدير.. و تحنيت ..اضاربنا انا و خوله ف الصالون كنت ابا حنه خفيفه..و خوله كانت تبا حنة عرايس ...اخر شي صخيت..عن تصيح لي مره ثانيه و تفضحني ..
.اترييت لي ما نشفت الحنه خلاص..عقبها طلعنا ..
سالتها اتطنز عليها : أخت خوله أي صالون باجر تبينه يعدلني ف دبي ولا الشارجه..
ضحكت خوله مدري ليش استانست يوم جفتها تنقع من الضحك : هههههههههههههههه
نوره: عيبتج..
خوله: هيييييييي وايد..بروح صالون ايفاري شو قلتي..
شهقت : انتي من صجج خلي شيما اتعدلني ...

خوله : لا تستهبلين..خليها مفاجاه و هالثوب لا اتروينه ل حد ل باجر..
سالتها: ما ابا اروح بوظبي مع فارس..
خوله: لازم علشان عقب بنسافر ماشي وقت..

اتنهدت : متى بسافر و ارتاح..زين انا ما ابا اروح ابروحي اخاف تعالي معاي انتي ...؟؟
خوله: شو تبين ارز بويهي هبله انتي ...
سالتها : عيل انتي ليش ما تحنيتي و شريتي لج ثوب شراتي...؟؟
خوله : لاني انا قبل السفر بيوم بتكون عزيمتي ..

أأأأأأأه يا خوله ما تدرين شو بصدري..انا بنيه مثل باجي البنات تبا قاعه فرق و فستان عرس تذكرت انا الي اشترطت ها الشيء ..
..دمعت عيوني ..فارس حرمني من كل شي الله يغربله.. ردينا الشقه..شويه و ياه خليفه ..خذ خوله..قبلها راويتها الذهب الي يابه فارس و حكيت لها كل شي ...بس هي تفهتني و خذت السالفه ضحك و سوالف ..اونه ماله داعي اني اصيح و اثور علشان ضحك و قال لي مبروك يا العروس..خوله ما اتعرف فارس .. ولا اتعرف طبيعة العلاقه الي بينا ..

.المهم قبل ما اتروح ترجتني اني البس ها الذهب..باجر ..بس يخسي البسه بعد ما تطنز علي ....فريت الثوب داخل الكبت..و رحت اغسل ايدي من الحنه من زمان حتى ما اذكر متى اخر مره تحنيت..بس شكل ايدي حلوه بالحنه...وصلني مسج و كان من فارس " بسامحج لانج ظهرتي من غير ما اتقولين لي بس علشان العزيمه لكن مره ثانيه ما بعديها لج "

كنت برد عليه بس مع فارس يناسب اسلوب الحقران يقطع المصران..مرت علي خوله ام العلوم...و سرت الصالون ..خلصت ع الساعه 12 الظهر..عقبها رديت الشقه..

و هي رجعت قبل ما ايي عمور..ما كانت تباه يجوفها ...يلست ف حجرتي اتامل روحي..و الله اول مره احس اني عروس يوم جفت روحي جي كاشخه ..دش علي عمور قعد يتاملني لحظات..عقبها اتجدم و حضني : سامحيني نوره سامحيني..

ابتسمت: ليش كل ها..باجر بتطلق..
عمور مصدوم: فال الله ولا فالج شو هالرمسه ..
ضحكت : زين متى بنروح خالي حرق موبايلي ...

عمور: زهبتي اغراضج ..
نوره : اغراضي !!!
عمور: تراج بتطلعين معاه بوظبي ..
سالته: ليش ما بنرجع نفس اليوم ..

عمور: لا يمكن تقعدين هناك لي ما انييكم انا و خوله و نقعد معاكم و عقب بنطلع من مطار بوظبي ..
يلست ع الشبريه : شو بقعد في بوظبي مع فارس ابروحي...
ابتسم : شو فيج هاريلج..

طالعته : شو هالمصخره الي قاعدته اتصير..اتسون كل شي من غير ما اتقولون لي ..
عمور: ليش خوله ما قالت لج..
صرخت عليه : لا ما قالت "ويلست اصيح.."
حاول يسكتني لا اتصيحين ..نوره لا اتسوين ابروحج جي ..
طالعته و انا اصيح : انت قاعد تجتلني عمور انا ما اريده فارس ..

مسح دموعي: زين لا اتصيحين خلاص انا بتصل بقوم خالي ..و بخرب السالفه بس لا اتصيحين جي دخيلج...
سكتت و طالعته : ما يحتاي اتخرب السالفه..خلاص ماشي فايده المهم بسافر معاك صح..
هز راسه..طالعته جفت دموعه متيمعه بعيونه حضني و باسني

سالته : شو فيك..
خذ نفس طويل : احس اني ظلمتج وايد.."طالعني " بس انا اضمن لج فارس
رديت عليه : ترمس جني ما بسافر معاك..

حضن ويهي بايده: لا بتسافرين معاي بس احسج ما اطيقين فارس يكون جريب منج لو ثواني..
ابتسمت له علشان اخفف عنه : اخيرا حسيت فيني ..

ضحكنا..شليت شنطتي الي كانت فيها اغراض السفر..فكرت اخذها معاي ...و حطيت اغراضي الي بتكفيني اسبوعين...كنت احس برجفه..و انا ايمع اغراضي.. يا ليت يكون كابوس انش منه باي لحظه ..سرت صوب التسريحه.. عدلت ميكابي الي اخترب .

.لمحت البكس الصغيرون فتحته..و لبست الطقم و الدبله مالت فارس ..حسيت بنار تحرق جلدي مكان ما لمسني الذهب بجسمي يمكن لانه مال فارس ..شل عمور شنطتي..و نزلنا تحت ..ركبت سيارته..ما بغيت اودع شقتي لاني اكيد برد لها قبل ما انسافر مع عمور..بنسلم ع قوم خالاتي .

