زاد الحكي في هالزمن هرج تلون بالغرور
كل(ن) و له فسحة حكي ينثر عليها منطقه

حرف ينيشن و القلم يقطع مسافاته سطور
يبسط من ألفاظه فراش اللي يدوسه زحلقه

يذبح و يسفك في البشر ينثر من اضغانه شرور
تصويب جاري و الهدف افكار في ظنه (إ)غلقه

يطلق جماحه و الحبر يخفي باعماقه ضمور
حصري على ارض القلم عرض مفاده (طقطقه)

المعضلة لمحة بصر شيد بها أعلى قصور
و البيت لأبيض لو يبي بأرض العقارب يحرقه

و الصين لو وده ايغزي يرسل لها أسراب الصقور
و الهم لو ضيق عليه ابلا فصال يخنقه

يفزع و لكن فزعته للي تملاه الفجور
يجعله شيخ للورع سمح المزايا مطلقه

يعني إذا قلنا الكذب الباب لأول للحضور
صاحب مزاييف الورق يحيي و يفني بورقه

ضاعت موازين الأمل لا صار اقصاها شعور
انك بهالدنيا ملك من خالفك للمشنقه

ساري بتعريف الأمم من يعترض سير النمور
انسان بالفطره (---) و اللي يجامل تعتقه

غلطة مفاهيمن سرت كذبن وصارت له جسور
اسود عالمنا أثر غيبة شموس مشرقه

إرصف و لون هرجتك تلقى ميادينك زهور
اصدق حروفك ما تحس الا بجوف المحرقه

عاين و شوف اللي جرى الحزن يستعمر صدور
أزمة كلام انتجت شعب سهاله تسرقه

ما عاد ينفعنا صبر ما عاد ترضينا جحور
لا صار بين الناس فرق الكون كله تفرقه

زاد الحكي اثر الحكي أزين لأصحابه يغور
أحلى بشف اللي غدا عرف المجامل منطقه

خل الكلام اللي كتب لا هاج من حلقه يثور
موج و يلطم مركبه يالله بعونك تغرقه

يسألوني عن حبيب ساكن في الخلايا
ما دروا ان الحكاوي و الكذب ماهو بعرفي

و ان بغيت أصدق ظلمته مالنا علم النوايا
يمكن اظروفه تحده يبتعد عني و يقفي

اه منه متعبني حمل قليبي رزايا
توه اف/أول سنينه علموه اشلون يجفي

فيه قلبي ما الومه صارخه في الحنايا
ما قوت تغفر طعونه كيف هي تعذر و تعفي

طول الغيبه و انا ارسم بين ذكراه الزوايا
تشعل اشموع انتظاري بين قيفاني و حرفي

ياه من ليلي .. جحيمه ألهب عيون المرايا
و انعكاسات ابتعاده ضللت قولي و وصفي

ظنتي و ان ضاق حظي ما يلاقي له سوايا
لو هي اتدور الدواير ما يبدلني و ينفي

ما سكن مني خفوقه ما اتركه نبضي ورايا
ظنتي عشقن و اكثر .. عشق لامسته بكفي

لا تخليني لحالي .. مهنتي .. سرد الحكايا
ما لهالدنيا ملامح بعد ما بيحت نزفي

بارد ليلي بدونك خايره بعدك قوايا
و الهقاوي تحتويني لا خبا لحني و عزفي

اه من شكوى جروحي .. من تباريح الشظايا
و العنا لفلف كياني و ختنق .. شفي بحرفي

ناقصه فيني اماكن تحتري حلو المزايا
لين ما طال انتظاري .. و البكا يغتال طرفي

كان لي منوة حياتي .. غير عن كل الهدايا
ريت من لجله عذابي .. حس باهاتي و ضعفي

ساكتن يومي نشدته .. يجبر إكسور .. المرايا
شاح عني .. ما تكلم .. و انتهى صبري بحتفي

ايش يبقى بعد ظلمك .. اظلمت كل الزوايا
دام من عيني فقدتك .. ابتعد عني .. و إقفي

تذكر كيف/نا ،، كنا و حنا نبتدي المشوار
تناديني / أقلك: سم / يا أحلى شي في ، ذاتي

صغيره دارنا لكن ، بعيني / يا كبرها الدار ؟!
بها من رقة الذكرى ، تبدد لي معاناتي ؟!

