رد: رواية / أرض جمعتنا مابنضيعها بقلم : shahad"شهد"

" البارت الثاني "

في بيت صالح وسعاد

يوم الجمعه
الساعه 9:06

كانت فاطمه تنادي : ساره حبيبتي ويينك .، ساراه .
جت لمها لميس : فاطمه شفيك ؟؟
فاطمه : كملي أصوت ع ساره ولا ترد .
لميس : وين بتصير يعني ، أكيد بالحديقة ولا تلعب مع مراد .
فاطمه : لا دورتها عجززت .
لميس خافت : يعني وين بتكون .
رجعت فاطمه تنادي وجت لهم مريم : شفيكم .
لميس : مريم شفتي ساره ؟؟
مريم : لا ما شفتها .
فاطمه : يوووه .
مريم تغني بصوت عالي : اتركوني اتركوني .
جاهم صوت ساره : هلوني في هالي أويلي أويلي .
البنات طيرو عيونهم ومريم فاقعه ضحك .
فاطمه ماسكه اعصابها : ساره وين كنتي .
ساره : تنت أتوذا ( كنت أتوزا )
لميس ضمتها : خوفتينا عليك .
ساره رجعت تغني : اتلكوني اتلكوني .
مريم للحين تضحك : فاطمه انصحك تحفظين الأغاني الي تحبهن حتا اذا توزت بسرعه تلقينهن .
فاطمه شالت ساره وضحكت : يالله يالله ولا ما عاد ينفع شي .
جت لمهم سديم : ماما .
فاطمه : عيون ماما .
سديم : تثلمين " وهي تناقز " أبي همام.
فاطمه ع طوول نزلت ساره وركضت بسديم للحمام بس للأسف ما لحقت وبللت سديم ملابسها ..
سديم جلست تصيح وقام زياد من صوت الصياح وصاح وفاطمه ما تدري وش تلحق عليه ،
جت لمها ليان : فطومه تبغين أعاونك ؟؟
فاطمه : تسوين معروف ما أنساه .
راحت ليان شالت زياد وصارت تلعبه لين سكت ثم زينت له رضعه بحكم خبرتها بالأطفال عرفة انه جوعان


مريم ولميس راحو يكوون شمغ العيال وسمر وهمس يكوون الثياب .
وريم تكسر البخور وتوازن مبخرات ،، لينا ووسن يجهزون الفطور " بيض مسلوق ومعلبات وتست محمص وأنواع فطاير وزمزمية شاهي وزمزمية زنجبيل وبان كيك وعصير طبيعي "
خلصو من الفطور ورتبوه ع طاولة الطعام وطلعو وصكو الباب " للتوضيح : غرفة الطعام تصل بين قسم الحاريم والرجال ودايم البنات يجهزون الوجبه ع الطاوله ثم يصكون الباب ويدقون جرس يعني ' الوجبه جاهزه '

بغرفة سعاد وصالح

كانت سعاد تنقل المفاتيح والأوراق الي بجيوب الثوب الي كان لابسه صالح لجيوب الثوب النظيف وصالح داخل يتروش فتحت الدرايش وشالت الستاير رتبت المفارش حقات السرير وبخرت الغرفه .
طقو الباب مريم ولميس وسمر وهمس : ماما .
سعاد فتحت الباب : سمو يا قلبي .
أعطوها الثياب والشمغ شكرتهم ودخلتهم ولقت صالح خلص لابس أعطته الثياب والشمغ شكرها وقبل خدها وطلب منها شكر البنات وأخذ الثياب والشمغ للعيال .

العيال كانو جالسين بالصاله يسولفون شوي ويصلون ع النبي شوي ثاني ( من سنن يوم الجمعه كثرة الصلاة ع النبي ) نادا لهم صالح ورقو له كلن أخذ ثوبه وشماغه وراحو يلبسون .
بعدها نزلو ودخلو لغرفة الطعام حمدو ربهم ع النعمه الي هم فيها وسمو وأكلو .
وبعدها دخلت عليهم سعاد ' بعبايه كامله ما يطلع منها ولا شعره ' سلمت وحطت المباخر ردو الشباب السلام وسألوها عن حالها وحال البنات وبعدها طلعت .