وصلنا بيت خالوه مريم .. و كانت كذا سياره برع البيت الظاهر شي ناس وايد...نزلت و رحت سيده ع الصاله..جفت الصاله فاضيه..دخلت حجرة خوله..بعد محد وينهم !! اتصلت بخوله ردت علي ..
سالتها : وينج ..؟؟
ردت علي: انتي وينج..
قلتها: انا بحجرتج بس البيت فاضي وينكم..
خوله: موجوده الحينه بييج انا داخل حجرة خليفه مع شيما الحينه بنيييج

صكرت عنها ...اتوقعت بلاقي استقبال يناسب مستواي ..انفتح باب الحجره وقفت ع طول ع بالي خوله..بس كان فارس اتفاجا يوم جافني الظاهر ما عرفني اتغشيت و عطيته ظهري..بعدني ما نسيت الموقف الي صار اول امس ...اتصكر الباب ع بالي ظهر..شهقت يوم جفته يدش و يقفل الباب ..
حطيت ايدي ع خدي خايفه : انت شو اتسوي
ابتسم لي ابتسامه استفزتني شو يبا بعد مب كافي اول امس فليل مصخرني شو يبا مني.
.أشرت ع الباب و قلته : اطلع برع ..
اتجدم مني: مب قبل ما اسلم عليج...
صرخت عليه و رجعت ورا: ما ابا
مد ايده : السلام عليكم...
حسيه صج شيطان بنظراته صديت عنه من غير ما ارد عليه ..
سالني: شو انتي كافره انا متزوج كافره !!

رديت عليه بحده: ما يخصك...اظهر قبل لا اصرخ و افضحك...
سمعت ضحكته: هههههههههههه يالله سمعيني غردي اجوف...
خذت نفس طويل ..شسوي يا ربي شو هالبلوه الي ربي بلاني فيها ..اففففففففففف...
طالعته بغيض : و بعدين يعني ...و بعدين
سمعت دقت الباب هذا صوت خوله: فتحي نوره ...
ابتسمت ابتسامة فوز : يالله نش افتح الباب ..
فارس بعناد: بعد ما اتسلمين علي ..
حطيت ايدي ورا ظهري : ما بسلم مستحيل ...
انتبهت للذهب و الدبله الي كنت لابستنها..اووه زين ما انتبه جان بيعلق ع الذهب الي يايبنه ...
فارس: عيل ما بفتح..
خوله: يالله فتحي شتسوين..

اتجدمت ع اساس افتح الباب بس وقف ابويهي خفت من طوله حشى مب ادامي يبل شامخ عدالي..
مد ايده: سلمي..
زخيت ايده بغيض:ها ها شحالك شخبارك زين..
فارس : ههههههههههههه وايد زين..
زخ ايدي و باسها..يريتها و صفعته كرد فعل طبيعي رديت لورا يوم جفت نظراته الي تغيرت و ابتسامته الي اختفت من محياه...
صك ع اسنانه: ما عليه حاسبنهم لج ..
وراح صوب الباب فجه..
شهقت خوله: انت شتسوي هنيييييييييييي ...

يلست و انا ارتجف بداخلي يا ربي كيف بروح معاه بوظبي ..مقدر ..اكيد بجتلني..و الله ماناسب بعض و عمور اونه اضمنه لج..
سمعته يرد ع خوله: ما يخصج..حرمتي و كيفي..
خوله: ما عليه مسود الويه طوف الرياييل يتريونك ف الميلس...
طلع من غير ما اسمع تعليقه...دشت خوله جافتني يالسه ع الشبريه..
خوله : اعترفي شو كنتي اتسوين مع فارس..
رديت عليها : ماشي مهم ؟...
خوله: قولي و اعترفي ترا بفضحج بقول نوره و فارس كانوا بالحجره ارواحهم..
عصبت عليها: بس لاه مب فايجه لج تستخفين دمج
خوله: سوري سوري..امممممم شو هالكشخه..ما ينلام فارس يقفل عليه و عليج الباب..

طالعتها بنظره فسكتت دشن خلود و شيما و نهله و خوات شيما عزه و رضيه...سلمنا علي و باركن لي..عيبهم تعدلي و يلسن يمدحوني..فقدته فارس ما يعرف يجامل او حتى يقص علي فقدته..حثاله شدراه بهاي السوالف ...المهم قعدنا انسولف و كل وحده اتعق تعليق ع الثانيه.
..نسيت اني متضايجه..كانت لمتنا حلوه..قعدنا نتذكر ايام رحلتنا في البر..حكيت لهم حلمي. الي حلمته في الجزيره .بس ما قلتهم كل شي ...

شويه طلت علينا خالوه مريم تباني ادش اسلم ع الحريم يبون يجوفوني..نشيت ورحت الصاله سلمن علي..و باركن لي و الله ع رغم الكل الي يصير بيني و بين فارس.. الاهذي اول مره احس اني صج عروس...حتى حسيت اني بصيح يودت روحي...حطوا الغدا و تغدينا ..يا الله من توقع يصير فيني جي..اخر زمن اكون حرمة فارس سود الله رقاع ويهك..بعد ما صلينا العصر..

زقرني خالي احمد: وينها نوره..
طلعت من حجرة خوله: لبيه خالي ...
خالي احمد: يالله تعالي سلمي ع اهلج..ريلج يبا يروح بوظبي...
حسيت اني طحت بحفره للحظات شو بروح بوظبي بهاي السرعه ما يصير..تو الناس..كنت بحتج و اقول بعدني ابا ايلس بس..عفدت علي خالوه عايشه اتسلم علي..كنت ابا اصرخ و اقول لحححححححححححححظه تو الناس ما ابا اروح الحينه.بس كل وحده قاعده ترقعني ابوسه..يالله شسوي مشيت معاهم الموضوع ..حضنتي خوله و بجت..

.مدري ليش مع اني بجوفها عقب اسبوعين حاولت اصيح بس ما فيني ..غصبت روحي ادمع ماشي فايده..من صاحت خوله..كلهن يلسن يصحن ليش مدري جني بموت..و هذا هو الواقع انا اموت كل يوم يذبحني فارس ...حضنتي خالوه مريم.. و كانت هي اخر وحده اتسلم علي..حضنتها..و كانت ميته من الصياح..ابا اصيييييح بس ماشي فايده....

