البداية
البارت الأول
قبل ثلاث سنوات كان يعيش في أركان هذي العائلة الكبيرة قصة حب عظيمة تقف لها الأنفاس
الجدة حصة:أنا بروح أنام ماقدر على السهر تصبحوا على خير
نورة وأم عبدالعزيز : تلاقي الخير يمه
نورة: أنا بعد يام عبدالعزيز بروح خلي الخدامة تنادي على غلا
أم عبدالعزيز : وين باقي بدري خليك شوي
نورة :لا تأخرت على البيت ومحمد دق واللحين بيمر علينا
أم عبدالعزيز:على راحتك .........
أم عبدالعزيز: ميري نادي على غلا أمها بتروح
ميري: حاضر ماما
البنات كانوا متجمعين في غرفة البنات وصوت السوالف والضحك عبأ المكان وقطع عليهم صوت دق في الباب
الهنوف : مين؟
ميري : ماما نورة بيمشي خلي ماما غلا يطلع ابوها يجي
غلا : يوة دايم اللحظات الحلوة تمر بسرعة
الهنوف: انتي من جدك بتروحي وتخلينا والسهرة مابقي بدأت
غلا:ماسمعتي ميري تقول ابوي جاء يعني مارح يخليني اجلس عشان اخوانك موجودين
سعاد: خلونا نكلم عمتي تقنعة ونشوف وش يقول !
شوق:خلاص أنا بروح اكلمها
نورة:هاه ياشوق وين غلا ابوها ينتظر تحت
شوق: فديتك ياعمه خليها تجلس معنا
نورة:يابنتي أنا ماعندي مانع بس ابوها مارح يوافق
شوق أنتي كلميه و اقنعية تكفي ياعمه
وبعد محاولات مع أبو غلا وافق تجلس عند أخوالها
الكل نام الساعة 12 إلا البنات جلسوا عند التلفزيون
الساعة 3ونص الفجر
غلا:بنات أنا جوعانة حيييل
الهنوف: فيه اندومي من حقت ميري تبغي ؟
غلا:لاوالله أنا نفسي في شي مقلي
سعاد : بطاطس ماعندنا والدجاج على بال مانطلعه وتذوب بيأذن للفجر
الهنوف :خلاص لقيتها وأخذت الجوال ودقت على احمد
هلا بأخوي سندي حبيبي
احمد:يالله صباح خير مدري مساء الخير وش المصلحة اللي تبيها
الهنوف:يعجبني فيك ذكاءك بس بغينا أغراض من السوبر ماركت
احمد:أنا جالس مع الشباب وماني طالع
الهنوف:تكفى غلاوي عندنا وجوعانة وماعندنا غير اندومي وماتبيها تبي شي ثاني والبنت ضيفة ولازم نكرمها تكفى لاتفشلنا
احمد: خلاص أنا طالع إذا وصلت السوبر دقيت
سعاد: وش قال؟
الهنوف: بيطلع السوبر اللحين وإذا وصل بيدق علينا

