اللي يبينا عيت النفس تبغيه (منقوله)...كامله

**اناغيم** · 13-07-2009, 08:02 AM

الساعه8:00م
نزلت انا وعمتي نورا للسوق...عشان نشتري مفارش جديدة لضيوفنا اللي بيجون بكرة... وعيت عفاري انها تجي معنا...وماجات معنا غير ريما اللي كانت شايلة عروستها بفستانها المخملي ومبسوطة على الأخير وهي قاعده تحقق مع جورج بالسيارة...
ريما: انت في كلام ئربي؟؟؟
جورج:yes
ريما: طيب ليش...انت كلام انجليزززي واجد؟؟
جورج وهو يهز راسه: انا...مافي كلام ئربي كتير زين..
ريما بعناد: يعني...انت مافي ائرف ئربي؟؟
جورج وهو يهز راسه بصبر ويبتسم ل ريما: u can say that
هزت ريما راسها وقالت معصبة: ماما...
قالت عمتي نورا اللي صوتها كان يرتعش: هلا؟؟؟
ريما بطفولة بريئة: انا ماحب جورج..علي احسن...
ابتسمت عمتي نورا اللي كانت كاشفه غطاها عشان السيارة مضللة:طيب..علي يرجعنا...ارتحتي...
رجعت ريما تقول باصرار ل جورج: أزا انت مافي كلام ئربي..انا ازئل..
ضحك جورج وقال: i'll try.....don't be upset
ريما: good....very good
سفهت ريما والسواق...وقعدت العب بالجوال...ولاحظت بطرف عيني ان عمتي نورا...شكلها كان مرهق... وتعبان....ياربييييي...وش اللي قاعد يصير من حولي...عفرا...وكأن ميت لها احد...ما تطلع من غرفتها... ما تاكل...لبسها يقرررف..شعرها يقرررف...عيونها محمرة طول الوقت...وبس تقلب عيونها تطالع بالتقويم والساعه....
عمتي نورا...اليوم كله من الغدا وهي ميب على بعضها..بس اطقطق اصابعها...وتمشي كثير على غير هدى في البيت..تفتح علينا غرفنا تطل علينا وتروح...ياليته فيني ولا فيك يا عمه...
فجأة قالت عمتي نورا: طلبتك يا ملكه....
طالعتها وترددت ما ادري وش اقول: امري...
عمتي نورا: ما يامر عليك عدو...قولي تم....
رديت بتردد اكبر وعلامة استفهام كبيرة قاعدة تشق مخي: تتتم...
تنفست عمتي نورا بارتياح وقالت وهي تمسك يديني بترجي: كلمي سلطان...
: عمه!!!!
عمتي: واللي يخليك لي...يا ويلي ولدي له فتررة مابان...
قلت بتردد: طيب...وش بايدي اسويه؟؟؟
عمتي نورا وعيونها غرقانه دموع: ملكه....انا سلطان ما اقدر على بعاده...والله قلبي متقطع عليه.. ووافي ومساعد ماقصروا...بس هالولد اختفى...كأن الارض انشقت وابلعته...
سكتت لحظات وكملت وهي ترفع عيونها للسقف: وافي...قالي...انه خلاص...بينتبه لاشغاله...لأن ماعنده وقت يضيعه...على...على...( وبكت بحرارة) على مراهقيييييين...
حسيت بكره كبييييييييييير لوافي...عما...وش ذي الاخلاق...بدل ما يقول لخته..مرجعه مرجعه الله لا يعوق بشر...بكل ببرود يسب سلطان ويقول عنه مراهق...
التفتت ريما علينا وقالت بجزع: ماما؟؟؟!!!!!!!
مسحت عمتي نورا دموعها بالمنديل وابتسمت ل ريما...اللي رجعت مكانه وقالت تكلم عروستها: دايم كذا..
مسكت ايد عمتي نورا وقلت بحزن وتقدير: تبيني انا وعفاري نروح ندوره؟؟؟؟
قالت وهي تبتسم بالم: الرجال مالقوه...انتم شلون بتلاقونه...
وكملت بتردد: ابيك...ابيك..( وقلبت عيونها كثير) تكلمينه...
: نععععععععععم؟؟؟..عمتييي...
قالت عمتي بسرعه: انتي قلت تم...اه...الله يخليك...قوليله...انك تحبينه...وان البيت دونك ولا شي...
صديت عن عمتي...اكيد عمتي مجنونة....لالالا...لا يمكن تكون جديه بكلامها...فيه عمه تطلب من بنت اخو زوجها...انها تكلم ولدها وتغازله...لالالا...اكيد اني فاهمه غلط...
وقفنا عن الكلام لأن السواق وقف...عدلت عمتي نقابها ونزلنا..واحنا ياله نمشي..مالنا نفس بشيء...

رجعت البيت...وخفت ان عمتي نورا...تكلمني بموضوع سلطان من جديد...عشان كذا سويت حالة استنفار.. وقلت للشغالات يطلعون الفرش فوق...عشان نفرشها...واسرعت وراهم عشان عمتي ما تمسكني من جديد وتبكي عندي...في الغرفتين حقت الضيوف...وحده فيها سريرين...والثانية فيها سرير مزدوج...حطينا المفرش الابيض اللي بورود زرقاء وسماوي...في الغرفة حقت السرير الواحد...والمفارش الاورنج...على السريرين...وجت ريما..وتبرعت ببعض العابها كديكور للغرفة...قلت لعايشة وانا اخذ الورد البلدي منها....:حطي بغرفة ولد.." قالت عايشة: كلوا ولد...ولا بس ولد جديد..." فكرت للحظات وقلت وانا اصد عنها بحركة طفولية غبية: لا...بس ولد جديد.." واعطيتها المفرش الابيض عشان يحطونه...رتبت الورود والريحان بفازة كريستال كبيرة...ورميت شوية حصى باسفلها... واخذت من تولات العود والمسك اللي بحمامي وحطيتهم بسلة خزف صغيرة مع صابون ملون وبطاقة ترحيب كتبتها بنفسي بالحمامات حقت غرف الضيوف..وخليت الشغالات ياخذون الفازة الكريستال الثانية اللي زينتها بنفس الطريقة والسلة الخزف لغرفة الولد او الاصح الرجال...

**اناغيم** · 13-07-2009, 08:05 AM

الساعه10:00م

دق جوالي...شفت البدوي يتصل بك...ضحكت هذا محمد وهو اللي مسجل اسمه بجوالي كذا..
محمد: الو...
: الوووووو( بدللع عشان ارفع ضغطه)
محمد بصوت معصب: لحووووووووول....
: وشوووو؟؟؟؟ يعني حرام ادلع على خطيبي...
محمد وهو يصارخ: خطيبك بعينك!!!
: اه...خلاص زززئلت...اهىء اهىء
محمد: الله من البلشة....اخلصي...بسرعه...
: ا..ا...
محمد: وش اللي ا؟؟؟!!!
: ( قلت بدلع زايد) يعني لاءا..
محمد: اففففف...تبين تاكلين ولا لا؟؟؟
: إلا..
محمد: طيب...انا بروح لاقرب مطعم بيتزا بالقاه...تجين معي؟؟؟
( نطيت من الفرح خصوصا ان جو البيت خنقه وكتمه وزهق): اييييييييييييييه...
محمد وهو يضحك: هههههههه...الله منكن يا الحريم....روحي اخلصي وجهزي ريما معك...
: ولو...من عيووووووووووووني...يا اغل...
طوط..طوط..طوط...طوط...
ضحكت بقوة يا حليله سكر الخط...اوريك يا محمدوه...
قمت من سريري..وسكرت الستيريو....ولبست عباتي....واخذت شنطتي وشيلتي....طلعت من غرفتي وقفلتها زززين..ورحت دقيت الباب على عفرا: عفراء....عفررا
ولا اي رد...ولا كلمه...والله ماهيب طبيعية...
: عفرا...عيوني....انا باطلع...تعالي معي..
ولا رد...ولا حتى نفس....
: ترا الطلعه من غيرك وعععععع...( نفس الجواب)
حاولت افتح الباب...مقفول...دقيت عليه بصوت عالي...نفس الشيء...سكوووت...قلت بتردد: اكيد نايمه ورحت لغرفة ريما...
لقيت ريما تمشط شعر الباربي حقتها الهندية....
ريما: ليتني حلوة مثلك..
انا وانا شوي واضحك على خبالتها:ريما...بتجين معي؟؟؟؟
ريما وهي تنط: وووين؟؟؟
قلت وانا ابعد عن باب غرفتها: لمطعم البيتزا...
ريما: طيييييييييب انتظررررررري...
رجعتلها: ليش؟؟
قالت وهي تدخل غرفة ملابسها: بغير ملابسي....
لحقتها على غرفة الملابس..وبعد اخذ وعطا...قررت البسها فستانها الجينز المطرز بورود حمر...وبوت احمر وربطه حمرا على شعرها...عشان تصير مثلي...ونصير كاننا خوات...( تفكير طفولي بحت)...ولا بتفل شعرها بعد وودها تلبس عدسات..بس قلتلها: طيب...احاول اقنع عمي...بس بسرعه خلصي...
طردتني من غرفتها...عشان تلبس..ونزلت تحت عشان اطلع لمحمد...عند اللكزس برا...
ماكان موقف قدام البيت عرفت انه موقف ورا...فرحت اخذت لفه طويلة بالحوش عشان اوصله..عند مدخل النافورة...طبعا...الوقت ظلام..والانوار نصها مقفلة...فأنا كنت امشي بسرعه ونظراتي وراي عشان لو احد يلحقني او شي زي كذا...
(ايي.....) هذا صوتي اللي لحقته.... صرخة مكتومة وبعدها( ماتشوفين قدامك يا مره؟؟..) رفعت راسي...مو قادرة اشوف مع الظلام... يا ربييييييييييييييي...صدق هذا مفسد الافراح..يعني كل مابكون مبسوطة راح اشوفه...قلت بعصبية وانا اعطيه قفاي عشان اعدل غطاي على وجهي زين( والله ما ادري مين اللي مايشوف يا الاجودي؟؟؟) طلعت منه اهة قهر...وقال بصوت مكتوم متنرفز(ماخبر...بناتنا ياخذون ويعطون مع الرجاجيل!!) تنرفزت من رده وقلت بحرارة(لا تغير الموضوع!!) قال وهو يضرب كف بكف( طيب...) وكمل وانا ارجع اعطيه وجهي(ممكن امر؟؟) حمر وجهي من العصبية وقلت بصوت مرتفع( وانا منعتك يا استاذ!!) قال وهو يضحك بسخرية وعيونه تلمع مع الليل(لا ابدا...بس واقفه معترضه الخط...لا اخذه اليمين ومريحتنا ولا اخذه اليسار وفاكتنا من شرك..) طالعت فيه من فوق لتحت...وكملت طريقي من جنبه بسرعه...وبعد يتكلم كانه يعرفني هو ووجه...صدق ما يستحي...صدق مافقلبه رجوله...وإلا ماكان قام ياخذ ويعطي معي وانا مانيب من محارمه!!!!!!!!

كانت الطلعة للمطعم تسد النفس مع محمد وريما...اللي اخذوا يتناقرون وقلبتها ريما مناحه علينا...ماقدرت اكل اي شيء..كل تفكيري بهالمجنون..وافي..يا ثقل دمه...والله انه ما يستحي...ولا ....يكلمني كان بيني وبينه عشرة عمر..مو اقل من اسبوعين وعمري ما كلمته..بس الحق ينقال..عليه رزززه معتبرة...ولا بكل الرجال... ومشاء الله العطر اللي إلا الان لاصقي بشيلتي وعبايتي...حمرت خدودي يوم تذكرت اني ضربت بصدره..يلعن ابو الفشله..بملكه بدرية شافني متفصخه... وبالصبح.. شافني بذاك اللبس الكاشف لكل شي..ولا قبل شوي...لزقت فيه وطحت بحظنه... ضربت جبيني فجأة..وقلت بصوت مرتفع ناسية نفسي: يا فشلتك والله!!
ريما وهي تاشر علي وتضحك بعد ماراقت شوي: زي عاشه....
محمد يطالع فيني وكأنه تذكر شي يضحك ومات ضحك هو وريما...
قلت اسوي نفسي معصبة: خلاص...مافي لوحه مرة تاني....
قال محمد وهو يحاول يسكت: لو شفت وجهك وانت تكلمين بصوت عالي زي عايشه يوم تحلطم...
ابتسمت لهم...وشوي تذكرت وجه عايشه يوم تحاكي روحها...والله العشرة اثرت فيني وقعدت اضحك معهم غصبا علي...

رجعنا البيت...بعد ماخذنا وجبات من ماكدونالز لكل الخدم والعيلة..حطيت حقت الرجال بالمطبخ الخارجي.. واللي تخص عفرا وبدرية وعمتي والشغالات...بالاوفيز..، رجعت غرفتي...وتروشت..ولبست بيجاما لونها كحلي فيها قصب فضي خفيف..ومشطت شعري لين مانشف...وتركته وقعدت ادهن ارجولي بكريم...واسويلهم مساج...

لحظات ودخلت عمتي نورا علي وانا خلاص على وشك اني اخلص مساج يديني...طالعتها...وحمر وجهي.. قالت وهي شكلها مرهقه من كثر الصياح...: ملكه الله يخلييييييييييييييييك....
قمت لها على طول ورحت ضميتها بقوة: عمتي نورا...هدي عمرك الله يعافيك...
عمتي نورا وهي تبكي: ما اقدر...لازم اشوف سلطان لازم اشوفه....
وكملت وهي تصيح بقوة: قلبي قابضني...حاسه اني بموت قريب.. وما راح اقدر املي عيوني منه ومن وجهه الحبيب..
واخذتها وجلستها على السرير..وقلتلها: عمتي...ليش تقولين كذا؟؟..فال الله ولا فالك...
عمتي نورا وهي تمسح دموعها: قلبي قابضني يا ملكه...انا ام واحس بعيالي...والله احس فيهم....
وكملت بحزن منهار: انت...بالنسبة.. ل سلطان شي فوق ما تتصورينه...
دمعت عيوني وقلت وانا مابي اصيح: وسلطان غالي عليا...
عمتي نورا واهي ترجع شعرها ورا اذنها: مو مثل حبه لك!!!
سكت ما عرفت وش ارد.... وكملت:ملكه..الله يخليك...قوليله..اكذبي عليه...وخليه يرجع...
قلتلها وانا ابكي: ما اقدر...ما اقدر اكذب عليه...صعععبه...
عمتي نورا واهي تنهار وتتمدد على سريري: لالالا....لالالا..الله يخليك لا تقولين صعبه...
قلت وانا احك جبيني ووجهي مليان دموع: تخيلي موقفي..وإذا عرف اني كذبت...
عمتي نورا واهي تعصر مخدتي بين يدينها وتضمها بقوة: في ذاك الوقت فيه مية حلال...بس اهم شي يرجع ولدي...حرام عليك...ولدي يحبك...يحبك يالناكرة....!!!!!
طلعت للوفيز منهارة بعد كلمت عمتي نورا...انا ناكرة...انا...ليش؟؟؟....طيب وش سويت؟؟؟ عشان ينقال عني كذا....انا اللي بكيت على سلطان اكثر مما بكوا خواته....انا اللي دعمته كثير...ووقفت معه كثير...حتى اني ياما وقفت ضد عمي علشا انه.... انا اللي قلت لعمي كلام ما ينقال علشانه طرد سلطان....نزلت دمعه حارة ومرة وتحرررق على خدي...واتبعتها دموع ثانية.......وقعدت ابكي بحرارة..وانا احط ايديني على عيوني واتمسك بالطاولة اللي قدامي.. تذكرت سلطان...سلطان يوم يبتسم...سلطان يوم ينكت...سلطان يوم يتاثر...سلطان يوم طلعت معه انا وعفرا عشان السيارة..سلطان يوم استقبلني بالمطار ... سلطان يوم يتغزل فيني...سلطان يوم قرالي الشعر اللي اكتبه لي...سلطان يوم يلعب كوره صوته وفرحته وضحكته تملا الدنيا....سلطان...انا السبب باللي انت فيه....سامحني يا الغالي... سامحني..اخذت كاسه كانت قدامي و رميتها على الارض بعصبية....وتكسرت لالف قطعه صغيرة...طحت على الارض..وما اهتميت بجروحي .. وقعدت ابكي واشاهق بصوت مكتوم... تذكرت الكابوس...الكابوس...انا احرقته...انا احرقت قلبه... احرقته..احرقته...احررقته....يا ربيييييييييييي ارحمني.....اه....اه يا قلبيييييي..مسكت صدري بقوة...بسبب الالم اللي اخذ يزيد جواتي....لمست القزاز بايدي بتردد...وضغطت عليه بعصبية...ابي اعاقب نفسي....لازم اعاقب نفسي.. انا انسانة سيئة...سيئة....صرخت بصوت عالي: يببببببببببببببه ... يممممممممممم مممه ...ليش رحتوا وتركتووني.....انتم ماتحبوني والله...والله ماتحبوني....خالد.....خذني معاك"وقعدت اضرب يديني على القزاز بقوة...واشوف الدم يتناثر....يتناثر بكل مكان...ليتني مت..ليتني مت...ليش؟؟؟...ليش انا اسبب الالم للناس...ليش ما اكون السعادة بحياة من حولي؟؟؟... ليش انا الناكرة؟؟...ليش؟؟... والله مو قاعده احس بالالم...اللي فيني اكبر من اني اتالم...اه.. .ا اه... .حاسه روحي مثقلة مجروحه ... تعبانه... يالله وش كثر التعب النفسي يهد الواحد...وش كثر يجرحه....وش كثر يالمه...مسكت القزاز بايدي وضغطت عليه بقوة.. ودموعي تطيح على جروحي وتحرقني بقوة...يارب يكون قزاز متسمم واموت يا رب اموووت.... حسيت بالقزاز يدخل بيدي...ابتسمت بسخرية....لكن ما طالت هالبسمة....لأنيصرخت صرخة بصوت عالي اخترقت الليل والصمت والسكون اللي كان يعم البيت بعد يوم مرهق..." ابي امووووووووووووووووووت....ابي اموووووووووووووت .... خلوووني امووووووو ووووت ..." سمعت صوت ركض...وصوت صراخ...لكن الدنيا غابت عن بالي...واختفى كل شي من حولي....ودارت علي الدواير

**اناغيم** · 13-07-2009, 08:07 AM

الفصل العاشر

لو يشتكي المظلوم وش في يدينه....من يرحمه لاهلت عيونه ادموع...
من يسمعه لي باح خافي كنينه...من هو يرد القلب لاصار منزوع...
مهما شكى قلبه وعقله وعينه...شكواه ماتنفع ولاهوب مسموع...
الله على كثرة اهمومه يعينه...قلبه غدا في روضة الهم مزروع...
زرعه ذبل من قبل وقته وحينه...صارت حياته هم واحزان ووجوع...
يوم انقطع حبل الرجا في يمينه...يسحب ولكن حبل رجواه مقطوع..
ماعاد باقي كود ذكرى حنينه...في خافق برق الرجا عنه ممنوع...
هذي معاناة القلوب الحزينة...مثلي انا لو صحت مانيب مسموع...

