يلوموني و انا اسمي مع الأيام مجنونه
يقولو ربنا يثبت علينا العقل و الدين

وانا بإحساسي الغاوي غناوي حب ملحونه
لطيفة و طبعي الهادي سلاحن يمتلك حدين

جنون الشعر و قليبي محال ان صدقه يخونه
كذوب(ن) من وصف قلبي بأنه يعشق الاثنين

غرور النفس ما لي به و له ناس(ن) يحبونه
و لا لي بالكبر منوه ..ولكن شيخة(ن) للزين

انا ماهمني قالوا و لا شلي يقولونه
و لا الطم ابد خدي و لا اضرب على الكفين

تركت الولوله للي جنوني ما يطولونه
يظل الشهد للعاجر مثال(ن) للوهن و الشين

عشان ايبرر اذلاله و ضعف(ن) تفضحه عيونه
يشوه / يفتري/يكذب يبالغ يمتعض ويهين

و هاذي حيلة الخاطي و كل اللي يحدونه
حشود(ن) اثرت الا تصدق كذبة الغاويين

جمال الورد يربكهم /بأفظع وصف يرمونه
و كل من زاد في جوره / تغلغل في ثنايا الطين

يقولون الذي يطمح ،، عواذل ما يهمونه
اذا راد الرقا ياصل لو ان الحاقدين ألفين

بإحساسي اصارعهم و انا ما عيش من دونه
وهذا انا امام الناس قوية شامخة للحين

يهزون الجبل يمكن و حرفي ما يهزونه
جذوره راسخه /خلقه قبل لا يبدأ التكوين

ما حسبت الكون قاسي ،، يمتهن لوي الذراع
وما هقيت ان القساوة تدهس احلام(ن)صغيرة

لا و لا عدا بذهني / مركب ناقص شراع
بين موج البحر أمسى / يحسبه حسبة بحيره

غاص و اللجه تدمر / من امانيه ،، اليراع
فتتت أغصان عمره / و ارخصت كل الذخيره

ما تود الحلم يكمل / يسكت افواه الجياع
ضفة بالحلم طفله ،، تشهد ايام عسيره

يا صغيره ودعيهم / ما لنا في الكون باع
اتركيهم / ودعيهم كل انسان و ضميره

ما لنا فيهم / حسافة كل شي اليوم ضاع
اتركي عنك نداهم ما لنا في القوم /سيره

من سمعنا (ما سمعنا) ما لهم بالاستماع
راح وقت لا ندهنا هاجت الدنيا الكبيره

لجل هم يبعدونه قبل ما تلفي الضباع
كلهم فدوة عيونك / ينقذون المستجيره

عز أول إنتهى و انقضى عهد السباع
و ابتدى عنده زمان المهزله (حقبه مثيره)

ما حسبت الكون قاسي ،، يمتهن لوي الذراع
وما هقيت ان الأمل كل أطرافه كسيرة

أقول و لا أثنيها بأني بنت شرقيه
عفافي رفعتي أصلي هديه من إله الكون


خلقني ربي إنسانه خفوقي رتبه فخريه
و ميزني على غيري بحس نادر مكنون


وسديم الأرض لي منشأ و روحي خلطه سحريه
تراب كنت أنا أصلا و من ينكر ترى ملعون


تمرد قبله العاصي و بث السم كالحيه
بكلمه غير أقداره جحيم حارق مجنون


قريب إمن الوريد إلنا و يبدو صادق النيه
يبي ياذي ضمايرنا يصيب الحق فينا إطعون


حشا ما مسني شره و لا قرب أبد ليه
و لا إهوا و لا غيره و لا عشره و لا مليون


حشاي إمطعمن بسياج بالأخلاق محميه
خفوقي للرقا دومن و روحي غاليه ما تهون


و لا يمكن أرخصهاو عزي بادي(ن) فيه
و لا أحني أبد راسي لغير الرب مهما يكون

بغيت اصدق احساسي [ابهنا بالهوى و ارتاح]
بغيت اصدق الكذبة [أنا ماني بمنسيه]


رسمت امن الورق لعبة تطير ابلا ذنب و جناح
معاها كنت اغني لي غناوي حب عذرية


الين ان الزمن قرر ينسيني الفرح بجماح
علي الفرح يستخسر اعيشه في غناويه


صفعني و الألم يجرح خفوق بالهوى صداح
خفوق كل ما يملك بعض احلام وردية


هتكها و لحظتي ماتت و كل اللي بنيته راح
صحيح ان الزمن قاسي و زادت قسوته فيه

قال حامد زيد ذات مرة :

غريبة كل حلم يمر برقادي تزورينه
والاغرب كيف احلم الحلم وارجع واحلمة بعدين

قبل يومين شفتك بالمنام وقمت من حينه
ونمت امس ورجع نفس المنام اللي قبل يومين

تقول الشعر يا حامد و منك صدق يا زينه
و حرف لا نثرته من خفوقك .. يجمع الإثنين

شعور دافي و ادري شعورك وحده الزينه
يا كيف ان رافقه جزل المعاني دون شك يزين

واذوب بسكر افكارك و يعتق يختي سنينه
انا لا تهت بفكارك .. اغرب عن فضاي سنين

وانا اشهد الشعر من ضفتك ازداد تمكينه
بدل ما للهوى شاطي .. على يدك غدا شطين

يبيلي قلب لامنك جرحته حيل يتحمل
يبيلي امن الصبر ديره/عساني اغفر اهبالك

يبيلي اعتق اسماعي سواليفك من الأول
كفاية تكذب و كذبك اشوفه؟ ايش في بالك

تظن ان الكذب يمرق ، عشاني منك ما ازعل
و تظن ان الطريق اللي خطيته للأسف سالك

تراني اشعر اف/بعدك ؟ و ادري فيك ما تسأل
و تراني اعرفك لامن بديت .. اتحوس في إحبالك

