سمعنا خالوه عايشه تزقرنا عشان نتعشى ..عطيت جسوم ل خلود بعد ما بسته لانه ما كان يباني..ما يعرفني وايد!!مستغربني ..المهم .. طلعنا نتعشى و شويه دش علينا محمد و خليفه..
_السلام عليكم
_عليكم السلام ..
خليفه: اووه نوره هني ..
نوره: شفيكم انتوا ..اروح يعني..ذليتونا ما تسوى علي هاي الزياره..
خوله: امعودتنهم يجوفونج كل نهاية الاسبوع
نهله: ناقصنا عمور.
رديت عليها: احلمي جان تبين اتجوفين عمور قاعد ويانا الحينه ..
خليفه: ايه لا اتحشون ف الريال..
نوره: ما انروم انرد عليك معرس ..
طالعتني نهله : عقبال حميدان
الله يغربلها و الله لو كانت جريبه مني كنت فقعت عيونها ...شو تتحسبني بنحرج منه فجيييييت حلجي بابتسامه اغايضها ..جفت حميد يطالعني..ندمت اني ييت بيت خالوه مريم .. و ندمت اكثر اني رضيت اتعشى ف بيت خالوه عايشه..
كلنا .طالعنا جسوم الي كان يضحك ابصوت عالي ..
حميد: خاين جسوم يضحك عند ابوه و انا يلبسني..
محمد: اتقول ابوه ..
شويه و حطوا العشى ..ما صدقت تعشيت و خلصت..
نوره: يالله ابوي انا بروح..تاخرت الساعه ثمان و نص ..
خالوه عايشه: حميد يمه نش وصل بنت خالتك..
نوره: لا ما يحتاي بروح ابروحي ابراييه..
خالوه عايشه: من ساعه قلتي اتخافين اتروحين ف ليل ابروحج..
حميد: خلاص بوصلج..
طالعت خوله .. و بعدين نهله بس جفت ملامحهم جامده استغربت !! بس ليش استغرب شي عادي من ساعه كانت سوالف .و دووووم كنا جي انسولف المهم ..سلمت عليهم ..
طلعت و طلع معاي حميد...و خوله و خليفه..
خليفه: متى بتروحون تشترون لكم نفنوووف حق الملجه ...
نوره+خوله: نفنووووووووف !!
حميد: هههههههههههههههههههههههههه
خوله: هههههههههههههه
نوره: وين تبا نفنوووف قال..الناس تطورت فساتين
خليفه منحرج و بويهه شبه ابتسامه: متى بتشترووون
خوله: هالخميس باذن الله ...
خليفه: عاد اشتروا شي حلو عن تفضحونا..
خوله: اسمعني نوره شو يقول خليفه..
نوره: طنشيه..انا اول مره اجوف واحد يرز ويهه و يسال عن فساتين البنات ..
خوله: انت اصلا اشدراكك ف الموضه..
لاحظت حميد صاخ بس يسمع ...رفعت راسي اطالعه ابتسم..لي
وقال: يالله انا بركب سيارتي و بترياج لي ما توصلين سيارتج
خليفه: شو رايك بالمره اتشلها و تشل سيارتها وياك..
خوله: ههههههههههه
خليفه: و الله مستوي لي قيس
حسيت بالاحراج من تعليق خليفه سكت و ما رديت.. و كملت طريجي صوب بيت خالوه مريم..بس سمعت حميد يرد عليه..
حميد: طوووف انته لا اكون السبب في فسخ خطوبتك و بالمره زواجك..
ما سمعت رد خليفه بس سمعت خوله تضحك ابصوت عالي ... و خوله ليش واقفه معاهم للحين اصلا !! وصلت سيارتي فتحت باب سيارتي و يلست و قبل ما اشغلها جفت خليفه يركض و حميد وراه ..و خوله ميته ضحك..ابتسمت ل الموقف..صج الايام الي تروح عمرها ما ترجع...ركب حميد سيارته و حرك...نزلت دريشة سيارتي يوم وصلوا خوله و خليفه صوبي: سلموا ع خالوه مريم و خالي احمد ..
خليفه: ليش ما تنزلين اتسلمين لهم بلمره..ولا اتخاف لا يطير عنج حميدان
رديت عليه: طووف لا ادعمك..
خوله: خليفه شفيك عليهم ..خلهم ع راحتهم
خليفه يطالعني و يرمس خوله: انتي ما اتجوفينهم نظرات و ابتسمات ..انا بيت خالوه عايشه كنت قاعد بس اراقب الفلم الهندي...
نوره + خوله = ههههههههههههههههه
رفعت دريشة سيارتي و انا اقوله:من خطبت استوا دمك ثجيل الله يعين شيما عليك...
و حركت سيارتي قبل ما يعلق ..مب ناقصتنك خلووف..ترا ملاحظاتك مالها معنى ولا حايه...اتجدمت بسيارتي و طلعت ع الشارع الرئيسي .. و لحقني حميد...رفعت راسي بالجامه جفته يرمس بالتلفون ...هذا هو حميييد من عرفته لوتي عود ما مخلي بنيه بالفريج الا امرمسنها....حتى اظني المحترمه يلاحقها ل ما يخليها اتصيع ...
مادري شو اسوي ..بالكلام الي قلته ل خوله..اسوي الفكره او لا ..!! حميد قال بخطبني بس للحين ما قال شي .. ولا نطق..بس حركاته اتلمح..بس يمكن يقص علي مثل ما يقص ع غيري !!! المهم بحاول اخليه يتعلق فيني .. و يخطبني ...المهم نهله ما تاخذ عمور..بس بيطيع اذا قلته ها الشررط ؟؟...اتنهدت انا قاعده اخطط لشيء جايد و مدري شو نتايجه ..
.اذا حميد يباني صج..بييييييوافق ع شرطي.. و ابمجرد ما تنخطب نهله او عمور يفكر ابغيرها و يشل راسه فكره خطبته ل نهله ...بفسخ خطبتي من حميدان ...بحجة انه لعاب ومغازلجي رقم واحد...
بضرب عصفورين بحجر منه بأدب حميدان و منه ما بخلي عمور يفكر ب نهله ...بعد ما ينرفض...ابتسمت ع الخطه الجهنميه الي قاعده امشي فيها ...رفعت راسي مره ثانيه جفت حميد وراي و بعده يرمس بالتلفون..طنشته...
اخيرا وصلت شقتي...بركنت سيارتي...نزلت جفت عمور واقف عند سياره واحد من الشباب و يسولف معاه ياخي حرام ..عمور ما يشتغل ناطور للبنايه كل ما ايي اجوفه واقفه حذال البنايه و يرمس..حشى حتى الناطور ما يوقف كثره..جافني عمور رفع ايده يسلم علي يتحراني واحد من الشباب هاي ما يستحي جدام ربعه يسولف معاي و يسلم عادي عنده... شو ها الاخ الفرييييييه طنشته و جني ما اعرفه وو .سرت داخل..بس قبل لا ادش سمعت صوت عمور المزعج يسلم ع حميد...
معناتها حميد نزل من سيارته..
.طالعت وراي..جفت فارس ينزل من السياره الي كان واقف حذالها و يسلم ع حميد..هاه يعني هذي سياره فارس لحظه شي شاب غيره...و انا شو لي فيهم..دشيت البناية... دشيت شقتي و انا ادور زلاغي و كوت عمور الاخضر مال الشرطه كنت ميته من البرد ..صليت العشا و انخمدت في سابع نومه ..
ف اليوم الخميس ع الساعه 11 الصبح ..كنت بتصل ب خوله بس هي دقت لي..
رديت عليها: ساحره توني كنت بتصل بج..
خوله: قلبي ع قلبج بس سبقتج يعني انا احبج اكثر..
نوره: زين حبتج العافية حبيبتي...
خوله: زين زاهبه ..
نوره:زاهبه!!مب المفروض انا اسالكم اذا كنتن زاهبات اولا ..انا الي باخذكن..
خوله: لا ابوي ما رضى انروح ارواحنا نحن البنات..
نوره:يعني شوه...؟؟
خوله: يعني يا حلوه... نحن بنمر عليج...
نوره: نحن!! منو بياخذكم خليفه...
خوله: لا خليفه راح يصايع ف دبي هو محمد ...حميد الي بياخذنا...
نوره: اممممممممم ما تلاحظين حميد وايد قام يثبت وجوده..
خوله: هههههههههه وين تبين يثبت وجوده..
نوره: زين ابوي انتن اسبقوني ..انا بعدني اغسل ثيابي من اخلص بخلي عمور يوصلني متعايزه اسوق ..
خوله: خلاص عيل نحن بعد شويه بنظهر..اتريا حميد يمر علينا...
نوره: انزين خلاص بعد نص ساعه بظهر من البيت ..الا ما قلتي خليفه و محمد شو يسون في دبي..
خوله: محمد عنده شغل مدري سوالف سيارته ..
نوره: انزين.. و خليفه..؟؟
خوله: خليفه رايح كشته ويا ربعه ..و يمكن يشتري هدايا حق شيما
نوره: يا ويل حالي ..انا ع بالي راييحين مع بعض ..
خوله: لا لا ...يالله اسمع هرن السياره..
نوره: زين يالله سلمي ع حميدان ...
خوله:شوه قلتي ؟؟؟
نوره: ماشي مع السلامه..
خوله: فيمان الله ..
نشيت من ع الكنبه و رحت حجرة الغسل و و خلصت تقريبا بعد ربع ساعه..دشيت حجرة عمور جفته مب موجود اتنهدت ع بالي راقد هالانسان يدش البيت و يظهر و انا ما عندي خبر ... اتصلت به..رد عليه..
:- ها نوره شوبلاج ..؟؟
نوره: وينك مب توه كنت موجوده ف حجرتك متى ظهرت ساحر انت !!
عمور: ههههههههههههه انتي كنتي اتغسلين جفتج بس انتي ما انتبهتي لي ...ليش بغيتي شي ..؟؟
نوره: طلب صغنون لو سمحت ..
عمور: من وين لج هالاحترام عادي خلج دفشه ..و قولي شو بغيتي..
نوره: اباك اتوصلني المنار ..؟؟
عمور: و سيارتج وينها ..و بعدين شتسوين المنار ابروحج..؟؟
نوره: مب ابروحي بنات خالتي هناك..سبقون حميدان خذهن..و انا اباك انت اتوصلني ...بتيي ولا اروح ابروحي و ابكرامتي..

عمور: انزين انا تحت لبسي و انزلي اترياج بالسياره..
اقولكم حرام ما يكون ناطور: تحت !! حد معاك "خفت لا يكون فارس موجود .."
عمور: كنت اتريا واحد من الربع خلاص بتصل به بخبره اني بتاخر شويه.
نوره: هاه قلت واحد من الربع ..لا يكون ...
قاطعني:: عندج خمس دقايق ما نزلتي بروح عنج..
نوره زييييييييييييين حشى علينا ..يالله دقايق و نازله ..
بدلت ملابسي و لبست عبايتي و شيلتي و ركضت نازله تحت ...من جافني عمور ركب سيارته .. سرت و ركبت حذاله ...سرنا المنار ..كان جريب منا...وصلنا ..و الغريب تمينا ساكتين طول الدرب.. مع ان من هذاك اليوم الي صحت فيه و راضني ..ردت علاقتنا شرات قبل.. حتى عمور قام يحذر ما يطري لي فارس ابد... هالشيء ريحني تمام...زين بعد سوا لي حساب ...بركن سيارته ...طلعت موبايلي و اتصل ل خوله ..
ردت عليه نهله.
سمعتها اتقول لي: هلا بالطش و الرش..
نوره: احيدني طلبت رقم خوله مب رقمج ..
نهله: موبايل خوله عندي...ها وينج انتي ..؟
نوره: توني وصلت انتوا وين عشان اييكم ..
