تويت
قصيدة بعنوان / مزامنة الفكر والقلم ..
{ صوت }
مليت من صبري ومن هم الأيام
وامسيت بين الخلق حاله فريده
الفجر مثل الليل من عدة اعوام
حتى القلم ما عاد سجل جديده
واليوم (عيد هاجسي عقب ماصام)
واسرج خيال الفكر وغنى شريده
اكتب حروف مابها عشق واهيام
شعر قفار من المعاني المفيده
دارت بي الدنيا وما شي لي دام
جور الزمن والظلم بيح رصيده
حاولت أزامن بين فكري والاقلام
ميرالفكر عاجز فنظم القصيده
يا (نايف) ابن العم يانسل الاكرام
شبل البقوم ومحتمين العقيده
افعالهم بالطيب من فوق الاعلام
ماضي وحاضر والطبوع الحميده
الحال يا نايف قضى والعقل هام
ولوعات قلبي سببت لي وقيده
لو بحسب اللي فات عجزن الارقام
ولو بحسبه بالحرف تصبح مكيده
اهل الردى سبة عذابي والاقزام
اهل النميمه والحكي والفسيده
تمشي بزور العلم وتحث الاقدام
والوقت يا نايف لهم باسط إيده
وامسيت انا ياخوك للهم مرسام
وضاق الفضا والصبر همي يزيده
اعانق انجوم السماء وسط الاحلام
واحزن على حالي ليالي عديده
هذي علوم الحال ما هي بالاوهام
والا هي طواري نوم واحلام سعيده
ان كان عندك راي فالحال منضام
والا ترا ( المجنون ) حاله فريده
بقلمي
فواز خالد
١٤٣٤/٦/١٥ه
@@@
{ صدى }
صدى لقصيدة اخوي فواز بن خالد
( مزامنة الفكر والقلم)
البحر هايج والسفن كنها اعلام
وبين المراكب هالسفينه فريده
يابحر سرك خافي جوفك افلام
اعقول بعض الناس صعب تفيده
لولا الملامه جيتك إليال وأيام
ابحث عن المكنون خوف المكيده
يافخر ربعي عزوتي شيخ مقدام
فواز بن خالد لجنبي عضيده
الشاعر اللي لعبته حبر واقلام
واحلى القوافي من بحوره وليده
ياصاحبي دامك على الحق مادام
لاتلتفت لأهل العلوم الفسيده
اهل النميمه حامله راية العام
اعلومهم تشبه حكاوي الجريده
اللي سواتك في زمانه ماينضام
حنكه وفطنه والمزايا العديده
فواز يابن العم يانسل ضرغام
انا خويك فالليالي العتيده
مادام خيلك مسرجه وفيدك الجام
ولو هي جموح جت على ما تريده
يا فارس الميدان صاحبك ما نام
يوم الرساله دندنت في بريده
الكوكب اللي نازل وسط الاجرام
هو منيتي حالي بدونه فقيده
هذا خفوقي صار ياصاح مضرام
كنه حطب والعشق يلهب وقيده
ترى الهوى بلسم يزيل الاسقام
وانته على ما قيل ( فن تجيده )
هن سبب لجروحنا طول الاعوام
وبعشقهن طب السقوم الشديده
ويابحر هايج والسفن كنها اعلام
عشقي سفينه في مراسي بعيده
نايف البقمي
/ 19/6/1434ه
تم الإرسال بواسطة iPhone بإستخدام منتدى عبير
تعليق