طالعت بوجهي بالمرايه....عيون غايرة....شفايف مبيضه... مظهر شاحب..مصفر..زي وجيه الموتى!!... ارتعشت شفايفي..ثلاثة ايام... جلست في المستشفى كنت راح انجن فيها...شلون لو جلست اكثر..!!!...وكأن الطبيب الجديد..ماصدق يمسك اول مريض يجيه.. يبي يتدرب علي حظرته...!!...طالعت شعري..اللي ما انمشط من ثلاث ايام...وسحبت المشط بهدوء من على المغسله...وقعدت امشط شعري خصلة خصلة...تذكرت الطبيب المجنون...تصوروا سوا من الحبه قبه...وقال ان معي مرض نفسي خطير...وان ايذاء النفس..ممكن يكون بسبب خلل في وظائف الدماغ!!..انا..وخلل..والله موب صاحي..
رميت المشط من ايدي..مو قادرة امشط شعري يالمني مرة..فيه عقد كثيرة...مثل عقد حياتي...متشابكة ومتشابكة...مثل كومة من الخيوط..اجتمعت ولا قدرت تفرق!!...طالعت بايديني اللي ملفوفة بشاش ابيض..ارتعشت..مثل ذاك القسم...القسم النفسي!!.. هزيت راسي بقوة.. وفتحت الموية حقت الدش.. ابي انسى.. ابر..ابر...ابر...على مدى ثلاث ايام..طول الوقت نايمه مو حاسه بعمري...ولا بعد هالثلاث ايام اطلع ومعي كومة منومات وحبوب اكتئاب..
لمست الموية المتساقطة البارده...مثل حياتي..من بعد فرقا الحبايب...بارده..خاوية...وكأنك بقصر كبير مهجور...تسمع لضحكاتهم واصواتهم بس..للاسف مو قادر تلقاهم..عارف ليش؟؟..لأنها اصوات الجدران اللي حبتهم..وضمتهم بين حناياها...!!..
خلعت ملابسي..الروب الابيض القطني...ووقفت تحت الماء المتساقط...القوي...اللي كانه بيخترق جسمي.. معقولة يكون هذا نوع ثاني من الاذى النفسي اللي حكى عنه الطبيب؟؟..لالالا..هذا ما ياذي..هذا بس يسبب الم بسييط...بسيط..مثل فرحتي بالرجعه لهالبيت..
غمضت عيوني بقوة..ابي انسى النظرة اللي طالعوني فيها يوم رجعت البيت...نظرة خوف...هلع..ذنب؟؟!!.. يمكن هالاخيرة بس بعيون عمي سعود وعمتي نورا.. لا تخافون تراني كويسة..بس تعرفون كلام الدكاترة.. ضربت على قلبي بقوة..انا اخاف..اخاف من الوحده...اخاف...ومع هذا...تركوني ثلاث ايام..ثلاث ايام بمستشفى كبيرة ولا...بالقسم النفسي منها...استمع لصرخات المرضى...واستمع لشكوى الممرضات في اخر الليل...
حطيت ايديني على اذني...مابي...مابي اسمع مابي...انا بس تمنيت اموت...بس!!..اموت..يا الله صار تمني الموت..شي مؤذي..مرض نفسي...مجنون والله مجنون...(الدكتور)..
طحت على ركبي....تلمست الماء..ضميته باصابعي...لكن...لا..قاعد يتسرب مني..يهرب...ماراح اخليك.. ليش تروح؟؟...ليش حتى انت ماتبي تجلس معي؟؟؟..ليييييييييييش؟؟؟
اه...اكرهك يا بدررية اكرهك..صدق انسانة حقيرة...رفست بلاط الحوض بقوة...فتعورت رجلي فصرخت بحقد فيه.." حتى انت تحبها وتدافع عنها.."..شوهت سمعتي...قالت للضيوف الجدد..بنات العم ناصر....اني مجنونة...واني خطيرة...وممكن اذيهم...وشفت...شفت الخوف بعيونهم..انا اخوف؟؟..ضميت روحي بقوة..وانا ائئن من الالام اللي مثقلة روحي ومضيقة خلقي...ليش يا بدرية؟؟..ليش؟؟...انت ماتخافين ربك..وينك ياعفرا عني؟؟...لكن وشاقول عن هالبنت...عفرا... عفرا...وش حالها؟؟..غادية سراب..شي ينشاف لكن ما ينقرب منه..تجي تطل على الكل وتروح لغرفتها...جسمها صاير انحف من اول بكثير..شعرها تحطه فوق راسها باي طريقة...عيونها مثقلة بالالام العالم كله..تطفر الدموع من عيونها فجأة وبدون سابق انذار..!! ليتك ياعفرا بحالتك الأولية..كان بكيت بحضنك..ما كان بكيت بروحي...بعيد عن العالم..بين اربع جدران..احسها تضيق وتضيق حتى تطبق علي..وتخنقني وتموتني!!

تلمست دربي للسجاده بتعب...اخيرا وصلتلها...بصوفها الناعم..وملمسها الدافي المريح...وريحة العود اللي ماليتها...لفيت شرشف الصلاه علي.. تمايل على جسمي بسهولة...والتصق بي...كأنه يقولي اشتقتلك يا ملكه لا تخليني...تميت اتنافض من البرد..والذكريات..والالام اللي تحوم حولي.. تالمني...تصرخ بي...وتطن براسي ... مثل اجراس الكنايس...طنين..يمتد ويمتد..وتشك إذا كان بينتهي بلحظه مثل مابدا؟؟
( الله اكبر)...بديت صلاتي وانا جالسه..صليت المغرب والعشا سوا..اصلا..طول وقت نومي..فصرت اجمع الصلوات تلقائيا...هذاني لي ثماني واربعين ساعه... من طلعتي للمستشفى...وحالتي الجسمية والنفسية تزيد سوء بسوء...
خلصت صلاتي..وجلست اسبح واكبر واستغفر...وادعي..ادعي لعفرا..وادعي لسلطان..لكن..مادعيت لنفسي!!...لا تسالون ليش؟؟..يمكن لاني متعودة افكر بالكون كله ولا افكر بنفسي..!!..في اشياء كثيرة تستاهل دعواتي اهم من نفسي...!!

اخذت حبوبي..وشربت كاسة ماء...ومسكت الجوال بايدي...كانت ايدي ترتعش..هالحبوب اتعبتني..مالي إلا يومين..واحس انها قاتلتني...جمدت ايدي بقوة على الجهاز...وفتحت الرسايل..لقيت رسالة..منه...اللي يفكر فيني دوم...سلطان!!..

لاباس انا يالغالية قلتها لك..من قلب يخلص لك يحبك ويغليك..ياليتني كنت المنوم بدالك..وليت المرض يابنت فيني ولافيك!!!

ابتسمت..سلطان...متى راح تكرهني؟؟..متى؟؟؟..ياربي...ارحمه من حبي..وخله يلاقي البنت اللي تستاهله.. ماهو من نصيبي..والله ماهو من نصيبي..غمضت عيوني..للحظات...رجعت فتحتها...لا!!..اكلمه؟؟؟..ارده للبيت..اغامر..بس..بس راح يكرهني..راح يكرهني..لا تقولين لا...راح يكرهني..لأن..لأن التلاعب بالقلوب حرام...جريمة...جناية...يحاسبنا عليها رب العالمين..انا ابي الناس تدعيلي بالخير..مابي احد يدعي علي ..يوووه..هذا مو وقته.....مابي انوووم..لحظه...ب..س..ا...بي..

**اناغيم** · 13-07-2009, 08:10 AM

الساعه2:00م

صحيت على صوت عفرا..كانت تهزني بضعف.....فتحت عيوني ببطء...عفرا!!!" وشووووو؟؟؟" قلت بملل وانا اميل للجهة الثانية من السرير....قالت بصوت اعياه البكى" نشششي..." سفهتها....كملت واهي تسحب عني الفراش" يلا....الغدا جاهز...." التفت لها بياس" بس شوووي..." قالت وهي تصد عني عشان تطلع" مالي شغل...انا بروح اتغدا...وباباتي يقول..لو ماييتي ماراح ياكل..." نفضت عني الفراش وقلت وانا اشوفها تطلع" شكرا على سدة النفس!!..." اففف منك يا عفرا...ليتني اصفقك بس...قفلت باب غرفتي وخلعت ملابسي..وطرت على الحمام..اخذت شاور سريع عشان اصحصح...من هالنوم اللي ماليني...خصوصا ان عيوني مليانة نوم..الله يقطع هالحبوب جننتني...ايييييي...دخل الصابون بعيني..غسلت عيوني زين...وكملت حمامي...وطلعت...

مشيت للغرفة الطعام...اللي خاصه بالعيلة.. قالتلي عمتي نورا..انهم غيروها عشان يزيدون عدد الكراسي!!... دخلت الغرفة...وانعكست صورتي على المراية الكبيرة المقابلة الباب..على الجدار الثاني...انصدمت من شكلي...لها الدرجه انا نحفت...من ثلاث ايام صرت كذا..
سمعت صوت عمي يقول بحنان: ملكه حبيبتي....تعالي اجلسي!!.." ابتسمت له..وجيت جلست جنب ريما...اللي قالتلي بصوت واطي" عيونك حملا...(حمرا)..." رديت عليها بهمس: والله؟؟" قالتلي وهي تهز راسها بعدم رضى" ماحطيتي الكليم(الكريم) اللي اشتريتلي مثله...؟؟" قلتلها بنعومة وانا اضحك بصوت واطي" يوووه..نسيت!!.." علا صوت بدرية بهاللحظة" مانعتقد ان في شي يضحك.." رفعت حواجبي وقلت وانا اخذ صحن فاضي" في اشياء كثيرة في هاللحظة تضحك يا بدرية..." طالعتني بدرية بغرور...ولفت شفايفها المليانه روج احمر" ايييه...صح.." وكملت بصوت خافت ماسمعوه اللي على الطرف الثاني من الطاولة" للمجانين بس!!"رفعت عيوني لها...جرحتني كلمتها!!...فعلا جرحتني....انا مجنونة!!...انا..انا...بس تعبانة شوي...نفسيتني تعبانة...كان عندي كل شيء...فجأة صرت بلا شيء...ليش ماتعذروني ياجماعه؟؟.. ليش؟؟...، لاحظت نظرات سماح بنت العم ناصر لبدرية...كانت تطالع ب بدرية بنظرة غامضة.. او يمكن مشفقة؟؟؟..ما ادري...مو هذا المهم هالحين..ولا؟؟؟
حطيت بصحني...شويت لحم...وشوية سلطة...وصبيت كاس عصير برتقال...قعدت اكل سلطة...ولاحظت بطرف عيني ان كل واحد يسبح ببحره الخاص...عمي سعود...وجهه وكأنه كبر عشر سنين...عمتي نورا...وفيها انكسار غريب...الوجه المشرق الجميل..تغير..صار كله عبوس...وحزن...ايه حزن...حزن ضللها بضلالة سودا...غريبة...حتى انها صارت غير مرئية...بجلابيتها السودا وشعرها الملموم باهمال عن وجهها...عفرا..اه..وش اقولكم...الضحكة اللي كانت تعلى وتعلى في يوم...انخمدت...وكأنها ضاعت... ضاعت بين الزحمة وماعد لها اي وجود....صارت بلا مبالغة...مجرد شخبوطه صغيرة بدفتر الايام...مالها اي معنى..لكنها موجودة وبس...لا تئن ولا تتكلم ولا حتى تناظر باحد...محمد...يحاول ياكل السلطة غصبا عنه...لأن عمي غاصبه ياكلها....وتشفون وجهه الطفولي...وهو يحاول..يكابر..لكن ما يقدر يدخلها فمه!!... ريما...مثلي بالضبط...تطالع في الوجيه اللي حولها وبراءه رائعه مرسومة فوجهها الحلو...مرسومة بشفايفها الحمرا الصغيرة...بعيونها السود الواسعه...بخشمها الصغير..الناعم...، بنات العم ناصر...شقول؟؟...شقول عنهم؟؟...مكسورات يا قلبي....ابوهم مريض في امريكا..يصارع الخبيث...يا غالب يا مغلوب!!، وامهم معاه بالغربة...تساند زوجها..توقف بجنبه..تدعمه بحبها وحنانها واهتمامها...الاهتمام..وين سمعت هالكلمة من قبل؟؟ تصدقون اني انرميت ثلاث ايام بالمستشفى..النفسي..هذاك...وماحد جا يسال عني...كأنهم ماصدقوا افتكوا مني....وش تتوقعون الجرح اللي احسه..جرح أخذ يعزف بقلبي على كيفه..يعزف ويصنع نوتة موسيقية اعظم من موسيقى بتهوفن!!.... ساخره... القوها الممرضات وكأنها نكته...(مجنونة...ياحرام...ايكد اهلها مفتشلين مايبون احد يشوفها معهم!!...)
فيه واحد...واحد بس...كان دايم معي..دايم يرسلي باقات ورد كبيرة...بالصبح وبالليل..كل ما انوم القاها..باقة حمراء كبيرة...عدد الورود فيها...عدد سنين عمري...مهتم فيني..من يكون؟؟...حاولت اعرف كثير..وسالت الممرضات كثير...لكنهم ماعرفوا يوصفونه...ماعرفوا يوصفون هالفارس اللي خلص محلات الورد وهو يرسلي يوميا على مدى ثلاث ايام بوكيه ورد عملاق الصبح وبوكيه ورد عملاق المسا...