عمور يسمع الكلام الي يدور بيني و بين نهله بس ما اعتقد عرف اني ارمس نهله ولا بخليه يعرف..
نهله: نحن في الجعيدي تعالي لنا ..
نوره: زين دقايق و بكون عندكم...
صكرت عنها ...طالعت عمور..
نوره: شكرا ع التوصيله بنزل الحينه..و انت اتوكل.
عمور: بتروحين ابروحج داخل !!
نوره: شو فيها ...
عمور: لا بنزل وياج بوصلج داخل و عقب برجع ..
و بند السياره ما عطاني فرصه اقوله ما يحتاي الهرم جنه حاس نهله موجوده و هي الي ردت علي ...سبحان الله الي قلبي ما يدانيهم ولا يحبهم و يموت فيهم عمور ..المهم نزلنا من السياره.. دشينا المنار..انا صح طويله بس جدام عمور جني قزومه ...دشينا المنار و سرنا صوب الجعيدي جفنا حميد يالس يرمس بالموبايل ...برع و قاعد يحاوط ..سلم ابدينه يوم جاف عمور...
نوره: ها حميد ما يشبع مغازله..
عمور: و انتي اشلج بالريال ...و بعدين ليش تظلمينه يمكن يرمس واحد من الربع ..
نوره: هي صح واحد من الربع علينا ها من احيده..
عمور: ندري لوتي بس فضحتي الريال ...
نوره: هههههههه
وصلنا صوب حميد فصكر الموبايل ... و سلم ع عمور ..
عمور: ها بو عبود اجوفك اتحاوط برع..
حميد: ياييب البنات...شحالج نوره..
رديت عليه بابتسامه: زينه ..
التفتنا كلنا ل صوت نهله الي كانت واقفه عند باب المحل
نهله: تعالي نوره جوفي فستاني بعيبج..
انقهرت منها اونج انتي تبين رايي الا جفتي عمور الله يغربلج..
عمور: نوره !! كلهن متغشيات الا انتي ليش ...؟؟
نوره: انا غير ...يالله روح قلت بتوصلني و بترجع خلاص برجع ورا حميد..
عمور: لا غيرت رايي بتم معاكم شكل الطلعه حلوه..
طالعته بنظراته فهمته ادري غيرت رايك لانك جفت نهله هني يا الدب يا عمور ..عطيته ظهري من غير ما ارد عليه بس سمعت حميد يساله: شو بلاها
ما سمعت رد عمور لاني خلاص دشيت داخل ...
سلمت: السلام عليكم
الكل_عليكم السلام ..
نوره: ها شو شريتوا شي ...؟؟
نهله: انا اخترت هالفستان حلو مره قياسي..
صديت عنها و طالعت خوله : لا مب حلو شو ها الذوق ..خوله شو شريتي شي
سمعت نهله اتقول: و الله ما عيبج..
خوله: مدري نوره شكلي بغير رايي و بشتري لي فستان اتجنن الفساتين..
جفتها ماسكه فستان لونه سماوي. و طالعت خلود جفت ابيدها فستان لونه زيتوني بس اتصدقون احلى فستان عيبني الي كانت مختارتنه نهله...اتفأجات يوم سمعت نهله و كانت واقفه وراي اتقول ..
نهله: حميد عمور حلو هاللون ..؟؟؟
صديت جفت عمور و حميد داخل المحل شو اتسوووووووون هني..سرت صوبهن عشان اروغهم جنه محل ابوي ...
عمر: يهبل هاللون عليج..
رديت عليه: و انت شدراك بالالوان هاه ..
نهله: انتي شفيج غيرانه ..
حميد: هههههههههه شو بتضاربون هني بعد مب وقته خلصن..بياذن الظهر و انتن ما شريتن شي..
نوره: انا بشتري لي ثوب من اليشمك ما ابا اشتري فستان ..
خوله:تجدمت منا: زين روحي انتي اليشمك لي ما اندور لنا فساتين..عشان ما انضيع وقت...
لقيتها فرصه ابعد عمور عن نظر نهله: زين يالله عمور تعال معاي اليشمك ...
عمور:- لا انا ما ابا اتاخر و بعدين اليشمك داخل انا ما ابا اتاخر..
نوره: لا و الله عيل ليش نزلت معاي..؟؟
عمور: عشان اوصلج ما يصير اتروحين ابروحج...
نوره: عيل الحينه بروح اليشمك ابروحي..
و طلعت من المحل و لحقني
عمور: لا تستوي شرات اليهالوووه زين؟اصطلبي..
رديت عليه بعصبيه: تبا اتم مع نهلووه هاه من جفتها قلت غيرت رايك..
رد يغايضني: كيفي خطيبتي..
سرعت بمشيتي: لو تموت
لحقني سمعت ضحكته و ييرني من ايدي: قسم بالله انج ياهل ..
سكت عنه و ما رديت...وصلنا اليشمك..دشيت و دش معاي عمور ...
سالت البياع: شو عندك شي يديد..
تم يعرض علي جلابيات..عيبتني ثلاث جلابيات احترت شو اختار..
سالت عمور: أي وحده اختار ...؟؟
عمور: توج اتقولين شدراني بالالوان.. و الحين تبين رايي
طالعته: انا الحماره الي اسالك..
ابتسم لي و طلع برع يرد ع موبايله يوم رن ...
البياع: عايزه الصراحه ده اللون الاسود يجنن
نوره: بس هاي الجلابيه درجات الازرق رهيبه...
فكرت للحظه اذا لبست اسود بحشروني خالاتي ليش لابسه اسود و مدري شو خليني أخذ هاللون ..
نوره: خلاص باخذ هذي الجلابيه ..و كان لونها ازرق بدرجاته...جفت عمور يظهر من المحل و كانه يبا يتصل ل حد..اتفجت ع السعر مع البياع و ظهرت من المحل صكر يوم جافني يايه صوبه..
سالته: شو بتروح ..؟؟
عمور: هي خلصتي خلاص ..
ردت عليه: هي خلصت بس ما بروح معاك ..بروح عند قوم خالوه
عمور: منو قال بردج بمر ع واحد من الربع ..
نوره:زين اظهر من الباب الي صوب المطاعم ..و انا برجع الجعيدي شكلهن البنات ما خلصن..
عمور: ع كيفج شو اظهر من هاك الباب و انا موقف سيارتي صوب الباب الرئيسي..
نوره: علينا قول تبا اتجوف نهله..
عمور: اففففففففففف نوره لا اتلوعين بجبدي..طوف جدامي لاعطييج ع ويهج..
نوره: زيييييييين شيل الجيس عني ما تستحي اتخليني انا اشيله و انت الريال
ياخذ عني الجيس: الله يعين فارس عليج..
طالعته مستغربه: شو قصدك ..؟؟
مشى و لحقته: ما يخصج..
رديت عليه متنرفزه: امبلى يخصني و شو دخل فارس الحينه ..
عمور: نوره طوفي جدامي .."وقف فجاه و طالعني" هذي شواربي بحلقها جان خذتج معاي مره ثانيه..
بطلت حلجي ارد عليه بس ما عرفت شو اقول ف سكت و تجابلنا مع قوم خالتي و هم طالعات من الجعيدي..و حميد وراهن..عطانا عمور الجيس..
خوله: شريتي خلصتي ..؟؟
نوره: هيييي و انتن..
خلود: خلصنا بس انا مب مقتنعه بالي شريته..
عمور: يالله انا بروح عنكم عندي شغل ..
حميد: خلاص بنتغدى و بدق لك عشان ايي صوبكم ..
نهله: ليش عمور ما بتتغدا معانا ..
طالعني عمور و رد ع نهله:الشيخه مشغول وقت ثاني .. اوكى يالله فيمان الله ..
قهرتني نهله..حسيت ان شي علاقه بين نهله و عمور اكيد يرمسون بالتلفون ويا بعض انا متاكده..طالعت خوله جفتها اتجوفني و كانها تقرا افكاري ..
.طالعنا حميد يوم قال ..:يالله شو رايكم انروح المصلى بالاول انصلي و بعدين انروح نتغدا..
بعد ربع ساعه طلعنا من المصلى ..جفنا حميد يتريانا برع.كنت اسمع تعليقات خوله و خلود و نهله..بس ما كان لي نفس ارد عليهن و اسولف محتاره..افكر برمسه عمور"الله يعين فارس عليج.."جمله متعلقه في بالي و ما برتاح الا يوم يقولي عمور شو قصده...سرنا صوب المطاعم و يلسنا حميد عن طاوله كانت بالزاويه و شويه بعيده عن باجي الطاولات ..اقدر اقولكم منعزله..عشان ناخذ راحتنا ..
حميد: يالله شو تبون غدا..
نهله: ع حسابك..
حميد: طبعا ...
خوله: اممممممممم ابصراحه خاطري بزنجر ..
خلود و نهله: نحن بعد من زمان ما كلنا شي من كنتاكي...
حميد: و انتي نوره شتبين تاكلين..
طالعته: أي شي ع ذوقك..
حميد: يمكن اييب لج شي ما تبينه...؟؟
نوره: كل شي منك بيعيبني..
ادري نهله و خوله و خلود مستغربات من ردي..بس لازم اتجرب من حميد..عشان ابعد نهله و عمور عن بعض مستحيل عمور يرتبط ب نهلووه لو شو يصير ,..
حميد مبتسم: حاضر لطيبين..وراح..
نهله: اونه سمعتوا الي سمعته..
خلود:هههههههه الظاهر القلوب عند بعضها..
نوره: و انتن شو حارنكن
خوله: شو فيكم راح فكركم بعيد عادي نوره دوم اتسولف مع حميد ليش كل هالتعليقات...
نهله: لا لا خوله لا ادافعييييين...
كرهت نهله و كرهت تعليقاتها ..وقفت..و شليت شنطتي ..
خلود: وين رايحه..
نوره:بروح ورا حميد انتن مملات..
و سرت عنهن و سمعت تعليقات نهله..بس طنشتها و ما حبيت ارد عليها...لحقت حميد..اتفاجا يوم جافيني جريبه منه..
ابتسمت له: مليت من القعده..
رفع حياته:لحقتي تملين
هزيت راسي بمعنى نعم..وصلنا كنتاكي و طلبنا للبنات الوجبات الي طلبوها...و طلب حميد لي و له وجبات .. و شرينا بيتزا .... و مقبلات...طالعت حميد و هو قاعد يرمس راعي المطعم..غمضني..حسيت اني اتامر عليه و العب بمشاعره بس ع عشان رغباتي الشخصيه..بس بعد حميد يقص علي..ادريبه لوتي و من ساعه يوم دشينا انا و عمور المنار جفته يرمس و صكر من جافنا معناته كان يغازل...يعني كل واحد يلعب ع الحبليين..هالشيء يريحني..صديت عنه يوم
سمعته يقولي: اول مره اتجوفيني والا قاعده تدرسين ملامح ويهي..
مارديت عليه..ردينا ل قوم خوله.. و يلست مجابله حميد..
نهله: يالله انا يوعانه تاخروا..
خلود: يا الله بالستر
نهله: ههههههه ىمن زمان ما تغديت هني عشان جي مستانسه.
حميد: زين عن تاكلينا و تاكلين الطاوله ويانا
خلود +نهله +نوره= هههههههههههههههه
طالعت خوله جفتها سرحانه..و ملامح ويها متغيره ...حسيت فيها شي ادري خوله فيها شي ساكته و هاديه ..محد ملاحظ عليها..بس انا خوله اعرفها اكثر عن نفسي...ما حبيت اسالها جدام نهله و خلود و حميد..وصل الغدا و تغدينا...طبعا احتجول البنات ليش انا و حميد طلنا اكل خاص و بيتزا و مقبلات..بس طنشناهم و كلنا ..بعد ما تغدينا...نشت خوله
_انا بروح اطلب لكم كوفي..شو تبون..
