رواية { غربة السنين } ، بقلم : أيار

البارت الاول : Part 1


الكويت / العاصمة
٠٢:٠٠ الليل
صوت صراخ ، زحمة ناس ، مكان مظلم ، يحس بقمته مايقدر يتنفس ، جسمه يعرق ، صوت ام تصرخ : ولديييييييي ، فز من نومه بصرخه : اه
زوجته قعدت مخترعه : بسم الله الرحمن الرحيم ،( مسكت زوجها بعد ماشافت شكله ) ، جابر اسم الله عليك شفيك ؟؟
جابر برجفه و دموع بعينه : بعد كل هالسنين ماني قادر انساهم يا غادة ماني قادر ، ضميري يأنبني ماني عارف شلون اكفر عن ذنبي .
غادة بحزن و خوف على زوجها : جابر حبيبي ، انتا مالك ذنب ، هذا يومهم ، الله يرحمهم ان شاء الله و يجمعنا فيهم بجنته يارب .( قعدت تهديه بكلامها و دعائها و صوتها بتلاوه القران الى أن نام )

يوم الجمعة
١٢:٠٠ الظهر
فيلا جابر صالح ال....

قعدت من النوم منزعجه من صوت المنبه تحك عينها ، و بصوت كله نوم : اوووووووووف بنام ماشبعت نوووم .
رجعت انسدحت و اهيا تلم المخده و تبتسم على جو الغرفة المظلم البارد ، توها غفت ولا تسمع الباب يفتح و صوت امها العالي : وردتي ، وتقرب من السرير تسحب البطانيه منها ، ورودة ماما يالله قومي .

ورد تتقلب و مسكت البطانيه تتلحف و ودها تبجي : يما بليز ابي انا ماما الله يخليج خليني شويه بس شويه .

الام (غادة) سحبت البطانيه : ماكو خلاص قومي صارت ١٢ وربع ، هذا انتوا بالاجازة كله نوم لا صلاه ولا عباده ، قومي يالله .

ورد تسحب البطانيه من امها و عضت عليها و اهيا تسمع اسطوانة امها اللي دايما ترددها لها في الاجازات و تهز راسها ب (اي أي) و اهيا تحاول تنام .

الام : شفيج تهزين راسج جنج مسترجعه ! ، ( قعدت على طرف السرير )خلف الله علي الله عطاني بنت وحده قلت بتعوضني ، ماشوف شي ، ماغير نايمه ولا تهايلين من مكان لي مكان ويا رفيجاتج و انا ساحبه علي وطاقتني بالطووفة ، ( ومثلت الزعل ).

ورد كسرت خاطرها امها ، رفعت نفسها من الفراش و باست امها و لمتها : عمرييييي والله غدوويا ابوووووي انتي ، كاني بعد الثانوية و تخرجت منها و اليوم النتايج و لا شغل ولا مشغله ، بنطلع و نقز سينما و مطاعم و مجمعات و يمعات و حركات .

الام ( غادة ) ضحكت : هههههههه لعبي علي بهالكلام ، يالله اشوف قومي قعدي معاي تحت ، ابوج راح الصلاة و بعدها معزوم عند ربعه ، باقي ساعتين على نتايج الثنوية و انتي ليلحينج بفراشج

ورد تتمغط : اه ، ان شالله ان شالله قمت .

راحت الحمام ( عزكم الله ) ، امها ترتب غرفتها و تهويها .

قبل لا تطلع صرخت : ورررد ماما انا تحت بالصاله ناطرتج .

ورد من تحت الدوش تصرخ : oooookkkay maaaaammmmii

خلصت شاور و لبست توها بتسوي شعرها الا سمعت صرخت امها : وووورررررررددد
طاح السشوار من ايدها و ركضت تحت مخترعه وقفت بنص الدرج مصدومة ، و بعدها صرخت : اه

••تعريف عن الشخصيات ••
ورد : ١٨ سنة ، وحيدة امها و ابوها ، طيبة وحنونة ، بشوشه صدرها وسيع و صبورة و احلى شي فيها انها قنوعه و مستحيل تشوف احد محتاج و ماتساعده ، طولها ١٦٠ و جسمها حلو و متناسق ، رياضيه و صحيه ، بشرتها بيضا و شعرها بني ، عيونها كبار لونهم بني ، وجهها برئ و اي احد يشوفها مايمل منها و من سوالفها ، اجتماعيه درجه اولى و خفيفة عالقلب .

الام( غادة ) : ٤٠ سنة ، دكتورة نفسيه ، طيبة و حنونة ، تحب بنتها و زوجها و اللي حولها و مغرقتهم بحنانها ، كل من يعرفها يلجأ لها وقت شدته .

الاب ( جابر ) : ٥٢ سنة ، صاحب شركة عقارات و استثمار ، و عده شركات على مستوى الخليج ، يعشق بنته و زوجته اللي ماقصرت معاه بشي و تحملته و وقفت معاه بشدته ، دايما يحرص ان ما ينشغل عنهم بمشاغل الحياه ، و يوفر لهم كل متطلباتهم من قبل لا يطلبونها ، صارله موقف من ٢٣ سنة الى الان موقادر ينساه و في باله يقول انه الذنب ذنبه .


نهاية البارت الاول ، اتمنى نكون عند حسن الظن .
( البارت قصييير جدا لكنهم كبداية بالنسبة لي ان شاء الله البارتات القادمة تكون أطول )

بانتظار ملاحظاتكم عالبارت .

ولكم هذي الاسئلة
# تتوقعون شنو سبب كوابيس جابر بو ورد ؟
#منو الام اللي صرخت و الولد في حلم جابر ؟
#سبب صراخ غادة ام ورد ؟
#سبب صدمة ورد و ردت فعلها؟

لنا لقاء قريب باذن الله