بس يوم جفت فارس واقف عند باب الصاله يترياني..و خواته يسلمون عليه..بجيت من الخاطر مدري من وين طلعت لي دموع..يلست اصيح و اصيح.. حتى خالوه عايشه يلست اتهديني...ما يدرون شو الي خلاني اصيح جان ضحكوا علي.
.المهم...طلعت من الصاله ..

و بعده فارس كان يسلم ع خواته و يباركون له..تغشيت يوم جفت خليفه و محمد حميد..مب متعوده اتغشي بس علشان كنت متمكيجه..و غير ان شعري طالع ابسبب التسريحه.

.المهم...سمعتهم يباركون لي..عدا حميد..ما سمعت حسه..يا ليتني ما فسخت دبلتك يا حميدان يا ليت..و عند باب الحوي كان عمور يترياني..سلمت عليه حضني و باسني فوق راسي ..شو السالفه الا هو اسبوعين و راده لكم يا جماعة الخير ...
قالي: سامحيني نوره سامحيني..
ابتسمت له و انا ويهي مليان دموع: مسامحتنك..عمور..
عمور: صدقيني اضمن لج فارس عقب كم شهر بتقولين ابا فستان و صاله و عرس علشان كل العالم يجوفون ريلي ..
ترجيته: دخيلك عمور لا تتفلسف علي..هالحثاله عمره ما بتغير محد يعرفه كثري..

رص ع ايدي: زين صخي خالي احمد وراج...
طالعت وراي جفت خالي احمد و فارس يرمسون..و كأنه قاعد يوصيه علي احسن علشان يعرفون وراي ظهر و سند...سلم علي خالي احمد..سرت صوب سياره فارس مدري كيف قادتني ريولي صوب سيارته بس كنت مجبوره..يا الله كيف البرييء يربع صوب منصة اعدامه ...

ركبت سياره فارس هذي ثالث مره اركبها بس اول مره ادقق فيها كانت ريحتها حلوه..ابصراحه ما اتناسب سيارة هالحثاله ...طالعت من الجامه جفت خالي احمد و عمور مدري شو يقولون فارس و فارس بس قاعد يهز راسه جنه هندي توه يتعلم العربيه.

..المهم...يا ويلي ويلاه...ياه صوب سيارته بعد ما سلم ع خالي احمد و عمور...كانت كل خطوه من خطواته..كانه طعنه تضرب قلبي ...بلعت ريجي يوم فتح باب سيارته .. وقعد..نزل دريشه السياره الي كانت صوبي لان عمور اتجدم ..باسني ع راسي خيبه ..اليوم راسي شبع بوس..
سمعته يقول لي: تحملي ف عمرج..

ابتسمت له : ان شاء الله..
قال لي: اغراضج كلها في سياره فارس ..
نوره: مشكور..
رجع لورا يوم حرك فارس شويه سيارته : فارس ما اوصيك...
فارس : افا عليك..في أمان الله..
عمور: وداعة الله ...
طلعنا ع الشارع الرئيسي...حطيت ايدي ع قلبي يا ويلي كم بتتحمل يا قلب .....تميت ساكته و نفس الحال مع فارس ...يلست اطالع الشارع الرئيسي..حطيت راسي ع السيت و غفلت من غير ما احس..شسوي من الملل...فجيت عيوني للحظه جفت فارس قاعد يصب بترول..طالعت حولي نحن وين ...؟؟

ما عرفت ...؟؟ بس الظاهر في دبي ..شويه وركب فارس السياره...و حرك..كملنا طريجنا...ل ما وصلنا بوظبي و هذي اول مره ادش فيها ...ابوظبي شي مدهش كل بنايات... روعه..فديت داري..قمة التقدم و الحضاره..طالعت حولي..معلوم الريال ما يرد راس الخيمه من راغه ابوه ..هني وسايل الراحه متوفره بشكل كبير و متطور..دخلنا كذا شارع و من شارع ل شارع..

.رن موبايله..سمعته يرد..فهمت من كلامه المتصل كان خاله..يبارك له عقب كلمته خالته...اونه امسوي روحه مستانس فقدته...الغريب ان يوم طلبتني خالته اترمسني اتعذر لها شو يخصه هو يخي انا ابارمس مليت طول الوقت ساكته ...يا هي حاله ....اممممم يبا يروح لهم عقب يومين اونه يبا يرتاح مالت عليك يا المنافق قاعد يألف لهم قصص...بس خاطري اجوف البيت الي عاش فيه فارس عقب ما راغه خالي احمد...ما عليه الايام يايه..صكر التلفون..عقبها وقف سيارته...


طالعني : شو رايج بالرحله ..
رديت عليه اتطنز : جنان ...
رمس من غير ما يبتسم : يالله ننزل ...
فتح باب السياره..و نزلت قبله..حسيت ركبتي بتنقع باي لحظه..يالله هذيلا الي يشتغلون ف بوظبي كيف كل يوم رايحين رادين ل راس الخيمه ابصراحه اسميه انجاز ...
نزل شنطتي من ورا..و اتجدم لحقته..دارت بي الدنيا و انا احس ابعمري واقفه بين بنايات اشكثر..بس تدرون ابتسمت حسيت بروحي ف بلد اجنبي ؟؟؟

يالله عقب جم يوم بجوف لندن و بكون متعوده ع هالمناظر..وصلنا الشقه و كانت بالدور الخامس ...فتح الشقه..و انا مكتوب بكل حياتي اعيش في شقق..دشيت.. اممممم شقه عوده اكبر من شقتي انا و عمور..الصاله عوده...بس صج شقه عزوبي مب مرتبه ..شو ان شاء لله يباني انظف له شقته...المهم...لحقته وين ما سار ...فتح باب الحجره..

و حط شنطتي ..باين ع الحجرة مب مسكونه زين بعد...
طلع عني من غير ما يقول أي كلمه..الظاهر خالي احمد عطاه سد الحنك قبل ما يظهر من بيته...صكرت علي الباب ...يالله لاحقه ع الشقى..انسدحت ع الشبريه ..