خوله تهرب من شي حتى انها ما كلت شي !! شو سالفتها ...جفت حميد يراقبني..ابتسمت له و صديت عنه ..قامت خوله ..و سارت صوب الركن الفرنسي حسيتها تهرب من شي ...لحقتها..
سالتها بصوت واطي: شفيج خوله انتي مب طبيعيه..
تهمس: ماشي بس انتي لا اتمصخينها ويا حميد ترا الي اتسوينه غلط..
نوره: ادري بس ما اظن هالشي مضايجنج شو فيج ...؟؟
ردت بعصبيه: ماشي..
سكت عنها ما اباها اتعصب علي ...خوله بطبعها هاديه..بس اذا حرجت..عادي اتسوي أي شي ما تندم عليه لو شو كان...طلبت لي كوفيه..و كنت بطلب ل حميد شراتي بس خوله ..ما خلتني.. و ما حبيت اجادلها عادي اطلع حرتها فيني ..
.طلبت خوله لها و خلود و حميد و نهله.. و ردينا الطاوله..و معانا صينيه الكوفيه ..شربنا ضحكنا و سولفنا حسيت خوله شويه شويه اترد ل طبيعتها .. و غير ان حميد امسوي جو في القعده ضحك و سوالف ... و هالشي ونسنا...بس اتصلت خالوه عايشه عشان اتقولنا ان جسوم ملعوزنها..بصياحه.. و عشان جي فكرنا انرد البيت....بس نحن و طالعين..و عند باب المنار طاحت علينا خوله مغمي عليها ...

(( الحلقة السادسة))

"مد الخطاوي وعاود يا خلي إبساع ..في خافقي صار حبك يالزين مطبوع ...الحب بيني وبينك مكشوف القناع ..يعطي البراهين ما بين اهات و دموع"
حسينا بالصدمه كانت تمشي ورانا..بس يوم سمعنا ضربة قويه ع الارض كلنا التفتنا و جفنا خوله طايحه..عاد اتخيلوا بالمنار و يوم الخميس و حزة الغدا...عفدنا عليها انا و خلود و نهله..حميد كان متردد يشيلها اول لاء.
.بس حسينا انها اطالعنا و اتحس فينا بس كانت ميهوده و مب رايمه تمشي..دمعت عيوني يوم جفت خوله ضعيفه..و كانها مكسوره الخاطر فديتج خوله كنت حاسه انج مب طبيعيه و فيج شي..بس ما توقعت جي بيصير لج...حاولنا اوقفها انا و خلود و نهله..قدرت توقف و اتساندت فينا..و كنا نسحبها لانها ما كانت رايمه تمشي..دورت حميد نم بين الناس المتيمعه..بس ما لقيته..عرفت انها سار اييب السياره..
رمسة خوله: خوله خوله انتي ابخير..
ردت علي : هي هي..
بس كنت عارفه انها مب حاسه ابعمرها ولا كانت داريه شو اتقول..بجت خلود..بعد ما ركبناها السياره..
عصبت عليها: اسكت لا اتصيحين شو فيج ..
حميد: اخذها الطبيب
خوله بصوت ضعيف:ما يحتاي انا ابخير بروح بيتنا ..
خلود تمسح دموعها: ويهج ما يطمن انج ابخير..
نوره: حميد ودها الطواري..
خوله تبلع ريجها:اقولكم انا ابخير ابا اروح البيت بس ..
نوره: زين حياتي بنوديج البيت بس انتي لا ترمسين..
غمضت عيونها مدري رقدت ولا اغمي عليها مره ثانيه..كنت كل ما ازقرها كانت اتقول هي حتى لو اسالها ..عرفت انها بعدها مب وعيها..دقايق و ع سرعة حميد وصلنا الطواري..حاولنا انزلها من السياره لي ما ياب حميد كرسي متحرك.
.الحمدلله لك ربي يوم طرشت حميد معانا و ما سرنا ابروحنا شلة بنات ...كنا بنتورط...يلسنا خوله ع الكرسي و ابسرعه وصلنها غرفة العلاج..تميت معها ..نص ساعه ف الغرفه...و كانت نهله و خلود و حميد يتريونا برع..نهله اختفت و كانها خايفه ..و خلود عبرت عن خوفها بالصياح..حميد كان المنقذ لنا ..بطلت خوله عيونها مستغربه المكان اتجدمت منها ..
ابتسمت لها: الحمدلله ع السلامه..
خوله:شو صار ...؟؟
نوره: مدري بس و نحن طالعات من المنار طحت علينا ..فضحتينا زين طيحي ف السياره مره جدام العالم..
ابتسمت خوله: و الله ما اذكر شي كل الي اتذكره يوم حميد قال يالله انروح..
مسكت ايدينها: ابشو حاسه..
خوله:جسمي متكسر و ضعيفه..
نوره: يمكن لانج مب متغديه..
خوله: تستهبلين كلت معاج..بس احس براحه الحينه..
نوره: يمكن لان جرعات الاوكسجين فادتج...ع فكره انتي ما كلتي ولا شي ..كنتي سرحانه..
جفت حزن بعيون خوله فديتج خوله افداج بروحي بس امسحي الحزن من عيونج..دش علينا الدكتور..
الدكتور: ازيك يا خوله..
خوله: الحمدلله احسن..
الدكتور: تقدري تمشي ..
خوله: طبعا ما احس فيني شي بس ميهوده..
الدكتوره:ايه ميهوده!!
ضحكت: هههههههه دكتور يعني تعبانه..
الدكتوره:أه هههههههه لا ما اتخفيش ده مجرد ارهاق و قلة اكل..حاولي تتغذي كويس.. و ازا عايزه تطمني ع روحك تعالي اعملي فحوصات شامله..
يلست خوله: ما فيداعي يالله نوره انروح البيت..
الدكتور: ايه مالك يا خوله..
نوره:هههههههههههه
دشوا حميد و خلود و نهله..
خلود حضنتها: شحالج خوله ابخير..
خوله:شفيكم انا بخير..
حميد: اسميج سويتي فينا مقلب ..
نهله: ابصراحه ..........
قاطعتها: صخي صخي نهله اونج الحينه رمستي "طالعت خوله" ترا هاي اول كلمه تنطقها نهله بعد ما طحتي علينا
نهله: شو كنت خايفه..
خلود: انا اتصلت بامايه و خبرتها ..وايد تحاتيج..
خوله: ما كان لازم اتخبرينها..
حميد:يالله انروح..
جفت نهله اتجدمت عشان اتزخ ايد خوله..سبقتها مسكت خوله من ايدها
نوره:خل عنج انا بمسكها خلج مرتاحه انتي..
خلود: متفيجه نوره..
نهله: زين بسم الله عن تاكلينا..
حميد:روحن السياره انا بييكم..
ووقت العشى ع الساعه 8 بعد ما تعشينا بيت خالوه مريم..انا و خلود و نهله..طبعا حميد ظهر مع ربعه..اتصلت ب عمور اخبره اني برقد مع خوله..لاني حسيت انها تعبانه و محتاجه لي..طبعا عمور ما صدق خبر اصلا شو يهمه ولا تفرق عنه..زين بعد باجر الجمعه و اجازه ماشي دوامات...انسدحت ع الشبريه حذال خوله..كان فيني رقاد خلاص الحين وقت رقادي..
خوله:شو بترقدين..
مغمضه عيوني: ابا ارقد خولوووه ..لا تزعجيني..
خوله: اونج عيل ليش متعبه روحج و تامه معاي روحي انخمدي في بيتج..
رديت عليها بكسل: شو تتحرين برقد معاج عشان اسهر الليل اراقبج و انتي تنخمدين.
خوله: هي ع بالي جي صدمتيني؟؟
ابتسمت لها: اتصدقين خوله ..
خوله: هاه..
نوره: احس بج تدلعين ..صح..
اتنهدت: يا ليييييييت نوره يا ليت..اه يا قلبي
رفعت راسي اطالعها يوم لفتتني نبرة صوتها : شو مضايجنج انتي ف البدايه كنتي عاديه و طبيعيه "شهقت و نقزت ابمكاني و يلست ع الشبريه
خوله مستغربه: شو بلاج ...؟؟
نوره: انتي انجلب حالج بعد ما تماديت مع حميد لا يكون اتحبينه و اتغارييييييين
طالعتني خوله مستغربه ..و فجاه هههههههههههههههههههههههههههههههههههههههههههههههههه ههههههههههههههههههه
بشكل هستيري حتى اني خفت لا صابها شي ..
يلست اهزها: خوله خولووووووه بس خولوووووووووووه
خوله و هي تضحك: انتي عليج افكار..غريبه ..ابصراحه اثبتي لي انج مينونه..
نوره: جب صخي لا تضحكين و الله يوم تضحكين علي احس ابعمري هبله..
خوله: ههههههههههههههههه و غبيه بعد شو هالافكار انا احب حميد..
نوره: عيل شو جلب حالج هاه ..لدرجه انه اغمي عليج اونج انتي صرتي حساسه..
خوله"تتنهد"ضحكتيني من الخاطر مشكوره ..
رجعت انسدحت ع الشبريه: عفوا ..ما اعرف ارقد ابا زلاغ ..
خوله: من وين اييب لج..
نوره: اتصرفي..
خوله: ما عندي و الله تبين اسال لج امايه..
نوره: طبعا لا تستهبلين..خربتي علينا فرحة فساتينا حتى ولا لبسناها انجوف المقاس ويا ويهج..
خوله: ..............
نوره: خوله ما بتقولين شو بلاج ...؟؟
خوله: امبلى..
نوره: ذليتيني شو تترين يالله قولي اتحبين حميد..
خوله: لالاع
نوره: ها عيل ...؟؟
خوله تهمس: جابر..
رفعت راسي اطالعها: جابر وينه ...؟؟
خوله: في المنار..
يلست مره ثانيه اطالعها: شوه كان جابر هناك ...
هزت خوله راسها بمعنى نعم..
نوره: انا جم مره قايلتنج يوم بجوفينه خبريني عشان اكسر راسه..
خوله: مدري نوره من وين يظهر لي شرات الشيطان
نوره:بس مب جنج بالغتي في ردة فعلج و شو يعني جفتي جابر ما كان لزوم هالمشاعر الي حسيتي فيها..
خوله: مب ايدي نوره..اكره اكررررره نظراته ..
نوره: زين خلاص لا تنفعلين خليه يزول..
خوله اتصيح: يا ليت اقدر امحيه من بالي ..نوره انتي ما جفتي نظراته لي ..يطالعني جني وحده وحده ..
و غطت ويها بايدها و يلست اتصيح ابصوت عالي..يا ربي انا شو سويت خليتها تنهار ...
حضنتها: خوله خلاص لا اتصيحين هذا ماضي و انتهى...
رفعت راسها و عيونها مليانه دموع الم و قهر: انا ما سويت له شي ..بالعكس كنت ابا اكسبه و كل ما تقربت منه خطوه ابتعد عني عشر خطوات بس علشان امه انا شو ذنبي..
حسيت ان خوله كانت تتكلم و اتقول كلام مب مفهوم كانها للحظه اتعيد كل شي صار بعد طلاقها من جابر
حاولت اهديها: خوله خلاص ..جابر ظلمج و كل شي بالدنيا قسمه و نصيب...
قمت من عنها و رحت يبت لها قران :ها خذي اقري يمكن ترتاحين..
خذت عني القران و هي تترجاني: ما ابا اجوفه مره ثانيه كيف نوره خبريني...؟؟
نوره: ان شاء الله يموت و تفتكين منه هالحمار ..