عند البنات
كانو جالسين بالصاله لأنهم مفطرين قبل العيال دخلت فاطمه : لينا الله يعافيك دقي ع طلال وقولي له يجيب اياد امس كنه باديه تعب وودي اتطمن عليه .
قامن لينا : ابشري ي قلبي .
دقت لينا ع طلال الي كان يفطر وتو حط اللقمه بفمه لينا : الو .
طلال يالله يتكلم : ألو .
لينا : شلونك ؟؟
طلال برضو فمه مليان أكل : بخير .
لينا ارتاعت : طلال عسى ما شر شفيه صوتك .
طلال بيبلع الي بفمه علقت بحلقه طلعت عيونه وبدا يكح وصك التلفون بالغلط باسم بدون تفكيير كثير حتى قبل ما يستوعب طلال انه غص طراخ مع ظهره ،، حتى دخل وجه طلال بصحه .
طلال لف ع باسم : هاي خير جيت بتذبحني .
باسم وهو ياكل فطيره زعتر : أنت ميت ميت يا غاص يا من ظربتي فقلت تموت بيدي اختصار حتى ما تتعذب وأنت مختنق .
صالح بسرعه : بسام فال الله ولا فالك .
باسم : اي كل شي ولا طلول وحنى لنا الله .
طلال : طلول بعينك ي رخمه .
باسم : أنا ارخمه ي جرذي .
سامر : بس ظربوني احسن << وهو فصده يتطنز بالعم صالح الي دايم اذا تهاوشو قال كذا .
طلال وباسم ناظروه وسامر ما أمداه ابتسم الا بكرتون مناديل بوجهه الكل جلس يضحك وهو لسا ما استوعب وناظر بيشوف من تجرأ وظربه الا يشوف عمر يبتسم ويقول : سفت تحسب بس انت الدوي ' شفت تحسب بس أنت القوي )
سامر طير عيونه : يا لسانه ذا الولد ..
طلال رجع يدق جواله رد وجاه صوت اخته مرتاعه : ألوو طلال عسى ماشر شصار ؟؟؟
طلال مبتسم : لا تطمني بس غصيت وجاني طراق طلع هاللقمه والي قبلها ..
لينا براحه : اي الحمد لله اهم شي انت بخير ،، ءءء شكنت بقول ءء اي صح تقول فاطمه أرسلو لي اياد. طلال : قولي لها تبشر . وصكها .
لينا ناظرت السماعه : ع الأقل قل مع السلامه .
فاطمه : هاه شقال بيجيبه ؟؟
لينا : اي بيجيبه ، بس غريبه ليش ما قلتي لمهند يجيبه ؟؟
فاطمه : مهند رايح للصيدليه يجيب حليب لزياد ورائد وحور .
لينا : اها .
طلال قال لاياد يروح لفاطمه والأطفال أفطرو وراحو للبنات حتى يلبسونهم ويروحون مع الرجال .

طلعو العيال وصالح لصلاة الجمعه والبنات جلسو يراجعون حفظهم لهذا اليوم من القران .

"""""""""""""""""""&
التعريف بالشخصيات

البيت ماكان فيه العيال والبنات وبس لا كان فيه أطفال 5 بنات و5 أولاد والي تعتني فيهم هي فاطمه ورجلها مهند بحكم حبهم للأطفال وخبرتهم بحكم تخصصهم رياض أطفال .

فاطمه : عائلتها تعيش ب جده وهي جت لبيت صالح من تزوجت مهند عمرها 24 طييبه وخوافه وصدرها وسييييع < يعني ما تغضب بسرعه .
مهند : لقيط وهو أول من كفله صالح وبحكم وفائه له ما طلع من البيت بعد زواجه بالعكس جاب زوجته تسكن معه عندهم وهو خير مساعد لصالح ويده اليمين عمره 28 سنه يشتغل بالشركه مع صالح .
ساره : لقيطه عمرها 3 سنوات ما عليها من أحد ابددد الي في بالها تسويه والي ما يعجبها تسفهه .
سديم : يتيمه ماتت أمها وهي تالدها عمرها 4 سنوات مؤدبه بمعنا الكلمه ولسانها ينقط عسسل .
لمار : يتيمه توفت أمها العام الماضي عمرها 7 سنوات صار معها مرض أول بالأصح حاله نفسيه تخلي عقلها يبدل أمها الأولى بفاطمه يعنيي مثلا أمها الصدقيه معطيتها دميه هي تحسب ان فاطمه الي معطيتها اياها ونست شكل امها الأصليه نهائيا حبوبه وتساعد الككل .
ميس : لقيطه عمرها 7 سنوات صديقة لمار مرره وهي معها بنفس المدرسه والصف وكل شي نفس بعض كأنهم خوات .
حور : لقيطة عمرها 5 شهور .