أأأأأأأأأأخ تعبانه ...فسخت عبايتي و شيلتي ..رحت صوب دريشتي ع بالي بطيح عيني ع منظر رهيب بس كانت بويهي بنايات جامده .مثل فارس ..رديت ..حطيت اغراضي في الكبت...اخ لاه ما يعيبني حجره ما فيها حمام...طلعت ادور ع الحمام..جفت بويهي كذا باب...اخاف افج أي باب يطلع لي فارس بويهي ...احترت أي واحد باب الحمام يا ربي شو هالارف ...رديت لورا يوم انفتح الباب الي مجابل باب حجرتي و ظهر فارس ..
طالعني : شو بلاج ...؟؟
سالته : ادور ع الحمام ..؟؟

اشر ع الباب الي ملاصق حجرتي : هذا حمامج.. "واشر ع الباب الي مجابل باب الحمام" و هذا المطبخ.."واشر ع الباب الي وراه" هذي حجرتي ...و كان الباب الي بين حجرتي و حجرته..مكتبته ..زين بعد طلع مثقف عنده مكاتب ...

جفته رايح صوب الصاله..و شغل التلفزيون..دشيت الحمام و تغسلت...طلعت ...صليت المغرب و العشى..مدري شو البس الحينه..شليت ثوب مخوره..و لبستها ..مشطت شعري .. و حطيت لي مكياج خفيف جدا...يلست بحجرتي ربع ساعه مليت..وكلت امري لله و طلعت رايحه الصاله ..جفت التلفزيون شغال .. و فارس مب موجود..طلع !!..

يلست اطالع التلفزيون..ياني فضول اجوف شقه فارس..و اطالعها مكان مكان..بس مدري اذا فارس كان داخل او ظهر .
..حسيت بيوع..شو هذي الحاله..ها الظاهر طالع برع ...نشيت دشيت المطبخ. فجيت الثلاجه .كانت فاضية ...؟؟؟ما فيها شي ..حطيت ايدي ع بطني يا ويل حالي ...طلعت ..رجعت الصاله شهقت يوم جفت الساعه تسع ابيه للحين ما رقدت هالسبال وينه ...

افففففففففففف شو هالارف ..حاله هذي..وين ذلف حسيت بالوحده..ابمكان غريب...مكان محد فيه غيري..يلست اوسوس الساعه عشر ونص و فارس ما رد..و انا شو اسوي لو ما رد...لالالاو عمور اونه اضمنه لج تعال جوف حالتي جان بتضمنه لي فقدته و فقدت فارس وياك...


يلست حسيت اني نودانه ...يلست اصيح.
.رحت حجرتي و طحت ع الشبريه..و انا ميته من الصياح..شو يتحراني مب اداميه يسوي فيني جي..يا الله متى يمر اسبوعين..

و افتك من الجحيم الي انا فيه..رقدت بعد ما حسيت اني تعبانه.. فجت عيني يوم انفتح ليت حجرتي..يلست ابمكاني خايفه..جفت فارس ياي صوبي...
بلعت ريجي:شو تبا ..اطلع برع ..
اتجدم مني ولا كأني ارمس : شو بلاج كنتي اتصيحين شوه...
نشيت من ع الشبريه و عطيته ظهري..بلعت ريجي منحرجه انا ليش ما قفلت باب حجرتي !!
سالني: يوعانه..

يتني الصيحه : ردني راس الخيمه.."ويلست اصيح" ما ابا اتم معاك..انا مدري كيف طاوعتهم و ييت معاك..
رد علي: زين سولفي بعدين ..البسي علشان نطلع نتعشى برع..
عاندته : ما اباه ...
فارس : امبلى تبين..قاعد اسمع عصافير بطنج...
تميت واقفه ابمكاني شرات الهبله و اصيح..اتمنيت من الخاطر اني ارجع راس الخيمه..اتجدم مني..فرجعت لورا ..
فارس: شو بلاج انا ما أأأأأكل..
ما رديت عليه معقوله ها فارس !!مدري ليش ياني هالشعور ..طالعته راح صوب الكبت ..طالع ثيابي..
سالني : هذي بس ثيابج !!

ما رديت عليه ...اصلا ما كان يتريا مني جواب...لمح شنطتي الي كانت ورا الباب ..فتحها..
قلته : هذي ثيابي مالت السفر خلها ابمكانها ..
طنشني و طلع بدله ع كيفه يتعبث باغراضي ..ياني شعور اروح اشوته...بس خفت..لا يسوي فيني شي ..ياه صوبي و فر البدله ع الشبريه
قال لي: لبسي ها وايد حلو عليج ..
طنشته: ما بلبس شي انا ميته رقاد اظهر من حجرتي ...
فارس : حجرتج !!يالله زين لبسي ..ابسرعه..
صرخت عليه: انت ما تفهم اقولك برقد ما ابا اطلع معاك ...
شل بدلتي و ياه صوبي.: بتلبسين ولا البسج
رديت لورا اتهبي انت تلبسني ها القاصر بعد ...بروده و تطنيشه لي كان يحرقني من الداخل و يستفزني ...صديت عنه بس تجدم مني..شهقت : خلاص خلاص بلبس ...

يريت عنه البدله بعصبيه..بس ما علق..طلع من الحجرة ...لبست بكل غيض شو يتحرا عمره ها السبال ...يالله بتبع سياسة خوله ..بصبر لي ما يفرجها ربي شو بخسر يا ربي ...طلعت من الحجره جفته يترياني برع اول مره اجوفه لابس عقبال يعني ما كان متعصم..ابصراحه شي..احلى بوايد.

.المهم..ما حبيت امدحه ما يستاهل.حتى انتو لا تتصورون اني بوصف لكم شكله علشان ما اتقولون واي يهبل ..أأأأأخ يا قلبي من ها الحثاله كم بتعاني ..طلعنا..و و نحن نازلين من اللفت..سمعته يقول بنبرة أمر: تغشي..
عدلت شيلتي و تحجبت..
قال لي : قلتلج تغششي مب تتحجبين..
رديت عليه: مب متعوده اتغشي..
طلعنا من اللفت حرج علي :تغشي اقولج..