يلست خوله ع الشبريه و فتحت القران و يلست تقرا..اما انا رديت و يلست ع الكرسي الهزاز..اراقب خوله و هي تقرا..كانت ملامحها جامده بس امبين عليها التعب و يمكن ما بغت اتوضح لي...اتنهدت و غمضت عيوني..حضنت الارنب الي كان موجود ع الكرسي...يا ربي فيني رقاد بس حالة خوله ما تطمن..الله يستر..
هالحيوان بعد ما طلقها و مرت سنة و نص ع طلاقها قام يظهر لها ابكل مكان كانه شبح... وكان هذي الايام تتكرر و تنعاد ايام و ما تطلقت خوله...كانت مصدومه..و تعبت و اضطريت اقعد معاها كم يوم..الين ما الكل اقنعها اتكمل دراستها ف معهد التمريض...
صدق ايام اتمر عليج اتحنين عليها و تتمنين انها تكرر الف مره و ايام اتمر عليج تتمنين انج اتكونين ف كابوس..و اتنشين منه عشان ما يتكرر بس للاسف يكون حقيقه وواقع في يومنا...و هذي خوله كل ما جافت جابر ..ساءت حالتها .اذكر اول مره جافها بيت عمها عبدالله ...يوم كانوا مسوين عزيمه بمناسبة تخرج ولدهم سيف..
.كانت خوله كاشخه..و اصلا من غير ما تكشخ ما شاء الله عليها تقاسيم ويهها مره وحده..جابر يقرب ل زوجة عمهم اتصير عمته..فشيء طبيعي كان موجود ويا المعازيم..من طاحت عينه ع خوله تخبل و اصر انه يخطبها و يتزوجها مع ان خوله ما كانت تدري ان جابر جايفنها فاجاها بعد ما ملجوا يخبرها بالسالفه و كيف جافها ....
.فتحت عيوني يوم سمعت خوله تشهق..بس حاولت تكتم شهقتها و كملت قرايه القران..رجعت و غمضت عيوني..تم زواج جابر و خوله مع ان خالوه مريم كانت رافضه لانها كانت وايد تسمع رمسات ام جابر انها ما تتعاشر وانها وايد عصبيه و تغار ع عيالها وايد...بس خالي احمد يوم جاف الريال ما به عيب.. و البنيه مالها قرار وافق و حط خالوه مريم تحت الامر الواقع ...
بس خالوه مريم يوم جافت خالي احمد مصر ع الزواج..طلبت منه ان يشترط ع المعرس بيت ل خوله..عشان ترتاح مع زوجها..بس للاسف خالي احمد رفض لان مستحيل جابر يظهر من البيت و يخلي امه ابروحه ..بعد ما تزوجوا اخوانه وبقى عنقود البيت ابروحه مع امه ..تضايجت خوله وايد بس بعدين تقبلت الامر..
.اتذكر كيف خوله كانت مستانسه و طايره من الوناسه بعد ما ردت من شهر العسل..و استقبلنها في بيت خالوه مريم....
خوله: نصيحه مني نوره عرسي..
نوره: تو الناس..
خوله: صدقيني بتتغير حياتج..الزواج وايد حلو ..
ابتسمت لها:الله يسعدج دوم ..

حضنتني و قالت: جابر انسان غير...غير عن ايام الملجه...صج نوره احس بالاستقرار
حسيت انها كانت مرتاحه و الدنيا مب شايلتنها من الوناسه...
كملت كلامها: ايام الملجه..كانت روعه كلامه حلو سوالفه حلوه..بس بعد الزواج كانج عايشه في خيال ..
نوره: بس بس دخيلج خوله ..جي اتخليني اطلع ع الشارع و اسحب أي واحد للمحكمة..و اتزوجه..
خوله:هههههههههههههههههه مينونه اتسوينها..
مسكينه خوله..كانت علاقتي فيها قويه..بس خفت اتصالاتها من بعد ما عرست وانشغلت بحياتها اليديده ..حتى اني ما قمت اجوفها بالاسابيع..ف البدايه تضايجت بس بعدين قدرت ظروفها انها تغيرت ...و كان لازم اتقبل هالشيء...بس بعد ثلاث شهور تقريبا من زواجها..
كثرت اتصالاتها فيني و كانت دايما تشكي من عمتها ام جابر.. و الي يضايجها اكثر كيف جابر ما يرضى ع امه لو كانت ع باطل او حق..كنت دايما اهديها و اقولها تصبر ...و الحمدلله خوله من النوع الصيور و القنوع..بس مره ما تحملت و اشتكت لامها..و خالوه مريم خبرت خالي احمد...بس طبعا دوم الرياييل ما يتفهون الحريم و يعتبرونهن يكبرون السالفه ع ماشي.. و شي الي يقهر ان خالي احمد زخ خوله و قعد ينصحها جنها هي الظالمه مب المظلومه ...
حتى يوم احملت ..حليلها ما كملت شهرين والا اجهضت ابسبب شغل البيت .. جابر ابد ما كان يعارض امه..و امه هي كانت الامره و الناهيه..بس غريبه للحين ما زوجته بعد ما اجبرته انه يطلق خوله بعد ما عقت.الي في بطنها .فديتج خوله..توها ما فاقت من صدمة انها فقدت شي غالي ..وصلتها ورقة طلاقها..ابصراحه هذيج الايام ما تنحسدين عليها ابد يا خوله...و الحينه ها ولد امه مدري كيف يظهر لها ابكل مكان....جفت خوله اتصكر القران..و كانها ارتاحت...
سمعتها تزقرني: نوره رقدتي..
رديت عليها من غير ما ابطل عيوني: لا ...
خوله: متى بترقدين صار الساعه 10 ونص..
بطلت عيوني : بعد ما ترقدين انتي ..
خوله: انا الحينه برقد..
نوره: شو نفسيتج..
خوله: الحمدلله ارتحت وايد..
ابتسمت لها و نشيت من الكرسي الهزاز,, و سرت انسدحت حذالها ع الشبريه...
خوله: تصبحين ع خير ..
نوره: و انتي من اهل الخير ..
في اليوم الثاني و كان الجمعه...بعد الغدا ...يلسنا ف الصاله انا و خوله و خليفه و خالوه مريم و خالي احمد نشرب الشاي ..
خليفه: ها خوله سمعنا البارحه امسويه فلم هندي...؟؟
نوره:هههههههههه فضحتنا فضيحه..
خالي احمد: جفتي و كنتن ناويات تظهرن ارواحكن زين اني طرشت لكم حميد "ياشر ل خليفه"ها ما منه فايده..
خايفه: كنت مشغول..
خالوه مريم: مشغول في شو يحسره طلعه و كشته ويا الشباب في دبي و العين و غيره هاي هي اشغالك..الحينه لو كان حميد مب موجود معاهم شو كانوا سوووا
خليفه: ما عليكم هذي نوره عن الف ريال ..
خوله : يا حافظ
نوره:ههههههههههههه
خالي احمد: حتى لو كانت الف ريال عيب البنات يظهرن اروحهن لازم يكون وراهن ريال و انت ما منك فايده...
خالوه مريم: انت احمد ربك و اشكره كانوا سايرات عشان يشترين فستاتين ل لملجتك ...
خليفه طفران: زيييييييييييين ذليتوني الحينه لو ما صار اب خوله شي ما سمعتوني هالرمسه..
.نوره +خوله = ههههههههههههه
خليفه: اندوكم ضحكتوا علي البنات...
خالوه مريم: تستاهل ...
نوره: خلاص خالوه قطعتيه و بعدين عمور كان ويانا
خالوه مريم: اظن لو كان حميد مب موجود ما ظنتي عمور بتم وياكن..
نوره:هههههههه صدقج كل شي عنده عادي...
سمعنا ياذن العصر...
خالي احمد: ع طاري عمور وينه ما ينجاف ما يقول عندي ريل خاله بنسلم عليه...حتى ما ايي يتدرب ويا الشباب ما بقى شي ع سباق التجديف
نوره: و الله يا خالي عمور كل جمعه ايمر هني يسلم ع خالوه مريم و عايشه اكيد ايي ينشد عنك بس ما يلاقييك..
خالي احمد: هيييييييي ها اللي يبا العباده ما بتفوته يا نوره الصلاة..
حسيت بالاحراج ها عمور فضحنا: مدري و الله
خوله: مع انه الاسبوع الي طاف تغدا بيت خالوه عايشه انت الي ما كنت موجود ..
خالي احمد: يعني لازم نتجاوف بالعزايم و الصدف ما ايي يسلم و لا يسال ...
خالوه مريم: الحق ع ولدك كل ما اتصلت به و قلته وينك قال انا عند حميد و عمور..جي ما اتيبه يسلم ع خالك..
خليفه محرج: اففففففففففففف و انا الحينه اشلي ادخلوني ف السالفه متى اتزوج و افتك من اذيتكم..
نوره + خوله= هههههههههههههههه
خالي احمد: بتستوي شرات عمور ما بتسال ولا تنشد..
خالوه مريم: ولدي بتم معانا بنبني له ملاحق في الحوي البيت عود..
خليفه : لا بظهر من البيت..
خالي احمد: و ليش الخساير مثل ما قالت امك بنبني لك ملاحق .. و بعدين ابني بيتك ع ارضك و ع راحتك ..
خليفه: يصير خير...
خالي احمد: يالله قم بيقومون الصلاة ..
خليفه واقف: يالله ..
وقفت علشان اروح حجرة خوله: انا بعد بروح البيت ...
خالوه مريم: ليش نوره تمي تعشي معانا...
نوره: مشكوره خالوه بس لازم اروح من البارحه انا هني ..
و سرت حجرة خوله البس عبايتي و شيلتي...لحقتني خوله..
خوله: مليتي شوه..
نوره: طبعا لا بس لازم اروح
خوله:سمعتي ابويه يوم يتشره ع عمور
نوره: ما عليه باجر بتزوجج و بيجوفه كل وقت ..
خوله: هي هي تنكتين ..
نوره: بمر بيت خالوه عايشه بسلم عليها قبل ما اروح ما بتيين ..؟؟
خوله: لا لا ما اقدر بروح لهم بعد صلاة المغرب..تبين اتجوفين جابرشوه ..؟؟
نوره:بروح عشان خالوه عايشه لكن لو جفت جابر زين بعد حظي حلو ..
خوله:نوره تحمل ترا الي تسوينه غلط..و كل شي ف النهاية بنجلب ع راسج..
طنشتها: اها اوكى زين فيمان الله
خوله: مع السلامه يا الغاليه ..
سلمت ع خالوه مريم و ظهرت ما ركبت سيارتي قلت بدش اسلم ع خالوه عايشه لان البيت وايد جريب و ما ياخذ دقايق لين ما اوصل كان الباب امبطل اصلا من عرفت الدنيا عمري ما جفت بيت خالوه عايشه متصكر المهم سمعت اصوات و ضحك اتجدمت اكيد محمد و خلود ...كنت بفتح الباب بس لفتني صوت نهله !!
اتجدمت اكثر ها عمور ..!!
عمور شويسوي و بها الوقت بيت خالوه عايشه..صح صح عمور كل جمعه يمر هني يسلم بس شو يسوي مع نهله ...فتحت الباب بس ما انتبهوا لي لاني كنت وراهم ..جفتهم نهله يالسه ع المريحانه و عمور واقف جريب منها ...مثل ما توقعت بينهم علاقه ..
نهله :- لا لا حبي انا بعدني صغيره ..
عمور: شو شو قلتي..
انتبهت نهله شو قالت فارتبكت: ما قلت شي...
عمورابتسم: انا حبج..
نهله ردت ابسرعه : لا
عمور: ليش لا جايفتني شيبه و انتي ف عمر الزهور..
نهله: ههههههههه هي انا بعمر الزهور بس انت مب شيبه ...تو الناس عمور..