*عند الشباب
احمد:يلا سلام شباب أنا طلع
فارس:وين باقي بدري
احمد:لابس الأهل طالبين أغراض من السوبر
طلال : احد يطلب أغراض اللحين
احمد: وش نسوي أختك عندنا وطلباتها أوامر عند أخواتي
*ولما وصل احمد دق على الهنوف
الهنوف:هلا حمود
احمد:هاه وش تبون
الهنوف:نبي أوصال دجاج وبطاطس قلي
احمد:بتقلون في الفجر
الهنوف:وش نسوي طلبات غلا
احمد:اسأليها وش رايهها أجيب شيبس أحسن من القلي بتتجمد شرايينكم لان الجو بارد
الهنوف : غلاوي وش رأيك احمد يقول يجيب شيبس أحسن من القلي الجو بارد بتتجمد شراييننا
غلا:لا وإذا تجمدت كل شي عشان يهون
الهنوف:أتوقع سمعتها
احمد: خلاص تبوا شي تشربونة
الهنوف:ايوة جب معك اربعة بيبسي
احمد:وليش اربعة؟
الهنوف:لي ولغلاوي وشوق وسعاد
احمد:وان انشاء الله مالي نصيب
الهنوف:ليش راح تأكل معنا
احمد:حلوة ذي تطلعوني من عند الشباب وتقطعون سهرتي وباقي تسالي إذا باكل معكم والالا ؟
الهنوف: خلاص ياسيدي وش فيك اكلتني بقشوري
احمد:اقول تراك طولتي علية وعلى فكرة أنا بطبخ لكم فاهمة
الهنوف: احد بيجية شي جاهز ويرفض باي
*وصل احمد وكان اللابتوب في يد والاغراض في يدة الثانية
كانت غلا جالسة على الكنبة ولابسة بيجامه صفراء عليها ميكي ماوس وشعرها مرفوع بطريقة فوضوية ودخل احمد وارتبكت لما شافتة وحست بالاحراج لأنة دخل وشافها بشكلها ذا
احمد: هاي غلا كيفك؟
غلا: اهلين أنا بخير كيفك انته ؟
احمد:دامك بخير أنا بخير
غلا حست ان كلام احمد يزيد من احراجها فقامت بسرعه الغرفة وغيرت ملابسها ولما طلعت من الغرفة حطت طرحتها على راسها
احمد:مين بيساعدني
الهنوف وشوق:نحن اسفون فيه فيلم اكشن مستحيل نفوتة
سعاد: خلاص حمود أنا بساعدك
احمد:طيب يلا نروح المطبخ
وقتها وصلت غلا عندهم
سعاد: اقول غلاوي وش رأيك تجي تساعديني
غلا:اوكية
الهنوف :الله يقويك غلاوي وسوي سلطة أنا احب سلطتك
احمد: وين الادب اللي طاح عليك وانا عند الشباب ماتقولي لازم نكرم الضيف واخرتها تقولي قطعي سلطة بدل ماتقولي تعالي معنا نشوف الفيلم
الهنوف:خير انشاء وش فيك علية؟وبعدين ترى بعض الناس خوافين ومايشوفوا افلام اكشن
احمد:مين تقصدي؟
الهنوف:في غير غلا اللي اكلتني بلسانك عشان حضرتها
احمد:غلا بجد أنتي تخافين
غلا وصلت قمة من الاحراج لانها ماتحب احد يعرف شى عنها
احمد:وش فيك ماتردين
سعاد: احمد انت شوف ملامح وجهها وانت بتشوف البراءة عشان كذا ماتحب العنف مو مثل اخواتك الشر طالع من عيونهم
احمد:ومنك ياسعاد نستفيد عرفت صفة من صفات هالغلا ...
سعاد:يلا ترانا طولناه وهي قصيرة واذان الفجر قرب
*عن التلفزيون كانت الهنوف وشوق منسجمات على الاخر
*اما في المطبخ كانوا منسجمين على تعليمات احمد سعاد حطي الزيت ....وانتي ياغلا قطعي سلطة ولما صار وقت القلي طلعت الاوصال ريحة مو حلوة بالمرة والكل لاحظ بس كملوا على امل ان طعمها حلو طبعا ابوهم شم الريحة بس ماكان يعرف مصدرها وصحى
سعاد:شباب بروح أجيب فاين وارجع
وقتها كانت غلا عند الثلاجة تطلع الخضار واحمد واقف عند الفرن يقلى
طلعت سعاد من المطبخ وسمعت صوت ابوها ورجعت بسرعه
سعاد: الحقوا ابوي صحى
احمد(من الصدمة صاح):كذابه
ابوهم سمع الصوت جاي من المطبخ واتجه لمصدرة غلا دخلت جنب الثلاجة وسعاد وراء الباب اما احمد عرف انة مكشوف مكشوف فظل مكانة ودخل ابوة علية
ابوة:احمد وش قاعد تسوي؟
احمد:جوعان
ابوة:ةاللي جوعان يقلى الفجر
احمد:وش اسوي اشتهيته
ابوة كان يدف الباب ويرجع لان سعاد وراء الباب
ابوة:طيب وين اخواتك
احمد:اتوقع ناموا
ابوة عرف انة يكذب علية وكان متاكد ان معاه احد وراء الباب واعطى احمد تهزئ محترم بعدين راح ينام لأنة ماسمع صوت لان الهنوف وشوق لما حسوا بالخطر قفلوا التلفزيون وجلسو في الظلام