و ياما ، زارنا / فيها من احلام الوله / خطار ؟!
و حب ،، ال/ هاذي اللحظة ،، نواجه ، فيضه العاتي

و تذكر يومنا نتعب، و تاخذنا كذا أفكار ؟
تناطح بعضها / حره ، و انا في يومها ،، أحاتي

عشان انغير السيره / نشدنا ، في بعضنا اشعار
اقلك يا حبيبي خذ / تقلي يا الغلا ،، هاتي

يا احلى من رأت عيني و قلب نابض مدرار
و احلى شي بالماضي و احلى شي ب/ الاتي

يشوفك قلبي يتحسس زوايا بالعشق تحتار
و كلمات بعينك تجتذب كلمات كلماتي

و اسولف لك وانا شارد بلحظة دونما اشعار
كذا احروف الغلا تنساب غصب عن عينها اشفاتي

و اعدل يمك الجلسه و قلبي بالمحبة ثار
و الم ايدينك ابيدي و ابعثر فينا ،، ضحكاتي

انا والله إن حبك يحطم بيننا أسوار
من اول لحظة شقلب معه ، ألوان حالاتي

و اذا رمت انطق بكلمة حروفي ابحينها تنهار
و احس الروح تتشرد معك و تزود زلاتي

و اداري ربكتي ابضحكه و تكثر يمها اعذار
عشاني استر اقليب(ن) على اعتباكم ماتي

بسيطة كانت العيشه كثيرة كانت الادوار
بمسرح شوقنا تحيي قديم(ن) غابر(ن) /فاتي

عشان اعمارنا عدت و باقي خطوه بالمشوار
نخطيها و (تمت) بعدها اخر حكاياتي

من يدور في حياتي ما لقى معنى الخساره
حتى في غفوة جنوني امتلك وجدان صافي

في عيوني سحر دافي يلهب عيون السهاره
و الحلا مني تكون مسكنه حولي / ضفافي

جيت لك كلي و حرفي ما نويت اشن غاره
مير رغباتي .. مدافع .. تلتوي بين القوافي

وأبتدي نثر المعاني بعدما شلنا الستاره
لجل نبدا في وصوف نجلي عنها كل خافي

أكتب حروفي هنيه و أكتفي بعد الإشاره
بالعلوم اللي تبين من ملامحنا العجافي

صار ملعبنا سبيل يسلكه أهل القذاره
كل واحد يتبارى و يتمادى بإنجرافي

هاذي (إ) تميل و هذا يسلب قلوب العذاره
ما بقى للشعر موقف غير صمت و انصرافي

قل من بالساح يملك حرف يزخر بالجداره
يرفض أفكار دخيله و لمبادينا تنافي

ما نشوف إلا مهازل و الحبر قل إقتداره
و إن مشينا ع/ الخطيه مني لك هزة كتافي

إطوي الصفحات يالله ما على قلبك اماره
لو تبي منها تلاقي بعض نفحات رهافي

ما تربع في حناها غير أضغاث إنهماره
و الروابي بعد عزه مرها فصل الجفافي

يا خساره لو تغير شعرنا بأرض الحضاره
و الوهن بان و تكون فوق سطح الود طافي

ما نقول إلا أملنا أول النار الشراره
يا عسى يصحى بعدها كل من بالحلم غافي

ما ابي تشهد حروفي بعد عزه إنكساره
يمتلي حلم غمرها بإنحدار و إرتجافي

يا حسافة يوم كل ملتهي يصدح بطاره
و الملا ما بين ضحك بين رقص و اصطفافي

هذا واقف في يمينه .. ذاك يهتف في يساره
ياه من ضعف المشاعر بسنا خذلان كافي

ليت قلبي من سموه / لا يحن و لا يذوب
لا يدغدني شعوري لي شفوف الهاويه