عمور: لا مب تو الناس جوفي انا الحينه ما اداوم و باجازه ..يعني أي وقت بتحدد موعد الدوره و بسافر و انا ابا اخذج معاي..
نهله: عمور تبا تاخذني لندن..
عمور:هي نهلووه ابا اكون جريب منج ...حرام عليج الي اتسوينه فيني ..
نهله: لا اتلومني ما ابا حد يفرق بينا ..
عمور: ما انولد الي بيفرق بينا..تدرين انتي لي و انا لج من يوم كنا صغار ...
نهله: هي بس غيرنا ما يدري..
عمور: ما يهمني شي بالدنيا المهم انا و انتي ...
نهله: عمور متى بتخطبني ...؟؟
عمور: يوم حضرتج بتقولين يالله عمور انا موافقه تعال اطلب ايدي..
نهله:ههههههههههه احب اجوفك متضايج و مقهور
عمور: لانج ما ادانييني
نهله : لا و الله اموت في............
ما كملت جملتها لان حميد كان واري
حميد: نوره هلا و الله...
نقزت ونقز عمور و نهله
ارتبكت و اتعمدت ما اطالع عمور و نهله عشان ما يحسون اني كنت اسمعهم ..
رديت ع حميد: كنت يايه اسلم ع خالوه و اروح البيت..
دش حميد البيت و لحقته .. وقفنا جريب من نهله و عمور و انا فيني غييييييييييض و الله لو ما كنا في بيت خالوه عايشه كنت لعبت مصارعه مع عمور و نهله..عمور يا الخاين اكررررررهك..
سمعت عمور: هلا بو عبود..
حميد: هلا و الله اعلومك..
عمور: طيب طاب حالك..مريت اسلم ع خالوه عايشه بس نهله قالت لي مب موجوده..
حميد: هي طلعت مع محمد و خلود ..
كنت ساكته و حسيت اني ابا اصيييييح عشان جي لو تكلمت باي كلمه عادي تنزل دموعي...ففضلت السكوت ..عمور: هاي اختك الزطيه حتى كوب عصير ما عزمتني..
نهله + حميد : هههههههههههههههه
نهله: شحالج نوره ...؟؟؟

كرهت حسها و كرتها و الله لو طاحت عيني بعينها كنت تفلت عليها عشان جي تميت اطالع حميد و طنشتها
حافظت ع نبرة صوتي فقلت له: حميد سلم ع خالوه و قولها اني مريت اجوفها ...
حميد: زين دشي
نوره: لا ما عليه فيمان الله..
و طلعت عنهم ادري اسلوبي و ردت فعلي و تطنيشي ل نهله اكيد شكوا اني سمعت كل شي قالوه ..ركبت سيارتي محرجه ..حتى ما فكر يلحقني عمور الحيوان..او يبرر موقفه مع نهله ...يعني عمور ايي كل جمعه عشان نهله مب عشان خالوه عايشه ..الحقير..
كنت حاسه بينهم شي من نظراتهم..ع الاقل نهله ما كانت توضح لكن عمور كان امبين و حركاته واضحه شرات الشمس..صحت ابصوت عالي ..متفجين ع الزواج..الحقير يباني ارد بيت خالوه مريم عشان يتزوج نهله و يعيشون هني ..
حسيت اني مخدوعه عمور كان يقص علي ...هين عمور انا اراويك..ها ويهي جان خليتك تزوج نهله ...اه يا ربي سمعتهم يقولون من يوم كنا صغار معقوله !! انا وين كنت ..اصلا عمور كان ويا فارس ..متى لحق يحب نهله !!! فاررررررررس ..اكيد فارس يعرف ..بس لحظه كيف عمور يحب نهله و يتزوجها بعد كل الي سواه فارس !! لا و علاقتهم مستمره و كل واحد متعلق في الثاني ..؟؟؟ كيف جي شي سر بالسالفه انا مب فاهمه شي ...
ما يهمني شو يصير ..هذيلا كلهم حثاله و انا لازم احط حد لهاي المصخره...بتجوف عمور ..انا اراويك ..انت و هاي راعية المشاكل نهله ..
وصلت الشقه و انا مليون فكره تضرب ابراسي...بدلت ملابسي بعد ما اتغسلت... دورت ع زلاغي ..حاولت ما افكر بشي ...سويت لي عشى..بعد ما سويت كوفيه .
صليت المغرب ..سرت المطبخ و تعشيت ...دورت ع كوت عمور الاخضر ..لبسته ادفي نفسي فيه ..مع ان في داخلي نار ..
.شغلت التلفزيون.. و انا احس ان راسي بنفجر..بس قدرت و قدرت اشغل نفسي..بس الحينه ما عندي شي..فكرت اروح ارقد و انخمد مع ان الساعه 7 يعني بعدها ...دورت ع موبايلي..جفت خمس مكالمات خيبه ...شو مستوي معقوله الكل حاس شو فيني عشان جي متصلين يسالون عني ...
و منو يهتم فيني و يسال غير خوله علني افداها ان ما زوجتها عمور..ما اكون انا نوره..فتحت لست المكالمات جفت خوله متصله..مره و عمور مره..
ورقم ثلاث مرات منوه !!! هالرقم نهلوه ..لالا ما اعتقد لان نهله رقمها مخزن عندي ...فريت موبايلي ...عمور حق شو متصل اكيد عشان يجييس نبضي ...بس انت شرف البيت و جوف شو بسوي فيك...قلبي ياكلني مب رايمه اصبر..انخمدت ع الشبريه بعد ما طفيت كل الليتات الشقه..حبيت اكون ابروحي و بهاي الظلمه عشان افكر ع راحتي ...الحبيب يبا يتزوجها و يسافرها معاه الدوره...
وصلني مسج فتحته "شحالج نوره ..شغلتي بالي حسيت انج مب طبيعيه يوم كنت ارمسج عسى ما شر.."حميد" المرسل نفس الرقم الي كان ظاهر توه عندي ..هاه يعني حميد متصل فيني ثلاث مرات من وين ياب رقمي !!!
زين زين حميد زين ظهرت ع الساحه ها وقتك الحينه انا لازم اصيدك عشان اضرب ضربتي ...المهم طنشته و اصلا ما ابا اقوي علاقتي ب حميد عن طريق التلفون..لان هالطريج مب شي و مب زين...حتى لو كان ولد خالتي ورابين ويا بعض ...الحينه لازم اتريا عمور و اواجهه بس متى ..بيرد البيت هاه ....رقدت و انا ميته من التفكير ..نشيت ع صياح السوري بو عيون خضر..منبه .
.جفت الساعه كانت ثلاث ف ليل نشيت و سرت حجرة عمور جفته بعده مب ياي ...رديت حاولت ارقد..رقدت ابصعوبه و نشيت ع اذان الفير ...صليت و قريت قران...كانت الساعه 6 الصبح سرت حجرة عمور جفته راقد...
ييرت اللحاف عنه: عمور نش برمسك..عموووووووووور
ماشي فايده الظاهر توه راقد يعني من سابع المستحيل ينش و يرمسني..لبست عبايتي و شيلتي و نزلت الدوام ...حسيت ان اليوم طويل و ثجيل ..
اتصل فيني حميد كذا مره بس طنشته ...متفيج هاه ..
نوف رفيجتي في الدوام: شو فيج مب طبيعيه..
نوره: امبين علي ...؟؟
نوف: هي حتى شكلج تعبان مستوي شي ..؟؟
نوره: لا ماشي بس ميته غيض احس ابا انفجر لازم اسوي شي
نوف: نوره صلي ع النبي
نوره: عليه الصلاة و السلام ..نوف جم باجي و يخلص الدوام ...؟؟
ابتسمت لي: ساعتين ..
نوره: اه وايد
نوف: زين انا من عرفتج و انتي ميته غيض بس ما كانت جي حالتج..
نوره: هالمره غير ..لا تساليني ليش ..؟؟
نوف: اكيد عمور ..
نوره: هيه عمور السبال
نوف: زين قولي لي شو سوا فيج بعد هالمره ..؟؟
نوره: يبا يخطب وحده ما ادانيها امسوي لي مؤامره
نوف: قولي و الله ها الي مضايجنج ..
طالعتها: ليش ها شويه..
نوف: هههههههههه نوره حياتي هذي حياته الخاصه ..
نوره: مب كيفه حسيت اني مخدوعه الخاين..
نوف:خاين!! شفيج انتي ترمسين جنه حبيبج مب اخوج..
نوره: نوف انتي مب فاهمه شي ...المهم خلينا انغير الموضوع ..متى عرسج ..؟
نوف: بعد شهر و عقبها بروح بوظبي ..
نوره: ريلج هناك يشتغل
نوف: هي انا بنتقا هناك..
نوره: الله يهنيج بس انا لو اموت ما بظهر من راس الخيمه..
نوف: شسوي ها نصيبي ..
نوره: انا عكسي حتى لو كان ريلي يشتغل ف بوظبي خليه هو ينتقل راس الخيمه مب انا ..
نوف: هههههههههه انتي عجيبه .
.
الحمدلله ما صدقت خلص الدوام ركضت صوب سيارتي ...مدري حسيت بيوع فضيع ..مريت ع المطعم ..و شليت لي صحن عيش...رديت شقتي ...فتحت باب الشقه و جفت عمور منسدح ع الكنبه يطالع التلفزيون ..

(( الحلقة السابعة ..))
"داوي جروح الليل واهدي الحزن بسمه..لا تجرحين الصبح تخفي الحسن عنا..مدي جسور الهمس قولي احبك حيل...لاجل امحي احزاني واحيا بزمن ثاني....حيث الزمن غيرك فيه الفرح مهجور"
خذت نفس طويل طالعني و طالعته بس طنشته و سرت صوب المطبخ حطيت جيس العيش و سرت صوب حجرتي ...غريبه كنت متلهفه اجوف عمور عشان اجاتل معاه بس يوم جفته صابني برووووود بدلت ملابسي و صليت الظهر و رديت المطبخ ..حطيت لي غدا..لمحت عمور بعده يجوف التلفون ولا سال و لا نشد لانه حيوان ...يلست اكل و انا فيني غصه..دش عليه المطبخ..
عمور: ليش ما تعزميني ع الغدا
رفعت راسي اطالعه و رجعت اكمل اكلي مطنشتننه..
يلس ع الكرسي مجابلني..
عمور: شو فيج وارمه ..؟؟
نوره..........................."اكل ابسرعه و بعصبيه"
عمور: زين عن اتغصين شوي شوي..
طنشته حسيت بطني بنفجر من الاكل كنت ابا اخلص كل الي ف الصحن بس ما رمت..عشان عمور ما ياكل معاي قمت و شليت الصحن و عقيت باجي العيش ف الزباله و عمور يراقبني ..
عمور: حرام نعمة الله ..
طنشته فتحت الثلاجه و شربت ماي.. و ظهرت من المطبخ ..لحقني ..مدري مدري شو اسوي فيه يستهبل علي و انا ابا اجتله..يلست ع الكنبه ..قعد حذالي
سمعته يقول لي: اول مره اكتشف انج زطيييييه و جاسيه حتى العيش ما تبين اكل معاج ..
رديت عليه:و انا اول مره اكتشف انك حيوان و لوتي ..
رد علي ابرود: صرت لوتي بالاول بس حميد الحينه انا بعد..
استفزني بروده : ما يخصك ف حميد..خلك ب نهله يا بو نهله..
ابتسم: شو بلاها نهله ..ها الحينه انتي زعلانه لانج جفتيني البارحه اسولف مع نهله بنت خالوه عايشه..
رديت عليه : لا والله..
عمور: عيل انا ما منعتج من انج اتسولفين مع عيال خالاتي ..حتى البارحه خليتج ترقدين مع خوله..