عمر : لقيط عمره 4 سنوات مهايطي ويمووت بساره وما يجي يوم الا وتهاوشو هو وسامر .
اياد : يتيم عمره 5 سنوات مناعته ضعيفه وع طوول يتعب حبوب وما يتهاوش مع احد .
عدي : يتيم عمره 9 سنوات غالبا يجلس مع الشباب وتفكيره أكبر من عمره .
زياد : لقيط عمره 11 شهر .
رائد : لقيط عمره 8 شهور .

"""""""""""""""""""""&

بعد صلاة الجمعه
الساعه 12:30

البنات مسوين حلقه ويتلون سورة الكهف
والعيال مسوين حلقه ويتلون سوره الكهف

أما فاطمه ومهند جالسين بغرفة مخصصه للأطفال مسوين حلقة ويرددون سورة الشمس وسارة كل شوي تهج وعمر يشوفها ويلحقها وفاطمه ترجع تجلسهم .

بعد الأجواء الروحانيه دخلو البنات للمطبخ وبدو يخططون وش بيطبخو للغداء
لميس : أنا مشتهيه كشري .
همس : وأنا ابي سلطه سيزر .
ليان : طيب من تبغى تسوي الكشري ؟؟
كلن سكت .
لميس : وين مرييم هي الي تظبطه . ونادت ماريام .
لينا ظربتها : ولسنه اقصريي صوتك العيال يسمعووون .
لميس حطت يدها ع فمها بفشله أول ما سمعت صوت طلال ينادي ع لينا.
راحت لينا لطلال وطلعت فريده ورقت تدور ع مريم وهي جالسه تدور بين الغرف لقت غدير بغرفتها تصيح
" غدير من جت وهي ما تكلم احد اما ساكته ولا تصيح وهم حطو لها غرفه خاصه الين ما تتعود عليهم "
فريده رحمتها ودخلت لمها غدير انتبهت ومسحت دموعها ،، جلست بجانبها فريده : غدير حبيبتي من جينا ما سمعنا صوتك ، ي قلبي تدرين ان الي يكون حزين ويبطي ما يكلم احد يختفي صوته تدريجيا وبعدها يفقد حواسه وبعدها يمكن ما يمشي وشوي شوي تبدى الأعصاب تتلف ويصيبه تشنج وبعدها يمووت .
غدير شهقت بخوف ورجعت تصيح بقوووه : بابا .
فريده ضمتها : حبيبتي كلنا مثلك بس انتي بنعمه تدرين ليش؟؟
غدير رفعت راسها من حضن فريده بتساؤل .
فريده : ع الأقل انتي عندك اب شفتيه من وقت قريب " وقالت بغصه " أنا ما شفت أمي وأبوي أببد .
وصارت فريده تصيح وغدير تسكتها << كنها انقلبت الايه !!
فريده : وأنتي حلوه وقلبك طيب وكلن يحبك حتا البنات قلقانين عليك أما أما أنا سمينه ولا أحد يحبني والأسوء من هذا كله ان اسمي فريده بسس ودي اعرف فريده بوشو ؟؟؟
غدير : بالعكس فريده انتي حلوه والكل يحبك اصلا ما شاء الله كلكم قلوبكم ع بعض وغير كذا جسمك يهببل .
فريده ناظرتها : الله يسلمك .
وقفت وأعطتها يدها وهي مبتسمه : تعالي معي تحت عند البنات .
غدير بتردد مدت يدها ومشت معها لتحت وقابلو بطريقهم مريم اللي كانت حاطه سلة ملابس كبيييره بلاستيك عند بداية الدرج ،، فريده : يا مجنونه وش تسويين .
مريم تضحك وتأشر لهم : تعالوو . غديير تعالي اركبي .
فريده : لالا تذبحين علينا البنت تراني طفرة بها .
مريم : أقوول غدير تعالي .
غدير تحمست وركبت معها .
مريم فرييده حبيبتي دفيينيي .
فريده بسسررعه دفتهم حتا قبل ما تتوازن وريم .
وصارت السله تنزل بسرعه كبييييره من الدرج الطويييل بحكم انهم نازلين من الدور الثالث ' درجهم كان لولبي ' وكان يصدر صوت مزززعج .
طلعت سعاد من غرفتها خايفه من الصوت بس فجئه سمعت طراخ .
عند مريم وغدير الي لسا ما استوعبو وش صقعو به لقو قدامهم الدولاب مريم فرطت تضحك وغدير ضحكت معها ، نزلت سعاد : أكييد مريم هذي حركاتها 'شافتها وكانت بتهوش بس يوم شافت معها ليان سكتت وعاتبتها بعيونها' ، ومريم للحين تضحك وقامت وليان قامت بعدها وشافو التجمهر الي عند باب المطبخ والبنات طايره عيونهم ليان استحت وخبت نفسها ورا مريم همس : وقلبييي الي يستحون .
غدير احمرت وتوزت ورا مريم زياده " وبحكم طول مريم وقصر غدير قدرت غدير تختفي عن أنظارهم "