طالعت حولي بعد فترة..اكتشفت ان الكل قام عن الطاولة إلا انا...قمت وانا اقول بصوت مسموع" الله لا يلومهم يوم يقولون مجنونة...صح مجنونة...مجنونة بصاحب الورد!!" طلعت من غرفة الطعام...وقررت اروح غرفة عفرا...وانا رايحه غرفة عفرا استوقفني..موضوع سمعته من ورا الباب المسكر( على فكره ترى التنصت عادة ذميمة تجيب العيد على راسك!!)
بدرية بسخرية: اقولك مجنووونة...
صوت ثاني( اعتقد انها ميران اختهم الكبيرة..تموت بشي اسمه بدرية...وهاذي اللي لاحظته وانا مالي إلا يوم بعد رجعة المستشفى زي ظلها تروح معها وين ماتروح):الله لايبلانا..حلوة ومريضة نفسيا...ههههه
بدرية بقهر: حلوووة؟؟..لا ياشيخة...مفارقها الحلا...وين الحلا عنها...وبعدين تعالي..ليش تحبين تغيرين الاشياء...هاذي مجنونة...مش مريضة نفسيا...فاقده الاهلية...فهمتي؟؟؟...
ميران بعدم اقتناع: بسس...شكلها..والله ما ادري...بس شكلها عاقلة...
بدرية وهي تعلي صوتها شوي: اففف..انت ليش مو مصدقة..؟؟بلاج ماكنتي هنا يوم بغت تنتحر!!...
ميران بحماس: عيدي المشهد من جديد...اضحك يوم اتخيلها...
بدرية بخوف: يمممه...كانت تخررع..تصوري ايدينها كلها دددم...وبعدين...اصابعها وععععع...الله يقرفها...قولي في انسان طبيعي يسوي كذا...
ميران بخوف هي الثانية: لالالا صح...اكيد مجنونة...شلون تضغط على القزاز بايدينها...

تحركت من عند الباب...وعيوني مليانة دموع...يعني راح يحملوني حمل هالشي طول العمر...غلطه...والله غلطه ووعدت الكل اني ما اكررها...وصلت عند باب عفرا...ادخل...بس هاذي بعد كئيبة...يله على الاقل اهي بيوم من الايام كانت تهتم فيني وبصحتي...لازم ما انسى او اتناسى هالشيء...
دخلت غرفتها...انفجعت من شكل غرفتها...كان اعصار دخل ودمر الغرفة...كانت فيه اوراق كثيرة متقطعة ومرمية بشراسه على الارض...و ظروف رسايل وباقات ورد مجفف... مسكت ورده مجففه متهشمة بقوة... بغيت ابكي...مسكينة...تهشمت.. ماعاد لها اي قيمه...مثلي انا!!...او..مثل عفرا...ورفعت راسي... سمعت صوت باب الحمام...طالعت عفرا.. يوم شافتني ركضت وضمتني بقوة...وقامت تصيييييييح...كان شكلها مرريض...وعيونها متنفخة بقوة وخشمها احمر...قالت وهي اتناشق" تعبانة يا ملكه...تعبانه" قلتلها وانا قلبي متقطع" طيب قوليلي...وشو؟؟ احكيلي..وش اللي متعبك؟؟؟" قالت وهي تبعد عني فجأة" لالالا...ما اقدر...ما اقدر.. تعبي اكبر من الكلام... اكبر من العالم.. من الكون..." صرررخت فيني وهي تاشر بحركات مجنونة" تعبي..تعدى درب التبانه ورحل لمجرات وعوالم بعيدة..بعدي عن ح..." وسكتت....وطالعت فيني واخذت تهتز بصمت...ودموعها مالية وجهها اللي كان بيوم جميل!!..قلتلها بحنان وانا اقفل الباب بالمفتاح" عفرا...انت خويتي...خلك صريحه معي..." سكتت عفرا وهي موطية راسها بين كتوفها... يالله..شوفوا الحزن شيسوي؟؟... كانت كأنها طفله صغيرة... مو حرمه بالاربع وعشرين سنة...حطت ايدها على فمها كانها بترجع...وركضت على الحمام..طالعت المكان اللي بفوضى...ورحت للاستيريو دخلت فيه CD لاغاني وائل كفوري.. وقعدت الم الورد اللي تكسر تحت خطوات عفرا...
طلعت عفرا...وصرخت فيني بهستيريا يوم شافتني الم الورد" وش تبغين؟؟؟...اتركييييييييييييييه.." فزعت من صوتها ورميت الورد كلها.. طالعتني وكأنها حست بالذنب...قالت بتوتر وهي تروح تجلس على الكنبة الحمرا
.." اسفه..اجمعيه..." طالعتها بتوتر..ورميت باقي الورد اللي تفتت بايدني ورحت جلست عندها وقلتلها بهدوء " عفرا....مو حال هاذي إللي انتي فيه..." طالعتني ببرود ورمت راسها على ورا وقالت وهي تضرب صدرها بقوة" دايم يهينا يا ملكه...دايم..." سكت...فعلا دايم يهين..ليت ربي ماخلق فينا احاسيس...صح ان الاحاسيس تشكل شخصيتك لكنها تنهيك وتدمرك بعد...ليش تعتقدون مدمن المخدرات يلجأ للمخدرات؟؟.. ليش معظم البنات المراهقات يحبون..ويعيشون قصص حب وهمية...ولا يراهقون بعد!!..وليش معظم ضعيفي الايمان ينتحرون!!....كل هذا بسبب الاحاسيس..اكرهها هي سبب بؤسنا والامنا...التفت لعفرا وقلتلها بصوت مازح" ترى...احم احم.. مايتحمل يشوف حبيبته بهالشكل..." وليتني ماقلت كذا...ضمتني عفرا بقوة..وانهارت تصيح وتشاهق بقوة.." انا بدونه ولا شي يا ملكه...ولا شي..." وكملت من بين دموعها وانا مصدومة" احبه..وربي احبه...لويطلب عيوني ما فكرت مرتين إذا باعطيه اياه اولا..." وكملت وهي تدفن راسها بصدري اللي تبلل بدموعها السايله مثل شلالات نياغرا..قوية...غزيرة...قاتله..." يكرهني...اهو يكرهني... يعتقد اني.." وسكتت ميب قادرة تقول شي..قلتلها وانا مو مستوعبه" شلون...عرررفتي؟؟.." قامت بعيد عني وصرخت بغضب" شفتي؟؟؟....ماحد داررري..." وانهارت على الارض.... مسكت ورد..وتاملته ثم..رمته " هذا منه.. هدية منه...قبل فترة....شوفي شلون مات...مات...لأن.." وكملت بهمس" لاننا انتهينا.." سكت شوي..وصوت وائل كفوري وهو يردد" ياحبيبي ئرب ليا!!..." يتردد بالغرفة.. غمضت عفرا عيونها بانهزام مرير...مثل اللاعب اللي عرف ان وقت المباراة انتهى وهو مو قادر يسوي شي..وهاذي البطولة اللي كان يحلم فيها من زمان... وماراح ابدا يقدر يحقق حلمه...ما عرفت شاقول... دارت افكاري بي..إذا جاسر..جاسر هو..اللي كان بالمطعم!!...يالله ليش كذا...ليش الصدف اللي في حياتنا معظمها سيء..سيء..تنهدت وانا اتذكر كلام ابوي..." مافيه شي اسمه صدفة عند الانسان المؤمن...هذا كله مكتوب.. مكتوب في الصحف المكتوبة.." قلت بهمس" العوض بالجنة..." ووقفت..عرفت ان وجودي ما راح يداوي جروح عفاري اللي قاعده تضم الورد بانهزام وهي تشاهق باقوى ماعندها...يارب البكى يقدر يريحها شوي..يقدر يداوي جروحها...

رجعت لغرفتي وانا تعبانة ومو عارفة وش اسوي...كل شي احسه ضدي..وش ذا البيت اللي انقلب بين يوم وليلة وصار من بيت عامر بالافراح لبيت الحزن عنوانه!!..تنهدت وتعوذت من ابليس....وجلست على طاولة الكمبيوتر... فتحت الاب توب..ودخلت على ايميلي... لقيت رسايل من سارا ومن سلطان...سلطان كالعاده كان مهديلي مجموعة اغاني..وبطاقات... وقعدت اقرا بايميل سارا:
حبيبتي ملكه،

وينك عسى ماشر؟؟..والله خفت عليك..اربع ايام لا تردين ولا تسالين عني...وكل مادخل على الماسنجر القاك اوفلاين...؟؟؟...قلبي قابضني مو قادرة انوم...قاعده انتظر اتصالك على احر من الجمر...الدنيا فقدت بريقها.. والشوارع ضاعت ملامحها...وبيتنا اكتسحه السواد....

الموووهيم...اخوي ريان بيخطب....بس يقول...انك بيوم وعدتيه انك تخطبيله...يله على يدك العروسة...ولك منه نص مهرها....هههه...لا تصدقين كثير...صديقة زين...نص المهر بينقسم بيني وبينك....

صديقتك الصدوقة...سوسو..^ _^

ابتسمت...عمر سارا ماب تنساني...مهما يصير....رجعت وكتبتلها كل الاحداث مع اغفال حقيقة دخولي المستشفى...كتبتلها على موضوع عفرا...وطلبتها النصح...ووعدتها افكر بموضوع اخوها ريان..

بالنسبة لسلطان... ارسلته صورة بيت مهجور وكتبتله " يهون عليك يصير البيت دونك كذا"

قمت من مكاني...ورحت غرفة الملابس...مشطت شعري من جديد وتركته بدون قيود... خليته متحرر...يمكن يحسسني بالحرية... زينت مكياجي...الموف...وتاملت فستاني الموف الصيفي...كان بدون اكمام...طويل واسع.. مخليني كاني بنت صغيرة فيه...ضيق بس على الصدر...ابتسمت لنفسي وقلت بتفاؤل" اليوم يوم سعيد.. وانا متأكده اني بعد شوي..بلقا حل يرجع عفرا لجاسر" وبعدت عن المراية بعد مارسلت بوسه لنفسي...

نزلت الحوش...بشوف ورودي...وحشتني...اكيد اهملوها وماحد اساقها بغيابي..اساسا اهي ماتقبل احد يسقيها غيري.....اول ماطلعت من باب الفلة..طالعت يمين ويسار ماشفت احد...قلت براحه...ماحد راح يتجرأ يطلع من الملحق...لأن وافي بنات ناصر موب محرم له ...والثاني يزيد انا وبنات عمي سعود موب محرم له...واكيد طبعا عمي سعود معطيهم العلم الصحيح... ارتحت بعد ماطمنت نفسي...ورحت امشي بهدوء وانا كل شوي التفت وراي..عشان لولا قدر الله احد نسى او شي زي كذا!!...

اه...صرخت بذعر وانا اشوف القطعه اللي ازرع فيها..ورودي...ورودي... كانت متقطعه بوحشية..الريحام والفل والياسمين متناثرات بكل مكان..والورد البلدي والجوري...متقطع من جذوره....جلست على ركبي لا شعوريا ...ياربيييييييي....متى صار هالشي؟؟...وليييييش؟؟...ليش؟؟...مديت ايدي ببطء...وتلمست الجوري اللي متقطع من..من لحظات بس...لأنه لسه طري وريحته منتشرة بالجو...حسيت بشخص يراقبني...فلفيت بسرعه وشفت خيال اختفى بسرعه...صحت بقهر..وحطيت ايديني على وجهي... وقمت اشاهق...وردي.. ليش؟؟ ليش قطعوه؟؟...وش ذنبه...ماتركوا ولا جذر بمكانه...كلها انتزعت...وكأنهم كانوا ينتقمون مني بهالشيء...

**اناغيم** · 13-07-2009, 08:14 AM

حسيت بخطوات وراي بس مالتفت...اكيد هاذي عفرا شافتني من شباكها..وانا منهارة...بس جمدت بمكاني وانا قاعده احس بشيء... لزج...رطب...ريحته كريهة... على اصابعي اللي مغطية على وجهي..شلت يدي ببطء عن وجهي...وكانت الصدمه.. ( اه) صرخت بجنون وانا ارجع وراي وانا جالسه على الارض( يمممممممممه) ارتفعت صرختي بالمكان الهادي.. العصر الكل نايم....الكل غافي موب داري عني...يمممه....كان كلب...كلب كبير...كلب رعاة الماني ضخم...طالع فيني الكلب...فصرخت وهو يقرب مني...(لالالالالالالالا)...سمعت صوت ركض...يمه هذا شلون دخل...؟؟؟ روح عني...وحاولت ابعد الكلب لكن ماقدرت... كان كبير....وإلا يبي يجي عندي....يلعب معي الاخ...وصلت لركن...ولا قدرت اتراجع. .. ضميت رجولي لصدري...وقعدت اهتز بمكاني وابكي...اكره الكلاب...اكرهها...اكره كل الحيوانات... وععععع... قرف.. قرب الكلب اللي كان يلهث ومو عارف وين الغلط؟؟؟..بس انا كنت حاطه يديني فوق راسي...وضامه نفسي بقوة.... سمعت صوت خشن امر" Come here.....Bobby" رفعت راسي بسرعه..اول مرة اسمع هالصوت...شفت واحد طويل...ضخم.. لابس بنطلون جينز...وقميص واسع...وشعره طويل..ولابس نظرات سودا كبيرة...من هالغريب؟؟... لاحظت ان الكلب ماكان وده يتحرك بس بالاخير راح لصاحبه...نزلت راسي من جديد وقلت وانا اشاهق" روح...ارجع...وراك" شكله ما انتبه لكلامي...فقرب مني..مرة وحسيت بايده على كتفي..ارتجفت....اه اول مرة يلمسني شخص غريب......بس يمكن لحظات!! ...او اقل...رمشة عين...إلا وهو طاير على الارض...رفعت راسي بفزع.. كان وافي واقف... وقال للثاني الطويل" لا تقرب من محارمي!!.." ووقف قدامي..عشان يغطيني بظهره وثوبه عن الغريب!!...قام الثاني وهو يترنح من على الارض المبللة الطينية...واللي تاكدت انه يزيد...وطبعا انا اشوف هذا كله من فتحه صغيرة...بين الجدار وثوب وافي الي ريحته دكت حصوني واقتحمتني بجنون...قال وهو يحك شعره"I'm sorry...I did'nt mean s.."قاطعه وافي بعصبية" مو مهم...روح...عطنا ظهرك..." طالع فيه يزيد وكأنه موب مستوعب وبعدين قال وهو يسحب بوبي من الحبل اللي مربوط برقبته...ببرود" اخلاق يا الاخو...اخلاق..." وراح من مكان ماجا؟...لاحظت ان وافي ينتفض بعصبية...
قلت وانا مستوعبه ان وافي موب محرم لي وان وقفته غلط قدامي رغم انه لسه مالف علي" لوسمحت!!.." وكأنه انتبه جا يلف...فصرخت فيه بجنون" لا تلف!!.." وكملت يوم شفت جانب وجهه وفمه مزموم بعصبية" ياليتك تروح ..." وبصوت هامس" من غير ماتلف..." لاحظت قبضة يده السمرا وهو يشد عليها...شوي و يكسر اصابعه من كلامي...وقال بعد لحظة ببرود جمد قلبي" الحركات هاذي ما ابيها في بيت ناس طيبين زي سعود..." وكمل وانا لسه مو مستوعبه وش قاعد يخربط ويقول" حركات الاغراء هاذي وفرتيها لمساعد وسلطان...وسكتنا.. لكن..." وصرخ بغضب وهو يلف علي" إلا الغرب..فاهمه...إلا الغرب..ماعاش من يوطي راس سعود بالتراب..!!" طالعته وعيوني مفتوحه على الاخير وفمي مفتوح...شفته وهو يطالعني ببرود...وراح...راح بكل بساطه...عطاني ظهره وراح..حطمني واهاني وراح...شهقت ببطء.. حاسه...حاسه بغثيان..بقررف...بقبضه باردة قاعدة تعصر قلبي...