جاوبته: انا غيييييير و انت غيييييييير
عمور: شو الفرق
صرخت عليه: عموووووووور لا تستهبل علي تفهم ولا لاء ..
عمور: لا تصرخين..شو فيج داشه علي امبرطمه..
نوره: يعني ما تدري ..
عمور: لا ما ادري يالله قولي شو بلاج..
نوره:انا سمعت كل كلمه انقالت بينك و بين نهله..
طالعني متفاجا معناتها ما يدري اني كنت اسمعهم عشان جي كل ها البرود..
شويه و بصيح: قصيييييييت عللللي ..انت و هالحي....
قاطعني محرج: لا تغلطين عليها هاي الي ترمسين عنها بنت خالتج حالها حال خوله..
رديت عليه: اتهبي الا هي حالها حال خوله خوله ملاك مب شرات هاي الزباله..
فاجاني رده القوي: انا ما اسمح لج تغلطين عليها كونها بنت خالتي و بعد بتكون زوجتي و شريكتي حياتي..
اتخبلت يوم سمعت جملته الاخيره قمت من مكاني و يلست افره بالوسايد مالت الكنبه و انا اصرخ و اقوله..
:- ع جثتي تزوج نهلوووووو
نش عمور من مكانه و زخني: اثجلي شو انتي خبله ..
صرخت عليه و كنت اصيح بصوت عالي: هييييييي تخبلت انا مدري أي كرامه عندك تقبل تزوج وحده وحده
صرخ علي: جب جب اقولج
صرخت عليه:شو ما ترضى عليها
حسيت ان اصواتنا علت و عادي كل الي في البنايه سمعوا صريخنا ...
رد علي: هي ما ارضى و غياض فيج انا بخطبها الاسبوع الياي ..
رديت عليه بكل عصبيه: انجلع اخطبها بس انسى عندك اختك من بعد ما تخطب هاي الحثاله..
حسيت ان عمور ماسك اعصابه ..كان يبا يمد ايده علي بس شي منعه..اتجدمت منه
و من كل خاطري قلته: اكرررررررهك و اكرررها و بحياتي ما حسيت ان اكره مخلوق كثرها و خاصه البارحه و بسوي المستحيل عشان افرق من بينكم ...
وسرت حجرتي لاني احس خلاص اعصابي تعبت ..و ما عاد فيني اتحمل اكثر بس عمور لحقني الظاهر مب ناوي يعدي السالفه ع خير ..اما انا بعدني كنت اصيح من الغيض ..
وقف عدال باب حجرتي : ليش تكرهينها هالكثر...
ما رديت عليه ...................
كمل كلامه: نهله مالها ذنب بالي صار من زمان
طالعته: ما تلاحظ في شي غريب..كل الي سواه فارس زمان و كلنا قاطعناه الا انت ..و حتى بعد الي صار تبا تخطب نهله و ترتبط فيها و تاخذها معاك الخارج بذمتك ها مب لغز وشي غريب..؟؟
تغيرت ملامح عمور اتجدم مني : ما تبيني اتزوج نهله ...؟؟
هزيت راسي بمعنى لا ما ابا
سمعته يقولي: تبيني اتزوج خوله..
رديت عليه: خوله او غيرها المهم نهله لا ...
يلس حذالي: زين انا بخطب خوله لان هالشي يريحج ..
طالعته مستغربه بس بداخلي طايره من الوناسه بس فاجاني
يوم قالي: بس بشرط..
طالعته من غير ما اعلق ..
سمعته يقول: جان تبين من باجر بخطب خوله و بتزوجها بس شرط انج تزوجين فارس
صرخت عليه: انت شو اتقول
رد علي: شوه مب عايبنج شرطي..
وقفت: طبعا لا و مستحيل ..اسوي الي اتقوله..
عمور: عيل ليش تبيني تزوجيني وحده ما اباها..
رديت عليه ابسرعه: مشاعري صوب فارس غير عن مشاعرك صوب خوله..
عمور: بس انا ما ابا خوله ..
حسيت باليأس فصحت: تزوج الي تبا تزوجها..نهله ولا خوله ولا غيرهن بس ما يخصك فيني من اليوم انت مستحيل اتكون اخوي انت عدوي..
وقف و اتجدم مني: جفتي نفس المشاعر الي تحسين فيها الحينه انا حسيت فيها يوم قلتي لي انج ما تبيني اتزوج نهله ..
و طلع من حجرتي و تمت كلماته متعلق في بالي مرات عمور يستوي غامض يقول كلام مب مفهوم ..بس خلاص يسوي اللي يباه بس انا ما بخليه ف حاله و بحاول اسوي الي علي..و من اليوم بطنش عمور و ما بعبر عن راييي فيه او في نهله يولون المهم بتجرب من حميدان هذا هو المهم و الاهم ...سرت غسلت ملابسي و ع الساعه 5 العصر رن موبايلي و كانت نفسيتي احسن بوايد المتصله خوله..
رديت عليها: هلا بالطش و الرش
خوله: السلام عليج..
نوره: عليج السلام و رحمة الله و بركاته شحالج..
خوله: طيبه انتي شخبارج..
من الخاطر: ززززززززفت
خوله: انتي دوم جي عفانا الله المهم شو رايج امر عليج و اتعشى وياج..
نوره: اتردين الجميل..
خوله: لازم يكون سبب ويا ويهج..
نوره: زين حياج منو بييبج..
خوله: بخلي خليفه يوصلني انا مخبرتنه
نوره: اوكى خلاص شو تبين اسوي لج ..
خوله:هههههههههههه احلى هناك اونج شو تبين اسوي لج اصلا انتي تعرفين تطبخين..
نوره: ابصراحه لا
خوله: عيل لمي ثمج انا مسويه محشي ملفوف و ايس كريم..
نوره: يا سلام ..زين يالله تعالي بترياج..
خوله: اوكى ربع ساعه و اكون عندج ..مع السلامه...
نوره: مع السلامه..
فديتج خوله انتي الي اتحسين فيني...زيارتج يت بوقتها محتاجه ل حد يقعد و يسولف معاي ....اتصلت ل مخبز ربيع لبنان و طلبت فطاير..بعد مب حلوه ما اضيفها بشيء ..نشيت اكمل غسيل ثيابي قبل ما توصل خوله.. دشيت حجرتي عشان اتسبح و اتعدل بعد ما خلصت لمحت جيس اليشمك لحظه انا ما جربته عليه بس طلبت رقم المقاس..خطر ع بالي اجربه لبسته..
سرت صوب الجامه اتفاجأت ابصراحه شكل الثوب رهيب عيل ..لالالا انا فديتني غاويه شو بلاني..عيبني شكلي و الحمدلله ما ندمت اني اخترت هالثوب حطيت جحل و كلوس و طلع شكلي اوكى ابتسمت ل نفسي راضيه كنت ببدل بس رن جرس الباب هذي خوله وصلت مسرعها ..
.بفاجاها ف الثوب الي لابستنه لبست الشيله الخاصه بالثوب و كان لونها ازرق..وظهرت من حجرتي ..اندق جرس الباب مره ثانيه..
رديت : زين اذيتينا
فتحت الباب و انا اعرض نفسي:شو رايج ب ثوبي مفاجاه..
وقفت وقلت: صح..
صح كانت مفاجاه لان الواقف عند باب الشقه فارس مب خوله..وقفت ابمكاني مشلوله
ابتسم لي: يهبل عليج احلى ما رات عيني
كلماته كانت مثل الصفعه قومتني من الصدمه...حرجت كنت بصكر الباب ابويهه ابتسامه نظراته الشيطانيه هي هي نفسها ما تغيرت ..
اتجدمت و مسكت باب الشقه :- انت شو تبا منا ..
فارس: و ليش محرجه..
نوره: لاني ما احب اجوفك حذال باب شقتي لانك اتييب الشبهه
رفع حياته: بس مب ياينج انا ياي ادور ع عمور..
صرخت عليه: ما يخصك ابعمور اطلع من حياتنا كافي الي يانا منك
وصكرت الباب ابويهه ناقصتنك انا بعد كافي الضرابه الي صارت بيني و بين عمور اليوم ابسببك و ابسبب نهله ...الله ياخذكم و افتك منكم ...دشيت حجرتي بعصبيه و بدلت ثوبي....اتذكرت يوم قالي يهبل عليج..فسخته و فريته بعصبيه ع الشبريه ما بلبسه يوم الملجه بس لان فارس جافني لابستنه ...لبست بيجامه لونها بنفسجي ما اقدر اوصف لكم شعوري و انا اجوف فارس جدامي لا و بعد قاعده استعرض عليه...الله يخس ابليسج خوله كل منج...توني اتذكر الكلام الي دار بينا..مدري من وين يتني العصبيه و الوقاحه..بس امثال فارس يستاهلون و ينعطون بالويه دواه عشان يحرم ايي شقتنا صج ما عنده دم ..بعد كل الكلام الي سمعه الاسبوع الي طاف بعد له ويه ايدق باب شقتنا...سمعت الجرس مره ثانيه..خفت لا يكون بعد فارس..اتصلت بخوله..
نوره: انتي عند الباب
خوله: هيه فتحي
سالتها: خليفه وياج ولا ابروحج لاني لابسه بيجامه
خوله: لا ابروحي ذليتيني ترا
نوره: اوكي يايتنج باي..
سرت صوب باب الشقه و فتحت الباب ..
يريتها: دشي ابسرعه..
خوله مستغربه: شفيج ..؟؟
يلستها: خليفه نزل معاج..
خوله: هي وصلني عند اللفت ليش شو مستوي شو فيج متغيره..
سالتها: ما جفتوا فارس عند البنايه..
خوله: فارس !!! لا شو يسوي
حسيت بالراحه و عقبها صحت غطيت ايدي بويهي و يلست اصيح
خوله: شو فييييج
يلست احكي السالفه ل خوله..
خوله: مدري عمور شو سالفته ويا فارس نحن اهله ما نذكره موليه..
نوره: ما قصرت فيه سبيته و جلعته من هني
خوله: هههههههههه ما يحتاي حد يعلمج..
نوره:هاليومين وايد مشاكل صارت لي
خوله: شو

نوره: ساعديني انسى لا تساليني
خوله: ان شاء الله
خذت عنها المحشي و الايس كريم و حطيتهم ف المطبخ ..سرت الصاله جفتها يالسه اتجلب قنوات التلفزيون ..
كنت ابا اقولها شو سمعت و جفت البارحه في بيت خالوه عايشه بين نهله و عمور بس غيرت رايي لان يمكن بعد عمور يخطب خوله و اكيد بترفض اذا عرفت علاقة عمور ب نهله ..
فاجاتني: شو فيج سرحانه تراج مب طبيعية ..
يلست حذالها: خولوووه ابا اطلب منج طلب ..؟؟
خوله: انتي تامرين..
نوره: جربيني من حميد..
خوله: ليش ..؟؟ عشان اتقصين عليه اسفه ...انا اصلا مب مقتنعه بالي اتسوينه ..
نوره: المهم انا اقتنع.و بعدين حميد يحبني
خوله: وايد واثقه انتي نسيتي انه لوتي..
نوره: بس انا غير..
خوله: حبيبتي نوره تهدمين حياتج عشان بس عمور خليه اذا يبا نهله انتي ليش اتكونين حاجز من بينهم..؟؟
نوره: عمور ما يحب نهله بس يبا يخطبها علشان يغايضني..
خوله: انا اول مره اسمع الزواج بس عشان غياض
نوره: المهم انتي بتساعديني ولا لاء..
خوله: طبعا لا ..ما يخصني فيج حرام فكري ب حميد يوم بتقوليله خلاص ما اباك..
نوره: ما بقوله..
خوله: اعرفج انا نوره ...سوري خليني ابعيد عن الخط..