عند العيال ،،

الي يتابع التلفزون والي معه جواله وسامر وباسم وطلال وجهاد يلعبون شيش
باسم أشر ع التلفزيون الي يعلنون موت أم بشار والعيال يعلقون سامر مندون لا أحد يحس حرك المكعبات حقات اللعبه ع كيفه .
وأول ما رجعو يلعبون وكان دور طلال ناظر باللعبه وهو يفكر سامر : ي رجال بسرعه << يخاف يكشفه
طلال حرك مكعباته ورما الحجر وطلع له 6 6 وحرك مرره ثانيه وفاز سامر معصب وقلب اللعبه : لا ي خي مب عدل حتا بعد ما غشيت اخسر والله مب عدل .
طلال ضحك ويحرك حواجبه : شنسوي الحمير حمير لو يصهلون << صوت الحصان .
العيال يضحكون وسامر عصب : منهوو الحمار هاه .
طلال : الي ع راسه بطحا يتحسسها .
سامر ناظره منقهر وسكت ، شوي الا شاف عمر ورا طلال ويأشر لسامر اششش سامر حرك راسه بعنا طيب قرب عمر وكب كاسه مويه بارده ع طلال وطلال شههق بقووه وصار يرجف بحكم بروده الجو والتفت ع عمر معصصب .
عمر : عثان مله ثانيه تتلم عمك ثامر ذين
طلال : وتبببن بوجهك انت واياه .
عمر بدون تفكير ضرب الكاس بوجه طلال وهج وطلال جا الكاس ع جبهته وانكسر وهو يصرخ : عوومار والله لا أوريك ي بزززررر .' ومسك راسه وهو يتألم '
سامر قام : طلال ورني اشوف يصب دم ولا لا .
طلال انسدح ووخر يده عن جبهته ومكان الظربه ازززرق مايل للأسود قمز سامر يجيب شنطة الإسعافات .
جهاد يضحك : والله ما يقواك الا عمر ههههههههههههههههههههه.
طلال خزه وجهاد سكت نطق باسم وهو الصادق خزه طلال باسم : ولوا وش لك تخسني تحسب اني بخاف تخسي وبهمس 'اخر عمري اخاف من دجاج '
قمز طلال وباسم ما تشوفون الا غبرته وجلسو يضحكون حتى طلال ضحك عليه وجا بسام وعطاه اللصق .
دخلو راشد وسعد معهم أغراض الغداء ..