اليوم الثلاثاء....الساعه 8:00م

قمت من النوم...وانا تعبانة...حاسه ان جسمي متكسرر...يالمني..واستغربت من هالشيء..يمكن كثرت نوم.. ايه اكيد...الدنيا ظلام...تلمست دربي للاباجورة اللي جنبي...فتحتها..بعد مالفيتها بعيد شوي..طالعت بالساعه...اففف..الوقت متأخر...قمت من على سريري والصداع قاعد يلعب براسي بشكل مو طبيعي.. يبرق ويرعد ويذبحني.. دخلت الحمام وغسلت وجهي زين... توضيت ببطء...وطالعت بايدي مفجوعه... كلها كدمات زرقاء وكبيرة...وش السبب..غريبة...ما اذكر اني طحت او تعورت...تلمست يديني ببطء.. اي..تعوور... هزيت راسي...صدق هالحبوب اللي اخذها تخليني ما ادري وين ربي حطني فيه...رجعت لغرفتي...وصليت...وقريت لي كم صفحة من سورة المائدة...وفكرت اطلع اشرب لي شاهي بليمون.. اخفف هالام المجنونة براسي... بس بالاول...رحت لبست روب اكمامه طويلة...عشان لولا قدر الله احد انتبه للي بيدي...
دخلت الاوفيز...وانا حافيه...حسيت بالبلاط البارد على رجولي..ارتعشت شوي...ورحت قفلت الشباك الكبير...حطيت الغلاية على النار...وفتحت الثلاجه طلعت منها حبة ليمون...وشوية زنجبيل أخضر...وقعدت على الطاولة وانا ماسكه سكين عشان اقطعها..سمعت حركة عند الباب...شفت سماح عند الباب واقفة..ابتسمت لها" هلا سماح..تعالي شاركيني بالشاهي.." دخلت سماح وشكلها كانت مستحية وقالت بصراحه" كل اللي في البيت نايمين...ماعدا ميران وروعه وبدرية طلعوا يتمشون مع يزيد.." ارتجفت وانا اتذكر يزيد ووافي!!...اه يا قاسي مو وافي!!..قلت ل سماح" هاو؟؟..طيب ليش ماطلعتي معهم..." تنهدت سماح وجلست قبالي" سواليفهم ماتعجبني...كله بس حش بخلق الله..." ضحكت من قلب على سماح..وقلت وانا اقطع الزنجبيل واقشره..." هههه...سبحان الله..فرق بينك وبين ميران..." قالت وهي ترجع شعرها الاسود ورا اذنها" اييه كل الناس يقولونه...يقولون....اننا شكليا وروحيا فرق السما عن الارض..." قلتلها وانا احط الزنجبيل بالكوبين اللي قدامي" طيب..كذا احلى..حلاوة الاخوات يوم كل وحده تكون متفردة...ومتميزة عن الثانية...مو كربونات ومنسوخه..." ضحكت سماح على كلمتي واخذت الليمون الاخضر وقطعته بالنص ورمت نص بكوبي ونص بكوبها وقالت وهي تطالع فيني" سبحان الله...شكلك مررة يختلف عنهم..." قلت وانا اقوم عشان اطفي النار عن الغلاية" صح...اصلا طالعه لأهل امي...وهم من قبيله ثانية...بعيدة عن قبيلة العم سعود..." قالت سماح" اه..." وغيرت الموضوع" احس انك ما تضايقتي من شوفتنا...بعكس عفرا وخالتي نوره.." قلت بحرارة وانا اصب الموية الحارة بالكوبين" بالعكس...عمتي نورا لا يمكن تضايق من وجود احد..وعفرا بس مريضة هاليومين..ولا صدقيني مافي احلى منهم باستقبال الضيوف.." كملت سماح وهي تطالع باصابيعها بتوتر" حتى بدرية...اوكي ارتاحت لميران..لأن الطيور على اشكالها تقع..لكن..ما ادري..احس انها ما انبسطت بجيتنا..." قلتلها وانا اعطيها السكرية" لا تصيرين حساسه يا سموحه...والله ترى التفكير هذا بيتعبك.." سكتت سماح وأخذت تحط السكر بكوبها وهي تفكر...قلت عشان اشغل تفكيرها شوي" تدرسين؟؟..." قالت وهي تعطيني السكرية" لا...درست وخلصت..اخذت دورات تصميم في ايطاليا وفرنسا..وهالحين بفتلحي مكتب بجده..واشتغل لحسابي...تصميم ديكور.." قلت وانا احرك كوبي بالملعقة" طيب..مشاء الله حاجه حلوة..." قالت وهي تبعد غرتها عن وجهها" وانت؟؟..." قلت وانا اشرب شوي من كوبي" انا...كنت ادرس ترجمه انجليزي...بس وقفت دراسه..." قالت وهي مقطبة حواجبها" طيب.. ماحتكملين...؟؟" قلت وانا اهز كتوفي" إلا...بس انشالله السمستر الجاي...خلاص فاتني هالسمستر..." قالت وهي تقطب حواجبه وتحط ايدها فوق ايدي" الله يوفقك.." ابتسمتلها...وحسيت بسعادة ان في عفرا ثانية بهالكون...

**اناغيم** · 13-07-2009, 08:17 AM

اليوم السبت...الساعه 12:00م

مشيت مترنحه من الالام اللي احسها بجمسي..تعبان..متكسر...كله اثار ضرب..ازرق... بنفسجي... احمر.. وقفت تحت الدش البارد احاول انشط اقوم..وش هالام اللي تعابتني؟؟..وش سالفه هالحبوب؟؟..واثار الضرب اللي ماليه جسمي؟؟.. وش بيقول عمي إذا شافها؟؟..ماراح يصدقني...

تنهدت وقعدت اقرا المعوذات...واية الكرسي...وحاولت اريح اعصابي وانا تحت الدش..واسوي مساج لراسي... بعد ماخلصت...لبست روب الحمام...وطلعت من الغرفة...رحت فتحت ستاير غرفتي... وانتشر ضو الشمس داخل الغرفة الباردة..من المكيفات المركزية..ورحت لغرفة الملابس...طلعتلي فستان كحلي ناعم فيه نقط بيضاء....باكمام طويلة ويوصل لحد الركبة...لبسته...ونشفت شعري بالاستشوار...واستغربت ان جلدت راسي تالمني مررررررة...ربطت شعري على شكل ذيل حصان بربطة لونها ابيض..ولبست صندل كحلي عالي كعبه...وتعطرت من عطري المفضل الور من شانيل...

استغربت من ريحة العود اللي مالية البيت...صح متعودة على البخور...بس اليوم فيه شي مو طبيعي...كانت الستاير اللي بالدور العلوي كلها مفتوحه...والشمس داخله من كل مكان...والفازات اللي بالاسياب مليانة ورود طبيعية...والبيت كان يجنن...لقيت عمتي نورا بالطريق وانا على وشك انزل...وكانت لافه شعرها بمكر.....رحت لها وبستها على راسها... قلت وانا ابتسم بفضول" وش السالفه؟؟؟....مين العروس هالمرة؟؟؟.." طبعا قلت هالكلام لأني تذكرت خطوبة بدرية....ضحكت عمتي نورا وهي تضمني وقالت بفرح" وفيه كم عروس ببيتنا...بدرية ومتزوجه...وعفرا عايفة الزواج..." وكملت وهي تناظرني وانا مستغربة" انت هي العروس يا ملكه..." قلت وانا اعطيها ظهري" نعععم؟؟.." كنت مصدومة مين اللي بيخطبني..مين؟؟ ...و ليش انا؟؟؟..انا مابي اتزوج اساسا... قالت عمتي نورا وهي توقف قدامي" بيجون العصر ضيوفنا... وابيك تتشيكين وتلبسين احلى فستان عندك..." قلت بصراحه وانا احاول اخفض صوتي" بس.. انا مابي اتزوج حاليا..." وكملت وانا احط ايدي على حلقي" اهلي...ماكملوا سنة.." قالت عمتي نورا وهي تضمني" ملكه..سمي بالرحمن...يمكن ماتصير خطوبة او غيرها...كل اللي بيصير...ان هاذولي الناس اللي.. ساعدوك يوم صار الحادث..." حاولت اتذكر...وتذكرتهم...الرجال الشيبة وحرمته وبناته!!..صح.. عمي قالي عنهم قبل فترة وانه لسه يكلمه بين فترة وفترة...بس...!!!!...مابي اتزوج...مابي...قطع حبل افكاري صوت عمتي بدرية الفزع" ملكه؟؟...وش ذا؟؟؟.." قلت وانا وجهي صار طماطه" ها؟؟..طحت على ايدي وتعورت..." قالت وهي تمسك كفوفي..." احلفي..." قلت بعصبية وانا ابعد عنها" يوووه عمتي نورا...يعني بكذب عليك!!..." طالعتني بشك..وبعدين قالت وهي تشيل المبخرة بايدها" ياله روحي دوريلك لبس حلو..." وكملت وهي تنزل السلالم" وإذا بغيتني اساعدك ماعندي مانع..."

مريت بغرفة بدرية..ووقفت عندها..بتردد..وبعدين هزيت راسي وكملت الطريق للاوفيز عشان اسويلي فطور خفيف..وافكر شلون اقنع عمي اني مابي اتزوج..خصوصا...ان عقلي وقلبي في الوقت الحالي اخذين اجازة.. بعدين إذا لازم اتزوج...سلطان اولى بي من الاغراب..رحت للشباك حق الاوفيز ووقفت اطالع بالحوش.... اسمع اصوات السواقين والقهوجيه وهم يسولفون...اسمع صوت بوبي وهو ينبح...وعععع...لا شعوريا طالع بايديني...الله يقرفه...قلبي عورني وانا ارجع اتذكر الموقف السخيف اللي انحطيت فيه..الله حسيبك يا وافي على الكلام الجارح اللي تقطه بوجهي..كل ماشفتني..يعني احد قايلك اني ناقصه جروح...لفيت عن الشباك .. ابي اروح للثلاجه لكني سمعت صوت عمي سعود..فرجعت اناظر من جديد...عمي سعود كان لابس ثوب ابيض نظيف وشماغ احمر...ومعه وافي...عمرك طويل يالشيخ..فكرت بسخرية وانا اشوف..عمي متسند على النخله اللي وراه ووافي واقف على بعد متر تقريبا..وكان لابس بنطلون جينز وقميص ابيض ضيق.. كله رجولة يا ناس...والله رجولة..يعني شي ما ينقال...يعني الوقفة اللي واقفها بهاللحظة ولا افضل عارض ازياء ممكن يتقنها...والاحلى انها طالعه منه تلقائية وهو يسحب سيجارة من العلبة الذهبية اللي بايده"طيب...سالت عن الولد؟؟.." ارتعشت لاشعوريا..وانا اسمع صوته...رد عمي وهو ياخذ سيجارة من وافي" سالت..بس ما ودي تبعد عني...تعرف بنت اخوي..و محسوبة علي..و.."قاطعه وافي بشراسه" من حقها تتزوج...زوجها.." وكمل بصوت واطي بس قدرت اسمعه" صدقني...زوجها يا سعود...بكره ماتدري عن الايام وش بيصير فيها..على الاقل هي امانه برقبتك حاليا.. لكن إذا زوجتها بتصير امانة بايد غيرك.." قال عمي وهو ينفخ هوا السيجارة بضيق" هم مكلميني من اسبوعين.. وانا كل مرة اتحجج لهم بحجة..." واضاف بعد ثواني" اعتقد ان الولد شافها يوم طاحت بالمركز الصحي اللي بعقلة الصقور..." لاحظت ان وافي زم شفايفه بعصبية وقال وهو يدير ظهره شوي لعمي عشان مايقدر يقرا وجهه بسهولة" شافها؟؟..طي..طيب.. مو مشكله.." قال عمي بحرارة" بس ملكه مفروض تكون لسلطان..ولدي احق فيها من الغرب" قاطعه وافي بعصبية" وليش؟؟.." طالع فيه عمي وكانه مستغرب" وش اللي ليش؟؟.." وكمل وهو يرمي السيجارة على الارض ويدعسها بجزمته" كل اللي هنا عارفين..ان سلطان يحب ملكه.." مرر وافي اصابعه بشعره وقال بتوتر استغربته" يحب؟؟..لالا...سلطان مراهق يا سعود..يعني..بيوم وليلة مشاعره ممكن تغير.." قال عمي وهو يبعد عن النخله اللي كان متسند عليها" يسمع منك رب العالمين...مابي اكسر نفس ولدي..وصدقني.. لو ملكه اخذت سلطان..بتعيش ملكه بحق..لأن سلطان...عنده ان الحرمه...لازم يكون لها حقوق كثيرة... والولد.. متاثر بالديموقراطيه بزيادة...ههههههه..." ماضحك وافي وقال لعمي وهو يطفي سيجارته بعد" على العموم.. يصير خير..ان كان لها نصيب بواحد من هم..فراح تاخذه غصبا علينا.." هز عمي راسه وراح... بس وافي ضرب الارض بعصبية..والنخله بايده بقوة..وشفته يكلم نفسه بس للاسف ماقدرت اسمع وش يقول..

الساعه4:47م

اخيرا وصلوا ضيوفنا...سمعت صوت عمتي نورا وهي ترحب وتهلي فيهم....وانا فوق واقفه مع سماح وعفرا ومتنرفزة... ماودي اتزوج..والله ماودي..وهذاك الخسيس وافي...ايه..يبي يرتاح مني..لكن على قلبه...موب كيفه يقطني يمين وشمال.. قالت عفرا وهي تحاول تهديني" سمي بالرحمن يا ملكه...ماحد راح يغصبك على شي ماتبينه..."
سماح: صح يا ملكه...بعدين عيب...هذولي..هم اللي ساعدوك وانت وحيده..اقلها استقبليهم وانت مبتسمة...
عفرا: ايه صح..يعني تبينهم يقولون ان ال..ماعرفوا يربون بناتهم..
قلت بحرارة وانا انتفض: لالا...الله لا يقوله..بس..مابي اتزوج يا بنات افهمووني..
سماح وهو تقرص خصري: ياهوووه...لو يدري عن حبكم حبيب القلب...كان جايك راكب الهمر عشان يخطفك...
عفرا: هههههههه..يقطعك يا سماح...بدل ما تقولين حصان....تقولين همر...بنات اخر زمن..ماديات..
طالعت بوجه عفرا اللي من زمان ماضحكت: ايه صح...الهمر ازين من الحصان في الوقت الحالي...
عفرا: مانتي صاحيه...الحصان العربي الاصيل ممكن تتجاوز قيمته المليون والمليونين والثلاثة حتى.. لكن الهمر..هه..ما اقول غير...يا مقلب القلوب...اهدي ملكه وسماح لدرب الصواب..
: يا سلام...عشان كذا تقولين متى يجي راكب حصانه متى يجي راكب حصانه...
قاطعتني سماح:ياحظي...نحسبك تبغين اللي فوق الحصان اثرك تبين الحصان نفسه...هههههههه
انا وعفرا:ههههههه...
سمعنا صوت باب يتسكر...وشفنا روعه جاية لنا...طبعا روعه هي اصغر بنات العم ناصر...باول ثانوي تقريبا...مشاء الله عليها..مملوحه حيل..سمرا وشعرها بني وعيونها عسلية فاتحه..كانت لابسه فستان وردي قصير..
روعه: ها..وش عندكم؟؟
سماح: لا ابدا....نتكلم عن حصان عفرا
روعه وهي مفتحه عيونها على الاخير: حصانك!!!
ضحكت عفرا: ههههههه...حصان الاحلام لأن الحقيقي لسه ما انولد...
روعه : ها..ماعندكم سالفه..حمستوني..
بعدين التفتت علي وكملت: قمر يا ملكه...قمر...بس ليش متسترة بزيادة؟؟؟
عفرا وهي تطالعني: صح...غريبة ملكه...ليش لابسه جاكيت فوق الفستان..
سماح تدافع عني:يا ساتر..كليتوا البنت..هي حرة...( وكملت وهي تغمز لي) ماتبي اهل الزوج الحبيب... يسيئون الظن فيها...
ضربتها على راسها: صدق ماعندك سالفة..( والتفت على عفرا وروعه اللي ماتوا ضحك على شكل سماح) وانتم...يعني مستكثرين علي اتستر لو مرة وحده بحياتي...بيني وبينكم انا وجهي طايح من عمي كل ماشافني وانا متفصخه...
روعه وهي تقيم فستاني الابيض القصير اللي لبست تحته برمودا ساتان ابيض: بس الابيض طالع عليك روووعه...وشعرك مرة حلو شكله كذا...بس ليش ماتحطين مكياج اكثر..
عفرا وهي تطالعني: ماتحتاج بسم الله عليها..
قلت بغرور وانا الف عنهم: ماحتاج بسم الله علي...يله روحوا ماكلم شينات انا..( وسمعت اصواتهم وهم يضحكون ويحشون فيني وانا رايحه الاوفيز عشان اشيل كاسات العصير)