يا الله شو هالحاله..زين ماشي ناس في الممر جان انفضحت فضيحه الله يغربلك يا فارس تغشيت ابسرعه...نزلنا من الدري و الله ما اعرف مب متعوده..نزلت الغشوه و ظهرت عيوني علشان اجوف الدرب...ركبنا السياره ...نزلت الغشوه..
هزبني: ثاني مره تتغشين ما تظهرين من الشقه جي كاشفه ويهج ...
سكت عنه ...يالله كيف بتحمله...زين ارمس و ارمس و تأمر ع كيفك ايام و بفتك منك...تمينا ساكتين ل ما وصلنا المطعم..ما انتهبت لاسمه بس شكله كان راقي و ع اخر فخامه..طلبت لي عشى..

انا بها الوقت قاعده احلم ف رقادي مب اتعشى..ها من الحينه يبا يخرب روتين حياتي ...طلبت لي عشى...و أي شي يطلبه كنت اطلب عكسه..المهم تعشيت..ما توقعت هالكثر انا يوعانه..تميت اكل بشراهه..


ضحك علي : ههههههههه الي يجوفج يقول مب جايفه خير..
بلعت اللقمه حسيت بالاحراج بس طنشت : انت موتني من اليوع انا اتعشى الساعه 7 و ارقد الساعه 8 حط هالشي ف بالك...
رجع ياكل: ان شاء الله بحاول اتذكر...شو رايج بالاكل ..؟؟
رديت عليه : لذيذ..
سمعته يقول: انا دوم من هني اكل...
كملت اكلي مطنشته و شو يعني دوم تاكل من هني و الله
خلصنا عشى..الظاهر كان وده يتمشى ..بس جافني نودانه..فرجعنا الشقه..ما صدقت..فريت عمري ع الشبريه و انخمدت ...

مرت ثلاث اتيام و انا حالي مع فارس ما تغير ..كان كل يظهر من البيت و ما يرجع الا وقت الغدا او العشى ياخذني ع المطعم ناكل و نرد..ها الثلاث ايام كانوا اكره شي بحياتي..حسيت بالضيج و الملل ...باليوم التالي ...دش علي و كنت اتصفح المجله..
.قعد جريب مني و قال: قوم خالي يبون انروح نتغدا معاهم يبون يتعرفون عليج..
رديت من غير ما اطالعه: زين مب مشكله احسن بعد لاعت جبدي من اكل المطاعم ...
ما سمعت منه رد..لحظات رفعت راسي جفته يطالعني بنظرات مافهمتها موليه...انتبه اني اطالعه فوقف ابسرعه و قال لي زين يالله روحي لبسي ..اترياج هني ..