البارت الثاني

*في المطبخ احمد صدق انقهر ان ابوة هزأة بس مابين هالشي
غلا: احمد أنا اسفة اخذت تهزئ عشاني
احمد: مو أنتي اللي قلتي كل شي عشانك يهون ... وانا بعد اقول كل شي عشان الغلا يهون (غلا تمنت الارض تنشق وتبلعها ولاتكون سمعت هالكلام)
*بعدها تجمعوا عندtv باكلهم
احمد:وش فيكم ماتكلوا أوصال
الهنوف:وش قالو لك فيران تجارب
شوق:وانا عني مو مضحية بنفسي
سعاد:أنا لاتطاع فيه وانت تعرف اني اكثر وحدة اتحسس من أي شى اكلة
*في هالوقت اتجهت الانظار كلها لغلا
احمد:وانتي غلا وش عذرك
غلا:تبغاني اموت
احمد: سلامتك من الموت يس يعني أنتي عادي عندك اطلع من عند الشباب واروح السوبر واقلي واخذ تهزئ عشانك وكل هذا حتى ماتجاملي
غلا(مدت يدها للصحن وأخذت قطعة واكلتها وكان باين على وجهها ملامح عدم الرضا)
احمد:كيفك الطعم؟
غلا: حلوة يكفي انك انت اللي سويتها وش تبي اكثر من كذا
احمد:ايوة علمهم(ويأشر على اخواتة)الذوق ياذوق
غلا حست قلبها ينبض بسرعة ولاول مرة بحياتها تحس ان في شئ يربطها بأحمد
*اذن للفجر وصحيوا اهل البيت والرجال راحوا المسجد يصلوا ورجعوا ناموا والبنات كذلك صلوا وناموا إلا غلا اللي ماقدرت تنام كانت طول الوقت تفكر بالشعور اللي تحسة لما تشوف احمد وبكلامة لها وبعدة فترة نامت بس في الوقت كانت الهنوف تعاني وتتعذب من داخلها (في الفترة كانت الهنوف عند أهلها لان زوجها مسافر) كانت تفكر في عبدالله اللي مسافر الخارج وكيف ماصار يهتم فيها وكيف تغير فجأة بعد ماكان يحب الهنوف لدرجة الجنون وبعد تفكير طويل طبعت على خد كل وحدة من بناتها بوسة وغفت عينها لكن قلبها ماغفى عن حبيبها اللي عذبها
"

قصة عذابي ماجرت للمحبين ......
ياما شكيت الحال مما جرالي .......
واقول مالي في السعادة عناوين ......
ماللسعادة في حياتي مجالي ......
احمل جروحي واحبس الدمع بالعين ......
واشكي فراق اللي على الروح غالي .....