اعذروني البارتات البدائيه مافيها حماس لأني أبيكم تتعرفون ع شخصية كل واحد ..
اتمنا البارت ينال ع اعجابكم
اي صح لو سمحتو اريد اي احد يكتب تعليق يعطيني نسبه من 100

التوقيع شهد'shahad'

رد: رواية / أرض جمعتنا مابنضيعها بقلم : shahad&quot;شهد&quot;

جميل البارت بس مثل ما قلتي للحين ما بدأت الاحداث المشوقة خلينا نبدا بيها وبعدها اعطيك نسبة
تحياتي لك

رد: رواية / أرض جمعتنا مابنضيعها بقلم : shahad&quot;شهد&quot;

الله يعطيك العافية

رواية / أرض جمعتنا مابنضيعها بقلم : shahad&amp;quot;شهد&amp;quot;

تشرفت فيكم اتمنا ما تقطعون ️️

رد: رواية / أرض جمعتنا مابنضيعها بقلم : shahad&quot;شهد&quot;

البارت بإذن الله بينزل بكره يعني راح أثبت البارت ينزل كل يوم اثنين

رد: رواية / أرض جمعتنا مابنضيعها بقلم : shahad&quot;شهد&quot;

خسارة كنت احسب بتنزلي البارت اليوم بس ما في مشكلة ننتظر لبكره
تحياتي لك

رد: رواية / أرض جمعتنا مابنضيعها بقلم : shahad&quot;شهد&quot;

"البارت الثالث"

يوم الجمعه
الساعه 1:30 ظهرا

أخذو البنات أغراض الغدا وخلصو تظبيطه وراحو يجهزون السفره ع بال ما يزين وريم اخذه غدير تمشيها وتعرفها ع بيتهم وغدير منسجمه معها وبدا ينشرح صدرها ، أما سمر وفريده رايحين ياخذون الملابس حقات العيال حتى يغسلونهم ( البنات كل وحده مسؤوله عن واحد من العيال يعني تغسل ملابسه وتكويهن وكذا الا ليان وغدير ليان كانت مسؤوله عن ملابس الأطفال مع فاطمه وغدير ما بعد بدت تاخذ شغل )

أما عند العيال
راشد وسعد وطلال رايحين للمزرعه يجيبون التمر من المخازن ( يصل بين المزرعه والبيت سيب طوييل وطبعا صالح ما جاب عمال حتى البنات ياخذو راحتهم والعيال مهتمان للمزرعه ويحبونها كثييير كان بالمزرعه مخازن كبيره " زي الثلاجات بس كبيييره يعني كأنها غرف " يحطون فيها التمر والعنب والطماط والليمون والعبري وغيره من الثمار اللي يزعونها ، وعندهم حيوانات أرانب ، سلاحف ، بقر ، غنم ، دجاج ، وغزالتين مع صغيرهن ، وأربع أحصنه .. وبالمزعه فيه مبنين مبنى نساء وبنى رجال وكل مبنى مكون من دور واحد والمباني مثل بعض بالضبط كل مبنا فيه مطبخين ومجلسين وغرفة طعام وغرفتين نوم وأربع دورات مياه ومخزن ) أما باقي العيال فكانو يعلفون الحيوانات " يعطونهن طعامهن "

بعد العمل والتعب اجتمع البنات ع سفرة الغداء والرجال كذلك ..

،،،،،،،،،،،،،،،،،،،،،،،،،،

من جهه ثانيه

في برلين المانيا
الساعه 11:30

كانت تنقل ملخص المحاظره الي ما حضرتها الأسبوع الماضي ، طق هشام الباب و دخل
هشام : السلام عليكم .
وداد بعد ما تغطت وبصوت هادي : وعليكم السلام .

مشى هشام وهو منزل عيونه لغرفته ، طلعت ترف من الغرفه : وداد جا هشام ؟؟
وداد وعينها ع الدفتر تكتب : يس .
ترف : وعلي ؟؟
وداد : لا ما جىء .
رجعت ترف لغرفتها ولبست عبايتها وخلت معها الطرحه حتى اذا جئ علي تتغطى ،
جلست جمب وداد ساكته .
وداد رفعت غطوتها عن وجهها : ترف وش فيك ؟؟
ترف : لا ما فيني شي ..
وداد : يلله عاد قولي .
ترف بتردد وهي تفرك يدينها : رند ..
وداد بسرعه : شفييها خوفتيني .
ترف : اليوم شفتها مع واحد بالجامعه .
وداد بشهقه : اما .
ترف : والله .
وداد : والله ما أتوقعت منها ، قلبي اوجعني عليها تلقينها مغصوبه ولا بينهم بحث رند مستحييل تسويها.
ترف بدون اقتناع : يمكن .