.سرت حجرتي من غير ما اقول شي..كنت افكر ليش كان يطالعني جذا...لبست و عاد هالمره كشخت من الخاطر..ابا احسسهم اني عروس ...طلعت و جفت فارس يترياني ..وقف يوم جافني: زاهبه..
رديت عليه: هيه ...
طلعنا من المدينة.. و دشينا ع فريج..يا سلام حي سكني ..ما توقعت اجوف حي سكني ع بالي كل بنايات..وقف عند فله دورين..الظاهر ها بيت خاله ..نزلنا من السياره فتح باب الحوي بواحد من المفاتيح الي كانت عنده ...دشينا بيتهم الحوي ابصراحه وايد عود و مليان زراعه روعه..تميت اطالع يمين و شمال عايبني الورد الي كانت منتشره في الحوي...زخني من ايدي: عيبج ...
حاولت ايير ايدي بس ما طاع يهدها: هي ..هدني..
همس: جب..
وفج باب الصاله..دشينا...طاحت عيوني ع مجموعه كانوا يالسين بوسط الصاله..الوسيعه..حسيت بالاحراج ..مدري ليش انتابني هالشعور و من غير قصد رصيت ع ايد فارس ...
فارس: السلام عليكم...
_عليكم السلام..
اتجدم ريال شيبه الظاهر ها خاله سلم عليه و علي و بارك لنا.. وسلمت علينا حرمة بعد كبيره بالسن و الظاهر هذي خالته ...و عرفني ع عيال خاله..العوده زينب اتفاجات يوم قال معرسه و عندها ولد ...و الثانيه اسمها مها هاي باين عليها دلوعه من قصت شعرها حسيت جي ..شعرها كان وايد قصير عكس زينب الي شعرها كان واصل ل ركبتها ...بس زينب كانت جميله أجمل ما رأت عيني ...ما شاء الله عليها ..اكيد هي بعمر فارس و امرضعه له ...عرفت ان مها متزوجه من جريب .سلمت علينا و ربعت فوق مدري شو بلاها .
.ابصراحه هاي العايله دشوا ..خاطري..يا حظه فارس..انراغ من بيت خالي احمد..و حضنته عايله..فنانه ..و الظاهر انه مرتاح معاهم..لازم 8 سنوات كافيه ..يخليه يحس انه عايش في بيته ...
فارس: وينه فيصل ...؟؟؟
حسن"خال فارس" بعده برع
زينب: شحالها حرمة اخوي..
هاي ترمسني !! و الله ما انتبهت حرمة اخوي يديده هاي .
..ابتسمت لها: الحمدلله..شحالج انتي ..
زينب : ابخير..عيل فارس ما قلت لنا حرمتك بها الجمال ..
كنت بضحك يوم انا بها الجمال انتي شو تطلعين فلقه قمر ...لاحظت اني للحين زاخه ايد فارس فيريت ايدي عنه ...طالعني و ابتسم : هذي نوره الي دوم اطريها لكم ..."كلامه كان مفاجاه لي"
خالته: كان يرمس عن شقاوتج..بس الظاهر كان يبالغ ..
يا الحيوان فاضحني جدام اهله ..رديت بابتسامه ما عرفت شو اقول ...
خاله حسن: هي امبين عليها بنت عرب و ناس ..ما شاء الله عليها ...
حسيت ان فارس بدا يغير الموضوع جنه غار يدري بعمره حثاله: وين راحت مها
زينب: تلقاها زعلانه منك..تدري بها دلوعه..
وقف فارس: بروح اراضيها ما انروم ع زعل المها ...
خالته: محد مدلعنها غيرك...
فارس و هو يركب الدري: هالله هالله بحرمتي ...
ابتسم لي و كانه يغايضني كنت بطلع له لساني بس زين يودت روحي
حسن: حصه يالله حطوا الغدا البنيه يوعانه..
نشت خالة فارس "حصه" : بروح اجوف الطباخ ..
نشت زينب من مكانها و يلست جريب مني: كم عمرج انتي ...؟؟
رديت عليها : نهاية ال 21
زينب : العمر كله ...انتي وايد حلوه هههههههه بحسدج..
ابتسمت لها: ما شاء الله انتي الاحلى و الاجمل..وينه ولدج...؟؟
زينب : طفر بي 24 ساعه صياح اتصلت بابوه مدري وين خذاه..
ذكرتني بجسوم علني افداه .وولد السوري يحليله والله..انفتح باب الصاله تحجبت يوم جفت شاب داش..
زينب: ها فيصل اخوي ...كتكوت البيت..
فيصل: مب كتكوت ..
زينب: امبلى كتكوت البيت ..
فيصل : بفضحج يا......
حسن: جي ما اتسلم مسود الويه..
فيصل: كل منج ا لسلام عليكم ...من ها الحلوه الي عندنا...
خيبه ويه لوووح بس شكله توه مراهق..طالعنا صوب الدري صوت فارس: خلك بعيد عن حرمتيه..
فيصل"رفع ايده" استسلم..شحالج حرمة اخوي..
ضحكت"باين عليه دمه خفيف" ابخير ربي يسلمك
زينب: شو سويت بالامتحان...شد حيلك..
فارس: الاول ان شاء الله هالسنه بعد..
قعد فيصل: الله يسمع منكم...فكه ما بقى لي غير يومين..
الظاهر انه ثانويه عامه ...نزلت مها من الدري كانت لابسه عبايتها و شيلتها ..
حصه طالعه من المطبخ: وين رايح...؟؟
مها: خالد يترياني برع بنتغدا برع ..
حسن: سلمي عليه ..
فارس: بوصلج برع..
شو ها المصاخه شو يبا يوصلها يعني ما تندل الدرب صدقت حصه يوم قالت ..امدلعنها ..ها الحثاله..بس صج احسدك ع العايله الي لمتك..ابسرعه اندمجت وياهم ..و حسيت بالالفه معاهم..شعور طيب ...تغدينا ...بعد ما خلصنا..راحت زينب بيتها الظاهر ريلها بعد برع.. و تمينا انا و فارس و فيصل..و حسن راح يرقدو حصه تمت اتسولف معانا...ع اذان العصر..
وقف: فارس : يالله نوره ...
حصه: وين يالسين ...؟؟
فارس: ان شاء الله الايام يايه ..
حصه: اكره اليوم الي خذت فيه شقه و طلعت عنا ..
فارس: ههههههه ما قطعتكم زين ليل و نهار وياكم..
باسته : فيك الخير يمه الله يحفظك..
في السياره:: لاحظت شي يجمعنا انا و فارس انا و هو بلا ام..ربتني خالتي و هو نفس الحاله بعد ما راغه خالي احمد ..
سالني: شو رايج باهلي ..
ابتسمت له: دشوا خاطري..بس مها تدلع..
فارس: اول مره اجوفج تبتسمين ..حلوه ابتسامتج ..شو بلاها مها !!
صديت اطالع برع : ماشي ...
فارس: غريبه استويتي هاديه...مب من عوايدج..يمكن الزواج اثر فيج..
طالعته: و هذا اتسميه زواج يا..
قاطعني: بقص لسانج ..
سكت عنه ...ما عليه انا ساكته عنك بس علشان مابقى شي ع سفري مع عمور و ما اريدك اتخرب علي ..خلني اتحمل و اكون مطيعه هاليومين بس ..الله يصبرني ..دشينا الشقه..بدلت ملابسي بعد ما اتغسلت و يلست اطالع التلفزيون...وقت العشى ياه فارس ..طلعنا نتعشى برع ..ردينا متاخر..علمني السهر ولد امه ...