* الظهر في بيت ال علي في غرفة تركي
فاطمة: اقول يمه تركي ترانا طولناها أنا صاير لي سنة من لما خطبت شوق لك وللحين ماصار شئ رسمي عشان كذا أنا بكلم ابوك ونروح نخطب رسمي أنا ودي افرح فيك يمه
تركي:لايمه الزواج مولعبة أنا مو قدة اللحين انتظري شوي وإذا حسيت اني قد الزواج بجي اقولك بنفسي اول شي اخطبي لنايف
فاطمة: نايف عروستة موجودة وانت على راحتك بس أنا ابي مصلحتك وانت كيفك وطلعت من الغرفة
ابتسام:وانت لاتصدق ان امي تبي مصلحتك تراى شوق مو حلوة سعاد احلى(ابتسام طبعها كذا تغار من بنات خالها لان الكل يثني عليهم )
تركي: لاشوق ولاسعاد أنا مافكر اتزوج اللحين
ابتسام:اللهم بلغت اللهم فاشهد أنا قلت لك وانت حر
*في بيت ال سالم
ابو عبدالعزيز كان يحكي لابوة عن احمد لما لقية يقلى الفجر
أم عبدالعزيز: وانت وش عليك منهم الخير موجود والحمد للة
ابو عبدالعزيز:أنا ماقلت شي ياكلون بالعافية بس مو سهر باليل ونوم بالنهار
احمد:السلام عليكم
الكل :وعليكم السلام
أم عبدالعزيز :وش تبي يمه غداء
احمد: الحمدلله يمه! مابية بطلع
جود: خالو خذني معك
احمد:طيب روحي عند ماما تلبسك
أم عبدالعزيز:أمها مابقي صحت
الجدة حصة: وتلومون زوجها إذا سافر أنا مالومة حتى لو تزوج عليها بعد لان مافية زوجة تنام للعصر
أم عبدالعزيز تضايقت من كلام الجدة وراحت تبدل ملابس جود
وبعدها دقت على البنات الغرفة
احمد: يمه وش فيك؟
أم عبدالعزيز:ابيهم يصحوا ياكلوا لهم شي على الاقل عشان غلا
احمد:اقول يامامي اصلا هم ماناموا إلا متاخرين عشان غلا
أم عبدالعزيز: وش تقصد؟
احمد:أنا اقول إذا صحوا بيفهمونك !يلا باي جود انتظرك في السيارة
الهنوف صحت وفتحت الباب لامها
الهنوف :صباح الخير يمه
أم عبدالعزيز:وين صباح الخير الساعة 4 العصر
جود: ماما عادي اروح مع خالو؟
الهنوف:لابسة ومخلصة وتوك تستأذنين بس يلا روحي
وباست جود أمها وراحت لخالها اللي ينتظرها في السيارة
أم عبدالعزيز:يلا اصحوا الجو جنان
غلا سمعت خالتها وصحيت
الهنوف:وش رأيك نطلع نتمشى
غلا :وليش لا بس مع مين بنروح
الهنوف:لاتحاولي تفكري ان احد بيطلعنا
غلا:وليش مانروح مع احمد
الهنوف:أنتي تحلمين ترى امس لو مو جوعان ماعبرنا
غلا:والحل
الهنوف:بنطلع على رجولنا مشي
غلا:وانا ماعندي مانع
سعاد:اقول مابقي خلصتم تراكم ازعجتونا
شوق :سبحان الله اول مرة تقولي شي صح
سعاد:قدها
شوق:لوماني قدها ماقلتها
سعاد:اخذت جوالها وشغلت الاغاني ورفعت الصوت وشوق تضايقت وصحت
*في بيت ال محمد
محمد:وغلا متى بتجي
نورة :بكلمها تجي في الليل
محمد:أنا عندي دوام وماقدر اجيبها
نورة:باكلم خالها يجيبها