نزلت للضيوف تحت بعد ماطلعتلي عمتي نورا... وكنت مرة متوترة وادعي من قلبي اني ماعجبهم... مع ان امه يا حياتي..كانت طييييييييييبة مرة وحبوبة... وخمتني وسالتني عن احوالي وجلستني يمها...وكانوا معها ثنتين من بناتها...الكبار...اللي شفت بعيونهم التقييم الواضح لي...وشكلي اخذت خمس نجوم وزيادة.. جلست معهم تقريبا ربع ساعه بعدين استاذنت وقمت..وعلى قومتي ادخلوا ميران وبدرية وسلموا...وكانوا متكشخين على الاخير...لدرجة ان اللي يشوفنا يشك...مين اللي بتنخطب فينا؟؟...انا ولاهم؟؟...ما اهتميت كثير... لمن وصلت فوق...حكيت على السريع...لسماح وروعه وعفرا كل شي...
سماح: مشاء الله...امه شكلها طيبة مرة..
: والله انك صادقة...شكلها حنونة وحبوبة بعد...
روعه: انا مايعجبوني الامهات اللي زي كذا...ابغى امه تكون ستايل...مو كذا...
: بالعكس..يا روعه...الام او ام زوج بحنانها مو بشكلها وكشختها...
روعه بعناد: لا الام عموما باناقتها..ومظهرها..عشان تعلم عيالها الاهتمام..
عفرا: الله يالجيل الجديد..إذا هذا تقييمكم للام...على الدنيا السلام...
في هاللحظة وصلوا ميران وبدرية عندنا فوق..قالت بدرية وهي تحط ايدها على ايدي وتضغط بقوة" مبروك يا بنة عمي.." وسلمت على خدي بقوة...قالت ميران ببرود وهي توقف جنب اختها سماح" مبروك ملكه..." قلت وانا المس مكان لمسة بدرية اللي عورني" الله يبارك فيكم...وعقابلكم..."
روعه: ييييييييييه...ماحد اساسا يخطب هاذولي..كله حش بخلق الله..
عصبت ميران وضربت اختها بقوة على كتفها: احترميني..انا واقفه قبالك...
طالعت بعفرا وهزيت راسي بملل..وشفت بعيونها نفس الشي..قلت وانا ابعد مع عفرا" عن اذنكم.." سفهتني ميران اللي تتهاوش مع عفرا..اما سماح قالت" اذنك معك يا الغالية..." وراحت لغرفتها...ماوصلت لباب غرفتي..إلا وتدفني بقوة عفرا وتقفل الباب ورانا...قالت بعصبية" ملكه..وش اللي قاعد يصير؟؟.." قلتلها بهدوء" وش قصدك؟؟..." قالت بعصبية" اووووه...علينا...افصخي الجاكيت حقك.." سفهتها وقلت بعصبية" لا...وبعدين..ياليت لو تطلعين من الغرفة..." لفتني عفرا بقوة عشان اقابلها وقالت بصراحه" ملكه...يا ملكه.. ساعديني اساعدك...لا تدمريين نفسك بنفسك.." قلتلها بتوتر" انت وشفيك؟؟...اتركيني بحالي" قالت عفرا وهي تهز راسها" لا تعذبين عمرك....العلاج افضل من انك تشوهين نفسك بنفسك..." رديت عليها بعصبية" وشفيك؟؟..تحسبين اني مجنونة..." قالت وهي تمسك ايدي بس انا بعدتها" لا تقولين كذا.. يمكن اعصابك تعبانة شوي..." وكملت وهي تشوفني ملقية قفاي لها: اسفه يابنت عمي الغالية" وتركتني وعيونها مليانه دموع...انهرت على سريري..وقعدت ابكي فترة طويلة...مين راح يصدقني..اني فعلا ما ادري شلون هالاثار جايه على جسمي...اخاف يحكمون اني مجنونة ويرجعوني هناك مرة ثانية.... مافكرت كثير لأني تعبان مرة...رحت خذيت حبوب منومة ونمت بملابسي وبدون حتى ما اغطي نفسي...

قمت والظلام مالي الغرفة...واه...الام مو طبيعية بجمسي...صفقت مرتين..عشان الضو ينتشر بالغرفة.. وغمضت عيوني للحظات عشان اتعود على الضو..عيوني تالمني من كثر ماصحت..وراسي مصدععع.. واحس انه متورم بعد....بس بصلي..وبعدين برجع اكمل نوم...جيت اقوم من السرير..بس ما امداني اتحرك إلا...شي غريب..شي مخيف...لا يمكن يصير..مو معقولة...لالالا..شلوووون؟؟؟...انا ماسويت كذا..ماسويت كذا....وصرخت بصوت عالي" شلوووووووووووووووون؟؟؟؟؟؟.." وقعدت اصيح مفجوعة من اللي شفته...
الفصل الحادي عشر

لاح الحزن في ليله واجهر الشوف..يرعد ويبرق في النواظر سحابه..

تلمست ايدي مو مصدقة...معصمي..قاعد ينزف بغزارة..الدم غرق المكان من حولي...حاولت اقوم من السرير ماقدرت..من الفجعه...وقعدت اصيح بصوت عالي مو مصدقة..دم احمر غزير...قاعد يصب..ياوويلي راح اموت...راح امووووت... اه...ايييييييي..حاولت للمرة الثالثة اني اقوم..وصرخت بقوة اول ماوصلت رجلي للارض...كان في قزاز كثير متكسر..تحت رجولي..اه.... اوووه... حاسه بدوخه شديدة...لالالا ياربي مو قادرة اقوم او اروح..اربط ايدي...قعدت ادور جوالي تحت المخدة ووسط المفارش.. حتى لقيته..وعيوني مو قادرة افتحها من الالام اللي ماليه جسمي.. دقيت على عفرا....دق الجوال...رنة.. رنتين..ثلاث..بعدين...

عفرا: الووووووووو
: اه....الحقيني يا عفرا...الحقيني...
عفرا: ملكه؟؟؟...وشفييييييييييييييييييييييييج؟؟؟
: اىىيييي....اه اه اه.....
عفرا: طي...طيب..

رجعت اطالع بايدي وادور شي..اربطها فيه....مالقيت...وقعدت اصيح بحرارة...مو انا والله...مو انا الللي سويت بنفسي كذا..مو انا...انا لا يمكن احاول انتحر...او اقعد اذي نفسي...ليش اسوي كذا؟؟..انفتح الباب..طالعته...كانت عفرا..شافتني وصرخت: اه...
قفلت الباب وراها...وجاتني بسرعه....قالت وهي تمسكني مع ايدي: قوووومي....
رديت عليها وانا مو قادرة افتح عيوني اكثر: القزاز....القزاز المتكسر...هنا..
طالعت الارض...وراحت جري على غرفة الملابس...غطست فيها كم دقيقة...بعدين جات وهي معها....ايشارب احمر...وشبشب بنفسجي...لبستني الشبشب...وساعدتني اني اتحرك واقوم من السرير بعد ماربطت الايشارب بقوة...فوق معصمي على طول...كنت امشي بشوووويش....لأن رجولي مليانه قزاز ومو قادرة اضغط عليهم...واول مرة احس ان طريق الحمام طووويل طووويل..ترنحت بقوة..وانهبلت عفرا...." ملكه...تماسكي...قربنا نوصل...." وقامت تصيح بقوة....وتشاهق....وتقولي" انا اسفه....لهيت بعمري ولا سالت فيج...اسفه..." وضمتني بقوة..
دخلت الحمام وجلست على كرسي...راحت بسرعه...وطلعت عدة الاسعافات الموجودة بصيدلية الحمام...وجابت طاسه صغيرة عبتها موية حارة...وقامت تنظف معصمي....وانا مغمضة عيوني..مو قادرة افتحها..نقص الدم بجمسي...خلاني مو حاسه باي شي...وصرت اهذي....واخربط على عفرا...وقلت اسم مساعد لا شعوريا....رفعت عفرا راسها وقالت ببطء: مساعد؟؟؟...وش فيه؟؟..." مارديت عليها...صفقتني كف خفيف..." ملكه...ملكه...خلك واعيه معي...اصحي...مو وقته النووووم..." فتحت عيوني ببطء...شفت عفرا...شعرها الاسود الناعم منتشر حول وجهها....ومضلللها بضلالة سودا حزينة كئيبة...صديت عنها وقلت وانا اشاهق من الالم" رجووولي..." هزت راسها وراحت للصيدلية.. طالعت بعفرا وهي تدور بالصيدلية على شي...كانت لابسه روب نوم احمر قصير لحد الركبة...وعيونها منتفخة بزياده..
رجعتلي..ومسكت رجلي وقامت تطلع القزاز بسرعه...وتحط القزاز على منديل على الارض...وانا ماغير اشاهق واحط ايدي على فمي من قوة الالم....قدرت عفرا بعد ساعه تقريبا تنظف رجولي زين....واخذت الشاش ولفته عليهم....ولفته على معصمي....وساعدتني ارجع لغرفتي من جديد...
طالعت بالمفرش وهي ميب راضية....قالتلي" لالا....مررة مايصير...." جلست على الكنبة الفوشيا المخملية.. وتمددت... وهي راحت تشيل المفارش....الملونة....وقالت وهي تلتفت لي" بروح ادور لج مفرش نظيف....لا تنامين..ابيج بموضوع.." هزيت لها راسي...وانا مو عارفة وش تخربط...غمضت عيوني بتعب.. اوووووه ....احس اني مرهقه....وش راح يقول عمي لو شاف سريري وهو كذا؟؟..ولا بدرية.. وش راح تقنعهم فيه؟؟؟ اني مجنووونة....اكيد انا مجنووونة....ولا شلون اسوي هالشي بعمري...وانا مو دارية...اممممم..برتاح شوي بس...بس!!

**اناغيم** · 13-07-2009, 08:18 AM

الساعه 6:00ص

فتحت عيوني ببطء...وش هالصداع؟؟؟...اوف...حاولت اتحرك..وطحت على الارض..اي... وش ذا؟؟؟... تلمست الارض ببطء..وين انا؟؟؟؟ ...حسيت بحركة بالغرفة....انتشر النور فجأة...لقيت عفرا تطالعني... كانت نايمة على السرير...ابتسمت لي وقالت بصوت مليان نوم" اعذررريني....بس لمن رجعت كنت نايمة على الكنبة فما قلت لج شييي..." قلت وانا اطالع الكنبة: مو مشكلة..." وقمت من على الارض... قالت لي عفرا وهي تبتسم" بخلي البشكارات يحطون الريوق بالحديقة....ابيج بكلمه.." طالعتها بتردد وقلت" عفرا..عنجد مو عارفة شلون؟؟..." طالعتني وقامت من على السرير" مو مشكلة...المهم راحتج...يله..." هزيت لها راسي...ورحت دخلت الحمام...وهي دخلت غرفة الملابس...تحممت على السريع...ولفيت منشفه على جسمي...ولقيت عفرا مجهزتلي ملابس...اخذت القميص الاخضر الحريري...اللي اكمامه طويلة واسعه ونهايتها ضيقة على المعصم...والقميص..كله ضيق...وفتحته واسعه على الصدر..وبنطلون جينز ضيق...لبسته... ومشطت شعري زين..مع ان جلدة راسي كانت تالمني بششكل غير طبيعي...رفعته على شكل كعكه فوق راسي...ماحطيت مكياج...حطيت بس مرطب شفايف...وواقي شمس على وجهي وصدري ويديني.. ولبست شبشب ابيض...وكانت رجولي تالمني...ما اتوقع ان كل القزاز طلع...لازم اشيك بنفسي اليوم...!!

نزلت انا وعفرا للحديقة.. وكانت عفرا لابسه..فستان سماوي...قصير فوق الركبة...بدون اكمام او اكتاف وتاركه شعرها على طبيعته وحاطه جلوس وردي...وصلنا عند المسبح...وجلسنا حول وحده من الطاولات الخشبية الدائرية اللي منتشره حول المسبح...
عفرا بدون اي مواربة: وش السالفه يا ملكه؟؟؟..
طالعتها وعضيت على شفايفي واخذت نفسي عمييق) السالفه يا طويلة العمر...اني مو عارفة وش قاعد يصير من حولي؟؟؟
عفرا وهي تطالع بعيوني مباشرة: ملكه...حالج مو طبيعي...إذا انت مريضة...لازم نعرف...
: انا...قلتلك....انوم بسبب هالحبوب...وبعدين ما ادري وش يصير فيني؟؟...اقوم والقى جسمي فيه كل انواع الجروح والتمخيش والضرب....
عفرا وهي تقطب حواجبها باهتمام: من متى؟؟...
: من رجعت من المستشفى...
عضت عفرا على شفايفها وسرحت بالتفكير....
: عفرا...انا مبسوطة..انك اهتميت بحالي..رغم كل الهموم اللي حولك....
عفرا بابتسامة باهتة: ولو....احنا بنات عم قبل لا نكون حبيبات وصديقات....
: انا..( ومديت ايدي وحطيتها على ايدها) مهتمة فيك...انت..بنت..جميلة....ومحبوبة..ومن عيلة معروفة اقتصاديا واجتماعيا...فبتلاقين احسن من هالجاسر واطلق بكثير...
ابتسمت عفرا من جديد وقالت وهي تبعد عني وتروح تلمس الموية برجولها بعد مافصخت شبشبها: احسن واطلق من جاسر...مافيه.. لكن خلاص...انا ما اقدر اسوي شي...بنتظر...إذا جاتني هدية منه بالعيد...فمعناته لسه يحبني...أما إذا ماجاني شي...( والتفتت تطالعني) فمعناته...اني..انتهيت...( وسكتت لحظات وكملت بصوت متهدج) من حياته!!
كنت بتكلم...بس جووا الخدمات وهم ماسكين صواني بايديهم....حطوا على الطاولة كل اللي موجود...وراحو ... طالعت بالفطور...جبن...زبادي...مرتديلا...بيض عيون..اومليت..ستيك لحم خفيف...بان كيك بعسل... وحسيت اني مو مشتهية شي...بس صبيت لي حليب وشاهي وكمان لعفرا اللي رجعت تجلس...
حطيت بصحني بان كيك...وقعدت اكله ببطء..وانبسطت وانا اشوف عفرا قاعده تاكل وهي سرحانه... على الاقل اكلت مو مثل اول...تطالع بالصحون وتحركها... صوت العصافير روووعه..تغرد...وتسولف فوق راسنا...قعدت اتاملها يا حلوها...الوانها واشكالها غريبة عجيبه....تخليك تتامل بخلقة الخالق...طبعا محمد..كان دايم يرمي الحب على كل الحوش...عشان تنزل الطيور تاكل...فتشوفون الحديقة فيها من جميع انواع الطيور... وبيني وبينكم..انا اكررره الحيوانات...بس احب اتامل العصافير لكن امسكها لا...او اقرب منها لائين مو لا وحده...
عفرا: يا حلو..العصافير...تحسينها بررريئة...طالعي..هذاك اللي منقاره احمر...يجنن..
: فعلا...احسها برريئة...
عفرا بحماس: شوفي...شوفي..يتهاوشون على الحب...
ضحكت:ههههه....هذا ومحمد مو مقصر....
عفرا وهي ترجع تشرب شاهي: تصدقين ابوي اول كان كذا...بس هالحين تغير...ما ادري ليش؟؟
: عفرا...ممكن سؤال شخصي شوي؟؟؟
عفرا بهدوء: اكيد...يحقلك تسالين اللي تبين..
: وش فيها عمتي نورا؟؟..ليش مو مبسوطة بشوفة بنات العم ناصر؟؟؟
سكتت عفرا للحظات:خافت من المسؤولية...بنات مراهقات...جايين يسكنون عندنا لفترة الله اعلم كم طولها..
كنت بتكلم...بس شفت عفرا..تقوم من كرسيها بفرح..: Bobby.....come...come...
صرخت بفزع وقمت من كرسيي ومشيت على ورا:عفرا
عفرا وهي تبوس الكلب بفرح: وشو؟؟؟
: ابعدييييييييييييييييه من هنا...
طالعتني عفرا...وهو قام ينبح لي...مبسوط..عساه العلة...
: عفرا اللله يخلييييييييييييييييييييييك...
عفرا بخبث: تخافين منه؟؟؟
: عفرا...لاتطالعين فيني كذا...الله يعافيك
عفرا وهي لسه على وجهها الابتسامة الخبيثة:تراه حبووووب..ويحب اللي يخافون منه...
مشيت على ورا..ووقفت عند طرف المسبح...: عفرا الله يخلييييييييييييييك...( ودمعت عيوني من الخوف)
بس عفرا ما اهتمت وتركت الكلب....بعد ماقالته شي...باذنه...شفت الكلب يجيني ركض....
صرررخت بصوت عالي...وطحت على ورا يوم شفته ينط علي....والنتيجة اني انا والكلب في المسبح....الكلب قدر يطلع من جديد....لكن انا ما اعرف اسبح...حاولت اطلع نفسي...لكن ما قدرت...كتمت انفاسي....ويتهيأ لي اني سمعت عفرا تصارخ مفزوووعه...." ملكه..... ايدج....." تحركت يمين شمال...يمين...شمال...بس ما قدرت....جسمي ثقييييييييل مرة....والماء دخل بشمي وباذني وبفمي....والكلور مرة قوي....فاحس اني خلاص...احاول ادفع نفسي بقوة على فوق...لكن المسبح غووويط..
وداخل تحت الست امتار...حاولت اغلب الماء..لكن الماء اقوى مني....وكانت في حرب قوية بيني وبينه.. وانا اسمع صوت عفرا وبوبي المفجوع....حتى بوبي بهاللحظة حنيت عليه...وش هالتعب...اللي قاعد يصيطر علي...لالالا...مو انا اللي اموت بمسبح...لا...الجاذبية مرة قوية...قاعدة تسحبني لتحت..خلاص....شكلييي.. مت...مت.....بس ثواني زيادة.....واحس بجسم ثاني بالموية...يدين قوية مرة....رفعتني لفوووق....تعلقت بدون تفكير بصاحب اليدين هاذي..الحياه غالية....والواحد مايعرف قيمتها إلا بالمواقف اللي كذا...تعلقت فيه بقوة..جودت ايديني بقميصه...