قال لي : باجر علي دوام نشي من وقت سوي لي ريوق ..لاعت جبدي من اكل المطاعم
طنشته و دشيت حجرتي: ما اعرف اطبخ..و هو اصلا شي في المطبخ..
فارس هي اليوم مزرته اغراض بس انتي الظاهر تعلمتي ع اكل المطاعم
سرت صوب باب حجرتي: من زمان متعوده ..
صكرت علي باب الحجره بعد هالقاصر..اسوي لك اكل دحق يدحك..حاولت ارقد تميت اتجلب ما ياني رقاد..انا صار لي اسبوع هني.. و ما قد اتصلت بعمور او هو اتصل يسال عني ...نشيت طلعت موبايلي...جفت البطاريه امفضيه..طلعت ادور لي جراجه...جفت فارس يالس يطالع تلفزيون لمحني واقفه
سالني: شو بلاج...؟؟
رديت عليه: ابا جراجه ..
فارس: حق شو..
تطنزت عليه: ابا اجرج مخي فيوزاته ضاربه ..حق شو بعد ابا ارمس عمور موليه ما اتصل فيني ابا اعرف اخباره ..
ابتسم لي ابتسامه مبهمه : انا شليت البطاقه من موبايلج..
فجت الموبايل ابسرعه..جفت مافيه بطاقه حرجت عليه: منو سمح لك تتعبث باغراضي ..
فارس: باجر بيبلج بطاقه يديده...
رديت عليه: ما اريد..ابا بطاقتي الجديمه...
رد ابرود: مب مستواج ..و بعدين عمور سافر..
اتمنيت بها اللحظه تنشق الارض و تبلعني بس اكيد يقص علي ..ما يباني اسافر ..ادريبه ها المحتال ..
رديت ابرود متصنع: جذاب..
فارس ضحك: ههههههههههههه و الله سافر من ثلاثة تيام هو خوله ...قص عليج..ههههههههههههههه
يتني الصيحه فارس يقص علي مستحيل عمور يسوي فيني جي انا اخته ..كان يضحك ع شكل ويهي المصدوم..قهرني..
صرخت عليه: جذاب انت اصلا واحد لوث ..
صخ فارس ونش تجدم مني رديت لورا خايفه قال لي: كملي ليش سكتي ...؟؟؟
خفت من نظراته ...لصقت باليدار حسيت ابروده قويه...يا ليت ييبت زلاغي معاي ...وينك يا كوت عمور ها مب وقته ..راقبت فارس الي رجع مكانه و شل موبايله جفته يضغط ع ارقام..و علا ع الصوت علشان اسمع ..كان صوت خليفه ..
فارس: شو اخباركم...؟؟
خليفه: الحمدلله ابخير اعلومك و نوره شو مسويه اكيد لاعنه صيرك..
فارس "طالعني": ههههههههههههه شويه...ماشي علوم من صوب اهل لندن..
خليفه: اسكت يا ريال خوله من سافرت كل يوم ادق اتصيح اونه متولهه ع..
ما سمعت باجي كلام خليفه..يلست ع الارض مب مصدقه...ما حسيت ابروحي قص علي عمور خدعني..قعدت اراجع الاحداث ..علشان جي بس يوم الجمعه سووا عزيمه لي و خوله..و بعد عمور اصر اني اخذ اغراضي كلها..و كان كل شويه يستسمح مني..حتى ما اتصل يودعني..يلست اصيح بصوت عالي...عمور خدعني ...خلني مع هالحثاله..وودرني..اكيد خوله ما تدري بها الشيء ولا كانت خبرتني..مدري فارس شو قال ل خليفه..ما سمعت شي..كل الي حسيت به انه يتجرب مني ..كان يبا يجرحني ..طالعته و انا احاول اكتم عبراتي بس ما قدرت ..مسحت دموعي ع ظهر ايدي..يوم جفت نظرات فارس الي كانت تستهزأ مني..
قلته و انا اصيح: انا اكرررررهك و اكره عمور اكررررررهكم..
نزل و صار جريب مني: عمور خلج امانه عندي ..انا مدري كيف طافت عليج لعبتنا و انتي بقمة من الذكاء..
طالعته مصدومه من كلامه ما قدرت اقرا عيونه لانه دموعي كانت مسويه غشاوه ..ما تحملت نظراته..نشيت من مكاني وربعت حجرتي و يلست اصيح لي ما انهد حيلي ..
.نشيت شرات المينون..فجيت الشنطه بعد ما حطيتها ع الشبريه.. و حطيت كل اغراضي ...وصكرت عليها...انا مستحيل اعيش مع هالحثاله ثانيه وحده..انا تحملت و صبرت بس علشان سالفه السفر..يتني الصيحه مره ثانيه..الله يسامحك عمور ...انت ما تدري شو نوايا فارس لو كنت تدري ما خليتني هني ابروحي معاه...شليت شنطتي اسحبها ع الارض..و قبل ما افج باب الحجره فتحه فارس و يلس يطالع الشنطه: ع وين ...؟؟
رديت عليه: ما يخصك..انا ما اعيش مع شخص حثاله..تحملتك هالاسبوع بس علشان محطيه ف بالي اني بفتك منك...بس انت علمت عمور النذاله...
هددني: ثمني كلامج....و ان كنت ساكت عنج بس لاني ما ابا ازيد عليج..كافي الي انتي فيه ...
طنشته.. و سحبت شنطتي...سرت صوب الباب ...و الحينه وين اروح..؟؟ انا ما اعرف أي مكان ولا ادامي هني ...؟؟ شسوي..؟ لو كان بنهار كنت تصرفت لكن ف ليل ..و بمثل هالوقت..ماشي امان ...طالعت وراي جفت فارس متساند ع اليدار..و ابتسامة استهزاء مرسومه ع محياه...من جفته حسيت باليأس...رفسة شنطتي و يلست ع الارض اصيح : ردني راس الخيمه ردني ...؟؟ ابرايه عمور خليه ينسجن عله ما طلع موليه ...
اتجدمني و يرني ووقفت : ما احيدج ياهل اثجلي ..
رفعت راسي اطالعه: ليش قص علي عمور ...وعدني اسافر معاه...
طالعني و كأنه اول مره يجوفني: انتي ما اتعرفين وايد سوالف...و بعدين بالعقل عروس توه متزوجه ريلها بخليها اتسافر برع سنتين..
صخت: من قالك انا عروس من قال ...
فارس..................." ماشي رد"
رديت عليه ابسرعه: بعدين شوه السوالف الي ما اعرفهاخبرني ...
فارس: كل شي بوقته حلو...
يرني جني ياهل وخذني حجرتي ..يلست ع الشبريه..امسح دموعي ...جفته يايب شنطتي معاه..
صرخت عليه: ما ابا اعيش معاك..
رد علي بنفس النبره و ابصراحه ما كنت متوقعه عصبيته: انتي زوجتي الحينه افهمي زوجتي...