حسافة كثر ما حبيت قلبك في انا تجهل
حسافة ما دريت اني احاول بس اتمالك

و حسافة ان الألم مبطي من عيوني بدا ينهل
وهواي اللي تمنيته غدا في خافقي هالك

و حسافة الجرح بي يكبر و ماعاد السكوت اسهل
بكيد الصمت في نحره ..و اخونك/ حد إذلالك

تعبني الهم تعب قلبي و زاد امن التعب هجره
تركني بأصعب ظروفي وفاه اليوم حسيته


أيا ليته .. تكشف لي .. قبل طعناته و غدره
و ياليتي .. تجردته كثر .. ما كنت اغليته


صعب تهوى و لا تدري هواك / بداخله قدره
صعب تنصاب من غالي .. خفوقك كان له بيته


هدر حبي .. بلا سبه .. تمنى قلبي (إي)/عذره
و لكن الغدر بين .. جزا وهمن .. تعاطيته

تدري احبك قبل شوف النظر
اي شي اطلب تراني حاضره

لو طلبت الحب ملزوم إي/حظر
انت ما تطلب حبيبي (تامره)

ما وصل قدرك بهالدنيا بشر
لا و لا طال اي احد منك اشعره

قلب غاوي احتوى كلي قدر
فاق حد الوصف حد المقدره

طول حلمي و التحمل و الصبر
اطيب الاثمار حظي باخره

احمد الله صوره بأحلى الصور
زاد ملحه فوق ملحه كثره

في خفوقي موطنه في انحصر
مير مقداره صعيب(ن) احصره

عمر عمري رغم صغره كم صغر
و الفرح من بعد ضيقه أبصره

يا لبى قلب الليالي و القمر
يوم سهراتي .. حلومن .. مقمره

كل ابوها .. قصة الحب/ المطر
قصة بالعشق كله ممطره

من يدور في حياتي ما لقى معنى الخساره
حتى في غفوة جنوني امتلك وجدان صافي

في عيوني سحر دافي يلهب عيون السهاره
و الحلا مني تكون مسكنه حولي / ضفافي

جيت لك كلي و حرفي ما نويت اشن غاره
مير رغباتي .. مدافع .. تلتوي بين القوافي

وأبتدي نثر المعاني بعدما شلنا الستاره
لجل نبدا في وصوف نجلي عنها كل خافي

أكتب حروفي هنيه و أكتفي بعد الإشاره
بالعلوم اللي تبين من ملامحنا العجافي

صار ملعبنا سبيل يسلكه أهل القذاره
كل واحد يتبارى و يتمادى بإنجرافي

هاذي (إ) تميل و هذا يسلب قلوب العذاره
ما بقى للشعر موقف غير صمت و انصرافي

قل من بالساح يملك حرف يزخر بالجداره
يرفض أفكار دخيله و لمبادينا تنافي

ما نشوف إلا مهازل و الحبر قل إقتداره
و إن مشينا ع/ الخطيه مني لك هزة كتافي

إطوي الصفحات يالله ما على قلبك اماره
لو تبي منها تلاقي بعض نفحات رهافي

ما تربع في حناها غير أضغاث إنهماره
و الروابي بعد عزه مرها فصل الجفافي

يا خساره لو تغير شعرنا بأرض الحضاره
و الوهن بان و تكون فوق سطح الود طافي

ما نقول إلا أملنا أول النار الشراره
يا عسى يصحى بعدها كل من بالحلم غافي

ما ابي تشهد حروفي بعد عزه إنكساره
يمتلي حلم غمرها بإنحدار و إرتجافي

يا حسافة يوم كل ملتهي يصدح بطاره
و الملا ما بين ضحك بين رقص و اصطفافي

هذا واقف في يمينه .. ذاك يهتف في يساره
ياه من ضعف المشاعر بسنا خذلان كافي

الريح تعصف و المشاعر بها تميل
والقلب خفقاته ، تناهيد و امال

وأصل الحكايه إرث .. يتناقله جيل
وأحزان من عين السحب ليل تنهال]

تشكي بقايا طيف في عتمها يجيل
و يغير أحوالها من حال لا حال

وصوت و صدى و اثار في ظلمة الليل
كنه شتات أرواح في الجوف لا زال

ينثر عذابه في الزوايا أقاويل
و لا هواجيس بها الروح يغتال

و اصغي ال/ صخب انفاس من دون تعليل
والدرب خاوي و التصاوير أشكال

واهذي و اتمتم بين رعب و ترتيل
ربي يزيح الغيم و ان غيها طال

وياما جرعت الاه .. من كاسة الويل
لو كان بيدي حيلة كان .. بحتال

وما عاد لي قدره على الحط و الشيل
و القلب في حيره و للهم شيال

و درب مشيته بالعنا هدني .. حيل
واسندت ظهري بالهوا لينما .. مال

وحدي و ليلي دونما ضي قنديل
و الطيف ضيعته .. كأني بالأدغال

والعتم و اشباح تحوم .. و مواويل
مصدر خطاها اقرب لي من ظلال

و أصوات تتبعني .. و تنهال كالسيل
و تزيد شرهاتي/ تقطع .. بالأوصال

وين الملا وين السند و الرجاجيل
ضاقت بي الدنيا على كل لأحوال

لين الأسى روح و بانت تهاليل
بانت شموس الود و النور و الجال

واقصيت همي دونما أي تأجيل
حلم(ن) و خلف في تجاويفي أطلال