لا يهمني شروقه .. لا يهمني ، غروب
ع الفراق اليوم كلي عن هواهم ناويه

يا قليبي لا ترخي / هدنتك امست حروب
يكفي اني كم كبته كم حزوني طاويه

ما بقى فيني مكان يحتمل منه ضروب
للعنا ما عدت اقوى/ للجنون امخاويه

اه يا عمرن يعاني و الهوى فيه امغلوب
و الجراح ابكل نوع في ضلوعك حاويه

كم تجرعتك حسافة كم تجرعتك حبوب
ريتها تسكن ملامح من لهيبه / ضاويه

لا فوايد من كلامي و الرضا في امعطوب
و الألم ينهش حروف ... للماسي ، راويه

قلب ما بيده يغير من معالمها اللعوب
و الوجوه اليوم امست فالأذى متساويه

ما اقول الا سلامي / من بعد عذري وجوب
أحمل احلامي و أرحل / قبل أهوي ذاويه

ما بقى للقول معنى ما بقى الا الهروب
يوم مالي بالأماني .. لا دموعي / قاويه

ليت قلبي من سموه / لا يحن و لا يذوب
لا يدغدغني شعوري لي شفوف الهاويه

لا يهمني شروقه .. لا يهمني ، غروب
بعد ما زاد اغترابي .. في دروبن غاويه

على أرضج .. كويت العز .. نثرت الورد بأنواعه
أبي أوصف مدى شوقي لموج الود و الشطان

لطيب في زمان الحب .. تسلل .. بين .. أضلاعه
يناجي المد يتراقص ..تراتيل الهوى و الدان

ويسأل يا ترى كيفه ؟؟ نسيم العشق .. و أوضاعه
عساه بخير .. ما مرت ..دروبه .. ضيقة الأحزان

هواي ال ضفتج بحر تقاسم روحي الساعه
بحر يرمي من الطيبه ..مراسي شوقه الظميان

و بحر يكتم اشعوره .. قبل ..لا يطلق .. إشراعه
لروحج يا بلاد العز .. خفوقي هايم(ن) ولهان

عيونه للخضار تحن .. و مجد(ن) ..دام صناعه
على نهج الوفا ساروا و نهج الطيب والإحسان

سياسة تهدف العزه .. وقتل الزيف و اطماعه
تداري خاطر الأمة ..وتنهر سطوة العدوان

تسابقني لج أشواقي .. و شوقي ..يطلب إشباعه
ابي المس دفا روحج وقلب .. بالحلا مليان

كويتي فدوه ال عينج سواري النور ..و إشعاعه
من الأنوار مخلوقه .. خريطة .. للوله ..عنوان

أبفدي من سكن دارج ..ومنهو ..حلوه ..أطباعه
عسى دربه فرح دايم .. وسعد(ن) ما راه إنسان

عروس البحر .. تتمايل .. و تمسك بالغلا ..ذراعه
و تمشي و القمر .. ينظر لمشية ..شيخة الظبيان

تداري بالحيا فيض .. تناثر .. بين .. إيقاعه
و ترمي العطر في خفه ..على معزوفة الألحان

حسنها .. شي أذهلني .. عليها .. تم .. إبداعه
رسمها .. لوحه ما تبلى ..مرايا سحره الفتان

بديعة ..كثر عزتها.. أبيه .. تلزم .. الطاعه
على الإيمان مفطومه .. بديعة صنعة الرحمن

رجيتك تقصر الجفوه تعب قلبي من غيابك
تعبت انطر على ساحل غرامك و اللقا مجهول

رجيتك رد لي فرحة و رد الفرح لأحبابك
وشرهاتك على عيني / عطايا من حكي معسول

على قلبي عسل و أزود ملامك شدة اعتابك
ولو ان العتب حقي و لكن لو توده (قول)