انفتح الباب ودخل علي وترف ع طوول تغطت ،.
علي : السلام عليكم .
وداد وترف : وعليكم السلام .
علي : تغديتو ؟؟
وداد : لا مو مشتهين .
علي : أووه بس انا جوعان ، شرايك تسوين لي شي .
وداد رجعت تكتب : مالي خلق .
قامت ترف وبصوت خافت : انا بسويه .
علي وقف واتجه لغرفته : مشكوره .


"""""""""""""""""""""""""""""&
التعريف بالشخصيات

علي : ولد سعاد وصالح عمره 25 رسمي كثيير وثقل صوته رووعه
وداد : اخت علي عمرها 22 تهتم بالدراسه كثيير ودايم محسنه النيه
هشام : يتيم عمره 24 خلووووق اتعب وأنا أقول خلوق مؤدب بدرجه كبييره بشوش وابتسامته هاديه .
ترف : اخت هشام عمرها 22 تقدر الشخص مهما كان تخم تخدم الغير ما تسامح عن الخطأ مهما كان




،،،،،،،،،،،،،،،،،،،،،،،،،،،،،،

بالسعودية

بعد صلاة العصر

كان متمدد ورا الفله على المسطح الأخضر ( ثيل ، حشائش خضراء ، عشب ، ... ) مغمض عيونه ويفكر سمع صوت حبيبة قلبه ، فتح عيونه وشافها تمشي بالتجاهه ، فتح يدينه لها وهي ركضت له وضمته ، شششيييب وو داضمها لصدره ودمعه متمرده نزلت من عينه اليمين ، مسحها بسرعه وهو يسمهعا تقول : عموو ليه انت دالس هنا تتوسح ملابسك ؟؟
جهاد : ي قلبي الحين أقوم ،( وقف وصار يمشي وهي ممسكه يده )،
بعد فتره قالت ساره : عموو ابي الوح مكان مليت .
جهاد حملها : وين تبغين نروح .
ساره وهي تعدد ع أصابعها : بقاله ، وألعاب ، وثوق ...
قاطعها جهاد وهو يضحك : وين وين ؟؟
ساره : ثووق .
جهاد : اذا عرفتي تنطقينها زين وديتك له تطفرين به من الحين نبلش فيك .
وحملها : تعالي اوديك البقاله بعدين الألعاب .
ساره بحماس طفولي : ثثددق ،( وحاوطت يدينها برقبته )، يثث
جهاد ركبها بسيارته الكسز الصغيره وركب ومشو للبقاله .

عند البنات

نريم وغدير راقين بالسطح
وجالسين ع المكيفات ( المكيفات السبلت لازم يصير عندها بالسطح زي الصندوق فيه مروحه وكذا ، ي رب انكم فهمتو ) ويسولفون ومنسجمين وغدير بدت تتعود عليهم ومريم فاله امها معها شوي الا ويسمعون صوت نزلو بخفيف حتا ما يصدرو صوت لقو الباب حق الأولاد ينفتح ودخل سامر وباسم ناظرو الباب حقهم انصك وبطبيعه بيبان السطوح ما تنفتح الا من داخل ، سامر وباسم بدو يتمشون وغدير ومريم صارو يمشون ع ركبهم يحاولون يبعدون عنهم ،.
سامر : ي رجال أنا قايلك من قبل والله ما منه نففع .
باسم بهم :بس وش عقبه خلاص تورطت .
سامر : ي رجال ما تدري يمكن انها خيره .
باسم : انا خايف يدري طلال خبرك اخر مره وش سوا فيني .
سامر : اقول بس فلها وربك يحلها والله ما يلبق عليك الهم .
باسم : هي والله مب وقتك انا وين وانت ويين ؟؟

سمعو صوت خترشه ولفو وما لقو شي
مريم تناظر غدير : وشش سويتي ؟؟
غدير بهمس : مدري الظاهرغلاف حلاوه .
غدير لفت بتكمل زحف بس .............