*طلعوا البنات رحلة ونزل عليهم مطر وجلسوا برى البيت الى المغرب وبعدها رجعوا وصلوا وتجمعوا في الصالة وغلا كانت لابسة تيور جينز وبلوزة حمراء ناعمة وكيوت وشعرها مفرود وملل بالموية
ودخل احمد وجود
احمد:سلام
الكل:وعليكم السلام
احمد:غلا باقي عندنا ؟وكان يطاع فيها من فوق لتحت بنظرات اربكتها بس هالنظرات ماخلتها تستسلم وحاولت تبين انها تقدر تواجة نظراتة وحطت يدها على خصرها وقالت:لايكون بس متضايق من وجودي ياسيد احمد
احمد(كان بخاطرة يضحك على براءتها): على هونك اصلا أنا مبسوط بوجودك
غلا ارتبكت وحست انه بان عليها بس حبت انه ماتوضح هالشي بس من داخلها تقول(لية تربكني بكلامك لية تتلخبط اموري بس اشوفك ) بعدين انتبهت على حالها وقالت بكل غرور :مشكور على اني اتوقع العكس
بعدها جلسوا البنات يضحكوا ويسولفوا وغلا معاهم ولاهي معاهم
الهنوف:اقول غلا اضحكي تراني قلت نكتة
احمد:وش تضحك عليه على سخافتك
الهنوف: اقول انت انكتم ومالك دخل
احمد:لامارح انكتم وباقول لكم لغز واتحداكم تحلوة
سعاد:احلا صرنا نعرف الغاز
احمد:أنتي بما انك اصغرنا حجما إذا أنتي اخرنا تكلمنا
الكل:ههههههههههههههههههههههههههه
شوق: اخلص نبي ناكل بنموت جوع
احمد:امنيت حياتي تتجمعوا وماتاكلون
سعاد:بسم الله علينا
احمد:اقول أنتي اسكتي ليته بان فيك
سعاد:وش فيك حاط نقرك من نقري اليوم
احمد:كذا مزاج......اقول اللغز والا اروح
غلا:يلا قول
احمد:بشرط اللي مايجاوب ماياكل
الهنوف :اكييد وحدة بتجاوب و3لا يعني اللي بتاكل وحدة بس
احمد: هذا إذا احد جاوب
سعاد:وإذا ماوافقنا على الشروط
احمد:مافية سهرة اليوم
سعاد: اتحداك
احمد:لاتتحديني بتندمي
سعاد:بنشوف
احمد:يلا بقول اللغز "دخل مطعم ست وعشرين رجل وكان في المطعم 21كرسي فكلهم جلسوا على كراسي كيف
غلا(بفرحة وماتدري كيف نطقتها): وفرحان انت وجهك هذا اتفه لغز مر علية ست يعني امرأة وعشرين رجل يعني صاروا واحد وعشرين
احمد(بكل اندهاش من عفوية غلا): والله ذكية بس اكيد طالعة على ولد خالك يلا أنتي اللي تستاهلي تاكلين وهم يتفرجوا عليك ههههههههههههههههه
غلا:لا ياحبيبي (قالتها وانصدمت من نفسها بس كان كل همها تقهر احمد)
هذولاء أخواتي واي شي نسوية لازم نسوية مع بعض
احمد(انبسط كثير من غلا لما قالت ياحبيبي وحب يحرجها لأنة يعجبة شكلها وهي منحرجة): إذا هم اخواتك فانا حبيبك وانتي اللي قلتية بلسانك
غلا(ماردت من كثر الاحراج اللي كانت عايشة فيه وراحت الغرفة بسرعة )
سعاد:احمد اللي سويتة خطا وانت تعرف انها غلا عفوية وطلعت الكلمة منها كذا
احمد(حس ان في شي يجذبة لغلا ومايعرف شنو ):اقول اسكتي وروحي نامي والانسيتي انك تحديتيني على ان مافي سهر اليوم
سعاد:اقول بنسهر واعلى مافي خيلك اركبة
احمد:حننننننننننننننننننننننننشوف