رجيتك رد لي سالم جرحني الشوق بأسبابك
تعبت انطر على ساحل غرامك و الليالي تطول

اسوق الحب لك شمعة يضوي نورها بابك
هقيتك تفهم شعوري و طرف(ن) بالوله مبلول

هقيتك للوصل شاري هقيت الشوق لي جابك
هقيتك كل هقواتي بعينك و الغرام (اوحول)

خساره عمري الفايت قضيته أندب غيابك
خسارة وقت ضيعته و انا أدري الأمل مقتول

تعدى ع الغصون الطيب و زلزل جذعي المجنون
خنق إحساسي الجارف و طفل الحب في صدري

جنايه ع الهوى في ليل غريب بالوهم مسكون
و أنا أسري بلا جدوى و أمسك بالعنا ظهري

أبدي ضحكتي و احجب دموعي ما ابي يدرون
بأني حيل مكسوره .. و أفضي بالألم .. جهري

أمانة .. لا سألتوني و خر الهم .. مني إمزون
أبد لا تسألوا من وين ؟ لفاني الهم من بدري

و لا تتشفقوا الحالي .. و لا تتألموا .. تكفون
كفاية بكتم إجروحي و أعيش بضيقي و سري

أموت و يسعد الجاني ترى يا كيف بس وشلون؟
و أصبر نفسي و احزاني و اهو عني و لا يدري

دروبي بالماسي اتغص و تتحاذف بها لظنون
و لا تسعفني هالدنيا حملت الظيم من صغري

عصيه كلمة الفرقه بجوف العاشق المطعون
و اقسى لا نثرت الجرح حروف نثرها عبري

كواني في بروده لي يشد و يرتخي بالهون
يجمدني بأعصابه .. و اتحرق على جمري

قطفني قبل ما أكبر و لا يبدا بزهري لون
تملكني بقاموس ضليع .. باذخ سحري

و دس السم في نزف يلوثني بعتم الكون
و روحي تنثني بينه و شطره موطني الحصري

تجردت الطفل و الحب تبدد في وهن لجفون
و ذابت فيني إبذور تبعثر لي ورق عمري

كلما ذابت حروفي .. إنفضت .. مني حروف
و ادعت .. إني غريبه .. واني كلي .. مجرمه

إعذريني يا حروفي .. كلنا .. بحكم الظروف
ما لنا غير انتصبر ع الجروح المؤلمه

جادت أفكاري .. بكلمه .. تحتوي كل الصنوف
الأماني .. و المعاني .. و الدروب المظلمه

بس يا قلبي .. حسافه .. ما لقت غير الرفوف
تحمل افكاري عليها .. و الخفايا المبهمه

وأعلن الحبر .. اكتئابه و انسحابه و العزوف
يوم الاوهام اعتلتنا .. و النوايا المعتمه

ياقصيدة شوق ضاعت .. بين أحلام و طيوف
و إحتويتي.. من عذابي .. الزوايا المعدمه

إسمعيني و افهميني .. حنا بالدنيا .. ضيوف
لو حكيتي .. لا تزيدي .. عن كلام الهمهمه

ولا تلوميني و لومي .. عين ما عادت .. تشوف
غير الافكار الرديه .. و الهزل .. و اللملمه

غابت انوار الحقيقه .. و ابتدا وقت الكسوف
يظلم اوجاني و روحي .. و الهوى هم يظلمه

ومالي غير الحرف مرسى .. لو كساني كلي خوف
بس يا حرفي السموحه .. و الله اني مرغمه

كلما ذابت حروفي .. إنفضت .. مني حروف
و ادعت .. إني غريبه .. واني كلي .. مجرمه

إعذريني يا حروفي .. كلنا .. بحكم الظروف
ما لنا غير انتصبر ع الجروح المؤلمه

دار الهوى ماطر على الدار لا دار
دور مع احلامه و دور مساها

هل و همى هادر على الروح مدرار
اروى مسام الروح و اروى مداها

عطر الحلا لا حل حلوه معه حار
كل الحلا /حلوه / مرده حلاها

طار الهوى كله مع الحلم لا طار
واهمل على مده مدامع سماها

همه على حد المدى صار محدار
واهل الموده / همهم ما حداها