طلع صرصور بوجهها وصرخت : اءءءءءءءءءءءءءءءههه
سامر وباسم ارتاعو ولفو ومشو يدورو ع مكان الصوت .
مريم : لالا لا تجون حنا ما معنا غطاوينا .
باسم : شجابكم هنا ؟؟
مريم : حنا جايين قبلكم بس الباب حق الصطح انصك وما قدرنا نطلع .
غدير وشوي وتبكي : مررييم في شي يمشي ع ظهري .
مريم لفت وشافت ظهرها : ءءءءء غدير لا تخافين بس ءءء فيه خنفسانتين .
غدير : قامت تطامر : ءءءءءءءءءاعععععع يويلي يويلي .
ومريم ماسكه قطعه من كرتون وتظرب بها ظهر غدير ، وسامر وباسم ميتيييييين ظحك عليهم وع أشكالهم ( طبعا الشباب أولل مره يشوفو البنات بغير حجاب )
باسم قلب جدي بتمثيل : ترا الخنفاسنه يقدر يتلبسها جني .!!
غدير ببكى : مرييييم بعدييه .
مريم مرتاعه وما قدرت تسوي شي .
غدير صارت تتنفس بسررعه وانغما عليها . وطاحت وريم مسكتها قبل ما تطيح وشافت الخنافس طايحات وشكلهم من زمان بس مع الروعه ما شافوهن .
مريم تضرب وجه غدير : غديير غدييير .
العيال متصنمين وباسم خايف لأنه هو السبب رمى ع مريم عينه عطر ( علبه بلاستكيك صغيره ) وقال لها شمميها اياه وصد اول ما استوعب وقفتهم وأبعدو بحيث ما يشوفونهم .


عند جهاد
كانت ساره تشتري من كل نوع 10 حبات واذا قال لها جهاد ليش تقول سرر .
ساره شافت طفل ماسك يد ابوه ويقول : بابا بابا ابيي هذا ماما تحبه .
ساره لفت ع جهاد وقالت : تدلي ميس وس تقول ؟؟
جهاد نزل مستواها وببتسامه : وش تقول ؟؟
ساره : تقول حنا ما عندنا ماما وبابا ، ماما فاطمه مب أمنا .
جهاد المه قلبه مع انه عارف انها مي فاهمه شلون يعني ام وابو : ها سارونه انتي ليش أخذتي من كل نوع كذا " وأشر بيده علامة العشره "
ساره ببرائه صارت تعد بأصابعها : هنا ميس وهنا عمر وهنا عدي وهنا ...
جهاد قاطعها : الله كللهم .
ساره : اي انا احبهم .
جهاد : خلاص يلله تعالي ناخذ زياده لهم

وبعدها حاسبو ووداها تلعب بالألعاب اليين تعبت .
ركبو بالسياره جهاد : ها سارونه استانستي .
ساره وهي توسع يدينها : كثيييييل .
جهاد ' والله ما ادري كيف يصير لك قلب وتتركها كذا !!!'


عند البنات بالسطح
اذن المغرب وليان فزت وصارت تصرخ بقووه
ومريم وسامر وبسام خايفيين .
باسم : انتبهي لا يصير فيها شيي .
سامر : ي غبي انت تعرف ان الرسول صلى الله عليه وسلم نهانا نطلع هالوقت لأنه وقت خروج الشياطين وزياده ع ذلك أنت ذكرتهم وانت تعرف إنهم عند ذكرهم يحضروون .
غدير زاد صراخها و باسم صار يععررق من الخوف ويحس انه المسؤول ، قال بسررعه : بروح أقول لأبوي .
ونززل بسررعه وسامر دق ع قسم النساء وطلب منهم عباءة مريم وليان وطلب منهم ما يخبرون سعاد بشي .
جابت سمر عباياتهم وهي لابسه عبايتها لبست ليان الي بدت تتشنج ،،



معلييش ادري تأخرت بس هذا الأسبوع كلله اختبارات ،،
اتمنى البارت يعجبكم
التوقيع : شهد 'shahad'

رد: رواية / أرض جمعتنا مابنضيعها بقلم : shahad&quot;شهد&quot;

السلام عليكم
جمييييييييل البارت متحمسة للبارت الرابع
تحياتي لك

رد: رواية / أرض جمعتنا مابنضيعها بقلم : shahad&quot;شهد&quot;

انتي الأجمل
سعيده بمرورك
وأتمنا البارت الرابع يكون عند حسن ظنك

رد: رواية / أرض جمعتنا مابنضيعها بقلم : shahad&quot;شهد&quot;

السلام عليكم
انا انتظر البارت بفارغ الصبر فلا تتأخري