نوره: زين ابرايج..زين شو استعداداتج للملجه ما بقى غير 4 ايام
مب مهتمه: عادي.ليش انا العروس عشان استعد و ما استعد ..
رديت عليها: اونج انتي ..مستويه بارده..أي صالون بتتعدلين..
خوله: محتاره بين ايفاري و اتش تو اووه ...المهم أي صالون اتروحين له بروح معاج..
نوره: اسمعي اذا نهله بتلحقج ما باخذج معاي ..
خوله: نوره مب لها الدرجه ..نهله بشو ضرتج..
نوره: كيفي ما ادانيها..اقولج من الحينه اذا فكرت نهله اتيي معانا ما باخذها..
خوله: زين زين مستويه فضيعه انتي ..
ما تنلامين خوله ما اتعرفين شو الي صار و شو الي استوا عشان جي لازم بدافعين عن نهله و بتعتبرينها مالها ذنب..علها السقم ....
خوله: تدرين نوره يوم السبت اجازة راس السنة و اتفجوا يروحون البر رحله ...يعوضون عن الرحله الي اجلناها هذاك اليوم..
نوره: هيه بس ما بسير معاكم...؟؟
خوله: ليش !!
نوره: بس مالي نفس...
خوله: عشان نهله ..
نوره: اتزول..
خوله: خلاص اذا ما بتروحين انا بعد ما بروح ...
نوره: قومي قومي خلنا نصلي المغرب و بعدين نتعشى..
خوله: يالله بالستر ...حشى فطور هاه مب عشى
نوره: هههههههههههه
نشيينا ..انصلي المغرب ..و بعدين حطينا العشى و بالنفس الوقت ياه راعي المخبز و معاه الفطاير ..تعشينا ..سولفنا و ضحكنا..حمدت ربي ان خوله يت اتزورني اليوم لانها غيرت نفسيتي 180 درجة رن موبايلي ..طلعت من المطبخ و سرت صوبه جفت حميد المتصل عقدت حياتي ..شو مشكلته هاه ...رديت المطبخ ...
خوله:منوه ...؟؟
نوره: بتصدقيني اذا قلتلج حميد ..
خوله مصدومه: حميد ولد خالوه عايشه..
هزيت راسي بمعنى نعم و كلت حبة محشي...
خوله: نوره .....
قاطعتها: لا اتكملين كلامج..حميد من البارحه يدق لي بس انا ما رديت عليه...ما ابا اقوي علاقتي فيه عن طريق التلفون لان ها مب من طبعي ولا من اخلاقي لاني اعرف رمسة التلفون تطور و تطور..بس انتي ليش مستغربه ..انا ع بالي خذ رقمي منج ..
خوله: لو طلبه مني ما كنت بعطيه ..بس الظاهر ماخذنه من خلود او نهله..
نوره: السم الهاري
خوله:ههههههههههههه بسج دعاوي اعوذ بالله منج...
خلصنا اكل و ع الساعه 8 اتصل خليفه عشان يمر ع خوله ... و قبل ما تظهر من البيت
مسكت ايدها:- مشكوره خوله ..
خوله: ع ..؟؟
نوره: ع الزياره ابصراحه نفسيتي تحسنت وايد..
ابتسم لي و باستني ع خدي: يالله فيمان الله تعالي لنا باجر..
رديت عليها: اكيد ..فيمان الله ..
سرت المطبخ و نظفته.. بعدين لبست زلاغي احب ارقد بالزلاغ خلاص تعودنا و لبست كوت عمور الاخضر و انسدحت ع الشبريه..رقدت ابسرعه يمكن كنت تعبانه ..
بعد ساعتين نشيت و انا ارتجف .. و كنت احس ان ويهي معرق..كنت اجوف فارس في منامي..جفت نظراته الشيطانيه اتلاحقني من مكان ل مكان و كانه يهددني...حطيت ايدي ع قلبي الي كان يرقع..سرت المطبخ و شربت كلاسين ماي..حاولت اهدي نفسي..حسبي الله عليك يا فارس قمت اتزورني ف المنام..رجعت ل شبريتي احاول ارقد تجلبت و تجلبت .
.موقف يوم استعرض ب ثوبي ل فارس و انا الي ع بالي خوله..دوم ف بالي ...شسوي ..يالله ...فتحت السده الجريبه من شبريتي و طلعت رواية اقراها..اشغل نفسي.. ويلست اقرا لي ما رقدت من غير ما احس ابعمري ...نشيت ع صوت اذان الفير ..صليت و قريت قران كالعاده... و لبست ..عشان اروح الدوام..كنت احس بصداع خفيف يمكن لاني مب راقده زين..
.و انا ظاهره فكرت امر حجرة عمور اجوفه ياه ولا بعده سهران برع..فتحت باب حجرته جفته راقد..جفت موبايله ع الطاوله ياني فضول اجوف امخزن رقم نهله او لا تجدمت شويه شويه..شلت الموبايل عشان اجيك بس للاسف امسوي قفل ...الهرم..حطيت موبايله ..ورحت دوامي...اتفاجات اليوم بالدوام ان خوله يايه عشان التدريب لانها خريجه هالكورس..اختارت مستشفى الي انا اشتغل فيها عشان اتكون جريبه مني...كان اليوم بيشيكون ع المكان و بعد عطلة الربيع بتبدأ تدريباتها ..
.و بعد اليوم وصلني مسج من حميد يسالني ليش ما ارد عليه .." بعد طنشته و ما رديت عليه..خليني العوزه...شويه..كنت امفكره اروح بيت خالوه مريم عشان اجوف حميد..بس يوم قريت المسج و جفته يعاتب..غيرت رايي و قلت بروح لهم بعد يومين يعني يوم الاربعاء ..حجه ابارك ل خليفه بيوم ملجته ...و اخلي حميد يتعلق فيني اكثر و اكثر ...
و في يوم ملجة خليفه ع شيما بنت عمه عبدالله...سرت بيت قوم خالوه مريم وقت العصر...دشيت ما لقيت حد سالت الشغاله عن خوله قالت لي طلعت مع خالوه مريم و خالي احمد عشان يشترون اغراض ل باجر الخميس حفلة الملجه ...
و انا طالعه من البيت جفت خليفه داش ...
خليفه: هلا و الله..
ابتسمت له: مبروووووك ..
رد عليه و كان باين عليه مستانس: الله يبارك فيج عقبالج..
نوره: تو الناس لا تتفاول علينا...
خليفه: هههههههههه انتن يا البنات حركات اونكن ما تبون اتعرسات و مناك ما اتصدقن خبر يوم تنخطبون...
نوره: أيه ارمس عن حرمتك مب عنا
خليفه: ايه انتي لا تغلطين ع الاهل..
ضحكت من الخاطر: هههههههههههههههه و الله وصارت عندك حرمه ..
خليفه: احم احم ...
نوره: شو شعورك..
خليفه:بطير من الوناسه و الله يا نوره شعور جميل..
ابتسمت له: الله يهنيك..
خليفه: هي حلوه صح..
نوره: قمر ما شاء الله عليها بس انت تباها عشان حلوه..
خليفه: لا بس بعد الواحد لازم ياخذ له وحده تفتح نفسه..بس قصيره
نوره: من طولك زين تناسبك...بس احلى خواتها ...
خليفه: تدرين يوم دشت حجرة القاضي عشان اتوقع الكتاب...جفت وحده متغشيه قزومه و يابسه انا ع بالي وحده بصف سادس
نوره:ههههههههههههههههههه

خليفه: و الله استغربت ما توقعتها جي ..
نوره: زين ع ما وصفتها بس بعد تناسبك ولا تبا وحده اطول عنك يا الدجمه..
خليفه: طوفي طوفي لا اييج طراق
نوره: اترووووووووم لا اتخليني اتضارب وياك اخليك ادش باجر الملجه و انت متكسر ..
خليفه:هههههههههه اتسوينها يا الدبه..
نوره: احسن من اكون يابسه
خليفه: نغزات هاه ..
نوره: اسولف حرام عليك اتخليني اطيح ف البنيه ابسببك..يالله انا بروح بيتكم فاضي ..
خليفه: تمي زين للعشى..
نوره: ما اروم بمر ع خالوه عايشه بالمره عن تحشرنا بعد..
خليفه: ترا حميد محد ف البيت..
طلعت لساني: مالت عليك..
سمعت ضحكته و انا سايره ..الله يسعدك يا خليفه و يهنيك مع بنت عمك شيما ..فكرت اني ما اسير بيت خالوه عايشه بس عشان ما اجوف ها الخياس نهله..اتولي ورا باجر الجمعه و اكيد عمور بيي يجوفها..موعدهم يوم الجمعه...الله يفرق بينهم ان شاء الله ..دشيت بيت خالوه عايشه..\
دشيت الصاله جفتها يالسه و معاها حرمتين وحده عرفتها حرمة علي بن محمد ييرانا و الثانيه مدري منوه ...سلمت عليها ...اصرت اني اقعد معاهم ..بس انا رفضت بحجة انه جريب ياذن المغرب و انا ما فيني اتاخر ...
سمعتها اتقلي: زين روحي قعدي عند نهله جان تستحين من الحريم..
رديت عليها: لا و الله مب سالفه مستحى انا كنت ماره بيت خالوه مريم ابارك لهم ...بس ما جفت حد ف البيت فقلت اسلم عليج بالمره ..
خالوه عايشه: الله يسلمج يا يمه ...
نوره: زين اسمحولي انا رايحه ..
سلمت عليهن و طلعت من بيت خالوه عايشه.. و قبل ما اوصل سيارتي لمحت سياره حميد جريبه مني..
حميد: شحالج نوره..
كملت طريجي: الحمدلله..
حميد: قاعد ارمسج زين اصبري
رديت عليه و انا اكمل طريجي: مب حلوه ارمسك ف الشارع ..
حميد: زين تعالي دشي بيتنا ابا اقولج شي ..
بس انا وصلت سيارتي و كنت اقول ف نفسي اثجلي نوره اثجلي حميد ما يباله غير التطنيش عشان يصير خاتم في صبعج ..فتحت باب سيارتي ...شغلت السياره بس حميد الهرم صكر علي الطريج و نزل من سيارته و فتح باب سيارتي..و قعد حذالي
شهقت: انزل من سيارتي...
مستغرب:شو فيها ..؟؟
كررت جملته: شو فيها!! ...لو حد جافنا شو بيقولون ..؟؟
هز جتفه مب مهتم: قلتلج دشي بيتنا برمسج ما رضيتي ...
طالعت ساعتي اوني مستعيله: حميدان بتاخر شو بغيت..
حميد: اسوي لج من يوم الجمعه ليش ما اتردين علي زعلانه مني ..؟؟
نوره: لا مب زعلانه
حميد: عيل ليش امسويه لي طاف
ابتسمت له: و ليش ارد عليك باي صفه..
حميد:بصفتي ولد خالتج..
نوره: ولد خالتي ع عيني و راسي بس مب معناتها ارمس واسولف معاك ف التلفون..
حميد: كنت بسالج ليش هذاك اليوم طلعتي من بيتنا محرجه ..بس انتي ما رديتي علي فقلت بتصل بج اجوفج ليش زعلانه مني..
قلته: حميد انت سويت شي يزعلني
رد علي: لا و مستحيل ازعلج
نوره: عيل خلاص ما كان في داعي انك تتصل ولا ماخذنها حجه..
حميد: تبين الصراحه
هزيت راسي بمعنى هي
حميد: انا ابا اخ........
قاطعنا خليفه ظاهر من البيت: اوب اوووووب اوووووووب احلى هناك
طالعت حميد: جفت شسويت..شو يسكته خليفه
خليفه: هاه شو اتسون..قلبي كان حاس من زمان
حميد: ماشي اصلح سيارتها اختربت..