حسيت بكفوف خفيفه على وجهي....وضغط على صدري بقوة...مرة..مرتين..ثلاثة...رجعت موية...كثيرة... وتحركت ببطء على البلاط المبلول....فتحت عيوني..والشمس كانت قوية..سمعت صوت بوبي...فخفت ... تحركت بسرعه ورفعت راسي...طالعت بعيون الشخص اللي قدامي...شعر طويل...عيون تطالعني بتامل ..خشم حاد... لحيه خفيفه...صرخت بعد لحظات وانا اغطي وجهي بقوة: اه...." وتخبيت ورا عفرا... ارتبكت عفرا للحظات وقالت بعد ما انتبهت" يزيد....ملكه...ماتكشف عليك...روووووح..." وشفته وهو يروح بسرعه....وشكله يقول وش هالبنت المعقدة؟؟...يممه..كان حاط ايده على بطني...صرخت مرة ثانية....وضربتني عفرا بقوة على كتفي...طالعتها وقلت بدون ما استوعب: انت مجنونة ...شلون تخلين رجال اجنبي عني....يشوفني..." قالت عفرا وهي معصبة وتمسح دموعها اللي قاعده تطيح من عيونها: ملكه...كنت تموتين تحت هنا.." واشرت على المسبح وكملت بعصبية: وانا رحت ناديت وافي...ويزيد بدون ما احس...كنت انادي كل اللي فيه...لاني كنت خايفه انج تموتين... ورميت نفسي عندج بالمسبح.. لكنج كنت ثقيلة فما قدرت عليج...جا..جا وافي...وطلعج بره....لكنك كنت دايخه ومو قاعدة تنتفسين... فرحت ناديتلج يزيد ....لأنه يفهم بهالامور...وبس!!" وكملت وهي معصبة: وبدل ما تشكرينه وتشكريني...صرختي بوجهه.." قلت وانا اوقف مفوجعه" اه...لا تقولين...لا تقولين سوالي... تنفس اصطناعي....لالالالا...لا" وقفت عفرا وقالت وهي ترفع يدينها فوق" ياربي لك الحمد...مصدقة نفسها البنت...هيييييي..تراه متعود على البنات الشقر الحلوات...ماراح يطالع فينا" قلتلها وانا قاعده اضرب وجهي" عفرا..تنفس اصطناعي...فاهمه وشو؟؟؟.. يعني..يعني... يوووه قررررف...وععع" وقعدت امسح فمي بقوة... عصبت وراحت وخلتني بالحوش لوحدي...طالعت ب بوبي...اللي كان جالس قريب مني وقلت بعصبية" بععد عني بسرعه... Go ...Go .." وتركته ورجعت البيت وانا قاعد اسب وادعي على عفرا الغبية...انا وتنفس اصطناعي الله لا يقوله...

**اناغيم** · 13-07-2009, 08:21 AM

الساعه12:30م

كنت جالسه في غرفة المعيشة اللي بالدور الثالث...انا وعمتي نورا..وسماح وروعه... انا كانت افكاري...بوافي...وانقاذه لي.. وبيزيد المسكين...اللي صرخت بوجهه...من غير حتى مافكر اشكره...لازم اخلي سماح تشكره نيابة عني...او اكتبله بطاقة وارسلها مع روعه...وطيب..وافي...وافي اللي...ارتعشت...يمممه..تمسكت فيه من غير ما احس..يا فشلهز.عاد كله ولا وافي...لو واحد من السواقين كان اهووون.. لأن وافي افكاره وسخه وقذرة...وغمضت عيوني..اذكر..كلامه اللي مثل السم...وافكاره الغبية والقذرة عني...

دق جوالي فجأة وعمتي نورا كانت قاعدة تقرا مجلة...وسماح وروعه يسولفون..طالعت بالاسم مو مصدقة...الاخو...من متى ما اتصل؟؟..رديت بلهفة..
: الوووو...مرحبا...
سلطان بلهفة: ياهلا براعية هالصوت ياهلا....
: ياهلا بالقاطعين ياهلا...
سلطان: ههههههههه...خلاص...راجع...راجع يا ملكه..
: صدددددددددق؟؟( والكل يطالعني مفجوعين من صوتي)...متى طيب؟؟؟..
سلطان: اممممممم...يمكن بعد اسبوع..اسبوعين..ثلاث..
: نعععععععم؟؟حمار ماعندك سالفه...
سلطان مسوي فيها عصبي: حماره انتي...مو انا...انا حصان...اسد...نمر...مو حمار( ويقلد صوتي)
: خلاص عاد...حصان...ارتحت...
سلطان: عندي لك خبر رووووووووووعه...
: والله وشو؟؟؟...( طبعا عمتي نورا تركت المجلة..وقامت تطالعني...)
سلطان: برجع البيت...اليووووم وبعد شوووي...
: نعععععععععم...للووووووووووليش...الف الصلاة والسلام عليك يا نبي الله محمد...لللووويش...
سلطان:فضحتينا...هدي...هدي خلاص....
( عمتي نورا..جات وسحبت الجوال مني)
عمتي نورا: سلطان يا حيوان....يا الدب....( وقعدت تصيييييييييح) ضميتها بقوة وهي تبكي....وتكلم سلطان كلام متقطع...وسماح وروعه يطالعون في بعض..وابتسموا...

البيت كان غير اليوم...كان كله فرح وسعادة...وريحة البخور منتشرة بكل مكان...والشغالات والطباخ مدهرين بالمطبخ اللي تحت...يسوون كيك وحلى باشكال وانواع...وفطاير...
وانا وعفرا وسماح وروعه بالملحق...قاعدين نرتب غرفة سلطان ونظفها...ونجدد المفارش حقت السرير حقه....
عفرا بحماس: انا عارفة ليش سلطان رجع....
طالعتها ورميت عليها خدادية صغيرة لونها موف..وقلت بصوت عالي: والله لو قلتي شي لضربك يا حماره...
تفادت المخدة بحركة سريعه..وقالت بصوت عالي وانا اركض وراها: تراه عشان موضوع خطوبة ملكه....الاخ عاشق هيمان...خايف تروح عليه...
ضربتها بقوة وخنقتها وهي تدافع عن نفسها...وبعدين انفجرنا ضحك وضمتني بقوة وقالت بصوت مسموع: لا تضيعين سلطان من ايدج...ترى السلطان ما ياخذ غير ملكه تليق بمقامه...
سكت ولا قدرت اتكلم...انا عارفة ان مافي مثل سلطان ابدا.. لا باخلاق..ولا بمقام..
التفت عشان ارجع ارتب السرير..لاحظت ان وجه سماح مبهت..وروعه..كأنها مصدومه...ولاحظت ان عفرا لاحظت هالشي..فطلعت من الغرفة ولحقتها بسرعه..
عفرا: وش السالفه؟؟...
: قولي..مين فيهم معجبة بسلطان؟؟
عفرا بعصبية: اقووول..اخوي..لو مابقى غير هاذول ماياخذ منهم...
: عيييييييب....وش هالكلام...ترى سموحه حبيبة...
عفرا وهي تتركني وتروح تدخل غرفة وافي: مايهم اي وحده فيهم...كلهم مثل بعض حبيبتي..
ترددت عند باب غرفة وافي... الابجورات مفتوحه...والغرفة مظلمه...وريحة العطر مليانه...وريحة السجاير...ولها نكهة خاصة...والاوراق...ممزقة بعنف وكانه قاعد ينتقم من حبيبته...الغجرية...تنهدت...وبالاخير قررت ارجع لغرفة سلطان اصرف لي واهون على قلبي...

" للوووووووووويش...لللوووووويش..." اخيرا وصل سلطان...كان لابس بنطلون جينز..وقميص بيج...وضم امه بقوة....كانوا كلهم متجمعين عنده قريب...في الحوش..قبال البيت...باستثناء بدرية اللي مانزلت له...
انا كنت لابسه جلابية حمرا...وفوقها الشرشف الاسود حق الصلاة...وبرقعي...وواقفه بعيد...في البيت ورا الشبابيك.. غرقت عيوني...وانا اشوف عفرا تضم سلطان بقوة وتشاهق...وعمتي نورا...وعمي سعود يسلم عليه ويعتذر له بحرارة....بنات العم ناصر كانوا واقفين وراي يطلون على المشهد...المؤثر وعيونا مليانه دموع...
سماح بتاثر: يابعد عمري...له كم طالع من البيت؟؟؟
: يمكن ثلاث اسابيع او شهر....
روعه: ياي...مرررة كششششخة وانييييق...كذا الشباب ولا..بلاش...
سماح: هيييييي...عييب...
روعه: اففف...خواتي معقدات...ياربييييييي...
: ياهوووه اسكتوا...فضحتونا...
سمعنا صوت خطوات على الدرج...التفنا الثلاثة...لقينا ميران نازلة من الدرج...وكانت لابسه برمودا احمر ساتان...وبلوزة انيقة لونها فوشي..وبطنها باينة...وصندل احمر..وريحة العطر واصله لاخر الدنيا...
ميران: هاي بنات...
سماح وهي مفجوعه: وووين؟؟؟؟...وووين رايحه بهاللبس ان شاء الله؟؟
ميران ببرود: وييييييييييه...وشفيك...الحمدالله لابسه زين.. مو مثلكم..اشكالكم تجيب المرض..بهالتي شرتات...
قالت روعه ببساطه: على الاقل محترمات انفسنا...ترى سلطان مايحب هالحركات...
طالعت ميران ب روعه مقهورة...ولفت واعطتنا قفاها..وراحت جلست على الكنبة البيج....تنتظرهم يجون...طبعا كنا مرتبين الصواني حقت الحلى والفطاير كلها بالصالة...شفتهم جايين..وفتحت الباب...اوقفوا سماح وروعه وراي...
قلت بصوت عالي: تو مانور البيت...كلللووووووووويش..
سلطان بعصبية مصطنعه: بس..بس ازعجتونا....من اليوم لا اله إلا الله...ترى كلها شهر...
وصافحني بيده...وضغط عليها بقوة..حتى انا استحيت من سماح وروعه اللي سلموا عليه بعدي...
عمتي نورا وهي تدخل وراه: شهر...حرام عليك يا الظالم شهر وثلاثة ايام..والله كانها دهر على قلبي...
عفرا: سلطان...ترى خلاص..هجه من البيت مافيه..اسال ملكه... ترانا ماطلعنا ولا مكان بعد مارحت...
: ههه...( بسخرية) إلا كل يوم واحنا طالعين...لا ترجع يا سلطان..ترانا فليناها..
سلطان: نععععم؟؟؟..والله ما اتحرك من ذا البيت...اجل اخذتوها فرصه انت والانسه عفاري...
توجهنا للكنب...اللي بالطرف عند الشبابيك..ودخل عمي سعود...سلمت على راسه وباركتله برجعة سلطان..فقال وهو يضحك بصوت واطي: الفضل لك!!...
حمر وجهي واتفشلت...رحت ركض عند سلطان..واخذت الدلة...كانت عفرا وعمتي نورا جنب سلطان...كل وحده من جهة..وهو بالنص..وحاط ايدينه وراهم..ميران وسماح وروعه..قباله بالضبط..وميران جايه بالنص قبال سلطان... عمي سعود جاي بين الكنبتين بكنبة مفردة..وانا واقفة..قلت وانا اصب فنجال لعمي سعود" سم..."
عمي سعود" سم الله عدوك...
وصبيت لسلطان...قال سلطان وهو يبتسم" تحسسيني اني في البادية يا ملكه....."
الكل:هههههههههه
: يا سلام....وليش ان شاء الله؟؟؟
سلطان: وطب ليش زعلانة...فيه احلى من البادية.....
: لا مافيه...وبعدين مافيه احلى من البدويات..يعني انت قاعد تغزل فيني..وغزلك غير مسموح...
سلطان:هههههههه....امحق غزل...
ضربته عفرا بقوة على يده وقالت: عيب..وبعدين وش اللي خلاك ترجع بهالوقت؟؟؟ بهالوقت بالضبط؟؟؟
سلطان وهو يمسح على محل الضرب: ايييييي...ها؟؟.. اللي رجعني...هو..هو..( وحك شعر راسه).. اني اشتقت للامارات..
الكل: نععععععم؟؟؟
قلت وانا اضحك: ههههههه..صراحه كنت شاكه انك في السعودية...
عفرا بسرعه وبدون تفكير: عند جاسر...( طالعوا الكل فيها فكملت بسرعة)...في مزرعة خالتي حورية...
سلطان بهدوء: ايه في المزرعة...عند الخيل... والطبيعه.. وصراحه ارتحت كثير...وجاسر ماقصر..
عمي سعود: يا مشاء الله...طيب....ليش ما اخذتنا معك؟؟؟
استحى سلطان..فقلت انا وانا اروح اصب لعمي فنجال قهوة ثاني: الله يهديك يا عم...وين ياخذنا..والمدارس وكلية بدرية...
عمي: على العموم...احمد زوج حورية..عازمنا عنده باجازة العيد...
طالعت بعفرا...اللي عضت على شفايفها بتوتر...لاحظت انا هذا الشي...واشرتلها تطلع فوق..بعيوني..
عفرا وهي تقوم: انا بطلع فوق..مصدعه شوي...
سلطان وهو يراقبها وهي تروح: باجيلك بعد نص ساعه.. ابيك بموضوع مهم...
انا ارتجفت...لا يكون جاسر قال لسلطان شي...لاحظت ان سلطان انتبه لي....وشفت في عيونه..لمعه غريبة..وكانه متضايق..فتركت القهوة بعد ماشفت ان سماح بتاخذها مني...وابتسمت لي...هزيت راسي لها... وطلعت ورا عفرا...

الساعه4:45م

قلت لعفرا وانا ادلك راسها وهي منسدحه على فخذي: خلاص هدي اعصابك...بطلي بكا وصياح...
عفرا وهي تمسح دموعها: تعبانة يا ملكه...تعبانه..اكيد قال لسلطان عن اللي صار...اكيد...
: يا عيوني..يا عمري..ما يصير اللي تسوينه بعمرك...خلاص..هدي اعصابك يا قلبي...
عفرا وهي تمسح خشمها بالمنديل:اه....انا طول عمري حظي مقرود...طول عمري..
وكملت وهي تشاهق: انت ماتعرفين قصة حبنا؟؟؟...قصة حبي انا وجاسر..قصة حب طاهرة نظيفة...استمرت ثلاث سنين.. لكن خلاص...خلاص...انتهى كل شي...
قلت وانا امسح على شعرها وامسح دموعها: طيب...لو..لو لا قدر الله...تركك...وتزوج غيرك...
صرخت بعصبية وهي تبعد عني وتحط ايدها على فمي بقوة: لا تقولين كذا... راح اذبحه لو تزوج غيري راح اذبحه... واذبحها.. لا راح انهي حياته وانهي حياتي...ونموت كلنا سوا...
قمت وانا مفزوعه من على سريري: عفرا..لا تقولين هالكلام.. انت ربي راح يرزقك بانسان افضل واطلق منه..ويقدرك وراح تحبينه بعد زواجكم...
انهارت عفرا على الارض وقالت: الحب...مافيه حب بعد الزواج.. هاذي مجرد خرابيط..كلام حريم...كلام كذب... الحب واحد سواء قبل الزواج...او بعده...
سكت..ماعرفت وش ارد عليها..سمعنا دق على الباب حق غرفتي...قلت بتوتر: مين؟؟؟
سمعنا صوت سلطان....وتوترنا..ضمتني عفرا بقوة...
: ما ابي اشوفه يا ملكه..مابي...الله يعافيج...
: عفرا...هدي اعصابك يا قلبي...
سلطان: عفرا...افتحي الباب...ابيك ضروري...
: لحظة يا سلطان....( ولفيت عليها) بدخل غرفة الملابس...ولو لا قدر الله صار شي راح اطلعلك...خلاص؟؟؟
هزت عفرا راسها....ومسحت دموعها بسرعه ورتبت شعرها ومسحت خشمها....
ضميتها بقوة ورحت دخلت الغرفة حقت الملابس...وانا ميته ابي اعرف وش يبي سلطان من عفرا؟؟؟
الفصل الثاني عشر

ماقدر اعيش العمر يوم بلياك...طيفك بعيني راسخ في خيالي
صعب علي بالحيل يازين فرقاك..ليتك تشوف اللي بحبك جرى لي..
مازل يوم ماهذري بطرياك..دايم على ذكراك مشغول بالي..
الله واكبر ياريش العين ما اقساك...صار الوصل بيني وبينك محالي..
(عبدالله الرشود)

دخل سلطان الغرفة...وانا رحت تخبيت في غرفة الملابس..عشان اعطيهم راحتهم...قد ما اقدر... حاولت اسمع الحوار اللي يصير بينهم لكن ماقدرت...فقعدت ادعي لعفرا من كل قلبي..ان سلطان مايكسر بخاطرها ويقولها شي ماهوب زين... مرت دقايق حسيتها شهور وانا قاعده انطر على جمر!!... وقاعده اتخيل كل موقف ممكن يصير بين هالاثنين...اتخيل سلطان معصب..ويهاوش عفرا..واتخيل سلطان مبسوط ويبشر عفرا...واتخل ملامحه عادية ويسالها عن اللي صار بالسوق...لكن كل هذي خيالات لا تسمن ولاتغني من جوع!!!...
حاولت اجمد قلبي...لكن قلبي رقيق ما قدرت اجمده..دمعت عيوني...ليش طولوا؟؟؟... اكيد ان جاسر قال شي لسلطان عن عفرا...لالا الله لا يقوله...جاسر رجال موب بزر...حتى لو لاقدر الله...قرر جاسر انه يترك عفرا...لا يمكن يقول لسلطان شي موب زين عن اخته!!...