كنت بصرخ و اصرخ و اقول اتهبي الا انت بس خفت منه و من صرخاته...رجعت اصيح..شات الشنطه فطاحت ع الارض.. و انفجت فطاحت كل اغراضي..ظهر من حجرتي..وصكر الباب بكل عصبيه..
.استغربت من تصرفه..المفروض انا الي اسوي جي مب هو ليش جي انجلب حاله..ما يهمني المهم اني ما اتم في بوظبي دقيقه وحده..بس كيف ..و الموبايل ما فيه بطاقه شسوي ..ليله كامله و انا اتجلب فيها ..فكرت اتصل بحميد ايي ياخذني بس بشمت فيني ..
مدري شسوي..اخرتها اعترفت ل نفسي..انا مستحيل اقدر ع فارس دام اني وصلت شقته..اخرتها بيمل مني و ابروحه بردني راس الخيمه.
.ماشي غير حل واحد اني انكد عليه حياته ...و اتقبل الواقع الي صار لي ..بغبائي مهما صار يا عمور لو تركع جدامي ما بسامحك...حتى لو بجيت دم.. و عهدن عليك افرق من بينك و بين خوله لانها ما تستاهل مجرم شراتك .....بس شو هي السوالف الي ما اعرفها و الي طارها لي فارس افكار و كلام وايد كان يدور ف بالي ...حتى ما كنت ادري انا صاحية او راقده..ما كنت اكيده من شي الا ف شي واحد اني صرت تحت رحمة الحثاله
فارس ..
فتحت عيوني بثجل...حسيت بصداع ...من تعب البارحه..يالله شو هالظروف الي امر فيها الزمن ما يرحم ابد...فجيت الستاره..جفت ا لشمس توها بتشرق...اتذكرت الحلم ايام ما كنا ف جزيره قشم..كنت اصور الشمس وقت شروقها..حسيت بالانتعاش للحظه ...روعه الطبيعه ع الاقل اتحسين انها اتنسيج هموم و لو للحظات..سرت الحمام.. اتغسلت و لبست ملابسي...صليت الفير..وين ايام ما انش ع صوت اذان الفير ..لاحول ولا قوة الا بالله كل شي تغير في دنياي بس خلال اسابيع ...أي اسابيع الا ايام...بلعت ريجي..سرت صوب المطبخ يلست اجوف كل شي فيه..واو كل شي ناقصنا طباخ...سويت لي حليب بعد ما جلبت المطبخ فوق و تحت ادور ع الغوري ...يلست اشرب ...يا ويلك مني عمور..حقد العالم كله تجمع فيني ..بتندم ع الي سويته فيني ها يزاتي..انت و هاي الي ما يتسمى..اتروعت يوم سمعت صوت فارس : صباح الخير ..
ساحر ها من وين طلع !! طنشته و ما رديت عليه ...
طالعت وراي بعد ما حسيت بلاهدوء..جفته اختفى لا يكون كنت اتخيل صوته..يولي و شو همني منه كل شي تغير ..انتهت وولت ايام المصاخه..و الطاعه...غسلت الكوب.. و طلعت من المطبخ...قبل ما ادش حجرتي سمعته يزقرني..طالعت وراي جفت باب حجرته مفتوح لمحته كان يصكر فصم قميصه
..شو ها فارس ضابط !!محد قاللي الي سمعته عنده شركة سيارات...التفت لي..جذبني شكله وسامته ملامحه الجميله..صديت عنه الصوب الثاني ما ابا اجوفه من زينه ...بس تعالوا ..انا !!نسيت قص الكروت ...لازم اتصل انهي اجازتي لازم اتفاهم ويا ها التعبان ....
تميت واقفه ابمكاني سمعته يقول : تعالي ليش وقفتي ..
اتجدمت ووقفت حذال باب حجرته..قاص علي معطني حجره ع قد حالها و هو ماخذ حجره روعه الا اتهبل قعدت اتامل الحجره كل شي فيها فخامه .
.طالعته يوم قال: شسويتي لنا فطور ..
ابتسمت له : حذر فزر..
طالعني : امممممممممممم بيض و طماط ..اذكر ناس قالولي انج ما اتعرفين تطبخين غير البيض و الطماط..
ضحكت اتمصخر عليه : ههههههه لا و انت الصاج خوزي من صباح الله خير..
رحت عنه صوب الصاله اشغل التلفزيون ...شو هالملل ..
.لحقني ما حسيت فيه بس سمعت حسه يقولي : عشر دقايق برتب اوراقي لي ما اتزهبين لي الفطور ..
فجيت حلجي علشان ارد عليه بس اختفى..اشرت بايدي ولي لاه بعد قصوري اسوي لك فطور ..انا عمور ما قد طبخت له و كنت اذله ذل ع اللقمه الي اسويها..اخوي جي انت شو تطلع ..حثاله..
حطيت مسلسل كنت اتابعه زمان.
.اندمجت فيه مع اني عارفه احداثه..سمعت خطوات فارس..اتساندت اكثر و حطيت ريل فوق ريل اغايضه ..و يلست اضرب الرموت بركبتي اوني ادندن ..تم واقف للحظات يطالع سويت روحي مب منتبهه اكيد مصدوم مب هذي الي كانت البارحه شويه و بتموت ..صدقني برد راس الخيمه يا فارس و انت الي بتردني و الايام من بينا ...مصخها شو يطالع هاه سويت روحي انفض شعري؟؟حركت فطاحت عيني عليه اوني عاد ما ادري انه مصطن من ساعه هني ..فجيت عيني مستغربه من وجوده ..
اتجدم مني ويير عني الرموت : روحي حطي لي الريوق تراني تاخرت
صديت عنه و انا العب بشعري : انا عمور ما كنت اسوي له شي .."ورديت اطالعه من فوق ل تحت و اشر بصبعي و قلت ابرود " تباني اسوي ل........
شهقت يوم يرني من ذراعي حسيت اني ذراعي انشل ما قدرت اكمل جملتي..انا ممكن اسوي أي شي الا نظراته الي دوم تخوفني و تجتلني ..
صك ع اسنانه : ليش سكتي ..كملي
همست له: خوز عني انت بتجلع ذراعي..
عضيت ع شفايفي امنع دموعي من النزول ..شهقت يوم دزني بعيد و قال : روحي المطبخ...
صرخت عليه : ما اشتغل عنك..
وركضت حجرتي بس قبل ما افج باب حجرتي زخني من اخر رقبتي ..و فج باب المطبخ و دزني داخل..حسيت الدنيا تدور فيني ...
سمعته يقول : هني مكانج..انا رايح الدوام..لكن يوم برجع ابا اجوف الغدا زاهب ...
اختفى من عيوني..يلست ع الكرسي..امسح مكان قبضه ايده..يودت عمري ما بصيح ..مابصيح مب ها الحثاله الي بصيحني..ركضت حجرتي ..شليت اغراضي..لبست عبايتي و شيلتي...انا مستحيل اتم هني دقيقه وحده