واذن العشاء وراحوا صلوا ورجعوا والشياب على طول ناموا ولابقي غير الشباب
*في الغرفة
غلا كانت في الدنيا ومو في الدنيا (يارب مو معقولة وش اللي قلتة وشلون اقولة حبيبي اللحين وش بيقول عني أنا احبة بس هاشي مو مفروض اقولة )وقطع تفكيرها صوت جوالها
غلا:هلا يمه
أم غلا : اقول تراك طولتي متى بتجين
غلا:خلاص خلي أي احد يجي ياخذني
أم غلا: ابوك عندة دوام واخوانك في البر مع الشباب لكن خلي خالك يجيبك
غلا:خالي صلى العشاء ونام
أم غلا:خلي احمد يجيبك
غلا :بكلمة وبشوف (مستحيل اسويها لكن عشان اسكتك يمه ) مع السلامة
دخلوا البنات الغرفة
الهنوف:وش فيك غلاوي
غلا :امي دقت تقول اروح
سعاد:مين بيوصلك
غلا:امي تقول اكلم احمد وانا مستحيل اكلمة لان ماحد يقولة شي
شوق:خليك معنا اليوم وبكرة روحي
غلا:أنا ابي اروح اليوم على الاقل اخذ ملابس
سعاد:بس رح تفوتك سهرة اليوم
غلا:شكلك نسيتي تحدي احمد
سعاد:لامانسيت بس اتوقع مايقدر يسوي شي وابوي موجود
غلا:بس أنا احس اني متوترة من تصرفات احمد معي لأنة صار ياخذ كل كلمة اقولها على محمل الجد عشان كذا أنا افضل اروح اليوم واجيكم لما يرجع احمد الانسان اللي اعرفة
شوق:على راحتك وإذا تبين كلمتة لك
غلا: ياليت
شوق:من عيوني وتعالي معي واجلسي عند الباب عشان تسمعي وش بيقول
*عند التلفزيون كان احمد جالس لحالة ويفكر كيف يحرمهم السهرة وقطع تفكيرة صوت شوق:احمد
احمد:وجع أنا جنبك مو في المريخ يوم تصيحين كذا
شوق:ادري انك جنبي بس عقلك مو هنا
احمد:وش عندك اخلصي ماني فاضي لك
شوق:عمتي دقت وتبيك توصل غلا بيتهم
احمد:وشوا غلا بتروح ؟
شوق:انت ماتسمع ايوة تبي تروح
احمد: اسف ماقدر خلي غيري يوصلها
شوق:احمد تكفى مافية غيرك والبنت عند الباب تسمعك ...هاه وش قلت
احمد:قولي لها حبيبك (تعمد يقولها عشان تسمعه غلا) يقولك اسف مايقدر يستغني عن وجودك
غلا توترت اكثر لما سمعت كلام احمد وماقدرت تمسك نفسها ودخلت عندة وقالت:خلاص أنا مابي اروح لامعك ولامع غيرك
احمد:شفتي ياشوق ماتقدر على مفارق حبيبها
غلا(بصرخة والدموع في عينها):احمد كفاية تراك زودتها وانا ماعاد اتحملك وطلعت تركض بدون ماتسمع أي كلمة من احمد
*دخلت غلا الغرفة عند البنات وهي واصلة حدها
غلا:وش فيه اخوكم هذا انهبل؟
سعاد:ماعليك منه شكل امي كانت ترضعه ثقالة دم
الهنوف:أنا اوريك فيه بروح اطلعة من عند التلفزيون ونروح بدالة نغير جو
*احمد لازال يفكر في التحدي بس علي دخل وخرب علية
علي:احمد قوم الشباب كلهم في البر مابقي إلا أنا وانت
احمد: طلعه ماني طالع
علي :لا خليك جالس مع البنات ورح البس من ملابسهم يكون أحسن ... أنا بروح مع نايف
احمد: والله فكرة ....واقلب وجهك واللي تبي تروح معة روح
الهنوف(دخلت وصدمت في علي اللي كان معصب):وجع ماتشوف
علي:اوة جت الثانية مو كفاية اخوك الاهبل مو راضي يطلع
الهنوف :مو على كيفة احنا نبي نشوف التلفزيون
(الهنوف مادرت انها وصلت احمد للي يبي واعطتة الفكرة بدون ماتدري )
احمد:خلاص رح اطلع عشانك ياهنوف بس مو اللحين بعد ربع ساعة
الهنوف:مو مشكلة أهم شي تطلع
*احمد قفل الTVواخذ سلك التوصيلة وجرحه بحيث إن اللي يشغله ينفجر فيه وكان في الغرفة اللي جالس فيها بلكونة وفتح الباب وطلع فيها وكان الجو عاصف وبارد واخذ جوالة ودق على الهنوف يبلغها انه طلع مع واحد من الشباب
الهنوف:يلا شباب احمد راح
غلا:روحوا انتم وأنا بلبس بيجامة والحق عليكم
دخلوا البنات الغرفة واحمد كان يراقب تحركاتهم بس استغرب أن غلا مو موجودة
سعاد:شوق شغلي التلفزيون
الهنوف:لا خلي البنات يناموا أول
جود:أنا مابنام بجلس معكم
الهنوف : طيب بس اسكتي عشان تنام أختك
نامت نجود
ودخلت غلا وفرح احمد لما شافها لأنة خاف تكون زعلانة
غلا:ليش مقفلينTV
الهنوف: خلاص شغليه نجود نامت
أخذت غلا السلك وشافها احمد كان يبي يصرخ ويقول لاتشغلية بس يد غلا كانت أسرع من صوت احمد وبس حطت غلا التوصيلة في الكهرباء انفجرت فيها



إلى هنا واكتفي وأتمنى أشوف ردودكم واوعدكم انزل بارت أطول في اقرب وقت ممكن
وابي توقعاتكم وش بيصير في غلا البارت الجاي ؟؟؟؟؟؟!!!!!!
واعذروني اذا كان فية اخطاء املائية

اتمنى اشوف ردودكم ودعمكم

يسلمو خيتو على الروايه الاكثر من رائعه بالمره نايس نايس دخلت جو معاهم واتوقع اللي صار في غلا دخل احمد عليهم وقال لا ليتها في خواتي مو فيك ههههه بس ان شاء الله يكون احسن من كدا والله فله وننتظر البارت وياليت ماتتاخرين علينا لاني تحمست بالمره ننتظر جديدك

(فاقدة اخوها) فديتك بروحي يالغالية ومشكوررة على توقعاتك

بداية رائعة واتمنى لك التوفيق
واتمنى منك تنزيل الاجزاء الباقية في اسرع واقرب وقت لو سمحتي ..

لولو المالكي

مشكووووووووووووره