بعد عشر دقايق تقريبا...افتحت عفرا الباب...وكان شكلها غير!!...كانت عيونها تلمع بقوة...وهي.. كأنها طفله صغيرة...مبسوطة ومو عارفة تعبر عن سعادتها...قالت لي وهي ترتعش :اخيرا يا ملكه...راح اتزوج يا ملكه..راح اتزوج...
وركضت لي وضمتني بقوة...ضميتها بقوة وانا مو مصدقة اللي قاعده اسمعه...قلت لها من بين دموعي: شفتي ان الله كريم؟؟... وانه رحمك من العذاب اللي كنت عايشة فيه؟؟" قالت وهي تصيح.. " انا مو مصدقة...توقعته راح يتركني... توقعته راح يهجرني...ما توقعت ابد..ان لي حق احلم لو بنسبة 1% برجعته..." قلت لها وانا ابعد عنها شوي وامسح دموعها" لا تقولين كذا...جاسر يحبك.. واللي يحب ما يستغني عن حبيبه بهالسهولة..جاسر صبر سنين وعاند ابوه علشان هالعيون يا الغبية..." وضربتها بقوة على كتفها.. قالت من بين دموعها وهي تضحك"اييييي... انت يا ملكه...وجه خير علي..والله وجه خير علي...انا مو مصدقة..والله راح اسمي بنتي عليك.." ضحكت وانا ابكي" خليها تجي اول...بعدين فكري باسمها يا الهبلة.." وكملت وانا اجيب المنديل وامسح خشمي" وبعدين..لا تنسين تركدين بتفضحينا بين البدوان اللي هناك!!!.." قالت عفرا وهي تبكي اكثر وتضمني" والله ما خليه يندم لحظه وحده على زواجه مني...والله..." وكملت وهي تعض على شفايفها من الارتعاش اللي تحس فيه" راح اخليه اسعد انسان بالكون...راح احبه... واشيله بين عيوني...راح اقرا عليه إذا طلع...وإذا نام... وإذا تكلم قدام الناس...راح اطبخ له بنفسي..واكله بنفسي..والبسه بنفسي...واخدمه بعيوني الثنتين...وحادعي كل ليلة..ان ربي يحفظه ويطول بعمره..." طالعت بعفرا وضميتها اكثر وبكيت معها بحرارة وقلتلها وانا مو مصدقة" حمارة...راح افقدك يا الدبة...مين راح يجلس معي؟؟..ليش حائط المبكى بيروح؟؟..." قالت عفرا وهي تضحك شوي وتبكي شوي"راح اكون دوم موجوده لاجلج يا ملكه...متى ما اشتقتي لي او حسيتي انك تبين تفضفضين لي..لا يردج إلا موبايلج.." قلت وانا ابعد عنها شوي وامسح دموعي" ماراح احسدك...يله روحي بسرعه قبل لا اغير رايي...روحي قولي لعمتي نورا..يحقلها تعرف...".

**اناغيم** · 13-07-2009, 08:23 AM

الساعه1:52ص

" ملكه..ملكه...نشششي....!!" فتحت عيوني ببطء...وش السالفه؟؟..وين هالصوت؟؟..تحركت ببطء على سريري...ادور مصدر الصوت...غمضت عيوني بقوة ورجعت فتحتها...الظلام بالغرفة يخوف...وصفقت كذا مرة ولا انفتحت اللمبات...استغربت..يمكن في عطل بالكهرباء.. او يمكن ما سدد عمي الفواتير ...اتحركت بارهاق..عشان اقوم من على السرير... قلت بصوت عالي..." ميييين؟؟؟...عفرا!!!" سمعت الصوت اللي اول يتكرر" ملكه..ملكه...نشششي!!" ما ادري ليش قلبي قبضني..تحركت ببطء..ووقفت..على الارض..بس تزحلقت وطحت على الارض..وش ذا؟؟..ماء!!...مو عارفة وشو؟؟..مو باين...اووووه..جمسي يالمني...بشكل!!..افف.. فضيع متعب... افف..وش هذا؟؟...لالالا مو ماء..شي ثقيل شوي..لزج شوي...
حاولت اوقف لين ماقدرت...لاحظت ان فيه نور ضعيف بالحمام....خفت...قلت بصوت عالي" عفرا...هذا انت؟؟..." مشيت بخوف وانا كل شوي اتزحلق...واطيح واحس باشياء طايحه...وصلت الحمام...لقيت فيه شمعة....مولعة..مشيت ببطء..سمعت الصوت يتكرر..." ملكه...ملكه... نشششي!!.." رجعت على ورا مو مصدقة..وين هالصوت؟؟..اكيد هذا حلم...اكيد...حسيت ان شعر رقبتي وقف...حسيت ان فيه احد يراقبني...!!..التفت ورا..ماشفت احد...طالعت بالمراية... وصررررخت بصوت عالي..." اه...لالالاؠ ?ا ا..." رجعت على ورا..انا متاكده شفت شبح...والله شفت شبح..شفت عيون تطالعني....يا عالم تطالعني...صرخت بصوت ثاني..وحاولت اطلع من الحمام..لكن ماقدرت.. اتسكر الباب بقوة......انقفل باب الحمام... صرر ررخت بقوووووووة... حاولت افتحه قد ما اقدر...طقيت على الباب بقوة....حطيت ايديني على راسي..وقعدت اشاهق بصوت عالي...وانادي" عفرا..يممممممممممه...." ماحد يرد علي...لحظات..وانفجر صوت ضحك..صوت ضحك مجنون...واخذ يعلى ويعلى..وانا ضميت نفسي بقوووة..وقعدت اصيح.......لالالا اكيد حلم..انا مو مجنونة..هذا حلم والله...حلم والله!!!

اسوأ احساس في الدنيا هو احساس الخوف.. محبوسة بين اربع جدران..والدنيا ظلام... دامس ماعدا نور شمعه بسيطه....تظلم في المكان اكثر من انها تنوره....نور الشمعه هذا جنني...خلاني اشوف اشياء موب موجودة...ميلانها مع هبة الهوى..خلاني اصرخ من اعماق قلبي..كل حركة اسمعها هي جني ناوي يتلبسني....وكل ظل اشوفه على الجدار...هو حرامي بيغصتبني وبيقطعني وبيرميني للكلاب...قطرات الموية هي خطوات القاتل اللي بيقتلني...ودقات الساعه... هي دقايق اعدامي وموتي ونهاية حياتي....
..شديت شعري بقوة..وانا اصيح بصوت مكتوم..انا خايفة... خايفه اموت بالمستشفى هناك...عند المجانين...راح ياخوني هناك..لأني مجنونة....انا مجنونة...هذا حلم..لالالا..قصدي كابوس..لكني مو قادره اميزه عن الواقع..اكيد كلها عشر دقائق واقوم من النوم..واضحك على جنوني كأنه نكتة الموسم...ايه....اكيد عفرا بتدخل تقومني علشان نشرب شاهي بالزنجبيل ونتمشى بالحوش..اكيد احد بيسمع صوت صراخي وينقذني من اللي انا فيه...
قرصت نفسي بقوة....ضربت وجهي كف بقوة....ليش ما اقووووووووم؟؟؟...جاوبوني ليش؟؟... صخت باعلى صوت" عفرا....عمتي نورا....عمي سعووووووود.." وقعدت اشاهق بيأس البيت كله عوازل وماحد راح يسمعنيييييي.....
تلمست جسمي....جسمي اللي مليان جروح...طووويلة وداميه مثل هالليلة....ضميت نفسي بقوة....ولزقت بالجدار اكثر...انحشرت بركن..وحطيت راسي على ركبي...وقعدت ارتجف..بقوة...واقرى على نفسي اواسمي...لكن....ولا شي صار...غير ان نور الشمعه بدى يلفظ انفاسه ويموووت...ينتهي... رحت لها بسرعه...وبكيت....ما ابيها تنطفي...لا تنطفين...الله يخليك .. من كثر ماني خايفه حاولت اشيلها بايدي...فطاحت على فخذي وانطفت..

" ملكه...بنتي..بسم الله عليك" هذا كان صوت عمتي نورا وهي تدخل علي...بعد مافتحت باب الحمام علي بعد ثلاث ساعات تقريبا...طالعتها...كان شعري منتفش...وعيوني حمر... ذبلانة ...وشفايفي ترتعش بقوة...ضميت نفسي بقوة..وقلت لها بصوت خافت..يمكن حتى ماسمعته" اتاخرتي يا عمتي.. اتاخرتي..." طالعتني مفجوعه..." انت وش مجلسك بالحمام؟؟..." مارديت عليها...صرخت وهي تنتبه ليديني اللي مليانه جروح...وفزعت وهي تشوف الدم اللي مالي ركبي...قلت لها بصوت منهدم" عمتي... انا...ابي انوم!!" قربت مني وكانها خايفه...، ابتسمت بسخرية وضحكت....ضحكة عالية مرتفعه....وقلت لها"ههههههههه.... خايفه مني!!..هههههه" وكملت وانا اعض على شفايفي بتريقة" انا ما اعض!!..شوفي....ههههههههه"تناثرت دموع غبيه...من عيوني....عشان تعلن الضعف اللي ماليني من شمالي ليميني..من فوق لتحتي...من داخلي لخارجي... مسحت عمتي نورا دمعه من عيوني وقالت بصوت يرتعش" انت تعبانة؟؟!!... اكيد تعبانة..." وضمتني بقوة...ما بكيت ولا تحركت..ولا تفاعلت معها...دزيتها بعيد عني ووقفت مترنحه وطلبت منها بصوت طبيعي" اتركيني بحالي...انا مو مجنونة....انا انسانه طبيعية.. مو محتاجه شفقتك يا...يا.."...واضفت بسخرية وانا اطلع من الحمام: يا عمتي العزيزة"..

اخيرا...ناموا..اخيرا..تركووني...طالعت بالمطهر اللي بايدي وبالقطن اللي على الارض...لهم ساعات وهم يدقون على الباب...حتى سلطان جا ودق علي الباب...ارتعشت وانا اضم رجولي لصدري..ورميت المطهر من ايدي وقلت وانا ارتعش بصوت عالي شوي" ليتكم خذيتوني معكم.." كنت اكلم صورة امي وابوي بيوم زواجهم...الله...كانوا مبسوطين حيل!!... امي بفستانها الابيض النافش...ووجهها البريء....وابوي..بثوبه والمشلح حقه..مساكين...ماعرفوا بمصيرهم ولا مصير.. عيالهم... ماعرفوا ان المستقبل خبا عليهم لعبته الغادرة...!!..اهتزت شفتي..وانا اخذ المطهر من جديد واحط منه على القطن...مسحت على جروحي النازفة...اه..لو الاقي احد...يمسح على جروح قلبي...وياخذني بحظنه وينسيني العالم كله!!...مسحت على ركبتي المجروحه بقوة..واحرقتني دموعي اللي كانت تناثر بقوة...دموعي مسكينة تراها!!...عمرها مالقت ايد حنون تمسحها..حتى امي الله يرحمها...صدق كانت حنونة...لكنها كانت تحب اخواني اكثر!!... وكانت تنتبه لهم اكثر..كانوا دايم يقولون ملكه العاقله اللي ما ينخاف عليها...ملكه هي عن عشر رجال....ملكه لو نتركها بصحرا..ورجعنالها بعد فترة لقيناها عايشة ومعيشة من حولها..عشان كذا عمرهم ما اهتموا لي...!!...عمرهم مافكروا يسالون عن احوالي...!!.. عمرهم ما فكروا ان هالملكه...مثلها مثل غيرها...انسان طبيعي...له قلب نابض واحاسيس متدفقه.

اخيرا..خلصت..طهرت كل جروحي..ولفيت على بعضها شاش...والبعض الثاني..حطيت عليه لزقات...بلعت ريقي وانا اتحرك على اقل من مهلي..لأن كل جزء من جسمي يالمني...كل جزء يئن ويحترق بالنار اللي جواتي...كل جزء يحكي قصة عذاب طويلة..عيت تنتهي فصولها!!!

جلست على السرير..وشلت رواية كنت اقراها امس قبل لا انوم...بس لسه ما خلصتها... اسمها قطار النسيان..محظوظة جيسكا...فقدت ذاكرتها وعاشت مع واحد وسيم وطيب..ولا... يحبها بعد...بس هي غبية...مصرة تعرف حقيقتها..مصرة تعرف اسمها وشخصيتها...!!..بنات غبيات... السعاده ما تجي غير مرة وحده..ومع هذا ما نغتم الفرصه..ونسعد..نقعد نفكر ببكرة..والتفكير ببكرة متعب...مثلي انا...قررت ما افكر ببكرة...لأن بكره.. يمكن ياخذوني لمستشفى الصحة النفسية...مستشفى المجانين...اكيد راح ياخذوني هناك..رميت الرواية على الارض بقوة.. وتلحفت...راح ارجع عنده..عند الدكتور..المجنون...غمضت عيوني بقوة..امنع الدموع المالحه انها تطلع..لأنها تالمني..لأن وجهي كله جروح...مو مصدقة...انا..ملكه...ال....، مصيري مستشفى المجانين...لالالا....انا لازم اهرب من هالبيت...لازم..اوافق على الي خاطبني...هو فرصتي الوحيده للهرب....ايه..بكره راح اكلم عمي واقوله...اقوله اني موافقه على اللي خاطبني واني ابي الزواج باسرع وقت ممكن...
دورت حبوبي المنومة...واكلت لي حبتين...وشربت كاسة ماء باردة..تبرد النيران اللي تشتعل بصدري..، غمضت عيوني...ونطقت اسمه...نطقت اسم الوحيد اللي حسيت انه مهتم فيني...مساعد!!...

**اناغيم** · 13-07-2009, 08:32 AM

الساعه 11:22ص

طالعت بوجهي في المراية...كان لوحه حزينة تحكي قصه حياتي كامله...نثرت الموية على المراية بقوة...تشوه وجهي..وتغيرت ملامحه...عضيت على شفايفي وطحت على الارض اشاهق وابكي بحرارة...انا خايفه يا ناس...خايفه...خايفه اروح هناك...خايفه اموت وحيده...خايفه يحسبوني مجنونة...انا مجنونة....بس ما لازم احد يعرف...مالازم احد يعرف اني مجنونة!!..لازم اتصرف بشكل طبيعي...لازم يكون تصرفي واقعي..وثقيل ورزه..التصرفات اللي تعودوها مني...انا صرت اخلط بين الاحلام والواقع..صرت ما افرق بينهم..اللي كان بالامس...كله كابوس..ومع هذا انا اعتقدته حقيقي...حتى ان باب الحمام ماكان مقفول..كان مفتوح!!..ومع هذا انا حسبته مقفول..وماكان فيه شي على الارض..مع هذا تعثرت على الارض كثير..وماكان فيه شي لزج...البلاط نظيف لامع...مافيه اي شي...