نوره:ههههههههه حميد انزل بروح البيت..
خليفه: حرام لا تجرحين شخص هام في حبكم و انجبر
حميد: محد فاهمني غيرك خلوف
حذرته: حميدان انزل من سيارتي
خليفه: انزل لا اتصرخ و اتلم عليك الناس و تفضحنا
حميد:ههههههههههههه خلاص استسلم الايام يايه نوره ..
خليفه: ها ع شو ناوييييييين
حميد يطالعني و يرد ع خليفه: انت ما يخصك
اترييت حميد ل ما يحرك ابسيارته..ضربت لهم هرن و روحت عنهم ..اخ كان بيقولي ابا اخطبج بس خليفه الثور خرب علينا متفيج...خلووف يظهر علينا بها الوقت اووووووف قهر..متى الحينه بتجاوف مره ثانيه..هي صح اجازة راس السنة..هههههههههه ضحكت من خاطري احس بوناسه تدرون ليش لاني جني قاعده اغامر ..و يا انا يا عمور ..انا اراويك عمور ..اتحب نهله هاه ..
في اليوم الثاني شليت ثوبي و اكسسواراتي..و فريتها في السيت الي ورا من سيارتي و روحت بيت خالوه مريم...فكرت اروح اتغدا هناك و بالمره نطلع الصالون انا و خوله..الي حجزت عند ايفاري و نهله و خلود ..قالوا وحده بتعدلهن يعني بتمر عليهن البيت..فكه ..زين يت منهن ...دشيت بيت خالوه مريم...البيت صخه..ولا جنه اليوم بتكون عندهم ملجه...دشيت الصاله جفت خالوه مريم ترمس بالتلفون صكرت يوم جافتني داشه...
سلميت عليها: السلام عليج خالوه..
ردت علي: عليكم السلام..
نوره: شو البيت هدوء ولا جنه عندكم ملجه...انا بس المتحمسه
خالوه مريم:هههههههههه الحفله ف بيت العروس مي هنا حق شو الحشره...
نوره:الا وين خوله..
خالوه مريم: بعدها راقده حتى المعرس راقد..
دش علينا خالي احمد: السلام عليكم..
نوره: مريم= عليكم السلام..
نوره: اشحالك خالي..
خالي احمد: الحمدلله ابخير ربي يسلمج ما شاء الله امبجره اليوم..
ابتسمت له: شسوي مرتبشه عندي ملجه ..
خالي احمد: ههههههههه عمور شخباره..
امممممممم شو ارد عليه من يوم تضاربت معاه ما اجوفه ف الشقه ..
جذبت عليه: الحمدلله ابخير
خالي احمد: خبريه ايي التدريب ما بقى شي ع سباق التجديف الا ثلاث شهور..
نوره: ان شاء الله
خالي احمد: ولا اقولج عطيني رقمه انا ابروحي بتصل به..
احسسسسن وفرت علي شوط كبير يا خالي عطيته الرقم ..
مريم: لا اتخلي ولدي ايجدف تراه معرس..
احمد: ماشي معرس ولا غيره حاله حال الشباب
مريم: فديت ولديه ياينه عرس تبا اتهد حيله..
احمد: دواهم محد قالهم ما ايون يتدربون محد فيهم غير حميد ..ولا عمور و خليفه فساد
نوره: و محمد ولد خالوه عايشه..
خالي احمد: لالا هاه ما يكون فاضي دوامه برع راس الخيمه ف دبي عشان جي ما يناسب يشترك ويانا اصلا ابروحه ما يبا...
مريم: و الله مدري ع شو متعبي رواحكم
خالي احمد: تراثنا هاه واجب انحافظ عليه..
و ابوي بدت ضرابه خالي احمد و خالوه مريم نشيت من مكاني: بروح اوعي خوله
مريم: تعالي تريقي
نوره: بسني الحمدلله كلت في البيت...
دشيت حجرة خوله و كانت راقده يريت عنها اللحاف:قومي بسج رقاد
خوله اتيير اللحاف: اووووه خليني راقده متاخر..
نوره: يالله قومي اففففففففففففف و الله بجب عليج ماي بارد
يلست خوله طفرانه: انتي شو يايبنج من صباح الله خير
نوره:ههههههههههه اليوم الخميس ماشي دوام شي ملجه قلت بيي بجوفكم مرتبشات
خوله ردت ترقد: متفيجه انتي ..
نوره: زولي بروح بيت خالوه عايشه احسن لي بس بردلج اذا جفتج مب ناشه بسبحج بالماي
اتشر لي:برع برع
ضربتها ع جتوفها: زين بتجوفين
قمت عنها و خذت مفتاح الحجره معاي عشان ما تقفل حجرتها اتسويها الدبه....جافتني خالوه مريم ظاهره من حجرة خوله
نوره:بنتج الدبه ما تبا اتنش
خالوه مريم: تتحرينها شراتج نشيطه هاي موتها و الرقاد..
نوره: ويه وين اختفى خالي احمد..
خالوه مريم: وين بعد رايح يشيك ع الشاحوف وين بتروحين اجوفج واقفه
نوره: بسير بيت خالوه عايشه بروح العب مع جسوم احسن لي
خالوه مريم: ثواني بييب عبايتي بيي معاج..
دقايق ووصلنا بيت خالوه عايشه ..جفت خالوه عايشه و خلود و معها جسوم قاعد يصيح ذكرني بولد السوريه المنبه المهم كانات قاعدات تحت الليوان ..خالوه عايشه ما اتودر هالمكان...سلمنا عليهم ...يلست الاعب جسوم ...طبعا الطفس ما يحبني من يجوفني يصيح لها الدرجه انا اخوف !!
شويه و دشوا علينا محمد و حميد.و جسوم من جاف ابوه يلس يصيح فشاله عني
خالوه مريم: توه خالك احمد يطريك..
حميد: ان شاء الله بالخير..
خالوه مريم: هي اكيد قال انت الي فيهم تدرب عشان سباق التجديف ولا عمور و خليفه ولا ينجافون الا يوم السباق
حميد: عيزت من ازقرهم ...شحالج نوره..
رديت عليه من غير ما طالعه: بخير ..."كنت ابا اشرد من نظراتهم مدري ليش حسيت كل الانظار صوبي يوم حميد سلم علي فقلت حق خلود" :- خلود راويني فستانج تراني مب جايفتنه..
نشت خلود: تعالي
حمدت ربي سرنا حجرة خلود و طلعت فستانها و كان لونه وردي بصراحه حلو ..
نوره: مب جنه واسع عليج..
خلود: لا بالعكس قياسي مره ..متى بتروحون الصالون..
نوره: بالاول خلي ست الحسن و الدلال اتنش من رقادها ...بس يمكن بعد الغداو انتوا..؟؟
خلود: بتيينا الصالونه بعد اذان العصر ..
نوره: زين مع انه احس ماله داعي ملجه ف البيت ..
خلود: صدقج خساير المهم خلينا نستانس..و نتكششخ..
نوره: تعالي نظهر من حجرتج اخاف ريلج ايي
خلود: اوكى انروح حجرة نهله..
قاطعتها: لاع نقعد في الصاله
خلود:ههههههههه انتي بعدج ع فكره ما لحظتي شي من دش حميد..
نوره: امبلى حسيت نظراتكم كلها علي اتلومت
خلود: لانه البارحه رمس اهله و قال يبا يخطبج..
حسيت ببروده بكل جسمي يمكن من الصدمه مع اني ادري انه يبا يخطبني ...بس انا ما ابا حميد ما اباه بس هذي فرصتي ..
خلود:حووو وين سرحتي
نوره: هذا حميد متفيج قومي خليني نظهر من هني..اخاف محمد يطب علينا
طلعنا و سرنا عند قوم خالوه مريم و عايشه بس يوم جفت حميد و محمد بعدهم يالسين برع ...
غيرت رايي: انا بروح اجوف خوله..
خالوه عايشه/ ردي تعالي تغدي هني..
خالوه مريم: ويه البنيه يايه بيتنا ..و انتي تبينها تتغدى ف بيتكم ...؟؟
نوره: ههههههههه اول مره احس اني محبوبه
خالوه مريم: انتي الغاليه بنت الغاليه ..الا اقول عايشه لا تطبخون اليوم امسوين غدا من المطعم حق اهل العروس و جدر عيش لنا بنجسم ع الحاره و بنطرش لكم..
خالوه عايشه : زين قلتلي ...
نوره: خلود ما بتيين معاي..
خلود: برقد جسوم و بيي ...
محمد: و انا !!!
خلود:هههههههههه انت خلاص اسبوع هني مليت منك..
محمد: افا
الكل: ههههههههههههه
نوره: زين انا بسير ..فيمان الله..
مدري ليش بغيت اروح بيت خالوه مريم هل لاني عرفت ان حميد برع و يمكن اتلاقى معاه او اني اهرب من خالوه عايشه عن تفتح لي سالفه الخطبه ...زين و الله خليفه ملج و شجع حميد و عمور ...اووه نسيت اسال خلود شو قالت نهله يوم حميد خبرهم انه يبا يخطبني..يولون و انا شو يهمني حتى حميد ما يهمني..طلعت من بيت خالوه عايشه ..جفت حميد قاعد ف سيارته طنشته.. و سرت بيت خالوه مريم... كنت اعرف انه بيلحقني شعور بداخلي عطني هالاحساس...
حميد: نوره..
صديت صوبه: هلا و الله
حميد: وايد تتغلين كنتي غير..
طالعته اوني مب فاهمه قصده...
حميد: شحالج..؟؟
رديت عليه: ابخير ..
حميد: خبرت خلود اني قلت لاهلي اباج اتكونين حليلتي
ما عرفت شو ارد ولا شو اقوله ..معقوله صرت وحده تلعب بالمشاعر..و يمكن حميد بعد يلعب علي ..رن موبايله ارتبك ياي احساس انه المتصله بنيه..طالعته بنظرات اتطنز عليه ..حول تلفونه صامت..
حميد: شو رايج...؟؟
نوره: انا بنت خالتك ..و انت ولد خالتي و عندي اخ تطلبني منه...
حميد: يعني انتي موافقه..
ابتسمت له لان فرصتي يت بوقتها: ..بشرط ...
حميد: انا موافق
نوره: حميدان انا مب يالسه العب معاك ..عندي شرط ولازم تسمعه..
جفت الحيره بعيونه: شو امري ..
نوره: اترد عمر اخوي اذا خطب اختك نهله.."و نطقت اسم اخته باشمئزاز"
حميد: مستغرب: عمور يبا يخطب نهله !!!
نوره: هي يفكر يخطبها..اذا تم زواج عمور و نهله مستحيل ارتبط فيك..
حميد بعد مستغرب كنت بضحك ع شكل ويهه: ليش كل هاه ..؟؟عيل ليش نهله استانس و رحبت بقراري يوم قلت بخطبج..
رفعت راسي بكبرياء :انا غير و نهله غير.. و انا لي اسبابي
حميد: بس انا مالي حق ارد أي واحد يتقدم لها
رديت عليها: امبلى مب انت اخوها العود و مسؤل عنها ؟؟؟
حميد: بس ليش ما تبين عمور ياخذ نهله..
رديت بعناد: قلتلك لي اسبابي
رده فاجأني: مقدر اوقف نصيب اختي عشاني و عشانج..
انصدمت توقعته انه بيوافق ..يا اللوتي الحينه بينت نواياك تبا اتقص علي شرات ما اتقص ع البنات الي اترمسهن ..كنت بسبه و اضربه بعد بس مسكت اعصابي لاني في بيت خالوه و مب حلوه اسوي هالحركه ...
اتصنعت ابتسامه و انا من داخلي ميته قهر
نوره : خلاص عيل مالنا نصيب