وقفت بعد ماسمعت طق على باب غرفتي..طلعت من الحمام وتوجهت للباب...لقيت عفرا واقفه هناك...كانت تطالعني وفي عيونها الف سؤال وسؤال...كانت لابسه روب ابيض عليه دبدوب احمر..وشعرها مسيحته حول وجهها...صديت عنها ورحت لسجادتي..قالت لي وهي ترتعش" ملكه!!...انا مو مصدقتهم فيك!!..." وكملت وهي تشهق" انت...من بد كل البشر لا يمكن تكونين مجنونة!!...انت العقل كله...انت..." وحطت ايدها على فمها وقالت وهي تبكي بحرارة فجأة" حرام ...انا ما اسمح لهم ياخذونك للمسشتفى...ما اسمحلهم يحطمون حياتك...ما راح اسمحلهم يحكمون عليك بالاعدام وانت حية ونابضة بالحيا..."مارديت عليها..لفيت شرشف الصلاة الوردي علي..وغطيت شعري زين...كملت كلامها وهي تجلس على السرير بعد ماقفلت الباب" فهميني شو اللي صار؟؟..فهميني...ليش كنت في الحمام؟؟؟..فهمينييييييييييي...ليش سويتي بنفسج جذي؟؟؟" اهتزت شفايفي..بس ما رديت...ماحد راح يصدقني..ليش يصدقوني؟؟؟..مو انا مجنونة..خلاص مالي كلمة....فاقده الاهلية..رنت الكلمة باذني..كلمة بدرية..صدقت انا فاقده الاهلية..ما اصلح لاي شي...مسكتني عفرا ولفتني بقوة عليها" ماراح اخليج تروحين هناك.. فاهمه؟؟...فاهمتني يا الغبية...ساعديني اساعدج...ساعديييني..." وامتلت عيونها دموع وارتعشت بقوة...طالعتها ببرود وبعدتها عني وقلت قبل لا اكبر عشان ابدى الصلاة" مابي مساعدتك...." وكبرت عشان اصلي...طالعت فيني وانا اصلي وصرخت بقوة فيني وقالت" انا ماراح اخليك تضيعين نفسج بنفسج...فاهمه؟؟.." وتركت الغرفة وطلعت وقفلت الباب وراها بقوة!!..

خلصت صلاة...وانسدحت على سجادتي المخمل...ضميت القران بقوة لصدري..مابي اطلع..مابي اواجههم..مابي اشوف الشفقة اللي تلمع بعيونهم....مابي اشوف الشماته بعيونهم..عضيت على شفايفي.. وغمضت عيوني بقوة...ماعدت اقدر استحمل.. لازم اكل من حبوب الاكتئاب اللي عندي... انا ما اكلت منها نهائيا....لأني كنت اعتقد اني مانيب محتاجتها...لكن لا....هالحين راح اروح اخذلي حبتين... لازم احاول انسى او اتناسى الحقيقة..الحقيقة...اني..مجرد مجنونة...رفع عنها القلم في الشرع...يعني حتى الصلاة..لو ماصليتها ماحيلوموني.. حتى الصيام لو ما صمته بيعذروني!!.. مادريت ان شعور المجانين مثل شعور الناس العاديين..يعني انا احس بنفسي انسانة طبيعية...لكن انا بنظر الكون مجنونة!!...مجنونة!!..مجنوووووووووووووونة....فاهمين ثقل هالكلمة؟؟...تخيلوا تودعون كل احلامكم...وكل امالكم..وتناظرونها تكبر مع غيركم..وتترعرع في بيوت ناس ثانية..قمت من مكاني بسرعه وتركت المصحف على جنب..انا لازم ارجع ازرعهم.. ورودي .. لازم ارجع ازرعهم من جديد.. لازم اخليهم يكبرون...ويكونون شاهدين على وجود انسان مجنون بالورد في يوم من الايام..انسان عاش بهالقصر..وحب هالقطعة الصغيرة..واسقاها وصبر عليها بكل امانة واخلاص!!...

وصلت لقطعتي...اللي كانت بيوم لي انا..لقيتها خاوية..مجرد تربة...بدون اي زرع...جلست على الارض..وتلمست الارض بلهفه...ابتسمت وقلت بصوت مرتفع شوي" راح ازرعك من جديد..وراح اسقيك من عرق جبيني...وراح اراقبك تكبرين وتحلوين يوم ورا يوم..." قمت من على الارض..وقررت اروح للمطبخ..لأني كنت مخبية فيه البذور حقت الورد والنعناع... والريحان والفل والياسمين... وصلت للمطبخ..لقيت فيه الطباخ سمير الهندي..قلت لسمير وانا متلثمة بشرشف الصلاة" سمير..." التفت لي وقال وهو يحرك البصل في القدر" نئم ئمتي..."
: وين البذور حقتي؟؟...
سمير: اه هذا بزور حق ورد..؟؟
: ايوووه...وينها؟؟..طلعها لي!!..
سمير: او...سوري ئمتي..هدا...ئمة بدرية اخد..( عمتي بدرية اخذتها)
: نعم؟؟؟..بدرية؟؟..
سمير: ايوا ئمتي...هي قول..هدا بزر خربان..
طالعت فيه وتنهدت....وقلت وانا الف عنه: خلاص سمير...شكرا...
مشيت خطوتين...إلا سمعت صوت وقف الدم في عروقي
: انا اجيبلك كل البذور اللي في الدنيا...بس لا يضيق صدرك...يالغلا..

فتحت فمي مو مصدقة...هذا حلم ولا علم..يمكن فعلا انا بديت اخبط..ولا اميز بين الواقع والحلم!! ...لالا...هذا مساعد..مساعد بلحمه ودمه.. قلت بصوت متقطع" مسا..عد!!" قال وهو يقرب مني" ايه مساعد...مساعد اللي ماغبتي عن عينه لحظة..مساعد اللي مل هالكون بلياك..مساعد.. اللي ندم على انه فكر يتركك دقيقة..." بعدت عنه خطوتين على ورا وقلت وانا احاول اتراجع بس بحذر" مساعد...وقف عندك.." طالعني وكانه استغرب كلمتي..قلت وانا اخذ نفس عميق واتوكل على رب العالمين...لحظة المصارحه قربت..وانا مليت هالغلط..انا من اليوم راح اكون لغيره فالافضل انه يعرف هالشي مني..عشان مايفكر يتمادى...لأني عمري ماحكون ملك له!!.." مساعد.. انت خطيب بنت عمي..ما اسمحلك..ابدا ابدا..تقرب مني...فاهم؟؟" وكملت بقوة اكبر رغم اني شفت بعيونه صدمه قوية" ..ولا اسمحلك ابدا..ابدا..تجرح بنت عمي!!" اتسعت عيونه مو مصدق..اللي قاعد يسمع..كانت عيونه حمرا...وشعره طويل شوي..وذقنه مبهذلة...قالي بصوت مبحوح" لا اقرب منك؟؟..لهالدرجه وع؟؟..لها الدرجة كخة؟؟...مو من مقامك يابنت ال...؟؟"" قلت وانا اتراجع اكثر" مساعد..عيب...عليك.." صرخ فيني" عييييييب؟؟..عيب احبك...عيب؟؟؟..عيب اهواك؟؟ ..عيب اجي عشان اشوفك؟؟" تلفت حولي بسرعه..بيفضحنا هالرجال..قال وهو يقطب حواجبه" تغيرتي يا ملكه..تغيرتي..كل هذا لأنك صرت مخطوبة لغيري.." استغربت انه يعرف... استغربت ..من متى درى؟؟..ومتى قالوله الموضوع ماله يومين...كيف انتشر؟؟؟قلت وانا ارتجف" ايه..لأني صرت لغيرك..مساعد..لا تضحك على نفسك..انا عمري ماكنت لك عشان اكون لغيرك.." سفهني وتقدم مني بسرعه..حط يدينه على كتوفي..وقربني منه بقوة.. ماكان يفصلني عنه شي...جمدت بمكاني..دنيتي دارت... الخوف صرعني...حاولت اصرخ..لكن فمي انطبق..ماكنت مصدقه اللي يصير...عشان كذا انت كنت فاتحه فمي ومبققه عيوني فيه..كانت عيونه تطالع عيوني تاكلني.. تخليني احس اني بدون ملابس...ان في شي غلط!!..قال بصوت متالم حزين وهو يهزني بقوة" انا احبك..فاهمه وش يعني احبك؟؟..يعني اموت بهواك...واحب طية رجلك...واحب لمعة عيونك.... ملكه.شلون تخليني وحيد...شلون تتركيني...وانا تركت بدرية علشانك....يوم دريت انك تعبانة بالمستشفى...جيت مشي بالسيارة..لأني مالقيت حجز...واول ما وصلت...مافكرت اروح ارتاح...جيتك طيران للمستشفى...وفوق هذا كله...كنت مرابط فيه طول الوقت..كنت ادخل بالسر لغرفتك...ارشي الممرضات عشان يخلوني اشوفك.." وكمل وشفته ترتعش وماكان طبيعي بالمرة" كنت..كنت املي غرفتك بالورد!!...كنت المس شعرك الاحمر...المس وجهك الفاتن..." صرخت بذعر يوم حاول يجر اللثام عن وجهي بس ما اهتم..جره عن وجهي وأخذني لركن منعزل شوي عن شبابيك البيت...قال وهو يتنهد بحسرة" بتحرميني منك!!...بتروحين لغيري؟؟" قلت وانا ارتجف" مساعد الله يخليك اترركني...مو حلوة بحقك او بحقي...خلاص..ربي ماكتب انا نكون لبعض..ربي..كتب لك انسانه غيري..وانا كتب لي..." صرخ فيني بصوت عالي" بس انت..انتي عشمتيني فيك!!..عشمتني بحبك..بجنونك..." قلت وانا ابكي" متى؟؟..متى عشمتك فيني؟؟.." صرخ فيني وهو يهزني" بكل لحظة تلاقت عيوني بعيونك..بكل لحظة شفتك فيها...بكل ابتسامه من ابتسامتك وضحكة من ضحكاتك..." غمضت عيوني وقعدت ابكي بحرارة..بعدني عنه بقوة وابتعد عني خطوتين على ورا وقالي بصوت عالي وهو يحط يدينه على راسه" ماراح تكونين لغيري... فهمتي؟؟...حطي هالشي براسك...انت لي انا...لي انا"..

الساعه2:05م في غرفة الطعام..

" لالالا.." صرخت بصوت خافت وانا جالسه على طاولة الاكل...شفت الوجيه كلها تطالعني... رفعت وجهي لهم..قلت وانا احرك الاكل بصحني" معليش..سرحت شوي.." قالت عفرا بطريقة اندفاعية" ايه عادي...من حق كل شخص عايش في الامارت انه يسرح بافكاره..." عمي سعود قال وهو يطالع بوجهي" ملكه...ابيك بموضوع بعد الاكل.." ارتجفت بس عفرا مسكت يديني وابتسمت لي تطني...وطمأنيت شوي.. شفت عمي سعود وهو يقوم عن الطاولة... وودعته بنظراتي وانا متاكده انه بيكلمني بموضوع من اثنين يا المستشفى يا اللي خاطبني...طالعت بعمتي نورا.. كانت نحفانه..ووجهها ذبلان....وشفيك عمتي..؟؟..وش اللي يدور براسك؟؟.. قالت سماح وهي تطالعني" تبين مكرونة بالبشاميل؟؟..تراني مساعده الطباخ فيها؟؟.." ابتسمت لها واعطيتها صحني...حطت لي قطعه كبيرة...فاخذت منهالصحن وانا شاكره..امممممم..ريحة المكرونة تجنن.. لكن...نفسي مسدودة..بس علشان سماح بحاول اكل شوي...، قالت روعه وهي تاكل شوية سلطة" جسمك يجنن ملكه..على كثر ماسوي ريجمات ما يطلع مثلك ليش؟؟.." قالت سماح وهي تضحك" قولي مشاء الله..اهي خلقه جسمها كذا..." والتفتت علي" صح ملكه؟؟.." قلت لها وانا ابتسم" يعني انا طبيعتي ما اكل كثير..عشان كذا ما اسمن..وبالنسبة لتقاسيم الجسم..وارثتها من جهة امي..." قالت روعه وهي تترك ملعقتها" يا بختك...انا تعبت من الريجيمات..ومع هذا مو عاجبني جسمي.." قلت لها وانا امسك الملعقة" ليش مو عاجبك؟؟..يجنن.." قالت وهي تفتح عيونها على الاخير"بالعكس..ماشفتيني وانا لابسه البنطلون..يخرررع..." سكت..ماعرفت وش اقولها؟..انا بيوم كنت نسخه من روعه بكل شي... قالت عفرا وهي تحط ايدها ورى ظهري" تفلي على بنت عمي...لا تحسدينها...بعدين تنتفخ وتصير مثل البعير!!.." ضحكت سماح بقوة وقالت" عفرا..فال الله ولافالك..بعير مرة وحده..لو ناقه مو اهون؟؟" قالت عفرا وهي تناظرني" والله ما ادري كلهم واحد....المهم..انها تسمي وتفل على بنية عمي الوحيده...تراها غالية عند ناس كثير.." قالت سماح وهي تطالعني بنص عين" صح..غالية عند ناس كثيييييييييييير.." وغمزت لي.. طالعتها هي وعفرا..اوكيه..عفرا تقصد سلطان...لكن سماح مين تقصد؟؟...قالت بدرية ببرود" اف.. ذبحتونا ترى..اتفلي عليها..اتفلي عليها...كأنها اول وحده بالديره جسمها نحيف!!.." قالت سماح وهي تهز كتوفها" جسم ملكه مو نحيف...جسمها جميل..." وكملت وكأنها تذكرت شي" تذكرين نيكول يا ميران؟؟...اللي يسمونها عارضة ازياء الجامعه.." قالت ميران ببرود وهي تقلب عيونها اللي ممكيجتها على الاخير..ومضللتها بالاسود والعنابي..." ايه..ذكرتها..وش فيها؟؟.." قالت روعه" وانا بعد عرفتها...قصدك تشبه ملكه مو؟؟.." صرخت ميران مفجوعه" الله يالفجر!!...هاذيك الجميلة تشبه ملكه..." وكملت وهي تطالعني" معليش ملكه..مو انتقاص لك..بس هي غير وانت غييييير!!" قالت سماح وهي تاكل المكرونة حقتها" لا والله...ان ملكه ازين منها مية مرة.." قالت روعه بصراحه" ايه..الحق ينقال.. جسم نيكول زي جسم ملكه...وشعرها نفس الشي..لكن وجه ملكه مشاء الله خيال...موب مثل ذيك البرصه!!..ومشاء الله لون بشرة ملكه يجنن..انا اموت ويصير ذهبي كذا... كنا نتسدح بالشمس بالساعات ما يطلع بنفس الدرجة..." قالت بدرية وهي ترمي شوكتها بوقاحه بقوةعلى صحنها: اففففف..موضوع يسد النفس.." وتركت الطاولة...وبعد ثواني لحقتها ميران وصوت كعبها يرن على البلاط...

تسحبت بعد الغدا لغرفتي...ابي ارتاح شوي..الاحداث قاعده تتلاحق بذهني...حطيت ايدي على قفل باب غرفتي المدور...لكني سمعت صوت عمي سعود..
: ملكه...
: هلا عمي...وشو؟؟
عمي سعود: ابيك بكلمه..
بلعت ريقي: ايه عمي...حياك..بغرفتي صح؟؟
عمي سعود: لا...المكتب حقي ازين..( وحك شعر راسه شوي) لالا..خلاص بغرفتك..
:حياك..اقلط..يابو سلطان..
ودخلنا غرفتي..
على طول اتجهنا انا وعمي للكنب اللي بالغرفة وجلسنا...
عمي سعود وهو يفكر: ملكه..انا...مو..عارف شلون...اتكلم معك..
: عادي يا عمي قول اللي عندك مثل ما تقوله..راح اتقبله وش ماكان...
عمي سعود وهو يطالع فيني مباشرة: اللي خطبك..
: ايه يا عمي؟؟
عمي سعود: رجال..ماقاصره شي..قبيلي..حالتهم المادية زينة...وهو ضابط بالحرس الوطني...
..وانا صراحه كنت اتمناك لسلطان...لكن هذا مافيه شي يعيبه..
: امممممممم....
عمي سعود: مابي اضغط عليك...فكري زين..صلي استخاره..وتراه ماينرد..
( كنت ابي اقول موافقه...لكن عيا لساني ينطقها...رغم اني يوم اذكر..اللي صار مع مساعد قبل ساعات..ارتجف)
: ان شاء الله يا عمي اني اعطيك الرد بكرة..
عمي وهو يوقف: الله يكتب اللي فيه الخير...
وصلته الباب وقبل يطلع التفت: يا سلام لو ازوجك انت وعفرا بليلة وحده..
ابتسمتله وقلت مازحه: ياسلام يا عمي...علشان تقلب غرفتي وغرفة عفرا...مكان لعروسك الجديدة...هههههههههههههههه
انكتمت ضحكتي يوم شفت عمي مابادلني الضحك..وظلم وجهه..وقال بصوت متقطع..
: عروسي الجديدة لو بتجي...بتاخذلها غرفة وحده صغيرة وتخب عليها بعد....والباقي كله لام سلطان...
وراح وتركني..وقفت متنحه اطالع فيه وهو يروح يمشي بتثاقل....مسكت صدري بقوة..يا عمي وش ناوي عليه؟؟....وعضيت على شفايفي ودخلت غرفتي....

اللي يبينا عيت النفس تبغيه (منقوله)...كامله

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

google Ad Widget